အိၣ်မူဒ်ခရံာ်ဖိအသိး
ပအိၣ်ဒီးတၢ်ခွဲးတၢ်ယာ်လၢ ပကသူၣ်ထီၣ်ဒီး ကွၢ်ထွဲဘှီဂ့ၤထီၣ်က့ၤ တၢ်လီၢ်တဖၣ်လၢ တၢ်ဘူၣ်တၢ်ဘါအမ့ၢ်အတီအဂီၢ်
ဖဲပှၤအံၣ်စရ့လးဖိတဖၣ် သူၣ်ထီၣ်ဝဲတၢ်လုၢ်ဟံၣ်အဆၢကတီၢ်န့ၣ် တၢ်လၢာ်ဘူၣ်လၢာ်စ့ၤအိၣ်ဝဲအါမး ဒီးအဝဲသ့ၣ်တဖၣ်န့ၣ် ကဘၣ်ဂုာ်ကျဲးစၢးဝဲသပှၢ်ကတၢၢ်လီၤ. ဒ်လဲၣ်ဂ့ၤဒ်လဲၣ်ဂ့ၤ ပှၤအံၣ်စရ့လးဖိတဖၣ် ဆီၣ်ထွဲမၤစၢၤဝဲ တၢ်မၤအံၤလၢ တၢ်သူၣ်ဆူၣ်သးဆူၣ်အပူၤလီၤ. (၁ ကွဲး. ၂၉:၂-၉; ၂ ကွဲး. ၆:၇, ၈) တၢ်သူၣ်ထီၣ်တၢ်လုၢ်ဟံၣ် ဝံၤအလီၢ်ခံ ပှၤအံၣ်စရ့လးဖိတဖၣ် မ့ၢ်အဲၣ်ဒိးပာ်ဖျါထီၣ်လၢ အဝဲသ့ၣ်မ့ၢ် ပှၤလၢအဒိၣ်တုာ်ခိၣ်ပှဲၤလၢ နီၢ်သးတခီန့ၣ် အဝဲသ့ၣ်ကဘၣ် ဆဲးကွၢ်ထွဲဘှီဂ့ၤထီၣ်ဝဲတၢ်လုၢ်ဟံၣ်ထီဘိန့ၣ်လီၤ. (၂ စီၤပၤ. ၂၂:၃-၆; ၂ ကွဲး. ၂၈:၂၄; ၂၉:၃) မုၢ်မဆါတနံၤအံၤ ပှၤခရံာ်ဖိတဖၣ် ဟ့ၣ်လီၤအတၢ်ဆၢကတီၢ် ဒီးဂုာ်ကျဲးစၢးမၤစၢၤတၢ်လၢ တၢ်သူၣ်ထီၣ်ဘီမုၢ်ဘျီၣ်ဒိၣ် ဒီးဘျီၣ်ဒိၣ်တဖၣ်လၢ တၢ်အိၣ်ဖှိၣ်ဖးဒိၣ်အဂီၢ် တကးဒံးဘၣ် လၢတၢ်မၤကဆှဲကဆှီ ဒီးတၢ်ကွၢ်ထွဲဘှီဂ့ၤထီၣ်က့ၤ တၢ်သူၣ်ထီၣ်သ့ၣ်တဖၣ်အံၤအဂီၢ်စ့ၢ်ကီးလီၤ. ဒ်လဲၣ်ဂ့ၤဒ်လဲၣ်ဂ့ၤ တၢ်မၤသကိးတၢ်ဒီး ယဟိဝၤယွၤဒ်အံၤန့ၣ် မ့ၢ်တၢ်ခွဲးတၢ်ယာ်ဖးဒိၣ်လၢပဂီၢ် ဒီးမ့ၢ်ကျဲလၢ ပကမၤယွၤအတၢ်မၤန့ၣ်လီၤ.—စံး. ၁၂၇:၁; လီၣ်. ၇:၁၅.
ပမၤစၢၤတၢ်သ့ဒ်အံၤ . . .
တၢ်အိၣ်ဖှိၣ်ရိဖှိၣ်မ့ၢ်ဝံၤကိးဘျီဒဲးန့ၣ် နမၤကဆှဲကဆှီတၢ်သ့ဝဲလီၤ. နတၢ်ဆၢကတီၢ်မ့ၢ်တအိၣ်ဘၣ်န့ၣ် နမၤကဆှဲကဆှီတၢ်တစဲးလၢ နလီၢ်ဆ့ၣ်နီၤအကပိာ်ကပၤသ့ဝဲလီၤ.
ပၣ်ဃုာ်မၤသကိးတၢ်လၢ တၢ်မၤကဆှဲကဆှီတၢ် ဒီးကွၢ်ထွဲဘှီဂ့ၤထီၣ်က့ၤ ဘီမုၢ်ဘျီၣ်ဒိၣ်အဂီၢ်န့ၣ်တက့ၢ်. စုအါခီလၢ အမၤသကိးတၢ်န့ၣ် ဒုးအိၣ်ထီၣ်ဝဲတၢ်သူၣ်ခုသးခုဒီး တၢ်မၤန့ၣ်ဘီၣ်ထီၣ်ညီထီၣ်ဝဲလီၤ.—lv ကဘျံးပၤ ၉၂-၉၃ အဆၢ ၁၈.
ပဆီၣ်ထွဲမၤစၢၤလၢ တၢ်မၤဘူၣ်သ့ဝဲလီၤ. ပမ့ၢ်ဟ့ၣ်တၢ်မၤဘူၣ်ထဲ “တိၢ်ဖိခံဘ့ၣ်”လၢ အလုၢ်အပှ့ၤစှၤဝဲသနာ်က့ ပမ့ၢ်ဟ့ၣ်တၢ်လၢတၢ်သးအိၣ်အပူၤန့ၣ် ကစၢ်ယဟိဝၤယွၤ ကသးခုဝဲလီၤ.—မၢ်. ၁၂:၄၁-၄၄.
ဖဲပှၤသူၣ်ထီၣ် မ့တမ့ၢ် ဘှီဂ့ၤထီၣ်က့ၤ တၢ်လီၢ်တဖၣ်လၢ တၢ်ဘူၣ်တၢ်ဘါအမ့ၢ်အတီအဂီၢ်န့ၣ် နမၤစၢၤသ့ဝဲလီၤ. နတၢ်သ့တၢ်ဘၣ်မ့ၢ်တအိၣ်ဘၣ် သနာ်က့ နပၣ်ဃုာ်လၢ တၢ်သူၣ်ထီၣ်တၢ်မၤအံၤသ့စ့ၢ်ကီးလီၤ.