ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမၢ်ၡး ၁-၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၇-၈
“တၢ်မၤလိလၢ ပဒိးန့ၢ်ဘၣ်ခီဖျိ ပှၤအံၣ်စရ့လးဖိတဖၣ် သူၣ်လီၤအဒဲ”
it-1 ၄၉၇ ¶၃
တၢ်အိၣ်ဖှိၣ်
ပှၤအံၣ်စရ့လးဖိခိၣ်နၢ်တဖၣ်န့ၣ် အါတက့ၢ် ဘၣ်ဟံးန့ၢ်မူဒါလၢ ပှၤဒီတဖုအဂီၢ်လီၤ. (ဧ့. ၁၀:၁၄) အဃိ ဖဲပှၤဘှီထီၣ် ဒဲစီဆှံဝံၤအလီၢ်ခံ “ပှၤအဒူၣ်တဖၣ်အပဒိၣ်” ဘၣ်ဟံးန့ၢ်မူဒါလီၤ. (၄ မိၤ. ၇:၁-၁၁) တကးဒံးဘၣ် လၢစီၤနဃ့မယၤအစိၤ ပှၤလၢ “အစဲပနီၣ်ဃာ် တၢ်အၢၣ်လီၤအီလီၤ” တဖၣ်န့ၣ်မ့ၢ်ဝဲ “ပဒိၣ်ဖးဒိၣ်,” ပှၤလ့ၤဝံဖိ ဒီးပှၤလုၢ်တၢ်အခိၣ်တဖၣ်လီၤ. (ဃ့. ၉:၃၈–၁၀:၂၇) ဖဲပှၤအံၣ်စရ့လးဖိတဖၣ် လဲၤတၢ်လၢ ပှၢ်မုၢ်ကနၢပူၤအဆၢကတီၢ် စီၤကိၤရး, စီၤဒၤသၣ် ဒီးစီၤအဘံရၣ် ဒီးစီၤအိၣ်န့ၣ် ပူထီၣ်ထီဒါဝဲ စီၤမိၤၡ့လီၤ. ဒီးပှၤအဂၤ ၂၅၀ လၢပၣ်ဃုာ်လၢ အဝဲသ့ၣ်အကျါန့ၣ် ပၣ်ဃုာ်စ့ၢ်ကီးဒီး “ပဒိၣ်လၢတၢ်အိၣ်ဖှိၣ်အပူၤ, ပှၤဒိးတၢ်ကိးအီၤလၢ တၢ်အိၣ်ဖှိၣ်အပူၤ” ပှၤလၢအမံၤဟူသၣ်ဖျါတဖၣ်န့ၣ်လီၤ. (၄ မိၤ. ၁၆:၁-၃) ဖဲစီၤမိၤၡ့ ဝံဝဲ “ပှၤဂီၢ်မုၢ်သ့ၣ်အတၢ်ဝံ” တန့ၢ်လၢၤဘၣ်အခါ အဝဲဃုထၢထီၣ်ဝဲ ပှၤသူၣ်က့သးပှၢ်အဂၤ ၇၀ လၢပှၤအံၣ်စရ့လးဖိခိၣ်နၢ်တဖၣ်အကျါ လၢအလီၤပလိာ်ဒီး ကစၢ်ယွၤအတၢ်ဟံးစုနဲၣ်ကျဲန့ၣ်လီၤ. (၄ မိၤ. ၁၁:၁၆, ၁၇, ၂၄, ၂၅) ဖဲ ၃ မိၤၡ့ အဆၢဒိၣ် ၄:၁၅ န့ၣ်ပာ်ဖျါထီၣ်ဝဲလၢ “တၢ်အိၣ်ဖှိၣ် အသူၣ်က့သးပှၢ်တဖၣ်” လီၤ. ဖျါလၢ အဝဲသ့ၣ်တဖၣ်န့ၣ် မ့ၢ်ဝဲကလုာ်ဒူၣ်တဖၣ်အခိၣ်, ပှၤသူၣ်က့သးပှၢ်, ခိၣ်နၢ်, ပှၤစံၣ်ညီၣ်ကွီၢ် ဒီးပှၤကွဲးလံာ်တဖၣ်န့ၣ်လီၤ.—၄ မိၤ. ၁:၄, ၁၆; ၡူ. ၂၃:၂; ၂၄:၁.
it-2 ၇၉၆ ¶၁
ရူၤဘ့ၣ်
ဖဲပှၤအံၣ်စရ့လးဖိတဖၣ် သူၣ်လီၤဒဲအခါ ရူၤဘ့ၣ်အဒူၣ်န့ၣ်ဘၣ်သူၣ်လီၤဝဲ ဒဲလၢကလံၤထံးတခီ ဃုာ်ဒီးစူၤမ့းအိၣ်အဒူၣ် ဒီးကးအဒူၣ်လီၤ. ဖဲပှၤဘၣ် သုးလီၢ်သုးကျဲအခါန့ၣ် ယူဒၤ, ယံးစၣ်ကၢ်, စဘူလိၣ် အဒူၣ်ဟးထီၣ်မ့ၢ်ဝံၤမး ကလုာ်ဒူၣ်သၢဒူၣ်လၢ ရူၤဘ့ၣ် တီခိၣ်ရိၤမဲဝဲန့ၣ် ဘၣ်ပိာ်ထီၣ်ပှၤခံလီၤ. (၄ မိၤ. ၂:၁၀-၁၆; ၁၀:၁၄-၂၀) ဖဲပှၤဟ့ၣ်လုၢ်ထီၣ်တၢ်လၢ တၢ်ပာ်စီဆှံ ဒဲစီဆှံ အမုၢ်နံၤခါစ့ၢ်ကီး ဘၣ်တၢ်မၤအီၤ ဒ်တၢ်ရဲၣ်တၢ်ကျဲၤအံၤအသိးလီၤ.—၄ မိၤ. ၇:၁, ၂, ၁၀-၄၇.
တၢး၀၄ ၈/၁ ၂၅ ¶၁
လံာ်စီဆှံ အတၢ်ပာ်ဖျါလၢလံာ် ၄ မိၤၡ့ အဂီၢ်
၈:၂၅, ၂၆. ဒ်သိးပှၤလ့ၤဝံဖိ အတၢ်မၤ ကလဲၤအသးဘၣ်ဘျီးဘၣ်ဒါ ဒီးပှၤကပာ်ဖျါထီၣ်လၢ ပှၤဆိကမိၣ်န့ၢ်တၢ်လၢ ပှၤသးပှၢ်တဖၣ်အဂီၢ် ပှၤလ့ၤဝံဖိပိာ်ခွါသးပှၢ်တဖၣ်န့ၣ် ပှၤဒုးအိၣ်ဘှံးအဝဲသ့ၣ်လၢ တၢ်မၤလီၤ. ဘၣ်ဆၣ်, အဝဲသ့ၣ် မ့ၢ်အဲၣ်ဒိးမၤစၢၤဝဲ ပှၤလ့ၤဝံဖိအဂၤတဖၣ်လၢ အသးဒၣ်ဝဲန့ၣ် မၤစၢၤဝဲသ့လီၤ. မုၢ်မဆါတနံၤအံၤ ပှၤလၢအစံၣ်တဲၤတဲလီၤ ဘီမုၢ်တၢ်သးခုကစီၣ်တဂၤအဂီၢ် တၢ်အိၣ်ဘှံးတအိၣ် သနာ်က့ တၢ်မၤလိာ်တခါအံၤ သိၣ်လိပှၤ တၢ်မၤလိလၢ အလုၢ်ဒိၣ်ပှ့ၤဒိၣ်တခါလီၤ. ခရံာ်ဖိတဂၤ ခီဖျိလၢ အသးပှၢ်ထီၣ်အဃိ မၤလၢပှဲၤဝဲ အမူဒါတခါခါ မ့ၢ်တန့ၢ်လၢၤသနာ်က့ တၢ်လၢအဝဲမၤဝဲန့ၢ်န့ၣ်မၤဝဲသ့ဒံးလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၈၃၅
ဖိဝဲၢ်ကိ, ဆၣ်ဖိကီၢ်ဖိအဝဲၢ်ကိ
လၢပှၤအံၣ်စရ့လးဖိတဖၣ်အကျါ ဖိဝဲၢ်ကိန့ၣ် ကဲထီၣ်ဝဲ ဟံၣ်တဒူၣ်စုာ်စုာ်အခိၣ်အဃိ အဝဲသ့ၣ်မ့ၢ် ပှၤခၢၣ်စးလၢ ပှၤဒီတကလုာ်အဂီၢ်လီၤ. တၢ်အၢၣ်လီၤအီၤလီၤလၢ ကစၢ်ယွၤ မၤဝဲဒီး စီၤအၤဘြၤဟၣ်န့ၣ် ပှၤအဆိကတၢၢ်တကလုာ်လၢအမ့ၢ် ပှၤအံၣ်စရ့လးဖိတဖၣ်န့ၣ် ယဟိဝၤယွၤ ကိးအဝဲသ့ၣ်လၢ “ယဖိဝဲၢ်ကိ”လီၤ. (၂ မိၤ. ၄:၂၂) မ့ၢ်လၢ ယဟိဝၤယွၤ မၤပူၤဖျဲးဝဲ ဖိဝဲၢ်ကိတဖၣ်အသးသမူအဃိ အဝဲတဲဝဲလၢ “ကယဲၢ်တၢ်လၢအအိးထီၣ်ဆိတၢ်အဒၢလီၢ် လၢပှၤအံၣ်စရ့လးဖိအကျါ, ပှၤကညီမ့ၢ်ဂ့ၤ, ဆၣ်ဖိကီၢ်ဖိအဒၢမ့ၢ်ဂ့ၤ, မ့ၢ်ယတၢ်လီၤ.” (၂ မိၤ. ၁၃:၂) အဃိ ဖိဝဲၢ်ကိတဖၣ်န့ၣ် ဘၣ်တၢ်ပာ်လီၤဆီအီၤလၢ ကစၢ်ယွၤအဂီၢ်လီၤ.
လါမၢ်ၡး ၈-၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၉-၁၀
“ယဟိဝၤယွၤ တီခိၣ်ရိၤမဲဝဲ အပှၤဂီၢ်မုၢ်ဒ်လဲၣ်”
it-1 ၃၉၈ ¶၃
သူၣ်ဒဲအလီၢ်
ဖဲအဝဲသ့ၣ် ဘၣ်သုးအလီၢ် တတီၤဝံၤတတီၤအခါ (၄ မိၤၡ့ ၃၃ အပူၤန့ၣ် စီၤမိၤၡ့ ပာ်ဖျါထီၣ်ဝဲလၢ အဝဲသ့ၣ် သုးအလီၢ် တတီၤဝံၤတတီၤ အိၣ်ဝဲ အဘျီ ၄၀ ညါလီၤ.) လီၤကမၢကမၣ်ဒိၣ်မးလၢ အဝဲသ့ၣ် ဘၣ်တၢ်ကရၢကရိအီၤ ဂ့ၤဂ့ၤဘၣ်ဘၣ်အဃိလီၤ. ဖဲတၢ်အၢၣ်အိၣ်ပတုာ်လၢ ဒဲစီဆှံအဖီခိၣ်အခါ အဝဲသ့ၣ်သူၣ်လီၤအဒဲ ဒီးဖဲတၢ်အၢၣ် သုးထီၣ်အသးအခါ အဝဲသ့ၣ်စ့ၢ်ကီး ဘၣ်ဟးထီၣ်ဝဲလီၤ. “ဖဲယွၤအထးခိၣ် ပှၤအံၣ်စရ့လးဖိလဲၤတၢ်, ဒီးဖဲယွၤအထးခိၣ်သူၣ်ဝဲအဒဲလီၤ.” (၄ မိၤ. ၉:၁၅-၂၃) ယဟိဝၤယွၤ ဟ့ၣ်လီၤအကလုၢ်န့ၣ် ဘၣ်တၢ်ဒုးသ့ၣ်ညါအီၤ ခီဖျိ ပှၤအူထီၣ်ကွဲၤစ့ ခံဖျၢၣ်န့ၣ်လီၤ. (၄ မိၤ. ၁၀:၂, ၅, ၆) ပှၤဘၣ်သူၣ်လီၤဒဲ မ့တမ့ၢ် ပှၤဘၣ်ဟးထီၣ်န့ၣ် ဘၣ်တၢ်ဒုးသ့ၣ်ညါအီၤ ခီဖျိ တၢ်အၢၣ်သုးထီၣ်သုးလီၤအသးလီၤ. “လၢခံနံၣ်တနံၣ် [ချ.ခ.န ၁၅၁၂], လါခံလါတလါထီၣ် အနံၤခံဆံန့ၣ်” အဝဲသ့ၣ်ဘၣ်သုးအလီၢ် အဆိကတၢၢ်တဘျီလီၤ. ပှၤဘၣ်ယိးထီၣ် တၢ်အၢၣ်လီၤအီလီၤ တလါစီဆှံလၢ တၢ်မဲာ်ညါကတၢၢ်ဝံၤအလီၢ်ခံ ယံးစၣ်ကၢ်အဒူၣ်, စဘူလိၣ်အဒူၣ်လၢ ယူဒၤအဒူၣ်တီခိၣ်ရိၤမဲဝဲန့ၣ် ပိာ်ထီၣ်အခံလီၤ. ဝံၤအလီၢ်ခံ က့ရၡိၣ်, ဒီးမရၤရံၤအဖိအလံၤတဖၣ်န့ၣ် ဘ့ၣ်လီၤဝဲ ဒဲစီဆှံ, ယိးထီၣ်ဝဲ ဒီးပိာ်ထီၣ် အဝဲသ့ၣ်အခံလီၤ. လၢခံ စူၤမ့းအိၣ်အဒူၣ်, ကးအဒူၣ်လၢ ရူၤဘ့ၣ်အဒူၣ် တီခိၣ်ရိၤမဲဝဲန့ၣ် ပိာ်ထီၣ်အဝဲသ့ၣ်အခံလီၤ. ကဃးအဒူၣ်န့ၣ် ဘၣ်စိာ်ဝဲ ဒဲစီဆှံ အတၢ်ပီးတၢ်လီတဖၣ်လီၤ. အဝဲသ့ၣ် အလီၢ်ခံန့ၣ် မနၤၡ့ၤအဒူၣ်, ဘံၣ်ယၤမံၣ်အဒူၣ် လၢအ့ဖရဲၣ် တီခိၣ်ရိၤမဲဝဲန့ၣ် ပိာ်ထီၣ်အခံလီၤ. လၢခံအၤၡ့ၢ်, နးသၤလံ အဒူၣ်လၢ ဒၣ်အဒူၣ် တီခိၣ်ရိၤမဲဝဲန့ၣ် ဟးထီၣ်ဝဲလၢ ပှၤလီၢ်ခံကတၢၢ်လီၤ. လၢတၢ်န့ၣ်အဃိ ပှၤအဒူၣ်လၢ အအါကတၢၢ်ဒီး အဂံၢ်ဆူၣ်ကတၢၢ်ခံဒူၣ်န့ၣ် လဲၤဝဲလၢ မဲာ်ညါတဒူၣ် ဒီးလၢလီၢ်ခံတဒူၣ် ဒ်သိးကဒီသဒၢတၢ်အဂီၢ်လီၤ.—၄ မိၤ. ၁၀:၁၁-၂၈.
တၢး၁၁ ၄/၁၅ ၄-၅
မ့ၢ်နထံၣ်ဘၣ် တၢ်အုၣ်အသးလၢ ကစၢ်ယွၤ တီခိၣ်ရိၤမဲတၢ်န့ၣ်ဧါ
ပစံးဘျုးစံးဖှိၣ် ကစၢ်ယွၤ အတၢ်တီခိၣ်ရိၤမဲပှၤန့ၣ် ပပာ်ဖျါထီၣ်ကသ့ဒ်လဲၣ်. တၢ်မၢဖိပီလူး တဲဝဲလၢ “ဒိကနၣ် ပှၤလၢအတီခိၣ်ရိၤမဲတၢ် လၢသုကျါတက့ၢ်. ဒီးဒိးပၢသုသးလၢ အဝဲသ့ၣ်အဖီလာ်” တက့ၢ်. (ဧ့ၤ. ၁၃:၁၇) ပကမၤဒ်န့ၣ်အဂီၢ် တညီထီဘိဘၣ်. အဒိ နမ့မ့ၢ်ပှၤအံၣ်စရ့လးဖိလၢ အအိၣ်မူဘၣ်လၢ စီၤမိၤၡ့အစိၤန့ၣ် နကဘၣ်လဲၤတၢ်လၢနခီၣ် တဘျုးသီဝံၤအလီၢ်ခံ တၢ်အၢၣ်န့ၣ် အိၣ်ပတုာ်ဝဲလီၤ. နကဘၣ်အိၣ်ဖဲန့ၣ် ကယံာ်ထဲလဲၣ်, တသီဧါ, တနွံဧါ, အလါတဖၣ်အလါဧါ. နကဆိကမိၣ်ဘၣ်လၢ ‘မ့ၢ်နကဘၣ်ဘ့ၣ်လီၤ(ဃ့ၣ်လီၤ) တၢ်ဘိၣ်တဖၣ်ဧါ.’ အဆိကတၢၢ် နကဘ့ၣ်လီၤတၢ်ဘိၣ်လၢ နလိၣ်ဘၣ်အီၤတဖၣ်လီၤ. ဘၣ်ဆၣ် စှၤသီဝံၤအလီၢ်ခံ နဘၣ်ဃု နတၢ်ဖိတၢ်လံၤတဖၣ် နသးတစူၤလၢၤဘၣ်အဃိ နကဘ့ၣ်လီၤကွံာ် နတၢ်ဘိၣ်ခဲလၢာ်လီၤ. ဘၣ်ဆၣ် ဖဲနဘ့ၣ်လီၤ နတၢ်ဘိၣ်လၢာ်အခါ တၢ်အၢၣ်န့ၣ် သုးထီၣ်အသးလီၤ. အဃိ နကဘၣ်ဘိၣ်ထီၣ်ကဒီး တၢ်ဘိၣ်လီၤ. နဘၣ်မၤဒ်အံၤန့ၣ် တမ့ၢ်တၢ်လၢအညီဘၣ်. ဘၣ်ဆၣ် ပှၤအံၣ်စရ့လးဖိတဖၣ် “လဲၤ” တၢ်တဘျီဃီလီၤ.—၄ မိၤ. ၉:၁၇-၂၂.
မုၢ်မဆါတနံၤအံၤစ့ၢ်ကီး ဖဲပဒိးန့ၢ်ဘၣ် ကစၢ်ယွၤ အတၢ်ဟံးစုနဲၣ်ကျဲအခါ ပမၤဒ်လဲၣ်. ပဂုာ်ကျဲးစၢးမၤထွဲအီၤ တဘျီဃီဧါ. မ့တမ့ၢ် ပမၤဒ် ညီနုၢ်ပမၤအီၤအသိးဧါ. တၢ်ဟံးစုနဲၣ်ကျဲလၢ ဟဲထီၣ်အသီဘၣ်ဃးဒီး တၢ်မၤလိ လံာ်စီဆှံဒီးပှၤဂၤ, တၢ်စံၣ်တဲၤတဲလီၤ ပှၤလၢအကတိၤကျိာ်အဂၤ, တၢ်မၤဟံၣ်ဖိဃီဖိ တၢ်မၤလိလံာ်စီဆှံ, တၢ်မၤသကိးတၢ်ဒီး ကမံးတံာ်လၢ အဆဲးကျိးဒီးတၢ်ဆါဟံၣ်ဒီး တၢ်ဟ့ၣ်ပလီၢ်လၢ တၢ်အိၣ်ဖှိၣ်ဖးဒိၣ်အဂီၢ်တဖၣ်န့ၣ် မ့ၢ်နသ့ၣ်ညါဧါ. ပပာ်ဖျါထီၣ်လၢ ပစံးဘျုးစံးဖှိၣ် ကစၢ်ယွၤ အတၢ်ဟံးစုနဲၣ်ကျဲ ခီဖျိ ပတူၢ်လိာ်ဒီးမၤထွဲ တၢ်ဟ့ၣ်ကူၣ်တဖၣ်န့ၣ်လီၤ. ဖဲနကဘၣ်မၤ တၢ်ဆၢတဲာ်လၢ အရ့ဒိၣ်အခါ တဘၣ်သန့ၤနသးလၢ နတၢ်ကူၣ်ဘၣ်ကူၣ်သ့တဂ့ၤ. ဃုတၢ်ဟံးစုနဲၣ်ကျဲလၢ ယဟိဝၤယွၤ ဒီး အတၢ်ကရၢကရိ အအိၣ်တက့ၢ်. ဖဲကလံၤမုၢ်လီၤ အဆၢကတီၢ် ဒ်ဖိသၣ်လၢအလဲၤဃ့ၢ်ဆူ အမိၢ်အပၢ်အအိၣ် ဒ်သိးကဒိးန့ၢ်ဘၣ် တၢ်ဒီသဒၢအဂီၢ်အသိး, ဖဲပထံၣ်ဘၣ် တၢ်ကီတၢ်ခဲလၢ အလီၤဂာ်ဒီး ကလံၤမုၢ်အခါ ပလဲၤဃု တၢ်ဒီသဒၢလၢ ယဟိဝၤယွၤအအိၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၁၉၉ ¶၃
တၢ်အိၣ်ဖှိၣ်
တၢ်အိၣ်ဖှိၣ် မ့ၢ်တၢ်လၢအရ့ဒိၣ်. တၢ်ရဲၣ်တၢ်ကျဲၤလၢ အဘၣ်ထွဲဒီး ဘူၣ်လဲၤကပာ်လၢ ဘၣ်တၢ်မၤအီၤ ကိးနံၣ်ဒဲးန့ၣ် ပာ်ဖျါထီၣ်ဝဲလၢ ဒ်သိးပကအိၣ်ဒီး တၢ်ရ့လိာ်သးဒီး ယဟိဝၤယွၤဘူးဘူးတံၢ်တံၢ်အဂီၢ် အရ့ဒိၣ်လၢ ပကဘၣ်ဟံးန့ၢ် တၢ်အဘျုးလၢလၢပှဲၤပှဲၤလၢ တၢ်အိၣ်ဖှိၣ်လၢ ကစၢ်ယွၤ ကတဲာ်ကတီၤန့ၢ်ပှၤတဖၣ်န့ၣ်လီၤ. ပှၤပိာ်ခွါတဂၤန့ၣ် ကဆှီဝဲ ဒီးတလဲၤလၢတၢ်လီၢ်အဂၤဘၣ်, ဘၣ်ဆၣ် အဝဲမ့ၢ်တမၤဝဲ ဘူၣ်လဲၤကပာ်ဘၣ်န့ၣ် ကဘၣ်တၢ်မၤသံအီၤလီၤ. (၄ မိၤ. ၉:၉-၁၄) စီၤပၤဃံးစကံယၤ ကွဲမုာ်ပှၤယူဒၤဖိတဖၣ် ဒီးပှၤအံၣ်စရ့လးဖိတဖၣ်လၢ ကဟဲထီၣ် ဘူၣ်လဲၤကပာ်လၢ ဝ့ၢ်ယရူၤၡလ့ၣ်အပူၤလီၤ. လၢအလံာ်ကွဲမုာ်အပူၤန့ၣ် ပာ်ဖျါဝဲလၢ “အံၣ်စရ့လးဖိသ့ၣ်ဧၢ, ဃၣ်ကဒါက့ၤသုသးဆူယွၤ, . . . ပာ်ဆူၣ်သုကိာ်ဒ်သုပၢ်အသိးန့ၣ်တဂ့ၤ. ဟ့ၣ်သုစုလၢယွၤ, ဒီးလဲၤနုာ်လၢအလီၢ်စီဆှံလၢ အပာ်စီဆှံလီၤထူလီၤယိာ်, ဒီးမၤယွၤသုကစၢ်အတၢ်, ဒ်သိးအသးထီၣ်ဆူၣ် ကဃၣ်ကွံာ်အသးလၢ သုအိၣ်တက့ၢ်. . . . ယွၤသူၣ်ကညီၤတၢ်, သးကညီၤတၢ်, ဒီးအသးအိၣ်တၢ်လီၤ. ဒီးသုမ့ၢ်ဃၣ်က့ၤသုသးဆူအအိၣ်ဒီး, တဃၣ်ကွံာ်အမဲာ်လၢ သုအိၣ်ဘၣ်.” (၂ ကွဲး. ၃၀:၆-၉) ပှၤလၢအတမၤ ဘူၣ်လဲၤကပာ်အံၤလၢ အသးဒၣ်ဝဲတဂၤန့ၣ် မ့ၢ်ဒၣ် ပာ်ဖျါထီၣ်ဝဲလၢ ကွၢ်ကပာ်ကွံာ် ကစၢ်ယွၤန့ၣ်လီၤ. ခရံာ်ဖိတဖၣ်န့ၣ် တမၤလၢၤ ဘူၣ်လဲၤကပာ် သနာ်က့ ဘၣ်တၢ်ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ အသုတဟးဆှဲး တၢ်အိၣ်ဖှိၣ်ရိဖှိၣ်တဂ့ၤန့ၣ်လီၤ. လံာ်စီဆှံ ပာ်ဖျါဝဲလၢ “မ်ပဆိကမိၣ်န့ၢ်တၢ်လၢ တဂၤဒီးတဂၤအဂီၢ် ဒ်သိးကထိၣ်ဟူးထိၣ်ဂဲၤထီၣ်လိာ်သး လၢပကပာ်ဖျါထီၣ် တၢ်အဲၣ်တၢ်ကွံ ဒီးတၢ်မၤလၢအဂ့ၤတဖၣ် န့ၣ်တက့ၢ်. မ်ပသုတဟးဆှဲး ပတၢ်အိၣ်ဖှိၣ် ဒ်ပှၤတနီၤနီၤအလုၢ်အလၢ် အိၣ်ဝဲအသိးတဂ့ၤ. မ့မ့ၢ် မ်ပဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးဒ်သုထံၣ်မုၢ်နံၤ ဟဲဘူးထီၣ်ဝဲအသိး မ်သုမၤအါထီၣ် တၢ်သ့ၣ်တဖၣ်အံၤတက့ၢ်.”—ဧ့ၤ. ၁၀:၂၄, ၂၅; see CONGREGATION.
လါမၢ်ၡး ၁၅-၂၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၁၁-၁၂
“ဘၣ်မနုၤအဃိ ပကဘၣ်ဟးဆှဲး တၢ်ကဒူးကဒ့ၣ် လဲၣ်”
တၢး၀၁ ၆/၁၅ ၁၇ ¶၂၀
သုတကဲထီၣ် ပှၤလၢအနၢ်ဟူတၢ်ဝံၤ သးပ့ၤနီၣ်တၢ်န့ၣ်တဂ့ၤ
၂၀ ခရံာ်ဖိအါတက့ၢ်န့ၣ် တမ့ၢ်ကဟ့ၣ်ၡူအသးလၢ ကမၤကမၣ်မုာ်ကမၣ်ခွါအဂီၢ်ဘၣ်. ဘၣ်ဆၣ် ပကဘၣ်ပလီၢ်ပသး ဒ်သိးပသုတကဲထီၣ် ပှၤလၢအကဒူးကဒ့ၣ်တၢ်တဂ့ၤန့ၣ်လီၤ. ပမ့ၢ်ကဒူးကဒ့ၣ်တၢ်န့ၣ် ပတဒိးန့ၢ်ဘၣ် ကစၢ်ယွၤ အတၢ်ဘၣ်သးလၢၤဘၣ်. စီၤပီလူး ဟ့ၣ်ပလီၢ်ပှၤလၢ “ဒီးမ်ပသုတမၤကွၢ် ယဟိဝၤယွၤတဂ့ၤ. အဝဲသ့ၣ်တနီၤန့ၣ် မၤကွၢ်အီၤအဃိ ဂုၢ်တဖၣ်အ့ၣ်သံ အဝဲသ့ၣ်လီၤ. တဘၣ်ကဲထီၣ်ပှၤလၢ အကဒူးကဒ့ၣ်တၢ်တဂ့ၤ. အဝဲသ့ၣ်တနီၤ ကဒူးကဒ့ၣ်တၢ်အဃိ ပှၤလၢအမၤဟးဂီၤတၢ်တဂၤ မၤသံကွံာ်အဝဲသ့ၣ်လီၤ.” (၁ ကရံၣ်သူး ၁၀:၉, ၁၀) ပှၤအံၣ်စရ့လးဖိတဖၣ် ကဒူးကဒ့ၣ် စီၤမိၤၡ့ ဒီးစီၤအၤဟရိၣ် ဘၣ်ဃးဒီး ကိၣ်မၤနၤလီၤ. နီၢ်နီၢ်န့ၣ် တမ့ၢ်ထဲ အကဒူးကဒ့ၣ် အဝဲသ့ၣ်ဘၣ်, မ့ၢ်အကဒူးကဒ့ၣ်စ့ၢ်ကီး ကစၢ်ယွၤလီၤ. (၄ မိၤ. ၁၆:၄၁; ၂၁:၅) တၢ်ကဒူးကဒ့ၣ်န့ၣ် မၤဘၣ်ဒိ ယဟိဝၤယွၤအသး ထဲသိးဒီး တၢ်မၤကမၣ်မုၣ်ကမၣ်ခွါန့ၣ်ဧါ. လံာ်စီဆှံ ပာ်ဖျါဝဲလၢ ပှၤကဒူးကဒ့ၣ်တၢ်အါဂၤန့ၣ် ဂုၢ်အ့ၣ်သံကွံာ် အဝဲသ့ၣ်လီၤ. (၄ မိၤၡ့ ၂၁:၆) လၢအပူၤကွံာ်တဘျီန့ၣ် ခီဖျိလၢ အဝဲသ့ၣ် ကဒူးကဒ့ၣ်တၢ်အဃိပှၤ ၁၄,၇၀၀ ဘျဲၣ် ဘၣ်တၢ်မၤဟးဂီၤအီၤလီၤ. (၄ မိၤ. ၁၆:၄၉) လၢတၢ်န့ၣ်အဃိ မ်ပသုတမၤကွၢ် ယဟိဝၤယွၤ အတၢ်သူၣ်စူၤသးစူၤ ခီဖျိလၢပကဒူးကဒ့ၣ်တၢ်လၢ ယဟိဝၤယွၤ ကတဲာ်ကတီၤန့ၢ်ပှၤတဖၣ်န့ၣ်တဂ့ၤ.
တၢး၀၆ ၇/၁၅ ၁၅ ¶၇
‘ကဒူးကဒ့ၣ်တၢ်တဂ့ၤ’
၇ ပှၤအံၣ်စရ့လးဖိတဖၣ် အတၢ်ပာ်သူၣ်ပာ်သး ဆီတလဲကွံာ်ဝဲလီၤ. လၢအခီၣ်ထံးန့ၣ် ဖဲအဝဲသ့ၣ် ထူၣ်ဖျဲးထီၣ်လၢ ကီၢ်အဲၤကူပတူး ဒီးဘၣ်တၢ်မၤပူၤဖျဲးထီၣ် အဝဲသ့ၣ်လၢ ပီၣ်လဲၣ်ဂီၤဝံၤအခါ သးဝံၣ်စံးထီၣ်ပတြၢၤဝဲ ယဟိဝၤယွၤ လၢတၢ်စံးဘျုးစံးဖှိၣ်အပူၤလီၤ. (၂ မိၤၡ့ ၁၅:၁-၂၁) ဘၣ်ဆၣ် ဖဲအဝဲသ့ၣ်ထံၣ်ဘၣ် တၢ်ကီတၢ်ခဲ ဒီးပျံၤဝဲပှၤကနၤဧၣ်ဖိတဖၣ်အခါ အတၢ်စံးဘျုးစံးဖှိၣ် လီၤမၢ်ကွံာ်ဝဲ ဒီးစးထီၣ်ကဒူးကဒ့ၣ်တၢ်လီၤ. အဝဲသ့ၣ်ထူၣ်ဖျဲးထီၣ်အဃိ ကဘၣ်စံးဘျုးစံးဖှိၣ် ကစၢ်ယွၤအလီၢ် ကဒူးကဒ့ၣ်ကစၢ်ယွၤလၢ ထံၣ်ဘၣ်တၢ်ကီတၢ်ခဲအဃိလီၤ. အဃိ တၢ်ကဒူးကဒ့ၣ်န့ၣ် ပာ်ဖျါထီၣ်ဝဲ တၢ်တပာ်လုၢ်ပာ်ပှ့ၤ ယဟိဝၤယွၤ အတၢ်ကတဲာ်ကတီၤတဖၣ်လီၤ. အဃိ ကစၢ်ယွၤတဲဝဲလၢ “တၢ်အိၣ်ဖှိၣ်အအၢအသီအံၤ ကကဒူးကဒ့ၣ်တၢ်လၢယလိၤ ဆံးယံာ်လဲၣ်” န့ၣ်တမ့ၢ်တၢ်လၢ အလီၤကမၢကမၣ်ဘၣ်.—၄ မိၤၡ့ ၁၄:၂၇; ၂၁:၅.
it-2 ၇၁၉ ¶၄
တၢ်အ့ၣ်လိာ်ဆိးက့
တၢ်ကဒူးကဒ့ၣ်. တၢ်ကဒူးကဒ့ၣ်န့ၣ် မၤလီၤစၢ်ပှၤသးအဂံၢ်အဘါ ဒီးမၤဟးဂီၤတၢ်လီၤ. ပှၤအံၣ်စရ့လးဖိတဖၣ်န့ၣ် တမ့ၢ်ထဲအသ့ၣ်နီၣ်ထီၣ်က့ၤဝဲ ကီၢ်အဲၤကူပတူးဘၣ်. အဝဲသ့ၣ် ကဒူးကဒ့ၣ် ယဟိဝၤယွၤ ဒီးဃုဝဲပှၤလၢအတီခိၣ်ရိၤမဲတၢ် စီၤမိၤၡ့ ဒီးစီၤအၤဟရိၣ် အတၢ်ကမၣ်လီၤ. (၂ မိၤ. ၁၆:၂, ၇) လၢခံန့ၣ် မ့ၢ်လၢအဝဲသ့ၣ် ကဒူးကဒ့ၣ်တၢ်အဃိ စီၤမိၤၡ့ အသးဟးဂီၤတုၤဒၣ်လဲာ် အဲၣ်ဒိးသံဝဲလီၤ. (၄ မိၤ. ၁၁:၁၃-၁၅) တၢ်ကဒူးကဒ့ၣ်တၢ်န့ၣ် မၤဘၣ်ဒိပှၤလၢ အကဒူးကဒ့ၣ်တၢ်တဖၣ် စ့ၢ်ကီးလီၤ. အဝဲသ့ၣ် ကဒူးကဒ့ၣ်ဝဲ စီၤမိၤၡ့ သနာ်က့ ယဟိဝၤယွၤ ပာ်ဝဲဒ် ပှၤကဒူးကဒ့ၣ် အဝဲအတၢ်တီခိၣ်ရိၤမဲအသိးလီၤ. (၄ မိၤ. ၁၄:၂၆-၃၀) ခီဖျိလၢ တၢ်ကဒူးကဒ့ၣ်အဃိ ပှၤဘၣ်သံဝဲအါမးလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၃၀၉
ကိၣ်မၤနၤ
အက့ၢ်အဂီၤ ဒီးအလွဲၢ်. ကိၣ်မၤနၤန့ၣ် အလွဲၢ်ဝါဒ် “နၣ်နၣ်အချံအသိး” လီၤ. လီၤဂာ်ဒ်ပလဲ ဒီးဘံၣ်ဒ့လယၣ်အထုးလၢအဖျါဆှံန့ၣ်လီၤ. လီၤဂာ်ဒ် “ကိၣ်ဘ့ၣ်ဘၣ် ဘူတလါဖိတဖၣ်လၢ အဘၣ်တၢ်မၤအီၤဃုာ်ဒီးကနဲစီန့ၣ်လီၤ.” ကိၣ်မၤနၤန့ၣ် ပှၤဂံာ်အီၤ မ့တမ့ၢ် ပှၤတိၢ်အီၤ ဒီးပှၤချီအီၤလီၤ. ပှၤမၤအီၤဒ် ကိၣ်အဖျၢၣ်ဖိတဖၣ် မ့တမ့ၢ် ပှၤသၣ်ဘၢအီၤသ့စ့ၢ်ကီးလီၤ.—၂ မိၤ. ၁၆:၂၃, ၃၁, ခ့ခါစှီၤကျိာ်; ၄ မိၤ. ၁၁:၇, ၈.
လါမၢ်ၡး ၂၂-၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၁၃-၁၄
“တၢ်နာ်ဟ့ၣ်ပှၤ တၢ်သူၣ်ဒူသးဒူ”
တၢး၀၆ ၁၀/၁ ၁၆-၁၇ ¶၅-၆
တၢ်နာ်ဒီး တၢ်ပျံၤယွၤန့ၣ် ဟ့ၣ်ပှၤတၢ်သူၣ်ဒူသးဒူ
၅ ပှၤကွၢ်ဟုၣ်တၢ်ခံဂၤလၢအမ့ၢ် စီၤယိၤၡူ ဒီးစီၤကၤလ့းန့ၣ် အသးဆူၣ်လၢ ကလဲၤနုာ်လီၤဆူ ကီၢ်တၢ်စံးပာ်အပူၤလီၤ. အဝဲသ့ၣ် တဲဝဲလၢ ပှၤကနၤဧၣ်ဖိတဖၣ်န့ၣ် “မ့ၢ်ဝဲလၢတၢ်အီၣ်လၢပဂီၢ်လီၤ. အတၢ်တဒီတဒါန့ၣ် ဟါမၢ်ကွံာ်လံ ဒီးယွၤအိၣ်ဒီးပှၤလီၤ. ပျံၤအီၤတဂ့ၤ.” (၄ မိၤၡ့ ၁၄:၉) စီၤယိၤၡူဒီး စီၤကၤလ့းန့ၣ် တအိၣ်ဒီးတၢ်ကူၣ်သ့ဘၣ် ဒီးထံၣ်တၢ်ထဲအဂ့ၤတခီတၢၤန့ၣ်ဧါ. တမ့ၢ်ဒ်န့ၣ်ဘၣ်. ယဟိဝၤယွၤ မၤမဲာ်ဆှး ကီၢ်အဲၤကူပတူးဒီး အကစၢ်ယွၤတဖၣ် ခီဖျိလၢ တၢ်နးတၢ်ဖှီၣ်အခါ ၁၀ န့ၣ်အဝဲသ့ၣ်ဒီး ပှၤအဂၤတဖၣ် ထံၣ်ဘၣ်ဝဲလီၤ. လၢခံယဟိဝၤယွၤ မၤလီၤဘျၢကွံာ် စီၤပၤဖၤရိၤ ဒီးအသုးမုၢ်တဖၣ်လၢ ပီၣ်လဲၣ်ဂီၤအပူၤန့ၣ် အဝဲသ့ၣ် ထံၣ်ဘၣ်ဝဲစ့ၢ်ကီးလီၤ. (စံးထီၣ်ပတြၢၤ ၁၃၆:၁၅) အဃိ ပှၤကွၢ်ဟုၣ်တၢ် အဂၤတဆံ ဒီးပှၤလၢအဒိကနၣ်အကလုၢ်လၢ အပျံၤတၢ်တဖၣ်န့ၣ် တဲပူၤဖျဲးအသး အလီၢ်တအိၣ်ဘၣ်. လၢတၢ်သူၣ်အုးသးအုးအပူၤ ယဟိဝၤယွၤ တဲဝဲလၢ “လၢကယဲၢ်တၢ်လီၤလးလၢ ယမၤလၢအကျါခဲလၢာ်အဃိန့ၣ် တနာ်ယၤဘၣ်ဒီးကအိၣ်ဆံးယံာ်လဲၣ်. —၄ မိၤၡ့ ၁၄:၁၁.
၆ ယဟိဝၤယွၤ ပာ်ဖျါထီၣ်ဝဲလၢ အဝဲသ့ၣ်ပျံၤတၢ်န့ၣ် မ့ၢ်လၢအတၢ်နာ်တအိၣ်ဘၣ်အဃိလီၤ. မ့ၢ်လီၤ. တၢ်နာ်ဒီး တၢ်သူၣ်ဒူသးဒူန့ၣ် ဘၣ်ထွဲလိာ်အသးအဃိ ခရံာ်ဖိတၢ်အိၣ်ဖှိၣ်ဒီး တၢ်ဒုးလၢနီၢ်သးတခီအဂ့ၢ်န့ၣ် တၢ်မၢဖိယိၤဟၣ် ကွဲးဝဲဒ်အံၤလီၤ. “လၢပတၢ်နာ်အဃိ ပမၤနၢၤဟီၣ်ခိၣ်လီၤ.” (၁ ယိၤဟၣ် ၅:၄) မုၢ်မဆါတနံၤအံၤ ယဟိဝၤပှၤအုၣ်အသး ဃုကကွဲၢ်ဘျဲၣ်လၢ ဟီၣ်ခိၣ်ဒီဘ့ၣ်န့ၣ် သးပှၢ်မ့ၢ်ဂ့ၤ, သးစၢ်မ့ၢ်ဂ့ၤ, တၢ်အိၣ်ဆူၣ်အိၣ်ချ့ဂ့ၤမ့ၢ်ဂ့ၤ, တဂ့ၤဘၣ်မ့ၢ်ဂ့ၤ အဝဲသ့ၣ်အိၣ်ဒီး တၢ်နာ်ဒ် စီၤယိၤၡူ ဒီးစီၤကၤလ့းအသိးအဃိ စံၣ်တဲၤတဲလီၤ ယွၤအဘီအမုၢ် တၢ်သးခုကစီၣ်အဂ့ၢ်န့ၣ်လီၤ. အဝဲသ့ၣ် အဂံၢ်ဆူၣ် ဒီးအိၣ်ဒီးတၢ်သူၣ်ဒူသးဒူအဃိ ကယဲၢ်ဒူၣ်ဒါလၢ အမၤပတုာ်အဝဲသ့ၣ်န့ၢ်န့ၣ် တအိၣ်ဘၣ်.—ရိမ့ၤ ၈:၃၁.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၇၄၀
ထံကီၢ်လၢ ကစၢ်ယွၤဟ့ၣ် ပှၤအံၣ်စရ့လးဖိတဖၣ်
ထံကီၢ်လၢ ကစၢ်ယွၤ ဟ့ၣ်လီၤပှၤအံၣ်စရ့လးဖိတဖၣ်န့ၣ် မ့ၢ်ထံကီၢ်လၢ အဂ့ၤဒိၣ်မးတဘ့ၣ်လီၤ. စီၤမိၤၡ့ မၢလီၤပှၤကွၢ်ဟုၣ်တၢ်တဖၣ်လၢ ကလဲၤကွၢ်ဟုၣ်ဝဲ ကီၢ်တၢ်စံးပာ် ဒီးဟဲက့ၤစိာ် တၤသူတၤသၣ်လၢ အဟးထီၣ်လၢ ထံကီၢ်အဝဲန့ၣ်အပူၤလီၤ. ဖဲအဝဲသ့ၣ် ဟဲက့ၤအခါ ဟဲက့ၤစိာ်ဝဲ သလဲသၣ် ဒီးချၢၣ်ဒၢသၣ်တနီၤလီၤ. အဝဲသ့ၣ် ဟဲက့ၤကျီဝဲ စပံးသၣ်တချံၣ်န့ၣ် ဒိၣ်တလၢအဃိ ပှၤဘၣ်ယိးဝဲခံဂၤလီၤ. ဘၣ်ဆၣ် အဝဲသ့ၣ် အတၢ်နာ်တအိၣ်ဒီး ပျံၤတၢ်သနာ်က့ တဲဝဲလၢ ကီၢ်န့ၣ် “ယွၤမၤဝဲဒီးတၢ်နုၢ်ထံဒီးကနဲစီလီၤ.”—၄ မိၤ. ၁၃:၂၃, ၂၇.
လါမၢ်ၡး ၂၉–လါအ့ဖြ့ၣ် ၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၁၅-၁၆
“ဟးဆှဲး တၢ်ပာ်ထီၣ်ထီသး ဒီးတၢ်နာ်န့ၢ်လီၤသးအါတလၢတက့ၢ်”
တၢး၁၁ ၉/၁၅ ၂၇ ¶၁၂
ယဟိဝၤယွၤ သ့ၣ်ညါနၤဧါ
၁၂ စီၤကိၤရး နာ်ဝဲလၢ ပှၤတီခိၣ်ရိၤမဲ ပှၤအံၣ်စရ့လးဖိတဖၣ်လၢ ကလဲၤဆူ ကီၢ်တၢ်စံးပာ်အဂီၢ်န့ၣ် အကျိၤအကျဲကမၣ်ဝဲလီၤ. အံၣ်စရ့လး အပှၤသူၣ်က့သးပှၢ်အဂၤ ၂၅၀ စ့ၢ်ကီး ပာ်ဖှိၣ်ထီၣ်အသးဒီး စီၤကိၤရး ဒီးဂုာ်ကျဲးစၢးမၤဝဲ တၢ်ဆီတလဲလီၤ. စီၤကိၤရး ဒီးပှၤသ့ၣ်တဖၣ်အံၤန့ၣ် နာ်ဝဲလၢ အဝဲသ့ၣ်အိၣ်ဒီး တၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ်လီၤ. အဝဲသ့ၣ်တဲစီၤမိၤၡ့လၢ “ပှၤအိၣ်ဖှိၣ်ခဲလၢာ်န့ၣ် မ့ၢ်အစီဆှံကိးဂၤဒဲး, ဒီးယွၤအိၣ်လၢအကျါလီၤ. ဒီးသုပာ်ထီၣ်ထီသုသးလၢ ယွၤအတၢ်အိၣ်ဖှိၣ်အဖီခိၣ်န့ၣ် မ့ၢ်အဘၣ်မနုၤလဲၣ်.” (၄ မိၤၡ့ ၁၆:၁-၃) အဝဲသ့ၣ် နာ်န့ၢ်လီၤအသးအါတလၢ ဒီးပာ်ထီၣ်ထီအသးလီၤ. အဃိ စီၤမိၤၡ့ တဲအဝဲသ့ၣ်လၢ “ယွၤကလီၣ်ဖျါထီၣ်ပှၤလၢအမ့ၢ်အတၢ်”လီၤ. (ဖး ၄ မိၤၡ့ ၁၆:၅) လၢခံတနံၤ ဟါခီန့ၣ် စီၤကိၤရး ဒီးပှၤလၢအပူထီၣ်ထီဒါတၢ်တဖၣ် ဘၣ်သံဝဲခဲလၢာ်လီၤ.—၄ မိၤ. ၁၆:၃၁-၃၅.
တၢး၁၁ ၉/၁၅ ၂၇ ¶၁၁
ယဟိဝၤယွၤ သ့ၣ်ညါနၤဧါ
၁၁ ဘၣ်ဃးဒီး တၢ်ယူးယီၣ်ပာ်ကဲ ယဟိဝၤယွၤ အတၢ်ရဲၣ်တၢ်ကျဲၤ ဒီးအတၢ်ဆၢတဲာ်တဖၣ်န့ၣ်စီၤမိၤၡ့ ဒီးစီၤကိၤရး အတၢ်ပာ်သူၣ်ပာ်သး လီၤဆီလိာ်အသးလီၤ. ယဟိဝၤယွၤ အတၢ်ထံၣ်စ့ၢ်ကီးလီၤဆီလၢ အဝဲသ့ၣ်အဖီခိၣ် ခီဖျိလၢ အဝဲသ့ၣ် အတၢ်မၤအဃိလီၤ. စီၤကိၤရးမ့ၢ် ပှၤလ့ၤဝံဖိ စီၤကဃးအဒူၣ်ဖိထၢဖိ ဒီးအဝဲအိၣ်ဒီး တၢ်ခွဲးတၢ်ယာ်လီၤဆီလၢ ကစၢ်ယွၤ အတၢ်ဖံးတၢ်မၤအပူၤလီၤ. အဝဲထံၣ်ဘၣ်ဝဲ ပှၤအံၣ်စရ့လးဖိတဖၣ် ထူၣ်ဖျဲးထီၣ်လၢ ပီၣ်လဲၣ်ဂီၤလီၤ. ဖျါလၢ ဖဲယဟိဝၤယွၤ စံၣ်ညီၣ်ဝဲ ပှၤအံၣ်စရ့လးဖိလၢ တဒိကနၣ်တၢ်တဖၣ်လၢ ကစၢၢ်စံၤနါအခါ အဝဲအိၣ်လၢ ပှၤလၢအအိၣ်လၢ ယဟိဝၤယွၤအိၣ်တခီ အကျါလီၤ. အဝဲဒိးန့ၢ်ဘၣ် တၢ်ခွဲးတၢ်ယာ်လၢ စိာ်ဘၣ်ဝဲ တလါစီဆှံစ့ၢ်ကီးလီၤ. (၂ မိၤ. ၃၂:၂၆-၂၉; ၄ မိၤ. ၃:၃၀, ၃၁) အဝဲမ့ၢ် ပှၤတဂၤလၢအတီဒီး ယဟိဝၤယွၤလၢ အနံၣ်ဖးယံာ် ဒီးပှၤအံၣ်စရ့လးဖိအါတက့ၢ်န့ၣ် ယူးယီၣ်ပာ်ကဲအီၤလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၈ ၉/၁ ၂၀ ¶၁-၂
မၤလီၤတံၢ်လၢ နပာ်ဆိ တၢ်လၢနကြၢးပာ်ဆိအီၤ တဖၣ်
ဘၣ်ဃးဒီး တၢ်ဂ့ၢ်အံၤန့ၣ် ယဟိဝၤယွၤ ပာ်ဝဲလၢ တၢ်အရ့ဒိၣ်န့ၣ်လီၤ. လံာ်စီဆှံပာ်ဖျါထီၣ်ဝဲလၢ “ဒီးယွၤစံးဘၣ်စီၤမိၤၡ့ , ပှၤတဂၤန့ၣ် ကဘၣ်တၢ်မၤသံအီၤသပှၢ်တၢၢ်လီၤ.” (၄ မိၤၡ့ ၁၅:၃၅) ဘၣ်ဃးဒီး ပှၤတဂၤအံၤ အတၢ်မၤန့ၣ် ဘၣ်မနုၤအဃိ ယဟိဝၤယွၤ ထံၣ်ဝဲဒ် တၢ်လၢအရ့ဒိၣ်တမံၤလဲၣ်.
ပှၤကထၢဖှိၣ်သ့ၣ်မုၢ်ဒီး ပှၤကမၤတၢ်မၤလၢ နီၢ်ခိတၢ်လုၢ်အီၣ်သးသမူအဂီၢ်န့ၣ် တၢ်ဆၢကတီၢ်အိၣ်ဝဲ ဃုသီလီၤ. မ့မ့ၢ် မုၢ်နွံသီတသီန့ၣ် ဘၣ်တၢ်ပာ်ပနီၣ်ဃာ်အီၤလၢ နီၢ်သးတၢ်လိၣ်ဘၣ်တဖၣ်အဂီၢ်လီၤ. တၢ်ထၢသ့ၣ်မုၢ်န့ၣ် တမ့ၢ်တၢ်လၢ အကမၣ်သနာ်က့ မ့ၢ်လၢအဝဲသူဝဲ တၢ်ဆၢကတီၢ်လၢ ဘၣ်တၢ်ပာ်ပနီၣ်အီၤလၢ တၢ်ဘူၣ်ထီၣ်ဘါထီၣ် ယဟိဝၤယွၤအဂီၢ်အဃိကမၣ်ဝဲလီၤ. ခရံာ်ဖိတဖၣ် တအိၣ်လၢ စီၤမိၤၡ့ အတၢ်သိၣ်တၢ်သီ အဖီလာ်သနာ်က့ တၢ်ဂ့ၢ်အံၤ ဒုးသ့ၣ်ညါပှၤလၢ ပကဘၣ်ပာ်ဆိ တၢ်လၢပကြၢးပာ်ဆိအီၤ လၢညါတဖၣ်လီၤ. —ဖံလံးပံၤ ၁:၁၀.
လါအ့ဖြ့ၣ် ၅-၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၁၇-၁၉
“ယမ့ၢ် . . . နတၢ်န့ၢ်သါ”
တၢး၁၁ ၉/၁၅ ၁၃ ¶၉
နဒုးကဲထီၣ် ယဟိဝၤယွၤလၢနဂီၢ် နတၢ်န့ၢ်သါန့ၣ်ဧါ
၉ ဆိကမိၣ်ကွၢ် ပှၤလ့ၤဝံဖိလၢ တန့ၢ်သါဘၣ် ဟီၣ်ခိၣ်လီၢ်တဖၣ်န့ၣ်တက့ၢ်. အဝဲသ့ၣ်န့ၣ် ဘၣ်မၤတၢ်လၢ တၢ်ဘူၣ်ထီၣ်ဘါထီၣ်စီဆှံအဂီၢ်အဃိ လၢအဝဲသ့ၣ် အနီၢ်ခိ တၢ်လိၣ်ဘၣ်အဂီၢ် ဘၣ်ပာ်ဂံၢ်ပာ်ဘါဝဲ ယဟိဝၤယွၤလၢ အတဲအဝဲသ့ၣ်လၢ “ယမ့ၢ်နဂီၢ် ဒီးနတၢ်န့ၢ်သါလီၤ.” (၄ မိၤ. ၁၈:၂၀) ဒ်ပှၤလုၢ်တၢ်အဒိၣ် ဒီးပှၤလ့ၤဝံဖိတဖၣ်အသိး ပတမၤတၢ်လၢ တၢ်လုၢ်ဟံၣ်ပူၤဘၣ် သနာ်က့ ပကွၢ်လိမၤဒိး အဝဲသ့ၣ် အတၢ်ပာ်သူၣ်ပာ်သးသ့ခီဖျိ ပနာ်လၢ ယဟိဝၤယွၤ ကဆီၣ်ထွဲ မၤစၢၤပှၤန့ၣ်လီၤ. မ့ၢ်လၢပအိၣ်မူဘၣ်လၢ မုၢ်နံၤအခံကတၢၢ် အလီၢ်ခံကတၢၢ်အဃိ ကကီထီၣ်လၢ ပကဂ့ၢ်လိာ် ဆၣ်ဖိကီၢ်ဖိလၢ အအၢတဒုအတၢ်ပနီၣ် ဒီးအိၣ်လီၤဆီဒီး ဟီၣ်ခိၣ်အဂီၢ်လီၤ. အဃိ ပတၢ်နာ်လၢ ကစၢ်ယွၤ ကကတဲာ်ကတီၤန့ၢ်တၢ်လၢပဂီၢ်န့ၣ် အရ့ဒိၣ်အါန့ၢ်အလီၢ်လီၤ.—လီၣ်. ၁၃:၁၇.
တၢး၁၁ ၉/၁၅ ၇ ¶၄
ယဟိဝၤယွၤ မ့ၢ်ယဂီၢ် ယတၢ်န့ၢ်သါ
၄ ဖဲယဟိဝၤယွၤ ဃုထၢထီၣ်ဝဲ ပှၤလ့ၤဝံဖိတဖၣ်အခါ အဝဲကဲထီၣ်ဝဲ အဝဲသ့ၣ် အတၢ်န့ၢ်သါလၢ ကျဲဒ်လဲၣ်. အဝဲသ့ၣ် တန့ၢ်သါဘၣ် ဟီၣ်ခိၣ်လီၢ်သနာ်က့ ဒိးန့ၢ်ဘၣ်ဝဲ တၢ်ခွဲးတၢ်ယာ်လၢ အလုၢ်ဒိၣ်ပှ့ၤဒိၣ်လၢ အမၤဘၣ် ကစၢ်ယွၤအတၢ်မၤအဃိ ယဟိဝၤယွၤ ကဲထီၣ် အဝဲသ့ၣ်အတၢ်န့ၢ်သါလီၤ. “ပှၤလုၢ်တၢ်အဒိၣ်အလီၢ်န့ၣ် မ့ၢ်အတၢ်န့ၢ်သါလီၤ.” (ၡူ. ၁၈:၇) ပမ့ၢ်ကွၢ် ၄ မိၤၡ့ ၁၈:၂၀ တၢ်ကတိၤ အဖီခိၣ်ဒီး အဖီလာ်န့ၣ် ပသ့ၣ်ညါဘၣ်လၢ အဝဲသ့ၣ် ဒိးန့ၢ်ဘၣ်ဝဲ နီၢ်ခိတၢ်လိၣ်ဘၣ်တဖၣ် လၢလၢပှဲၤပှဲၤလီၤ. (ဖး ၄မိၤၡ့ ၁၈:၁၉, ၂၁, ၂၄ တက့ၢ်) ပှၤလ့ၤဝံဖိသ့ၣ်တဖၣ်န့ၣ် ဒိးန့ၢ်ဘၣ်ဝဲ “ဆံဆဲၣ်ပူတပူခဲလၢာ်လၢ အံၣ်စရ့လးအပူၤလၢပှၤလ့ၤဝံဖိလၢ တၢ်န့ၢ်သါအဂီၢ်လၢ အတၢ်မၤလၢအမၤဝဲအဃိ, တၢ်အိၣ်ဖှိၣ်အဒဲအတၢ်မၤန့ၣ်လီၤ.” အဝဲသ့ၣ် ကဒိးန့ၢ်ဘၣ်ဝဲ ပှၤအံၣ်စရ့လးဖိတဖၣ် အတၤသူတၤသၣ် ဒီးအဆၣ်ဖိကီၢ်ဖိတဖၣ်အကျါ အမၠးကယၤ ၁၀ န့ၣ်လီၤ. ပှၤလ့ၤဝံဖိတဖၣ်စ့ၢ်ကီးတၢ်လၢ အဝဲသ့ၣ် ဒိးန့ၢ်ဘၣ်ဝဲတဖၣ်အကျါ ဆံဆဲၣ်ပူတပူလၢအမ့ၢ် “တၢ်အဂ့ၤကတၢၢ်” န့ၣ်ဘၣ်ဟ့ၣ်ဝဲ ပှၤလုၢ်တၢ်အဒိၣ်လီၤ. (၄ မိၤ. ၁၈:၂၅-၂၉) ပှၤလုၢ်တၢ်အဒိၣ်တဖၣ်န့ၣ် ဒိးန့ၢ်ဘၣ်ဝဲ “ကယဲၢ်တၢ်ဝံၢ်လၢတၢ်စီဆှံတဖၣ်အကျါ” လၢပှၤအံၣ်စရ့လးဖိတဖၣ် ဟဲစိာ်ဝဲဆူ ယွၤအအိၣ်န့ၣ်လီၤ. အဝဲသ့ၣ် နာ်ဝဲသ့ သပှၢ်တၢၢ်လၢ ယဟိဝၤယွၤ ကကွၢ်ထွဲ အဝဲသ့ၣ်န့ၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
g၀၂ ၆/၈ ၁၄ ¶၂
အံသၣ်—မ့ၢ်တၢ်လၢ အလုၢ်ဒိၣ်ပှ့ၤဒိၣ်တခါ
အံသၣ်န့ၣ် မ့ၢ်ဝဲတၢ်အိၣ်ဂၢၢ်ဆိးကျၢၤဒီး တၢ်တဟးဂုၤဟးဂီၤ အတၢ်ပနီၣ်တခါလီၤ. လၢတၢ်န့ၣ်အဃိ လံာ်စီဆှံအပူၤန့ၣ် တၢ်အၢၣ်လီၤအီလီၤလၢ ဘၣ်တၢ်ပာ်ဂၢၢ်ပာ်ကျၢၤအီၤတဖၣ်န့ၣ် ဘၣ်တၢ်ကိးအီၤလၢ “တၢ်အၢၣ်လီၤအီလီၤ အထူအယိာ် ဘၣ်ဃးဒီးအံသၣ်” လီၤ. ဒ်သိးပှၤကပာ်ဂၢၢ်ပာ်ကျၢၤ တၢ်အၢၣ်လီၤအီလီၤအဂီၢ် ပှၤလၢအပၣ်ဃုာ်လၢ တၢ်အၢၣ်လီၤအီလီၤအပူၤတဖၣ်န့ၣ် ဘၣ်အီၣ်သကိးဝဲ တၢ်အီၣ်လၢအပၣ်ဃုာ်ဒီး အံသၣ်န့ၣ်လီၤ. (၄ မိၤၡ့ ၁၈:၁၉) လၢစီၤမိၤၡ့ အတၢ်သိၣ်တၢ်သီအပူၤန့ၣ် တၢ်လုၢ်လၢ ပှၤလုၢ်ထီၣ်အီၤလၢ တၢ်လုၢ်လီၢ်တဖၣ်န့ၣ် ပှၤဘၣ်ဖှံအီၤဒီးအံသၣ် ဒီးအခီပညီမ့ၢ် တဟးဂီၤဘၣ် မ့တမ့ၢ် တအုၣ်ဘၣ်.
လါအ့ဖြ့ၣ် ၁၂-၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၂၀-၂၁
“ဖဲနထံၣ်ဘၣ် တၢ်ဆီၣ်သနံးအခါ ဆဲအိၣ်ဒီး တၢ်သးစူၤတက့ၢ်”
ဃုတၢ်သူၣ်စူၤသးစူၤ ဒီးမၤတၢ်ဘၣ်ယဟိဝၤယွၤအသး
၁၉ ပမ့ၢ်အိၣ်ဒီး တၢ်သူၣ်စူၤသးစူၤန့ၣ် ကမၤစၢၤပှၤလၢ ပကဟးဆှဲး တၢ်မၤကမၣ်တၢ်လီၤ. ဆိကမိၣ်ကွၢ်ကဒီး စီၤမိၤၡ့အဂ့ၢ်တက့ၢ်. ပှၤအံၣ်စရ့လးဖိတဖၣ် လဲၤတၢ်လၢ ပှၢ်မုၢ်ကနၢအပူၤကီကီခဲခဲ ဒီးဖဲအနံၣ် ၄၀ ဘူးကပှဲၤထီၣ်အခါ စီၤမိၤၡ့ အတၢ်သူၣ်စူၤသးစူၤ လီၤမၢ်ကွံာ်ဝဲလီၤ. ဖျါလၢအဒီပုၢ်ဝဲၢ်မုၣ်လၢ အမၤပူၤဖျဲး အသးသမူလၢ ကီၢ်အဲၤကူပတူးအပူၤန့ၣ် သံသဒၣ်ကွံာ်အီၤဒီး ဘၣ်တၢ်ခူၣ်လီၤအီၤလၢ ကၤဒ့ၣ်လီၤ. တကးဒံးဘၣ် ပှၤအံၣ်စရ့လးဖိတဖၣ် ကဒူးကဒ့ၣ်တၢ်လၢ ပှၤတကွၢ်ထွဲအီၤဂ့ၤဂ့ၤဘၣ်. ဖဲန့ၣ်အဆၢကတီၢ် အဝဲသ့ၣ် “ထိၣ်အ့ၣ်လိာ်ဆိးက့လိာ်အသးဒီး စီၤမိၤၡ့” လၢထံတအိၣ်ဘၣ်အဃိလီၤ. ယဟိဝၤယွၤဟ့ၣ် စီၤမိၤၡ့တၢ်စိတၢ်ကမီၤလၢ ကမၤတၢ်လီၤလးအါမံၤ ဘၣ်ဆၣ်စီၤမိၤၡ့ တကွၢ်လီၤထဲ အနီၢ်ကစၢ်အဘျုးဘၣ်ဒီး တီခိၣ်ရိၤမဲအဝဲသ့ၣ် သနာ်က့ အဝဲသ့ၣ် ကဒူးကဒ့ၣ်တၢ်ဒံးလီၤ. အဝဲသ့ၣ် ကဒူးကဒ့ၣ်တၢ်လၢ ထံတအိၣ်အဃိ တကးဒံးဘၣ် ကဒူးကဒ့ၣ်တၢ်လၢ စီၤမိၤၡ့အလိၤလီၤ. အဝဲသ့ၣ်တဲဝဲလၢ ခီဖျိစီၤမိၤၡ့အတၢ်ကမၣ်အဃိ အဝဲသ့ၣ် ဘၣ်လီၤဒိထံလီၤ.—၄ မိၤၡ့ ၂၀:၁-၅, ၉-၁၁.
ဃုတၢ်သူၣ်စူၤသးစူၤ ဒီးမၤတၢ်ဘၣ်ယဟိဝၤယွၤအသး
၂၀ မ့ၢ်လၢ စီၤမိၤၡ့သးထီၣ်တၢ် ဒိၣ်ဒိၣ်ကလဲာ်အဃိ အဝဲတအိၣ်ဒီး တၢ်သူၣ်စူၤသးစူၤလၢၤဘၣ်. ယဟိဝၤယွၤမၢ စီၤမိၤၡ့တဲတၢ်ဒီးလၢၢ်ဘၣ်ဆၣ် စီၤမိၤၡ့ တဲတၢ်ဒီးပှၢ်ဂီၢ်မုၢ်တဖၣ် ဆူၣ်ဆူၣ်ကိၤကိၤ ဒီးတဲဝဲလၢ အကမၤတၢ်လီၤလးလီၤ. ဝံၤဒီးအဝဲတီၢ်ဝဲလၢၢ်ခံထံၣ် ဒီးထံဟဲဟးထီၣ်ဝဲလီၤ. ခီဖျိလၢ အဝဲပာ်ထီၣ်ထီအသး ဒီးသးထီၣ်တၢ်ဒိၣ်မးအဃိ အဝဲမၤဘၣ် တၢ်ကမၣ်ဖးဒိၣ်လီၤ. (စံးထီၣ်ပတြၢၤ ၁၀၆:၃၂, ၃၃) စီၤမိၤၡ့အတၢ်သူၣ်စူၤသးစူၤ လီၤမၢ်ထဲတစိၢ်တလီၢ်ဖိ သနာ်က့ အဝဲတလဲၤနုာ်ဘၣ်ဆူ ကီၢ်တၢ်စံးပာ်အပူၤလၢၤဘၣ်.—၄ မိၤၡ့ ၂၀:၁၂.
၂၁ ပမ့ၢ်ကွၢ် တၢ်အဒိအတဲာ်အံၤန့ၣ် ပန့ၢ်ဘၣ် တၢ်မၤလိလၢ အလုၢ်ဒိၣ်ပှ့ၤဒိၣ်တဖၣ်လီၤ. အဆိကတၢၢ်န့ၣ် ပန့ၢ်ဘၣ်တၢ်မၤလိလၢ ပကဘၣ်ဂုာ်ကျဲးစၢးဒ်သိး ပကအိၣ်ဒီး တၢ်သူၣ်စူၤသးစူၤထီဘိလီၤ. ပမ့ၢ်တမၤဒ်န့ၣ်ထီဘိဘၣ်န့ၣ် လၢတၢ်တပာ်သူၣ်ပာ်သးအပူၤ ပကကဲထီၣ် ပှၤလၢအပာ်ထီၣ်ထီအသး ဒီးပကတဲကမၣ်ဘၣ်တၢ် ဒီးမၤကမၣ်ဘၣ်တၢ်လီၤ. ဒီးအဂၤတမံၤန့ၣ် ဖဲပသူၣ်ကိၢ်သးဂီၤအခါ ပကအိၣ်ဒီးတၢ်သူၣ်စူၤသးစူၤအဂီၢ် တညီဘၣ်. လၢတၢ်န့ၣ်အဃိ ဖဲပအိၣ်ဒီး တၢ်ကိၢ်တၢ်ဂီၢ်အခါ ပကဘၣ်ဂုာ်ကျဲးစၢးဒ်သိး ပကအိၣ်ဒီး တၢ်သူၣ်စူၤသးစူၤအဂီၢ်လီၤ.
တၢး၀၉ ၉/၁ ၁၉ ¶၅
စံၣ်ညီၣ်ကွီၢ်လၢ အအိၣ်လၢတၢ်မ့ၢ်တၢ်တီ တကပၤ
တၢ်ဂ့ၢ်တၢတမံၤန့ၣ် ကစၢ်ယွၤ တဟံးစုနဲၣ်ကျဲ စီၤမိၤၡ့လၢ ကဘၣ်တဲတၢ်ဘၣ်အဃိ အလီၢ်တအိၣ်လၢ အဝဲသ့ၣ် ကစံၣ်ညီၣ်ဝဲ ပှၤအံၣ်စရ့လးဖိတဖၣ်လၢ ပှၤပူထီၣ်တၢ်ဘၣ်. ခံမံၤတမံၤ စီၤမိၤၡ့ ဒီးစီၤအၤဟရိၣ်န့ၣ် တမၤလၤကပီၤဝဲ ယဟိဝၤယွၤဘၣ်. ကစၢ်ယွၤတဲဝဲလၢ “သုတနာ်ဘၣ်ယၤလၢ သုကပာ်စီဆှံယၤ” ဘၣ်. (အဆၢဖိ ၁၂) စီၤမိၤၡ့တဲဝဲလၢ “ပဘၣ်ဒုးဟဲထီၣ်ထံလၢ လၢၢ်အပူၤအံၤ, လၢသုဂီၢ်စ့ၢ်ကီးဧါ.” အဃိ ဖျါလၢ ပှၤလၢအမၤကဲထီၣ်ထံလၢ တၢ်လီၤလိၢ်လီၤလးအပူၤန့ၣ် တမ့ၢ်ယဟိဝၤယွၤဘၣ်. မ့ၢ်ဒၣ်အဝဲဒီး စီၤအၤဟရိၣ်န့ၣ်လီၤ. သၢမံၤတမံၤ ကစၢ်ယွၤ အတၢ်စံၣ်ညီၣ်အံၤန့ၣ် လီၤပလိာ်လိာ်အသးဒီး အတၢ်စံၣ်ညီၣ်လၢ အပူၤကွံာ်တဖၣ်လီၤ. လၢအပူၤကွံာ် ပှၤလၢအပူထီၣ်ထီဒါတၢ်တဖၣ် ကစၢ်ယွၤတပျဲလၢ အဝဲသ့ၣ် ကနုာ်လီၤဘၣ်လၢ ကီၢ်ကနၤဧၣ်အပူၤဘၣ်. အဃိ စီၤမိၤၡ့ဒီး စီၤအၤဟရိၣ်စ့ၢ်ကီး ဘၣ်တၢ်စံၣ်ညီၣ်အီၤ ဒ်န့ၣ်အသိးလီၤ. (၄ မိၤၡ့ ၁၄:၂၂, ၂၃) လွံၢ်မံၤတမံၤ စီၤမိၤၡ့ ဒီးအၤဟရိၣ်န့ၣ် မ့ၢ်ပှၤအံၣ်စရ့လးဖိ ခိၣ်နၢ်တဖၣ်လီၤ. ပှၤလၢအိၣ်ဒီး မူဒါအါတဖၣ်န့ၣ် ကဘၣ်ၡဲစရီ ဒီးကစၢ်ယွၤ အါန့ၢ်အန့ၣ်လီၤ.—လူၤကၣ် ၁၂:၄၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
မ့ၢ်နထံၣ်ပှၤဂၤ အတၢ်ဂံၢ်စၢ်ဘါစၢ်ဒ် ယဟိဝၤယွၤ ထံၣ်ဝဲအသိးဧါ
၁၂ မ့ၢ်နထံၣ် ပှၤဂၤ အတၢ်ဂံၢ်စၢ်ဘါစၢ် ဒ်ယဟိဝၤယွၤ ထံၣ်ဝဲအသိးဧါ. ခီဖျိလၢ စီၤအၤဟရိၣ် အတၢ်ကမၣ်အဃိ ယဟိဝၤယွၤ မ့ၢ်အဲၣ်ဒိးစံၣ်ညီၣ်အီၤန့ၣ် စံၣ်ညီၣ်ဝဲတဘျီဃီသ့လီၤ. တဘျီတခီၣ်န့ၣ် စီၤအၤဟရိၣ် အိၣ်ဒီးတၢ်ဂံၢ်စၢ်ဘါစၢ် သနာ်က့ အဝဲတမ့ၢ် ပှၤအၢပှၤသီတဂၤဘၣ်န့ၣ် ယဟိဝၤယွၤသ့ၣ်ညါဝဲလီၤ. ခီဖျိလၢ တၢ်အိၣ်သးလၢအကီအခဲ ဒီးပှၤအဂၤတဖၣ် အတၢ်ဆီၣ်သနံးအီၤအဃိ အဝဲမၤဘၣ် တၢ်ကမၣ်လီၤ. ဘၣ်ဆၣ် စီၤအၤဟရိၣ်န့ၣ် အၢၣ်လီၤအတၢ်ကမၣ် ဒီးတူၢ်လိာ် ယဟိဝၤယွၤ အတၢ်သိၣ်ဃီၣ်လီၤ. (၂ မိၤ. ၃၂:၂၆; ၄ မိၤ. ၁၂:၁၁; ၂၀:၂၃-၂၇) စီၤအၤဟရိၣ်န့ၣ် အဲၣ်ယဟိဝၤယွၤ ဒီးပီၢ်ယၢ်လီၤက့ၤအသးအဃိ ယဟိဝၤယွၤ ပျၢ်အတၢ်ကမၣ်လီၤ. လၢခံပူၤကွံာ် အနံၣ်အါမးဒၣ်လဲာ် စီၤအၤဟရိၣ် ဒီးအဟံၣ်ဖိဃီဖိတဖၣ်န့ၣ် ဘၣ်တၢ်သ့ၣ်ညါအီၤ ဒ်ပှၤလၢအတီဒီး ယဟိဝၤယွၤလီၤ.—စံး. ၁၁၅:၁၀-၁၂; ၁၃၅:၁၉, ၂၀.
g ၁/၁၅ ၉
ယပၢၤယတၢ်သးထီၣ် ကသ့ဒ်လဲၣ်
နကဘၣ်မၤဒ်လဲၣ်
ပာ်လီၤဖီတၢၣ်. တဘၣ်တဲလၢ “ယၤဒုယဒ်အံၤလီၤ” တဂ့ၤ. ဂုာ်ကျဲးစၢးလၢ ဃုလါ မ့တမ့ၢ် လၢတၢ်ဆၢကတီၢ်ဖုၣ်ကိာ် အတီၢ်ပူၤ နကဆီတလဲနသးန့ၣ်တက့ၢ်. ဖဲန့ၣ်အတီၢ်ပူၤ ကွဲးလီၤပာ် နတၢ်လဲၤထီၣ်လဲၤထီတဖၣ်တက့ၢ်. ဖဲနသးထီၣ်တၢ် ကိးဘျီဒဲးန့ၣ် ကွဲးလီၤပာ်လၢ (၁) ဘၣ်မနုၤလဲၣ်, (၂) ယမၤတ့ၢ်ဒ်လဲၣ်, (၃) ယမ့ၢ်မၤဒ်လဲၣ်န့ၣ် ကဂ့ၤလဲၣ်, ဘၣ်မနုၤအဃိလဲၣ်. လၢခံ နသးမ့ၢ်ဟဲထီၣ်န့ၣ် ဂုာ်ကျဲးစၢးမၤ ဒ်နကြၢးမၤအသိးတက့ၢ်. တၢ်ဟ့ၣ်ကူၣ်– ဖဲနပၢၤဃာ် နတၢ်သးထီၣ်န့ၢ်အခါ ကွဲးလီၤပာ်အီၤတက့ၢ်. ဒီးဖဲနပၢၤနသးန့ၢ်အခါ နတူၢ်ဘၣ်ဒ်လဲၣ်န့ၣ် ကွဲးလီၤပာ်အီၤတက့ၢ်.—လံာ်စီဆှံ အတၢ်ဟံးစုနဲၣ်ကျဲ-ကလီးစဲ ၃:၈.
တဘၣ်တဲဆၢက့ၤတၢ် မၤဆၢက့ၤတၢ်တဘျီဃီတဂ့ၤ. ဖဲနသးထီၣ်တၢ်လၢ တၢ်တမံၤမံၤအဃိန့ၣ် တဘၣ်သုတဲထီၣ်တၢ် ဒ်တၢ်အိၣ်လၢနသးပူၤအသိး တဘျီဃီတဂ့ၤ. မ့ၢ်သ့န့ၣ် သါသဖှိထီၣ်တက့ၢ်. အဲရံးလၢ အသးအိၣ် ၁၅ နံၣ်န့ၣ် တဲဝဲလၢ “နမ့ၢ်သါသဖှိထီၣ်န့ၣ် တၢ်ဆၢကတီၢ်ကအိၣ်လၢ နကဆိကမိၣ်ထီၣ်တၢ် ဒ်သိးနသုတမၤဘၣ်တၢ် မ့တမ့ၢ် တဲဘၣ်တၢ်တမံၤမံၤလၢ လၢခံနကပီၢ်ယၢ်လီၤက့ၤနသးတဂ့ၤအဂီၢ်လီၤ.”—လံာ်စီဆှံ အတၢ်ဟံးစုနဲၣ်ကျဲ– ကတိၤဒိ ၂၁:၂၃.
ဆိကမိၣ်န့ၢ်တၢ်လၢ ပှၤဂၤအဂီၢ်. တဘျီတခီၣ် နမ့ၢ်ဆိကမိၣ်တၢ်ထဲတခီတၢၤန့ၣ် နသးထီၣ်တၢ်သ့လီၤ. ဆိကမိၣ်န့ၢ်တၢ်လၢ ပှၤဂၤအဂီၢ်တက့ၢ်. သးစၢ်မုၣ်လၢ အမံၤမ့ၢ် ကၠဲးစံၤကၤ တဲဝဲလၢ “ပှၤတဂၤန့ၣ် မ့ၢ်ဖျါလၢ တအိၣ်ဒီးတၢ်ပာ်ကဲ နီတစဲးဒၣ်လဲာ် တၢ်ဂ့ၢ်အိၣ်ဝဲ တမံၤမံၤသ့လၢ နကနၢ်ပၢၢ်စၢၤအီၤအဂီၢ်လီၤ.”—လံာ်စီဆှံ အတၢ်ဟံးစုနဲၣ်ကျဲ– ကတိၤဒိ ၁၉:၁၁.
မ့ၢ်ကြၢးဟးထီၣ်ကွံာ်န့ၣ် ဟးထီၣ်ကွံာ်တက့ၢ်. လံာ်စီဆှံ တဲဝဲလၢ “တၢ်ဂ့ၢ်လိာ်ဘှီလိာ် တချုးဘၢၣ်ဖျိဒံးဘၣ်ဒီး ဆိတ့ၢ်တက့ၢ်.” (ကတိၤဒိ ၁၇:၁၄) ဒ်လံာ်စီဆှံ တဲဝဲအသိး နမ့ၢ်ဟးဆှဲး တၢ်အိၣ်သးလၢ ကမၤသးထီၣ်နၤန့ၣ် ကမ့ၢ်အဂ့ၤကတၢၢ်လီၤ. ဘၣ်ဆၣ် နမ့ၢ်ဆိကမိၣ်ဝံၤ ဆိကမိၣ်က့ၤ တၢ်ဂ့ၢ်သ့ၣ်တဖၣ်န့ၣ်န့ၣ် နသးကဟဲဒိၣ်ထီၣ်လီၤ. ဒဲနယၢၤ တဲဝဲလၢ “ယမၤနီၢ်ခိ တၢ်ဟူးတၢ်ဂဲၤအခါ ယတၢ်သူၣ်ကိၢ်သးဂီၤ လီၤစှၤဒီး ယပၢၤယသးန့ၢ်ဝဲလီၤ.”
ဂုာ်ကျဲးစၢး ကွၢ်ကပာ်ကွံာ်အီၤတက့ၢ်. လံာ်စီဆှံ တဲဝဲဒ်အံၤ”ဆိကမိၣ်လီၤသုသးလၢ သုလီၢ်မံပူၤန့ၣ်, ဒီးအိၣ်ဘှီၣ်ကလာ်တက့ၢ်.”(စံးထီၣ်ပတြၢၤ ၄:၄) နသးဘၣ်တံာ်တာ်အဘျီအိၣ်ဝဲန့ၣ် တမ့ၢ်တၢ်လၢအကမၣ်ဘၣ်. တၢ်လၢအရ့ဒိၣ်န့ၣ် မ့ၢ်တၢ်မနုၤလဲၣ်. ရံးခၠၢးတဲဝဲလၢ “နမ့ၢ်သးထီၣ်တၢ်လၢ ပှၤဂၤအဃိန့ၣ် အဝဲမၤနၢၤနၤလံ. အဃိ ပာ်နသးမုာ်မုာ် ဒီးဂုာ်ကျဲးစၢး ကွၢ်ကပာ်ကွံာ် အဝဲသ့ၣ် အတၢ်မၤန့ၣ်တက့ၢ်.” နမ့ၢ်မၤဒ်န့ၣ်န့ၣ် နပၢၤနတၢ်သးထီၣ်ကန့ၢ် ဒီးတၢ်သးထီၣ်န့ၣ် ပၢၤနၤတန့ၢ်လၢၤဘၣ်.
လါအ့ဖြ့ၣ် ၁၉-၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၂၂-၂၄
“ယဟိဝၤယွၤ ဒုးကဲထီၣ် တၢ်ဆိၣ်အၢလၢ တၢ်ဆိၣ်ဂ့ၤ”
bt ၅၃ ¶၅
“စံၣ်တဲၤတဲလီၤ တၢ်သးခုကစီၣ်လၢ ဘၣ်ဃးဒီး ယ့ၣ်ၡူးအဂ့ၢ်”
၅ ဒ်တၢယၤဖှိၣ်အစိၤအသိး မုၢ်မဆါတနံၤအံၤစ့ၢ်ကီး ပှၤမၤအၢမၤနး ကစၢ်ယွၤအပှၤကလုာ်တဖၣ် သနာ်က့ တၢ်စံၣ်တဲၤတဲလီၤ တၢ်မၤအံၤ တပတုာ်ဝဲဘၣ်. ခရံာ်ဖိတဖၣ် ဘၣ်တၢ်ဆှၢအီၤလၢ ဃိာ်တဖျၢၣ်ဘၣ်တဖျၢၣ် မ့တမ့ၢ် ထံကီၢ်တဘ့ၣ်ဘၣ်တဘ့ၣ် အဃိကဲထီၣ်တၢ်မၤစၢၤလၢ အဝဲသ့ၣ်ကစံၣ်တဲၤတဲလီၤ ဘီမုၢ်တၢ်သးခုကစီၣ် လၢပှၤလၢအအိၣ်ဖဲ တၢ်လီၢ်ဖဲန့ၣ်တဖၣ်အဂီၢ်လီၤ. အဒိ ဖဲဟီၣ်ခိၣ်တၢ်ဒုးခံဘျီတဘျီန့ၣ် ယဟိဝၤပှၤအုၣ်အသးတဖၣ် စံၣ်တဲၤတဲလီၤဘၣ်တၢ်လၢ နးစံၣ်အဃိာ်တဖၣ်အပူၤလီၤ. လၢဃိာ်ဖဲန့ၣ်န့ၣ် ပှၤကၠူဖိတဂၤလၢ အထံၣ်ဘၣ်ဒီး ယဟိဝၤပှၤအုၣ်အသးတဖၣ်န့ၣ် တဲဝဲဒ်အံၤ “ယဟိဝၤပှၤအုၣ်အသးလၢ အိၣ်လၢဃိာ်ပူၤတဖၣ်န့ၣ် အိၣ်ဒီးတၢ်သူၣ်ဂၢၢ်သးကျၢၤအဃိ ယနာ်လၢ အဝဲသ့ၣ်အတၢ်နာ်န့ၣ် သန့ၤထီၣ်အသးလၢ လံာ်စီဆှံလီၤ. အဃိ လၢခံယၤစ့ၢ်ကီး ယကဲထီၣ် ယဟိဝၤပှၤအုၣ်အသးတဂၤလီၤ.”
it-2 ၂၉၁
မၤနါစိၤတၢ်
တၢ်မၤနါစိၤတၢ်လၢ အထီဒါ ယဟိဝၤယွၤ. ဝံစီၤဘံးလၣ်န့ၣ် လီကီဝဲတိၢ်လၢ မိၤအးအစီၤပၤဘၤလး ကဟ့ၣ်အီၤအဃိ အဝဲဂုာ်ကျဲးစၢးဝဲ ဒ်သိးကဆိၣ်အၢဝဲ ပှၤအံၣ်စရ့လးဖိတဖၣ်လီၤ. ဘၣ်ဆၣ် ယဟိဝၤယွၤ တြီအီၤလီၤ. ဘၣ်ဃးဒီး စီၤဘံးလၣ်န့ၣ် စီၤပ့းတရူး ကွဲးဝဲလၢ “ကသ့ၣ်ယီၤလၢ အတဲတၢ်တသ့ဘၣ်န့ၣ် တဲထီၣ်တၢ်လၢ ပှၤဟီၣ်ခိၣ်ဖိအကလုၢ် ဒီးတြီဃာ်ဝံတဂၤအံၤ အကျဲနါစိၤန့ၣ်လီၤ.” ဘၣ်ဃးဒီး စီၤဘံးလၣ် မၤနါစိၤတၢ်န့ၣ် တၢ်မၢဖိ ပ့းတရူး သူဝဲကြံးအတၢ်ကတိၤ ပၣ်ရၣ်ဖရိၣ်နံၣ်ယၤ (pa·ra·phro·niʹa) န့ၣ် အခီပညီအိၣ်လၢ “ပှၤသးတလၢဘၣ်လီၤ.”—၂ ပ့း. ၂:၁၅, ၁၆; ၄ မိၤ. ၂၂:၂၆-၃၁.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၄ ၈/၁ ၂၇ ¶၂
လံာ်စီဆှံအတၢ်ပာ်ဖျါလၢ လံာ် ၄ မိၤၡ့အဂီၢ်
၂၂:၂၀-၂၂—ဘၣ်မနုၤအဃိ ယဟိဝၤယွၤ အသးထီၣ် စီၤဘံးလၣ်လဲၣ်. ယဟိဝၤယွၤ မၤလိာ်ဝဲ စီၤဘံးလၣ်လၢ တဘၣ်ဆိၣ်ဃီၣ်ဝဲ ပှၤအံၣ်စရ့လးဖိတဖၣ်ဘၣ်. (၄ မိၤၡ့ ၂၂:၁၂) ဘၣ်ဆၣ် ဝံအံၤအိၣ်ဒီးတၢ်တိာ်ပာ်လၢ ကဆိၣ်အၢဝဲ ပှၤအံၣ်စရ့လးဖိတဖၣ်အဃိ အဝဲလဲၤပိာ်ဝဲ စီၤဘၤလး အပှၤတဖၣ်အခံလီၤ. စီၤဘံးလၣ်န့ၣ် အဲၣ်ဒိးဒိးန့ၢ်ဘၣ်ဝဲ မိၤအးအစီၤပၤ အတၢ်ဘၣ်သး ဒီးအခိၣ်ဖးန့ၣ်လီၤ. (၂ ပ့းတရူး ၂:၁၅, ၁၆; ယူဒၤ ၁၁) ဖဲစီၤဘံးလၣ် ကဆိၣ်အၢဝဲ ပှၤအံၣ်စရ့လးဖိတဖၣ်အလီၢ် ဘၣ်ဆိၣ်ဂ့ၤဝဲအခါဒၣ်လဲာ် အဝဲဂုာ်ကျဲးစၢးဝဲ ဒ်သိးကဒိးန့ၢ်ဘၣ် စီၤပၤအတၢ်ဘၣ်သး ခီဖျိ ဟ့ၣ်ကူၣ်ဝဲလၢ ကသူဝဲ ပိာ်မုၣ်လၢအဘူၣ်ထီၣ်ဘါထီၣ် ဘဧၤလး လၢကကွဲန့ၢ်လွဲန့ၢ်ဝဲ ပှၤအံၣ်စရ့လး ပိာ်ခွါတဖၣ်အဂီၢ်လီၤ. (၄ မိၤၡ့ ၃၁:၁၅, ၁၆) အဃိ ကစၢ်ယွၤ အသးထီၣ် စီၤဘံးလၣ်န့ၣ် မ့ၢ်လၢအတၢ်သူၣ်လီသးကွံအဃိလီၤ.
လါအ့ဖြ့ၣ် ၂၆–လါမ့ၤ ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၄ မိၤၡ့ ၂၅-၂၆
“ပှၤတဂၤအဃိ တၢ်ဆီတလဲအိၣ်ထီၣ်သ့ဧါ”
“ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ”
ပှၤတခွဲညၣ်ဖိတဂၤ လဲၤဝဲဆူတၢ်လီၢ်လၢ အလဲၤဝဲမုာ်ကတၢၢ်တတီၤ ဒ်သိးကတခွဲညၣ်အဂီၢ်လီၤ. အဝဲသးလီဝဲ ညၣ်လီၤလီၤဆီဆီတကလုာ်န့ၣ်လီၤ. အဝဲဃုထၢဝဲ ညၣ်ဆၣ်ဒီးဘျးထီၣ်ဝဲ လၢတခွဲလိၤဝံၤအလီၢ်ခံ စဲၤလီၤဝဲတခွဲလၢ ထံကျါလီၤ. တယံာ်ဘၣ်န့ၣ် တခွဲပျံၤဖ့ၣ်ဆၢထီၣ်ဝဲ, တခွဲဘိက့ၣ်လီၤဒီး အဝဲထုးထီၣ်ဝဲတခွဲလီၤ.
၂ ပှၤဟီၣ်ခိၣ်ဖိတဖၣ်စ့ၢ်ကီး ဘၣ်ဘျးလၢကျဲအကလုာ်ကလုာ်လီၤ. အဒိ ဖဲပှၤအံၣ်စရ့လးဖိတဖၣ် လဲၤတၢ်ဘူးကတုၤလၢ ကီၢ်တၢ်စံးပာ်အခါ အဝဲသ့ၣ်သူၣ်ဒဲလၢ ကီၢ်မိၤအးပျီပူၤန့ၣ်လီၤ. ကီၢ်မိၤအးအစီၤပၤ အၢၣ်လီၤဝဲပှၤတဂၤလၢ အမံၤမ့ၢ် စီၤဘံးလၣ်လၢ နမ့ၢ်ဆိၣ်အၢ ပှၤအံၣ်စရ့လးဖိန့ၣ် ယကဟ့ၣ်နၤစ့အါမးလီၤ. လၢခံန့ၣ် စီၤဘံးလၣ်ဃုကျဲလၢ တၢ်ဆိၣ်အၢကလီၤဘၣ် ပှၤအံၣ်စရ့လးဖိတဖၣ်အဂီၢ်လီၤ. စီၤဘံးလၣ်ကူၣ်ထီၣ်ဖးလီၤဝဲလၢ အဝဲကသူဝဲညၣ်ဆၣ်လၢအမ့ၢ် ပှၤမိၤအးပိာ်မုၣ်သးစၢ်တဖၣ် လၢအလီၤထုးန့ၢ်သူၣ်ထုးန့ၢ်သးန့ၣ်လီၤ.—၄ မိၤၡ့ ၂၂:၁-၇; ၃၁:၁၅, ၁၆; လီၣ်ဖျါ ၂:၁၄.
“ဃ့ၢ်ဟးဆှဲးကွံာ် တၢ်မၤကမၣ်မုၣ်ကမၣ်ခွါ”
၄ ဘၣ်မနုၤအဃိ ပှၤအံၣ်စရ့လးဖိအါဂၤ မၤကမၣ်တၢ် ဒ်စီၤဘံးလၣ် ကူၣ်ထီၣ်ဖးလီၤဝဲအသိးလဲၣ်. ဖဲန့ၣ်အခါ အဝဲသ့ၣ်ဆိကမိၣ်ထဲ အနီၢ်ကစၢ်တၢ်သူၣ်လီသးကွံ ဒီးသးပ့ၤနီၣ်ကွံာ်တၢ်လၢ ယဟိဝၤယွၤ မၤန့ၢ်အီၤတဖၣ်န့ၣ်လီၤ. ယဟိဝၤယွၤ မၤထူၣ်ဖျဲးပှၤအံၣ်စရ့လးဖိလၢ ကီၢ်အဲၤကူပတူး, ဒုးအီၣ်ဒုးအီအဝဲသ့ၣ်လၢ ပှၢ်မုၢ်ကနၢ, ဒီသဒၢအဝဲသ့ၣ်ဒီး ဆှၢအဝဲသ့ၣ်ဘူးကတုၤလၢ ကီၢ်တၢ်စံးပာ်န့ၣ်လီၤ. လၢတၢ်န့ၣ်အဃိ ပှၤအံၣ်စရ့လးဖိတဖၣ် ကြၢးတီလၢ ကစၢ်ယွၤအဖီခိၣ်န့ၣ်လီၤ. (ဧ့ၤဘြံၤ ၃:၁၂) ဘၣ်ဆၣ် တၢ်ကွဲန့ၢ်လွဲန့ၢ်အဝဲသ့ၣ်လၢ ကမၤကမၣ်မုၣ်ကမၣ်ခွါန့ၣ်လီၤ. ဘၣ်ဃးဒီး တၢ်ဂ့ၢ်တခါအံၤ တၢ်မၢဖိပီလူးတဲဝဲလၢ “ဒီးသုတမၤကမၣ်မုၣ်ကမၣ်ခွါ, ဒ်အဝဲသ့ၣ်တနီၤနီၤ မၤကမၣ်မုၣ်ကမၣ်ခွါ, ဒီးလီၤဃံၤဝဲခံကလးသၢကထိလၢ မုၢ်တနံၤဃီအသိးန့ၣ်တဂ့ၤ.”—၁ ကရံၣ်သူး ၁၀:၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၃၅၉ ¶၁-၂
ထံဆၢကီၢ်ဆၢ
ပှၤအံၣ်စရ့လးဖိတဖၣ် ဖဲအနီၤလီၤဝဲ ဟီၣ်ခိၣ်လီၢ်အခါ အဝဲသ့ၣ် သန့ၤထီၣ်ဝဲလၢ တၢ်ဂ့ၢ်ခံမံၤအံၤလီၤ. အဝဲသ့ၣ် ဖးတၢ် ဒီးကွၢ်ဝဲလၢ ပှၤအါပှၤစှၤအဖီခိၣ် ဒီးနီၤလီၤဝဲလီၤ. ဘၣ်သ့ၣ်သ့ၣ် ကလုာ်ဒူၣ်တဒူၣ်စုာ်စုာ်န့ၣ် ကဘၣ်နီၤလီၤလိာ်အသး တၢ်လီၢ်လၢအဝဲသ့ၣ် ဒိးန့ၢ်ဘၣ်ဝဲအပူၤန့ၣ်လီၤ. လၢတၢ်န့ၣ်အဃိ တၢ်လီၢ်လၢ တၢ်န့ၢ်သါအဂီၢ် အဆၢတဖၣ်န့ၣ် ဘၣ်တၢ်ပာ်ဖျါထီၣ်အီၤလၢ ပီၣ်လဲၣ်နံၤအသရ့ၤ, ကစၢၢ်ကလိ, မုၢ်ထီၣ်, မုၢ်နုာ်, ကလံၤထံး ဒီးကလံၤစိး သ့ၣ်တဖၣ်န့ၣ်လီၤ. တၢ်ဆၢတဲာ်လၢ အဝဲသ့ၣ် ဒိးန့ၢ်ဘၣ်ဝဲလၢ ဖးတၢ်အဃိန့ၣ် ဟဲလၢယဟိဝၤယွၤအအိၣ်အဃိ ကလုာ်ဒူၣ်တဖၣ်န့ၣ် တသးက့ၣ်လိာ်အသး ဒီးတအ့ၣ်လိာ်ဆိးက့လိာ်အသးဘၣ်. (ကတိၤ. ၁၆:၃၃) ခီဖျိလၢ ကစၢ်ယွၤ တီခိၣ်ရိၤမဲအဝဲသ့ၣ်လၢ ကျဲဒ်အံၤအဃိ ဒ်စီၤယၤကိာ် တဲဆိပာ်ဝဲ ဘၣ်ဃးဒီး ကလုာ်ဒူၣ်တဒူၣ်စုာ်စုာ် လၢ ၁ မိၤၡ့ ၄၉:၁-၃၃ အပူၤန့ၣ် လၢပှဲၤထီၣ်ဝဲန့ၣ်လီၤ.
တၢ်ဖးလီၤန့ၢ်ဝဲ ကလုာ်ဒူၣ်တဒူၣ်စုာ်စုာ်အဂီၢ် တၢ်လီၢ်တၢ်ကျဲဝံၤအလီၢ်ခံ အဝဲသ့ၣ် ဆဲးမၤကဒီးဝဲ လၢခံတဆီလီၤ. အဝဲသ့ၣ် သန့ၤထီၣ်ဝဲလၢ တၢ်လီၢ်အလဲၢ်အထီ ဒီးနီၤလီၤဝဲ ပှဲၤသိးသိးလီၤ. “ဖးတၢ်သတးဒီး, သုဘၣ်နီၤဖးထံဧိၤကီၢ်ဧိၤအဆၢလၢ တၢ်န့ၢ်သါလၢ သုဒူၣ်တဖၣ်အဂီၢ်လီၤ. လၢပှၤအါတက့ၢ် တဖၣ်န့ၣ် သုဘၣ်ဟ့ၣ်အီၤလၢ တၢ်န့ၢ်သါတၢ်လၢအအါ, ဒီးပှၤလၢအစှၤတက့ၢ်တဖၣ်န့ၣ် သုဘၣ်ဟ့ၣ်အီၤလၢ တၢ်န့ၢ်သါတၢ်လၢအစှၤလီၤ. ပှၤဘၣ်အိၣ်လၢအလီၢ်, ဖဲအဂီၢ်လီၤဘၣ်လၢဖးတၢ်လီၤ. ဒ်သုပၢ်အဒူၣ်တဖၣ်အသိးန့ၣ်, သုကန့ၢ်ဘၣ်သါတၢ်လီၤ.” (၄ မိၤ. ၃၃:၅၄) အဝဲသ့ၣ် ဖးဒီးဆၢတဲာ်ဝဲ ဟီၣ်ခိၣ်လီၢ်ဝံၤသနာ်က့ မ့ၢ်အဲၣ်ဒိးမၤဝဲတၢ်ဆီတလဲန့ၣ် မၤဝဲသ့လီၤ. လၢတၢ်န့ၣ်အဃိ တၢ်လီၢ်လၢ ယူဒၤအဒူၣ်ဖိထၢဖိတဖၣ် ဒိးန့ၢ်ဘၣ်ဝဲန့ၣ် လဲၢ်တလၢအဃိ ဟ့ၣ်လီၤဝဲ ပှၤစူၤမ့းအိၣ်ဖိတဖၣ် တနီၤလီၤ.—ၡူ. ၁၉:၉.
တၢး၀၄ ၄/၁ ၂၉
ပှၤဖးလံာ်ဖိတဖၣ် အတၢ်သံကွၢ်
ပှၤအံၣ်စရ့လးဖိတဖၣ် ဘၣ်သံလၢ အမၤကမၣ်မုၣ်ကမၣ်ခွါအဃိန့ၣ် ၄ မိၤၡ့ ၂၅:၉ ပာ်ဖျါဝဲအဂၤ ၂၄,၀၀၀ သနာ်က့ ဘၣ်မနုၤအဃိ ၁ ကရံၣ်သူး ၁၀:၈ န့ၣ်ပာ်ဖျါဝဲလၢအဂၤ ၂၃,၀၀၀ လဲၣ်.
လံာ်စီဆှံအဆၢခံဆၢအံၤ ပာ်ဖျါထီၣ်ဝဲနီၣ်ဂံၢ်တဖၣ် တဒ်သိးလိာ်အသးဘၣ်န့ၣ် တၢ်ဂ့ၢ်ကအိၣ်ဝဲအါမံၤလီၤ. တၢ်ဂ့ၢ်တမံၤန့ၣ် ဘၣ်သ့ၣ်သ့ၣ် အနီၣ်ဂံၢ်ကမ့ၢ်ဝဲ ၂၃,၀၀၀ ဒီး ၂၄,၀၀၀ အဘၢၣ်စၢၤလီၤ.
ဆိကမိၣ်ကွၢ် တၢ်ဂ့ၢ်အဂၤတမံၤတက့ၢ်. လၢပျၢၤဝ့ၢ်ကရံၣ်သူးန့ၣ် မ့ၢ်ဝ့ၢ်လၢအပှဲၤဒီး တၢ်မၤကမၣ်မုၣ်ကမၣ်ခွါအဃိ ဖဲစီၤပီလူးကွဲးလံာ်ဆူ ကရံၣ်သူး တၢ်အိၣ်ဖှိၣ်အအိၣ်အခါ အဝဲသူဝဲ တၢ်ဂ့ၢ်လၢ တၢ်မၤအသးဒီး ပှၤအံၣ်စရ့လးဖိတဖၣ်လၢၡံးထံၣ် ဒီးဟ့ၣ်ပလီၢ်အဝဲသ့ၣ်လီၤ. အဝဲကွဲးဝဲလၢ– “သုတမၤကမၣ်မုၣ်ကမၣ်ခွါ, ဒ်အဝဲသ့ၣ်တနီၤနီၤ မၤကမၣ်မုၣ်ကမၣ်ခွါ, ဒီးလီၤဃံၤဝဲခံကလးသၢကထိလၢ မုၢ်တနံၤဃီအသိးန့ၣ်တဂ့ၤ.” စီၤပီလူးပာ်ဖျါထီၣ်ဝဲထဲလၢ ပှၤလၢယဟိဝၤယွၤ စံၣ်ညီၣ်သံအီၤလၢ တၢ်မၤကမၣ်မုၣ်ကမၣ်ခွါအဃိန့ၣ် အနီၣ်ဂံၢ်အိၣ်ဝဲအဂၤ ၂၃,၀၀၀ လီၤ.—၁ ကရံၣ်သူး ၁၀:၈.
ဘၣ်ဆၣ်ဖဲ ၄ မိၤၡ့ ၂၅ န့ၣ်ပာ်ဖျါဝဲလၢ “အံၣ်စရ့လးမၤစဲဘူးလိာ်အသးဒီး ဘဧၤလးပဧိၢ်လီၤ. ဒီးယွၤအသးထီၣ်ကဲၤထီၣ်ဘၣ်အံၣ်စရ့လးလီၤ.” လၢခံယဟိဝၤယွၤ တဲဘၣ်စီၤမိၤၡ့လၢ ကဘၣ်မၤသံ “ပှၤဂီၢ်မုၢ်အခိၣ်ခဲလၢာ်” လီၤ. ဒီးစီၤမိၤၡ့ လဲၤတဲဘၣ် စံၣ်ညီၣ်ကွီၢ်တဖၣ်လၢ ကမၤဝဲမူဒါအံၤအဂီၢ်လီၤ. လၢခံကတၢၢ် ဖဲစီၤပံၤနဃၣ် မၤသံဝဲ ပှၤအံၣ်စရ့လးဖိလၢ အဟဲက့ၤကိး ပှၤမံးဒယၣ်မုၣ်တဂၤန့ၣ် ဝံၤအလီၢ်ခံ “တၢ်သံသတြိာ်အိၣ်ကတီၢ်ဝဲ” လီၤ. တၢ်ကွဲးနီၣ်တခါအံၤ ဘၣ်တၢ်မၤကတၢၢ်ကွံာ်အီၤလၢ “ဒီးပှၤလၢအသံလၢ တၢ်သံသတြိာ်န့ၣ် မ့ၢ်ပှၤခံကလးလွံၢ်ကထိလီၤ.”—၄ မိၤၡ့ ၂၅:၁-၉.
လီၤဂာ်လၢ ၄ မိၤၡ့အပူၤ ပာ်ဖျါဝဲနီၣ်ဂံၢ်န့ၣ် ပၣ်ဃုာ်ဒီး “ပှၤဂီၢ်မုၢ်အခိၣ်ခဲလၢာ်” လၢစံၣ်ညီၣ်ကွီၢ်တဖၣ် မၤသံဝဲ ဒီးပှၤလၢယဟိဝၤယွၤ စံၣ်ညီၣ်သံအီၤတဖၣ်န့ၣ်လီၤ. ပှၤဂီၢ်မုၢ်အခိၣ်တဖၣ်လၢ စံၣ်ညီၣ်ကွီၢ်တဖၣ် မၤသံဝဲန့ၣ် အနီၣ်ဂံၢ် ကအိၣ်တကထိဃၣ်ဃၣ်အဃိ ခဲလၢာ်ကအိၣ်ဝဲ ၂၄,၀၀၀ န့ၣ်လီၤ. ပှၤဂီၢ်မုၢ်အခိၣ် မ့တမ့ၢ် ပှၤလၢအကဲခိၣ်ကဲနၢ်တဖၣ်အံၤ မ့ၢ်မၤကမၣ်မုၣ်ကမၣ်ခွါမ့ၢ်ဂ့ၤ, မ့ၢ်ပၣ်ဃုာ်လၢမူးပွဲတဖၣ်အပူၤမ့ၢ်ဂ့ၤ မ့တမ့ၢ် မ့ၢ်ပျဲလၢပှၤကလဲၤမူးပွဲအဂီၢ်မ့ၢ်ဂ့ၤ အဝဲသ့ၣ်အတၢ်ကမၣ်အိၣ်လၢ “မၤစဲဘူးလိာ်အသးဒီး ဘဧၤလးပဧိၢ်” အဃိန့ၣ်လီၤ.
ဘၣ်ဃးဒီး တၢ်ကတိၤ “မၤစဲဘူး” န့ၣ်လံာ်တဘ့ၣ် တဲဝဲလၢ “တၢ်ကတိၤအံၤ အခီပညီအိၣ်လၢ ပှၤတဂၤ မၤစဲဘူးအသးဒီး ပှၤအဂၤတဂၤ” လီၤ. ပှၤအံၣ်စရ့လးဖိတဖၣ် မ့ၢ်ပှၤလၢအဟ့ၣ်လုၢ်ထီၣ်အသးဆူ ယဟိဝၤယွၤအအိၣ်လီၤ. ဘၣ်ဆၣ်ဖဲ အဝဲသ့ၣ် “မၤစဲဘူးအသးဒီး ဘဧၤလးပဧိၢ်” အခါ မ့ၢ်ဒၣ်မၤဟးဂီၤဝဲ အတၢ်ရ့လိာ်သးဒီးယွၤလီၤ. ပူၤကွံာ်အနံၣ် ၇၀၀ ဝံၤအလီၢ်ခံ ခီဖျိလၢဝံဟိၤၡ့န့ၣ် ယဟိဝၤယွၤ တဲဘၣ်ပှၤအံၣ်စရ့လးဖိတဖၣ်လၢ “အဝဲသ့ၣ်လဲၤဝဲဆူ ဘဧၤလးပဧိၢ်, ဒီးမၤလီၤဖးအသးလၢ တၢ်မဲာ်ဆှးအလီၢ်အဂီၢ်, ဒီးကဲထီၣ်တၢ်သးဘၣ်အၢအလီၢ်န့ၣ် ဒ်တၢ်လၢအအဲၣ်ဝဲအသိးန့ၣ်လီၤ.” (ဟိၤၡ့ ၉:၁၀) ပှၤလၢအမၤဒ်န့ၣ်အသိးတဖၣ် ဘၣ်တၢ်စံၣ်ညီၣ်လီၤ. အဃိ စီၤမိၤၡ့ ဟ့ၣ်ပလီၢ် ပှၤအံၣ်စရ့လးဖိတဖၣ်လၢ “တၢ်လၢယွၤမၤဝဲလၢ ဘဧၤလးပဧိၢ်အဃိန့ၣ် သုမဲာ်ထံၣ်ဘၣ်လံ. အဂ့ၢ်ဒ်အံၤ, ကယဲၢ်ပှၤလၢအလဲၤပိာ် ဘဧၤလးပဧိၢ်အခံခဲလၢာ်န့ၣ် ယွၤသုကစၢ် မၤဟးဂီၤကွံာ်အီၤလၢသုကျါလံ.”—၅ မိၤၡ့ ၄:၃.