၃. (က) စီၤတံၤမသ့း ကဲထီၣ်ခရံာ်ဖိဒ်လဲၣ်. ဒီးတၢ်လၢအမၤလိဘၣ်ဝဲတဖၣ် န့ၣ်အဝဲမၤဝဲဒ်လဲၣ်. (ခ) တၢ်ဂ့ၢ်သၢထံၣ်လၢ စီၤပီလူးတဲဝဲ စီၤတံၤမသ့းန့ၣ် မ့ၢ်မနုၤလဲၣ်.

^၃ ဖဲ ခ.န ၄၇ န့ၣ် စီၤပီလူး လဲၤဟးဝဲလၢဝ့ၢ်လူစတြၤလီၤ. ဖဲန့ၣ်အခါ စီၤတံၤမသ့း ကမ့ၢ်ဝဲပှၤလိၣ်ဘိ ဒီးကစးထီၣ်မၤလိဘၣ်ဝဲ ယ့ၣ်ၡူးအဂ့ၢ်လီၤ. ဒီးအဝဲအိၣ်မူထွဲဝဲဒ် တၢ်လၢအမၤလိဘၣ်ဝဲတဖၣ်အသိးအဃိ ခံနံၣ်ပူၤကွံာ်ဝံၤအလီၢ်ခံ အဝဲစးထီၣ်ပိာ်ဝဲ စီၤပီလူးအခံလီၤ. ပူၤကွံာ် ၁၆ နံၣ်ဒီးစီၤပီလူးကွဲးန့ၢ်ဝဲ စီၤတံၤမသ့းအလံာ် ဒီးတဲဝဲလၢ– “မ့မ့ၢ်နဲဒၣ်အံၤအိၣ်နဲဆိးနဲလၢ တၢ်လၢနမၤလိအီၤ, လၢနသ့ၣ်ညါလၢအမ့ၢ် အမ့ၢ်အတီတဖၣ်အပူၤတက့ၢ်. နမၤလိတၢ်လၢမတၤမတၤအအိၣ်န့ၣ် နသ့ၣ်ညါလီၤ. ဒီးလၢနမ့ၢ်ဖိဒံဖိသၣ်လံၤလံၤန့ၣ် နသ့ၣ်ညါတၢ်ကွဲးအသးစီဆှံတဖၣ် [လံာ်စီဆှံလၢ ဧ့ၤဘြံၤကျိာ်တကတြူၢ်], လၢအဒုးကူၣ်သ့ကူၣ်ဘၣ်နၤ, တုၤလၢတၢ်အုၣ်က့ၤခီၣ်က့ၤနၤလၢ တၢ်နာ်ယ့ၣ်ၡူးခရံာ်အဃိန့ၣ်” လီၤ. (၂ တံၤမသ့း ၃:၁၄, ၁၅) ဖဲအံၤပာ်သူၣ်ပာ်သးလၢ စီၤပီလူးတဲဝဲ စီၤတံၤမသ့းလၢ (၁) နသ့ၣ်ညါတၢ်ကွဲးအသးစီဆှံတဖၣ်, (၂) တၢ်လၢနမၤလိဘၣ်တဖၣ်န့ၣ် နသ့ၣ်ညါလၢ အမ့ၢ်အမ့ၢ်အတီ ဒီး (၃) ကဲထီၣ်ပှၤကူၣ်သ့ကူၣ်ဘၣ်လၢ တၢ်အုၣ်က့ၤခီၣ်က့ၤ ခီဖျိတၢ်နာ်ယ့ၣ်ၡူးတက့ၢ်.

“သ့ၣ်ညါလၢအမ့ၢ် အမ့ၢ်အတီ”

၅. (က) တၢ်ကတိၤလၢ “သ့ၣ်ညါလၢအမ့ၢ် အမ့ၢ်အတီ” န့ၣ်အခီပညီဒ်လဲၣ်. (ခ) စီၤတံၤမသ့း နာ်ဝဲယ့ၣ်ၡူးအဂ့ၢ်လီၤတံၢ်လီၤဆဲးန့ၣ် ပသ့ၣ်ညါဘၣ်ဒ်လဲၣ်.

^၅ နသိၣ်လိနဖိတဖၣ်ထဲ တၢ်မၤအသးဒီး ပှၤအဂ့ၢ်လၢ လံာ်စီဆှံအပူၤန့ၣ် တလၢပှဲၤဒံးဘၣ်. သ့ၣ်နီၣ်ထီၣ်လၢ တၢ်လၢစီၤတံၤမသ့း မၤလိဘၣ်ဝဲတဖၣ်န့ၣ် အဝဲ “သ့ၣ်ညါလၢအမ့ၢ် အမ့ၢ်အတီ” စ့ၢ်ကီးလီၤ. တၢ်ကတိၤလၢ စီၤပီလူးသူဝဲလၢအမ့ၢ် “သ့ၣ်ညါလၢအမ့ၢ် အမ့ၢ်အတီ” န့ၣ်အခီပညီမ့ၢ်ဝဲ “သ့ၣ်ညါလီၤတံၢ်” မ့တမ့ၢ် “နာ်တၢ်တမံၤမံၤ ဒီးနာ်လၢအမ့ၢ် တၢ်မ့ၢ်တၢ်တီနီၢ်နီၢ်လီၤ.” လၢစီၤတံၤမသ့းအ “နီၢ်ဆံးခါလံၤလံၤ” သ့ၣ်ညါဝဲလံာ်စီဆှံလၢ ဧ့ၤဘြံၤကျိာ်တကတြူၢ်လီၤ. လၢခံအဝဲနၢ်ပၢၢ်ထီၣ်ဝဲလၢ ယ့ၣ်ၡူးမ့ၢ်မ့းၡံအၤလီၤ. စီၤတံၤမသ့းအတၢ်နာ် ဆူၣ်ထီၣ်ဝဲတုၤဒၣ်လဲာ် အဝဲဒိးဘျၢထံ ဒီးပိာ်ဝဲစီၤပီလူးအခံ ဒ်မံးၡ့ၣ်နရ့ၣ်တဂၤအသိးလီၤ.

၆. ဒ်သိးနဖိတဖၣ် ကနာ်လံာ်စီဆှံအဂီၢ် နမၤစၢၤအဝဲသ့ၣ်ကသ့ဒ်လဲၣ်.

^၆ ဒ်သိးနဖိတဖၣ်ကတူၢ်လိာ် တၢ်မ့ၢ်တၢ်တီဒီးကအိၣ်ဒီးတၢ်နာ်ဒ် စီၤတံၤမသ့းအသိးအဂီၢ် နမၤစၢၤအဝဲသ့ၣ်ကသ့ဒ်လဲၣ်. အဆိကတၢၢ်န့ၣ် အိၣ်ဒီးတၢ်ဝံသးစူၤတက့ၢ်. ဒ်သိးနဖိတဖၣ် အတၢ်နာ်ကဆူၣ်ထီၣ်အဂီၢ်လိၣ်ဘၣ်ဝဲ တၢ်ဆၢကတီၢ်လီၤ. ဒ်နနာ်တၢ်တမံၤမံၤအသိး တဘၣ်ဆိကမိၣ်လၢနဖိတဖၣ် ကနာ်တၢ်ဒ်နၤအသိးတဂ့ၤ. နဖိတဖၣ်ကဘၣ် “နီၤဖးတၢ်ဂ့ၤဒီးတၢ်အၢအဆၢ” လၢအနီၢ်ကစၢ်ဒၣ်ဝဲလီၤ. (ဖး ဧ့ၤဘြံၤ ၅:၁၄ တက့ၢ်.) လီၤဆီဒၣ်တၢ် ဖိတဖၣ်မ့ၢ်သံကွၢ်တၢ်န့ၣ် မိၢ်ပၢ်တဖၣ် ကဘၣ်ဂုာ်ကျဲးစၢးမၤစၢၤအဝဲသ့ၣ် ဒ်သိးအတၢ်နာ်ကဂၢၢ်ကျၢၤထီၣ်အဂီၢ်လီၤ. ပကတဲသကိး ပၢ်တဂၤအဒိအတဲာ် ဒီးပဟံးန့ၢ်တၢ်မၤလိလၢ အဝဲအအိၣ်ကသ့ဒ်လဲၣ်န့ၣ်လီၤ.

၇, ၈. (က) ပၢ်တဂၤ ဖဲအဝဲသိၣ်လိအဖိမုၣ်အခါ ပာ်ဖျါထီၣ်ဝဲလၢ အအိၣ်ဒီးတၢ်သးစူၤလၢကျဲဒ်လဲၣ်. (ခ) နၤစ့ၢ်ကီး နကဘၣ်ပာ်ဖျါထီၣ်တၢ်သးစူၤလၢ နဖိအဖီခိၣ်လၢအခါဖဲလဲၣ်.

^၇ ဒီပုၢ်ဝဲၢ်ထီမၢၣ်(စ်)န့ၣ် အိၣ်ဒီးအဖိမုၣ်လၢအသးနံၣ်အိၣ် ၁၁ နံၣ်တဂၤလီၤ. အဝဲတဲဝဲလၢ တဘျီတခီၣ် အဖိမုၣ်ဖိသံကွၢ်ဝဲတၢ်သံကွၢ်ဒ်သိးဒီး– “ဒ်သိးတၢ်သးသမူကကဲထီၣ်အဂီၢ် ကစၢ်ယွၤသူဝဲ သးသမူအတၢ်လဲလိာ်အသး တဆီဘၣ်တဆီဧါ. မ့တမ့ၢ် ဒ်သိးတၢ်အိၣ်သးကဂ့ၤထီၣ်အဂီၢ် ဘၣ်မနုၤအဃိ ပတပၣ်ဃုာ်လၢ တၢ်ကရၢကရိတဖၣ်အကျါလဲၣ်. အဒိ, ဘၣ်မနၤအဃိ ပတဟ့ၣ်တၢ်ဖးဘၣ်လဲၣ်.” တဘျီတခီၣ် အဝဲကဘၣ်ပၢၤအသး ဒ်သိးအသုတစံးဆၢဘၣ် အဖိမုၣ်လၢ ကဘၣ်နာ်တၢ်ဒ်အံၤဒ်နုၤတဂ့ၤအဂီၢ်လီၤ. ဒီပုၢ်ဝဲၢ်ထီမၢၣ်(စ်) သ့ၣ်ညါဝဲလၢ ဒ်သိးတၢ်မ့ၢ်တၢ်တီ ကထုးန့ၢ်ပှၤတဂၤအသးအဂီၢ် တလိၣ်ဘၣ်ထဲ တၢ်အုၣ်အသးဖးဒိၣ်တခါဘၣ်, လိၣ်ဘၣ်တၢ်အုၣ်အသး ဆံးဆံးဖိအါမးလီၤ.

^၈ ဒီပုၢ်ဝဲၢ်ထီမၢၣ်(စ်) သ့ၣ်ညါစ့ၢ်ကီးဝဲလၢ ဒ်သိးအဝဲကသိၣ်လိ အဖိမုၣ်အဂီၢ် အဝဲသ့ၣ်ကဘၣ်အိၣ်ဒီး တၢ်သးစူၤလီၤ. တၢ်သူၣ်စူၤသးစူၤန့ၣ် မ့ၢ်တၢ်အရ့ဒိၣ်လၢ ခရံာ်ဖိတဖၣ်အဂီၢ်လီၤ. (ကလီးစဲ ၃:၁၂) ဒီးဒီပုၢ်ဝဲၢ်ထီမၢၣ်(စ်) သ့ၣ်ညါဝဲလၢ ဒ်သိးအဖိမုၣ် အတၢ်နာ်ကဂၢၢ်ကျၢၤအဂီၢ် အဝဲသ့ၣ်ကဘၣ်ထဲးဂံၢ်ထဲးဘါ ဒီးကဘၣ်တဲသကိးတၢ်ဒီးအီၤအါမးလီၤ. အဝဲသ့ၣ်ကဘၣ်ဟ့ၣ်တၢ်အုၣ်အသး ဒ်သိးအဖိမုၣ် ကနာ်ဝဲတၢ်လၢအမၤလိဘၣ်ဝဲလၢ လံာ်စီဆှံအပူၤတဖၣ်န့ၣ်လီၤ. ဒီးအဝဲတဲဝဲလၢ– “လီၤဆီဒၣ်တၢ် ယၤဒီးယမါ ပအဲၣ်ဒိးသ့ၣ်ညါလၢ တၢ်လၢပဖိမုၣ်မၤလိဘၣ်ဝဲတဖၣ် မ့ၢ်အနၢ်ပၢၢ်ဝဲ ဒီးနာ်ဝဲနီၢ်နီၢ်ဧါ. အဝဲမ့ၢ်သံကွၢ်တၢ်န့ၣ် ပသးခု. ပမ့ၢ်တဲတီတီန့ၣ် အဝဲမ့ၢ်တူၢ်လိာ်ဝဲတဘျီဃီ ဒီးမ့ၢ်တသံကွၢ်တၢ်နီတမံၤန့ၣ် ပကဘၣ်ယိၣ်တၢ်လၢအဂီၢ်လီၤ.”

၉. ဒ်သိးနဖိကနာ်လံာ်စီဆှံအဂီၢ် နမၤစၢၤအီၤကသ့ဒ်လဲၣ်.

^၉ မိၢ်ပၢ်တဖၣ်မ့ၢ်သိၣ်လိအဖိလၢ တၢ်သးစူၤအပူၤန့ၣ် လၢခံကယီကယီ အဖိတဖၣ်ကနၢ်ပၢၢ်ထီၣ်ဝဲ တၢ်နာ် “အဒီၣ်တူာ်, ဒီးအထီ, ဒီးအလီၤဆၢၣ်, ဒီးအထီၣ်ထီ” လီၤ. (အ့းဖ့းစူး ၃:၁၈) ပသိၣ်လိပဖိတဖၣ် တၢ်ဂ့ၢ်လၢအကြၢးဒီး အဝဲသ့ၣ်အသးနံၣ် ဒ်သိးအဝဲသ့ၣ် နၢ်ပၢၢ်ဝဲကညီအဂီၢ် သ့ဝဲလီၤ. အဝဲသ့ၣ်မ့ၢ်နာ်ဝဲ တၢ်လၢအမၤလိဘၣ်ဝဲတဖၣ်န့ၣ် ကမၤစၢၤအီၤဒ်သိး ကဆၢထၢၣ်ဂၢၢ်ကျၢၤလၢအတၢ်နာ် လၢပှၤဂၤဒီးအတံၤသကိးလၢကၠိတဖၣ် အမဲာ်ညါန့ၣ်လီၤ. (၁ ပ့းတရူး ၃:၁၅) အဒိ, ဖဲပသံအခါ တၢ်ကမၤအသးဒီးပှၤဒ်လဲၣ်န့ၣ် နဖိတဲနၢ်ပၢၢ်ပှၤဂၤလၢ လံာ်စီဆှံအပူၤသ့ဧါ. မ့ၢ်အဝဲသ့ၣ်နၢ်ပၢၢ်ဝဲ တၢ်လၢလံာ်စီဆှံတဲဝဲတဖၣ်န့ၣ်ဧါ.a (ကွၢ်တၢ်ဂ့ၢ်အဘျဲၣ်တက့ၢ်.) ဒ်သိးနဖိသ့ၣ်တဖၣ် အတၢ်နာ်လံာ်စီဆှံကအါထီၣ်အဂီၢ် နကဘၣ်မၤစၢၤအဝဲသ့ၣ် လၢတၢ်သူၣ်စူၤသးစူၤအပူၤလီၤ. ဘၣ်ဆၣ် နမ့ၢ်မၤဒ်န့ၣ်န့ၣ် ကကဲဘျုးဝဲလီၤ.—၅ မိၤၡ့ ၆:၆, ၇.

၁၀. ဖဲနသိၣ်လိနဖိတဖၣ်အခါ တၢ်လၢအရ့ဒိၣ်န့ၣ် မ့ၢ်မနုၤလဲၣ်.

^၁၀ ဒ်သိးနဖိတဖၣ် အတၢ်နာ်ကဒိၣ်ထီၣ်အဂီၢ် နဒိနတဲာ်စ့ၢ်ကီး မ့ၢ်တၢ်လၢအရ့ဒိၣ်လီၤ. စတဲးဖၢၣ်နံၤ လၢအိၣ်ဒီးအဖိမုၣ်သၢဂၤန့ၣ် တဲဝဲလၢ– “လၢယဖိအနီၢ်ဆံးလံၤလံၤန့ၣ် ယသံကွၢ်လီၤယသးလၢ ‘ဘၣ်မနုၤအဃိ ယနာ်လၢ ယဟိဝၤယွၤအိၣ်အနီၢ်ကီၢ်လဲၣ် ဒီးယဟိဝၤယွၤအတၢ်အဲၣ်တၢ်ကွံ ဒီးအတၢ်သိၣ်တၢ်သီတဖၣ် မ့ၢ်အမ့ၢ်အတီန့ၣ် မ့ၢ်ယတဲဘၣ် ယဖိတဖၣ်ဧါ. မ့ၢ်ယဖိတဖၣ်ထံၣ်ဝဲလၢ ယအဲၣ်ယဟိဝၤယွၤနီၢ်နီၢ်ဧါ.’ ယနီၢ်ကစၢ်ဒၣ်ယဲ ယမ့ၢ်တနာ်ဘၣ်န့ၣ် ယမုၢ်လၢ်လၢ ယဖိတဖၣ်ကနာ်ဝဲန့ၣ်တသ့ဘၣ်.”