ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအီးကထိဘၢၣ် ၇–၁၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၤကိာ် ၃–၅
“ပာ်ဖျါထီၣ် တၢ်ကူၣ်သ့ လၢဘၣ်ဃးဒီးယွၤ”
(ယၤကိာ် ၃:၁၇) မ့မ့ၢ်တၢ်ကူၣ်ဘၣ်ကူၣ်သ့လၢထးန့ၣ်, မ့ၢ်လၢအဆိလၢတၢ်စီတၢ်ဆှံ, လၢခံက့ၤ, တၢ်မုာ်တၢ်ဖိး, တၢ်သူၣ်စူၤတၢ်သးစူၤ, ဒိးတၢ်ကညးန့ၢ်အီၤညီ, လၢထီၣ်ပှဲၤထီၣ်ဒီးတၢ်သးကညီၤ ဒီးတၤသၣ်အဂ့ၤ, တကွၢ်မဲာ်ဘၣ်တၢ်ဘၣ်, ဒီးတၢ်လီတၢ်ဝ့ၤ တအိၣ်ဘၣ်လၢအပူၤဘၣ်လီၤ.
cl ကဘျံးပၤ ၂၂၁-၂၂၂ အဆၢ ၉-၁၀
“တၢ်ကူၣ်ဘၣ်ကူၣ်သ့လၢထးန့ၣ်” ကဲဘျုးလၢ နတၢ်အိၣ်မူအပူၤဧါ
၉ “အဆိလၢတၢ်စီတၢ်ဆှံ.” တၢ်စီတၢ်ဆှံန့ၣ် တမ့ၢ်တၢ်ကဆှဲကဆှီထဲလၢ တၢ်အိၣ်ဖျါလၢခိဘၣ် မ့ၢ်ဝဲတၢ်ကဆှဲကဆှီလၢ နီၢ်ခိမ့ၢ်ဂ့ၤ လၢနီၢ်သးမ့ၢ်ဂ့ၤလီၤ. လံာ်စီဆှံပာ်ဖျါထီၣ်ဝဲလၢ တၢ်ကူၣ်သ့ဒီး သးန့ၣ်ဘၣ်ထွဲလိာ်အသးလီၤ. ဘၣ်ဆၣ် တၢ်ကူၣ်သ့လၢ အဟဲလၢထးန့ၣ် တနုာ်လီၤလၢ သးလၢအပှဲၤဒီး တၢ်တကဆှီဘၣ်, တၢ်ဆိကမိၣ်လၢအတဂ့ၤ, တၢ်မိၣ်န့ၢ်သးလီလၢအတဂ့ၤ ဒီးတၢ်တိာ်ပာ်လၢ အတဂ့ၤတဖၣ်အပူၤဘၣ်. (ကတိၤဒိ ၂:၁၀; မးသဲ ၁၅:၁၉, ၂၀) ဘၣ်ဆၣ် ပမ့ၢ်ပှၤတလၢတပှဲၤသနာ်က့ တသ့ဖဲအသ့ ပသးမ့ၢ်ကဆှဲကဆှီန့ၣ်ပက “ဟးသဒၣ်ကွံာ်တၢ်အၢ ဒီးမၤတၢ်ဂ့ၤ” လီၤ. (စံးထီၣ်ပတြၢၤ ၃၇:၂၇; ကတိၤဒိ ၃:၇) တၢ်ဂ့ၤတၢ်ဝါလၢ ဘၣ်ထွဲလိာ်အသးဒီး တၢ်ကူၣ်သ့တဖၣ်အကျါ တၢ်စီတၢ်ဆှံအံၤ ဘၣ်တၢ်ပာ်ဖျါထီၣ်အီၤလၢ အဆိကတၢၢ်န့ၣ် မ့ၢ်တၢ်လၢအကြၢးအဘၣ်တမ့ၢ်ဧါ. ပသကဲာ်ပဝးမ့ၢ်ဂ့ၤ ပနီၢ်သးမ့ၢ်ဂ့ၤ မ့ၢ်တကဆှဲကဆှီဘၣ်န့ၣ် ပပာ်ဖျါထီၣ်တၢ်ဂ့ၤတၢ်ဝါအဂၤလၢ ဘၣ်ဃးဒီး တၢ်ကူၣ်သ့တဖၣ် ကသ့ဂ့ၤဂ့ၤဧါ.
၁၀ “တၢ်မုာ်တၢ်ဖိး.” တၢ်ကူၣ်သ့လၢ အဟဲလၢထးန့ၣ် ထိၣ်ဟူထိၣ်ဂဲၤထီၣ်ပှၤလၢ ပကမၤအါထီၣ်တၢ်ဃူတၢ်ဖိး လၢအမ့ၢ်သးအတၤသၣ်န့ၣ်လီၤ. (ကလၤတံ ၅:၂၂) ပကဘၣ်ဂုာ်ကျဲးစၢးဟးဆှဲး တၢ်လၢကမၤဟးဂီၤ ‘တၢ်သးတဖျၢၣ်ဃီ’ လၢအဒုးအိၣ်ဃူအိၣ်ဖိး ယဟိဝၤယွၤအပှၤဂီၢ်မုၢ်တဖၣ်န့ၣ်လီၤ. (အ့းဖ့းစူး ၄:၃) တၢ်ဃူတၢ်ဖိး မ့ၢ်တအိၣ်ဘၣ်န့ၣ် တသ့ဖဲအသ့ ပကဘၣ်ဂုာ်ကျဲးစၢး မၤဃူမၤဖိးက့ၤတၢ်လီၤ. ဘၣ်မနုၤအဃိ အရ့ဒိၣ်လၢ ပကဘၣ်မၤဒ်အံၤလဲၣ်. လံာ်စီဆှံ တဲဝဲလၢ “မ်သုအိၣ်သုသးတဖျၢၣ်ဃီတက့ၢ်. မ်သုအိၣ်ဃူအိၣ်ဖိးတက့ၢ်. ဒီးတၢ်အဲၣ်တၢ်ကွံ, ဒီးတၢ်ဃူတၢ်ဖိးအကစၢ်န့ၣ်, ကအိၣ်ဒီးသုလီၤ.” (၂ ကရံၣ်သူး ၁၃:၁၁) လၢတၢ်န့ၣ်အဃိ ပမ့ၢ်ဆဲးအိၣ်ဒီးတၢ်ဃူတၢ်ဖိးန့ၣ် တၢ်ဃူတၢ်ဖိးအယွၤ ကအိၣ်ဒီးပှၤစ့ၢ်ကီးလီၤ. ပတၢ်ရ့လိာ်သး ဒီးပှၤစူၢ်တၢ်နာ်တၢ်ကဒဲကဒဲန့ၣ် ဘၣ်ထွဲလိာ်အသးဒီး ပတၢ်ရ့လိာ်သးဒီး ယဟိဝၤယွၤစ့ၢ်ကီးလီၤ. ပမ့ၢ်ပှၤလၢအမၤဃူမၤဖိးတၢ်န့ၣ် ပပာ်ဖျါထီၣ်ကသ့ဒ်လဲၣ်. ပကဆိကမိၣ်ကွၢ် တၢ်အဒိတခါလီၤ.
(ယၤကိာ် ၃:၁၇) မ့မ့ၢ်တၢ်ကူၣ်ဘၣ်ကူၣ်သ့လၢထးန့ၣ်, မ့ၢ်လၢအဆိလၢတၢ်စီတၢ်ဆှံ, လၢခံက့ၤ, တၢ်မုာ်တၢ်ဖိး, တၢ်သူၣ်စူၤတၢ်သးစူၤ, ဒိးတၢ်ကညးန့ၢ်အီၤညီ, လၢထီၣ်ပှဲၤထီၣ်ဒီးတၢ်သးကညီၤ ဒီးတၤသၣ်အဂ့ၤ, တကွၢ်မဲာ်ဘၣ်တၢ်ဘၣ်, ဒီးတၢ်လီတၢ်ဝ့ၤ တအိၣ်ဘၣ်လၢအပူၤဘၣ်လီၤ.
cl ကဘျံးပၤ ၂၂၃-၂၂၄ အဆၢ ၁၂
“တၢ်ကူၣ်ဘၣ်ကူၣ်သ့လၢထးန့ၣ်” ကဲဘျုးလၢ နတၢ်အိၣ်မူအပူၤဧါ
၁၂ “တၢ်သူၣ်စူၤတၢ်သးစူၤ.” မ့တမ့ၢ် တၢ်ကွၢ်ထံဆိကမိၣ်တၢ်. တၢ်ကွၢ်ထံဆိကမိၣ်တၢ်န့ၣ် အခီပညီမ့ၢ်မနုၤလဲၣ်. ပှၤကူၣ်ဘၣ်ကူၣ်သ့လၢ ဘၣ်ဃးဒီးလံာ်စီဆှံတဖၣ် တဲဝဲလၢ ယၤကိာ် ၃:၁၇ အပူၤ ကြံး အတၢ်ကတိၤလၢ ဘၣ်တၢ်ကွဲးကျိာ်က့ၤအီၤလၢ “တၢ်သူၣ်စူၤတၢ်သးစူၤ” န့ၣ် ကီလၢပှၤကကွဲးကျိာ်ထံ က့ၤအီၤအဂီၢ်လီၤ. ပှၤကွဲးကျိာ်ထံတၢ် အါတက့ၢ်န့ၣ် သူဝဲတၢ်ကတိၤလၢအမ့ၢ် “ကပုာ်လုး,” “ဝံသးစူၤတၢ်” ဒီး “သ့ဆိကမိၣ်တၢ်” လီၤ. လၢကြံးကျိာ် တၢ်ကတိၤအံၤ အခီပညီန့ၣ် မ့ၢ်ဝဲ “ဟ့ၣ်ၡူအသး” လီၤ. တၢ်ကူၣ်ဘၣ်ကူၣ်သ့လၢထး မၤတၢ်လၢပပူၤန့ၣ် ပပာ်ဖျါထီၣ်အီၤကသ့ဒ်လဲၣ်.
cl ၂၂၄-၂၂၅ အဆၢ ၁၄-၁၅
“တၢ်ကူၣ်ဘၣ်ကူၣ်သ့လၢထးန့ၣ်” ကဲဘျုးလၢ နတၢ်အိၣ်မူအပူၤဧါ
၁၄ “ဒိးတၢ်ကညးန့ၢ်အီၤညီ.” မ့တမ့ၢ် တၢ်သးအိၣ်ဒိကနၣ်တၢ်. ကြံးအတၢ်ကတိၤလၢ ဘၣ်တၢ်ကွဲးကျိာ်ထံက့ၤအီၤလၢ “ဒိးတၢ်ကညးန့ၢ်အီၤညီ” န့ၣ်လံာ်စီဆှံလၢ ကြံးကျိာ်တကတြူၢ်အပူၤ ပတထံၣ်ဘၣ်လၢတၢ်လီၢ်အဂၤဘၣ်. ပှၤကူၣ်ဘၣ်ကူၣ်သ့လၢ ဘၣ်ဃးဒီးလံာ်စီဆှံတဂၤ ပာ်ဖျါဝဲလၢ တၢ်ကတိၤအံၤ “ညီနုၢ်ဘၣ်တၢ်သူအီၤ ဘၣ်ဃးဒီး တၢ်ဘျၢလၢသုးဖိတဖၣ်အဂီၢ်လီၤ.” တၢ်အံၤအဲၣ်ဒိးတဲဝဲ “ပှၤတဲနၢ်ပၢၢ်ဘၣ်အီၤညီ” ဒီး “သးအိၣ်ဒိကနၣ်တၢ်” လီၤ. ပှၤလၢအတူၢ်လိာ် တၢ်ကူၣ်သ့လၢထးန့ၣ် အသးအိၣ်ဒိကနၣ် တၢ်လၢလံာ်စီဆှံတဲဝဲတဖၣ်လီၤ. အဝဲတမ့ၢ်ပှၤလၢ အဆၢတဲာ်တၢ်မ့ၢ်ဝံၤန့ၣ် တတူၢ်လိာ်ဝဲ တၢ်အဂၤလၢအထီဒါလိာ်အသးဒီး အတၢ်ဆၢတဲာ်အံၤနီတစဲးလၢၤဘၣ်န့ၣ်ဘၣ်. လၢတၢ်န့ၣ်အလီၢ် ပှၤမ့ၢ်ပၠးအီၤ လံာ်စီဆှံတၢ်အုၣ်သးလၢ အဝဲအတၢ်ဆၢတဲာ်အံၤကမၣ် မ့တမ့ၢ် အတၢ်ဆိကမိၣ်ကမၣ်န့ၣ် အဝဲဆီတလဲဝဲလၢ အဆိအချ့လီၤ. ပှၤအဂၤတဖၣ် သ့ၣ်ညါနၤလၢ နမ့ၢ်ပှၤဒ်န့ၣ်တဂၤဧါ.
“လၢထီၣ်ပှဲၤထီၣ်ဒီးတၢ်သးကညီၤ ဒီးတၤသၣ်အဂ့ၤ”
၁၅ “လၢထီၣ်ပှဲၤထီၣ်ဒီးတၢ်သးကညီၤ ဒီးတၤသၣ်အဂ့ၤ.” တၢ်ကူၣ်သ့လၢထးအကျါ တၢ်သးကညီၤန့ၣ် မ့ၢ်စ့ၢ်ကီး တၢ်ဂ့ၤတၢ်ဝါလၢ အရ့ဒိၣ်တခါလီၤ. မ့ၢ်လၢအတဲဝဲလၢ တၢ်ကူၣ်ဘၣ်ကူၣ်သ့ ဒ်သိးန့ၣ်န့ၣ် “လၢထီၣ်ပှဲၤထီၣ်ဒီးတၢ်သးကညီၤ” အဃိလီၤ. ပာ်သူၣ်ပာ်သးလၢ “တၢ်သးကညီၤ” ဒီး “တၤသၣ်အဂ့ၤ” ဘၣ်တၢ်ပာ်ဖျါထီၣ်အီၤတပူၤဃီတက့ၢ်. တၢ်သ့ၣ်တဖၣ်အံၤ ဘၣ်တၢ်ပာ်ဖျါထီၣ်အီၤတပူၤဃီန့ၣ် မ့ၢ်တၢ်လၢအကြၢးဝဲဘၣ်ဝဲလီၤ. မ့ၢ်လၢတၢ်သးကညီၤန့ၣ် အါတက့ၢ် လံာ်စီဆှံသူဝဲ ဘၣ်ဃးဒီး တၢ်ဘၣ်ယိၣ်တၢ်လၢ ပှၤဂၤအဂီၢ်, အိၣ်ဒီးတၢ်ဒိသူၣ်ဒိသးလၢ အပာ်ဖျါထီၣ်ဝဲလၢ တၢ်ဖံးတၢ်မၤလၢအပှဲၤဒီး တၢ်သးကညီၤလီၤ. လံာ်တဘ့ၣ်ပာ်ဖျါထီၣ်ဝဲလၢ တၢ်သးကညီၤန့ၣ်မ့ၢ်ဝဲ “ပှၤတဂၤတူၢ်ဘၣ် တၢ်သူၣ်အုးသးအုး ခီဖျိပှၤတဂၤဂၤ အတၢ်အိၣ်သးလၢအကီအခဲအဃိ ဒီးဒ်သိးကမၤဘၣ်ဂီၢ်က့ၤန့ၢ်ဝဲအဂီၢ် ဂုာ်ကျဲးစၢးမၤဝဲ တၢ်တမံၤမံၤလီၤ.” အဃိ တၢ်ကူၣ်သ့လၢ အဟဲလၢယွၤအိၣ်န့ၣ် တမ့ၢ်ထဲဒၣ် တၢ်သ့ၣ်ညါဧိၤဘၣ်. လၢတၢ်န့ၣ်အလီၢ် တၢ်သးကညီၤန့ၣ် မ့ၢ်ဝဲတၢ်ပာ်ဖျါထီၣ် တၢ်အဲၣ်တၢ်ကွံ, တၢ်သူၣ်အိၣ်သးအိၣ် ဒီးသ့ၣ်ညါပှၤဂၤအတူၢ်ဘၣ်လီၤ. ပအိၣ်ဒီးတၢ်သးကညီၤန့ၣ် ပပာ်ဖျါထီၣ်ကသ့ဒ်လဲၣ်.
(ယၤကိာ် ၃:၁၇) မ့မ့ၢ်တၢ်ကူၣ်ဘၣ်ကူၣ်သ့လၢထးန့ၣ်, မ့ၢ်လၢအဆိလၢတၢ်စီတၢ်ဆှံ, လၢခံက့ၤ, တၢ်မုာ်တၢ်ဖိး, တၢ်သူၣ်စူၤတၢ်သးစူၤ, ဒိးတၢ်ကညးန့ၢ်အီၤညီ, လၢထီၣ်ပှဲၤထီၣ်ဒီးတၢ်သးကညီၤဒီးတၤသၣ်အဂ့ၤ, တကွၢ်မဲာ်ဘၣ်တၢ်ဘၣ်, ဒီးတၢ်လီတၢ်ဝ့ၤ တအိၣ်ဘၣ်လၢအပူၤဘၣ်လီၤ.
cl ကဘျံးပၤ ၂၂၆-၂၂၇ အဆၢ ၁၈-၁၉
“တၢ်ကူၣ်ဘၣ်ကူၣ်သ့လၢထးန့ၣ်” ကဲဘျုးလၢ နတၢ်အိၣ်မူအပူၤဧါ
၁၈ “တကွၢ်မဲာ်ဘၣ်တၢ်ဘၣ်.” တၢ်ကူၣ်သ့လၢအဟဲလၢယွၤအအိၣ်န့ၣ် မၤစၢၤပှၤလၢ ပကဟးဆှဲး တၢ်ကွၢ်တလီၤကလုာ်ဒူၣ် ဒီးတၢ်ပာ်ဒိၣ်ကလုာ်ဒူၣ်န့ၣ်လီၤ. ပမ့ၢ်အိၣ်ဒီး တၢ်ကူၣ်သ့အံၤန့ၣ် ပကဂုာ်ကျဲးစၢး ဒ်သိးပသုတကွၢ်မဲာ်တၢ်တဂ့ၤလီၤ. (ယၤကိာ် ၂:၉) ပှၤလၢအိၣ်ဒီး တၢ်ကူၣ်ဘၣ်ကူၣ်သ့, တၢ်အိၣ်တၢ်ယၢၤ, ပှၤလၢအမူဒါအိၣ်လၢ တၢ်အိၣ်ဖှိၣ်ပူၤတဖၣ် ဒီးဒီပုၢ်ဝဲၢ်အဖှီၣ်အယာ်တဖၣ်န့ၣ် ပတကွၢ်ဒိၣ်ဆံးအါစှၤ အဝဲသ့ၣ် ဒီးရ့လီၤဆီအဝဲသ့ၣ်ဘၣ်. ယဟိဝၤယွၤ မ့ၢ်အဲၣ်အဝဲသ့ၣ်န့ၣ် ပဝဲသ့ၣ်တဖၣ်စ့ၢ်ကီး ပကြၢးအဲၣ်အဝဲသ့ၣ်လီၤ.
၁၉ “တၢ်လီတၢ်ဝ့ၤတအိၣ်ဘၣ်.” ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤလၢ တၢ်လီတၢ်ဝ့ၤန့ၣ် ကအဲၣ်ဒိးတဲဝဲ “ပှၤဂဲၤဒိတၢ်တဂၤလၢ အဂဲၤဒိတၢ်လီၤ.” လၢပျၢၤန့ၣ် ကြံးဒီးရိမ့ၤ အပှၤဂဲၤဒိတၢ်ဖိတဖၣ် ဖဲအဂဲၤဒိတၢ်အခါ ဖျီၣ်ဘၢအမဲာ်လၢ တၢ်ကးဘၢမဲာ်လီၤ. အဃိ ကြံးအတၢ်ကတိၤ လၢဘၣ်တၢ်ကွဲးကျိာ်က့ၤအီၤလၢ တၢ်လီတၢ်ဝ့ၤအံၤန့ၣ် ပှၤသူအီၤလၢ ပှၤလၢအပာ်မၤအသး မ့တမ့ၢ် ပှၤလၢအပာ်မၤအသး ဒီးဂဲၤဒိတၢ်အဂီၢ်လီၤ. တၢ်ကူၣ်ဘၣ်ကူၣ်သ့လၢ အဟဲလၢယွၤအအိၣ်အံၤ ကြၢးအိၣ်ဖျါလၢ ပတၢ်ရ့လိာ်သးဒီးဒီပုၢ်ဝဲၢ်တဖၣ် တကးဒံးဘၣ် ပတၢ်ပာ်သူၣ်ပာ်သးလၢ အဝဲသ့ၣ်အဖီခိၣ်စ့ၢ်ကီးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၤကိာ် ၄:၅) မ့ၢ်သုဆိကမိၣ် လံာ်စံးတၢ်ကလီကလီန့ၣ်ဧါ. သးအိၣ်ဝဲဆိးဝဲလၢ ပပူၤဆၢတၢ်သးကါန့ၣ်ဧါ.
တၢး၀၈ ၁၁/၁၅ ကဘျံးပၤ ၂၀ အဆၢ ၆
လံာ်စီဆှံ အတၢ်ပာ်ဖျါလၢ လံာ်ယၤကိာ် ဒီးလံာ်ပ့းတရူး
၄:၅—စီၤယၤကိာ် ယၢၤထီၣ်ဝဲ လံာ်စီဆှံဖဲလဲၣ်တဆၢလဲၣ်. တမ့ၢ်စီၤယၤကိာ် ယၢၤထီၣ်ဝဲ လံာ်စီဆှံအဆၢ တဆၢဆၢဘၣ်. ဘၣ်ဆၣ် ကစၢ်ယွၤ အကလုၢ်ကထါလၢ အယၢၤထီၣ်ဝဲအံၤန့ၣ် ဘၣ်သ့ၣ်သ့ၣ် ကဒိးသန့ၤထီၣ်ဝဲလၢ ၁ မိၤ ၆:၅; ၈:၂၁; ကတိၤဒိ ၂၁:၁၀; ဒီး ကလၤတံ ၅:၁၇ အပူၤလီၤ.
(ယၤကိာ် ၄:၁၁, ၁၂) ဒီပုၢ်ဝဲၢ်သ့ၣ်ဧၢ, သုတစံးအၢစံးသီလိာ် သုသးတဂ့ၤ. ပှၤလၢအစံးအၢအဒီပုၢ်ဝဲၢ်ဒီး စံၣ်ညီၣ်အဒီပုၢ်ဝဲၢ်န့ၣ်, စံးအၢတၢ်သိၣ်တၢ်သီဒီး စံၣ်ညီၣ်တၢ်သိၣ်တၢ်သီလီၤ. ဒီးနမ့ၢ်စံၣ်ညီၣ်တၢ်သိၣ်တၢ်သီဒီး, နမ့ၢ်ပှၤစံၣ်ညီၣ်တၢ်, ဒီးတမ့ၢ်ဘၣ်ပှၤစူၢ်တၢ်သိၣ်တၢ်သီဘၣ်. ပှၤဟ့ၣ်တၢ်သိၣ်တၢ်သီ ဒီးစံၣ်ညီၣ်တၢ်န့ၣ် အိၣ်ဝဲတဂၤလီၤ. အဝဲဒၣ်န့ၣ်အုၣ်က့ၤခီၣ်က့ၤတၢ်သ့, ဒီးမၤဟးဂီၤတၢ်သ့လီၤ. ပှၤလၢအစံၣ်ညီၣ်ပှၤဂၤနဲဒၣ်အံၤ, နမ့ၢ်မတၤတဂၤလဲၣ်.
တၢး၉၇ ၁၁/၁၅ ကဘျံးပၤ ၂၀-၂၁ အဆၢ ၈
တၢ်နာ်မၤစၢၤပှၤလၢ ပကအိၣ်ဒီးတၢ်သူၣ်စူၤသးစူၤ ဒီးတၢ်သူၣ်ဆူၣ်သးဆူၣ်
၈ ပမ့ၢ်စံးအၢစံးသီ ခရံာ်ဖိဒီပုၢ်ဝဲၢ်တဖၣ်န့ၣ် မ့ၢ်ပမၤတၢ်ဒဲးဘးလီၤ. (ယၤကိာ် ၄:၁၁,၁၂) ဘၣ်ဆၣ် ပှၤတနီၤန့ၣ် ဆိကမိၣ်လီၤအသးလၢ အတီအလိၤအဃိမ့ၢ်ဂ့ၤ, အဲၣ်ဒိးပာ်ဒိၣ်ပာ်ထီအသး ခီဖျိကွၢ်တလီၤပှၤဂၤအဃိမ့ၢ်ဂ့ၤ ဃုပှၤဂၤအတၢ်ကမၣ်လီၤ. (စံးထီၣ်ပတြၢၤ ၅၀:၂၀; ကတိၤဒိ. ၃:၂၉) ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤအီၤလၢ ‘စံးအၢစံးသီ’ န့ၣ်အခီပညီအိၣ်လၢ တၢ်ထီဒုၣ်ထီဒါ, တၢ်တဲပိၣ်တၢ် မ့တမ့ၢ် တၢ်ပာ်ထီၣ်တၢ်ကမၣ်လၢ ပှၤဂၤအလိၤကလီကလီလီၤ. တၢ်န့ၣ်မ့ၢ်ဒၣ် ပစံၣ်ညီၣ်ပဒီပုၢ်ဝဲၢ် တတီတလိၤဘၣ်လီၤ. တၢ်န့ၣ်မ့ၢ်ပ ‘စံးအၢစံးသီတၢ် ဒီးစံၣ်ညီၣ်ယွၤအတၢ်သိၣ်တၢ်သီ’ လၢကျဲဒ်လဲၣ်. ပှၤကွဲးလံာ် ဒီးပှၤဖၤရံၤၡဲတဖၣ်န့ၣ် “မၤကဲထီၣ်ယွၤအကလုၢ်ကထါလၢ တၢ်ကလီကလီၤ” ဒီးစံၣ်ညီၣ်ပှၤဂၤလၢ အဝဲသ့ၣ် အတၢ်ဘျၢဒၣ်ဝဲလီၤ. (မၢ်ကူး ၇:၁-၁၃) ဒ်န့ၣ်အသိး ဒီပုၢ်ဝဲၢ်လၢ ယဟိဝၤယွၤ တစံၣ်ညီၣ်အီၤတဂၤ ပမ့ၢ်စံၣ်ညီၣ်အီၤန့ၣ် မ့ၢ်ဒၣ်ပ ‘စံၣ်ညီၣ် ယွၤအတၢ်သိၣ်တၢ်သီ’ ဒီးပမၤကမၣ်တၢ်န့ၣ်လီၤ. တကးဒံးဘၣ် ပမ့ၢ်စံးအၢစံးသီ ဒီးဃုပဒီပုၢ်ဝဲၢ်အတၢ်ကမၣ်န့ၣ် မ့ၢ်ဒၣ်ပတမၤထွဲ တၢ်မၤလိာ်လၢအမ့ၢ် ပကဘၣ်အဲၣ်လိာ်ပသးန့ၣ်လီၤ.—ရိမ့ၤ ၁၃:၈-၁၀.
တၢ်ဖးလံာ်စီဆှံ
(ယၤကိာ် ၃:၁-၁၈) ယဒီပုၢ်ဝဲၢ်သ့ၣ်ဧၢ, ကဲထီၣ်သရၣ်အါဂၤတဂ့ၤ, အဂ့ၢ်ဒ်အံၤ, ပသ့ၣ်ညါလၢ ပကဘၣ်တၢ်စံၣ်ညီၣ်နးန့ၢ်အလီၢ်တက့ၢ်လီၤ. ၂ အဂ့ၢ်ဒ်အံၤ, ပမၤကမၣ်တၢ်အါမံၤခဲလၢာ်လီၤ. ပှၤမ့ၢ်တမၤကမၣ် ဘၣ်လၢတၢ်ကတိၤ ဘၣ်တဂၤဂၤဒီး, အဝဲဒၣ်န့ၣ်မ့ၢ်ပှၤအလၢအပှဲၤတဂၤ, ဒီးမၤနၢၤအနီၢ်ခိဒီဂၤညါသ့စ့ၢ်ကီးလီၤ. ၃ ကွၢ်ကွၢ်, ဒ်သိးကသ့ၣ်ကစူၢ်ပှၤဒီး, ပဒုးအ့ၣ်ထီၣ်အထးဒီး, ပဃၣ်အမိၢ်ပှၢ်ဒီဒုညါလီၤ. ၄ ကွၢ်စ့ၢ်ကီးကဘီတဖၣ်ဒိၣ်ထဲအံၤ, ဒီးဘၣ်တၢ်ဆီၣ်ဖျိးအီၤလၢကလံၤမုၢ်ဘၣ်ဆၣ်ဒီး, ဘၣ်တၢ်ဘိးဃၣ်အီၤလၢနီၣ်ဝံာ်ခံအဆံးကိာ်, ဖဲအဘၣ်ပှၤလၢအဝံာ်န့ၢ် အခံတဂၤအသးလီၤ. ၅ ဒ်န့ၣ်အသိး ပျ့ၤမ့ၢ်တၢ်အက့ၢ်အဂီၤဆံးကိာ်, ဒီးကတိၤသူၣ်ဂဲၤတၢ်ဖးဒိၣ်လီၤ. ကွၢ်ကွၢ်, မ့ၣ်အူဆံးကိာ်မၤကဲထီၣ်သ့ၣ်မုၣ်အါအါကလဲာ်လီၤ. ၆ ဒီးပျ့ၤမ့ၢ်မ့ၣ်အူ, မ့ၢ်တၢ်အၢတၢ်သီအဟီၣ်ခိၣ်တဘ့ၣ်လီၤ. ဒ်န့ၣ်အသိးပျ့ၤန့ၣ် ဘၣ်တၢ်ပာ်အီၤလၢ ပက့ၢ်ပဂီၤအကျါ, ဒီးမၤဘၣ်အၢပနီၢ်ခိဒီဂၤညါ, ဒီးဆိၣ်ကဲၤပသးသမူအကျဲ, ဒီးဘၣ်တၢ်ဆိၣ်ကဲၤအသးလၢလရာ်လီၤ. ၇ အဂ့ၢ်ဒ်အံၤ, ကယဲၢ်ဆၣ်ဖိကီၢ်ဖိအမံၤ, ဒီးထိၣ်ဧိၤလံၣ်ဧိၤ, ဒီးတၢ်စွါတၢ်စွဲ, ဒီးတၢ်အိၣ်လၢပီၣ်လဲၣ်ပူၤတမံၤလၢ်လၢ်န့ၣ်, ဘၣ်တၢ်မၤဘှါအီၤ, ဒီးဘၣ်လံတၢ်မၤဘှါအီၤလၢပှၤကညီတကလုာ်, ခဲလၢာ်လံ. ၈ မ့မ့ၢ်ပျ့ၤန့ၣ်ပှၤမၤဘှါအီၤတသ့ဘၣ်နီတဂၤဘၣ်. မ့ၢ်တၢ်အၢလၢပှၤမၤအီၤတနၢၤဘၣ်, ဒီးလၢပှဲၤဝဲဒီးတၢ်အစုၣ်အပျၢ်လၢ အမၤသံတၢ်လီၤ. ၉ ပဆိၣ်ဂ့ၤယွၤပၢ်တဂၤန့ၣ်, လၢအီၤ, ဒီးပဆိၣ်အၢပှၤကညီလၢ အဘၣ်တၢ်တ့အီၤဒ်ယွၤအက့ၢ်အဂီၤအသိး, လၢအီၤလီၤ. ၁၀ တၢ်ဆိၣ်ဂ့ၤ, ဒီးတၢ်ဆိၣ်အၢန့ၣ်, ဟဲထီၣ်လၢပထးခိၣ်တပူၤဃီလီၤ. ယဒီပုၢ်ဝဲၢ်သ့ၣ်ဧၢ, တၢ်န့ၣ်တဖၣ်တဂ့ၤမၤဘၣ်အသးဒ်န့ၣ်ဘၣ်. ၁၁ ထံထီၣ်ပၢၢ်တပူၤဃီန့ၣ်, မ့ၢ်အထီၣ်ပၢၢ်တၢ်အဆၢဒီးတၢ်အခၣ်စ့ၢ်ကီးဧါ. ၁၂ ယဒီပုၢ်ဝဲၢ်သ့ၣ်ဧၢ, ချၢၣ်ဒၢတထံးန့ၣ် သၣ်ထီၣ်သ့ၣ်စၤယံးအသၣ်, ဒီးစပံးမုၢ်သၣ်ထီၣ် ချၢၣ်ဒၢအသၣ်န့ၣ်, ဘၣ်ကသ့ဧါ. ဒ်န့ၣ်အသိးထံဟီဒီးထံဘျါန့ၣ်, ထီၣ်ပၢၢ်တပူၤဃီတသ့ဘၣ်. ပှၤအိၣ်ဒီးအတၢ်ကူၣ်သ့ကူၣ်ဘၣ်, ဒီးအတၢ်သ့ၣ်ညါ လၢသုကျါန့ၣ် မ့ၢ်မတၤတဂၤလဲၣ်. လၢအတၢ်ကျဲးစၢးတၢ်ဂ့ၤန့ၣ်, မ်အဒုးနဲၣ်အတၢ်မၤလၢ တၢ်ကူၣ်သ့အတၢ်သူၣ်စူၤသးစူၤန့ၣ်တက့ၢ်. ၁၃ ပှၤအိၣ်ဒီးအတၢ်ကူၣ်သ့ကူၣ်ဘၣ်, ဒီးအတၢ်သ့ၣ်ညါ လၢသုကျါန့ၣ် မ့ၢ်မတၤတဂၤလဲၣ်. လၢအတၢ်ကျဲးစၢးတၢ်ဂ့ၤန့ၣ်, မ်အဒုးနဲၣ်အတၢ်မၤလၢ တၢ်ကူၣ်သ့အတၢ်သူၣ်စူၤသးစူၤန့ၣ်တက့ၢ်. ၁၄ ဘၣ်ဆၣ်ဒီး သုမ့ၢ်အိၣ်ဒီးသးဆဲးအဲးအခၣ်, ဒီးတၢ်ဂ့ၢ်လိာ်ဘှီလိာ်လၢသုသးကံၢ်ပူၤဒီး, ပာ်သုသးကဖၢလၢဒီး ကတိၤတၢ်ကဘျံးကဘျၣ် ထီဒါတၢ်မ့ၢ်တၢ်တီတဂ့ၤ. ၁၅ တၢ်န့ၣ်တမ့ၢ်ဘၣ်တၢ်ကူၣ်သ့ကူၣ်ဘၣ်လၢ အဟဲလီၤလၢထးန့ၣ်ဘၣ်. မ့ၢ်အဘၣ်ဃးဒီးဟီၣ်ခိၣ်, ဒီးပှၤကညီအသး, ဒီးတၢ်ဝံတၢ်နါတဖၣ်န့ၣ်လီၤ. ၁၆ အဂ့ၢ်ဒ်အံၤ, ဖဲတၢ်သးဆဲးအဲးဒီးတၢ်ဂ့ၢ်လိာ်ဘှီလိာ်အိၣ်ဝဲန့ၣ်, တၢ်တၢထီၣ်တၢလီၤ, ဒီးတၢ်မၤအၢမၤသီကိးမံၤဒဲး, အိၣ်ဝဲဖဲန့ၣ်လီၤ. ၁၇ မ့မ့ၢ်တၢ်ကူၣ်ဘၣ်ကူၣ်သ့လၢထးန့ၣ်, မ့ၢ်လၢအဆိလၢတၢ်စီတၢ်ဆှံ, လၢခံက့ၤ, တၢ်မုာ်တၢ်ဖိး, တၢ်သူၣ်စူၤတၢ်သးစူၤ, ဒိးတၢ်ကညးန့ၢ်အီၤညီ, လၢထီၣ်ပှဲၤထီၣ်ဒီးတၢ်သးကညီၤဒီးတၤသၣ်အဂ့ၤ, တကွၢ်မဲာ်ဘၣ်တၢ်ဘၣ်, ဒီးတၢ်လီတၢ်ဝ့ၤ တအိၣ်ဘၣ်လၢအပူၤဘၣ်လီၤ. ၁၈ ဒီးတၢ်တီတၢ်လိၤအတၤသၣ်န့ၣ်, ဘၣ်ဖှံလီၤအသးလၢတၢ်ဃူတၢ်ဖိးအပူၤလၢပှၤလၢ အမၤတၢ်ဃူတၢ်ဖိးအစုပူၤလီၤ.
တၢး၁၀ ၉/၁ ကဘျံးပၤ ၂၃-၂၄
ဘၣ်မနုၤအဃိ ပကဘၣ် တဲဖျါထီၣ် ပတၢ်ကမၣ်လဲၣ် ဒီးပကဘၣ်တဲဖျါထီၣ်လၢ မတၤအအိၣ်လဲၣ်
ပှၤလၢအမၤကမၣ် ကစၢ်ယွၤန့ၣ် ကစၢ်ယွၤတဟ့ၣ် တၢ်စိတၢ်ကမီၤလၢ ပှၤဟီၣ်ခိၣ်ဖိတဖၣ် ကပျၢ်အတၢ်ကမၣ်ဘၣ်. ပှၤလၢအပျၢ်တၢ်ကမၣ်သ့န့ၣ် မ့ၢ်ထဲဒၣ်ကစၢ်ယွၤတဂၤဧိၤလီၤ. လံာ်စီဆှံ တဲဝဲလၢ “ပမ့ၢ်တဲာ်လီၤကျဲၤလီၤ ပတၢ်ဒဲးဘးဒီး, အဝဲဒၣ်အကလုၢ်တီ, ဒီးတီဝဲလိၤဝဲ ဒ်သိးအကပျၢ်ကွံာ် ပတၢ်ဒဲးဘး, ဒီးသ့စီကွံာ်ပှၤလၢ ကယဲၢ်တၢ်အၢတၢ်သီခဲလၢာ်လီၤ.” (၁ ယိၤဟၣ် ၁:၉) ဘၣ်ဆၣ် ဘၣ်ဃးဒီးတၢ်ကမၣ်ဖးဒိၣ်န့ၣ် ပကြၢးတဲဖျါထီၣ်လၢ မတၤအအိၣ်လဲၣ်.
ပှၤပျၢ်ကွံာ် ပတၢ်ကမၣ် သ့ထဲဒၣ်ကစၢ်ယွၤတဧိၤအဃိ ပကဘၣ်တဲဖျါထီၣ် ပတၢ်ကမၣ်လၢအအိၣ်လီၤ. ဒ်ပသ့ၣ်ညါတ့ၢ်အသိး စီၤဒၤဝံးစ့ၢ်ကီး မၤဝဲဒ်န့ၣ်လီၤ. ဘၣ်ဆၣ် အဝဲအတၢ်ကမၣ် ကပျၢ်ကွံာ်အဂီၢ် ဒိးသန့ၤထီၣ်အသးလၢ တၢ်မနုၤလဲၣ်. လံာ်စီဆှံ ပာ်ဖျါထီၣ်ဝဲဒ်အံၤ “မၤသးဒ်န့ၣ်ဒီး ဒ်သိးသုတၢ်ဒဲးဘး ကဘၣ်တၢ်တြူာ်ကွံာ်, ဒီးဒ်သိးတၢ်အခုၣ်တၢ်အမုာ် လၢကစၢ်အမဲာ်ညါ အကတီၢ်ကဘၣ်” လီၤ. (မၤတၢ် ၃:၁၉) ဒ်သိးပတၢ်ကမၣ်ကပျၢ်ကွံာ်အဂီၢ် ထဲဒၣ်ပတူၢ်လိာ်လၢ ပမၤကမၣ်ဘၣ်တၢ် ဒီးပတဲဖျါထီၣ်ပတၢ်ကမၣ်န့ၣ် တလၢပှဲၤဒံးဘၣ်. ပကဘၣ်ပာ်တ့ၢ်ကွံာ် ကျဲလၢအကမၣ်တဖၣ် လၢာ်လၢာ်ဆ့ဆ့လီၤ. တၢ်လၢပကဘၣ်မၤအီၤ လၢခံတခါန့ၣ် ဘၣ်သ့ၣ်သ့ၣ် ကကီလၢပဂီၢ်လီၤ. ဘၣ်ဆၣ် ပဒိးန့ၢ်တၢ်မၤစၢၤသ့လီၤ.
သ့ၣ်နီၣ်ထီၣ်က့ၤ စီၤယၤကိာ်အတၢ်ကတိၤလၢ ပပာ်ဖျါထီၣ်တ့ၢ်လၢထးန့ၣ်တက့ၢ်. အဝဲတဲဝဲလၢ “တဲာ်လီၤကျဲၤလီၤလိာ် သုတၢ်သရူးတၢ်ကမၣ်သကိးသကိး, ဒီးဘါထုကဖၣ်လိာ်သုဂီၢ် သကိးသကိး, ဒ်သိးသုကဘျါက့ၤတက့ၢ်.” တကးဒံးဘၣ် ဆဲးတဲကဒီးဝဲလၢ “ပှၤအတီအလိၤအတၢ်ထုကဖၣ် သပှၢ်သပှၢ်န့ၣ်, မၤန့ၢ်တၢ်အါမးလီၤ.” (ယၤကိာ် ၅:၁၆) “ပှၤအတီအလိၤ” န့ၣ်မ့ၢ်ဝဲ ‘တၢ်အိၣ်ဖှိၣ်သးပှၢ်တဖၣ်’ လၢစီၤယၤကိာ် ပာ်ဖျါထီၣ်ဝဲလၢ အဆၢဖိ ၁၄ အပူၤလီၤ. လၢခရံာ်ဖိတၢ်အိၣ်ဖှိၣ်အပူၤန့ၣ် အိၣ်ဒီးပှၤ “သးပှၢ်” မ့တမ့ၢ် တၢ်အိၣ်ဖှိၣ်သးပှၢ်လၢ အဒိၣ်တုာ်ခိၣ်ပှဲၤလၢ ကမၤစၢၤပှၤလၢအဲၣ်ဒိးလၢ ကစၢ်ယွၤကပျၢ်ကွံာ် အတၢ်ကမၣ် တဖၣ်အဂီၢ်လီၤ. ပှၤဟီၣ်ခိၣ်ဖိတဖၣ် တအိၣ်ဒီးတၢ်ခွဲးတၢ်ယာ်လၢ ကပျၢ်ကွံာ်တၢ်ကမၣ်အဂီၢ်ဘၣ် အဃိ ‘ပှၤသးပှၢ်’ တဖၣ်အံၤစ့ၢ်ကီး ပျၢ်ကွံာ်တၢ်ကမၣ်တသ့ဘၣ်. ဘၣ်ဆၣ် အဝဲသ့ၣ် အိၣ်ဒီးတၢ်သ့တၢ်ဘၣ်လၢ ကသိၣ်ဃီၣ် ပှၤလၢအမၤဘၣ် တၢ်ကမၣ်ဖးဒိၣ်တဖၣ် ဒီးဘှီဘၣ်ထီၣ်က့ၤ အဝဲသ့ၣ်လီၤ. အဝဲသ့ၣ်ကမၤစၢၤဝဲ ဒ်သိးပှၤလၢအမၤတၢ်ကမၣ်တဂၤ ကသ့ၣ်ညါဝဲလၢ အတၢ်ကမၣ်ဒိၣ်ဆံးအါလဲၣ် ဒီးကပီၢ်ယၢ်လီၤက့ၤအသးအဂီၢ်လီၤ.—ကလၤတံ ၆:၁.
ပှၤလၢအမၤဘၣ် တၢ်ကမၣ်အဒိၣ်မ့ၢ်ဂ့ၤအဆံးမ့ၢ်ဂ့ၤန့ၣ် အတၢ်ရ့လိာ်သးဒီး ပှၤအဂၤတဖၣ်မ့ၢ်ဂ့ၤ ကစၢ်ယွၤမ့ၢ်ဂ့ၤ ဟးဂီၤဝဲလီၤ. လၢတၢ်န့ၣ်အဃိ အဝဲကသူၣ်ကိၢ်သးဂီၤ မ့တမ့ၢ် အသးကဟးဂီၤဒိၣ်မးလီၤ. ပတူၢ်ဘၣ်ဒ်အံၤန့ၣ် မ့ၢ်လၢကစၢ်ယွၤ ဟ့ၣ်ပှၤသးလၢအသ့ၣ်ညါဒၣ်တၢ်အဃိလီၤ. (ရိမ့ၤ ၂:၁၄, ၁၅) ပမ့ၢ်တူၢ်ဘၣ်ဒ်အံၤန့ၣ် ပကဘၣ်မၤဒ်လဲၣ်.
ကွၢ်က့ၤလံာ်လၢ စီၤယၤကိာ်ကွဲးဝဲတက့ၢ်. ပကထံၣ်ဘၣ်တၢ်ကတိၤလၢ အဟ့ၣ်ဂံၢ်ဟ့ၣ်ဘါပှၤဒ်အံၤ “ပှၤလၢသုကျါမ့ၢ် အဘၣ်တၢ်ဆါတဂၤဂၤဧါ. မ်အကိးတၢ်အိၣ်ဖှိၣ် အသးပှၢ်တဖၣ်တက့ၢ်. ဒီးမ်အဝဲသ့ၣ် ဖှူအလိၤလၢသိလၢကစၢ်အမံၤ ဒီးဘါထုကဖၣ်တၢ်လၢအဂီၢ်တက့ၢ်. ဒီးတၢ်စူၢ်တၢ်နာ် အတၢ်ထုကဖၣ်န့ၣ်, ကအုၣ်က့ၤခီၣ်က့ၤပှၤဆါ, ဒီးကစၢ်ကဒုးဂဲၤဆၢထၢၣ်အီၤ, ဒီးအတၢ်ဒဲးဘးလၢ အမၤတ့ၢ်လံမ့ၢ်အိၣ်ဒီး, တၢ်ကပျၢ်ကွံာ်အီၤလီၤ.”—ယၤကိာ် ၅:၁၄, ၁၅.
ပှၤသးပှၢ် မ့တမ့ၢ် တၢ်အိၣ်ဖှိၣ်သးပှၢ်တဖၣ် မၤစၢၤဝဲဒီပုၢ်ဝဲၢ်မုၣ်ခွါတဖၣ် အတၢ်လိၣ်ဘၣ်လီၤ. အဝဲသ့ၣ်မၤစၢၤဝဲဒ်လဲၣ်. ဖဲပှၤမၤတၢ်ကမၣ်တဂၤ တဲဖျါထီၣ်အတၢ်ကမၣ်အခါ တမ့ၢ်ထဲအဒိကနၣ်န့ၢ်ဝဲ တခါဧိၤဘၣ်. အဝဲကဘၣ်မၤတၢ်တမံၤမံၤ ဒ်သိးပှၤလၢအမၤတၢ်ကမၣ်တဂၤ အတၢ်ရ့လိာ်သးဒီး ကစၢ်ယွၤ ကဂ့ၤထီၣ်က့ၤအဂီၢ်လီၤ. ဒ်စီၤယၤကိာ် ပာ်ဖျါထီၣ်ဝဲအသိး အဝဲမၤတၢ်သ့ခံမံၤလီၤ.
အဆိကတၢၢ် “ဖှူအလိၤလၢသိ” တၢ်အံၤအဲၣ်ဒိးတဲဝဲ လံာ်စီဆှံအိၣ်ဒီး တၢ်စိတၢ်ကမီၤလၢ အမၤဘျါအဂီၢ်လီၤ. တၢ်မၢဖိပီလူး တဲနၢ်ပၢၢ်ဝဲလၢ “ယွၤအကလုၢ်န့ၣ်မ့ၢ်တၢ်မူ, ဒီးမၤတၢ်သ့, . . . ဒီးမ့ၢ်တၢ်လၢအသ့ၣ်ညါ ပသးအတၢ်ဆိကမိၣ် ဒီးအကူၣ်တၢ်တဖၣ်” အဃိ သ့ၣ်ညါပတၢ်ဆိကမိၣ် ဒီးပသးဂ့ၤဂ့ၤလီၤ. (ဧ့ၤဘြံၤ ၄:၁၂) ပှၤသးပှၢ်တဖၣ်န့ၣ် ကသူဝဲလံာ်စီဆှံဂ့ၤဂ့ၤ ဒ်သိးကမၤစၢၤဝဲ ပှၤလၢအမၤတၢ်ကမၣ်တဂၤ ကသ့ၣ်ညါလီၤအတၢ်ကမၣ် ဒီးကမၤဝဲတၢ်လၢ အဝဲကဘၣ်မၤဂ့ၤထီၣ်က့ၤဝဲလၢ ကစၢ်ယွၤအမဲာ်ညါတဖၣ်လီၤ.
ခံထံၣ်တထံၣ်န့ၣ် မ့ၢ်ဝဲ “တၢ်စူၢ်တၢ်နာ် အတၢ်ထုကတဖၣ်” လီၤ. ပှၤသးပှၢ်တဖၣ် အတၢ်ထုကဖၣ်န့ၣ် ဆီတလဲဝဲ ကစၢ်ယွၤအတၢ်စံၣ်ညီၣ် အတီအလိၤတန့ၢ်သနာ်က့ အဝဲသ့ၣ်တၢ်ထုကဖၣ်န့ၣ် မ့ၢ်တၢ်အရ့ဒိၣ်လၢ ကစၢ်ယွၤ လၢအသးအိၣ်ပျၢ်တၢ်ကမၣ် ခီဖျိအဒိးသန့ၤထီၣ်ဝဲလၢ ယ့ၣ်ၡူးအတၢ်ပှ့ၤက့ၤလီၤ. (၁ ယိၤဟၣ် ၂:၂) ကစၢ်ယွၤ အိၣ်ကတဲာ်ကတီၤအသးလၢ ကမၤစၢၤဝဲပှၤလၢ အပီၢ်ယၢ်လီၤက့ၤအသးနီၢ်နီၢ် ဒီး “မၤတၢ်ကြၢးဒီး တၢ်ပီၢ်ယၢ်လီၤက့ၤအသး” တဖၣ်လီၤ.—မၤတၢ် ၂၆:၂၀.
ပမ့ၢ်မၤကမၣ်ဘၣ် ပှၤအဂၤမ့ၢ်ဂ့ၤ ကစၢ်ယွၤမ့ၢ်ဂ့ၤ တၢ်ဂ့ၢ်လၢပကြၢး တဲဖျါထီၣ်ပတၢ်ကမၣ်န့ၣ် မ့ၢ်ဒ်သိးပကဒိးန့ၢ်ဘၣ်က့ၤ ကစၢ်ယွၤအတၢ်ဘၣ်သးအဂီၢ်လီၤ. ယ့ၣ်ၡူးတဲဝဲလၢ ဒ်သိးပဘူၣ်ထီၣ်ဘါထီၣ် ကစၢ်ယွၤလၢ သးလၢအသ့ၣ်ညါဒၣ်တၢ်လၢ အကဆှီကန့ၢ်အဂီၢ် အဆိကတၢၢ် ပမ့ၢ်အိၣ်ဒီး တၢ်ဂ့ၢ်သဘံၣ်ဘုၣ်ဒီးပှၤဂၤန့ၣ် ပကဘၣ်မၤဘၣ်ဂီၢ်က့ၤအီၤလီၤ. (မးသဲ ၅:၂၃, ၂၄) ကတိၤဒိ ၂၈:၁၃ တဲဝဲလၢ “ပှၤလၢအကျၢၢ်ဘၢ အတၢ်သရူးကမၣ်န့ၣ် တဘီၣ်ထီၣ်တညီထီၣ်ဘၣ်ဘၣ်. မ့မ့ၢ်ပှၤလၢ အတဲလီၤကျဲၤလီၤ ဒီးညိကွံာ်ဝဲန့ၣ် ကဒိးတၢ်သးကညီၤလီၤ.” ပမ့ၢ်အိၣ်ဒီး တၢ်ဆီၣ်လီၤသးလၢ ယဟိဝၤယွၤအမဲာ်ညါ ဒီးဃ့ပျၢ်ပတၢ်ကမၣ်န့ၣ် ပကဒိးန့ၢ်ဘၣ်က့ၤအတၢ်ဘၣ်သး ဒီးအဆၢကတီၢ်မ့ၢ်ဘၣ်န့ၣ် အဝဲကပာ်ထီၣ်ထီပှၤလီၤ.—၁ ပ့းတရူး ၅:၆.
လါအီးကထိဘၢၣ် ၁၄–၂၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ပ့းတရူး ၁–၂
“ကဲထီၣ်ပှၤစီဆှံတက့ၢ်”
(၁ ပ့းတရူး ၁:၁၄, ၁၅) ဒ်ဖိသၣ်လၢ အနၢ်လိၤအသိးန့ၣ်, ဒုးမၤက့ၤသုက့ၢ်သုဂီၤ ဒ်တၢ်သးကွံအခီၣ်ထံးလၢ သုတသ့ၣ်ညါဘၣ်တၢ်ဘၣ်အပူၤအသိးန့ၣ်တဂ့ၤ. ၁၅ မ့မ့ၢ်ဒ်ပှၤလၢအကိးန့ၢ်သု, မ့ၢ်အစီအဆှံအသိးန့ၣ်, ကဲထီၣ်သုဝဲစ့ၢ်ကီးလၢ အစီအဆှံလၢသုမၤတၢ်ဖံးတၢ်ကိးအမံၤဒဲးအပူၤတက့ၢ်.
တၢ်ပှ့ၤက့ၤန့ၣ်မ့ၢ် “တၢ်ဟ့ၣ်အလၢအပှဲၤ” လၢအဟဲလၢပၢ်အအိၣ်
၅ ပပာ်ဖျါထီၣ်လၢ ပအဲၣ်ယဟိဝၤယွၤအမံၤ ကသ့ဒ်လဲၣ်. ပပာ်ဖျါထီၣ်သ့ခီဖျိလၢ ပတၢ်ဖံးတၢ်မၤတဖၣ်လီၤ. ယဟိဝၤယွၤအဲၣ်ဒိးဝဲလၢ ပကအိၣ်စီဆှံလီၤ. (ဖး ၁ ပ့းတရူး ၁:၁၅, ၁၆ တက့ၢ်.) တၢ်အံၤအဲၣ်ဒိးတဲဝဲ ယဟိဝၤယွၤဘၣ်သးလၢ ပဘူၣ်ထီၣ်ဘါထီၣ်ထဲဒၣ်အီၤ ဒီးဒိကနၣ်အကလုၢ်လၢ ပသူၣ်ဒီဖျၢၣ်ပသးဒီဖျၢၣ်န့ၣ်လီၤ. ဖဲပှၤဂၤမၤအၢမၤသီပှၤအခါဒၣ်လဲာ် ပဂုာ်ကျဲးစၢးအိၣ်မူဒ် ယဟိဝၤယွၤသိၣ်လိနဲၣ်လိပှၤအသိးလီၤ. ပမ့ၢ်အိၣ်မူဒ် ယွၤအတၢ်သိၣ်တၢ်သီအသိးန့ၣ် ယဟိဝၤယွၤအမံၤကဘၣ် တၢ်မၤလၤကပီၤအီၤလီၤ. (မးသဲ ၅:၁၄-၁၆) ပပာ်ဖျါထီၣ်လၢ ယဟိဝၤယွၤအတၢ်သိၣ်တၢ်သီန့ၣ် ဂ့ၤဝဲဒီး မုၣ်ကီၤလံၢ်မ့ၢ် ပှၤလံၣ်တၢ်လီတၢ်တဂၤန့ၣ်လီၤ. ပတမ့ၢ် ပှၤလၢပှၤပှဲၤအဃိ ပမၤကမၣ်ဘၣ်တၢ်သ့လီၤ. ဘၣ်ဆၣ် ဖဲပမၤကမၣ်ဘၣ်တၢ်အခါ ပပီၢ်ယၢ်လီၤက့ၤပသးဒီး ပဂုာ်ကျဲးစၢးဟးဆှဲးတၢ်လၢ ယွၤသးဟ့ဝဲတဖၣ်န့ၣ်လီၤ.—စံး. ၇၉:၉.
(၁ ပ့းတရူး ၁:၁၆) အဂ့ၢ်ဒ်အံၤ, တၢ်ကွဲးအသး, ကဲထီၣ်ပှၤစီဆှံတက့ၢ်. အဂ့ၢ်ဒ်အံၤ, ယမ့ၢ်ပှၤစီဆှံလီၤ.
ပဃုထၢတၢ်ဂီၤမူ, တၢ်သးဝံၣ်ဒီး တၢ်အဂၤတဖၣ်ကသ့ဒ်လဲၣ်
၆ ယဟိဝၤယွၤ တဲဘၣ်ပှၤလၢ “ကဲထီၣ်ပှၤစီဆှံတက့ၢ်. အဂ့ၢ်ဒ်အံၤ, ယမ့ၢ်ပှၤစီဆှံလီၤ.” (၁ ပ့းတရူး ၁:၁၄-၁၆; ၂ ပ့းတရူး ၃:၁၁-၁၃) ပတၢ်ဘူၣ်ထီၣ်ဘါထီၣ် မ့ၢ်စီဆှံလၢ ကစၢ်ယွၤအမဲာ်ညါမး အဝဲကတူၢ်လိာ်ဝဲလီၤ. (၅ မိၤ ၁၅:၂၁) ဘၣ်ဆၣ် ပမ့ၢ်မၤတၢ်လၢ ယဟိဝၤယွၤ သးဟ့ဝဲတဖၣ် ဒ်သိးဒီး တၢ်မၤကမၣ်မုၣ်ကမၣ်ခွါ, တၢ်မၤဆူၣ်မၤစိး မ့တမ့ၢ် တၢ်ဝံတၢ်နါအတၢ်ဖံးတၢ်မၤန့ၣ် ပတၢ်ဘူၣ်ထီၣ်ဘါထီၣ်အီၤ တစီဆှံလၢၤဘၣ်. (ရိမ့ၤ ၆:၁၂-၁၄; ၈:၁၃) တကးဒံးဘၣ် ယဟိဝၤယွၤတဘၣ်အသးလၢ ပကကွၢ်တၢ်ဂီၤမူ မ့တမ့ၢ် ဒိကနၣ်တၢ်သးဝံၣ်လၢ အပာ်ဖျါထီၣ် တၢ်လၢအဝဲသးဟ့ဝဲတဖၣ်အံၤဘၣ်. ဒီးပမ့ၢ်ကွၢ် မ့တမ့ၢ် ဒိကနၣ်တၢ်သ့ၣ်တဖၣ်အံၤန့ၣ် ဘၣ်သ့ၣ်သ့ၣ် ပတၢ်ဘူၣ်ထီၣ်ဘါထီၣ် တစီဆှံလၢၤဘၣ်အဃိ ယဟိဝၤယွၤ တတူၢ်လိာ်ဝဲဘၣ်. လၢတၢ်န့ၣ်အဃိ ပတၢ်ရ့လိာ်သးဒီးယဟိဝၤယွၤ ကဘၣ်ဒိဝဲဒိၣ်မးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ ပ့းတရူး ၁:၁၀-၁၂) လၢတၢ်အုၣ်က့ၤခီၣ်က့ၤန့ၣ်အဂ့ၢ်အကျိၤ, ဝံတဖၣ်ဃုကွၢ်, ဒီးသံကွၢ်လီၤတံၢ်လီၤဆဲး, ဖဲအကတိၤတၢ်လၢဝံအကျိာ်လၢ တၢ်ဘျုးတၢ်ဖှိၣ်ဘၣ်ဃးဒီးသုန့ၣ်လီၤ. ၁၁ ဒီးဖဲအအုၣ်ပာ်အသးလၢ ခရံာ်အတၢ်ဖှီၣ်တၢ်နးအဂ့ၢ်အကျိၤ, ဒီးတၢ်လၤကပီၤလၢ အဝဲန့ၣ်အလီၢ်ခံ အဂ့ၢ်အကျိၤန့ၣ်ဒီး, ခရံာ်အသးအိၣ်လၢအပူၤ, ဒုးနဲၣ်တၢ်မနုၤလဲၣ်, ဒီးအကတီၢ်ဆံးယံာ်လဲၣ်န့ၣ်, အဝဲသ့ၣ်ကွၢ်ထံကွၢ်ဆးလီၤ. ၁၂ ဒီးတၢ်လီၣ်ဖျါထီၣ်လၢအီၤလၢအမၤတၢ်န့ၣ်, တမ့ၢ်ဘၣ်လၢအဂီၢ်ဒၣ်ဝဲဘၣ်, မ့ၢ်လၢသုဂီၢ်လီၤ. ဒီးခဲကနံၣ်အံၤ တၢ်န့ၣ်တဖၣ်ဘၣ်တၢ်စံၣ်တဲၤတဲလီၤသုလၢ ပှၤလၢအစံၣ်တဲၤတဲလီၤ တၢ်သးခုအကစီၣ်, လၢသးစီဆှံ လၢတၢ်မၢလီၤအီၤလၢမူခိၣ်လီၤ. ဒီးဆူအဝဲန့ၣ်အပူၤ ကလူးတဖၣ် တၢ်မိၣ်ကွၢ်ထံကွၢ်ဆးအသးလီၤ.
တၢး၀၈ ၁၁/၁၅ ကဘျံးပၤ ၂၁ အဆၢ ၁၀
လံာ်စီဆှံ အတၢ်ပာ်ဖျါလၢ လံာ်ယၤကိာ် ဒီးလံာ်ပ့းတရူး
၁:၁၀-၁၂. မူခိၣ်ကလူးတဖၣ် သးအိၣ်ဃုသ့ၣ်ညါနၢ်ပၢၢ်ဝဲ တၢ်မ့ၢ်တၢ်တီလၢ အဒိၣ်အယိာ်လၢအမ့ၢ် ကစၢ်ယွၤအဝံလၢပျၢၤတဖၣ် အတၢ်ကွဲးလၢ ဘၣ်ဃးဒီး ခရံာ်ဖိတၢ်အိၣ်ဖှိၣ်လၢ ဘၣ်တၢ်ဒိးဖှူအီၤန့ၣ်လီၤ. ဘၣ်ဆၣ် တၢ်သ့ၣ်တဖၣ်အံၤ ဟဲဖျါထီၣ်ထဲဒၣ်ဖဲ ယဟိဝၤယွၤ စးထီၣ် ဒုးအိၣ်ထီၣ်ဝဲ တၢ်အိၣ်ဖှိၣ်အခါန့ၣ်လီၤ. (အ့း. ၃:၁၀) ပဝဲသ့ၣ်တဖၣ်စ့ၢ်ကီး ပကြၢးကွၢ်လိ မူခိၣ်ကလူးတဖၣ်အံၤ ဒီးဂုာ်ကျဲးစၢးဃုသ့ၣ်ညါ “တၢ်ယိာ်ဘၣ်ဃးဒီးယွၤ” န့ၣ်လီၤ.—၁ ကရံၣ်. ၂:၁၀.
(၁ ပ့းတရူး ၂:၂၅) အဂ့ၢ်ဒ်အံၤ, သုမ့ၢ်တ့ၢ်ဒ်သိလၢ အဟးဖျိးကျဲအသိးန့ၣ် ဘၣ်ဆၣ်ဒီး, ခဲကနံၣ်အံၤ, သုတုၤက့ၤလၢပှၤကွၢ်သိ, ဒီးသုသးအပှၤကွၢ်တၢ်တဂၤ, အအိၣ်န့ၣ်လီၤ.
it-2 ကဘျံးပၤ ၅၆၅ အဆၢ ၃
ပှၤကွၢ်တၢ်
ပှၤကွၢ်တၢ်လၢအဂ့ၤကတၢၢ်. ၁ ပ့းတရူး ၂:၂၅ တဲဝဲလၢ ပှၤလၢအလီၤဂာ်ဒီး “သိလၢ အဟးဖျိးကျဲ” န့ၣ်ဖျါလၢ စီၤပ့းတရူး ယၢၤထီၣ်က့ၤဝဲ ယၡါယၤ ၅၃:၆ လီၤ. အဝဲဆဲးတဲဝဲလၢ “ခဲကနံၣ်အံၤ, သုတုၤက့ၤလၢ ပှၤကွၢ်သိ, ဒီးသုသးအပှၤကွၢ်တၢ်တဂၤ, အအိၣ်န့ၣ်လီၤ.” ဖဲအံၤန့ၣ် အဲၣ်ဒိးတဲဝဲ ယဟိဝၤယွၤလီၤ. မ့ၢ်လၢပှၤလၢ စီၤပ့းတရူးကွဲးလံာ်ဆူအအိၣ်တဖၣ်န့ၣ် တဟးဖျိးကွံာ်လၢ ယ့ၣ်ၡူးခရံာ်အအိၣ်ဘၣ်, အဝဲသ့ၣ်န့ၣ် ဘၣ်တၢ်ကိးက့ၤအီၤဆူ ယဟိဝၤယွၤလၢအမ့ၢ် ပှၤကွၢ်သိအဂ့ၤကတၢၢ်အအိၣ် ခီဖျိယ့ၣ်ၡူးန့ၣ်လီၤ. (စံး. ၂၃:၁; ၈၀:၁; ယံး. ၂၃:၃; ဃ့း. ၃၄:၁၂) ယဟိဝၤယွၤ မ့ၢ်စ့ၢ်ကီးပှၤကွၢ်တၢ်, ပှၤလၢအအိၣ်သကိးတၢ် မ့တမ့ၢ် အသမံသမိးတၢ်တဂၤလီၤ. (စံး. ၁၇:၃) တၢ်ကတိၤလၢအမ့ၢ် တၢ်အိၣ်သကိးတၢ် (Gr., e·pi·sko·peʹ) န့ၣ်ဘၣ်ထွဲလိာ်အသးဒီး ကစၢ်ယွၤ အတၢ်စံၣ်ညီၣ်လၢအဆူၣ်န့ၣ်လီၤ. လီၤဂာ်ဒ် ချ.ခ.န တၢယၤဖှိၣ် ဝ့ၢ်ယရူၤၡလ့ၣ်လၢ တသ့ၣ်ညါဝဲ ‘တၢ်ဟဲအံးက့ၤကွၢ်က့ၤအီၤအမုၢ်အလါ’ [Gr., e·pi·sko·pesʹ]ဘၣ် ဒီးဘၣ်တၢ်စံၣ်ညီၣ်အီၤအသိးန့ၣ်လီၤ. (လူၤ. ၁၉:၄၄) မ့တမ့ၢ် ကအဲၣ်ဒိးတဲဝဲ ပှၤလၢအမၤလၤကပီၤယွၤန့ၣ် ကဒိးန့ၢ်ဘၣ် ကစၢ်ယွၤအတၢ်ကွၢ်မဲာ်, အတၢ်ဘျုးတၢ်ဖှိၣ် ဖဲကစၢ်ယွၤ “တၢ်အိၣ်သကိးအမုၢ်နံၤ [Gr., e·pi·sko·pesʹ]” န့ၣ်လီၤ.—၁ ပ့း. ၂:၁၂.
တၢ်ဖးလံာ်စီဆှံ
(၁ ပ့းတရူး ၁:၁-၁၆) ယ့ၣ်ၡူးခရံာ်အပှၤတၢ်မၢဖိ, ယၤစီၤပ့းတရူး, ယစံးဘၣ်ပှၤတမှံၤဘၣ်ဃးဒီး တၢ်လီၤပြံလီၤပြါလၢပီၣ်တူး, လၢကလၤတံ, လၢကးပၤဒကံ, လၢအၤစံ, ဒီးလၢဘံၤသူၤနံအပူၤန့ၣ်, ၂ ပှၤဘၣ်တၢ်ဃုထၢအီၤဒ် ပၢ်ယွၤအတၢ်သ့ၣ်ညါပာ်အသိး, လၢသးအတၢ်မၤစီဆှံအပူၤ, လၢအကစူၢ်တၢ်ဒီး ဒိးဖှံအသးလၢ ယ့ၣ်ၡူးခရံာ်အသွံၣ်န့ၣ်, မ်တၢ်ဘျုးတၢ်ဖှိၣ်, ဒီးတၢ်ဃူတၢ်ဖိး အါထီၣ်ဒီးသုတက့ၢ်. ၃ ယွၤ, ပကစၢ်ယ့ၣ်ၡူးခရံာ်အပၢ်, မ်အဘၣ်တၢ်ဆိၣ်ဂ့ၤတက့ၢ်. အဝဲဒၣ်, ဒ်အတၢ်သးကညီၤဒိၣ်အသိး, မၤလိၣ်ထီၣ်ကဒီးပှၤလၢ တၢ်မုၢ်လၢ်အမူအပူၤ, လၢယ့ၣ်ၡူးခရံာ် အတၢ်ဂဲၤဆၢထၢၣ်လၢတၢ်သံအဃိ, ၄ ဆူတၢ်န့ၢ်သါလၢ အတဟးဂီၤဘၣ်, ဒီးတဘၣ်အၢဘၣ်, ဒီးတလီၤညွံးဘၣ်အပူၤ, လၢတၢ်ပာ်ဝဲလၢ သုဂီၢ်လၢမူခိၣ်လီၤ. ၅ သုဘၣ်တၢ်ပၢၤသုလၢယွၤ အစိအကမီၤလၢ တၢ်နာ်အဃိ, ပၢၢ်လၢတၢ်အုၣ်က့ၤခီၣ်က့ၤလၢ အအိၣ်ကတဲာ်ကတီၤအသးလၢ အကဘၣ်တၢ်လီၣ်ဖျါထီၣ်အီၤ ဖဲတၢ်ကတၢၢ်အဆၢအကတီၢ်လီၤ. ၆ လၢအဝဲန့ၣ်အဃိ သုသူၣ်ဖှံသးညီ, ဘၣ်ဆၣ်ခဲကနံၣ်အံၤ အလီၢ်မ့ၢ်အိၣ်ဒီး, သုသူၣ်အုးသးအုးတစိၢ်လၢ တၢ်လ့ပစီအါမံၤအဃိ, ၇ ဒ်သိးသုတၢ်နာ် အတၢ်မၤကွၢ်အီၤ, လၢအမ့ၢ်တၢ်လုၢ်တၢ်ပှ့ၤဒိၣ်န့ၢ်ထူ, လၢအဘၣ်တၢ်မၤကွၢ်အီၤလၢ မ့ၣ်အူနာ်သက့ဒီး ဟးဂီၤဝဲန့ၣ်, ကအိၣ်ဖျါထီၣ်လၢ တၢ်စံးထီၣ်ပတြၢၤ, ဒီးတၢ်ယူးတၢ်ယီၣ်, ဒီးတၢ်လၤကပီၤအဂီၢ်, ဖဲယ့ၣ်ၡူးခရံာ်အတၢ်အိၣ်ဖျါထီၣ်န့ၣ်လီၤ. ၈ အဝဲဒၣ်န့ၣ် သုတထံၣ်ဘၣ်အီၤဘၣ်ဒီး, သုအဲၣ်အီၤလီၤ. ခဲကနံၣ်အံၤ သုတထံၣ်ဘၣ်နာ်သက့ဒီး, သုနာ်အီၤဒီး, သုသးခုဒီးတၢ်သးခုလၢ ပစံးတသ့ဘၣ်, ဒီးလၢပှဲၤဝဲဒီးတၢ်လၤကပီၤ, ဒီးသုဒိးန့ၢ်သုတၢ်နာ်အကတၢၢ်န့ၣ်, ၉ တၢ်အုၣ်က့ၤခီၣ်က့ၤသုသးလီၤ. ၁၀ လၢတၢ်အုၣ်က့ၤခီၣ်က့ၤန့ၣ် အဂ့ၢ်အကျိၤ, ဝံတဖၣ်ဃုကွၢ်, ဒီးသံကွၢ်လီၤတံၢ်လီၤဆဲး, ဖဲအကတိၤတၢ်လၢ ဝံအကျိာ်လၢ တၢ်ဘျုးတၢ်ဖှိၣ်ဘၣ်ဃးဒီး သုန့ၣ်လီၤ. ၁၁ ဒီးဖဲအအုၣ်ပာ်အသးလၢ ခရံာ်အတၢ်ဖှီၣ်တၢ်နးအဂ့ၢ်အကျိၤ, ဒီးတၢ်လၤကပီၤလၢ အဝဲန့ၣ်အလီၢ်ခံ အဂ့ၢ်အကျိၤန့ၣ်ဒီး, ခရံာ်အသးအိၣ်လၢအပူၤ, ဒုးနဲၣ်တၢ်မနုၤလဲၣ်, ဒီးအကတီၢ်ဆံးယံာ်လဲၣ်န့ၣ်, အဝဲသ့ၣ်ကွၢ်ထံကွၢ်ဆးလီၤ. ၁၂ ဒီးတၢ်လီၣ်ဖျါထီၣ်လၢအီၤလၢ အမၤတၢ်န့ၣ်, တမ့ၢ်ဘၣ်လၢအဂီၢ်ဒၣ်ဝဲဘၣ်, မ့ၢ်လၢသုဂီၢ်လီၤ. ဒီးခဲကနံၣ်အံၤ တၢ်န့ၣ်တဖၣ် ဘၣ်တၢ်စံၣ်တဲၤတဲလီၤသုလၢ ပှၤလၢအစံၣ်တဲၤတဲလီၤ တၢ်သးခုအကစီၣ်, လၢသးစီဆှံ လၢတၢ်မၢလီၤအီၤလၢမူခိၣ်လီၤ. ဒီးဆူအဝဲန့ၣ်အပူၤ ကလူးတဖၣ် တၢ်မိၣ်ကွၢ်ထံကွၢ်ဆးအသးလီၤ. ၁၃ မၤသးဒ်န့ၣ်ဒီး, ကံၢ်တူာ်ထီၣ်သုသးအယီၢ်ဒ့, ဒီးကီၤသုသး, ဒီးမုၢ်လၢ်သပှၢ်ပှၢ် တၢ်ဘျုးတၢ်ဖှိၣ်လၢ တၢ်ကဟဲစိာ်န့ၢ်သု, ဖဲယ့ၣ်ၡူးခရံာ် ကအိၣ်ဖျါထီၣ်န့ၣ်တက့ၢ်. ၁၄ ဒ်ဖိသၣ်လၢ အနၢ်လိၤအသိးန့ၣ်, ဒုးမၤက့ၤသုက့ၢ်သုဂီၤ ဒ်တၢ်သးကွံအခီၣ်ထံးလၢ သုတသ့ၣ်ညါဘၣ်တၢ်ဘၣ် အပူၤအသိးန့ၣ်တဂ့ၤ. ၁၅ မ့မ့ၢ်ဒ်ပှၤလၢအကိးန့ၢ်သု, မ့ၢ်အစီအဆှံအသိးန့ၣ်, ကဲထီၣ်သုဝဲစ့ၢ်ကီးလၢ အစီအဆှံလၢ သုမၤတၢ်ဖံးတၢ် ကိးအမံၤဒဲးအပူၤတက့ၢ်. ၁၆ အဂ့ၢ်ဒ်အံၤ, တၢ်ကွဲးအသး, ကဲထီၣ်ပှၤစီဆှံတက့ၢ်. အဂ့ၢ်ဒ်အံၤ, ယမ့ၢ်ပှၤစီဆှံလီၤ.
လါအီးကထိဘၢၣ် ၂၁–၂၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ပ့းတရူး ၃–၅
“တၢ်ခဲလၢာ်အကတၢၢ်န့ၣ်ဘူးထီၣ်လံ”
(၁ ပ့းတရူး ၄:၇) ဒီးတၢ်ခဲလၢာ်အကတၢၢ်န့ၣ် ဘူးထီၣ်လံ. မၤသးဒ်န့ၣ်ဒီး, ပာ်သုသးသပှၢ်ပှၢ်, ဒီးဆိးသီလၢ တၢ်ဘါထုကဖၣ်အဂီၢ်တက့ၢ်.
တၢး၁၃ ၁၁/၁၅ ကဘျံးပၤ ၃ အဆၢ ၁
“ဆိးသီလၢ တၢ်ဘါထုကဖၣ်အဂီၢ်တက့ၢ်”
ပှၤမၤတၢ်လၢမုၢ်နၤခီတဂၤ တဲဝဲလၢ– “တနၤအတီၢ်ပူၤ ဆၢကတီၢ်လၢ ပှၤအဲၣ်ဒိးမံခ့ဒိၣ်ကတၢၢ်န့ၣ် မ့ၢ်ဝဲမုၢ်ဘူးကဝါအဆၢကတီၢ်လီၤ.” ပှၤလၢအဘၣ်အိၣ်ဆိးသီဒီနၤတဖၣ် ကတူၢ်လိာ်ဝဲဒ်အံၤစ့ၢ်ကီးလီၤ. ခရံာ်ဖိလၢ မုၢ်မဆါတနံၤအံၤတဖၣ်စ့ၢ်ကီး အတၢ်အိၣ်သးလီၤဂာ်ဒ်န့ၣ်လီၤ. မ့ၢ်လၢဟီၣ်ခိၣ်လၢ မုၣ်ကီၤလံၢ်ပၢဝဲအံၤန့ၣ် လီၤဂာ်ဒ်မုၢ်နၤဒီးခဲအံၤန့ၣ် မ့ၢ်တၢ်ခံးဒိၣ်ကတၢၢ်အဆၢကတီၢ်လီၤ. (ရိ. ၁၃:၁၂) ပမ့ၢ်မံသပ့ၤဘၣ်ပသး ဖဲဆၢကတီၢ်ဖုၣ်ကိာ်အတီၢ်ပူၤအံၤန့ၣ် ကလီၤဘၣ်ယိၣ်ထဲလဲၣ်. အဃိအရ့ဒိၣ်ဒိၣ်မးလၢ ပက ‘ပာ်ပသးသပှၢ်ပှၢ်’ ဒီးဒိကနၣ် လံာ်စီဆှံ အတၢ်ဟံးစုနဲၣ်ကျဲ ဒ်သိးပက “ဆိးသီလၢတၢ်ဘါထုကဖၣ်အဂီၢ်” န့ၣ်လီၤ.—၁ ပ့း. ၄:၇.
(၁ ပ့းတရူး ၄:၈) ဒီးလၢတၢ်ခဲလၢာ်အမဲာ်ညါ, မ်တၢ်အဲၣ်တၢ်ကွံဒိၣ်မးအိၣ်လၢသုကျါတက့ၢ်. အဂ့ၢ်ဒ်အံၤ, တၢ်အဲၣ်တၢ်ကွံန့ၣ် ကျၢၢ်ဘၢတၢ်ဒဲးဘးအါမးလီၤ.
တၢး၉၉ ၄/၁၅ ကဘျံးပၤ ၂၂ အဆၢ ၃
နသ့ၣ်ညါလီၤနနီၢ်သးအတၢ်ဂံၢ်စၢ်ဘါစၢ် ဒီးနမၤဂ့ၤထီၣ်အီၤကသ့ဒ်လဲၣ်
ထီဘိန့ၣ် သ့ၣ်နီၣ်ထီၣ်က့ၤ တၢ်မၢဖိပ့းတရူး အတၢ်ဟ့ၣ်ပလီၢ်လၢ– “တၢ်ခဲလၢာ်အကတၢၢ်န့ၣ် ဘူးထီၣ်လံ. မၤသးဒ်န့ၣ်ဒီး, ပာ်သုသးသပှၢ်ပှၢ်, ဒီးဆိးသီလၢ တၢ်ဘါထုကဖၣ် အဂီၢ်တက့ၢ်. ဒီးလၢတၢ်ခဲလၢာ် အမဲာ်ညါ, မ်တၢ်အဲၣ်တၢ်ကွံဒိၣ်မး အိၣ်လၢသုကျါတက့ၢ်. အဂ့ၢ်ဒ်အံၤ, တၢ်အဲၣ်တၢ်ကွံန့ၣ် ကျၢၢ်ဘၢတၢ်ဒဲးဘး အါမးလီၤ.” (၁ ပ့း. ၄:၇, ၈) ပနီၢ်ကစၢ်ဒီးပှၤအဂၤ အတၢ်တလၢတပှဲၤတဖၣ် ဟဲနုာ်လီၤဆူပသးပူၤ ဒီးညီဒိၣ်မးလၢ ပကလီၤဃံၢ်အဂီၢ်လီၤ. မုၣ်ကီၢ်လံၢ်သ့ၣ်ညါဝဲ ပှၤဟီၣ်ခိၣ်ဖိ အတၢ်ဂံၢ်စၢ်ဘါစၢ်အံၤဂ့ၤဂ့ၤလီၤ. မုၢ်ကီၤလံၢ် အတၢ်ကူၣ်တၢ်ဖးတမံၤန့ၣ် မ့ၢ်အဝဲကမၤလီၤဖးပှၤ ဒီးကမၤနၢၤမၤဃၣ်ပှၤလီၤ. လၢတၢ်န့ၣ်အဃိ ပကဘၣ်ဖၢဘၢကွံာ် တၢ်တလၢတပှဲၤတဖၣ်အံၤ ခီဖျိပတၢ်အဲၣ်အဒိၣ်အယိာ်လၢ တဂၤဒီးတဂၤအဖီခိၣ် လၢအဆိအချ့ ဒီးပတဘၣ် “ဟ့ၣ်မုၣ်ကီၤလံၢ် အလီၢ်ဘၣ်.”—အ့းဖ့းစူး ၄:၂၅-၂၇.
(၁ ပ့းတရူး ၄:၉) တၢ်ကဒူးကဒ့ၣ်တအိၣ်ဘၣ်ဒီး, တူၢ်ထံၣ်တူၢ်တမှံၤလိာ်သုသးတက့ၢ်.
တၢး၁၈.၀၃ ကဘျံးပၤ ၁၅-၁၆ အဆၢ ၂-၃
တၢ်တူၢ်လိာ်တမှံၤန့ၣ်—မ့ၢ်တၢ်လၢအရ့ဒိၣ်
၂ ဖဲန့ၣ်အခါ စီၤပ့းတရူး ဟ့ၣ်သဆၣ်ထီၣ် ခရံာ်ဖိတဖၣ်လၢ “တူၢ်ထံၣ်တူၢ်တမှံၤလိာ်သုသးတက့ၢ်.” (၁ ပ့းတရူး ၄:၉) ကြံးအတၢ်ကတိၤလၢအမ့ၢ် “တူၢ်ထံၣ်တူၢ်တမှံၤ” န့ၣ်အခီပညီမ့ၢ်ဝဲ “ပာ်ဖျါထီၣ် တၢ်အဲၣ်တၢ်ကွံ မ့တမ့ၢ် တၢ်သးကညီၤလၢ ပှၤလၢအအိၣ်ဟဲလၢ တၢ်လီၢ်အဂၤတဖၣ်အဖီခိၣ်လီၤ.” မ့မ့ၢ်ဒီပုၢ်ဝဲၢ်တဖၣ်အံၤ အဝဲသ့ၣ် သ့ၣ်ညါတ့ၢ်လိာ်သး ဒီးမၤသကိးတၢ်ဘၣ်ဆၣ် စီၤပ့းတရူးဟ့ၣ်သဆၣ်ထီၣ် အဝဲသ့ၣ်လၢ ကတူၢ်လိာ်ခီၣ်ဆၢ ‘လိာ်သး’ တဂၤဒီးတဂၤလီၤ. တၢ်တူၢ်လိာ်တမှံၤန့ၣ် မၤစၢၤအဝဲသ့ၣ်ဒ်လဲၣ်.
၃ တၢ်တူၢ်လိာ်တမှံၤန့ၣ် မၤဂ့ၤထီၣ်အဝဲသ့ၣ် အတၢ်ရ့လိာ်သး တဂၤဒီးတဂၤလီၤ. မ့မ့ၢ်နၤမီၤ, မ့ၢ်နနီၣ်ဘၣ်လၢ ပှၤကွဲမုာ်နၤလၢအဟံၣ် အိၣ်တဘျီဘျီဧါ. နမ့ၢ်ကွဲမုာ်ပှၤဂၤလၢ နဟံၣ်န့ၣ် နကဘူးထီၣ်ဒီးအီၤလီၤ. ကျဲအဂ့ၤတဘိလၢ နကသ့ၣ်ညါအါထီၣ် ဒီပုၢ်ဝဲၢ်တဖၣ်အဂ့ၢ်န့ၣ် မ့ၢ်ဝဲနကွဲမုာ် အဝဲသ့ၣ်လၢနဟံၣ်လီၤ. ဖဲစီၤပ့းတရူးအစိၤန့ၣ် မ့ၢ်လၢတၢ်အိၣ်သး နးထီၣ်ဝဲအဃိ ခရံာ်ဖိဖဲန့ၣ်တဖၣ် ကဘၣ်ရ့လိာ်သး ဘူးဘူးတံၢ်တံၢ်လီၤ. “လၢမုၢ်နံၤအခံကတၢၢ်” အဆၢကတီၢ်န့ၣ် ပကဘၣ်မၤ ဒ်န့ၣ်စ့ၢ်ကီးလီၤ.—၂ တံၤမသ့း ၃:၁.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ ပ့းတရူး ၃:၁၉, ၂၀) လၢအဝဲန့ၣ်စ့ၢ်ကီး လဲၤစံၣ်တဲၤတဲလီၤတၢ်လၢ သးတဖၣ်အိၣ်ဝဲလၢဃိာ်ပူၤ, ၂၀ ဖဲအဝဲသ့ၣ်တဖၣ် လၢထံးလၢပျၢၤ တစူၢ်ဘၣ်တၢ်ဘၣ်, ဖဲယွၤအတၢ်ဝံသးစူၤ ဆူလၢ်ဟူတၢ်လၢ စီၤနိအၤအစိၤ, လၢတၢ်တ့ကဘီအဖၢမုၢ်န့ၣ်လီၤ. လၢအပူၤန့ၣ်ပှၤစှၤဂၤ, ဒ်ပစံးတၢ်အသိး, ပှၤအသးဃိးဂၤ, တုၤလၢတၢ်အုၣ်က့ၤခီၣ်က့ၤအီၤ လၢထံလီၤ.
တၢး၁၃ ၆/၁၅ ကဘျံးပၤ ၂၃
ပှၤဖးလံာ်ဖိတဖၣ် အတၢ်သံကွၢ်
လံာ်စီဆှံ ပာ်ဖျါဝဲလၢယ့ၣ်ၡူး “လဲၤဒီးစံၣ်တဲၤတဲလီၤတၢ်လၢ သးတဖၣ်လၢ အဘၣ်တၢ်ဒုးဃာ် အီၤလၢဃိာ်ပူၤန့ၣ်လီၤ.” (၁ ပ့း. ၃:၁၉) တၢ်အံၤအခီပညီ မ့ၢ်မနုၤလဲၣ်.
▪ စီၤပ့းတရူး ပာ်ဖျါထီၣ်ဝဲ ပှၤနီၣ်သးဖိတဖၣ်အံၤဒ် “ပှၤတဖၣ်လၢအတစူၢ်ကစၢ်ယွၤ ဖဲကစၢ်ယွၤအိၣ်ခိး အဝဲသ့ၣ်လၢ တၢ်သးစူၤအပူၤ ဖဲစီၤနိအၤဘှီထီၣ်အကဘီ အခါန့ၣ်လီၤ.” (၁ ပ့း. ၃:၂၀) ပသ့ၣ်ညါဘၣ်လၢ စီၤပ့းတရူးအဲၣ်ဒိးတဲဝဲ မူခိၣ်ကလူးတဖၣ်လၢ အဃုထၢဝဲလၢ ကမၤသကိးတၢ်ဒီး မုၣ်ကီၤလံၢ်န့ၣ်လီၤ. စီၤယၤကိာ် ပာ်ဖျါဝဲလၢ မူခိၣ်ကလူးတဖၣ်လၢ “အတဟံးဃာ်ဘၣ် အတၢ်ခီၣ်ထံးဘၣ်ဝဲဘၣ်, မ့မ့ၢ်ဟးထီၣ်ကွံာ်လၢ အအိၣ်အဆိးအလီၢ်ဒၣ်ဝဲတဖၣ်” န့ၣ်ကစၢ်ယွၤ “ဟံးဃာ်အီၤလၢ တၢ်စၢဃာ်လီၤထူလီၤယိာ်, လၢတၢ်ခံးအဖီလာ်, လၢမုၢ်နံၤဒိၣ် အတၢ်စံၣ်ညီၣ်အဂီၢ်လီၤ.”—ယူဒၤ ၆.
ပှၤနီၢ်သးဖိလၢ စီၤနိအၤအစိၤတဖၣ် တအိၣ်ဒီးတၢ်ဒိကနၣ်လၢကျဲဒ်လဲၣ်. တချုးလၢ ထံလုၣ်ဘၢတၢ်ဒံးဘၣ်န့ၣ် ပှၤနီၢ်သးဖိလၢအအၢတဖၣ်အံၤ မၤကဲထီၣ်အသးလၢ ပှၤကညီအက့ၢ်အဂီၤ လၢကစၢ်ယွၤတတိာ်ပာ်ဝဲလၢ အဝဲသ့ၣ်အဂီၢ်ဘၣ်န့ၣ်လီၤ. (၁ မိၤ. ၆:၂, ၄) တကးဒံးဘၣ် မူခိၣ်ကလူးလၢ အအိၣ်ဃုာ်ဒီး ပိာ်မုၣ်တဖၣ်န့ၣ် လူၤဘၣ်အသးလီၤ. ကစၢ်ယွၤ တတ့လီၤပှၤနီၢ်သးဖိတဖၣ်လၢ ကမံဃုာ်အိၣ်ဃုာ်ဒီး ပိာ်မုၣ်တဖၣ်အဂီၢ်ဘၣ်. (၁ မိၤ. ၅:၂) မူခိၣ်ကလူးလၢအအၢအသီ ဒီးတအိၣ်ဒီး တၢ်ဒိကနၣ်တဖၣ်အံၤ ကဘၣ်တၢ်မၤဟးဂီၤအီၤ ဖဲကစၢ်ယွၤသ့ၣ်နံၤဖးသီပာ်ဝဲ အဆၢကတီၢ်န့ၣ်လီၤ. ခဲအံၤန့ၣ် ဒ်စီၤယူဒၤပာ်ဖျါဝဲအသိး အဝဲသ့ၣ်တဖၣ်အိၣ်လၢ “တၢ်ခံးအဖီလာ်” န့ၣ်လီၤ.
ယ့ၣ်ၡူး လဲၤစံၣ်တဲၤတဲလီၤတၢ်ဆူ “သးတဖၣ်အိၣ်ဝဲလၢဃိာ်ပူၤ” အခါဖဲလဲၣ် ဒီးလဲၤစံၣ်တဲၤတဲလီၤဝဲဒ်လဲၣ်. စီၤပ့းတရူးကွဲးဝဲလၢ “ဒိးတၢ်မၤမူထီၣ်က့ၤအီၤလၢသး” ဝံၤအလီၢ်ခံန့ၣ်လီၤ. (၁ ပ့း. ၃:၁၈, ၁၉) တချုးလၢ စီၤပ့းတရူးကွဲးဝဲ လံာ်အဆိကတၢၢ်တဘ့ၣ် ဒံးဘၣ်န့ၣ် ဒ်သိးကပာ်ဖျါထီၣ်ဝဲလၢ ယ့ၣ်ၡူးစံၣ်တဲၤတဲလီၤတ့ၢ်တၢ်အဂီၢ် အဝဲသူဝဲ တၢ်ကတိၤလၢကြံးကျိာ် လၢအပာ်ဖျါဝဲ တၢ်မၤတ့ၢ်အသးန့ၣ်လီၤ. အဃိ ဖျါလၢယ့ၣ်ၡူး ဂဲၤဆၢထၢၣ်သမူထီၣ်က့ၤဝံၤအလီၢ်ခံ ဆၢကတီၢ်တတီၤတီၤန့ၣ် အဝဲလဲၤစံၣ်တဲၤတဲလီၤဝဲ ပှၤနီၢ်သးဖိတဖၣ်လၢ တၢ်စံၣ်ညီၣ်အဂ့ၢ်န့ၣ်လီၤ. ယ့ၣ်ၡူးတလဲၤတဲဘၣ် အဝဲသ့ၣ်လၢ တၢ်မုၢ်လၢ်အဂ့ၢ်ဘၣ်. လဲၤတဲဘၣ်အဝဲသ့ၣ်လၢ တၢ်စံၣ်ညီၣ်အဂ့ၢ်န့ၣ်လီၤ. (ယိၤနါ ၁:၁, ၂) ယ့ၣ်ၡူးပာ်ဖျါထီၣ်အတၢ်နာ် ဒီးအတၢ်သးတီ တုၤလၢအသံတစု ဒီးအတၢ်ဂဲၤဆၢထၢၣ်သမူထီၣ်က့ၤန့ၣ် ပာ်ဖျါထီၣ်ဝဲလၢ မုၣ်ကီၤလံၢ် ဖီၣ်ဃံးအီၤတန့ၢ်ဘၣ်လီၤ. အဃိယ့ၣ်ၡူးအိၣ်ဒီး တၢ်ဂ့ၢ်လၢကစံၣ်တဲၤတဲလီၤ တၢ်စံၣ်ညီၣ်အကစီၣ်အံၤန့ၣ်လီၤ.—ယိၤဟၣ် ၁၄:၃၀; ၁၆:၈-၁၁
ခါဆူညါန့ၣ် ယ့ၣ်ၡူးကစၢဃာ် မုၣ်ကီၤလံၢ် ဒီးအမူခိၣ်ကလူးတဖၣ် ဒီးတ့ၢ်လီၤကွံာ်အီၤဆူ တၢ်ယိာ်ပူၤလီၤ. (လူၤကၣ် ၈:၃၀, ၃၁; လီၣ်. ၂၀:၁-၃) တချုးလၢတၢ်ဆၢကတီၢ် အဝဲန့ၣ်တုၤဒံးဘၣ်န့ၣ် ပှၤနီၢ်သးဖိလၢ တအိၣ်ဒီးတၢ်ဒိကနၣ်တဖၣ်အံၤ အတၢ်အိၣ်သး လီၤဂာ်ဒ်တၢ်ခံးယိာ်ဒီး လၢခံကတၢၢ် အဝဲသ့ၣ်ကဘၣ်တၢ်မၤဟးဂီၤအီၤ သပှၢ်တၢၢ်လီၤ.—လီၣ်. ၂၀:၇-၁၀.
(၁ ပ့းတရူး ၄:၆) အဂ့ၢ်ဒ်အံၤ, လၢတၢ်န့ၣ်အဃိစ့ၢ်ကီး, တၢ်သးခုအကစီၣ် ဘၣ်တၢ်စံၣ်တဲၤတဲလီၤလၢ ပှၤသံတဖၣ်, ဒ်သိးအဝဲသ့ၣ် ကဘၣ်တၢ်စံၣ်ညီၣ် ဘၣ်ဃးဒီးပှၤကညီလၢ တၢ်ဖံးတၢ်ညၣ်အပူၤ, ဒီးမူဝဲဘၣ်ဃးဒီးယွၤ, လၢသးန့ၣ်အပူၤလီၤ.
တၢး၀၈ ၁၁/၁၅ ကဘျံးပၤ ၂၁ အဆၢ ၈
လံာ်စီဆှံ အတၢ်ပာ်ဖျါလၢ လံာ်ယၤကိာ် ဒီးလံာ်ပ့းတရူး
၄:၆—“ပှၤသံတဖၣ်” လၢ “တၢ်သးခုအကစီၣ် ဘၣ်တၢ်စံၣ်တဲၤတဲလီၤ” အီၤန့ၣ်မ့ၢ်မတၤတဖၣ်လဲၣ်. အဝဲသ့ၣ်မ့ၢ် ပှၤတဖၣ်လၢ “သံတ့ၢ်လၢတၢ်သရူးတၢ်ကမၣ် ဒီးတၢ်ဒဲးတူာ်တၢ်ဒဲးဘးအပူၤ” မ့တမ့ၢ် သံလၢနီၣ်သးတခီ တချုးလၢအနၢ်ဟူဘၣ် တၢ်သးခုကစီၣ်ဒံးဘၣ်န့ၣ်လီၤ. (အ့း. ၂:၁) အဝဲသ့ၣ်နာ်တၢ်သးခုကစီၣ် ဝံၤအလီၢ်ခံ “မူ” ထီၣ်က့ၤလၢနီၢ်သးန့ၣ်လီၤ.
တၢ်ဖးလံာ်စီဆှံ
(၁ ပ့းတရူး ၃:၈-၂၂) လၢခံကတၢၢ်န့ၣ်, မ်ပှၤခဲလၢာ်ကဲထီၣ် ပှၤသးတဖျၢၣ်ဃီ, ပှၤဒိးဃုာ်တၢ်, ပှၤအဲၣ်ဒီပုၢ်ဝဲၢ်, ပှၤသးကညီၤတၢ်, ပှၤဆီၣ်လီၤအသးန့ၣ်တက့ၢ်. ၉ လၢတၢ်အၢအဃိန့ၣ်, ဟ့ၣ်ကၣ်တၢ်အၢတဂ့ၤ. လၢတၢ်ဒုၣ်ဒွဲၣ်အဃိန့ၣ်, ဟ့ၣ်ကၣ်တၢ်ဒုၣ်ဒွဲၣ်တဂ့ၤ, အခိၣ်တလိာ် တၢ်ဆိၣ်ဂ့ၤန့ၣ်တက့ၢ်. အဂ့ၢ်ဒ်အံၤ, သုဘၣ်တၢ်ကိးန့ၢ်သုလၢ တၢ်အံၤအဂီၢ်, ဒ်သိးသုကန့ၢ်ဘၣ်သါ တၢ်ဆိၣ်ဂ့ၤန့ၣ်လီၤ. ၁၀ အဂ့ၢ်ဒ်အံၤ, ပှၤလၢအသးအဲၣ်တၢ်မူ, ဒီးဆၢထံၣ်အနံၤအသီလၢ အဂ့ၤတဖၣ်န့ၣ်, မ်အတြီဃာ် အပျ့ၤလၢတၢ်အၢ, ဒီးအပျုၤလၢတၢ်ကတိၤလီတၢ်န့ၣ်တက့ၢ်. မ်အဟးဆှဲးတၢ်အၢ, ဒီးမၤတၢ်ဂ့ၤတက့ၢ်. ၁၁ မ်အဃုတၢ်ဃူတၢ်ဖိး, ဒီးလူၤအီၤတက့ၢ်. ၁၂ အဂ့ၢ်ဒ်အံၤ, ယွၤအမဲာ်အိၣ်လၢ ပှၤတီပှၤလိၤအလိၤ, ဒီးအနၢ်အိၣ်လၢပှၤလၢ အဃ့ကညးတၢ်အဂီၢ်လီၤ. ဒီးယွၤအမဲာ်ထီဒါ ပှၤမၤတၢ်အၢန့ၣ်လီၤ. ၁၃ ဒီးသုမ့မ့ၢ်ပှၤလၢအသးဆူၣ်လၢ တၢ်ဂ့ၤအဂီၢ်ဒီး, မ့ၢ်မတၤကမၤအၢသုတဂၤလဲၣ်. ၁၄ မ့မ့ၢ်သုမ့ၢ်ဘၣ် တၢ်ဖှီၣ်တၢ်နးလၢ တၢ်တီတၢ်လိၤအဃိဒီး, သုဘၣ်ဆိၣ်ဂ့ၤလီၤ. ဒီးသုတပျံၤအဝဲသ့ၣ် အတၢ်မၤပျံၤန့ၣ်တဂ့ၤ, ဒီးသူၣ်ကိၢ်သးဂီၤတဂ့ၤ. ၁၅ ဒီးပာ်စီဆှံကစၢ်ခရံာ်လၢ သုသးကံၢ်ပူၤတက့ၢ်. ဒီးကယဲၢ်ပှၤလၢ အသံကွၢ်သုလၢ တၢ်မုၢ်လၢ်အိၣ်လၢ သုပူၤအဂ့ၢ်အကျိၤကိးဂၤဒဲးန့ၣ်, အိၣ်ကတီၤသုသးထီဘိလၢ တၢ်စံးဆၢ, မ့မ့ၢ်လၢ တၢ်သူၣ်စူၤသးစူၤဒီး တၢ်ပျံၤတၢ်ဖုးတက့ၢ်. ၁၆ အိၣ်ဒီးသုသးလၢ အသ့ၣ်ညါဒၣ်တၢ်အဂ့ၤ, ဒ်သိးတၢ်လၢ အဝဲသ့ၣ်စံးအၢသု, ဒ်ပှၤမၤအၢတၢ်အသိး, ပှၤလၢအကတိၤတရီတပါ သုမၤတၢ်အဂ့ၤလၢခရံာ်အပူၤအံၤ, ကမဲာ်ဆှးဝဲလီၤ. ၁၇ အဂ့ၢ်ဒ်အံၤ, မ့ၢ်ဘၣ်ယွၤအသးဒီး, ပဘၣ်တၢ်နးတၢ်ဖှီၣ်လၢ ပမၤတၢ်ဂ့ၤအဃိ, ဂ့ၤန့ၢ်ပဘၣ်တၢ်လၢ ပမၤတၢ်အၢအဃိန့ၣ်တက့ၢ်လီၤ. ၁၈ အဂ့ၢ်ဒ်အံၤ, ခရံာ်ဒိးတၢ်စ့ၢ်ကီး တဘျီလၢတၢ်ဒဲးဘးအဃိ, ပှၤတီပှၤလိၤလၢ ပှၤတတီတလိၤအဂီၢ်, ဒ်သိးအကဆှၢန့ၢ်ပှၤဆူ ယွၤအအိၣ်လီၤ. အဂ့ၢ်ဒ်အံၤ, ဒိးသံအသးလၢ တၢ်ဖံးတၢ်ညၣ်အပူၤ ဘၣ်ဆၣ်ဒီး, ဒိးတၢ်မၤမူထီၣ်က့ၤအီၤလၢ သးန့ၣ်လီၤ. ၁၉ လၢအဝဲန့ၣ်စ့ၢ်ကီး လဲၤစံၣ်တဲၤတဲလီၤတၢ်လၢသးတဖၣ် အိၣ်ဝဲလၢဃိာ်ပူၤ, ၂၀ ဖဲအဝဲသ့ၣ်တဖၣ် လၢထံးလၢပျၢၤ တစူၢ်ဘၣ်တၢ်ဘၣ်, ဖဲယွၤအတၢ်ဝံသးစူၤ ဆူလၢ်ဟူတၢ်လၢစီၤနိအၤအစိၤ, လၢတၢ်တ့ကဘီအဖၢမုၢ်န့ၣ်လီၤ. လၢအပူၤန့ၣ်ပှၤစှၤဂၤ, ဒ်ပစံးတၢ်အသိး, ပှၤအသးဃိးဂၤ, တုၤလၢတၢ်အုၣ်က့ၤခီၣ်က့ၤအီၤလၢထံလီၤ. ၂၁ လၢအဝဲန့ၣ်အဒိအတဲာ် တၢ်ဒိးဘျၢပသး အုၣ်က့ၤခီၣ်က့ၤစ့ၢ်ကီး ပှၤခဲကနံၣ်အံၤ, တမ့ၢ်ဘၣ် တၢ်ပာ်ကွံာ်ပဖံးပညၣ်, အတၢ်ဘၣ်အၢဘၣ်. မ့ၢ်ပသးသ့ၣ်ညါဒၣ်တၢ်အဂ့ၤ အမံသူၣ်မံသးဘၣ်ဃးဒီး ယွၤလၢယ့ၣ်ၡူးခရံာ် အတၢ်ဂဲၤဆၢထၢၣ်က့ၤအဃိလီၤ. ၂၂ အဝဲဒၣ်န့ၣ်က့ၤထီၣ်ဆူမူခိၣ်, ဒီးအိၣ်ဝဲလၢယွၤအစုထွဲတခီ, ဒီးတၢ်ပာ်ကလူးတဖၣ်, ဒီးတၢ်အစိအကမီၤ, ဒီးတၢ်အကဟုအကညီၢ် တဖၣ်လၢအဖီလာ်လီၤ.
လါအီးကထိဘၢၣ် ၂၈–လါနိၣ်ဝ့ဘၢၣ် ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ပ့းတရူး ၁–၃
“ကွၢ်လၢ်ဒီးဆၢသပှၢ်ပှၢ် ယွၤအမုၢ်နံၤ”
(၂ ပ့းတရူး ၃:၉, ၁၀) ကစၢ်တမၤယံာ်မၤနီၢ်တၢ်လၢ အတၢ်စံးပာ်အဂ့ၢ်အကျိၤ, ဒ်ပှၤကညီတနီၤနီၤ ပာ်တၢ်မၤယံာ်မၤနီၢ် အသိးန့ၣ်ဘၣ်. မ့မ့ၢ်မ့ၢ်အဝံသးစူၤ သုဃဲးဃဲးလီၤ. အဂ့ၢ်ဒ်အံၤ, တဘၣ်ဘၣ်အသးလၢ ပှၤကတုၤလၢ တၢ်ဟးဂူာ်ဟးဂီၤနီတဂၤဘၣ်. မ့ၢ်လၢပှၤခဲလၢာ်ကန့ၢ်ဘၣ် တၢ်ပီၢ်ယၢ်လီၤက့ၤအသးလီၤ. ၁၀ မ့မ့ၢ်ကစၢ် အမုၢ်နံၤတနံၤန့ၣ်, ကဟဲဒ်တၢ်ဘျၣ်အသိးလီၤ. ဒီးလၢအပူၤန့ၣ်, မူခိၣ်တဖၣ်ကဒံကွံာ်ဒံဖျိးလၢ တၢ်သီၣ်ဖးဒိၣ်, ဒီးတၢ်အမိၢ်ပှၢ်တဖၣ် ကကဲၤထီၣ်, ဒီးကဒံကွံာ်ဝဲ, ဒီးဟီၣ်ခိၣ် ဒီးတၢ်မၤတဖၣ်လၢအပူၤန့ၣ်, မ့ၣ်အူကအီၣ်ကွံာ်ဝဲလီၤ.
တၢး၀၆ ၁၂/၁၅ ကဘျံးပၤ ၂၇ အဆၢ ၁၁
ယဟိဝၤယွၤက “ကစံၣ်ညီၣ်တီ” တၢ်
၁၁ ယ့ၣ်ၡူးတဲဝဲလၢ ယဟိဝၤယွၤ ကစံၣ်ညီၣ်တီတၢ် “ချ့ချ့” န့ၣ်ပကြၢးနၢ်ပၢၢ်အီၤဒ်လဲၣ်. ကစၢ်ယွၤအကလုၢ်ကထါ ပာ်ဖျါဝဲလၢ ယဟိဝၤယွၤ “ဝံသးစူၤ” တၢ်သနာ်က့ အဆၢကတီၢ်မ့ၢ်ဘၣ်န့ၣ် အဝဲကစံၣ်ညီၣ်တၢ်တီတီလီၤ. (လူၤကၣ် ၁၈:၇, ၈; ၂ ပ့းတရူး ၃:၉, ၁၀) ဖဲစီၤနိအၤအစိၤ ထံလုၣ်ဘၢတၢ်အခါ ပှၤအၢပှၤသီတဖၣ် ဘၣ်တၢ်မၤဟးဂီၤအီၤလၢ အဆိအချ့လီၤ. ဒ်န့ၣ်အသိး ဖဲစီၤလိာ်အစိၤ မ့ၣ်အူဟဲလီၤလၢ မူခိၣ်အခါ ပှၤအၢပှၤသီတဖၣ် ဟးဂီၤကွံာ်ဝဲလီၤ. ယ့ၣ်ၡူးတဲဝဲလၢ “မုၢ်နံၤလၢပှၤကညီဖိခွါအံၤ ကအိၣ်ဖျါထီၣ်ဒီး, တၢ်ကမၤအသးဒ်န့ၣ်အသိးလီၤ.” (လူၤကၣ် ၁၇:၂၇-၃၀) ပှၤအၢပှၤသီတဖၣ်န့ၣ် ‘တၢ်ဟးဂူာ်ဟးဂီၤ ကဟဲဘၣ်အီၤ’ သတူၢ်ကလာ်လီၤ. (၁ သ့းစၤလနံ ၅:၂, ၃) ပနာ်သ့သပှၢ်တၢၢ်လၢ အဆၢကတီၢ်မ့ၢ်ဘၣ်လၢ ယဟိဝၤယွၤ ကစံၣ်ညီၣ်ဝဲဟီၣ်ခိၣ်လၢ မုၣ်ကီၤလံၢ်ပၢအီၤအံၤန့ၣ် အဝဲကစံၣ်ညီၣ်ဝဲ တဘျီဃီလီၤ. ထဲတသီဒၣ်လဲာ် အဝဲတသုးနံၤသုးသီဘၣ်.
(၂ ပ့းတရူး ၃:၁၁, ၁၂) မၤသးဒ်န့ၣ်ဒီး, တၢ်တဖၣ်န့ၣ် ကဒံကွံာ်ခဲလၢာ်သတးဒီး, ၁၂ လၢတၢ်ကွၢ်လၢ်ဒီးတၢ်ဆၢ သပှၢ်ပှၢ်ယွၤအမုၢ်နံၤကဟဲဝဲ, ဖဲမူခိၣ်ကကဲၤထီၣ်ဒီးပူၤကွံာ်, ဒီးတၢ်အမိၢ်ပှၢ်တဖၣ် ကပှံၢ်လီၤလၢတၢ်ကိၢ်န့ၣ်,
တၢး၀၆ ၁၂/၁၅ ကဘျံးပၤ ၁၉ အဆၢ ၁၈
“ယွၤအမုၢ်နံၤဖးဒိၣ်တနံၤ အိၣ်ဘူးထီၣ်လံ”
၁၈ တၢ်မၢဖိပ့းတရူး ဟ့ၣ်ဂံၢ်ဟ့ၣ်ဘါပှၤလၢ ပကဆၢသပှၢ်ပှၢ် ဘၣ်ဃးဒီး “ယွၤအမုၢ်နံၤ” န့ၣ်ပတကမၢကမၣ်ဘၣ်. ပဆၢသပှၢ်ပှၢ်ကသ့ဒ်လဲၣ်. ကျဲတဘိလၢ ပမၤသ့န့ၣ် မ့ၢ်ပအိၣ်ဒီး ‘တၢ်ဖံးတၢ်မၤစီဆှံ ဒီးတၢ်ယူးယီၣ်ယွၤ’ န့ၣ်လီၤ. (၂ ပ့းတရူး ၃:၁၁-၁၃) ပတၢ်မၤမ့ၢ်အါလၢ တၢ်ဖံးတၢ်မၤစီဆှံတဖၣ်အံၤန့ၣ် ကမၤစၢၤပှၤလၢ ပကကွၢ်လၢ် “ယွၤအမုၢ်နံၤ” လၢတၢ်သူၣ်ဆူၣ်သးဆူၣ်အပူၤလီၤ. ကြံးအတၢ်ကတိၤလၢ ဘၣ်တၢ်ကွဲးကျိာ်က့ၤအီၤလၢ “ဆၢသပှၢ်ပှၢ်” န့ၣ်အခီပညီလိၤလိၤမ့ၢ်ဝဲ “တၢ်လဲၤချ့ချ့” န့ၣ်လီၤ. တချုးလၢ ယွၤအမုၢ်နံၤဟဲတုၤဒံးဘၣ် တၢ်ဆၢကတီၢ်လၢအအိၣ်တ့ၢ်အံၤ ပမၤချ့ထီၣ်အီၤတသ့ၣ်ဘၣ်. ဘၣ်ဆၣ် ဖဲပခိးကွၢ်လၢ် ယွၤအမုၢ်နံၤအံၤအခါ ပတၢ်မၤမ့ၢ်အါလၢ ကစၢ်ယွၤ အတၢ်ဖံးတၢ်မၤအပူၤန့ၣ် တၢ်ဆၢကတီၢ်တဖၣ် ကလၢာ်ကွံာ်ဝဲချ့ချ့လီၤ.—၁ ကရံၣ်သူး ၁၅:၅၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ ပ့းတရူး ၁:၁၉) ဒီးပအိၣ် ဒီးဝံအကလုၢ် ဂၢၢ်န့ၢ်ကျၢၤန့ၢ်အလီၢ်တက့ၢ်, လၢသုဂ့ၤကွၢ်ထံအီၤ ဒ်မ့ၣ်အူဒၢကပီၤထီၣ်လၢ တၢ်ခံးအလီၢ်အသိး, တုၤလၢမုၢ်ဆ့ၣ်ထီၣ်, ဒီးဆၣ်တူၢ်ဂီၤထီၣ်ဘးလၢ သုသးကံၢ်ပူၤန့ၣ်လီၤ.
တၢး၀၈ ၁၁/၁၅ ကဘျံးပၤ ၂၂ အဆၢ ၂
လံာ်စီဆှံ အတၢ်ပာ်ဖျါလၢ လံာ်ယၤကိာ် ဒီးလံာ်ပ့းတရူး
၁:၁၉—“ဆၣ်တူၢ်ဂီၤ” န့ၣ်မ့ၢ်မတၤလဲၣ်, ဟဲအိၣ်ဖျါထီၣ်အခါဖဲလဲၣ်. ဒီးပသ့ၣ်ညါသ့ဒ်လဲၣ်. “ဆၣ်တူၢ်ဂီၤ” န့ၣ်မ့ၢ်ယ့ၣ်ၡူးခရံာ်လၢ အိၣ်ဒီးအစိကမီၤလၢ ယွၤအဘီမုၢ်အပူၤန့ၣ်လီၤ. (လီၣ်. ၂၂:၁၆) ဒ်မုၢ်နံၤအသီတနံၤ အမုၢ်ဆ့ၣ်ဝါထီၣ်အသိး ဖဲ ၁၉၁၄ န့ၣ်ယ့ၣ်ၡူး ဟဲဖျါထီၣ် လၢတၢ်ဘၣ်တ့ခဲလၢာ်အမဲာ်ညါ ဒ်မ့းၡံအၤစီၤပၤအသိးလီၤ. ယ့ၣ်ၡူး အတၢ်ပျိာ်လဲအသးန့ၣ် ဒုးထံၣ်ဆိပာ်ဝဲ ယ့ၣ်ၡူးအလၤကပီၤ ဒီးအဘီမုၢ်အစိကမီၤန့ၣ်လီၤ. ဒီးတၢ်အံၤဒုးသ့ၣ်ညါပှၤလၢ ကစၢ်ယွၤ အဝံအတၢ်စံးပာ်တဖၣ်န့ၣ် ပနာ်အီၤသ့သပှၢ်တၢၢ်လီၤ. ခီဖျိလၢ ပသးစၢၢ်ဆၢ ဝံအတၢ်စံးပာ်အံၤအဃိ မ့ၢ်ဒၣ်ပမၤကပီၤထီၣ်ပသး ဒီးပပာ်သူၣ်ပာ်သးလၢ ဆၣ်တူၢ်ဂီၤဟဲအိၣ်ဖျါထီၣ်လံန့ၣ်လီၤ.
(၂ ပ့းတရူး ၃:၁၇) မၤသးဒ်န့ၣ်ဒီး, ပှၤလၢတၢ်အဲၣ်အီၤသုဝဲသ့ၣ်ဧၢ, မ့ၢ်သုသ့ၣ်ညါပာ်သတးဒီး, ပလီၢ်သုသးဒ်သိး တၢ်သုတကလံာ်န့ၢ်သုလၢ ပှၤတတီတလိၤဘၣ် အတၢ်လီတၢ်ဝ့ၤတဂ့ၤ, ဒ်သိးသုသုတလီၤတဲာ်ကွံာ်လၢ သုတၢ်ဂၢၢ်တၢ်ကျၢၤဒၣ်သုဝဲန့ၣ်တဂ့ၤ.
တၢး၀၈ ၁၁/၁၅ ကဘျံးပၤ ၂၂ အဆၢ ၄
လံာ်စီဆှံ အတၢ်ပာ်ဖျါလၢ လံာ်ယၤကိာ် ဒီးလံာ်ပ့းတရူး
၃:၁၇—စီၤပ့းတရူးတဲဝဲ ဘၣ်ဃးဒီး “သ့ၣ်ညါပာ်” န့ၣ် အဲၣ်ဒိးတဲဝဲ တၢ်မနုၤလဲၣ်. အဲၣ်ဒိးတဲဝဲ တၢ်သ့ၣ်ညါဆိပာ် ဘၣ်ဃးဒီး တၢ်ကမၤအသးလၢခါဆူညါ လၢအဝဲဒီးပှၤကွဲးလံာ်စီဆှံအဂၤတဖၣ် ဘၣ်တၢ်ဒုးသ့ၣ်ညါအီၤခီဖျိ ယွၤအသးစီဆှံန့ၣ်လီၤ. ဘၣ်ဆၣ် တအဲၣ်ဒိးတဲဝဲလၢ အဝဲသ့ၣ် သ့ၣ်ညါဝဲ တၢ်ခဲလၢာ်ခဲဆ့ဘၣ်. အဃိအဝဲသ့ၣ် သ့ၣ်ညါဆိပာ်တၢ်န့ၣ် အခီပညီတမ့ၢ်လၢ အဝဲသ့ၣ် သ့ၣ်ညါဆိပာ် တၢ်ကမၤအသးလၢ ခါဆူညါ လီၤတံၢ်လီၤဆဲးန့ၣ်ဘၣ်.
တၢ်ဖးလံာ်စီဆှံ
(၂ ပ့းတရူး ၁:၁-၁၅) ယ့ၣ်ၡူးခရံာ် အခ့အပှၤဒီးအပှၤတၢ်မၢဖိ, ယၤစီၤၡံမိၣ်ပ့းတရူး, ယစံးဘၣ်ပှၤလၢအန့ၢ်ဘၣ် တၢ်စူၢ်တၢ်နာ်လုၢ်ဒိၣ်ပှ့ၤဒိၣ် တမံၤဃီဒီးပှၤ, လၢယွၤဒီး ပတၢ်အုၣ်က့ၤခီၣ်က့ၤ, ယ့ၣ်ၡူးခရံာ်, အတၢ်တီတၢ်လိၤအပူၤန့ၣ်, ၂ မ်တၢ်ဘျုးတၢ်ဖှိၣ်, ဒီးတၢ်ဃူတၢ်ဖိးအါထီၣ်လၢသုဂီၢ်, လၢတၢ်သ့ၣ်ညါယွၤ, ဒီးပကစၢ်ယ့ၣ်ၡူးခရံာ် အပူၤန့ၣ်တက့ၢ်. ၃ အဂ့ၢ်ဒ်အံၤ, မ့ၢ်လၢတၢ်သ့ၣ်ညါဘၣ်ဃးဒီး ပှၤလၢအကိးန့ၢ်ပှၤလၢအလၤကပီၤ, ဒီးအတၢ်ဂ့ၤတၢ်ဝါဒၣ်ဝဲသတးဒီး, ယွၤအစိအကမီၤဟ့ၣ်လီၤလံပှၤလၢ ကယဲၢ်တၢ်ဘၣ်ဃးဒီးတၢ်မူဒီး တၢ်ယူးယီၣ်ယွၤ, ၄ ဒီးဟ့ၣ်လီၤလံစ့ၢ်ကီးပှၤလၢ တၢ်စံးပာ်အဒိၣ်အမုၢ် ဒီးအလုၢ်ဒိၣ်ပှ့ၤဒိၣ်, ဒ်သိးသုကပူၤဖျဲးဒီး တၢ်ဟးဂီၤလၢ အကဲထီၣ်ဝဲလၢ ဟီၣ်ခိၣ်ချၢလၢ ပသးကွံတၢ်အဃိ, ဒီးန့ၢ်ဃုာ်တၢ်အလုၢ်အလၢ် ဘၣ်ဃးဒီးယွၤန့ၣ်လီၤ. ၅ လၢတၢ်န့ၣ်အဃိစ့ၢ်ကီး, သုမၤတၢ်လၢကယဲၢ် တၢ်ဂုာ်မၤခဲလၢာ်သတးဒီး, လၢသုတၢ်နာ်အဖီခိၣ်, ပာ်ဖှိၣ်တၢ်ဂ့ၤတၢ်ဝါ, ဒီးလၢတၢ်ဂ့ၤတၢ်ဝါအဖီခိၣ်, တၢ်သ့ၣ်ညါ, ၆ ဒီးလၢတၢ်သ့ၣ်ညါအဖီခိၣ်, တၢ်ကီၤပသး, ဒီးလၢတၢ်ကီၤပသးအဖီခိၣ်, တၢ်ဝံသးစူၤ ဒီးလၢတၢ်ဝံသးစူၤအဖီခိၣ်, တၢ်ယူးယီၣ်ယွၤ, ၇ ဒီးလၢတၢ်ယူးယီၣ်ယွၤအဖီခိၣ်, တၢ်အဲၣ်ပုၢ်အဲၣ်ဝဲၢ်, ဒီးလၢတၢ်အဲၣ်ပုၢ်အဲၣ်ဝဲၢ်အဖီခိၣ်, တၢ်အဲၣ်တၢ်ကွံတက့ၢ်. ၈ အဂ့ၢ်ဒ်အံၤ, တၢ်တဖၣ်န့ၣ်မ့ၢ်အိၣ်လၢသုပူၤ, ဒီးမ့ၢ်အါထီၣ်ဝဲဒီး, ကဒုးကဲထီၣ်သုလၢ သုတမ့ၢ်ဘၣ်ပှၤအကၢၣ်အကျူ, ဒီးပှၤတသၣ်ထီၣ်ဘၣ်လၢ တၢ်သ့ၣ်ညါ ပကစၢ်ယ့ၣ်ၡူးခရံာ်အဂ့ၢ်န့ၣ်ဘၣ်လီၤ. ၉ အဂ့ၢ်ဒ်အံၤ, ပှၤလၢတၢ်န့ၣ်တဖၣ် တအိၣ်ဘၣ်န့ၣ်, မ့ၢ်ပှၤမဲာ်ဘျီၣ်, ဒီးတထံၣ်ဘၣ်တၢ်အယံၤဘၣ်, ဒီးသးပ့ၤနီၣ်လၢအဒိးကဆှီထီၣ် အသးလၢအတၢ်ဒဲးဘးလီၢ်လံၤန့ၣ်လီၤ. ၁၀ မၤသးဒ်န့ၣ်ဒီး, ဒီပုၢ်ဝဲၢ်သ့ၣ်ဧၢ, ကျဲးစၢးမၤဂၢၢ်မၤကျၢၤ တၢ်ကိးန့ၢ်သုဒီးတၢ်ဃုထၢသု, ဒိၣ်ဒၣ်တၢ်န့ၣ်တက့ၢ်. အဂ့ၢ်ဒ်အံၤ, သုမ့ၢ်မၤတၢ်တဖၣ်န့ၣ်ဒီး, သုတလီၤဃံၤလၢၤဘၣ် နီတခီၣ်ဘၣ်. ၁၁ အဂ့ၢ်ဒ်အံၤ, ဒ်န့ၣ်အသိး တၢ်ကပာ်ဖှိၣ်ဒီး သုထူးထူးတီၤတီၤလၢ တၢ်လဲၤနုာ်ဆူတၢ်အုၣ်က့ၤခီၣ်က့ၤ, ပကစၢ်ယ့ၣ်ၡူးခရံာ် အဘီအမုၢ်အထူအယိာ်အပူၤလီၤ. ၁၂ မ်ဒ်န့ၣ်ဒီး သုသ့ၣ်ညါတၢ်န့ၣ်တဖၣ်, ဒီးသုအိၣ်ဂၢၢ်ဆိးကျၢၤလၢ တၢ်မ့ၢ်တၢ်တီလၢအအိၣ်ဒီး သုနာ်သက့ဒီး, ယကဂုာ်ဒုးသ့ၣ်နီၣ်ထီၣ်သုလၢ အဂ့ၢ်အကျိၤ, တဘိယူၢ်ဃီလီၤ. ၁၃ ဒီးယဆိကမိၣ်လၢ ယအိၣ်ဒံးလၢဒဲအံၤအဖၢမုၢ်ဒီး, ယဂ့ၤထိၣ်ဂဲၤသုလၢ တၢ်သ့ၣ်နီၣ်ထီၣ်အဂီၢ်လီၤ. ၁၄ ယသ့ၣ်ညါလၢ ယဘၣ်ပာ်ကွံာ်ယဒဲအံၤချ့သဒံး, ဒ်ပကစၢ်ယ့ၣ်ၡူးခရံာ် ဒုးနဲၣ်ယၤအသိးန့ၣ်လီၤ. ၁၅ ဒီးယကကျဲးစၢးတၢ်ဒ်သိး ယက့ၤက့ၤအလီၢ်ခံန့ၣ်, သုကသ့ၣ်နီၣ်ထီၣ် တၢ်တဖၣ်အံၤတထံၣ်ဃီလီၤ.