တၢ်မၤလိ ၅
ယွၤအတံၤသကိးတဖၣ် ကအိၣ်ဝဲဆိးဝဲသ့ၣ်လၢ ပၤရဒံစူး
ပၤရၤဒံစူးန့ၣ် တမ့ၢ်ကလီၤဂာ်ဒ်သိး ဟီၣ်ခိၣ်လၢပအိၣ်ခဲအံၤဘၣ်. ကစၢ်ယွၤတဘၣ်အသးနီတဘျီလၢ ဟီၣ်ခိၣ်အံၤ ကပှဲၤမးဒီးတၢ်နးတၢ်ဖှီၣ်, တၢ်သူၣ်အုးသးအုး, တၢ်သူၣ်ကိၢ်သးဂီၤဒီးတၢ်ဆူးတၢ်ဆါတဖၣ်န့ၣ်ဘၣ်. ခါဆူညါန့ၣ်, ကစၢ်ယွၤကမၤကဲထီၣ်ပၤရဒံစူး လၢဟီၣ်ခိၣ်လိၤန့ၣ်လီၤ. ပၤရဒံစူးန့ၣ် ကမၤအသးဒ်လဲၣ်? မ်ပကကွၢ်သကိး လံာ်စီဆှံစံးဝဲဒ်လဲၣ်န့ၣ်တက့ၢ်.
ပှၤအဂ့ၤတဖၣ်. ပၤရဒံစူးန့ၣ်ကမ့ၢ်ဝဲ ယွၤအတံၤသကိးတဖၣ်အဟံၣ်လီၤ. အဝဲသ့ၣ်တဖၣ်န့ၣ် ကမၤတၢ်ဂ့ၤလၢ တဂၤဒီးတဂၤအဂီၢ်န့ၣ်လီၤ. ကအိၣ်မူ့ဝဲသ့ၣ်ဒ် ယွၤအတၢ်တီတၢ်လိၤအတၢ်ဘျၢအသိးန့ၣ်လီၤ.—ကတိၤဒိ ၂:၂၁.
တၢ်အီၣ်တၢ်အီဂီၢ်မုၢ်ဂီၢ်ပၤ. လၢပၤရဒံးစူးန့ၣ် တၢ်သၣ်ဝံၤလီၤဒိတမ့ၢ်ကအိၣ်ဘၣ်. လံာ်စီဆှံစံးပာ်ဝဲလၢ “ဘုဧိၤဟုဧိၤ [မ့တမ့ၢ် တၢ်အီၣ်တၢ်အီ] ကအိၣ်လၢပှဲၤဝဲလၢဟီၣ်ခိၣ်. . .န့ၣ်လီၤ.”—စံးထီၣ်ပတြၢၤ ၇၂:၁၆, ခ့ခါစှီၤကျိာ်.
ဟံၣ်လၢအဂ့ၤတဖၣ် ဒီးတၢ်မၤလၢအမၤသးဖှံပှၤ. လၢဟီၣ်ခိၣ်အပၤရဒံစူးပူၤန့ၣ် ဟံၣ်ဖိဃီဖိခဲလၢာ် ကအိၣ်ဒီးအဟံၣ်အဃီဒၣ်ဝဲစုာ်စုာ်ခဲလၢာ်န့ၣ်လီၤ. ပှၤကိးဂၤဒဲးကမၤဝဲ တၢ်မၤလၢကဒုးသးဖှံအီၤတံၢ်နီၢ်ကိးဂၤဒဲးန့ၣ်လီၤ.—ယၡါယၤ ၆၅:၂၁-၂၃.
ဟီၣ်ခိၣ်ဒီဘ့ၣ်အတၢ်ဃူတၢ်ဖိး. တၢ်ဒုးတၢ်ယၤ ဒီးပှၤဘၣ်သံလၢတၢ်ဒုးအဃိ တအိၣ်လၢၤဘၣ်. ယွၤအကလုၢ်ကထါပာ်ဖျါဝဲလၢ ကစၢ်ယွၤန့ၣ်က “ဒုးအိၣ်ကတီၢ် တၢ်ဒုးတၢ်ယၤတဖၣ်” န့ၣ်လီၤ.—စံးထီၣ်ပတြၢၤ ၄၆:၈, ၉.
တၢ်အိၣ်ဆူၣ်အိၣ်ချ့လၢအဂ့ၤ. လံာ်စီဆှံစံးပာ်ဝဲဒ်အံၤလီၤ. “ပှၤလၢအအိၣ်လၢ ပထံလီၢ်ကီၢ်ပူၤ [ပၤရဒံစူး] တကဒူးကဒ့ၣ်ကဒီးလၢ အဆူးအဆါနီတဂၤလၢၤဘၣ်.” (ယၡါယၤ ၃၃:၂၄, ခ့ခါစှီၤကျိာ်) လၢန့ၣ်အမဲာ်ညါ, ပှၤလၢ အခီၣ်ဟးဂီၤ, အမဲာ်ဘျီၣ်, အနၢ်တအၢ, ဒီးအုးအးကတာ်တဖၣ် တအိၣ်နီတဂၤလၢၤဘၣ်.—ယၡါယၤ ၃၅:၅, ၆.
တၢ်အိၣ်က့အိၣ်ကွဲၣ်, တၢ်သူၣ်အုးသးအုးဒီး တၢ်သံတၢ်ပှၢ်အကတၢၢ်. ယွၤအကလုၢ်ကထါစံးဝဲဒ်အံၤလီၤ. “တၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသးတအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢအခီၣ်ထံးတဖၣ် ပူၤကွံာ်လံ.”—လီၣ်ဖျါ ၂၁:၄.
ပှၤအၢပှၤသီတအိၣ်လၢၤဘၣ်. ယဟိဝၤအၢၣ်လီၤဝဲဒ်အံၤလီၤ. “[ပှၤအၢပှၤသီတဖၣ်] န့ၣ်, ကဘၣ်တၢ်ဒီၣ်တဲာ်ကွံာ်အီၤလၢကီၢ်ပူၤ, ဒီးပှၤမၤကမၣ်တၢ်ဖိန့ၣ် ကဘၣ်တၢ်ထဲးကွံာ်အီၤလၢအပူၤလီၤ.”—ကတိၤဒိ ၂:၂၂.
ပှၤတဂၤဒီးတဂၤ ကအဲၣ်လိာ်ကွံလိာ်အသး ဒီးကယုးယီၣ်ပာ်ကဲလိာ်အသးလီၤ. တၢ်တတီတလိၤ, တၢ်ဆီၣ်ဘံၣ်ဆီၣ်ဘၢ, တၢ်သးလီသးကွံဒီး, တၢ်သူၣ်ဟ့သးဟ့တအိၣ်လၢၤဘၣ်. ပှၤတဖၣ် ကအိၣ်ဒီးတၢ်ဃူတၢ်ဖိး ဒီးကအိၣ်ဝဲဆိးဝဲဒ် ယွၤအတၢ်မ့ၢ်တၢ်တီအတၢ်ဘျၢအသိးန့ၣ်လီၤ.—ယၡါယၤ ၂၆:၉.