ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအီကူး ၅–၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ တံၤမသ့း ၁–၄
“ယွၤဟ့ၣ်လီၤပှၤလၢ ပသးသုၣ်တမ့ၢ်ဘၣ်”
(၂ တံၤမသ့း ၁:၇) အဂ့ၢ်ဒ်အံၤ, ယွၤဟ့ၣ်လီၤပှၤလၢ ပသးသုၣ်တမ့ၢ်ဘၣ်, မ့ၢ်ပသးဘၣ်ဃးဒီး တၢ်စိတၢ်ကမီၤ, ဒီးတၢ်အဲၣ်တၢ်ကွံ, ဒီးတၢ်သူၣ်ဂၢၢ်သးကျၢၤလီၤ.
တၢး၀၉ ၅/၁၅ ကဘျံးပၤ ၁၅ အဆၢ ၉
သးစၢ်သ့ၣ်ဧၢ, ပာ်ဖျါထီၣ် နတၢ်သ့ထီၣ်ဘၣ်ထီၣ်
၉ စီၤပီလူး မၤစၢၤစီၤတံၤမသ့း ခီဖျိဒုးသ့ၣ်နီၣ်ဝဲလၢ– “ယွၤဟ့ၣ်လီၤပှၤလၢ ပသးသုၣ်တမ့ၢ်ဘၣ်, မ့ၢ်ပသးဘၣ်ဃးဒီး တၢ်စိတၢ်ကမီၤ, ဒီးတၢ်အဲၣ်တၢ်ကွံ, ဒီးတၢ်သူၣ်ဂၢၢ်သးကျၢၤလီၤ.” (၂ တံၤ. ၁:၇) “တၢ်သူၣ်ဂၢၢ်သးကျၢၤ” န့ၣ်ပၣ်ဃုာ်ဒီး တၢ်ကွၢ်ထံဆိကမိၣ်တၢ် ဒီးတၢ်သ့ပဲာ်ထံနီၤဖးတၢ်လီၤ. တကးဒံးဘၣ် ပၣ်ဃုာ်စ့ၢ်ကီးဒီး တၢ်သ့တၢ်ဘၣ်လၢ နကထံၣ်တၢ်အိၣ်အသး ဒ်အအိၣ်နီၢ်ကီၢ်အသိး ဒီးတမ့ၢ်ဒ်နမုၢ်လၢ်အသိးဘၣ်. ပှၤသးစၢ်တနီၤလၢ တဒိၣ်တုာ်ခိၣ်ပှဲၤ ဒီးအိၣ်ဒီးအသးသုၣ် မ့တမ့ၢ် ပျံၤတၢ်တဖၣ်န့ၣ် ဂုာ်ကျဲးစၢး မၤလီၤမၢ်ကွံာ် အတၢ်သူၣ်ကိၢ်သးဂီၤ ခီဖျိ မံဝဲဆူၣ်ဆူၣ် မ့တမ့ၢ် ကွၢ်ဝဲတၢ်ဂီၤမူ, အီသံး, သူကမၣ်ကသံၣ်မူၤဘှိး, မၤဖၤထံၣ်ထီဘိ မ့တမ့ၢ် မၤကမၣ်မုၣ်ကမၣ်ခွါလီၤ. ခရံာ်ဖိတဖၣ် ဘၣ်တၢ်ဟ့ၣ်ပလီၢ် အဝဲသ့ၣ်လၢက “ဘၣ်ညိကွံာ် တၢ်တယူးတယီၣ်ဘၣ်ယွၤ, ဒီးတၢ်သးကွံဘၣ်ဃးဒီးဟီၣ်ခိၣ်, ဒီးလၢပဘၣ်အိၣ်ပဘၣ်ဆိးလၢ အအံၤတဃၣ် အိၣ်ဒီးတၢ်ပာ်ပသးသပှၢ်သပှၢ်, အိၣ်ဒီးပသူၣ်တီပသးလိၤ, ဒီးတၢ်ယူးယီၣ်ယွၤ” လီၤ.—တံတူး ၂:၁၂.
(၂ တံၤမသ့း ၁:၈) မၤသးဒ်န့ၣ်ဒီး, တၢ်အုၣ်အသး ဘၣ်ဃးဒီး ပကစၢ်မ့ၢ်ဂ့ၤ, ယၤအပှၤဘၣ်စၢဃာ်မ့ၢ်ဂ့ၤ, နသုတမဲာ်ဆှးတဂ့ၤ. မ့မ့ၢ်ဒိးဃုာ်တၢ်နးတၢ်ဖှီၣ်ဒီးယၤလၢ တၢ်သးခုအကစီၣ်အဃိ, ဒ်ယွၤအစိအကမီၤအသိးတက့ၢ်.
တၢး၀၃ ၃/၁ ကဘျံးပၤ ၉ အဆၢ ၇
‘ပာ်ဆူၣ်နသးဒီး တံးတဟီၣ်တက့ၢ်’
၇ ဖဲစီၤပီလူးကွဲးဝဲလံာ်ဆူ စီၤတံၤမသ့းအိၣ်အခါ တဲဝဲလၢ– “ယွၤဟ့ၣ်လီၤပှၤလၢ ပသးသုၣ်တမ့ၢ်ဘၣ်, မ့ၢ်ပသးဘၣ်ဃးဒီး တၢ်စိတၢ်ကမီၤ, ဒီးတၢ်အဲၣ်တၢ်ကွံ, ဒီးတၢ်သူၣ်ဂၢၢ်သးကျၢၤလီၤ. မၤသးဒ်န့ၣ်ဒီး, တၢ်အုၣ်အသးဘၣ်ဃးဒီး ပကစၢ်မ့ၢ်ဂ့ၤ, ယၤအပှၤဘၣ်စၢဃာ်မ့ၢ်ဂ့ၤ, နသုတမဲာ်ဆှးတဂ့ၤ.” (၂ တံၤမသ့း ၁:၇, ၈; မၢ်ကူး ၈:၃၈) ဖဲပဖး တၢ်ကတိၤတဖၣ်အံၤအခါ ပကဘၣ်သံကွၢ်လီၤပသးလၢ– ‘မ့ၢ်ယမဲာ်ဆှးလၢ ယတၢ်စူၢ်တၢ်နာ်အဃိဧါ မ့တမ့ၢ် ယအိၣ်ဒီး တၢ်သူၣ်ဒူသးဒူဧါ. လၢယတၢ်မၤလီၢ် (မ့တမ့ၢ် လၢကၠိ) န့ၣ်မ့ၢ်ပှၤသ့ၣ်ညါယၤလၢ ယမ့ၢ်ယဟိဝၤ ပှၤအုၣ်အသးတဂၤဧါ မ့တမ့ၢ် ယမၤဒ်သိး ပှၤသုတသ့ၣ်ညါယၤ တဂ့ၤအဂီၢ်ဧါ. ယလီၤဆီဒီးပှၤအဂၤတဖၣ်အဃိ မ့ၢ်ယမဲာ်ဆှးဧါ မ့တမ့ၢ် ယပာ်ကဖၢလၢယသးလၢ ယတၢ်ရ့လိာ်သးဒီး ယဟိဝၤယွၤအဃိဧါ.’ ပှၤတဂၤဂၤ မ့ၢ်အိၣ်ဒီး တၢ်ထံၣ်အတဂ့ၤလၢ ဘၣ်ဃးဒီး တၢ်စံၣ်တဲၤတဲလီၤ တၢ်သးခုကစီၣ်တၢ်မၤ မ့တမ့ၢ် တၢ်အိၣ်လီၤဆီဒီးပှၤဂၤန့ၣ် မ်အသ့ၣ်နီၣ်ထီၣ် ယဟိဝၤယွၤ အတၢ်ဟ့ၣ်ကူၣ်လၢ အဟ့ၣ်ဝဲစီၤယိၤၡူလၢအမ့ၢ် “ပာ်ဆူၣ်နသး, ဒီးတံးတဟီၣ်တက့ၢ်.” နတံၤသကိးလၢကၠိ မ့တမ့ၢ် ပှၤလၢနတၢ်မၤလီၢ်တဖၣ် အတၢ်ထံၣ်န့ၣ် အရ့တဒိၣ်ဘၣ်. တၢ်လၢအရ့ဒိၣ်ကတၢၢ်န့ၣ် မ့ၢ်ဝဲယဟိဝၤယွၤ ဒီးယ့ၣ်ၡူး အတၢ်ထံၣ်န့ၣ် တဘၣ်သးပ့ၤနီၣ်တဂ့ၤ.—ကလၤ. ၁:၁၀.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ တံၤမသ့း ၂:၃, ၄) မ်ဒ်န့ၣ်ဒီး, ဒိးတၢ်နးတၢ်ဖှီၣ်, ဒ်ယ့ၣ်ၡူးခရံာ်အသုးဖိလၢ အဂ့ၤတဂၤအသိးန့ၣ်တက့ၢ်. ၄ ပှၤလၢအဒုးတၢ်န့ၣ်, ဒ်သိးအကမၤဘၣ်ပှၤလၢ အမၢအဒုးတၢ်တဂၤအသးဒီး, တမၤသဘံၣ်ဘုၣ်အသးဒီး တၢ်ဖံးတၢ်မၤဘၣ်ဃးဒီး အအံၤတဃၣ်နီတဂၤဘၣ်.
ဃုတၢ်ထူးတၢ်တီၤလၢ အကဲဘျုးနီၢ်နီၢ်တက့ၢ်
၁၃ စီၤတံၤမသ့းန့ၣ် မ့ၢ်ပှၤတဂၤလၢ အိၣ်ဒီးတၢ်နာ်စ့ၢ်ကီးလီၤ. စီၤပီလူးကိးဝဲ စီၤတံၤမသ့းလၢ “ယ့ၣ်ၡူးခရံာ်အသုးဖိလၢ အဂ့ၤတဂၤ” လီၤ. အဝဲတဲဝဲ– “ပှၤလၢအဒုးတၢ်န့ၣ်, ဒ်သိးအကမၤဘၣ်ပှၤလၢ အမၢအဒုးတၢ်တဂၤ အသးဒီး, တမၤသဘံၣ်ဘုၣ်အသးဒီး တၢ်ဖံးတၢ်မၤဘၣ်ဃးဒီး အအံၤတဃၣ် နီတဂၤဘၣ်.” (၂ တံၤမသ့း ၂:၃, ၄ ) မုၢ်မဆါတနံၤအံၤ ပှၤလၢအမၤယွၤအတၢ်မၤလၢ ဆၢကတီၢ်လၢပှဲၤ အဂၤတကကွဲၢ်ဘျဲၣ်ဃုာ်ဒီး ယ့ၣ်ၡူးအပျဲၢ်အဘီၣ်လၢအဂၤခဲလၢာ် ဂုာ်ကျဲးစၢးအိၣ်မူထွဲဝဲဒ် စီၤပီလူး အတၢ်ဟ့ၣ်ကူၣ်အသိးလီၤ. အဝဲသ့ၣ် ဘၣ်ဟးဆှဲးဝဲတၢ်လ့ပစီဒီး ဟီၣ်ခိၣ်တၢ်သူၣ်လီသးကွံတဖၣ်လီၤ. အဝဲသ့ၣ် နၢ်ပၢၢ်ဝဲလံာ်စီဆှံတၢ်ဟ့ၣ်ကူၣ်လၢအမ့ၢ်– “ပှၤလၢအလိၢ်စ့န့ၣ် ကကဲထီၣ်စ့ကစၢ်အကုၢ်လီၤ.” (ကတိၤဒိ ၂၂:၇) မုၣ်ကီၤလံၢ်အဲၣ်ဒိးဝဲလၢ ပကသူပတၢ်ဆၢကတီၢ်ဒီး ပဂံၢ်ပဘါတဖၣ်လၢ ပကဃုဟီၣ်ခိၣ် အတၢ်ထူးတၢ်တီၤအဂီၢ်လီၤ. ပှၤတနီၤနီၤန့ၣ် ဃ့လိၢ်စ့အါအါလၢ ကပှ့ၤဟံၣ်, ပှ့ၤကါ, ဃုတၢ်ကူၣ်ဘၣ်ကူၣ်သ့ မ့တမ့ၢ် လၢတၢ်တ့တၢ်ဖျီအဃိ အကမၢ်ထီၣ်ဝဲဒီဒူၣ်ညါလီၤ. ပမ့ၢ်တပလီၢ်ပသးန့ၣ် ပကမၢ်ကထီၣ် အါနံၣ်အါလါလီၤ. ဘၣ်ဆၣ် ပမ့ၢ်အိၣ်မူယိယိဖိ, မ့ၢ်တမၤထီၣ်ကမၢ်ဘၣ် ဒီးပမ့ၢ်တသူစ့အါအါဘၣ်န့ၣ် မ့ၢ်ဒၣ်ပပာ်ဖျါထီၣ်လၢ ပအိၣ်ဒီးတၢ်ကူၣ်သ့လီၤ. ဒီးပမ့ၢ်မၤဒ်န့ၣ်န့ၣ် လၢပကကဲဘၣ်ဟီၣ်ခိၣ်အတၢ်ထူးတၢ်တီၤ အကုၢ်အလီၢ် ပကမၤဘၣ်ယဟိဝၤယွၤအတၢ်မၤလၢ တၢ်သဘျ့အပူၤလီၤ.—၁ တံၤမသ့း ၆:၁၀.
(၂ တံၤမသ့း ၂:၂၃) မ့မ့ၢ်တၢ်သံကွၢ်ကလီကလီ, ဒီးတဂိာ်တသီၣ်ဘၣ်န့ၣ်, ဟးဆှဲးအီၤတက့ၢ်. အဂ့ၢ်ဒ်အံၤ, နသ့ၣ်ညါလၢအမၤအိၣ်ထီၣ် တၢ်အ့ၣ်လိာ်ဆိးက့လိာ်န့ၣ်လီၤ.
ယဟိဝၤယွၤ အပှၤဂီၢ်မုၢ်တဖၣ် “မ်အဟးဆှဲး တၢ်တတီတလိၤဘၣ်တက့ၢ်”
၁၀ မုၢ်မဆါတနံၤအံၤ ပှၤလၢအစူးကွံာ်ညိကွံာ် တၢ်နာ်တဖၣ် ပတညီနုၢ်ထံၣ်ဘၣ်အီၤလၢ တၢ်အိၣ်ဖှိၣ်ပူၤဘၣ်. ဘၣ်ဆၣ် ပနၢ်ဟူဘၣ်တၢ်သိၣ်လိလၢ အထီဒါလိာ်အသးဒီး လံာ်စီဆှံသ့ဝဲလီၤ. တၢ်သိၣ်လိတဖၣ်အံၤ မ့ၢ်ဟဲလၢတၢ်လီၢ်ဖဲလဲၣ်ဂ့ၤ, ဖဲလဲၣ်ဂ့ၤ ပကဘၣ်ဂ့ၢ်လိာ်ကွံာ်အီၤတဘျီဃီလီၤ. ပမ့ၢ်ရ့ဒီး ပှၤလၢအစူးကွံာ်ညိကွံာ်တၢ်နာ်တဖၣ် ခီဖျိပတဲသကိးတၢ်ဒီးအီၤ မဲာ်သကိးမဲာ်မ့ၢ်ဂ့ၤ, လၢအ့ထၢၣ်နဲးအပူၤမ့ၢ်ဂ့ၤ လၢကျဲအဂၤတမံၤမံၤမ့ၢ်ဂ့ၤန့ၣ် ပမ့ၢ်ပှၤလၢတအိၣ်ဒီး တၢ်ကူၣ်သ့ဘၣ်န့ၣ်လီၤ. ပမ့ၢ်လဲၤတဲသကိးတၢ်ဒီးအီၤခီဖျိလၢ ပအဲၣ်ဒိးမၤစၢၤအဝဲသ့ၣ်ဒၣ်လဲာ် မ့ၢ်ဒၣ်ပတဒိကနၣ် ယဟိဝၤယွၤ အကလုၢ်ဘၣ်န့ၣ်လီၤ. ကစၢ်ယွၤ တဲဘၣ်ပှၤလၢ ပကဘၣ်ဟးဆှဲး ပှၤလၢအစူးကွံာ်ညိကွံာ်တၢ်နာ် ဒီးပတဘၣ်မၤဘၣ်ဃးပသး ဒီးအဝဲသ့ၣ်နီတစဲးဘၣ်.
ယဟိဝၤယွၤ အပှၤဂီၢ်မုၢ်တဖၣ် “မ်အဟးဆှဲး တၢ်တတီတလိၤဘၣ်တက့ၢ်”
၃ ဖဲ ၂ တံၤမသ့း ၂:၁၉ အပူၤန့ၣ် စီၤပီလူး တဲဝဲ “တၢ်အခီၣ်ထံးဘၣ်ဃးဒီး ယွၤအိၣ်ဂၢၢ်အိၣ်ကျၢၤ” အဂ့ၢ်လီၤ. ဒီးတၢ်ခီၣ်ထံးအလိၤန့ၣ် ဘၣ်တၢ်စိးပျၤပာ် တၢ်ဂ့ၢ်ခံထံၣ်လီၤ. တၢ်ဂ့ၢ်တၢတထံၣ်န့ၣ် ဘၣ်တၢ်ဟံးန့ၢ်အီၤလၢ ၄ မိၤၡ့ ၁၆:၅ လၢအတဲဝဲ ယဟိဝၤယွၤ သ့ၣ်ညါ “ပှၤလၢအမ့ၢ်အတၢ်” လီၤ. ဘၣ်ဆၣ် တၢ်ဂ့ၢ်ခံထံၣ်တထံၣ်လၢအမ့ၢ် “ကယဲၢ်ပှၤလၢအပှ့ၤဘၣ် ကစၢ်အမံၤ တဂၤလၢ်လၢ်န့ၣ်, မ်အဟးဆှဲး တၢ်တတီတလိၤ” တက့ၢ်. တၢ်ကတိၤအံၤ အဝဲဟံးန့ၢ်ဝဲဖဲလဲၣ်. ပှၤတနီၤကီလၢ ကနၢ်ပၢၢ်ဝဲတၢ်ဂ့ၢ်အံၤလီၤ. ဘၣ်မနုၤအဃိလဲၣ်.
၄ စီၤပီလူး အတၢ်ကတိၤတဖၣ်အပူၤန့ၣ် ပာ်ဖျါထီၣ်ဝဲလၢ တၢ်ကတိၤအံၤ ဟံးန့ၢ်ဝဲလၢ တၢ်လီၢ်အဂၤ လၢဧ့ၤဘြံၤလံာ်စီဆှံတကတြူၢ်အပူၤလီၤ. ဘၣ်ဆၣ် လီၤဂာ်လၢ လံာ်စီဆှံအဆၢလၢ ကလီၤပလိာ်ဒီး တၢ်ကတိၤအံၤန့ၣ် တအိၣ်ဘၣ်. အဃိ ဖဲအဝဲတဲဝဲလၢ “ကယဲၢ်ပှၤလၢအပှ့ၤဘၣ် ကစၢ်အမံၤ တဂၤလၢ်လၢ်န့ၣ်, မ်အဟးဆှဲး တၢ်တတီတလိၤ” တက့ၢ်အခါ အဝဲအဲၣ်ဒိးတဲဝဲ တၢ်မနုၤလဲၣ်. စီၤပီလူး တဲဝဲတၢ်ဂ့ၢ်တၢတထံၣ်န့ၣ် မ့ၢ်ဝဲစီၤကိၤရး အတၢ်ပူထီၣ်ထီဒါအဂ့ၢ်လၢ ဘၣ်တၢ်ပာ်ဖျါထီၣ်အီၤဖဲ ၄ မိၤၡ့ အဆၢဒိၣ် ၁၆ အပူၤလီၤ. တၢ်ဂ့ၢ်ခံထံၣ်တထံၣ်စ့ၢ်ကီး ဘၣ်သ့ၣ်သ့ၣ် ကအဲၣ်ဒိးတဲဝဲ တၢ်မၤအသးအံၤ စ့ၢ်ကီးလီၤ.
၅ စီၤဒၤသၣ် ဒီးစီၤအဘံရၣ်န့ၣ် ပၣ်ဃုာ်လၢ စီၤကိၤရး အတၢ်ပူထီၣ်ထီဒါအပူၤလီၤ. (၄ မိၤၡ့ ၁၆:၁-၅) အဝဲသ့ၣ်တဖၣ်န့ၣ် တယူးယီၣ်ပာ်ကဲ စီၤမိၤၡ့ဘၣ် ဒီးတတူၢ်လိာ်ဝဲ စီၤမိၡ့ အတၢ်တီခိၣ်ရိၤမဲလၢ အဟဲလၢကစၢ်ယွၤ အအိၣ်စ့ၢ်ကီးဘၣ်. ပှၤပူထီၣ်ထီဒါတၢ်တဖၣ် အိၣ်ဒံးလၢပှၤအံၣ်စရ့လးဖိတဖၣ် အကျါအဃိ တၢ်ဘၣ်ယိၣ်အလီၢ်အိၣ်ဝဲလီၤ. တချုးလၢ ယဟိဝၤယွၤပာ်ဖျါထီၣ် ပှၤလၢအဘူၣ်ထီၣ်ဘါထီၣ် အီၤလၢတၢ်သးတီအပူၤ ဒံးဘၣ်န့ၣ် အဝဲဟ့ၣ်လီၤဝဲ တၢ်မၤလိာ်ယိယိဖိတခါလီၤ.
၆ လံာ်စီဆှံ ပာ်ဖျါထီၣ်ဝဲဒ်အံၤ “ယွၤကတိၤတၢ်ဒီးစီၤမိၤၡ့, ဒီးစံးဝဲဒၣ်, ကတိၤတၢ်ဒီးတၢ်အိၣ်ဖှိၣ်, ဒီးစံးဘၣ်အီၤ, ဟးထီၣ်ကွံာ်လၢ တၢ်ဝးတရံးစီၤကိၤရး, ဒီးစီၤဒၤသၣ်, ဒီးစီၤအဘံရၣ်အဒဲတက့ၢ်.” စီၤမိၤၡ့ဒီး ပှၤအံၣ်စရ့လးဖိ အပှၤသူၣ်က့သးပှၢ်တဖၣ် လဲၤဝဲလၢ စီၤဒၤသၣ် ဒီးစီၤအဘံရၣ်အအိၣ်လီၤ. ဝံၤဒီးတဲဘၣ်ဝဲ ပှၤဂီၢ်မုၢ်တဖၣ်လၢ “ဟးထီၣ်ကွံာ်လၢ်လၢ ပှၤအၢတဖၣ်အံၤအဒဲတၢ်. ဒီးထိးအတၢ်နီတမံၤတဂ့ၤ, သုကဘၣ်တၢ်အီၣ်ကွံာ်ဘၣ်ဖုးသုလၢ အတၢ်ဒဲးဘးခဲလၢာ်အပူၤလီၤ.” ဒီးအဝဲသ့ၣ်တဖၣ် “ဟးထီၣ်ကွံာ်ဝဲလၢစီၤကိၤရး, စီၤဒၤသၣ်, ဒီးစီၤအဘံရၣ်အဒဲကိးခီဒဲး” တဘျီဃီလီၤ. (၄ မိၤၡ့ ၁၆:၂၃-၂၇) ဒီးယဟိဝၤယွၤ မၤဟးဂီၤကွံာ်ဝဲ ပှၤလၢအထီဒါတၢ်ခဲလၢာ်လီၤ. မ့မ့ၢ်ပှၤလၢအိၣ်ဒီးတၢ်သးတီတဖၣ် ပူၤဖျဲးဝဲလီၤ. ဘၣ်မနုၤအဃိလဲၣ်. မ့ၢ်လၢအဝဲသ့ၣ် အဟးဆှဲး တၢ်တတီတလိၤဘၣ် ခီဖျိအိၣ်ဝဲယံၤယံၤဒီး ပှၤလၢအပူထီၣ်ထီဒါတၢ်တဖၣ်အဃိလီၤ.
၇ ဖဲ စီၤပီလူး ကွဲးဝဲလၢ ယဟိဝၤယွၤ သ့ၣ်ညါ “ပှၤလၢအမ့ၢ်အတၢ်” အခါ မ့ၢ်ဒၣ်အဝဲယၢၤထီၣ်ဝဲ ၄ မိၤၡ့ ၁၆:၅ န့ၣ်လီၤ. ဒီးဖဲအဝဲ ကွဲးဝဲလၢ “ကယဲၢ်ပှၤလၢအပှ့ၤဘၣ် ကစၢ်အမံၤ တဂၤလၢ်လၢ်န့ၣ်, မ်အဟးဆှဲး တၢ်တတီတလိၤ” တက့ၢ်အခါ ကမ့ၢ်အဝဲ ယၢၤထီၣ်ဝဲ တၢ်မၤအသးလၢ ၄ မိၤၡ့ ၁၆:၅, ၂၃-၂၇ အပူၤလီၤ. လၢတၢ်န့ၣ်အဃိ ပတဲသ့လၢ တၢ်ဂ့ၢ်ခံထံၣ်လၢအိၣ်လၢ ၂ တံၤမသ့း ၂:၁၉ အပူၤန့ၣ် ပာ်ဖျါထီၣ်ဝဲ တၢ်မၤအသးတမံၤဃီအဂ့ၢ်န့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် ပမၤလိန့ၢ်တၢ်မနုၤလဲၣ်. ပသ့ၣ်ညါဘၣ်လၢ ယဟိဝၤယွၤန့ၣ် သ့ၣ်ညါဝဲတၢ်အိၣ်လၢပသးပူၤလီၤ. မတၤတဖၣ် မ့ၢ်အခ့အပှၤလၢအတီအလိၤလဲၣ်န့ၣ် အဝဲသ့ၣ်ညါဝဲလီၤ. တကးဒံးဘၣ် အဝဲအဲၣ်ဒိးလၢ အခ့အပှၤတဖၣ် ကအိၣ်ယံၤယံၤဒီး ပှၤအၢပှၤသီတဖၣ်လီၤ.
တၢ်ဖးလံာ်စီဆှံ
(၂ တံၤမသ့း ၁:၁-၁၈) ယ့ၣ်ၡူးခရံာ် အပှၤတၢ်မၢဖိ, ကဲထီၣ်လၢယွၤအသး ဒ်တၢ်စံးပာ်ဘၣ်ဃးဒီး တၢ်မူအိၣ်လၢ ယ့ၣ်ၡူးခရံာ်အပူၤအသိးန့ၣ်, ယၤစီၤပီလူးအံၤ, ၂ ယစံးဘၣ်ယဖိလၢ ယအဲၣ်အီၤ, စီၤတံၤမသ့း, မ်တၢ်ဘျုးတၢ်ဖှိၣ်, တၢ်သူၣ်ကညီၤတၢ်သးကညီၤ, တၢ်ဃူတၢ်ဖိးလၢ ပၢ်ယွၤ ဒီးပကစၢ်ယ့ၣ်ၡူးခရံာ်န့ၣ်, ဘၣ်နၤတက့ၢ်. ၃ ယစံးထီၣ်ပတြၢၤယွၤ အဘျုးအဖှိၣ်, လၢယမၤအတၢ်လၢ ယထူယထံး, လၢယသးလၢအသ့ၣ်ညါဒၣ်တၢ်အဂ့ၤ, လၢယသ့ၣ်နီၣ်ထီၣ်က့ၤနၤတဘိယူၢ်ဃီ လၢယတၢ်ထုကဖၣ်လၢ မုၢ်ဆါဆဲးလၢမုၢ်နၤအဃိလီၤ. ၄ ယသ့ၣ်နီၣ်ထီၣ်က့ၤ နမဲာ်ထံလီၤသတးဒီး, ယဆၢထံၣ်ဘၣ်နၤဒိၣ်ဒိၣ်ကလဲာ်, ဒ်သိးယတၢ်သးခု ကလၢထီၣ်ပှဲၤထီၣ်လီၤ. ၅ ဒီးယသ့ၣ်နီၣ်ထီၣ်က့ၤ တၢ်နာ်နီၢ်နီၢ်, လၢအအိၣ်လၢနပူၤ, ဒီးအိၣ်ဆိလၢနဖံနီၢ်လိၤအ့ၣ်အပူၤ, ဒီးလၢနမိၢ်နီၢ်အူၤနံက့ၤအပူၤ, ဒီးယနာ်နီၢ်နီၢ်လၢ အအိၣ်စ့ၢ်ကီးလၢနပူၤန့ၣ်လီၤ. ၆ မၤသးဒ်န့ၣ်ဒီး, ယဒုးသ့ၣ်နီၣ်ထီၣ်နၤ, ဒ်သိးနကထိၣ်ဂဲၤထီၣ်တၢ်ဟ့ၣ်လၢ အအိၣ်လၢနပူၤ လၢယပာ်ယစုလၢနလိၤအဃိလီၤ. ၇ အဂ့ၢ်ဒ်အံၤ, ယွၤဟ့ၣ်လီၤပှၤလၢ ပသးသုၣ်တမ့ၢ်ဘၣ်, မ့ၢ်ပသးဘၣ်ဃးဒီး တၢ်စိတၢ်ကမီၤ, ဒီးတၢ်အဲၣ်တၢ်ကွံ, ဒီးတၢ်သူၣ်ဂၢၢ်သးကျၢၤလီၤ. ၈ မၤသးဒ်န့ၣ်ဒီး, တၢ်အုၣ်အသး ဘၣ်ဃးဒီး ပကစၢ်မ့ၢ်ဂ့ၤ, ယၤအပှၤဘၣ်စၢဃာ်မ့ၢ်ဂ့ၤ, နသုတမဲာ်ဆှးတဂ့ၤ. မ့မ့ၢ်ဒိးဃုာ်တၢ်နးတၢ်ဖှီၣ် ဒီးယၤလၢ တၢ်သးခုအကစီၣ်အဃိ, ဒ်ယွၤအစိအကမီၤ အသိးတက့ၢ်. ၉ အဝဲဒၣ်န့ၣ် အုၣ်က့ၤခီၣ်က့ၤပှၤ, ဒီးကိးပှၤလၢတၢ်ကိးအစီအဆှံ, ဒ်ပတၢ်ဖံးတၢ်မၤအသိးတမ့ၢ်ဘၣ်. မ့ၢ်ဒ်အတၢ်ကူၣ်ပာ်ဒၣ်ဝဲ, ဒီးအဘျုးအဖှိၣ်လၢ အဟ့ၣ်ပှၤလၢယ့ၣ်ၡူးခရံာ်အပူၤ လၢတၢ်လီၤထူလီၤယိာ်, ၁၀ ဒီးခဲကနံၣ်အံၤ အိၣ်ဖျါထီၣ်လၢ တၢ်အုၣ်က့ၤခီၣ်က့ၤပှၤ, ကစၢ်ယ့ၣ်ၡူးခရံာ် အတၢ်အိၣ်ဖျါအဃိ, ပှၤလၢအမၤဟးဂီၤတၢ်သံဒီး လီၣ်ဖျါထီၣ်တၢ်မူဒီး တၢ်သံတသ့ဘၣ်, လၢတၢ်သးခုအကစီၣ်အပူၤလီၤ. ၁၁ လၢတၢ်အံၤအဂီၢ် တၢ်ပာ်ယၤလၢ ပှၤစံၣ်တဲၤတဲလီၤတၢ်, ဒီးပှၤတၢ်မၢဖိ, ဒီးပှၤသိၣ်လိပှၤကလုာ်တဖၣ်လီၤ. ၁၂ မၤသးဒ်န့ၣ်ဒီး, ယဘၣ်တၢ်နးတၢ်ဖှီၣ် တဖၣ်အံၤလီၤ. ဘၣ်ဆၣ်ဒီး, ယမဲာ်တဆှးဘၣ်. အဂ့ၢ်ဒ်အံၤ, ယစူၢ်က့ၤနာ်က့ၤ မတၤမတၤန့ၣ် ယသ့ၣ်ညါ, ဒီးယနာ်လၢအကပၢၤတၢ်လၢ ယပာ်လၢအစုပူၤသ့ဝဲ တုၤမုၢ်နံၤတနံၤန့ၣ်လီၤ. ၁၃ တၢ်ကတိၤအဂ့ၤအဘၣ်လၢ နနၢ်ဟူလၢယၤအံၤ အဂ့ၢ်မိၢ်ပှၢ်န့ၣ် ဟံးဃာ်အီၤလၢ တၢ်နာ်ဒီးတၢ်အဲၣ်တၢ်ကွံ, လၢယ့ၣ်ၡူးခရံာ်အပူၤတက့ၢ်. ၁၄ တၢ်အဂ့ၤတမံၤလၢ တၢ်အးက့ၤလၢနစုပူၤန့ၣ် ပၢၤအီၤလၢသးစီဆှံ, လၢအအိၣ်ဝဲဆိးဝဲလၢ ပပူၤအဃိန့ၣ်တက့ၢ်. ၁၅ ကယဲၢ်ပှၤအိၣ်လၢ အၤစံခဲလၢာ်န့ၣ် ဃၣ်ကွံာ်အသးလၢယၤအံၤ, နသ့ၣ်ညါလီၤ. စီၤဖူက့းလူး, ဒီးစီၤအ့းရံမိက့းန့ၤ, အိၣ်ဝဲလၢအကျါလီၤ. ၁၆ မ်ကစၢ်သူၣ်ကညီၤသးကညီၤ စီၤအီးနံၤစံဖရူး အဟံၣ်ဖိတက့ၢ်. အဂ့ၢ်ဒ်အံၤ, အဝဲဒၣ်န့ၣ် မၤခုၣ်မၤမုာ်ယၤ တလီၢ်လီၢ်တလီၢ်လီၢ်, ဒီးအမဲာ်တဆှးဘၣ်လၢ ယထးသွဲအဃိဘၣ်. ၁၇ ဒီးလၢအအိၣ်ဝဲလၢ ရိမ့ၤအပူၤန့ၣ်, ဃုယၤသပှၢ်ပှၢ်, ဒီးထံၣ်န့ၢ်ယၤလီၤ. ၁၈ မ်ကစၢ်ဟ့ၣ်အထံၣ်န့ၢ် တၢ်သးကညီၤလၢ ကစၢ်လၢမုၢ်တနံၤန့ၣ်တက့ၢ်. ဒီးအဝဲဒၣ်မၤစၢၤယၤ လၢအ့းဖ့းစူးအပူၤ, လၢတၢ်ဆံးအါဆံးအါန့ၣ်, နသ့ၣ်ညါကစီဒီလီၤ.
လါအီကူး ၁၂–၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | တံတူး ၁–ဖံၤလ့မိၣ်
“ပာ်ထီၣ် တၢ်အိၣ်ဖှိၣ်သးပှၢ်တဖၣ်”
(တံတူၤ ၁:၅-၉) ယပာ်လီၤတဲာ်နၤလၢ ကြ့တ့ၤန့ၣ်အဂ့ၢ်ဒ်အံၤ, ဒ်သိးနက ကတဲာ်ကတီၤတၢ်လၢ အတလၢတပှဲၤဘၣ်တဖၣ်, ဒီးဒ်သိးနကပာ်ထီၣ် ပှၤသူၣ်က့သးပှၢ်လၢ ဝ့ၢ်ကိးဖျၢၣ်ဒဲးအပူၤ, ဒ်ယမၤလိာ်တ့ၢ်နၤအသိး, ၆ ပှၤလၢတၢ်ပာ်တၢ်ကမၣ်လၢအလိၤ အလီၢ်တအိၣ်ဘၣ်, ဒီးအိၣ်ဒီးအမါတဂၤဧိၤ. ဒီးအိၣ်ဒီး အဖိအလံၤလၢအကလုၢ်တီ, လၢတၢ်ပာ်တၢ်ကမၣ်လၢအလိၤလၢ တၢ်ကလုာ်ကလိၤအဃိ အလီၢ်တအိၣ်ဘၣ်, ဒီးတမ့ၢ်ဘၣ် အနၢ်က့ၣ်ဘၣ်န့ၣ်လီၤ. ၇ အဂ့ၢ်ဒ်အံၤ, ဒ်ပှၤကွၢ်ယွၤအတၢ်အသိးန့ၣ်, ပှၤကွၢ်တၢ်အိၣ်ဖှိၣ် ဘၣ်အိၣ်ထူၣ်ဖျဲးဒီး တၢ်ပာ်တၢ်ကမၣ်လၢအလိၤလီၤ. တမ့ၢ်ဘၣ်ပှၤလၢ အမၤဖဲဒၣ်အသး, ပှၤလၢအသးဒိၣ်ထီၣ်ချ့, ပှၤလၢအအိၣ်လၢစပံးထံအဃၢၤ, ပှၤတီၢ်တၢ်, ပှၤသးကွံစ့လၢ အလၤကပီၤ တအိၣ်ဘၣ်. ၈ မ့ၢ်ပှၤလၢအအဲၣ်ပှၤတမှံၤ, ပှၤလၢအအဲၣ်ပှၤဂ့ၤ, ပှၤလၢအပာ်အသးသပှၢ်သပှၢ်, ပှၤလၢအတီအလိၤ, ပှၤလၢအစီအဆှံ, ပှၤလၢအကီၤအသး, ၉ ပှၤလၢအဟံးဃာ် တၢ်အကလုၢ်အမ့ၢ်အတီ ဒ်တၢ်သိၣ်တၢ်သီအသိးန့ၣ်, ဒ်သိးအကသိၣ်ကညးတၢ်လၢ တၢ်သိၣ်တၢ်သီအဂ့ၤအဘၣ်, ဒီးတြီဃာ် ပှၤဂ့ၢ်လိာ်ဘှီလိာ်တဖၣ်န့ၣ်, သ့လီၤ.
တၢး၁၄ ၁၁/၁၅ ကဘျံးပၤ ၂၈-၂၉
ပှၤဖးလံာ်ဖိတဖၣ် အတၢ်သံကွၢ်
ဘၣ်ဃးဒီး တၢ်ပာ်ထီၣ် တၢ်အိၣ်ဖှိၣ်သးပှၢ်အဂ့ၢ်န့ၣ် လံာ်စီဆှံ တပာ်ဖျါထီၣ်ဝဲ လီၤတံၢ်လီၢ်ဆဲးသနာ်က့ ပထံၣ်ဘၣ် တၢ်ဂ့ၢ်တနီၤလၢ အဒုးသ့ၣ်ညါပှၤလၢ ပှၤမၤဝဲဒ်လဲၣ်န့ၣ်လီၤ. ပသ့ၣ်ညါဘၣ်လၢ ဖဲစီၤပီလူး ဒီးစီၤဘၢ်နါဘၤ ဟဲက့ၤကဒါက့ၤလၢ မံးၡ့ၣ်နရ့ၣ် အတၢ်လဲၤအဆိကတၢၢ် တဘျီအခါ အဝဲသ့ၣ် “ပာ်ထီၣ်ပှၤသူၣ်က့သးပှၢ်တဖၣ် လၢအဂီၢ်လၢတၢ်အိၣ်ဖှိၣ် တပူၤလၢ်လၢ်ဝံၤဒီး, ဘါထုကဖၣ်တၢ်, ဒီးဒုၣ်တၢ်အီၣ်တၢ်အီ, ဒီးအးလီၤအီၤ လၢကစၢ်လၢ အဝဲသ့ၣ် နာ်အီၤအစုပူၤလီၤ.” (မၤတၢ် ၁၄:၂၃) ပူၤကွံာ်အနံၣ်တဖၣ်ဝံၤအလီၢ်ခံ ဖဲစီၤပီလူးကွဲးဝဲလံာ်ဆူ စီၤတံတူးလၢ အလဲၤသကိးတၢ်ဒီးအီၤ အအိၣ်အခါ အဝဲတဲဝဲလၢ “ယပာ်လီၤတဲာ်နၤလၢ ကြ့တ့ၤန့ၣ် အဂ့ၢ်ဒ်အံၤ, ဒ်သိးနကကတဲာ်ကတီၤတၢ်လၢ အတလၢတပှဲၤဘၣ်တဖၣ်, ဒီးဒ်သိးနကပာ်ထီၣ် ပှၤသူၣ်က့သးပှၢ် လၢဝ့ၢ်ကိးဖျၢၣ်ဒဲးအပူၤ, ဒ်ယမၤလိာ်တ့ၢ်နၤအသိး” လီၤ. (တံတူး ၁:၅) ဒ်န့ၣ်အသိး စီၤတံၤမသ့းလၢ အလဲၤတ့ၢ်တၢ်အါဘျီဒီး စီၤပီလူးစ့ၢ်ကီး ဖျါလၢအိၣ်ဒီးတၢ်ခွဲးတၢ်ယာ်လၢ အပာ်ထီၣ်ပှၤဂၤ လၢတၢ်အိၣ်ဖှိၣ်သးပှၢ်န့ၣ်လီၤ. (၁ တံၤ. ၅:၂၂) ပသ့ၣ်ညါဘၣ်လၢ ပှၤပာ်ထီၣ်တၢ်အိၣ်ဖှိၣ်သးပှၢ်န့ၣ် မ့ၢ်ဝဲပှၤလဲၤတရံးအံးက့ၤကွၢ်က့ၤတၢ်တဖၣ် အမူဒါလီၤ. တမ့ၢ်တၢ်မၢဖိ ဒီးပှၤသူၣ်က့သးပှၢ်လၢ ဝ့ၢ်ယရူၤၡလ့ၣ်တဖၣ်အမူဒါဘၣ်.
ယဟိဝၤပှၤအုၣ်အသးတဖၣ် အပှၤပၢဆှၢတၢ် ကမံးတံာ် ဆိကမိၣ်ဝဲ လံာ်စီဆှံအဒိအတဲာ်အံၤ ဒီးမၤဝဲတၢ်ဆီတလဲ ဘၣ်ဃးဒီး တၢ်ပာ်ထီၣ်တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ်န့ၣ်လီၤ. စးထီၣ်လၢ လါစဲးပတ့ဘၢၣ် ၁, ၂၀၁၄ န့ၣ်ကဝီၤအပှၤကွၢ်တၢ်တဖၣ် ဒ်သိးကပာ်ထီၣ်တၢ်အိၣ်ဖှိၣ်သးပှၢ်အဂီၢ် အဝဲသ့ၣ် ကဘၣ်သမံသမိးဝဲ တၢ်ဟ့ၣ်ကူၣ်ဟ့ၣ်ဖးလၢ အဒိးန့ၢ်ဘၣ်ဝဲလၢ အကဝီၤပူၤ လီၤတံၢ်လီၤဆဲးလီၤ. ဖဲအဝဲသ့ၣ်တဖၣ် လဲၤဟးအိၣ်သကိး တၢ်အိၣ်ဖှိၣ်အဆၢကတီၢ် မ့ၢ်သ့န့ၣ် ကဟးစံၣ်တဲၤတဲလီၤတၢ်ဒီး ပှၤလၢအဘၣ် တၢ်တူၢ်လိာ်အီၤလၢ ကကဲထီၣ်တၢ်အိၣ်ဖှိၣ်သးပှၢ်တဖၣ် ဒ်သိးကသ့ၣ်ညါ အဝဲသ့ၣ်အဂ့ၢ်အဂီၢ်လီၤ. ကဝီၤအပှၤကွၢ်တၢ် ကတဲသကိးတၢ်ဒီး တၢ်အိၣ်ဖှိၣ်သးပှၢ်ကရူၢ် ဒီးကဒိကနၣ်ဝဲအဝဲသ့ၣ် အတၢ်ဟ့ၣ်ကူၣ်ဟ့ၣ်ဖးဝံၤအလီၢ်ခံ အဝဲအိၣ်ဒီးမူဒါလၢ ကပာ်ထီၣ်ဝဲ တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်တဖၣ် လၢအကဝီၤပူၤလီၤ. တၢ်ရဲၣ်တၢ်ကျဲၤအံၤ မ့ၢ်ဒၣ်ပှၤမၤထွဲခရံာ်ဖိလၢညါတဖၣ် အဒိအတဲာ်လီၤ.
မတၤမၤဝဲ မူဒါတဖၣ်အံၤလဲၣ်. ထီဘိန့ၣ် “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့,” အိၣ်ဒီးမူဒါလၢ ကလုၢ်အီၣ်လုၢ်အီ ဟံၣ်ဖိဃီဖိတဖၣ်လီၤ. (မး. ၂၄:၄၅-၄၇) တၢ်မၤအံၤ ပၣ်ဃုာ်ဒီး တၢ်ဃုလံာ်စီဆှံအဆၢတဖၣ်လၢ သးစီဆှံအတၢ်မၤစၢၤ ဒ်သိးကကတဲာ်ကတီၤဝဲ လံာ်စီဆှံ အတၢ်ဟံးစုနဲၣ်ကျဲလၢ ဘၣ်ဃးဒီး တၢ်အိၣ်ဖှိၣ်လၢ ဟီၣ်ခိၣ်ဒီဘ့ၣ်တဖၣ် ကဘၣ်တၢ်သုးကျဲၤအီၤဒ်လဲၣ်န့ၣ်လီၤ. တၢ်အကုၢ်အပှၤလၢအကလုၢ်တီန့ၣ် ပာ်ထီၣ်ဝဲ ကဝီၤအပှၤကွၢ်တၢ် ဒီးဝဲၤတြၢ်ကမံးတံာ်တဖၣ်စ့ၢ်ကီးလီၤ. ဝဲၤတြၢ်တဖျၢၣ်စုာ်စုာ်န့ၣ် ဆီၣ်ထွဲမၤစၢၤ ပှၤပၢဆှၢတၢ်ကမံးတံာ် ခီဖျိမၤထွဲဝဲ တၢ်ဟံးစုနဲၣ်ကျဲလၢ အဒိးန့ၢ်ဘၣ်ဝဲတဖၣ်လီၤ. တၢ်အိၣ်ဖှိၣ်သးပှၢ်ကရူၢ် တခါစုာ်စုာ် အိၣ်ဒီးမူဒါအရ့ဒိၣ်လၢ ကသမံသမိးဝဲ ဒီပုၢ်ဝဲၢ်လၢအဝဲသ့ၣ် တူၢ်လိာ်ဝဲလၢ အကြၢးဘၣ်တၢ်ပာ်ထီၣ်အီၤလၢ ယွၤအတၢ်အိၣ်ဖှိၣ်ပူၤတဖၣ်န့ၣ် အိၣ်ဒီးတၢ်ဂ့ၤတၢ်ဝါလၢ လံာ်စီဆှံပာ်ဖျါထီၣ်ဝဲတဖၣ်ဧါ တအိၣ်ဧါန့ၣ်လီၤ. ကဝီၤအပှၤကွၢ်တၢ်တဂၤစုာ်စုာ် အိၣ်ဒီးမူဒါဖးဒိၣ်လၢ ကဘၣ်ဆိကမိၣ်ထံ ဒီးဃ့ဘါထုကဖၣ်တၢ် ဘၣ်ဃးဒီးတၢ်အိၣ်ဖှိၣ်သးပှၢ်တဖၣ် အတၢ်ဟ့ၣ်ကူၣ်ဟ့ၣ်ဖး ဝံၤအလီၢ်ခံ ကဘၣ်ပာ်ထီၣ် ပှၤပိာ်ခွါလၢအတုၤထီၣ်ထီၣ်ဘးတဖၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(တံတူး ၁:၁၂) ပှၤလၢအကျါဒၣ်ဝဲ, အဝံတဂၤစံးဝဲဒၣ်, ပှၤကြ့တ့ၤဖိ မ့ၢ်ပှၤကတိၤတၢ် ကဘျံးကဘျၣ်ထီဘိ, ဆၣ်ဖိကီၢ်ဖိအအၢ, ပှၤလၢအဟၢဖၢကၢၣ်ကျူလီၤ.
တၢး၈၉ ၅/၁၅ ကဘျံးပၤ ၃၁ အဆၢ ၅
ပှၤဖးလံာ်ဖိတဖၣ် အတၢ်သံကွၢ်
အဝဲတအိၣ်ဃူဝဲ ကလုာ်ဒူၣ်တဖုဖုလၢ တမ့ၢ်ပှၤကြ့တ့ၤဖိတဖၣ်ဘၣ်. မ့ၢ်လၢစီၤပီလူးသ့ၣ်ညါဝဲလၢ ခရံာ်ဖိအဂ့ၤလၢ ကစၢ်ယွၤဘၣ်အသးဒီး ဒိးဖှူအီၤလၢ သးစီဆှံတဖၣ် အိၣ်လၢကီးကြ့တ့ၤအပူၤလီၤ. (မၤတၢ် ၂:၅, ၁၁, ၃၃) ခရံာ်ဖိလၢ အိၣ်ဒီးတၢ်သးတီတဖၣ် အိၣ်ဝဲလၢလၢပှဲၤပှဲၤ ဒ်သိးကသူၣ်ထီၣ် တၢ်အိၣ်ဖှိၣ်လၢ “ဝ့ၢ်ကိးဖျၢၣ်ဒဲး” အပူၤလီၤ. ခရံာ်ဖိသ့ၣ်တဖၣ်အံၤ တမ့ၢ်ပှၤလၢပှၤပှဲၤသနာ်က့ ပနာ်သ့သပှၢ်တၢၢ်လၢ အဝဲသ့ၣ်တမ့ၢ် ပှၤလီတၢ်, ပှၤကၢၣ်လၢ အအီၣ်လုာ်ကိတၢ်ဘၣ်. အဝဲသ့ၣ်မ့ၢ်မၤဝဲဒ်န့ၣ်န့ၣ် တဒိးန့ၢ်ဘၣ် ကစၢ်ယွၤ အတၢ်ဘၣ်သးလၢၤဘၣ်. (ဖံလံးပံၤ ၃:၁၈, ၁၉; လီၣ်ဖျါ ၂၁:၈) မုၢ်မဆါတနံၤအံၤ လၢပှၤကိးကလုာ်ဒဲးအကျါန့ၣ် ပထံၣ်ဘၣ် ပှၤလၢအလီၤဂာ်ဒ် ပှၤကြ့တ့ၤဖိလၢ အိၣ်ဒီးတၢ်သူၣ်ဘျၢသးဘျၢတဖၣ် လၢအသူၣ်အုးသးအုးလၢ ပှၤလၢအသကဲာ်ပဝးတဂ့ၤတဖၣ်အဃိန့ၣ် အိၣ်ဝဲအါမးလီၤ. ပှၤသ့ၣ်တဖၣ်အံၤ အသးအိၣ်ဒိကနၣ် တၢ်သးခုကစီၣ်လီၤ.—ယဃ့းစက့လး ၉:၄; ထိၣ်သတြီၤဒီး မၤတၢ် ၁၃:၄၈.
(ဖံၤလ့မိၣ် ၁၅, ၁၆) အဂ့ၢ်ဒ်အံၤ, ဘၣ်တဘၣ်အဟးဖးဒီးနၤတစိၢ်အံၤ မ့ၢ်ဒ်သိးနကန့ၢ်က့ၤအီၤအထူအယိာ်, ၁၆ တမ့ၢ်လၢၤဘၣ်ဒ်ကုၢ်အသိးဘၣ်, မ့ၢ်လၢကုၢ်အဖီခိၣ်, ဒီပုၢ်ဝဲၢ်လၢအဘၣ်တၢ်အဲၣ်အီၤ, လီၤဆီဒၣ်တၢ်လၢယၤ, ဘၣ်ဆၣ်ဒီး လၢနၤဒိၣ်န့ၢ်အန့ၣ်တက့ၢ် ဆံးအါလဲၣ်, လၢဖံးလၢညၣ်အပူၤ, ဒီးလၢကစၢ်အပူၤလီၤ.
တၢး၀၈ ၁၀/၁၅ ကဘျံးပၤ ၃၁ အဆၢ ၄
လံာ်စီဆှံ အတၢ်ပာ်ဖျါလၢ လံာ်တံတူး, လံာ်ဖံၤလ့မိၣ် ဒီး လံာ်ဧ့ၤဘြံၤ
၁၅, ၁၆—ဘၣ်မနုၤအဃိ စီၤပီလူး တမၢဝဲ စီၤဖံၤလ့မိၣ်လၢ ကဟ့ၣ်ဝဲ စီၤအီးန့ၤစံမူး တၢ်သဘျ့ဘၣ်လဲၣ်. စီၤပီလူး သးစၢၢ်ဆၢဝဲထဲဒၣ် အမူဒါလၢအမ့ၢ် ‘တၢ်စံၣ်တဲၤတဲလီၤ ယွၤအဘီအမုၢ်တၢ်မၤ ဒီးတၢ်သိၣ်က့ၤသီက့ၤတၢ် ဘၣ်ဃးဒီး ကစၢ်ယ့ၣ်ၡူးခရံာ်အဂ့ၢ်အကျိၤ’ လီၤ. လၢတၢ်န့ၣ်အဃိ အဝဲဃုထၢဝဲလၢ အသုတမၤဘၣ်ဃးအသးဒီး ကုၢ်အတၢ်ဂ့ၢ်တၢ်ကျိၤလၢ ဘၣ်ဃးဒီးပှၤအတဝၢန့ၣ်လီၤ.—မၤတၢ်. ၂၈:၃၁.
တၢ်ဖးလံာ်စီဆှံ
(တံတူး ၃:၁-၁၅) ဒုးသ့ၣ်နီၣ်ထီၣ်က့ၤအီၤလၢ အဘၣ်ပာ်အသးလၢပှၤအခိၣ်, ပှၤအိၣ်ဒီးအစိအကမီၤတဖၣ်အဖီလာ်, လၢအဘၣ်စူၢ်ပဒိၣ်တဖၣ်, လၢအဘၣ်အိၣ်ကတီၤအသးလၢ ကယဲၢ်တၢ်မၤဂ့ၤတမံၤလၢ်လၢ်အဂီၢ်, ၂ တဒုၣ်ဒွဲၣ်ဘၣ်ပှၤနီတဂၤဘၣ်, တအ့ၣ်လိာ်ဆိးက့ဘၣ်, လၢအဘၣ်ပာ်အသးခုၣ်ခုၣ်မုာ်မုာ်, လၢအဘၣ်ဒုးနဲၣ်ကယဲၢ် တၢ်ဝံသးစူၤလၢ ပှၤကညီခဲလၢာ်တက့ၢ်. ၃ အဂ့ၢ်ဒ်အံၤ, လၢထံးလၢမကိာ်န့ၣ်, ပဝဲစ့ၢ်ကီးပမ့ၢ်ပှၤဟးဂီၤဖိ, ပှၤတစူၢ်ဘၣ်တၢ်ဘၣ်, ပှၤဒိးလီအသး, ပှၤကဲကုၢ်လၢ တၢ်ကလုာ်ကလိၤ, ဒီးတၢ်မုာ်လၤ အကလုာ်ကလုာ်အပူၤ, ပှၤမၤဝဲဒီးအသးအၢ, ဒီးအသူၣ်က့ၣ်သးက့ၣ်, ပှၤဂ့ၤဒိးတၢ်သးဟ့အီၤ, ပှၤလၢအသး ဟ့လိာ်အသးလီၤ. ၄ ဘၣ်ဆၣ်ဒီး တုၤတၢ်အုၣ်က့ၤခီၣ်က့ၤပှၤ, ယွၤအတၢ်သးကညီၤ ဒီးအတၢ်အဲၣ် ပှၤကညီအိၣ်ဖျါထီၣ်ဒီး, လၢပတၢ်မၤလၢ တၢ်တီတၢ်လိၤ လၢပမၤပဝဲအဃိတမ့ၢ်ဘၣ်. ၅ မ့ၢ်ဒ်အတၢ်သးကညီၤ ဒၣ်ဝဲအသိးန့ၣ်, အဝဲဒၣ် အုၣ်က့ၤခီၣ်က့ၤပှၤလၢ တၢ်သ့စီဘၣ်ဃးဒီး ပအိၣ်ဖျဲၣ်ကဒီးတစု, ဒီးတၢ်မၤက့ၤပနီၢ်သီလၢ သးစီဆှံ, ၆ လၢအလူလီၤဂၢ်လီၤအီၤလၢ ပလိၤထူးထူးတီၤတီၤ, လၢတၢ်အုၣ်က့ၤခီၣ်က့ၤပှၤ ယ့ၣ်ၡူးခရံာ်အဃိ, ၇ ဒ်သိးပဘၣ် တၢ်ပာ်တီပာ်လိၤပှၤလၢ အဘျုးအဖှိၣ်သတးဒီး, ပကကဲပှၤန့ၢ်ဘၣ်သါတၢ်, ဒ်တၢ်မုၢ်လၢ် တၢ်မူအထူအယိာ် အသိးန့ၣ်လီၤ. ၈ တၢ်ကတိၤအဝဲန့ၣ် မ့ၢ်အမ့ၢ်အတီ, ဒီးလၢတၢ်န့ၣ်တဖၣ် အဂ့ၢ်အကျိၤ ယသးအိၣ်လၢ နကစံၣ်တဲၤတဲလီၤ သပှၢ်ပှၢ်တထံၣ်ဃီ, ဒ်သိးပှၤလၢ အစူၢ်က့ၤနာ်က့ၤယွၤတဖၣ်, ကပလီၢ်အသးလၢ အကမၤတၢ်ဂ့ၤ တဘိယူၢ်ဃီန့ၣ်လီၤ. တၢ်န့ၣ်တဖၣ် မ့ၢ်တၢ်အဂ့ၤအဘၣ်, ဒီးမ့ၢ်တၢ်ဘျုးတၢ်ဖှိၣ်လၢ ပှၤကညီအဂီၢ်လီၤ. ၉ မ့မ့ၢ်တၢ်သံကွၢ်ကလီကလီ, ဒီးတၢ်ဂံၢ်ထံးဃဲၤလာ်, ဒီးတၢ်အ့ၣ်လိာ်ဆိးက့လိာ်, ဒီးတၢ်တဲးလိာ်ဃိလိာ်ပသးလၢ တၢ်သိၣ်တၢ်သီ အဂ့ၢ်အကျိၤန့ၣ်, ဟးဆှဲးအီၤတက့ၢ်. အဂ့ၢ်ဒ်အံၤ, မ့ၢ်တၢ်တဂိာ်တသီၣ်ဘၣ်, ဒီးတၢ်ကလီကလီလီၤ. ၁၀ ပှၤလၢအစု တလီၤဃုာ်ဘၣ်န့ၣ်, သိၣ်ဃီၣ်အီၤတစု, ဒီးပှဲၤထီၣ် ခံစုတစု အလီၢ်ခံန့ၣ်, ဟးဆှဲးအီၤတက့ၢ်. ၁၁ နသ့ၣ်ညါလၢ ပှၤဒ်န့ၣ်သိးတဂၤန့ၣ် ဘၣ်တၢ်မၤကဒါအီၤ, ဒီးမၤတၢ်ဒဲးဘး, ဒီးစံၣ်ညီၣ်ဃၣ်လီၤအသးဒၣ်ဝဲလီၤ. ၁၂ စီၤအၢ်တ့းမါမ့ၢ်ဂ့ၤ, စီၤတူဃံၤကူးမ့ၢ်ဂ့ၤ, တုၤယမၢအလဲၤဆူနအိၣ်ဒီး, ဟဲနဲဆူယအိၣ်လၢ နံၤကပီလံး အပူၤချ့ချ့တက့ၢ်. အဂ့ၢ်ဒ်အံၤ, ယပာ်ယသးလၢ ယကအိၣ်ဖဲန့ၣ် လၢတၢ်ဂိၢ်အကတီၢ် ဒီကတီၢ်ညါလီၤ. ၁၃ ပှၤသ့လံာ်တၢ်သိၣ်တၢ်သီ စီၤစ့ၤနါ, ဒီးစီၤအပီးလိၤန့ၣ် မၤစၢၤအလဲၤလၢညါသပှၢ်ပှၢ်, ဒ်သိးအမိၣ်န့ၢ်ဘၣ်တၢ် အလီၢ်သုတအိၣ် နီတမံၤတဂ့ၤန့ၣ်တက့ၢ်. ၁၄ ပှၤဘၣ်ဃးဒီး ပဝဲတဖၣ်စ့ၢ်ကီး, ဒ်သိးအသုတမ့ၢ်ပှၤလၢ အတၤသၣ်တအိၣ်ဘၣ်တဂ့ၤဒီး, မ်အမၤလိမၤတၢ်လၢ အမၤဝဲအလီၢ်အိၣ်အဂီၢ်န့ၣ်တက့ၢ်. ၁၅ ပှၤအိၣ်လၢ ယအိၣ်ခဲလၢာ်န့ၣ် ကတိၤဒိၣ်နၤလီၤ. ပှၤလၢအအဲၣ် ပှၤလၢတၢ်နာ်အပူၤန့ၣ် ကတိၤဒိၣ်အီၤတက့ၢ်. တၢ်အဘျုးအဖှိၣ်န့ၣ်, မ်အအိၣ်ဒီးသုခဲလၢာ်တက့ၢ်.
လါအီကူး ၁၉–၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့ၤဘြံၤ ၁–၃
“အဲၣ်တၢ်တီတၢ်လိၤ ဒီးသးဟ့တၢ်အၢတၢ်သီ”
(ဧ့ၤဘြံၤ ၁:၈) မ့မ့ၢ်လၢအဖိခွါအဂ့ၢ်န့ၣ်, ယွၤဧၢ, နလီၢ်ပစိာ်န့ၣ် အိၣ်ဝဲအစိၤစိၤအဃၣ်ဃၣ်, တၢ်တီတၢ်လိၤအနီၣ်ထိးန့ၣ်, မ့ၢ်နဘီနမုၢ်အနီၣ်ထိးလီၤ.
တၢး၁၄ ၂/၁၅ ကဘျံးပၤ ၅ အဆၢ ၈
စံးထီၣ်ပတြၢၤ စီၤပၤလၢ အလၤကပီၤဒိၣ် ယ့ၣ်ၡူးခရံာ်
၈ ဖဲ ၁၉၁၄ န့ၣ် ယဟိဝၤယွၤ ပာ်ထီၣ်အဖိခွါ ဒ်မ့းၡံအၤဘီမုၢ်စီၤပၤ လၢမူခိၣ်န့ၣ်လီၤ. ယ့ၣ်ၡူး ‘အဘီအမုၢ်အနီၣ်ထိးန့ၣ် မ့ၢ်တၢ်မ့ၢ်တၢ်တီအနီၣ်ထိးလီၤ.’ လၢတၢ်န့ၣ်အဃိ ပနာ်သ့သပှၢ်ကတၢၢ်လၢ အဝဲကပၢတၢ်လၢ တၢ်တီတၢ်လိၤ ဒီးတၢ်မ့ၢ်တၢ်တီလီၤ. အဝဲအတၢ်ပၢန့ၣ် မ့ၢ်တၢ်ပၢလၢအကြၢးဝဲဘၣ်ဝဲ, မ့ၢ်လၢ ‘ကစၢ်ယွၤမ့ၢ် အလီၢ်ပစိာ်’ အဲၣ်ဒိးတဲဝဲ ယဟိဝၤယွၤ ပာ်ထီၣ်အီၤလၢ အဘီမုၢ်စီၤပၤအဃိလီၤ. ယ့ၣ်ၡူးအလီၢ်ပစိာ်န့ၣ်က “အိၣ်ဝဲအစိၤစိၤအဃၣ်ဃၣ်လီၤ.” နမၤဘၣ် ယဟိဝၤယွၤအတၢ်မၤလၢ စီၤပၤလၢအဝဲ ပာ်ထီၣ်ဝဲတဂၤအံၤ အတၢ်ပၢဖီလာ်အဃိ နတအိၣ်ဒီးတၢ်သူၣ်ခုသးခုဘၣ်ဧါ.
(ဧ့ၤဘြံၤ ၁:၉) နအဲၣ်တၢ်တီတၢ်လိၤ, ဒီးနသးဟ့တၢ်အၢတၢ်သီလီၤ. မၤသးဒ်န့ၣ်ဒီး ယွၤနကစၢ်ဖှူနလိၤ လၢတၢ်သးခုအသိ, လၢနတံနသကိး အဖီခိၣ်လီၤ.
တၢး၁၄ ၂/၁၅ ကဘျံးပၤ ၄-၅ အဆၢ ၇
စံးထီၣ်ပတြၢၤ စီၤပၤလၢ အလၤကပီၤဒိၣ် ယ့ၣ်ၡူးခရံာ်
၇ ဖး စံးထီၣ်ပတြၢၤ ၄၅:၆, ၇ တက့ၢ်. ယ့ၣ်ၡူးန့ၣ် အဲၣ်တၢ်တီတၢ်လိၤ ဒီးသးဟ့ဝဲ ကယဲၢ်တၢ်လၢအမၤဘၣ်ဒိ အပၢ်အလၤကပီၤတဖၣ်အဃိ ယဟိဝၤယွၤ ဒိးဖှူအီၤလၢ မ့းၡံအၤဘီမုၢ်စီၤပၤလီၤ. ယ့ၣ်ၡူးန့ၣ် ဘၣ်တၢ်ဒိးဖှူအီၤလၢ “တၢ်သးခုအသိ” အါန့ၢ်ဒံး ‘အတံၤသကိး’ တဖၣ်လီၤ. တံၤသကိး တဖၣ်န့ၣ် မ့ၢ်ဝဲပှၤယူဒၤဖိအစီၤပၤတဖၣ် လၢအဟဲလီၤစၢၤလီၤသွဲၣ်လၢ စီၤဒၤဝံးလီၤ. ယ့ၣ်ၡူးဘၣ် တၢ်ဒိးဖှူအီၤလၢကျဲဒ်လဲၣ်. အဆိကတၢၢ်န့ၣ် ယဟိဝၤယွၤ ဒိးဖှူအီၤလၢ အနီၢ်ကစၢ်ဒၣ်ဝဲလီၤ. ခံထံၣ်တထံၣ် ယဟိဝၤယွၤ ဒိးဖှူအီၤဒ်အမ့ၢ် စီၤပၤ ဒီးပှၤလုၢ်တၢ်အဒိၣ်အသိးလီၤ. (စံး. ၂:၂; ဧ့ၤ. ၅:၅, ၆) သၢထံၣ်တထံၣ် ယ့ၣ်ၡူးန့ၣ် တဘၣ်တၢ်ဒိးဖှူအီၤလၢသိ ဒ်ပှၤအံၣ်စရ့လးဖိ အစီၤပၤတဖၣ်အသိးဘၣ်. ဘၣ်တၢ်ဒိးဖှူအီၤလၢ သးစီဆှံလီၤ. လၢခံကတၢၢ်တထံၣ်န့ၣ် အဝဲတပၢတၢ်လၢ ဟီၣ်ခိၣ်ဘၣ် ကပၢတၢ်လၢမူခိၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧ့ၤဘြံၤ ၁:၃) အဝဲဒၣ်မ့ၢ်အလၤကပီၤအတၢ်ကပြုၢ်ကပြီၤ, ဒီးအကစၢ်မိၢ်ပှၢ်အက့ၢ် အဂီၤလီၤတံၢ်လီၤဆဲး, ဒီးစိာ်ထီၣ် ကယဲၢ်တၢ်ခဲလၢာ်လၢ အကလုၢ်အစိအကမီၤ, ဒီးမၤစီကွံာ် ပတၢ်ဒဲးဘးလၢ အကစၢ်ဒၣ်ဝဲဝံၤဒီး, ဆ့ၣ်နီၤလၢ တၢ်အကဟုကညီၢ်တဂၤ အစုထွဲလၢတၢ်ထီၣ်ထီ,
it-1 ကဘျံးပၤ ၁၁၈၅ အဆၢ ၁
အက့ၢ်အဂီၤ
ယ့ၣ်ၡူးန့ၣ် လီၤဂာ်ဒီးအပၢ်ထီဘိဧါ
ကစၢ်ယွၤအဖိဝဲၢ်ကိလၢ လၢခံအကဲထီၣ် ပှၤဟီၣ်ခိၣ်ဖိယ့ၣ်ၡူးန့ၣ် လီၤဂာ်ဒီးအပၢ်လီၤ. (၂ ကရံၣ်. ၄:၄) ဖဲကစၢ်ယွၤတဲဝဲ ပှၤတဂၤလၢ “မ်ပတ့လီၤပှၤကညီဒ်ပဂီၤဒၣ်ပဝဲအသိး” အခါ ဖျါလၢပှၤတဂၤအံၤန့ၣ်မ့ၢ်ဝဲ ယ့ၣ်ၡူးလီၤ. အဃိ ဖိခွါအံၤလၢတၢ်တ့လီၤအီၤဝံၤလံၤလံၤန့ၣ် အဝဲလီၤဂာ်ဒီး အပၢ်, တၢ်ဘၣ်တ့ကစၢ်လီၤ. (၁ မိၤ. ၁:၂၆; ယိၤ. ၁:၁-၃; ကလီး. ၁:၁၅, ၁၆) ဒ်ပှၤအလၢအပှဲၤတဂၤအသိး ဖဲအဝဲအိၣ်လၢဟီၣ်ခိၣ်ချၢအခါ ပာ်ဖျါထီၣ်ဝဲ အပၢ်အတၢ်ဂ့ၤတၢ်ဝါ ဒီးအတၢ်ပာ်သူၣ်ပာ်သးတဖၣ်စ့ၢ်ကီးလီၤ. လၢတၢ်န့ၣ်အဃိ အဝဲတဲဝဲလၢ “ပှၤလၢအထံၣ်ယၤန့ၣ် မ့ၢ်အထံၣ်လံပၢ်န့ၣ်လီၤ.” (ယိၤ. ၁၄:၉; ၅:၁၇, ၁၉, ၃၀, ၃၆; ၈:၂၈, ၃၈, ၄၂) ဖဲအဝဲဂဲၤဆၢထၢၣ်သမူထီၣ်က့ၤ ဒ်ပှၤနီၢ်သးဖိတဂၤအသိးလၢမူခိၣ် ဒီးအပၢ်ယဟိဝၤယွၤ ဟ့ၣ်လီၤအီၤ “တၢ်စိတၢ်ကမီၤလၢမူခိၣ် ဒီးလၢဟီၣ်ခိၣ်ချၢ” အခါ အဝဲလီၤဂာ်အါထီၣ်ဒီးအပၢ်လီၤ. (၁ ပ့း. ၃:၁၈; မး. ၂၈:၁၈) တကးဒံးဘၣ် ကစၢ်ယွၤဟ့ၣ်အီၤ “အမံၤဒိၣ်န့ၢ် ကယဲၢ်တၢ်အမံၤခဲလၢာ်” အဃိဆၢကတီၢ်ခဲအံၤ ယ့ၣ်ၡူး ပာ်ဖျါထီၣ်အပၢ်အလၤကပီၤ န့ၢ်အါန့ၢ်ဒံးတချုး အဝဲဟဲလီၤလၢ ဟီၣ်ခိၣ်အခါဒံးဘၣ်န့ၣ်လီၤ. (ဖံလံး. ၂:၉; ဧ့ၤ. ၂:၉) ခဲအံၤအဝဲမ့ၢ် ‘ကစၢ်ယွၤအက့ၢ်အဂီၤလီၤတံၢ်လီၤဆဲး’ လီၤ.—ဧ့ၤ. ၁:၂-၄.
(ဧ့ၤဘြံၤ ၁:၁၀-၁၂) ဒီးနဲဒၣ်, ကစၢ်ဧၢ, လၢထံးလၢသီန့ၣ်, နပာ်လီၤဟီၣ်ခိၣ်အခီၣ်ထံး, ဒီးမူခိၣ်န့ၣ် မ့ၢ်နစုအမၤတၢ်လီၤ. ၁၁ အဝဲသ့ၣ်ကတုၤလၢ တၢ်ဟးဂီၤ, မ့မ့ၢ်နဲဒၣ်အံၤ နအိၣ်နဆိးလီၤ. အဝဲသ့ၣ်ကလီၢ်လံၤ ဒ်တၢ်ကူတၢ်သိးတဘ့ၣ်အသိး, ၁၂ ဒီးဒ်ယၣ်တဘ့ၣ်အသိးန့ၣ်, နကချံးထီၣ်အီၤ, ဒီးကဘၣ်လဲလိာ်အသးလီၤ. မ့မ့ၢ်နဲဒၣ်အံၤ နအိၣ်နကစၢ်ဒၣ်နဲဒ်လီၢ်လီၢ်, ဒီးနနံၣ်တဖၣ် တလၢာ်ဘၣ်ဝဲဘၣ်.
it-1 ကဘျံးပၤ ၁၀၆၃ အဆၢ ၇
မူခိၣ်
တၢ်ကတိၤလၢ စံးထီၣ်ပတြၢၤ ၁၀၂:၂၅, ၂၆ န့ၣ် ဘၣ်ထွဲလိာ်အသးဒီး ယဟိဝၤယွၤ သနာ်က့ ဖဲစီၤပီလူး ယၢၤထီၣ်ဝဲ တၢ်ကတိၤတဖၣ်အံၤအခါ ဒုးဘၣ်ထွဲဝဲဒီး ယ့ၣ်ၡူးစ့ၢ်ကီးလီၤ. ဘၣ်မနုၤအဃိလဲၣ်န့ၣ် ဖဲကစၢ်ယွၤတ့လီၤ မူဟီၣ်ကယၢအခါ အဝဲပာ်ထီၣ်ဝဲအဖိခွါထဲတဂၤအံၤ ဒ်အပှၤခၢၣ်စးအဃိလီၤ. အဃိမ့ၢ်ဒၣ် စီၤပီလူး ထိၣ်သတြီၤဝဲ ယ့ၣ်ၡူးအတၢ်အိၣ်ဂၢၢ်ဆိးကျၢၤဒီး မူဟီၣ်ကယၢလၢ ကစၢ်ယွၤမ့ၢ်အဲၣ်ဒိး “ချံးထီၣ်အီၤ” ဒ်ယၣ်အသိး ဒီးမၤဟးဂီၤကွံာ်အီၤအံၤ အတၢ်လီၤဆီလိာ်အသးန့ၣ်လီၤ.—ဧ့ၤ. ၁:၁, ၂, ၈, ၁၀-၁၂; ထိၣ်သတြီၤ ဒီး ၁ ပ့း. ၂:၃.
တၢ်ဖးလံာ်စီဆှံ
(ဧ့ၤဘြံၤ ၁:၁-၁၄) ယွၤကတိၤတၢ်ဒီး ပၢ်သ့ၣ်လၢပျၢၤ အါတီၤဒီးအါကျိၤ လၢဝံတဖၣ် ဘၣ်ဆၣ်ဒီး, ၂ လၢနံၤကတၢၢ်တဖၣ်အံၤ, ကတိၤတၢ်ဒီးပှၤ, လၢအဖိခွါလၢ အပာ်အီၤလၢ ပှၤန့ၢ်ဘၣ်သါတၢ်ခဲလၢာ်, ဒီးတ့ဟီၣ်ခိၣ်စ့ၢ်ကီးလၢအီၤလီၤ. ၃ အဝဲဒၣ်မ့ၢ် အလၤကပီၤအတၢ်ကပြုၢ်ကပြီၤ, ဒီးအကစၢ်မိၢ်ပှၢ်အက့ၢ် အဂီၤလီၤတံၢ်လီၤဆဲး, ဒီးစိာ်ထီၣ် ကယဲၢ်တၢ်ခဲလၢာ်လၢ အကလုၢ်အစိအကမီၤ, ဒီးမၤစီကွံာ် ပတၢ်ဒဲးဘးလၢ အကစၢ်ဒၣ်ဝဲဝံၤဒီး, ဆ့ၣ်နီၤလၢ တၢ်အကဟုကညီၢ်တဂၤ အစုထွဲလၢတၢ်ထီၣ်ထီ, ၄ ဒီးဂ့ၤန့ၢ်ကလူးတဖၣ် ထဲသိးဒီးအမံၤလၢ အန့ၢ်ဘၣ်သါန့ၣ်, ဂ့ၤန့ၢ်အဝဲသ့ၣ် အမံၤတက့ၢ်လီၤ. ၅ အဂ့ၢ်ဒ်အံၤ, နဲဒၣ်အံၤ နမ့ၢ်ယဖိခွါလီၤ, ယမၤလိၣ်ထီၣ်လံနၤလၢ မုၢ်မဆါတနံၤအံၤလံန့ၣ်, မ့ၢ်အစံးဘၣ်ကလူးတဘျီဘျီ, ဖဲလဲၣ်တဂၤလဲၣ်, ဒီးမၤကဒီးတစု, ယကကဲလၢအပၢ် ဒီးအဝဲဒၣ်ကကဲလၢ ယဖိခွါန့ၣ်လီၤ, မ့ၢ်အစံးတဘျီဘျီလၢ ကလူးဖဲလဲၣ်တဂၤလဲၣ်. ၆ ဒီးမၤကဒီးတစု, တုၤအဟဲဆှၢ အဖိဝဲၢ်ကိဆူဟီၣ်ခိၣ်ဒီး, စံးဝဲဒၣ်, ယွၤအကလူး တဂၤလၢ်လၢ်န့ၣ်, မ်အဘါထီၣ်အီၤတက့ၢ်. ၇ ဒီးစံးဝဲလၢ ကလူးတဖၣ်အဂ့ၢ်အကျိၤ, မ့ၢ်အမၤအကလူးတဖၣ်လၢကလံၤ, ၈ ဒီးအခ့အပှၤလၢ မ့ၣ်အူလၣ်လီၤ. မ့မ့ၢ်လၢအဖိခွါအဂ့ၢ်န့ၣ်, ယွၤဧၢ, နလီၢ်ပစိာ်န့ၣ် အိၣ်ဝဲအစိၤစိၤအဃၣ်ဃၣ်, တၢ်တီတၢ်လိၤအနီၣ်ထိးန့ၣ်, မ့ၢ်နဘီနမုၢ်အနီၣ်ထိးလီၤ. ၉ နအဲၣ်တၢ်တီတၢ်လိၤ, ဒီးနသးဟ့တၢ်အၢတၢ်သီလီၤ. မၤသးဒ်န့ၣ်ဒီး ယွၤနကစၢ်ဖှူနလိၤ လၢတၢ်သးခုအသိ, လၢနတံနသကိး အဖီခိၣ်လီၤ. ၁၀ ဒီးနဲဒၣ်, ကစၢ်ဧၢ, လၢထံးလၢသီန့ၣ်, နပာ်လီၤဟီၣ်ခိၣ်အခီၣ်ထံး, ဒီးမူခိၣ်န့ၣ် မ့ၢ်နစုအမၤတၢ်လီၤ. ၁၁ အဝဲသ့ၣ်ကတုၤလၢတၢ်ဟးဂီၤ, မ့မ့ၢ်နဲဒၣ်အံၤနအိၣ်နဆိးလီၤ. အဝဲသ့ၣ်ကလီၢ်လံၤ ဒ်တၢ်ကူတၢ်သိးတဘ့ၣ်အသိး, ၁၂ ဒီးဒ်ယၣ်တဘ့ၣ်အသိးန့ၣ်, နကချံးထီၣ်အီၤ, ဒီးကဘၣ်လဲလိာ်အသးလီၤ. မ့မ့ၢ်နဲဒၣ်အံၤ နအိၣ်နကစၢ်ဒၣ်နဲဒ်လီၢ်လီၢ်, ဒီးနနံၣ်တဖၣ် တလၢာ်ဘၣ်ဝဲဘၣ်. ၁၃ ဆ့ၣ်နီၤလၢယစုထွဲ, တုၤယပာ်နဒုၣ်နဒါလၢ နခီၣ်ယီၢ်အလီၢ်တက့ၢ်န့ၣ်, မ့ၢ်အစံးဘၣ်ကလူး တဘျီဘျီဖဲလဲၣ်တဂၤလဲၣ်. ၁၄ အဝဲသ့ၣ်ခဲလၢာ်မ့ၢ်သးလၢ အဒိးမၢအသးဒ်သိး အကမၤတၢ်အခ့အပှၤအတၢ်လၢ ပှၤလၢအကန့ၢ်ဘၣ်သါ တၢ်အုၣ်က့ၤခီၣ်က့ၤတဖၣ်အဂီၢ် တမ့ၢ်ဘၣ်ဧါ.
လါအီကူး ၂၆–လါစဲးပတ့ဘၢၣ် ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့ၤဘြံၤ ၄–၆
“ဂုာ်ကျဲးစၢး ဒ်သိးနကအိၣ်ဘှံးဘၣ်ဒီး ကစၢ်ယွၤအဂီၢ်တက့ၢ်”
(ဧ့ၤဘြံၤ ၄:၁) မၤသးဒ်န့ၣ်ဒီး, ပျံၤသကိးတၢ်တက့ၢ်, တၢ်ကလီၤဂာ်ဘၣ်ဖုးလၢ တၢ်စံးပာ်အိၣ်လီၤတဲာ်လၢ ပကနုာ်ဘၣ်လၢ အတၢ်အိၣ်ဘှံး အပူၤဘၣ်ဆၣ်ဒီး, သုတတုၤဘၣ်တဂၤဂၤလီၤ.
(ဧ့ၤဘြံၤ ၄:၄) အဂ့ၢ်ဒ်အံၤ, စံးဝဲဒၣ်လၢ တၢ်တပူၤလၢနွံနံၤတနံၤ အဂ့ၢ်အကျိၤဒ်အံၤ, ဒီးယွၤအိၣ်ဘှံးလၢ အတၢ်မၤခဲလၢာ်လၢနွံနံၤတနံၤန့ၣ်လီၤ.
တၢး၁၁ ၇/၁၅ ကဘျံးပၤ ၂၄-၂၅ အဆၢ ၃-၅
ကစၢ်ယွၤအိၣ်ဘှံးန့ၣ်—အခီပညီဒ်လဲၣ်
၃ ဖဲယ့ၣ်ၡူး ဒီးတၢ်မၢဖိအစိၤ မုၢ်နွံနံၤတနံၤ တကတၢၢ်ဒံးဘၣ်န့ၣ် ပတဲသ့လၢ တၢ်ဂ့ၢ်ခံမံၤအံၤအဃိလီၤ. တၢ်ဂ့ၢ်တၢတမံၤန့ၣ် ပထံၣ်ဘၣ်ဖဲ ယ့ၣ်ၡူးစံးဆၢက့ၤဝဲ ပှၤလၢအထီဒါတၢ်တဖၣ်အခါန့ၣ်လီၤ. ပှၤလၢအထီဒါတၢ်တဖၣ်န့ၣ် တူၢ်လိာ်ဝဲလၢ ပှၤတဘၣ်မၤတၢ်လၢ မုၢ်နွံနံၤတနံၤဘၣ်. အဃိ ဖဲအဝဲသ့ၣ်ထံၣ်ဝဲ ယ့ၣ်ၡူးမၤဘျါက့ၤ ပှၤဆူးပှၤဆါလၢမုၢ်နံၤအံၤအခါ အဝဲသ့ၣ်ပာ်ဒ့ၣ်ပာ်ကမၣ်အီၤလီၤ. ယ့ၣ်ၡူးတဲဆၢက့ၤ အဝဲသ့ၣ်လၢ “ယပၢ်မၤတၢ်တုၤခဲကနံၣ်အံၤ, ဒီးယမၤစ့ၢ်ကီးယဲဒၣ်လီၤ.” (ယိၤဟၣ် ၅:၁၆, ၁၇) အဝဲအဲၣ်ဒိးတဲဝဲ တၢ်မနုၤလဲၣ်. ယ့ၣ်ၡူးဘၣ်တၢ်ပာ်ဒ့ၣ်ပာ်ကမၣ်အီၤလၢ အမၤတၢ်လၢမုၢ်နွံနံၤတနံၤလီၤ. အဝဲတဲဆၢက့ၤဝဲလၢ “ယပၢ်မၤတၢ်တုၤခဲကနံၣ်အံၤ” လီၤ. အဲၣ်ဒိးတဲ ဝဲ ‘ယၤဒီးယပၢ်န့ၣ် ပမၤတၢ်တမံၤဃီလီၤ. ယပၢ်န့ၣ်မၤတၢ်လၢ မုၢ်နွံနံၤတနံၤလၢ အိၣ်ဝဲအနံၣ်လၢ အကထိတဖၣ်အဃိ ယၤစ့ၢ်ကီးယမၤတၢ်လၢ မုၢ်နွံနံၤတနံၤသ့စ့ၢ်ကီးလီၤ.’ ယ့ၣ်ၡူးအတၢ်ကတိၤန့ၣ် ပာ်ဖျါထီၣ်ဝဲလၢ ဖဲအဝဲအိၣ်လၢ ဟီၣ်ခိၣ်အဆၢကတီၢ် ကစၢ်ယွၤအိၣ်ဘှံးအနံၤ မုၢ်နွံနံၤန့ၣ် တကတၢၢ်ဒံးဘၣ်.
၄ တၢ်ဂ့ၢ်ခံမံၤတမံၤန့ၣ် ပထံၣ်ဘၣ်လၢ လံာ်လၢတၢ်မၢဖိပီလူး ကွဲးဝဲအပူၤလီၤ. တချုးလၢအဝဲ ယၢၤဖျါထီၣ်ဝဲ ကစၢ်ယွၤအိၣ်ဘှံးအနံၤ လၢ ၁ မိၤၡ့ ၂:၂ အပူၤဒံးဘၣ်န့ၣ် အဝဲကွဲးဝဲလၢ “ပှၤလၢအနာ်တၢ်ပဝဲဒၣ်အံၤ, ပနုာ်ဘၣ်လၢတၢ်အိၣ်ဘှံးအပူၤ“ လီၤ. (ဧ့ၤ. ၄:၃, ၄, ၆, ၉) လၢတၢ်န့ၣ်အဃိ မုၢ်နွံနံၤန့ၣ် အိၣ်တုၤပၢၢ်လၢ စီၤပီလူးအိၣ်မူအဆၢကတီၢ်လီၤ. မုၢ်အိၣ်ဘှံးအနံၤအံၤ ကဆဲးအိၣ်တုၤအခါဖဲလဲၣ်.
၅ ဒ်သိးပကသ့ၣ်ညါ တၢ်သံကွၢ်အံၤ အတၢ်စံးဆၢအဂီၢ် ပကဘၣ်သ့ၣ်နီၣ်ထီၣ် မုၢ်နွံနံၤတနံၤ အတၢ်တိာ်ပာ်လီၤ. ၁ မိၤၡ့ ၂:၃ တဲနၢ်ပၢၢ်ပှၤဒ်အံၤ “ယွၤဆိၣ်ဂ့ၤ မုၢ်နွံနံၤတနံၤန့ၣ်, ဒီးပာ်စီဆှံအီၤလီၤ.” ယဟိဝၤယွၤ ‘မၤစီဆှံဝဲ’ မုၢ်နံၤအံၤန့ၣ် မ့ၢ်ဒ်သိးအဝဲ အတၢ်တိာ်ပာ်လၢ ဘၣ်ဃးဒီးဟီၣ်ခိၣ်အံၤ ကလၢထီၣ်ပှဲၤထီၣ်ဝဲအဂီၢ်လီၤ. အဝဲတိာ်ပာ်ဝဲလၢ ပိာ်မုၣ် ဒီးပိာ်ခွါလၢ အိၣ်ဒီးတၢ်ဒိကနၣ်တဖၣ် ကအိၣ်မူလၢဟီၣ်ခိၣ်အံၤ ဒီးကအံးထွဲကွၢ်ထွဲ ဟီၣ်ခိၣ်ဒီးတၢ်အိၣ်လၢအပူၤခဲလၢာ်လီၤ. (၁ မိၤ. ၁:၂၈) ခီဖျိလၢ တၢ်တိာ်ပာ်အံၤအဃိ ယဟိဝၤယွၤ ဒီးယ့ၣ်ၡူးခရံာ် လၢအမ့ၢ် “မုၢ်အိၣ်ဘှံးအနံၤအကစၢ်” န့ၣ် “မၤတၢ်တုၤခဲကနံၣ်အံၤ” လီၤ. (မး. ၁၂:၈) လၢတၢ်န့ၣ်အဃိ ကစၢ်ယွၤအိၣ်ဘှံးအနံၤန့ၣ် ကအိၣ်တုၤလၢ ကစၢ်ယွၤအတၢ်တိာ်ပာ် ဟဲလၢထီၣ်ပှဲၤထီၣ်ဝဲ ဖဲယ့ၣ်ၡူးပၢတၢ်အနံၣ်တကထိ အကတၢၢ်န့ၣ်လီၤ.
(ဧ့ၤဘြံၤ ၄:၆) မၤသးဒ်န့ၣ်ဒီး တၢ်အိၣ်လီၤတဲာ်ဝဲလၢ ပှၤကလဲၤနုာ်ဝဲတနီၤနီၤ, ဒီးပှၤလၢ တၢ်စံၣ်တဲၤတဲလီၤအီၤလၢ တၢ်သးခုအကစီၣ် အဆိတဖၣ်န့ၣ်, တနုာ်ဘၣ်လၢ အတစူၢ်တနာ်ဘၣ်တၢ် အဃိသတးဒီး,
တၢး၁၁ ၇/၁၅ ကဘျံးပၤ ၂၅ အဆၢ ၆
ကစၢ်ယွၤအိၣ်ဘှံးန့ၣ်—အခီပညီဒ်လဲၣ်
၆ ကစၢ်ယွၤ တဲနၢ်ပၢၢ် စီၤအၤဒၣ် ဒီးနီၣ်အံၣ်အုလၢ အတၢ်တိာ်ပာ်အဂ့ၢ် လီၤတံၢ်လီၤဆဲး သနာ်က့ အဝဲသ့ၣ်တမၤဝဲဒ် တၢ်တိာ်ပာ်အံၤအသိးဘၣ်. စီၤအၤဒၣ် ဒီးနီၢ်အံၣ်အုန့ၣ် မ့ၢ်ပှၤအဆိကတၢၢ်ခံဂၤလၢ တအိၣ်ဒီးတၢ်ဒိကနၣ်အဃိ လၢခံပှၤလၢအကကွဲၢ်တဖၣ်စ့ၢ်ကီး တအိၣ်ဒီးတၢ်ဒိကနၣ်ဘၣ်. ပှၤအံၣ်စရ့လးဖိလၢ ကစၢ်ယွၤဃုထၢထီၣ်အီၤလၢ အပှၤကလုာ်တဖၣ်ဒၣ်လဲာ် တအိၣ်ဒီးတၢ်ဒိကနၣ်ဘၣ်. လၢတၢ်မၢဖိအစိၤန့ၣ် စီၤပီလူးဟ့ၣ်ပလီၢ်ဝဲ ခရံာ်ဖိတနီၤလၢ အဝဲသ့ၣ်ကဲထီၣ်ဒ် ပှၤအံၣ်စရ့လးဖိတဖၣ်သ့ဝဲလီၤ. အဝဲကွဲးဝဲလၢ “မ်ပဂုာ်နုာ်ဘၣ်တၢ်အိၣ်ဘှံးတမံၤအံၤ, ဒ်သိးပသုတလီၤဃံၤထွဲ တၢ်တစူၢ်တနာ်ဘၣ် အဒိအတဲာ်တမံၤဃီအခံ, နီတဂၤတဂ့ၤန့ၣ်တက့ၢ်.” (ဧ့ၤ. ၄:၁၁) ပာ်သူၣ်ပာ်သးလၢ စီၤပီလူးတဲဝဲ ပှၤလၢတဒိကနၣ်တၢ်တဖၣ် တနုာ်လီၤဘၣ်လၢ ယွၤအိၣ်ဘှံးအနံၤန့ၣ်တက့ၢ်. တၢ်အံၤအခီပညီ အိၣ်လၢပဂီၢ်ဒ်လဲၣ်. ပဝဲသ့ၣ်တဖၣ် ပမ့ၢ်ထီဒါဘၣ် ကစၢ်ယွၤအတၢ်တိာ်ပာ်လၢ ကျဲတမံၤမံၤန့ၣ် ပတနုာ်လီၤဘၣ်လၢ ကစၢ်ယွၤအတၢ်အိၣ်ဘှံး အနံၤလၢၤဘၣ်န့ၣ်ဧါ. တၢ်သံကွၢ်အံၤ အတၢ်စံးဆၢန့ၣ် အရ့ဒိၣ်ဒိၣ်မးလၢပဂီၢ်အဃိ ပကသမံသမိး အါထီၣ်တၢ်ဂ့ၢ်အံၤလီၤ. အဆိကတၢၢ် ပကသမံသမိးကွၢ် ပှၤအံၣ်စရ့လးဖိတဖၣ် အဒိအတဲာ်လၢ အတဂ့ၤတဖၣ် ဒီးဘၣ်မနုၤအဃိ အဝဲသ့ၣ်တနုာ်လီၤဘၣ်လၢ ယွၤအတၢ်အိၣ်ဘှံး အနံၤဘၣ်လဲၣ်န့ၣ်လီၤ.
(ဧ့ၤဘြံၤ ၄:၉-၁၁) မၤသးဒ်န့ၣ်ဒီး, တၢ်အိၣ်ဘှံးအိၣ်လီၤတဲာ်မးလၢ ယွၤအပှၤဂီၢ်မုၢ်အဂီၢ်လီၤ. ၁၀ အဂ့ၢ်ဒ်အံၤ, ပှၤလၢအနုာ်ဘၣ်တ့ၢ်ဝဲလၢ အတၢ်အိၣ်ဘှံးအပူၤတဂၤန့ၣ်, အဝဲဒၣ်အိၣ်ဘှံးစ့ၢ်ကီးလၢ အတၢ်မၤ, ဒ်ယွၤလၢအတၢ်မၤဒၣ်ဝဲအသိးန့ၣ်လီၤ. ၁၁ မၤသးဒ်န့ၣ်ဒီး မ်ပဂုာ်နုာ်ဘၣ် တၢ်အိၣ်ဘှံးတမံၤအံၤ, ဒ်သိးပသုတလီၤဃံၤထွဲ တၢ်တစူၢ်တနာ်ဘၣ် အဒိအတဲာ်တမံၤဃီအခံ, နီတဂၤတဂ့ၤန့ၣ်တက့ၢ်.
တၢး၁၁ ၇/၁၅ ကဘျံးပၤ ၂၈ အဆၢ ၁၆-၁၇
ကစၢ်ယွၤအိၣ်ဘှံးန့ၣ်—အခီပညီဒ်လဲၣ်
၁၆ မုၢ်မဆါတနံၤအံၤ ခရံာ်ဖိလၢကတဲဝဲလၢ ပှၤကဘၣ်ဒိကနၣ် စီၤမိၤၡ့ အတၢ်မၤလိာ်တနီၤ ဒ်သိးကန့ၢ်တၢ်အုၣ်က့ၤခီၣ်က့ၤအဂီၢ်န့ၣ် တအိၣ်အါအါဘၣ်. ဘၣ်ဃးဒီးတၢ်ဂ့ၢ်အံၤန့ၣ် ဖဲစီၤပီလူး ကွဲးဝဲလံာ်လၢ အ့းဖ့းစူး တၢ်အိၣ်ဖှိၣ်အအိၣ်အခါ ပာ်ဖျါထီၣ်ဝဲၡဲၡဲဖိဒ်အံၤ– “အဂ့ၢ်ဒ်အံၤ, သုတုၤလၢ တၢ်အုၣ်က့ၤခီၣ်က့ၤသုလၢ တၢ်ဘျုးတၢ်ဖှိၣ်လၢ တၢ်နာ်အဃိလီၤ. ဒီးအဝဲန့ၣ် တမ့ၢ်ဘၣ်လၢ သုဃိဒၣ်သုဝဲဘၣ်, မ့ၢ်ယွၤအတၢ်ဟ့ၣ်လီၤ. ဒ်သိးပှၤသုတပာ်အသး ကဖၢလၢနီတဂၤတဂ့ၤဒီး, တမ့ၢ်ဘၣ်လၢတၢ်မၤအဃိဘၣ်.” (အ့း. ၂:၈, ၉) မ့မ့ၢ်ဒ်န့ၣ် ခရံာ်ဖိတဖၣ် နုာ်လီၤလၢကစၢ်ယွၤအိၣ်ဘှံးအနံၤ ကသ့ဒ်လဲၣ်. ဒ်သိးအတၢ်တိာ်ပာ်လၢ ဘၣ်ဃးဒီးဟီၣ်ခိၣ်အံၤ ကဟဲလၢထီၣ်ပှဲၤထီၣ်အဂီၢ် ယဟိဝၤယွၤပာ်ပနီၣ်ဝဲ မုၢ်နွံနံၤတနံၤလၢအမ့ၢ် အတၢ်အိၣ်ဘှံးအနံၤဝံၤလံ. ပနုာ်လီၤလၢ ယဟိဝၤယွၤအိၣ်ဘှံးအနံၤ သ့ခီဖျိ ပဒိကနၣ်အကလုၢ် ဒီးမၤသကိးတၢ်ဒီး အတၢ်ကရၢကရိန့ၣ်လီၤ.
၁၇ ပဝဲသ့ၣ်တဖၣ် ပမ့ၢ်တဒိကနၣ် ကုၢ်လၢအကလုၢ်တီ အတၢ်ဟ့ၣ်ကူၣ်လၢ ဒိးသန့ၤထီၣ်အသးလၢ လံာ်စီဆှံဘၣ် ဒီးပမ့ၢ်ဃုထၢလၢ ပကဒိကနၣ်တၢ်ထဲလၢ ပဆိကမိၣ်လၢ အမ့ၢ်တၢ်လၢအရ့ဒိၣ်တဖၣ်လီၤန့ၣ် မ့ၢ်ဒၣ်ပထီဒါ ကစၢ်ယွၤအတၢ်တိာ်ပာ်န့ၣ်လီၤ. ပမ့ၢ်ထီဒါ ယဟိဝၤယွၤအတၢ်တိာ်ပာ်န့ၣ် ပတၢ်ရ့လိာ်သးဒီးအီၤ ကဟးဂီၤလီၤ. တၢ်မၤလိလၢခံတခါန့ၣ် ပကသမံသမိးကွၢ် ဘၣ်ဃးဒီးတၢ်အိၣ်သးတနီၤန့ၣ် ပပာ်ဖျါထီၣ်တၢ်ဒိကနၣ်သ့ ဒီးပတၢ်ဆၢတဲာ်လၢ ဘၣ်ဃးဒီး တၢ်အိၣ်သးအံၤန့ၣ် ကပာ်ဖျါထီၣ်ဝဲလၢ ပနုာ်လီၤလၢ ကစၢ်ယွၤအိၣ်ဘှံးအနံၤန့ၢ်ဧါ, တန့ၢ်ဧါန့ၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧ့ၤဘြံၤ ၄:၁၂) အဂ့ၢ်ဒ်အံၤ, ယွၤအကလုၢ်န့ၣ် မ့ၢ်တၢ်မူ, ဒီးမၤတၢ်သ့, ဒီးအကနၣ်အ့ၣ်တၢ်ဂ့ၤန့ၢ် နးတဘ့ၣ်လၢ အကနၣ်ခံခီလိာ်, ဒီးဆဲးဖျိတုၤအနီၤဖး ပတၢ်မူဒီးပသး, ဒီးတၢ်အဆၢဒီးတၢ်အကံၢ်, ဒီးမ့ၢ်တၢ်လၢ အသ့ၣ်ညါပသး အတၢ်ဆိကမိၣ်ဒီး အကူၣ်တၢ်တဖၣ်န့ၣ်လီၤ.
ပှၤဖးလံာ်ဖိတဖၣ် အတၢ်သံကွၢ်
ဧ့ၤဘြံၤ ၄:၁၂ ပာ်ဖျါထီၣ်ဝဲလၢ “ယွၤအကလုၢ်” လၢ “မ့ၢ်တၢ်မူ ဒီးမၤတၢ်သ့” န့ၣ်မ့ၢ်မနုၤလဲၣ်
▪ လံာ်စီဆှံအဆၢ အဖီခိၣ်ဒီးအဖီလာ်တဖၣ် ပာ်ဖျါထီၣ်ဝဲလၢ စီၤပီလူးအဲၣ်ဒိးတဲဝဲ တၢ်ကစီၣ်လၢဘၣ်ဃးဒီး ကစၢ်ယွၤအတၢ်တိာ်ပာ်လၢ အိၣ်လၢလံာ်စီဆှံအပူၤန့ၣ်လီၤ.
လၢပလံာ်လဲၢ်တဖၣ်အပူၤ ပာ်ဖျါထီၣ်ဝဲ တၢ်ဂ့ၢ်လၢဘၣ်ဃးဒီး လံာ်စီဆှံဆီတလဲ ပတၢ်အိၣ်မူသ့အခါ ညီနုၢ်ယၢၤဖျါထီၣ်ဝဲ ဧ့ၤဘြံၤ ၄:၁၂ န့ၣ်မ့ၢ်တၢ်လၢ အကြၢးဝဲဘၣ်ဝဲလီၤ. ပမ့ၢ်ဃုသ့ၣ်ညါအါထီၣ် ဧ့ၤဘြံၤ ၄:၁၂ န့ၣ် ကကဲဘျုးဒိၣ်မးလီၤ. စီၤပီလူးဟ့ၣ်ဂံၢ်ဟ့ၣ်ဘါဝဲ ပှၤဧ့ၤဘြံၤဖိလၢ အကဲထီၣ်ခရံာ်ဖိတဖၣ် လၢကမၤသကိးတၢ်ဃူဃူဖိးဖိး ဒ်ကစၢ်ယွၤအတၢ်တိာ်ပာ်အသိးလီၤ. လံာ်စီဆှံ ပာ်ဖျါထီၣ်ဝဲ တၢ်တိာ်ပာ်တဖၣ်အံၤလီၤ. စီၤပီလူးသူဝဲ ပှၤအံၣ်စရ့လးဖိလၢ အထူၣ်ဖျဲးထီၣ်လၢ ကီၢ်အဲၤကူပတူးအပူၤတဖၣ် အဒိအတဲာ်လီၤ. အဝဲသ့ၣ်တဖၣ် အိၣ်ဒီးတၢ်မုၢ်လၢ်လၢ ကအိၣ်ဘှံးဘၣ်ဝဲလၢ ကီၢ်တၢ်စံးပာ် “လၢအယွၤဝဲဒီးတၢ်နုၢ်ထံ ဒီးကနဲစီ” အပူၤလီၤ.—၂ မိၤ. ၃:၈; ၅ မိၤ. ၁၂:၉, ၁၀.
တၢ်န့ၣ်မ့ၢ်ဝဲ ကစၢ်ယွၤအတၢ်တိာ်ပာ်လီၤ. လၢခံပှၤအံၣ်စရ့လးဖိတဖၣ် အခိၣ်ကိၤထီၣ် ဒီးအတၢ်နာ်တအိၣ်လၢၤဘၣ်အဃိ အဝဲသ့ၣ်အါတက့ၢ်န့ၣ် တနုာ်လီၤဘၣ်လၢ မုၢ်အိၣ်ဘှံးအနံၤပူၤဘၣ်. (၄ မိၤ. ၁၄:၃၀; ၡူ. ၁၄:၆-၁၀) ဘၣ်ဆၣ် စီၤပီလူး တဲကဒီးဝဲလၢ “တၢ်စံးပာ်အိၣ်လီၤတဲာ်လၢ ပကနုာ်ဘၣ်လၢ [ယွၤ] အတၢ်အိၣ်ဘှံးအပူၤ” လီၤ. (ဧ့ၤ. ၃:၁၆-၁၉; ၄:၁) “တၢ်စံးပာ်” န့ၣ်မ့ၢ်ဝဲ ကစၢ်ယွၤအတၢ်တိာ်ပာ်တခါ စ့ၢ်ကီးလီၤ. ဒ်ပှၤဧ့ၤဘြံၤဖိလၢ အကဲထီၣ်ခရံာ်ဖိတဖၣ်အသိး ပဝဲသ့ၣ်တဖၣ်စ့ၢ်ကီး ပဖး ဒီးပပာ်ဖှိၣ်မၤသကိးတၢ်ဒ် တၢ်တိာ်ပာ်အံၤအသိးသ့လီၤ. ဒ်သိးစီၤပီလူး ကပာ်ဖျါထီၣ်ဝဲလၢ တၢ်စံးပာ်အံၤ သန့ၤထီၣ်အသးလၢ လံာ်စီဆှံပူၤအဂီၢ် အဝဲယၢၤထီၣ်ဝဲ ၁ မိၤၡ့ ၂:၂ ဒီး စံးထီၣ်ပတြၢၤ ၉၅:၁၁ လီၤ.
“တၢ်စံးပာ်အိၣ်လီၤတဲာ်လၢ ပကနုာ်ဘၣ်လၢ [ယွၤ] အတၢ်အိၣ်ဘှံးအပူၤ” န့ၣ် ကြၢးထုးန့ၢ်ပသးဒိၣ်မးလီၤ. ပနာ်လၢ ပအိၣ်ဒီးတၢ်မုၢ်လၢ်လၢ ပကနုာ်လီၤဘၣ်လၢ ကစၢ်ယွၤအတၢ်အိၣ်ဘှံးအပူၤ ဒီးပခါထီၣ်ပခီၣ်လၢ ပကနုာ်လီၤအဂီၢ်စ့ၢ်ကီးလီၤ. ပတခါထီၣ်ပခီၣ်ခီဖျိ ပဂုာ်ကျဲးစၢး မၤထွဲစီၤမိၤၡ့အတၢ်မၤလိာ် ဒီးမၤတၢ်မၤအဂၤလၢ ကဒိးန့ၢ်ဘၣ်ယဟိဝၤယွၤ အတၢ်ဘၣ်သးအဂီၢ်ဘၣ်. ဒ်ကစၢ်ယွၤအတၢ်တိာ်ပာ်အိၣ်ဝဲအသိး ပအိၣ်ဒီးတၢ်နာ် ဒီးပာ်ဖှိၣ်မၤသးကိးတၢ်လၢ တၢ်သူၣ်ခုသးခုအပူၤ ဒီးပကဆဲးမၤဒ်န့ၣ်အသိးလီၤ. တကးဒံးဘၣ် ဒ်ပပာ်ဖျါထီၣ်တ့ၢ်လၢထးအသိး ပှၤအကထိတဖၣ်လၢအအိၣ်လၢ ဟီၣ်ခိၣ်ဒီဘ့ၣ်န့ၣ် စးထီၣ်မၤလိလံာ်စီဆှံ ဒီးသ့ၣ်ညါထီၣ်ဝဲ ကစၢ်ယွၤအတၢ်တိာ်ပာ်အဂ့ၢ်လီၤ. ဒီးအဝဲသ့ၣ်တဖၣ် ဆီတလဲအတၢ်အိၣ်မူ, ပာ်ဖျါထီၣ်အတၢ်နာ် ဒီးကဲထီၣ်ခရံာ်ဖိလၢ အဒိးဘျၢထံဝံၤတဖၣ်လီၤ. အဝဲသ့ၣ်တဖၣ် ဆီတလဲအတၢ်အိၣ်မူန့ၣ် မ့ၢ်တၢ်အုၣ်သးလၢ “ယွၤအကလုၢ်န့ၣ် မ့ၢ်တၢ်မူ ဒီးမၤတၢ်သ့” န့ၣ်လီၤ. ဒ်လံာ်စီဆှံ ပာ်ဖျါထီၣ်ဝဲအသိး ကစၢ်ယွၤ အတၢ်တိာ်ပာ်န့ၣ် ကဲဘျုးလၢ ပတၢ်အိၣ်မူအဂီၢ် ဒီးကဆဲးမၤတၢ်လၢ ပတၢ်အိၣ်မူအပူၤစ့ၢ်ကီးလီၤ.
(ဧ့ၤဘြံၤ ၆:၁၇, ၁၈) ဒ်န့ၣ်အသိး ယွၤအတၢ်ကူၣ်ပာ် ဟးဂီၤတသ့ဘၣ်. အဂ့ၢ်န့ၣ်, သါကဒုးနဲၣ်ဝဲလၢ ပှၤန့ၢ်သါတၢ်စံးပာ်, သပှၢ်တၢၢ်အဃိဒီး, ကတိၤဝဲလၢတၢ်ဆိၣ်, ၁၈ ဒ်သိး, မ့ၢ်တၢ်ဂၢၢ်တၢ်ကျၢၤခံမံၤ, လၢယွၤကတိၤကဘျံးကဘျၣ် တသ့ဘၣ်သတးဒီး, ပှၤလၢအဃ့ၢ်ပူၤဖျဲးဒ်သိး အကမၤန့ၢ်တၢ်မုၢ်လၢ် အိၣ်လၢအမဲာ်ညါ, ပဝဲဒၣ်အံၤ, ပကန့ၢ်ဘၣ်တၢ်ခုၣ်တၢ်မုာ်ဖးဒိၣ်လီၤ.
it-1 ကဘျံးပၤ ၁၁၃၉ အဆၢ ၂
တၢ်မုၢ်လၢ်
တၢ်မုၢ်လၢ်တၢ်မူအထူအယိာ် ဒီးတၢ်တအုၣ်သံဘၣ်လၢ ပှၤလၢ ‘တၢ်ကိးအီၤဘၣ်ဃးဒီးမူခိၣ်’ (ဧ့ၤ. ၃:၁) တဖၣ်အဂီၢ်န့ၣ် မ့ၢ်တၢ်မုၢ်လၢ်အဂၢၢ်အကျၢၤ ဒီးပနာ်န့ၢ်သ့သပှၢ်ကတၢၢ်လီၤ. ကစၢ်ယွၤ အတၢ်စံးပာ် ဒီးအတၢ်အၢၣ်လီၤအီလီၤတဖၣ်န့ၣ် မၤဂၢၢ်ကျၢၤထီၣ်ဝဲ တၢ်မုၢ်လၢ်အံၤလီၤ. ဘၣ်ဃးဒီး တၢ်ဂ့ၢ်ခံမံၤအံၤန့ၣ် ကစၢ်ယွၤ တလီတၢ်နီတဘျီဘၣ်. တကးဒံးဘၣ် ခဲအံၤခီဖျိလၢ ယ့ၣ်ၡူးဒိးန့ၢ်ဘၣ် သးသမူလၢအသံတသ့ဘၣ် လၢမူခိၣ်အဃိ ပမုၢ်လၢ်ဒ်န့ၣ်သ့လီၤ. လၢတၢ်န့ၣ်အဃိ တၢ်မုၢ်လၢ်အံၤမ့ၢ် “ဒ်သးအနီၣ်သက့ၤအသိး လၢအစဲဘူးဃာ် ဒီးအိၣ်ဂၢၢ်ဆိးကျၢၤ [ဒ်ပှၤလုၢ်တၢ်အခိၣ် နုာ်လီၤလၢ ဒၢးလၢအစီဆှံကတၢၢ်အပူၤ ဖဲတၢ်မၤပူၤဖျဲးအနံၤအသိး] ဒီးနုာ်ဘၣ်လၢယၣ်ဘျးလီၤအသးအပူၤ. ဖဲပှၤဃ့ၢ်တၢ်လၢညါ, ယ့ၣ်ၡူးတဂၤ, လဲၤနုာ်ဘၣ်ဝဲလၢပဂီၢ်, ဒီးကဲထီၣ်ပှၤလုၢ်တၢ်အခိၣ်အထူအယိာ်, ဒ်စီၤမၤလကံစဒ့း အလုၢ်အလၢ်အသိးန့ၣ်လီၤ.”—ဧ့ၤ. ၆:၁၇-၂၀.
တၢ်ဖးလံာ်စီဆှံ
(ဧ့ၤဘြံၤ ၅:၁-၁၄) အဂ့ၢ်ဒ်အံၤ, ကယဲၢ်ပှၤလုၢ်တၢ်အခိၣ်ကိးဂၤဒဲး, ဘၣ်တၢ်ဟံးန့ၢ်အီၤလၢ ပှၤကညီအကျါသတးဒီး, တၢ်ပာ်အီၤလၢတၢ်ဘၣ်ဃးဒီး ယွၤလၢပှၤကညီအဂီၢ်, ဒ်သိးအကပာ်ထီၣ် တၢ်မၤဘူၣ်, ဒီးတၢ်လုၢ်လၢ တၢ်ဒဲးဘးအဂီၢ်လီၤ. ၂ ဒီးမ့ၢ်တၢ်ဂံၢ်စၢ်ဘါစၢ်အိၣ်ဝးတရံး အကစၢ်ဒၣ်ဝဲသတးဒီး, သးအိၣ်ပှၤလၢအတသ့ၣ်ညါဘၣ်တၢ်ဘၣ်, ဒီးပှၤလၢအဟးကမၣ်ကျဲတဖၣ်, သ့လီၤ. ၃ မၤသးဒ်န့ၣ်ဒီး, ဒ်လၢပှၤဂီၢ်မုၢ်အဂီၢ်အသိးန့ၣ်, ဘၣ်ပာ်ထီၣ်စ့ၢ်ကီး တၢ်လၢအဂီၢ်ဒၣ်ဝဲလၢ တၢ်ဒဲးဘးအဃိလီၤ. ၄ ဒီးပှၤတဂၤဟံးန့ၢ်ဒၣ်ဝဲ တၢ်လၤကပီၤအံၤ တမ့ၢ်ဘၣ်, မ့ၢ်ပှၤလၢယွၤကိးန့ၢ်အီၤ, ဒ်စီၤအၤဟရိၣ်အသိးန့ၣ်လီၤ. ၅ ဒ်န့ၣ်အသိး ခရံာ်တမၤလၤမၤကပီၤဒၣ်အသး, ဒ်သိးအကကဲထီၣ် ပှၤလုၢ်တၢ်အခိၣ်ဘၣ်. မ့မ့ၢ်ပှၤစံးဘၣ်အီၤ, နဲဒၣ်အံၤနမ့ၢ်ယဖိခွါလီၤ. ယမၤလိၣ်ထီၣ်လံနၤလၢ မုၢ်မဆါတနံၤအံၤလံ. ၆ ဒီးဒ်အစံးဝဲလၢ တပူၤဒၣ်အသိးန့ၣ်, နမ့ၢ်ပှၤလုၢ်တၢ်အဒိၣ် လီၤထူလီၤယိာ်, ဒ်စီၤမၤလကံစဒ့း အလုၢ်အလၢ်အသိးန့ၣ်လီၤ. ၇ အဝဲဒၣ်လၢ အဖံးအညၣ် အမုၢ်နံၤတဖၣ်န့ၣ်, ဘါထုကဖၣ်ဒီး ဃ့ကညးပှၤလၢ အအုၣ်က့ၤခီၣ်က့ၤအီၤလၢ တၢ်သံသ့တဂၤ, အိၣ်ဒီးတၢ်ကိးပသူထီၣ်, ဒီးမဲာ်ထံမဲာ်နိ, ဒီးမ့ၢ်အယူးယီၣ်ယွၤသတးဒီး, တၢ်ဒိကနၣ်အကလုၢ်လီၤ. ၈ မ့ၢ်ဖိခွါနာ်သက့ဒီး, မၤလိစူၢ်တၢ်အကလုၢ်လၢ အဒိးတၢ်နးတၢ်ဖှီၣ်အဃိလီၤ. ၉ ဒီးလၢထီၣ်ပှဲၤထီၣ်ဝဲဒီး, ကဲထီၣ်ပှၤလၢ အစူၢ်အကလုၢ်တဖၣ်ခဲလၢာ် အတၢ်အုၣ်က့ၤခီၣ်က့ၤအီၤ အထူအယိာ်အကစၢ်လီၤ. ၁၀ ဒီးယွၤပာ်အီၤလၢ ပှၤလုၢ်တၢ်အခိၣ် ဒ်စီၤမၤလကံစဒ့း အလုၢ်အလၢ်အသိးန့ၣ်လီၤ. ၁၁ လၢအဝဲဒၣ် အဂ့ၢ်အကျိၤပအိၣ်ဒီး တၢ်ကတိၤအါထံၣ်လၢ ပမၤဖျါထီၣ်ကီမးလၢ သုကဲလၢပှၤအနၢ်ဃၢအဃိလီၤ. ၁၂ အဂ့ၢ်ဒ်အံၤ, လၢအဆၢအကတီၢ်ဖဲ သုဂ့ၤကဲထီၣ်သရၣ်တဖၣ်န့ၣ်ဒီး, ပှၤသိၣ်လိကဒီးသု လၢယွၤအကလုၢ်အကထါ မိၢ်ပှၢ်အခီၣ်ထံးန့ၣ်, အလီၢ်အိၣ်, ဒီးသုကဲပှၤလၢ အဂ့ၤန့ၢ်တၢ်နုၢ်ထံ, ဒီးတမ့ၢ်ဘၣ်တၢ်အီၣ်အသံး အကာ်ဘၣ်. ၁၃ အဂ့ၢ်ဒ်အံၤ, ကယဲၢ်ပှၤလၢ အအီၣ်နုၢ်ထံတဖၣ်န့ၣ်, တညီနုၢ်ဘၣ်တၢ်တီတၢ်လိၤ အတၢ်ကတိၤနီတဂၤဘၣ်. အဂ့ၢ်ဒ်အံၤ, မ့ၢ်ဖိသၣ်လီၤ. ၁၄ ဒီးတၢ်အီၣ်အသံးအကာ်န့ၣ် မ့ၢ်လၢပှၤဒိၣ်တုာ်ခိၣ်ပှဲၤအဂီၢ်, ပှၤလၢအအိၣ်ကတဲာ်ကတီၤအသး, ဒီးညီနုၢ်နီၤဖးတၢ်ဂ့ၤဒီးတၢ်အၢအဆၢန့ၣ်လီၤ.