မ့ၢ်နသ့ၣ်ညါဧါ

ဘူၣ်ဘျီၣ်န့ၣ် အိၣ်ထီၣ်လၢဆၢကတီၢ်ဖဲလဲၣ်

တၢ်ကတိၤလၢအမ့ၢ် “ဘူၣ်ဘျီၣ်” န့ၣ်ဟဲလၢ ကြံးအတၢ်ကတိၤလၢ အခီပညီမ့ၢ်ဝဲ “တၢ်အိၣ်ဖှိၣ်” မ့တမ့ၢ် “ပှၤပာ်ဖှိၣ်ထီၣ်ပှၤသး” လီၤ. ဒီးပှၤကိးအီၤလၢ ဘူၣ်ဘျီၣ်န့ၣ်​ မ့ၢ်တၢ်လၢအကြၢးဝဲဘၣ်ဝဲလီၤ. မ့ၢ်လၢ လၢပျၢၤလံၤလံၤန့ၣ်​ ပှၤယူဒၤဖိတဖၣ်​ ပာ်ဖှိၣ်ထီၣ်အသး လၢဘူၣ်ဘျီၣ်အပူၤ လၢတၢ်ဟံးစုနဲၣ်ကျဲ ဒီးတၢ်ဘူၣ်ထီၣ်ဘါထီၣ်အဂီၢ်လီၤ. ဘၣ်ဃးဒီး ဘူၣ်ဘျီၣ်အဂ့ၢ်န့ၣ်​ လံာ်စီဆှံလၢ ဧ့ၤဘြံၤကျိာ်တကတြူၢ် တပာ်ဖျါထီၣ်ဝဲ တၢ်ဂ့ၢ်လီၤတံၢ်လီၤဆဲး သနာ်က့ ပမ့ၢ်ကွၢ်လၢ လံာ်စီဆှံလၢ ကြံးကျိာ်တကတြူၢ်အပူၤန့ၣ်​ ပထံၣ်ဘၣ်လၢ ဖဲ ခ.န တၢယၤဖှိၣ်အဆၢကတီၢ် ဘူၣ်ဘျီၣ်န့ၣ်​ မ့ၢ်တၢ်လၢအအိၣ်ပာ်စၢၤလံန့ၣ်လီၤ.

ပှၤကူၣ်ဘၣ်ကူၣ်သ့လၢ ဘၣ်ဃးဒီးလံာ်စီဆှံ အါတက့ၢ်န့ၣ်​ နာ်ဝဲလၢ ပှၤစးထီၣ်ဒုးအိၣ်ထီၣ်ဘူၣ်ဘျီၣ်​ ဖဲပှၤယူဒၤဖိတဖၣ်​ ဘၣ်တၢ်က့ၤဖီၣ်အီၤဆူ ဘၤဘူၤလိၣ်အဆၢကတီၢ်န့ၣ်လီၤ. ကၠ့ၤဒ့ကၤ အလံာ်ပီညါဂံၢ်ထံး (The Encyclopaedia Judaica) ပာ်ဖျါထီၣ်ဝဲလၢ “ပှၤလၢအဘၣ်တၢ်က့ၤဖီၣ်အီၤဆူ ထံဂၤကီၢ်ဂၤတဖၣ်န့ၣ်​ အဝဲသ့ၣ်​ ကမၤမုာ်ထီၣ်အသးလၢ အတၢ်ကိၢ်တၢ်ဂီၤအဂီၢ်, ကထံၣ်လိာ်အသးတဘျီဘၣ်တဘျီ လၢမုၢ်အိၣ်ဘှံးနံၤ ဒီးကဖးလံာ်စီဆှံအဂီၢ် အတၢ်လုၢ်ဟံၣ်တအိၣ်ဘၣ်.” ပှၤယူဒၤဖိတဖၣ်​ ဟဲက့ၤဟးထီၣ်လၢ ဘၤဘူၤလိၣ်ဝံၤအလီၢ်ခံ ဖျါလၢအဝဲသ့ၣ်​ ဆဲးပာ်ဖှိၣ်ထီၣ်အသးလၢ ကဃ့ဘါထုကဖၣ်​ ဒီးဖးလံာ်စီဆှံအဂီၢ်လီၤ. ဒီးတၢ်လီၢ်လၢအဝဲသ့ၣ်အိၣ်ဝဲ တပူၤလၢ်လၢ်န့ၣ်​ အဝဲသ့ၣ်​ တ့ထီၣ်ဝဲဘူၣ်ဘျီၣ်လီၤ.

လၢ ခ.န တၢယၤဖှိၣ်အဆၢကတီၢ် ပှၤယူဒၤဖိတဖၣ်န့ၣ်​ သူဝဲဘူၣ်ဘျီၣ်လၢ တၢ်ဘူၣ်ထီၣ်ဘါထီၣ်, တၢ်ရ့လိာ်မုာ်လိာ်အဂီၢ်လီၤ. ဒီးလၢမဲးဒံးထၢၣ်ရ့နယၢၣ်, မုၢ်ထီၣ်တၢ်ခၢၣ်သးလီၢ်ကဝီၤ ဒီးလၢကီၢ်အံၣ်စရ့အပူၤန့ၣ်​ ဘူၣ်ဘျီၣ်အိၣ်ဝဲလၢ တၢ်လီၢ်ကိးပူၤဒဲးလီၤ. လံ လဘါ လၢအမ့ၢ် ပှၤကူၣ်ဘၣ်ကူၣ်သ့လၢ ဧ့ၤဘြံၤ အဖၠၣ်စိမိၤကၠိလၢ ယရူၤၡလ့ၣ်တဂၤ တဲဝဲလၢ “[ဘူၣ်ဘျီၣ်] န့ၣ်ပှၤသူအီၤလၢ ပှၤကမၤလိတၢ်, ပှၤကအီၣ်တၢ်အီၣ်လၢ အစီအဆှံ, ပှၤထီၣ်ရူထီၣ်တ့, ပှၤပာ်ဖှိၣ်စ့မၤဘူၣ်, ပှၤမၤတၢ်အိၣ်ဖှိၣ်လၢ ထံဂ့ၢ်ကီၢ်ဂ့ၢ် ဒီးတၢ်ရ့လိာ်မုာ်လိာ်အဂီၢ်လီၤ.” ဒီးအဝဲတဲကဒီးဝဲလၢ “ဘၣ်ဆၣ်​ တၢ်လီၢ်အံၤန့ၣ်​ ပှၤသူအီၤလၢ တၢ်ဘူၣ်တၢ်ဘါအဂီၢ် အအါကတၢၢ်လီၤ.” လၢတၢ်န့ၣ်အဃိ ယ့ၣ်ၡူးလဲၤဝဲဆူ ဘူၣ်ဘျီၣ်အပူၤ တလီၢ်လီၢ်န့ၣ်​ တမ့ၢ်တၢ်လၢ အလီၤကမၢကမၣ်ဘၣ်. (မၢ်ကူး ၁:၂၁; ၆:၂; လူၤကၣ်​ ၄:၁၆) ဖဲန့ၣ်န့ၣ်​ အဝဲသိၣ်လိတၢ်, ဟ့ၣ်သဆၣ်ထီၣ်ပှၤဂၤ ဒီးဟ့ၣ်ဂံၢ်ဟ့ၣ်ဘါပှၤဂၤလီၤ. ဖဲပှၤဒုးအိၣ်ထီၣ်​ ခရံာ်ဖိတၢ်အိၣ်ဖှိၣ်ဝံၤအခါဒၣ်လဲာ် တၢ်မၢဖိပီလူး လဲၤစံၣ်တဲၤတဲလီၤတၢ်လၢ ဘူၣ်ဘျီၣ်အပူၤအါမးလီၤ. ပှၤလၢအအဲၣ်ဒိးသုးဘူးအသးဆူ ကစၢ်ယွၤအအိၣ်တဖၣ်န့ၣ်​ လဲၤဝဲဆူ ဘူၣ်ဘျီၣ်ပူၤလီၤ. လၢတၢ်န့ၣ်အဃိ ဖဲစီၤပီလူး လဲၤဝဲဆူ ဝ့ၢ်တဖျၢၣ်ဂ့ၤတဖျၢၣ်ဂ့ၤအခါ ညီနုၢ်န့ၣ်​ အဝဲလဲၤဆိဝဲဆူ ဘူၣ်ဘျီၣ်ပူၤဒီး စံၣ်တဲၤတဲလီၤတၢ်ဖဲန့ၣ်လီၤ.—မၤတၢ် ၁၇:၁, ၂; ၁၈:၄.