ဖဲပထံၣ်ဘၣ်​ တၢ်မၤကွၢ်တဖၣ်အခါ ပဆဲးပၢၤဃာ် ပတၢ်သးခုဒ်လဲၣ်

၁-၂. ဒ် မးသဲ ၅:၁၁ ပာ်ဖျါထီၣ်ဝဲအသိး ပကဘၣ်ထံၣ်​ တၢ်မၤကွၢ်တဖၣ်အံၤဒ်လဲၣ်.

ယ့ၣ်ၡူးအၢၣ်လီၤဝဲလၢ ပှၤလၢအပိာ်အခံတဖၣ်န့ၣ်​ ကသးခုဝဲလီၤ. ယ့ၣ်ၡူးဟ့ၣ်ပလီၢ်စ့ၢ်ကီးလၢ ပှၤလၢအအဲၣ်အီၤတဖၣ်​ အဝဲသ့ၣ်ကထံၣ်ဘၣ်ဒီး တၢ်မၤကွၢ်တဖၣ်လီၤ. (မးသဲ ၁၀:၂၂, ၂၃; လူၤကၣ်​ ၆:၂၀-၂၃) ပသးခုဒိၣ်မးလၢ ပကဲထီၣ်ဘၣ်​ ခရံာ်အပျဲၢ်အဘီၣ်လီၤ. ဘၣ်ဆၣ်​ ပမ့ၢ်ထံၣ်ဘၣ်​ တၢ်မၤကွၢ်လၢပဟံၣ်ပူၤဃီပူၤ, ပဒိၣ်ပပှၢ်အတၢ်မၤအၢမၤနး ဒီးတၢ်ဆီၣ်သနံးလၢ တၢ်မၤလီၢ် မ့တမ့ၢ် လၢကၠိန့ၣ်​ ပကမၤဒ်လဲၣ်. ဖဲပထံၣ်ဘၣ်​ တၢ်အိၣ်သးတဖၣ်အံၤအခါ ပသူၣ်ကိၢ်သးဂီၤတၢ်လီၤ.

^၂ ပှၤအါတက့ၢ်ထံၣ်ဝဲလၢ တၢ်မၤအၢမၤနးန့ၣ်​ တမ့ၢ်တၢ်သးခုဘၣ်. ဘၣ်ဆၣ်​ မ့မ့ၢ်လၢပဝဲသ့ၣ်န့ၣ်​ လံာ်စီဆှံတဲဘၣ်ပှၤလၢ ပကဘၣ်အိၣ်ဒီး တၢ်သးခုလီၤ. တၢ်မၢဖိယၤကိာ်ကွဲးဝဲလၢ ဖဲပထံၣ်ဘၣ်တၢ်မၤကွၢ်တဖၣ်အခါ ပတဘၣ်သူၣ်ကိၢ်သးဂီၤတၢ် အါတလၢဘၣ်​ လၢတၢ်န့ၣ်အလီၢ် ပကဘၣ်အိၣ်ဒီးတၢ်သးခုလီၤ. (ယၤကိာ် ၁:၂, ၁၂) ဒီးယ့ၣ်ၡူးတဲဝဲစ့ၢ်ကီးလၢ ဖဲပှၤမၤအၢမၤနးပှၤအခါဒၣ်လဲာ် ပကဘၣ်သးခုလီၤ. (ဖး မးသဲ ၅:၁၁ တက့ၢ်.) ဖဲပထံၣ်ဘၣ်တၢ်မၤကွၢ်အခါ ပဆဲးပၢၤဃာ် ပတၢ်သးခုကသ့ဒ်လဲၣ်. ပကမၤလိန့ၢ်ဘၣ်​ တၢ်ဂ့ၢ်အံၤလၢ စီၤယၤကိာ်အလံာ်ပရၢလၢ အကွဲးန့ၢ်ခရံာ်ဖိတဖၣ်​ လၢတၢယၤဖှိၣ်အစိၤလီၤ. အဆိကတၢၢ် ပကတဲသကိး ခရံာ်ဖိဖဲန့ၣ်တဖၣ်​ ထံၣ်ဘၣ်ဒီး တၢ်ကီတၢ်ခဲမနုၤတဖၣ်လဲၣ်.

ခရံာ်ဖိလၢ တၢယၤဖှိၣ်အစိၤန့ၣ်​ ထံၣ်ဘၣ်တၢ်မၤကွၢ် မနုၤတဖၣ်လဲၣ်

၃. ဖဲစီၤယၤကိာ်ကဲထီၣ်​ ယ့ၣ်ၡူးအပျဲၢ်အဘီၣ်ဝံၤအလီၢ်ခံ တၢ်ကဲထီၣ်သးဒ်လဲၣ်.

^၃ ယ့ၣ်ၡူးအဒီပုၢ်ဝဲၢ်ခိၣ်ချၢ စီၤယၤကိာ် ဖဲအကဲထီၣ်​ ယ့ၣ်ၡူးအပျဲၢ်အဘီၣ်​ ဝံၤအလီၢ်ခံန့ၣ်​ ခရံာ်ဖိလၢယရူၤၡလ့ၣ်တဖၣ်​ ဘၣ်တၢ်မၤအၢမၤနးအဝဲသ့ၣ်လီၤ. (မၤတၢ် ၁:၁၄; ၅:၁၇, ၁၈) ဖဲယ့ၣ်ၡူးအပျဲၢ်အဘီၣ်​ စီၤစတ့ဖး ဘၣ်တၢ်မၤသံအီၤဝံၤအလီၢ်ခံ ခရံာ်ဖိအါဂၤ ဃ့ၢ်ထီၣ်ကွံာ်ဝဲ လၢဝ့ၢ်ပူၤဒီး “လီၤပြံလီၤပြါဝဲ သကုၤလၢကီၢ်ယူဒၤ ဒီးကီၢ်ၡၤမရံ အဟီၣ်ကဝီၤအပူၤ” လီၤ. ဒီးတနီၤနီၤ ဘၣ်လဲၤအိၣ်ဝဲ တုၤလၢ ကူပြူ ဒီးအၣ်တံၤအီာ်လီၤ. (မၤတၢ် ၇:၅၈–၈:၁; ၁၁:၁၉) ပထံၣ်တမှံကွၢ်သ့လၢ ယ့ၣ်ၡူးအပျဲၢ်အဘီၣ်တဖၣ်​ ဘၣ်လဲၤခီဖျိဝဲ တၢ်ကီတၢ်ခဲအါမးလီၤ. ဖဲအဝဲသ့ၣ်လဲၤတုၤ တၢ်လီၢ်တပူၤလၢ်လၢ်န့ၣ်​ အဝဲသ့ၣ်စံၣ်တဲၤတဲလီၤတၢ်သးခုကစီၣ်​ ဒီးတၢ်အိၣ်ဖှိၣ်စးထီၣ်​ အိၣ်သူၣ်ထီၣ်အသး လၢရိမ့ၤဘီမုၢ်တၢ်ပၢအဖီလာ်လီၤ. (၁ ပ့းတရူး ၁:၁) ဘၣ်ဆၣ်​ ဖဲန့ၣ်ဝံၤအလီၢ်ခံ အဝဲသ့ၣ်ထံၣ်ဘၣ်​ တၢ်ကီတၢ်ခဲအါထီၣ်လီၤ.

၄. ခရံာ်ဖိလၢညါတဖၣ်​ ထံၣ်ဘၣ်ဒီးတၢ်မၤကွၢ် မနုၤတဖၣ်လဲၣ်.

^၄ ခရံာ်ဖိလၢညါတဖၣ်​ ထံၣ်ဘၣ်ဒီးတၢ်မၤကွၢ် အကလုာ်ကလုာ်လီၤ. အဒိ, ကဘၣ်ဖဲ ခ.န ၅၀ ဃၣ်ဃၣ်န့ၣ်​ ရိမ့ၤအပဒိၣ်ဖးဒိၣ်​ စီၤကျီၤဒံ ဟ့ၣ်လီၤတၢ်ကလုၢ်လၢ ပှၤယူဒၤဖိတဖၣ်​ ကဘၣ်ဟးထီၣ်ကွံာ်လၢ ရိမ့ၤအပူၤလီၤ. ပှၤယူဒၤဖိလၢ အကဲထီၣ်ဝဲ ခရံာ်ဖိသ့ၣ်တဖၣ်န့ၣ်​ ဘၣ်ပာ်တ့ၢ်ကွံာ် အဟံၣ်အဃီ ဒီးအတၢ်လီၢ်တၢ်ကျဲဖဲန့ၣ်လီၤ. (မၤတၢ် ၁၈:၁-၃) ဖဲ ခ.န ၆၁ ဃၣ်ဃၣ်န့ၣ်​ တၢ်မၢဖိပီလူးကွဲးဖျါထီၣ်ဝဲလၢ အဒီပုၢ်ဝဲၢ်ခရံာ်ဖိတဖၣ်​ ဘၣ်တၢ်ဒုၣ်ဒွဲၣ်ဒီး ပှၤမၤအၢမၤနးအဝဲသ့ၣ်​ လၢပှၤအါဂၤအမဲာ်ညါ ဒီးပှၤထၢနုာ်လီၤ အဝဲသ့ၣ်လၢဃိာ်ပူၤ ဒီးတကးဒံးဘၣ်​ ပှၤဟံးန့ၢ်ကွံာ်အဝဲသ့ၣ်​ အတၢ်ဖိတၢ်လံၤတဖၣ်လီၤ. (ဧ့ၤဘြံၤ ၁၀:၃၂-၃၄) ဒ်ပှၤဂၤတဖၣ်အသိး ခရံာ်ဖိသ့ၣ်တဖၣ်န့ၣ်​ ထံၣ်ဘၣ်တၢ်ဖှီၣ်တၢ်ယာ် ဒီးတၢ်ဆူးတၢ်ဆါတဖၣ်လီၤ.—ရိမ့ၤ ၁၅:၂၆; ဖံလံးပံၤ ၂:၂၅-၂၇.

၅. ပကစံးဆၢ တၢ်သံကွၢ်မနုၤတဖၣ်လဲၣ်.

^၅ စီၤယၤကိာ်ကွဲးဝဲ အလံာ်ပရၢ တချုးဖဲ ခ.န ၆၂ နံၣ်အခါန့ၣ်​ အဝဲသ့ၣ်ညါဝဲ အဒီပုၢ်ဝဲၢ်မုၣ်ခွါတဖၣ်​ ထံၣ်ဘၣ်ဒီးတၢ်မၤကွၢ်တဖၣ်ဒ်လဲၣ်န့ၣ်လီၤ. ယဟိဝၤယွၤ ဟံးစုနဲၣ်ကျဲဝဲ စီၤယၤကိာ်လၢ ကကွဲးဝဲလံာ်ဆူ ခရံာ်ဖိသ့ၣ်တဖၣ်အအိၣ်​ ဒ်သိးကဟ့ၣ်ကူၣ်​ ဒီးကမၤစၢၤအဝဲသ့ၣ်လၢ ကဆဲးပၢၤဃာ်အတၢ်သးခု ဖဲအဝဲသ့ၣ်ထံၣ်ဘၣ်​ တၢ်မၤကွၢ်အခါလီၤ. ပကကွၢ်သကိး စီၤယၤကိာ်အလံာ်ပရၢ ဒီးပကစံးဆၢ တၢ်သံကွၢ်တဖၣ်​ လၢအမ့ၢ်ဝဲ တၢ်သးခုလၢ စီၤယၤကိာ်ကွဲးဝဲန့ၣ်​ ဘၣ်ဃးဒီး တၢ်ဂ့ၢ်မနုၤလဲၣ်. တၢ်လၢအကမၤဟးဂီၤ ခရံာ်ဖိအတၢ်သးခုန့ၣ်​ ကမ့ၢ်တၢ်မနုၤလဲၣ်. တၢ်ကူၣ်သ့, တၢ်နာ် ဒီးတၢ်သးဒူန့ၣ်​ မၤစၢၤပှၤဒ်သိး ပကဆဲးပၢၤဃာ် ပတၢ်သးခု ဖဲပထံၣ်ဘၣ်တၢ်မၤကွၢ်တဖၣ်အခါ ကသ့ဒ်လဲၣ်.

တၢ်လၢအမၤသးခု ခရံာ်ဖိအသးန့ၣ်​ မ့ၢ်မနုၤလဲၣ်

၆. ဒ် လူၤကၣ်​ ၆:၂၂, ၂၃ ပာ်ဖျါထီၣ်ဝဲအသိး ခရံာ်ဖိတဂၤ ဖဲအထံၣ်ဘၣ်​ တၢ်မၤကွၢ်တဖၣ်အခါဒၣ်လဲာ် ဘၣ်မနုၤအဃိ အသးခုဒံးလဲၣ်.

^၆ ဘၣ်သ့ၣ်သ့ၣ်​ ပှၤတနီၤနီၤကဆိကမိၣ်ဘၣ်ဝဲလၢ အဝဲသ့ၣ်ကအိၣ်ဒီးတၢ်သးခု ဖဲအဝဲသ့ၣ်အိၣ်ဒီးတၢ်အိၣ်ဆူၣ်အိၣ်ချ့လၢအဂ့ၤ, ကျိၣ်စ့အါအါ ဒီးဟံၣ်မုာ်ဃီပၢၤအခါလီၤ. ဘၣ်ဆၣ်​ တၢ်သးခုလၢ စီၤယၤကိာ်တဲဝဲန့ၣ်​ ဘၣ်ဃးဒီးကစၢ်ယွၤ အသးစီဆှံအတၤသၣ်လီၤ. အဃိ တၢ်မ့ၢ်ကဲထီၣ်အသး ဒ်လဲၣ်ဂ့ၤဒ်လဲၣ်ဂ့ၤ တၢ်သးခုတခါအံၤ တလီၤမၢ်ဝဲဘၣ်. (ကလၤတံ ၅:၂၂) ခရံာ်ဖိတဂၤ ကမၤဒိၣ်ထီၣ်အါထီၣ်​ အတၢ်သးခု ဒီးကသးခုဝဲ သပှၢ်ကတၢၢ်ကသ့အဂီၢ်န့ၣ်​ အသ့ၣ်ညါဝဲလၢ အဝဲကဘၣ်မၤ ယဟိဝၤယွၤအတၢ်ဘၣ်သး ဒီးမၤထွဲဝဲယ့ၣ်ၡူး အဒိအတဲာ်လီၤ. (ဖး လူၤကၣ်​ ၆:၂၂, ၂၃ တက့ၢ်; ကလီးစဲ ၁:၁၀, ၁၁) ဒ်မ့ၣ်အူလၣ်​ ကဲၤထီၣ်လၢ မ့ၣ်အူဒၢပူၤအသိး တၢ်သးခုလၢ ခရံာ်ဖိတဂၤအသးပူၤန့ၣ်​ လီၤဂာ်ဝဲဒ်န့ၣ်အသိးလီၤ. ပတၢ်အိၣ်ဆူၣ်အိၣ်ချ့ မ့ၢ်တဂ့ၤဘၣ်​ ဒီးပကျိၣ်ပစ့ မ့ၢ်တအိၣ်အါအါဘၣ်​ သနာ်က့ ပသးခုဒံးဝဲလီၤ. ဒီးဖဲပှၤဒုၣ်ဒွဲၣ်စံးအၢပှၤမ့ၢ်ဂ့ၤ, ပဟံၣ်ဖိဃီဖိ ဒီးပှၤဂၤတဖၣ်​ ထီဒါပှၤအခါမ့ၢ်ဂ့ၤ ပကအိၣ်ဒီးတၢ်သးခုလီၤ. အဃိ ဖဲပထံၣ်ဘၣ်တၢ်မၤကွၢ် တဘျီလၢ်လၢ်အခါ လၢပသးဂံၢ်ဘါကလီၤစၢ်အလီၢ် ပကဆဲးအိၣ်ဒီးတၢ်သးခုလီၤ. တၢ်မၤကွၢ်လၢ ပထံၣ်ဘၣ်တဖၣ်န့ၣ်​ ပာ်ဖျါထီၣ်ဝဲလၢ ပအိၣ်ဒီးတၢ်နာ်လၢအဂၢၢ်ကျၢၤ ဒီးပမ့ၢ်ဝဲ ခရံာ်အပျဲၢ်အဘီၣ်နီၢ်နီၢ်လီၤ. (မးသဲ ၁၀:၂၂; ၂၄:၉; ယိၤဟၣ်​ ၁၅:၂၀) လၢတၢ်ဂ့ၢ်အံၤအဃိ စီၤယၤကိာ်ကွဲးဝဲလၢ “ယဒီပုၢ်ဝဲၢ်သ့ၣ်ဧၢ, ဖဲသုထံၣ်ဘၣ်​ တၢ်မၤကွၢ်အကလုာ်ကလုာ် အဆၢကတီၢ်န့ၣ်​ ပာ်အီၤဒ်တၢ်သးခု သပှၢ်တၢၢ်တက့ၢ်.”—ယၤကိာ် ၁:၂.

၇-၈. ဖဲပထံၣ်ဘၣ်​ တၢ်မၤကွၢ်တဖၣ်အခါ ပတၢ်နာ် ဟဲဂၢၢ်ကျၢၤထီၣ်ဝဲဒ်လဲၣ်.

^၇ စီၤယၤကိာ် ပာ်ဖျါထီၣ်ဝဲလၢ ဘၣ်မနုၤအဃိ ခရံာ်ဖိတဖၣ်​ ဘၣ်ထံၣ်ဘၣ်ဒီး တၢ်မၤကွၢ်တဖၣ်​ နးနးကလဲာ်လဲၣ်. အဝဲတဲဝဲလၢ “တၢ်မၤကွၢ်သုတၢ်နာ်ဒ်အံၤန့ၣ်​ ဒုးအိၣ်ထီၣ်ဝဲ တၢ်တူၢ်န့ၢ်ခီၣ်ကဲလီၤ.” (ယၤကိာ် ၁:၃) တၢ်မၤကွၢ်တဖၣ်န့ၣ်​ ဘၣ်တၢ်ထိၣ်သတြီၤအီၤ ဒ်ထးလၢအဘၣ်ဒီး မ့ၣ်အူအသိးန့ၣ်လီၤ. ဖဲထးတခါအံၤ အဘၣ်ဒီးတၢ်ကိၢ် ဒီးအခုၣ်လီၤက့ၤအခါ ထးအံၤအက့ၤၡိၣ်ထီၣ်က့ၤဝဲလီၤ. ဒ်န့ၣ်အသိး ဖဲပလဲၤခီဖျိ တၢ်မၤကွၢ်တဖၣ်အခါ ပတၢ်နာ်ဟဲဂၢၢ်ကျၢၤ ဒိၣ်ထီၣ်ဝဲဒၣ်လီၤ. လၢတၢ်ဂ့ၢ်အံၤအဃိ စီၤယၤကိာ်ကွဲးဝဲလၢ “မ်တၢ်တူၢ်န့ၢ်ခီၣ်ကဲ မၤဝံၤအတၢ်မၤ ဒ်သိးသုကလၢထီၣ်ပှဲၤထီၣ်​ လၢတၢ်ခဲလၢာ်အပူၤ” လီၤ. (ယၤကိာ် ၁:၄) ဖဲပထံၣ်ဘၣ်​ တၢ်မၤကွၢ်သ့ၣ်တဖၣ်အံၤ မၤဂၢၢ်ကျၢၤထီၣ်​ ပတၢ်နာ်အခါ ပလဲၤခီဖျိအီၤလၢ တၢ်သးခုအပူၤလီၤ.

^၈ လၢစီၤယၤကိာ် အလံာ်ပရၢအပူၤ အဝဲတဲဖျါထီၣ်စ့ၢ်ကီး တၢ်ဂ့ၢ်တနီၤလၢ ကမၤလီၤမၢ် ပတၢ်သးခုလီၤ. တၢ်လၢကမၤလီၤမၢ် ပတၢ်သးခုန့ၣ်​ မ့ၢ်မနုၤလဲၣ်​ ဒီးပလဲၤခီဖျိအီၤကသ့ဒ်လဲၣ်.

ဒ်သိးပတၢ်သးခု တလီၢ်မၢ်တဂ့ၤအဂီၢ် ပကဘၣ်မၤတၢ်မနုၤလဲၣ်

၉. ဘၣ်မနုၤအဃိ ပလိၣ်ဘၣ်တၢ်ကူၣ်သ့လဲၣ်.

^၉ တၢ်ကီတၢ်ခဲ– ပကမၤတၢ်မနုၤလဲၣ်န့ၣ်​ ပတသ့ၣ်ညါဘၣ်. ဖဲပအိၣ်ဒီးတၢ်ကီတၢ်ခဲတဖၣ်အခါ ပကဘၣ်ဃ့ယဟိဝၤယွၤလၢ ကမၤစၢၤပှၤဒ်သိး ပကမၤအတၢ်ဘၣ်သး ဒီးပကမၤစၢၤ ပဒီပုၢ်ဝဲၢ်မုၣ်ခွါတဖၣ်​ တကးဒံးဘၣ်​ ကမၤစၢၤပှၤလၢ ပကဆဲးအိၣ်ဒီး တၢ်သးတီအဂီၢ်လီၤ. (ယံးရမံယၤ ၁၀:၂၃) ပလိၣ်ဘၣ်တၢ်ကူၣ်သ့ ဒ်သိးပကသ့ၣ်ညါလၢ ပကဘၣ်မၤတၢ်မနုၤလဲၣ်​ ဒီးဖဲပှၤထီဒါပှၤအခါ ပကတဲဆၢက့ၤအဝဲသ့ၣ်ဒ်လဲၣ်န့ၣ်လီၤ. ပကဘၣ်မၤတၢ်မနုၤလဲၣ်​ ပမ့ၢ်တသ့ၣ်ညါဘၣ်န့ၣ်​ ပသးကဟးဂီၤ ဒီးပတၢ်သးခုန့ၣ်​ ကလီၤမၢ်ကွံာ်ဝဲဒၣ်လီၤ.

၁၀. ဒ်သိးပကန့ၢ်အါထီၣ်​ တၢ်ကူၣ်သ့အဂီၢ် ယၤကိာ် ၁:၅ တဲပှၤလၢ ပကဘၣ်မၤတၢ်မနုၤလဲၣ်.

^၁၀ တၢ်လၢပမၤအီၤသ့– ဃ့ယဟိဝၤယွၤ အတၢ်ကူၣ်သ့တက့ၢ်. ဒ်သိးပကလဲၤခီဖျိတၢ်ကီတၢ်ခဲ လၢတၢ်သးခုပူၤကသ့အဂီၢ် အဆိကတၢၢ် ပကဘၣ်ဃ့ယဟိဝၤယွၤ အတၢ်ကူၣ်သ့ ဒ်သိးကမၤစၢၤပှၤလၢ  ပကမၤတၢ်ဆၢတဲာ်  လၢအဘၣ်ကသ့အဂီၢ်လီၤ. (ဖး ယၤကိာ် ၁:၅ တက့ၢ်.) ယဟိဝၤယွၤ မ့ၢ်တစံးဆၢပတၢ်ထုကဖၣ်​ တဘျီဃီဘၣ်န့ၣ်​ ပကဘၣ်မၤဒ်လဲၣ်. စီၤယၤကိာ်တဲဝဲလၢ ပကဘၣ်​ “ဆဲးဃ့တၢ်” လၢကစၢ်ယွၤအအိၣ်လီၤ. ပမ့ၢ်ဆဲးဃ့ ယဟိဝၤယွၤ အတၢ်ကူၣ်သ့ထီဘိန့ၣ်​ အဝဲတသးလၢၤပှၤဘၣ်​ ဒီးအသးအိၣ်ဒိကနၣ်ပှၤလီၤ. ဖဲပဃ့ဘါထုကဖၣ်ဒ်သိး ပကဒိးန့ၢ်ဘၣ်​ တၢ်ကူၣ်သ့လၢ ပကလဲၤခီဖျိ တၢ်မၤကွၢ်တဖၣ်အခါ ပပၢ်လၢမူခိၣ်န့ၣ်​ အ “သးအိၣ်ဟ့ၣ်ဝဲ ပှၤ . . . တၢ်အါအါဂီၢ်ဂီၢ်” လီၤ. (စံးထီၣ်ပတြၢၤ ၂၅:၁၂, ၁၃) ကစၢ်ယွၤန့ၣ်​ ထံၣ်ပတၢ်ကီတၢ်ခဲဒီး အဒိသူၣ်ဒိသးပှၤ တကးဒံးဘၣ်​ အသးအိၣ်မၤစၢၤပှၤလီၤ. အဃိ ပမ့ၢ်အိၣ်ဒီး တၢ်ကီတၢ်ခဲတဖၣ်ဒၣ်လဲာ် ပတၢ်သးခု တလီၤမၢ်ဘၣ်. ယဟိဝၤယွၤကဟ့ၣ်ပှၤ တၢ်ကူၣ်သ့လၢကျဲဒ်လဲၣ်.

၁၁. ဒ်သိးပကဒိးန့ၢ်အါထီၣ်​ တၢ်ကူၣ်သ့အဂီၢ် ပကဘၣ်မၤတၢ်မနုၤလဲၣ်.

^၁၁ ယဟိဝၤယွၤဟ့ၣ်ပှၤ တၢ်ကူၣ်သ့ခီဖျိ အကလုၢ်ကထါလံာ်စီဆှံလီၤ. (ကတိၤဒိ ၂:၆) ဒ်သိးပကန့ၢ်အါထီၣ်​ တၢ်ကူၣ်သ့အဂီၢ် ပကဘၣ်မၤလိကစၢ်ယွၤ အကလုၢ်ကထါ ဒီးပကဘၣ်ဃုသ့ၣ်ညါ လံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံအပူၤတဖၣ်လီၤ. ဘၣ်ဆၣ်​ ပကဘၣ်မၤအီၤအါန့ၢ်ဒံး ပဃုသ့ၣ်ညါတၢ်မ့ၢ်တၢ်တီလီၤ. တၢ်လၢပမၤလိဘၣ်သ့ၣ်တဖၣ်န့ၣ်​ ပကဘၣ်အိၣ်မူမၤထွဲအီၤလီၤ. စီၤယၤကိာ် ကွဲးဝဲလၢ “ကဲထီၣ်ပှၤလၢ အမၤထွဲယွၤအကလုၢ်ကထါ ဒီးတဘၣ်ကဲထီၣ်​ ထဲပှၤလၢ အနၢ်ဟူတၢ်ဧိၤန့ၣ်တဂ့ၤ.” (ယၤကိာ် ၁:၂၂) ဖဲပမၤထွဲကစၢ်ယွၤ အတၢ်ဟ့ၣ်ကူၣ်အခါ ပကပာ်ပသး မုာ်မုာ်ခုၣ်ခုၣ်, ပကဘၣ်အိၣ်ဒီး တၢ်ထံၣ်လၢအကြၢးအဘၣ်​ ဒီးသးကညီၤတၢ်သ့လီၤ. (ယၤကိာ် ၃:၁၇) တၢ်ဂ့ၤတၢ်ဝါတဖၣ်အံၤ ကမၤစၢၤပှၤဒ်သိး ပကလဲၤခီဖျိ တၢ်ကီတၢ်ခဲ ဒီးပကဆဲးပၢၤဃာ် ပတၢ်သးခုအဂီၢ်လီၤ.

၁၂. ဘၣ်မနုၤအဃိ အရ့ဒိၣ်လၢ ပကဘၣ်သ့ၣ်ညါ လံာ်စီဆှံဂ့ၤဂ့ၤလဲၣ်.

^၁၂ ကစၢ်ယွၤကလုၢ်ကထါန့ၣ်  လီၤဂာ်ဒီးမဲာ်ထံကလာ်  ဒီးအမၤစၢၤပှၤဒ်သိး ပကထံၣ်လီၤပသး ဒီးပကဘှီဘၣ်ထီၣ်က့ၤပသးလီၤ. (ယၤကိာ် ၁:၂၃-၂၅) အဒိ, ဖဲပမၤလိ ကစၢ်ယွၤကလုၢ်ကထါ ဝံၤအလီၢ်ခံ ပသ့ၣ်ညါထီၣ်လၢ ပကဘၣ်ပၢၤဃာ် ပတၢ်သူၣ်ဒိၣ်သးဖျိးလီၤ. ခီဖျိလၢ ယဟိဝၤယွၤအတၢ်မၤစၢၤအဃိ ဖဲပှၤဂၤမၤဒိၣ်ထီၣ်ပသးအခါမ့ၢ်ဂ့ၤ, တၢ်ကီတၢ်ခဲ ဆီၣ်သနံးပှၤအခါမ့ၢ်ဂ့ၤ ပကဘၣ်အိၣ်ဒီး တၢ်ဆီၣ်လီၤသးလီၤ. ခီဖျိလၢ ပပာ်ပသးမုာ်မုာ်ခုၣ်ခုၣ်အဃိ ပကလဲၤခီဖျိ တၢ်ကီတၢ်ခဲတဖၣ်​ ညီထီၣ်ဝဲလီၤ. တကးဒံးဘၣ်​ ပကဆိကမိၣ်ထံတၢ် ဒီးပကမၤတၢ်ဆၢတဲာ် လၢအဘၣ်သ့ဝဲလီၤ. (ယၤကိာ် ၃:၁၃) ဘၣ်မနုၤအဃိ အရ့ဒိၣ်လၢ ပကဘၣ်သ့ၣ်ညါ လံာ်စီဆှံဂ့ၤဂ့ၤလဲၣ်.

၁၃. ဘၣ်မနုၤအဃိ ပကဘၣ်ကွၢ်လိမၤဒိး ပှၤဒိဂ့ၤတဲာ်ဘၣ်​ လၢအအိၣ်လၢလံာ်စီဆှံအပူၤတဖၣ်လဲၣ်.

^၁၃ တဘျီတခီၣ်​ ပမၤကမၣ်တၢ်ဝံၤမး ပသ့ၣ်ညါလၢ ပကဘၣ်ဟးဆှဲးအီၤလီၤ. ဘၣ်ဆၣ်​ ပမ့ၢ်မၤဒ်န့ၣ်န့ၣ်​ အဘျုးတအိၣ်လၢပဂီၢ်ဘၣ်. ကျဲလၢပကဒိးန့ၢ်ဘၣ်​ တၢ်ကူၣ်သ့န့ၣ်​ မ့ၢ်ဝဲပကဘၣ်မၤလိန့ၢ်တၢ်လၢ ပှၤလၢအဒိဂ့ၤတဲာ်ဘၣ်တဖၣ်အအိၣ်​ ဒီးပှၤလၢအလဲၤကျဲကမၣ်တဖၣ်​ အအိၣ်န့ၣ်လီၤ. ဘၣ်မနုၤအဃိ စီၤယၤကိာ်ဟ့ၣ်ဂံၢ်ဟ့ၣ်ဘါပှၤလၢ ပကကွၢ်လိမၤဒိး ပှၤလၢအဒိဂ့ၤတဲာ်ဘၣ်​ လၢအအိၣ်လၢလံာ်စီဆှံအပူၤ ဒ်သိးဒီး စီၤအၤဘြၤဟၣ်, နီၢ်ရၤဃး, စီၤယိၤဘးဒီး စီၤအလံၤၡါန့ၣ်လဲၣ်. (ယၤကိာ် ၂:၂၁-၂၆; ၅:၁၀, ၁၁, ၁၇, ၁၈) ယဟိဝၤယွၤအခ့အပှၤလၢ အသးတီသ့ၣ်တဖၣ်အံၤ လဲၤခီဖျိဘၣ်ဝဲ တၢ်ကီတၢ်ခဲတဖၣ်​ ဘၣ်ဆၣ်ဒီး အဝဲသ့ၣ်အတၢ်သးခု တလီၤမၢ်ကွံာ်ဘၣ်. အဝဲသ့ၣ်အဒိအတဲာ်န့ၣ်​ ပာ်ဖျါထီၣ်ဝဲဒၣ်လၢ ယဟိဝၤယွၤစ့ၢ်ကီးမၤစၢၤပှၤ လၢပကလဲၤခီဖျိ ပတၢ်ကီတၢ်ခဲကန့ၢ် ဒ်သိးအဝဲသ့ၣ်လီၤ.

၁၄-၁၅. ဘၣ်မနုၤအဃိ ပတဘၣ်အိၣ်ဒီး တၢ်သးဒ့ဒီဘၣ်လဲၣ်.

^၁၄ တၢ်ကီတၢ်ခဲ– ဖဲပသးဒ့ဒီအခါ. တဘျီတခီၣ်န့ၣ်​ ကီလၢပကနၢ်ပၢၢ် တၢ်လၢလံာ်စီဆှံတဲဝဲတဖၣ်လီၤ. ယဟိဝၤယွၤတစံးဆၢ ပတၢ်ထုကဖၣ်​ ဒ်ပမုၢ်လၢ်ပာ်စၢၤအီၤ အသိးဘၣ်. လၢတၢ်န့ၣ်အဃိ ပတၢ်သးဒ့ဒီ ဟဲအါထီၣ်ဝဲလီၤ. ပသးမ့ၢ်ဒ့ဒီန့ၣ်​ ပတၢ်နာ်ကလီၤစှၤ ဒီးပတၢ်ရ့လိာ်သးဒီး ယဟိဝၤယွၤတဂ့ၤအါအါလၢၤဘၣ်. (ယၤကိာ် ၁:၇, ၈) တကးဒံးဘၣ်​ ပတၢ်မုၢ်လၢ်လၢ ခါဆူညါစ့ၢ်ကီး ကလီၤမၢ်ကွံာ်ဝဲလီၤ.

^၁၅ တၢ်မၢဖိပီလူး ထိၣ်သတြီၤဝဲ ပတၢ်မုၢ်လၢ်လၢခါဆူညါန့ၣ်​ လီၤဂာ်ဒ်သိးဒီး နီၣ်သက့ၤလီၤ. (ဧ့ၤဘြံၤ ၆:၁၉) နီၣ်သက့ၤန့ၣ်​ မၤစၢၤဝဲကဘီဒ်သိး ကဘီကအိၣ်ဂၢၢ်ဝဲ ဖဲကလံၤမုၢ်ဖးဒိၣ်ဟဲဒီး ကဘီတလဲၤဘၣ်ထံးဒီး လၢၢ်ဖးဒိၣ်တဂ့ၤအဂီၢ်လီၤ. နီၣ်သက့ၤမၤစၢၤဝဲ ကဘီဒ်သိး ကဘီတဟးဂီၤတဂ့ၤအဂီၢ်လီၤ. ဘၣ်ဆၣ်​ နီၣ်သက့ၤအပျံၤထး မ့ၢ်ထီၣ်အ့ၣ်န့ၣ်​ နီၣ်သက့ၤန့ၣ်​ အတကဲဘျုးဝဲလၢၤဘၣ်. ဒ်န့ၣ်အသိး ပသးမ့ၢ်ဒ့ဒီန့ၣ်​ ပတၢ်နာ် ကလီၤစၢ်ဝဲလီၤ. ဖဲပထံၣ်ဘၣ်​ တၢ်မၤကွၢ်အခါ ပသးမ့ၢ်ဒ့ဒီန့ၣ်​ ပတၢ်နာ်ဘၣ်ဃးဒီး ယဟိဝၤယွၤအတၢ်တိာ်ပာ်သ့ၣ်တဖၣ်​ ကလီၤမၢ်ကွံာ်ဝဲလီၤ. ပတၢ်နာ်မ့ၢ်လီၤမၢ်ကွံာ်န့ၣ်​ ပတၢ်မုၢ်လၢ်စ့ၢ်ကီးတအိၣ်လၢၤဘၣ်. ဒ်စီၤယၤကိာ် တဲဝဲအသိး “ပှၤလၢအသးဒ့ဒီန့ၣ်​ မၤအသးဒ် လပီလၢပီၣ်လဲၣ်ပူၤ လၢကလံၤအူဘၣ်အီၤအဃိ ဟူးဝးဝဲ ဆူအံၤဆူဘးန့ၣ်လီၤ.” (ယၤကိာ် ၁:၆) ပှၤလၢအအိၣ်ဒီး တၢ်သးဒ့ဒီန့ၣ်​ အတသးခုဝဲ နီတဘျီဘၣ်.

၁၆. ပမ့ၢ်အိၣ်ဒီးတၢ်သးဒ့ဒီန့ၣ်​ ပကဘၣ်မၤတၢ်မနုၤလဲၣ်.

^၁၆ တၢ်လၢပမၤအီၤသ့– မၤလီၤမၢ်နတၢ်သးဒ့ဒီ ဒီးမၤဂၢၢ်ကျၢၤထီၣ်​ နတၢ်နာ်တက့ၢ်. တဘၣ်ထုးယံာ်ထုးနီၢ် နသးတဂ့ၤ. ဖဲဝံအ့ၤလံယၤအစိၤန့ၣ်​ ပှၤအံၣ်စရ့လးဖိတဖၣ်​ ထုးယံာ်ထုးနီၢ်အသးလီၤ. အဃိ ဝံအ့ၤလံယၤတဲဘၣ်​ အဝဲသ့ၣ်လၢ “သုကလဲၤ တကျဲၢ်တကျဲၢ်လၢ တၢ်ခံမံၤအဘၢၣ်စၢၤအံၤဆံးယံာ်လဲၣ်. ယွၤမ့မ့ၢ်ကစၢ်ဒီး, လူၤအီၤတက့ၢ်. မ့မ့ၢ်ဘဧၤလး မ့မ့ၢ်ကစၢ်ဒီး, လူၤအီၤတက့ၢ်.” (၁ စီၤပၤ ၁၈:၂၁) မုၢ်မဆါတနံၤအံၤစ့ၢ်ကီး ပကဃုသ့ၣ်ညါ တၢ်ဂ့ၢ်ဘၣ်ဃးဒီး ယဟိဝၤန့ၣ်​ မ့ၢ်ဝဲကစၢ်ယွၤ, လံာ်စီဆှံန့ၣ်​ မ့ၢ်ဝဲကစၢ်ယွၤအကလုၢ်ကထါ ဒီးယဟိဝၤယွၤပှၤအုၣ်အသးန့ၣ်​ မ့ၢ်ဝဲကစၢ်ယွၤအပှၤဂီၢ်မုၢ်န့ၣ်​ ပတဘၣ်ထုးယံာ်ထုးနီၢ်ပသးဘၣ်. (၁ သ့းစၤလနံ ၅:၂၁) ဖဲပမၤဒ်န့ၣ်အခါ ပမၤလီၤမၢ်ကွံာ် ပတၢ်သးဒ့ဒီ အဃိ ပတၢ်နာ်ကဂၢၢ်ကျၢၤ ဒိၣ်ထီၣ်ဝဲလီၤ. ပမ့ၢ်လိၣ်ဘၣ်တၢ်မၤစၢၤလၢ ပကမၤလီၤမၢ်ကွံာ် ပတၢ်သးဒ့ဒီန့ၣ်​ ပဃ့တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ်အအိၣ်​ သ့ဝဲလီၤ. ပမ့ၢ်အဲၣ်ဒိးလၢ ပတၢ်သးခုကဆဲးအိၣ်လၢ ယဟိဝၤယွၤတၢ်မၤအပူၤန့ၣ်​ ပတဘၣ်ထုးယံာ်ထုးနီၢ်ပသးဘၣ်.

၁၇. ပတၢ်သးဒူ မ့ၢ်လီၤမၢ်ကွံာ်န့ၣ်​ တၢ်ကကဲထီၣ်အသး ဒီးပှၤဒ်လဲၣ်.

^၁၇ တၢ်ကီတၢ်ခဲ– ဖဲပသးဂံၢ်ဘါလီၤစၢ်အခါ. ကစၢ်ယွၤကလုၢ်ကထါ တဲဝဲလၢ “နသးမ့ၢ်လီၤဘှါလၢ တၢ်နးတၢ်ဖှီၣ်အမုၢ်တနံၤန့ၣ်ဒီး, နဂံၢ်နဘါမ့ၢ်အဆံးလီၤ.” (ကတိၤဒိ ၂၄:၁၀) ဧ့ၤဘြံၤတၢ်ကတိၤလၢအမ့ၢ် “သးမ့ၢ်လီၤဘှါ” န့ၣ်​ အဲၣ်ဒိးတဲဝဲ အခီပညီလၢ ပတၢ်သးဒူ လီၤမၢ်ကွံာ်ဝဲလီၤ. ပတၢ်သးဒူမ့ၢ်လီၤမၢ်ကွံာ်န့ၣ်​ ပတၢ်သးခုစ့ၢ်ကီး တအိၣ်လၢၤဘၣ်.

၁၈. တၢ်တူၢ်န့ၢ်ခီၣ်ကဲန့ၣ်​ အဲၣ်ဒိးတဲဝဲ အခီပညီဒ်လဲၣ်.

^၁၈ တၢ်လၢပမၤအီၤသ့– သန့ၤနသးဒီးယဟိဝၤယွၤ ဒ်သိးအကဟ့ၣ်နၤတၢ်သးဒူလၢ  နလဲၤခီဖျိတၢ်ကန့ၢ်အဂီၢ်တက့ၢ်. ပလိၣ်ဘၣ်တၢ်သးဒူလၢ ပကလဲၤခီဖျိ တၢ်ကီတၢ်ခဲတဖၣ်ကန့ၢ်အဂီၢ်လီၤ. (ယၤကိာ် ၅:၁၁) စီၤယၤကိာ်သူတၢ်ကတိၤ လၢအမ့ၢ် “တၢ်တူၢ်န့ၢ်ခီၣ်ကဲ” န့ၣ်​ အဲၣ်ဒိးတဲဝဲအခီပညီလၢ ပှၤတဂၤအိၣ်ဆၢထၢၣ်ဒူဒူလၢအလီၢ်လီၤ. ပကသ့ၣ်နီၣ်ထီၣ်က့ၤ ပှၤသုးဖိတဂၤ ဖဲအဒုၣ်အဒါဟဲဒုးအီၤအခါ အဝဲကဆၢထၢၣ်ဒူဒူ ဒီးအကဒုးဆၢက့ၤ အဒုၣ်အဒါလၢ တၢ်သူၣ်ဒူသးဒူအပူၤလီၤ.

၁၉. တၢ်မၢဖိပီလူး အတၢ်လဲၤခီဖျိန့ၣ်​ ပမၤလိန့ၢ်တၢ်မနုၤသ့လဲၣ်.

^၁၉ တၢ်မၢဖိပီလူး ပာ်လီၤဒိဂ့ၤတဲာ်ဘၣ်လၢ အအိၣ်ဒီးတၢ်သးဒူ ဒီးတၢ်တူၢ်န့ၢ်ခီၣ်ကဲလီၤ. ဘၣ်တဘျီ အတူၢ်ဘၣ်လၢ အဂံၢ်အဘါလီၤစၢ်ဝဲလီၤ. ဘၣ်ဆၣ်​ အဝဲအိၣ်ဒီး တၢ်တူၢ်န့ၢ်ခီၣ်ကဲခီဖျိလၢ အသန့ၤအသးလၢယဟိဝၤယွၤ လၢအဟ့ၣ်အီၤ တၢ်ဂံၢ်တၢ်ဘါ ဖဲအလိၣ်ဘၣ်ဝဲအဆၢကတီၢ်လီၤ. (၂ ကရံၣ်သူး ၁၂:၈-၁၀; ဖံလံးပံၤ ၄:၁၃) ပမ့ၢ်အိၣ်ဒီးတၢ်ဆီၣ်လီၤသး ဒီးသ့ၣ်ညါလီၤသးလၢ ပလိၣ်ဘၣ်​ ယဟိဝၤယွၤအတၢ်မၤစၢၤန့ၣ်​ ပကအိၣ်ဒီး တၢ်တူၢ်န့ၢ်ခီၣ်ကဲလီၤ.—ယၤကိာ် ၄:၁၀.

သုးဘူးနသးဆူ ကစၢ်ယွၤအအိၣ်​ ဒီးဆဲးပၢၤဃာ် နတၢ်သးခုတက့ၢ်

၂၀-၂၁. ပနာ်န့ၢ်တၢ်မနုၤ သ့သပှၢ်ကတၢၢ်လဲၣ်.

^၂၀ ပသ့ၣ်ညါလၢ ပကထံၣ်ဘၣ်တၢ်မၤကွၢ်တဖၣ်​ ဘၣ်ဆၣ်​ တၢ်သ့ၣ်တဖၣ်န့ၣ်​ တမ့ၢ်ယဟိဝၤယွၤ စံၣ်ညီၣ်ပှၤဘၣ်. စီၤယၤကိာ် ဟ့ၣ်ဂံၢ်ဟ့ၣ်ဘါပှၤလၢ “ဖဲပှၤဘၣ်​ တၢ်မၤကွၢ်အခါ မ်ပှၤသုတတဲလၢ ‘ကစၢ်ယွၤမၤကွၢ်ယၤ’ န့ၣ်နီတဂၤတဂ့ၤ. ပှၤမၤကွၢ် ကစၢ်ယွၤလၢ တၢ်အၢတၢ်သီတသ့ဘၣ်​ ဒီးအဝဲတမၤကွၢ်ပှၤဂၤလၢ တၢ်အၢတၢ်သီနီတဂၤစ့ၢ်ကီးဘၣ်.” (ယၤကိာ် ၁:၁၃) ဖဲပနာ်သပှၢ်ကတၢၢ်လၢ တၢ်ကဲထီၣ်သးဒီး ပှၤသ့ၣ်တဖၣ်န့ၣ်​ တမ့ၢ်ကစၢ်ယွၤမၤကွၢ်ပှၤဘၣ်အခါ ပကသုးဘူးပသးဆူပပၢ်လၢ အပှဲၤဝဲဒီးတၢ်အဲၣ်တၢ်ကွံ လၢမူခိၣ်တဂၤအအိၣ်လီၤ.—ယၤကိာ် ၄:၈.

^၂၁ ယဟိဝၤယွၤန့ၣ်​ “တကဒံကဒါ ဒီးတဆီတလဲအသး” ဘၣ်. (ယၤကိာ် ၁:၁၇) ယဟိဝၤယွၤဆီၣ်ထွဲမၤစၢၤ ခရံာ်ဖိလၢတၢယၤဖှိၣ်အစိၤ ဒ်သိးကလဲၤခီဖျိ တၢ်မၤကွၢ်တဖၣ်ကန့ၢ်အဂီၢ်လီၤ. ဒီးလၢမုၢ်မဆါတနံၤအံၤစ့ၢ်ကီး အဝဲကမၤစၢၤပှၤဒ်န့ၣ်အသိးလီၤ. အဃိ ဃ့တၢ်မၤစၢၤလၢ ယဟိဝၤယွၤအအိၣ်​ ဒ်သိးကဟ့ၣ်နၤတၢ်ကူၣ်သ့, တၢ်နာ် ဒီးတၢ်သးဒူတက့ၢ်. ယဟိဝၤယွၤ အဝဲကစံးဆၢနတၢ်ထုကဖၣ်လီၤ. ဝံၤဒီး နနာ်သ့သပှၢ်ကတၢၢ်လၢ ယဟိဝၤယွၤကမၤစၢၤနၤ ဒ်သိးနကဆဲးအိၣ်ဒီးတၢ်သးခု ဖဲနလဲၤခီဖျိ နတၢ်မၤကွၢ်တဖၣ်အခါန့ၣ်လီၤ.