၂. ဘၣ်ဃးဒီး ယဟိဝၤယွၤန့ၣ် လံာ်စီဆှံတဲဝဲဒ်လဲၣ်.

လံာ်စီဆှံတဲဝဲလၢ ယွၤတဖၣ် လၢပှၤဟီၣ်ခိၣ်ဖိ ဘူၣ်ထီၣ်ဘါထီၣ်ဝဲ ခဲလၢာ်အကျါန့ၣ် ယဟိဝၤယွၤ မ့ၢ်ကစၢ်ယွၤလၢ အမ့ၢ်အတီ ထဲတဂၤလီၤ. ဘၣ်မနုၤအဃိ လံာ်စီဆှံတဲဝဲ ဒ်န့ၣ်လဲၣ်. ခီဖျိလၢ တၢ်ဂ့ၢ်အါမံၤအဃိလီၤ. အဒိ ယဟိဝၤယွၤ မ့ၢ်ပှၤလၢအစိအကမီၤ ဒိၣ်ကတၢၢ်အဃိ အဝဲမ့ၢ်ပှၤထဲတဂၤလၢ “အထီကတၢၢ်လၢ ဟီၣ်ခိၣ်ဒီဘ့ၣ်ညါ အဖီခိၣ်.” (ဖး စံးထီၣ်ပတြၢၤ ၈၃:၁၈.) ဒီးလံာ်စီဆှံကိးအီၤလၢ “သ့တၢ်လၢာ်ကစၢ်” အဃိ အဝဲအိၣ်ဒီး တၢ်စိတၢ်ကမီၤလၢ အကမၤတၢ်ကိးမံၤဒဲး လၢအအဲၣ်ဒိးမၤဝဲ. အဝဲ “တ့လီၤတၢ်ခဲလၢာ်” လၢအမ့ၢ် မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ် ဒီးတၢ်သးသမူခဲလၢာ် လၢဟီၣ်ခိၣ်ချၢ. (လီၣ်ဖျါ ၄:​၈, ၁၁) ယဟိဝၤယွၤန့ၣ် အတဒ်သိးဒီး ယွၤအဂၤတဖၣ်ဘၣ်. အဝဲအိၣ်ဝဲထီဘိ ဒီးအဝဲကဆဲးအိၣ်ဒံး လီၤထူလီၤယိာ်လီၤ.​—စံးထီၣ်ပတြၢၤ ၉၀:၂.

ယဟိဝၤယွၤန့ၣ် အကဲ ပတၢ်ဘၣ်တ့ကစၢ်အဃိ ပကြၢးတီဒီးအီၤ လၢပသးဒီဖျၢၣ်. (လီၣ်ဖျါ ၄:၁၁) အဃိ ပကဘၣ်အဲၣ် ကစၢ်ယွၤ ဒီးဘူၣ်ထီၣ်ဘါထီၣ် ထဲအီၤတဂၤလီၤ. ဒီးဖဲပဘူၣ်ထီၣ်ဘါထီၣ် ကစၢ်ယွၤအခါ ပတကြၢးသူ တၢ်ဂီၤတၢ်ဖှီၣ်တဖၣ်ဘၣ်.​—ဖး ယၡါယၤ ၄၂:၈.

ဒ်သိး ယဟိဝၤယွၤက “တူၢ်လိာ်” ပတၢ်ဘူၣ်ထီၣ်ဘါထီၣ်အဂီၢ် ပတၢ်ဘူၣ်ထီၣ်ဘါထီၣ်န့ၣ် ကဘၣ် “စီဆှံဝဲ.” (ရိမ့ၤ ၁၂:၁) အဃိ ပကဘၣ်ဒိကနၣ် ဒီးမၤထွဲ ကစၢ်ယွၤ အတၢ်သိၣ်တၢ်သီ. အဒိ ပှၤလၢအအဲၣ် ယဟိဝၤယွၤန့ၣ် ဒိကနၣ် ဒီးမၤထွဲဝဲ ကစၢ်ယွၤ အတၢ်သိၣ်တၢ်သီ ဘၣ်ဃးဒီး တၢ်ဆီဟံၣ်ဆီဃီ. တကးဒံးဘၣ် လုၢ်လၢ်လၢ အတဂ့ၤဘၣ် ဒ်သိးဒီး တၢ်သူကသံၣ်မူၤဘှီးမ့ၢ်ဂ့ၤ, တၢ်အီမီာ်မ့ၢ်ဂ့ၤ, တၢ်အီၣ်သဘျုၣ်သဲးသၣ်မ့ၢ်ဂ့ၤ ဒီးတၢ်အီမူၤသံးမ့ၢ်ဂ့ၤ အဝဲသ့ၣ်ဟးဆှဲးဝဲ.a