အဝဲသ့ၣ် “ထံၣ်” တၢ်စံးပာ်တဖၣ်

၁. ဘၣ်မနုၤအဃိ ဂ့ၤဝဲလၢပကထံၣ်တမှံကွၢ် တၢ်လၢပတထံၣ်ဒံးဘၣ်န့ၣ်လဲၣ်. (ကွၢ်တၢ်ဂီၤလၢ တၢ်မၤလိအံၤအခီၣ်ထံးတက့ၢ်.)

ယဟိဝၤယွၤ ဟ့ၣ်ပှၤတၢ်ဟ့ၣ်လၢ အလုၢ်ဒိၣ်ပှ့ၤဒိၣ်တခါလီၤ. တၢ်ဟ့ၣ်အံၤမ့ၢ်တၢ်သ့တၢ်ဘၣ်တခါလၢ ပထံၣ်တမှံတၢ်လၢ ခါဆူညါကသ့အဂီၢ်န့ၣ်လီၤ. တၢ်သ့တၢ်ဘၣ်အံၤ ကမၤစၢၤပှၤဒ်သိး ပကမုၢ်လၢ်တၢ်ဆိၣ်ဂ့ၤတဖၣ်လၢ ပကဒိးန့ၢ်ဘၣ်ခါဆူညါအဂီၢ်လီၤ. တၢ်အံၤကမၤစၢၤစ့ၢ်ကီးပှၤ ဒ်သိးပကအိၣ်ဒီး တၢ်ကတဲာ်ကတီၤပသးဒီး ဒ်သိးပဟးဆှဲးတၢ်ကီတၢ်ခဲကသ့အဂီၢ်လီၤ. ယဟိဝၤယွၤသ့ၣ်ညါဝဲ တၢ်ကမၤအသးလၢ ခါဆူညါတဖၣ် ဒီးဒ်သိးပကအိၣ်ဒီးတၢ်မုၢ်လၢ်အဂီၢ် ကစၢ်ဒုးသ့ၣ်ညါစ့ၢ်ကီးပှၤလီၤ. ခါဆူညါတၢ်ကမၤအသးတဖၣ်အံၤ ပတထံၣ်အီၤဒံးဘၣ်သနာ်က့ ပထံၣ်တမှံအီၤသ့ ဒီးပနာ်လၢတၢ်သ့ၣ်တဖၣ်အံၤကဟဲကဲထီၣ်အသး သပှၢ်တၢၢ်န့ၣ်လီၤ.—၂ ကရံၣ်သူး ၄:၁၈.

၂, ၃. (က) တၢ်ထံၣ်တမှံတၢ်န့ၣ် ကမၤစၢၤပှၤဒ်လဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.

^၂ တဘျီတခီၣ်ပထံၣ်တမှံဘၣ် တၢ်လၢကဲထီၣ်အသးတသ့ဘၣ်တဖၣ် အိၣ်ဝဲလီၤ. အဒိ ဖိသၣ်ပိာ်မုၣ်ဖိတဂၤအံၤ ထံၣ်တမှံကွၢ်ဝဲလၢ အဝဲဒိးဝဲဒၣ် စီးကပ့ၤတဘ့ၣ်န့ၣ်လီၤ. တၢ်အံၤကဲထီၣ်အသး တသ့လ့ၤတက့ၤဘၣ်. ဘၣ်ဆၣ်စီၤၡမူၤအ့လးအမိၢ်လၢအမ့ၢ် နီၢ်ဃးနၤန့ၣ် ထံၣ်တမှံဝဲတၢ်လၢ အကဲထီၣ်အသးသ့ဝဲန့ၣ်လီၤ. အဝဲဆိကမိၣ်ဝဲ မုၢ်နံၤလၢအကလဲၤကိးအဖိခွါဆူ ဒဲစီဆှံဒ်သိး အဖိခွါကမၤသကိးတၢ်ဒီး ပှၤလုၢ်တၢ်အဒိၣ်တဖၣ်လီၤ. တၢ်အံၤတမ့ၢ် တၢ်မံမီၢ်တခါဘၣ်. နီၢ်ဃးနၤပာ်လီၤအသးလၢ အကမၤဝဲဒ်န့ၣ်လီၤ. လၢတၢ်န့ၣ်အဃိ တၢ်ထံၣ်တမှံကွၢ်မုၢ်နံၤအဝဲန့ၣ် မၤစၢၤနီၤဃးနၤလၢ အကတီဒီးအတၢ်အၢၣ်လီၤ ဒီးယဟိဝၤယွၤအဂီၢ်န့ၣ်လီၤ. (၁ ၡမူၤအ့လး ၁:၂၂) ဖဲပထံၣ်တမှံကွၢ်တၢ်လၢ ယဟိဝၤယွၤအၢၣ်လီၤပှၤတဖၣ်န့ၣ် မ့ၢ်ပထံၣ်တမှံတၢ်လၢအကဟဲကဲထီၣ်အသး နီၢ်နီၢ်န့ၣ်လီၤ.—၂ ပ့းတရူး ၁:၁၉-၂၁.

^၃ လၢလံာ်စီဆှံပူၤ ယဟိဝၤယွၤအခ့အပှၤအါဂၤန့ၣ် ထံၣ်တမှံကွၢ်ဝဲ ကစၢ်ယွၤအတၢ်စံးပာ်တဖၣ်လီၤ. ဘၣ်မနုၤအဃိဂ့ၤဝဲလၢ အဝဲသ့ၣ်ကထံၣ်တမှံကွၢ် ယွၤအတၢ်စံးပာ်န့ၣ်လဲၣ်. ဒီးပဝဲစ့ၢ်ကီး ပမ့ၢ်မၤဒ်န့ၣ်န့ၣ် ဘၣ်မနုၤအဃိဂ့ၤလၢပဂီၢ်လဲၣ်.

အဝဲသ့ၣ်အတၢ်နာ်ဆူၣ်ထီၣ်ဝဲ ခီဖျိထံၣ်တမှံကွၢ် တၢ်ကမၤအသးလၢခါဆူညါ

၄. ဘၣ်မနုၤအဃိ စီၤဟ့းဘ့းလးထံၣ်တမှံကွၢ်ဝဲ ခါဆူညါတၢ်ကမၤအသးလၢ အဂ့ၤတဖၣ်သ့န့ၣ်လဲၣ်.

^၄ စီၤဟ့းဘ့းလးမ့ၢ်ပှၤအဆိကတၢၢ်တဂၤလၢ အနာ်ဝဲယဟိဝၤယွၤအတၢ်စံးပာ်တဖၣ်လီၤ. ဖဲစီၤအၤဒၣ်ဒီးနီၢ်အံၣ်အုမၤကမၣ်တၢ်ဝံၤအလီၢ်ခံန့ၣ် ယဟိဝၤယွၤစံးဘၣ်ဂုၢ်လၢ “ယကဒုးထီဒုၣ်ဒါလိာ်နသးဒီး ပိာ်မုၣ်, ဒီးနချံနသၣ် ဒီးပိာ်မုၣ်အချံအသၣ်န့ၣ်လီၤ. အဝဲဒၣ်ကမၤသဘှံးနခိၣ်, ဒီးနကမၤသဘှံးအခီၣ်နၢၣ်ခံလီၤ.” (၁ မိၤၡ့ ၃:၁၄, ၁၅) ကစၢ်ယွၤအတၢ်ကတိၤတဖၣ်အံၤ စီၤဟ့းဘ့းလးသ့ၣ်ညါဝဲလီၤ. ဘၣ်ဆၣ်တၢ်သ့ၣ်တဖၣ်အံၤ ကဟဲလၢထီၣ်ပှဲၤထီၣ်ဝဲဒ်လဲၣ်န့ၣ် စီၤဟ့းဘ့းလး တသ့ၣ်ညါဝဲလီၤတံၢ်လီၤဆဲးဘၣ်. အဝဲကဆိကမိၣ်ထံဝဲ တၢ်လၢကစၢ်ယွၤတဲတ့ၢ်ဝဲတဖၣ်န့ၣ်လီၤ. ဘၣ်သ့ၣ်သ့ၣ်စီၤဟ့းဘ့းလးကဆိကမိၣ်ဝဲလၢ ‘ပှၤလၢဂုၢ်ကမၤဘၣ်ဒိဝဲတဂၤလၢ ကမၤစၢၤပှၤဟီၣ်ခိၣ်ဖိတဖၣ် ဒ်သိးကလၢထီၣ်ပှဲၤထီၣ်က့ၤအဂီၢ်န့ၣ် ကမ့ၢ်မတၤတဂၤလဲၣ်.’ ဒီးစီၤဟ့းဘ့းလးနာ်ဝဲ တၢ်လၢယဟိဝၤယွၤစံးဝဲတဖၣ်ခဲလၢာ်န့ၣ် ကဟဲကဲထီၣ်အသးလီၤ. လၢတၢ်န့ၣ်အဃိ ယဟိဝၤယွၤတူၢ်လိာ် အဝဲအတၢ်လုၢ်ထီၣ်လီၤ.—ဖး ၁ မိၤၡ့ ၄:၃–၅; ဧ့ၤဘြံၤ ၁၁:၄ တက့ၢ်.

၅. ဘၣ်မနုၤအဃိ ဂ့ၤလၢစီၤဃနိာ်ကထံၣ်တမှံဝဲ တၢ်ကမၤအသးလၢခါဆူညါတဖၣ်န့ၣ်လဲၣ်.

^၅ စီၤဃနိာ်စ့ၢ်ကီး မ့ၢ်ပှၤတဂၤလၢအနာ်ကစၢ်ယွၤ လၢလၢပှဲၤပှဲၤလီၤ. အဝဲအိၣ်မူဘၣ်ဝဲလၢ ပှၤအၢပှၤသီတဖၣ်အကျါလီၤ. ဒီးပှၤတဖၣ်အံၤအတၢ် “ကတိၤအအၢအသီ” န့ၣ် ထီဒါယွၤလီၤ. ဘၣ်ဆၣ်စီၤဃနိာ်စံၣ်တဲၤတဲလီၤ ယွၤအကလုၢ်ကထါလၢ တၢ်သးဒူအပူၤလီၤ. အဝဲတဲဘၣ်ပှၤဟီၣ်ခိၣ်ဖိတဖၣ်လၢ ကစၢ်ယဟိဝၤယွၤကမၤဟးဂီၤဝဲ ပှၤအၢပှၤသီတဖၣ်လီၤ. (ယူဒၤ ၁၄, ၁၅) တၢ်မနုၤမၤစၢၤအီၤလၢ ကမၤဝဲဒ်န့ၣ်အဂီၢ်လဲၣ်. ကမ့ၢ်လၢအဝဲထံၣ်တမှံဝဲတၢ်ဆၢကတီၢ် ဖဲပှၤခဲလၢာ်ကဘူၣ်ထီၣ်ဘါထီၣ် ယဟိဝၤယွၤအခါ ဟီၣ်ခိၣ်အံၤတၢ်ကမၤအသးဒ်လဲၣ် အဂ့ၢ်န့နၣ်လီၤ.—ဖး ဧ့ၤဘြံၤ ၁၁:၅, ၆ တက့ၢ်.

၆. ဖဲထံၣ်လုၣ်ဘၢတၢ်ဝံၤအလီၢ်ခံ ဘၣ်သ့ၣ်သ့ၣ် စီၤနိအၤကဆိကမိၣ်ကွၢ်ဝဲ တၢ်ဂ့ၢ်မနုၤလဲၣ်.

^၆ စီၤနိအၤနာ်ဝဲယဟိဝၤယွၤအဃိ ဖဲထံလုၣ်ဘၢတၢ်အခါ ပူၤဖျဲးဝဲလီၤ. (ဧ့ၤဘြံၤ ၁၁:၇) ခီဖျိလၢအတၢ်နာ်အဃိ စီၤနိအၤလုၢ်ထီၣ်ဆၣ်ဖိကီၢ်ဖိတဖၣ်ဆူ ယဟိဝၤယွၤအအိၣ်လီၤ. (၁ မိၤၡ့ ၈:၂၀) ဖဲထံလုၣ်ဘၢတၢ်ဝံၤအလီၢ်ခံ ပှၤဟီၣ်ခိၣ်ဖိတဖၣ် အၢထီၣ်သီထီၣ်ကဒီးလီၤ. စီၤနံးမရိးစးထီၣ်ပၢတၢ်ဒီး အဝဲအဲၣ်ဒိးဝဲလၢ ပှၤဟီၣ်ခိၣ်ဖိတဖၣ်ကထီဒါ ယဟိဝၤယွၤလီၤ. (၁ မိၤၡ့ ၁၀:၈-၁၂) မ့မ့ၢ်စီၤနိအၤန့ၣ် အိၣ်ဒီးတၢ်နာ်ဂၢၢ်ဂၢၢ်ကျၢၤကျၢၤလီၤ. ဒ်စီၤဟ့းဘ့းလးအသိး စီၤနိအၤနာ်ဝဲလၢ မုၢ်ကအိၣ်ဝဲတနံၤလၢကစၢ်ယွၤကမၤလီၤမၢ်ကွံာ် တၢ်ဒဲးဘးဒီးတၢ်သံန့ၣ်လီၤ. ဘၣ်သ့ၣ်သ့ၣ်စီၤနိအၤကဆိကမိၣ်ဘၣ်ဝဲတၢ်ဆၢကတီၢ်ဖဲ ပှၤပၢတၢ်လၢအအၢအသီတဖၣ်တအိၣ်လၢၤဘၣ်လီၤ. ပဝဲသ့ၣ်စ့ၢ်ကီး ပထံၣ်တမှံကွၢ် တၢ်ကမၤအသးလၢ ခါဆူညါတဖၣ်အံၤသ့ဝဲလီၤ.—ရိမ့ၤ ၆:၂၃.

အဝဲသ့ၣ်ထံၣ်တမှံကွၢ် တၢ်ဆၢကတီၢ်လၢ ကစၢ်ယွၤအတၢ်စံးပာ်တဖၣ် ကဟဲလၢပှဲၤထီၣ်ဝဲ

၇. စီၤအၤဘြၤဟၣ်, စီၤအံၤစဲး ဒီးစီၤယၤကိာ် ထံၣ်တမှံဘၣ်ဝဲ ခါဆူညါတၢ်ကမၤအသး မနုၤတမံၤလဲၣ်.

^၇ စီၤအၤဘြၤဟၣ်, စီၤအံၤစဲးဒီး စီၤယၤကိာ်ထံၣ်တမှံဘၣ်ဝဲ ခါဆူညါတၢ်ကမၤအသးလၢ အဂ့ၤတဖၣ်န့ၣ်လီၤ. ယဟိဝၤယွၤအၢၣ်လီၤအီလီၤအဝဲသ့ၣ်လၢ ပှၤကလုာ်ခဲလၢာ်ကဘၣ်တၢ်ဆိၣ်ဂ့ၤခီဖျိလၢ အဝဲသ့ၣ် “အချံအသၣ်” အဃိလီၤ. (၁ မိၤၡ့ ၂၂:၁၈; ၂၆:၄; ၂၈:၁၄) ကစၢ်ယွၤအၢၣ်လီၤအဝဲသ့ၣ်လၢ အဟံၣ်ဖိဃီဖိတဖၣ် ကကဲထီၣ်ပှၤကလုာ်ဖးဒိၣ် တကလုာ်ဒီးကအိၣ်မူဘၣ်လၢ ကီၢ်တၢ်စံးပာ်ဃံလၤတဘ့ၣ်အပူၤလီၤ. (၁ မိၤၡ့ ၁၅:၅-၇) ခီဖျိလၢစီၤအၤဘြၤဟၣ်, စီၤအံၤစဲး, စီၤယၤကိာ်နာ်ဝဲလၢ ယဟိဝၤယွၤ အတၢ်စံးပာ်တဖၣ်န့ၣ် ကဟဲလၢထီၣ်ပှဲၤထီၣ်ဝဲအဃိ အဝဲသ့ၣ်ထံၣ်တမှံဘၣ် လၢအဟံၣ်ဖိဃီဖိတဖၣ် အိၣ်ဘၣ်လၢ ကီၢ်တၢ်စံးပာ်အပူၤလီၤ. စးထီၣ်လၢ စီၤအၤဒၣ်ဒီး နီၢ်အံၣ်အုမၤတၢ်ဒဲးဘးဝံၤအလီၢ်ခံ ယဟိဝၤယွၤမၤစၢၤဝဲ အခ့အပှၤလၢအတီအလိၤတဖၣ် ဒ်သိးကနၢ်ပၢၢ်ထီၣ်ဝဲလၢ မုၢ်ကအိၣ်ဝဲတနံၤဖဲ ပှၤဟီၣ်ခိၣ်ဖိတဖၣ် ကဟဲလၢထီၣ်ပှဲၤထီၣ်ဝဲန့ၣ်လီၤ.

၈. တၢ်မနုၤမၤစၢၤ စီၤအၤဘြၤဟၣ်လၢကအိၣ်ဒီး တၢ်နာ်အဂၢၢ်အကျၢၤ ဒီးတၢ်ဒိကနၣ်န့ၣ်လဲၣ်.

^၈ ဖဲစီၤအၤဘြၤဟၣ်ကွၢ်ဆၢၣ်မဲာ်ဘၣ်ဝဲ တၢ်ကီတၢ်ခဲအခါ ခီဖျိလၢအဝဲအိၣ်ဒီးတၢ်နာ်ဂၢၢ်ဂၢၢ်ကျၢၤကျၢၤအဃိ အဝဲဒိကနၣ်ဝဲ ယဟိဝၤယွၤအကလုၢ်န့ၣ်လီၤ. ယွၤအတၢ်စံးပာ်တဟဲလၢပှဲၤထီၣ်လၢ စီၤအၤဘြၤဟၣ်ဒီး ယွၤအခ့အပှၤလၢအတီအလိၤအဂၤတဖၣ် အစိၤသနာ်က့ အဝဲသ့ၣ်ထံၣ်တမှံဝဲ ယွၤအတၢ်စံးပာ်တဖၣ်န့ၣ်လီၤ. လံာ်စီဆှံပာ်ဖျါထီၣ်ဝဲလၢ “‘အဝဲသ့ၣ် ထံၣ်သကွ့ၤတၢ်တဖၣ်န့ၣ်, ဒီးဖိးဝဲ [‘ထံၣ်စိဝဲတၢ်သ့ၣ်တဖၣ်အံၤလၢအယံၤ ဒီးတူၢ်လိာ်မုာ်တ့ၢ်ဝဲ,’ nwt]’” လီၤ. (ဖး ဧ့ၤဘြံၤ ၁၁:၈–၁၃ တက့ၢ်.) စီၤအၤဘြၤဟၣ် သ့ၣ်ညါဝဲလၢယဟိဝၤယွၤတီဒီး အတၢ်စံးပာ်လၢအပူၤကွံာ်တဖၣ်အဃိ နာ်ဝဲသပှၢ်တၢၢ်လၢ ယဟိဝၤယွၤအတၢ်စံးပာ်လၢ ခါဆူညါတၢ်ကမၤအသးတဖၣ်စ့ၢ်ကီး ကလၢထီၣ်ပှဲၤထီၣ်ဝဲလီၤ.

၉. စီၤအၤဘြၤဟၣ်နာ်ဝဲယွၤအတၢ်စံးပာ်တဖၣ်အဃိ ကဲထီၣ်တၢ်မၤစၢၤလၢအဂီၢ်ဒ်လဲၣ်.

^၉ ခီဖျိလၢ စီၤအၤဘြၤဟၣ်နာ်ဝဲ ယဟိဝၤယွၤအတၢ်စံးပာ်တဖၣ်အဃိ အဝဲမၤဝဲဒ်ယဟိဝၤယွၤမၢအီၤအသိးန့ၣ်လီၤ. အဒိ အဝဲပာ်တ့ၢ်ကွံာ်အဟံၣ်လၢ ဝ့ၢ်အူၢ်အပူၤဒီး လၢတၢ်န့ၣ်အလီၢ်ခံ လၢအတၢ်အိၣ်မူဒီတကတီၢ်အပူၤန့ၣ် တသူၣ်ထီၣ်အဟံၣ်လၢ ကအိၣ်ဂၢၢ်ဆိးကျၢၤဝဲအဂီၢ်ဘၣ်. အဝဲသ့ၣ်ညါဝဲလၢ ဝ့ၢ်လၢအခိၣ်အဃၢၤတဖၣ် တအိၣ်ဂၢၢ်အိၣ်ကျၢၤ ထီဘိဘၣ်. မ့ၢ်လၢပှၤလၢအပၢတၢ်တဖၣ် တမၤတၢ်ဘၣ်ယွၤအသးအဃိန့ၣ်လီၤ. (ယိၤၡူ ၂၄:၂) အဝဲမုၢ်လၢ်ဝဲလၢ ယဟိဝၤယွၤဒီးအဘီမုၢ် ကပၢတၢ်လီၤစိၤလီၤထီလီၤ. တၢ်ပၢတၢ်ပြးတခါအံၤမ့ၢ် “ဝ့ၢ်တဖျၢၣ်လၢအအိၣ်ဒီး အခီၣ်ထံးတဖၣ်, လၢပှၤသူၣ်အီၤဒီး တ့အီၤတဂၤန့ၣ်, မ့ၢ်ယွၤလီၤ.” (ဧ့ၤဘြံၤ ၁၁:၁၀) စီၤအၤဘြၤဟၣ်, စီၤဟ့းဘ့းလး, စီၤဃနိာ်, စီၤနိအၤ ဒီးပှၤအဂၤတဖၣ်နာ်ဝဲ တၢ်ဂဲၤဆၢထၢၣ်သမူထီၣ်က့ၤလီၤ. ဖဲအဝဲသ့ၣ်ဆိကမိၣ်ဝဲလၢ ကအိၣ်မူဘၣ်လၢဟီၣ်ခိၣ်ဃံလၤ လီၤထူလီၤယိာ်အခါန့ၣ် အတၢ်နာ်ဂၢၢ်ကျၢၤထီၣ်ဝဲလီၤ. —ဖး ဧ့ၤဘြံၤ ၁၁:၁၅, ၁၆ တက့ၢ်.

၁၀. ဘၣ်မနုၤအဃိ ဂ့ၤလၢနီၢ်စၤရါကထံၣ်တမှံကွၢ်တၢ်လၢ ခါဆူညါတဖၣ်န့ၣ်လဲၣ်.

^၁၀ စီၤအၤဘြၤဟၣ်အမါနီၢ်စၤရါန့ၣ် နာ်ဝဲယဟိဝၤယွၤအတၢ်စံးပာ် လၢလၢပှဲၤပှဲၤစ့ၢ်ကီးလီၤ. ဖဲနီၢ်စၤရါအသးအိၣ် ၉၀ အခါ အဖိတအိၣ်နီတဂၤဒံးဘၣ် သနာ်က့မုၢ်လၢ်ဝဲလၢ အဆၢကတီၢ်ဖဲအဝဲကအိၣ်ဖျဲၣ်ထီၣ်အဖိန့ၣ်လီၤ. နီၢ်စၤရါကထံၣ်တမှံဘၣ်ဝဲလၢ အဖိအလံၤတဖၣ် ကကဲထီၣ်ပှၤကလုာ်ဖးဒိၣ်တကလုာ်လီၤ. (ဧ့ၤဘြံၤ ၁၁:၁၁, ၁၂) ဘၣ်မနုၤအဃိ နီၢ်စၤရါနာ်ဝဲလၢ တၢ်သ့ၣ်တဖၣ်အံၤ ကဲထီၣ်အသးသ့လဲၣ်. မ့ၢ်လၢယဟိဝၤယွၤ စံးဘၣ်အဝၤလၢ “ယကဆိၣ်ဂ့ၤအီၤ, ဒီးယကဟ့ၣ်လီၤနဖိခွါလၢ အီၤစ့ၢ်ကီးလီၤ. ဒီးယကဆိၣ်ဂ့ၤအီၤ, ဒီးကကဲထီၣ်ပှၤကလုာ်တဖၣ်, ဒီးပှၤဂီၢ်မုၢ်အစီၤပၤတဖၣ် ကလီၤစၢၤလၢအီၤလီၤ.” (၁ မိၤၡ့ ၁၇:၁၆) ဒ်ယဟိဝၤယွၤ အၢၣ်လီၤဝဲအသိး နီၢ်စၤရါဒိးန့ၢ်ဘၣ်ဝဲ အဖိခွါစီၤအံၤစဲးန့ၣ်လီၤ. မ့ၢ်လၢတၢ်လီၤလးတခါအံၤအဃိ နီၢ်စၤရါနာ်ဝဲလၢ ယဟိဝၤယွၤအတၢ်စံးပာ်လၢ အဂုၤအဂၤတဖၣ် ကဟဲလၢထီၣ်ပှဲၤထီၣ်ဝဲလီၤ. ပဝဲသ့ၣ်တဖၣ် ပတၢ်နာ်ဂၢၢ်ထီၣ်ကျၢၤထီၣ်သ့ ခီဖျိပထံၣ်တမှံကွၢ် ယဟိဝၤယွၤအတၢ်စံးပာ်လၢ အလီၤလိၢ်လီၤလးတဖၣ်န့ၣ်လီၤ.

အဝဲဆိကမိၣ်တၢ် ဘၣ်ဃးဒီး တၢ်လၢကဒိးန့ၢ်ဘၣ်ဝဲသ့ၣ်တဖၣ်

၁၁, ၁၂. စီၤမိၤၡ့အတၢ်အဲၣ်ယဟိဝၤယွၤ ကအါထီၣ်အဂီၢ်တၢ်မနုၤ မၤစၢၤအီၤလဲၣ်.

^၁၁ စီၤမိၤၡ့နာ်ဝဲ ယဟိဝၤယွၤအတၢ်စံးပာ်တဖၣ်စ့ၢ်ကီးလီၤ. အဝဲဒိၣ်ထီၣ်လၢ ကီၢ်အဲၤကူပတူး ဒ်စီၤပၤအဖိခွါတဂၤအသိးလီၤ. ခီဖျိလၢ စီၤမိၤၡ့အဲၣ်ယဟိဝၤယွၤဒိၣ်န့ၢ်ဒံး တၢ်အဂုၤအဂၤခဲလၢာ်အဃိ အဝဲတသးလီဝဲ တၢ်စိတၢ်ကမီၤ ဒီးတၢ်ထူးတၢ်တီၤဘၣ်. အဝဲမၤလိဘၣ် ယဟိဝၤယွၤအဂ့ၢ်လၢ အမိၢ်အပၢ်လၢအမ့ၢ် ပှၤဧ့ၤဘြံၤဖိအအိၣ်လီၤ. အမိၢ်အပၢ်သိၣ်လိအီၤလၢ ယဟိဝၤယွၤအၢၣ်လီၤဝဲလၢ ကမၤပူၤဖျဲးပှၤဧ့ၤဘြံၤဖိတဖၣ်လၢ ကုၢ်အလီၢ်ဒီးကဟ့ၣ်အဝဲသ့ၣ်လၢ ကီၢ်တၢ်စံးပာ်လီၤ. (၁ မိၤၡ့ ၁၃:၁၄, ၁၅; ၂ မိၤၡ့ ၂:၅-၁၀) စီၤမိၤၡ့ထံၣ်တမှံကွၢ် ယဟိဝၤယွၤအတၢ်အၢၣ်လီၤတဖၣ်အဃိ အတၢ်အဲၣ်ကစၢ်ယွၤအါထီၣ်ဝဲလီၤ.

^၁၂ ထီဘိန့ၣ် စီၤမိၤၡ့ဆိကမိၣ်ဝဲတၢ်ဂ့ၢ်မနုၤလဲၣ်. လံာ်စီဆှံစံးဝဲ “လၢတၢ်နာ်, စီၤမိၤၡ့ဒိၣ်ထီၣ်ဒီး, တအၢၣ်လီၤအီလီၤဘၣ်လၢ ပှၤကကိးအီၤလၢ စီၤပၤဖၤရိၤအဖိမုၣ်န့ၣ်အဖိခွါဘၣ်. ဘၣ်နးဘၣ်ဖှီၣ်ဃုာ်ဒီး ယွၤအပှၤဂီၢ်မုၢ်န့ၣ်, ဘၣ်အသးဒိၣ်န့ၢ် အမုာ်လၤတၢ်လၢ တၢ်ဒဲးဘးအတၢ်မုာ်တၢ်လၤအပူၤ တစိၢ်တလီၢ်န့ၣ်တက့ၢ်လီၤ. ဆိကမိၣ်ဝဲလၢ ခရံာ်အတၢ်ဒုၣ်ဒွဲၣ်, မ့ၢ်တၢ်အထူးအတီၤဒိၣ်န့ၢ် အဲၤကူပတူးအတၢ်လုၢ်ဒိၣ်ပှ့ၤဒိၣ်တက့ၢ်လီၤ. အဂ့ၢ်ဒ်အံၤ, ကွၢ်ဃီၤဝဲဆူ အဘူးအလဲလီၤ.”—ဧ့ၤဘြံၤ ၁၁:၂၄-၂၆.

၁၃. ဘၣ်မနုၤအဃိ ဂ့ၤလၢစီၤမိၤၡ့ကဆိကမိၣ် ယဟိဝၤအတၢ်စံးပာ်တဖၣ်လဲၣ်.

^၁၃ ယဟိဝၤယွၤအတၢ်စံးပာ်လၢ ကမၤပူၤဖျဲးပှၤဧ့ၤဘြံၤဖိတဖၣ်လၢ ကုၢ်အလီၢ်န့ၣ် စီၤမိၤၡ့ကဆိကမိၣ်ဘၣ်ဝဲအဂ့ၢ် လီၤတံၢ်လီၤဆဲးလီၤ. ဒ်ယဟိဝၤယွၤအခ့အပှၤအဂၤတဖၣ်အသိး စီၤမိၤၡ့သ့ၣ်ညါဝဲလၢ ယဟိဝၤယွၤကမၤပူၤဖျဲး ပှၤဟီၣ်ခိၣ်ဖိလၢတၢ်သံလီၤ. (ယိၤဘး ၁၄:၁၄, ၁၅; ဧ့ၤဘြံၤ ၁၁:၁၇-၁၉) လၢတၢ်န့ၣ်အဃိ စီၤမိၤၡ့သ့ၣ်ညါဝဲလၢ ကစၢ်ယဟိဝၤယွၤအဲၣ်ပှၤဟီၣ်ခိၣ်ဖိ ထဲလဲၣ်န့ၣ်လီၤ. တၢ်အံၤမၤစၢၤစီၤမိၤၡ့ဒ်သိး အတၢ်အဲၣ်ယဟိဝၤယွၤ ကဒိၣ်ထီၣ်အဂီၢ်တကးဒံးဘၣ် ဒ်သိးအတၢ်နာ်စ့ၢ်ကီး ကဂၢၢ်ကျၢၤထီၣ်ဝဲအဂီၢ်လီၤ. ဒီးမၢၤစၢၤအီၤလၢ ကမၤယဟိဝၤယွၤအတၢ်မၤ တစိၤအသးလီၤ. (၅ မိၤၡ့ ၆:၄, ၅) ဖဲစီၤပၤဖၤရိၤအဲၣ်ဒိးမၤသံအီၤအခါဒၣ်လဲာ် အဝဲတပျံၤတၢ်ဘၣ်. အဝဲသ့ၣ်ညါလၢ ယဟိဝၤယွၤကဆိၣ်ဂ့ၤအီၤန့ၣ်လီၤ.—၂ မိၤၡ့ ၁၀:၂၈, ၂၉.

ထံၣ်တမှံကွၢ် တၢ်လၢယွၤအဘီအမုၢ် ကမၤဝဲ

၁၄. တၢ်ကမၤအသးလၢခါဆူညါတဖၣ်န့ၣ် ပှၤတနီၤနီၤ ထံၣ်တမှံကွၢ်ဝဲ ဒ်လဲၣ်.

^၁၄ ပှၤအါဂၤဆိကမိၣ်တၢ် ဘၣ်ဃးဒီးခါဆူညါတၢ်ကမၤအသးအဂ့ၢ် ဒီးထံၣ်တမှံကွၢ်ဝဲ တၢ်လၢအဟဲကဲထီၣ်အသးတသ့ဘၣ်တဖၣ်လီၤ. အဒိ ပှၤဖှီၣ်ဖိယာ်ဖိတနီၤ ထံၣ်တမှံကွၢ်ဝဲလၢ အဝဲသ့ၣ်ကကဲထီၣ်ပှၤထူးပှၤတီၤအဃိ တလိၣ်လၢအဝဲသ့ၣ် ဘၣ်ယိၣ်တၢ်နီတမံၤလၢၤဘၣ်န့ၣ်လီၤ. ဘၣ်ဆၣ်လံာ်စီဆှံ ပာ်ဖျါထီၣ်ဝဲလၢတၢ်အိၣ်မူလၢ မုၣ်ကီၤလံၢ်အတၢ်ပၢတၢ်ပြး အဖီလာ်န့ၣ်ပှဲၤဝဲဒီး “တၢ်ကိၢ်တၢ်ဂီၤ, ဒီးတၢ်နးတၢ်ဖှီၣ်လီၤ.” (စံးထီၣ်ပတြၢၤ ၉၀:၁၀) မ့မ့ၢ်ပှၤအဂၤတနီၤ ထံၣ်တမှံကွၢ်ဝဲလၢ ဟီၣ်ခိၣ်ပဒိၣ်ပပှၢ်တဖၣ် ကမၤဟါမၢ်ကွံာ် တၢ်ကီတၢ်ခဲခဲလၢာ်လၢ ဟီၣ်ခိၣ်ချၢန့ၣ်လီၤ. ဘၣ်ဆၣ်လံာ်စီဆှံစံးဝဲလၢ ထဲယွၤအတၢ်ပၢတၢ်ပြးမၤဝဲဒ်န့ၣ်ကသ့လီၤ. (ဒၤနံးယ့လး ၂:၄၄) ပှၤအါဂၤ ဆိကမိၣ်ဝဲလၢ ဟီၣ်ခိၣ်အတၢ်အိၣ်သးတဖၣ်အံၤ တဆီတလဲအသးနီတဘျီလၢၤဘၣ်. ဘၣ်ဆၣ် လံာ်စီဆှံစံးဝဲလၢ ယွၤကမၤဟးဂီၤကွံာ် ပှၤအၢပှၤသီလၢ ဟီၣ်ခိၣ်ချၢန့ၣ်လီၤ. (စဖါနယၤ ၁:၁၈; ၁ ယိၤဟၣ် ၂:၁၅-၁၇) ပှၤလၢအထံၣ်တမှံကွၢ်တၢ်လၢ အတလီၤပလိာ်အသးဒီး ယဟိဝၤယွၤအတၢ်ကတိၤတဖၣ်န့ၣ် ကထံၣ်ဘၣ်တၢ်သးအုးလီၤ.

၁၅ (က) ဘၣ်မနုၤအဃိ ဂ့ၤလၢပကထံၣ်တမှံကွၢ် ယွၤအတၢ်စံးပာ်တဖၣ်လဲၣ်. (ခ) ခါဆူညါနဆၢထံၣ်ဘၣ် တၢ်မနုၤတမံၤလဲၣ်.

^၁၅ ယဟိဝၤယွၤ အၢၣ်လီၤအီလီၤပှၤလၢ ခါဆူညါန့ၣ် အဝဲကမၤန့ၢ်ပှၤ တၢ်လၢအဂ့ၤတဖၣ်လီၤ. ဖဲပဆိကမိၣ် ကစၢ်ယွၤအတၢ်စံးပာ်တဖၣ်အခါ ပအိၣ်ဒီးတၢ်သူၣ်ဖှံသးညီဒီး တၢ်သူၣ်ဒူသးဒူလၢ ပကဆဲးမၤကစၢ်ယွၤအတၢ်မၤအဂီၢ်န့ၣ်လီၤ. နမ့မ့ၢ် ပှၤလၢအအိၣ်ဒီးတၢ်မုၢ်လၢ်လၢ ကထီၣ်ဘၣ်ဆူမူခိၣ်မ့ၢ်ဂ့ၤ ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်မ့ၢ်ဂ့ၤ မ့ၢ်နထံၣ်တမှံကွၢ် တၢ်ဆၢကတီၢ်ဖဲ နကမၤတၢ်လၢ ယဟိဝၤယွၤအၢၣ်လီၤနၤတဖၣ် ကသ့စ့ၢ်ကီးဧါ. နမ့ၢ်မုၢ်လၢ်လၢနကအိၣ်မူဘၣ်လၢ ဟီၣ်ခိၣ်ချၢလီၤထူလီၤယိာ်န့ၣ် ထံၣ်တမှံကွၢ်လၢ နၤဒီးနတံၤသကိးတဖၣ် မၤဃံမၤလၤထီၣ်ဟီၣ်ခိၣ် ဒ်ကရၢၢ်ဃံလၤတဘ့ၣ်အသိးန့ၣ်တက့ၢ်. ပှၤလၢအကတီခိၣ်ရိၣ်မဲတၢ်တဖၣ်စ့ၢ်ကီး ကဟုကယာ်နၤလီၤ. ဒ်နအဲၣ်ယဟိဝၤယွၤအသိး ပှၤလၢနဃၢၤခဲလၢာ် အဲၣ်ယဟိဝၤယွၤစ့ၢ်ကီးလီၤ. နတၢ်အိၣ်ဆူၣ်အိၣ်ချ့ကဂ့ၤထီၣ်, နဂံၢ်နဘါကအိၣ်လၢလၢပှဲၤပှဲၤ ဒီးနတၢ်ကိၢ်တၢ်ဂီၤ တအိၣ်နီတမံၤလၢၤဘၣ်န့ၣ်လီၤ. နကသူၣ်ဖှံသးညီ ခီဖျိလၢ နကသူနတၤလၣ်ဒီး တၢ်သ့တၢ်ဘၣ်လၢ ကမၤစၢၤပှၤဂၤအဂီၢ် ဒီးလၢနကမၤလၤကပီၤယဟိဝၤယွၤအဂီၢ်န့ၣ်လီၤ. ဘၣ်သ့ၣ်သ့ၣ် နကမၤစၢၤဘၣ်ပှၤလၢ အဂဲၤဆၢထၢၣ်သမူထီၣ်က့ၤတဖၣ် လၢကသ့ၣ်ညါဘၣ် ယဟိဝၤယွၤအဂီၢ်န့ၣ်လီၤ. (ယိၤဟၣ် ၁၇:၃; မၤတၢ် ၂၄:၁၅) ဖဲနထံၣ်တမှံတၢ်သ့ၣ်တဖၣ်အံၤအခါ တၢ်န့ၣ်တမ့ၢ်တၢ်မံမီၢ်ဘၣ်. မ့ၢ်လၢ လံာ်စီဆှံတဲဆိပာ်ဝဲတၢ်သ့ၣ်တဖၣ်အံၤအဃိ ပသ့ၣ်ညါလၢအကဟဲကဲထီၣ်ဝဲသပှၢ်တၢၢ်လီၤ.—ယၡါယၤ ၁၁:၉; ၂၅:၈; ၃၃:၂၄; ၃၅:၅-၇; ၆၅:၂၂.

တဲသကိးတၢ်လၢ နဆၢထံၣ်ဘၣ်အီၤတဖၣ်အဂ့ၢ်

၁၆, ၁၇. ဘၣ်မနုၤအဃိ ဂ့ၤဝဲလၢပကတဲသကိး ကစၢ်ယွၤအတၢ်စံးပာ်လၢ ခါဆူညါအဂီၢ်န့ၣ်လဲၣ်.

^၁၆ ဖဲပတဲဘၣ်ပဒီပုၢ်ဝဲၢ်တဖၣ်လၢ ဘၣ်ဃးတၢ်လၢပအဲၣ်ဒိးမၤလၢ ဟီၣ်ခိၣ်သီအခါန့ၣ် မ့ၢ်ကျဲတဘိလၢ ပကမၤစၢၤလိာ်သးကဒဲကဒဲ ဒ်သိးပကထံၣ်တမှံတၢ်မုၢ်လၢ်လၢ အဃံအလၤတဖၣ် ၡဲၡဲဖိကသ့အဂီၢ်လီၤ. ပကမၤတၢ်မနုၤလဲၣ်န့ၣ် ပတသ့ၣ်ညါလီၤတံၢ်လီၤဆဲးဘၣ်. ဘၣ်ဆၣ်ဖဲပတဲသကိးတၢ်လၢ ပဆၢမုၢ်လၢ်မၤဝဲတဖၣ်န့ၣ် မ့ၢ်ဒၣ်ပပာ်ဖျါထီၣ်ပတၢ်နာ်လၢ ယဟိဝၤယွၤအတၢ်စံးပာ်တဖၣ်လီၤ. ပမ့ၢ်မၤဒ်အံၤန့ၣ် မ့ၢ်ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒ်သိးပကဆဲးမၤ ယဟိဝၤယွၤအတၢ်မၤ ဖဲပထံၣ်ဘၣ်တၢ်ကီတၢ်ခဲအခါလီၤ. တၢ်မၢဖိစီၤပီလူးဒီး ဒီပုၢ်ဝဲၢ်အဂၤတဖၣ်အိၣ်လၢ ရိမ့ၤအပူၤန့ၣ် မၤဝဲဒ်န့ၣ်စ့ၢ်ကီးလီၤ.—ရိမ့ၤ ၁:၁၁, ၁၂.

^၁၇ ဖဲနဆိကမိၣ်ကွၢ် ယဟိဝၤယွၤ အတၢ်စံးပာ်တဖၣ်အခါ နတၢ်ဆိကမိၣ်ဘၣ်ဃးဒီး နတၢ်ကီတၢ်ခဲတဖၣ်န့ၣ် ကစှၤလီၤဝဲလီၤ. ဘၣ်တဘျီ စီၤပ့းတရူးဘၣ်ယိၣ်တၢ်ဒီး စံးဘၣ်ယ့ၣ်ၡူးလၢ “ကွၢ်ကွၢ်, ပဝဲဒၣ်အံၤ,ပဟးသဒၣ် တၢ်ခဲလၢာ်, ဒီးပပိာ်နခံလံ. မၤသးဒ်န့ၣ်ဒီး ပကန့ၢ်တၢ်မနုၤတမံၤလဲၣ်.” ယ့ၣ်ၡူးအဲၣ်ဒိးလၢ စီၤပ့းတရူးဒီး အခ့အပှၤအဂၤသ့ၣ်တဖၣ် ကထံၣ်တမှံကွၢ်တၢ်လၢ အဝဲသ့ၣ်ကမၤလၢခါဆူညါတဖၣ်န့ၣ်လီၤ. ဒီးယ့ၣ်ၡူးစံးဘၣ်အဝဲသ့ၣ်လၢ “တုၤပှၤကညီဖိခွါအံၤ ကဆ့ၣ်နီၤလၢအလီၢ်ပစိာ် ကဟုကညီၢ်အဖီခိၣ်ဒီး, သုဝဲသ့ၣ်အံၤ, သုကဆ့ၣ်နီၤစ့ၢ်ကီးလၢ လီၢ်ပစိာ် တဆံခံ ဖျၢၣ်အဖီခိၣ်, ဒီးသုကစံၣ်ညီၣ်အံၣ်စရ့လး တဆံခံဒူၣ်န့ၣ်လီၤ. ဒီးကယဲၢ်ပှၤလၢ အဟးသဒၣ်အဟံၣ်အဃီမ့ၢ်ဂ့ၤ, အဒီပုၢ်ဝဲၢ်မုၣ်မ့ၢ်ဂ့ၤ, အဒီပုၢ်ဝဲၢ်ခွါမ့ၢ်ဂ့ၤ, အမိၢ်မ့ၢ်ဂ့ၤ, အပၢ်မ့ၢ်ဂ့ၤ, အဖိအလံၤမ့ၢ်ဂ့ၤ, အစံာ်အပျီမ့ၢ်ဂ့ၤ, လၢယမံၤအဃိကိးဂၤဒဲးန့ၣ်, ကန့ၢ်ဘၣ်က့ၤဝဲအါန့ၢ်အလီၢ်တကယၤ, ဒီးကန့ၢ်ဘၣ်သါ တၢ်မူအထူအယိာ်လီၤ.” (မးသဲ ၁၉:၂၇-၂၉) လၢတၢ်န့ၣ်အဃိ စီၤပ့းတရူးဒီးတၢ်မၢဖိအဂၤသ့ၣ်တဖၣ် ကထံၣ်တမှံကွၢ်ဝဲလၢ အဝဲသ့ၣ်တဖၣ် ကပၢဃုာ်တၢ်ဒီး ယ့ၣ်ၡူးလၢမူခိၣ်လီၤ. ဖဲန့ၣ်အဆၢကတီၢ် အဝဲသ့ၣ်ကမၤစၢၤဝဲ ပှၤဟီၣ်ခိၣ်ဖိလၢအဒိကနၣ်တၢ်တဖၣ် ဒ်သိးကကဲထီၣ်ပှၤလၢပှၤပှဲၤအဂီၢ်န့ၣ်လီၤ.

၁၈. ဘၣ်မနုၤအဃိ ဂ့ၤလၢပကထံၣ်တမှံကွၢ် တၢ်ဆၢကတီၢ်လၢ ကစၢ်ယွၤကမၤလၢပှဲၤထီၣ် အတၢ်စံးပာ်န့ၣ်လဲၣ်.

^၁၈ ပမၤလိတ့ၢ်တၢ်လၢ အမၤစၢၤယဟိဝၤယွၤအခ့အပှၤတဖၣ် ဒ်သိးကအိၣ်ဒီးတၢ်နာ်အဂၢၢ်အကျၢၤအဂီၢ်န့ၣ်လီၤ. ခီဖျိလၢ စီၤဟ့းဘ့းလးထံၣ်တမှံကွၢ်ဝဲ ယဟိဝၤယွၤအတၢ်စံးပာ်လၢ ဘၣ်ဃးဒီးခါဆူညါအဂ့ၢ်ဒီးနာ်ဝဲအဃိ အဝဲမၤသးခုယဟိဝၤယွၤအသးလီၤ. စီၤအၤဘြၤဟၣ် ထံၣ်တမှံဘၣ်ဝဲလၢ ယဟိဝၤယွၤအတၢ်အၢၣ်လီၤဘၣ်ဃး “အချံအသၣ်” ကဟဲလၢထီၣ်ပှဲၤထီၣ်ဝဲအဃိ ဖဲအဝဲကွၢ်ဆၢၣ်မဲာ်ဘၣ် တၢ်ကီတၢ်ခဲဒၣ်လဲာ် ဒိကနၣ်ယဟိဝၤယွၤအကလုၢ်န့ၣ်လီၤ. (၁ မိၤၡ့ ၃:၁၅) စီၤမိၤၡ့မုၢ်လၢ်ဝဲ တၢ်ဆိၣ်ဂ့ၤလၢယဟိဝၤယွၤအၢၣ်လီၤအီၤအဃိ တၢ်အံၤမၤစၢၤအီၤလၢ ကအဲၣ်ယဟိဝၤယွၤဒီး တီဒီးအီၤအဂီၢ်န့ၣ်လီၤ. (ဧ့ၤဘြံၤ ၁၁:၂၆) ပမ့ၢ်ထံၣ်တမှံကွၢ် ယဟိဝၤယွၤအတၢ်စံးပာ်တဖၣ်လၢ ကဟဲလၢထီၣ်ပှဲၤထီၣ်ဝဲန့ၣ် ပတၢ်အဲၣ်ဒီးပတၢ်နာ်ယဟိဝၤယွၤ ကအါထီၣ်ဝဲလီၤ. တၢ်မၤလိလၢခံတခါန့ၣ် ပကမၤလိသကိး တၢ်ထံၣ်တမှံကွၢ်တၢ်လၢ ကျဲအဂၤတဘိလီၤ.