လံာ်စီဆှံတဘ့ၣ်အံၤ—ဟဲလၢယွၤအအိၣ်

၁, ၂. လံာ်စီဆှံလၢပဒိးန့ၢ်ဘၣ်လၢ ယွၤအအိၣ်န့ၣ်​ ဘၣ်မနုၤအဃိ ထုးန့ၢ်ပသူၣ်ပသးလဲၣ်.

လၢတၢ်တပာ်သူၣ်ပာ်သးအပူၤ နတံၤသကိးတဂၤ မ့ၢ်ဟ့ၣ်နၤတၢ်ဟ့ၣ်တခါန့ၣ်​ နသးကမၤအသးဒ်လဲၣ်. နကအဲၣ်ဒိးအိးထီၣ်ကွၢ်အီၤတဘျီဃီလီၤ. နကသးခုလၢ နတံၤသကိးပာ်ဖျါထီၣ်အတၢ်သးအိၣ်နၤ ဒီးနကစံးဘျုးစံးဖှိၣ်အီၤလၢ အဝဲဟ့ၣ်နၤတၢ်ဟ့ၣ်အဃိလီၤ.

^၂ လံာ်စီဆှံတဘ့ၣ်အံၤ မ့ၢ်တၢ်ဟ့ၣ်တခါလၢ ဟဲလၢယွၤအအိၣ်လီၤ. လံာ်အံၤပာ်ဖျါထီၣ်န့ၢ်ပှၤတၢ်ဂ့ၢ်သ့ၣ်တဖၣ်လၢ ပဃုထံၣ်န့ၢ်အီၤလၢလံာ်လဲၢ်အဂၤတဖၣ်အပူၤ တဘၣ်ဘၣ်န့ၣ်လီၤ. အဒိ လံာ်စီဆှံတဲဖျါထီၣ်ဝဲဘၣ်ဃး ယွၤတ့လီၤမူခိၣ်, ဟီၣ်ခိၣ်​ ဒီးတ့လီၤဝဲပိာ်မုၣ်ဒီးပိာ်ခွါအဆိကတၢၢ်ခံဂၤအဂ့ၢ်န့ၣ်လီၤ. ဒီးလံာ်စီဆှံတဘ့ၣ်အံၤ ပာ်ဖျါထီၣ်တၢ်ဟ့ၣ်ကူၣ်ဟ့ၣ်ဖး ဒ်သိးကကဲထီၣ်တၢ်မၤစၢၤလၢပဂီၢ် ဖဲပကွၢ်ဆၢၣ်မဲာ်ဘၣ်​ တၢ်ကီတၢ်ခဲအဆၢကတီၢ်န့ၣ်လီၤ. တကးဒံးဘၣ်​ ကစၢ်ယွၤက မၤလၢပှဲၤထီၣ်အတၢ်တိာ်ပာ် ဒီးကမၤဂ့ၤထီၣ်က့ၤဟီၣ်ခိၣ်အတၢ်အိၣ်သးလၢ ကျဲဒ်လဲၣ်န့ၣ်​ လံာ်စီဆှံပာ်ဖျါထီၣ်ဝဲလီၤ. လံာ်စီဆှံန့ၣ်​ မ့ၢ်တၢ်ဟ့ၣ်တမံၤလၢ အထုးန့ၢ်ပသူၣ်ပသးလီၤ.

၃. ဖဲနမၤလိလံာ်စီဆှံအဆၢကတီၢ် နကသ့ၣ်ညါဘၣ်တၢ်မနုၤလဲၣ်.

^၃ နမ့ၢ်မၤလိအါထီၣ်လံာ်စီဆှံန့ၣ်​ နကသ့ၣ်ညါဘၣ်လၢ ကစၢ်ယွၤအဲၣ်ဒိးလၢ နကကဲထီၣ်အတံၤသကိးန့ၣ်လီၤ. ဒ်နမၤလိအါထီၣ်ကစၢ်ယွၤအဂ့ၢ်အသိး နတၢ်ရ့လိာ်သးဒီးအီၤ ဒံးယံာ်ဒံးဘူးထီၣ်ဝဲလီၤ.

၄. ပှၤထုးထီၣ်ရၤလီၤလံာ်စီဆှံအါထဲအံၤန့ၣ်​ ဘၣ်မနုၤအဃိထုးန့ၢ်နသးလဲၣ်.

^၄ လံာ်စီဆှံအံၤ ဘၣ်တၢ်ကွဲးကျိာ်ထံက့ၤအီၤလၢကျိာ် ၂,၆၀၀ ဃၣ်ဃၣ်​ ဒီးဘၣ်တၢ်ထုးထီၣ်ရၤလီၤအီၤ အကကွဲၢ်လၢအကထိတဖၣ်န့ၣ်လီၤ. ပှၤဟီၣ်ခိၣ်ဖိ အမျးကယၤ ၉ဝ ဘျဲၣ်န့ၣ်​ ဖးဘၣ်ဝဲလံာ်စီဆှံလၢ အနီၢ်ကစၢ်အကျိာ်သ့ဝဲလီၤ. တနွံဘၣ်တနွံန့ၣ်​ ပှၤဟီၣ်ခိၣ်ဖိ တကကွဲၢ်ဘျဲၣ်​ ဒိးန့ၢ်ဘၣ်ဝဲလံာ်စီဆှံန့ၣ်လီၤ. လၢတၢ်န့ၣ်အဃိ လံာ်စီဆှံအံၤတလီၤဂာ်ဒီးလံာ်အဂုၤအဂၤတဖၣ်ဘၣ်.

၅. လံာ်စီဆှံတဘ့ၣ်အံၤ ဘၣ်မနုၤအဃိပတဲသ့လၢအ “ကွဲးအသးလၢယွၤအသးစီဆှံ” လဲၣ်.

^၅ လံာ်စီဆှံန့ၣ်​ “ကွဲးအသးလၢယွၤအသးစီဆှံ” လီၤ. (ဖး ၂ တံၤမသ့း ၃:၁၆ တက့ၢ်.) ဘၣ်ဆၣ်သနာ်က့ ပှၤအါဂၤန့ၣ်​ ဆိကမိၣ်ဝဲလၢ ‘ပှၤဟီၣ်ခိၣ်ဖိကွဲးဝဲလံာ်စီဆှံအဃိ လံာ်အဝဲအံၤဟဲလၢယွၤအအိၣ်ကသ့လၢကျဲဒ်လဲၣ်.’ လံာ်စီဆှံ စံးဝဲလၢ “မ့ၢ်ဒ်သးစီဆှံဘိးထီၣ်အသးအသိးန့ၣ်, ယွၤအပှၤစီဆှံ ကတိၤတၢ်န့ၣ်လီၤ.” (၂ ပ့းတရူး ၁:၂၁) တၢ်အံၤ လီၤဂာ်ဒီးတၢ်မၤခိၣ်တဂၤမၢဝဲအနဲၣ်ရွဲၣ်ကွဲးဝဲလံာ်ပရၢတဘ့ၣ်န့ၣ်လီၤ. လံာ်အံၤ ကမ့ၢ်မတၤတဂၤအလံာ်ပရၢလဲၣ်. မ့ၢ်ဝဲတၢ်မၤခိၣ်​ အလံာ်ပရၢလီၤ. တမ့ၢ်နဲၣ်ရွဲၣ်အလံာ်ပရၢဘၣ်. ဒ်န့ၣ်အသိး ကစၢ်ယွၤသူဝဲပှၤဟီၣ်ခိၣ်ဖိလၢ ကကွဲးဝဲ လံာ်စီဆှံ ဘၣ်ဆၣ်​ တမ့ၢ်လၢအဝဲသ့ၣ်ဒုးအိၣ်ထီၣ်ဝဲဘၣ်. မ့ၢ်ကစၢ်ယွၤဒုးအိၣ်ထီၣ်ဝဲလီၤ. လၢတၢ်န့ၣ်အဃိ ကစၢ်ယွၤနဲၣ်လိအဝဲသ့ၣ်​ ဒ်သိးကကွဲးဝဲယွၤအတၢ်ဆိကမိၣ်တဖၣ်လီၤ. လံာ်စီဆှံအံၤမ့ၢ် “ယွၤအကလုၢ်အကထါ” နီၢ်နီၢ်န့ၣ်လီၤ.—၁ သ့းစၤလနံ ၂:၁၃, ကွၢ်တၢ်ဂ့ၢ် ၂ လၢလံာ်အကတၢၢ်တက့ၢ်.

လံာ်စီဆှံတဘ့ၣ်အံၤ မ့ၢ်လံာ်လၢအလီၤတံၢ်လီၤဆဲး

၆, ၇. ဘၣ်မနုၤအဃိပတဲသ့လၢလံာ်စီဆှံတဘ့ၣ်အံၤ အခီၣ်ထံးတုၤလၢအကတၢၢ်န့ၣ်​ လီၤပလိာ်လိာ်အသးလဲၣ်.

^၆ လံာ်စီဆှံအံၤ တၢ်ကွဲးအီၤယံာ်ဝဲ အနံၣ်​ ၁,၆၀၀ ဘျဲၣ်​ န့ၣ်လီၤ. ပှၤလၢအကွဲးလံာ်စီဆှံတဖၣ်န့ၣ်​ တအိၣ်မူဝဲလၢတၢ်ဆၢကတီၢ်တကတီၢ်ဃီဘၣ်. အဝဲသ့ၣ်တနီၤနီၤန့ၣ်​ မ့ၢ်ပှၤကူၣ်ဘၣ်ကူၣ်သ့ ဒီးတနီၤန့ၣ်မ့ၢ်ပှၤမုၢ်ဆ့ၣ်မုၢ်ဂီၤဖိလီၤ. အဒိ လၢအဝဲသ့ၣ်အကျါတဂၤန့ၣ်​ မ့ၢ်ကသံၣ်သရၣ်လီၤ. မ့မ့ၢ်အဂၤတနီၤန့ၣ်​ မ့ၢ်ပှၤထူစံာ်ဖိ, ပှၤမၤညၣ်ဖိ, ပှၤကွၢ်သိ, ဝံ, ပှၤစံၣ်ညီၣ်ကွီၢ် ဒီးစီၤပၤတဖၣ်န့ၣ်လီၤ. လံာ်စီဆှံတဘ့ၣ်အံၤ ပှၤကွဲးအီၤအါဂၤ ဘၣ်ဆၣ်​ တၢ်ဂ့ၢ်တၢ်ကျိၤတဖၣ်​ လီၤပလိာ်လိာ်အသးခဲလၢာ်လီၤ. ဒီးလံာ်စီဆှံတဆၢဘၣ်တဆၢန့ၣ်​ တထီဒါလိာ်အသးဘၣ်.a

^၇ လံာ် ၁ မိၤၡ့န့ၣ်​ ပာ်ဖျါထီၣ်ဝဲလၢတၢ်ကီတၢ်ခဲ ဟဲကဲထီၣ်အသးအဂ့ၢ်အကျိၤ ဒီးလံာ်လီၣ်ဖျါန့ၣ်​ ပာ်ဖျါထီၣ်ဝဲလၢ ကစၢ်ယွၤကမၤလီၤမၢ်ကွံာ်တၢ်ကီတၢ်ခဲတဖၣ်အံၤ တကးဒံးဘၣ်အဝဲကမၤကဲထီၣ်က့ၤဟီၣ်ခိၣ်ဒီဘ့ၣ်လၢ ပၤရဒံစူးန့ၣ်လီၤ. လံာ်စီဆှံအပူၤန့ၣ်​ ပၣ်ဃုာ်ဒီးပှၤဟီၣ်ခိၣ်ဖိ အတၢ်စံၣ်စိၤတဲစိၤ အနံၣ်လၢအကထိတဖၣ်​ ဒီးပာ်ဖျါထီၣ်စ့ၢ်ကီးဝဲလၢကစၢ်ယွၤအတၢ်တိာ်ပာ်န့ၣ်​ ဟဲလၢထီၣ်ပှဲၤထီၣ်ဝဲထီဘိန့ၣ်လီၤ.

၈. တၢ်လၢလံာ်စီဆှံပာ်ဖျါထီၣ်ဝဲ ဘၣ်ဃးဒီးစဲအ့ၣ်တကပၤ မ့ၢ်တၢ်လၢအလီၤတံၢ်လီၤဆဲးန့ၣ်​ ဟ့ၣ်တၢ်အဒိတဖၣ်တက့ၢ်.

^၈ လံာ်စီဆှံအံၤ တမ့ၢ်စဲအ့ၣ်အတၢ်ကူၣ်ဘၣ်ကူၣ်သ့အလံာ် မ့တမ့ၢ် ကၠိအလံာ်ဘၣ်. ဘၣ်ဆၣ်​ တၢ်လၢလံာ်စီဆှံပာ်ဖျါထီၣ်ဝဲ ဘၣ်ဃးဒီးစဲအ့ၣ်တကပၤန့ၣ်​ လီၤတံၢ်ဝဲထီဘိလီၤ. လံာ်စီဆှံအံၤ ဟဲလၢယွၤအိၣ်အဃိ ကဘၣ်မ့ၢ်လံာ်ဒ်န့ၣ်လီၤ. အဒိ လံာ် ၃ မိၤၡ့ ပာ်ဖျါထီၣ်ဝဲ ကစၢ်ယွၤအတၢ်သိၣ်တၢ်သီဒ်သိး တၢ်ဆူးတၢ်ဆါ သုတရၤလီၤအသးတဂ့ၤအဂီၢ် ပှၤအံၣ်စရ့လးဖိတဖၣ်​ ကဘၣ်မၤဝဲဒ်လဲၣ်အဂ့ၢ်န့ၣ်လီၤ. ဖဲပှၤတသ့ၣ်ညါဝဲလၢ တၢ်ဆါဃၢ်ဒုးအိၣ်ထီၣ်ဝဲတၢ်ဆူးတၢ်ဆါအဆၢကတီၢ်န့ၣ်​ တၢ်ဂ့ၢ်တဖၣ်အံၤ ဘၣ်တၢ်ကွဲးတ့ၢ်အီၤလၢ လံာ်စီဆှံအပူၤဖးယံာ်လံ. လံာ်စီဆှံပာ်ဖျါထီၣ်တၢ်မ့ၢ်တၢ်တီတခါလၢ ဟီၣ်ခိၣ်န့ၣ်တဘၣ်တၢ်စဲၤလီၤအီၤလၢ တၢ်နီတမံၤအလိၤဘၣ်. (ယိၤဘး ၂၆:၇) ဖဲပှၤဟီၣ်ခိၣ်ဖိအါတက့ၢ် နာ်ဝဲလၢဟီၣ်ခိၣ်အံၤဘံၣ်ဝဲအခါ လံာ်စီဆှံပာ်ဖျါထီၣ်ဝဲလၢ ဟီၣ်ခိၣ်အံၤအိၣ်ဝဲဖျၢၣ်သလၢၣ်န့ၣ်လီၤ.—ယၡါယၤ ၄၀:၂၂.

၉. မ့ၢ်လၢပှၤကွဲးလံာ်စီဆှံတဖၣ်​ ကွဲးဝဲတၢ်ဂ့ၢ်တီတီလိၤလိၤအဃိ ပသ့ၣ်ညါဘၣ်တၢ်မနုၤလဲၣ်.

^၉ တၢ်လၢလံာ်စီဆှံပာ်ဖျါထီၣ်ဝဲ ဘၣ်ဃးဒီးတၢ်စံၣ်စိၤတဲစိၤန့ၣ်​ ဘၣ်ဝဲထီဘိလီၤ. ဘၣ်ဆၣ်သနာ်က့ တၢ်စံၣ်စိၤတဲစိၤအလံာ်လၢအဂၤတဖၣ်န့ၣ်​ တပာ်ဖျါထီၣ်တၢ်ဂ့ၢ်တၢ်ကျိၤလီၤတံၢ်လီၤဆဲးလၢလၢပှဲၤပှဲၤဘၣ်. မ့ၢ်လၢပှၤကွဲးလံာ်တဖၣ်န့ၣ်​ တကွဲးဝဲတၢ်ဂ့ၢ်တၢ်ကျိၤ တီတီလိၤလိၤအဃိလီၤ. အဒိ တဘျီတခီၣ်န့ၣ်​ အဝဲသ့ၣ်တကွဲးဖျါထီၣ်ဝဲ တၢ်ဂ့ၢ်ဘၣ်ဃးဒီး တၢ်ဆၢကတီၢ်ဖဲအထံအကီၢ်ဘၣ်တၢ်မၤနၢၤအီၤအခါဘၣ်. မ့မ့ၢ်ပှၤကွဲးလံာ်စီဆှံတဖၣ်န့ၣ်​ ကွဲးဖျါထီၣ်ဝဲတၢ်ဂ့ၢ် တီတီလိၤလိၤဒီး ပာ်ဖျါထီၣ်ဝဲ ကီၢ်အံၣ်စရ့လးဘၣ်တၢ်မၤဟးဂီၤအီၤအဂ့ၢ်လီၤတံၢ်လီၤဆဲး ဃုာ်ဒီးအဝဲသ့ၣ်အနီၢ်ကစၢ်အတၢ်ကမၣ်န့ၣ်လီၤ. အဒိ လၢ ၄ မိၤၡ့အပူၤ စီၤမိၤၡ့ကွဲးထၢနုာ်ဝဲလၢ အဝဲမၤဘၣ်တၢ်ကမၣ်ဖးဒိၣ်​ ဒီးယွၤသိၣ်က့ၤသီက့ၤအီၤအဂ့ၢ်လီၤ. (၄ မိၤၡ့ ၂၀:၂-၁၂) မ့ၢ်လၢ ပှၤကွဲးလံာ်စီဆှံတဖၣ်န့ၣ်​ ကွဲးဝဲတၢ်ဂ့ၢ်တီတီလိၤလိၤ အဃိပာ်ဖျါထီၣ်ဝဲလၢ လံာ်စီဆှံတဘ့ၣ်အံၤ ဟဲလၢယွၤအိၣ်န့ၣ်လီၤ. လၢတၢ်န့ၣ်အဃိ ပနာ်န့ၢ် လံာ်စီဆှံသ့ဝဲလီၤ.

လံာ်တဘ့ၣ်အံၤပှဲၤဒီး ကစၢ်ယွၤအတၢ်ဟ့ၣ်ကူၣ်ဟ့ၣ်ဖး လၢကဲဘျုးလၢပဂီၢ်

၁၀. မုၢ်မဆါတနံၤအံၤ ဘၣ်မနုၤအဃိလၢ လံာ်စီဆှံအတၢ်ဟ့ၣ်ကူၣ်ဟ့ၣ်ဖးတဖၣ်န့ၣ်​ ကဲဘျုးလၢပဂီၢ်လဲၣ်.

^၁၀ လံာ်စီဆှံတဘ့ၣ်အံၤ “ဂ့ၤလၢသိၣ်တၢ်သီတၢ်အဂီၢ်, လၢသိၣ်ဃီၣ်တၢ်အဂီၢ်, လၢဃၣ်လိၤတၢ်အဂီၢ်” လီၤ. (၂ တံၤမသ့း ၃:၁၆) မုၢ်မဆါတနံၤအံၤ လံာ်စီဆှံအတၢ်ဟ့ၣ်ကူၣ်တဖၣ်​ ကဲဘျုးလၢပတၢ်အိၣ်မူအဂီၢ်လီၤ. ခီဖျိလၢကစၢ်ယွၤတ့လီၤပှၤအဃိ အဝဲနၢ်ပၢၢ်ပတၢ်ဆိကမိၣ်ဒီးပသးအတၢ်တူၢ်ဘၣ်တဖၣ်န့ၣ်လီၤ. လၢတၢ်န့ၣ်အဃိ အဝဲသ့ၣ်ညါပှၤဂ့ၤန့ၢ် ပသ့ၣ်ညါလီၤပနီၢ်ကစၢ်အသးန့ၣ်လီၤ. အဝဲသ့ၣ်ညါတၢ်လၢအဂ့ၤလၢပဂီၢ်ဒီး တၢ်လၢအတဂ့ၤလၢပဂီၢ်လီၤ.

၁၁, ၁၂. (က) ဖဲမးသဲ အဆၢဒိၣ်​ ၅ တုၤလၢ ၇ န့ၣ်ယ့ၣ်ၡူးဟ့ၣ်ကူၣ်ဟ့ၣ်ဖးပှၤ တၢ်ဂ့ၢ်မနုၤတဖၣ်လဲၣ်. (ခ) ပမၤလိန့ၢ် တၢ်မနုၤအဂၤတဖၣ်လၢ လံာ်စီဆှံအပူၤလဲၣ်.

^၁၁ ဖဲမးသဲအဆၢဒိၣ်​ ၅ တုၤလၢ ၇ န့ၣ်ယ့ၣ်ၡူးဟ့ၣ်ကူၣ်ဟ့ၣ်ဖးပှၤ ဘၣ်ဃးဒီးပကဒိးန့ၢ်ဘၣ်တၢ်သးခုလၢကျဲဒ်လဲၣ်, ပကြၢးရ့ဒီးပှၤအဂၤတဖၣ်ဒ်လဲၣ်, ပကဘၣ်ဃ့ဘါထုကဖၣ်ဒ်လဲၣ်​ ဒီးဘၣ်ဃးဒီးကျိၣ်ဧိၤစ့ဧိၤန့ၣ်​ ပကဘၣ်အိၣ်ဒီးတၢ်ထံၣ်လၢ အကြၢးအဘၣ်ဒ်လဲၣ်န့ၣ်လီၤ. ယ့ၣ်ၡူးအတၢ်ဟ့ၣ်ကူၣ်တဖၣ်အံၤ ပူၤကွံာ်အနံၣ်​ ၂,၀၀၀ လံဘၣ်ဆၣ်​ ကဲဘျုးပၢၢ်တုၤလၢ မုၢ်မဆါတနံၤအံၤလီၤ.

^၁၂ လၢလံာ်စီဆှံအပူၤန့ၣ်​ ကစၢ်ယွၤဟ့ၣ်ပှၤ တၢ်သိၣ်တၢ်သီမိၢ်ပှၢ်ဒ်သိး ကကဲထီၣ်တၢ်မၤစၢၤလၢ ဟံၣ်ဖိဃီဖိတဖၣ်​ ကအိၣ်ဒီးတၢ်အိၣ်မူလၢအဂ့ၤကတၢၢ်, ကကဲထီၣ်ပှၤမၤတၢ်ဖိလၢအဂ့ၤ ဒီးပအိၣ်ဃူလိာ်ဖိးလိာ်သးဒီးပှၤဂၤ ကသ့အဂီၢ်လီၤ. ပအိၣ်လၢတၢ်လီၢ်ဖဲလဲၣ်မ့ၢ်ဂ့ၤ, ပအိၣ်ဒီးတၢ်ကီတၢ်ခဲဒ်လဲၣ်မ့ၢ်ဂ့ၤ, ဒီးပမ့မ့ၢ်ပှၤဒ်လဲၣ်ဒ်လဲၣ်မ့ၢ်ဂ့ၤ လံာ်စီဆှံအတၢ်သိၣ်တၢ်သီမိၢ်ပှၢ်တဖၣ်န့ၣ်​ ကဲထီၣ်တၢ်မၤစၢၤလၢပဂီၢ် ထီဘိလီၤ.—ဖး ယၡါယၤ ၄၈:၁၇ ကွၢ်တၢ်ဂ့ၢ် ၃ လၢလံာ်အကတၢၢ်တက့ၢ်.

ဝံအတၢ်စံးပာ်လၢ လံာ်စီဆှံအပူၤန့ၣ်​ နနာ်န့ၢ်အီၤသ့

၁၃. တၢ်ကဟဲကဲထီၣ်အသးဒီး ဝ့ၢ်ဘၤဘူၤလိၣ်န့ၣ်​ ဝံယၡါယၤတဲဆိပာ်ဝဲဒ်လဲၣ်.

^၁၃ ဝံအတၢ်စံးပာ်လၢ လံာ်စီဆှံအပူၤန့ၣ်​ ဟဲလၢထီၣ်ပှဲၤထီၣ်အါမးလံ. အဒိ ဝံယၡါယၤ တဲဆိပာ်ဝဲလၢ တၢ်ကမၤဟးဂီၤဝ့ၢ်ဘၤဘူၤလိၣ်အဂ့ၢ်န့ၣ်လီၤ. (ယၡါယၤ ၁၃:၁၉) အဝဲပာ်ဖျါထီၣ်ဝဲ တၢ်ဂ့ၢ်လီၤတံၢ်လီၤဆဲး ဘၣ်ဃးဒီးဝ့ၢ်အံၤ ကဘၣ်တၢ်မၤဟးဂီၤအီၤဒ်လဲၣ်န့ၣ်လီၤ. ဝ့ၢ်တဖျၢၣ်အံၤ ဘၣ်တၢ်ဒီသဒၢအီၤလၢ ထံကျိဒီးတြဲၤဖးဒိၣ်တဖၣ်လီၤ. ဘၣ်ဆၣ်ဝံယၡါယၤတဲဆိပာ်ဝဲလၢ ထံကျိထံကလီၤသံး ဒီးဝ့ၢ်အတြဲၤကအိးထီၣ်ပာ်စၢၤအသးန့ၣ်လီၤ. ဒီးသုးဖိတဖၣ်ကမၤနၢၤဝ့ၢ်အဂီၢ်န့ၣ်​ အဝဲသ့ၣ်တလိၣ်ဒုးတၢ်ဘၣ်. ဝံယၡါယၤတဲဆိပာ်စ့ၢ်ကီးဝဲလၢ ပှၤလၢကမၤနၢၤဝဲဝ့ၢ်ဘၤဘူၤလိၣ်အံၤ မ့ၢ်စီၤကိရ့ၣ်လီၤ.—ဖး ယၡါယၤ ၄၄:၂၇–၄၅:၂ ကွၢ်တၢ်ဂ့ၢ် ၄ လၢလံာ်အကတၢၢ်တက့ၢ်.

၁၄, ၁၅. ဝံယၡါယၤအတၢ်စံးပာ်န့ၣ်​ ဟဲလၢထီၣ်ပှဲၤထီၣ်ဝဲလၢကျဲဒ်လဲၣ်.

^၁၄ ဝံအတၢ်စံးပာ်အံၤ ဘၣ်တၢ်ကွဲးအီၤပူၤကွံာ်အနံၣ်ခံကယၤဝံၤအလီၢ်ခံ သုးမုၢ်သံၣ်ဘိတဖုဟဲတုၤဝဲဒီး ကတဲာ်ကတီၤထီၣ်အသးလၢ ကဒုးဝဲဝ့ၢ်ဘၤဘူၤလိၣ်န့ၣ်လီၤ. မတၤတဂၤတီခိၣ်ရိၤမဲဝဲ သုးမုၢ်သံၣ်ဘိအံၤလဲၣ်. ဒ်ဝံအတၢ်စံးပာ်အသိးန့ၣ်​ မ့ၢ်ဝဲဖၢၡၢၣ်​ (ပၤရၣ်) အစီၤပၤ ကိရ့ၣ်န့ၣ်လီၤ. ဘၣ်ဆၣ်​ ဒ်ဝံယၡါယၤ တဲဆိပာ်ဝဲအသိး စီၤကိရ့ၣ်အသုးမုၢ်သံၣ်ဘိတဖၣ်​ နုာ်လီၤဆူဘၤဘူၤလိၣ်အပူၤကသ့ဧါ.

^၁၅ မုၢ်တနၤဖဲပှၤကလဲၤဒုးတၢ်န့ၣ်​ ပှၤဘၤဘူၤလိၣ်ဖိတဖၣ်​ မၤဝဲဘူၣ်ဧိၤပွဲဧိၤလီၤ. အဝဲသ့ၣ်ဆိကမိၣ်လၢအအိၣ်ဘၣ်ဘံၣ်ဘံၣ်ဘၢဘၢ ခီဖျိလၢအဝ့ၢ်ခိၣ်ဒူဒီးထံကျိန့ၣ်​ ဒီသဒၢဝဲဝ့ၢ်အဃိလီၤ. လၢဝ့ၢ်အချၢန့ၣ်​ စီၤကိရ့ၣ်ဒီးအသုးမုၢ်သံၣ်ဘိတဖၣ်​ ခူၣ်ဝဲထံအကျိၤ ဒ်သိးကမၤလီၤစှၤကွံာ်ထံကျိအထံန့ၣ်လီၤ. တၢ်န့ၣ်အလီၢ်ခံ ထံကျိထံစှၤလီၤဝဲတုၤလၢ ပှၤဖၢၡၢၣ်ဖိအသုးမုၢ်သံၣ်ဘိတဖၣ်​ ခီဂာ်ဝဲန့ၢ်တစုန့ၣ်လီၤ. ဘၣ်ဆၣ်သနာ်က့ အဝဲသ့ၣ်နုာ်လီၤဆူ ဝ့ၢ်ပူၤကသ့လၢကျဲဒ်လဲၣ်. ဒ်ဝံအတၢ်စံးပာ်အိၣ်ဝဲအသိး ဝ့ၢ်အတြဲၤအိးထီၣ်ပာ်အသးဒီး ပှၤသုးဖိတဖၣ်​ နုာ်လီၤဆူဝ့ၢ်ပူၤဒီး အဝဲသ့ၣ်တလိၣ်ဒုးတၢ်ဘၣ်.

၁၆. (က) ဝံယၡါယၤစံးပာ်ဝဲလၢ တၢ်ကမၤအသးဒီးဝ့ၢ်ဘၤဘူၤလိၣ်ဒ်လဲၣ်. (ခ) ဝံယၡါယၤ အတၢ်စံးပာ်ဟဲလၢထီၣ်ပှဲၤထီၣ်ဝဲန့ၣ်​ ပသ့ၣ်ညါဘၣ်ဒ်လဲၣ်.

^၁၆ ဝံယၡါယၤတဲဆိပာ်စ့ၢ်ကီးဝဲလၢ ဒ်တၢ်ဆၢကတီၢ်လဲၤပူၤကွံာ်ဝဲအသိးန့ၣ်​ ပှၤတအိၣ်ဝဲဆိးဝဲလၢဝ့ၢ်ဘၤဘူၤလိၣ်အပူၤ နီတဘျီလၢၤဘၣ်. အဝဲကွဲးဝဲလၢ “ပှၤတအိၣ်တဆိးဘၣ်လၢအပူၤ လီၤထူလီၤယိာ်, ဒီးပှၤအလီၢ်တလီၤစံာ်ဘၣ်လၢအပူၤ အစိၤစိၤအဃၣ်ဃၣ်လီၤ.” (ယၡါယၤ ၁၃:၂၀) တၢ်သ့ၣ်တဖၣ်အံၤ မ့ၢ်အဟဲလၢထီၣ်ပှဲၤထီၣ်အနီၢ်ကီၢ်ဧါ. တၢ်လီၢ်လၢ ဝ့ၢ်ဘၤဘူၤလိၣ်အိၣ်သူၣ်လီၤတ့ၢ်အသးအလီၢ်န့ၣ်​ အိၣ်ဝဲလၢကီၢ်အံၣ်ရးအပူၤ, စီၤစုၤဒီးဝ့ၢ်ဘၢးကဒဲး အမံးလာ် ၅၀ ဃၣ်ဃၣ်​ လၢကလံၤထံးတခီန့ၣ်လီၤ. ဝ့ၢ်ဘၤဘူၤလိၣ်အိၣ်တ့ၢ်အလီၢ်န့ၣ်​ အိၣ်ထဲတၢ်ဟးဂူာ်ဟးဂီၤဒီး မုၢ်မဆါတနံၤအံၤ ပှၤတအိၣ်လၢအပူၤနီတဂၤဘၣ်. ယဟိဝၤယွၤစံးဝဲ ယကခွဲသိၣ်ခွဲပျီ ဝ့ၢ်ဘၤဘူၤလိၣ်လၢ “နီၣ်ခွဲသိၣ်မၤဟးဂီၤတၢ်လီၤ.”—ယၡါယၤ ၁၄:၂၂, ၂၃.b

၁၇. ကစၢ်ယွၤကမၤလၢထီၣ်ပှဲၤထီၣ်​ အတၢ်အၢၣ်လီၤအီလီၤခဲလၢာ်န့ၣ်​ ဘၣ်မနုၤအဃိ ပနာ်အီၤသ့လဲၣ်.

^၁၇ ခီဖျိလၢ ဝံအတၢ်စံးပာ်ဟဲလၢထီၣ်ပှဲၤထီၣ်အါမးလံအဃိ တၢ်လၢလံာ်စီဆှံတဲဝဲဘၣ်ဃးဒီး ခါဆူညါတၢ်ကမၤအသးန့ၣ်​ ပနာ်န့ၢ်အီၤသ့ဝဲလီၤ. ပနာ်သ့သပှၢ်တၢၢ်လၢ ယဟိဝၤယွၤကမၤလၢထီၣ်ပှဲၤထီၣ်​ အတၢ်အၢၣ်လီၤအီလီၤဒီး ဒုးကဲထီၣ်ဟီၣ်ခိၣ်အံၤလၢ ပၤရဒံစူးန့ၣ်လီၤ. (ဖး ၄ မိၤၡ့ ၂၃:၁၉ တက့ၢ်.) တကးဒံးဘၣ်​ ပအိၣ်ဒီးတၢ်မုၢ်လၢ်လၢ ပကဒိးန့ၢ်ဘၣ်​ “တၢ်မူအထူအယိာ်လၢ ယွၤလၢအကတိၤတၢ် ကဘျံးကဘျၣ်တသ့ဘၣ်တဂၤ စံးပာ်ဝဲ” လီၤ.—တံတူး ၁:၂.c

လံာ်စီဆှံန့ၣ်​ ဆီတလဲနတၢ်အိၣ်မူသ့

၁၈. စီၤပီလူးတဲဖျါထီၣ်ဝဲလၢ “ယွၤအကလုၢ်” န့ၣ်မၤတၢ်ဒ်လဲၣ်.

^၁၈ ပမၤလိဘၣ်လၢ လံာ်အဂုၤအဂၤတဖၣ်န့ၣ်​ တဒ်သိးဒီးလံာ်စီဆှံဘၣ်. လံာ်စီဆှံန့ၣ်​ လီၤပလိာ်လိာ်အသးလၢအခီၣ်ထံးတုၤလၢအကတၢၢ် တကးဒံးဘၣ်​ ဘၣ်ဃးဒီးစဲအ့ၣ်တကပၤန့ၣ်​ ဘၣ်ဝဲလီၤတံၢ်လီၤဆဲးထီဘိလီၤ. လံာ်အံၤဟ့ၣ်ကူၣ်ပှၤတၢ်လၢအဂ့ၤ ဒီးအိၣ်ဒီးဝံအတၢ်ကတိၤလၢ အဟဲလၢထီၣ်ပှဲၤထီၣ်အါမးလံန့ၣ်လီၤ. ဘၣ်ဆၣ်​ လံာ်စီဆှံအတၢ်ကဲဘျုးကဲဖှိၣ်န့ၣ်​ အိၣ်အါန့ၢ်အန့ၣ်တက့ၢ်လီၤ. တၢ်မၢဖိပီလူး ကွဲးဝဲလၢ “ယွၤအကလုၢ်န့ၣ်မ့ၢ်တၢ်မူ, ဒီးမၤတၢ်သ့” လီၤ. တၢ်အံၤအခီပညီ မ့ၢ်မနုၤလဲၣ်.—ဖး ဧ့ၤဘြံၤ ၄:၁၂ တက့ၢ်.

၁၉, ၂၀. (က) လံာ်စီဆှံတဘ့ၣ်အံၤ မၤစၢၤနၤလၢနကသ့ၣ်ညါလီၤ နနီၢ်ကစၢ်အသးဒ်လဲၣ်. (ခ) ခီဖျိလၢကစၢ်ယွၤဟ့ၣ်ပှၤလံာ်စီဆှံအဃိ နစံးဘျုးစံးဖှိၣ်က့ၤအီၤသ့လၢ ကျဲဒ်လဲၣ်.

^၁၉ လံာ်စီဆှံဆီတလဲ နတၢ်အိၣ်မူသ့ဝဲလီၤ. တကးဒံးဘၣ်​ မၤစၢၤနၤသ့လၢ နကသ့ၣ်ညါလီၤနသးလၢ နမ့ၢ်ပှၤဒ်လဲၣ်တဂၤလဲၣ်န့ၣ်လီၤ. ဒီးမၤစၢၤနၤသ့စ့ၢ်ကီးလၢ နကနၢ်ပၢၢ်နတၢ်ဆိကမိၣ်ဒီး နတၢ်တူၢ်ဘၣ်အဒိၣ်အယိာ်န့ၣ်လီၤ. အဒိ ဘၣ်သ့ၣ်သ့ၣ်​ ပကဆိကမိၣ်လီၤပသးလၢ ပအဲၣ်ကစၢ်ယွၤလီၤ. ဘၣ်ဆၣ်​ ပမ့ၢ်တဲလၢပအဲၣ်ကစၢ်ယွၤန့ၣ်​ ပကဘၣ်ပာ်ဖျါထီၣ်​ ပတၢ်အဲၣ်အီၤခီဖျိလၢ ပအိၣ်မူပိာ်ထွဲလံာ်စီဆှံအတၢ်ဟံးစုနဲၣ်ကျဲန့ၣ်လီၤ.

^၂၀ လံာ်စီဆှံတဘ့ၣ်အံၤဟဲလၢ ကစၢ်ယွၤအအိၣ်သပှၢ်ကတၢၢ်လီၤ. ကစၢ်အဲၣ်ဒိးလၢနကဖးလံာ်စီဆှံ ဒီးဃုသ့ၣ်ညါအီၤလီၤတံၢ်လီၤဆဲးန့ၣ်လီၤ. နပာ်ဖျါထီၣ်နတၢ်စံးဘျုးစံးဖှိၣ်ကစၢ်ယွၤသ့ ခီဖျိလၢနမၤလိအကလုၢ်ကထါ ထီဘိန့ၣ်လီၤ. ဝံၤဒီး နကနၢ်ပၢၢ်ထီၣ်​ ကစၢ်ယွၤအတၢ်တိာ်ပာ် လၢပှၤဟီၣ်ခိၣ်ဖိအဂီၢ်လီၤ. တၢ်မၤလိလၢခံတခါန့ၣ်​ ပကမၤလိအါထီၣ်​ ဘၣ်ဃးဒီးကစၢ်ယွၤအတၢ်တိာ်ပာ်အံၤလီၤ.