မၤလိန့ၢ်တၢ်လၢ ယ့ၣ်ၡူးအပုၢ်ခွါအအိၣ်

၁. စီၤယၤကိာ် ဒိၣ်ထီၣ်ဘၣ်လၢ ဟံၣ်ဖိဃီဖိဒ်လဲၣ်.

ယ့ၣ်ၡူးအပုၢ်ခွါ စီၤယၤကိာ်န့ၣ်​ ဒိၣ်ထီၣ်ဘၣ်လၢ ဟံၣ်ဖိဃီဖိလၢ အနီၢ်သးဆူၣ်.b အမိၢ်အပၢ် နီၢ်မၤရံဒီး စီၤယိၤသးန့ၣ်​ အဲၣ်ယဟိဝၤယွၤဒိၣ်မး. ဒီးအဝဲသ့ၣ်​ ဘူၣ်ထီၣ်ဘါထီၣ်ကစၢ်ယွၤ လၢကျဲလၢအဂ့ၤကတၢၢ် ဒီးစီၤယၤကိာ်အကၠီန့ၣ်​ ဖဲအဒိၣ်ထီၣ်အခါ ကဲထီၣ်ဝဲ မ့းၡံအၤအဃိ မ့ၢ်တၢ်ဆိၣ်ဂ့ၤလၢ စီၤယၤကိာ်အဂီၢ်. စီၤယၤကိာ် ဒိၣ်ထီၣ်လၢ ဟံၣ်ဖိဃီဖိတဒူၣ်အံၤအကျါအဃိ မ့ၢ်တၢ်ခွဲးတၢ်ယာ်ဖးဒိၣ်​ လၢအဂီၢ်လီၤ.

၂. စီၤယၤကိာ် ကထံၣ်ဘၣ်ဝဲ အကၠီအတၢ်ဂ့ၤတၢ်ဝါ လၢအလီၤပာ်ကဲ မနုၤတဖၣ်လဲၣ်.

^၂ စီၤယၤကိာ်န့ၣ်​ ကထံၣ်ဘၣ်ဝဲ အကၠီအတၢ်ဂ့ၤတၢ်ဝါ လၢအလီၤပာ်ကဲ အါမံၤ. (မးသဲ ၁၃:၅၅) အဒိ, ဖဲယ့ၣ်ၡူးအိၣ်​ ၁၂ နံၣ်အခါ အသ့ၣ်ညါဝဲ လံာ်စီဆှံအဆၢတဖၣ်ဂ့ၤမးအဃိ ပှၤသူၣ်က့သးပှၢ် လၢဝ့ၢ်ယရူၤၡလ့ၣ်အပူၤတဖၣ်န့ၣ်​ ကမၢကမၣ်ဘၣ်အသး. (လူၤကၣ်​ ၂:၄၆, ၄၇) ဘၣ်သ့ၣ်သ့ၣ်​ စီၤယၤကိာ်န့ၣ်​ ကမၤဘၣ်​ လဲးသမါအတၢ်မၤဒီးအကၠီ. အဃိ အဝဲကသ့ၣ်ညါထီၣ်ဘၣ်အကၠီအဂ့ၢ် ဂ့ၤဂ့ၤလီၤ. ဒီပုၢ်ဝဲၢ် န့သၢၤနီ(ရ်) တဲဝဲလၢ “ဖဲနမၤသကိးဘၣ်တၢ်ဒီးပှၤတဂၤအခါ နသ့ၣ်ညါထီၣ်ဘၣ်အဂ့ၢ် အါမး.”c အဃိ “ယ့ၣ်ၡူး ဒိၣ်ထီၣ်ဝဲဒီး အတၢ်ကူၣ်သ့စ့ၢ်ကီး အါထီၣ်ဝဲ” ဒ်လဲၣ်န့ၣ်​ စီၤယၤကိာ် ကထံၣ်ဘၣ်ဝဲလီၤ. (လူၤကၣ် ၂:၅၂) အဃိ ဘၣ်သ့ၣ်သ့ၣ်​ ပကဆိကမိၣ်ဘၣ်လၢ စီၤယၤကိာ်န့ၣ်​ ကပၣ်ဃုာ်လၢ ယ့ၣ်ၡူးအပျဲၢ်အဘီၣ်​ လၢအဆိကတၢၢ်တဖၣ်အကျါ. ဘၣ်ဆၣ်​ နီၢ်ကီၢ်န့ၣ်​ အတမ့ၢ် ဒ်န့ၣ်ဘၣ်.

၃. ဖဲယ့ၣ်ၡူး စးထီၣ်အတၢ်စံၣ်တဲၤတဲလီၤတၢ်မၤအခါ စီၤယၤကိာ် တူၢ်လိာ်အီၤဧါ.

^၃ ဖဲယ့ၣ်ၡူး စံၣ်တဲၤတဲလီၤတၢ်လၢ ဟီၣ်ခိၣ်ချၢ အဆၢကတီၢ်န့ၣ်​ စီၤယၤကိာ် တကဲထီၣ်​ ယ့ၣ်ၡူးအပျဲၢ်အဘီၣ်ဘၣ်. (ယိၤဟၣ်​ ၇:၃-၅) ဒီးယ့ၣ်ၡူးအဘူးအတံၢ်လၢ အတဲအီၤလၢ “အပျုၢ်လံ” အကျါန့ၣ်​ ဘၣ်သ့ၣ်သ့ၣ်​ စီၤယၤကိာ် ကပၣ်ဃုာ်စ့ၢ်ကီး. (မၢ်ကူး ၃:၂၁) ဖဲယ့ၣ်ၡူး ဘၣ်တၢ်မၤသံအီၤလၢသ့ၣ်တၢၣ်လိၤ အဆၢကတီၢ်န့ၣ်​ လံာ်စီဆှံ တပာ်ဖျါထီၣ်ဝဲလၢ စီၤယၤကိာ်အိၣ်လၢ အမိၢ်နီၢ်မၤရံ အကပၤဘၣ်.—ယိၤဟၣ်​ ၁၉:၂၅-၂၇.

၄. ပကတဲသကိး တၢ်ဂ့ၢ်မနုၤလဲၣ်.

^၄ လၢခံစီၤယၤကိာ်န့ၣ်​ စူၢ်က့ၤနာ်က့ၤယ့ၣ်ၡူး ဒီးကဲထီၣ်ဝဲ ပှၤတဂၤလၢ ပှၤပာ်ကဲအီၤ လၢခရံာ်ဖိအတၢ်အိၣ်ဖှိၣ်အပူၤလီၤ. လၢတၢ်မၤလိအံၤအပူၤ ပကတဲသကိး တၢ်ဂ့ၢ်ခံထံၣ်လၢ ပမၤလိန့ၢ်လၢ စီၤယၤကိာ်အအိၣ်သ့. (၁) ဘၣ်မနုၤအဃိ ပကဘၣ်​ ဆဲးဆီၣ်လီၤသးလဲၣ်​ ဒီး (၂) ပကဲထီၣ်​ ပှၤသိၣ်လိတၢ်လၢအဂ့ၤတဂၤ ကသ့ဒ်လဲၣ်.

ဆဲးအိၣ်ဒီးတၢ်ဆီၣ်လီၤသး ဒ်သိးဒီးစီၤယၤကိာ်

၅. ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ လၢတၢ်သံ ဒီးလီၣ်ဖျါထီၣ်အသးလၢ စီၤယၤကိာ်အမဲာ်ညါ ဝံၤအလီၢ်ခံ စီၤယၤကိာ် မၤဝဲဒ်လဲၣ်.

^၅ စီၤယၤကိာ် ကဲထီၣ်ယ့ၣ်ၡူး အပျဲၢ်အဘီၣ်လၢ အအိၣ်ဒီးတၢ်သးတီ လၢအခါဖဲလဲၣ်. ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ လၢတၢ်သံ ဝံၤအလီၢ်ခံ “အဝဲလီၣ်ဖျါထီၣ်​ အသးလၢ စီၤယၤကိာ် အမဲာ်ညါ ဝံၤဒီး လၢတၢ်မၢဖိခဲလၢာ် အမဲာ်ညါလီၤ.” (၁ ကရံၣ်သူး ၁၅:၇) ဖဲစီၤယၤကိာ် ထံၣ်လိာ်သးဒီးယ့ၣ်ၡူး တဘျီန့ၣ်ဝံၤအလီၢ်ခံ အကဲထီၣ်ယ့ၣ်ၡူး အပျဲၢ်အဘီၣ်လီၤ. ဖဲတၢ်မၢဖိတဖၣ်​ အိၣ်ခိးတၢ်လၢ ဒၢးတဖျၢၣ်လၢ ဟံၣ်ဖီခိၣ်တတီၤလၢ ဝ့ၢ်ယရူၤၡလ့ၣ်အပူၤ ဒ်သိး ကဒိးန့ၢ်ဘၣ်သးစီဆှံအခါ စီၤယၤကိာ် ပၣ်ဃုာ်လၢ ပှၤကျါစ့ၢ်ကီး. (မၤတၢ် ၁:၁၃, ၁၄) လၢခံန့ၣ်​ စီၤယၤကိာ် ကဲထီၣ်ဝဲ ပှၤပၢဆှၢတၢ်ကမံးတံာ် တဂၤလၢ တၢ်မၢဖိအစိၤလီၤ. (မၤတၢ် ၁၅:၆, ၁၃-၂၂; ကလၤတံ ၂:၉) ဒီးတချုးဖဲ ခ.န ၆၂ ဃၣ်ဃၣ်န့ၣ်​ သးစီဆှံ ထိၣ်ဟူးထိၣ်ဂဲၤထီၣ်​ စီၤယၤကိာ်လၢ ကကွဲးဝဲ လံာ်ပရၢတဘ့ၣ်ဆူ ခရံာ်ဖိလၢ အဘၣ်တၢ်ဒိးဖှူအီၤတဖၣ်အအိၣ်. ပမ့ၢ်အိၣ်ဒီး တၢ်မုၢ်လၢ်လၢ ပကအိၣ်မူဘၣ်လၢ မူခိၣ်မ့ၢ်ဂ့ၤ, ဟီၣ်ခိၣ်မ့ၢ်ဂ့ၤ ပဒိးန့ၢ်ဘၣ်အဘျုးလၢ လံာ်ပရၢတဘ့ၣ်အံၤသ့. (ယၤကိာ် ၁:၁) ပှၤလၢအကွဲး တၢ်စံၣ်စိၤတဲစိၤ ကၠိၤစံဖၢၤ(စ်) တဲဝဲလၢ ပှၤယူဒၤဖိ အပှၤလုၢ်တၢ်ဒိၣ်​ စီၤအနၤနံ လၢအမ့ၢ် စီၤအၣ်နၣ်​ အဖိခွါန့ၣ်​ ဟ့ၣ်လီၤတၢ်ကလုၢ်လၢ ပှၤကမၤသံ စီၤယၤကိာ်. စီၤယၤကိာ်န့ၣ်​ အတီဒီး ယဟိဝၤယွၤ တုၤလၢအသံတစုလီၤ.

၆. စီၤယၤကိာ်န့ၣ်​ လီၤဆီဒီး တၢ်ဘူၣ်တၢ်ဘါခိၣ်နၢ်တဖၣ်​ လၢအစိၤန့ၣ်​ ဒ်လဲၣ်.

^၆ စီၤယၤကိာ် အိၣ်ဒီးတၢ်ဆီၣ်လီၤသး. ဘၣ်မနုၤအဃိ ပတဲလၢစီၤယၤကိာ်န့ၣ်​ အိၣ်ဒီးတၢ်ဆီၣ်လီၤသးလဲၣ်. ပကဆိကမိၣ်ကွၢ် ဘၣ်ဃးဒီး စီၤယၤကိာ် အတၢ်ပာ်သူၣ်ပာ်သး လၢယ့ၣ်ၡူးအဖီခိၣ်န့ၣ်​ လီၤဆီလိာ်အသးဒီး တၢ်ဘူၣ်တၢ်ဘါခိၣ်နၢ်အါဂၤ အတၢ်ပာ်သူၣ်ပာ်သးဒ်လဲၣ်အဂ့ၢ်. ဖဲစီၤယၤကိာ် ထံၣ်ဘၣ်ဝဲ တၢ်အုၣ်သး လီၤတံၢ်လီၤဆဲးလၢ ယ့ၣ်ၡူးမ့ၢ် ကစၢ်ယွၤ အဖိခွါအခါ အဝဲတူၢ်လိာ်ဝဲလၢ တၢ်ဆီၣ်လီၤသးအပူၤ. ဘၣ်ဆၣ်​ မ့မ့ၢ် ပှၤလုၢ်တၢ်ဒိၣ်အခိၣ်တဖၣ်​ လၢယရူၤၡလ့ၣ်န့ၣ်​ တမ့ၢ်ဒ်န့ၣ်ဘၣ်. အဒိ, အဝဲသ့ၣ်​ သ့ၣ်ညါဝဲ သပှၢ်ကတၢၢ်လၢ ယ့ၣ်ၡူးန့ၣ်​ မၤဂဲၤဆၢထၢၣ်သမူထီၣ်က့ၤ စီၤလါစရူး လၢတၢ်သံ. ဘၣ်ဆၣ်​ လၢအဝဲသ့ၣ်​ ကတူၢ်လိာ်လၢ ယဟိဝၤယွၤ ဆှၢလီၤယ့ၣ်ၡူးအလီၢ် အဝဲသ့ၣ်​ ဂုာ်ကျဲးစၢး ဃုမၤသံ ယ့ၣ်ၡူး ဒီးစီၤလါစရူး. (ယိၤဟၣ်​ ၁၁:၅၃; ၁၂:၉-၁၁) လၢခံဖဲယ့ၣ်ၡူး ဂဲၤဆၢထၢၣ်သမူထီၣ်က့ၤ လၢတၢ်သံအခါ အဝဲသ့ၣ်​ ဂုာ်ကျဲးစၢး ပာ်ခူသူၣ်ဝဲ တၢ်မ့ၢ်တၢ်တီ တခါအံၤ. (မးသဲ ၂၈:၁၁-၁၅) မ့ၢ်လၢ တၢ်ဘူၣ်တၢ်ဘါခိၣ်နၢ်တဖၣ်​ ပာ်ထီၣ်ထီသးအဃိ အဝဲသ့ၣ်​ တတူၢ်လိာ်ဝဲ မ့းၡံအၤဘၣ်.

၇. ဘၣ်မနုၤအဃိ ပတဘၣ်ပာ်ထီၣ်ထီသးဘၣ်လဲၣ်.

^၇ တၢ်မၤလိလၢပဂီၢ်– ပတဘၣ်​ ပာ်ထီၣ်ထီသးဘၣ်​ ဒီးပကဘၣ်သးအိၣ်တူၢ်လိာ် ယဟိဝၤယွၤ အတၢ်သိၣ်လိ. တၢ်ဆူးတၢ်ဆါတနီၤန့ၣ်​ အမၤဘၣ်ဒိ ပှၤသးဖျၢၣ်အသွံၣ်ကျိၤတဖၣ်အဃိ ပှၤသးဖျၢၣ်န့ၣ်​ တမၤတၢ် ဂ့ၤဂ့ၤလၢၤဘၣ်. ဒ်န့ၣ်အသိး ပမ့ၢ်အိၣ်ဒီး တၢ်ပာ်ထီၣ်ထီသးန့ၣ်​ အကမၤတံာ်တာ်ပသးလၢ ပကဒိကနၣ်​ ယဟိဝၤယွၤလီၤ. ပှၤဖၤရံၤၡဲသ့ၣ်တဖၣ်န့ၣ်​ ပာ်ထီၣ်ထီအသးဒိၣ်မးအဃိ အဝဲသ့ၣ်​ ထံၣ်တၢ်အုၣ်သး လီၤတံၢ်လီၤဆဲးလၢ ယ့ၣ်ၡူးအိၣ်ဒီး ကစၢ်ယွၤ အသးစီဆှံ ဒီးယ့ၣ်ၡူးမ့ၢ် ယွၤအဖိခွါသနာ်က့ အဝဲသ့ၣ်​ တတူၢ်လိာ်ဝဲဘၣ်. (ယိၤဟၣ် ၁၂:၃၇-၄၀) ခီဖျိလၢ တၢ်ပာ်ထီၣ်ထီသးအဃိ အဝဲသ့ၣ်​ ဘၣ်တူၢ်ၡူကွံာ် တၢ်ခွဲးတၢ်ယာ်လၢ ကန့ၢ်ဘၣ်​ တၢ်မူအထူအယိာ်. အဃိ တၢ်ပာ်ထီၣ်ထီသးန့ၣ်​ လီၤဘၣ်ယိၣ်ဒိၣ်မး. (မးသဲ ၂၃:၁၃, ၃၃) အဃိ အရ့ဒိၣ်ဒိၣ်မးလၢ ပကဘၣ်ပျဲ ကစၢ်ယွၤ အကလုၢ်ကထါ ဒီးအသးစီဆှံ ဘှီဘၣ်ထီၣ်က့ၤ ပတၢ်ပာ်သူၣ်ပာ်သး, ပတၢ်ဆိကမိၣ်​ ဒီးပတၢ်ဆၢတဲာ်တဖၣ်လီၤ. (ယၤကိာ် ၃:၁၇) စီၤယၤကိာ်အိၣ်ဒီး တၢ်ဆီၣ်လီၤသးအဃိ အဝဲတူၢ်လိာ် ယဟိဝၤယွၤ အတၢ်သိၣ်လိတဖၣ်. ဒီးမ့ၢ်လၢအဝဲအိၣ်ဒီး တၢ်ဆီၣ်လီၤသးအဃိ လၢခံန့ၣ်​ အကဲထီၣ်ဝဲ ပှၤသိၣ်လိတၢ်လၢ အအိၣ်ဒီးတၢ်သ့တၢ်ဘၣ်တဂၤ. ပကဆဲးမၤလိသကိး တၢ်ဂ့ၢ်အံၤ.

ဂုာ်ကျဲးစၢးကဲထီၣ်​ ပှၤသိၣ်လိတၢ်လၢအဂ့ၤ ဒ်သိးဒီးစီၤယၤကိာ်

၈. တၢ်မနုၤကမၤစၢၤပှၤ ဒ်သိးပကကဲထီၣ်​ ပှၤသိၣ်လိတၢ်လၢအဂ့ၤတဂၤလဲၣ်.

^၈ စီၤယၤကိာ် တမၤလိဘၣ်ဝဲ ဟီၣ်ခိၣ်အတၢ်ကူၣ်ဘၣ်ကူၣ်သ့ အါအါဘၣ်. အဃိ တၢ်ဘူၣ်တၢ်ဘါခိၣ်နၢ်တဖၣ်​ လၢစီၤယၤကိာ်အစိၤန့ၣ်​ ကထံၣ်အီၤဒ် အထံၣ်ဝဲ တၢ်မၢဖိပ့းတရူး ဒီးယိၤဟၣ်အသိး. အဝဲသ့ၣ်​ ထံၣ်ဝဲ တၢ်မၢဖိတဖၣ်အံၤဒ် ပှၤလၢအ “တမ့ၢ် ပှၤကူၣ်ဘၣ်ကူၣ်သ့ဘၣ်, မ့ၢ်ဒၣ်​ ပှၤမုၢ်ဆ့ၣ်မုၢ်ဂီၤဖိ” လီၤ. (မၤတၢ် ၄:၁၃) ဘၣ်ဆၣ်​ ပမ့ၢ်ဖးကွၢ် လံာ်လၢစီၤယၤကိာ် ကွဲးဝဲန့ၣ်​ ပသ့ၣ်ညါဘၣ်လၢ စီၤယၤကိာ်န့ၣ်​ မ့ၢ်ဝဲပှၤသိၣ်လိတၢ် လၢအဂ့ၤတဂၤ. ဒ်စီၤယၤကိာ်အသိး ဘၣ်သ့ၣ်သ့ၣ်​ ပတမၤလိဘၣ်​ ဟီၣ်ခိၣ်အတၢ်ကူၣ်ဘၣ်ကူၣ်သ့ အါအါဘၣ်. ဘၣ်ဆၣ်​ ခီဖျိလၢ ယဟိဝၤယွၤ အသးစီဆှံ ဒီးတၢ်ကရၢကရိ အတၢ်သိၣ်လိအဃိ ပကဲထီၣ်​ ပှၤသိၣ်လိတၢ်လၢအဂ့ၤသ့. ခဲအံၤ ပကတဲသကိး စီၤယၤကိာ် သိၣ်လိတၢ်ဒ်လဲၣ်​ ဒီးပန့ၢ်ဘၣ်​ တၢ်မၤလိလၢ အအိၣ်ဒ်လဲၣ်.

၉. စီၤယၤကိာ် သိၣ်လိတၢ်ဒ်လဲၣ်.

^၉ စီၤယၤကိာ် တသူဝဲ တၢ်ကတိၤလၢအပတီၢ်ထီဘၣ်​ ဒီးၡဲပၠးဝဲ ယိယိဖိ. အဃိ ပှၤလၢအဒိကနၣ်အီၤတဖၣ်န့ၣ်​ သ့ၣ်ညါဝဲလၢ အကဘၣ်မၤတၢ်မနုၤလဲၣ်​ ဒီးအကဘၣ်မၤဝဲ ဒ်လဲၣ်လီၤ. အဒိ, စီၤယၤကိာ်သိၣ်လိဝဲ ခရံာ်ဖိတဖၣ်လၢ အဝဲသ့ၣ်​ မ့ၢ်ထံၣ်ဘၣ်​ တၢ်တတီတလိၤသနာ်က့ ကဘၣ်ပာ်အသးမုာ်မုာ်လီၤ. အဝဲကွဲးဝဲလၢ “ပှၤလၢ အတူၢ်ဘၣ်ခီၣ်ဘၣ်တ့ၢ်တၢ်တဖၣ်န့ၣ်​ ပပာ်ပနီၣ်​ အဝဲသ့ၣ်လၢ ပှၤလၢအသးခုလီၤ. သုနၢ်ဟူဘၣ်​ စီၤယိၤဘး အတၢ်တူၢ်န့ၢ်ခီၣ်ကဲအဂ့ၢ် ဒီးသုသ့ၣ်ညါလၢ အလီၢ်ခံကတၢၢ်န့ၣ်​ ယဟိဝၤယွၤ မၤန့ၢ်တၢ်မနုၤလၢ အဂီၢ်လဲၣ်န့ၣ်လီၤ. အဃိ သုထံၣ်ဘၣ်လၢ ယဟိဝၤယွၤန့ၣ်​ ပှဲၤဝဲဒီးတၢ်အဲၣ်​ တၢ်ကဟုကယာ် ဒီးတၢ်သးကညီၤန့ၣ်လီၤ.” (ယၤကိာ် ၅:၁၁) ပထံၣ်ဘၣ်လၢ ဖဲစီၤယၤကိာ် သိၣ်လိတၢ်အခါ ဟံးန့ၢ်ဝဲ တၢ်ဂ့ၢ်တၢ်ကျိၤ လၢလံာ်စီဆှံအပူၤ. အသူဝဲ ကစၢ်ယွၤအကလုၢ်ကထါ ဒ်သိး ပှၤဒိကနၣ်အီၤတဖၣ်​ ကထံၣ်ဝဲလၢ ယဟိဝၤယွၤန့ၣ်​ အဆိၣ်ဂ့ၤဝဲဒၣ်​ ပှၤလၢအတီဒီးအီၤတဖၣ်​ ဒ်သိးဒီး စီၤယိၤဘး. စီၤယၤကိာ်သူဝဲ တၢ်ကတိၤယိယိဖိ ဒီးအၡဲပၠးဝဲ ယိယိဖိ ဒ်သိးပှၤထိၣ်ထံတယာ်ကွၢ်တၢ်ဂ့ၢ် ကဘၣ်အဂီၢ်. အဃိ ပထံၣ်ဘၣ်လၢ အဝဲသိၣ်လိတၢ် ဒ်သိးပှၤကသးစၢၢ်ဆၢလၢ ယဟိဝၤယွၤ ဒီးတမ့ၢ်လၢ ပှၤကသးစၢၢ်ဆၢအီၤ အဂီၢ်ဘၣ်.

၁၀. ဖဲပသိၣ်လိတၢ်အခါ ပကွၢ်လိမၤဒိး စီၤယၤကိာ် ကသ့ဒ်လဲၣ်.

^၁၀ တၢ်မၤလိလၢပဂီၢ်– သိၣ်လိတၢ် ယိယိဖိ ဒီးဒိးသန့ၤထီၣ်အီၤလၢ ကစၢ်ယွၤ အကလုၢ်ကထါ. ဖဲပသိၣ်လိတၢ်အခါ ပတၢ်တိာ်ပာ်န့ၣ်​ တဘၣ်မ့ၢ်ဒ်သိး ပှၤကဆိကမိၣ်ဒိၣ်ပှၤလၢ ပသ့ၣ်ညါတၢ်ထဲလဲၣ်န့ၣ်ဘၣ်, ပကဘၣ်သိၣ်လိတၢ် ဒ်သိးပှၤကသးစၢၢ်ဆၢလၢ ယဟိဝၤယွၤ သ့ၣ်ညါတၢ်ထဲလဲၣ်​ ဒီးအသူၣ်အိၣ်သးအိၣ်ပှၤ ထဲလဲၣ်လီၤ. (ရိမ့ၤ ၁၁:၃၃) ပမၤဒ်န့ၣ်သ့ ခီဖျိ တၢ်လၢပတဲအီၤတဖၣ်န့ၣ်​ ကဘၣ်ဒိးသန့ၤထီၣ်အသး လၢလံာ်စီဆှံထီဘိ. အဒိ, ဖဲပပှၤမၤလိ လံာ်စီဆှံဖိ ကဘၣ်မၤတၢ်ဆၢတဲာ်အခါ ပကတဲအီၤလၢ ပမ့ၢ်အိၣ်လၢ အဝဲသ့ၣ်အလီၢ်န့ၣ်​ ပကမၤဒ်အံၤဒ်နုၤအလီၢ် ပကဘၣ်မၤစၢၤ အဝဲသ့ၣ်​ ဒ်သိး အဝဲသ့ၣ်​ ကဆိကမိၣ်ထံဝဲ ပှၤဒိပှၤတဲာ် လၢလံာ်စီဆှံအပူၤ ဒီးကနၢ်ပၢၢ်ထီၣ်ဝဲ ယဟိဝၤယွၤ အတၢ်ထံၣ်​ ဒီးအတၢ်တူၢ်ဘၣ်အဂီၢ်လီၤ. ပမ့ၢ်မၤစၢၤ အဝဲသ့ၣ်​ ဒ်န့ၣ်န့ၣ်​ အဝဲသ့ၣ်​ မၤထွဲဝဲ တၢ်လၢအမၤလိဘၣ်ဝဲတဖၣ်​ ခီဖျိလၢ အအဲၣ်ဒိးမၤ တၢ်ဘၣ်ယဟိဝၤယွၤ အသးအဃိလီၤ, တမ့ၢ်လၢ အအဲၣ်ဒိးမၤ ပတၢ်ဘၣ်သးအဃိဘၣ်.

၁၁. လၢစီၤယၤကိာ်အစိၤန့ၣ်​ ခရံာ်ဖိတဖၣ်​ အိၣ်ဒီးတၢ်ကီတၢ်ခဲမနုၤလဲၣ်​ ဒီးစီၤယၤကိာ် ဟ့ၣ်ကူၣ်အဝဲသ့ၣ်​ ဒ်လဲၣ်. (ယၤကိာ် ၅:၁၃-၁၅)

^၁၁ စီၤယၤကိာ် နၢ်ပၢၢ်ဝဲ ဒီပုၢ်ဝဲၢ်မုၣ်ခွါတဖၣ်​ အတၢ်ကီတၢ်ခဲ. လၢစီၤယၤကိာ် အလံာ်ပရၢပူၤန့ၣ်​ ပထံၣ်ဘၣ်လၢ စီၤယၤကိာ် သ့ၣ်ညါဝဲ ဒီပုၢ်ဝဲၢ်မုၣ်ခွါတဖၣ်​ အတၢ်ကီတၢ်ခဲ. ဒီးဒီပုၢ်ဝဲၢ်မုၣ်ခွါတဖၣ်​ ကဘၣ်လဲၤခီဖျိ အတၢ်ကီတၢ်ခဲတဖၣ်​ ဒ်လဲၣ်န့ၣ်​ စီၤယၤကိာ် ဟ့ၣ်ကူၣ်အဝဲသ့ၣ်ပျီပျီ. အဒိ, ခရံာ်ဖိတနီၤန့ၣ်​ တမၤထွဲဝဲ တၢ်ဟ့ၣ်ကူၣ်​ တဘျီဃီဘၣ်. (ယၤကိာ် ၁:၂၂) ဒီးအဂၤတနီၤန့ၣ်​ ကွၢ်မဲာ်ဝဲ ပှၤကဲဒိၣ်တဖၣ်. (ယၤကိာ် ၂:၁-၃) ဒီးမ့မ့ၢ်လၢအဂၤတနီၤန့ၣ်​ ပၢၤအထးခိၣ်တန့ၢ်ဘၣ်. (ယၤကိာ် ၃:၈-၁၀) ခရံာ်ဖိတဖၣ်အံၤန့ၣ်​ အဝဲသ့ၣ်​ အိၣ်ဒီးတၢ်ကီတၢ်ခဲဖးဒိၣ်​ ဒ်အံၤသနာ်က့ စီၤယၤကိာ် တပျၢ်စုပျၢ်ခီၣ်လၢ အဝဲသ့ၣ်​ အဖီခိၣ်ဘၣ်. စီၤယၤကိာ် ဟ့ၣ်ကူၣ်အဝဲသ့ၣ်လိၤလိၤ လၢတၢ်အဲၣ်တၢ်ကွံအပူၤ. ဒီးပှၤလၢအနီၢ်သးဂံၢ်ဘါ လီၤစၢ်တဖၣ်န့ၣ်​ စီၤယၤကိာ် ဟ့ၣ်ကူၣ်အဝဲသ့ၣ်​ လၢကလဲၤဃ့တၢ်မၤစၢၤ လၢတၢ်အိၣ်ဖှိၣ်သးပှၢ်တဖၣ်​ အအိၣ်လီၤ.—ဖး ယၤကိာ် ၅:၁၃-၁၅.

၁၂. ဖဲပမၤစၢၤ ပပှၤမၤလိလံာ်စီဆှံဖိအခါ ပဆဲးအိၣ်ဒီး တၢ်ထံၣ်လၢအဂ့ၤ ကသ့ဒ်လဲၣ်.

^၁၂ တၢ်မၤလိလၢပဂီၢ်– ပကဘၣ်နၢ်ပၢၢ်ပှၤဂၤ အတၢ်ကီတၢ်ခဲ ဒီးအိၣ်ဒီးတၢ်ထံၣ်လၢအဂ့ၤ. ပပှၤမၤလိလံာ်စီဆှံဖိအါဂၤန့ၣ်​ ကမၤထွဲဝဲ တၢ်လၢအမၤလိဘၣ်ဝဲအဂီၢ် ဘၣ်သ့ၣ်သ့ၣ်​ တညီလၢအဝဲသ့ၣ်အဂီၢ်ဘၣ်. (ယၤကိာ် ၄:၁-၄) ဘၣ်သ့ၣ်သ့ၣ်​ အဝဲသ့ၣ်​ ကပတုာ်ကွံာ် အလုၢ်လၢ်လၢအတဂ့ၤဘၣ်​ ဒီးကအိၣ်ဒီး ခရံာ်ဖိ အတၢ်ဂ့ၤတၢ်ဝါအဂီၢ် အဝဲသ့ၣ်​ ကလိၣ်ဘၣ်​ တၢ်ဆၢကတီၢ်. အဃိ ပကွၢ်လိမၤဒိး စီၤယၤကိာ်သ့ခီဖျိ တၢ်လၢပပှၤမၤလိလံာ်စီဆှံဖိတဖၣ်​ ကဘၣ်မၤဂ့ၤထီၣ်ဝဲန့ၣ်​ ပတဲဘၣ်​ အဝဲသ့ၣ်ပျီပျီ. ဒီးပကဘၣ်​ ဆဲးအိၣ်ဒီး တၢ်ထံၣ်လၢအဂ့ၤ ဒီးနာ်လၢ ယဟိဝၤယွၤ ကမူၤပှၤလၢအဆီၣ်လီၤသး လၢအအိၣ်​ ဒီးကဟ့ၣ်​ အဝဲသ့ၣ်​ တၢ်ဂံၢ်တၢ်ဘါ ဒ်သိး အဝဲသ့ၣ်​ ကဆီတလဲ အတၢ်အိၣ်မူအဂီၢ်လီၤ.—ယၤကိာ် ၄:၁၀.

၁၃. ဒ် ယၤကိာ် ၃:၂ ပာ်ဖျါထီၣ်ဝဲအသိး စီၤယၤကိာ် ထံၣ်လီၤအသးဒ်လဲၣ်.

^၁၃ စီၤယၤကိာ် အိၣ်ဒီးတၢ်ထံၣ်လၢအကြၢးအဘၣ်​ လၢအနီၢ်ကစၢ် အဖီခိၣ်. စီၤယၤကိာ်န့ၣ်​ ခီဖျိလၢအမ့ၢ် ယ့ၣ်ၡူးအဒီပုၢ်ဝဲၢ် ဒီးအအိၣ်ဒီးမူဒါလီၤဆီအဃိ အတဆိကမိၣ်လီၤအသးလၢ အမ့ၢ်ပှၤလၢအရ့ဒိၣ်န့ၢ်ဒံး ဒီပုၢ်ဝဲၢ်မုၣ်ခွါအဂၤတဖၣ်ဘၣ်. အဝဲကိးဒီပုၢ်ဝဲၢ်မုၣ်ခွါတဖၣ်လၢ “ယဒီပုၢ်ဝဲၢ်သးဘိ” လီၤ. (ယၤကိာ် ၁:၁၆, ၁၉; ၂:၅) အတဂုာ်ကျဲးစၢးဝဲ ဒ်သိးပှၤဂၤကထံၣ်အီၤလၢ အမ့ၢ်ပှၤလၢပှၤပှဲၤဘၣ်. လၢတၢ်န့ၣ်အလီၢ် အတဲဝဲလၢ “ပဝဲခဲလၢာ် ပမၤကမၣ်တၢ်အါဘျီလီၤ.”—ဖး ယၤကိာ် ၃:၂.

၁၄. ဘၣ်မနုၤအဃိ ပကဘၣ်သးအိၣ်​ အၢၣ်လီၤ ပတၢ်ဂံၢ်စၢ်ဘါစၢ်လဲၣ်.

^၁၄ တၢ်မၤလိလၢပဂီၢ်– ပဝဲခဲလၢာ်န့ၣ်​ ပမ့ၢ်ပှၤတၢ်ဒဲးဘးဖိ. အဃိ ပတဘၣ်ဆိကမိၣ်လၢ ပမ့ၢ်ပှၤလၢအရ့ဒိၣ်န့ၢ်ဒံး ပပှၤမၤလိလံာ်စီဆှံဖိတဖၣ်​ လၢကျဲတဘိဘိဘၣ်. ပမ့ၢ် ဂုာ်ကျဲးစၢး ဒ်သိး အဝဲသ့ၣ်​ ကထံၣ်ဝဲလၢ ပတမၤကမၣ်တၢ်နီတဘျီဘၣ်န့ၣ်​ အဝဲကဆိကမိၣ်ဝဲလၢ အဒိကနၣ်​ ကစၢ်ယွၤအကလုၢ် လၢလၢပှဲၤပှဲၤ တသ့နီတဘျီဘၣ်​ ဒီးအသးကဟးဂီၤလီၤ. အဃိ ပမ့ၢ်တဲဘၣ်​ ပပှၤမၤလိလံာ်စီဆှံဖိ တီတီလိၤလိၤလၢ ပဝဲစ့ၢ်ကီး ပကမၤထွဲ လံာ်စီဆှံ အတၢ်ဟံးစုနဲၣ်ကျဲအဂီၢ် တညီလၢပဂီၢ်ထီဘိဘၣ်​ ဒီးယဟိဝၤယွၤ မၤစၢၤပှၤ လၢပကဆီတလဲပသး ဒ်လဲၣ်န့ၣ်​ အဝဲကသ့ၣ်ညါထီၣ်ဝဲလၢ အမၤယဟိဝၤယွၤ အတၢ်ဘၣ်သးသ့လီၤ.

၁၅. စီၤယၤကိာ်သူဝဲ တၢ်အဒိဒ်လဲၣ်. (ယၤကိာ် ၃:၂-၆, ၁၀-၁၂)

^၁၅ စီၤယၤကိာ် သူဝဲတၢ်အဒိ လၢအထုးန့ၢ်ပှၤသး. ဖဲစီၤယၤကိာ် သိၣ်လိတၢ်အခါ သးစီဆှံမၤစၢၤအီၤ. တကးဒံးဘၣ်​ ဒ်သိး အသိၣ်လိတၢ်ကသ့အဂီၢ် လီၤဂာ်လၢ အမၤလိန့ၢ်တၢ်အါမးလၢ အကၠီအဒိအတဲာ် လၢဘၣ်ဃးဒီး တၢ်ဟ့ၣ်တၢ်အဒိ. တၢ်အဒိလၢ စီၤယၤကိာ်သူဝဲလၢ အလံာ်ပရၢပူၤန့ၣ်​ ပှၤနၢ်ပၢၢ်ဘၣ်အီၤညီ ဒီးပှၤန့ၢ်ဘၣ်​ တၢ်မၤလိသ့ဝဲဂ့ၤဂ့ၤလီၤ.—ဖး ယၤကိာ် ၃:၂-၆, ၁၀-၁၂.

၁၆. ဘၣ်မနုၤအဃိ ပကဘၣ်သူတၢ်အဒိလၢ အကဲဘျုးလဲၣ်.

^၁၆ တၢ်မၤလိလၢပဂီၢ်– သူတၢ်အဒိလၢ အကဲဘျုးတဖၣ်. နမ့ၢ်သူ တၢ်အဒိလၢ အကြၢးအဘၣ်န့ၣ်​ လီၤဂာ်ဒ် နမၤစၢၤ ပှၤဒိကနၣ်တၢ်ဖိ ဒ်သိး အဝဲသ့ၣ်​ ထံၣ်တမှံကွၢ်တၢ် ကသ့အဂီၢ်လီၤ. အဃိ ကမၤစၢၤအဝဲသ့ၣ်ဒ်သိး အဝဲသ့ၣ်​ တိၢ်နီၣ်ဝဲ လံာ်စီဆှံ တၢ်မ့ၢ်တၢ်တီလၢ အရ့ဒိၣ်တဖၣ်​ ကန့ၢ်အဂီၢ်လီၤ. ယ့ၣ်ၡူးမ့ၢ် ပှၤအဖၠဲးကတၢၢ်တဂၤလၢ အသူဝဲ တၢ်အဒိ ဒီးအပုၢ်စီၤယၤကိာ် ကွၢ်လိမၤဒိးအီၤလီၤ. ခဲအံၤ ပကတဲသကိး စီၤယၤကိာ် ဟ့ၣ်တၢ်အဒိတခါ ဒီးဘၣ်မနုၤအဃိ တၢ်အဒိတခါအံၤန့ၣ်​ ကဲဘျုးလဲၣ်.

၁၇. တၢ်အဒိလၢ ယၤကိာ် ၁:၂၂-၂၅ န့ၣ်ဘၣ်မနုၤအဃိ ကဲဘျုးဝဲ ဒိၣ်မးလဲၣ်.

^၁၇ ဖး ယၤကိာ် ၁:၂၂-၂၅. စီၤယၤကိာ် ဟ့ၣ်တၢ်အဒိ ဘၣ်ဃးဒီး မဲာ်ထံကလၤန့ၣ်​ ကဲဘျုးဝဲလၢ ကျဲအဘိအါမး. ဘၣ်ဆၣ်​ ဖဲအံၤန့ၣ်​ စီၤယၤကိာ်အဲၣ်ဒိးတဲဝဲ လီၤဆီဒၣ်တၢ် ဘၣ်ဃးဒီး ဒ်သိးပကဒိးန့ၢ်ဘၣ်အဘျုးလၢ လံာ်စီဆှံအဂီၢ် ပကဘၣ်​ ဖးလံာ်စီဆှံ တကးဒံးဘၣ်​ ပကဘၣ်မၤထွဲ တၢ်လၢပဖးဘၣ်အီၤတဖၣ်လီၤ. စီၤယၤကိာ် ဟ့ၣ်တၢ်အဒိတခါအံၤန့ၣ်​ မၤစၢၤဝဲ ပှၤဒိကနၣ်တၢ်ဖိတဖၣ်​ လၢကထံၣ်တမှံဝဲ ပှၤတဂၤလၢ အကွၢ်လီၤအသး လၢမဲာ်ထံကလၤအပူၤလီၤ. အအဲၣ်ဒိး သိၣ်လိပှၤ တၢ်မနုၤလဲၣ်. ပှၤတဂၤ မ့ၢ်ကွၢ်လီၤ မဲာ်ထံကလၤ ဒီးမ့ၢ်ထံၣ်တၢ်ဘၣ်အၢလၢအလိၤ ဒီးမ့ၢ်တမၤပျီဝဲ နီတမံၤဘၣ်န့ၣ်​ အကွၢ်လီၤမဲာ်ထံကလၤနာ်က့ အဘျုးတအိၣ်လၢအဂီၢ်ဘၣ်. ဒ်န့ၣ်အသိး ပှၤတဂၤလၢ အဖးကစၢ်ယွၤ အကလုၢ်ကထါ ဒီးအသ့ၣ်ညါလီၤအသးလၢ အကဘၣ်ဆီတလဲ အသးသနာ်က့ အမ့ၢ်တမၤဝဲဘၣ်န့ၣ်​ အဖးလံာ်စီဆှံနာ်က့ အဘျုးတအိၣ်​ နီတမံၤဘၣ်.

၁၈. ပကဘၣ်​ ဟ့ၣ်တၢ်အဒိ ဒ်လဲၣ်.

^၁၈ ဖဲပဟ့ၣ်တၢ်အဒိအခါ ပကွၢ်လိမၤဒိး စီၤယၤကိာ်သ့လၢ ကျဲသၢဘိ. (၁) တၢ်အဒိလၢ နတဲအီၤန့ၣ်​ ကဘၣ်လီၤပလိာ်ဒီး တၢ်ဂ့ၢ်လၢနတဲတဖၣ်, (၂) သူတၢ်အဒိလၢ ပှၤနၢ်ပၢၢ်ဘၣ်အီၤညီညီဖိ ဒီး (၃) ဟ့ၣ်တၢ်အဒိလၢ ပှၤဟံးန့ၢ်တၢ်မၤလိသ့. ပကဘၣ်သူတၢ်အဒိလၢ အလီၤပလိာ်ဒီး တၢ်ဂ့ၢ်လၢပတဲအီၤဒ်လဲၣ်​ ပမ့ၢ်တသ့ၣ်ညါဘၣ်န့ၣ်​ ပဃုကွၢ်အီၤလၢ လံာ်လဲၢ်လၢ ပတၢ်ကရၢကရိ ထုးထီၣ်ဝဲ (Watch Tower Publications Index) အပူၤသ့. ဖဲန့ၣ်​ တၢ်အဒိအိၣ်ဝဲဒီဒူၣ်​ လၢပသူအီၤသ့လီၤ. တၢ်အဒိန့ၣ်​ လီၤဂာ်ဒ် တၢ်ကလုၢ်ဒၢ (microphone) အသိး. ဒ်တၢ်ကလုၢ်ဒၢ မၤၡဲထီၣ်​ တၢ်ကလုၢ်သီၣ်အသိး တၢ်အဒိန့ၣ်​ မၤစၢၤပှၤဒိကနၣ်တၢ်ဖိ ဒ်သိးကနၢ်ပၢၢ်ထီၣ်တၢ်ဂ့ၢ် ဂ့ၤဂ့ၤအဂီၢ်. အဃိ ပအဲၣ်ဒိးဟ့ၣ်​ တၢ်အဒိလၢ အဘၣ်ဃးလိာ်အသးထဲလၢ တၢ်ဂ့ၢ်လၢအရ့ဒိၣ်​ ဒ်သိးပှၤကနၢ်ပၢၢ်ထီၣ်​ တၢ်ဂ့ၢ်လၢအရ့ဒိၣ်အဂီၢ်လီၤ. ပအဲၣ်ဒိးမၤဂ့ၤထီၣ်​ ပတၢ်သ့တၢ်ဘၣ်လၢ တၢ်သိၣ်လိနဲၣ်လိအပူၤန့ၣ်​ တဘၣ်မ့ၢ်ဒ်သိး ပှၤကသးစၢၢ်ဆၢပှၤအဂီၢ်ဘၣ်, ကဘၣ်မ့ၢ်လၢ ပကမၤစၢၤပှၤဂၤ ဒ်သိးအဝဲသ့ၣ်​ ကကဲထီၣ်​ ယဟိဝၤယွၤ အဟံၣ်ဖိဃီဖိအဂီၢ်လီၤ.

၁၉. ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါတဖၣ်​ ကသ့ဒ်လဲၣ်.

^၁၉ စီၤယၤကိာ် ဒိၣ်ထီၣ်ဘၣ်ဒီး အကၠီလၢ အလၢအပှဲၤတဂၤလီၤ. မ့မ့ၢ်ပှၤန့ၣ်​ ပတအိၣ်ဒီး ပကၠီလၢ အလၢအပှဲၤဘၣ်. ဘၣ်ဆၣ်ပအိၣ်ဒီး ခရံာ်ဖိဒီပုၢ်ဝဲၢ်မုၣ်ခွါတဖၣ်​ လၢပမၤသကိးဘၣ်ဝဲ ယဟိဝၤယွၤအတၢ်မၤ တပူၤဃီ. ပပာ်ဖျါထီၣ်​ တၢ်အဲၣ်လၢအဝဲသ့ၣ်​ အဖီခိၣ်ခီဖျိ ပရ့ဒီးအဝဲသ့ၣ်, မၤလိန့ၢ်တၢ်လၢ အဝဲသ့ၣ်အအိၣ်​ ဒီးမၤသကိး တၢ်စံၣ်တဲၤတဲလီၤတၢ်မၤ ဒီးတၢ်သိၣ်လိနဲၣ်လိတၢ်မၤ ဒ်သိးသိး. ပမ့ၢ်ဂုာ်ကျဲးစၢး ကွၢ်လိမၤဒိး စီၤယၤကိာ် အတၢ်ပာ်သူၣ်ပာ်သး, အတၢ်မၤ ဒီးအတၢ်သိၣ်လိ အကျိၤအကျဲန့ၣ်​ ကကဲထီၣ်​ တၢ်လၤကပီၤလၢ ယဟိဝၤယွၤအဂီၢ် ဒီးကကဲထီၣ်တၢ်မၤစၢၤလၢ ပှၤလၢအသူၣ်ဘျၢသးဘျၢတဖၣ်​ ကဘူးထီၣ်ဒီး ပပၢ်လၢမူခိၣ်​ လၢအပှဲၤဒီး တၢ်အဲၣ်တၢ်ကွံတဂၤ အအိၣ်လီၤ.