နမ့ၢ်မၤတၢ်ဂ့ၤန့ၣ် မ့ၢ်နကအိၣ်မူဘၣ် တၢ်အိၣ်မူလၢအဂ့ၤဧါ
လၢအနံၣ်လၢ အကယၤတဖၣ်အတီၢ်ပူၤ ပှၤအါဂၤ ဆိကမိၣ်ဝဲလၢ နမ့ၢ်ကဲ ပှၤအဂ့ၤဒီးအိၣ်ဒီး သကဲာ်ပဝး လၢအဂ့ၤန့ၣ် နကအိၣ်မူဘၣ် တၢ်အိၣ်မူလၢအဂ့ၤ. အဒိ ခီၤဖၠူစ့ၣ် လၢအမ့ၢ် ပှၤကူၣ်ဘၣ်ကူၣ်သ့လၢ အမံၤဒိၣ်တဂၤန့ၣ် တဲဝဲလၢ “နမ့ၢ်အဲၣ်ဒိးလၢ ပှၤရ့နၤဂ့ၤဂ့ၤန့ၣ် နကဘၣ်ရ့ပှၤဂၤဂ့ၤဂ့ၤ.” အတၢ်ကတိၤ တထံၣ်အံၤန့ၣ် ပှၤအ့ၡၢၣ်ဖိအါဂၤ တူၢ်လိာ်ဝဲ.a
ပှၤအါဂၤ ဂုာ်ကျဲးစၢးမၤတၢ်ဂ့ၤ
ပှၤအါဂၤ နာ်ဝဲလၢ အဝဲသ့ၣ် မ့ၢ်အိၣ်မူဂ့ၤဂ့ၤဘၣ်ဘၣ်န့ၣ် ခါဆူညါ အဝဲသ့ၣ် ကအိၣ်မူဘၣ် တၢ်အိၣ်မူလၢအဂ့ၤ. အဃိ အဝဲသ့ၣ် ဂုာ်ကျဲးစၢး ပာ်ကဲပှၤဂၤ, အိၣ်ဒီးသကဲာ်ပဝး လၢအဂ့ၤ, မၤလၢပှဲၤအမူဒါ ဒီးဂုာ်ကျဲးစၢးအိၣ်ဒီး သးလၢအသ့ၣ်ညါဒၣ်တၢ်လၢအဂ့ၤ. အဒိ ပိာ်မုၣ်တဂၤ လၢအမံၤမ့ၢ်လ့(န်) လၢအအိၣ်လၢ ဘံၤယဲနၤန့ၣ် တဲဝဲလၢ “ထီဘိန့ၣ် ယနာ်လၢ ယမ့ၢ်မၤတၢ်တီတီလိၤလိၤ ဒီးမၤတၢ်လၢ တၢ်သူၣ်အိၣ်သးအိၣ်န့ၣ် ယကအိၣ်မူဘၣ် တၢ်အိၣ်မူလၢအဂ့ၤ.”
ပှၤတနီၤနီၤန့ၣ် ဂုာ်ကျဲးစၢးမၤတၢ်ဂ့ၤ ခီဖျိလၢ အတၢ်ဘူၣ်တၢ်ဘါအဃိ. အဒိ ပိာ်ခွါတဂၤ လၢအမံၤမ့ၢ် ၡူယူၤ လၢအအိၣ်လၢ ထဲၣ်ဝၣ်န့ၣ် တဲဝဲလၢ “ပှၤသိၣ်လိယၤလၢ ပှၤတဂၤ ဖဲအအိၣ်မူအခါ အမ့ၢ်မၤတၢ်ဂ့ၤန့ၣ် အမ့ၢ်သံန့ၣ် အကက့ၤထံၣ်ဘၣ်တၢ်ဂ့ၤ. ဘၣ်ဆၣ် ဖဲအအိၣ်မူအခါ အမ့ၢ်မၤတၢ်အၢန့ၣ် အမ့ၢ်သံန့ၣ် အကက့ၤတူၢ်ဘၣ်တၢ်.”
တၢ်လၢအဝဲသ့ၣ်မၤဝဲန့ၣ် မၤစၢၤအဝဲသ့ၣ်ဧါ
ပမ့ၢ်မၤဂ့ၤတၢ်လၢ ပှၤဂၤအဖီခိၣ်န့ၣ် ကဲဘျုးလၢ ပဂီၢ်အါမး. ဘၣ်ဆၣ် ပှၤအါဂၤ သ့ၣ်ညါထီၣ်ဘၣ်ဝဲလၢ အဝဲသ့ၣ် မ့ၢ်ဂုာ်ကျဲးစၢးမၤဂ့ၤတၢ်လၢ ပှၤဂၤအဖီခိၣ်သနာ်က့ ပှၤတက့ၤရ့ဒီး အဝဲသ့ၣ် ဂ့ၤဂ့ၤထီဘိဘၣ်. အဒိ ပိာ်မုၣ်တဂၤလၢ အမံၤမ့ၢ် ၡူၤဖ့ၤ လၢအအိၣ်လၢ ဟီၣ်ကီၣ်န့ၣ် တဲဝဲလၢ “ယထံၣ်ဘၣ်လၢ ယနီၢ်ကစၢ် တၢ်လဲၤခီဖျိလၢ ပှၤလၢအမၤတၢ်ဂ့ၤန့ၣ် တထံၣ်ဘၣ်တၢ်ဂ့ၤ ထီဘိဘၣ်. ယဂုာ်ကျဲးစၢး လၢအဂ့ၤကတၢၢ်လၢ ကမၤတၢ်ဂ့ၤ ဒီးအံးထွဲကွၢ်ထွဲ ယဟံၣ်ဖိဃီဖိ. ဘၣ်ဆၣ် ယဟံၣ်ဖိဃီဖိတအိၣ်ဒီး တၢ်သးခုဘၣ် ဒီးယဝၤပာ်တ့ၢ်ကွံာ် ယၤဒီးယဖိခွါ.”
ပှၤအါဂၤ သ့ၣ်ညါထီၣ်ဘၣ်ဝဲလၢ ပှၤလၢအမၤ တၢ်ဘူၣ်တၢ်ဘါ အတၢ်ဖံးတၢ်မၤတဖၣ်န့ၣ် တကဲပှၤလၢအဂ့ၤ ကိးဂၤဒဲးဘၣ်. အဒိ ပိာ်မုၣ်တဂၤလၢ အမံၤမ့ၢ် အဲၤစူကိၤ လၢအအိၣ်လၢ ကီၢ်ယပၣ်န့ၣ် တဲဝဲလၢ “ယလဲၤမၤစၢၤ တၢ်ဘူၣ်တၢ်ဘါ အတၢ်ကရၢကရိတခါ ဒီးယတီခိၣ်ရိၤမဲတၢ်လၢ ပှၤသးစၢ်တဖၣ်အဂီၢ်. ဘၣ်ဆၣ် ယထံၣ်ဘၣ်လၢ ပှၤတနီၤလၢ အမၤတၢ်ဘူၣ်တၢ်ဘါ အတၢ်ဖံးတၢ်မၤန့ၣ် အသကဲာ်ပဝး တဂ့ၤဘၣ်, အဂုာ်န့ၢ်လိာ်သးလီၢ်လၤ ဒီးအဝဲသ့ၣ် သူကမၣ်တိၢ်မၤဘူၣ် အဃိယကမၢကမၣ်ညါ.”
“ယဂုာ်ကျဲစၢး လၢအဂ့ၤကတၢၢ်လၢ ကမၤတၢ်ဂ့ၤ ဒီးယအံးထွဲကွၢ်ထွဲ ယဟံၣ်ဖိဃီဖိ ဘၣ်ဆၣ် ယဟံၣ်ဖိဃီဖိတအိၣ်ဒီး တၢ်သးခုဘၣ် ဒီးယဝၤပာ်တ့ၢ်ယၤ ဒီးယဖိခွါ.” —ၡူၤဖ့ၤ, ဟီၣ်ကီၣ်
ပှၤတနီၤန့ၣ် အဝဲသ့ၣ် အဲၣ်တၢ်ဘူၣ်တၢ်ဘါဒိၣ်မး ဒီးဂုာ်ကျဲးစၢး မၤတၢ်လၢအဂ့ၤ ဘၣ်ဆၣ် အဝဲသ့ၣ် ထံၣ်ဘၣ်ဒံး တၢ်လၢအတဂ့ၤဘၣ် အဃိ အဝဲသ့ၣ် သးဟးဂီၤ. အဒိ ပိာ်မုၣ်တဂၤလၢ အမံၤမ့ၢ်ဘဲ လၢအအိၣ်လၢ ဘံၤယဲနၤန့ၣ် တူၢ်ဘၣ်ဝဲဒ်န့ၣ်လီၤ. ဘဲတဲဝဲလၢ “ကိးနံၤဒဲန့ၣ် ယလဲၤပှ့ၤတၢ်သူတၢ်သၣ်, ဖီဒီးတၢ်အီၣ်တၢ်အီ ဒီးဟ့ၣ်လုၢ်ထီၣ်အီၤလၢ ယမိၢ်ပၢ်ဖံဖုလၢ အသံတ့ၢ်သ့ၣ်တဖၣ်အအိၣ် ဒီးယမုၢ်လၢ်လၢ ယကအိၣ်မူဘၣ် တၢ်အိၣ်မူလၢအဂ့ၤ လၢခါဆူညါ. ယမၤတၢ်ဂ့ၤတဖၣ်အံၤ ဒီးမၤထွဲ တၢ်ဘူၣ်တၢ်ဘါလုၢ်လၢ် လၢအနံၣ်အါမးသနာ်က့ ယဝၤဆိးက့ထီၣ်နးမး. လၢခံ ယဖိမုၣ်လၢ အသးနံၣ်အိၣ် အနံၣ် ၂၀ တဂၤန့ၣ် ဖဲအဝဲလဲၤမၤလိတၢ်လၢ ကီၢ်ချၢအခါ အသံဝဲ.”
ခါဆူညါ ဒ်သိး နကအိၣ်မူဘၣ် တၢ်အိၣ်မူလၢအဂ့ၤအဂီၢ် ထဲလၢနကဲပှၤအဂ့ၤ မ့ၢ်တလၢပှဲၤဒံးဘၣ်န့ၣ် နကဘၣ်မၤဒံး တၢ်မၤနုၤလဲၣ်. ဒ်သိး ပကသ့ၣ်ညါဘၣ် တၢ်သံကွၢ်တဖျၢၣ်အံၤ အတၢ်စံးဆၢအဂီၢ် ပလိၣ်ဘၣ် တၢ်ဟံးစုနဲၣ်ကျဲလၢ ပနာ်န့ၢ်အီၤသ့ ဒီးအကဟ့ၣ်ပှၤ တၢ်အိၣ်မူလၢအဂ့ၤ လၢခါဆူညါအဂီၢ်. ပဃုထံၣ်န့ၢ် တၢ်ဟံးစုနဲၣ်ကျဲအံၤ ကသ့ဖဲလဲၣ်.
a နမ့ၢ်အဲၣ်ဒိးသ့ၣ်ညါအါထီၣ်ဘၣ်ဃးဒီး တၢ်လၢ ခီၤဖၠူစ့ၣ်တဲဝဲန့ၣ် ဖးကွၢ် လံာ်လၢအမ့ၢ် Mankind’s Search for God တၢ်မၤလိ ၇ လံာ်အဆၢ ၃၁-၃၅ လၢယဟိဝၤပှၤအုၣ်အသးတဖၣ် ထုးထီၣ်ဝဲ. ဒီးဖးကွၢ်အီၤလၢ online အဖီခိၣ်လၢ www.jw.org အပူၤ.