ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါစဲးပတ့ဘၢၣ် ၂–၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့ၤဘြံၤ ၇–၈
“နမ့ၢ်ပှၤလုၢ်တၢ်အဒိၣ် လီၤထူလီၤယိာ် ဒ်စီၤမၤလကံစဒ့းအသိး”
(ဧ့ၤဘြံၤ ၇:၁, ၂) အဂ့ၢ်ဒ်အံၤ, စီၤမၤလကံစဒ့းအံၤ, ၡၤလ့ၣ်အစီၤပၤ, တၢ်ထီကတၢၢ်ကစၢ် အပှၤလုၢ်တၢ်အခိၣ်န့ၣ်, ဟဲသဂၢၢ်စီၤအၤဘြၤဟၣ်လၢ အဟဲက့ၤလၢတၢ်ကျီကွံာ် စီၤပၤတဖၣ်, ဒီးဆိၣ်ဂ့ၤအီၤလီၤ. ၂ ဒီးစီၤအၤဘြၤဟၣ်နီၤဟ့ၣ်အီၤလၢ တၢ်ခဲလၢာ်အဆံဆဲၣ်ပူတပူလီၤ. အခီပညီအခီၣ်ထံးန့ၣ်, မ့ၢ်တၢ်တီတၢ်လိၤအစီၤပၤ, လၢခံက့ၤဒီးၡၤလ့ၣ်အစီၤပၤ, ဒ်ပစံးတၢ်အသိး, တၢ်ဃူတၢ်ဖိးအစီၤပၤလီၤ.
it-2 ကဘျံးပၤ ၃၆၆
စီၤမၤလကံစဒ့း
စီၤမၤလကံစဒ့းမ့ၢ်ဝဲ လၢပျၢၤၡၤလ့ၣ်အစီၤပၤ ဒီး “တၢ်ထီကတၢၢ်ကစၢ် အပှၤလုၢ်တၢ်အဒိၣ်” လီၤ. (၁ မိၤ. ၁၄:၁၈, ၂၂) အဝဲမ့ၢ် ပှၤလုၢ်တၢ်အဒိၣ်တဂၤလၢ လံာ်စီဆှံပာ်ဖျါဝဲ အဆိကတၢၢ် ဒီးအဝဲကဲထီၣ်ဝဲ ပှၤလုၢ်တၢ်အဒိၣ်ဖဲ တချုး ချ.ခ.န ၁၉၃၃ တုၤဒံးဘၣ် ဆၢကတီၢ် တတီၤတီၤလီၤ. ဝ့ၢ်ၡၤလ့ၣ်န့ၣ် အခီပညီမ့ၢ်ဝဲ “တၢ်ဃူတၢ်ဖိး” ဒီးစီၤမၤလကံစဒ့းန့ၣ်မ့ၢ်ဝဲ ဝ့ၢ်ၡၤလ့ၣ် အစီၤပၤအဃိ တၢ်မၢဖိပီလူး ကိးအီၤလၢ “တၢ်ဃူတၢ်ဖိးအစီၤပၤ” ဒီးဘၣ်တၢ်ကိးစ့ၢ်ကီးအီၤလၢ “တၢ်တီတၢ်လိၤအစီၤပၤ” လီၤ. (ဧ့ၤ. ၇:၁, ၂) လၢခံဝ့ၢ်ယရူၤၡလ့ၣ်န့ၣ် ဘၣ်တၢ်သူၣ်ထီၣ်အီၤလၢ လၢပျၢၤဝ့ၢ်ၡၤလ့ၣ်အလီၢ်န့ၣ်လီၤ. မံၤလၢအမ့ၢ် “ၡၤလ့ၣ်” န့ၣ်ပၣ်ဃုာ်လၢ ယရူၤၡလ့ၣ်အပူၤအဃိ တဘျီတခီၣ် ဝ့ၢ်ယရူၤၡလ့ၣ်န့ၣ် ဘၣ်တၢ်ကိးစ့ၢ်ကီးအီၤလၢ ဝ့ၢ်ၡၤလ့ၣ်လီၤ.—စံး. ၇၆:၂.
စီၤအၤဘြၣ် (အၤဘြၤဟၣ်) မၤနၢၤဝဲ ကဒၢ်လဧိမ့ၢ် ဒီးစီၤပၤလၢအအိၣ်ဃူဒီးအီၤ တဖၣ်ဝံၤအလီၢ်ခံ အဝဲလဲၤဝဲဆူ တၢ်ပၢၤခိၣ်ၡၤဝ့ မ့တမ့ၢ် “စီၤပၤအတၢ်ပၢၤခိၣ်” န့ၣ်လီၤ. ဖဲန့ၣ်န့ၣ် စီၤမၤလကံစဒ့း ဟဲစိာ် “ကိၣ်ဒီးစပံးထံ” ဒီးဆိၣ်ဂ့ၤစီၤအၤဘြၤဟၣ် ဒီးစံးဝဲလၢ– “စီၤအၤဘြၣ် ဘၣ်ဃးဒီး တၢ်ထီကတၢၢ်ကစၢ်လၢ အအိၣ်ဒီးဟီၣ်ခိၣ် ဒီးမူခိၣ်န့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်.” စီၤအၤဘြၤဟၣ် မၤနၢၤဝဲ စီၤပၤတဖၣ်အံၤ ဒီးတၢ်လၢအဒိးန့ၢ်ဘၣ်ဝဲ အဂ့ၤကတၢၢ်အကျါ “တၢ်ခဲလၢာ်ဆံဆဲၣ်ပူတပူ” န့ၣ်ဟ့ၣ်ဝဲ စီၤပၤ ဒီးပှၤလုၢ်တၢ်အဒိၣ် စီၤမၤလကံစဒ့းလီၤ.—၁ မိၤ. ၁၄:၁၇-၂၀; ဧ့ၤ ၇:၄.
(ဧ့ၤဘြံၤ ၇:၃) အမိၢ်တအိၣ်, အပၢ်တအိၣ်, အထူအထံးတအိၣ်, အနံၤအသီအခီၣ်ထံးတအိၣ်, အသးသမူအကတၢၢ်တအိၣ်ဘၣ်, တၢ်ပာ်အီၤလၢတၢ်လီၤဂာ်ယွၤအဖိခွါဒီး, မ့ၢ်ဝဲပှၤလုၢ်တၢ်အဒိၣ်အစိၤစိၤဃၣ်ဃၣ်လီၤ.
it-2 ကဘျံးပၤ ၃၆၇ အဆၢ ၄
စီၤမၤလကံစဒ့း
စီၤမၤလကံစဒ့း “အနံၤအသီအခီၣ်ထံးတအိၣ်, အသးသမူအကတၢၢ်တအိၣ်ဘၣ်” န့ၣ်မ့ၢ်အဘၣ်ဧါ.
ဘၣ်ဃးဒီး စီၤမၤလကံစဒ့းန့ၣ် စီၤပီလူးပာ်ဖျါဝဲလၢ– “အမိၢ်တအိၣ်, အပၢ်တအိၣ်, အထူအထံးတအိၣ်, အနံၤအသီအခီၣ်ထံးတအိၣ်, အသးသမူအကတၢၢ်တအိၣ်ဘၣ်, တၢ်ပာ်အီၤလၢ တၢ်လီၤဂာ်ယွၤအဖိခွါဒီး, မ့ၢ်ဝဲပှၤလုၢ်တၢ်အဒိၣ် အစိၤစိၤဃၣ်ဃၣ်လီၤ.” (ဧ့ၤ. ၇:၃) စီၤမၤလကံစဒ့းန့ၣ် ဟဲအိၣ်ဖျဲၣ်ထီၣ် ဒီးသံဝဲဒ်ပှၤဟီၣ်ခိၣ်ဖိ အဂၤတဖၣ်အသိးလီၤ. ဘၣ်ဆၣ် အဝဲအမိၢ်အပၢ်အမံၤ ဒီးအတၢ်ဟဲလီၤစၢၤလီၤသွဲၣ် အဂ့ၢ်န့ၣ် တဘၣ်တၢ်ပာ်ဖျါထီၣ်အီၤဘၣ်. လံာ်စီဆှံ တပာ်ဖျါထီၣ်ဝဲ ဘၣ်ဃးဒီး အဝဲဟဲအိၣ်ဖျဲၣ်ထီၣ် ဒီးသံအဂ့ၢ်ဘၣ်. အဃိ စီၤမၤလကံစဒ့း မ့ၢ်တၢ်အဒိလၢ ဘၣ်ဃးဒီး ယ့ၣ်ၡူးခရံာ်လၢ ကကဲထီၣ် ပှၤလုၢ်တၢ်အဒိၣ် လီၤထူလီၤယိာ်အဂီၢ်န့ၣ် ကြၢးဝဲဘၣ်ဝဲလီၤ. လံာ်စီဆှံပာ်ဖျါထီၣ်ဝဲလၢ စီၤမၤလကံစဒ့းန့ၣ် တဒိးန့ၢ်ဘၣ် ပှၤလုၢ်တၢ်အဒိၣ်မူဒါလၢ ပှၤတဂၤဂၤအအိၣ်ဘၣ် ဒီးပှၤလၢကထီၣ်အလီၢ် စ့ၢ်ကီးတအိၣ်ဘၣ်. ဒ်န့ၣ်အသိး ဒ်ပှၤလုၢ်တၢ်အဒိၣ် ယ့ၣ်ၡူးစ့ၢ်ကီး လၢညါမ့ၢ်ဂ့ၤ လၢခံမ့ၢ်ဂ့ၤ ပှၤလုၢ်တၢ်အဒိၣ်လၢ အလီၤဂာ်ဒီးအီၤတအိၣ်ဘၣ်. အါန့ၢ်အန့ၣ် ယ့ၣ်ၡူးန့ၣ် ဟဲအိၣ်ဖျဲၣ်ထီၣ်လၢ ယူဒၤကလုာ်ဒူၣ် ဒီးစီၤပၤဒၤဝံး အစၢၤအသွဲၣ် သနာ်က့ လၢယူဒၤကလုာ်ဒူၣ်အပူၤ ပှၤလုၢ်တၢ်အဒိၣ်တအိၣ်ဘၣ်. အဝဲဒိးန့ၢ်ဘၣ် ပှၤလုၢ်တၢ်အဒိၣ် ဒီးစီၤပၤအမူဒါန့ၣ် တမ့ၢ်လၢအတၢ်ဟဲလီၤစၢၤလီၤသွဲၣ် အဃိဘၣ်. မ့ၢ်ဝဲယဟိဝၤယွၤ ဟ့ၣ်လီၤအီၤအဃိလီၤ.
(ဧ့ၤဘြံၤ ၇:၁၇) အဂ့ၢ်ဒ်အံၤ, တၢ်အုၣ်အသးလၢ, နမ့ၢ်ပှၤလုၢ်တၢ်အဒိၣ်လီၤထူလီၤယိာ်, ဒ်စီၤမၤလကံစဒ့းအလုၢ်အလၢ်အသိးန့ၣ်လီၤ.
it-2 ကဘျံးပၤ ၃၆၆
စီၤမၤလကံစဒ့း
ယ့ၣ်ၡူးအမူဒါလၢအမ့ၢ် ပှၤလုၢ်တၢ်အဒိၣ်. ဝံအတၢ်စံးပာ်လၢ ဘၣ်ဃးဒီးမ့းၡံအၤတခါန့ၣ် ပာ်ဖျါထီၣ်ဝဲလၢ ယဟိဝၤယွၤ ဆိၣ်တၢ်ဒီး စီၤဒၤဝံးအ “ကစၢ်” လၢ “နမ့ၢ်ပှၤလုၢ်တၢ်အဒိၣ် လီၤထူလီၤယိာ် ဒ်စီၤမးလကံစဒ့း အလုၢ်အလၢ်အသိးန့ၣ်လီၤ.” (စံး. ၁၁၀:၁, ၄) ခီဖျိလၢ လံာ်စံးထီၣ်ပတြၢၤ တဆၢအံၤအဃိ ပှၤဧ့ၤဘြံၤဖိတဖၣ် မုၢ်လၢ်ဝဲလၢ မ့းၡံအၤန့ၣ် ကမ့ၢ်ဝဲပှၤလၢကကဲထီၣ် ပှၤလုၢ်တၢ်အဒိၣ် ဒီးစီၤပၤလီၤ. ဖဲတၢ်မၢဖိပီလူး ကွဲးဝဲလံာ်ဆူ ပှၤဧ့ၤဘြံၤဖိတဖၣ်အအိၣ်အခါ အဝဲပာ်ဖျါထီၣ်ဝဲလၢ ယ့ၣ်ၡူးန့ၣ် “ကဲထီၣ်ပှၤလုၢ်တၢ်အခိၣ် အထူအယိာ် ဒ်စီၤမၤလကံစဒ့းအလုၢ်အလၢ်အသိး” အဃိ ဒုးသ့ၣ်ညါအဝဲသ့ၣ်လၢ မ့းၡံအၤန့ၣ် မ့ၢ်မတၤတဂၤလဲၣ်န့ၣ်လီၤ.—ဧ့ၤ. ၆:၂၀; ၅:၁၀; ကွၢ် COVENANT.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧ့ၤဘြံၤ ၈:၃) အဂ့ၢ်ဒ်အံၤ, တၢ်ပာ်ပှၤလုၢ်တၢ်အခိၣ်ကိးဂၤဒဲးန့ၣ်, လၢအကပာ်ထီၣ်တၢ်မၤဘူၣ်ဒီး တၢ်လုၢ်တၢ်ပာ်တဖၣ်အဂီၢ်န့ၣ်လီၤ. မၤသးဒ်န့ၣ်ဒီးပှၤတဂၤအံၤဘၣ်အိၣ် ဒီးတၢ်တမံၤမံၤလၢ အကပာ်ထီၣ်စ့ၢ်ကီးလီၤ.
တၢး၀၀ ၈/၁၅ ကဘျံးပၤ ၁၄ အဆၢ ၁၁
တၢ်လုၢ်တၢ်ပာ်လၢ ကစၢ်ယွၤဘၣ်သူၣ်ဘၣ်သးဝဲ
၁၁ တၢ်မၢဖိပီလူး တဲဝဲလၢ “တၢ်ပာ်ပှၤလုၢ်တၢ်အခိၣ်ကိးဂၤဒဲးန့ၣ်, လၢအကပာ်ထီၣ် တၢ်မၤဘူၣ် [မ့တမ့ၢ် တၢ်ဟ့ၣ်တဖၣ်] ဒီး တၢ်လုၢ်တၢ်ပာ်တဖၣ်အဂီၢ်န့ၣ်လီၤ.” (ဧ့ၤဘြံၤ ၈:၃) ပာ်သူၣ်ပာ်သးလၢ တၢ်လုၢ်လၢ ပှၤလုၢ်တၢ်အဒိၣ်လၢပျၢၤတဖၣ် ဘၣ်ဟ့ၣ်လုၢ်ထီၣ်ဝဲန့ၣ် စီၤပီလူးနီၤဖးဝဲခံခါ ဒီးကိးဝဲလၢ ‘တၢ်ဟ့ၣ်’ ဒီး “တၢ်လုၢ်တၢ်ပာ်” မ့တမ့ၢ် “တၢ်လုၢ်လၢတၢ်ဒဲးဘးအဂီၢ်” လီၤ. (ဧ့ၤဘြံၤ ၅:၁) အါတက့ၢ် ပှၤဟ့ၣ်တၢ်ဟ့ၣ်တဖၣ် ဒ်သိးကပာ်ဖျါထီၣ် တၢ်အဲၣ်, တၢ်စံးဘျုးစံးဖှိၣ်, ကမၤဂ့ၤထီၣ် အတၢ်ရ့လိာ်သး, ကဒိးန့ၢ်ပှၤဂၤအတၢ်ဘၣ်သး မ့တမ့ၢ် ပှၤဂၤအတၢ်တူၢ်လိာ်အဂီၢ်လီၤ. (၁ မိၤၡ့ ၃၂:၂၀; ကတိၤဒိ ၁၈:၁၆) ဒ်န့ၣ်အသိး တၢ်လုၢ်အါမံၤလၢ ဘၣ်တၢ်ပာ်ဖျါထီၣ်အီၤလၢ တၢ်မၤလိာ်အပူၤတဖၣ်န့ၣ် ပှၤထံၣ်အီၤဒ် ‘တၢ်ဟ့ၣ်’ လၢပှၤကဒိးန့ၢ်ဘၣ် ကစၢ်ယွၤအတၢ်ဘၣ်သးအဂီၢ်လီၤ. မ့မ့ၢ် “တၢ်လုၢ်လၢတၢ်ဒဲးဘးအဂီၢ်” န့ၣ် ဘၣ်တၢ်ဟ့ၣ်လုၢ်ထီၣ်အီၤဖဲ ပှၤမၤကမၣ်ဘၣ် တၢ်မၤလိာ်အခါလီၤ. ဖဲတကၠူး လီၤဆီဒၣ်တၢ် လံာ် ၂ မိၤၡ့, ၃ မိၤၡ့, ၄ မိၤၡ့ န့ၣ်ပာ်ဖျါထီၣ်ဝဲ တၢ်ဟ့ၣ် ဒီးတၢ်လုၢ်တၢ်ပာ် အိၣ်ဝဲအကလုာ်ကလုာ်လီၤ. ပကနၢ်ပၢၢ် ဒီးတိၢ်နီၣ် တၢ်ဂ့ၢ်လီၤတံၢ်လီၤဆဲးအဂီၢ် တညီဘၣ်. သနာ်က့ ဘၣ်ဃးဒီး တၢ်လုၢ်တၢ်ပာ် အကလုာ်ကလုာ်န့ၣ် ပကြၢးတိၢ်နီၣ် တၢ်ဂ့ၢ်လၢအရ့ဒိၣ်တနီၤလီၤ.
(ဧ့ၤဘြံၤ ၈:၁၃) စံးဝဲလၢတၢ်အသီဒီး, မ့ၢ်အပာ်အဂံၢ်ခိၣ်တမံၤလၢအလီၢ်လံၤကွံာ်လံလီၤ. ဒီးတၢ်လၢအလီၢ်လံၤ, ဒီးပှၢ်ဝဲန့ၣ်, အိၣ်ဘူးဒီးအကဒံကွံာ်လီၤ.
it-1 ကဘျံးပၤ ၅၂၃ အဆၢ ၅
တၢ်အၢၣ်လီၤအီလီၤ
တၢ်အၢၣ်လီၤအီလီၤ အလီၢ်လံၤန့ၣ် “လီၢ်လံၤ” ကွံာ်ဝဲဒ်လဲၣ်
ဘၣ်ဆၣ်, ဖဲကစၢ်ယွၤဘိးဘၣ်သ့ၣ်ညါဝဲ ဝံယံးရမံယၤလၢ တၢ်အၢၣ်လီၤအီလီၤအသီ ကဟဲအိၣ်ထီၣ်ဝဲအခါ တၢ်အၢၣ်လီၤအီလီၤ အလီၢ်လံၤအံၤ “လီၢ်လံၤ” ကွံာ်ဝဲလီၤ. (ယံး. ၃၁:၃၁-၃၄; ဧ့ၤ. ၈:၁၃) ဖဲ ခ.န ၃၃ န့ၣ်တၢ်အၢၣ်လီၤအီလီၤအလီၢ်လံၤအံၤ လီၢ်လံၤကွံာ်ဝဲ ခီဖျိလၢ ယ့ၣ်ၡူးတူၢ်သံအသးလၢ သ့ၣ်တၢၣ်လိၤအဃိလီၤ. (ကလီး. ၂:၁၄) ဒီးတၢ်အၢၣ်လီၤအီလီၤအသီ ဟဲအိၣ်ထီၣ်ဝဲလီၤ.—ဧ့ၤ. ၇:၁၂; ၉:၁၅; မၤတၢ်. ၂:၁-၄.
တၢ်ဖးလံာ်စီဆှံ
(ဧ့ၤဘြံၤ ၇:၁-၁၇) အဂ့ၢ်ဒ်အံၤ, စီၤမၤလကံစဒ့းအံၤ, ၡၤလ့ၣ်အစီၤပၤ, တၢ်ထီကတၢၢ်ကစၢ် အပှၤလုၢ်တၢ်အခိၣ်န့ၣ်, ဟဲသဂၢၢ်စီၤအၤဘြၤဟၣ် လၢအဟဲက့ၤလၢ တၢ်ကျီကွံာ်စီၤပၤတဖၣ်, ဒီးဆိၣ်ဂ့ၤအီၤလီၤ. ၂ ဒီးစီၤအၤဘြၤဟၣ် နီၤဟ့ၣ်အီၤလၢတၢ်ခဲလၢာ် အဆံဆဲၣ်ပူတပူလီၤ. အခီပညီ အခီၣ်ထံးန့ၣ်, မ့ၢ်တၢ်တီတၢ်လိၤအစီၤပၤ, လၢခံက့ၤဒီး ၡၤလ့ၣ်အစီၤပၤ, ဒ်ပစံးတၢ်အသိး, တၢ်ဃူတၢ်ဖိးအစီၤပၤလီၤ. ၃ အမိၢ်တအိၣ်, အပၢ်တအိၣ်, အထူအထံးတအိၣ်, အနံၤအသီအခီၣ်ထံးတအိၣ်, အသးသမူ အကတၢၢ်တအိၣ်ဘၣ်, တၢ်ပာ်အီၤလၢ တၢ်လီၤဂာ်ယွၤအဖိခွါဒီး, မ့ၢ်ဝဲပှၤလုၢ်တၢ်အဒိၣ် အစိၤစိၤဃၣ်ဃၣ်လီၤ. ၄ အဝဲဒၣ်, လၢပပၢ်အခိၣ်စီၤအၤဘြၤဟၣ် ဟ့ၣ်အီၤလၢတၢ်ဂုာ်ဆူၣ် တၢ်အဆံဆဲၣ်ပူတပူ, မ့ၢ်ပှၤဆံးဒိၣ်လဲၣ်န့ၣ်, ဆိကမိၣ်ကွၢ်တက့ၢ်. ၅ ဒီးစီၤလ့ၤဝံအဖိခွါလၢ အန့ၢ်ပှၤလုၢ်တၢ်အဒိၣ်အလီၢ်, အိၣ်ဒီးတၢ်မၤလိာ်, ဒ်တၢ်သိၣ်တၢ်သီအသိး, ဒ်သိးအကဟံးန့ၢ် ပှၤဂီၢ်မုၢ်အတၢ်ဆံဆဲၣ်ပူတပူ, ဒ်ပစံးတၢ်အသိး, အဒီပုၢ်ဝဲၢ်လၢ အဟဲနာ်သက့လၢ စီၤအၤဘြၤဟၣ် အယီၢ်ဒ့န့ၣ်လီၤ. ၆ မ့မ့ၢ်ပှၤလၢအထူအထံး တဘၣ်ဃးဘၣ်ဒီး အဝဲသ့ၣ်ဘၣ်တဂၤအံၤ, ဒိးန့ၢ်တၢ်ဆံဆဲၣ်ပူတပူလၢ စီၤအၤဘြၤဟၣ်, ဒီးဆိၣ်ဂ့ၤပှၤလၢအအိၣ်ဒီး တၢ်စံးပာ်တဖၣ်န့ၣ်လီၤ. ၇ ဒီးပှၤအဆံး ဘၣ်တၢ်ဆိၣ်ဂ့ၤလၢ ပှၤဒိၣ်တက့ၢ်န့ၣ်, မ့ၢ်တၢ်လၢ ပဂ့ၢ်လိာ်ဘှီလိာ်တသ့ဘၣ်. ၈ ဒီးဖဲအံၤ ပှၤကညီလၢအသံတဖၣ်, ဒိးန့ၢ်တၢ်ဆံဆဲၣ်ပူတပူလီၤ. မ့မ့ၢ်ဖဲန့ၣ် ပှၤလၢတၢ်အုၣ်အသးလၢ အမူဝဲလီၤ. ၉ ဒီးမ့ၢ်ဒ်ပစံးတၢ်အသိး, စီၤလ့ၤဝံလၢ အဒိးန့ၢ် တၢ်ဆံဆဲၣ်ပူတပူန့ၣ်, ဟ့ၣ်တၢ်ဆံဆဲၣ်ပူတပူလၢ စီၤအၤဘြၤဟၣ်အပူၤလီၤ. ၁၀ အဂ့ၢ်ဒ်အံၤ, လၢစီၤမၤလကံစဒ့း ဟဲသဂၢၢ်အီၤအခါန့ၣ်, အဝဲဒၣ်အိၣ်လၢ အပၢ်အယီၢ်ဒ့ပူၤလီၤ. ၁၁ မၤသးဒ်န့ၣ်ဒီး တၢ်လၢတၢ်ပှဲၤမ့ၢ်အိၣ်လၢ ပှၤလုၢ်တၢ်အဒိၣ်အလီၢ် ဘၣ်ဃးဒီး ပှၤလ့ၤဝံဖိဒီး, အဂ့ၢ်ဒ်အံၤ, ပှၤဂီၢ်မုၢ်န့ၢ်ဘၣ် တၢ်သိၣ်တၢ်သီလၢအီၤဒီး, ဘၣ်မနုၤလၢ ပှၤလုၢ်တၢ်အဒိၣ်အဂၤ, ဒ်စီၤမၤလကံစဒ့း အလုၢ်အလၢ်. ဒီးတမ့ၢ်ဘၣ် ဒ်စီၤအၤဟရိၣ် အလုၢ်အလၢ်ဘၣ်, ဂဲၤဆၢထၢၣ်အလီၢ်အိၣ်ဒံးလဲၣ်. ၁၂ အဂ့ၢ်ဒ်အံၤ, ပှၤလုၢ်တၢ်အဒိၣ်အလီၢ် မ့ၢ်လဲက့ၤအသးဒီး, တၢ်သိၣ်တၢ်သီန့ၣ် ဘၣ်လဲက့ၤအသးစ့ၢ်ကီးလီၤ. ၁၃ အဂ့ၢ်ဒ်အံၤ, ပှၤလၢတၢ်စံၣ်တဲၤ အဂ့ၢ်အကျိၤတဂၤအံၤ, ဘၣ်ဃးဒီး ပှၤအဒူၣ်လၢအဂၤ, လၢအတမၤဘၣ်တၢ်လၢ တၢ်လုၢ်အလီၢ်နီတဂၤဘၣ်လီၤ. ၁၄ အဂ့ၢ်ဒ်အံၤ, အိၣ်ဖျါမးလၢ ပကစၢ်အိၣ်ထီၣ်လၢ စီၤယူဒၤလီၤ. ဒီးစီၤမိၤၡ့တကတိၤဘၣ်လၢ ပှၤလုၢ်တၢ်အဒိၣ် ဘၣ်ဃးဒီး ပှၤအံၤတဒူၣ်န့ၣ်, နီတမံၤဘၣ်, ၁၅ ဒီးအဝဲန့ၣ် အိၣ်ဖျါဂ့ၤဒံးတက့ၢ်ဖးဒိၣ်, လၢပှၤလုၢ်တၢ်အဒိၣ်အဂၤ အိၣ်ထီၣ်ဒ် စီၤမၤလကံစဒ့းအသိး, ၁၆ လၢအတဘၣ်ဃးဒီး တၢ်သိၣ်တၢ်သီလၢပဖံးပညၣ်အတၢ်မၤလိာ်ဘၣ်. မ့ၢ်အဘၣ်ဃးဒီးတၢ်မူအထူအယိာ်အစိအကမီၤလီၤ. ၁၇ အဂ့ၢ်ဒ်အံၤ, တၢ်အုၣ်အသးလၢ, နမ့ၢ်ပှၤလုၢ်တၢ်အဒိၣ် လီၤထူလီၤယိာ်, ဒ်စီၤမၤလကံစဒ့း အလုၢ်အလၢ်အသိးန့ၣ်လီၤ.
it-1 ကဘျံးပၤ ၅၂၄ အဆၢ ၃-၅
တၢ်အၢၣ်လီၤအီလီၤအသီန့ၣ် မ့ၢ်မနုၤလဲၣ်
တၢ်အၢၣ်လီၤအီလီၤအသီ. ဖဲ ချ.ခ.န နွံယၤဖှိၣ်န့ၣ် ယဟိဝၤယွၤ တဲဆိပာ်ဝဲ ဝံယံးရမံယၤလၢ တၢ်အၢၣ်လီၤအီလီၤအသီအံၤ တလီၤဂာ်ဒီး တၢ်အၢၣ်လီၤအီလီၤအလီၢ်လံၤလၢ ပှၤအံၣ်စရ့လးဖိတဖၣ် လုၢ်သ့ၣ်ခါပတာ်ဝဲန့ၣ်ဘၣ်. (ယံး. ၃၁:၃၁-၃၄) ခ.န ၃၃ လါနံစၣ် ၁၄ သီ, ဖဲယ့ၣ်ၡူးမၤဝဲ ကစၢ်အတၢ်အီၣ်လၢဟါအီၣ်အခါ အဝဲတဲဖျါထီၣ်ဝဲ တၢ်အၢၣ်လီၤအီလီၤအသီလၢ ကဘၣ်တၢ်ပာ်ဂၢၢ်ပာ်ကျၤအီၤ ခီဖျိအတၢ်ဟ့ၣ်လုၢ်ထီၣ်သးန့ၣ်လီၤ. (လူၤ. ၂၂:၂၀) ဖဲယ့ၣ်ၡူး က့ၤထီၣ်ဆူအပၢ်အအိၣ် ဝံၤအသီ ၁၀, ကဘၣ်ဖဲ အဝဲဂဲၤဆၢထၢၣ်သမူထီၣ်က့ၤဝံၤအသီ ၅၀ အခါ အဝဲလူလီၤဝဲသးစီဆှံလၢ အဒိးန့ၢ်ဘၣ်ဝဲလၢအပၢ်အအိၣ် လၢအပျဲၢ်အဘီၣ်တဖၣ်အဖီခိၣ်လီၤ. ဖဲန့ၣ်အဆၢကတီၢ် ဘၣ်ဖဲအပျဲၢ်အဘီၣ်တဖၣ် အိၣ်ဖှိၣ်သကိးလၢ ဒၢးလၢတၢ်ဖီခိၣ်တဒၢးလၢ ဝ့ၢ်ယရူၤၡလ့ၣ်ပူၤလီၤ.—မၤတၢ်. ၂:၁-၄, ၁၇, ၃၃; ၂ ကရံၣ်. ၃:၆, ၈, ၉; ဧ့ၤ. ၂:၃, ၄.
ပှၤလၢအပၣ်ဃုာ်လၢ တၢ်အၢၣ်လီၤအီလီၤအသီန့ၣ် မ့ၢ်ဝဲယဟိဝၤယွၤ ဒီး “ယွၤအအံၣ်စရ့လး” လီၤ. အဝဲသ့ၣ်န့ၣ် မ့ၢ်ပှၤတဖၣ်လၢ အအိၣ်ဖျဲၣ်ထီၣ်ခီဖျိသးစီဆှံလီၤ. အဝဲသ့ၣ်န့ၣ် အိၣ်ဃူအိၣ်ဖိးဒီးခရံာ်, မ့ၢ်ဝဲခရံာ်အတၢ်အိၣ်ဖှိၣ် ဒီးအနီၢ်ခိန့ၣ်လီၤ. (ဧ့ၤ. ၈:၁၀; ၁၂:၂၂-၂၄; ကလၤ. ၆:၁၅, ၁၆; ၃:၂၆-၂၈; ရိ. ၂:၂၈, ၂၉) တၢ်အၢၣ်လီၤအီလီၤအသီအံၤ ကဲဘျုးစးထီၣ်ဖဲ ယ့ၣ်ၡူးလူလီၤအသွံၣ် (ဟ့ၣ်လုၢ်ထီၣ်အသးသမူ) အခါန့ၣ်လီၤ. ဖဲယ့ၣ်ၡူး က့ၤထီၣ်ဆူမူခိၣ်ဝံၤအလီၢ်ခံ အဝဲဟ့ၣ်လုၢ်ထီၣ် အတၢ်ဟ့ၣ်လုၢ်ထီၣ် အလုၢ်အပှ့ၤအံၤဆူ ယဟိဝၤယွၤအအိၣ်လီၤ. (မး.၂၆:၂၈) ဖဲကစၢ်ယွၤ ဃုထၢထီၣ်ပှၤတဂၤလၢ ကလဲၤထီၣ်ဆူမူခိၣ်အခါ (ဧ့ၤ. ၃:၁) အဝဲဒုးပၣ်ဃုာ်ဝဲ ပှၤအံၤလၢတၢ်အၢၣ်လီၤအီလီၤအသီအပူၤ ခီဖျိခရံာ်အတၢ်ပှ့ၤက့ၤန့ၣ်လီၤ. (စံး. ၅၀:၅; ဧ့ၤ. ၉:၁၄, ၁၅, ၂၆) ယ့ၣ်ၡူးခရံာ်မ့ၢ် တၢ်အၢၣ်လီၤအီလီၤအသီ အပှၤမၤဃူမၤဖိးတၢ် (ဧ့ၤ. ၈:၆; ၉:၁၅) ဒီးမ့ၢ်စ့ၢ်ကီး စီၤအၤဘြၤဟၣ် အချံအသၣ် လၢအရ့ဒိၣ်ကတၢၢ်လီၤ. (ကလၤ. ၃:၁၆) ခီဖျိလၢ ယ့ၣ်ၡူးမ့ၢ် တၢ်အၢၣ်လီၤအီလီၤအသီ အပှၤမၤဃူမၤဖိးတၢ်အဃိ အဝဲမၤစၢၤဝဲ ပှၤလၢအပၣ်ဃုာ်လၢ တၢ်အၢၣ်လီၤအီလီၤအသီတဖၣ် ဒ်သိးကကဲထီၣ် စီၤအၤဘြၤဟၣ် အချံအသၣ် နီၢ်နီၢ် (ဧ့ၤ. ၂:၁၆; ကလၤ. ၃:၂၉) ခီဖျိပျၢ်ကွံာ် အဝဲသ့ၣ်အတၢ်ဒဲးဘးန့ၣ်လီၤ. ယဟိဝၤယွၤ တူၢ်လိာ်ဝဲလၢ အဝဲသ့ၣ်မ့ၢ် ပှၤတီပှၤလိၤတဖၣ်လီၤ.—ရိ. ၅:၁, ၂; ၈:၃၃; ဧ့ၤ. ၁၀:၁၆, ၁၇.
ခရံာ်ဖိလၢ ဘၣ်တၢ်ဒိးဖှူအီၤခီဖျိ သးစီဆှံတဖၣ်န့ၣ် ကဲထီၣ် “ပှၤလုၢ်တၢ်အဒိၣ်စီၤပၤ” ဒီးမၤသကိးဃုာ်တၢ်ဒီး ပှၤလုၢ်တၢ်ခိၣ်အဒိၣ်ကတၢၢ်လီၤ. (၁ ပ့း. ၂:၉; လီၣ်. ၅:၉, ၁၀; ၂၀:၆) အဝဲသ့ၣ်မၤဝဲ ပှၤလုၢ်တၢ်အဒိၣ်အမူဒါ, တၢ်စံၣ်တဲၤတဲလီၤ “တၢ်မၤ” (ဖံလံး. ၂:၁၇) အဃိဘၣ်တၢ်ကိးအီၤလၢ “တၢ်အၢၣ်လီၤအီလီၤအသီ အခ့အပှၤ” လီၤ. (၂ ကရံၣ်. ၃:၆) အဝဲသ့ၣ်တဖၣ်န့ၣ် ကဘၣ်ယီၢ် ခရံာ်အခီၣ်လီၢ် ဘူးဘူးတံၢ်တံၢ် ဒီးကဘၣ်အိၣ်ဒီးတၢ်သးတီ တုၤအသံတစုန့ၣ်လီၤ. လၢခံယဟိဝၤယွၤ ကဒုးအိၣ်ထီၣ် ဘီမုၢ်လၢ ပှၤလုၢ်တၢ်အဒိၣ်တဖၣ်ပၢဝဲ ခီဖျိလၢ အဝဲသ့ၣ်န့ၣ်လီၤ. အဝဲသ့ၣ် ကကဲထီၣ်ပှၤနီၢ်သးဖိဒ် ကစၢ်ယွၤအသိးလီၤ. ကစၢ်ယွၤကဟ့ၣ် အဝဲသ့ၣ် သးသမူလၢအသံတသ့ဘၣ်, အတအုၣ်သံဘၣ် ဒီးကန့ၢ်သါဘၣ်တၢ်ဒီး ယ့ၣ်ၡူးခရံာ် လၢမူခိၣ်လီၤ. (၁ ပ့း. ၂:၂၁; ရိ. ၆:၃, ၄; ၁ ကရံၣ်. ၁၅:၅၃; ၁ ပ့း ၁:၄; ၂ ပ့း. ၁:၄) တၢ်အၢၣ်လီၤအီလီၤအံၤ အတၢ်တိာ်ပာ်မ့ၢ်ဝဲ ကစၢ်ယွၤ ကဟံးန့ၢ်ပှၤတကလုာ်လၢ အမံၤအဂီၢ် ဒ်စီၤအၤဘြၤဟၣ် “အချံအသၣ်” အသိးလီၤ. (မၤတၢ်. ၁၅:၁၄) အဝဲသ့ၣ် ကဲထီၣ်ခရံာ်အ “တလးမူးပိာ်မုၣ်” ဒီးမ့ၢ်ဝဲပှၤတဖၣ်လၢ ခရံာ်ဒုးပၣ်ဃုာ်အီၤလၢ တၢ်အၢၣ်လီၤအီလီၤအသီအပူၤ ဒ်သိးကပၢဃုာ်တၢ်ဒီးအီၤအဂီၢ်လီၤ. (ယိၤ. ၃:၂၉; ၂ ကရံၣ်. ၁၁:၂; လီၣ်. ၂၁:၉; လူၤ. ၂၂:၂၉; လီၣ်. ၁:၄-၆; ၅:၉, ၁၀; ၂၀:၆) တၢ်အၢၣ်လီၤအီလီၤအသီ အတၢ်တိာ်ပာ် အဘျုးအဖှိၣ် ကဘၣ်ဆဲးအိၣ်ဝဲတုၤလၢ “ယွၤအအံၣ်စရ့လး” က့ၤထီၣ်ဆူမူခိၣ် ကိးဂၤဒဲးလီၤ. ဖဲအတၢ်တိာ်ပာ် လၢပှဲၤထီၣ်ဝဲအခါ အဘျုးကအိၣ်ဝဲလီၤစိၤအဃိ တၢ်ကိးအီၤလၢ “တၢ်အၢၣ်လီၤအီလီၤအထူအယိာ်” သ့စ့ၢ်ကီးလီၤ.”—ဧ့ၤ. ၁၃:၂၀.
လါစဲးပတ့ဘၢၣ် ၉–၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့ၤဘြံၤ ၉–၁၀
“တၢ်သိၣ်တၢ်သီ အိၣ်ဒီးတၢ်ဂ့ၤလၢ အကဟဲဝဲန့ၣ် အကဒု”
(ဧ့ၤဘြံၤ ၉:၁၂-၁၄) ဒီးအိၣ်ဒီး မဲာ်တဲးလဲး ဒီးဂီၤဖံးဖိ အသွံၣ်တမ့ၢ်ဘၣ်, မ့ၢ်အအိၣ်ဒီးအသွံၣ်ဒၣ်ဝဲ, ဒီးလဲၤနုာ်ဝဲလၢ လီၢ်စီဆှံကတၢၢ်အပူၤတဘျီ, ဒီးန့ၢ်ဘၣ်တၢ်ပူၤဖျဲး လီၤထူလီၤယိာ်လီၤ. ၁၃ အဂ့ၢ်ဒ်အံၤ, ဂီၤဖံးဖါ, ဒီးမဲာ်တဲးလဲးအသွံၣ်, ဒီးဂီၤဖံးမိၢ်အဖၣ်ဆါ ဘၣ်ဖှံဝဲလၢ တၢ်တကဆှီဘၣ်အလိၤန့ၣ်, မ့ၢ်မၤကဆှီထီၣ်လၢ တၢ်မၤကဆှီ ပဖံးပညၣ်အဂီၢ်ဒီး, ၁၄ ခရံာ်လၢအပာ်ထီၣ်အသး တသံၣ်သူတမီၢ်ကျာ်လၢ သးအထူအယိာ်အပူၤ, လၢယွၤအမဲာ်ညါ, အသွံၣ်န့ၣ် ကမၤစီဆှံ ပသးလၢအသ့ၣ်ညါဒၣ်တၢ် လၢတၢ်မၤအသံ, ဒ်သိးပကမၤယွၤလၢ အမူဝဲအတၢ်မၤ ဂ့ၤန့ၢ်ဒိၣ်န့ၢ်အန့ၣ်တက့ၢ် ဆံးဒိၣ်လဲၣ်.
it-1 ကဘျံးပၤ ၈၆၂ အဆၢ ၁
တၢ်ပျၢ်တၢ်ကမၣ်
တၢ်မၤလိာ်လၢ ကစၢ်ယွၤဟ့ၣ်ဝဲ ပှၤအံၣ်စရ့လးဖိတဖၣ်န့ၣ် အိၣ်ဒီးတၢ်မၤလိာ်လၢ ပှၤတဂၤ မ့ၢ်မၤကမၣ်ဘၣ် ပှၤတဂၤဂၤ မ့တမ့ၢ် ကစၢ်ယွၤန့ၣ် ဒ်သိးအတၢ်ကမၣ်ကပျၢ်အဂီၢ် အဆိကတၢၢ် အဝဲကဘၣ်မၤဝဲ တၢ်လုၢ်တၢ်ဒဲးဘးလီၤ. လၢတၢ်အိၣ်သးအါမးအပူၤ တၢ်လုၢ်တၢ်ဒဲးဘးအဂီၢ်န့ၣ် ပှၤဘၣ်လုၢ်ထီၣ် တၢ်သွံၣ်လၢ ယဟိဝၤယွၤအအိၣ်လီၤ. (၃ မိၤ. ၅:၅–၆:၇) အဃိ စီၤပီလူး ပာ်ဖျါထီၣ်ဝဲလၢ “ဒ်တၢ်သိၣ်တၢ်သီအသိး, တၢ်ခဲလၢာ်ဃၣ်ဃၣ် ဘၣ်တၢ်မၤကဆှီအီၤလၢ တၢ်သွံၣ်လီၤ. ဒီးတၢ်သွံၣ်လူလီၤ အသးတအိၣ်ဘၣ်ဒီး, တၢ်ပျၢ်ကွံာ်တအိၣ်ဘၣ်လီၤ.” (ဧ့ၤ. ၉:၂၂) ဘၣ်ဆၣ် ဆၣ်ဖိကီၢ်ဖိလၢ ဘၣ်တၢ်လုၢ်ထီၣ်အီၤအသွံၣ်န့ၣ် မၤလီၤမၢ်ကွံာ်ဝဲ ပတၢ်ဒဲးဘးတန့ၢ်ဘၣ် ဒီးမၤကဆှီထီၣ်ဝဲ ပသးလၢအသ့ၣ်ညါဒၣ် တန့ၢ်လၢလၢပှဲၤပှဲၤစ့ၢ်ကီးဘၣ်. (ဧ့ၤ. ၁၀:၁-၄; ၉:၉, ၁၃, ၁၄) မ့မ့ၢ်တၢ်မၤလိာ်အသီလၢ ဘၣ်တၢ်တဲဆိပာ်အီၤန့ၣ် သန့ၤထီၣ်အသးလၢ ယ့ၣ်ၡူးအတၢ်ဟ့ၣ်လုၢ်ထီၣ် လၢတၢ်ပှ့ၤက့ၤအဃိ မၤလီၤမၢ်ကွံာ်ဝဲ ပတၢ်ဒဲးဘးသ့ သပှၢ်တၢၢ်လီၤ. (ယံး. ၃၁:၃၃, ၃၄; မး. ၂၆:၂၈; ၁ ကရံၣ်. ၁၁:၂၅; အ့း. ၁:၇) ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ မၤဘျါက့ၤဝဲ ပှၤသံတခီပၤတဂၤအဃိ ပာ်ဖျါထီၣ်ဝဲလၢ အဝဲအိၣ်ဒီးတၢ်စိတၢ်ကမီၤလၢ အပျၢ်ကွံာ်တၢ်ဒဲးဘးသ့န့ၣ်လီၤ.—မး. ၉:၂-၇.
(ဧ့ၤဘြ့ၤ ၉:၂၄-၂၆) အဂ့ၢ်ဒ်အံၤ, တၢ်အလီၢ်စီဆှံ, တၢ်မၤလၢပစု, လၢအမ့ၢ်တၢ်နီၢ်နီၢ် အဒိအတဲာ်န့ၣ်, ခရံာ်တလဲၤနုာ်ဘၣ်ဝဲဘၣ်, မ့မ့ၢ်လၢမူခိၣ် အကစၢ်ဒၣ်ဝဲ ဒ်သိးအကအိၣ်ဖျါ ခဲကနံၣ်အံၤလၢ ယွၤအမဲာ်ညါလၢပဂီၢ်လီၤ. ၂၅ တမ့ၢ်ဘၣ်လၢ အကပာ်ထီၣ် အသးတလီၢ်လီၢ်, ဒ်ပှၤလုၢ်တၢ်အခိၣ် လဲၤနုာ်တၢ်အလီၢ်စီဆှံကိးနံၣ်ဒဲး, အိၣ်ဒီးတၢ်ဂၤအသွံၣ် အသိးန့ၣ်ဘၣ်, ၂၆ တၢ်မ့ၢ်မၤအသးဒ်န့ၣ်ဒီး, လၢဟီၣ်ခိၣ်အခီၣ်ထံး လံၤလံၤန့ၣ်ကဘၣ်ဒိးဖှီၣ် အသးအါဘျီလီၤ. မ့မ့ၢ်ခဲကနံၣ်အံၤ, လၢတၢ်အစိၤကတၢၢ်န့ၣ်, အဝဲဒၣ်လီၣ်ဖျါအသးတဘျီ, ဒ်သိးအကပာ်ကွံာ် တၢ်ဒဲးဘးလၢ အတၢ်လုၢ်ထီၣ်အသးဒၣ်ဝဲလီၤ.
cf ကဘျံးပၤ ၁၈၃ အဆၢ ၄
“ပိာ်ယခံတက့ၢ်”
၄ ယ့ၣ်ၡူးက့ၤထီၣ်တုၤလၢမူခိၣ်အခါ ဘၣ်တၢ်တူၢ်လိာ်မုာ်အီၤ ဒီးအဝဲဒီးအပၢ် ထံၣ်လိာ်က့ၤအသးလၢ တၢ်သူၣ်ခုသးခုပူၤအဂ့ၢ်န့ၣ် လံာ်စီဆှံ တပာ်ဖျါထီၣ်ဝဲဘၣ်. ဘၣ်ဆၣ် ယ့ၣ်ၡူးက့ၤထီၣ်ဆူမူခိၣ် ဝံၤအလီၢ်ခံ တယံာ်ဘၣ် တၢ်ကမၤအသးတဖၣ်န့ၣ် လံာ်စီဆှံပာ်ဖျါထီၣ်ဝဲလီၤ. လၢအပူၤကွံာ် ၁၅ ယၤဖှိၣ်နံၣ်လံၤလံၤန့ၣ် ပှၤယူဒၤဖိတဖၣ် မၤဝဲမူးပွဲလၢ အစီဆှံတခါထီဘိလီၤ. တနံၣ်တဘျီ မုၢ်နံၤတနံၤန့ၣ် ပှၤလုၢ်တၢ်အခိၣ်အဒိၣ်ကတၢၢ်တဂၤ နုာ်လီၤလၢ တၢ်လုၢ်ဟံၣ်အဒၢးလၢ အစီဆှံကတၢၢ်အပူၤ ဒီးဘၣ်ဖှံဝဲတၢ်သွံၣ်လၢ တၢ်လုၢ်ထီၣ်အီၤလၢ တၢ်ပျၢ်တၢ်ဒဲးဘးအမုၢ်နံၤ လၢတၢ်အၢၣ်လီၤအီလီၤ တလါအမဲာ်ညါလီၤ. ပှၤလုၢ်တၢ်အခိၣ်အဒိၣ်ကတၢၢ်လၢ အမၤတၢ်လၢမုၢ်နံၤအံၤန့ၣ် ဘၣ်တၢ်ဒိလီၤအီၤလၢ မ့းၡံအၤလီၤ. ဖဲယ့ၣ်ၡူးက့ၤထီၣ်ဆူမူခိၣ် ဝံၤအလီၢ်ခံ တၢ်စံးပာ်လၢဘၣ်ဃးဒီးမူးပွဲအံၤ အခီပညီန့ၣ် လၢထီၣ်ပှဲၤထီၣ်ဝဲ တဘျီဃီလီၤ. အဝဲက့ၤထီၣ်ဆူ မူဟီၣ်ကယၢ တၢ်လီၢ်လၢအစီဆှံကတၢၢ် လၢအမ့ၢ်ယဟိဝၤယွၤ အိၣ်ဝဲအလီၢ်အမဲာ်ညါ ဒီးဟ့ၣ်လုၢ်ထီၣ်ဝဲ တၢ်ပှ့ၤက့ၤအလုၢ်အပှ့ၤ လၢအပၢ်အအိၣ်လီၤ. (ဧ့ၤဘြံၤ ၉:၁၁, ၁၂, ၂၄) မ့ၢ်ယဟိဝၤယွၤ တူၢ်လိာ်ဝဲ တၢ်ဟ့ၣ်အံၤဧါ.
(ဧ့ၤဘြံၤ ၁၀:၁-၄) အဂ့ၢ်ဒ်အံၤ, တၢ်သိၣ်တၢ်သီအိၣ်ဒီးတၢ်ဂ့ၤလၢ အကဟဲဝဲန့ၣ်အကဒု, တမ့ၢ်ဘၣ်တၢ်န့ၣ် အက့ၢ်အဂီၤ ဒၣ်ဝဲဘၣ်သတးဒီး, မၤဝဲဒီးတၢ်လုၢ်တၢ်ပာ်ဒ်လီၢ်လီၢ်, လၢပှၤပာ်ထီၣ် တနံၣ်ဘၣ်တနံၣ်တထံၣ်ဃီန့ၣ်, မၤလၢမၤပှဲၤပှၤလၢ အလဲၤဃီၤဆူအအိၣ်န့ၣ် တသ့ဘၣ်နီတဘျီဘၣ်လီၤ. ၂ မ့ၢ်သ့ဒီး, တၢ်လုၢ်န့ၣ်ကဆိတ့ၢ်, တမ့ၢ်ဘၣ်ဧါ. အဂ့ၢ်ဒ်အံၤ, ပှၤဘါတၢ်တဖၣ် ကဆှီထီၣ်တဘျီန့ၣ်သတးဒီး, အသးသ့ၣ်ညါဒၣ်တၢ် ဘၣ်ဃးဒီးတၢ်ဒဲးဘး, တအိၣ်လၢၤဘၣ်. ၃ မ့မ့ၢ်လၢတၢ်န့ၣ်တဖၣ်အပူၤ, တၢ်သ့ၣ်နီၣ်တၢ်ဒဲးဘးအိၣ်ဝဲကိးနံၤဒဲးလီၤ. ၄ အဂ့ၢ်ဒ်အံၤ, ဂီၤဖံးဖါ, ဒီးမဲာ်တဲးလဲးအသွံၣ်န့ၣ်, ပာ်ကွံာ်တၢ်ဒဲးဘးတသ့ဘၣ်.
it-2 ကဘျံးပၤ ၆၀၂-၆၀၃
တၢ်လၢတၢ်ပှဲၤ
စီၤမိၤၡ့အတၢ်မၤလိာ် အတၢ်လၢတၢ်ပှဲၤ. တၢ်မၤလိာ်လၢ ဘၣ်တၢ်ဟ့ၣ်လီၤ ပှၤအံၣ်စရ့လးဖိတဖၣ် ခီဖျိစီၤမိၤၡ့န့ၣ် ပၣ်ဃုာ်ဒီး ပှၤလုၢ်တၢ်အဒိၣ် အမူဒါ ဒီးတၢ်လုၢ်ထီၣ် ဆၣ်ဖိကီၢ်ဖိ အကလုာ်ကလုာ်လီၤ. ဒ်စီၤပီလူးပာ်ဖျါထီၣ်ဝဲအသိး တၢ်မၤလိာ်, ပှၤလုၢ်တၢ်အဒိၣ်အမူဒါ ဒီးတၢ်လုၢ်ထီၣ်တၢ် အတၢ်ရဲၣ်တၢ်ကျဲၤန့ၣ် ဟဲလၢကစၢ်ယွၤအိၣ်အဃိ မ့ၢ်တၢ်လၢတၢ်ပှဲၤသနာ်က့ မၤလၢထီၣ်ပှဲၤထီၣ်ဝဲ ပှၤလၢအိၣ်လၢ တၢ်မၤလိာ်အဖီလာ် တဖၣ်တသ့ဘၣ်. (ဧ့ၤ. ၇:၁၁, ၁၉; ၁၀:၁) ဒီးဒုးထူၣ်ဖျဲးထီၣ်ပှၤလၢ တၢ်ဒဲးဘး ဒီးတၢ်သံတန့ၢ်စ့ၢ်ကီးဘၣ်. လၢတၢ်န့ၣ်အလီၢ် ပာ်ဖျါအါထီၣ်ဝဲ တၢ်ဒဲးဘးလီၤ. (ရိ. ၃:၂၀; ၇:၇-၁၃) ဘၣ်ဆၣ် တၢ်လၢကစၢ်ယွၤ တိာ်ပာ်ဝဲလၢ ကဟဲကဲထီၣ်အသးတဖၣ်န့ၣ် ဟဲလၢပှဲၤထီၣ်ဝဲခီဖျိလၢ တၢ်သ့ၣ်တဖၣ်အံၤအဃိလီၤ. တၢ်သိၣ်တၢ်သီန့ၣ် မ့ၢ်ဝဲ “ပှၤသိၣ်လိနဲၣ်လိတၢ်” လၢအဆှၢပှၤဆူခရံာ်အအိၣ်လီၤ. ဒီးမ့ၢ်စ့ၢ်ကီး တၢ်လၢတၢ်ပှဲၤ “တၢ်ဂ့ၤလၢအကဟဲဝဲန့ၣ် အကဒု” လီၤ. (ကလၤ. ၃:၁၉-၂၅; ဧ့ၤ. ၁၀:၁) အဃိ ဖဲစီၤပီလူး တဲဝဲလၢ “တၢ်သိၣ်တၢ်သီမၤတသ့ဘၣ် လၢအဂံၢ်အဘါစၢ်လၢ တၢ်ဖံးတၢ်ညၣ်အဃိန့ၣ်” (ရိ. ၈:၃) မ့ၢ်ဒၣ်အဝဲပာ်ဖျါထီၣ်ဝဲ ဧ့ၤဘြံၤ ၇:၁၁, ၁၈-၂၈ လၢအတဲဝဲ ပှၤယူဒၤဖိအပှၤလုၢ်တၢ်အခိၣ် အဒိၣ်ကတၢၢ်တဂၤ က “အုၣ်က့ၤခီၣ်က့ၤ” ပှၤဂၤလၢလၢပှဲၤပှဲၤအဂီၢ်န့ၣ် မၤဝဲတသ့ဘၣ်. (ပှၤလုၢ်တၢ်အခိၣ်အဒိၣ်ကတၢၢ်န့ၣ် မ့ၢ်ဝဲပှၤလၢအဒိးန့ၢ်ဘၣ်မူဒါလၢ ကရဲၣ်လီၤကျဲၤလီၤတၢ်လၢ တၢ်ဟ့ၣ်လုၢ်ထီၣ်အဂီၢ် ဒ်တၢ်မၤလိာ်အိၣ်ဝဲအသိး ဒီးပှၤလၢအိၣ်ဒီးမူဒါလၢ ကနုာ်လီၤဘၣ်လၢ ဒၢးလၢအစီဆှံကတၢၢ်အပူၤ ဃုာ်ဒီးတၢ်သွံၣ် ဖဲတၢ်ပျၢ်တၢ်ဒဲးဘးအမုၢ်နံၤန့ၣ်လီၤ.) တၢ်ဟ့ၣ်လုၢ်ထီၣ်လၢ ပှၤလုၢ်တၢ်အဒိၣ်လၢ အဟဲလီၤစၢၤလီၤသွဲၣ်လၢ စီၤအၤဟရိၣ်တဖၣ် ဟ့ၣ်လုၢ်ထီၣ်ဝဲန့ၣ် ဒုးအိၣ်တီအိၣ်လိၤ ပှၤလၢကစၢ်ယွၤအမဲာ်ညါ သနာ်က့ ဒ်သိးပှၤသုတတူၢ်ဘၣ်လၢ ပှၤတအိၣ်ဒီး တၢ်ကမၣ်တဂ့ၤအဂီၢ် မၤဝဲတသ့လၢလၢပှဲၤပှဲၤဘၣ်. တၢ်မၢဖိပီလူး အဲၣ်ဒိးတဲဝဲတၢ်လုၢ်လၢ တၢ်ပျၢ်တၢ်ဒဲးဘးအဂီၢ်န့ၣ် မၤလၢထီၣ်ပှဲၤထီၣ်ဝဲ “ပှၤလၢအလဲၤဃီၤဆူ” ကစၢ်ယွၤအအိၣ်တဖၣ် တသ့လ့ၤတက့ၤဘၣ်. ဒ်သိးပသးလၢအသ့ၣ်ညါဒၣ်တၢ် ကကဆှီထီၣ် လၢလၢပှဲၤပှဲၤအဂီၢ်စ့ၢ်ကီး မၤဝဲတသ့ဘၣ်. (ဧ့ၤ. ၁၀:၁-၄; ထိၣ်သတြီၤဒီး ဧ့ၤ. ၉:၉) ပှၤလုၢ်တၢ်အခိၣ်အဒိၣ်ကတၢၢ် အတၢ်ဟ့ၣ်လုၢ်ထီၣ်န့ၣ် ပှ့ၤက့ၤပှၤလၢ တၢ်ဒဲးဘးတန့ၢ်ဘၣ်. ထဲဒၣ် ယ့ၣ်ၡူးလၢအမ့ၢ် ပှၤလုၢ်တၢ်အဒိၣ်လီၤထူလီၤယိာ် ဒီးအတၢ်ဟ့ၣ်လုၢ်ထီၣ်လၢ အလုၢ်ဒိၣ်ပှ့ၤဒိၣ်အဃိ တၢ်လၢတၢ်ပှဲၤကအိၣ်ထီၣ်ဝဲ လီၤထူလီၤယိာ်လီၤ.—ဧ့ၤ. ၉:၁၄; ၁၀:၁၂-၂၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧ့ၤဘြံၤ ၉:၁၆, ၁၇) အဂ့ၢ်ဒ်အံၤ, ဖဲတၢ်န့ၢ်သါအတၢ်အၢၣ်လီၤအီလီၤအိၣ်ဝဲဒီး, ကမ့ၢ်လၢပှၤအၢၣ်လီၤတၢ်န့ၣ်, ဘၣ်သံလီၤ. ၁၇ အဂ့ၢ်ဒ်အံၤ, တၢ်ဟ့ၣ်သါ အတၢ်အၢၣ်လီၤအီလီၤ အိၣ်ဂၢၢ်ဆိးကျၢၤလၢ ပှၤသံအလီၢ်ခံလီၤ. မ့မ့ၢ်အမူဒံးအဖၢမုၢ်ဒီး, တဂၢၢ်တကျၢၤဘၣ်လီၤ.
တၢး၉၂ ၃/၁ ကဘျံးပၤ ၃၁ အဆၢ ၄-၆
ပှၤဖးလံာ်ဖိတဖၣ် အတၢ်သံကွၢ်
စီၤပီလူးတဲဝဲလၢ ဒ်သိးကစၢ်ယွၤ ဒီးပှၤကညီအဘၢၣ်စၢၤ တၢ်အၢၣ်လီၤအီလီၤတဖၣ် ကဘၣ်တၢ်ပာ်ဂၢၢ်ပာ်ကျၢၤအီၤအဂီၢ် လိၣ်လၢပှၤကဘၣ်တူၢ်သံပှၤသးတဂၤလီၤ. တၢ်အၢၣ်လီၤအီလီၤအလီၢ်လံၤ န့ၣ်မ့ၢ်ဝဲ တၢ်အဒိတခါလီၤ. ဒ်သိးကစၢ်ယွၤ ဒီးပှၤအံၣ်စရ့လးဖိတဖၣ် အဘၢၣ်စၢၤ တၢ်အၢၣ်လီၤအီလီၤ ကအိၣ်ထီၣ်အဂီၢ် စီၤမိၤၡ့ မ့ၢ်ပှၤလၢအအိၣ်လၢ တၢ်ဘၢၣ်စၢၤလီၤ. အဃိ အဝဲဘၣ်မၤဝဲမူဒါလၢအရ့ဒိၣ် ဒီးမ့ၢ်ပှၤလၢ အဘၣ်ထွဲလိာ်အသးဒီး ပှၤအံၣ်စရ့လးဖိလၢ အအိၣ်လၢတၢ်အၢၣ်လီၤအီလီၤ အဖီလာ်တဖၣ်လီၤ. လၢတၢ်န့ၣ်အဃိ ပတဲသ့လၢ ပှၤလၢအမၤ တၢ်အၢၣ်လီၤအီလီၤအလီၢ်လံၤ ဒီးယဟိဝၤယွၤန့ၣ် မ့ၢ်ဝဲစီၤမိၤၡ့လီၤ. ဘၣ်ဆၣ် ဒ်သိးတၢ်အၢၣ်လီၤအီလီၤအလီၢ်လံၤအံၤ ကဘၣ်တၢ်ပာ်ဂၢၢ်ပာ်ကျၢၤအီၤအဂီၢ် စီၤမိၤၡ့ ဘၣ်လူလီၤဝဲအသွံၣ်ဧါ. တလူလီၤဘၣ်ဝဲဘၣ်. လၢတၢ်န့ၣ်အလီၢ် ဘၣ်ဟ့ၣ်လုၢ်ထီၣ်ဝဲ ဆၣ်ဖိကီၢ်ဖိအသွံၣ် လၢအဝဲအသွံၣ် အခၢၣ်စးလီၤ.—ဧ့ၤဘြံၤ ၉:၁၈-၂၂.
တၢ်အၢၣ်လီၤအီလီၤအသီလၢ ယဟိဝၤယွၤ မၤဝဲဒီး နီၢ်သးပှၤအံၣ်စရ့လးဖိတဖၣ်တခီမီၤ. ယ့ၣ်ၡူးမ့ၢ်ပှၤခၢၣ်စးလၢ အမၤဃူမၤဖိးက့ၤတၢ်လၢ ယဟိဝၤယွၤ ဒီးနီၢ်သးအံၣ်စရ့လးဖိတဖၣ် အဘၢၣ်စၢၤလီၤ. ယဟိဝၤယွၤ ဒုးအိၣ်ထီၣ်ဝဲ တၢ်အၢၣ်လီၤအီလီၤအသီအံၤ သနာ်က့ ယ့ၣ်ၡူးခရံာ်မ့ၢ် ပှၤလၢအရ့ဒိၣ်ကတၢၢ်လီၤ. အဝဲမ့ၢ်ပှၤလၢ အမၤဃူမၤဖိးတၢ် တကးဒံးဘၣ် အဝဲရ့ဘၣ်ဒီး ပှၤအဆိကတၢၢ်လၢ အနုာ်လီၤဘၣ်လၢ တၢ်အၢၣ်လီၤအီလီၤအသီအံၤ အပူၤတဖၣ်လီၤ. (လူၤ. ၂၂:၂၀, ၂၈, ၂၉) ဒီးအဝဲတုၤထီၣ်ထီၣ်ဘးလၢ ကဟ့ၣ်လုၢ်ထီၣ်အသး ဒ်သိးတၢ်အၢၣ်လီၤအီလီၤအသီအံၤ ကဘၣ်တၢ်ပာ်ဂၢၢ်ပာ်ကျၢၤအီၤ အဂီၢ်စ့ၢ်ကီးလီၤ. တၢ်ဟ့ၣ်လုၢ်ထီၣ်အံၤ တမ့ၢ်တၢ်လုၢ်ထီၣ်ဆၣ်ဖိကီၢ်ဖိဘၣ် မ့ၢ်ပှၤအလၢအပှဲၤတဂၤ အသးသမူလီၤ. လၢတၢ်န့ၣ်အဃိ စီၤပီလူး ကိးဝဲယ့ၣ်ၡူးခရံာ်လၢ ပှၤဟီၣ်ခိၣ်ဖိလၢ အမၤဂၢၢ်ကျၢၤ တၢ်အၢၣ်လီၤအီလီၤအသီလီၤ. “ခရံာ် . . . လဲၤနုာ် . . . လၢမူခိၣ် . . . လၢယွၤအမဲာ်ညါလၢပဂီၢ်” ဝံၤအလီၢ်ခံ တၢ်အၢၣ်လီၤအီလီၤအသီအံၤ ဘၣ်တၢ်ပာ်ဂၢၢ်ပာ်ကျၢၤအီၤလီၤ.—ဧ့ၤဘြံၤ ၉:၁၂-၁၄, ၂၄.
စီၤပီလူး တဲဝဲလၢ စီၤမိၤၡ့ ဒီးယ့ၣ်ၡူး မ့ၢ်ပှၤလၢ အမၤတၢ်အၢၣ်လီၤအီလီၤအဃိ အခီပညီတအိၣ်လၢ အဝဲသ့ၣ်ဒုးအိၣ်ထီၣ်ဝဲ တၢ်အၢၣ်လီၤအီလီၤတဖၣ်ဘၣ်. တၢ်အၢၣ်လီၤအီလီၤတဖၣ်န့ၣ် ကစၢ်ယွၤဒုးအိၣ်ထီၣ်ဝဲလီၤ. ဘၣ်ဆၣ် အဝဲသ့ၣ်ခံဂၤန့ၣ် မ့ၢ်ပှၤလၢ အမၤဃူမၤဖိးက့ၤတၢ်အဃိ ပၣ်ဃုာ်ဘၣ်လၢ တၢ်ပာ်ဂၢၢ်ပာ်ကျၢၤ တၢ်အၢၣ်လီၤအီလီၤတဖၣ်အပူၤလီၤ. တၢ်အၢၣ်လီၤအီလီၤတခါစုာ်စုာ်န့ၣ် လိၣ်လၢပှၤကဘၣ်တူၢ်သံပှၤသးလီၤ. လၢစီၤမိၤၡ့အဂီၢ်န့ၣ် ဘၣ်တၢ်မၤသံ ဆၣ်ဖိကီၢ်ဖိတဖၣ် ဒီးမ့မ့ၢ် ပှၤလၢအပၣ်ဃုာ်ဘၣ်လၢ တၢ်အၢၣ်လီၤအီလီၤအသီ အပူၤတဖၣ်အဂီၢ်န့ၣ် ယ့ၣ်ၡူး ဘၣ်ဟ့ၣ်လုၢ်ထီၣ်အသွံၣ်လီၤ.
(ဧ့ၤဘြံၤ ၁၀:၅-၇) မၤသးဒ်န့ၣ်ဒီး, တုၤအဟဲလီၤလၢဟီၣ်ခိၣ်ချၢဒီး, စံးဝဲဒၣ်, တၢ်လုၢ်ဒီးတၢ်မၤဘူၣ်န့ၣ် တဘၣ်ဘၣ်နသးဘၣ်, မ့မ့ၢ်နကတဲာ်ကတီၤနီၢ်ခိလၢယဂီၢ်လီၤ. ၆ လၢတၢ်လုၢ်ဆိၣ်ကဲၤဒီဒု, ဒီးတၢ်လုၢ်တၢ်ဒဲးဘးအဂီၢ်န့ၣ်, တဘၣ်ဘၣ်နသးဘၣ်, ၇ တုၤနုၤတစုယစံး, ယဟဲယဲ, ကွၢ်ကွၢ်, လၢလံာ်တထူအပူၤန့ၣ်, တၢ်ကွဲးအသးလၢ ယဂ့ၢ်ယကျိၤ, ဒ်သိးယကမၤ ဖဲဒၣ်နသး, ကစၢ်ဧၢ.
it-1 ကဘျံးပၤ ၂၄၉-၂၅၀
တၢ်ဒိးဘျၢထံ
စီၤလူၤကၣ် ပာ်ဖျါထီၣ်ဝဲလၢ ယ့ၣ်ၡူးဒိးဘျၢထံ အဆၢကတီၢ်န့ၣ် အဝဲဃ့ဘါထုကဖၣ်လီၤ. (လူၤ. ၃:၂၁) ပှၤကွဲးလံာ်တဂၤ ဖဲအကွဲးဝဲလံာ်လၢ ပှၤဧ့ၤဘြံၤဖိတဖၣ် အအိၣ်အခါ အဝဲကွဲးဝဲ ယ့ၣ်ၡူး “ဟဲလီၤလၢ ဟီၣ်ခိၣ်ချၢ” အဂ့ၢ်လီၤ. (တၢ်အံၤတမ့ၢ် ဖဲယ့ၣ်ၡူးအိၣ်ဖျဲၣ်ထီၣ်အခါဘၣ်. အဲၣ်ဒိးတဲဝဲ ဖဲယ့ၣ်ၡူးဟဲဝဲဒ်သိး ကဒိးဘျၢထံ ဒီးစးထီၣ်မၤ တၢ်သးခုကစီၣ်တၢ်မၤ အဆၢကတီၢ်န့ၣ်လီၤ.) ဖဲန့ၣ်အခါ အဝဲတဲဝဲဒ် စံးထီၣ်ပတြၢၤ ၄၀:၆-၈ လၢအတဲဝဲ “တၢ်လုၢ်ဒီးတၢ်မၤဘူၣ်န့ၣ် တဘၣ်ဘၣ်နသးဘၣ်, မ့မ့ၢ်နကတဲာ်ကတီၤ နီၢ်ခိလၢယဂီၢ်လီၤ. . . . တုၤနုၤတစုယစံး, ယဟဲယဲ, ကွၢ်ကွၢ်, (လၢလံာ်တထူအပူၤန့ၣ်, တၢ်ကွဲးအသးလၢ ယဂ့ၢ်ယကျိၤ) ဒ်သိးယကမၤ ဖဲဒၣ်နသး, ကစၢ်ဧၢ.” (ဧ့ၤ. ၁၀:၅-၉) ယ့ၣ်ၡူးန့ၣ် ဟဲအိၣ်ဖျဲၣ်ထီၣ်ဒ် ပှၤယူဒၤဖိအသိး, ပှၤယူဒၤဖိဒီတကလုာ်န့ၣ် မၤဝဲတၢ်အၢၣ်လီၤအီလီၤ ဒီးကစၢ်ယွၤဝံၤလံ. (၂ မိၤ. ၁၉:၅-၈; ကလၤ. ၄:၄) ယ့ၣ်ၡူးန့ၣ် တချုးလၢအဟဲလၢ စီၤယိၤဟၣ်အအိၣ် ဒီးဒိးဘျၢထံဒံးဘၣ်န့ၣ် အဝဲမၤတၢ်အၢၣ်လီၤအီလီၤဒီး ယဟိဝၤယွၤဝံၤလံလီၤ. ယ့ၣ်ၡူးဟဲလၢဟီၣ်ခိၣ်ချၢန့ၣ် တမ့ၢ်ထဲကဒိကနၣ် တၢ်မၤလိာ်တခါဧိၤဘၣ်. အဝဲဟဲဝဲဒ်သိး ကမၤဝဲအပၢ် ‘အတၢ်ဘၣ်သး’ လၢအမ့ၢ်က “ကတဲာ်ကတီၤ” ဝဲအနီၢ်ခိဒ်သိး ကဟ့ၣ်လုၢ်ထီၣ်ဝဲအဂီၢ် ဒီးကမၤကတၢၢ်ကွံာ် တၢ်မၤလိာ်လၢ ဘၣ်ဃးဒီး တၢ်ဟ့ၣ်လုၢ်ထီၣ် ဆၣ်ဖိကီၢ်ဖိအဂီၢ်လီၤ. တၢ်မၢဖိပီလူး ကွဲးဝဲလၢ “လၢတၢ်ဘၣ်အသးအံၤ ပကဲထီၣ်တၢ်စီဆှံ, လၢတၢ်ပာ်ထီၣ် ယ့ၣ်ၡူးခရံာ် အနီၢ်ခိတဘျီအဃိလီၤ.” (ဧ့ၤ. ၁၀:၁၀) ယ့ၣ်ၡူးဟဲဝဲ ဒ်သိးကမၤ အပၢ်အတၢ်ဘၣ်သး ဒီးတၢ်မၤအံၤ ပၣ်ဃုာ်ဒီး ယွၤအဘီအမုၢ် အတၢ်မၤတဖၣ်လီၤ. (လူၤ. ၄:၄၃; ၁၇:၂၀, ၂၁) ယဟိဝၤယွၤ တူၢ်လိာ်ဝဲအဖိခွါ ခီဖျိဒိးဖှူဝဲလၢ အသးစီဆှံ ဒီးတဲဝဲလၢ “နဲဒၣ်အံၤနမ့ၢ် ယဖိခွါလၢယအဲၣ်, ဘၣ်ယသးလၢနၤလီၤ.”—မၢ်. ၁:၉-၁၁; လူၤ. ၃:၂၁-၂၃; မး. ၃:၁၃-၁၇.
တၢ်ဖးလံာ်စီဆှံ
(ဧ့ၤဘြံၤ ၉:၁-၁၄) မၤကဒီးတစု, အခီၣ်ထံးတမံၤန့ၣ်အိၣ်ဝဲဒီးတၢ်မၤအလုၢ်အလၢ်ဘၣ်ဃးဒီးတၢ်မၤ, ဒီးအိၣ်ဒီး အလီၢ်စီဆှံလၢ ဟီၣ်ခိၣ်လီၤ. ၂ အဂ့ၢ်ဒ်အံၤ, တၢ်ကတဲာ်ကတီၤဒဲတဖျၢၣ်အဆၢခီၣ်ထံးန့ၣ် အိၣ်ဒီးမ့ၣ်အူဒၢအမိၢ်ပှၢ်ဒီးစီၢ်နီၤခိၣ်, ဒီးတၢ်မဲာ်ညါအကိၣ်, ဒီးတၢ်ကိးဝဲလၢလီၢ်စီဆှံလီၤ. ၃ ဒီးလၢယၣ်ဘျးလီၤ အသးခံဘ့ၣ်တဘ့ၣ်အမဲာ်ညါန့ၣ်, ဒဲကိးဝဲလၢတၢ်စီဆှံကတၢၢ်အိၣ်ဝဲလီၤ. ၄ ဒီးအိၣ်ဒီးတၢ်လုၢ်လီၢ်ထူ, ဒီးတၢ်အၢၣ်လီၤအီလီၤ အတလါပီၤအသးလၢ ထူဒီဖျၢၣ်ညါအိၣ်ဒီးလီခီထူလၢ မၤနၤအိၣ်လၢအပူၤ, ဒီးစီၤအၤဟရိၣ်အနီၣ်ထိးဘိ လၢအဒိးထီၣ်, ဒီးတၢ်အၢၣ်လီၤအီလီၤ အလၢၢ်ဘ့ၣ်ဘၣ်တဖၣ်န့ၣ်လၢအပူၤလီၤ. ၅ ဒီးလၢအဖီခိၣ်န့ၣ် တၢ်လၤကပီၤ အခ့ရူာ်လၢ အကဒုဘၣ် တၢ်မၤပူၤဖျဲးတၢ်အလီၢ်န့ၣ် အိၣ်ဝဲလီၤ. လၢအဝဲန့ၣ်အဂ့ၢ်အကျိၤ ပကတိၤတၢ်ခဲကနံၣ်အံၤ လီၤတံၢ်လီၤဆဲး အလီၢ်တအိၣ်ဘၣ်. ၆ ဒီးတၢ်တဖၣ်န့ၣ် အိၣ်ကတဲာ်ကတီၤအသးဒ်န့ၣ်ဒီး, ပှၤလုၢ်တၢ်အဒိၣ်တဖၣ် လဲၤနုာ်ဆူဒဲအခီၣ်ထံးတဖျၢၣ်န့ၣ်အပူၤ, တဘိယူၢ်ဃီဒီးမၤတၢ်မၤလီၤ. ၇ မ့မ့ၢ်ခံဖျၢၣ်တဖျၢၣ်န့ၣ်, ပှၤလုၢ်တၢ်အခိၣ်လဲၤနုာ်တဂၤဃီ တနံၣ်တဘျီတနံၣ်တဘျီ အိၣ်ဒီးတၢ်သွံၣ်, လၢအပာ်ထီၣ်လၢအဂီၢ်ဒၣ်ဝဲ, ဒီးလၢပှၤဂီၢ်မုၢ် အတၢ်ကမၣ်အဂီၢ်လီၤ. ၈ ဖဲဒဲခီၣ်ထံးအိၣ်ဒံးအဖၢမုၢ်န့ၣ်, သးစီဆှံဒုးနဲၣ်ဝဲလၢ တၢ်စီဆှံတဖၣ်အကျဲ တအိၣ်ဖျါထီၣ်ဒံးဘၣ်. ၉ အအံၤမ့ၢ်အဒိအတဲာ်လၢ အကတီၢ်ဖဲန့ၣ်အဂီၢ်, ဖဲတၢ်ဟ့ၣ်ဒီးတၢ်လုၢ်လၢ ပှၤပာ်ထီၣ်န့ၣ် မၤလၢထီၣ်ပှဲၤထီၣ်ပှၤလၢ အပာ်ထီၣ်အီၤ, အသးလၢအသ့ၣ်ညါဒၣ်တၢ်, တသ့ဘၣ်. ၁၀ မ့ၢ်ထဲတၢ်အီၣ်, ဒီးတၢ်အီ, ဒီးတၢ်ဘျၢအကလုာ်ကလုာ်, တၢ်အလုၢ်အလၢ်ဘၣ်ဃးဒီး တၢ်ဖံးတၢ်ညၣ်, လၢပှၤဘၣ်မၤတုၤလီၤလၢ တၢ်ဘှီက့ၤအကတီၢ်ဘၣ်လီၤ. ၁၁ မ့မ့ၢ်ခရံာ်ကဲထီၣ်လၢ တၢ်အဂ့ၤလၢအကဟဲဝဲတဖၣ် အပှၤလုၢ်တၢ်အခိၣ် ဘၣ်ဃးဒီးဒဲလၢအဒိၣ်န့ၢ်, ဒီးလၢန့ၢ်ပှဲၤန့ၢ်အန့ၣ်တက့ၢ်, လၢတၢ်တမၤဘၣ်လၢစုဘၣ်, ဒ်ပစံးတၢ်အသိး, တမ့ၢ်ဘၣ်လၢ တၢ်တ့အံၤဘၣ်, ၁၂ ဒီးအိၣ်ဒီးမဲာ်တဲးလဲး ဒီးဂီၤဖံးဖိအသွံၣ်တမ့ၢ်ဘၣ်, မ့ၢ်အအိၣ်ဒီးအသွံၣ်ဒၣ်ဝဲ, ဒီးလဲၤနုာ်ဝဲလၢ လီၢ်စီဆှံကတၢၢ်အပူၤတဘျီ, ဒီးန့ၢ်ဘၣ်တၢ်ပူၤဖျဲး လီၤထူလီၤယိာ်လီၤ. ၁၃ အဂ့ၢ်ဒ်အံၤ, ဂီၤဖံးဖါ, ဒီးမဲာ်တဲးလဲးအသွံၣ်, ဒီးဂီၤဖံးမိၢ်အဖၣ်ဆါ ဘၣ်ဖှံဝဲလၢတၢ်တကဆှီဘၣ်အလိၤန့ၣ်, မ့ၢ်မၤကဆှီထီၣ်လၢ တၢ်မၤကဆှီပဖံးပညၣ်အဂီၢ်ဒီး, ၁၄ ခရံာ်လၢအပာ်ထီၣ်အသး တသံၣ်သူတမီၢ်ကျာ်လၢ သးအထူအယိာ်အပူၤ, လၢယွၤအမဲာ်ညါ, အသွံၣ်န့ၣ်ကမၤစီဆှံ ပသးလၢအသ့ၣ်ညါဒၣ်တၢ် လၢတၢ်မၤအသံ, ဒ်သိးပကမၤယွၤလၢ အမူဝဲအတၢ်မၤ ဂ့ၤန့ၢ်ဒိၣ်န့ၢ်အန့ၣ်တက့ၢ် ဆံးဒိၣ်လဲၣ်.
လါစဲးပတ့ဘၢၣ် ၁၆–၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့ၤဘြံၤ ၁၁
“တၢ်နာ်မ့ၢ်တၢ်လၢ အရ့ဒိၣ်”
(ဧ့ၤဘြံၤ ၁၁:၁) ဒီးတၢ်စူၢ်တၢ်နာ်မ့ၢ်တၢ်မုၢ်လၢ်န့ၣ်အတၢ်သန့ၤပသး, ဒီးတၢ်လၢပတထံၣ်ဘၣ်တဖၣ် အတၢ်သ့ၣ်ညါလီၤ.
မၤဂၢၢ်မၤကျၢၤထီၣ်နတၢ်နာ် ဘၣ်ဃး ယဟိဝၤယွၤ အတၢ်စံးပာ်တဖၣ် န့ၣ်တက့ၢ်
၆ ဖဲ ဧ့ၤဘြံၤ ၁၁:၁ န့ၣ် လံာ်စီဆှံ ပာ်ဖျါထီၣ်ဝဲလၢ တၢ်နာ်န့ၣ် မ့ၢ်ဝဲတၢ်မနုၤလဲၣ်န့ၣ်လီၤ. (ဖးတက့ၢ်.) (၁) တၢ်နာ်န့ၣ်မ့ၢ်ဝဲပ “မုၢ်လၢ်” တၢ်လၢပနာ်အီၤတဖၣ်လီၤ. ဒီးပတၢ် “မုၢ်လၢ်” အကျါန့ၣ် ပၣ်ဃုာ်ဒီး ယွၤအတၢ်အၢၣ်လီၤ ဘၣ်ဃးဒီး ခါဆူညါန့ၣ်လီၤ. အဒိ ပသ့ၣ်ညါလီၤတံၢ်လီၤဆဲးလၢ တၢ်အၢတၢ်သီကလီၤမၢ် ဒီးဟီၣ်ခိၣ်ဒီဘ့ၣ်ကပှဲၤဒီး တၢ်မုာ်တၢ်ခုၣ်လီၤ. (၂) တၢ်နာ်န့ၣ်မ့ၢ်ဝဲ “တၢ်သ့ၣ်ညါ” မ့တမ့ၢ် တၢ်အုၣ်အသးလီၤတံၢ်လီၤဆဲးလၢ “ပတထံၣ်ဘၣ်တဖၣ်” လီၤ. အဒိ ပတထံၣ် ယဟိဝၤယွၤ, ယ့ၣ်ၡူးခရံာ်, မူခိၣ်ကလူးတဖၣ် ဒီးမူခိၣ်ဘီမုၢ် ဘၣ်ဆၣ် ပသ့ၣ်ညါလၢ အဝဲသ့ၣ်အိၣ်နီၢ်ကီၢ်လီၤ. (ဧ့ၤဘြံၤ ၁၁:၃) ပပာ်ဖျါထီၣ်လၢ ပနာ်ယဟိဝၤယွၤ အတၢ်အၢၣ်လီၤအီလီၤဒီး တၢ်လၢ ပတထံၣ်ဘၣ်တဖၣ် ကသ့လၢကျဲဒ်လဲၣ်. ပပာ်ဖျါထီၣ်သ့ခီဖျိလၢ ပတၢ်အိၣ်တၢ်ဆိး, ပတၢ်ဖံးတၢ်မၤဒီး တၢ်စံးတၢ်ကတိၤန့ၣ်လီၤ.
(ဧ့ၤဘြံၤ ၁၁:၆) မ့မ့ၢ်တၢ်နာ်တအိၣ်ဘၣ်ဒီး, တၢ်ဘၣ်အသးတသ့ဘၣ်. အဂ့ၢ်ဒ်အံၤ, ပှၤလၢအဟဲဃီၤဆူယွၤအအိၣ်, ဘၣ်နာ်လၢအအိၣ်, ဒီးလၢအမ့ၢ်ပှၤဟ့ၣ်လီၤတၢ်ဘျုးလၢ ပှၤလၢအဃုအီၤတဖၣ်န့ၣ်လီၤ.
တၢး၁၃ ၁၁/၁ ကဘျံးပၤ ၁၁ အဆၢ ၂-၅
“ပှၤဟ့ၣ်လီၤတၢ်ဘျုးလၢ ပှၤလၢအဃုအီၤတဖၣ်”
ပဒိးန့ၢ်ဘၣ် ကစၢ်ယွၤ အတၢ်ဘၣ်သးကသ့ဒ်လဲၣ်. စီၤပီလူးကွဲးဝဲလၢ “တၢ်နာ်တအိၣ်ဘၣ်ဒီး, တၢ်ဘၣ်အသးတသ့ဘၣ်.” ပာ်သူၣ်ပာ်သးလၢ စီၤပီလူးတတဲဝဲလၢ တၢ်နာ်မ့ၢ်တအိၣ်န့ၣ် ကီလၢပကဒိးန့ၢ်ဘၣ် ယွၤအတၢ်ဘၣ်သးဘၣ်. လၢတၢ်န့ၣ်အလီၢ် အဝဲတဲဝဲလၢ တၢ်ဘၣ်အသးတသ့ဘၣ်. ပမ့ၢ်တဲလၢကျဲအဂၤတမံၤန့ၣ် တၢ်နာ်မ့ၢ် တၢ်အရ့ဒိၣ်ကတၢၢ်လၢ ပကဒိးန့ၢ်ဘၣ် ကစၢ်ယွၤ အတၢ်ဘၣ်သးအဂီၢ်လီၤ.
ယဟိဝၤယွၤ ဘၣ်သူၣ်ဘၣ်သးဝဲ တၢ်နာ်ဒ်လဲၣ်တကလုာ်လဲၣ်. ပတၢ်နာ်ကစၢ်ယွၤန့ၣ် ကဘၣ်ပၣ်ဃုာ်ဒီးတၢ်ဂ့ၢ်ခံမံၤလီၤ. တၢ, ပကဘၣ် “နာ်လၢအအိၣ်” လီၤ. တၢ်ကွဲးကျိာ်ထံအဂၤ ကွဲးဝဲလၢ “နာ်လၢအမ့ၢ်ပှၤနီၢ်နီၢ် ဒီးနာ်လၢအအိၣ်.” ပမ့ၢ်အိၣ်ဒီးတၢ်သးဒ့ဒီန့ၣ် ပဒိးန့ၢ်ဘၣ် ကစၢ်ယွၤအတၢ်ဘၣ်သး သ့ဒ်လဲၣ်. တၢ်နာ်နီၢ်နီၢ်န့ၣ် တမ့ၢ်ထဲပနာ်တၢ်တခါဧိၤဘၣ်. တၢ်နါတဖၣ်ဒၣ်လဲာ် နာ်ဝဲလၢယဟိဝၤယွၤအိၣ်လီၤ. (ယၤကိာ် ၂:၁၉) ပတၢ်နာ်လၢ ယွၤအိၣ်နီၢ်နီၢ်န့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကပာ်ဖျါထီၣ်လၢတၢ်မၤ ဒီးပပာ်ဖျါထီၣ် ပတၢ်နာ် ခီဖျိ ပအိၣ်မူဒ်အတၢ်ဘၣ်သးလီၤ.—ယၤကိာ် ၂:၂၀, ၂၆.
ခံခါတခါန့ၣ် ပကဘၣ်နာ်လၢ ကစၢ်ယွၤ “ဟ့ၣ်လီၤတၢ်ဘျုး” လီၤ. ပှၤလၢအိၣ်ဒီး တၢ်နာ်နီၢ်နီၢ်တဖၣ် နာ်ဝဲလၢလၢပှဲၤပှဲၤလၢ အဝဲသ့ၣ် မ့ၢ်ဂုာ်ကျဲးစၢးအိၣ်မူဝဲဒ် တၢ်ဘၣ်ကစၢ်ယွၤအသးအသိးန့ၣ် တကဲထီၣ် တၢ်ကလီကလီဘၣ်. (၁ ကရံၣ်သူး ၁၅:၅၈) ပမ့ၢ်သးဒ့ဒီ လၢယဟိဝၤယွၤ အတၢ်သ့တၢ်ဘၣ် မ့တမ့ၢ် အတၢ်သးအိၣ်ဟ့ၣ်လီၤတၢ်အဘျုးန့ၣ် ပဒိးန့ၢ်ဘၣ် အတၢ်ဘၣ်သးကသ့ဒ်လဲၣ်. (ယၤကိာ် ၁:၁၇; ၁ ပ့းတရူး ၅:၇) ပှၤတဂၤမ့ၢ်ဆိကမိၣ်လၢ ကစၢ်ယွၤ တသးအိၣ်ပှၤဂၤဘၣ်, တအိၣ်ဒီးတၢ်စံးဘျုးဘၣ် ဒီးတဟ့ၣ်တၢ်ညီဘၣ်န့ၣ် အဝဲတသ့ၣ်ညါကစၢ်ယွၤအဂ့ၢ် ဒ်လံာ်စီဆှံပာ်ဖျါထီၣ်ဝဲအသိးဘၣ်.
ယဟိဝၤယွၤ ဟ့ၣ်တၢ်အဘျုးလၢ မတၤတဖၣ်လဲၣ်. စီၤပီလူး တဲဝဲလၢ “ပှၤလၢအဃုအီၤတဖၣ်” လီၤ. လံာ်တဘ့ၣ်လၢ ပှၤကွဲးကျိာ်ထံ လံာ်စီဆှံတဖၣ်အဂီၢ်န့ၣ် ပာ်ဖျါထီၣ်ဝဲလၢ ကြံးအတၢ်ကတိၤလၢ “ပှၤလၢအဃုအီၤတဖၣ်” န့ၣ်အခီပညီတမ့ၢ်ထဲ “လဲၤဃုတၢ်” ဘၣ်. အဲၣ်ဒိးတဲဝဲ ဟဲဆူယွၤအအိၣ် “လၢတၢ်ဘူၣ်ထီၣ်ဘါထီၣ်” အဂီၢ်လီၤ. လံာ်အဂၤတဘ့ၣ် တဲနၢ်ပၢၢ်ဝဲလၢ ကြံးအတၢ်ကတိၤအံၤန့ၣ် အဲၣ်ဒိးတဲဝဲ တၢ်သးစၢၢ်ဆၢ ဒီးတၢ်ဂုာ်ကျဲးစၢးဆူၣ်ဆူၣ်လီၤ. မ့ၢ်လီၤ. ယဟိဝၤယွၤ ဟ့ၣ်တၢ်ဘျုးတၢ်ဖှိၣ်လၢ ပှၤလၢအအဲၣ်အီၤလၢ အသးဒီဖျၢၣ် ဒီးပှၤလၢအိၣ်ဒီးတၢ်နာ် ဒီးအဘူၣ်ထီၣ်ဘါထီၣ်အီၤ လၢတၢ်သူၣ်ဆူၣ်သးဆူၣ်အပူၤတဖၣ်လီၤ.—မးသဲ ၂၂:၃၇.
(ဧ့ၤဘြံၤ ၁၁:၃၃-၃၈) အဝဲသ့ၣ်တဖၣ်လၢတၢ်နာ်အဃိန့ၣ်, မၤနၢၤတၢ်အဘီအမုၢ်, မၤတၢ်တီတၢ်လိၤ, ဒိးန့ၢ်တၢ်စံးပာ်, ပအၢဃာ်ခ့ယုၢ်အထးခိၣ်, ၃၄ မၤလီၤပံာ်မ့ၣ်အူအစိအကမီၤ, ပူၤဖျဲးကွံာ်နးအကနၣ်, လၢတၢ်ဂံၢ်စၢ်ဘါစၢ်အပူၤ, တၢ်ဒုးအိၣ်ထီၣ်အဂံၢ်အဘါ, လၢတၢ်ဒုးတၢ်ယၤအပူၤ ကဲထီၣ်ပှၤခူ, မၤဃၣ်ကွံာ်ပှၤတခီဘီမုၢ်ဖိ အသုးမုၢ်သံၣ်ဘိန့ၣ်လီၤ. ၃၅ ပိာ်မုၣ်တဖၣ်ဒိးန့ၢ်က့ၤ အပှၤသံလၢ တၢ်ဒုးဂဲၤဆၢထၢၣ်က့ၤအီၤလီၤ. ဒီးအဂၤတနီၤ, ဘၣ်တၢ်မၤအၢမၤနးအီၤဒီး တတူၢ်လိာ်ဘၣ်တၢ်ထူၣ်ဖျဲးဘၣ်, ဒ်သိးအကန့ၢ်ဘၣ်တၢ်ဂဲၤဆၢထၢၣ်က့ၤလၢအဂ့ၤတက့ၢ်လီၤ. ၃၆ ဒီးအဂၤတနီၤ ဘၣ်တၢ်မၤကွၢ်အီၤလၢ တၢ်ဒုၣ်ဒွဲၣ်, ဒီးတၢ်တီၢ်တၢ်ဝ့ၤ, ဒီးလၢန့ၣ်အမဲာ်ညါလၢတၢ်စၢဃာ်, ဒီးတၢ်လီၤဘၣ်လၢဃိာ်ပူၤလီၤ. ၃၇ တၢ်ကွံာ်အီၤလၢလၢၢ်, တၢ်ပူာ်တဲာ်အီၤ, တၢ်လ့ပစီအီၤ, တၢ်မၤသံအီၤလၢနး, ဟးဝ့ၤဝီၤကူသိး လၢသိအဖံး, ဒီးမဲာ်တဲးလဲးအဖံး, ဒီးဘၣ်ဖှီၣ်ဘၣ်ယာ်, ဘၣ်နးဘၣ်ဖှီၣ်, ဘၣ်တၢ်မၤအၢမၤနးအီၤ, ၃၈ (ဟီၣ်ခိၣ်တဂ့ၤဘၣ်ဒီးအီၤဘၣ်), ဟးဝ့ၤဝီၤလၢပှၢ်မုၢ်ကနၢ ဒီးလၢအကစၢၢ်ကလိအကျါ, ဒီးလၢလၢၢ်အအိပူၤ, ဒီးလၢဟီၣ်ခိၣ်အအိပူၤလီၤ.
မၤဂၢၢ်ကျၢၤထီၣ်နတၢ်နာ်လၢ တၢ်လၢနမုၢ်လၢ်အီၤတက့ၢ်
၁၀ လၢဧ့ၤဘြံၤ အဆၢဒိၣ် ၁၁ န့ၣ် စီၤပီလူးတဲဝဲဒၣ်လၢ– “ပိာ်မုၣ်တဖၣ်ဒိးန့ၢ်က့ၤ အပှၤသံလၢ တၢ်ဒုးဂဲၤဆၢထၢၣ်က့ၤအီၤလီၤ. ဒီးအဂၤတနီၤ, ဘၣ်တၢ်မၤအၢမၤနးအီၤဒီး တတူၢ်လိာ်ဘၣ်တၢ်ထူၣ်ဖျဲးဘၣ်, ဒ်သိးအကန့ၢ်ဘၣ် တၢ်ဂဲၤဆၢထၢၣ်က့ၤလၢ အဂ့ၤတက့ၢ်လီၤ.” (ဧ့ၤဘြံၤ ၁၁:၃၅) ပှၤအါဂၤ မၤနၢၤဝဲတၢ်မၤကွၢ်ဒီး အိၣ်ဒီးတၢ်သးတီ မ့ၢ်လၢအဝဲသ့ၣ်နာ်ဝဲ တၢ်ဂဲၤဆၢထၢၣ်သမူထီၣ်က့ၤလၢ ယွၤအၢၣ်လီၤဝဲအဃိလီၤ. အဝဲသ့ၣ် သ့ၣ်ညါဝဲလၢ ခါဆူညါန့ၣ် ယဟိဝၤယွၤ ကမၤသမူထီၣ်က့ၤအီၤ ဒီးကအိၣ်မူဘၣ်ဝဲလၢ ဟီၣ်ခိၣ်လီၤထူလီၤယိာ်န့ၣ်လီၤ. ဆိကမိၣ်ကွၢ် နၤဘိးဒီး စီၤစကၤရယၤ အဂ့ၢ်န့ၣ်တက့ၢ်. အဝဲသ့ၣ်ဒိကနၣ် ယွၤအကလုၢ်အဃိ ဘၣ်တၢ်ကွံာ်သံအဝဲသ့ၣ်လၢလၢၢ်န့ၣ်လီၤ. (၁ စီၤပၤ ၂၁:၃, ၁၅; ၂ ကွဲးနီၣ်တၢ် ၂၄:၂၀, ၂၁) မ့မ့ၢ်လၢ စီၤဒၤနံးယ့လးန့ၣ် ဘၣ်တၢ်တ့ၢ်လီၤအီၤလၢ ခ့ယုၢ်ကပိၤအပူၤ ဒီးအတံၤသကိးတဖၣ် ဘၣ်တၢ်တ့ၢ်လီၤအီၤလၢ မ့ၣ်အူပူၤန့ၣ်လီၤ. မ့ၢ်လၢအဝဲသ့ၣ်အဲၣ် ယဟိဝၤယွၤအဃိ မ့ၢ်ဘၣ်တူၢ်သံအသးဘၣ်ဆၣ် တူၢ်သံဝဲဘူၣ်လီၤ. ယဟိဝၤယွၤ ဟ့ၣ်အီၤသးစီဆှံအဃိ အဝဲသ့ၣ် အတၢ်စူၢ်တၢ်နာ်ဂၢၢ်ကျၢၤ ဒီးတူၢ်ဝဲတၢ်မၤအၢမၤနးန့ၢ်ဝဲလီၤ.—ဒၤနံးယ့လး ၃:၁၆-၁၈, ၂၀, ၂၈; ၆:၁၃, ၁၆, ၂၁-၂၃; ဧ့ၤဘြံၤ ၁၁:၃၃, ၃၄.
၁၁ ဝံအါဂၤ ဒ်သိးဒီး စီၤမံၤကါယၤ ဒီးစီၤယံးရမံယၤန့ၣ် ပှၤဒုၣ်ဒွဲၣ်စံးအၢ ဒီးပှၤပာ်လီၤအဝဲသ့ၣ်လၢ ဃိာ်ပူၤလီၤ. ဒီးအဂၤတနီၤ ဒ်သိးဒီးစီၤအ့ၤလံယၤန့ၣ်, “ဟးဝ့ၤဝီၤလၢ ပှၢ်မုၢ်ကနၢ ဒီးလၢအကစၢၢ်ကလိအကျါ, ဒီးလၢလၢၢ်အအိပူၤ, ဒီးလၢဟီၣ်ခိၣ်အအိပူၤလီၤ.” အဝဲသ့ၣ်ခဲလၢာ် တူၢ်တၢ်ကဲဒီး ဆဲးသးတီဒီးယွၤ မ့ၢ်လၢအအိၣ်ဒီးတၢ် “မုၢ်လၢ်” လၢအဂၢၢ်ကျၢၤအဃိန့ၣ်လီၤ.—ဧ့ၤဘြံၤ ၁၁:၁, ၃၆-၃၈; ၁ စီၤပၤ ၁၈:၁၃; ၂၂:၂၄-၂၇; ယံးရမံယၤ ၂၀:၁, ၂; ၂၈:၁၀, ၁၁; ၃၂:၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧ့ၤဘြံၤ ၁၁:၄) စီၤဟ့းဘ့းလးဟဲစိာ်တၢ်လုၢ်ဆူယွၤအအိၣ်, ဂ့ၤန့ၢ်စီၤကၤယံၣ်တက့ၢ်, လၢတၢ်နာ်လီၤ. ဒီးတၢ်အုၣ်အသးလၢ အဂီၢ်လၢအဝဲန့ၣ်အဃိ, လၢအမ့ၢ်ပှၤတီပှၤလိၤ, အဂ့ၢ်ဒ်အံၤ, ယွၤအုၣ်အသးလၢ အတၢ်ဟ့ၣ်တဖၣ်အဃိလီၤ. ဒီးသံဘၣ်ဆၣ်ဒီးကတိၤဒံးတၢ်, လၢအတၢ်နာ်အဃိလီၤ.
it-1 ကဘျံးပၤ ၈၀၄ အဆၢ ၅
တၢ်နာ်
ပှၤလၢပျၢၤတဖၣ်လၢ အိၣ်ဒီးဒိဂ့ၤတဲာ်ဘၣ်လၢတၢ်နာ်. “ပှၤအုၣ်အသးဂီၢ်မုၢ်” လၢ စီၤပီလူးပာ်ဖျါထီၣ်ဝဲန့ၣ် (ဧ့ၤ. ၁၂:၁) အဝဲသ့ၣ်တဂၤစုာ်စုာ် အိၣ်ဒီးတၢ်ဂ့ၢ်အဂ့ၤလၢ ကနာ်တၢ်အဂီၢ်လီၤ. အဒိ, ကစၢ်ယွၤအတၢ်စံးပာ်လၢ ဘၣ်ဃးဒီး “အချံအသၣ်” လၢကမၤသဘှံး “ဂုၢ်” အခိၣ်န့ၣ် စီၤဟ့းဘ့းလး သ့ၣ်ညါဝဲဂ့ၤဂ့ၤလီၤ. တကးဒံးဘၣ် အဝဲထံၣ်ဘၣ်ဝဲ ကစၢ်ယွၤအတၢ်စံၣ်ညီၣ် ဟဲလၢပှဲၤထီၣ်နီၢ်ကီၢ်လၢ အမိၢ်အပၢ်န့ၣ်လီၤ. ဟီၣ်ခိၣ်ဘၣ်တၢ်ဆိၣ်အၢ, တၤဆှုၣ်တၢ်မဲ ဒီးနီၣ်ဧိၤမံၤဧိၤ ဟဲမဲထီၣ် ဒီးစီၤအၤဒၣ် ဒီးအဟံၣ်ဖိဃီဖိ ဘၣ်ဖံးအီၣ်မၤအီၣ် ကီကီခဲခဲ လၢဧ့ၤဒ့ၣ်တၤသၣ်လီၢ်အချၢ တုၤအကပၢၤယွၤဝဲန့ၣ်လီၤ. လီၤဂာ်လၢ စီၤဟ့းဘ့းလး ကထံၣ်ဘၣ်ဝဲလၢ နီၢ်အံၣ်အု အသးအိၣ်စဲဘူးဒီးအဝၤ ဒီးစီၤအၤဒၣ် ဒိၣ်စိလၢအမါအဖီခိၣ်န့ၣ်လီၤ. ဒီးအမိၢ်ကတဲပၠးအီၤ ဖဲအိၣ်ထီၣ်ဒီးအဟုးအသးအခါ တူၢ်ဘၣ်တၢ်ဆါဒ်လဲၣ်န့ၣ်လီၤ. ဧ့ၤဒ့ၣ်တၤသၣ်လီၢ်စ့ၢ်ကီး ဘၣ်တၢ်ခိးအီၤလၢ ခ့ရူာ်တဖၣ်ဒီး နးမ့ၣ်အူလၢ အတရံးအသးကိးခီဒဲးလီၤ. (၁ မိၤ. ၃:၁၄-၁၉, ၂၄) တၢ်သ့ၣ်တဖၣ်အံၤမ့ၢ် “တၢ်သ့ၣ်ညါ” မ့တမ့ၢ် တၢ်အုၣ်အသးလၢအအိၣ်ဖျါလၢ အဝဲအဂီၢ်လီၤ. လၢတၢ်န့ၣ်အဃိ အဝဲနာ်ဝဲလၢ ပှၤကဒိးန့ၢ်ဘၣ်တၢ်အုၣ်က့ၤခီၣ်က့ၤ ခီဖျိတၢ်စံးပာ် “ချံသၣ်” န့ၣ်လီၤ. မ့ၢ်လၢအဝဲအိၣ်ဒီး တၢ်နာ်အဃိ “ဟဲစိာ်တၢ်လုၢ်ဆူယွၤအအိၣ်” လၢအဂ့ၤန့ၢ်ဒံး စီၤကၤယံၣ်အတၢ်လုၢ်န့ၣ်လီၤ.—ဧ့ၤ. ၁၁:၁, ၄.
(ဧ့ၤဘြံၤ ၁၁:၅) လၢတၢ်နာ်, စီၤဃနိာ်ဒိးတၢ်လဲက့ၤအသး ဒ်သိးအသုတထံၣ်တၢ်သံတဂ့ၤလီၤ. ဒီးတၢ်ဃုအီၤတန့ၢ်လၢၤဘၣ်. အဂ့ၢ်ဒ်အံၤ, ယွၤလဲက့ၤအီၤလီၤ. အဂ့ၢ်ဒ်အံၤ, တချုးတၢ်လဲက့ၤအီၤဒီး, တၢ်အုၣ်အသးလၢ ယွၤဘၣ်အသးလၢအီၤလီၤ.
“ယွၤဘၣ်အသးလၢအီၤ”
မ့မ့ၢ်ဒ်န့ၣ်န့ၣ် စီၤဃနိာ် “ဒိးတၢ်လဲက့ၤအသး” ဒ်သိးအသု “တထံၣ်တၢ်သံတဂ့ၤ” အဂီၢ်န့ၣ် အဲၣ်ဒိးစံးဝဲအခီပညီဒ်လဲၣ်. ဖျါလၢယဟိဝၤယွၤလဲက့ၤ အသးသမူဆူတၢ်သံဒ်သိး စီၤဃနိာ် တဘၣ်တၢ်မၤသံအီၤ ဆှုၣ်မဲာ်ကဲၤမဲာ်လၢ ပှၤအၢပှၤသီအစုပူၤတဂ့ၤအဂီၢ်လီၤ. ဘၣ်ဆၣ် တချုးလၢစီၤဃနိာ်သံဒံးဘၣ်န့ၣ် အဝဲဒိးန့ၢ်ဘၣ်ဝဲ “တၢ်အုၣ်အသးလၢယွၤ ဘၣ်အသးလၢအီၤလီၤ.” လၢကျဲဒ်လဲၣ်. ဖဲစီၤဃနိာ်ဘူးထီၣ်ကသံအခါ ဘၣ်သ့ၣ်သ့ၣ် ကစၢ်ယွၤကဒုးထံၣ်အီၤတၢ်ထံၣ်လၢညါခီ ဘၣ်ဃးဒီးဟီၣ်ခိၣ်ပၤရဒံစူးလီၤ. ဖဲအဝဲဒိးန့ၢ်ဘၣ်ဝဲ တၢ်အုၣ်အသးအံၤလၢ အပာ်ဖျါထီၣ်န့ၢ်အီၤလၢ ယဟိဝၤယွၤဘၣ်အသးလၢအီၤဝံၤအလီၢ်ခံ အဝဲမံမုာ်ဝဲလၢ တၢ်သံအပူၤလီၤ. ဘၣ်ဃးဒီး စီၤဃနိာ်ဒီး ပှၤတီပှၤလိၤပိာ်မုၣ်ဒီးပိာ်ခွါအဂၤတဖၣ်န့ၣ် တၢ်မၢဖိပီလူး ကွဲးဖျါထီၣ်ဝဲလၢ အဝဲသ့ၣ်– “သံဝဲလၢတၢ်နာ်အပူၤလီၤ.” (ဧ့ၤဘြံၤ ၁၁:၁၃) လၢတၢ်န့ၣ်အလီၢ်ခံ ဘၣ်သ့ၣ်သ့ၣ် စီၤဃနိာ်အဒုၣ်အဒါတဖၣ် ကဟးဃုဝဲအစိၣ်ဘၣ်ဆၣ် ဃုကွၢ်အီၤ “တန့ၢ်လၢၤဘၣ်.” ဘၣ်သ့ၣ်သ့ၣ် ယဟိဝၤယွၤ မၤလီၤမၢ်ကွံာ် စီၤဃနိာ်အစိၣ် ဒ်သိးအသုတမၤတၢ်လၢ အလီၤရၢၢ်လီၤစၢၢ် မ့တမ့ၢ် သူအီၤလၢကဆီၣ်ထွဲ တၢ်ဘူၣ်တၢ်ဘါအကမၣ် တဂ့ၤအဂီၢ်လီၤ.
တၢ်ဖးလံာ်စီဆှံ
(ဧ့ၤဘြံၤ ၁၁:၁-၁၆) ဒီးတၢ်စူၢ်တၢ်နာ်မ့ၢ်တၢ်မုၢ်လၢ်န့ၣ်အတၢ်သန့ၤပသး, ဒီးတၢ်လၢပတထံၣ်ဘၣ်တဖၣ် အတၢ်သ့ၣ်ညါလီၤ. ၂ အအဂ့ၢ်ဒ်အံၤ, လၢအဝဲန့ၣ်အပူၤ, ပမှံၤပပှၢ် ဒိးတၢ်အုၣ်အသးလၢအဂီၢ်လီၤ. ၃ လၢတၢ်နာ်, ပသ့ၣ်ညါလၢဟီၣ်ခိၣ်ဘၣ်တၢ်တ့အီၤလၢ ယွၤအကလုၢ်အကထါလီၤ. မၤသးဒ်န့ၣ်ဒီး, တၢ်လၢပထံၣ်အီၤတဖၣ်န့ၣ်, တမ့ၢ်ဘၣ်အကဲထီၣ်ဝဲလၢ တၢ်လၢအအိၣ်ဖျါတဖၣ်န့ၣ်ဘၣ်. ၄ စီၤဟ့းဘ့းလး ဟဲစိာ်တၢ်လုၢ်ဆူယွၤအအိၣ်, ဂ့ၤန့ၢ်စီၤကၤယံၣ်တက့ၢ်, လၢတၢ်နာ်လီၤ. ဒီးတၢ်အုၣ်အသးလၢ အဂီၢ်လၢအဝဲန့ၣ်အဃိ, လၢအမ့ၢ်ပှၤတီပှၤလိၤ, အဂ့ၢ်ဒ်အံၤ, ယွၤအုၣ်အသးလၢ အတၢ်ဟ့ၣ်တဖၣ်အဃိလီၤ. ဒီးသံဘၣ်ဆၣ်ဒီးကတိၤဒံးတၢ်, လၢအတၢ်နာ်အဃိလီၤ. ၅ လၢတၢ်နာ်, စီၤဃနိာ် ဒိးတၢ်လဲက့ၤအသး ဒ်သိးအသုတထံၣ် တၢ်သံတဂ့ၤလီၤ. ဒီးတၢ်ဃုအီၤတန့ၢ်လၢၤဘၣ်. အဂ့ၢ်ဒ်အံၤ, ယွၤလဲက့ၤအီၤလီၤ. အဂ့ၢ်ဒ်အံၤ, တချုးတၢ်လဲက့ၤအီၤဒီး, တၢ်အုၣ်အသးလၢ ယွၤဘၣ်အသးလၢအီၤလီၤ. ၆ မ့မ့ၢ်တၢ်နာ်တအိၣ်ဘၣ်ဒီး, တၢ်ဘၣ်အသးတသ့ဘၣ်. အဂ့ၢ်ဒ်အံၤ, ပှၤလၢအဟဲဃီၤဆူယွၤအအိၣ်, ဘၣ်နာ်လၢအအိၣ်, ဒီးလၢအမ့ၢ် ပှၤဟ့ၣ်လီၤတၢ်ဘျုးလၢ ပှၤလၢအဃုအီၤတဖၣ်န့ၣ်လီၤ. ၇ လၢတၢ်နာ်, စီၤနိအၤဘၣ်တၢ်သိၣ်အီၤလၢ တၢ်တအိၣ်ဖျါထီၣ်ဒံးဘၣ် အဂ့ၢ်အကျိၤ, ဒီးအိၣ်ဒီးတၢ်ပျံၤဘၣ်ဃးဒီးယွၤဒီး, တ့ကဘီလၢတၢ်အုၣ်က့ၤခီၣ်က့ၤအဟံၣ်ဖိအဂီၢ်လီၤ. အဝဲန့ၣ်အဃိဒီး, မ့ၢ်အစံၣ်ညီၣ်ဃၣ်ဟီၣ်ခိၣ်, ဒီးကဲထီၣ်ပှၤန့ၢ်ဘၣ်သါတၢ်တီတၢ်လိၤ ဘၣ်ဃးဒီးတၢ်နာ်န့ၣ်လီၤ. ၈ လၢတၢ်နာ် စီၤအၤဘြၤဟၣ် တုၤအဘၣ်တၢ်ကိးအီၤဒီး, ဒိကနၣ်ဝဲ ဒ်သိးအကဟးထီၣ်ဆူအလီၢ်လၢ အကန့ၢ်ဘၣ်သါ, ဒီးလဲၤဆူလဲၣ်ဆူလဲၣ်န့ၣ် တသ့ၣ်ညါဘၣ်နာ်သက့ဒီး, ဟးထီၣ်ကွံာ်ဝဲလီၤ. ၉ လၢတၢ်နာ်န့ၣ်, အိၣ်ဝဲဆိးဝဲလၢ ကီၢ်ဘၣ်ဃးဒီးတၢ်စံးပာ်, ဒ်တခီဘီမုၢ်ဖိအသိး, ဒီးအိၣ်ဝဲဆိးဝဲလၢဒဲပူၤဒီးစီၤအံၤစဲးဒီးစီၤယၤကိာ်, ပှၤလၢအကန့ၢ် ဃုာ်တၢ်ဟ့ၣ်သါဒီးအီၤ, လၢတၢ်စံးပာ်တမံၤဃီလီၤ. ၁၀ အဂ့ၢ်ဒ်အံၤ, ကွၢ်လၢ်ဝ့ၢ်တဖျၢၣ်လၢ အအိၣ်ဒီးအခီၣ်ထံးတဖၣ်, လၢပှၤသူၣ်အီၤဒီးတ့အီၤတဂၤန့ၣ်, မ့ၢ်ယွၤလီၤ. ၁၁ လၢတၢ်နာ်, နီၢ်စၤရါအကစၢ်ဒၣ်ဝဲ, ဒိးန့ၢ်အဂံၢ်အဘါလၢ အကဒၢထီၣ်အချံအသၣ်, လၢအဟုးတုၢ်အလီၢ်ခံလီၤ. အဂ့ၢ်ဒ်အံၤ, ပာ်ပှၤလၢ အစံးပာ်တၢ်တဂၤလၢ အကလုၢ်တီလီၤ. ၁၂ မၤသးဒ်န့ၣ်ဒီး, ပှၤအါဝဲဂီၢ်ဝဲ ဒ်မူခိၣ်အဆၣ်ဧိၤဖီဧိၤအသိး, ဒီးဒ်မဲးလၢပီၣ်လဲၣ်နံၤ, လၢတၢ်ဂံၢ်တလၢာ်ဘၣ်အသိးန့ၣ်, အိၣ်ဖျဲၣ်ဝဲလၢပှၤတဂၤ, ဒီးအဝဲဒၣ်န့ၣ်မၤသးဒ် ပှၤသံတ့ၢ်အသိးန့ၣ်လီၤ. ၁၃ အဝဲသ့ၣ်ခဲလၢာ်န့ၣ်, တန့ၢ်ဘၣ်တၢ်စံးပာ်ဘၣ်, ဒီးသံဝဲလၢတၢ်နာ်အပူၤလီၤ. မ့ၢ်အထံၣ်သကွ့ၤတၢ်တဖၣ်န့ၣ်, ဒီးဖိးဝဲ, ဒီးအၢၣ်လီၤလၢအမ့ၢ် ပှၤတမှံၤ, ဒီးပှၤတခီဘီမုၢ်ဖိလၢ ဟီၣ်ခိၣ်ချၢလီၤ. ၁၄ အဂ့ၢ်ဒ်အံၤ, ပှၤလၢအစံးတၢ် ဒ်န့ၣ်သိးတဖၣ်န့ၣ်, လီၣ်ဖျါထီၣ်ဝဲလၢ အဃုအထံအကီၢ်လီၤ. ၁၅ ဒီးမ့ၢ်သ့ၣ်နီၣ်ထီၣ်က့ၤ အထံအကီၢ်လၢ အဟးထီၣ်ကွံာ်လၢအပူၤဒီး, အကတီၢ်လၢ အကက့ၤက့ၤအဂီၢ်န့ၣ်, အိၣ်ဝဲသ့လီၤ. ၁၆ မ့မ့ၢ်ခဲကနံၣ်အံၤ, ဆၢန့ၢ်တၢ်လၢ အဂ့ၤန့ၢ်အန့ၣ်တက့ၢ်, ဒ်ပစံးတၢ်အသိး, တၢ်ဘၣ်ဃးဒီး မူခိၣ်လီၤ. မၤသးဒ်န့ၣ်ဒီး, ပှၤကိးယွၤလၢ အဝဲသ့ၣ်အကစၢ်န့ၣ်, ယွၤအမဲာ်တဆှးဘၣ်. အဂ့ၢ်ဒ်အံၤ, ကတဲာ်ကတီၤတ့ၢ် ဝ့ၢ်တဖျၢၣ်လၢအဂီၢ်လီၤ.
လါစဲးပတ့ဘၢၣ် ၂၃–၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့ၤဘြံၤ ၁၂–၁၃
“တၢ်သိၣ်ဃီၣ် ပာ်ဖျါထီၣ် ယဟိဝၤယွၤအတၢ်အဲၣ်”
(ဧ့ၤဘြံၤ ၁၂:၅) ဒီးသုသးပ့ၤနီၣ်လံ တၢ်သဆၣ်ထီၣ်သုခံ, လၢအကတိၤတၢ်ဒီး သုဒ်ဖိခွါတဖၣ်အသိးလံ. ယဖိခွါဧၢ. သုတပာ်ကလီကလီ ကစၢ်အသိၣ်တၢ်သီတၢ်တဂ့ၤ. ဒီးတုၤအသိၣ်ဃီၣ်နၤဒီး, မ်နသုတလီၤဘှံးလီၤတီၤတဂ့ၤ.
တၢး၁၂ ၃/၁၅ ကဘျံးပၤ ၂၉ အဆၢ ၁၈
“တဘၣ်ဃၣ်ကွံာ်” ဆူလီၢ်ခံတဂ့ၤ
၁၈ တၢ်သိၣ်က့ၤသီက့ၤ လၢအဆူၣ်. ပဝဲသ့ၣ်တဖၣ်န့ၣ် တဘျီတခီၣ် ပကဆိကမိၣ်ဘၣ်က့ၤ လၢအပူၤကွံာ် ပဘၣ်တၢ်သိၣ်က့ၤသီက့ၤပှၤ ဆူၣ်ဆူၣ်အဂ့ၢ်လီၤ. တၢ်မ့ၢ်ကဲထီၣ်အသးဒီးပှၤဒ်အံၤန့ၣ် ပသးကဟးဂီၤ, ပကသူၣ်အုးသးအုး ဒီးပက “လီၤဘှံးလီၤတီၤ” လီၤ. (ဧ့ၤ. ၁၂:၅) ပမ့ၢ်တတူၢ်လိာ် တၢ်သိၣ်က့ၤသီက့ၤ တဘျီဃီဘၣ်မ့ၢ်ဂ့ၤ ပတူၢ်လိာ်တဘျီဃီ ဘၣ်ဆၣ် လၢခံပသးမ့ၢ်တမုာ်ဘၣ်မ့ၢ်ဂ့ၤ ပကတူၢ်ဘၣ်တၢ်သးအုး ဒီးပတၢ်အိၣ်သး ကအိၣ်ဝဲဒ်သိးသိးလီၤ. ပမ့ၢ်မၤဒ်န့ၣ်န့ၣ် မ့ၢ်ဝဲ ပတဟံးန့ၢ် တၢ်အဘျုးလၢ တၢ်သိၣ်က့ၤသီက့ၤဘၣ်လီၤ. ပမ့ၢ်မၤထွဲ စီၤၡလိၤမိၤ အတၢ်ဟ့ၣ်ကူၣ်န့ၣ် ကဂ့ၤဒိၣ်မးလီၤ. “ဟံးဃာ်တၢ်သိၣ်လိတက့ၢ်. ပျၢ်အီၤတဂ့ၤ. ပၢၤအီၤတက့ၢ်. အဂ့ၢ်ဒ်အံၤ, မ့ၢ်နတၢ်မူလီၤ.” (ကတိၤ. ၄:၁၃) ဒ်ပှၤနီၣ်သိလ့ၣ်လၢ အဒိကနၣ် ကျဲအတၢ်သိၣ်တၢ်သီအသိး မ်ပတူၢ်လိာ်တၢ်သိၣ်က့ၤသီက့ၤ, မၤထွဲအီၤ ဒီးဆဲးလဲၤထီၣ်လဲၤထီတက့ၢ်.—ကတိၤ. ၄:၂၆, ၂၇; ဖး ဧ့ၤဘြံၤ ၁၂:၁၂, ၁၃.
(ဧ့ၤဘြံၤ ၁၂:၆, ၇) အဂ့ၢ်ဒ်အံၤ, ကစၢ်သိၣ်က့ၤသီက့ၤပှၤလၢအအဲၣ်, ဒီးဖျ့ကယဲၢ် အဖိခွါလၢအတူၢ်လိာ်, ကိးအဂၤဒဲးလီၤ. ၇ သုမ့ၢ်ဒိးတၢ်သိၣ်တၢ်သီဒီး, ယွၤမၤသု ဒ်ဖိခွါတဖၣ်အသိးန့ၣ်လီၤ. အဂ့ၢ်ဒ်အံၤ, ဖိခွါလၢအပၢ်တသိၣ်က့ၤသီက့ၤဘၣ်န့ၣ်, မ့ၢ်မတၤတဂၤလဲၣ်.
“တုၤသုဘါထုကဖၣ်တၢ်ဒီး စံး, အိၣ်လၢမူခိၣ်ပပၢ်ဧၢ”
ပၢ်လၢအိၣ်ဒီးတၢ်အဲၣ်တၢ်ကွံတဂၤန့ၣ် သိၣ်က့ၤသီက့ၤအဖိတဖၣ် ဒ်သိးကကဲထီၣ် ပှၤဂ့ၤပှၤဝါအဂီၢ်လီၤ. (အ့းဖ့းစူး ၆:၄) ပၢ်ဒ်သိးအံၤတဂၤန့ၣ် ကပာ်လီၤတၢ်ဘျၢ ဂၢၢ်ဂၢၢ်ကျၢၤကျၢၤ သနာ်က့ တသိၣ်က့ၤသီက့ၤအဖိတဖၣ် ဆူၣ်ဆူၣ်ကိၤကိၤဘၣ်. ဒ်န့ၣ်အသိး ပပၢ်အိၣ်လၢမူခိၣ်န့ၣ် သ့ၣ်ညါဝဲလၢ တဘျီတခီၣ် ပကလိၣ်ဘၣ်တၢ်သိၣ်က့ၤသီက့ၤလီၤ. ဘၣ်ဆၣ် ကစၢ်ယွၤအတၢ်သိၣ်က့ၤသီက့ၤန့ၣ် ပှဲၤဝဲဒီးတၢ်အဲၣ်ထီဘိ ဒီးတဆူၣ်ဆူၣ်ကိၤကိၤနီတဘျီဘၣ်. ဒ်ယဟိဝၤယွၤအသိး ယ့ၣ်ၡူးစ့ၢ်ကီး ဖဲအသိၣ်က့ၤသီက့ၤ အပျဲၢ်အဘီၣ်တဖၣ် ဒီးအဝဲသ့ၣ် မ့ၢ်တဆီတလဲအသးတဘျီဃီဒၣ်လဲာ် အဝဲတမၤဝဲ ဆူၣ်ဆူၣ်ကိၤကိၤဘၣ်.—မးသဲ ၂၀:၂၀-၂၈; လူၤကၣ် ၂၂:၂၄-၃၀.
(ဧ့ၤဘြံၤ ၁၂:၁၁) ဒီးကယဲၢ်သိၣ်ဃီၣ်တၢ်လၢ အဘၣ်ပှၤအဖၢမုၢ်န့ၣ်, တလီၤဂာ်ဘၣ် တၢ်သးခုနီတမံၤဘၣ်, မ့မ့ၢ်တၢ်သးအုးလီၤ. ဘၣ်ဆၣ်ဒီး လၢခံက့ၤန့ၣ် ပှၤလၢအဒိးအသးညီနုၢ်တဖၣ်န့ၣ်, သၣ်ထီၣ်ဝဲလၢ တၢ်တီတၢ်လိၤအတၤသၣ် လၢအဘၣ်ဃးဒီး တၢ်မုာ်တၢ်ဖိးလီၤ.
“ကနၣ်တၢ်သိၣ်လိတၢ်, ဒ်သိးနကူၣ်တၢ်ကသ့” အဂီၢ်တက့ၢ်
၁၈ ဖဲပှၤသိၣ်က့ၤသီက့ၤပှၤအခါ ပသးကဘၣ်ဒိလီၤ. ဘၣ်ဆၣ် ပမ့ၢ်တတူၢ်လိာ် တၢ်သိၣ်က့ၤသီက့ၤဘၣ်န့ၣ် ပသးကဘၣ်ဒိဒိၣ်န့ၢ်ဒံး ပဘၣ်တၢ်သိၣ်က့ၤသီက့ၤပှၤလီၤ. (ဧ့ၤဘြံၤ ၁၂:၁၁) ပမၤလိန့ၢ်တၢ်လၢ ပှၤလၢအဒိအတဲာ်တဂ့ၤ ဒ်သိးဒီးစီၤကၤယံၣ် ဒီးစီၤပၤစံးဒကံယၤ အအိၣ်သ့ဝဲလီၤ. ဖဲကစၢ်ယွၤထံၣ်လၢ စီၤကၤယံၣ် သးဟ့အဒီပုၢ်ဝဲၢ်အခါ အဝဲဟ့ၣ်ပလီၢ် စီၤကၤယံၣ်လၢ “ဘၣ်မနုၤနသးထီၣ်လဲၣ်, ဒီးဘၣ်မနုၤနမဲာ်လီၤသပှၢ်လဲၣ်. နမၤမ့ၢ်ဂ့ၤဒီး, တၢ်ပာ်ထီၣ်ထီနၤတအိၣ်ဘၣ်ဧါ. ဒီးနမၤမ့ၢ်တဂ့ၤဘၣ်ဒီး တၢ်ဒဲးဘးကိာ်လီၤလၢတြဲၤအဃၢၤလီၤ. ဒီးအဝဲဒၣ်ကသန့ၤအသးလၢနၤ, ဒီးနကပၢအီၤလီၤ.” (၁ မိၤၡ့ ၄:၆, ၇) စီၤကၤယံၣ် တတူၢ်လိာ်ယဟိဝၤယွၤ အတၢ်သိၣ်က့ၤသီက့ၤဘၣ် ဒီးအဝဲမၤသံကွံာ်ဝဲအပုၢ်လီၤ. လၢတၢ်န့ၣ်အဃိ အဝဲထံၣ်ဘၣ်တၢ်ကီတၢ်ခဲလၢ အတၢ်အိၣ်မူအပူၤလီၤ. (၁ မိၤၡ့ ၄:၁၁, ၁၂) စီၤကၤယံၣ် မ့ၢ်ဒိကနၣ် ကစၢ်ယွၤအကလုၢ်န့ၣ် အဝဲတထံၣ်ဘၣ် တၢ်သူၣ်အုးသးအုးအါအါဂီၢ်ဂီၢ်ဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧ့ၤဘြံၤ ၁၂:၁) မၤသးဒ်န့ၣ်ဒီး, ပှၤအုၣ်အသးဂီၢ်မုၢ်ပှဲၤန့ၣ် အိၣ်ဝးတရံးပှၤသတးဒီး, မ်ပဝဲဒၣ်စ့ၢ်ကီး ပာ်လီၤကွံာ်ကယဲၢ် တၢ်အဃၢတမံၤလၢ်လၢ်, ဒီးတၢ်ဒဲးဘးလၢပမၤအီၤညီ, ဒီးတၢ်ဃ့ၢ်သတြီၤအိၣ်လၢ ပမဲာ်ညါန့ၣ်, မ်ပဃ့ၢ်လၢ တၢ်သးစူၤတက့ၢ်.
တၢး၁၁ ၉/၁၅ ကဘျံးပၤ ၁၇-၁၈ အဆၢ ၁၁
ဃ့ၢ်လၢတၢ်တူၢ်န့ၢ်ခီၣ်ကဲအပူၤ
၁၁ ယဟိဝၤယွၤ အခ့အပှၤလၢအိၣ်ဒီးတၢ်သးတီလၢ အအိၣ်မူတ့ၢ်ဖဲ တချုးခရံာ်ဖိအစိၤတဖၣ်န့ၣ် စီၤပီလူးကိးဝဲလၢ ‘ပှၤအုၣ်အသးဂီၢ်မုၢ်လၢ အိၣ်ဝးတရံးပှၤ’ လီၤ. အဝဲသ့ၣ်တဖၣ်န့ၣ် ဃ့ၢ်ဝဲလၢတၢ်သးတီအပူၤ တုၤအကတၢၢ်လီၤ. အဝဲသ့ၣ်အဒိအတဲာ်န့ၣ် ပာ်ဖျါထီၣ်ဝဲလၢ ခရံာ်ဖိတဖၣ်စ့ၢ်ကီး တၢ်အိၣ်သးမ့ၢ်ကီ ထဲလဲၣ်ဂ့ၤထဲလဲၣ်ဂ့ၤ အဝဲသ့ၣ်တီဒီး ယဟိဝၤယွၤသ့လီၤ. “ပှၤအုၣ်အသးဂီၢ်မုၢ်” န့ၣ်လီၤဂာ် ဒ်ပှၤဃ့ၢ်ပြၢတၢ်ဖိလၢ အဃ့ၢ်ဝဲတုၤအတုၤလၢ အဖီတၢၣ်လီၤ. အဝဲသ့ၣ်အဒိအတဲာ်န့ၣ် ကဲထီၣ်တၢ်ဂံၢ်တၢ်ဘါလၢ ပှၤအဂၤတဖၣ် ကဆဲးဃ့ၢ်ဝဲအဂီၢ်လီၤ. ပမ့ၢ်နုာ်လီၤပြၢတၢ် ဒီးပမ့ၢ်သ့ၣ်ညါလၢ ပှၤပြၢတၢ်ဖိလၢအဖၠဲးတဖၣ် ကွၢ်ပှၤ ဒီးဟ့ၣ်ဂံၢ်ဟ့ၣ်ဘါပှၤန့ၣ် ပကဆဲးဂုာ်ကျဲးစၢး ဃ့ၢ်တုၤပတုၤလၢဖီတၢၣ်လီၤ. အဃိ ပှၤဧ့ၤဘြံၤဖိလၢ အကဲထီၣ်ခရံာ်ဖိတဖၣ် ကြၢးဆိကမိၣ်ဝဲ ယဟိဝၤယွၤအခ့အပှၤလၢပျၢၤတဖၣ် အဒိအတဲာ်လီၤ. ယွၤအခ့အပှၤတဖၣ် အဒိအတဲာ်န့ၣ် ကကဲထီၣ်တၢ်ဂံၢ်တၢ်ဘါ ဒ်သိးအဝဲသ့ၣ် ကဆဲး “ဃ့ၢ်လၢတၢ်သးစူၤ” အပူၤလီၤ. ကကဲဘျုးလၢ ပဂီၢ်စ့ၢ်ကီးလီၤ.
(ဧ့ၤဘြံၤ ၁၃:၉) သုတဒုးစိာ်ဝ့ၤဝီၤသုသးလၢ တၢ်သိၣ်တၢ်သီလီၤဆီ အကလုာ်ကလုာ်တဂ့ၤ. အဂ့ၢ်ဒ်အံၤ, ဂ့ၤလၢပသူၣ်ဂၢၢ်ပသးကျၢၤလၢ တၢ်ဘျုးတၢ်ဖှိၣ်အပူၤ, ဒီးတမ့ၢ်ဘၣ်လၢ တၢ်အီၣ်တဖၣ်, လၢပှၤလဲၤလၢအပူၤ, တန့ၢ်ဘၣ်တၢ်ဘျုးဘၣ်န့ၣ်ဘၣ်.
တၢး၈၉ ၁၂/၁၅ ကဘျံးပၤ ၂၂ အဆၢ ၁၀
ဟ့ၣ်လုၢ်ထီၣ်တၢ်လၢ ယဟိဝၤယွၤ ဘၣ်သူၣ်ဘၣ်သးဝဲ
၁၀ လၢတၢ်န့ၣ်အဃိ ဧ့ၤဘြံၤတၢ်အိၣ်ဖှိၣ်ဖိတဖၣ် ကဘၣ်ဟးဆှဲးဝဲ ပှၤယူဒၤဖိအတၢ်ဘူၣ်တၢ်ဘါလၢ အိၣ်ဒီး “တၢ်သိၣ်တၢ်သီလီၤဆီအကလုာ်ကလုာ်” န့ၣ်လီၤ. (ကလၤတံ ၅:၁-၆) အဝဲသ့ၣ် ကဘၣ်အိၣ်ဂၢၢ်ဆိးကျၢၤလၢ တၢ်မ့ၢ်တၢ်တီအပူၤ ‘ခီဖျိအသူၣ်ဂၢၢ်အသးကျၢၤလၢ ကစၢ်ယွၤအဘျုးအဖှိၣ်’ ဒီးတမ့ၢ်လၢ တၢ်သိၣ်လိတဖၣ်အံၤအဃိဘၣ်. လီၤဂာ်လၢ ပှၤတနီၤနီၤန့ၣ် ဂ့ၢ်လိာ်ဘှီလိာ်အသးလၢ ဘၣ်ဃးဒီး တၢ်အီၣ်အကလုာ်ကလုာ် ဒီးတၢ်ဟ့ၣ်လုၢ်ထီၣ်အကလုာ်ကလုာ်လီၤ. စီၤပီလူးတဲဝဲလၢ “တၢ်အီၣ်တဖၣ်, လၢပှၤလဲၤလၢအပူၤ, တန့ၢ်ဘၣ်တၢ်ဘျုးဘၣ်” တမၤဂၢၢ်မၤကျၢၤထီၣ် ပှၤသးဘၣ်. နီၢ်သးအတၢ်ဆိၣ်ဂ့ၤတဖၣ်န့ၣ် ဟဲခီဖျိ တၢ်ယူးယီၣ်ယွၤ ဒီးတၢ်ပာ်လုၢ်ပာ်ပှ့ၤ တၢ်ပှ့ၤက့ၤလီၤ. တမ့ၢ်လၢ တၢ်ပာ်ဒိၣ် တၢ်အီၣ်တၢ်အီ ဒီးမုၢ်နံၤလီၤဆီတဖၣ်ဘၣ်. (ရိမ့ၤ ၁၄:၅-၉) တကးဒံးဘၣ် ခီဖျိလၢ ယ့ၣ်ၡူးခရံာ်အတၢ်ဟ့ၣ်လုၢ်ထီၣ်အဃိ ပှၤလ့ၤဝံဖိတဖၣ် အတၢ်ဟ့ၣ်လုၢ်ထီၣ်န့ၣ် အဘျုးတအိၣ်လၢၤဘၣ်.—ဧ့ၤဘြံၤ ၉:၉-၁၄; ၁၀:၅-၁၀.
တၢ်ဖးလံာ်စီဆှံ
(ဧ့ၤဘြံၤ ၁၂:၁-၁၇) မၤသးဒ်န့ၣ်ဒီး, ပှၤအုၣ်အသးဂီၢ်မုၢ်ပှဲၤန့ၣ် အိၣ်ဝးတရံးပှၤသတးဒီး, မ်ပဝဲဒၣ်စ့ၢ်ကီး ပာ်လီၤကွံာ်ကယဲၢ် တၢ်အဃၢတမံၤလၢ်လၢ်, ဒီးတၢ်ဒဲးဘးလၢပမၤအီၤညီ, ဒီးတၢ်ဃ့ၢ်သတြီၤအိၣ်လၢ ပမဲာ်ညါန့ၣ်, မ်ပဃ့ၢ်လၢ တၢ်သးစူၤတက့ၢ်. ၂ ဒီးပှၤလၢအဒုးကဲထီၣ်ဒီး မၤလၢထီၣ်ပှဲၤထီၣ် ပတၢ်နာ်, ယ့ၣ်ၡူးတဂၤန့ၣ်, မ်ပကွၢ်ဃီၤတၢ်ဆူအအိၣ်တက့ၢ်. အဝဲဒၣ်ဒိးထူၣ်စုညါ, ဒီးပာ်တၢ်မဲာ်ဆှးလၢ တၢ်နီတမံၤဘၣ်, လၢတၢ်သးခုအိၣ် ပာ်လီၤအသးလၢ အမဲာ်ညါအဃိ, ဒီးဆ့ၣ်နီၤဝဲလၢယွၤ အလီၢ်ပစိာ်အစုထွဲတခီလီၤ. ၃ အဂ့ၢ်ဒ်အံၤ, ကွၢ်ဆိကမိၣ်ပှၤလၢ အဝံသးစူၤ ပှၤမၤတၢ်ဒဲးဘး အတၢ်မၤတံာ်တာ် ထီဒါအီၤထဲန့ၣ်, ဒ်သိးတၢ်ဘှံးသုသး သုတအိၣ်, ဒီးသုသုတလီၤဘှံးလီၤတီၤ တဂ့ၤန့ၣ်တက့ၢ်. ၄ သုတဂုာ်မၤနၢၤတၢ်ဒဲးဘး ဒီးတြီတၢ်တုၤလၢ တၢ်သွံၣ်ဒံးဘၣ်. ၅ ဒီးသုသးပ့ၤနီၣ်လံ တၢ်သဆၣ်ထီၣ်သုခံ, လၢအကတိၤတၢ် ဒီးသုဒ်ဖိခွါတဖၣ်အသိးလံ. ယဖိခွါဧၢ. သုတပာ်ကလီကလီ ကစၢ်အသိၣ်တၢ်သီတၢ်တဂ့ၤ. ဒီးတုၤအသိၣ်ဃီၣ်နၤဒီး, မ်နသုတလီၤဘှံးလီၤတီၤတဂ့ၤ. ၆ အဂ့ၢ်ဒ်အံၤ, ကစၢ်သိၣ်က့ၤသီက့ၤပှၤလၢအအဲၣ်, ဒီးဖျ့ကယဲၢ် အဖိခွါလၢအတူၢ်လိာ်, ကိးအဂၤဒဲးလီၤ. ၇ သုမ့ၢ်ဒိးတၢ်သိၣ်တၢ်သီဒီး, ယွၤမၤသုဒ် ဖိခွါတဖၣ်အသိးန့ၣ်လီၤ. အဂ့ၢ်ဒ်အံၤ, ဖိခွါလၢ အပၢ်တသိၣ်က့ၤသီက့ၤဘၣ်န့ၣ်, မ့ၢ်မတၤတဂၤလဲၣ်. ၈ မ့မ့ၢ်သုမ့ၢ်တဒိးဘၣ် တၢ်သိၣ်က့ၤသီက့ၤသု, လၢအဘၣ်ပှၤကိးအဂၤဒဲးန့ၣ်ဒီး, သုတမ့ၢ်ဘၣ်ဖိခွါဘၣ်, သုမ့ၢ်ပှၤဒၢဘၢဖိလီၤ. ၉ လၢန့ၣ်အမဲာ်ညါ, ပအိၣ်ဒီးပဖံး ပညၣ်အပၢ်လၢ အသိၣ်က့ၤသီက့ၤပှၤဒီး, ပယူးပယီၣ်အီၤလီၤ. ဒီးပပာ်ပသးလၢသးတဖၣ် အပၢ်အဖီလာ်ဒီးမူပဝဲန့ၣ်, ဂ့ၤဒၣ်တၢ်ဖးဒိၣ်, တမ့ၢ်ဘၣ်ဧါ. ၁၀ အဂ့ၢ်ဒ်အံၤ, အဝဲသ့ၣ်တဖၣ်န့ၣ်, သိၣ်က့ၤသီက့ၤပှၤ စှၤနံၤစှၤသီဖဲဒၣ်အသးလီၤ. မ့မ့ၢ်အဝဲဒၣ်န့ၣ်, လၢတၢ်ဘျုးတၢ်ဖှိၣ်အဂီၢ်, ဒ်သိးပကန့ၢ်ဘၣ်ဃုာ် အတၢ်စီဆှံလီၤ. ၁၁ ဒီးကယဲၢ်သိၣ်ဃီၣ်တၢ်လၢ အဘၣ်ပှၤအဖၢမုၢ်န့ၣ်, တလီၤဂာ်ဘၣ် တၢ်သးခုနီတမံၤဘၣ်, မ့မ့ၢ်တၢ်သးအုးလီၤ. ဘၣ်ဆၣ်ဒီး လၢခံက့ၤန့ၣ် ပှၤလၢအဒိးအသးညီနုၢ်တဖၣ်န့ၣ်, သၣ်ထီၣ်ဝဲလၢ တၢ်တီတၢ်လိၤအတၤသၣ် လၢအဘၣ်ဃးဒီး တၢ်မုာ်တၢ်ဖိးလီၤ. ၁၂ မၤသးဒ်န့ၣ်ဒီး, ပှၤအစုလၢအလီၤဘျ့, ဒီးအခီၣ်လ့ၢ်ခိၣ်လၢ အဂံၢ်အဘါ တအိၣ်ဘၣ်န့ၣ်, မၤဆူၣ်ထီၣ်တက့ၢ်. ၁၃ မၤလိၤကျဲဧိၤကပူၤဧိၤလၢ သုခီၣ်အဂီၢ်, ဒ်သိးပှၤလၢအခီၣ်ဟးဂီၤ အသုတဘၣ် ဃၣ်ကွံာ်အသးတဂ့ၤ, မ့မ့ၢ်ကဘျါက့ၤန့ၣ်တက့ၢ်. ၁၄ လူၤတၢ်မုာ်တၢ်ဖိး ဒီးပှၤခဲလၢာ်, ဒီးတၢ်စီဆှံတက့ၢ်. တၢ်စီဆှံတအိၣ်ဘၣ်ဒီး, ပှၤတထံၣ်ဘၣ် ယွၤနီတဂၤဘၣ်. ၁၅ ကွၢ်ထံကွၢ်ဆး, ဒ်သိးပှၤသုတလီၤတိၢ်လၢ ယွၤအဘျုးအဖှိၣ် နီတဂၤတဂ့ၤ, ဒ်သိးဂံၢ်အခၣ်တဘိ သုတမဲထီၣ်မၤတံာ်တာ်သု, ဒီးပှၤအါဂၤ ဘၣ်တၢ်မၤဘၣ်အၢလၢအဃိတဂ့ၤ, ၁၆ ဒ်သိးပှၤမၤကမၣ်ပိာ်မုၣ်ပိာ်မၢၤမ့ၢ်ဂ့ၤ, ပှၤလၢအမၤတရီတပါတၢ် ဒ်စီၤဧ့ၡီၤလၢအဆါကွံာ် အတၢ်ဝဲၢ်ကိအလီၢ်လၢ တၢ်အီၣ်ဘျဲးအီၣ် တဘျီအဂီၢ်အသိးမ့ၢ်ဂ့ၤ, အသုတအိၣ်တဂ့ၤ. ၁၇ အဂ့ၢ်ဒ်အံၤ, လၢခံက့ၤဒီး, တုၤအမိၣ်န့ၢ်ဘၣ်သါက့ၤ တၢ်ဆိၣ်ဂ့ၤဒီး, ဘၣ်တၢ်ညိကွံာ်အီၤန့ၣ် သုသ့ၣ်ညါလီၤ. အဂ့ၢ်ဒ်အံၤ, ဃုတၢ်ပီၢ်ယၢ်လီၤက့ၤအသးအလီၢ်, အိၣ်ဒီးတၢ်မဲာ်ထံမဲာ်နိ ဘၣ်ဆၣ်ဒီး, တထံၣ်န့ၢ်ဘၣ်ဝဲဘၣ်.
လါစဲးပတ့ဘၢၣ် ၃၀–လါအီးကထိဘၢၣ် ၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၤကိာ် ၁–၂
“ကျဲလၢအဆှၢပှၤဆူ တၢ်ဒဲးဘး ဒီးတၢ်သံ”
(ယၤကိာ် ၁:၁၄) ဘၣ်ဆၣ်ဒီး တုၤပှၤတဂၤဂၤ အတၢ်သးကွံဒၣ်ဝဲထုးအီၤ, ဒီးကလံာ်န့ၢ်အီၤဒီး, အဝဲဒၣ်ဘၣ်တၢ်လ့ပစီအီၤလီၤ.
g၁၇.၄ ကဘျံးပၤ ၁၄
တၢ်လ့ပစီ
တၢ်လ့ပစီန့ၣ် မ့ၢ်ဝဲနဘၣ်တၢ်ထုးန့ၢ်နသး လၢတၢ်တမံၤမံၤ လီၤဆီဒၣ်တၢ် တၢ်လၢအကမၣ်တမံၤမံၤလီၤ. အဒိ, ဖဲနလဲၤပှ့ၤတၢ်အခါ နထံၣ်တၢ်လၢ နဘၣ်သူၣ်ဘၣ်သးတခါလီၤ. ဖဲန့ၣ်အခါ နဆိကမိၣ်ထီၣ်လၢ နမ့ၢ်ဟုၣ်အီၤန့ၣ် တမ့ၢ်လၢ ပှၤကသ့ၣ်ညါဘၣ်. ဘၣ်ဆၣ် နသးလၢအသ့ၣ်ညါဒၣ်တၢ် တဲနၤလၢ မၤတဂ့ၤ အဃိ နမၤလီၤမၢ်ကွံာ် တၢ်ဆိကမိၣ်အံၤလီၤ. လၢတၢ်အိၣ်သးအံၤန့ၣ် နမၤနၢၤကွံာ် တၢ်လ့ပစီလီၤ.
လံာ်စီဆှံတဲဝဲဒ်လဲၣ်
တမ့ၢ်ထဲပှၤအတဂ့ၤတဖၣ် ဘၣ်တၢ်လ့ပစီဘၣ်. လံာ်စီဆှံတဲဝဲလၢ ပှၤခဲလၢာ်န့ၣ် ဘၣ်တၢ်လ့ပစီလီၤ. (၁ ကရံၣ်သူး ၁၀:၁၃) တၢ်လၢအရ့ဒိၣ်ကတၢၢ်န့ၣ် မ့ၢ်ဝဲ ဖဲပဘၣ်တၢ်လ့ပစီအခါ ပမၤဆၢက့ၤဒ်လဲၣ်န့ၣ်လီၤ. ပှၤတနီၤန့ၣ် ဆိကမိၣ်ဝဲ အတၢ်မိၣ်န့ၢ်သးလီလၢ အတဂ့ၤတဖၣ် ယံာ်ယံာ်အဃိ လၢခံအဝဲသ့ၣ် မၤဘၣ်တၢ်လၢအတဂ့ၤတဖၣ်လီၤ. မ့မ့ၢ်ပှၤအဂၤတနီၤန့ၣ် ထုးထီၣ်ကွံာ်ဝဲတၢ်ဆိကမိၣ်လၢ အကမၣ်တဖၣ် တဘျီဃီလီၤ.
“တုၤပှၤတဂၤဂၤအတၢ်သးကွံဒၣ်ဝဲထုးအီၤ, ဒီးကလံာ်န့ၢ်အီၤဒီး, အဝဲဒၣ်ဘၣ်တၢ်လ့ပစီအီၤလီၤ.”—ယၤကိာ် ၁:၁၄.
(ယၤကိာ် ၁:၁၅) လၢခံက့ၤဒီး တၢ်သးကွံန့ၣ်ဒၢထီၣ်, ဒီးဆံးစၢ်တၢ်ဒဲးဘး, ဒီးတၢ်ဒဲးဘးန့ၣ် လၢထီၣ်ပှဲၤထီၣ်, ဒီးဆံးစၢ်တၢ်သံလီၤ.
g၁၇.၄ ကဘျံးပၤ ၁၄
တၢ်လ့ပစီ
လံာ်စီဆှံ ပာ်ဖျါထီၣ်န့ၢ်ပှၤတၢ်ဂ့ၢ်လၢ အကဒုးကဲထီၣ်တၢ်ကမၣ်တဖၣ်န့ၣ်လီၤ. ယၤကိာ် ၁:၁၅ တဲဝဲလၢ “တၢ်သးကွံန့ၣ်ဒၢထီၣ်, ဒီးဆံးစၢ်တၢ်ဒဲးဘး, ဒီးတၢ်ဒဲးဘးန့ၣ် လၢထီၣ်ပှဲၤထီၣ်, ဒီးဆံးစၢ်တၢ်သံလီၤ.” ပမ့ၢ်တဲယိယိဖိန့ၣ် ပမ့ၢ်ဆိကမိၣ်တၢ်လၢ အတကြၢးတဘၣ်တဖၣ် ယံာ်ယံာ်န့ၣ် ပကမၤဘၣ်တၢ်လၢ အတဂ့ၤတဘၣ်လီၤ. ကလီၤဂာ်ဒ် ပိာ်မုၣ်လၢအဒၢတဂၤ ဘၣ်အိၣ်ဖျဲၣ်အဖိ သပှၢ်တၢၢ်အသိးလီၤ. ဘၣ်ဆၣ် ဒ်သိးပသုတမၤဘၣ် တၢ်လၢအတဂ့ၤတဘၣ်တဖၣ်တဂ့ၤအဂီၢ် ပဟးဆှဲးအီၤသ့ ခီဖျိပပၢၤပသးန့ၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၤကိာ် ၁:၁၇) ကယဲၢ်တၢ်ဟ့ၣ်အဂ့ၤအဝါ, ဒီးကယဲၢ်တၢ်ဟ့ၣ် အလၢအပှဲၤတမံၤလၢ်လၢ်န့ၣ်, ဟဲလီၤလၢတၢ်ကပီၤအပၢ်လၢထးန့ၣ်လီၤ. တၢ်ကဒံကဒါမ့ၢ်ဂ့ၤ, တၢ်ဃၣ်က့ၤအကဒုမ့ၢ်ဂ့ၤ, တအိၣ်ဘၣ်ဒီးအီၤဘၣ်.
it-2 ကဘျံးပၤ ၂၅၃-၂၅၄
တၢ်ကပီၤ
ယဟိဝၤယွၤမ့ၢ် “တၢ်ကပီၤအပၢ်လၢထး” လီၤ. (ယၤ. ၁:၁၇) အဝဲန့ၣ် တမ့ၢ်ထဲအဟ့ၣ်ပှၤ “တၢ်ကပီၤလၢ မုၢ်ဆါအဂီၢ်, ဒီးမၤလိာ်လါဒီးဆၣ်ဧိၤဖီဧိၤလၢ တၢ်ကပီၤလၢမုၢ်နၤအဂီၢ်” ဘၣ်. (ယံး. ၃၁:၃၅) မ့ၢ်စ့ၢ်ကီး တၢ်ကပီၤဘၣ်ဃးဒီးတၢ်မ့ၢ်တၢ်တီခဲလၢာ် အဂံၢ်ခီၣ်ထံးလီၤ. (၂ ကရံၣ်. ၄:၆) ပှၤလၢအတူၢ်လိာ် ကစၢ်ယွၤ အတၢ်မၤလိာ်, အတၢ်စံၣ်ညီၣ် ဒီးအတၢ်ကတိၤတဖၣ်အဂီၢ် တၢ်သ့ၣ်တဖၣ်န့ၣ်မ့ၢ်ဝဲ တၢ်ကပီၤလီၤ. (စံး. ၄၃:၃; ၁၁၉:၁၀၅; ကတိၤ. ၆:၂၃; ၡါ. ၅၁:၄) ပှၤကွဲးထါစံးထီၣ်တြၢၤ ကွဲးဝဲလၢ “လၢနတၢ်ကပီၤအကျါန့ၣ် ပကထံၣ်ဘၣ်တၢ်ကပီၤလီၤ.” (စံး. ၃၆:၉; ထိၣ်သတြီၤဒီး စံး. ၂၇:၁; ၄၃:၃) ဒ်မုၢ်ဆ့ၣ်ထီၣ်အတၢ်ကပီၤ “တုၤလီၤလၢမုၢ်ထူၣ်” ဒံးယံာ်ဒံးကပီၤထီၣ်အသိး ပှၤတီပှၤလိၤတဖၣ်အကျဲ ဒံးယံာ်ဒံးကပီၤထီၣ် ခီဖျိအတၢ်ကူၣ်ဘၣ်ကူၣ်သ့လၢ ဟဲလၢယွၤအအိၣ်အဃိလီၤ. (ကတိၤ. ၄:၁၈) ပှၤလၢအလဲၤတၢ်ဒ် ယဟိဝၤယွၤအတၢ်သိၣ်တၢ်သီအသိးတဖၣ်န့ၣ် မ့ၢ်ဒၣ်အလဲၤတၢ်လၢ ယွၤအတၢ်ကပီၤအကျါလီၤ. (ၡါ. ၂:၃-၅) ဘၣ်ဆၣ် ဘၣ်ဃးဒီးတၢ်ဂ့ၢ်တမံၤမံၤန့ၣ် ပှၤတဂၤမ့ၢ်အိၣ်ဒီး တၢ်ထံၣ်လၢအတကြၢးတဘၣ် မ့တမ့ၢ် တၢ်ပာ်သူၣ်ပာ်သးလၢအတဂ့ၤဘၣ်န့ၣ် အဝဲခံးလီၤလၢနီၢ်သးတခီလီၤ. ယ့ၣ်ၡူးတဲဝဲဒ်အံၤ “နမဲာ်မ့ၢ်ယုာ်ဒီး, နနီၢ်ခိကအိၣ်ဒီးတၢ်ခံးဒီဂၤညါလီၤ. မၤသးဒ်န့ၣ်ဒီး တၢ်ကပီၤအိၣ်လၢနပူၤမ့မ့ၢ်တၢ်ခံးဒီး, တၢ်လၢတၢ်ခံးန့ၣ်ဆံးဒိၣ်လဲၣ်.”—မး. ၆:၂၃; ထိၣ်သတြီၤဒီး ၅ မိၤ. ၁၅:၉; ၂၈:၅၄-၅၇; ကတိၤ. ၂၈:၂၂; ၂ ပ့း. ၂:၁၄.
(ယၤကိာ် ၂:၈) သုမ့ၢ်မၤလၢထီၣ်ပှဲၤထီၣ် တၢ်သိၣ်တၢ်သီစီၤပၤ, ဒ်တၢ်ကွဲးအသးအသိးန့ၣ်, အဲၣ်ပှၤလၢနဃၢၤ ဒ်နအဲၣ်လီၤနသးအသိးတက့ၢ်န့ၣ်ဒီး, သုမၤတၢ်ဂ့ၤဂ့ၤဘၣ်ဘၣ်လီၤ.
it-2 ကဘျံးပၤ ၂၂၂ အဆၢ ၄
တၢ်မၤလိာ်
“တၢ်သိၣ်တၢ်သီစီၤပၤ.” “တၢ်သိၣ်တၢ်သီစီၤပၤ” န့ၣ်မ့ၢ်တၢ်လၢအအိၣ်ဖျါ ဒီးအရ့ဒိၣ်န့ၢ် တၢ်သိၣ်တၢ်သီအဂၤလၢ စီၤပၤတဂၤထုးထီၣ်ဝဲ ဘၣ်ဃးဒီး ပှၤဟီၣ်ခိၣ်ဖိအတၢ်ရ့လိာ်သးလီၤ. (ယၤ. ၂:၈) လၢစီၤမိၤၡ့ အတၢ်သိၣ်တၢ်သီအပူၤန့ၣ် တၢ်အဲၣ်တၢ်ကွံ မ့ၢ်တၢ်လၢအရ့ဒိၣ်လီၤ. ဒီး (တၢ်သိၣ်တၢ်သီစီၤပၤ) လၢအမ့ၢ် “အဲၣ်ပှၤလၢနဃၢၤ ဒ်နအဲၣ်လီၤနသးဒၣ်နဲအသိး” န့ၣ်ဟဲလီၤစၢၤလၢ ဝံအကလုၢ် ဒီးတၢ်သိၣ်တၢ်သီတဖၣ် ဒီးမ့ၢ်ဝဲတၢ်မၤလိာ်အဒိၣ်ကတၢၢ် ခံထံၣ်တထံၣ်လီၤ. (မး. ၂၂:၃၇-၄၀) ခရံာ်ဖိတဖၣ် တအိၣ်လၢၤလၢ တၢ်အၢၣ်လီၤအီလီၤအလီၢ်လံၤ အဖီလာ် သနာ်က့ မ့ၢ်ဘၣ်ဃးဒီးတၢ်အၢၣ်လီၤအီလီၤအသီန့ၣ် အဝဲသ့ၣ်အိၣ်လၢ စီၤပၤယဟိဝၤယွၤ ဒီးအဖိခွါ စီၤပၤယ့ၣ်ၡူး အတၢ်မၤလိာ်အဖီလာ်လီၤ.
တၢ်ဖးလံာ်စီဆှံ
(ယၤကိာ် ၂:၁၀-၂၆) အဂ့ၢ်ဒ်အံၤ, ဖဲဒၣ်ပှၤလၢအတိၢ်န့ၢ် တၢ်သိၣ်တၢ်သီခဲလၢာ်, ဒီးမၤကမၣ်တၢ် တထံၣ်ဧိၤတဂၤန့ၣ်, ကဲလၢပှၤဂ့ၤဘၣ်တၢ်လၢ တၢ်ခဲလၢာ်အဃိလီၤ. ၁၁ အဂ့ၢ်ဒ်အံၤ, ပှၤလၢအစံးဝဲ, အဲၣ်ဘၢမါအဲၣ်ဘၢဝၤတဂ့ၤန့ၣ်, စံးစ့ၢ်ကီးဝဲ, မၤသံပှၤကညီတဂ့ၤ, သတးဒီး, နမ့ၢ်တအဲၣ်ဘၢမါအဲၣ်ဘၢဝၤ ဘၣ်ဆၣ်ဒီး, နမ့ၢ်မၤသံပှၤကညီဒီး, နကဲထီၣ်ပှၤလုၣ်သ့ၣ်ခါပတာ် တၢ်သိၣ်တၢ်သီလီၤ. ၁၂ ကတိၤတၢ်ဒ်အံၤ, ဒီးမၤတၢ်ဒ်အံၤ, ဒ်ပှၤလၢအကဘၣ် တၢ်စံၣ်ညီၣ်အီၤလၢ တၢ်ထူၣ်ဖျဲး အတၢ်သိၣ်တၢ်သီအသိးန့ၣ်တက့ၢ်. ၁၃ အဂ့ၢ်ဒ်အံၤ, ပှၤလၢအတသးကညီၤဘၣ်တၢ်ဘၣ်န့ၣ်, တၢ်သးကညီၤတအိၣ်ဘၣ်ဒီး, ကဘၣ်တၢ်စံၣ်ညီၣ်လီၤ. ဒီးတၢ်သးကညီၤန့ၣ်, ပာ်ဒိၣ်ပာ်ထီအသးလၢ တၢ်စံၣ်ညီၣ်အဖီခိၣ်လီၤ. ၁၄ ယဒီပုၢ်ဝဲၢ်သ့ၣ်ဧၢ, ပှၤတဂၤဂၤမ့ၢ်စံးလၢ သါအိၣ်ဒီးတၢ်နာ်, ဒီးမ့ၢ်တအိၣ်ဘၣ်ဒီး တၢ်မၤဘၣ်ဒီး, မ့ၢ်အဘျုးမနုၤလဲၣ်. တၢ်နာ်န့ၣ် အုၣ်က့ၤခီၣ်က့ၤအီၤ ဘၣ်ကသ့ဧါ. ၁၅ ဒီးဒီပုၢ်ဝဲၢ်မုၣ်မ့ၢ်ဂ့ၤ ဒီပုၢ်ဝဲၢ်ခွါမ့ၢ်ဂ့ၤ, မ့ၢ်အိၣ်ဘ့ၣ်ဆ့, ဒီးအတၢ်အီၣ်တနံၤအဂီၢ် တနံၤအဂီၢ် မ့ၢ်တအိၣ်ဘၣ်ဒီး, ၁၆ ပှၤလၢသုကျါတဂၤ မ့ၢ်စံးဘၣ်အီၤ, က့ၤက့ၤမုာ်မုာ်တက့ၢ်, အိၣ်လၢၤပုးတြူး, ဒီးအီၣ်ဘျဲးအီၣ်တၢ်တက့ၢ်န့ၣ် ဘၣ်ဆၣ်ဒီး, သုမ့ၢ်တဟ့ၣ်ဘၣ်တၢ်လၢ အကြၢးဒီးအနီၢ်ခိဘၣ်ဒီး, မ့ၢ်အဘျုးမနုၤတမံၤလဲၣ်. ၁၇ ဒ်န့ၣ်အသိး တၢ်နာ်မ့ၢ်တအိၣ်ဘၣ်ဒီး တၢ်မၤဒီး, မ့ၢ်တၢ်သံလၢ အကစၢ်ဒၣ်ဝဲလီၤ. ၁၈ ဘၣ်ဆၣ်ဒီး ပှၤတဂၤဂၤကစံး, နဲဒၣ်အံၤ, နအိၣ်ဒီးတၢ်နာ်, ယဲဒၣ်ယအိၣ်ဒီး တၢ်မၤလီၤ. တၢ်မၤတၢ်တအိၣ်ဘၣ်ဒီး, ဒုးနဲၣ်ယၤလၢ နတၢ်နာ်တက့ၢ်. ဒီးယကဒုးနဲၣ်နၤ ယတၢ်နာ်လၢ ယမၤတၢ်အဃိလီၤ. ၁၉ နနာ်လၢ ယွၤအိၣ်တဂၤဃီလီၤ. နမၤတၢ်ဂ့ၤလီၤ. တၢ်နါတဖၣ် နာ်စ့ၢ်ကီးတၢ်, ဒီးကနိးကစုာ်လီၤ. ၂၀ ဘၣ်ဆၣ်ဒီး ပှၤတဂိာ်တသီၣ်ဘၣ်တၢ်တဂၤဧၢ, တၢ်မၤတဖၣ်တအိၣ်ဘၣ်ဒီး, တၢ်နာ်မ့ၢ်တၢ်သံန့ၣ်, တၢ်မိၣ်သ့ၣ်ညါနသး စ့ၢ်ကီးဧါ. ၂၁ ပပၢ်စီၤအၤဘြၤဟၣ် ပာ်ထီၣ်အဖိခွါ စီၤအံၤစဲးလၢ တၢ်လုၢ်လီၢ်အဖီခိၣ်ဒီး, တၢ်ပာ်တီပာ်လိၤအီၤလၢ တၢ်မၤတဖၣ်အဃိ, တမ့ၢ်ဘၣ်ဧါ. ၂၂ နထံၣ်လၢ တၢ်နာ်မၤဃုာ်ဒီး အတၢ်မၤတဖၣ်, ဒီးတၢ်နာ် လၢထီၣ်ပှဲၤထီၣ်လၢတၢ်မၤ, တမ့ၢ်ဘၣ်ဧါ. ၂၃ ဒီးလံာ်န့ၣ် လၢထီၣ်ပှဲၤထီၣ်လၢ အစံးဝဲဒၣ်, ဒီးစီၤအၤဘြၤဟၣ် နာ်ယွၤ, ဒီးတၢ်ပးကဲလၢ တၢ်တီတၢ်လိၤလၢအဂီၢ်, ဒီးတၢ်ကိးအီၤလၢ ယွၤအတံၤအသကိးလီၤ. ၂၄ မၤသးဒ်န့ၣ်ဒီး, သုထံၣ်လၢပှၤကညီ ဘၣ်တၢ်ပာ်တီပာ်လိၤအီၤလၢ တၢ်မၤတဖၣ်အဃိ, ဒီးတမ့ၢ်ဘၣ်ထဲ တၢ်နာ်အဃိဘၣ်. ၂၅ ဒီးဒ်န့ၣ်အသိး ဃဲသဲမုၣ်နီၢ်ရၤဃးတဂၤ တူၢ်လိာ်ကလူးတဖၣ်, ဒီးမၢအက့ၤက့ၤ ကျဲတဘိဒၣ်ဒီး, ဘၣ်စ့ၢ်ကီး တၢ်ပာ်တီပာ်လိၤအီၤလၢ တၢ်မၤတဖၣ်အဃိ, တမ့ၢ်ဘၣ်ဧါ. ၂၆ အဂ့ၢ်ဒ်အံၤ, ဒ်နီၢ်ခိတအိၣ်ဘၣ်ဒီး သးန့ၣ် မ့ၢ်တၢ်သံအသိးန့ၣ် တၢ်နာ်တအိၣ်ဘၣ်ဒီး တၢ်မၤတဖၣ် မ့ၢ်တၢ်သံစ့ၢ်ကီး ဒ်န့ၣ်အသိးလီၤ.