ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါဒံၣ်စ့ဘၢၣ် ၄–၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စဖါနယၤ ၁–ဃးကဲ ၂
“ဃုယဟိဝၤယွၤ တချုးလၢအသးထီၣ်အမုၢ်နံၤ ဟဲတုၤဒံးအခါ”
(စဖါနယၤ ၂:၂, ၃) တၢ်သိၣ်တချုးအိၣ်ဖျဲၣ်ဒံးဘၣ်ဒီး, မုၢ်နံၤဒံကွံာ်ဒ်ဖ့အသိး, ယွၤအသးကဲၤထီၣ် တချုးဘၣ်ဒံးဘၣ်သုဘၣ်, ယွၤအသးထီၣ်တချုးဘၣ်ဒံးဘၣ်သုဒီး, ၃ ဃုယွၤတက့ၢ်, ကယဲၢ်ပှၤလၢအသးစူၤလၢ ထံဧိၤကီၢ်ဧိၤအပူၤ, လၢအမၤအတၢ်စံၣ်ညီၣ်ခဲလၢာ်သ့ၣ်ဧၢ, ဃုတၢ်တီတၢ်လိၤ, ဃုတၢ်သူၣ်စူၤသးစူၤန့ၣ်တက့ၢ်. ဘၣ်တဘၣ်သုကအိၣ်တဒၢလၢ ယွၤအသးထီၣ်အမုၢ်တနံၤအပူၤန့ၣ်လီၤ.
တၢး၀၁ ၂/၁၅ ကဘျံးပၤ ၁၈-၁၉ အဆၢ ၅-၇
ဃုယဟိဝၤယွၤ တချုးလၢအသးထီၣ်အမုၢ်နံၤ ဟဲတုၤဒံးအခါ
၅ ဘၣ်သ့ၣ်သ့ၣ် ပကတဲလၢ– ‘ယဟ့ၣ်လုၢ်ထီၣ်ယသးဒီး ဒိးဘျၢထံ ဒ်ယဟိဝၤပှၤအုၣ်အသးတဂၤအသိး ဝံၤလံ, ယမၤတၢ်တလၢပှဲၤဒံးဘၣ်ဧါ.’ နီၢ်နီၢ်န့ၣ် ပကဘၣ်မၤတၢ်အါန့ၢ်ဒံး ပဟ့ၣ်လုၢ်ထီၣ်ပသးဆူ ယဟိဝၤယွၤအအိၣ်လီၤ. ပှၤအံၣ်စရ့လးဖိတဖၣ်န့ၣ် မ့ၢ်ကလုာ်လၢ အဟ့ၣ်လုၢ်ထီၣ်အသးဆူ ယဟိဝၤယွၤအအိၣ် ဘၣ်ဆၣ် လၢဝံစဖါနယၤအစိၤန့ၣ် အဝဲသ့ၣ်တဖၣ် တအိၣ်မူဒ် အတၢ်ဟ့ၣ်လုၢ်ထီၣ်အသးအသိးဘၣ်. အဃိ အဝဲသ့ၣ်ဘၣ်တၢ်ညိကွံာ်အီၤလီၤ. တၢ်ဃုယဟိဝၤယွၤန့ၣ် မ့ၢ်ဝဲ ပကဘၣ်မၤဒိၣ်ထီၣ်ဒီး ပၢၤဃာ်ပတၢ်ရ့လိာ်သးဒီး ယဟိဝၤယွၤခီဖျိ ပမၤထွဲဒ် အတၢ်ကရၢကရိလၢဟီၣ်ခိၣ် အတၢ်ဟံးစုနဲၣ်ကျဲအသိးလီၤ. ဒီးပကဘၣ်ဃုသ့ၣ်ညါကစၢ်ယွၤအတၢ်ထံၣ် လၢဘၣ်ဃးဒီး တၢ်ဂ့ၢ်တၢ်ကျိၤတဖၣ်ဒီး မၤသးခုအီၤလီၤ. ဖဲပဖးလံာ်စီဆှံ, ဆိကမိၣ်ထံအီၤဒီး အိၣ်မူထွဲအီၤအခါ မ့ၢ်ပဃုယဟိဝၤယွၤလီၤ. ပမ့ၢ်ဃုယွၤအတၢ်ဟံးစုနဲၣ်ကျဲ ခီဖျိလၢတၢ်ထုကဖၣ်ဒီး မၤထွဲဒ်အသးစီဆှံ အတၢ်ဟံးစုနဲၣ်ကျဲအသိးန့ၣ် ပတၢ်ရ့လိာ်သးဒီးအီၤ ကဂၢၢ်ကျၢၤထီၣ်ဒီး ပကအဲၣ်ဒိးမၤအတၢ်မၤလၢ ‘ပသူၣ်ကံၢ်သးလဲ, ဒီးပသးဒီဖျၢၣ်ညါ ဒီးပဂံၢ်ပဘါခဲလၢာ်လီၤ.’—၅ မိၤၡ့ ၆:၅; ကလၤတံ ၅:၂၂-၂၅; ဖံလံးပံၤ ၄:၆, ၇; လီၣ်ဖျါ ၄:၁၁.
၆ ဖဲ စဖါနယၤ ၂:၃ န့ၣ်ပာ်ဖျါထီၣ်ဝဲ တၢ်ဂ့ၢ်ခံမံၤတမံၤလၢအမ့ၢ် “ဃုတၢ်တီတၢ်လိၤ” လီၤ. ပဝဲအါတက့ၢ်န့ၣ် တချုးလၢ ပဒိးဘျၢထံဒ် ခရံာ်ဖိတဂၤဒံးဘၣ်အခါ ပမၤတၢ်ဆီတလဲလၢ အရ့ဒိၣ်တဖၣ်လီၤ. ဘၣ်ဆၣ် ပကဘၣ်ဆဲးအိၣ်မူဒ် ကစၢ်ယွၤအတၢ်ဘျၢအတီအလိၤအသိးလီၤ. ပှၤတနီၤနီၤန့ၣ် လၢအစးခီၣ်ထံး အိၣ်မူဝဲဒ် ကစၢ်ယွၤအတၢ်ဘျၢအသိးဘၣ်ဆၣ် လၢခံအဝဲသ့ၣ် မၤပိာ်ထွဲဝဲဒ် ပှၤဟီၣ်ခိၣ်ဖိတဖၣ်အသိးလီၤ. ပအိၣ်မူဘၣ်လၢ ဟီၣ်ခိၣ်လၢအပှဲၤဒီး ပှၤလၢအမၤကမၣ်မုၣ်ကမၣ်ခွါ, ပှၤလၢအလံၣ်တၢ်လီတၢ် ဒီးမၤတၢ်ကမၣ်အဂၤတဖၣ်အဃိ ပကဃုတၢ်တီတၢ်လိၤန့ၣ် တညီဝဲဘၣ်. ဘၣ်ဆၣ် ပမ့ၢ်သးအိၣ်မၤ တၢ်ဘၣ်ယဟိဝၤယွၤအသး သပှၢ်ကတၢၢ်န့ၣ် ကမၤစၢၤပှၤဒ်သိး ပသုတမၤဒ် ပှၤဟီၣ်ခိၣ်ဖိအသိးတဂ့ၤန့ၣ်လီၤ. ပှၤယူဒၤဖိတဖၣ် မၤပိာ်ထွဲဝဲဒ် ပှၤလၢအကပိာ်ကပၤ လၢအတဘူၣ်ထီၣ်ဘါထီၣ်ကစၢ်ယွၤတဖၣ်အဃိ တဒိးန့ၢ်ဘၣ် ကစၢ်ယွၤအတၢ်ဘၣ်သးလၢၤဘၣ်. လၢပကွၢ်လိမၤဒိး ပှၤဟီၣ်ခိဖိတဖၣ်အလီၢ် မ်ပကကဲထီၣ် “ပှၤကွၢ်လိယွၤ” ဒီးပက “ကူထီၣ်သိးထီၣ်နီၢ်သီတ့အသးလၢ တၢ်လီၤဂာ်ယွၤအသိး, လၢတၢ်တီတၢ်လိၤ, ဒီးတၢ်စီဆှံနီၢ်နီၢ်အပူၤ” န့ၣ်တက့ၢ်.—အ့းဖ့းစူး ၄:၂၄; ၅:၁.
၇ ဖဲကစၢ်ယွၤအသးထီၣ် အမုၢ်နံၤအခါ ဒ်သိးပကဒိးန့ၢ်ဘၣ် တၢ်ဒီသဒၢအဂီၢ် စကၤရယၤ ၂:၃ ပာ်ဖျါထီၣ်ဝဲ တၢ်ဂ့ၢ်သၢဘီတဘီလၢပကဘၣ်မၤအီၤန့ၣ်မ့ၢ်ဝဲ ပကဘၣ် “ဃုတၢ်သူၣ်စူၤသးစူၤ” လီၤ. ကိးနံၤဒဲးန့ၣ် ပထံၣ်လိာ်ဘၣ်ပသးဒီး ပှၤပိာ်မုၣ်, ပိာ်ခွါ ဒီးပှၤသးစၢ်တဖၣ်လၢ အတအိၣ်ဒီး တၢ်သူၣ်စူၤသးစူၤတဖၣ်န့ၣ်လီၤ. အဝဲသ့ၣ်ထံၣ်ဝဲလၢ တၢ်ပာ်သူၣ်ပာ်သးအံၤန့ၣ် မ့ၢ်တၢ်လၢအကမၣ်လီၤ. ဒီပှၤလၢအိၣ်ဒီးတၢ်သူၣ်စူၤသးစူၤ မ့တမ့ၢ် အိၣ်ဒီးတၢ်ဆီၣ်လီၤသးန့ၣ် အဝဲသ့ၣ်ထံၣ်ဝဲဒ် ပှၤလၢအပျံၤတၢ်လီၤ. အဝဲသ့ၣ်အဲၣ်လီၤထဲအသး, မ့ၢ်ပှၤတခီတၢၤ ဒီးထံၣ်ဝဲလၢ အတၢ်ခွဲးတၢ်ယာ် ဒီးအတၢ်ထံၣ်န့ၣ် မ့ၢ်တၢ်လၢအဘၣ်လီၤ. တၢ်ပာ်သူၣ်ပာ်သးဒ်အံၤ မ့ၢ်အိၣ်လၢပသးပူၤန့ၣ် မ့ၢ်တၢ်လၢအလီၤသးအုးဒိၣ်မးလီၤ. ဆၢကတီၢ်ခဲအံၤ မ့ၢ်တၢ်ဆၢကတီၢ်လၢ ပကဘၣ် “ဃုတၢ်သူၣ်စူၤသးစူၤ” လီၤ. ပမၤဒ်န့ၣ် ကသ့ဒ်လဲၣ်. ပမၤသ့ခီဖျိ ပဒိကနၣ်ကစၢ်ယွၤအကလုၢ်, ဒိကနၣ်အတၢ်သိၣ်ဃီၣ် လၢတၢ်ဆီၣ်လီၤသးအပူၤ ဒီးအိၣ်မူဒ်အတၢ်ဘၣ်သးအသိးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စဖါနယၤ ၁:၈) ဒီးမုၢ်တနံၤလၢ ယွၤကလုၢ်တၢ်န့ၣ် တၢ်ကမၤအသးလၢ ယကအိၣ်သကိးပှၤအခိၣ်, ဒီးစီၤပၤအဖိအလံၤ, ဒီးကယဲၢ်ပှၤလၢအကူအသိးဒီး ပှၤတခီဘီမုၢ်ဖိ အကူအသိးလီၤ.
တၢး၀၇ ၁၁/၁၅ ကဘျံးပၤ ၁၁ အဆၢ ၃
လံာ်စီဆှံ အတၢ်ပာ်ဖျါလၢ လံာ်နၤဃူာ်, လံာ်ဃဘးကူာ်, ဒီးလံာ်စဖါနယၤ
၁:၈. ပှၤတနီၤနီၤလၢ ဝံစဖါနယၤအစိၤန့ၣ် ‘ကူသိးဒီး ပှၤတခီဘီမုၢ်ဖိ အကူအသိး’ ဒ်သိးကဒိးန့ၢ်ဘၣ်ဝဲ ပှၤအိၣ်လၢအကပိာ်ကပၤတဖၣ် အတၢ်ဘၣ်သးအဂီၢ်လီၤ. မုၢ်မဆါတနံၤအံၤ ပှၤတဖၣ်လၢအဘူၣ်ထီၣ်ဘါထီၣ် ယဟိဝၤယွၤ မ့ၢ်မၤဝဲဒ်သိး ကဒိးန့ၢ်ဘၣ် ပှၤဟီၣ်ခိၣ်ဖိတဖၣ်အတၢ်ဘၣ်သးန့ၣ် မ့ၢ်တၢ်လၢအလီၤသးအုးဒိၣ်မးလီၤ.
(ဃးကဲ ၂:၉) ဟံၣ်အံၤအလၤကပီၤလၢခံ ကဒိၣ်န့ၢ်အလၤကပီၤလၢညါတက့ၢ်လီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်. ယကဟ့ၣ်လီၤတၢ်ဃူတၢ်ဖိးလၢ တၢ်အလီၢ်ဖဲအံၤလီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်.
တၢး၀၇ ၁၂/၁ ကဘျံးပၤ ၉ အဆၢ ၃
လံာ်စီဆှံ အတၢ်ပာ်ဖျါလၢ လံာ်ဃးကဲ ဒီးလံာ်စကၤရယၤ
၂:၉—‘ဟံၣ်အံၤအလၤကပီၤလၢခံ ဒိၣ်န့ၢ်အလၤကပီၤလၢညါ’ လၢကျဲဒ်လဲၣ်. တၢ်ဂ့ၢ်အိၣ်ဝဲ အစှၤကတၢၢ်သၢမံၤလၢအမ့ၢ် တၢ်လုၢ်ဟံၣ်အိၣ်ဝဲပှဲၤနံၣ်လဲၣ်, မတၤသိၣ်လိတၢ်ဖဲန့ၣ်လဲၣ် ဒီးမတၤသ့ၣ်တဖၣ် ဟဲဘူၣ်ထီၣ်ဘါထီၣ် ယဟိဝၤယွၤလဲၣ်န့ၣ်လီၤ. စီၤၡလိၤမိၤ အတၢ်လုၢ်ဟံၣ်ဖးဒိၣ်န့ၣ်အိၣ်ဝဲအနံၣ် ၄၂၀, စးထီၣ်လၢ ချ.ခ.န ၁၀၂၇ တုၤလၢ ချ.ခ.န ၆၀၇ ဘၣ်ဆၣ် မ့မ့ၢ်တၢ်လုၢ်ဟံၣ် “လၢခံ” တဖျၢၣ်န့ၣ်အိၣ်ဝဲအနံၣ် ၅၈၀, ပှၤသူၣ်ထီၣ်အီၤဝံၤဖဲ ချ.ခ.န ၅၁၅ ဒီးဘၣ်တၢ်မၤဟးဂီၤကွံာ်အီၤဖဲ ခ.န ၇၀ န့ၣ်လီၤ. တကးဒံးဘၣ် ခရံာ်လၢအမ့ၢ် မ့းၡံအၤန့ၣ် သိၣ်လိတၢ်ဖဲတၢ်လုၢ်ဟံၣ် “လၢခံ” တဖျၢၣ်အပူၤဒီးပှၤဟဲဘူၣ်ထီၣ်ဘါထီၣ် ကစၢ်ယွၤလၢ တၢ်လုၢ်ဟံၣ် “လၢခံ” န့ၣ်အါန့ၢ်ဒံးပှၤဟဲလၢ တၢ်လုၢ်ဟံၣ် “လၢညါ” တဖျၢၣ်လီၤ.—မၤတၢ် ၂:၁-၁၁.
တၢ်ဖးလံာ်စီဆှံ
(ဃးကဲ ၂:၁-၁၄) လါနွံလါတလါ, ထီၣ်အနံၤခံဆံတနံၤန့ၣ် ယွၤအကလုၢ် ဟဲဝဲလၢဝံဃးကဲအစုပူၤ ဒီးစံးဝဲဒၣ်, ၂ စံးလၢယူဒၤအခိၣ်, စီၤၡၤလတံၤအ့လးအဖိခွါ စီၤစရူဘၤဘ့လး, ဒီးပှၤလုၢ်တၢ်အခိၣ်စီၤယိၤစါဒးအဖိခွါ, စီၤယိၤၡူ, ဒီးပှၤဂီၢ်မုၢ် လၢအအိၣ်လီၤတဲာ်, ဒီးစံး, ၃ ပှၤလၢအထံၣ်ဘၣ်ဟံၣ်အံၤလၢ အလၤကပီၤအခီၣ်ထံးန့ၣ် မ့ၢ်မတၤအိၣ်လီၤတဲာ်လၢ သုကျါတဂၤလဲၣ်. ဒီးသုထံၣ်ဘၣ်အီၤခဲကနံၣ်အံၤဒ်လဲၣ်. ထိၣ်သတြီၤတၢ်, ဒီးအအံၤတဟံၣ်န့ၣ်အိၣ်လၢ သုမဲာ်ညါဒ်တၢ်နီတမံၤဘၣ်အသိးန့ၣ်တမ့ၢ်ဘၣ်ဧါ. ၄ ဘၣ်ဆၣ်ဒီးခဲကနံၣ်အံၤပာ်ဆူၣ်နသး, စီၤစရူဘၤဘ့လးဧၢ, ယွၤစံးဝဲဒၣ်, ပာ်ဆူၣ်နသး, ပှၤလုၢ်တၢ်အခိၣ် စီၤယိၤစါဒးအဖိခွါစီၤယိၤၡူဧၢ, ဒီးပာ်ဆူၣ်သုသး, ပှၤဂီၢ်မုၢ်လၢကီၢ်ပူၤခဲလၢာ်သ့ၣ်ဧၢ, ဒီးမၤတၢ်တက့ၢ်. တၢ်သုးမုၢ်ဂီၢ်မုၢ်အယွၤစံးဝဲဒၣ်, ယအိၣ်ဒီးသုလီၤ. တၢ်သုးမုၢ်ဂီၢ် မုၢ်အယွၤစံးဝဲဒၣ်, ၅ ဒ်တၢ်ကတိၤလၢ ယအၢၣ်လီၤအီလီၤဒီးသု ဖဲသုဟးထီၣ်လၢ အဲၤကူပတူးအပူၤအသိးန့ၣ် ယသးအိၣ်ဂၢၢ်ဆိးကျၢၤလၢသုကျါလီၤ, ပျံၤတၢ်တဂ့ၤ. ၆ အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤစံးဝဲဒ်အံၤ, အိၣ်ဒံးတစိၢ်ဖိ, ဒီးယကမၤဟူးဝးမူခိၣ်, ဒီးဟီၣ်ခိၣ်, ဒီးပီၣ်လဲၣ်, ဒီးခိလီၤ. ၇ ဒီးယကဒုးကနိး ပှၤကိးကလုာ်ဒဲး, ဒီးတၢ်လၢပှၤကလုာ်ခဲလၢာ်သးကွံဝဲန့ၣ် ကဟဲဝဲလီၤ. ဒီးယကမၤပှဲၤဟံၣ်အံၤဒီးတၢ်လၤကပီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်, ၈ ကျိၣ်ဧိၤစ့ဧိၤန့ၣ်မ့ၢ်ယတၢ်, ဒီးထူဧိၤလွဲဧိၤန့ၣ်မ့ၢ်ယတၢ်, တၢ်သုးမုၢ်ဂီၢ်မုၢ်အယွၤစံးဝဲဒၣ်. ၉ ဟံၣ်အံၤအလၤကပီၤလၢခံ ကဒိၣ်န့ၢ်အလၤကပီၤလၢညါတက့ၢ်လီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်. ယကဟ့ၣ်လီၤတၢ်ဃူတၢ်ဖိးလၢ တၢ်အလီၢ်ဖဲအံၤလီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်. ၁၀ လၢစီၤဒၤရယါဝ့ၣ် အနံၣ်ခံနံၣ်တနံၣ် လါခွံလါတလါ, ထီၣ်ခံဆံလွံၢ်နံၤတနံၤန့ၣ် ယွၤအကလုၢ်ဟဲဝဲလၢဝံဃးကဲ အစုပူၤ, ဒီးစံးဝဲဒၣ်, ၁၁ တၢ်သုးမုၢ်ဂီၢ်မုၢ်အယွၤစံးဒ်အံၤ, သံကွၢ်တၢ်သိၣ်တၢ်သီအဂ့ၢ်လၢ ပှၤလုၢ်တၢ်အဒိၣ်တဖၣ်, ဒီးစံး, ၁၂ ပှၤမ့ၢ်စိာ်တၢ်ညၣ်စီဆှံလၢအယၣ်အသရ့ၤ, ဒီးကိၣ်ဂ့ၤ, ကသူဂ့ၤ, စပံးထံဂ့ၤ, သိဧိၤချါဧိၤဂ့ၤ, တၢ်အီၣ်တမံၤမံၤဂ့ၤ, အယၣ်အသရ့ၤမ့ၢ်ထိးအီၤဒီး, ကကဆှီစ့ၢ်ကီးဧါ. ဒီးပှၤလုၢ်တၢ်အဒိၣ်တဖၣ် စံးဆၢတၢ်ဒီးစံးဝဲဒၣ်, တမ့ၢ်ဘၣ်. ၁၃ ဒီးစီၤဃးကဲစံးဝဲဒၣ်, ပှၤလၢအတကဆှီဘၣ်လၢ တၢ်သံအဃိန့ၣ် မ့ၢ်ထိးဘၣ်တၢ်န့ၣ်တမံၤမံၤဒီး, တၢ်တမံၤန့ၣ် ကကဲလၢတၢ်တကဆှီဘၣ်ဧါ. ဒီးပှၤလုၢ်တၢ်အဒိၣ်တဖၣ် စံးဆၢတၢ်ဒီးစံးဝဲဒၣ်, ကကဲလၢတၢ်တကဆှီဘၣ်လီၤ. ၁၄ ဒီးစီၤဃးကဲစံးဆၢတၢ်ဒီးစံးဝဲဒၣ်, ပှၤဂီၢ်မုၢ်အံၤ မ့ၢ်ဒ်န့ၣ်အသိး, ဒီးပှၤတကလုာ်အံၤ မ့ၢ်ဒ်န့ၣ်အသိးလၢယမဲာ်ညါ, ယွၤစံးဝဲဒၣ်. ဒီးအမၤတၢ်လၢ အစုမ့ၢ်ဒ်န့ၣ်အသိးခဲလၢာ်, ဒီးတၢ်လၢအမၤဘူၣ်ဖဲန့ၣ် မ့ၢ်တကဆှီဘၣ်လီၤ.
လါဒံၣ်စ့ဘၢၣ် ၁၁–၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စကၤရယၤ ၁-၈
“ဟံးဃာ် . . . ပှၤယူဒၤဖိတဂၤ အဆ့အသရ့ၤ”
(စကၤရယၤ ၈:၂၀-၂၂) တၢ်သုးမုၢ်ဂီၢ်မုၢ်အယွၤစံးဝဲဒ်အံၤ, ပှၤဂီၢ်မုၢ်ဒီး ပှၤဝ့ၢ် ဖိလၢအါဝ့ၢ်ကဟဲဒံးလီၤ. ၂၁ ဒီးပှၤအိၣ်ဝဲဆိးဝဲလၢဝ့ၢ်တဖျၢၣ်အပူၤ ကလဲၤဆူအဂၤတဖျၢၣ်ဒီးစံး, လဲၤဃ့ကညးသကိးယွၤချ့ချ့, ဒီးဃုသကိး တၢ်သုးမုၢ်ဂီၢ်မုၢ်အယွၤတက့ၢ်. ယကလဲၤလီၤ, ယဲဒၣ်လဲာ်စ့ၢ်ကီးလီၤ. ၂၂ ဒီးပှၤအါကလုာ်ဒီး ပှၤကလုာ်ဆူၣ်တဖၣ် ကဟဲဃုတၢ်သုးမုၢ်ဂီၢ်မုၢ်အယွၤလၢ ယရူၤၡလ့ၣ်အပူၤ, ဒီးဃ့ကညးယွၤလီၤ.
တၢး၁၄ ၁၁/၁၅ ကဘျံးပၤ ၂၇ အဆၢ ၁၄
“ခဲကနံၣ်အံၤ, သုမ့ၢ်ယွၤအပှၤတကလုာ်”
၁၄ ဝံလၢပျၢၤခံဂၤ တဲဆိပာ်ဝဲ လၢမုၢ်နံၤအခံကတၢၢ်အံၤအတီၢ်ပူၤ ပှၤအါအါဂီၢ်ဂီၢ်ဃုာ်ဒီးယွၤအခ့အပှၤတဖၣ် ကဘူၣ်ထီၣ်ဘါထီၣ် ယဟိဝၤယွၤ န့ၣ်လီၤ. ဝံယၡါယၤ တဲဆိပာ်စၢၤဝဲလၢ– “ဒီးပှၤဂီၢ်မုၢ်အါကလုာ်ကလဲၤဒီးစံး, ဟဲ, လဲၤထီၣ်သကိးဆူယွၤအကစၢၢ်, ဆူစီၤယၤကိာ်အကစၢ်အဟံၣ်န့ၣ်တက့ၢ်. ဒီးကနဲၣ်လိပှၤလၢအကျဲတဖၣ်, ဒီးပကပိာ်အကျဲဧိၤကပူၤဧိၤလီၤ. အဂ့ၢ်ဒ်အံၤ, လၢစံယိၣ်အပူၤန့ၣ် တၢ်သိၣ်တၢ်သီကလဲၤထီၣ်, ဒီးယွၤအကလုၢ်ကထါ လၢယရူၤၡလ့ၣ်အပူၤလီၤ.” (ယၡါယၤ ၂:၂, ၃) ဒ်န့ၣ်အသိး ဝံစကၤရယၤ တဲဆိပာ်စၢၤဝဲလၢ “ပှၤအါကလုာ်ဒီး ပှၤကလုာ်ဆူၣ်တဖၣ် ကဟဲဃုတၢ်သုးမုၢ်ဂီၢ်မုၢ်အယွၤလၢ ယရူၤၡလ့ၣ်အပူၤ, ဒီးဃ့ကညးယွၤလီၤ.” အဝဲ ကိးဝဲပှၤသ့ၣ်တဖၣ်န့ၣ်လၢ “ပှၤဆံဆဲၣ်ဂၤလၢ ပှၤကလုာ်ခဲလၢာ်အကျါ” လီၤ. အဝဲသ့ၣ် ဟံးဃာ်နီၢ်သးအံၣ်စရ့လး အဆ့အသရ့ၤဒီး စံးဝဲ– “ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢကစၢ်အိၣ်ဝဲဒီးသုလီၤ.”—စကၤရယၤ ၈:၂၀-၂၃.
(စကၤရယၤ ၈:၂၃) တၢ်သုးမုၢ်ဂီၢ်မုၢ်အယွၤစံးဒ်အံၤ, တၢ်လၢမုၢ်နံၤတဖၣ်န့ၣ်ပှၤဆံဆဲၣ်ဂၤလၢ ပှၤကလုာ်ခဲလၢာ်အကျါန့ၣ် ကဟံးဃာ်တၢ်, ကဟံးဃာ်ဒၣ်လဲာ် ပှၤယူဒၤဖိတဂၤအဆ့အသရ့ၤ, ဒီးစံး, ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢကစၢ်အိၣ်ဝဲဒီးသုလီၤ.
“သုမ့ၢ်ယွၤအပှၤတကလုာ်လီၤ”
၄ ပမ့ၢ်တသ့ၣ်ညါ ပှၤလၢအဘၣ်တၢ်ဒိးဖှူအီၤလၢ အအိၣ်တ့ၢ်လၢဟီၣ်ခိၣ်ချၢအမံၤ ကိးဂၤဒဲးန့ၣ် သိလၢအဂုၤအဂၤ “လဲၤတၢ်” ဒီးအဝဲသ့ၣ်ကသ့ဒ်လဲၣ်. လံာ်စီဆှံစံးဝဲလၢ “ပှၤဆံဆဲၣ်ဂၤ” က “ဟံးဃာ်တၢ်, ကဟံးဃာ်ဒၣ်လဲာ် ပှၤယူဒၤဖိတဂၤအဆ့အသရ့ၤ, ဒီးစံး, ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢကစၢ်အိၣ်ဝဲဒီးသုလီၤ.” လံာ်စီဆှံတဆၢအံၤ စံးဝဲလၢ ပှၤယူဒၤဖိတဂၤဘၣ်ဆၣ် စံးကဒီးဝဲလၢ “သု” လီၤ. ပသ့ၣ်ညါဘၣ်လၢ လံာ်စီဆှံတဆၢအံၤအဲၣ်ဒိးစံးဝဲ အါန့ၢ်ဒံးတဂၤလီၤ. ပှၤယူဒၤဖိတဂၤန့ၣ် တမ့ၢ်ထဲပှၤတဂၤဘၣ်, မ့ၢ်ပှၤဘၣ်တၢ်ဒိးဖှူအီၤဒီတဖုလီၤ. သိလၢအဂုၤအဂၤတဖၣ် သ့ၣ်ညါတၢ်ဂ့ၢ်အဝဲအံၤအဃိ အဝဲသ့ၣ် မၤယဟိဝၤယွၤအတၢ်မၤ ဃုာ်ဒီးပှၤဘၣ်တၢ်ဒိးဖှူအီၤတဖုန့ၣ်လီၤ. တလိၣ်လၢ ပကသ့ၣ်ညါ ပှၤလၢအဘၣ်တၢ်ဒိးဖှူအီၤ ကိးဂၤဒဲးအမံၤ ဒီးပိာ်အဝဲသ့ၣ်တဂၤစုာ်စုာ်အခံဘၣ်. ယ့ၣ်ၡူးမ့ၢ်ပခိၣ် အဃိလံာ်စီဆှံစံးဝဲလၢ ပကဘၣ်ပိာ်ထဲယ့ၣ်ၡူးအခံလီၤ.—မးသဲ ၂၃:၁၀.
တၢး၀၉ ၂/၁၅ ကဘျံးပၤ ၂၇ အဆၢ ၁၄
အဝဲသ့ၣ် “ပိာ်သိဖိအခံ”
၁၄ ပှၤလၢအဆီၣ်ထွဲ အဒီပုၢ်ဝဲၢ်တဖၣ်န့ၣ် ယ့ၣ်ၡူးခရံာ်ထံၣ်ဝဲ ဒ်အဆီၣ်ထွဲအီၤအသိးလီၤ. (ဖး မးသဲ ၂၅:၄၀ တက့ၢ်.) ပှၤလၢ အတၢ်မုၢ်လၢ်အိၣ်လၢ ကအိၣ်မူဘၣ်လၢ ဟီၣ်ခိၣ်ချၢတဖၣ် ဆီၣ်ထွဲဝဲ ယ့ၣ်ၡူးအဒီပုၢ်ဝဲၢ်လၢ အဘၣ်တၢ်ဒိးဖှူအီၤတဖၣ် လၢကျဲဒ်လဲၣ်. ဆီၣ်ထွဲမၤစၢၤဝဲခီဖျိ မၤစၢၤ အဝဲသ့ၣ်လၢ တၢ်စံၣ်တဲၤတဲလီၤတၢ်မၤအပူၤလီၤ. (မး. ၂၄:၁၄; ယိၤဟၣ် ၁၄:၁၂) ပှၤဘၣ်တၢ်ဒိးဖှူအီၤလၢ ဟီၣ်ခိၣ်ချၢတဖၣ် အနီၣ်ဂံၢ်စှၤလီၤသနာ်က့, သိလၢအဂုၤအဂၤတဖၣ် အနီၣ်ဂံၢ်အါထီၣ်ဝဲလီၤ. ဖဲပှၤလၢ အတၢ်မုၢ်လၢ်အိၣ်လၢဟီၣ်ခိၣ်ချၢတဖၣ် မၤဝဲတၢ်စံၣ်တဲၤတဲလီၤတၢ်မၤမ့ၢ်ဂ့ၤ, မၤဝဲပှၤစိာ်တၢ်သးခုကစီၣ်ဖိလၢ ဆၢကတီၢ်လၢပှဲၤအခါမ့ၢ်ဂ့ၤ, မ့ၢ်ဒၣ် ဆီၣ်ထွဲမၤစၢၤဝဲ ပှၤဘၣ်တၢ်ဒိးဖှူအီၤတဖၣ် အမူဒါလၢအမ့ၢ် တၢ်လဲၤဒုးကဲထီၣ်ပှၤလၢယ့ၣ်ၡူးအပျဲၢ်အဘီၣ်န့ၣ်လီၤ. (မး. ၂၈:၁၉, ၂၀) တၢ်ခွဲးတၢ်ယာ် အိၣ်စ့ၢ်ကီးလၢ ပကဆီၣ်ထွဲမၤစၢၤတၢ်မၤအံၤ ခီဖျိပဟ့ၣ်တၢ်မၤဘူၣ်လၢ ကျဲအါဘိန့ၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စကၤရယၤ ၅:၆-၁၁) ဒီးယစံး, အဝဲအံၤမ့ၢ်မနုၤတမံၤလဲၣ်. ဒီးအဝဲဒၣ်စံးဝဲ, အဝဲအံၤမ့ၢ် အ့ဖးလၢအဟဲထီၣ်လီၤ. ဒီးစံးဝဲဒၣ်, အဝဲသ့ၣ်ဖျါဝဲ ဒ်တၢ်အံၤသိးလၢကီၢ်ဒီဘ့ၣ်ညါလီၤ. ၇ ဒီးကွၢ်ကွၢ်, စီၤပီၢ်သၣ်ပှာ်တလိၣ်, ဒီးပိာ်မုၣ်ဆ့ၣ်နီၤလၢ အ့ဖးအပူၤန့ၣ်အိၣ်ဝဲတဂၤလီၤ. ၈ ဒီးစံးဝဲဒၣ်, အဝဲအံၤမ့ၢ်တၢ်အၢတၢ်သီလီၤ. ဒီးတ့ၢ်လီၤကွံာ်ပိာ်မုၣ် ဆူအ့ဖးအသးကံၢ်ပူၤ, ဒီးကွံာ်စီၤပီၢ်သၣ်ပှာ်တလိၣ်လၢ အ့ဖးအခိၣ်ထိးအဖီခိၣ်လီၤ. ၉ ဒီးယကျ့ထီၣ်ယမဲာ်ဒီး ယကွၢ်တၢ်, ဒီးကွၢ်ကွၢ်ပိာ်မုၣ်ခံဂၤဟဲထီၣ်, ဒီးကလံၤအိၣ်ဝဲလၢ အဒံးဆ့တဖၣ်အပူၤလီၤ. အဂ့ၢ်ဒ်အံၤ, အိၣ်ဝဲဒီးအဒံးဆ့တဖၣ် ဒ်ထိၣ်ဒိၣ်အဒံးဆ့အသိးန့ၣ်, ဒီးစိာ်ထီၣ်အ့ဖးဆူ မူခိၣ်ဒီးဟီၣ်ခိၣ်အဘၢၣ်စၢၤလီၤ. ၁၀ ဒီးယစံးလၢကလူးလၢ အကတိၤတၢ်ဒီးယၤတဂၤ, အဝဲသ့ၣ်အံၤစိာ်ထီၣ်အ့ဖးဆူလဲၣ်. ၁၁ ဒီးစံးဘၣ်ယၤ, ဒ်သိးအကမၤဟံၣ်တဖျၢၣ် လၢအဂီၢ်လၢ ကီၢ်ၡံနၢ်အပူၤလီၤ. ဒီးကအိၣ်ဝဲဆိးဝဲ, ဒီးတၢ်ကပာ်အီၤဖဲန့ၣ်လၢ အလီၢ်ဒၣ်ဝဲလီၤ.
ဝံစကၤရယၤ အတၢ်ထံၣ်လၢညါခီန့ၣ်—အဘျုးအိၣ်လၢနဂီၢ်ဒ်လဲၣ်
၁၈ ဝံစကၤရယၤ အတၢ်ထံၣ်လၢညါခီအံၤ ဒုးသ့ၣ်နီၣ်ထီၣ်ပှၤယူဒၤဖိတဖၣ်လၢ ဒ်သိးအဝဲသ့ၣ် အတၢ်ဘူၣ်ထီၣ်ဘါထီၣ် ကစီဆှံလၢ ယဟိဝၤယွၤအမဲာ်ညါအဂီၢ် အဝဲသ့ၣ်ခဲလၢာ်အိၣ်ဒီးမူဒါလီၤ. တၢ်အၢတၢ်သီန့ၣ် အိၣ်လၢ ယွၤအပှၤဂီၢ်မုၢ်အကျါတသ့ဘၣ်. မုၢ်မဆါတနံၤအံၤ ယဟိဝၤယွၤ မိၤပှၤဆူအတၢ်ကရၢကရိလၢအစီဆှံ လၢအပှဲၤဒီးတၢ်အဲၣ်ဒီး တၢ်ကဟုကယာ်န့ၣ်လီၤ. လၢတၢ်န့ၣ်အဃိ ဒ်သိးယွၤအတၢ်ကရၢကရိ ကအိၣ်စီဆှံအဂီၢ် ပဝဲခဲလၢာ်ပအိၣ်ဒီးမူဒါလီၤ. တၢ်အၢတၢ်သီန့ၣ် အိၣ်လၢယဟိဝၤယွၤ အပှၤဂီၢ်မုၢ်အကျါ တသ့လ့ၤတက့ၤဘၣ်.
(စကၤရယၤ ၆:၁) ဒီးယကျ့ထီၣ်ကဒီးယမဲာ်, ဒီးယကွၢ်တၢ်, ဒီးကွၢ်ကွၢ်, လ့ၣ်ကဟၣ်လွံၢ်ဆိ ဟဲထီၣ်လၢကစၢၢ်ခံဖျၢၣ် အကဆူးပူၤ, ဒီးကစၢၢ်တဖၣ်န့ၣ် မ့ၢ်ကစၢၢ်တိၢ်ဘီလီၤ.
တၢး၁၇.၁၀ ကဘျံးပၤ ၂၇-၂၈ အဆၢ ၇-၈
လ့ၣ်ကဟၣ်တဖၣ်ဒီး ခိၣ်သလုးန့ၣ် ကဒီသဒၢနၤ
၇ လၢလံာ်စီဆှံအပူၤကစၢၢ်န့ၣ် ဘၣ်တၢ်ဒိလီၤအီၤလၢဘီမုၢ် မ့တမ့ၢ် တၢ်ပၢတၢ်ပြးတဖၣ်လီၤ. ကစၢၢ်လၢ ဝံစကၤရယၤထံၣ်ဝဲန့ၣ် လီၤဂာ်လိာ်အသးဒီးကစၢၢ်လၢ လံာ်ဒၤနံးယ့လးအပူၤန့ၣ်လီၤ. ကစၢၢ်တဖျၢၣ်န့ၣ် ဘၣ်တၢ်ဒိလီၤအီၤလၢ ယဟိဝၤယွၤ အတၢ်ပၢလၢတၢ်ခဲလၢာ်အဖီခိၣ် ဒီးအတၢ်ပၢလီၤထူလီၤယိာ်လီၤ. လၢခံတဖျၢၣ်န့ၣ် ဒိလီၤဝဲမ့းၡံအၤ အဘီမုၢ်လၢယ့ၣ်ၡူးပၢဝဲန့ၣ်လီၤ. (ဒၤနံးယ့လး ၂:၃၅, ၄၅) ကစၢၢ်ခံဖျၢၣ်အံၤ အိၣ်ထီၣ်ဝဲဖဲ ၁၉၁၄ နံၣ်ဖဲယ့ၣ်ၡူး စးထီၣ်ကဲစီၤပၤအခါန့ၣ်လီၤ. ဒီးကစၢၢ်ခံဖျၢၣ်အံၤန့ၣ် အရ့ဒိၣ်လၢ ယွၤအတၢ်တိာ်ပာ် ကဟဲလၢပှဲၤထီၣ်လၢ ဟီၣ်ခိၣ်ချၢအဂီၢ်န့ၣ်လီၤ.
၈ ဘၣ်မနုၤအဃိ ကစၢၢ်န့ၣ်မ့ၢ်ဝဲ တိၢ်ဘီလဲၣ်. တိၢ်ဘီန့ၣ် အလုၢ်ဒိၣ်ပှ့ၤဒိၣ် ဒီးကပြုၢ်ကပြီၤဝဲလီၤ. လၢတၢ်န့ၣ်အဃိ ယဟိဝၤယွၤ မၢဝဲပှၤအံၣ်စရ့လးဖိတဖၣ် သူဝဲတိၢ်ဘီ ဖဲအဝဲသ့ၣ်တ့ထီၣ် ဒဲစီဆှံဒီးတၢ်လုၢ်ဟံၣ်လၢ ဝ့ၢ်ယရူၤၡလ့ၣ်အခါန့ၣ်လီၤ. (၂ မိၤၡ့ ၂၇:၁-၃; ၁ စီၤပၤ ၇:၁၃-၁၆) လၢတၢ်န့ၣ်အဃိ ကစၢၢ်တိၢ်ဘီခံဖျၢၣ်အံၤန့ၣ် ပာ်ဖျါထီၣ်ဝဲလၢ ယဟိဝၤယွၤအတၢ်ပၢဒီး မ့းၡံအၤအဘီမုၢ်န့ၣ် မ့ၢ်တၢ်ပၢလၢအဂ့ၤကတၢၢ်လီၤ. ဒီးဘီမုၢ်အံၤ ကဒုးအိၣ်ထီၣ် တၢ်မုာ်တၢ်ခုၣ် လၢပှၤဟီၣ်ခိၣ်ဖိအကျါ ဒီးအဝဲသ့ၣ်ကဒိးန့ၢ်ဘၣ် တၢ်ဆိၣ်ဂ့ၤအါမးလီၤ.
တၢ်ဖးလံာ်စီဆှံ
(စကၤရယၤ ၈:၁၄-၂၃) အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤစံးဒ်အံၤ, တုၤသုပၢ်ထိၣ်ဂဲၤယသးထီၣ်ဒီး, ဒ်ယကူၣ်တၢ်မၤအၢသုဒီး ယတပီၢ်ယၢ်လီၤက့ၤဘၣ် ယသးဘၣ်အသိးန့ၣ်, တၢ်သုးမုၢ် ဂီၢ်မုၢ်အယွၤစံးဝဲဒၣ်, ၁၅ ယကူၣ်တၢ်လၢ မုၢ်နံၤတဖၣ်အံၤကဒီးဒ်န့ၣ်အသိး, ယကမၤဂ့ၤယရူၤၡလ့ၣ် ဒီးယူဒၤအပှၤဟံၣ်ဖိလီၤ. ပျံၤတၢ်တဂ့ၤ. ၁၆ အအံၤမ့ၢ်တၢ်လၢသုဘၣ်မၤတဖၣ်, ကတိၤတၢ်မ့ၢ်တၢ်တီ တဂၤဒီးတဂၤတက့ၢ်. စံၣ်ညီၣ်တၢ်မ့ၢ်တၢ်တီ, ဒီးတၢ်ဃူတၢ်ဖိးလၢ သုပဲတရီအပူၤန့ၣ်တက့ၢ်. ၁၇ ဒီးကူၣ်ဆိကမိၣ်တၢ်အၢ လၢသုသးကံၢ်ပူၤ ထီဒါပှၤလၢသုဃၢၤနီတဂၤတဂ့ၤ, ဒီးအဲၣ်ဒိးဆိၣ်တၢ်တတီဘၣ်တဂ့ၤ. အဂ့ၢ်ဒ်အံၤ, တၢ်န့ၣ်တဖၣ် ယသးဟ့အီၤခဲလၢာ်လီၤ, ယွၤစံးဝဲဒၣ်. ၁၈ ဒီးတၢ်သုးမုၢ်ဂီၢ်မုၢ်အယွၤ အကလုၢ်ဘၣ်ယၤ ဒီးစံးဝဲဒၣ်, ၁၉ တၢ်သုးမုၢ်ဂီၢ်မုၢ်အယွၤစံးဒ်အံၤ, လါလွံၢ်လါတလါ အတၢ်ဒုၣ်တၢ်အီၣ်, ဒီးလါယဲၢ်လါတလါအတၢ်ဒုၣ်တၢ်အီၣ်, ဒီးလါနွံလါတလါအတၢ်ဒုၣ်တၢ်အီၣ်, ဒီးလါဆံဆဲၣ်လါတလါ အတၢ်ဒုၣ်တၢ်အီၣ်န့ၣ် ကကဲထီၣ်တၢ်သူၣ်ဖှံသးညီ, ဒီးတၢ်သူၣ်ခုသးခု, တၢ်မၤဘူၣ်နံၤတဖၣ်ဒၣ်လဲာ်လၢ ယူဒၤအပှၤဟံၣ်ဖိအဂီၢ်လီၤ. မၤသးဒ်န့ၣ်ဒီး အဲၣ်တၢ်မ့ၢ်တၢ်တီ, ဒီးတၢ်ဃူတၢ်ဖိးတက့ၢ်. ၂၀ တၢ်သုးမုၢ်ဂီၢ်မုၢ်အယွၤစံးဝဲဒ်အံၤ, ပှၤဂီၢ်မုၢ်ဒီး ပှၤဝ့ၢ် ဖိလၢအါဝ့ၢ်ကဟဲဒံးလီၤ. ၂၁ ဒီးပှၤအိၣ်ဝဲဆိးဝဲလၢဝ့ၢ်တဖျၢၣ်အပူၤ ကလဲၤဆူအဂၤတဖျၢၣ်ဒီးစံး, လဲၤဃ့ကညးသကိးယွၤချ့ချ့, ဒီးဃုသကိး တၢ်သုးမုၢ်ဂီၢ်မုၢ်အယွၤတက့ၢ်. ယကလဲၤလီၤ, ယဲဒၣ်လဲာ်စ့ၢ်ကီးလီၤ. ၂၂ ဒီးပှၤအါကလုာ်ဒီး ပှၤကလုာ်ဆူၣ်တဖၣ် ကဟဲဃုတၢ်သုးမုၢ်ဂီၢ်မုၢ်အယွၤလၢ ယရူၤၡလ့ၣ်အပူၤ, ဒီးဃ့ကညးယွၤလီၤ. ၂၃ တၢ်သုးမုၢ်ဂီၢ်မုၢ်အယွၤစံးဒ်အံၤ, တၢ်လၢမုၢ်နံၤတဖၣ်န့ၣ် ပှၤဆံဆဲၣ်ဂၤလၢ ပှၤကလုာ်ခဲလၢာ်အကျါန့ၣ် ကဟံးဃာ်တၢ်, ကဟံးဃာ်ဒၣ်လဲာ် ပှၤယူဒၤဖိတဂၤအဆ့အသရ့ၤ, ဒီးစံး, ပကလဲၤတၢ်ဒီးသုလီၤ. အဂ့ၢ်ဒ်အံၤ, ပနၢ်ဟူလၢကစၢ်အိၣ်ဝဲဒီးသုလီၤ.
လါဒံၣ်စ့ဘၢၣ် ၁၈–၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စကၤရယၤ ၉-၁၄
အိၣ်ဆိးလၢ “ကစၢၢ်တဖၣ် အကစၢၢ်ကဆူး”
(စကၤရယၤ ၁၄:၃, ၄) ဒီးယွၤကဟးထီၣ်, ဒီးဒုးသုးဒီးပှၤကလုာ်တဖၣ်, ဒ်အဒုးတၢ်လၢ တၢ်ဒုးသုးအမုၢ်တနံၤအသိးန့ၣ်လီၤ. ၄ ဒီးတၢ်လၢမုၢ်တနံၤန့ၣ် အခီၣ်ကဆၢထၢၣ်လၢ ကစၢၢ်သ့ၣ်စၤယံးအလိၤ လၢအအိၣ်ဝဲလၢ ယရူၤၡလ့ၣ်အမဲာ်ညါလၢ မုၢ်ထီၣ်တခီလီၤ. ဒီးကစၢၢ်သ့ၣ်စၤယံး ကသ့ၣ်ဖးလၢအသးကံၢ်ပူၤ ဆူမုၢ်ထီၣ်ဒီးဆူမုၢ်နုာ်, ကစၢၢ်ကဆူးဖးဒိၣ်ကကဲထီၣ်လီၤ. ဒီးကစၢၢ်တခီ ကသုးအသးဆူကလံၤစိး, ဒီးတခီဆူကလံၤထံးလီၤ.
တၢး၁၃ ၂/၁၅ ကဘျံးပၤ ၁၉ အဆၢ ၁၀
အိၣ်ဆိးလၢ ယဟိဝၤယွၤ အကစၢၢ်ကဆူး အတၢ်ဒီသဒၢအပူၤ
၁၀ ဖဲကစၢၢ်လၢမ့ၢ်တၢ်အဒိအံၤ သ့ၣ်ဖးကွံာ်ဆူ ကလံၤစိးတခီဒီး ကလံၤထံးတခီအခါ ယဟိဝၤယွၤအခီၣ်အိၣ်ဒံးလၢ ကစၢၢ်ခံခီအံၤအလိၤလီၤ. “ကစၢၢ်ကဆူးဖးဒိၣ်” ဟဲအိၣ်ထီၣ်ဖဲ ယဟိဝၤယွၤ အခီၣ်ဖီလာ်န့ၣ်လီၤ. ကစၢၢ်ကဆူးလၢအမ့ၢ်တၢ်အဒိအံၤ ဒိလီၤဝဲ ယွၤအတၢ်ဒီသဒၢ ဒီးယဟိဝၤယွၤ အခ့အပှၤတဖၣ် အိၣ်ဒီးတၢ်ဘံၣ်တၢ်ဘၢလၢ ယွၤအတၢ်ပၢဒီး အဖိခွါယ့ၣ်ၡူး အဘီမုၢ်အဖီလာ်လီၤ. ယဟိဝၤယွၤ တပျဲဝဲလၢ တၢ်ဘူၣ်ထီၣ်ဘါထီၣ်စီဆှံ ကလီၤမၢ်ကွံာ်ဝဲဘၣ်. ကစၢၢ်သ့ၣ်စၤယံး သ့ၣ်ဖးကွံာ်ဝဲဖဲလဲၣ်အခါလဲၣ်. သ့ၣ်ဖးကွံာ်ဝဲဖဲ ၁၉၁၄, ပှၤတခီဘီမုၢ်ဖိတဖၣ် အမုၢ်အလါလၢာ် ဒီးယွၤအဘီအမုၢ် သူၣ်ထီၣ်အသးအခါန့ၣ်လီၤ. ပှၤဘူၣ်ထီၣ်ဘါထီၣ်တၢ် အမ့ၢ်အတီတဖၣ် လဲၤအိၣ်ဝဲလၢကစၢၢ်ကဆူးလၢ အခါဖဲလဲၣ်.
(စကၤရယၤ ၁၄:၅) ဒီးသုကဃ့ၢ်ထီၣ်ဆူ ယကစၢၢ်တဖၣ် အကစၢၢ်ကဆူးလီၤ. အဂ့ၢ်ဒ်အံၤ, ကစၢၢ်တဖၣ်အကစၢၢ်ကဆူးန့ၣ် ကပၢၢ်လၢအၤစလး, ဒီးသုကဃ့ၢ်တၢ်ဒ်သုဃ့ၢ်တၢ်လၢ ဟီၣ်ခိၣ်ဟူးဝးအမဲာ်ညါ, လၢယူဒၤအစီၤပၤဧူးစံယါ အမုၢ်နံၤအသိးန့ၣ်လီၤ. ဒီးယွၤယကစၢ်ကဟဲဝဲ, ဒီးပှၤစီဆှံခဲလၢာ်ကအိၣ်ဒီးနၤလီၤ.
တၢး၁၃ ၂/၁၅ ကဘျံးပၤ ၂၀ အဆၢ ၁၃
အိၣ်ဆိးလၢ ယဟိဝၤယွၤ အကစၢၢ်ကဆူး အတၢ်ဒီသဒၢအပူၤ
၁၃ ပမ့ၢ်အိၣ်ဘူးဘူးတံၢ်တံၢ်ဒီး ယဟိဝၤယွၤ ဒီးအိၣ်ဆၢထၢၣ်လၢ တၢ်မ့ၢ်တၢ်တီအပူၤန့ၣ် ကစၢ်ယွၤ ဒီးအဖိခွါ ကမၤလၢပှဲၤဝဲအမူဒါ ဒီးယွၤတပျဲဝဲ ပှၤတဂၤဂၤ မ့တမ့ၢ် တၢ်တမံၤမံၤ ‘ဂုာ်န့ၢ်ပျီန့ၢ်ဘၣ်ပှၤလၢ အစုပူၤဘၣ်.’ (ယိၤဟၣ် ၁၀:၂၈, ၂၉) ပမ့ၢ်ဒိကနၣ် တၢ်ဘၣ်တ့ကစၢ် ယဟိဝၤယွၤ အကလုၢ် ဒီးဒိးပၢပသးလၢ မ့းၡံအၤအဘီမုၢ်အဖီလာ်န့ၣ် ယဟိဝၤယွၤ အိၣ်ကတဲာ်ကတီၤအသးလၢ ကမၤစၢၤပှၤလီၤ. ပကဘၣ်အိၣ်ဂၢၢ်ဆိးကျၢၤလၢ ကစၢၢ်ကဆူး အတၢ်ဒီသဒၢအပူၤလီၤ. မ့ၢ်လၢဖဲတၢ်နးတၢ်ဖှီၣ်ဖးဒိၣ်ဘူးထီၣ်အခါ ကစၢၢ်ကဆူးအံၤ အဘျုးကအိၣ်နီၢ်နီၢ်လၢ ပှၤဘူၣ်ထီၣ်ဘါထီၣ်တၢ် အမ့ၢ်အတီတဖၣ်အဂီၢ်န့ၣ်လီၤ.
(စကၤရယၤ ၁၄:၆, ၇) ဒီးလၢမုၢ်တနံၤန့ၣ် တၢ်ကမၤအသးလၢ တၢ်ကပီၤတအိၣ်ဘၣ်, ဒီးတၢ်ကဲၤကပီၤတမံၤ ကသုးကွံာ်အသးလီၤ. ၇ ဒီးကမ့ၢ်မုၢ်တနံၤလၢ ယွၤသ့ၣ်ညါဝဲ, တမ့ၢ်မုၢ်ဆါဘၣ်, ဒီးတမ့ၢ်မုၢ်နၤဘၣ်, ဒီးတၢ်ကမၤအသးလၢ ဖဲမုၢ်ဟါအကတီၢ်န့ၣ် တၢ်ကကပီၤထီၣ်လီၤ.
(စကၤရယၤ ၁၄:၁၂) ဒီးအအံၤမ့ၢ် တၢ်တီၢ်လၢယွၤကတီၢ်ပှၤဂီၢ်မုၢ် လၢအဒုးသုးဒီးယရူၤၡလ့ၣ်ခဲလၢာ်, အညၣ်ကဃဲၤလီၤကွံာ်လၢ အဆၢထၢၣ်လၢအခီၣ်အဖၢမုၢ်, ဒီးအမဲာ်ကဟးဂီၤလၢအမဲာ်ကွီၤပူၤ, ဒီးအပျ့ၤကလၢာ်ဝဲလၢအကိာ်ပူၤလီၤ.
(စကၤရယၤ ၁၄:၁၅) ဒ်တၢ်တီၢ်အံၤအသိးန့ၣ် တၢ်တီၢ်ကသ့ၣ်, ကသ့ၣ်လၤ, ကီၤလၤအူး, ဒီးကသ့ၣ်ယီၤ, ဒီးဆၣ်ဖိကီၢ်ဖိအဒၢလၢ တၢ်သူၣ်ဒဲအလီၢ်အပူၤန့ၣ် ကဒ်န့ၣ်သိးလီၤ.
တၢး၁၃ ၂/၁၅ ကဘျံးပၤ ၂၀ အဆၢ ၁၅
အိၣ်လၢယဟိဝၤယွၤ အကစၢၢ်ကဆူး အတၢ်ဒီသဒၢအပူၤ
၁၅ ဖဲကစၢ်ယွၤ ဒုးတၢ်အမုၢ်နံၤအခါ ပှၤလၢတအိၣ်ဝဲလၢ “ကစၢၢ်ကဆူးဖးဒိၣ်” အတၢ်ဒီသဒၢအပူၤတဖၣ် အတၢ်အိၣ်သး ကမၤသးဒ်လဲၣ်. အဝဲသ့ၣ် တဒိးန့ၢ်ဘၣ် ကစၢ်ယွၤအ “တၢ်ကပီၤ” လၢအမ့ၢ် ယွၤအတၢ်ဘၣ်သးဘၣ်. တၢ်ဒုးလၢ အကဟဲအံၤ အတီၢ်ပူၤ ပှၤဟီၣ်ခိၣ်ဖိတဖၣ် အတၢ်စုကဝဲၤလၢ ဘၣ်တၢ်ဒိလီၤအီၤလၢ “ကသ့ၣ်, ကသ့ၣ်လၤ, ကီၤလၤအူး, ဒီးကသ့ၣ်ယီၤ, ဒီးဆၣ်ဖိကီၢ်ဖိအဒၢလၢ တၢ်သူၣ်ဒၢအလီၢ်” တဖၣ်န့ၣ် ကဟးဂီၤဝဲလီၤ. တၢ်စုကဝဲၤဒ်သိးအံၤတဖၣ် “ကသုးကွံာ်အသး” မ့တမ့ၢ် ကဟးဂီၤကွံာ် ဒီးပှၤသူအီၤတသ့လၢၤဘၣ်. ယဟိဝၤယွၤ ကသူစ့ၢ်ကီးဝဲ တၢ်ဆူးတၢ်ဆါဒီး “တၢ်တီၢ်” လီၤ. မ့မ့ၢ်တၢ်အဒိမ့ၢ်ဂ့ၤ တၢ်အနီၢ်ကီၢ်မ့ၢ်ဂ့ၤ တၢ်စံၣ်ညီၣ်အံၤ ကမၤလီၤမၢ် တၢ်မၤပျံၤမၤဖုးလီၤ. ဖဲမုၢ်နံၤအဝဲန့ၣ် အဝဲသ့ၣ် “အမဲာ်ကဟးဂီၤ . . . ဒီးအပျ့ၤကလၢာ်ဝဲလၢအကိာ်ပူၤ” လီၤ. အဝဲသ့ၣ် မၤကီမၤခဲပှၤ ဒီးကတိၤဒုၣ်ဒွဲၣ်ပှၤတသ့လၢၤဘၣ်. (ကၤ. ၁၄:၆, ၇, ၁၂, ၁၅) သုးမုၢ်သံၣ်ဘိဂီၢ်မုၢ် ကအိၣ်လၢ မုၣ်ကီၤလံၢ်အအိၣ်တခီလီၤ. အဝဲသ့ၣ် မ့ၢ်အိၣ်ဝဲဖဲလဲၣ်ဂ့ၤ ဖဲလဲၣ်ဂ့ၤ ကဃ့ၢ်ပူၤဖျဲးအသးအဂီၢ် တၢ်လီၢ် တအိၣ်လၢၤဘၣ်. (လီၣ်. ၁၉:၁၉-၂၁) “ပှၤဘၣ်တၢ်မၤသံလၢယွၤန့ၣ် ကအိၣ်လၢဟီၣ်ခိၣ်အကတၢၢ် ပၢၢ်လၢဟီၣ်ခိၣ်အကတၢၢ်” လီၤ.—ယံး. ၂၅:၃၂, ၃၃.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စကၤရယၤ ၁၂:၃) တၢ်လၢမုၢ်တနံၤန့ၣ် ယကပာ်ယရူၤၡလ့ၣ်လၢလၢၢ် ဃၢတဖျၢၣ်လၢပှၤဂီၢ်မုၢ်ခဲလၢာ်အဂီၢ်လီၤ. ကယဲၢ်ပှၤလၢ အဟံးထီၣ်အီၤန့ၣ် ကဘၣ်တၢ်ဒီၣ်တဲာ်ကွံာ်အီၤခဲလၢာ်လီၤ. ဘၣ်ဆၣ်ဒီး ဟီၣ်ခိၣ်အပှၤကလုာ်ခဲလၢာ် ကအိၣ်ဖှိၣ်ရိဖှိၣ်ထီဒါအီၤလီၤ.
တၢး၀၇ ၁၂/၁၅ ကဘျံးပၤ ၂၃ အဆၢ ၁၀
တၢ်စုကဝဲၤလၢ အထီဒါနၤ တဘီၣ်ထီၣ်ညီထီၣ် နီတမံၤဘၣ်
၉ ဘၣ်မနုၤအဃိ ပှၤကလုာ်အဂၤတဖၣ် ထီဒါဝဲ ခရံာ်ဖိတဖၣ်လဲၣ်န့ၣ် ဝံစကၤရယၤပာ်ဖျါထီၣ်ဝဲလီၤ. ဖဲ စကၤရယၤ ၁၂:၃ န့ၣ်ပာ်ဖျါထီၣ်ဝဲလၢ “တၢ်လၢမုၢ်တနံၤန့ၣ် ယကပာ်ယရူၤၡလ့ၣ်လၢလၢၢ် ဃၢတဖျၢၣ်လၢပှၤဂီၢ်မုၢ်ခဲလၢာ်အဂီၢ်လီၤ.” ဝံအတၢ်စံးပာ်အံၤ အဲၣ်ဒိးစံးဝဲ ဝ့ၢ်ယရူၤၡလ့ၣ် ဖဲလဲၣ်တဖျၢၣ်လဲၣ်. ဝံစကၤရယၤ အဲၣ်ဒိးစံးဝဲဘၣ်ဃးဒီး “ယရူၤၡလ့ၣ်လၢအဘၣ်ဃးဒီးမူခိၣ်” လၢအဒိလီၤဝဲ မူခိၣ်အဘီအမုၢ်လၢ ပှၤလၢအဘၣ်တၢ်ဒိးဖှူအီၤတဖၣ် ဘၣ်တၢ်ကွဲမုာ်အီၤအလီၢ်န့ၣ်လီၤ. (ဧ့ၤဘြံၤ ၁၂:၂၂) ပှၤလၢအဘၣ်တၢ်ဒိးဖှူအီၤ တဖၣ်န့ၣ် အိၣ်မူဒံးဝဲလၢ ဟီၣ်ခိၣ်စှၤကိာ်ဂၤန့ၣ်လီၤ. ဖဲတၢ်ဆၢကတီၢ်အိၣ်တ့ၢ်ဒံးဒီးအဝဲသ့ၣ်အခါ အဝဲသ့ၣ်ဒီး “သိလၢအဂုၤအဂၤ” တဖၣ်န့ၣ် ဟ့ၣ်သဆၣ်ထီၣ် ပှၤဂၤဒ်သိး ပှၤကဒိးပၢပှၤသးလၢ ယွၤအဘီအမုၢ်အတၢ်ပၢဖီလာ်လီၤ. (ယိၤဟၣ် ၁၀:၁၆; လီၣ်ဖျါ ၁၁:၁၅) ပှၤအဂၤတဖၣ်န့ၣ် မ့ၢ်အတူၢ်လိာ်အဝဲသ့ၣ်ဧါ. ယဟိဝၤယွၤ ဟံးစုနဲၣ်ကျဲ တၢ်ဘူၣ်တၢ်ဘါ အမ့ၢ်အတီဒ်လဲၣ်. ပကကွၢ်သကိး တၢ်စံးဆၢဖဲ စကၤရယၤ အဆၢဒိၣ် ၁၂ အပူၤလီၤ. ပကထံၣ်ဘၣ်လၢ “တၢ်အစုကဝဲၤ” လၢအထီဒါဝဲ ပှၤလၢအဘၣ်တၢ်ဒိးဖှူအီၤတဖၣ် ဒီးပှၤလၢအမၤသကိးတၢ်ဒီးအီၤတဖၣ်န့ၣ် “တဘီၣ်ထီၣ်ညီထီၣ်နီတမံၤဘၣ်.”
၁၀ စကၤရယၤ ၁၂:၃, ခ့ခါစှီၤကျိာ်, ပာ်ဖျါဝဲလၢ ပှၤကလုာ်တဖၣ် “ကဘၣ်ဒိဘၣ်ထံး” လီၤ. တၢ်အံၤ ကကဲထီၣ်အသးဒ်လဲၣ်. ကစၢ်ယွၤ စံးဝဲလၢ ဘီမုၢ်အတၢ်သးခုကစီၣ် ကဘၣ်တၢ်စံၣ်တဲၤတဲလီၤအီၤလီၤ. ယဟိဝၤပှၤအုၣ်အသးတဖၣ် စံၣ်တဲၤတဲလီၤတၢ်လၢ တၢ်သူၣ်ဆူၣ်သးဆူၣ်အပူၤလီၤ. ဘၣ်ဆၣ် တၢ်စံၣ်တဲၤတဲလီၤ ဘီမုၢ်တၢ်သးခုကစီၣ်လၢ အမ့ၢ်တၢ်မုၢ်လၢ်ထဲတမံၤဧိၤလၢ ပှၤဟီၣ်ခိၣ်ဖိအဂီၢ်န့ၣ် ကဲထီၣ် “လၢၢ်ဃၢတဖျၢၣ်” လၢပှၤကလုာ်တဖၣ်အဂီၢ်လီၤ. အဝဲသ့ၣ် ဂုာ်ကျဲးစၢးသုးကွံာ်ဝဲလၢၢ်အံၤ ခီဖျိမၤတံာ်တဲာ်ဝဲ ပှၤစံၣ်တဲၤတဲလီၤတၢ်ဖိတဖၣ်လီၤ. ဘၣ်ဆၣ် ပှၤလၢအမၤတံာ်တာ်တၢ်တဖၣ် က “ဘၣ်ဒိဘၣ်ထံး” ဝဲလီၤ. အဝဲသ့ၣ် ကဒိးန့ၢ်ဘၣ်တၢ်မဲာ်ဆှး ဒီးကဘၣ်ဒိအလၤကပီၤစ့ၢ်ကီးလီၤ. အဝဲသ့ၣ် မၤဘှ့ၣ်ဝဲ ပှၤစံၣ်တဲၤတဲလီၤတၢ်ဖိလၢ အစံၣ်တဲၤတဲလီၤတၢ်လၢ တချုးတၢ်အကတၢၢ်ဟဲဒံးဘၣ် ဒီးအပာ်လုၢ်ပာ်ပှ့ၤ တၢ်စံၣ်တဲၤတဲလီၤ “တၢ်သးခုအကစီၣ် အထူအယိာ်” တဖၣ်တန့ၢ်ဘၣ်. (လီၣ်ဖျါ ၁၄:၆) ကီၢ်အၤဖြံၤကၤ အပှၤခိးဃိာ်တဂၤ ဖဲအထံၣ်ဘၣ်ဝဲ ပှၤမၤအၢမၤနး ယဟိဝၤပှၤအုၣ်အသးတဖၣ်အခါ တဲဝဲလၢ– ‘သုမၤအၢမၤနး ပှၤသ့ၣ်တဖၣ်အံၤ သနာ်က့ ကကဲထီၣ်တၢ်ကလီကလီလီၤ. အဝဲသ့ၣ် တတူၢ်ၡူအသး နီတဘျီဘၣ်. အဝဲသ့ၣ်အါထီၣ်ဒၣ်ကွ့ၢ်ကွ့ၢ်လီၤ.’
(စကၤရယၤ ၁၂:၇) ယွၤကအုၣ်က့ၤခီၣ်က့ၤဆိ ယူဒၤအဒဲတဖၣ် ဒ်သိးစီၤ ဒၤဝံးအပှၤဟံၣ်ဖိအလၤကပီၤ, ဒီးပှၤယရူၤၡလ့ၣ်ဖိ အလၤကပီၤအသုတမၤဒိၣ်ထီၣ်အသး လၢယူဒၤအဖီခိၣ်တဂ့ၤလီၤ.
တၢး၀၇ ၁၂/၁၅ ကဘျံးပၤ ၂၅ အဆၢ ၁၃
တၢ်စုကဝဲၤလၢ အထီဒါနၤ တဘီၣ်ထီၣ်ညီထီၣ် နီတမံၤဘၣ်
၁၃ ဖး စကၤရယၤ ၁၂:၇, ၈ တက့ၢ်. လၢပျၢၤ ကီၢ်အံၣ်စရ့အပူၤ ဒဲတဖၣ် အိၣ်အါမး ဒီးဖဲန့ၣ်အဆၢကတီၢ် ပှၤကွၢ်သိဒီး ပှၤသူၣ်အီၣ်ဖျးအီၣ်တၢ်တဖၣ် အိၣ်ဝဲလၢဒဲလီၤ. ဖဲဒုၣ်ဒါတဖၣ်ဟဲဒုး ဝ့ၢ်ယရူၤၡလ့ၣ်အခါ ပှၤအိၣ်လၢဒဲတဖၣ်န့ၣ် မ့ၢ်ပှၤသ့ၣ်တဖၣ်လၢ ဒုၣ်ဒါဟဲမၤဘၣ်အီၤညီဒီး လိၣ်ဘၣ်တၢ်ဒီသဒၢလၢအဆိကတၢၢ်န့ၣ်လီၤ. တၢ်ကတိၤလၢအမ့ၢ် “ယူဒၤအဒဲတဖၣ်” န့ၣ်မ့ၢ်ဝဲ စိၤခဲအံၤ ပှၤဘၣ်တၢ်ဒိးဖှူအီၤလၢ အိၣ်တ့ၢ်သ့ၣ်တဖၣ်လီၤ. အဝဲသ့ၣ်တဖၣ်န့ၣ် လီၤဂာ်ဒ်အိၣ်လၢတၢ်ပျီပူၤ ဒီးတအိၣ်ဘၣ်လၢဝ့ၢ်လၢအအိၣ်ဒီးတၢ်ဒီသဒၢအပူၤဘၣ်လီၤ. အဝဲသ့ၣ် အိၣ်ဒီးတၢ်သူၣ်ဆူၣ်သးဆူၣ်လၢ မ့းၡံအၤ အဘီမုၢ်အတၢ်ဒိၣ်ထီၣ်ထီထီၣ်အဂီၢ်လီၤ. မုၣ်ကီၤလံၢ်ကဒုးဝဲ “ယူဒၤအဒဲတဖၣ်” လၢညါအဃိ ယဟိဝၤယွၤ အသုးမုၢ်ကအုၣ်က့ၤခီၣ်က့ၤ အဝဲသ့ၣ်လၢ အဆိကတၢၢ်န့ၣ်လီၤ.
တၢ်ဖးလံာ်စီဆှံ
(စကၤရယၤ ၁၂:၁-၁၄) တၢ်အကလုၢ်လီၤ, ယွၤအကလုၢ်လၢ အံၣ်စရ့လးအဂ့ၢ်. ယွၤလၢအသလၣ်ထီၣ်မူခိၣ်, ဒီးပာ်လီၤဟီၣ်ခိၣ်အခီၣ်ထံး, ဒီးတ့လီၤပှၤကညီအသးလၢ အအိၣ်ဝဲလၢအပူၤတဂၤန့ၣ် စံးဝဲဒၣ်, ၂ ကွၢ်ကွၢ်, ယကပာ်ယရူၤၡလ့ၣ်လၢ တၢ်လဲၤကနူၤကပၤအလီခီလၢ ကယဲၢ်ပှၤဂီၢ်မုၢ်အဂီၢ်လၢ အအိၣ်ဝးတရံးအီၤလီၤ. ဒီးလၢတၢ်ကဝီၤဃာ် ယရူၤၡလ့ၣ်န့ၣ် တၢ်ကမၤစ့ၢ်ကီးဒ်န့ၣ်လၢယူဒၤလီၤ. ၃ တၢ်လၢမုၢ်တနံၤန့ၣ် ယကပာ်ယရူၤၡလ့ၣ်လၢလၢၢ် ဃၢတဖျၢၣ်လၢပှၤဂီၢ်မုၢ်ခဲလၢာ်အဂီၢ်လီၤ. ကယဲၢ်ပှၤလၢ အဟံးထီၣ်အီၤန့ၣ် ကဘၣ်တၢ်ဒီၣ်တဲာ်ကွံာ်အီၤခဲလၢာ်လီၤ. ဘၣ်ဆၣ်ဒီး ဟီၣ်ခိၣ်အပှၤကလုာ်ခဲလၢာ် ကအိၣ်ဖှိၣ်ရိဖှိၣ်ထီဒါအီၤလီၤ. ၄ ယွၤစံးဝဲဒၣ်, တၢ်လၢမုၢ်တနံၤန့ၣ်ယကဒုးသးကတုၤ ကယဲၢ်ကသ့ၣ်ခဲလၢာ်, ဒီးဒုးပျုၢ်ထီၣ် ပှၤဒိးကသ့ၣ်န့ၣ်လီၤ. ဒီးယကဒိးယမဲာ် အိၣ်စီၣ်ထီၣ်အသးဆူယူဒၤအပှၤဟံၣ်ဖိလီၤ. ဒီးပှၤဂီၢ်မုၢ်အကသ့ၣ်န့ၣ် ယကဒုးဘျီၣ်အမဲာ်ကိးဒုဒဲးလီၤ. ၅ ဒီးယူဒၤအခိၣ်တဖၣ် ကစံးလၢအသးကံၢ်ပူၤန့ၣ်, ယဂံၢ်ယဘါမ့ၢ် ပှၤယရူၤၡလ့ၣ်ဖိလၢ တၢ်သုးမုၢ်ဂီၢ်မုၢ်အယွၤ, အကစၢ်အပူၤလီၤ. ၆ တၢ်လၢမုၢ်တနံၤန့ၣ် ယကပာ်ယူဒၤအခိၣ်တဖၣ်ဒ် သပၢၤမ့ၣ်အူတဖျၢၣ်လၢ သ့ၣ်မုၣ်အကျါအသိး, ဒီးဒ်မ့ၣ်အူအဆှီတဘိလၢ ဘုကဒိၣ်အပူၤအသိးန့ၣ်, ဒီးကအီၣ် ကွံာ်ပှၤဂီၢ်မုၢ်ခဲလၢာ် အိၣ်ဝးတရံးဝဲလၢ စုထွဲဒီးလၢစုစ့ၣ်, ဒီးပှၤကအိၣ်ကဆိးဒံးလၢယရူၤၡလ့ၣ်အပူၤ လၢအလီၢ်ဒၣ်ဝဲ, လၢယရူၤၡလ့ၣ်အပူၤလီၤ. ၇ ယွၤကအုၣ်က့ၤခီၣ်က့ၤဆိ ယူဒၤအဒဲတဖၣ် ဒ်သိးစီၤ ဒၤဝံးအပှၤဟံၣ်ဖိအလၤကပီၤ, ဒီးပှၤယရူၤၡလ့ၣ်ဖိအ လၤကပီၤအသုတမၤဒိၣ်ထီၣ်အသး လၢယူဒၤအဖီခိၣ်တဂ့ၤလီၤ. ၈ တၢ်လၢမုၢ်တနံၤန့ၣ် ယွၤကအိၣ်ပှိၤပှၤယရူၤၡလ့ၣ်ဖိ, ဒီးပှၤလၢအခီၣ်ဘၣ်တိၢ်လၢမုၢ်တနံၤန့ၣ် ကမၤသးဒ်စီၤ ဒၤဝံးအသိး, ဒီးစီၤဒၤဝံးအဟံၣ်ဒ်ယွၤအသိး, ဒ်ယွၤအကလူးလၢ အမဲာ်ညါအသိးန့ၣ်လီၤ. ၉ ဒီးလၢမုၢ်တနံၤန့ၣ် တၢ်ကမၤအသးလၢယကဃုမၤ ဟးဂီၤပှၤကလုာ်ခဲလၢာ်လၢ အဟဲထီဒါယရူၤၡလ့ၣ်လီၤ. ၁၀ ယကလူလီၤဂၢ်လီၤ လၢစီၤဒၤဝံးအပှၤဟံၣ်ဖိ, ဒီးလၢပှၤအိၣ်ဝဲဆိးဝဲလၢ ယရူၤၡလ့ၣ်အပူၤတဖၣ်အလိၤလၢ သးဘၣ်ဃးဒီးတၢ်ဘျုးတၢ်ဖှိၣ်, ဒီးတၢ်ဃ့ကညးတၢ်လီၤ. ဒီးကကွၢ်ယၤလၢအဆဲးဝဲ, ဒီးကဟီၣ်ဝဲလၢအဃိဒ်ပှၤ ဟီၣ်ဝဲလၢအဖိခွါတဂၤဃီအဃိအသိး, ဒီးအသူၣ်ကကိၢ် အသးကဂီၤလၢအဃိ ဒ်ပှၤလၢအသူၣ်ကိၢ်အသးဂီၤလၢ အဖိဝဲၢ်ကိအဃိအသိးန့ၣ်လီၤ. ၁၁ တၢ်လၢမုၢ်တနံၤန့ၣ် တၢ်ဟီၣ်ဖးဒိၣ်ကအိၣ်ဝဲလၢယ ရူၤၡလ့ၣ်အပူၤ, ဒ်တၢ်ဟီၣ်ဘၣ်ဃးဒီး ဟၤဒးရံးမိၣ်လၢ ကစၢၢ်ကဆူးမကံးဒိၤအပူၤအသိးလီၤ. ၁၂ ဒီးပှၤကီၢ်ဖိကဟီၣ်, တဒူၣ်တပူၤ, တဒူၣ်တပူၤစုာ်စုာ်လီၤ. စီၤဒၤဝံးအဟံၣ်အပှၤဒူၣ်ဖိတပူၤ, ဒီးအမါတဖၣ်တပူၤဒၣ်, စီၤနၤသၣ်အဟံၣ်အပှၤဒူၣ်ဖိတပူၤ, ဒီးအမါတဖၣ်တပူၤဒၣ်, ၁၃ စီၤလ့ၤဝံအဟံၣ်အပှၤဒူၣ်ဖိတပူၤ, ဒီးအမါတဖၣ်တပူၤဒၣ်, စီၤၡံမံၤအဟံၣ်အပှၤဒူၣ်ဖိတပူၤ, ဒီးအမါတဖၣ်တပူၤဒၣ်, ၁၄ ကယဲၢ်ပှၤအဒူၣ်လၢအအိၣ် လီၤတဲာ်န့ၣ်တဒူၣ်တပူၤ, တဒူၣ်တပူၤ, ဒီးအမါတဖၣ် တပူၤဒၣ်, အမါတဖၣ်တပူၤဒၣ်စုာ်စုာ်လီၤ.
လါဒံၣ်စ့ဘၢၣ် ၂၅–၃၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မၤလကံ ၁-၄
“မ့ၢ်နတၢ်ဆီဟံၣ်ဆီဃီန့ၣ် ဘၣ်ယဟိဝၤယွၤအသးဧါ”
(မၤလကံ ၂:၁၃, ၁၄) ဒီးသုမၤတၢ်အံၤခံဘျီတဘျီ, သုကျၢၢ်ဘၢယွၤ အတၢ်လုၢ်လီၢ်လၢမဲာ်ထံ, ဒီးဟီၣ်တၢ်, ဒီးတၢ်ကအုကစွါတုၤ အတကွၢ်မဲာ်လၢၤဘၣ်တၢ်လုၢ်ဘၣ်, ဒီးတတူၢ်လိာ်လၢၤဘၣ်ဝဲလၢ သုစုပူၤလၢတၢ်ဘၣ်အသးဘၣ်. ၁၄ ဘၣ်ဆၣ်ဒီးသုစံး, မ့ၢ်အဂ့ၢ်မနုၤလဲၣ်. အဂ့ၢ်ဒ်အံၤ, ယွၤမ့ၢ်တၢ်အုၣ်အသးလၢနၤ, ဒီးနဖိၣ်သၣ်ခွါထီၣ်အမါ အဘၢၣ်စၢၤလၢနမၤအီၤ လၢတၢ်လီတၢ်ဝ့ၤလီၤ. ဘၣ်ဆၣ်ဒီး မ့ၢ်နသကိးဒီး နတၢ်အၢၣ်လီၤအီလီၤအမါလီၤ.
jd ကဘျံးပၤ ၁၂၅-၁၂၆ အဆၢ ၄-၅
ဂုာ်ကျဲးစၢး ဒုးအိၣ်ထီၣ် ဟံၣ်ဃီလၢ အဘၣ်ကစၢ်ယွၤအသး
၄ ဖဲမၤလကံအစိၤ, ချ.ခ.န ၅၀၀ အတီၢ်ပူၤ လၢပှၤယူဒၤဖိတဖၣ်အကျါန့ၣ် တၢ်မၤကတၢၢ်ကွံာ် တၢ်ဆီဟံၣ်ဆီဃီန့ၣ် အိၣ်ဝဲအါမးလီၤ. ဝံမၤလကံတဲအဝဲသ့ၣ်လၢ– “ယွၤမ့ၢ်တၢ်အုၣ်အသးလၢနၤ, ဒီးနဖိၣ်သၣ်ခွါထီၣ်အမါ အဘၢၣ်စၢၤလၢနမၤအီၤ လၢတၢ်လီတၢ်ဝ့ၤလီၤ. ဘၣ်ဆၣ်ဒီး မ့ၢ်နသကိးဒီး နတၢ်အၢၣ်လီၤအီလီၤအမါလီၤ.” ယဟိဝၤယွၤအတၢ်လုၢ်လီၢ်န့ၣ် ပှဲၤဝဲဒီး ပိာ်မုၣ်အါမး လၢအဝၤအဲၣ်ဘၢအီၤတဖၣ် “အမဲာ်ထံ ဒီးဟီၣ်တၢ်” လီၤ. ဘၣ်ဆၣ် ပှၤလုၢ်တၢ်အဒိၣ်လၢ အတတီတလိၤဘၣ်တဖၣ်န့ၣ် ကွၢ်ကပာ်ကွံာ်ဝဲ တၢ်ဂ့ၢ်အံၤလီၤ.—မၤလကံ ၂:၁၃, ၁၄.
၅ လၢဝံမၤလကံအစိၤ တၢ်လီၤသူၣ်အုးသးအုးလၢ အကဲထီၣ်အသးလၢ ဟံၣ်ဖိဃီဖိတဖၣ်န့ၣ် ယဟိဝၤယွၤထံၣ်ဝဲဒ်လဲၣ်. ဝံမၤလကံကွဲးဝဲလၢ “ယွၤအံၣ်စရ့လး အကစၢ်စံးဝဲဒၣ် ပှၤပာ်မၢ်ကွံာ်အမါ . . . န့ၣ်ယသးဟ့လီၤ,” ဒီးအဝဲတဲစ့ၢ်ကီးဝဲလၢ ယဟိဝၤယွၤန့ၣ် “တကဒံကဒါဘၣ်.” (မၤလကံ ၂:၁၆; ၃:၆) ကစၢ်ယွၤအတၢ်ပာ်သူၣ်ပာ်သး အိၣ်ဒ်လဲၣ် မ့ၢ်နထံၣ်ဧါ. လၢညါလံၤလံၤ ကစၢ်ယွၤသးဟ့ဝဲ တၢ်မၤကတၢၢ်ကွံာ် တၢ်ဆီဟံၣ်ဆီဃီလီၤ. (၁ မိၤၡ့ ၂:၁၈, ၂၄) ဒ်ဝံမၤလကံအစိၤ ကစၢ်ယွၤသးဟ့ဝဲ တၢ်အံၤအသိး လၢပစိၤခဲအံၤစ့ၢ်ကီးသးဟ့ဝဲလီၤ. ပှၤတနီၤနီၤန့ၣ် တအိၣ်ဒီးတၢ်သူၣ်မံသးမံလၢ အသးသမူတံၤသကိးတဖၣ်အဖီခိၣ်အဃိ အဝဲသ့ၣ် အဲၣ်ဘၢမါအဲၣ်ဘၢဝၤလီၤ. အဝဲသ့ၣ် အတၢ်မၤ ဒီးအတၢ်ပာ်သူၣ်ပာ်သးဒ်အံၤန့ၣ် ယဟိဝၤယွၤထံၣ်ဝဲလီၤ. (ယံးရမံယၤ ၁၇:၉, ၁၀) ပှၤတဂၤ မ့ၢ်မၤကတၢၢ်ကွံာ်အတၢ်ဆီဟံၣ်ဆီဃီဒီး တဲပူၤဖျဲးအသးသနာ်က့ တၢ်လံၣ်တၢ်လီဒီး တၢ်သးက့ၣ်လၢအအိၣ်လၢအသးပူၤန့ၣ် ယဟိဝၤယွၤထံၣ်ဝဲခဲလၢာ်လီၤ. “မ့ၢ်ကယဲၢ်တၢ်တမံၤလၢ်လၢ် အိၣ်ဘ့ၣ်ဆ့, ဒီးအိၣ်ဖျါထီၣ်ဝဲလၢ ပှၤအကလုၢ်ဘၣ်ဃးဒီးပှၤန့ၣ် အမဲာ်လီၤ.”—ဧ့ၤဘြံၤ ၄:၁၃.
(မၤလကံ ၂:၁၅, ၁၆) မ့ၢ်နာ်သက့ဒ်န့ၣ်ဒီး တ့ထဲတဂၤဧိၤ, တမ့ၢ်ဘၣ်ဧါ. ဘၣ်ဆၣ်ဒီး တၢ်အသးအိၣ်လီၤတဲာ်ဒီးအီၤလီၤ. ဒီးတ့ထဲပှၤတဂၤဧိၤ မ့ၢ်အဘၣ်မနုၤလဲၣ်. မ့ၢ်ယွၤဃုန့ၢ် တၢ်အချံဘၣ်ဃးဒီးယွၤလီၤ. မၤသးဒ်န့ၣ်ဒီးပလီၢ်သုသး ဒီးမၢလီတၢ်လၢ နဖိၣ်သၣ်ခွါထီၣ်အမါတဂ့ၤ. ၁၆ အဂ့ၢ်ဒ်အံၤ, ယွၤအံၣ်စရ့လးအကစၢ်စံးဝဲဒၣ်, ပှၤပာ်မၢ်ကွံာ်အမါ, ဒီးကျၢၢ်ဘၢအကူအသိးလၢ တၢ်မၤန့ၢ်ဆူၣ်န့ၣ်ယသးဟ့လီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်. မၤသးဒ်န့ၣ်ဒီး ပလီၢ်သုသးဒ်သိး သုသုတမၤလီတၢ်တဂ့ၤ.
တၢး၀၂ ၅/၁ ကဘျံးပၤ ၁၈ အဆၢ ၁၉
ယဟိဝၤယွၤသးဟ့ဝဲ ပှၤလၢအတတီဒီး အသးသမူတံၤသကိး
၁၉ ပမ့ၢ်ကွၢ်လၢအဂ့ၤတကပၤန့ၣ် ဝံမၤလကံပာ်ဖျါထီၣ်ဝဲလၢ ပှၤပိာ်ခွါတနီၤန့ၣ် အဝဲသ့ၣ်တီဒီး အသးသမူတံၤသကိးလီၤ. အဃိကစၢ်ယွၤ “အသး [အသးစီဆှံ] အိၣ်လီၤတဲာ်ဒီး” အဝဲသ့ၣ်လီၤ. (မၤလကံ ၂:၁၅) မုၢ်မဆါတနံၤအံၤ လၢကစၢ်ယွၤအတၢ်ကရၢကရိအပူၤ ပှၤပိာ်ခွါလၢ “ယူးယီၣ်” အမါအိၣ်ဝဲအါမးအဃိ လီၤသးခုဒိၣ်မးလီၤ. (၁ ပ့းတရူး ၃:၇) အဝဲတမၤဆါအမါလၢ နီၢ်ခိဒီး လၢတၢ်ကတိၤဘၣ်. တမၤမဲာ်ဆှးအမါခီဖျိလၢ မၢဆူၣ်အမါလၢ ကမံဃုာ်ဒီးအီၤလၢ ကျဲလၢအတကြၢးတဘၣ်, တလိၣ်ကွဲတၢ်အဲၣ်ဒီးပှၤပိာ်မုၣ်အဂၤ မ့တမ့ၢ် ကွၢ်တၢ်ဂီၤဘ့ၣ်ဆ့ဘၣ်. လၢယဟိဝၤယွၤ အတၢ်ကရၢကရိအပူၤ မါတဖၣ်လၢ အတီဒီးကစၢ်ယွၤဒီး အတၢ်သိၣ်တၢ်သီတဖၣ် အိၣ်ဝဲအါမးအဃိ လီၤသးခုဒိၣ်မးလီၤ. ဒီးပှၤပိာ်မုၣ်ဒီး ပှၤပိာ်ခွါတဖၣ်အံၤန့ၣ် သ့ၣ်ညါဝဲတၢ်လၢ ကစၢ်ယွၤသးဟ့ဝဲတဖၣ် ဒီးဆိကမိၣ်တၢ်ဒီးမၤထွဲဝဲဒ် အသ့ၣ်ညါဝဲအသိးလီၤ. အဝဲသ့ၣ် ‘စူၢ်ယွၤ’ အကလုၢ်ဒီး ဒိးန့ၢ်ဘၣ်တၢ်ဆိၣ်ဂ့ၤ ခီဖျိလၢ ယွၤအသးစီဆှံလီၤ.—မၤတၢ် ၅:၂၉.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မၤလကံ ၁:၁၀) ပှၤအိၣ်ဝဲလၢသုကျါတဂၤ လၢအကကးတံာ်ဃာ်တြဲၤမ့ၢ်မတၤတဂၤလဲၣ်. သုတဆိၣ်ကဲၤကလီဘၣ်မ့ၣ်အူလၢ ယတၢ်လုၢ်အလီၢ်အဖီခိၣ်န့ၣ်ဘၣ်. သုတဘၣ်ဘၣ် ယသးလ့ၤတက့ၤဘၣ်, တၢ်သုးမုၢ်ဂီၢ်မုၢ်အယွၤစံးဝဲဒၣ်, ဒီးယတဒိးဘၣ်တၢ်မၤဘူၣ်လၢသုစုဘၣ်.
တၢး၀၇ ၁၂/၁၅ ကဘျံးပၤ ၂၇ အဆၢ ၁
လံာ်စီဆှံ အတၢ်ပာ်ဖျါလၢ လံာ်မၤလကံ
၁:၁၀. ယဟိဝၤယွၤ တတူၢ်လိာ်ဝဲ ပှၤလုၢ်တၢ်အဒိၣ် လၢအသူၣ်လီသးကွံတၢ်တဖၣ် အတၢ်လုၢ်ထီၣ်ဘၣ်. မ့ၢ်လၢ ဖဲအဝဲသ့ၣ် မၤဝဲတၢ်မၤယိယိဖိ ဒ်သိးဒီးပံးတံာ်တြဲၤ မ့တမ့ၢ် ဒွဲၣ်ထီၣ်ဝဲ တၢ်လုၢ်လီၢ်အမ့ၣ်အူဒၣ်လဲာ် လီကီဝဲအတၢ်မၤ အဘူးအလဲလီၤ. လၢတၢ်န့ၣ်အဃိ အရ့ဒိၣ်ဒိၣ်မးလၢ ပဟးစံၣ်တဲၤတဲလီၤတၢ် ဒီးပၣ်ဃုာ်လၢ တၢ်ဖံးတၢ်မၤလၢ ဘၣ်ဃးဒီးတၢ်ဘူၣ်ထီၣ်ဘါထီၣ်အပူၤန့ၣ် တဘၣ်မ့ၢ်လၢပကဒိးန့ၢ်ဘၣ် ကျိာ်စ့အဂီၢ်ဘၣ်. ကဘၣ်မ့ၢ်လၢ ပအဲၣ်ကစၢ်ယွၤ ဒီးပှၤလၢပဃၢၤ နီၢ်နီၢ်အဃိလီၤ.—မးသဲ ၂၂:၃၇-၃၉; ၂ ကရံၣ်သူး ၁၁:၇.
(မၤလကံ ၃:၁) ကွၢ်ကွၢ်, ယကမၢလီၤယကလူးတဂၤ, ဒီးကကတဲာ်ကတီၤ ကျဲဧိၤကပူၤဧိၤလၢယမဲာ်ညါ, ဒီးကစၢ်လၢသုဃုအီၤ ကဟဲဆူအတၢ်လုၢ်ဟံၣ်ပူၤ သတူၢ်ကလာ်, တၢ်အၢၣ်လီၤအီလီၤအကလူး လၢအဘၣ်သုသးတဂၤ ဒၣ်လဲာ်လီၤ. ကွၢ်ကွၢ်, ကဟဲဝဲလီၤ, တၢ်သုးမုၢ်ဂီၢ်မုၢ်အယွၤစံးဝဲဒၣ်.
တၢး၁၃ ၇/၁၅ ကဘျံးပၤ ၁၀-၁၁ အဆၢ ၅-၆
“ယအိၣ်ဒီးသု ကိးမုၢ်နံၤမုၢ်နၤဒဲး”
၅ တချုးလၢ ယ့ၣ်ၡူးဟ့ၣ်တၢ်အဒိဘၣ်ဃးဒီး ဘုဒီးနီၢ်စံစာ်ဒံးဘၣ် အပူၤကွံာ်အနံၣ်လၢအကယၤတဖၣ်န့ၣ် ယဟိဝၤယွၤမၢ ဝံမၤလကံတဲဆိပာ်စၢၤဝဲ တၢ်မၤအသးလၢ အဘၣ်ထွဲလိာ်အသးဒီး ယ့ၣ်ၡူးအတၢ်အဒိအံၤလီၤ. (ဖး မၤလကံ ၃:၁-၄ တက့ၢ်.) ပှၤဘျၢတၢ်ယိၤဟၣ် မ့ၢ်ဝဲ ‘ကလူးတဂၤလၢ . . . အမၤက့ၤကျဲလၢမဲာ်ညါ’ လီၤ. (မးသဲ ၁၁:၁၀, ၁၁) မ့မ့ၢ်ယ့ၣ်ၡူးမ့ၢ် ကလူးခံဂၤတဂၤလီၤ. ဖဲ ခ.န ၂၉ ယ့ၣ်ၡူးဒိးဘျၢထံအခါ ပှၤယူဒၤဖိတဖၣ် ကဘၣ်တၢ်စံၣ်ညီၣ်အီၤ ဘူးထီၣ်လံလီၤ. အဝဲမၤကဆှီထီၣ်ဝဲ ဝ့ၢ်ယရူၤၡလ့ၣ်အတၢ်လုၢ်ဟံၣ်ခံဘျီ, တၢတဘျီ ဖဲအဝဲစးထီၣ်အတၢ်စံၣ်တဲၤတဲလီၤတၢ်မၤ ဒီးခံဘျီတဘျီန့ၣ် ဖဲအတၢ်စံၣ်တဲၤတဲလီၤတၢ်မၤဘူးက ဝံၤဝဲအခါလီၤ. (မးသဲ ၂၁:၁၂, ၁၃; ယိၤဟၣ် ၂:၁၄-၁၇) လၢတၢ်န့ၣ်အဃိ ယ့ၣ်ၡူးအတၢ်မၤကဆှီထီၣ်တၢ်န့ၣ် ယံာ်ဝဲတၢ်ဆၢကတီၢ် တကတီၢ်လီၤ.
၆ ဝံမၤလကံအတၢ်စံးပာ်အံၤ ဟဲလၢထီၣ်ပှဲၤထီၣ်ဝဲ လၢခံတဘျီဒ်လဲၣ်. ဖဲ ၁၉၁၄ နံၣ်အပူၤ ခၠါ(ရ်)ထ့(စ်)ရးစၢၤ ဒီးအတံၤသကိးတဖၣ် မၤတၢ်မၤဒ်သိးဒီး ဘျၢတၢ်ယိၤဟၣ်လီၤ. အဝဲသ့ၣ်အတၢ်မၤလၢ အရ့ဒိၣ်အံၤ မ့ၢ်ဝဲတၢ်ပာ်ဖျါထီၣ်က့ၤဝဲ လံာ်စီဆှံအတၢ်မ့ၢ်တၢ်တီတဖၣ်လီၤ. လံာ်စီဆှံကၠိဖိတဖၣ် သိၣ်လိဝဲ တၢ်မ့ၢ်တၢ်တီလၢ ဘၣ်ဃးဒီးခရံာ်အတၢ်ပှ့ၤက့ၤ, ပာ်ဖျါထီၣ်ဝဲ လရာ်မ့ၣ်အူ အတၢ်သိၣ်တၢ်သီန့ၣ် မ့ၢ်တၢ်လၢအကမၣ် ဒီးစံၣ်တဲၤတဲလီၤဝဲ ပှၤတခီဘီမုၢ်ဖိ အဆၢကတီၢ်ကလၢာ်ကွံာ်ဝဲ အကတီၢ်လီၤ. ဘၣ်ဆၣ် ဖဲန့ၣ်အဆၢကတီၢ် တၢ်ဘူၣ်တၢ်ဘါအကရူၢ်လၢ အကိးလီၤအသးလၢ ခရံာ်ဖိန့ၣ် အိၣ်ဒံးဝဲအါမးလီၤ. အဃိ တၢ်သံကွၢ်လၢအရ့ဒိၣ် ဟဲအိၣ်ထီၣ်ဝဲလၢ– ဘုန့ၣ်ကမ့ၢ်ဝဲ ကရူၢ်ဖဲလဲၣ်တကရူၢ်လဲၣ်. ဒ်သိးပကသ့ၣ်ညါ တၢ်စံးဆၢအဂီၢ် ယ့ၣ်ၡူးဟဲသမံသမိးကွၢ်ဝဲ နီၢ်သးအတၢ်လုၢ်ဟံၣ်ဖဲ ၁၉၁၄ နံၣ်လီၤ. တၢ်သမံသမိးတၢ်ဒီး တၢ်မၤကဆှီထီၣ်တၢ်န့ၣ် ယံာ်ဝဲတၢ်ဆၢကတီၢ် တကတီၢ်, စးထီၣ်ဖဲ ၁၉၁၄ တုၤလၢ ၁၉၁၉ နံၣ်အခီၣ်ထံးလီၤ.
တၢ်ဖးလံာ်စီဆှံ
(မၤလကံ ၁:၁-၁၀) တၢ်အကလုၢ်လီၤ, ယွၤအကလုၢ်လၢ အဘၣ်အံၣ်စရ့လးလၢ စီၤမၤလကံအစုပူၤလီၤ. ၂ ယအဲၣ်တ့ၢ်သု, ယွၤစံးဝဲဒၣ်, ဘၣ်ဆၣ်ဒီးသုစံး, နအဲၣ်တ့ၢ်ပှၤဒ်လဲၣ်. ဧ့ၡီၤမ့ၢ်စီၤယၤကိာ်အဒီပုၢ်ဝဲၢ်, တမ့ၢ်ဘၣ် ဧါ, ယွၤစံးဝဲဒၣ်, ဘၣ်ဆၣ်ဒီးယအဲၣ်စီၤယၤကိာ်, ၃ ဒီးယသးဟ့စီၤဧ့ၡီၤ, ဒီးယမၤသယုၢ်အကစၢၢ်ကလိ, ဒီးအတၢ်န့ၢ်သါလၢ အအိၣ်အဆိးအလီၢ်လၢပှၢ်မုၢ်ကနၢလီၤ. ၄ မ့ၢ်အဒိၣ်စံးဝဲ, ပဘၣ်ဖှီၣ်ဘၣ်ယာ်ဘၣ်ဆၣ်ဒီး, ပကမၤထီၣ်က့ၤပအိၣ်သယုၢ်အလီၢ်န့ၣ်ဒီး, တၢ်သုးမုၢ်ဂီၢ်မုၢ်အယွၤစံးဒ်အံၤ, အဝဲသ့ၣ်ကမၤက့ၤဒၣ်ဝဲတက့ၢ်. မ့မ့ၢ်ယဲဒၣ်အံၤယကမၤလီၤပှီၢ်တၢ်လီၤ. ဒီးတၢ်ကကိးအီၤလၢတၢ်အၢအကီၢ်အဃၢၤ, ဒီးပှၤဂီၢ်မုၢ်လၢယွၤသးထီၣ်ဘၣ်အီၤလီၤစိၤလီၤထီလီၤ. ၅ ဒီးသုမဲာ်ကထံၣ်ဘၣ်ဝဲ, ဒီးသုကစံး, မ်ယွၤဘၣ်တၢ်ပာ်ဒိၣ်အီၤလၢအံၣ်စရ့လးအကီၢ်ဃၢၤတက့ၢ်. ၆ ပှၤဖိခွါမၤလၤကပီၤအပၢ်, ဒီးတၢ်အခ့အပှၤန့ၣ် မၤလၤကပီၤအကစၢ်လီၤ. ဒီးယမ့မ့ၢ်ပၢ်ဒီး, ယလၤကပီၤအိၣ်ဖဲလဲၣ်. ယမ့မ့ၢ်ကစၢ်ဒီး, ယမၤပျံၤတၢ်န့ၣ်အိၣ်ဖဲလဲၣ်, တၢ်သုးမုၢ်ဂီၢ်မုၢ်အယွၤစံးဘၣ်သု, ပှၤလုၢ်တၢ်အဒိၣ်လၢ အတပးကဲဘၣ်ယမံၤဘၣ်သ့ၣ်ဧၢ. ဒီးသုစံး, ပတပးကဲဘၣ်နမံၤဒ်လဲၣ်. ၇ မ့ၢ်သုမၤဘူၣ်တၢ်အီၣ်ဘၣ်အၢ လၢယတၢ်လုၢ်အလီၢ်အဖီခိၣ်, ဒီးသုစံး, ပမၤဘၣ်အၢနၤဒ်လဲၣ်. လၢသုစံးလၢယွၤ အစီၢ်နီၤခိၣ်န့ၣ် မ့ၢ်တၢ်တပးကဲဘၣ်အလီၢ်န့ၣ်လီၤ. ၈ ဒီးတုၤသုလုၢ်တၢ်မဲာ်ဘျီၣ် လၢတၢ်လုၢ်အဂီၢ်ဒီး, မ့ၢ်တၢ်အၢ, တမ့ၢ်ဘၣ်ဧါ. ဒီးတုၤသုလုၢ်တၢ်အစုအခီၣ်ဟးဂီၤ, ဒီးတၢ်ဘၣ်ဆါဒီး, မ့ၢ်တၢ်အၢ, တမ့ၢ်ဘၣ်ဧါ. ဟ့ၣ်အီၤလၢပှၤပၢနၤတက့ၢ်. ကဘၣ်အသးလၢနၤစ့ၢ်ကီးဧါ. ကဘၣ်အမဲာ်လၢနၤစ့ၢ်ကီးဧါ. တၢ်သုးမုၢ်ဂီၢ်မုၢ်အယွၤစံးဝဲဒၣ်. ၉ ဒီးခဲကနံၣ်အံၤမ်သုဃ့ကညးယွၤ, ဒ်သိးအကသးကညီၤပှၤတက့ၢ်. သုမၤဒ်န့ၣ်ဒီးကဘၣ်အမဲာ်လၢသုစ့ၢ်ကီးဧါ. တၢ်သုးမုၢ်ဂီၢ်မုၢ်အယွၤစံးဝဲဒၣ်. ၁၀ ပှၤအိၣ်ဝဲလၢသုကျါတဂၤ လၢအကကးတံာ်ဃာ်တြဲၤမ့ၢ်မတၤတဂၤလဲၣ်. သုတဆိၣ်ကဲၤကလီဘၣ်မ့ၣ်အူလၢ ယတၢ်လုၢ်အလီၢ်အဖီခိၣ်န့ၣ်ဘၣ်. သုတဘၣ်ဘၣ် ယသးလ့ၤတက့ၤဘၣ်, တၢ်သုးမုၢ်ဂီၢ်မုၢ်အယွၤစံးဝဲဒၣ်, ဒီးယတဒိးဘၣ်တၢ်မၤဘူၣ်လၢသုစုဘၣ်.