ယ့ၣ်ၡူးသိၣ်လိ ယွၤအဘီအမုၢ်အဂ့ၢ်

ဖဲယ့ၣ်ၡူးဟဲလီၤဆူဟီၣ်ခိၣ်ချၢ အဆၢကတီၢ်န့ၣ် အတၢ်ပညိၣ်မ့ၢ်တၢ်မနုၤလဲၣ်. ကစၢ်စံးဝဲလၢ “ယဘၣ်စံၣ်တဲၤတဲလီၤ ယွၤအဘီအမုၢ် အတၢ်သးခုကစီၣ် . . . လီၤ. အဂ့ၢ်ဒ်အံၤ, မ့ၢ်လၢတၢ်အံၤအဂ့ၢ်ဒီး, တၢ်မၢလီၤယၤလီၤ.” (လူၤကၣ် ၄:၄၃) ဆိကမိၢ်ကွၢ်တၢ်ဂ့ၢ်လွံၢ်မံၤလၢ ဘၣ်ဃးဒီးဘီမုၢ်အဂ့ၢ်လၢ ယ့ၣ်ၡူးသိၣ်လိဝဲန့ၣ်တက့ၢ်. ဘီမုၢ်အံၤ မ့ၢ်တၢ်ဂ့ၢ်မိၢ်ပှၢ်လၢ ယ့ၣ်ၡူးအတၢ်စံၣ်တဲၤတဲလီၤတၢ်မၤအပူၤလီၤ.

၁. ယ့ၣ်ၡူးကကဲထီၣ် ဘီမုၢ်အံၤအစီၤပၤလီၤ. ယ့ၣ်ၡူးစံးဝဲလိၤလိၤလၢ အဝဲမ့ၢ်မ့းၡံအၤလၢ ဘၣ်တၢ်တဲဆိပာ်ဝဲလီၤ. (ယိၤဟၣ် ၄:၂၅, ၂၆) ကစၢ်ပာ်ဖျါထီၣ်စ့ၢ်ကီးဝဲလၢ အဝဲမ့ၢ်စီၤပၤလၢ ဝံဒၤနံးယ့လး ထံၣ်ဘၣ်တ့ၢ်လံဖဲ တၢ်ထံၣ်လၢညါခီအပူၤန့ၣ်လီၤ. ယ့ၣ်ၡူးစံးဘၣ်အတၢ်မၢဖိတဖၣ်လၢ မုၢ်ကအိၣ်ဝဲတနံၤလၢ အဝဲကဆ့ၣ်နီၤလၢ “လီၢ်ပစိာ်ကဟုကညီၢ်” အဖီခိၣ် ဒီးအတၢ်မၢဖိတဖၣ်စ့ၢ်ကီးကဆ့ၣ်နီၤဝဲလၢ လီၢ်ပစိာ်အဖီခိၣ်လီၤ. (မးသဲ ၁၉:၂၈) ကစၢ်ကိးဝဲပှၤပၢတၢ် တကရူၢ်လၢ “သိလၢအစှၤတဖု” လီၤ. ဒီးပာ်ဖျါထီၣ်စ့ၢ်ကီးဝဲလၢ အဝဲအိၣ်ဒီး “သိလၢအဂုၤအဂၤ” တဖၣ်လီၤ. သိတဖၣ်အံၤ တပၣ်ဃုာ်လၢသိလၢအစှၤတဖုအကျါဘၣ်.—လူၤကၣ် ၁၂:၃၂; ယိၤဟၣ် ၁၀:၁၆.

၂. ယွၤအဘီအမုၢ် ကဒုးအိၣ်ထီၣ် တၢ်စံၣ်ညီၣ်တီနီၢ်နီၢ်လီၤ. ယ့ၣ်ၡူးပာ်ဖျါထီၣ်ဝဲလၢ ဘီမုၢ်အံၤကပာ်စီဆှံထီၣ် ယဟိဝၤယွၤအမံၤန့ၣ်လီၤ. ဒီးကမၤဟါမၢ်ကွံာ်ဝဲ တၢ်ဒုၣ်ဒွဲၣ်စံးအၢယွၤအမံၤလၢ မုၣ်ကီၤလံၢ်ဒုးအိၣ်ထီၣ်ဝဲစးထီၣ်လၢ ဧ့ၤဒ့ၣ်အပူၤတုၤလီၤလၢပစိၤခဲအံၤလီၤ. တၢ်တတီတလိၤအဒိၣ်ကတၢၢ်တမံၤအံၤန့ၣ် ယွၤအဘီအမုၢ်ကတြူာ်ကွံာ်ဝဲလီၤ. (မးသဲ ၆:၉, ၁၀) ယ့ၣ်ၡူးပာ်ဖျါထီၣ်ဝဲ တၢ်တကွၢ်ဒိၣ်ဆံးအါစှၤတၢ် ခီဖျိလၢသိၣ်လိဝဲ ပိာ်မုၣ်မ့ၢ်ဂ့ၤပိာ်ခွါမ့ၢ်ဂ့ၤ, ပှၤကဲဒိၣ်မ့ၢ်ဂ့ၤ ပှၤဖှီၣ်ဖိယာ်ဖိမ့ၢ်ဂ့ၤလီၤ. ယ့ၣ်ၡူးအမူဒါလၢ အရ့ဒိၣ်ကတၢၢ်န့ၣ်မ့ၢ် ဒ်သိးကသိၣ်လိဝဲ ပှၤအံၣ်စရ့လးဖိတဖၣ်သနာ်က့ အဝဲမၤစၢၤဝဲပှၤၡၤမရံဖိ ဒီးပှၤတခီဘီမုၢ်ဖိ (ပှၤလၢအတမ့ၢ်ဘၣ်ပှၤယူဒၤဖိတဖၣ်ဘၣ်) စ့ၢ်ကီးန့ၣ်လီၤ. ကစၢ်ခရံာ်န့ၣ် တကွၢ်ဒိၣ်ဆံးအါစှၤတၢ် ဒီးတကွၢ်မဲာ်တၢ်ဘၣ်အဃိ ကစၢ်တလီၤဂာ်ဒ်သိးဒီး တၢ်ဘူၣ်တၢ်ဘါခိၣ်နၢ်တဖၣ်လၢ အစိၤဘၣ်န့ၣ်လီၤ.

၃. ယွၤအဘီအမုၢ်န့ၣ် တဘၣ်ဃးဘၣ်ဒီးဟီၣ်ခိၣ်ဘၣ်. ယ့ၣ်ၡူးအိၣ်မူဖဲ ထံကီၢ်အတၢ်အိၣ်သး တဂၢၢ်တကျၢၤအဆၢကတီၢ်န့ၣ်လီၤ. ထံကီၢ်လၢကစၢ်အိၣ်ဝဲန့ၣ် အိၣ်လၢပှၤတခီဘီမုၢ်ဖိ အတၢ်ပၢအဖီလာ်န့ၣ်လီၤ. ဘၣ်ဆၣ် ဖဲပှၤဂုာ်ကျဲးစၢးဒ်သိး ယ့ၣ်ၡူးကမၤဘၣ်ဃးအသးဒီး ထံဂ့ၢ်ကီၢ်ဂ့ၢ်လၢ စိၤဖဲန့ၣ်အခါ ကစၢ်ဟးဆှဲးဝဲလီၤ. (ယိၤဟၣ် ၆:၁၄, ၁၅) ယ့ၣ်ၡူးစံးဘၣ် ပှၤမၤထံဂ့ၢ်ကီၢ်ဂ့ၢ်တဂၤလၢ “ယဘီယမုၢ် တဘၣ်ဃးဘၣ်ဒီး ဟီၣ်ခိၣ်အံၤဘၣ်.” (ယိၤဟၣ် ၁၈:၃၆) စံးဘၣ်စ့ၢ်ကီးပှၤပိာ်အခံတဖၣ်လၢ “မ့မ့ၢ်သုဝဲသ့ၣ်အံၤ, မ့ၢ်သုတဘၣ်ဃးဘၣ်ဒီး ဟီၣ်ခိၣ်” ဘၣ်. (ယိၤဟၣ် ၁၅:၁၉) ကစၢ်တဟ့ၣ်အခွဲးလၢ အဝဲသ့ၣ်ကသူတၢ်စုကဝဲၤလၢ ကဒီသဒၢအီၤအဂီၢ်ဘၣ်.—မးသဲ ၂၆:၅၁, ၅၂.

၄. ခရံာ်ကပၢတၢ်ပှဲၤဒီးတၢ်အဲၣ်တၢ်ကွံလီၤ. ယ့ၣ်ၡူးအၢၣ်လီၤပာ်ဝဲလၢ ကမၤသးဖှံပှၤဟီၣ်ခိၣ်ဖိဒီး ကမၤစှၤလီၤအဝဲသ့ၣ် အတၢ်ဝံတၢ်ယိးန့ၣ်လီၤ. (မးသဲ ၁၁:၂၈-၃၀) ကစၢ်အိၣ်မူဝဲဒ် အတၢ်ကတိၤအသိးလီၤ. ကစၢ်ဟ့ၣ်တ့ၢ်ဝဲတၢ်ဟ့ၣ်ကူၣ်လၢအဘျုးအိၣ် ဒ်သိးပကမၤဂ့ၤထီၣ်ပတၢ်ရ့လိာ်သးဒီးပှၤဂၤ, ပကတြီဆၢဟီၣ်ခိၣ်အတၢ်သူၣ်လီသးကွံ, ပကဃုထံၣ်န့ၢ် တၢ်သူၣ်ခုသးခု ဒီးပကွၢ်ဆၢၣ်မဲာ် တၢ်သူၣ်ကိၢ်သးဂီၤကန့ၢ်အဂီၢ်လီၤ. (မးသဲ အဆၢဒိၣ် ၅-၇) ယ့ၣ်ၡူးပာ်ဖျါထီၣ်ဝဲတၢ်အဲၣ်လၢ ပှၤဂၤအဖီခိၣ်အဃိ ပှၤလၢအပတီၢ်ဖုၣ်မ့ၢ်ဂ့ၤ ထီမ့ၢ်ဂ့ၤန့ၣ် သုးဘူးအသးဆူ ကစၢ်အအိၣ်ညီဝဲလီၤ. ပှၤလၢအဘၣ် တၢ်ဆီၣ်တံၢ်မၤနၢၤအီၤတဖၣ်ဒၣ်လဲာ် နာ်ဝဲလၢယ့ၣ်ၡူးကရ့ဒီးအဝဲသ့ၣ်လၢ တၢ်သးကညီၤ ဒီးတၢ်ပာ်ကဲအဃိ အဝဲသ့ၣ်သုးဘူးအသးဆူ ယ့ၣ်ၡူးအအိၣ်လီၤ. ပှၤအါဂၤထံၣ်ဘၣ်ဝဲလၢယ့ၣ်ၡူးကကဲထီၣ်စီၤပၤလၢ အဂ့ၤကတၢၢ်လီၤ.

ကျဲအဂၤတဘိလၢ ယ့ၣ်ၡူးသိၣ်လိဝဲ ယွၤအဘီအမုၢ်အဂ့ၢ်အိၣ်ဝဲလီၤ. ကစၢ်မၤတၢ် လီၤလိၢ်လီၤလးအါမးလီၤ. ဘၣ်မနုၤအဃိ ဘၣ်မၤဝဲဒ်န့ၣ်လဲၣ်. ပကကွၢ်သကိးတက့ၢ်.

​—ဘၣ်တၢ်ဒိးသန့ၤထီၣ်အီၤလၢ မးသဲ, မၢ်ကူး, လူၤကၣ် ဒီးယိၤဟၣ်န့ၣ်လီၤ.