ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမ့ၤ ၃-၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၂၇-၂၉
“ကွၢ်လိမၤဒိး ယဟိဝၤယွၤလၢ အတကွၢ်ဒိၣ်ဆံးအါစှၤတၢ်”
တၢး၁၃ ၆/၁၅ ၁၀ ¶၁၄
ပာ်လုၢ်ပာ်ပှ့ၤ ယဟိဝၤယွၤ အတၢ်ဂ့ၤတၢ်ဝါတဖၣ်
၁၄ ပှၤဒီပုၢ်ဝဲၢ်မုၣ်ယဲၢ်ဂၤအံၤ လဲၤဆူစီၤမိၤၡ့အအိၣ် ဒီးသံကွၢ်ဝဲလၢ “မ့ၢ်ပပၢ်အဖိခွါတအိၣ်ဘၣ်ဒီးအမံၤကဘၣ် တြူာ်ကွံာ်အီၤလၢ အပှၤဒူၣ်ဖိအကျါန့ၣ် မ့ၢ်အဘၣ်မနုၤလဲၣ်.” အဝဲသ့ၣ် ဃ့ဝံသးစူၤဝဲလၢ “ဟ့ၣ်လီၤပှၤလၢ တၢ်န့ၢ်သါလၢ ပဒီပုၢ်ဝဲၢ်အကျါန့ၣ်တက့ၢ်.” စီၤမိၤၡ့စံးဆၢက့ၤအဝဲသ့ၣ်လၢ တၢ်မၤလိာ်အိၣ်ဒ်အံၤလီၤ. ယမၤတသ့နီတမံၤဘၣ်န့ၣ်ဧါ. တတဲဝဲဒ်န့ၣ်ဘၣ်. စီၤမိၤၡ့ “ဟဲစိာ်အဝဲသ့ၣ်အမူးဆူယွၤအမဲာ်ညါ” လီၤ. (၄ မိၤ. ၂၇:၂-၅) ယဟိဝၤယွၤ တဲဝဲဒ်လဲၣ်. ယဟိဝၤယွၤ တဲစီၤမိၤၡ့လၢ “စီၤစလၤဖဃးအဖိမုၣ်သ့ၣ်တဖၣ်န့ၣ် ကတိၤတၢ်မ့ၢ်အတီလီၤ. နဘၣ်ဟ့ၣ်လီၤအီၤလၢတၢ်န့ၢ်သါလၢ အပၢ်အဒီပုၢ်ဝဲၢ်အကျါန့ၣ်သပှၢ်တၢၢ်, ဒီးနဘၣ်ဒုးန့ၢ်ဘၣ်အီၤလၢအပၢ်အတၢ်န့ၢ်သါန့ၣ်လီၤ.” ယဟိဝၤယွၤ မၤဝဲအါန့ၢ်အန့ၣ်ဒံးလီၤ. ယဟိဝၤယွၤ တဲဘၣ်စီၤမိၤၡ့လၢ ကကွဲးလီၤဝဲ တၢ်မၤလိာ်အံၤလီၤ. “ပှၤမ့ၢ်သံဒီးအဖိခွါမ့ၢ်တအိၣ်ဘၣ်ဒီး, သုဘၣ်ဒုးန့ၢ်ဘၣ်အတၢ်န့ၢ်သါလၢအဖိမုၣ်လီၤ.” (၄ မိၤ. ၂၇:၆-၈; ၡူ. ၁၇:၁-၆) စးထီၣ်ဖဲန့ၣ်န့ၣ် ပိာ်မုၣ်လၢအထံၣ်ဘၣ် တၢ်ကီတၢ်ခဲဒ်သိးန့ၣ်တဖၣ်န့ၣ် ဒိးန့ၢ်ဘၣ်ဝဲတၢ်န့ၢ်သါလီၤ.
တၢး၁၃ ၆/၁၅ ၁၁ ¶၁၅
ပာ်လုၢ်ပာ်ပှ့ၤ ယဟိဝၤယွၤ အတၢ်ဂ့ၤတၢ်ဝါတဖၣ်
၁၅ မ့ၢ်တၢ်ဆၢတဲာ်လၢ တအိၣ်ဒီးတၢ်ကွၢ်ဒိၣ်ဆံးအါစှၤတၢ်ဘၣ်လီၤ. ယဟိဝၤယွၤန့ၣ် ရ့ဒီးပိာ်မုၣ်လၢ အလိၣ်ဘၣ်တၢ်မၤစၢၤတဖၣ်အံၤ တီတီလိၤလိၤ ဒီးလၢတၢ်ပာ်ကဲအပူၤ ဒ်အရ့ဒီး ပှၤအံၣ်စရ့လးဖိအဂၤတဖၣ်အသိးလီၤ. (စံး. ၆၈:၅) တၢ်မၤအသးအံၤ ပာ်ဖျါထီၣ်ဝဲ တၢ်မၤအသးလၢ လံာ်စီဆှံပူၤတဖၣ် အကျါတခါ လၢဘၣ်ဃးဒီး ယဟိဝၤယွၤန့ၣ် ရ့ဒီးအခ့အပှၤတဖၣ် တီတီလိၤလိၤ ဒီးတကွၢ်ဒိၣ်ဆံးအါစှၤတၢ်ဘၣ်လီၤ.—၁ မူၤ. ၁၆:၁-၁၃; မၤတၢ်. ၁၀:၃၀-၃၅, ၄၄-၄၈.
တၢး၁၃ ၆/၁၅ ၁၁ ¶၁၆
ပာ်လုၢ်ပာ်ပှ့ၤ ယဟိဝၤယွၤ အတၢ်ဂ့ၤတၢ်ဝါတဖၣ်
၁၆ ပကွၢ်လိမၤဒိး ယဟိဝၤယွၤလၢ တကွၢ်ဒိၣ်ဆံးအါစှၤတၢ်ဘၣ်န့ၣ် ကသ့ဒ်လဲၣ်. သ့ၣ်နီၣ်ထီၣ်လၢ နကဘၣ်နာ်လၢ ပှၤကိးဂၤဒဲးန့ၣ် ကြၢးဘၣ်တၢ်ရ့အီၤ တီတီလိၤလိၤန့ၣ်တက့ၢ်. နမ့ၢ်နာ်ဒ်န့ၣ်န့ၣ် တမ့ၢ်လၢနကကွၢ်ဒိၣ်ဆံးအါစှၤတၢ်ဘၣ်. နီၢ်နီၢ်န့ၣ်ပဝဲကိးဂၤဒဲး ပဆိကမိၣ်လီၤပသးလၢ ပတၢ်ပာ်သူၣ်ပာ်သးလဲၢ် ဒီးပတကွၢ်ဒိၣ်ဆံးအါစှၤတၢ်ဘၣ်. ဘၣ်ဆၣ် ပကသမံသမိးလီၤက့ၤ ပတၢ်ပာ်သူၣ်ပာ်သး တီတီလိၤလိၤအဂီၢ် တညီထီဘိဘၣ်. အဃိ နမ့ၢ်ပှၤလၢအကွၢ်ဒိၣ်ဆံးအါစှၤတၢ်ဧါ, တမ့ၢ်ဧါန့ၣ် နသ့ၣ်ညါလီၤနသးကသ့ဒ်လဲၣ်. ယ့ၣ်ၡူးမ့ၢ် ပှၤလၢအဒိဂ့ၤတဲာ်ဘၣ်လၢပဂီၢ်လီၤ. ဖဲအဝဲအဲၣ်ဒိးသ့ၣ်ညါဝဲလၢ ဘၣ်ဃးဒီးအီၤန့ၣ် ပှၤတဲဒ်လဲၣ်အခါ အဝဲသံကွၢ်ဝဲ အတံၤသကိးတဖၣ်လၢ “ပှၤကညီဖိခွါန့ၣ် ပှၤတဲဝဲလၢ အမ့ၢ်မတၤတဂၤလဲၣ်.” (မး. ၁၆:၁၃, ၁၄) ဘၣ်ဃးဒီးတၢ်ဂ့ၢ်အံၤန့ၣ် ကွၢ်လိမၤဒိးယ့ၣ်ၡူးတက့ၢ်. ဃုထၢတံၤသကိးတဂၤလၢ ကတဲဘၣ်နၤနဂ့ၢ် တီတီလိၤလိၤ ဒီးသံကွၢ်အီၤလၢ နကွၢ်ယၤန့ၣ် ဖျါလၢယရ့ပှၤဂၤ တီတီလိၤလိၤဧါ. ပှၤအဂၤတဖၣ်န့ၣ် တူၢ်လိာ်ဝဲလၢ ယတမ့ၢ်ပှၤလၢ တကွၢ်ဒိၣ်ဆံးအါစှၤတၢ်ဘၣ်န့ၣ်ဧါ. ဒီးအဝဲမ့ၢ်တဲဆၢက့ၤနၤလၢ နၤန့ၣ်တဘျီတခီၣ် နကွၢ်ဒိၣ်ဆံးအါစှၤ ကလုာ်ဒူၣ်တနီၤ မ့တမ့ၢ် ပှၤကျိၣ်အိၣ်စ့အိၣ် မ့တမ့ၢ် ပှၤကူၣ်ဘၣ်ကူၣ်သ့တဖၣ်န့ၣ် နရ့အီၤဂ့ၤဂ့ၤအါန့ၢ်ဒံးပှၤအဂၤလီၤ. အဝဲမ့ၢ်တဲနၤဒ်န့ၣ်န့ၣ် နကြၢးမၤဒ်လဲၣ်. ဃ့ဘါထုကဖၣ်လၢ ယဟိဝၤယွၤအအိၣ် ဒီးဃ့အီၤလၢကမၤစၢၤနၤဒ်သိး နတၢ်ပာ်သူၣ်ပာ်သးလၢ ပှၤဂၤအဖီခိၣ်ကဆီတလဲအဂီၢ်တက့ၢ်. နမ့ၢ်မၤဒ်န့ၣ်န့ၣ် နကလီၤဂာ်အါထီၣ်ဒီး ယဟိဝၤယွၤ ဒီးတမ့ၢ်လၢ နကကွၢ်ဒိၣ်ဆံးအါစှၤ ပှၤဂၤလၢၤဘၣ်.—မး. ၇:၇; ကလီး. ၃:၁၀, ၁၁.
it-2 ၅၂၈ ¶၅
တၢ်လုၢ်တဖၣ်
တၢ်လုၢ်အီ. လီၤဆီဒၣ်တၢ် ဖဲပှၤအံၣ်စရ့လးဖိတဖၣ် လဲၤတုၤလၢကီၢ်တၢ်စံးပာ်ဝံၤအလီၢ်ခံ ဟ့ၣ်လုၢ်ထီၣ်ဝဲတၢ်လုၢ်အီ ဃုာ်ဒီးတၢ်လုၢ်အဂၤတဖၣ်န့ၣ်လီၤ. (၄ မိၤ. ၁၅:၂, ၅, ၈-၁၀) တၢ်လုၢ်အီန့ၣ် ပၣ်ဃုာ်ဒီးစပံးထံ (“တၢ်ထံလၢအသဟီၣ်ဆူၣ်”) ဒီးဘၣ်တၢ်လူလီၤအီၤလၢ တၢ်လုၢ်လီၢ်အဖီခိၣ်လီၤ. (၄ မိၤ. ၂၈:၇, ၁၄; ထိၣ်သတြီၤဒီး ၂ မိၤ. ၃၀:၉; ၄ မိၤ. ၁၅:၁၀) တၢ်မၢဖိပီလူး ကွဲးဝဲလံာ်ဆူခရံာ်ဖိလၢ အအိၣ်လၢဝ့ၢ်ဖံလံးပံးတဖၣ်အအိၣ်လၢ “တၢ်မ့ၢ်လူလီၤယၤ ဒ်စပံးထံလၢ တၢ်လုၢ်တၢ်ပာ်အဂီၢ်အသိးဒၣ်လဲာ် မ့ၢ်ဒၣ်ယဆီၣ်ထွဲ သုတၢ်လုၢ်ထီၣ် ဒီးသုတၢ်မၤလၢ သုမၤအီၤလၢ ယွၤအဂီၢ် မ့ၢ်လၢသုတၢ်နာ် ထိၣ်ဟူးထိၣ်ဂဲၤထီၣ်သု အဃိလီၤ. လၢတၢ်န့ၣ်အဃိ ယသးခု ဒီးယသူၣ်ဖှံသးညီဃုာ်ဒီး သုဝဲခဲလၢာ်လီၤ.” (ဖံလံး. ၂:၁၇) တချုးလၢ အသံဒံးဘၣ်န့ၣ် အဝဲကွဲးဝဲလံာ်ဆူ စီၤတံၤမသ့းအအိၣ်လၢ “တၢ်လူလီၤယၤ ဒ်စပံးထံလၢ တၢ်လုၢ်တၢ်ပာ်အဂီၢ်အသိးလံ ဒီးတၢ်ဆၢကတီၢ်လၢ ယကထူၣ်ဖျဲးထီၣ်န့ၣ် ဘူးထီၣ်လံ.” —၂ တံၤ. ၄:၆.
လါမ့ၤ ၁၀-၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၃၀-၃၁
“မၤလၢပှဲၤနတၢ်အၢၣ်လီၤအီလီၤ”
it-2 ၁၁၆၂
တၢ်ဆိၣ်
တၢ်မၤတၢ်ဆိၣ်လၢအသးဒၣ်ဝဲ, ဘၣ်မၤဝဲဒ်အဆိၣ်တၢ်အသိး. တၢ်ဆိၣ်န့ၣ်ပှၤမၤအီၤလၢပှၤသးဒၣ်ဝဲလီၤ. ဘၣ်ဆၣ်ကစၢ်ယွၤ အတၢ်မၤလိာ်အိၣ်လၢ ပှၤမ့ၢ်မၤတၢ်ဆိၣ်န့ၣ် ပှၤကဘၣ်မၤထွဲဒ် ပှၤဆိၣ်တၢ်အသိးလီၤ. ပှၤမ့ၢ်ဆိၣ်တၢ်န့ၣ် “ကဘၣ်မၤဒ်ကယဲၢ်တၢ်လၢ အထီၣ်ဖျဲးလၢအထးခိၣ်အသိးန့ၣ်လီၤ.” (၄ မိၤ. ၃၀:၂; ကွၢ်စ့ၢ်ကီး ရိ. ၁:၃၁, ၃၂) တၢ်န့ၣ်မ့ၢ် တၢ်ဂ့ၢ်လၢအရ့ဒိၣ်အဃိ လံာ်စီဆှံ ဟ့ၣ်ကူၣ်ပှၤလၢ တချုးလၢပမၤ တၢ်ဆိၣ်ဒံးဘၣ်န့ၣ် ပကဘၣ်ဆိကမိၣ်ထံအီၤလီၤ. တၢ်မၤလိာ်အပူၤ ပာ်ဖျါဝဲလၢ “တုၤနဆိၣ်တၢ်ဆိၣ်လၢ နကမၤဘူၣ်တၢ်လၢယွၤနကစၢ်ဒီး, သုးနံၤသုးသီလၢနကဟ့ၣ်အီၤတဂ့ၤ. အဂ့ၢ်ဒ်အံၤ, ယွၤနကစၢ်ကဃုဝဲလၢနၤသပှၢ်တၢၢ်, ဒီးကကဲထီၣ်တၢ်ဒဲးဘးလၢနလိၤလီၤ.”—၅ မိၤ. ၂၃:၂၁, ၂၂.
တၢး၀၄ ၈/၁ ၂၇ ¶၃
လံာ်စီဆှံ အတၢ်ပာ်ဖျါလၢလံာ် ၄ မိၤၡ့ အဂီၢ်
၃၀:၆-၈—ခရံာ်ဖိပိာ်ခွါတဂၤန့ၣ် မၤဟးဂီၤကွံာ်ဝဲ တၢ်ဆိၣ်လၢအမါမၤဝဲတဖၣ်သ့ဧါ. ဘၣ်ဃးဒီးတၢ်ဆိၣ်တဖၣ်န့ၣ် ယဟိဝၤယွၤ ကၡဲစရီဒီး ပှၤလၢအဘူၣ်ထီၣ်ဘါထီၣ်အီၤ တဂၤစုာ်စုာ်လီၤ. အဒိ တၢ်ဟ့ၣ်လုၢ်ထီၣ်သးဆူ ယဟိဝၤယွၤအအိၣ်န့ၣ် မ့ၢ်ဝဲတၢ်ဆိၣ်လၢ ပှၤနီၢ်ကစၢ်ဒၣ်ဝဲမၤဝဲလီၤ. (ကလၤတံ ၆:၅) တၢ်ဆိၣ်ဒ်သိးအံၤတဖၣ်န့ၣ် ဝၤတဂၤမၤဟးဂီၤဝဲတသ့ဘၣ်. ဘၣ်ဆၣ် မါန့ၣ်တကြၢးမၤဝဲ တၢ်ဆိၣ်လၢအထီဒါလိာ်အသးဒီး ကစၢ်ယွၤအကလုၢ်ကထါ မ့တမ့ၢ် မါအမူဒါန့ၣ်ဘၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၂၈ ¶၁
စီၤယံးဖသၤ
ပှၤဟ့ၣ်လုၢ်ထီၣ်ပှၤကညီလၢ ကမၤတၢ်လၢ ယဟိဝၤယွၤ အဒဲစီဆှံအဂီၢ်သ့ဝဲလီၤ. မိၢ်ပၢ်တဖၣ် အိၣ်ဒီးတၢ်ခွဲးတၢ်ယာ်လၢ ကမၤဝဲဒ်န့ၣ်လီၤ. စီၤၡမူၤအ့လးန့ၣ် ဘၣ်တၢ်ဟ့ၣ်လုၢ်ထီၣ်အီၤဒ်န့ၣ်လီၤ. တချုးလၢ စီၤၡမူၤအ့လး အိၣ်ဖျဲၣ်ထီၣ်ဒံးဘၣ်န့ၣ် အမိၢ်နီၢ်ဃးနၤ ဆိၣ်တၢ်လၢ ကဟ့ၣ်လုၢ်ထီၣ်အီၤလၢ ကမၤယဟိဝၤယွၤ အတၢ်မၤလၢ ဒဲစီဆှံအဂီၢ်လီၤ. စီၤအ့လကါနၤ တူၢ်လိာ်ဝဲ နီၢ်ဃးနၤ အတၢ်ဆိၣ်လီၤ. စီၤၡမူၤအ့လး ဖှၣ်အနုၢ်ဝံၤအလီၢ်ခံ နီၢ်ဃးနၤ လဲၤကိးအီၤဆူ ကစၢ်ယွၤအဟံၣ်လီၤ. လဲၤစိာ်ဝဲ ဆၣ်ဖိကီၢ်ဖိလၢ ကလုၢ်ထီၣ်ဝဲအဂီၢ်စ့ၢ်ကီးလီၤ. (၁ ၡမူၤ. ၁:၁၁, ၂၂-၂၈; ၂:၁၁) စီၤၡံၣ်ၡိၣ် စ့ၢ်ကီးဘၣ်တၢ်ဟ့ၣ်လုၢ်ထီၣ်အီၤလၢ ကမၤကစၢ်ယွၤအတၢ်မၤအဂီၢ် ဒ်ပှၤနစၤရံဖိတဂၤအသိးလီၤ.—စံၣ်ညီၣ်. ၁၃:၂-၅, ၁၁-၁၄; ထိၣ်သတြီၤဒီး ပၢ်တဖၣ်အတၢ်စိတၢ်ကမီၤလၢ အဖိမုၣ်အဖီခိၣ်လၢ ၄ မိၤ. ၃၀:၃-၅, ၁၆.
လါမ့ၤ ၁၇-၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၃၂-၃၃
“ဟီထီၣ်ကွံာ် ပှၤကီၢ်ဖိခဲလၢာ်”
တၢး၁၀ ၈/၁ ၂၃
မ့ၢ်နသ့ၣ်ညါဧါ
လံာ်စီဆှံလၢ ဧ့ၤဘြံၤကျိာ်တကတြူၢ် ပာ်ဖျါထီၣ်ဝဲ “တၢ်အလီၢ်ထီၣ်ထီ” တဖၣ်န့ၣ် အဲၣ်ဒိးတဲဝဲ တၢ်မနုၤလဲၣ်.
ဘူးထီၣ်လၢ ပှၤအံၣ်စရ့လးဖိတဖၣ် ကနုာ်လီၤဆူ ကီၢ်ကနၤဧၣ်ပူၤအခါ ယဟိဝၤယွၤ မၤလိာ်အဝဲသ့ၣ်လၢ ကမၤဟးဂီၤကွံာ်ဝဲ ပှၤကနၤဧၣ်ဖိတဖၣ် အတၢ်ဘူၣ်ထီၣ်ဘါထီၣ်အလီၢ်ခဲလၢာ်လီၤ. ကစၢ်ယွၤတဲဘၣ်အဝဲသ့ၣ်လၢ “သုဘၣ်ဟီထီၣ်ကွံာ် ပှၤကီၢ်ဖိခဲလၢာ်လၢယမဲာ်ညါ, ဒီးမၤဟးဂီၤကွံာ် အတၢ်ဂီၤထူၣ်ကလာ်ခဲလၢာ်, ဒီးမၤဟးဂီၤကွံာ်အတၢ်ဂီၤသိအသးခဲလၢာ်, ဒီးမၤလီၤပှီၢ်ကွံာ်အလီၢ်ထီၣ်ထီတဖၣ်လီၤ.” (၄ မိၤၡ့ ၃၃:၅၂) တၢ်ဘူၣ်တၢ်ဘါကမၣ် အလီၢ်တဖၣ်န့ၣ် အိၣ်လၢ တၢ်စိခိၣ်, သ့ၣ်ထူၣ်အဖီလာ် မ့တမ့ၢ် ဝ့ၢ်ပူၤလီၤ. (၁ စီၤပၤ ၁၄:၂၃; ၂ စီၤပၤ ၁၇:၂၉; ယဃ့းစက့လး ၆:၃) တၢ်လီၢ်ဖဲန့ၣ်သ့ၣ်တဖၣ်န့ၣ် အိၣ်ဒီးတၢ်လုၢ်လီၢ်, လၢၢ်ထူၣ်လၢ တၢ်ဘူၣ်ထီၣ်ဘါထီၣ်အဂီၢ်, တၢ်ဂီၤ ဒီးတၢ်ထူၣ်လၢ ပှၤလုၢ်ထီၣ်တၢ်နၢမူအဂီၢ် ဒီးတၢ်ပီးတၢ်လီအဂၤလၢ အဘၣ်ထွဲဒီး တၢ်ဘူၣ်ထီၣ်ဘါထီၣ်လီၤ.
တၢး၀၈ ၂/၁၅ ၂၇ ¶၅-၆
ဟံးန့ၢ်တၢ်မၤလိလၢ ပှၤအံၣ်စရ့လးဖိတဖၣ် မၤကမၣ်တၢ်
မုၢ်မဆါတနံၤအံၤ ပထံၣ်ဘၣ် တၢ်လ့ပစီတဖၣ် ဒ်ပှၤအံၣ်စရ့လးဖိတဖၣ် ထံၣ်ဘၣ်ဝဲအသိးလီၤ. စိၤခဲအံၤ တၢ်ဘါတၢ်ဂီၤတၢ်ဖှီၣ်န့ၣ် အိၣ်ဝဲလၢ ကျဲအကလုာ်ကလုာ်လီၤ. တၢ်သ့ၣ်တဖၣ်န့ၣ်အကျါ ပၣ်ဃုာ်ဒီး ကျိၣ်စ့, တၢ်မၤမုာ်မၤဖှံသး, ပှၤလိၣ်ကွဲလၢ အမံၤဟူသၣ်ဖျါ, ထံဂ့ၢ်ကီၤဂ့ၢ်, တၢ်ဘူၣ်တၢ်ဘါခိၣ်နၢ်တဖၣ် ဒီးပဟံၣ်ဖိဃီဖိတဖၣ်ဒၣ်လဲာ်လီၤ. တၢ်သ့ၣ်တဖၣ်န့ၣ် ကဲထီၣ်တၢ်အရ့ဒိၣ်ကတၢၢ်လၢပဂီၢ်သ့လီၤ. ပမ့ၢ်ရ့ဒီး ပှၤလၢတအဲၣ် ယဟိဝၤယွၤတဖၣ်န့ၣ် ကမၤဘၣ်ဒိ ပတၢ်ရ့လိာ်သဒီး ယဟိဝၤယွၤလီၤ.
တၢ်မံဃုာ်အိၣ်ဃုာ်လၢ တဖိးသဲစးန့ၣ် မ့ၢ်တၢ်အရ့ဒိၣ်လၢ တၢ်ဘူၣ်ထီၣ်ဘါထီၣ် ဘဧၤလးအဂီၢ် ဒီးကဲထီၣ် တၢ်လ့ပစီလၢ ပှၤအံၣ်စရ့လးဖိတဖၣ်အဂီၢ်လီၤ. ဆၢကတီၢ်ခဲအံၤ တၢ်သ့ၣ်တဖၣ်အံၤ ကဲထီၣ်တၢ်လ့ပစီလၢ ကစၢ်ယွၤအပှၤဂီၢ်မုၢ်အဂီၢ်စ့ၢ်ကီးလီၤ. အဒိ ပှၤလၢအဲၣ်ဒိး ဃုသ့ၣ်ညါတၢ်တဂၤ မ့တမ့ၢ် ပှၤလၢတအိၣ်ဒီး တၢ်ပလီၢ်သူၣ်ပလီၢ်သးတဂၤန့ၣ် မ့ၢ်ဆီၣ်လီၤဝဲ ခီၣ်ဖၠူထၢၣ်ထဲတဘီန့ၣ် ကွၢ်ဘၣ်ဝဲ တၢ်လၢအမၤဘၣ်ဒိ အသးလၢအသ့ၣ်ညါဒၣ်တၢ်သ့ဝဲန့ၣ်လီၤ. ခရံာ်ဖိတဂၤ မ့ၢ်ဘၣ်တၢ်လ့ပစီလၢ ကကွၢ်တၢ်ဂီၤဘ့ၣ်ဆ့လၢ အ့ထၢၣ်နဲးအပူၤန့ၣ် ကလီၤသးအုးဒိၣ်မးလီၤ.
it-1 ၄၀၄ ¶၂
ကနၤဧၣ်
ဒ်သိးကမၤဟးဂီၤဝဲ ပှၤကနၤဧၣ်ဖိတဖၣ်အဂီၢ် စီၤယိၤၡူ မၤဝဲဒ် “တၢ်လၢယွၤမၤလိာ်စီၤမိၤၡ့ခဲလၢာ်” ဒီး “တပာ်လီၤတဲာ်ဘၣ်နီတမံၤဘၣ်.” (ၡူ. ၁၁:၁၅) ဘၣ်ဆၣ် ပှၤအံၣ်စရ့လးဖိတဖၣ် တမၤသံဝဲ ပှၤကနၤဧၣ်ဖိခဲလၢာ် ဒ်စီၤယိၤၡူ မၤဝဲအသိးဘၣ်. လၢတၢ်န့ၣ်အဃိ ဒ်တၢ်ဆၢကတီၢ်လဲၤပူၤကွံာ်အသိး ပှၤအံၣ်စရ့လးဖိတဖၣ် တတီဒီးကစၢ်ယွၤလၢၤဘၣ်. ဒီးအဝဲသ့ၣ်အါတက့ၢ်န့ၣ် ဘၣ်သံဝဲလီၤ. (အဝဲသ့ၣ်မၤဝဲ တၢ်အၢတၢ်သီ, တၢ်မၤကမၣ်မုၣ်ကမၣ်ခွါ, ဒီးဘါတၢ်ဂီၤတၢ်ဖှီၣ်) အဝဲသ့ၣ် မ့ၢ်မၤဟးဂီၤကွံာ်ဝဲ ပှၤကနၤဧၣ်ဖိ ခဲလၢာ်န့ၣ် တမ့ၢ်လၢကထံၣ်ဘၣ် တၢ်နးတၢ်ဖှီၣ်တဖၣ်န့ၣ်ဘၣ်. (၄ မိၤ. ၃၃:၅၅, ၅၆; စံၣ်ညီၣ်. ၂:၁-၃, ၁၁-၂၃; စံး. ၁၀၆:၃၄-၄၃) မ့ၢ်လၢယဟိဝၤယွၤ တဲဆိပာ် ပှၤအံၣ်စရ့လးဖိတဖၣ်လၢ မ့ၢ်ဆီဟံၣ်ဆီဃီဒီး ပှၤကနၤဧၣ်ဖိ, မ့ၢ်ဘူၣ်ထီၣ်ဘါထီၣ် အဝဲသ့ၣ်အယွၤ, မ့ၢ်လူၤပိာ်ထွဲအလုၢ်အလၢ် ဒီးမ့ၢ်မၤဝဲ တၢ်လၢအလီၤသးဘၣ်အၢတဖၣ်န့ၣ် ကဘၣ်တၢ်မၤဟးဂီၤကွံာ်အီၤတဘျီဃီလီၤ. လၢတၢ်န့ၣ်အဃိ ယဟိဝၤယွၤန့ၣ် တီဝဲလိၤဝဲ ဒီးအတၢ်စံၣ်ညီၣ်တဖၣ်န့ၣ်ဘၣ်ဝဲလီၤ—၂ မိၤ. ၂၃:၃၂, ၃၃; ၃၄:၁၂-၁၇; ၃ မိၤ. ၁၈:၂၆-၃၀; ၅ မိၤ. ၇:၂-၅, ၂၅, ၂၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၃၅၉ ¶၂
ထံဆၢကီၢ်ဆၢ
တၢ်ဖးလီၤန့ၢ်ဝဲ ကလုာ်ဒူၣ်တဒူၣ်စုာ်စုာ်အဂီၢ် တၢ်လီၢ်တၢ်ကျဲဝံၤအလီၢ်ခံ အဝဲသ့ၣ် ဆဲးမၤကဒီးဝဲ လၢခံတဆီလီၤ. အဝဲသ့ၣ် သန့ၤထီၣ်ဝဲလၢ တၢ်လီၢ်အလဲၢ်အထီ ဒီးနီၤလီၤဝဲ ပှဲၤသိးသိးလီၤ. “ဖးတၢ်သတးဒီး, သုဘၣ်နီၤဖးထံဧိၤကီၢ်ဧိၤအဆၢလၢ တၢ်န့ၢ်သါလၢ သုဒူၣ်တဖၣ်အဂီၢ်လီၤ. လၢပှၤအါတက့ၢ် တဖၣ်န့ၣ် သုဘၣ်ဟ့ၣ်အီၤလၢ တၢ်န့ၢ်သါတၢ်လၢအအါ, ဒီးပှၤလၢအစှၤတက့ၢ်တဖၣ်န့ၣ် သုဘၣ်ဟ့ၣ်အီၤလၢ တၢ်န့ၢ်သါတၢ်လၢအစှၤလီၤ. ပှၤဘၣ်အိၣ်လၢအလီၢ်, ဖဲအဂီၢ်လီၤဘၣ်လၢဖးတၢ်လီၤ. ဒ်သုပၢ်အဒူၣ်တဖၣ်အသိးန့ၣ်, သုကန့ၢ်ဘၣ်သါတၢ်လီၤ.” (၄ မိၤ. ၃၃:၅၄) အဝဲသ့ၣ် ဖးဒီးဆၢတဲာ်ဝဲ ဟီၣ်ခိၣ်လီၢ်ဝံၤသနာ်က့ မ့ၢ်အဲၣ်ဒိးမၤဝဲတၢ်ဆီတလဲန့ၣ် မၤဝဲသ့လီၤ. လၢတၢ်န့ၣ်အဃိ တၢ်လီၢ်လၢ ယူဒၤအဒူၣ်ဖိထၢဖိတဖၣ် ဒိးန့ၢ်ဘၣ်ဝဲန့ၣ် လဲၢ်တလၢအဃိ ဟ့ၣ်လီၤဝဲ ပှၤစူၤမ့းအိၣ်ဖိတဖၣ် တနီၤလီၤ.—ၡူ. ၁၉:၉.
တၢး၀၉ ၁၀/၁ ၃၀, တၢ်လွံၢ်နၢၣ်
ဘၣ်မနုၤအဃိ ယဟိဝၤယွၤ ဆိၣ်ဂ့ၤဝဲ လၢပျၢၤပှၤအံၣ်စရ့လးဖိတဖၣ်အတၢ်ဒုးလဲၣ်
တချုးလၢ ခရံာ်ဖိတၢ်ဘူၣ်တၢ်ဘါအိၣ်ထီၣ်ဒံးဘၣ် ပူၤကွံာ်အနံၣ်လၢ အကယၤတဖၣ်န့ၣ် ကစၢ်ယွၤဟ့ၣ်အခွဲးလၢ ထံကီၢ်လၢအဃုထၢထီၣ်ဝဲ လၢအမ့ၢ်ကီၢ်အံၣ်စရ့လးန့ၣ် ကဒုးတၢ်တဘျီတခီၣ်လီၤ. တချုးလၢပှၤအံၣ်စရ့လးဖိတဖၣ် နုာ်လီၤလၢ ကီၢ်ကနၤဧၣ်လၢ ကစၢ်ယွၤအၢၣ်လီၤပာ်စၢၤ စီၤအၤဘြၤဟၣ် အပူၤဒံးဘၣ်န့ၣ် ကစၢ်ယွၤ မၤလိာ်ဝဲ ပှၤအံၣ်စရ့လးဖိတဖၣ်ဒ်အံၤ “တုၤယွၤနကစၢ် ကဒုးလဲၤနုာ်နၤဆူကီၢ်ပူၤ ဖဲနလဲၤမၤန့ၢ်အီၤ, ဒီးဟီထီၣ်ကွံာ် ပှၤအါကလုာ်လၢနမဲာ်ညါ . . . ပှၤနွံကလုာ်ဒိၣ်န့ၢ်ဆူၣ်န့ၢ်နၤတက့ၢ်, ဒီးတုၤယွၤနကစၢ် ကဟ့ၣ်လီၤကွံာ်အီၤလၢနမဲာ်ညါဒီး, နဘၣ်ကျီကွံာ်အီၤ, ဒီးမၤဟးဂီၤကွံာ်အီၤစီဖ့ကလ့ၤလီၤ. အၢၣ်လီၤအီလီၤတၢ်အၢၣ်လီၤအီလီၤဒီးအီၤတဂ့ၤ, ဒီးသးကညီၤအီၤတဂ့ၤ.” (၅ မိၤၡ ၇:၁, ၂) လၢတၢ်န့ၣ်အဃိ ပှၤအံၣ်စရ့လးဖိအသုခိၣ်ဖးဒိၣ် စီၤယိၤၡူန့ၣ် မၤဝဲ “ဒ်ယွၤအံၣ်စရ့လး အကစၢ်မၤလိာ်ဝဲအသိးန့ၣ်လီၤ.” အဝဲသ့ၣ် မၤနၢၤဝဲ အဒုၣ်အဒါတဖၣ်အထံကီၢ်အါမးလီၤ.
ပှၤအံၣ်စရ့လးဖိတဖၣ် မၤနၢၤဝဲအဒုၣ်အဒါတဖၣ် အထံကီၢ်အါမးအဃိ အဲၣ်ဒိးတဲဝဲ အဝဲသ့ၣ်တဖၣ်န့ၣ် တအိၣ်ဒီးတၢ်သးကညီၤဘၣ်န့ၣ်ဧါ. တမ့ၢ်ဒ်န့ၣ်ဘၣ်. လၢထံကီၢ်တဖၣ်န့ၣ်အပူၤန့ၣ် အိၣ်ပှဲၤဒီး တၢ်ဘူၣ်တၢ်ဘါအကမၣ်တဖၣ်, တၢ်မၤဆူၣ်မၤစိး ဒီးတၢ်မၤကမၣ်မုၣ်မၤကမၣ်ခွါတဖၣ်လီၤ. တကးဒံးဘၣ် အဝဲသ့ၣ် လုၢ်ထီၣ်ဖိသၣ်တဖၣ်လၢ တၢ်လုၢ်မ့ၣ်အူအဖီအခိၣ်လီၤ. (၄ မိၤ. ၃၃:၅၂; ယံး. ၇:၃၁) ကစၢ်ယွၤ အတၢ်စီတၢ်ဆှံ, အတၢ်တီတၢ်လိၤ ဒီးအတၢ်အဲၣ်အပှၤကလုာ်န့ၣ် ထိၣ်ဟူးထိၣ်ဂဲၤထီၣ်အီၤလၢ ကမၤဟးဂီၤကွံာ် တၢ်တကဆှီဘၣ်ခဲလၢာ်လၢအအိၣ်လၢ ကီၢ်ကနၤဧၣ်အပူၤန့ၣ်လီၤ. ဘၣ်ဆၣ် ယဟိဝၤယွၤန့ၣ် သမံသမိးဝဲ ပှၤတဂၤစုာ်စုာ်အတၢ်ပာ်သူၣ်ပာ်သး ဒီးအဝဲမ့ၢ်ထံၣ်ဝဲ ပှၤလၢအပာ်တ့ၢ် တၢ်အၢတၢ်သီအကျဲ ဒီးအဲၣ်ဒိးဘူၣ်ထီၣ်ဘါထီၣ်အီၤတဖၣ်န့ၣ် အဝဲမၤပူၤဖျဲးဝဲလီၤ. မုၢ်မဆါတနံၤအံၤ သုးခိၣ်သုးနၢ်တဖၣ် မၤဝဲဒ်သိးန့ၣ်တသ့ဘၣ်.
လါမ့ၤ ၂၄-၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၃၄-၃၆
“ယဟိဝၤယွၤမ့ၢ် တၢ်ပူၤဖျဲးအလီၢ်”
မ့ၢ်နသန့ၤနသးလၢ ယဟိဝၤယွၤဧါ
၄ ဘၣ်ဆၣ် ပှၤအံၣ်စရ့လးဖိတဂၤ မ့ၢ်မၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤတခီမီၤ. အဝဲမၤသံဘၣ်ပှၤလၢ တၢ်တပာ်သူၣ်ပာ်သးအပူၤ သနာ်က့ မ့ၢ်လၢအမၤသံဘၣ် ပှၤလၢအတၢ်ကမၣ်တအိၣ်ဘၣ်အဃိ အဝဲအိၣ်ဒီးတၢ်ကမၣ်န့ၣ်လီၤ. (၁ မိၤၡ ၉:၅) ဘၣ်ဆၣ်အဝဲဒိးန့ၢ်ဘၣ် ယဟိဝၤယွၤ အတၢ်သးကညီၤသ့ဝဲလီၤ. ဒ်သိးပှၤမၤကၣ်တၢ်သွံၣ်အကစၢ်တဂၤ သုတမၤသံဘၣ်အီၤတဂ့ၤအဂီၢ် အဝဲကဘၣ်ဃ့ၢ်ပူၤဖျဲးအသးဆူ တၢ်ပူၤဖျဲးအဝ့ၢ် ဃုဖျၢၣ်အကျါတဖျၢၣ်လီၤ. ဖဲအဝဲလဲၤနုာ်လီၤလၢ ဝ့ၢ်ပူၤအခါတလိၣ်ဘၣ်ယိၣ်တၢ်လၢၤဘၣ်. ဘၣ်ဆၣ် အဝဲကဘၣ်အိၣ်လၢ တၢ်ပူၤဖျဲးအဝ့ၢ်ပူၤ တုၤလၢပှၤလုၢ်တၢ်အခိၣ်သံတစုလီၤ.—၄ မိၤၡ့ ၃၅:၁၅, ၂၈.
မ့ၢ်နသန့ၤနသးလၢ ယဟိဝၤယွၤဧါ
၆ ပှၤအံၣ်စရ့လးဖိတဂၤ မ့ၢ်မၤသံဘၣ်ပှၤတဂၤလၢ တၢ်တပာ်သူၣ်ပာ်သးအပူၤန့ၣ် အဝဲကဘၣ်လဲၤဃ့ၢ်လၢ တၢ်ပူၤဖျဲးအဝ့ၢ် ဒီးကဘၣ်လဲၤ “ကတိၤတၢ်” မ့တမ့ၢ် လဲၤတဲဘၣ် ဝ့ၢ်အပှၤသူၣ်က့သးပှၢ် လၢအတၢ်ဂ့ၢ်တဖၣ်လီၤ. ဒီးပှၤသူၣ်က့သးပှၢ်တဖၣ်န့ၣ် ကဘၣ်တူၢ်လိာ်အီၤလီၤ. (ယိၤၡူ ၂၀:၄) လၢခံပှၤက့ၤဆှၢက့ၤအီၤဆူ ဝ့ၢ်လၢအဝဲသ့ၣ်မၤသံဘၣ်ပှၤဂၤ ဒ်သိးဝ့ၢ်အပှၤသူၣ်က့သးပှၢ်တဖၣ် ကသမံသမိးအတၢ်ဂ့ၢ်အဂီၢ်လီၤ. (ဖး ၄ မိၤၡ့ ၃၅:၂၄, ၂၅ တက့ၢ်.) ပှၤသူၣ်က့သးပှၢ်တဖၣ် မ့ၢ်ဆၢတဲာ်ဝဲလၢ အဝဲမၤသံဘၣ်ပှၤလၢ တၢ်တပာ်သူၣ်ပာ်သးအပူၤန့ၣ် အဝဲကဘၣ်တၢ်ဆှၢက့ၤအီၤဆူ တၢ်ပူၤဖျဲးအဝ့ၢ်န့ၣ်လီၤ.
မ့ၢ်နသန့ၤနသးလၢ ယဟိဝၤယွၤဧါ
၁၃ ပှၤလၢအဃ့ၢ်ပူၤဖျဲးအသးတဂၤ မ့ၢ်လဲၤတုၤလၢတၢ်ပူၤဖျဲးအဝ့ၢ်ပူၤန့ၣ် တၢ်ဘၣ်ယိၣ်လၢအဂီၢ်တအိၣ်လၢၤဘၣ်. ယဟိဝၤယွၤတဲဝဲလၢ ဝ့ၢ်တဖၣ်အံၤ– “ကကဲထီၣ်တၢ်ပူၤဖျဲး . . . လၢသုဂီၢ်” လီၤ. (ယိၤၡူ ၂၀:၂, ၃) ဒီးယဟိဝၤယွၤ တစံၣ်ညီၣ်ကဒီးအီၤလၢ အတၢ်ကမၣ်တခါအံၤအဃိလၢၤဘၣ်. တကးဒံးဘၣ် ပှၤမၤကၣ်တၢ်သွံၣ်အကစၢ် လဲၤနုာ်လီၤမၤသံအီၤလၢ ဝ့ၢ်ပူၤတန့ၢ်ဘၣ်. ဖဲအဝဲအိၣ်လၢ တၢ်ပူၤဖျဲးအဝ့ၢ်ပူၤအခါ မ့ၢ်ဒၣ်အအိၣ်လၢ ယဟိဝၤယွၤ အတၢ်ဒီသဒၢအဖီလာ်အဃိ တလိၣ်ဘၣ်ယိၣ်တၢ်လၢၤဘၣ်. တလီၤဂာ်ဒ်ပှၤအိၣ်လၢ ဃိာ်ပူၤဘၣ်. အဝဲဖံးတၢ်မၤတၢ်, မၤစၢၤပှၤဂၤ ဒီးမၤယဟိဝၤယွၤ အတၢ်မၤလၢ တၢ်သဘျ့အပူၤသ့ဝဲလီၤ. တကးဒံးဘၣ် အဝဲအိၣ်ဒီးတၢ်အိၣ်မူလၢ အပှဲၤဒီးတၢ်သူၣ်ခုသးခု ဒီးတၢ်သူၣ်မံသးမုာ်သ့စ့ၢ်ကီးလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၁ ၂/၁၅ ၁၃ ¶၁၃
တၢ်ပှ့ၤက့ၤလၢ အကြၢးဝဲလၢ ပှၤခဲလၢာ်အဂီၢ်
၁၃ ဘၣ်ဆၣ် နီၢ်အံၣ်အုဒီးစီၤအၤဒၣ်န့ၣ် တဒိးန့ၢ်ဘၣ်တၢ်အဘျုးလၢ တၢ်ပှ့ၤက့ၤဘၣ်. လၢစီၤမိၤၡ့ အတၢ်သိၣ်တၢ်သီအပူၤန့ၣ် ပၣ်ဃုာ်ဒီး တၢ်ဟံးစုနဲၣ်ကျဲအံၤလီၤ. “ပှၤမၤသံတၢ်တဂၤန့ၣ် ကဘၣ်တၢ်မၤသံအီၤလီၤ. အဝဲပူၤဖျဲး ဒီးတၢ်စံၣ်ညီၣ်အံၤ ခီဖျိတၢ်ဟ့ၣ်တၢ်အပှ့ၤလၢ ကျိၣ်ဧိၤစ့ဧိၤတသ့ဝဲဘၣ်.” (၄ မိၤ. ၃၅:၃၁, ခ့ခါစှီၤကျိာ်) စီၤအၤဒၣ်န့ၣ် တဘၣ်တၢ်လ့ပစီအီၤဘၣ် အဝဲမၤတၢ်ကမၣ်လၢ အသးဒၣ်ဝဲလီၤ. (၁ တံၤမသ့း ၂:၁၄) လီၤဂာ်လၢ အဝဲမၤသံဝဲအဖိအလံၤတဖၣ်လီၤ. မ့ၢ်လၢအဖိအလံၤတဖၣ် န့ၢ်သါဘၣ်တၢ်တလၢတပှဲၤလၢအအိၣ်ဒီး ဘၣ်သံဝဲအဃိလီၤ. စီၤအၤဒၣ် ကြၢးသံဝဲသပှၢ်တၢၢ်လီၤ. မ့ၢ်လၢအဝဲမ့ၢ်ပှၤလၢအလၢပှဲၤတဂၤသနာ်က့ ဃုထၢဝဲလၢအသးဒၣ်ဝဲ လၢတဒိကနၣ် ကစၢ်ယွၤအကလုၢ်အဃိလီၤ. ယဟိဝၤယွၤ မ့ၢ်သူဝဲတၢ်ပှ့ၤက့ၤလၢ စီၤအၤဒၣ်အဂီၢ်န့ၣ် ကထီဒါလိာ်အသးဒီး အတၢ်သိၣ်တၢ်သီတဖၣ်လီၤ. ခီဖျိလၢအဝဲဟ့ၣ်က့ၤဝဲ တၢ်အပှ့ၤလၢ စီၤအၤဒၣ်အတၢ်ကမၣ်အဂီၢ်အဃိ မၤလီၤမၢ်ကွံာ်ဝဲ တၢ်သံလၢစီၤအၤဒၣ် အဖိအလံၤတဖၣ် ကဘၣ်တူၢ်ဘၣ်ဝဲန့ၣ်လီၤ. (ရိမ့ၤ ၅:၁၆) လီၤဂာ်ဒ် တၢ်ဒဲးဘးအတၢ်စိတၢ်ကမီၤလၢ အမၤဟးဂီၤတၢ်န့ၣ် ဘၣ်တၢ်ဒီၣ်တဲာ်ကွံာ်အီၤလၢ အခီၣ်ထံးန့ၣ်လီၤ. ပှၤလၢအဟ့ၣ်လုၢ်ထီၣ်အသးတဂၤန့ၣ် “လ့ၣ်ကွၢ်တၢ်သံလၢ ပှၤကညီခဲလၢာ်အဂီၢ်” ဒီးဘၣ်တူၢ်ဝဲ စီၤအၤဒၣ်အဖိအလံၤတဖၣ် အတၢ်ဒဲးဘးလီၤ.—ဧ့ၤဘြံၤ ၂:၉; ၂ ကရံၣ်သူး ၅:၂၁; ၁ ပ့းတရူး ၂:၂၄.
လါမ့ၤ ၃၁–လါယူၤ ၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၁-၂
“တၢ်စံၣ်ညီၣ်န့ၣ် ဘၣ်ဃးဒီး ယဟိဝၤယွၤ”
တၢး၉၆ ၃/၁၅ ၂၃ ¶၁
ယဟိဝၤယွၤအဲၣ် တၢ်တီတၢ်လိၤဒီး တၢ်စံၣ်ညီၣ်တီ
တၢ်အိၣ်ဖှိၣ်သးပှၢ်တဖၣ်န့ၣ် ဘၣ်စံၣ်ညီၣ်ဝဲ တၢ်ကမၣ်ဖးဒိၣ်တဖၣ်လီၤ. (၁ ကရံၣ်သူး ၅:၁၂, ၁၃) ဖဲအဝဲသ့ၣ် စံၣ်ညီၣ်တၢ်အခါ ကဘၣ်သ့ၣ်နီၣ်ထီၣ်ဝဲ ကစၢ်ယွၤ အတၢ်စံၣ်ညီၣ်တီ ဒီးတသ့ဖဲအသ့ ကဘၣ်ပာ်ဖျါထီၣ် တၢ်သးကညီၤလီၤ. မ့မ့ၢ်ပှၤလၢ အမၤတၢ်ကမၣ်လၢ တပီၢ်ယၢ်လီၤက့ၤအသးတဖၣ်န့ၣ် အလီၢ်တအိၣ်လၢ အဝဲသ့ၣ် ကဘၣ်ပာ်ဖျါထီၣ် တၢ်သးကညီၤဘၣ်. ဘၣ်ဆၣ် တၢ်အိၣ်ဖှိၣ်သးပှၢ်တဖၣ်န့ၣ် တဟီထီၣ်ကွံာ် ပှၤမၤတၢ်ကမၣ်တဂၤန့ၣ် ခီဖျိလၢ အဲၣ်ဒိးဟ့ၣ်ကၣ်ဝဲအဃိန့ၣ်ဘၣ်. အဝဲသ့ၣ်မုၢ်လၢ်ဝဲလၢ တၢ်ဟီထီၣ်ကွံာ် အတၢ်ရဲၣ်တၢ်ကျဲၤန့ၣ် ကမၤစၢၤဝဲ ပှၤလၢအမၤဘၣ် တၢ်ကမၣ်တဂၤလၢ ကသ့ၣ်ညါလီၤက့ၤအသးအဂီၢ်လီၤ. (ထိၣ်သတြီၤဒီး ယဃ့းစက့လး ၁၈:၂၃.) လၢခရံာ်အတၢ်တီခိၣ်ရိၤမဲ အဖီလာ်န့ၣ် တၢ်အိၣ်ဖှိၣ်သးပှၢ်တဖၣ် မၤတၢ်တီတီလိၤလိၤလီၤ. လီၤဂာ်ဒ်တၢ်အိၣ်သဒၢအလီၢ်လၢ ကလံၤအမဲာ်ညါအသိးလီၤ. (ယၡါယၤ ၃၂:၁, ၂) အဃိ အဝဲသ့ၣ် ကဘၣ်အိၣ်ဒီး တၢ်ထံၣ်လၢအကြၢးအဘၣ် ဒီးတဘၣ်ကွၢ်ဒိၣ်ဆံးအါစှၤတၢ်ဘၣ်.—၅ မိၤၡ့ ၁:၁၆, ၁၇.
တၢး၀၂ ၈/၁ ၉ ¶၄
ဒိးပၢနသးလၢ ကစၢ်ယွၤအတၢ်န့ၢ်စိန့ၢ်ကမီၤအဖီလာ် လၢတၢ်သးတီအပူၤ
၄ ဒ်သိးပှၤကကဲထီၣ် စံၣ်ညီၣ်ကွီၢ်တဂၤအဂီၢ် ထဲဒၣ်အသ့ၣ်ညါဝဲ တၢ်မၤလိာ်တဖၣ်န့ၣ် တလၢပှဲၤဒံးဘၣ်. ပှၤသးပှၢ်တဖၣ်န့ၣ် တလၢတပှဲၤဘၣ်အဃိ အဝဲသ့ၣ်ကဘၣ်ပလီၢ်အသး ဒ်သိးအသုတစံၣ်ညီၣ်ကမၣ်တၢ်, အသုတအဲၣ်လီၤထဲအသး, သုတကွၢ်မဲာ်တၢ် ဒီးသုတသးကွံတၢ်တဂ့ၤအဂီၢ်လီၤ. စီၤမိၤၡ့တဲဘၣ်အဝဲသ့ၣ်လၢ “သုတဘၣ်ကွၢ်မဲာ်တၢ်လၢ တၢ်စံၣ်ညီၣ်အပူၤဘၣ်. သုဘၣ်ကနၣ်ပှၤအဆံးဒ် ပှၤအဒိၣ်အသိးန့ၣ်လီၤ. ဒီးသုတပျံၤပှၤကညီအမဲာ်တဂ့ၤ. အဂ့ၢ်ဒ်အံၤ, တၢ်စံၣ်ညီၣ်န့ၣ်မ့ၢ်ယွၤအတၢ်လီၤ.” မ့ၢ်လီၤ. ပှၤအံၣ်စရ့လးဖိ အပှၤစံၣ်ညီၣ်ကွီၢ်တဖၣ်န့ၣ် ဘၣ်စံၣ်ညီၣ်တၢ်လၢ ယဟိဝၤယွၤအခၢၣ်စးလီၤ. တၢ်မၤအံၤမ့ၢ်ဝဲ တၢ်ခွဲးတၢ်ယာ်ဖးဒိၣ်တခါလီၤ.—၅ မိၤၡ့ ၁:၁၆, ၁၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၃ ၉/၁၅ ၉ ¶၉
ယဟိဝၤယွၤ အတၢ်ဟ့ၣ်ပလီၢ်န့ၣ် ပနာ်န့ၢ်အီၤသ့
၉ ဖဲပှၤအံၣ်စရ့လးဖိတဖၣ် လဲၤတၢ်လၢ ပှၤမုၢ်ကနၢလၢအလီၤပျံၤအပူၤ အနံၣ် ၄၀ အခါ ယဟိဝၤယွၤ ကဒီသဒၢ အဝဲသ့ၣ်ဒ်လဲၣ်န့ၣ် အဝဲသ့ၣ် တသ့ၣ်ညါဆိဝဲ လီၤတံၢ်လီၤဆဲးဘၣ်. ဘၣ်ဆၣ် အဝဲသ့ၣ် မ့ၢ်သန့ၤအသးလၢ ကစၢ်ယွၤ ဒီးမ့ၢ်ဒိကနၣ်ဝဲ အတၢ်ဟံးစုနဲၣ်ကျဲတဖၣ်န့ၣ် ကဒိးန့ၢ်ဘၣ်ဝဲအဘျုးန့ၣ် ကစၢ်ယွၤ ပာ်ဖျါထီၣ်ဝဲလၢ ကျဲအါဘိလီၤ. ယဟိဝၤယွၤ သူဝဲတၢ်အၢၣ်အထူၣ်လၢ မုၢ်ဆါခီ ဒီးမ့ၣ်အူအထူၣ်လၢ မုၢ်နၤခီန့ၣ် မ့ၢ်ဒ်သိး ကဒုးသ့ၣ်နီၣ်ထီၣ်ဝဲ ပှၤအံၣ်စရ့လးဖိတဖၣ်လၢ အဝဲအံးထွဲကွၢ်ထွဲဒီး ဆှၢအဝဲသ့ၣ်လၢ ကျဲလၢအကီအခဲ ဒီတဘိအပူၤလီၤ. (၅ မိၤ. ၁:၁၉; ၂ မိၤ. ၄၀:၃၆-၃၈) ကစၢ်ယွၤ ကတဲာ်ကတီၤန့ၢ် ကယဲၢ်တၢ်လၢအဝဲသ့ၣ် လိၣ်ဘၣ်ဝဲတဖၣ်လီၤ. “အကူအသိးတလီၢ်လံၤဘၣ်, ဒီးအခီၣ်တညိးထီၣ်ဘၣ်. “အတၢ်တလၢတပှဲၤတအိၣ်ဘၣ်.”—ဃ့. ၉:၁၉-၂၁.
တၢး၁၃ ၈/၁၅ ၁၁ ¶၇
ဟးဆှဲးတၢ်တဲဒီးတၢ်ဒိကနၣ် တၢ်ကတိၤလၢ အတဂ့ၤတဖၣ်
၇ ပှၤဂၤအတၢ်ကတိၤလၢ အတဂ့ၤတဖၣ်န့ၣ် မၤလီၤစၢ်ပသးသ့ဝဲလီၤ. (၅ မိၤၡ့ ၁:၂၆-၂၈) ပှၤအံၣ်စရ့လးဖိတဖၣ် ဟးထီၣ်လၢကုၢ်အလီၢ် လၢကီၢ်အဲၤကူပတူးအပူၤသီသီဒံးလီၤ. ယဟိဝၤယွၤ ဒုးဟဲလီၤတၢ်နးတၢ်ဖှီၣ်အခါတဆံလၢ ကီၢ်အဲၤကူပတူးအပူၤ တကးဘၣ် မၤဟးဂီၤကွံာ်ဝဲ စီၤပၤဖၤရိၤ ဒီးအသုးမုၢ်သံၣ်ဘိတဖၣ်လၢ ပီၣ်လဲၣ်ဂီၤအပူၤလီၤ. (၂ မိၤ. ၁၂:၂၉-၃၂, ၅၁; စံး. ၁၃၆:၁၅) ကစၢ်ယွၤအပှၤဂီၢ်မုၢ်န့ၣ် ကတဲာ်ကတီၤအသးလၢ ကနုာ်လီၤလၢ ကီၢ်တၢ်စံးပာ်အပူၤလံ. ဘၣ်ဆၣ် လၢတၢ်ဆၢကတီၢ်လၢ အရ့ဒိၣ်အံၤအတီၢ်ပူၤ ပှၤအံၣ်စရ့လးဖိတဖၣ် ကဒုးကဒ့ၣ်တၢ်လၢ ယဟိဝၤယွၤအလိၤလီၤ. တၢ်မနုၤမၤစှၤလီၤ အဝဲသ့ၣ်အတၢ်နာ်လဲၣ်. မ့ၢ်လၢပှၤလဲၤကွၢ်ဟုၣ်တၢ်အဂၤတဆံန့ၣ် တတဲတၢ်မ့ၢ်တၢ်တီလၢ ဘၣ်ဃးဒီး ကီၢ်တၢ်စံးပာ်အဃိလီၤ. (၄ မိၤ. ၁၄:၁-၄) ခီဖျိလၢတၢ်ဂ့ၢ်အံၤအဃိ ပှၤအံၣ်စရ့လးဖိတဖၣ် တနုာ်လီၤဘၣ်လၢ ကီၢ်လၢအဃံအလၤအပူၤလၢၤဘၣ်. (၅ မိၤ. ၁:၃၄, ၃၅) ပဒိးန့ၢ်ဘၣ်တၢ်မၤလိ မနုၤလဲၣ်. ပန့ၢ်ဘၣ်တၢ်မၤလိလၢ ပှၤဂၤအတၢ်ကတိၤလၢ အတဂ့ၤတဖၣ်န့ၣ် မၤစှၤလီၤပတၢ်နာ်သ့ ဒီးပပာ်ဒ့ၣ်ပာ်ကမၣ်ဘၣ် ယဟိဝၤယွၤ ခီဖျိလၢအတၢ်ရ့လိာ်အသးဒီးပှၤသ့ဝဲလီၤ.
လါယူၤ ၇-၁၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၃-၄
“ယဟိဝၤယွၤ အတၢ်မၤလိာ်တဖၣ်န့ၣ် အိၣ်ဒီးတၢ်ကူၣ်သ့ ဒီးတီဝဲလိၤဝဲ”
it-2 ၁၁၄၀ ¶၅
တၢ်သ့ၣ်ညါနၢ်ပၢၢ်
ပှၤလၢအမၤလိ ကစၢ်ယွၤအကလုၢ်ကထါ ဒီးအတၢ်မၤလိာ်တဖၣ် လၢတၢ်သူၣ်ဆူၣ်သးဆူၣ်အပူၤ ဒီးမၤထွဲဝဲတဖၣ်န့ၣ် အတၢ်နၢ်ပၢၢ်ကအါန့ၢ်ဒံး ပှၤလၢအသိၣ်လိတၢ်တဖၣ် ဒီးအတၢ်သ့ၣ်ညါနၢ်ပၢၢ်ကအါန့ၢ်ဒံး ပှၤသးပှၢ်တဖၣ်လီၤ. (စံး. ၁၁၉:၉၉, ၁၀၀, ၁၃၀; ထိၣ်သတြီၤဒီး လူၤ. ၂:၄၆, ၄၇.) မ့ၢ်လၢကစၢ်ယွၤ အတၢ်ဟံးစုနဲၣ်ကျဲ ဒီးအတၢ်စံၣ်ညီၣ်တဖၣ်န့ၣ် အိၣ်ဒီးတၢ်ကူၣ်သ့ ဒီးတၢ်သ့ၣ်ညါနၢ်ပၢၢ်အဃိလီၤ. အဃိ ဖဲပှၤအံၣ်စရ့လးဖိတဖၣ် မၤထွဲဝဲတၢ်ဟံးစုနဲၣ်ကျဲတဖၣ်လၢ တၢ်သးတီပူၤအခါ ကလုာ်ဒူၣ်လၢအဝဲသ့ၣ် အခိၣ်အဃၢၤတဖၣ်န့ၣ် တဲဝဲလၢ အဝဲသ့ၣ်မ့ၢ် ပှၤတကလုာ်လၢ “အကူၣ်တၢ်သ့ အကူၢ်တၢ်ဘၣ် ဒီးအသူၣ်ဆးအသးဆးလီၤ.” (၅ မိၤ. ၄:၅-၈; စံး. ၁၁၁:၇, ၈, ၁၀; ထိၣ်သတြီၤဒီး ၁ စီၤပၤ. ၂:၃.) ပှၤလၢအိၣ်ဒီး တၢ်သ့ၣ်ညါနၢ်ပၢၢ်တဂၤန့ၣ် တူၢ်လိာ်ဝဲလၢ ကဘၣ်မၤထွဲ ကစၢ်ယွၤ အကလုၢ်ကထါသပှၢ်တၢၢ်လီၤ. ဒ်သိးမၤထွဲဝဲကန့ၢ်အဂီၢ် ဃ့ဝဲတၢ်မၤစၢၤလၢ ကစၢ်ယွၤအအိၣ်လီၤ. (စံး. ၁၁၉:၁၆၉) အဝဲပျဲဝဲလၢ ကစၢ်ယွၤအကလုၢ်ကထါ အဂံၢ်ကစဲၤလီၤလၢအသးပူၤလီၤ. (မး. ၁၃:၁၉-၂၃), ကွဲးလီၤဝဲ ကစၢ်ယွၤအကလုၢ်ကထါလၢ အသးပူၤလီၤ. (ကတိၤ. ၃:၃-၆; ၇:၁-၄), ဒီးသးဟ့ဝဲ “တၢ်ကတိၤကဘျံးကဘျၣ်အကျဲခဲလၢာ်” လီၤ. (စံး. ၁၁၉:၁၀၄). ကစၢ်ယွၤ အဖိခွါစ့ၢ်ကီး ဖဲအအိၣ်လၢ ဟီၣ်ခိၣ်ချၢအခါ ပာ်ဖျါထီၣ်ဝဲ တၢ်သ့ၣ်ညါနၢ်ပၢၢ်လၢ ကျဲဒ်အံၤလီၤ. အဝဲတဃုကျဲလၢ ကဃ့ၢ်ပူၤဖျဲးအသးဘၣ်. ဒ်သိးကစၢ်ယွၤ အကလုၢ်ကထါ ကလၢပှဲၤထီၣ်အဂီၢ် အဝဲသးအိၣ်တူၢ်သံအသးလီၤ.—မး. ၂၆:၅၁-၅၄.
တၢး၉၉ ၁၁/၁ ၂၀ ¶၆-၇
တၢ်သးအိၣ်ဟ့ၣ်တၢ် အါအါဂီၢ်ဂီၢ်
တၢ်လၢနီၢ်ပၤမုၣ် နၢ်ဟူဝဲဒီး ထံၣ်ဝဲတဖၣ်န့ၣ် ဒုးကမၢကမၣ်အီၤ ဒီးလၢတၢ်ဆီၣ်လီၤသးအပူၤ အဝဲတဲဝဲလၢ “ပှၤလၢအဆၢထၢၣ်လၢ နမဲာ်ညါတထံၣ်ဃီ, ပှၤလၢအနၢ်ဟူနတၢ်ကူၣ်သ့န့ၣ် ဘၣ်ဆိၣ်ဂ့ၤဝဲလီၤ. (၁ စီၤပၤ ၁၀:၄-၈) စီၤၡလိၤမိၤအကုၢ်တဖၣ်န့ၣ် ထူးဝဲတီၤဝဲသနာ်က့ အဝဲတတဲဝဲလၢ ပှၤသ့ၣ်တဖၣ်န့ၣ် သးခုဝဲလၢ တၢ်သ့ၣ်တဖၣ်န့ၣ်အဃိဘၣ်. လၢတၢ်န့ၣ်အလီၢ် စီၤၡလိၤမိၤအကုၢ်တဖၣ်န့ၣ် ဒိကနၣ်ဘၣ်ဝဲ အဝဲအတၢ်ကူၣ်ဘၣ်ကူၣ်သ့တဖၣ် ထီဘိသ့အဃိ မ့ၢ်ဝဲတၢ်ဆိၣ်ဂ့ၤလီၤ. ၡဘၤအနီၢ်ပၤမုၣ် မ့ၢ်ဝဲဒိဂ့ၤတဲာ်ဘၣ်လၢ ယဟိဝၤယွၤအခ့အပှၤလၢ စိၤခဲအံၤတဖၣ်အဂီၢ်လီၤ. မ့ၢ်လၢအဝဲသ့ၣ် ဒိးန့ၢ်ဘၣ် တၢ်ကူၣ်သ့လၢ တၢ်ဘၣ်တ့ကစၢ် ဒီးအဖိခွါယ့ၣ်ၡူးအအိၣ်အဃိန့ၣ်လီၤ.
တကးဒံးဘၣ် ပကြၢးပာ်သူၣ်ပာ်သး တၢ်ကတိၤလၢ နီၢ်ပၤမုၣ်ဆဲးတဲဝဲ စီၤၡလိၤမိၤန့ၣ်လီၤ. တဲဝဲလၢ “ယွၤနကစၢ် မ်ဘၣ်တၢ်စံးထီၣ်ပတြၢၤအီၤတက့ၢ်.” (၁ စီၤပၤ ၁၀:၉) ဖျါလၢအဝဲသ့ၣ်ညါဝဲလၢ စီၤၡလိၤမိၤ အတၢ်ကူၣ်ဘၣ်ကူၣ်သ့ ဒီးအတၢ်ထူးတၢ်တီၤတဖၣ်န့ၣ် ဟဲလၢယဟိဝၤယွၤအအိၣ်လီၤ. တၢ်အံၤလီၤပလိာ်လိာ်အသးဒီး ကစၢ်ယွၤအတၢ်မၤလိာ်လၢ အဟ့ၣ်တ့ၢ်ဝဲ ပှၤအံၣ်စရ့လးဖိလၢညါတဖၣ်န့ၣ်လီၤ. ယဟိဝၤယွၤတဲဘၣ် အဝဲသ့ၣ်လၢ ‘တိၢ်န့ၢ်ယတၢ်မၤလိာ်’ တက့ၢ်. “အဝဲန့ၣ်မ့ၢ်သုတၢ်ကူၣ်သ့ကူၣ်ဘၣ်, ဒီးသုသူၣ်ဆးသးဆးလၢပှၤကလုာ်တဖၣ်အမဲာ်ညါ, ဒီးအဝဲသ့ၣ် ကနၢ်ဟူတၢ်မၤလိာ်ခဲလၢာ်န့ၣ်, ဒီးကစံး, မ့ၢ်မးပှၤဂီၢ်မုၢ်အဒိၣ်အအါအံၤ မ့ၢ်ပှၤတကလုာ်လၢ အကူၣ်တၢ်သ့အကူၣ်တၢ်ဘၣ်, ဒီးအသူၣ်ဆးအသးဆးလီၤ.”—၅ မိၤၡ့ ၄:၅-၇.
တၢး၀၇ ၈/၁ ၂၉ ¶၁၃
နမ့ၢ်ပှၤလၢအထူးအတီၤလၢ ကစၢ်ယွၤအမဲာ်ညါဧါ
၁၃ ယဟိဝၤယွၤ ပာ်ဖှိၣ်တၢ်ဆိၣ်ဂ့ၤတဖၣ်လၢ အပှၤဂီၢ်မုၢ်အဂီၢ် ဒီးဟ့ၣ်အဝဲသ့ၣ် တၢ်လၢအဂ့ၤကတၢၢ်ထီဘိလီၤ. (ယၤကိာ် ၁:၁၇) အဒိ ယဟိဝၤယွၤ ဟ့ၣ်ဝဲပှၤအံၣ်စရ့လးဖိတဖၣ် ထံကီၢ်န့ၣ် မ့ၢ်ထံကီၢ်လၢ အယွၤဝဲဒီး “တၢ်နုၢ်ထံဒီးကနဲစီ” လီၤ. ကီၢ်အဲၤကူပတူးစ့ၢ်ကီး ဘၣ်တၢ်ပာ်ဖျါထီၣ်အီၤ ဒ်သိးန့ၣ်သနာ်က့ ထံကီၢ်လၢ ယဟိဝၤယွၤဟ့ၣ် ပှၤအံၣ်စရ့လးဖိတဖၣ်န့ၣ် လီၤဆီလိာ်အသးဒီး ကီၢ်အဲၤကူပတူးလၢ တၢ်ဂ့ၢ်အရ့ဒိၣ် အစှၤကတၢၢ်တမံၤအဃိလီၤ. မ့ၢ်လၢ စီၤမိၤၡ့တဲဝဲလၢ ထံကီၢ်အံၤမ့ၢ်ထံကီၢ်လၢ “ယွၤအံးထွဲကွၢ်ထွဲအီၤလီၤ” ပမ့ၢ်တဲလၢကျဲအဂၤတမံၤန့ၣ်မ့ၢ်လၢ ယဟိဝၤယွၤ အံၤထွဲကွၢ်ထွဲ အဝဲသ့ၣ်အဃိ အဝဲသ့ၣ်မၤတၢ် ကကဲထီၣ်လိၣ်ထီၣ်လီၤ. ဖဲပှၤအံၣ်စရ့လးဖိတဖၣ် တီဒီးယဟိဝၤယွၤ အတီၢ်ပူၤ အတဲသ့ၣ်ဒိးန့ၢ်ဘၣ်ဝဲ ယဟိဝၤယွၤ အတၢ်ဆိၣ်ဂ့ၤတဖၣ် ဒီးအဝဲသ့ၣ် အတၢ်အိၣ်မူန့ၣ် ဂ့ၤဒိၣ်န့ၢ်ဒံး ပှၤတခီဘီမုၢ်ဖိလၢ အအိၣ်လၢ အဝဲသ့ၣ်အဃၢၤတဖၣ်လီၤ. မ့ၢ်လီၤ, ယွၤအတၢ်ဆိၣ်ဂ့ၤတဖၣ်န့ၣ် “ဒုးထူးဒုးတီၤပှၤလီၤ.”—၄ မိၤၡ့ ၁၆:၁၃; ၅ မိၤၡ့ ၄:၅-၈; ၁၁:၈-၁၅ ခ့ခါစှီၤကျိာ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၄ ၉/၁၅ ၂၅ ¶၃
လံာ်စီဆှံ အတၢ်ပာ်ဖျါလၢလံာ် ၅ မိၤၡ့အဂီၢ်
၄:၁၅-၂၀, ၂၃, ၂၄—တၢ်တြီဃာ်အိၣ်လၢ ပှၤတဘၣ်မၤ တၢ်ဂီၤစိးပျၤဘၣ်အဃိ ပှၤစိးပျၤတၢ်ဂီၤလၢ တမ့ၢ်တၢ်ဘူၣ်ထီၣ်ဘါထီၣ်အဂီၢ်ဘၣ်န့ၣ် ကမၣ်ဧါ. တကမၣ်ဘၣ်. တၢ်တြီဃာ်တခါအံၤန့ၣ် တြီဃာ်ဝဲပှၤမၤတၢ်ဂီၤစိးပျၤလၢ တၢ်ဘူၣ်ထီၣ်ဘါထီၣ်အဂီၢ်န့ၣ်လီၤ. ပှၤမၤတၢ်ဂီၤစိးပျၤ မ့တမ့ၢ် ပှၤတ့တၢ်ဂီၤလၢ တၢ်မၤဃံမၤလၤတၢ်အဂီၢ်တဖၣ်န့ၣ် လံာ်စီဆှံ တတြီဝဲဘၣ်.—၁ စီၤပၤ ၇:၁၈, ၂၅.
လါယူၤ ၁၄-၂၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၅-၆
“သိၣ်လိနဖိတဖၣ်လၢ ကအဲၣ်ယဟိဝၤယွၤအဂီၢ်”
တၢး၀၅ ၆/၁၅ ၂၀ ¶၁၁
မိၢ်ပၢ်သ့ၣ်ဧၢ, ကတဲာ်ကတီၤန့ၢ်တၢ်လၢ နဟံၣ်ဖိဃီဖိအဂီၢ်
၁၁ ဘၣ်ဃးဒီးတၢ်ဂ့ၢ်အံၤန့ၣ် ၅ မိၤၡ့ ၆:၅-၇ န့ၣ် ဘၣ်တၢ်ယၢၤဖျါထီၣ်အီၤအါကတၢၢ်လီၤ. ဝံသးစူၤ အိးထီၣ်နလံာ်စီဆှံဒီးဖးကွၢ် အဆၢဖိတဖၣ်န့ၣ်တက့ၢ်. ပာ်သူၣ်ပာ်သးလၢ အဆိကတၢၢ်မိၢ်ပၢ်တဖၣ်န့ၣ် ကဘၣ်အဲၣ် ယဟိဝၤယွၤ ဒီးယဟိဝၤယွၤ အကလုၢ်ကထါတဖၣ် ကဘၣ်အိၣ်လၢ အဝဲသ့ၣ်အသးပူၤလီၤ. မ့ၢ်လီၤ. ဒ်သိးသုကနၢ်ပၢၢ် ဒီးသုကအဲၣ် ယဟိဝၤယွၤအကျဲ, အတၢ်သီၣ်တၢ်သီ, အတၢ်ဟံးစုနဲၣ်ကျဲတဖၣ်အဂီၢ် သုကဘၣ်ဖးလံာ်စီဆှံထီဘိ, သုကဘၣ်ဆိကမိၣ်ထံအီၤ ဒီးဃုသ့ၣ်ညါအီၤလီၤတံၢ်လီၤဆဲးလီၤ. သုမ့ၢ်မၤဒ်န့ၣ်န့ၣ် သုသးကပှဲၤဒီး လံာ်စီဆှံတၢ်မ့ၢ်တၢ်တီ ဒီးတၢ်သ့ၣ်တဖၣ်န့ၣ် ကထိၣ်ဟူးထိၣ်ဂဲၤထီၣ်သု ဒ်သိးသုကအိၣ်ဒီးတၢ်သးခု ဒီးသုကအဲၣ် ယဟိဝၤယွၤအဂီၢ်လီၤ. ဖဲန့ၣ်အခါ သုကအိၣ်ဒီးတၢ်ဂ့ၤအါမး လၢသုကဟ့ၣ်နီၤလီၤဆူ သုဖိတဖၣ်အအိၣ်လီၤ.—လူၤကၣ် ၆:၄၅.
တၢး၀၇ ၅/၁၅ ၁၅-၁၆
ယဖိတဖၣ် ကကဲထီၣ်ပှၤကူၣ်ဘၣ်ကူၣ်သ့အဂီၢ် ယမၤစၢၤအဝဲသ့ၣ်ကသ့ဒ်လဲၣ်
တၢ်လၢနဆိကမိၣ်အီၤ, တၢ်လၢနပာ်လုၢ်ပာ်ပှ့ၤအီၤ, တၢ်လၢနဘၣ်သူၣ်ဘၣ်သးအီၤတဖၣ်န့ၣ် အိၣ်ဖျါလၢနတၢ်ကတိၤဒီး နတၢ်မၤန့ၣ်လီၤ. (ရိမ့ၤ ၂:၂၁, ၂၂) ဖိသၣ်တဖၣ် စးထီၣ်လၢအအီနုၢ်လံၤလံၤန့ၣ် ကွၢ်လိမၤဒိးဝဲ အမိၢ်အပၢ်တဖၣ်လီၤ. အဝဲသ့ၣ် သ့ၣ်ညါဝဲ တၢ်အရ့ဒိၣ်လၢ အမိၢ်အပၢ်တဖၣ်အဂီၢ် ဒီးတၢ်သ့ၣ်တဖၣ်န့ၣ် အရ့ဒိၣ်လၢ အဝဲသ့ၣ်အဂီၢ်စ့ၢ်ကီးလီၤ. နမ့ၢ်အဲၣ်ယဟိဝၤယွၤနီၢ်နီၢ်န့ၣ် နဖိတဖၣ်ကသ့ၣ်ညါဝဲလီၤ. အဒိ အဝဲသ့ၣ် ကသ့ၣ်ညါဝဲလၢ တၢ်ဖးလံာ်စီဆှံန့ၣ် မ့ၢ်တၢ်အရ့ဒိၣ်လၢနဂီၢ်လီၤ. လၢနတၢ်အိၣ်မူအပူၤ နမ့ၢ်ပာ်ဆိ ယွၤအဘီအမုၢ်လၢညါန့ၣ် အဝဲသ့ၣ် ကသ့ၣ်ညါဝဲလီၤ. (မးသဲ ၆:၃၃) နမ့ၢ်ထီၣ်တၢ်အိၣ်ဖှိၣ် ဒီးလဲၤစံၣ်တဲၤတဲလီၤတၢ်ထီဘိန့ၣ် မ့ၢ်ဒၣ် နပာ်ဖျါထီၣ်န့ၢ်အဝဲသ့ၣ်လၢ တၢ်မၤယဟိဝၤယွၤအတၢ်မၤန့ၣ် မ့ၢ်တၢ်အရ့ဒိၣ်ကတၢၢ်လၢနဂီၢ်လီၤ.—မးသဲ ၂၈:၁၉, ၂၀; ဧ့ၤဘြံၤ ၁၀:၂၄, ၂၅.
တၢး၀၅ ၆/၁၅ ၂၁ ¶၁၄
မိၢ်ပၢ်သ့ၣ်ဧၢ, ကတဲာ်ကတီၤန့ၢ်တၢ်လၢ နဟံၣ်ဖိဃီဖိအဂီၢ်
၁၄ ဒ် ၅ မိၤၡ့ ၆:၇ ပာ်ဖျါဝဲအသိး တၢ်ဆၢကတီၢ်အိၣ်ဝဲအါမးလၢ မိၢ်ပၢ်တဖၣ် ကတဲသကိးတၢ်ဒီးအဖိတဖၣ် ဘၣ်ဃးဒီး နီၢ်သးတခီန့ၣ်လီၤ. ဖဲသုလဲၤတၢ်က့ၤတၢ်, ဖံးတၢ်မၤတၢ်, ဒီးဟးကသုၣ်ကသီ ဒ်သိးသိးအခါ သုဃုတၢ်ခွဲးတၢ်ယာ်လၢ သုကမၤစၢၤသုဖိတဖၣ် အတၢ်လိၣ်ဘၣ်လၢ နီၢ်သးတခီသ့ဝဲလီၤ. တမ့ၢ်လၢသုကဘၣ် တဲဝံၤတဲက့ၤ လံာ်စီဆှံတၢ်မ့ၢ်တၢ်တီတဖၣ်န့ၣ်ဘၣ်. လၢတၢ်န့ၣ်အလီၢ် ဂုာ်ကျဲးစၢးတဲသကိး တၢ်ဂ့ၢ်လၢအဘၣ်ဃးဒီး နီၢ်သးတခီ လၢကမၤထီၣ်မၤထီ နဟံၣ်ဖိဃီဖိအဂီၢ်တက့ၢ်. အဒိလံာ်လၢအမ့ၢ် Awake! အပူၤန့ၣ် တၢ်ဂ့ၢ်အိၣ်ဝဲ အကလုာ်ကလုာ်လီၤ. နဟံးန့ၢ်တၢ်ဂ့ၢ်တဖၣ်န့ၣ် ဒီးနတဲသကိးတၢ် ဘၣ်ဃးဒီး ယဟိဝၤယွၤ တ့လီၤဝဲ ဆၣ်ဖိကီၢ်ဖိ, တၢ်ဃံတၢ်လၤလၢ အိၣ်လၢဟီၣ်ခိၣ်ဒီဘ့ၣ်, ပှၤဟီၣ်ခိၣ်ဖိအလုၢ်အလၢ်ဒီး တၢ်အိၣ်တၢ်ဆိးအလီၢ် လၢအလီၤသးစၢၢ်ဆၢတဖၣ်သ့ဝဲလီၤ. နမ့ၢ်တဲသကိးတၢ်ဒ်အံၤန့ၣ် ကထိၣ်ဟူးထိၣ်ဂဲၤထီၣ် ပှၤသးစၢ်တဖၣ်လၢ ကသးအိၣ်ဖးဝဲ လံာ်လဲၢ်လၢကုၢ်လၢအတီ ဒီးအကူၣ်တၢ်သ့ ကတဲာ်ကတီၤန့ၢ်ပှၤတဖၣ်န့ၣ်လီၤ.—မးသဲ ၂၄:၄၅-၄၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢ်အဲၣ်ဒီးတၢ်တီတၢ်လိၤလၢ လၢပျၢၤကီၢ်အံၣ်စရ့လးအပူၤ
၁၁ တၢ်မၤလိတဖၣ်– ယဟိဝၤယွၤ ထံၣ်တၢ်အါန့ၢ်ဒံး တၢ်လၢအအိၣ်ဖျါလၢခိလီၤ. အဝဲထံၣ်ဝဲ တၢ်လၢအအိၣ်လၢပသးပူၤ အနီၢ်ကီၢ်န့ၣ်လီၤ. (၁ ၡမူၤအ့လး ၁၆:၇) တၢ်ဆိကမိၣ်, တၢ်တူၢ်ဘၣ် ဒီးတၢ်မၤလၢ အအိၣ်ခူသူၣ်လၢ အမဲာ်ညါန့ၣ် တအိၣ်နီတမံၤဘၣ်. ဘၣ်ဆၣ် အဝဲဃုဝဲ တၢ်ဂ့ၤလၢအအိၣ်လၢပသးပူၤ ဒီးဟ့ၣ်ဂံၢ်ဟ့ၣ်ဘါပှၤလၢ ပကမၤအါထီၣ် တၢ်ဂ့ၤတၢ်ဝါတဖၣ်အံၤလီၤ. ဘၣ်ဆၣ် အဝဲအဲၣ်ဒိးလၢ ပကသ့ၣ်ညါဒီးပၢၤဃာ် ပတၢ်ဆိကမိၣ်လၢ အကမၣ်တဖၣ် တချုးလၢ တၢ်ဆိကမိၣ်တဖၣ်အံၤ ဆှၢပှၤဆူတၢ်မၤကမၣ်တၢ်ဒံးဘၣ်န့ၣ်လီၤ.—၂ ကွဲးနီၣ်တၢ် ၁၆:၉; မးသဲ ၅:၂၇-၃၀.
လါယူၤ ၂၁-၂၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၇-၈
“ဖျီလိာ်သုသးဒီးအီၤတဂ့ၤ”
တၢး၁၂ ၇/၁ ၂၉ ¶၂
ဘၣ်မနုၤအဃိ ယဟိဝၤယွၤ မၤလိာ်ဝဲလၢ ပှၤကဆီဟံၣ်ဆီဃီ ထဲလၢပှၤစူၢ်တၢ်နာ်တၢ်ကဒဲကဒဲအကျါလဲၣ်.
ယဟိဝၤယွၤ သ့ၣ်ညါဝဲဂ့ၤဂ့ၤလၢ မုၣ်ကီၤလံၢ်အဲၣ်ဒိးဝဲလၢ ပှၤလၢအဘူၣ်ထီၣ်ဘါထီၣ် ယဟိဝၤယွၤတဖၣ် အသကဲာ်ပဝး ကဟးဂီၤ ဒီးကဘူၣ်ထီၣ်ဘါထီၣ် ယွၤလၢအကမၣ်တဖၣ်အဂီၢ်လီၤ. အဃိ ကစၢ်ယွၤ ဟ့ၣ်ပလီၢ်ဝဲလၢ ပှၤလၢအတစူၢ်တၢ်နာ်တၢ်တဖၣ်န့ၣ် “ကဒုးဃာ်ကွံာ် နဖိခွါအသးလၢ အပိာ်ယခံ ဒ်သိးအကမၤကစၢ်အဂၤတဖၣ်အတၢ်လီၤ.” တၢ်ဟ့ၣ်ပလီၢ်အံၤ မ့ၢ်တၢ်လၢအရ့ဒိၣ်ဒိၣ်မးလီၤ. ပှၤအံၣ်စရ့လးဖိတဖၣ် မ့ၢ်ဘူၣ်ထီၣ်ဘါထီၣ်ဘၣ်ဖုး ကစၢ်ယွၤအဂၤတဖၣ်န့ၣ် အဝဲသ့ၣ်တမ့ၢ်ကဒိးန့ၢ်ဘၣ် ကစၢ်ယွၤအတၢ်ဘၣ်သးလၢၤဘၣ်. ဒီးကလီၤဘၣ်လၢ အဒူၣ်အဒါတဖၣ်အစုပူၤညီညီလီၤ. မ့မ့ၢ်ဒ်န့ၣ်န့ၣ် မ့းၡံအၤလၢ ဘၣ်တၢ်တဲဆိပာ်အီၤန့ၣ် ဟဲအိၣ်ထီၣ်လၢ ပှၤအံၣ်စရ့လးဖိအကလုာ်ဒူၣ်အကျါတသ့လၢၤဘၣ်. ခီဖျိလၢတၢ်ဂ့ၢ်အံၤအဃိ မုၣ်ကီၤလံၢ်လ့ပစီဝဲ ပှၤအံၣ်စရ့လးဖိတဖၣ်လၢ ကဆီဟံၣ်ဆီဃီဒီး ပှၤလၢအတၢ်စူၢ်တၢ်နာ် တဒ်သိးဒီးအီၤတဖၣ်လီၤ.
တၢး၁၅ ၃/၁၅ ၃၀-၃၁
တၢ်ဆီဟံၣ်ဆီဃီဒီးပှၤလၢ “ကစၢ်အပူၤ” န့ၣ်အဘျုးအိၣ်ဒံးဧါ.
လၢလံာ်စီဆှံပူၤန့ၣ် ယဟိဝၤယွၤ မၤလိာ်ဝဲလၢ ပှၤကဘၣ် ဆီဟံၣ်ဆီဃီထဲလၢ ကစၢ်အပူၤလီၤ. ဘၣ်မနုၤအဃိလဲၣ်. မ့ၢ်လၢ ယဟိဝၤယွၤသ့ၣ်ညါဝဲ တၢ်အဂ့ၤကတၢၢ်လၢပဂီၢ် ဒီးအဲၣ်ဒိးဒီသဒၢပှၤအဃိန့ၣ်လီၤ. အဝဲတအဲၣ်ဒိးလၢ ပကမၤတၢ်ဆၢတဲာ်လၢ အမၤဘၣ်ဒိပှၤ ဒီးမၤဟးဂီၤပသးန့ၣ်ဘၣ်. လၢနဃ့မယၤအစိၤန့ၣ် ပှၤယူဒၤဖိအါဂၤ ဆီဟံၣ်ဆီဃီဒီး ပိာ်မုၣ်လၢ တဘူၣ်ထီၣ်ဘါထီၣ် ယဟိဝၤယွၤတဖၣ်န့ၣ်လီၤ. အဃိ စီၤနဃ့မယၤ က့ၤတဲဘၣ်က့ၤ အဝဲသ့ၣ်လၢ စီၤၡလိၤမိၤအဒိအတဲာ်လၢ လၢအတဂ့ၤတဖၣ်န့ၣ်လီၤ. “စီၤပၤဒ်အဝဲဒၣ်အသိးလၢ အကစၢ်အဲၣ်အီၤ ဒီးပာ်အီၤလၢစီၤပၤလၢ အံၣ်စရ့လးခဲလၢာ်အဖီခိၣ်န့ၣ် တအိၣ်ဘၣ်နီတဂၤဘၣ်. ဘၣ်ဆၣ်ဒီး ပှၤတခီဘီမုၢ်ဖိ အဖိမုၣ် ဒုးမၤကမၣ်အီၤလီၤ.” (ဃ့. ၁၃:၂၃-၂၆) ယဟိဝၤယွၤသ့ၣ်ညါဝဲလၢ အတၢ်ဟ့ၣ်ပလီၢ်တဖၣ်န့ၣ် မ့ၢ်ဒၣ်လၢပဘျုးအဂီၢ်လီၤ. အဃိကစၢ်ဟံးစုနဲၣ်ကျဲဝဲလၢ ခရံာ်ဖိတဖၣ် ကဘၣ်ဆီဟံၣ်ဆီဃီထဲလၢ ကစၢ်အပူၤလီၤ. (စံး. ၁၉:၇-၁၀; ၡါ. ၄၈:၁၇, ၁၈) ခရံာ်ဖိနီၢ်နီၢ်တဖၣ်န့ၣ် ပာ်လုၢ်ပာ်ပှ့ၤဝဲ ကစၢ်ယွၤအတၢ်အဲၣ်ဒီး အတၢ်ကဟုကယာ် ဒီးသန့ၤအသးလၢ ကစၢ်ယွၤ အတၢ်ဟံးစုနဲၣ်ကျဲလီၤ. ပမ့ၢ်အၢၣ်လီၤဒိကနၣ် ယဟိဝၤယွၤ ဒ်ပတၢ်ပၢကစၢ်အသိးန့ၣ် မ့ၢ်ဒၣ်ပအၢၣ်လီၤတူၢ်လိာ်လၢ အဝဲမ့ၢ် မူဟီၣ်ကယၢပၢတၢ်ကစၢ်လီၤ.—ကတိၤ. ၁:၅.
လၢမုၢ်နံၤခံကတၢၢ် အဆၢကတီၢ်န့ၣ် ပလီၢ်နသးလၢ တၢ်ရ့တံၤရ့သကိးတက့ၢ်
၁၂ ခရံာ်ဖိလၢ အဲၣ်ဒိးဆီဟံၣ်ဆီဃီတဖၣ်န့ၣ် ကဘၣ်ဃုထၢဝဲ အသးသမူတံၤသကိးလၢအ လီၤတံၢ်လီၤဆဲးလီၤ. ယွၤအကလုၢ်ကထါ ဟ့ၣ်ပလီၢ်ပှၤလၢ– “သုတယိးနီၣ်ယိးဘိ ဖုၣ်ထံၣ်ဖုၣ်ထီဒီး ပှၤလၢအတစူၢ်တနာ်ဘၣ်တဖၣ် န့ၣ်တဂ့ၤ. အဂ့ၢ်ဒ်အံၤ, တၢ်တီတၢ်လိၤန့ၣ်, ဘၣ်ဃးဒီး တၢ်တတီတလိၤဘၣ် ဒ်လဲၣ်, ဒီးတၢ်ကပီၤရ့လိာ်အသးဒီး တၢ်ခံးဒ်လဲၣ်.” (၂ ကရံၣ်သူး ၆:၁၄) ကစၢ်ယွၤ အကလုၢ်ကထါ စံးဘၣ်တဲဘၣ်အခ့အပှၤလၢ အဝဲသ့ၣ် ကဘၣ်ဆီဟံၣ်ဆီဃီ “ထဲလၢကစၢ်အပူၤ” လီၤ. တၢ်အံၤအဲၣ်ဒိးစံးဝဲ အဝဲသ့ၣ် ကဘၣ်ဆီဟံၣ်ဆီဃီထဲလၢ ပှၤလၢအဘျၢထံဝံၤဒီး အိၣ်မူဒ် ယဟိဝၤယွၤ အတၢ်ဘၣ်သး အသိးန့ၣ်လီၤ. (၁ ကရံၣ်သူး ၇:၃၉) နမ့ၢ်ဆီဟံၣ်ဆီဃီ ဒီးပှၤလၢအအဲၣ် ယဟိဝၤယွၤန့ၣ် အဝဲကမၤစၢၤနၤလၢ နကတီဒီး ကစၢ်ယွၤအဂီၢ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၄ ၂/၁ ၁၃ ¶၄
ယဟိဝၤယွၤ ဟ့ၣ်ပှၤတၢ်အီၣ်လၢ တနံၤအဂီၢ် တနံၤအဂီၢ်
၄ ပတၢ်ဃ့ဘါထုကဖၣ်လၢ ကိၣ်လၢတနံၤအဂီၢ် တနံၤအဂီၢ်န့ၣ် ကြၢးဒုးသ့ၣ်နီၣ်ထီၣ်က့ၤပှၤလၢ ပလိၣ်ဘၣ်နီၢ်သးတၢ်အီၣ်လၢ တနံၤဘၣ်တနံၤအဂီၢ်စ့ၢ်ကီးလီၤ. ယ့ၣ်ၡူးဒုၣ်တၢ်အီၣ်အသီဖးယံာ် ဝံၤအလီၢ်ခံ တၢ်သၣ်ဝံၤအသးဖးဒိၣ် သနာ်က့ ဂ့ၢ်လိာ်ကွံာ်ဝဲ မုၣ်ကီၤလံာ်အတၢ်လ့ပစီလၢ ကမၤကဲထီၣ် လၢၢ်လၢကိၣ်န့ၣ်လီၤ. အဝဲတဲဆၢက့ၤဝဲလၢ “တၢ်ကွဲးအသးအိၣ်ဝဲလၢ ‘ပှၤဟီၣ်ခိၣ်ဖိ တမူဝဲထဲလၢ ကိၣ်အဃိဘၣ်. မ့မ့ၢ်မူဝဲလၢကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ’ အထးခိၣ်န့ၣ်လီၤ.” (မးသဲ ၄:၄) ဖဲအံၤန့ၣ် ပထံၣ်ဘၣ် ယ့ၣ်ၡူးယၢၤထီၣ်က့ၤဝဲ တၢ်ကတိၤလၢ စီၤမိၤၡ့တဲဘၣ်ဝဲ ပှၤအံၣ်စရ့လးဖိတဖၣ်လၢ “ဒီးဒုးဆီၣ်လီၤနသး, ဒီးဒုးသၣ်ဝံၤနသး, ဒီးဒုးအီၣ်နၤလၢမၤနၤ, လၢနတသ့ၣ်ညါဘၣ်အီၤ ဒီးနပၢ်တဖၣ်တသ့ၣ်ညါဘၣ်အီၤ, ဒ်သိးအကဘိးဘၣ်သ့ၣ်ညါနၤလၢ ပှၤကညီမူဝဲထဲလၢကိၣ်တမ့ၢ်ဘၣ်, မ့ၢ်လၢဖဲဒၣ်တၢ်လၢအထီၣ်ဖျဲးလၢ ယွၤအထးခိၣ်တမံၤလၢ်လၢ်သတးဒီး, ပှၤကညီမူဝဲလီၤ.” (၅ မိၤၡ့ ၈:၃) ယဟိဝၤယွၤ ဟ့ၣ်ဒုးအီၣ်ဝဲ ပှၤအံၣ်စရ့လးဖိတဖၣ်လၢ ကိၣ်မၤနၤအဃိ အဝဲသ့ၣ်ဒိးန့ၢ်ဘၣ်ဝဲ နီၢ်ခိတၢ်အီၣ် တကးဒံးဘၣ် ဒိးန့ၢ်ဘၣ်ဝဲ တၢ်မၤလိလၢ နီၢ်သးတခီစ့ၢ်ကီးလီၤ. တၢ်မၤလိတခါန့ၣ် အဝဲသ့ၣ်ကဘၣ် “လဲၤထၢထီၣ်တနံၤအတၢ်အီၣ်လၢအဂီၢ်ဒၣ်ဝဲ, တနံၤလၢအဂီၢ်ဒၣ်ဝဲလီၤ.” အဝဲသ့ၣ်မ့ၢ်ထၢဝဲ အါန့ၢ်ဒံးတနံၤအဂီၢ်န့ၣ် အအိၣ်တ့ၢ်သ့ၣ်တဖၣ် နၢအုၣ်ဒီးလၢၣ်ထီၣ်ဝဲလီၤ. (၂ မိၤၡ့ ၁၆:၄, ၂၀) ဘၣ်ဆၣ် ဖဲဃုသီတသီန့ၣ် အဝဲသ့ၣ်ဘၣ်ထၢဃုာ်ဝဲဒီး မုၢ်အိၣ်ဘှံးနံၤအဂီၢ် သနာ်က့ တနၢအုၣ်ဝဲဘၣ်. (၂ မိၤၡ့ ၁၆:၅, ၂၃, ၂၄) အဃိကိၣ်မၤနၤတခါအံၤ ကဒုးသ့ၣ်နီၣ်ထီၣ် အဝဲသ့ၣ်လၢ ကဘၣ်အိၣ်ဒီးတၢ်ဒိကနၣ် ဒီးအဝဲသ့ၣ် တမူဝဲထဲလၢကိၣ်ဘၣ်. “မူဝဲလၢကယဲၢ် တၢ်ကတိၤလၢ အဟဲထီၣ်လၢ ယဟိဝၤယွၤ အထးခိၣ်န့ၣ်လီၤ.”
တၢး၀၆ ၁/၁ ၂၈ ¶၁၄-၁၅
၁၄ ဖဲပှၤအံၣ်စရ့လးဖိတဖၣ် ဘူးကနုာ်လီၤလၢ ကီၢ်တၢ်စံးပာ်ပူၤအခါ ဒ်သိးအဝဲသ့ၣ် သုတသးပ့ၤနီၣ် ယဟိဝၤယွၤ တဂ့ၤအဂီၢ် ယဟိဝၤယွၤ မၤလိာ်အဝဲသ့ၣ်ဒ်အံၤလီၤ. “ပလီၢ်နသးဒ်သိး နသုတသးပ့ၤနီၣ်ယွၤနကစၢ်, လၢနတတိၢ်န့ၢ်ဘၣ်အတၢ်မၤလိာ်, ဒီးအတၢ်စံၣ်ညီၣ် လၢယမၤလိာ်နၤ လၢမုၢ်မဆါတနံၤအံၤ တဂ့ၤန့ၣ်တက့ၢ်. တုၤနအီၣ်တၢ် ဒီးဘျဲးအီၣ်, ဒီးသူၣ်ဟံၣ်အဂ့ၤ, ဒီးအိၣ်လၢအပူၤ, ဒီးနဂီၤဘုၣ်ဂီၤဖံး, ဒီးနသိမဲာ်တဲးလဲးအါထီၣ်, ဒီးနကျိၣ်ဧိၤစ့ဧိၤ, ဒီးနထူဧိၤလွဲဧိၤအါထီၣ်, ဒီးကယဲၢ်တၢ်လၢ အအိၣ်ဒီးနၤအါထီၣ်ဒီး, နကပာ်ထီၣ်ထီနသးဒီး သးပ့ၤနီၣ်ဘၣ်ဖုး ယွၤနကစၢ်လၢ အဒုးဟးထီၣ်ကွံာ်နၤလၢ ကီၢ်အဲၤကူပတူးအပူၤ, လၢပှၤကုၢ်ဖိအဟံၣ်ပူၤ” လီၤ.—၅ မိၤၡ့ ၈:၁၁-၁၄
၁၅ မုၢ်မဆါတနံၤအံၤစ့ၢ်ကီး တၢ်ကဲထီၣ်အသးဒ်သိးန့ၣ်သ့ဧါ. တၢ်လၢပကြၢးပာ်အီၤလၢ နီၣ်ဂံၢ်တၢတဖၣ် ပမ့ၢ်တပာ်ဆိအီၤလၢၤဘၣ်န့ၣ် တၢ်ကဲထီၣ်အသးဒီးပှၤ ဒ်သိးန့ၣ်သ့လီၤ. ဘၣ်ဆၣ် ပမ့ၢ်ပာ်ဆိ ယွၤအဘီအမုၢ် ဒီးအတၢ်တီတၢ်လိၤလၢ နီၣ်ဂံၢ်တၢန့ၣ် တၢ်ဘူၣ်တၢ်ဘါအမ့ၢ်အတီအံၤ ကမ့ၢ်တၢ်အရ့ဒိၣ်ကတၢၢ် လၢပဂီၢ်လီၤ. စီၤပီလူးဟ့ၣ်ဂံၢ်ဟ့ၣ်ဘါပှၤလၢ “သူသုတၢ်ဆၢကတီၢ်လၢ အဂ့ၤကတၢၢ်” ဒီးစံၣ်တဲၤတဲလီၤတၢ်လၢ တၢ်သူၣ်ဆူၣ်သးဆူၣ်အပူၤတက့ၢ်. (ကလီးစဲ ၄:၅; ၂ တံၤမသ့း ၄၂) ဘၣ်ဆၣ် တၢ်ထီၣ်တၢ်အိၣ်ဖှိၣ် ဒီးတၢ်ဟးစံၣ်တဲၤတဲလီၤတၢ် မ့ၢ်တကဲထီၣ် တၢ်အရ့ဒိၣ်လၢပဂီၢ်လၢၤဘၣ်, လၢတၢ်န့ၣ်အလီၢ် တၢ်သူၣ်ဖှံသးညီ ဒီးတၢ်မၤမုာ်မၤဖှံသး မ့ၢ်ကဲထီၣ် တၢ်အရ့ဒိၣ်လၢပဂီၢ်န့ၣ် ယဟိဝၤယွၤ တမ့ၢ်ပှၤအရ့ဒိၣ်လၢ ပဂီၢ်လၢၤဘၣ်အဃိ ပသးပ့ၤနီၣ်ကွံာ်အီၤသ့လီၤ. စီၤပီလူး တဲဝဲလၢ လၢမုၢ်နံၤအခံကတၢၢ်အတီၢ်ပူၤ ပှၤဟီၣ်ခိၣ်ဖိတဖၣ်န့ၣ် “လၢကအဲၣ်ကစၢ်ယွၤအလီၢ် ကအဲၣ်ဝဲ တၢ်မုာ်တၢ်ပၠီၣ်လီၤ.” (၂ တံၤမသ့း ၃:၄) ခရံာ်ဖိလၢအိၣ်ဒီး တၢ်သူၣ်ဘျၢသးဘျၢတဖၣ်န့ၣ် မ့ၢ်တၢ်ပာ်သူၣ်ပာ်သးတဖၣ်အံၤ အိၣ်လၢအသးပူၤဧါ တအိၣ်ဧါန့ၣ် အဝဲသ့ၣ်တဖၣ် သမံသမိးလီၤက့ၤအသးထီဘိလီၤ.—၂ ကရံၣ်သူး ၁၃:၅.
လါယူၤ ၂၈–လါယူၤလံ ၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၉-၁၀
“ယွၤနကစၢ် ဃ့တၢ်လၢနၤလၢ မနုၤတမံၤလဲၣ်”
တၢး၀၉ ၁၀/၁ ၁၀ ¶၃-၄
ယဟိဝၤယွၤ ဃ့နၤတၢ်မနုၤလဲၣ်
တၢ်မနုၤကထိၣ်ဟူးထိၣ်ဂဲၤထီၣ်ပှၤလၢ ပကဒိကနၣ် ကစၢ်ယွၤအကလုၢ်လၢ ပသးဒီဖျၢၣ်အဂီၢ်လဲၣ်. စီၤမိၤၡ့ ပာ်ဖျါထီၣ်ဝဲလၢ “ပျံၤယွၤနကစၢ်” တက့ၢ်. (အဆၢဖိ ၁၂) တမ့ၢ်တၢ်ပျံၤကစၢ်ယွၤခီဖျိလၢ ပှၤဘၣ်ယိၣ်တၢ်လၢ ပှၤကတူၢ်ဘၣ် တၢ်ပိာ်ထွဲလၢအအၢတဖၣ်အဃိဘၣ်. မ့ၢ်တၢ်ပျံၤကစၢ်ယွၤ ခီဖျိတၢ်ယူးယီၣ်ပာ်ကဲကစၢ်ယွၤ ဒီးအကျဲတဖၣ်လီၤ. ပမ့ၢ်ယူးယီၣ်ပာ်ကဲ ကစၢ်ယွၤလၢ ပသးဒီဖျၢၣ်န့ၣ် ပကဟးဆှဲးတၢ်လၢ အဝဲတဘၣ်သူၣ်ဘၣ်သးဝဲတဖၣ်လီၤ.
ဘၣ်ဆၣ် ပတၢ်တိာ်ပာ်လၢ ပဒိကနၣ်ကစၢ်ယွၤအကလုၢ်န့ၣ် ကြၢးမ့ၢ်တၢ်မနုၤလဲၣ်. စီၤမိၤၡ့ ပာ်ဖျါထီၣ်ဝဲလၢ “အဲၣ်အီၤ, ဒီးမၤယွၤနကစၢ်အတၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ” တက့ၢ်. (အဆၢဖိ ၁၂) တၢ်အဲၣ်ကစၢ်ယွၤန့ၣ် တမ့ၢ်ထဲလၢ ပတၢ်တူၢ်ဘၣ်ဘၣ်. လံာ်တဘ့ၣ်ပာ်ဖျါထီၣ်ဝဲလၢ “ဧ့ၤဘြံၤအတၢ်ကတိၤလၢ ပာ်ဖျါဝဲ တၢ်တူၢ်ဘၣ်န့ၣ် တဘျီတခီၣ် အဲၣ်ဒိးတဲဝဲ တၢ်မၤလၢ အဟဲအိၣ်ထီၣ် ခီဖျိလၢ တၢ်တူၢ်ဘၣ်န့ၣ်လီၤ.” လံာ်အဝဲန့ၣ်အပူၤ ပာ်ဖျါထီၣ်ဝဲလၢ ပအဲၣ်ကစၢ်ယွၤန့ၣ် မ့ၢ်ဝဲ “ပမၤတၢ်လၢတၢ်အဲၣ်တၢ်ကွံအပူၤ” လီၤ. ပမ့ၢ်တဲလၢ ကျဲအဂၤတမံၤန့ၣ် ပမ့ၢ်အဲၣ်ကစၢ်ယွၤနီၢ်နီၢ်န့ၣ် ပကမၤဒ်အတၢ်ဘၣ်သးအသိးလီၤ.—ကတိၤဒိ ၂၇:၁၁.
တၢး၀၉ ၁၀/၁ ၁၀ ¶၆
ယဟိဝၤယွၤ ဃ့နၤတၢ်မနုၤလဲၣ်
ပမ့ၢ်ဒိကနၣ်ကစၢ်ယွၤအကလုၢ်လၢ တၢ်သူၣ်အိၣ်သးအိၣ်အပူၤန့ၣ် ပကဒိးန့ၢ်ဘၣ် တၢ်ဆိၣ်ဂ့ၤတဖၣ်လီၤ. စီၤမိၤၡ့ ကွဲးဝဲလၢ “တိၢ်န့ၢ်ယွၤအတၢ်မၤလိာ်, ဒီးအတၢ်သိၣ်တၢ်သီလၢ ယမၤလိာ်နၤလၢ နတၢ်ဂ့ၤအဂီၢ် လၢမုၢ်မဆါတနံၤအံၤ” တက့ၢ်. (အဆၢဖိ ၁၃) ကယဲၢ်ယဟိဝၤယွၤ အတၢ်မၤလိာ် ဒီးကယဲၢ်တၢ်လၢ အဃ့ဝဲတမံၤလၢ်လၢ်န့ၣ် မ့ၢ်ဒၣ်လၢပဘျုးအဂီၢ်လီၤ. တမ့ၢ်လၢ တၢ်ဂ့ၢ်အဂၤတဖၣ်အဃိဘၣ်. လံာ်စီဆှံပာ်ဖျါဝဲလၢ “ကစၢ်ယွၤန့ၣ် မ့ၢ်တၢ်အဲၣ်တၢ်ကွံလီၤ.” (၁ ယိၤဟၣ် ၄:၈) အဃိတၢ်မၤလိာ်လၢ အဝဲဟ့ၣ်လီၤပှၤတဖၣ်န့ၣ် မ့ၢ်ဒ်သိးပကဒိးန့ၢ်ဘၣ် တၢ်အဘျုးထီဘိ အဂီၢ်လီၤ. (ယၡါယၤ ၄၈:၁၇) ပမ့ၢ်မၤထွဲဒ် ယဟိဝၤယွၤ အတၢ်မၤလိာ်တဖၣ်အသိးန့ၣ် ဆၢကတီၢ်ခဲအံၤ ပဟးဆှဲးတၢ်လၢ အလီၤသးအုးတဖၣ်ကန့ၢ် ဒီးခါဆူညါစ့ၢ်ကီး ပကဒိးန့ၢ်ဘၣ် တၢ်ဆိၣ်ဂ့ၤလၢအကတၢၢ်တအိၣ်ဘၣ် လၢအဘီအမုၢ်အတၢ်ပၢဖီလာ်န့ၣ်လီၤ.
cl ၁၆ ¶၂
န “သုးဘူးနသးဆူယွၤအအိၣ်” သ့နီၢ်နီၢ်ဧါ
၂ စီၤအၤဘြၤဟၣ် မ့ၢ်ပှၤလၢအိၣ်ဒီး တၢ်ရ့လိာ်သးဘူးဘူးတံၢ်တံၢ် ဒီးယဟိဝၤယွၤလီၤ. ယဟိဝၤယွၤ ကိးအီၤလၢ “ယတံၤယသကိး” လီၤ. (ယၡါယၤ ၄၁:၈) ယဟိဝၤယွၤ ပာ်စီၤအၤဘြၤဟၣ် ဒ်တံၤသကိးနီၢ်နီၢ်တဂၤအသိးလီၤ. မ့ၢ်လၢစီၤအၤဘြၤဟၣ် “နာ်ယဟိဝၤယွၤအဃိ” အဝဲအိၣ်ဒီး တၢ်ရ့လိာ်သးဘူးဘူးတံၢ်တံၢ် ဒီးအီၤလီၤ. (ယၤကိာ် ၂:၂၃) မုၢ်မဆါတနံၤအံၤစ့ၢ်ကီး ယဟိဝၤယွၤ ဃုဝဲတၢ်ခွဲးတၢ်ယာ်လၢက ‘ဘၣ်သူၣ်ဘၣ်သး’ ပှၤလၢမၤအတၢ်မၤ ခီဖျိလၢအဲၣ်အီၤအဃိလီၤ. (၅ မိၤၡ့ ၁၀:၁၅) ကစၢ်ယွၤ အကလုၢ်ကထါ ဟ့ၣ်ဂံၢ်ဟ့ၣ်ဘါပှၤလၢ “သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲကသုးဘူးအသး ဆူသုအိၣ်လီၤ.” (ယၤကိာ် ၄:၈) ဖဲအံၤန့ၣ် ပထံၣ်ဘၣ် တၢ်ကွဲမုာ် ဒီးတၢ်အၢၣ်လီၤခံမံၤလၢာ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၁၀၃
ပှၤဧနးဖိ
ပှၤတကလုာ်လၢ အနီၢ်ဒိၣ်အနီၢ်သွါလီၤဆီန့ၣ် အိၣ်ဝဲလၢ ကီၢ်ကနၤဧၣ် အကစၢၢ်ခိၣ် ဒီးလီၤဆီဒၣ်တၢ် တၢ်လီၢ်လၢအဘူးဒီးပီၣ်လဲၣ် လၢကလံၤထံးတခီန့ၣ်လီၤ. ပှၤဧနးဖိလၢ အမံၤဟူသၣ်ဖျါ သၢဂၤလၢအမ့ၢ် စီၤအဃံမ့ၣ်, စီၤၡ့ၤၡဲ, ဒီးစီၤတးလမဲန့ၣ် အိၣ်ဝဲဖဲ ဝ့ၢ်ဃ့ဘြိၣ်န့ၣ်လီၤ. (၄ မိၤ. ၁၃:၂၂) ဖဲပှၤဧ့ၤဘြံၤဖိ အပှၤကွၢ်ဟုၣ်တၢ် ၁၂ ဂၤထံၣ်ဝဲဒၣ် ပှၤဧနးဖိအဆိကတၢၢ်တဘျီအခါ ပှၤကွၢ်ဟုၣ်တၢ်အဂၤ ၁၀ န့ၣ်ပျံၤတၢ် ဒီးတဲဝဲလၢ ပှၤသ့ၣ်တဖၣ်န့ၣ် မ့ၢ်ပှၤလၢအဟဲလီၤစၢၤလီၤသွဲၣ်လၢ ပှၤနီၢ်ဒိၣ်နီၢ်သွါလၢ အအိၣ်မူလၢ တချုးထံလုၢ်ဘၢတၢ်ဒံးဘၣ်န့ၣ်လီၤ. လၢအဝဲသ့ၣ် အမဲာ်ညါန့ၣ် ပှၤဧ့ၤဘြံၤဖိတဖၣ် လီၤဂာ်ဒ် “ဒွဲၣ်”အသိးလီၤ. (၄ မိၤ. ၁၃:၂၈-၃၃; ၅ မိၤ. ၁:၂၈) ပှၤအ့ၣ်မ့းဖိဒီးပှၤရဘးဖိတဖၣ်န့ၣ် အနီၣ်ဒိၣ်နီၣ်သွါစ့ၢ်ကီးအဃိ ဘၣ်တၢ်ထိၣ်သတြီၤအဝဲသ့ၣ် ဒ်ပှၤဧနးဖိအသိးလီၤ. မ့ၢ်လၢအဝဲသ့ၣ် အဂံၢ်ဆူၣ်ဘါဆူၣ်အဃိ တၢ်ကတိၤဒိအိၣ်လၢ “မ့ၢ်မတၤဆၢထၢၣ်လၢ ပှၤဧနးဖိအမဲာ်ညါသ့တဂၤလဲၣ်.”—၅ မိၤ. ၂:၁၀, ၁၁, ၂၀, ၂၁; ၉:၁-၃.