တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—တၢ်စံးဆၢက့ၤ ဟံၣ်ကစၢ်လၢ အသးထီၣ်တၢ်တဂၤ

ဘၣ်မနုၤအဃိအရ့ဒိၣ်လဲၣ်– လၢတၢ်သးခုကစီၣ်တၢ်မၤအပူၤ ပထံၣ်ဘၣ်ပှၤအါဂၤန့ၣ် အိၣ်ဒီးတၢ်ယူးယီၣ်ပာ်ကဲလီၤ. ဘၣ်ဆၣ်, ယ့ၣ်ၡူးတဲဆိပာ်ဝဲလၢ ပှၤတနီၤကသးဟ့ပှၤလီၤ. (ယိၤဟၣ် ၁၇:၁၄) လၢတၢ်န့ၣ်အဃိ ပမ့ၢ်ထံၣ်ဘၣ်ဟံၣ်ကစၢ်လၢ အသးထီၣ်တၢ်တဂၤန့ၣ် တမ့ၢ်တၢ်လၢအလီၤကမၢကမၣ်ဘၣ်. ပမ့ၢ်ပှၤလၢအခၢၣ်စးယဟိဝၤယွၤအဃိ ဖဲတၢ်မၤအသးဒ်န့ၣ်အခါ ပအဲၣ်ဒိးစံးဆၢက့ၤတၢ်လၢအဂ့ၤကတၢၢ် ဒ်သိးကမၤသးခု ယဟိဝၤယွၤအသးအဂီၢ်လီၤ. (ရိ. ၁၂:၁၇-၂၁; ၁ ပ့း. ၃:၁၅) ပမ့ၢ်မၤဒ်န့ၣ်ဒီး ဘၣ်သ့ၣ်သ့ၣ် ဟံၣ်ကစၢ်အသး ကခုၣ်လီၤက့ၤဝဲလီၤ. အဂၤတမံၤန့ၣ် ပကကဲထီၣ်တၢ်အဒိလၢအဂ့ၤ လၢဟံၣ်ကစၢ်ဒီး ပှၤလၢအဃၢၤတဖၣ်အဂီၢ်လီၤ. လၢခံတဘျီယဟိၤဝၤပှၤအုၣ်အသး မ့ၢ်လဲၤန့ၣ်ဘၣ်သ့ၣ်သ့ၣ်အဝဲသ့ၣ် ကအဲၣ်ဒိးဒိကနၣ်ဝဲလီၤ.—၂ ကရံၣ်. ၆:၃.

ပမၤကသ့ဒ်လဲၣ်–

ကီၤနသး ဒီးပာ်ဖျါထီၣ်တၢ်မဲာ်မုာ်နါဆၢတက့ၢ်. တၢ်အံၤကကဲထီၣ်တၢ်မၤစၢၤလၢ တၢ်အိၣ်အသး သုတနးထီၣ်တဂ့ၤန့ၣ်လီၤ. လၢဟံၣ်ကစၢ်အတၢ်ကတိၤအဃိ တဘၣ်သးထီၣ်အီၤတဂ့ၤ. (စံၣ်. ၇:၉) ဘၣ်သ့ၣ်သ့ၣ် အဝဲအသးကဘၣ်တံာ်တာ်လၢ အနီၢ်ကစၢ်အတၢ်ကီတၢ်ခဲ မ့တမ့ၢ် နလဲၤဖဲအဝဲတချုးဘၣ်အဆၢကတီၢ်အဃိန့ၣ်လီၤ. ဟံၣ်ကစၢ်အသးမ့ၢ်ထီၣ် လၢပတၢ်ကစီၣ်အဃိဒၣ်လဲာ် ညီနုၢ်န့ၣ်မ့ၢ်ဒၣ်လၢ အဝဲနၢ်ပၢၢ်ကမၣ်ပှၤအဃိလီၤ.—၂ ကရံၣ်. ၄:၄.
စံးဆၢက့ၤလၢတၢ်ကတိၤအမုာ် ဒီးလၢတၢ်ယူးယီၣ်ပာ်ကဲအပူၤတက့ၢ်. (ကတိၤ. ၁၅:၁) မ့ၢ်ပမၤပၢၢ်ထီၣ်အီၤဧါ မ့တမ့ၢ် မ့ၢ်ပမၤတံာ်တာ်ဘၣ်အီၤဧါ. ပမ့ၢ်လဲၤဘၣ်အတီၤလၢ တၢ်အိၣ်အသးဒ်န့ၣ်ဒီး ပဃ့ဝံသးစူၤအီၤလၢ တၢ်ဆီၣ်လီၤသးအပူၤသ့လီၤ. ဘၣ်ဆၣ် ပတဃ့ဝံသးစူၤပှၤဂၤလၢ ပတဲဘၣ်အီၤတၢ်သးခုကစီၣ်အဃိဘၣ်လီၤ. အဝဲသ့ၣ်အသးထီၣ်ပှၤ ခီဖျိလၢအနၢ်ဟူဘၣ်ဝဲ ပှၤတဲကမၣ်ပဂ့ၢ်အဃိဧါ. မ့မ့ၢ်ဒ်န့ၣ်န့ၣ် နတဲအီၤဒ်အံၤသ့လီၤ. “နသးကဘၣ်တံာ်တာ်လၢ ပှၤဂၤအတၢ်ကတိၤအဃိဘၣ်ဆၣ်, ဖျါလၢတၢ်လၢနနၢ်ဟူဘၣ်တဖၣ်န့ၣ် ဘၣ်သ့ၣ်သ့ၣ် တလီၤတံၢ်လီၤဆဲးဝဲဘၣ်. ဝံသးစူၤ ယတဲနၢ်ပၢၢ်နၤကသ့ဧါ.” အဝဲမ့ၢ်ကတိၤထီဒါဝဲ ပတၢ်နာ်တမံၤမံၤ ဒ်သိးဒီးတၢ်ဟီထီၣ်ကွံာ်ပှၤကညီ မ့တမ့ၢ် ဘၣ်ဃးဒီးတၢ်သွံၣ်န့ၣ် နကတဲဆၢက့ၤအီၤဒ်လဲၣ်. နတဲသ့လၢ- “ယနၢ်ပၢၢ်စၢၤနၤသ့လီၤ. ပှၤအဂၤစ့ၢ်ကီး တဲဝဲဒ်န့ၣ်လီၤ. ဘၣ်မနုၤအဃိပနာ်ဒ်န့ၣ်လဲၣ်န့ၣ် ဝံသးစူၤ ယဒုးနဲၣ်နၤလၢ လံာ်စီဆှံပူၤကသ့ဧါ.”
ဟံၣ်ကစၢ်အသးမ့ၢ်ဒိၣ်ထီၣ် နးနးကလဲာ်န့ၣ် နမ့ၢ်တတဲဆၢက့ၤအီၤနီတမံၤဘၣ် ဒီးနမ့ၢ်ဟးထီၣ်ကွံာ်န့ၣ် ဘၣ်သ့ၣ်သ့ၣ် ကမ့ၢ်ကျဲလၢအဂ့ၤကတၢၢ်လီၤ. အဝဲမ့ၢ်တဲဝဲဒၣ်လၢ ယဟိဝၤပှၤအုၣ်အသးတဖၣ် တဘၣ်ဟဲလၢၤတဂ့ၤန့ၣ် နတဲဆၢက့ၤအီၤသ့လၢ ပကမၤဒ်နတဲအသိးန့ၣ်လီၤ.

မၤကွၢ်တၢ်အံၤ လၢတလါညါအံၤအတီၢ်ပူၤတက့ၢ်–

ကၠီးလိသုသးလၢ သုဟံၣ်ဖိဃီဖိတၢ်မၤလိလံာ်စီဆှံ အပူၤတက့ၢ်.
နဟးထီၣ်လၢ ဟံၣ်ကစၢ်လၢအသးဒိၣ်တၢ်တဂၤအဟံၣ် မ့ၢ်ဝံၤအလီၢ်ခံ, နကစံးဆၢက့ၤအီၤကျဲလၢ အဂ့ၤကတၢၢ်ကသ့ဒ်လဲၣ်န့ၣ် တၢၣ်ပီၣ်ဒီး ပှၤလၢအစံၣ်တဲၤတဲလီၤတၢ်ဒီးနၤတဂၤတက့ၢ်.