တၢ်သးခုကစီၣ် ရၤလီၤအသး

စီၤပီလူး ဆီတလဲအတၢ်ဘူၣ်တၢ်ဘါဝံၤအလီၢ်ခံ အဝဲစးထီၣ်စံၣ်တဲၤတဲလီၤယွၤအဘီမုၢ် တၢ်သးခုကစီၣ်လၢ တၢ်သးဆူၣ်အပူၤလီၤ. နီၢ်နီၢ်န့ၣ် စီၤပီလူးမ့ၢ်ပှၤလၢအထီဒါတ့ၢ်တၢ်တဂၤလီၤ. ဘၣ်ဆၣ် ခဲအံၤအဝဲကွၢ်ဆၢၣ်မဲာ်ဘၣ် တၢ်ထီဒုၣ်ထီဒါနးမးလီၤ. တၢ်မၢဖိလၢအမၤယွၤအတၢ်မၤလၢ အိၣ်ဘှံးအိၣ်သါတချုးဘၣ်တဂၤအံၤ လဲၤဝဲဆူတၢ်လီၢ်ဖးယံၤတဘျုးဘျီလီၤ. အဝဲလဲၤဝဲဒ်သိးအကစံၣ်တဲၤတဲလီၤတၢ်သးခုကစီၣ်လၢဘၣ်ဃးဒီးဘီမုၢ်လၢ ကမၤလၢပှဲၤထီၣ် ယွၤအတၢ်တိာ်ပာ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်လီၤ.

ဖဲစီၤပီလူးအတၢ်လဲၤလၢ တၢ်စံၣ်တဲၤတဲလီၤတၢ်အဂီၢ်တၢတဘျီန့ၣ် အဝဲမၤဘျါက့ၤ ပှၤအခီၣ်ဟးဂီၤလၢ အိၣ်ဖျဲၣ်ထီၣ်လံၤလံၤတဂၤ လၢဝ့ၢ်လူစတြၤအပူၤန့ၣ်လီၤ. ဖဲန့ၣ်အခါပှၤဂီၢ်မုၢ်တဖၣ် စးထီၣ်ကိးပသူထီၣ်ဝဲလၢစီၤပီလူးဒီး ပှၤလၢအလဲၤတၢ်ဒီးအီၤတဂၤ, စီၤဘၢ်နါဘၤန့ၣ် မ့ၢ်ယွၤတဖၣ်လီၤ. စီၤပီလူးဒီးစီၤဘၢ်နါဘၤ ဂုာ်ကျဲးစၢးတြီအဝဲသ့ၣ် ဒ်သိးအသုတလုၢ်ထီၣ်ပာ်ထီၣ်တၢ်လၢ အဝဲသ့ၣ်အအိၣ်တဂ့ၤန့ၣ်လီၤ. ဘၣ်ဆၣ် လၢခံန့ၣ်စီၤပီလူး အဒုၣ်ဒါတဖၣ် သဆၣ်ထီၣ်ပှၤဂီၢ်မုၢ်အခံ ဒ်သိးအဝဲသ့ၣ်ကမၤအၢမၤသီတၢ်လီၤ. လၢတၢ်န့ၣ်အဃိ ပှၤဂီၢ်မုၢ်တဖၣ် ကွံာ်ဝဲစီၤပီလူးလၢလၢၢ်တုၤအဝဲသ့ၣ်ဆိကမိၣ်ဝဲလၢ စီၤပီလူးသံလံန့ၣ်လီၤ. ဘၣ်ဆၣ်စီၤပီလူးတသံဝဲဘၣ်. လၢခံအဝဲဟဲက့ၤဆူဝ့ၢ်အံၤဒီး ဟ့ၣ်ဂံၢ်ဟ့ၣ်ဘါ ယ့ၣ်ၡူးအပျဲၢ်အဘီၣ်တဖၣ်န့ၣ်လီၤ.

ပှၤယူဒၤဖိလၢအကဲထီၣ်ခရံာ်ဖိတနီၤန့ၣ် တဲအါလိာ်အသးဒီးစီၤပီလူးဒီးစီၤဘၢ်နါဘၤလီၤ. အဝဲသ့ၣ်တဲဝဲလၢ ပှၤတခီဘီမုၢ်ဖိလၢ အစူၢ်က့ၤနာ်က့ၤတၢ်န့ၣ် ကဘၣ်မၤထွဲစီၤမိၤၡ့ အတၢ်သိၣ်တၢ်သီတနီၤလီၤ. လၢတၢ်န့ၣ်အဃိ စီၤပီလူးလဲၤပာ်ဖျါထီၣ်တၢ်ဂ့ၢ်တၢ်ကျိၤအံၤလၢ တၢ်မၢဖိဒီး ပှၤသူၣ်က့သးပှၢ်တဖၣ်အအိၣ်လၢ ဝ့ၢ်ယရူၤၡလ့ၣ်အပူၤန့ၣ်လီၤ. အဝဲသ့ၣ်တဖၣ်ဆိကမိၣ်ဒီးကွၢ်ထံကွၢ်ဆးဝဲ လံာ်စီဆှံလီၤတံၢ်လီၤဆဲးဒီး တူၢ်လိာ်ဝဲယွၤအသးစီဆှံ အတၢ်ဟံးစုနဲၣ်ကျဲန့ၣ်လီၤ. လၢခံအဝဲသ့ၣ်ကွဲးလံာ်ဆူတၢ်အိၣ်ဖှိၣ်တဖၣ်အအိၣ် ဒီးဟ့ၣ်ပလီၢ်ဝဲလၢ ဒီပုၢ်ဝဲၢ်တဖၣ်ကဘၣ်ဟးဆှဲး တၢ်ဘါတၢ်ဂီၤတၢ်ဖှီၣ်, တၢ်အီၣ်တၢ်သွံၣ်, ဆၣ်ဖိကီၢ်ဖိအညၣ်လၢတၢ်တဂၢ်လီၤကွံာ်အသွံၣ် ဒီးတၢ်မၤကမၣ်မုၣ်ကမၣ်ခွါန့ၣ်လီၤ. တၢ်မၤလိာ်တဖၣ်အံၤ “မ့ၢ်တဟးဆှဲးဘၣ်ဒီးအိၣ်ဝဲတသ့ဘၣ်.” ဘၣ်ဆၣ် တအဲၣ်ဒိးစံးဝဲလၢ ပကဘၣ်မၤထွဲ စီၤမိၤၡ့အတၢ်သိၣ်တၢ်သီဘၣ်.—မၤတၢ် ၁၅:၂၈, ၂၉.

ဖဲစီၤပီလူးအတၢ်လဲၤလၢ တၢ်စံၣ်တဲၤတဲလီၤတၢ်အဂီၢ်ခံဘျီတဘျီအတီၢ်ပူၤန့ၣ် အဝဲလဲၤဝဲဆူဝ့ၢ်ဘ့းရံၤလီၤ. မုၢ်မဆါတနံၤညါအံၤ ဝ့ၢ်တဖျၢၣ်အံၤအိၣ်ဖဲ ကြံးအကီၢ်ပူၤန့ၣ်လီၤ. ပှၤယူဒၤဖိလၢအအိၣ်ဖဲန့ၣ်တဖၣ်န့ၣ် တူၢ်လိာ်ဝဲယွၤအကလုၢ်ကထါလၢ တၢ်သးဆူၣ်အပူၤလီၤ. ဒ်သိးကသမံသမိး စီၤပီလူးအတၢ်သိၣ်လိတဖၣ်အဂီၢ် အဝဲသ့ၣ်ဖးဝဲလံာ်စီဆှံ ကိးနံၤဒဲးလီၤ. ဖဲန့ၣ် စီၤပီလူးကွၢ်ဆၢၣ်မဲာ်ဘၣ်တၢ်ထီဒုၣ်ထီဒါလၢ အသီတဘျီအဃိ လဲၤဝဲဆူဝ့ၢ်အၤသ့ၣ်န့ၣ်လီၤ. အဝဲဟ့ၣ်တ့ၢ်တၢ်စံၣ်တဲၤတဲလီၤဂ့ၤဒိၣ်မး လၢပှၤအၤသ့ၣ်ဖိလၢအကူၣ်ဘၣ်ကူၣ်သ့တကရူၢ်အမဲာ်ညါလီၤ. စီၤပီလူးအတၢ်စံၣ်တဲၤတဲလီၤတၢ်အံၤ မ့ၢ်တၢ်အဒိလၢအဂ့ၤလၢအပှဲၤဒီးတၢ်ကူၣ်သ့, တၢ်သူၣ်ဆးသးဆး ဒီးတၢ်ကတိၤလၢအထုးန့ၢ်ပှၤသးလီၤ.

စီၤပီလူးအတၢ်လဲၤလၢတၢ်စံၣ်တဲၤတဲလီၤတၢ်အဂီၢ် သၢဘျီတဘျီဝံၤအလီၢ်ခံ အဝဲလဲၤဝဲဆူ ဝ့ၢ်ယရူၤၡလ့ၣ်လီၤ. ဖဲအဝဲလဲၤဆူ တၢ်လုၢ်ဟံၣ်အခါ ပှၤယူဒၤဖိတနီၤမၤတၢထီၣ်တၢလီၤတၢ်ဒီး အဲၣ်ဒိးမၤသံအီၤလီၤ. ဘၣ်ဆၣ်ရိမ့ၤအသုးဖိတဖၣ် က့ၤကိးစီၤပီလူး ဒ်သိးကသံကွၢ်သံဒိးအီၤအဂီၢ်လီၤ. စီၤပီလူးန့ၣ် ခီဖျိလၢအဝဲမ့ၢ်ရိမ့ၤအထံဖိကီၢ်ဖိတဂၤအဃိ လၢခံအဝဲတီၣ်ဖျါထီၣ်ဝဲတၢ်ဂ့ၢ်အံၤဆူ ရိမ့ၤအစီၤပၤဖးဒိၣ် စီၤဖ့လံးအအိၣ်လီၤ. ပှၤယူဒၤဖိတဖၣ်န့ၣ် ကပာ်ဖျါထီၣ်စီၤပီလူးအတၢ်ကမၣ်အဂီၢ် အဝဲသ့ၣ်တအိၣ်ဒီးတၢ်အုၣ်အသးနီတမံၤဘၣ်. ရိမ့ၤအပဒိၣ်လၢအဂၤတဂၤလၢအမ့ၢ် စီၤဖ့စတူးန့ၣ် ဒ်သိးအသုတဟ့ၣ်လီၤကွံာ်စီၤပီလူးဆူ ပှၤယူဒၤဖိအစုပူၤတဂ့ၤအဂီၢ် စီၤပီလူးတဲအီၤလၢ “ယကိးထီၣ်ကဲစၢ်လီၤ.” ဒီးစီၤဖ့စတူးစံးဆၢဝဲလၢ “နကိးထီၣ်ကဲစၢ်, နကလဲၤဆူကဲစၢ်အအိၣ်န့ၣ်လီၤ.”—မၤတၢ် ၂၅:၁၁, ၁၂.

တၢ်န့ၣ်အလီၢ်ခံ စီၤပီလူးဘၣ်တၢ်ဆှၢအီၤဆူကီၢ်အံၤတလံ လၢကဘီဒ်သိးကထီၣ်ရူအဂီၢ်လီၤ. ကဘီဟးဂီၤဝဲလၢကျဲအဃိ အဝဲဘၣ်အိၣ်ဝဲလၢကီးမ့းလံတ့ၤ လၢတၢ်ဂိၢ်အကတီၢ်န့ၣ်လီၤ. လၢခံဖဲအဝဲလဲၤတုၤလၢ ရိမ့ၤအခါ အဝဲအိၣ်ဝဲလၢဟံၣ်ဒိးလဲအပူၤခံနံၣ်လီၤ. ခဲအံၤစီၤပီလူးလၢအအိၣ်ဒီး တၢ်သူၣ်ဆူၣ်သးဆူၣ်ထီဘိန့ၣ် ဘၣ်အိၣ်ဝဲလၢ သုးဖိတဖၣ် အတၢ်ပၢအဖီလာ်သနာ်က့ စံၣ်တဲၤတဲလီၤဝဲ ယွၤအဘီအမုၢ်အဂ့ၢ်ဆူ ပှၤလၢအဟဲအိၣ်သကိးအီၤတဖၣ်အအိၣ်န့ၣ်လီၤ.

​—ဘၣ်တၢ်ဒိးသန့ၤထီၣ်အီၤလၢ မၤတၢ် ၁၁:၂၂–၂၈:၃၁ န့ၣ်လီၤ.