ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါယူၤလံ ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၆–၇
“ယကမၤဖၤရိၤဒ်လဲၣ်ဒ်လဲၣ်န့ၣ် နကထံၣ်ဘၣ်”
(၂ မိၤၡ့ ၆:၁) ဒီးယွၤစံးဘၣ်စီၤမိၤၡ့, ခဲကနံၣ်အံၤ ယကမၤဖၤရိၤဒ်လဲၣ်ဒ်လဲၣ်န့ၣ် နကထံၣ်ဘၣ်လီၤ. အဂ့ၢ်ဒ်အံၤ, ကပျၢ်အီၤဒီးအစုဆူၣ်, ဒီးကဟီထီၣ်ကွံာ်အီၤ ဒီးအစုဆူၣ်လၢ အကီၢ်ပူၤလီၤ.
(၂ မိၤၡ့ ၆:၆, ၇) မၤသးဒ်န့ၣ်ဒီးစံးဘၣ် ပှၤအံၣ်စရ့လးဖိ, ယမ့ၢ်ယွၤလီၤ, ဒီးယကဒုးဟးထီၣ်ကွံာ်သုလၢ ပှၤအဲၤကူပတူးဖိအတၢ်ဝံတၢ်ယိးအဖီလာ်, ဒီးယကမၤထူၣ်ဖျဲးသုလၢ အကုၢ်အတၢ်မၤ, ဒီးယကပှ့ၤက့ၤသုလၢ ယစုယူာ်ထီၣ်အသး, ဒီးလၢတၢ်စံၣ်ညီၣ်ဖးဒိၣ်တဖၣ်, ၇ ဒီးယကပာ်သုလၢ ပှၤဂီၢ်မုၢ်လၢယဂီၢ်, ဒီးယကကဲထီၣ်ကစၢ်လၢသုဂီၢ်, ဒီးသုကသ့ၣ်ညါလၢ ယမ့ၢ်ယွၤသုကစၢ် လၢအဒုးဟးထီၣ်ကွံာ်သုလၢ ပှၤအဲၤကူပတူးဖိ အတၢ်ဝံတၢ်ယိးအဖီလာ်လီၤ.
it-2 ၄၃၆ ¶၃
စီၤမိၤၡ့
လၢပှၤအံၣ်စရ့လးဖိတဖၣ်အဂီၢ် မ့ၢ်တၢ်ဆီတလဲတခါစ့ၢ်ကီးလီၤ. လၢအခီၣ်ထံးန့ၣ် အဝဲသ့ၣ်တူၢ်လိာ်စီၤမိၤၡ့ သနာ်က့ ခီဖျိလၢစီၤပၤဖၤရိၤဟ့ၣ်လီၤတၢ်ကလုၢ် ဒီးအဝဲသ့ၣ်တဖၣ် ဘၣ်မၤတၢ်နးနးကလဲာ်အဃိ ပၣ်ဒ့ၣ်ပၣ်ကမၣ်ဝဲ စီၤမိၤၡ့လီၤ. အဃိ စီၤမိၤၡ့စ့ၢ်ကီး ဘၣ်ဃ့ကညးဝဲ ယဟိဝၤယွၤလၢ တၢ်သူၣ်ဟးဂီၤသးဟးဂီၤအပူၤလီၤ. (၂ မိၤ. ၄:၂၉-၃၁; ၅:၁၉-၂၃) ဖဲန့ၣ်အဆၢကတီၢ် ကစၢ်ယွၤလၢအဒိၣ်အထီကတၢၢ်တဂၤ ဟ့ၣ်ဂံၢ်ဟ့ၣ်ဘါအီၤ ခီဖျိလၢ အဝဲကမၤလၢပှဲၤထီၣ်ဝဲ တၢ်လၢစီၤအၤဘြၤဟၣ်, စီၤအံၤစဲး ဒီးစီၤယၤကိာ် ခိးကွၢ်လၢ်ဝဲတဖၣ်လီၤ. ပမ့ၢ်တဲလၢကျဲအဂၤတမံၤန့ၣ် ယဟိဝၤယွၤ ကပာ်ဖျါထီၣ်အမံၤအခီပညီ ကအုၣ်က့ၤခီၣ်က့ၤ ပှၤအံၣ်စရ့လးဖိ ဒီးကမၤကဲထီၣ်ဝဲ ပှၤကလုာ်ဖးဒိၣ်တကလုာ်လၢ ကီၢ်တၢ်စံးပာ်အပူၤလီၤ. (၂ မိၤ. ၆:၁-၈) ပှၤအံၣ်စရ့လးဖိတဖၣ် တဒိကနၣ် စီၤမိၤၡ့အကလုၢ်ဒံးဘၣ်. ဘၣ်ဆၣ် ဖဲတၢ်နးတၢ်ဖှီၣ်ခွံခါတခါဝံၤအလီၢ်ခံ အဝဲသ့ၣ်အိၣ်လၢ စီၤမိၤၡ့အအိၣ်တကပၤလီၤ. ဒီးတၢ်နးတၢ်ဖှီၣ်အခါတဆံဝံၤအလီၢ်ခံ စီၤမိၤၡ့ တီခိၣ်ရိၤမဲဒီး “ကတဲာ်ကတီၤ” ထီၣ်ဝဲပှၤအံၣ်စရ့လးဖိတဖၣ် ဒ်သုးဖိတဖုအသိး ဒီးဟးထီၣ်ဝဲဒၣ်လီၤ.—၂ မိၤ. ၁၃:၁၈.
(၂ မိၤၡ့ ၇:၄, ၅) ဒီးဖၤရိၤ တကနၣ်ဘၣ် သုကလုၢ်ဘၣ်, ဒီးယကပာ်လီၤယစုလၢအဲၤကူပတူးအလိၤ, ဒီးယကဒုးဟးထီၣ်ကွံာ်ယသုးမုၢ်တဖၣ်, ယပှၤဂီၢ်မုၢ်, ပှၤအံၣ်စရ့လးဖိ, လၢတၢ်စံၣ်ညီၣ်ဖးဒိၣ်တဖၣ်လၢ အဲၤကူပတူးအကီၢ်ပူၤလီၤ. ၅ ဒီးတုၤယယူာ်ထီၣ်ယစုလၢ အဲၤကူပတူးအဖီခိၣ်, ဒီးဒုးဟးထီၣ်ကွံာ် ပှၤအံၣ်စရ့လးဖိလၢအကျါဒီး, ပှၤအဲၤကူပတူးဖိကသ့ၣ်ညါလၢ ယမ့ၢ်ယွၤလီၤ.
it-2 ၄၃၆ ¶၁-၂
စီၤမိၤၡ့
လၢစီၤပၤဖၤရိၤအမဲာ်ညါ. စီၤမိၤၡ့ ဒီးစီၤအၤဟရိၣ်န့ၣ် မ့ၢ်ပှၤအရ့ဒိၣ်လၢ ‘ယွၤတဖၣ်ပြၢလိာ်အသးအခါ’ လီၤ. စီၤပၤဖၤရိၤန့ၣ် ကိးဖှိၣ်ဝဲပှၤအဲၤကူပတူးဖိအယွၤတဖၣ် အတၢ်စိတၢ်ကမီၤ ဒ်သိးပှၤမၤကဒါမဲာ်အခိၣ် စီၤယၣ်နံၤ ဒီးစီၤယၣ်ဘြံၤ (၂ တံၤ. ၃:၈) ကဒိးန့ၢ်တၢ်စိတၢ်ကမီၤ ဒီးကထီဒါဝဲ ယဟိဝၤယွၤ အတၢ်စိတၢ်ကမီၤအဂီၢ်လီၤ. ခီဖျိလၢစီၤမိၤၡ့အတၢ်ဟံးစုနဲၣ်ကျဲအဃိ စီၤအၤဟရိၣ် မၤတၢ်လီၤလးအဆိကတၢၢ်တခါလၢ စီၤပၤဖၤရိၤအမဲာ်ညါအခါ မ့ၢ်တၢ်အုၣ်သးလၢ ယဟိဝၤယွၤ အစိအကမီၤဒိၣ်န့ၢ်ဒံး အဲၤကူပတူးအယွၤတဖၣ်လီၤ. မ့မ့ၢ် စီၤပၤဖၤရိၤန့ၣ် အခိၣ်ကိၤဒံးအဖၢလီၤ. (၂ မိၤ. ၇:၈-၁၃) လၢခံဖဲတၢ်နးတၢ်ဖှီၣ်သၢခါတခါ ကဲထီၣ်အခါ ပှၤမၤကဒါမဲာ်တဖၣ် တဲဝဲလၢ “တၢ်အံၤတမံၤမ့ၢ်ယွၤအစုမုၢ်လီၤ.” ဖဲတၢ်နးတၢ်ဖှီၣ်အံၤအဆၢကတီၢ် ပှၤမၤကဒါမဲာ်တဖၣ်စ့ၢ်ကီး ခီဖျိလၢတၢ်ဝ့ဘၣ်အီၤအဃိ ဒ်သိးအဝဲသ့ၣ်ကထီဒါ စီၤမိၤၡ့အဂီၢ် ဟဲဝဲလၢစီၤပၤဖၤရိၤအမဲာ်ညါတကဲဘၣ်.—၂ မိၤ. ၈:၁၆-၁၉; ၉:၁၀-၁၂.
တၢ်နးတၢ်ဖှီၣ်တဖၣ်န့ၣ် မၤကပုာ်လီၤပှၤသး ဒီးမၤကိၤထီၣ်ပှၤခိၣ်. စီၤမိၤၡ့ဒီးစီၤအၤဟရိၣ်န့ၣ် ကဲထီၣ်ပှၤလၢ အဘိးဘၣ်သ့ၣ်ညါ တၢ်နးတၢ်ဖှီၣ်အခါတဆံအဂ့ၢ်လီၤ. တၢ်နးတၢ်ဖှီၣ်တဖၣ် ဟဲကဲထီၣ်အသးဒ်အဝဲသ့ၣ်ဘိးဘၣ်သ့ၣ်ညါဝဲအသိးအဃိ မ့ၢ်တၢ်အုၣ်သးလၢ စီၤမိၤၡ့ ဒီးစီၤအၤဟရိၣ်န့ၣ် မၤတၢ်ဒ်ယဟိဝၤယွၤအခၢၣ်စးအသိးလီၤ. ပှၤလၢအိၣ်လၢကီၢ်အဲၤကူပတူးအပူၤတဖၣ် သ့ၣ်ညါထီၣ်ဘၣ်ဝဲ ယဟိဝၤယွၤအမံၤ ဒီးအဝဲသ့ၣ်တဲသကိးဝဲ မံၤအံၤအဂ့ၢ်လီၤ. တၢ်အံၤမၤလီၤကပုာ်ဝဲ ပှၤအံၣ်စရ့လးဖိ ဒီးပှၤအဲၤကူပတူးဖိတနီၤအသး ဒီးမ့မ့ၢ် စီၤပၤဖၤရိၤ ဒီးအပှၤကူၣ်ဘၣ်ကူၣ်သ့တဖၣ် ဒီးပှၤအဂၤလၢအဆီၣ်ထွဲမၤစၢၤအီၤတဖၣ်န့ၣ် အခိၣ်ကိၤထီၣ်ဝဲလီၤ. (၂ မိၤ. ၉:၁၆; ၁၁:၁၀; ၁၂:၂၉-၃၉) ပှၤအဲၤကူပတူးဖိတဖၣ် သ့ၣ်ညါဝဲလၢ တမ့ၢ်လၢအဝဲသ့ၣ်မၤသးဒိၣ်ထီၣ်ဘၣ် အကစၢ်ယွၤဘၣ် မ့ၢ်ဒၣ်ယဟိဝၤယွၤ စံၣ်ညီၣ်အဝဲသ့ၣ်အယွၤတဖၣ်လီၤ. တၢ်နးတၢ်ဖှီၣ်ခွံခါတခါဝံၤအလီၢ်ခံ စီၤမိၤၡ့ န့ၢ်ဘၣ် “တၢ်ဘျုးတၢ်ဖှိၣ် လၢပှၤအဲၤကူပတူးဖိအမဲာ်ညါလီၤ. လၢန့ၣ်အမဲာ်ညါ စီၤမိၤၡ့တဂၤန့ၣ်, မ့ၢ်ပှၤဒိၣ်မးလၢကီၢ်အဲၤကူပတူးအပူၤ, လၢဖၤရိၤအခ့အပှၤအမဲာ်ညါ, ဒီးလၢပှၤဂီၢ်မုၢ်အမဲာ်ညါလီၤ.”—၂ မိၤ. ၁၁:၃.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၆:၃) ဒီးယလီၣ်ဖျါထီၣ်ယသးလၢ စီၤအၤဘြၤဟၣ်, ဒီးစီၤအံၤစဲး, ဒီးစီၤယၤကိာ်လၢယမံၤယွၤသ့တၢ်လၢာ်လီၤ. မ့မ့ၢ်လၢယမံၤယဟိဝၤန့ၣ် တၢ်တဒုးသ့ၣ်ညါဘၣ်အီၤလၢယၤဘၣ်.
it-1 ၇၈ ¶၃-၄
ယွၤသ့တၢ်လၢာ်
ဖဲယဟိဝၤယွၤ အၢၣ်လီၤဝဲ စီၤအၤဘြၤဟၣ်လၢ အဝဲဒိးန့ၢ်ဘၣ်အဖိခွါစီၤအံၤစဲးအခါ သူဝဲ အမံၤလၤသၣ်ကပီၤလၢ “ယွၤလၢအသ့တၢ်လၢာ်” (ʼEl Shad·daiʹ)လီၤ. စီၤအၤဘြၤဟၣ် ကဘၣ်အိၣ်ဒီးတၢ်နာ်အဂၢၢ်အကျၢၤလၢ ကစၢ်ယွၤလၢအိၣ်ဒီးအစိအကမီၤအံၤ ကမၤလၢပှဲၤထီၣ်အတၢ်အၢၣ်လီၤအီလီၤန့ၣ်လီၤ. ဖဲကစၢ်ယွၤ မၤဝဲတၢ်အၢၣ်လီၤအီလီၤဒီး စီၤအၤဘြၤဟၣ် လၢဘၣ်ဃးဒီး အဝဲကဆိၣ်ဂ့ၤဝဲ စီၤအံၤစဲး ဒီးစီၤယၤကိာ်အခါ အဝဲသူဝဲ အမံၤလၤသၣ်ကပီၤအံၤလီၤ.—၁ မိၤ. ၁၇:၁; ၂၈:၃; ၃၅:၁၁; ၄၈:၃.
ဒ်န့ၣ်အသိးလီၤ လၢခံယဟိဝၤယွၤ တဲဝဲစီၤမိၤၡ့လၢ “ယလီၣ်ဖျါထီၣ်ယသးလၢ စီၤအၤဘြၤဟၣ်, ဒီးစီၤအံၤစဲး, ဒီးစီၤယၤကိာ်လၢယမံၤယွၤသ့တၢ်လၢာ် [beʼElʹ Shad·daiʹ]လီၤ. မ့မ့ၢ်လၢယမံၤယဟိဝၤန့ၣ် တၢ်တဒုးသ့ၣ်ညါဘၣ်အီၤလၢယၤဘၣ်.” (၂ မိၤ. ၆:၃) တဲဝဲဒ်အံၤအဃိ အခီပညီတမ့ၢ်လၢ ပှၤအံၣ်စရ့လးဖိ အဖုဖးဒိၣ်လၢပျၢၤတဖၣ် တသ့ၣ်ညါဝဲ ယဟိဝၤယွၤအမံၤဘၣ်. ပှၤလၢ အအိၣ်မူလၢ အဝဲသ့ၣ်အမဲာ်ညါ သူဝဲမံၤအံၤ ဒီးအဝဲသ့ၣ် သူမံၤအံၤ ခဲအံၤခဲအံၤလီၤ. (၁ မိၤ. ၄:၁, ၂၆; ၁၄:၂၂; ၂၇:၂၇; ၂၈:၁၆) နီၢ်နီၢ်န့ၣ် လံာ် ၁ မိၤၡ့အပူၤ တၢ်ကတိၤလၢအမ့ၢ် “ယွၤသ့တၢ်လၢာ်” န့ၣ် အိၣ်ဝဲ ၆ ဘျီဒီး ဘၣ်ထွဲလိာ်အသးဒီး ပှၤအံၣ်စရ့လးဖိအဖုဖးဒိၣ်လၢပျၢၤတဖၣ် အတၢ်အိၣ်မူလီၤ. လံာ်စီဆှံတၢ်ကွဲးအသးအခီၣ်ထံးလၢ ဧ့ၤဘြံၤကျိာ်န့ၣ် ယဟိဝၤယွၤ အမံၤဘၣ်တၢ်ကွဲးလီၤအီၤအိၣ်ဝဲ ၁၇၂ ဘျီလီၤ. ပှၤအံၣ်စရ့လးဖိအဖုဖးဒိၣ်လၢပျၢၤတဖၣ် သ့ၣ်ညါဝဲလၢ ကစၢ်ယွၤန့ၣ် ကြၢးဒိးန့ၢ်ဘၣ်ဝဲ မံၤလၤသၣ်ကပီၤလၢအမ့ၢ် “ယွၤသ့တၢ်လၢာ်” ဒီးအဝဲအိၣ်ဒီးတၢ်ဂ့ၤတၢ်ဝါလၢ အလီၤပလိာ်ဒီးမံၤလၤသၣ်ကပီၤအံၤ သနာ်က့ အဝဲသ့ၣ်တဖၣ် တအိၣ်ဒီးတၢ်ခွဲးတၢ်ယာ်လၢ ကသ့ၣ်ညါဘၣ်ဝဲ မံၤလၢအမ့ၢ် ယဟိဝၤအခီပညီ ဒီးတၢ်ဂ့ၢ်လၢဘၣ်ဃးဒီးမံၤအံၤအခီပညီလၢလၢပှဲၤပှဲၤဘၣ်. ဘၣ်ဃးဒီးတၢ်ဂ့ၢ်အံၤန့ၣ် လံာ်တဘ့ၣ် The Illustrated Bible Dictionary (Vol. 1, p. 572) ပာ်ဖျါထီၣ်ဝဲလၢ “တၢ်တဲဆိပာ်လၢ ဘၣ်ဃးဒီးခါဆူညါလၢ ဘၣ်တၢ်ပာ်ဖျါထီၣ်န့ၢ် ပှၤအံၣ်စရ့လးဖိအဖုဖးဒိၣ်လၢပျၢၤတဖၣ်န့ၣ် အဝဲသ့ၣ်တဖၣ်ကြၢးနာ်ဝဲလီၤ. မ့ၢ်လၢ ယၤဝ့ န့ၣ်မ့ၢ်ယွၤ(ʼel) လၢ အိၣ်ဒီးတၢ်သ့တၢ်ဘၣ် (ဘၣ်သ့ၣ်သ့ၣ်ကမ့ၢ် sadday အခီပညီ) လၢကမၤလၢပှဲၤထီၣ် တၢ်စံးပာ်တဖၣ်အံၤလီၤ. တၢ်လီၣ်ဖျါထီၣ် မ့ၣ်အူအီၣ်တၢ်လၢ သ့ၣ်တၤဆှုၣ်န့ၣ် မ့ၢ်တၢ်ဂ့ၢ်လၢအရ့ဒိၣ်ဒီး လီၤတံၢ်လီၤဆဲးလီၤ. မ့ၢ်လၢ ကစၢ်ယွၤအတၢ်စိတၢ်ကမီၤ, ကစၢ်ယွၤအိၣ်ဒီးအဝဲသ့ၣ် ခဲအံၤဒီးပၢၤလၢခါဆူညါန့ၣ် ဘၣ်ထွဲလိာ်အသးဒီး မံၤလၢအမ့ၢ် ယၤဝ့ လၢအဝဲသ့ၣ်သ့ၣ်ညါပာ်စၢၤဝဲအံၤန့ၣ်လီၤ.—Edited by J. D. Douglas, 1980.
(၂ မိၤၡ့ ၇:၁) ဒီးယွၤစံးဘၣ်စီၤမိၤၡ့, ကွၢ်, ယပာ်နၤလၢယွၤအလီၢ်လၢဖၤရိၤအဂီၢ်, ဒီးနဒီပုၢ်ဝဲၢ်စီၤအၤဟရိၣ်ကကဲထီၣ်နဝံတဂၤလီၤ.
it-2 ၄၃၅ ¶၅
စီၤမိၤၡ့
စီၤမိၤၡ့န့ၣ် တနာ်န့ၢ်လီၤအသးသ့အဃိ တတုၤထီၣ်ထီၣ်ဘးဘၣ်. စီၤမိၤၡ့န့ၣ် တနာ်န့ၢ်လီၤအသးအဃိ တဲဝဲလၢ အတဲတၢ်တသ့ဘၣ်. ဖဲအံၤန့ၣ်အဝဲဆီတလဲလံ. ပူၤကွံာ်အနံၣ် ၄၀ အခါအဝဲဆိကမိၣ်ဝဲလၢ မၤပူၤဖျဲးဝဲ ပှၤအံၣ်စရ့လးဖိတဖၣ်ကန့ၢ်န့ၣ်လီၤ. အဝဲတဲဖျါထီၣ်ဝဲ တၢ်ဂ့ၢ်တၢ်ကျိၤလၢ ယဟိဝၤယွၤအအိၣ် ဒီးတဲဝဲလၢ အသုတဟ့ၣ်အီၤမူဒါအံၤတဂ့ၤလီၤ. ကစၢ်ယွၤအသးထီၣ်အီၤလၢ တၢ်ဂ့ၢ်အံၤအဃိ သနာ်က့ အဝဲတဂ့ၢ်လိာ်ကွံာ်စီၤမိၤၡ့ဘၣ် လၢတၢ်န့ၣ်အလီၢ် အဝဲကတဲာ်ကတီၤဝဲ စီၤအၤဟရိၣ်လၢ ကကတိၤတၢ်လၢ စီၤမိၤၡ့အလီၢ်လီၤ. စီၤမိၤၡ့ မၤတၢ်ဒ် ယဟိဝၤယွၤအခၢၣ်စးလီၤ. အဃိ ဒ်အမ့ၢ်ယွၤအခၢၣ်စးတဂၤအသိး အဝဲကဲထီၣ်ဘၣ်ဝဲ စီၤအၤဟရိၣ် အ “ယွၤ” လီၤ. ဖဲအဝဲသ့ၣ်လဲၤထံၣ်လိာ်အသးဒီး အံၣ်စရ့လးဖိသူၣ်က့သးပှၢ်တဖၣ် ဒီးတဲတၢ်ဒီးစီၤပၤဖၤရိၤအခါ ဖျါလၢစီၤအၤဟရိၣ်တဲဘၣ်အဝဲသ့ၣ် ကစၢ်ယွၤအတၢ်ဟံးစုနဲၣ်ကျဲ ဒီးတၢ်မၤလိာ်တဖၣ်လၢ စီၤမိၤၡ့တဲဘၣ်အီၤတဖၣ်န့ၣ်လီၤ. လၢတၢ်န့ၣ်အဃိ ဖဲစီၤအၤဟရိၣ်တဲတၢ်လၢ စီၤပၤဖၤရိၤ (ပှၤလၢအထီၣ်စီၤပၤဖၤရိၤလၢ ပူၤကွံာ်အနံၣ်လွံၢ်ဆံအခါ စီၤမိၤၡ့ ဃ့ၢ်ပူၤဖျဲးအသးလၢအမဲာ်ညါတဂၤအလီၢ်) အမဲာ်ညါအခါ အဝဲတဲဝဲလီၤတံၢ်လီၤဆဲးသ့လီၤ. (၂ မိၤ. ၂:၂၃; ၄:၁၀-၁၇) လၢခံယဟိဝၤယွၤတဲဝဲလၢ စီၤအၤဟရိၣ် ကကဲထီၣ် “ဝံ” လၢ စီၤမိၤၡ့အဂီၢ်လီၤ. အဲၣ်ဒိးစံးဝဲ ဒ်စီၤမိၤၡ့ ကဲဝဲကစၢ်ယွၤအဝံ ဒီးတူၢ်လိာ်ဝဲ ကစၢ်ယွၤအတၢ်ဟံးစုနဲၣ်ကျဲအသိး စီၤအၤဟရိၣ်စ့ၢ်ကီး ကြၢးတူၢ်လိာ်ဝဲ စီၤမိၤၡ့ အတၢ်ဟံးစုနဲၣ်ကျဲလီၤ. ဒီးတဲစ့ၢ်ကီးဝဲလၢ ကပာ်စီၤမိၤၡ့လၢ “ယွၤအလီၢ်လၢမၤရိၤအဂီၢ်” လီၤ. အဲၣ်ဒိးတဲဝဲ မ့ၢ်လၢယဟိဝၤယွၤဟ့ၣ်စီၤမိၤၡ့ တၢ်စိတၢ်ကမီၤ ဒီးတၢ်န့ၢ်စိန့ၢ်ကမီၤအဃိ စီၤမိၤၡ့န့ၣ် အတၢ်စိတၢ်ကမီၤအါန့ၢ် စီၤပၤဖၤရိၤ ဒီးတလိၣ်ပျံၤဝဲ အဲၤကူပတူးအစီၤပၤန့ၣ်ဘၣ်.—၂ မိၤ. ၇:၁, ၂.
တၢ်ဖးလံာ်စီဆှံ
(၂ မိၤၡ့ ၆:၁-၁၅) ဒီးယွၤစံးဘၣ်စီၤမိၤၡ့, ခဲကနံၣ်အံၤ ယကမၤဖၤရိၤဒ်လဲၣ်ဒ်လဲၣ်န့ၣ် နကထံၣ်ဘၣ်လီၤ. အဂ့ၢ်ဒ်အံၤ, ကပျၢ်အီၤဒီးအစုဆူၣ်, ဒီးကဟီထီၣ်ကွံာ်အီၤ ဒီးအစုဆူၣ်လၢ အကီၢ်ပူၤလီၤ. ၂ ဒီးယွၤကတိၤတၢ်ဒီးစီၤမိၤၡ့ဒီးစံးဘၣ်အီၤ, ယဲဒၣ်အံၤ ယမ့ၢ်ယဟိဝၤလီၤ. ၃ ဒီးယလီၣ်ဖျါထီၣ်ယသးလၢ စီၤအၤဘြၤဟၣ်, ဒီးစီၤအံၤစဲး, ဒီးစီၤယၤကိာ်လၢယမံၤယွၤသ့တၢ်လၢာ်လီၤ. မ့မ့ၢ်လၢယမံၤယဟိဝၤန့ၣ် တၢ်တဒုးသ့ၣ်ညါဘၣ်အီၤလၢယၤဘၣ်. ၄ ဒီးယပာ်ဂၢၢ်ပာ်ကျၢၤစ့ၢ်ကီးလံ ယတၢ်အၢၣ်လီၤအီလီၤဒီးအီၤလၢ ယကဟ့ၣ်လီၤအီၤလၢ ကီၢ်ကနၤဧၣ်, အအိၣ်တမှံၤအကီၢ်, ဖဲအအိၣ်တမှံၤလၢအပူၤလီၤ. ၅ ဒီးယနၢ်ဟူစ့ၢ်ကီး ပှၤအံၣ်စရ့လးဖိအတၢ်ကအုကစွါလၢ ပှၤအဲၤကူပတူးဖိမၢအကဲကုၢ်, ဒီးယသ့ၣ်နီၣ်ထီၣ်က့ၤလံ ယတၢ်အၢၣ်လီၤအီလီၤလံ. ၆ မၤသးဒ်န့ၣ်ဒီးစံးဘၣ် ပှၤအံၣ်စရ့လးဖိ, ယမ့ၢ်ယွၤလီၤ, ဒီးယကဒုးဟးထီၣ်ကွံာ်သုလၢ ပှၤအဲၤကူပတူးဖိအတၢ်ဝံတၢ်ယိးအဖီလာ်, ဒီးယကမၤထူၣ်ဖျဲးသုလၢ အကုၢ်အတၢ်မၤ, ဒီးယကပှ့ၤက့ၤသုလၢ ယစုယူာ်ထီၣ်အသး, ဒီးလၢတၢ်စံၣ်ညီၣ်ဖးဒိၣ်တဖၣ်, ၇ ဒီးယကပာ်သုလၢ ပှၤဂီၢ်မုၢ်လၢယဂီၢ်, ဒီးယကကဲထီၣ်ကစၢ်လၢသုဂီၢ်, ဒီးသုကသ့ၣ်ညါလၢ ယမ့ၢ်ယွၤသုကစၢ် လၢအဒုးဟးထီၣ်ကွံာ်သုလၢ ပှၤအဲၤကူပတူးဖိ အတၢ်ဝံတၢ်ယိးအဖီလာ်လီၤ. ၈ ဒီးယကဒုးဟဲသုဆူ ကီၢ်လၢယယူာ်ထီၣ်ယစုဒ်သိးယကဟ့ၣ်အီၤလၢ စီၤအၤဘြၤဟၣ်, စီၤအံၤစဲး, ဒီးစီၤယၤကိာ်, ဒီးယကဟ့ၣ်လီၤအီၤလၢ သုတၢ်န့ၢ်သါလီၤ. တၢ်လၢယၤအံၤယမ့ၢ်ယွၤလီၤ. ၉ ဒီးစီၤမိၤၡ့ကတိၤတၢ်ဒီး ပှၤအံၣ်စရ့လးဖိဒ်န့ၣ်, ဒီးအဝဲသ့ၣ်တဖၣ်န့ၢ် တကနၣ်ဘၣ်စီၤမိၤၡ့အကလုၢ်လၢ အသူၣ်ကိၢ်အသးဂီၤအဃိ, ဒီးလၢကုၢ်အတၢ်မၤအဃိလီၤ. ၁၀ ဒီးယွၤကတိၤတၢ်ဒီးစီၤမိၤၡ့, ဒီးစံးဝဲဒၣ်, ၁၁ လဲၤနုာ်, စံးဘၣ်အဲၤကူပတူးအစီၤပၤဖၤရိၤလၢ အဘၣ်ပျၢ်ကွံာ်ပှၤအံၣ်စရ့လးဖိလၢအကီၢ်ပူၤလီၤ. ၁၂ ဒီးစီၤမိၤၡ့ကတိၤတၢ်လၢယွၤအမဲာ်ညါ, ဒီးစံးဝဲဒၣ်, ကွၢ်ကွၢ်, ပှၤအံၣ်စရ့လးဖိတကနၣ်ဘၣ် ယကလုၢ်ဘၣ်, ဒီးဖၤရိၤကကနၣ်ယကလုၢ်ဒ်လဲၣ်. ဒီးယဲဒၣ်အံၤယပျုၤတဘၣ်တၢ်ကူးတရံးဘၣ်. ၁၃ ဒီးယွၤကတိၤတၢ် ဒီးစီၤမိၤၡ့ဒီးစီၤအၤဟရိၣ်, ဒီးမၤလိာ်အီၤ, လၢပှၤအံၣ်စရ့လးဖိအဂီၢ်, ဒီးလၢအဲၤကူပတူးအစီၤပၤဖၤရိၤအဂီၢ်, ဒ်သိးအကဒုးဟးထီၣ်ကွံာ် ပှၤအံၣ်စရ့လးဖိလၢ အဲၤကူပတူးအပူၤန့ၣ်လီၤ. ၁၄ အအံၤမ့ၢ်အဝဲသ့ၣ် အပၢ်အပှၤဟံၣ်ဖိအခိၣ်တဖၣ်, စီၤအံၣ်စရ့လးအဖိဝဲၢ်ကိစီၤရူၤဘ့ၣ်အဖိခွါတဖၣ်, စီၤဃနိာ်, စီၤပးလူ, ဒီးစီၤဃ့စရိၣ်, ဒီးစီၤကၢ်မံၤလီၤ. အဝဲသ့ၣ်တဖၣ်န့ၣ် မ့ၢ်စီၤရူၤဘ့ၣ်အဒူၣ်တဖၣ်လီၤ. ၁၅ ဒီးစီၤစူၤမ့းအိၣ်အဖိခွါတဖၣ်, စီၤယမူးအ့လး, ဒီးစီၤယးမံၣ်, ဒီးစီၤအိၣ်ဟး, ဒီးစီၤယၤကံၣ်, ဒီးစီၤစိဃၢ်, ဒီးပှၤကနၤဧၣ်မုၣ်အဖိခွါစီၤၡီအူးလီၤ. အဝဲသ့ၣ်တဖၣ်န့ၣ်မ့ၢ် စီၤစူၤမ့းအိၣ်အဒူၣ်တဖၣ်လီၤ.
တၢး၁၅ ၁/၁၅ ၉ ¶၆-၇
စံးဘျုးယဟိဝၤယွၤ ကိးနံၤဒဲးတက့ၢ်
စီၤပီလူးမၤအါထီၣ် အတၢ်စံးဘျုးစံးဖှိၣ်န့ၣ် ပကွၢ်လိမၤဒိးအီၤ ကသ့ဒ်လဲၣ်. ဒ်စီၤပီလူးအသိး ပက့ၤဆိကမိၣ်က့ၤ တၢ်လၢယဟိဝၤယွၤ မၤတ့ၢ်န့ၢ်ပှၤတဖၣ်သ့လီၤ. (စံး. ၁၁၆:၁၂) ပှၤတဂၤဂၤ မ့ၢ်သံကွၢ်နၤလၢ ‘နအဲၣ်ဒိးစံးဘျုးစံးဖှိၣ် ယဟိဝၤယွၤလၢ အတၢ်ဆိၣ်ဂ့ၤမနုၤအဂီၢ်လဲၣ်’ အခါ နကစံးဆၢက့ၤအီၤဒ်လဲၣ်. နကစံးဆၢက့ၤအီၤလၢ နတၢ်ရ့လိာ်သးဒီး ယဟိဝၤယွၤ ဂ့ၤဝဲအဃိဧါ. မ့တမ့ၢ် ခီဖျိလၢ ယ့ၣ်ၡူးအတၢ်ပှ့ၤက့ၤအဃိ ပတၢ်ဒဲးဘးဘၣ်တၢ်ပျၢ်ကွံာ်အီၤအဃိဧါ. ဖဲနထံၣ်ဘၣ်တၢ်ကီတၢ်ခဲအခါ ဒီပုၢ်ဝဲၢ်မုၣ်ခွါတဖၣ်အတၢ်မၤစၢၤအဃိဧါ. နကတဲတၢ်ဘျုး ခီဖျိလၢ နသးသမူတံၤသကိး မ့တမ့ၢ် နဖိတဖၣ်အဃိဧါ. ဟံးန့ၢ်တၢ်ဆၢကတီၢ်လၢ နကဆိကမိၣ်ထံ ယဟိဝၤယွၤ ဆိၣ်ဂ့ၤတ့ၢ်နၤလၢ ကျဲအါမံၤန့ၣ်တက့ၢ်. နမ့ၢ်မၤဒ်အံၤန့ၣ် ကထိၣ်ဟူးထိၣ်ဂဲၤထီၣ်နၤလၢ နကအဲၣ်ဒိးစံးဘျုးယဟိဝၤယွၤ ကိးနံၤဒဲးလီၤ.—စံးထီၣ်ပတြၢၤ ၉၂:၁, ၂, ဖးတက့ၢ်.
ဖဲပဆိကမိၣ်ထီၣ်က့ၤ တၢ်ဆိၣ်ဂ့ၤလၢပဒိးန့ၢ်ဘၣ်အီၤတဖၣ်အခါ ပကအဲၣ်ဒိးဃ့ဘါထုကဖၣ် လၢယဟိဝၤယွၤအအိၣ် ဒီးစံးဘျုးအီၤန့ၣ်လီၤ. (စံး. ၉၅:၂; ၁၀၀:၄, ၅) ပှၤတနီၤန့ၣ် ဃ့ဘါထုကဖၣ်လၢ ကစၢ်ယွၤအအိၣ် ဖဲအဲၣ်ဒိးသးလီတၢ်အခါလီၤ. ဘၣ်ဆၣ် ပဝဲသ့ၣ်တဖၣ် ပသ့ၣ်ညါလၢ ဖဲပဃ့ဘါထုကဖၣ်အခါ ပမ့ၢ်စံးဘျုးစံးဖှိၣ် ကစၢ်ယွၤလၢ တၢ်လၢအဝဲမၤန့ၢ်ပှၤတဖၣ်န့ၣ် အဝဲသးခုဝဲလီၤ. လၢလံာ်စီဆှံအပူၤန့ၣ် ပှၤလၢအဃ့ဘါထုကဖၣ် အိၣ်ဒီးတၢ်စံးဘျုးစံးဖှိၣ် ဒ်သိးဒီး နီၢ်ဃးနၤ ဒီးစီၤဃံးစကံယၤ န့ၣ်အိၣ်အါမးလီၤ. (၁ မူၤ. ၂:၁-၁၀; ၡါ. ၃၈:၉-၂၀) အဃိ မ်ပကွၢ်လိမၤဒိး ပှၤလၢအိၣ်ဒီးတၢ်သးတီတဖၣ် အဒိအတဲာ်ဒီး စံးဘျုး ယဟိဝၤယွၤလၢ တၢ်လၢပဒိးန့ၢ်ဘၣ်အီၤတဖၣ်အဂီၢ်တက့ၢ်. (၁ သ့း. ၅:၁၇-၁၈) နမ့ၢ်မၤဒ်န့ၣ်န့ၣ် နကဒိးန့ၢ်ဘၣ်တၢ်ဆိၣ်ဂ့ၤအါမးလီၤ. နတၢ်အဲၣ်ယဟိဝၤယွၤ ကအါထီၣ် ဒီးနတၢ်ရ့လိာ်သးဒီးအီၤ ကဂၢၢ်ကျၢၤဝဲလီၤ.—ယၤ. ၄:၈.
လါယူၤလံ ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၈–၉
“လၢတၢ်တပာ်သူၣ်ပာ်သးအပူၤ ဖၤရိၤလၢအပာ်ထီၣ်ထီအသးန့ၣ် မၤလၢပှဲၤထီၣ်ယွၤအတၢ်တိာ်ပာ်”
(၂ မိၤၡ့ ၈:၁၅) ဒီးဖၤရိၤထံၣ်တၢ်သါထီၣ်ဘၣ်က့ၤတထံၣ်ဒီး, မၤကိၤအသး, ဒီးတကနၣ်ဘၣ်အဝဲသ့ၣ်အကလုၢ်ဘၣ်, ဒ်ယွၤစံးဝဲအသိးန့ၣ်လီၤ.
it-2 ၁၀၄၀-၁၀၄၁
ပှၤခိၣ်ကိၤ
ယဟိဝၤယွၤ ရ့ဒီးပှၤဟီၣ်ခိၣ်ဖိတဖၣ်အခါ အဝဲပာ်ဖျါ တၢ်သူၣ်စူၤသးစူၤလၢ ပှၤတဂၤစုာ်စုာ် ဒီးထံကီၢ်တဘ့ၣ်စုာ်စုာ်လီၤ. အဝဲသ့ၣ် ကြၢးဘၣ်တၢ်မၤသံအီၤဘၣ်ဆၣ် ယွၤပျဲလၢအကအိၣ်မူဒံးလီၤ. (၁ မိၤ. ၁၅:၁၆; ၂ ပ့း. ၃:၉) ခီဖျိလၢကစၢ်ယွၤအတၢ်သးစူၤအဃိ ပှၤတနီၤန့ၣ် ဆီတလဲက့ၤအသး ဒ်သိးကဒိးန့ၢ်ဘၣ် တၢ်သးကညီၤအဂီၢ်လီၤ. (ၡူ. ၂:၈-၁၄; ၆:၂၂, ၂၃; ၉:၃-၁၅) ပှၤတနီၤ မၤကိၤအခိၣ် ဒီးထီဒါဝဲ ယဟိဝၤယွၤဒီး အပှၤဂီၢ်မုၢ် နးနးကလဲာ်လီၤ. (၅ မိၤ. ၂:၃၀-၃၃; ၡူ. ၁၁:၁၉, ၂၀) ယဟိဝၤယွၤ တတြီဝဲ ပှၤလၢအခိၣ်ကိၤတဖၣ်ဘၣ်. အဝဲ ပျဲဝဲလၢ ‘ပှၤသးကဆူၣ်ထီၣ်’ လီၤ. လၢခံကတၢၢ် ဖဲအဝဲစံၣ်ညီၣ် ပှၤလၢအခိၣ်ကိၤတဖၣ်အခါ အစိအကမီၤဒိၣ်န့ၣ် အိၣ်ဖျါထီၣ်ဒီး အမံၤဘၣ်တၢ်သ့ၣ်ညါအီၤစ့ၢ်ကီးလီၤ.—ထိၣ်သတြီၤဒီး ၂ မိၤ. ၄:၂၁; ယိၤ. ၁၂:၄၀; ရိ. ၉:၁၄-၁၈.
(၂ မိၤၡ့ ၈:၁၈, ၁၉) ဒီးပှၤကွဲးလံာ်မၤဝဲဒ်န့ၣ်လၢ အတၢ်မၤကဒါပမဲာ်ဒ်သိးအကဒုးကဲထီၣ်ဃးသူဃးလါ, ဒီးမၤဝဲတသ့ဘၣ်. ဒီးဃးသူဃးလါအိၣ်ဝဲလၢ ပှၤကညီအလိၤ, ဒီးဆၣ်ဖိကီၢ်ဖိအလိၤလီၤ. ၁၉ ဒီးပှၤကွဲးလံာ်စံးဘၣ်ဖၤရိၤ, တၢ်အံၤတမံၤမ့ၢ်ယွၤအစုမုၢ်လီၤ. ဒီးဖၤရိၤအသးဆူၣ်ထီၣ် ဒီးတကနၣ်ဘၣ်အကလုၢ်ဘၣ်, ဒ်ယွၤစံးဝဲအသိးန့ၣ်လီၤ.
(၂ မိၤၡ့ ၉:၁၅-၁၇) အဂ့ၢ်ဒ်အံၤ, ခဲကနံၣ်အံၤယကယူာ်ထီၣ်ယစု, ဒီးတီၢ်နၤ, ဒီးနပှၤဂီၢ်မုၢ်လၢတၢ်သံသတြိာ်, ဒီးနကဟးဂီၤကွံာ်လၢ ဟီၣ်ခိၣ်ချၢလီၤ. ၁၆ ဒီးမ့ၢ်မးယဒုးဆၢထၢၣ်နၤလၢ တၢ်အဂ့ၢ်အံၤ, ဒ်သိးယကဒုးနဲၣ်ယစိယကမီၤလၢနၤ, ဒီးဒ်သိးတၢ်ကစံၣ်တဲၤတဲလီၤယမံၤလၢ ဟီၣ်ခိၣ်ချၢဒီဘ့ၣ်ညါအဂ့ၢ်လီၤ. ၁၇ နပာ်ထီၣ်ထီဒံးနသးလၢ ယပှၤဂီၢ်မုၢ်အဖီခိၣ်လၢ နတပျၢ်ဘၣ်အီၤစ့ၢ်ကီးဧါ.
it-2 ၁၁၈၁ ¶၃-၅
တၢ်အၢတၢ်သီ
တကးဒံးဘၣ် ယဟိဝၤယွၤ သူဝဲတၢ်အိၣ်သးလၢ ပှၤအၢပှၤသီတဖၣ် အနီၢ်ကစၢ်ဒၣ်ဝဲ မၤလၢၤပှဲၤအဝဲအတၢ်တိာ်ပာ်လၢ တၢ်တတိာ်သူၣ်ပာ်သးအပူၤလီၤ. အဝဲသ့ၣ် ထီဒါကစၢ်ယွၤ သနာ်က့ ဒ်သိးအခ့အပှၤတဖၣ် ကတီဒီးအီၤအဂီၢ် အလီၢ်မ့ၢ်အိၣ်န့ၣ် တြီဃာ်ဝဲန့ၢ်လီၤ. လၢပှၤအၢပှၤသီတဖၣ်အဃိ ကစၢ်ယွၤ အတၢ်တီတၢ်လိၤ အိၣ်ဖျါထီၣ်သ့ဝဲ ဒၣ်လဲာ်လီၤ.( ရိ. ၃:၃-၅, ၂၃-၂၆; ၈:၃၅-၃၉; စံး. ၇၆:၁၀) ပသ့ၣ်ညါဘၣ်ခီဖျိ တၢ်ကတိၤဖဲ ကတိၤဒိ ၁၆:၄ လၢအစံးဝဲ “ယွၤမၤတၢ်ခဲလၢာ်လၢ အလီၢ်ဒၣ်ဝဲအဂီၢ်လီၤ. ပှၤတတီတလိၤဒၣ်လဲာ် လၢမုၢ်နံၤအၢတနံၤအဂီၢ်လီၤ.”
ဖဲစီၤမိၤၡ့ဒီး စီၤအၤဟရိၣ် လဲၤဟ့ၣ်ပလီၢ်ဝဲ ဖၤရိၤလၢကပျဲလီၤ ပှၤအံၣ်စရ့လးဖိလၢ အကဲကုၢ်တဖၣ်အခါ တၢ်ကဲထီၣ်အသးဒ်န့ၣ်အသိးလီၤ. ကစၢ်ယွၤ တမၤကဲထီၣ် အဲၤကူပတူး အပှၤပၢတၢ်အံၤလၢ ပှၤအၢပှၤသီဘၣ်, ဘၣ်ဆၣ် အဝဲပျဲဝဲလၢ ပှၤပၢတၢ်တဂၤအံၤကဆဲးအိၣ်မူဒီး အဝဲအနီၢ်ကစၢ်ဒၣ်ဝဲ ပာ်ဖျါထီၣ်ဝဲလၢ အမ့ၢ်ပှၤအၢပှၤသီ ဒီးကြၢးသံဝဲန့ၣ်လီၤ. ဖဲ ၂ မိၤၡ့ ၉:၁၆ အပူၤန့ၣ် ပာ်ဖျါထီၣ်ဝဲ ကစၢ်ယွၤ အတၢ်တိာ်ပာ်အံၤလၢ “ဒီးမ့ၢ်မးယဒုးဆၢထၢၣ်နၤလၢ တၢ်အဂ့ၢ်အံၤ, ဒ်သိးယကဒုးနဲၣ်ယစိယကမီၤလၢနၤ, ဒီးဒ်သိးတၢ်ကစံၣ်တဲၤတဲလီၤယမံၤလၢ ဟီၣ်ခိၣ်ချၢဒီဘ့ၣ်ညါအဂ့ၢ်လီၤ.”
တၢ်နးတၢ်ဖှီၣ်ဖးဒိၣ် ဟဲလီၤဆူ ကီၢ်အဲၤကူပတူးအဖီခိၣ်လီၤ. ဖၤရိၤဒီးအသုးမုၢ်တဖၣ် ဘၣ်တၢ်မၤဟးဂီၤကွံာ်အီၤလၢ ပီၣ်လဲၣ်ဂီၤပူၤအခါ ယဟိဝၤယွၤ အစိကမီၤ အိၣ်ဖျါထီၣ်ဝဲဂ့ၤဂ့ၤလီၤ. (၂ မိၤ. ၇:၁၄–၁၂:၃၀; စံး. ၇၈:၄၃-၅၁; ၁၃၆:၁၅) ပူၤကွံာ်အနံၣ်တဖၣ်အနံၣ် ဒၣ်လဲာ် ကလုာ်ဒူၣ်လၢအအိၣ်လၢအဃၢၤတဖၣ် တဲဒံးဝဲတၢ်ဂ့ၢ်အဝဲန့ၣ်လီၤ. ကစၢ်ယွၤအမံၤ ဘၣ်တၢ်ဒုးသ့ၣ်ညါအီၤလၢ ဟီၣ်ခိၣ်ဒီဘ့ၣ် လၢကျဲဒ်အံၤန့ၣ်လီၤ. (ၡူ. ၂:၁၀, ၁၁; ၁ မူၤ. ၄:၈) ကစၢ်ယွၤ မ့ၢ်စံၣ်ညီၣ်သံကွံာ် ဖၤရိၤတဘျီဃီန့ၣ် တမ့ၢ်လၢ ကစၢ်ယွၤ အစိကမီၤဒီး အလၤကပီၤ ကအိၣ်ဖျါထီၣ်ဂ့ၤဂ့ၤဘၣ်, တကးဒံးဘၣ် အပှၤဂီၢ်မုၢ်စ့ၢ်ကီး တမ့ၢ်ကထူၣ်ဖျဲးထီၣ်ဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၈:၂၁) နမ့ၢ်တပျၢ်ဘၣ်ယပှၤဂီၢ်မုၢ်ဒီး, ကွၢ်ကွၢ်, ယကမၢတၢ်အဖုတဖၣ် ဟဲလီၤလၢနလိၤ, ဒီးနခ့နပှၤအလိၤ, ဒီးနပှၤဂီၢ်မုၢ်အလိၤဒီးလၢနဟံၣ်တဖၣ်အပူၤလီၤ. ဒီးပှၤအဲၤကူပတူးဖိအဟံၣ်ပူၤကပှဲၤဒီး တၢ်အဖုတဖၣ်, ဒီးဟီၣ်ခိၣ်လၢအအိၣ်လၢ အဖီခိၣ်စ့ၢ်ကီးလီၤ.
it-1 ၈၇၈
တၢ်အဖုတဖၣ်
လံာ်စီဆှံလၢ ဧ့ၤဘြံၤကျိာ်တကတြူၢ် ပာ်ဖျါဝဲ တၢ်နးတၢ်ဖှီၣ်လွံၢ်ခါတခါ လၢအလီၤဘၣ် ကီၢ်အဲၤကူပတူးအံၤ ကမ့ၢ်တၢ်ဖိဃၢ်ဒ်လဲၣ်တကလုာ်လဲၣ်န့ၣ် ပတဲလီၤတံၢ်တသ့ဘၣ်. ပှၤအံၣ်စရ့လးဖိ အိၣ်တၢ်လီၢ် ကီၢ်ကိၡ့ၣ်န့ၣ် တတူၢ်ဘၣ်ဝဲ တၢ်နးတၢ်ဖှီၣ်အံၤဘၣ်. (၂ မိၤ. ၈:၂၁, ၂၂, ၂၄, ၂၉, ၃၁; စံး. ၇၈:၄၅; ၁၀၅:၃၁)
“တၢ်အဖုတဖၣ်” န့ၣ်ကပၣ်ဃုာ်ဒီး တၢ်ဖိဃၢ် ဒ်သိးဒီး ပကိာ်ဃးတဖၣ်သ့လီၤ. ပကိာ်ဃးတဖၣ်န့ၣ် အ့ၣ်ဝဲ ဆၣ်ဖိကီၢ်ဖိ ဒီးပှၤကညီတဖၣ် ဒီးဆူးဝဲအသွံၣ်လီၤ. ပကိာ်ဃးလၢအဖးထီၣ်သီတဖၣ်န့ၣ် ဟးအိၣ်လၢ ပှၤကညီဒီးဆၣ်ဖိကီၢ်ဖိတဖၣ်အလိၤ ဒီးပှၤထံၣ်ဘၣ်အီၤလၢ တၢ်ကိၢ်အလီၢ်တဖၣ်လီၤ. အဃိ ပကိာ်ဃးတဖၣ်အံၤ ကမၤနးမၤဖှီၣ် ပှၤအဲၤကူပတူးဖိ ဒီးအဆၣ်ဖိကီၢ်ဖိတဖၣ်တုၤဒၣ်လဲာ် ပှၤသံသ့န့ၣ်လီၤ.
(၂ မိၤၡ့ ၈:၂၅-၂၇) ဒီးဖၤရိၤကိးက့ၤစီၤမိၤၡ့ဒီးစီၤအၤဟရိၣ်, ဒီးစံးဝဲဒၣ်, လဲၤလုၢ်တၢ်လၢသုကစၢ်လၢ ကီၢ်အံၤအပူၤတက့ၢ်. ၂၆ ဒီးစီၤမိၤၡ့စံးဝဲဒၣ်, တၢ်တစံၣ်ညီၣ်ပာ်ဘၣ်လၢ ပကမၤဒ်န့ၣ်ဘၣ်, အဂ့ၢ်ဒ်အံၤ, ပကလုၢ်ပှၤအဲၤကူပတူးဖိအတၢ်သးဘၣ်အၢန့ၣ် လၢယွၤပကစၢ်လီၤ. ကွၢ်ကွၢ်, ပကလုၢ်ပှၤအဲၤကူပတူးဖိ အတၢ်သးဘၣ်အၢလၢအမဲာ်ညါ, ဒီးအဝဲသ့ၣ်တဖၣ်န့ၣ် ကကွံာ်ပှၤလၢလၢၢ်တမ့ၢ်ဘၣ်ဧါ. ၂၇ ပကလဲၤလၢပှၢ်လၢ်ကျါသၢနံၤကျဲ, ဒီးလုၢ်တၢ်လၢယွၤပကစၢ်, ဒ်အကမၤလိာ်ပှၤအသိးန့ၣ်လီၤ.
တၢး၀၄ ၃/၁၅ ၂၅ ¶၉
လံာ်စီဆှံတၢ်ပာ်ဖျါလၢ လံာ် ၂ မိၤၡ့ အဂီၢ်
၈:၂၆-၂၇ ဘၣ်မနုၤအဃိ စီၤမိၤၡ့တဲဝဲလၢ ပှၤအံၣ်စရ့လးဖိတဖၣ် အတၢ်လုၢ်န့ၣ်မ့ၢ် “ပှၤအဲၤကူပတူးဖိ အတၢ်သးဘၣ်အၢ” န့ၣ်လဲၣ်. ပှၤအဲၤကူပတူးဖိတဖၣ်န့ၣ် ဘူၣ်ထီၣ်ဘါထီၣ်ဝဲ ဆၣ်ဖိကီၢ်ဖိအါမးလီၤ. စီၤမိၤၡ့တဲဖျါထီၣ်ဝဲ တၢ်လုၢ်အဂ့ၢ်ဒ်န့ၣ်အဃိ ပှၤကအဲၣ်ဒိး တူၢ်လိာ်အတၢ်ကတိၤဒီး ကအဲၣ်ဒိးဒုးဟးထီၣ်အီၤ ဒ်သိးကလဲၤလုၢ်တၢ်လၢ ယဟိဝၤယွၤအဂီၢ်လီၤ.
တၢ်ဖးလံာ်စီဆှံ
(၂ မိၤၡ့ ၈:၁-၁၉) ဒီးယွၤစံးဘၣ် စီၤမိၤၡ့, ဒီးစံးဝဲဒၣ်, လဲၤဆူဖၤရိၤအအိၣ် ဒီးစံးဘၣ်အီၤ, ယွၤစံးဒ်အံၤ, ပျၢ်ယပှၤဂီၢ်မုၢ်ဒ်သိးအကမၤယတၢ်တက့ၢ်. ၂ ဒီးပျၢ်အီၤန့ၣ်နမ့ၢ်ဂ့ၢ်လိာ်ဒီး, ကွၢ်ကွၢ်, ယကတီၢ်နထံနကီၢ်ခဲလၢာ်လၢ ဒ့ၣ်ဧိၤကွီၣ်ဧိၤလီၤ. ၃ ဒီးထံမိၢ်ပှၢ်ကဖှံထီၣ်ဒ့ၣ်ဧိၤကွီၣ်ဧိၤ, လၢအကဟဲထီၣ်, ဒီးကလဲၤနုာ်လၢနဟံၣ်ပူၤ, ဒီးလၢနမံလီၢ်အဒၢးပူၤ, ဒီးလၢနလီၢ်မံအဖီခိၣ်, ဒီးလၢနခ့နပှၤတဖၣ်အဟံၣ်ပူၤ, ဒီးလၢနပှၤဂီၢ်မုၢ်အလိၤ, ဒီးလၢနဖၣ်ကပူၤတဖၣ်အပူၤ, ဒီးလၢနစံၢ်ကိၣ်အကျိးတဖၣ်အပူၤလီၤ. ၄ ဒီးဒ့ၣ်ဧိၤကွီၣ်ဧိၤန့ၣ် ကဟဲထီၣ်လၢနလိၤ, ဒီးလၢနပှၤဂီၢ်မုၢ်အလိၤ, ဒီးလၢနခ့နပှၤခဲလၢာ်အလိၤလီၤ. ၅ ဒီးယွၤစံးဘၣ် စီၤမိၤၡ့, စံးဘၣ်စီၤအၤဟရိၣ်, ယူာ်ထီၣ်နစုအိၣ်ဒီးနနီၣ်ထိးဘိလၢ ထံကျိအဖီခိၣ်, လၢထံမိၢ်ပှၢ်အဖီခိၣ်, ဒီးလၢကမါတဖၣ်အဖီခိၣ်, ဒီးဒုးဟဲထီၣ်ဒ့ၣ်ဧိၤကွီၣ်ဧိၤလၢ ကီၢ်အဲၤကူပတူးအဖီခိၣ်န့ၣ်တက့ၢ်. ၆ ဒီးစီၤအၤဟရိၣ် ယူာ်ထီၣ်အစုလၢ အဲၤကူပတူးအထံဧိၤနိဧိၤအဖီခိၣ်, ဒီးဒ့ၣ်ဧိၤကွီၣ်ဧိၤဟဲထီၣ်, ဒီးမၤဘံးမၤဘၢကီၢ်အဲၤကူပတူးလီၤ. ၇ ဒီးပှၤကွဲးလံာ်မၤဝဲဒ်န့ၣ်လၢ အတၢ်မၤကဒါပမဲာ် ဒီးဒုးဟဲထီၣ်ဒ့ၣ်ဧိၤကွီၣ်ဧိၤလၢ ကီၢ်အဲၤကူပတူးအဖီခိၣ်လီၤ. ၈ ဒီးဖၤရိၤကိးန့ၢ်စီၤမိၤၡ့, ဒီးစီၤအၤဟရိၣ်, ဒီးစံးဝဲဒၣ်, ဃ့ကညးယွၤလၢ အကဒုးဟးထီၣ်ကွံာ် ဒ့ၣ်ဧိၤကွီၣ်ဧိၤလၢယအိၣ်, ဒီးလၢယပှၤဂီၢ်မုၢ်အအိၣ်တက့ၢ်. ဒီးယကပျၢ်ပှၤဂီၢ်မုၢ် ဒ်သိးအကလုၢ်တၢ်လၢယွၤလီၤ. ၉ ဒီးစီၤမိၤၡ့စံးဘၣ်ဖၤရိၤ, အိၣ်ဒီးတၢ်အလၤကပီၤ လၢယဖီခိၣ်တက့ၢ်. ယဘၣ်ဃ့ကညးတၢ်လၢနဂီၢ်, ဒီးလၢနခ့နပှၤအဂီၢ်, ဒီးလၢနပှၤဂီၢ်မုၢ်အဂီၢ်, ဒ်သိးတၢ်ကမၤဟးဂီၤကွံာ်ဒ့ၣ်ဧိၤကွီၣ်ဧိၤလၢနလိၤ, ဒီးလၢနဟံၣ်တဖၣ်န့ၣ်, ဒီးဒ်သိး အကအိၣ်ထဲလၢ ထံမိၢ်ပှၢ်အပူၤဧိၤန့ၣ်, အကတီၢ်ဖဲလဲၣ်. ၁၀ ဒီးစံးဝဲဒၣ်, ခဲဂီၤကိာ်လီၤ. ဒီးစံးဝဲဒၣ်, မ်တၢ်မၤအသး ဒ်နစံးတၢ်အသိး, ဒ်သိးနကသ့ၣ်ညါလၢ တၢ်ဒ်ယွၤပကစၢ်အသိးတအိၣ်ဘၣ်လီၤ. ၁၁ ဒီးဒ့ၣ်ဧိၤကွီၣ်ဧိၤကဟးထီၣ်ကွံာ်လၢနလိၤ, ဒီးလၢနဟံၣ်တဖၣ်, ဒီးလၢနခ့နပှၤတဖၣ်, ဒီးလၢနပှၤဂီၢ်မုၢ်, ဒီးကအိၣ်လီၤတဲာ်ထဲလၢထံမိၢ်ပှၢ်အပူၤဧိၤလီၤ. ၁၂ ဒီးစီၤမိၤၡ့, ဒီးစီၤအၤဟရိၣ်ဟးထီၣ်ကွံာ်လၢ ဖၤရိၤအအိၣ်, ဒီးစီၤမိၤၡ့ကိးထီၣ်လၢယွၤလၢ ဒ့ၣ်ဧိၤကွီၣ်ဧိၤအဃိလၢ အပာ်ဝဲလၢဖၤရိၤအဂီၢ်လီၤ. ၁၃ ဒီးယွၤမၤဝဲဒ်စီၤမိၤၡ့အတၢ်ကတိၤအသိးန့ၣ်ဒီး ဒ့ၣ်ဧိၤကွီၣ်ဧိၤသံကွံာ်လၢဟံၣ်ပူၤ, ဒီးလၢအဂၢၤပူၤ, ဒီးလၢခိလီၤ. ၁၄ ဒီးပှၤထၢဖှိၣ်အီၤတပူတပူ, ဒီးထံဧိၤကီၢ်ဧိၤနၢအုၣ်ဝဲလီၤ. ၁၅ ဒီးဖၤရိၤထံၣ်တၢ်သါထီၣ်ဘၣ်က့ၤတထံၣ်ဒီး, မၤကိၤအသး, ဒီးတကနၣ်ဘၣ်အဝဲသ့ၣ်အကလုၢ်ဘၣ်, ဒ်ယွၤစံးဝဲအသိးန့ၣ်လီၤ. ၁၆ ဒီးယွၤစံးဘၣ် စီၤမိၤၡ့, စံးဘၣ်စီၤအၤဟရိၣ်, ယူာ်ထီၣ်နနီၣ်ထိးဘိ, ဒီးတီၢ်ဟီၣ်ခိၣ်အကမူၣ်, ဒ်သိးအကကဲထီၣ်ဃးသူဃးလါလၢ ကီၢ်အဲၤကူပတူး ဒီဘ့ၣ်ညါအပူၤန့ၣ်တက့ၢ်. ၁၇ ဒီးမၤဝဲဒ်န့ၣ်, ဒီးစီၤအၤဟရိၣ်ယူာ်ထီၣ်အစုအိၣ်ဒီးအနီၣ်ထိးဘိ, ဒီးတီၢ်ဟီၣ်ခိၣ်အကမူၣ်, ဒီးအတၢ်ကဲထီၣ်ဃးသူဃးလါလၢပှၤကညီအလိၤ, ဒီးလၢဆၣ်ဖိကီၢ်ဖိအလိၤလီၤ. ဟီၣ်ခိၣ်အကမူၣ်လၢ ကီၢ်အဲၤကူပတူးဒီကီၢ်ညါကဲထီၣ်ဃးသူဃးလါလီၤ. ၁၈ ဒီးပှၤကွဲးလံာ်မၤဝဲဒ်န့ၣ်လၢ အတၢ်မၤကဒါပမဲာ်ဒ်သိးအကဒုးကဲထီၣ်ဃးသူဃးလါ, ဒီးမၤဝဲတသ့ဘၣ်. ဒီးဃးသူဃးလါအိၣ်ဝဲလၢ ပှၤကညီအလိၤ, ဒီးဆၣ်ဖိကီၢ်ဖိအလိၤလီၤ. ၁၉ ဒီးပှၤကွဲးလံာ်စံးဘၣ်ဖၤရိၤ, တၢ်အံၤတမံၤမ့ၢ်ယွၤအစုမုၢ်လီၤ. ဒီးဖၤရိၤအသးဆူၣ်ထီၣ် ဒီးတကနၣ်ဘၣ်အကလုၢ်ဘၣ်, ဒ်ယွၤစံးဝဲအသိးန့ၣ်လီၤ.
လါယူၤလံ ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၁၀–၁၁
“စီၤမိၤၡ့ ဒီးစီၤအၤဟရိၣ် ပာ်ဖျါထီၣ် တၢ်သူၣ်ဒူသးဒူ”
(၂ မိၤၡ့ ၁၀:၃-၆) ဒီးစီၤမိၤၡ့, ဒီးစီၤအၤဟရိၣ်လဲၤနုာ်ဆူဖၤရိၤအအိၣ်ဒီးစံးဘၣ်အီၤ, ယွၤပှၤဧ့ၤဘြံၤဖိအကစၢ်စံးဒ်အံၤ, ဒ်သိးနသုတဆီၣ်လီၤနသးလၢ ယမဲာ်ညါတဂ့ၤဒီး, နကဂ့ၢ်လိာ်ဆံးယံာ်လဲၣ်. ပျၢ်ယပှၤဂီၢ်မုၢ်ဒ်သိးအကမၤ ယတၢ်တက့ၢ်. ၄ ပျၢ်ယပှၤဂီၢ်မုၢ်နမ့ၢ်ဂ့ၢ်လိာ်ဒီး, ကွၢ်ကွၢ်, ခဲဂီၤကိာ် ယကဒုးဟဲထီၣ်ဒွဲၣ်ဧိၤသကံၤဧိၤလၢနကီၢ်ပူၤ, ၅ ဒီးကမၤဘံးမၤဘၢဟီၣ်ခိၣ်တုၤ ပှၤထံၣ်ဘၣ်ဟီၣ်ခိၣ်တသ့ဘၣ်. ဒီးကအီၣ်တၢ်အိၣ်လီၤတဲာ်လၢအပူၤဖျဲး, တၢ်အိၣ်လီၤတဲာ်လၢသုဂီၢ်လၢသူၣ်န့ၣ်, ဒီးကအီၣ်ကယဲၢ်သ့ၣ်လၢအမဲထီၣ်လၢ သုဂီၢ်လၢပှၢ်လၢ်ကျါကိးထံးဒဲး, ၆ ဒီးကမၤပှဲၤနဟံၣ်, ဒီးနခ့နပှၤအဟံၣ်ခဲလၢာ်, ဒီးကယဲၢ်ပှၤအဲၤကူပတူးဖိအဟံၣ်ခဲလၢာ်လီၤ. တၢ်န့ၣ်နပၢ်သ့ၣ်,ဒီးနပၢ်အပၢ်သ့ၣ်တဖၣ် တထံၣ်ဘၣ်လၢမုၢ်နံၤလၢ အအိၣ်ထီၣ်လၢဟီၣ်ခိၣ်ချၢတုၤမုၢ်မဆါတနံၤအံၤလီၤ. ဒီးဃၣ်ကဒါက့ၤအသး, ဒီးဟးထီၣ်လၢဖၤရိၤအအိၣ်လီၤ.
တၢး၀၉ ၇/၁၅ ၂၀ ¶၆
ကွၢ်လိမၤဒိး ယ့ၣ်ၡူး—စံၣ်တဲၤတဲလီၤတၢ်လၢ တၢ်သူၣ်ဒူသးဒူ
၆ ဆိကမိၣ်ကွၢ် ဖဲစီၤမိၤၡ့ တဲတၢ်ဒီးစီၤပၤဖၤရိၤအခါ အဝဲအိၣ်ဒီးတၢ်သူၣ်ဒူသးဒူန့ၣ်တက့ၢ်. စီၤပၤဖၤရိၤန့ၣ် တမ့ၢ်ထဲအဝဲထံၣ်လီၤအသးဒ် အယွၤအခၢၣ်စးတဂၤဘၣ်. အဝဲထံၣ်လီၤအသးဒ်အမ့ၢ် မုၢ်အယွၤ ရၣ် အဖိခွါတဂၤအသိးလီၤ. ဒ်ဖၤရိၤအဂၤတဖၣ်အသိး အဝဲစ့ၢ်ကီး လီၤဂာ်လၢအ ဘူၣ်ထီၣ်ဘါထီၣ်ဝဲ အနီၢ်ကစၢ်အဂီၤလီၤ. ဖၤရိၤအတၢ်ကတိၤတဖၣ်န့ၣ် မ့ၢ်ဝဲတၢ်သိၣ်တၢ်သီ ဒီးအဝဲပၢတၢ် ဒ်အတၢ်ဘျၢဒီးအဝဲဟ့ၣ်လီၤတၢ်ကလုၢ်အသိးလီၤ. ဖၤရိၤလၢအိၣ်ဒီးတၢ်စိတၢ်ကမီၤ, ပာ်ထီၣ်ထီအသးဒီး အခိၣ်ကိၤန့ၣ် ပှၤကတဲအီၤလၢ မၤဒ်အံၤဒ်နုၤန့ၣ် တအိၣ်နီတဘျီဘၣ်. စီၤမိၤၡ့လၢ အမ့ၢ်ပှၤကွၢ်သိလၢ အိၣ်ဒီးတၢ်ဆီၣ်လီၤသးအံၤ ကဘၣ်လဲၤဝဲလၢ ပှၤဒ်သိးအံၤတဂၤအမဲာ်ညါ ဒီးပှၤတကွဲမုာ်အီၤဘၣ် ဒီးပှၤတတူၢ်လိာ်အီၤဘၣ်သနာ်က့ အဝဲလဲၤဝဲခဲအံၤခဲအံၤလီၤ. စီၤမိၤၡ့ လဲၤတဲဝဲ တၢ်ဂ့ၢ်မနုၤတဖၣ်လဲၣ်. အဝဲတဲဝဲ ဘၣ်ဃးဒီး တၢ်နးတၢ်ဖှီၣ်လၢ ကမၤဟးဂီၤတၢ်ဒိၣ်ဒိၣ်မုၢ်မုၢ်အဂ့ၢ်လီၤ. စီၤမိၤၡ့ ဃ့ဝဲတၢ်မနုၤလဲၣ်. အဝဲဃ့ဝဲလၢ ဖၤရိၤအကုၢ်လၢအကကွဲၢ်တဖၣ် ကဟးထီၣ်ဘၣ်လၢ ထံကီၢ်အပူၤလီၤ. မ့ၢ်စီၤမိၤၡ့ ကလိၣ်ဘၣ်တၢ်သူၣ်ဒူသးဒူဧါ. ကလိၣ်ဘၣ်ဝဲသပှၢ်ကတၢၢ်လီၤ.—၄ မိၤ. ၁၂:၃; ဧ့ၤ. ၁၁:၂၇.
(၂ မိၤၡ့ ၁၀:၂၄-၂၆) ဒီးဖၤရိၤကိးန့ၢ်စီၤမိၤၡ့, ဒီးစံးဝဲဒၣ်, လဲၤမၤယွၤအတၢ်တက့ၢ်. ဒုးအိၣ်လီၤတဲာ်ထဲသုသိ ဒီးသုမဲာ်တဲးလဲးတဖၣ်, ဒီးသုဂီၤဘုၣ်ဂီၤဖံးတဖၣ်ဧိၤတက့ၢ်. သုဖိဆံးကလဲၤဒၣ်ဝဲဒီးသုတက့ၢ်. ၂၅ ဒီးစီၤမိၤၡ့စံးဝဲဒၣ်, နဘၣ်ဟ့ၣ်စ့ၢ်ကီးပှၤလၢတၢ်လုၢ်, ဒီးတၢ်လုၢ်မ့ၣ်အူလၢပစုပူၤ, ဒ်သိးပကလုၢ်တၢ်လၢ ယွၤပကစၢ်လီၤ. ၂၆ ဒီးပဆၣ်ဖိကီၢ်ဖိအဒၢဘၣ်လဲၤဒီးပှၤလီၤ. ဆၣ်ဖိကီၢ်ဖိအခီၣ်မ့ၣ် တဘၣ်အိၣ်လီၤတဲာ်ဘၣ်နီတဘ့ၣ်ဘၣ်. အဂ့ၢ်ဒ်အံၤ, ပဘၣ်ဟံးန့ၢ်လၢတၢ်တဖၣ်န့ၣ်အကျါ ဒ်သိးပကမၤယွၤပကစၢ်အတၢ်, ဒီးပဘၣ်မၤယွၤအတၢ်လၢ မနုၤမနုၤန့ၣ်, ပတချုးလဲၤတုၤဒံးဘၣ်ဖဲန့ၣ်ဒီး, ပတသ့ၣ်ညါဘၣ်.
(၂ မိၤၡ့ ၁၀:၂၈) ဒီးဖၤရိၤစံးဘၣ်အီၤ, ဟးထီၣ်ကွံာ်လၢယအိၣ်တက့ၢ်. ပလီၢ်နသးတက့ၢ်. ထံၣ်လၢၤယမဲာ်တဂ့ၤ, အဂ့ၢ်ဒ်အံၤ, မုၢ်တနံၤလၢနထံၣ်ဘၣ်ယမဲာ်န့ၣ်နကသံလီၤ.
(၂ မိၤၡ့ ၁၁:၄-၈) ဒီးစီၤမိၤၡ့စံးဝဲဒၣ်, ယွၤစံးဝဲဒ်အံၤ, မုၢ်နၤဖးဖီမုၢ်ဃၣ်ဃၣ်ယကဟးထီၣ်ဆူ အဲၤကူပတူး အသးကံၢ်ပူၤလီၤ, ၅ ဒီးကယဲၢ်ပှၤအဝဲၢ်ကိလၢ အဲၤကူပတူးအပူၤကသံဝဲ, လၢဖၤရိၤအဖိဝဲၢ်ကိလၢ အဆ့ၣ်နီၤလၢ လီၢ်ပစိာ်အဖီခိၣ်, တုၤလီၤလၢကုၢ်ပိာ်မုၣ်လၢ အအိၣ်ဝဲလၢဆၢၣ်ဂူာ်အချၢဃံ, ဒီးဆၣ်ဖိကီၢ်ဖိအဒၢအဖိဝဲၢ်ကိခဲလၢာ်လီၤ. ၆ ဒီးတၢ်ကိးပသူဖးဒိၣ် ကအိၣ်ထီၣ်လၢ ကီၢ်အဲၤကူပတူးဒီဘ့ၣ်ညါအပူၤလီၤ. တၢ်ဒ်န့ၣ်တအိၣ်တ့ၢ်ဘၣ်. ဒီးတၢ်ဒ်န့ၣ်တအိၣ်လၢၤဘၣ်လီၤ. ၇ မ့မ့ၢ်ထီဒါပှၤအံၣ်စရ့လးဖိ, ပှၤကညီမ့ၢ်ဂ့ၤ, ဆၣ်ဖိကီၢ်ဖိအဒၢမ့ၢ်ဂ့ၤ, ထွံၣ်တဒုတဝးထီၣ်ဘၣ်အပျ့ၤဘၣ်, ဒ်သိးသုကသ့ၣ်ညါလၢ ယွၤမၤလီၤဆီ ပှၤအံၣ်စရ့လးဖိ ဒီးပှၤအဲၤကူပတူးဖိန့ၣ်လီၤ. ၈ ဒီးနခ့နပှၤခဲလၢာ်ကဟဲလီၤဆူယအိၣ်, ဒီးကတီၤလီၤကဒွံကျိာ်လၢယမဲာ်ညါဒီးစံး, ဟးထီၣ်, ဒီးပှၤဂီၢ်မုၢ်လၢ အပိာ်နခံခဲလၢာ်တက့ၢ်. ဒီးတၢ်န့ၣ်အလီၢ်ခံ ယကဟးထီၣ်ကွံာ်လီၤ. ဒီးဟးထီၣ်ဝဲ လၢအသးထီၣ်ကဲၤထီၣ်လၢဖၤရိၤအအိၣ်လီၤ.
it-2 ၄၃၆ ¶၄
စီၤမိၤၡ့
ပှၤကလဲၤလၢ ဖၤရိၤအမဲာ်ညါအဂီၢ် လိၣ်ဘၣ်တၢ်နာ် ဒီးတၢ်သူၣ်ဒူသးဒူ. ခီဖျိလၢ ယဟိဝၤယွၤ အဂံၢ်အဘါ ဒီးအသးစီဆှံအတၢ်မၤစၢၤအဃိ စီၤမိၤၡ့ ဒီးစီၤအၤဟရိၣ် မၤလၢပှဲၤဝဲအမူဒါသ့လီၤ. ထံၣ်တမှံကွၢ် ဖဲန့ၣ်အဆၢကတီၢ် ဖၤရိၤလၢအဒိၣ်စိလၢဟီၣ်ခိၣ်ဒီဘ့ၣ် ဒီးအနီတက့ၢ်. အတၢ်လီၤဘီလီၤမုၢ် န့ၣ်နထိၣ်သတြီၤအီၤဒီးတၢ်အဂၤတသ့ဘၣ်, ဖၤရိၤမ့ၢ်ပှၤလၢ အပာ်ထီၣ်ထီအသး, ဆိကမိၣ်လီၤအသးလၢအမ့ၢ်ယွၤ, အိၣ်ဒီးပှၤဟ့ၣ်ကူၣ်တၢ်, ပဒိၣ်ပပှၢ်တဖၣ်, ပှၤခိးတၢ်ဖိတဖၣ် ဒီးကုၢ်တဖၣ်လီၤ. အိၣ်စ့ၢ်ကီးဒီး တၢ်ဘူၣ်တၢ်ဘါခိၣ်နၢ်, ပှၤမၤကဒါမဲာ် ဒီးပှၤလၢအထီဒါ စီၤမိၤၡ့ တဖၣ်လီၤ. ပှၤသ့ၣ်တဖၣ်အံၤ ဖၤရိၤမ့ၢ်ဝံၤန့ၣ် အဝဲသ့ၣ်မ့ၢ်ပှၤလၢ အစိကမီၤဒိၣ်ကတၢၢ်လီၤ. ခီဖျိလၢ တၢ်သ့ၣ်တဖၣ်အံၤအဃိ လီၤဂာ်ဒ် ဖၤရိၤဒိးန့ၢ်ဘၣ်ဝဲ အဲၤကူပတူးအယွၤတဖၣ် အတၢ်ဆီၣ်ထွဲမၤစၢၤန့ၣ်လီၤ. စီၤမိၤၡ့ ဒီးစီၤအၤဟရိၣ်န့ၣ် တမ့ၢ်လဲၤလၢဖၤရိၤအအိၣ်ထဲတဘျီဘၣ်. လဲၤဝဲအဘျီတဖၣ်အဘျီလီၤ. မ့ၢ်လၢပှၤအံၣ်စရ့လးဖိလၢ အကဲကုၢ်တဖၣ်အံၤ မ့ၢ်တၢ်လုၢ်ဒိၣ်ပှ့ၤဒိၣ်လၢ ဖၤရိၤအဂီၢ်အဃိ အဝဲပာ်လီၤအသးလၢ တပျၢ်ကွံာ်အဝဲသ့ၣ်တဖၣ်ဘၣ်. အဃိမၤကိၤအခိၣ် ကိးဘျီဒဲးလီၤ. နီၢ်နီၢ်န့ၣ် ဖဲအဝဲသ့ၣ် ဘိးဘၣ်သ့ၣ်ညါဝဲ တၢ်နးတၢ်ဖှီၣ်ဃိးခါတခါဝံၤအလီၢ်ခံ စီၤမိၤၡ့ ဒီးစီၤအၤဟရိၣ်န့ၣ် ဘၣ်တၢ်နီဟးထီၣ်ကွံာ်အဝဲသ့ၣ်လၢ ဖၤရိၤအမဲာ်ညါ ဒီးစီၤပၤဟ့ၣ်လီၤတၢ်ကလုၢ်လၢ လၢခံတဘျီအဝဲသ့ၣ်မ့ၢ်ဟဲပၢၢ်ထီၣ်ကဒီးန့ၣ် ကဘၣ်တၢ်မၤသံအီၤလီၤ.—၂ မိၤ. ၁၀:၁၁, ၂၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၁၀:၁, ၂) ဒီးယွၤစံးဘၣ် စီၤမိၤၡ့, လဲၤနုာ်ဆူဖၤရိၤအအိၣ်တက့ၢ်. အဂ့ၢ်ဒ်အံၤ, ယမၤကိၤယသးဒီး အခ့အပှၤတဖၣ်အသးဒ်သိးယကဒုးနဲၣ် ယတၢ်အပနီၣ်လီၤလးတဖၣ်အံၤလၢအကျါ, ၂ ဒီးဒ်သိးနကစံၣ်တဲၤတဲလီၤတၢ်လၢ နဖိခွါအနၢ်ပူၤ, ဒီးနဖိခွါအဖိခွါ, လၢတၢ်လၢယမၤလၢ အဲၤကူပတူးအပူၤ, ဒီးတၢ်ပနီၣ်လီၤလးတဖၣ်လၢ ယမၤလၢအကျါ, ဒီးသုကသ့ၣ်ညါလၢယမ့ၢ်ယွၤလီၤ.
တၢး၉၅ ၉/၁ ၁၁ ¶၁၁
တၢ်အုၣ်အသးလၢ ယွၤအကမၣ်တကပၤ
၁၁ ဖဲပှၤအံၣ်စရ့လးဖိတဖၣ် အိၣ်လၢကီၢ်အဲၤကူပတူးအဆၢကတီၢ် ယဟိဝၤယွၤ ဆှၢလီၤစီၤမိၤၡ့ လၢဖၤရိၤအအိၣ် ဒီးတဲဘၣ်အီၤလၢ “ဒီးယွၤစံးဘၣ် စီၤမိၤၡ့, လဲၤနုာ်ဆူဖၤရိၤအအိၣ်တက့ၢ်. အဂ့ၢ်ဒ်အံၤ, ယမၤကိၤအသးဒီး အခ့အပှၤတဖၣ်အသးဒ်သိးယကဒုးနဲၣ် ယတၢ်အပနီၣ်လီၤလးတဖၣ်အံၤလၢအကျါ, ဒီးဒ်သိးနကစံၣ်တဲၤတဲလီၤတၢ်လၢ နဖိခွါအနၢ်ပူၤ, ဒီးလၢနဖိခွါအဖိခွါ, လၢတၢ်လၢယမၤလၢ အဲၤကူပတူးအပူၤ, ဒီးတၢ်ပနီၣ်လီၤလးတဖၣ်လၢ ယမၤလၢအကျါ, ဒီးသုကသ့ၣ်ညါလၢယမ့ၢ်ယွၤလီၤ.” (၂ မိၤၡ့ ၁၀:၁, ၂) ပှၤအံၣ်စရ့လးဖိလၢ အိၣ်ဒီးတၢ်ဒိကနၣ်တဖၣ်န့ၣ် ကတဲပၠးအဖိတဖၣ်လၢ ယဟိဝၤယွၤအတၢ်မၤလီၤလးတဖၣ်အဂ့ၢ်လီၤ. ဒီးအဖိတဖၣ်စ့ၢ်ကီး ကတဲပၠးကဒီးအဝဲသ့ၣ်အဖိအလံၤတဖၣ်စ့ၢ်ကီးလီၤ. ဒ်န့ၣ်အသိး ပှၤတစိၤဘၣ်တစိၤန့ၣ် ကတဲပၠးဝဲတၢ်ဂ့ၢ်အံၤသပှၢ်တၢၢ်လီၤ. လၢတၢ်န့ၣ်အဃိ ပှၤတိၢ်နီၣ် ယဟိဝၤယွၤအတၢ်မၤလီၤလးတဖၣ်အံၤကန့ၢ်ဝဲလီၤ. မုၢ်မဆါတနံၤအံၤစ့ၢ်ကီး မိၢ်ပၢ်တဖၣ်အိၣ်ဒီးမူဒါလၢ ကစံၣ်တဲၤတဲလီၤအဖိတဖၣ်လီၤ.—၅ မိၤၡ့ ၆:၄-၇; ကတိၤဒိ ၂၂:၆.
(၂ မိၤၡ့ ၁၁:၇) မ့မ့ၢ်ထီဒါပှၤအံၣ်စရ့လးဖိ, ပှၤကညီမ့ၢ်ဂ့ၤ, ဆၣ်ဖိကီၢ်ဖိအဒၢမ့ၢ်ဂ့ၤ, ထွံၣ်တဒုတဝးထီၣ်ဘၣ်အပျ့ၤဘၣ်, ဒ်သိးသုကသ့ၣ်ညါလၢ ယွၤမၤလီၤဆီ ပှၤအံၣ်စရ့လးဖိ ဒီးပှၤအဲၤကူပတူးဖိန့ၣ်လီၤ.
it-1 ၇၈၃ ¶၅
၂ မိၤၡ့
ယဟိဝၤယွၤ မၤလၤကပီၤအမံၤ ခီဖျိပာ်ဖျါထီၣ်အစိအမီၤလၢ ကျဲလၢအလီၤကမၢကမၣ် ဒီးမၤထူၣ်ဖျဲးထီၣ်ဝဲ ပှၤအံၣ်စရ့လးဖိတဖၣ်လီၤ. အဝဲသ့ၣ်တဖၣ် ခီဂာ်ဝဲပီၣ်လဲၣ်ဂီၤ ပူၤပူၤဖျဲးဖျဲးဝံၤအလီၢ်ခံ စီၤမိၤၡ့ တီခိၣ်ရိၤမဲဝဲ ပှၤအံၣ်စရ့လးဖိတဖၣ် ဒီးသးဝံၣ်တၢ်လီၤ. ဒီးအဒီပုၢ်မုၣ် ဝံမုၣ်နီၢ်မံးရယၣ်န့ၣ် ဟံးထီၣ်တၢ်ခြ့ခြ့ဒီးပှီၢ်ဝဲ ဒီးပိာ်မုၣ်အဂၤတဖၣ်စ့ၢ်ကီး ပှီၢ်ဝဲတၢ်ခြ့ခြ့ ဒီးဂဲၤကလံၣ်ဝဲလီၤ. အဝဲသ့ၣ်သးဝံၣ်ဝဲ တၢ်သးဝံၣ်လၢ ပှၤပိာ်ခွါတဖၣ် သးဝံၣ်ဝဲန့ၣ်လီၤ. (၂ မိၤ. ၁၅:၁, ၂၀, ၂၁) ပှၤအံၣ်စရ့လးဖိတဖၣ် အိၣ်ဘၣ်ဝဲလီၤလီၤဆီဆီ ဒီးအဒုၣ်အဒါတဖၣ်လီၤ. ဖဲအဝဲသ့ၣ်တဖၣ် ဟးထီၣ်လၢကီၢ်အဲၤကူပတူးဝံၤအလီၢ်ခံ ဒုၣ်ဒါလၢကမၤကီမၤခဲ အဝဲသ့ၣ် ဒီးအဆၣ်ဖိကီၢ်ဖိန့ၣ် တအိၣ်လၢၤဘၣ်. ထွံၣ်တဒုဒၣ်လဲာ် မီၤအဝဲသ့ၣ်တဘူၣ်လၢၤဘၣ်. (၂ မိၤ. ၁၁:၇) ပှၤလၢအကွဲး လံာ် ခံမိၤၡ့တဂၤအံၤန့ၣ် တကွဲးလီၤဝဲတၢ်ဂ့ၢ်လၢ ဖၤရိၤန့ၣ် လီၤအုးသံဒီးအပှၤသုးဖိတဖၣ်လၢ ပီၣ်လဲၣ်ဂီၤအပူၤဘၣ်. သနာ်က့ စံးထီၣ်ပတြၢၤ ၁၃၆:၁၅ န့ၣ်ပာ်ဖျါထီၣ်ဝဲလၢ “ဒီးတြုၤကွံာ်ဖၤရိၤ, ဒီးအတၢ်သုးမုၢ် ဆူပီၣ်လဲၣ်ဆှဲအပူၤလီၤ. အဂ့ၢ်ဒ်အံၤ, အဘျုးအဖှိၣ်အိၣ်ဝဲ လီၤစိၤလီၤထီလီၤ.”
တၢ်ဖးလံာ်စီဆှံ
(၂ မိၤၡ့ ၁၀:၁-၁၅) ဒီးယွၤစံးဘၣ် စီၤမိၤၡ့, လဲၤနုာ်ဆူဖၤရိၤအအိၣ်တက့ၢ်. အဂ့ၢ်ဒ်အံၤ, ယမၤကိၤယသးဒီး အခ့အပှၤတဖၣ်အသးဒ်သိးယကဒုးနဲၣ် ယတၢ်အပနီၣ်လီၤလးတဖၣ်အံၤလၢအကျါ, ၂ ဒီးဒ်သိးနကစံၣ်တဲၤတဲလီၤတၢ်လၢ နဖိခွါအနၢ်ပူၤ, ဒီးနဖိခွါအဖိခွါ, လၢတၢ်လၢယမၤလၢ အဲၤကူပတူးအပူၤ, ဒီးတၢ်ပနီၣ်လီၤလးတဖၣ်လၢ ယမၤလၢအကျါ, ဒီးသုကသ့ၣ်ညါလၢယမ့ၢ်ယွၤလီၤ. ၃ ဒီးစီၤမိၤၡ့, ဒီးစီၤအၤဟရိၣ်လဲၤနုာ်ဆူဖၤရိၤအအိၣ်ဒီးစံးဘၣ်အီၤ, ယွၤပှၤဧ့ၤဘြံၤဖိအကစၢ်စံးဒ်အံၤ, ဒ်သိးနသုတဆီၣ်လီၤနသးလၢ ယမဲာ်ညါတဂ့ၤဒီး, နကဂ့ၢ်လိာ်ဆံးယံာ်လဲၣ်. ပျၢ်ယပှၤဂီၢ်မုၢ်ဒ်သိးအကမၤ ယတၢ်တက့ၢ်. ၄ ပျၢ်ယပှၤဂီၢ်မုၢ်နမ့ၢ်ဂ့ၢ်လိာ်ဒီး, ကွၢ်ကွၢ်, ခဲဂီၤကိာ် ယကဒုးဟဲထီၣ်ဒွဲၣ်ဧိၤသကံၤဧိၤလၢနကီၢ်ပူၤ, ၅ ဒီးကမၤဘံးမၤဘၢဟီၣ်ခိၣ်တုၤ ပှၤထံၣ်ဘၣ်ဟီၣ်ခိၣ်တသ့ဘၣ်. ဒီးကအီၣ်တၢ်အိၣ်လီၤတဲာ်လၢအပူၤဖျဲး, တၢ်အိၣ်လီၤတဲာ်လၢသုဂီၢ်လၢသူၣ်န့ၣ်, ဒီးကအီၣ်ကယဲၢ်သ့ၣ်လၢအမဲထီၣ်လၢ သုဂီၢ်လၢပှၢ်လၢ်ကျါကိးထံးဒဲး, ၆ ဒီးကမၤပှဲၤနဟံၣ်, ဒီးနခ့နပှၤအဟံၣ်ခဲလၢာ်, ဒီးကယဲၢ်ပှၤအဲၤကူပတူးဖိအဟံၣ်ခဲလၢာ်လီၤ. တၢ်န့ၣ်နပၢ်သ့ၣ်,ဒီးနပၢ်အပၢ်သ့ၣ်တဖၣ် တထံၣ်ဘၣ်လၢမုၢ်နံၤလၢ အအိၣ်ထီၣ်လၢဟီၣ်ခိၣ်ချၢတုၤမုၢ်မဆါတနံၤအံၤလီၤ. ဒီးဃၣ်ကဒါက့ၤအသး, ဒီးဟးထီၣ်လၢဖၤရိၤအအိၣ်လီၤ. ၇ ဒီးဖၤရိၤအခ့အပှၤစံးဘၣ်အီၤ, ပှၤတဂၤအံၤ, ကကဲပျံၤသကွီၤလၢပဂီၢ်ဆံးယံာ်လဲၣ်. ပျၢ်လၢ်ပှၤပိာ်ခွါတဖၣ်ဒ်သိးအကမၤ ယွၤအကစၢ်အတၢ်န့ၣ်တက့ၢ်. အဲၤကူပတူးဟးဂီၤလံန့ၣ် နတသ့ၣ်ညါဒံးဘၣ်ဧါ. ၈ ဒီးပှၤဒုးဟဲက့ၤစီၤမိၤၡ့, ဒီးစီၤအၤဟရိၣ်ဆူဖၤရိၤအအိၣ်, ဒီးအဝဲဒၣ်စံးဘၣ်အီၤ, လဲၤမၤယွၤသုကစၢ်အတၢ်တက့ၢ်. မ့ၢ်မတၤကလဲၤတဖၣ်လဲၣ်. ၉ ဒီးစီၤမိၤၡ့စံးဝဲဒၣ်, ပကလဲၤဒီးပဖိဒံဖိသၣ်, ဒီးပသူၣ်က့သးပှၢ်, ဒီးပဖိခွါ, ဒီးပဖိမုၣ်, ဒီးလၢပသိဒီးမဲာ်တဲးလဲး, ဒီးပဂီၤဘုၣ်ဂီၤဖံးတဖၣ်န့ၣ် ပကလဲၤလီၤ. အဂ့ၢ်ဒ်အံၤ, တၢ်မၤဘူၣ်ယွၤအိၣ်ဒီးပှၤလီၤ. ၁၀ ဒီးစံးဘၣ်အီၤမ်ယွၤအိၣ်ဒီးသု ဒ်ယပျၢ်သုဒီးသုဖိဆံးအသိးန့ၣ်တက့ၢ်. ကွၢ်တက့ၢ်, အဂ့ၢ်ဒ်အံၤ, တၢ်အၢအိၣ်ဝဲလၢသုမဲာ်ညါလီၤ. ၁၁ ဒ်န့ၣ်တမ့ၢ်ဘၣ်, သုဝဲ, ပိာ်ခွါလဲၤတ့ၢ်, ဒီးမၤယွၤအတၢ်တက့ၢ်. အဂ့ၢ်ဒ်အံၤ, သုဃုတ့ၢ်တၢ်န့ၣ်တမံၤလီၤ. ဒီးပှၤဟီထီၣ်ကွံာ်အီၤလၢဖၤရိၤအမဲာ်ညါလီၤ. ၁၂ ဒီးယွၤစံးဘၣ်စီၤမိၤၡ့, ယူာ်ထီၣ်နစုလၢကီၢ်အဲၤကူပတူးအဖီခိၣ်လၢ ဒွဲၣ်ဧိၤသကံၤဧိၤအဂီၢ်, ဒ်သိးအကဟဲထီၣ်လၢ ကီၢ်အဲၤကူပတူးအပူၤ, ဒီးအီၣ်ကယဲၢ်နီၣ်ဧိၤမံၤဧိၤ, ဘုဧိၤဟုဧိၤလၢကီၢ်ပူၤန့ၣ်, ဒီးကယဲၢ်တၢ်လၢသူၣ်ပာ်လီၤတဲာ်န့ၣ်တက့ၢ်. ၁၃ ဒီးစီၤမိၤၡ့ယူာ်ထီၣ်အနီၣ်ထိးဘိလၢ ကီၢ်အဲၤကူပတူးအဖီခိၣ်, ဒီးယွၤဒုးဟဲကလံၤလၢမုၢ်ထီၣ်တခီ လၢကီၢ်န့ၣ်အဖီခိၣ်သ့တနံၤကျၢၤ, ဒီးသီတနၤကျၢၤလီၤ. မုၢ်ဆ့ၣ်ထီၣ်န့ၣ်ကလံၤလၢ မုၢ်ထီၣ်တခီဟဲဒီး ဒွဲၣ်ဧိၤသကံၤဧိၤလီၤ. ၁၄ ဒီးဒွဲၣ်ဧိၤသကံၤဧိၤ ဟဲထီၣ်ဝဲလၢ ကီၢ်အဲၤကူပတူးဒီဘ့ၣ်ညါအဖီခိၣ်, ဒီးစီၢ်လီၤဝဲလၢ ကီၢ်အဲၤကူပတူးကိးအလီၢ်ပူၤဒဲးလီၤ. အိၣ်ဝဲနးမးလီၤ. လၢပျၢၤလၢအမဲာ်ညါဒွဲၣ်ဧိၤသကံၤဧိၤ ဒ်အဝဲသ့ၣ်တဖၣ်အသိးန့ၣ်တအိၣ်ဘၣ်, ဒီးလၢအလီၢ်ခံန့ၣ်တအိၣ်ဘၣ်ဒ်န့ၣ်အသိးဘၣ်. ၁၅ ဒီးမၤဘံးမၤဘၢကီၢ်န့ၣ်ဒီဘ့ၣ်ညါ, ဒီးကီၢ်ခံးလီၤဝဲဒီး အီၣ်ဝဲကယဲၢ်နီၣ်ဧိၤမံၤဧိၤဘုဧိၤဟုဧိၤလၢကီၢ်ပူၤ, ဒီးသ့ၣ်အသၣ်ခဲလၢာ်လၢ သူၣ်ပာ်လီၤတဲာ်န့ၣ်လီၤ. ဒီးတၢ်အဟ့အလါသ့ၣ်ဧိၤဝၣ်ဧိၤမ့ၢ်ဂ့ၤ, တၢ်မုၢ်တၢ်ဘိမ့ၢ်ဂ့ၤ, တအိၣ်လီၤတဲာ်ဘၣ်နီတမံၤ, လၢကီၢ်အဲၤကူပတူး ဒီဘ့ၣ်ညါအပူၤဘၣ်.
လါယူၤလံ ၂၇–လါအီကူး ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၁၂
“ဘူၣ်လဲၤကပာ်—အခီပညီအိၣ်လၢ ခရံာ်ဖိတဖၣ်အဂီၢ်ဒ်လဲၣ်”
(၂ မိၤၡ့ ၁၂:၅-၇) သုတၢ်အဖိတဒုဘၣ်မ့ၢ်အလၢအပှဲၤ, အဖါ, တနံၣ်အဖိလီၤ. လၢသိတဖၣ်အကျါမ့ၢ်ဂ့ၤ, လၢမဲာ်တဲးလဲးတဖၣ်အကျါမ့ၢ်ဂ့ၤ, သုဘၣ်ဟံးန့ၢ်အီၤလီၤ. ၆ ဒီးသုဘၣ်ပၢၤအီၤတုၤလၢ လါထီၣ်တဆံလွံၢ်နံၤတနံၤ လၢလါတလါဃီန့ၣ်လီၤ. ဒီးအံၣ်စရ့လး အပှၤဂီၢ်မုၢ်ခဲလၢာ် အတၢ်အိၣ်ဖှိၣ်န့ၣ် ဘၣ်မၤသံအီၤ လၢမုၢ်ဟါလီၤခံတီၤ အဘၢၣ်စၢၤန့ၣ်လီၤ. ၇ ဒီးဘၣ်ဟံးန့ၢ်အသွံၣ်တနီၤ ဒီးပာ်ဝဲလၢကျဲစၢၤအထူၣ်လိၤခံခီ, ဒီးလၢကျဲစၢၤအခိၣ်ပိာ်လိၤ, လၢဟံၣ်တဖၣ်ဖဲအကအီၣ်အီၤလီၤ.
တၢး၀၇ ၁/၁ ၂၀ ¶၄
“မၤသးဒ်န့ၣ်ဒီး နကသးခုလီၤ”
၄ ယ့ၣ်ၡူးသံဝဲဖဲ ခ.န ၃၃, လါနံစၣ် ၁၄ လီၤ. ပှၤအံၣ်စရ့လးဖိတဖၣ် မၤဝဲဘူၣ်လဲၤကပာ်လၢ လါနံစၣ် ၁၄ သီလၢ တၢ်သူၣ်ခုသးခုအပူၤလီၤ. ကိးနံၣ်ဒဲးမ့ၢ်တုၤလၢ မုၢ်နံၤအံၤန့ၣ် အဝဲသ့ၣ်အဟံၣ်ဖိဃီဖိတဖၣ် အီၣ်သကိးဝဲသိဖိလၢ အလၢအပှဲၤတဒုအညၣ်လီၤ. ဘူၣ်အံၤဒုးသ့ၣ်နီၣ်ထီၣ်က့ၤအဝဲသ့ၣ်တဖၣ်လၢ အပူၤကွံာ် ချ.ခ.န ၁၅၁၃ လါနံစၣ် ၁၄ သီဖဲ မူခိၣ်ကလူးတဖၣ် မၤသံကွံာ်ဝဲ ပှၤအဲၤကူပတူးဖိအဖိဝဲၢ်ကိတဖၣ်အခါ ခီဖျိလၢ သိဖိအသွံၣ်အဃိ ပှၤအံၣ်စရ့လးဖိ အဖိဝဲၢ်ကိတဖၣ် ပူၤဖျဲးကွံာ်ဝဲအဂ့ၢ်န့ၣ်လီၤ. (၂ မိၤၡ့ ၁၂:၁-၁၄) ဘူၣ်လဲၤကပာ်သိဖိန့ၣ် မ့ၢ်တၢ်လၢအပာ်ဖျါထီၣ်ဆိဝဲ ယ့ၣ်ၡူးအတၢ်ဟ့ၣ်လုၢ်ထီၣ်အသးသမူန့ၣ်လီၤ. ဘၣ်ဃးဒီးတၢ်ဂ့ၢ်အံၤန့ၣ် တၢ်မၢဖိပီလူးကွဲးဝဲလၢ “မၤသးဒ်န့ၣ်ဒီး ဒ်သုမ့ၢ်တၢ်တဘၣ်ဘၣ် ဒီးကိၣ်မံၣ်ဘၣ်ဒီး, ဒ်သိးသုကကဲထီၣ်တၢ်တဖျၢၣ်လၢအသီသတးဒီး, မၤကဆှီကွံာ်ကိၣ်မံၣ် လီၢ်လံၤန့ၣ်တက့ၢ်. အဂ့ၢ်ဒ်အံၤ, ပတၢ်ဘူၣ်လဲၤကပာ်ခရံာ်န့ၣ်, ဘၣ်တၢ်မၤသံအီၤလၢပဂီၢ်စ့ၢ်ကီးလီၤ.” (၁ ကရံၣ်သူး ၅:၇) ဒ်ဘူၣ်လဲၤကပာ်သိဖိအသွံၣ်အသိး ယ့ၣ်ၡူးအသွံၣ်စ့ၢ်ကီး မ့ၢ်တၢ်အုၣ်က့ၤခီၣ်က့ၤလၢ ပှၤအါမးအဂီၢ်လီၤ.—ယိၤဟၣ် ၃:၁၆, ၃၆.
(၂ မိၤၡ့ ၁၂:၁၂, ၁၃) အဂ့ၢ်ဒ်အံၤ, လၢမုၢ်တနၤအံၤ ယကလဲၤခီဂာ်ကီၢ်အဲၤကူပတူး, ဒီးယကကျီသံကွံာ်ကယဲၢ်တၢ်အဖိဝဲၢ်ကိလၢ ကီၢ်အဲၤကူပတူးအပူၤ လၢပှၤကညီတုၤလၢ ဆၣ်ဖိကီၢ်ဖိအဒၢ, ဒီးထီဒါအဲၤကူပတူးအကစၢ်တဖၣ်ခဲလၢာ်န့ၣ် ယကမၤတၢ်စံၣ်ညီၣ်လီၤ. ယဲဒၣ်အံၤယမ့ၢ်ယွၤလီၤ. ၁၃ ဒီးတၢ်သွံၣ်န့ၣ် ကကဲထီၣ်တၢ်ပနီၣ် လၢသုဂီၢ်လၢဟံၣ်လိၤဖဲသုအိၣ်လၢအပူၤ, ဒီးတုၤယထံၣ်တၢ်သွံၣ်န့ၣ်ဒီး, ယကလဲၤကပာ်သု, ဒီးတုၤယကျီကွံာ်ကီၢ်အဲၤကူပတူးဒီး, တၢ်သံသတြိာ် တဘၣ်ဘၣ်သု လၢတၢ်ဟးဂီၤအဂီၢ်ဘၣ်လီၤ.
it-2 ၅၈၃ ¶၆
ဘူၣ်လဲၤကပာ်
တၢ်ဂ့ၢ်လီၤဆီတနီၤလၢ ဘၣ်ဃးဒီးဘူၣ်လဲၤကပာ်န့ၣ် ဟဲလၢပှဲၤထီၣ်ဝဲလၢ ယ့ၣ်ၡူးခရံာ်လီၤ. တၢ်လၢထီၣ်ပှဲၤထီၣ်တခါန့ၣ် လၢကီၢ်အဲၤကူပတူးအပူၤ ဟံၣ်လၢဘၣ်တၢ်ဖှူအီၤလၢ တၢ်သွံၣ်တဖၣ် အဖိဝဲၢ်ကိန့ၣ် မူခိၣ်ကလူးလၢ အမၤသံတၢ်တဖၣ် တမၤသံအဝဲသ့ၣ်ဘၣ်. စီၤပီလူးတဲဘၣ်ဝဲ ခရံာ်ဖိလၢ အဘၣ်တၢ်ဒိးဖှူအီၤတဖၣ်လၢ အဝဲသ့ၣ်မ့ၢ် တၢ်အိၣ်ဖှိၣ် ဘၣ်ဃးဒီးဝဲၢ်ကိ (ဧ့ၤ. ၁၂:၂၃) ဒီးဒိးန့ၢ်ဘၣ်တၢ်အုၣ်က့ၤခီၣ်က့ၤ ခီဖျိယ့ၣ်ၡူးအသွံၣ်လီၤ. (၁ သ့း. ၁:၁၀; အ့း. ၁:၇) ဘူၣ်လဲၤကပာ်အသိန့ၣ် ပှၤတဘၣ်မၤကၢ် အဃံနီတဘိဘၣ်. တၢ်အံၤမ့ၢ်စ့ၢ်ကီး ဝံအတၢ်စံးပာ်လၢ ယ့ၣ်ၡူးန့ၣ် ပှၤတဘၣ်မၤကၢ်အဃံနီတဘိဘၣ် ဒီးဟဲလၢပှဲၤထီၣ်ဝဲဖဲ ယ့ၣ်ၡူးသံဝဲအဆၢကတီၢ်န့ၣ်လီၤ. (စံး. ၃၄:၂၀; ယိၤ. ၁၉:၃၆) လၢတၢ်န့ၣ်အဃိ စီၤမိၤၡ့အတၢ်သိၣ်တၢ်သီအံၤ မ့ၢ်ဝဲတၢ်ပာ်ဖျါထီၣ်ဆိလၢ ယ့ၣ်ၡူးကဟဲ ဒီးကကဲထီၣ် “ယွၤအသိဖိ” န့ၣ်ပှၤယူဒၤဖိတဖၣ် သ့ၣ်ညါဝဲလၢ ယၤဖှိၣ်နံၣ်အါမးလံလီၤ.—ဧ့ၤ. ၁၀:၁; ယိၤ. ၁:၂၉.
(၂ မိၤၡ့ ၁၂:၂၄-၂၇) ဒီးသုဘၣ်တိၢ်န့ၢ်တၢ်တမံၤန့ၣ် လၢတၢ်အလုၢ်အလၢ် လၢနဂီၢ်ဒီးလၢနဖိနလံၤအဂီၢ် လီၤထူလီၤယိာ်လီၤ. ၂၅ ဒီးတၢ်ကမၤအသးတုၤသုတုၤ လၢကီၢ်တဘ့ၣ် လၢယွၤကဟ့ၣ်လီၤသု, ဒ်အစံးတၢ်အသိးဒီး, သုဘၣ်တိၢ်န့ၢ်တၢ်မၤအံၤလီၤ. ၂၆ ဒီးတၢ်ကမၤအသး တုၤသုဖိသုလံၤစံးလၢသု, သုမၤတၢ်အံၤမ့ၢ်ဒ်လဲၣ်, ၂၇ သုဘၣ်စံး, အဝဲအံၤမ့ၢ်ယွၤ အတၢ်လဲၤကပာ်အတၢ်လုၢ်လီၤ. အဂ့ၢ်ဒ်အံၤ, တုၤအကျီကွံာ်ပှၤအဲၤကူပတူးဖိဒီး, လဲၤကပာ်ပှၤအံၣ်စရ့လးဖိအဟံၣ်တဖၣ်လၢ အဲၤကူပတူးအပူၤ, ဒီးမၤပူၤမၤဖျဲးပဟံၣ်တဖၣ်လီၤ. ဒီးပှၤဂီၢ်မုၢ်ဆုးလီၤအခိၣ်, ဒီးဘူၣ်တၢ်ဘါတၢ်လီၤ.
တၢး၁၃ ၁၂/၁၅ ၂၀ ¶၁၃-၁၄
‘တၢ်အံၤကကဲထီၣ် တၢ်သ့ၣ်နီၣ်ထီၣ်လၢ နဂီၢ်’
၁၃ ပှၤအံၣ်စရ့လးဖိ တစိၤဘၣ်တစိၤန့ၣ် အဝဲသ့ၣ်သိၣ်လိဝဲ အဖိတဖၣ်လၢ တၢ်မၤလိအရ့ဒိၣ်လၢဘၣ်ဃးဒီး ဘူၣ်လဲၤကပာ်န့ၣ်လီၤ. တၢ်မၤလိတခါန့ၣ်မ့ၢ်ဝဲ ယဟိဝၤယွၤ ဒီသဒၢဝဲ ပှၤလၢအဘူၣ်ထီၣ်ဘါထီၣ်အီၤတဖၣ်န့ၣ်လီၤ. ဖိတဖၣ် မၤလိဘၣ်ဝဲလၢ ယဟိဝၤယွၤန့ၣ်အိၣ်အနီၢ်ကီၢ်, အိၣ်ဒီးသးသမူ, ကဟုကယာ် ဒီးဒီသဒၢအပှၤဂီၢ်မုၢ်တဖၣ်လီၤ. တၢ်အုၣ်သးတခါန့ၣ် မ့ၢ်ဝဲဖဲတၢ်နးတၢ်ဖှီၣ်အလီၢ်ခံကတၢၢ်တခါ လီၤလၢကီၢ်အဲၤကူပတူးအပူၤ ဒီးကစၢ်ယွၤ ဒီသဒၢဝဲ ပှၤအံၣ်စရ့လးဖိအဖိဝဲၢ်ကိတဖၣ်အခါန့ၣ်လီၤ.
၁၄ ခရံာ်ဖိမိၢ်ပၢ်တဖၣ် တဘၣ်တၢ်မၤလိာ်အဝဲသ့ၣ်လၢ ကဘၣ်သိၣ်လိအဖိတဖၣ်လၢ ဘၣ်ဃးဒီးဘူၣ်လဲၤကပာ်အဂ့ၢ် ကိးနံၣ်ဒဲးဘၣ်. ဘၣ်ဆၣ် တၢ်မၤလိလၢ နဒိးန့ၢ်ဘၣ်အီၤလၢ ဘူၣ်လဲၤကပာ် လၢဘၣ်ဃးဒီး ကစၢ်ယွၤ ဒီသဒၢဝဲ အပှၤဂီၢ်မုၢ်တဖၣ်သ့န့ၣ် မ့ၢ်နသိၣ်လိနဖိတဖၣ်ဧါ. မုၢ်မဆါတနံၤအံၤ နနာ်သပှၢ်တၢၢ်လၢ ကစၢ်ယွၤဒီသဒၢအပှၤဂီၢ်မုၢ်န့ၣ် မ့ၢ်နဖိတဖၣ် သ့ၣ်ညါဝဲဧါ. (စံး. ၂၇:၁၁; ၡါ. ၁၂:၂) တမ့ၢ်လၢနသိၣ်ဃီၣ်အဝဲသ့ၣ်ဒီး အ့န့အီၤအခါဘၣ် ဖဲနတဲသကိးတၢ်ဒီးအဝဲသ့ၣ် လၢတၢ်သူၣ်ဖှံသးညီအဆၢကတီၢ် မ့ၢ်နသိၣ်လိအဝဲသ့ၣ်တဖၣ်လၢ တၢ်မၤလိအံၤဧါ. တၢ်မၤလိတဖၣ်အံၤ ကမၤစၢၤနဟံၣ်ဖိဃီဖိလၢ အတၢ်နာ်ကစၢ်ယွၤကအါထီၣ်အဂီၢ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၁၂:၁၂) အဂ့ၢ်ဒ်အံၤ, လၢမုၢ်တနၤအံၤ ယကလဲၤခီဂာ်ကီၢ်အဲၤကူပတူး, ဒီးယကကျီသံကွံာ်ကယဲၢ်တၢ်အဖိဝဲၢ်ကိလၢ ကီၢ်အဲၤကူပတူးအပူၤ လၢပှၤကညီတုၤလၢ ဆၣ်ဖိကီၢ်ဖိအဒၢ, ဒီးထီဒါအဲၤကူပတူးအကစၢ်တဖၣ်ခဲလၢာ်န့ၣ် ယကမၤတၢ်စံၣ်ညီၣ်လီၤ. ယဲဒၣ်အံၤယမ့ၢ်ယွၤလီၤ.
it-2 ၅၈၂ ¶၂
ဘူၣ်လဲၤကပာ်
တၢ်နးတၢ်ဖှီၣ်အခါတဆံ လီၤလၢကီၢ်အဲၤကူပတူးအပူၤ လီၤဆီဒၣ်တၢ် တၢ်နးတၢ်ဖှီၣ်အလီၢ်ခံကတၢၢ်တခါလၢ ပှၤအဲၤကူပတူးဖိအဖိဝဲၢ်ကိဘၣ်သံဝဲန့ၣ် မ့ၢ်ဒၣ်တၢ်စံၣ်ညီၣ် အဲၤကူပတူးအယွၤတဖၣ်န့ၣ်လီၤ. (၂ မိၤ. ၁၂:၁၂) သိဖါတံၢ်တဖၣ်န့ၣ် ဘၣ်တၢ်ဟ့ၣ်လုၢ်ထီၣ်အီၤ လီၤလီၤဆီဆီလၢယွၤ ရၣ် အဂီၢ်အဃိ ဖဲပှၤဖှူဘူၣ်လဲၤကပာ်သိဖိအသွံၣ်လၢ တြဲၤထူၣ်အလိၤအခါန့ၣ် လၢပှၤအဲၤကူပတူးဖိတဖၣ်အဂီၢ် မ့ၢ်တၢ်မၤတရီတပါ အကစၢ်ယွၤလီၤ. ဂီၤဖံးဖါစ့ၢ်ကီး ဘၣ်တၢ်ဟ့ၣ်လုၢ်ထီၣ်အီၤအဃိ ဖဲဂီၤဖံးတဖၣ် အဖိဝဲၢ်ကိသံအခါ ကဲထီၣ်တၢ်ဒုၣ်ဒွဲၣ်စံးအၢလၢ ယွၤ အိၣ်စါရံး အဂီၢ်လီၤ. ဖၤရိၤအနီၢ်ကစၢ်ဒၣ်ဝဲ ဘၣ်တၢ်ပာ်ကဲအီၤဒ်အမ့ၢ် ရၣ်အဖိခွါအသိးလီၤ. ဖဲဖၤရိၤအဖိဝဲၢ်ကိသံအခါ ပာ်ဖျါထီၣ်လၢ ရၣ်မ့ၢ်ဂ့ၤ ဖၤရိၤမ့ၢ်ဂ့ၤ အစိအကမီၤတအိၣ်ဘၣ်.
(၂ မိၤၡ့ ၁၂:၁၄-၁၆) ဒီးတၢ်လၢမုၢ်နံၤအံၤ ကကဲထီၣ်တၢ်သ့ၣ်နီၣ်ထီၣ်က့ၤတၢ်လၢသုဂီၢ်, ဒီးသုဘၣ်တိၢ်န့ၢ်အီၤလၢ တၢ်မၤဘူၣ်ယွၤလီၤစိၤလီၤဃၣ်လီၤ. သုဘၣ်မၤအီၤလၢတၢ်မၤဘူၣ်လၢ တၢ်မၤလိာ်အထူအယိာ်လီၤ. ၁၅ နွံနံၤန့ၣ် သုဘၣ်အီၣ်ကိၣ် တအိၣ်ဘၣ်ဒီး ကိၣ်မံၣ်ဘၣ်. မုၢ်ခီၣ်ထံးတနံၤန့ၣ်ဒၣ်လဲာ်သုဘၣ်ပာ်ကွံာ်ကိၣ်မံၣ်လၢသုဟံၣ်ပူၤလီၤ. အဂ့ၢ်ဒ်အံၤ, ပှၤလၢအအီၣ်ကိၣ်အိၣ်ဒီးကိၣ်မံၣ်လၢ မုၢ်ခီၣ်ထံး တုၤလၢမုၢ်နွံနံၤတနံၤတဂၤဂၤန့ၣ်, ကဘၣ်တၢ်ဒီၣ်တဲာ်ကွံာ်အီၤဒီးအံၣ်စရ့လးလီၤ. ၁၆ ဒီးလၢမုၢ်ခီၣ်ထံးန့ၣ်တၢ်ကိးဖှိၣ်စီဆှံ, ဒီးလၢမုၢ်နွံနံၤတနံၤန့ၣ် တၢ်ကိးဖှိၣ်စီဆှံကအိၣ်လၢသုဂီၢ်လီၤ. လၢမုၢ်နံၤတဖၣ်န့ၣ်အတီၢ်ပူၤ သုတဘၣ်မၤတၢ်နီတမံၤဘၣ်. မၤထဲတၢ်လၢကယဲၢ်ပှၤဘၣ်အီၣ်ဧိၤလီၤ. ဘၣ်မၤထဲန့ၣ်ဧိၤလီၤ.
it-1 ၅၀၄ ¶၁
တၢ်ကိးဖှိၣ်စီဆှံ
“တၢ်ကိးဖှိၣ်စီဆှံ” တဖၣ်အတၢ်လီၤဆီတမံၤန့ၣ်မ့ၢ်ဝဲ ဖဲတၢ်အိၣ်ဖှိၣ်အဆၢကတီၢ် ပှၤတဘၣ်မၤတၢ်နီတမံၤဘၣ်. အဒိ မူးပွဲလၢ တၢ်ဘူၣ်ကိၣ်တအိၣ်ဘၣ်ဒီးကိၣ်မံၣ် အခီၣ်ထံးတသီ ဒီးနွံသီတသီန့ၣ် မ့ၢ်ဝဲ “တၢ်ကိးဖှိၣ်စီဆှံ” လီၤ. ယဟိဝၤယွၤ မၤလိာ်ဝဲလၢ “လၢမုၢ်နံၤတဖၣ်န့ၣ်အတီၢ်ပူၤ သုတဘၣ်မၤတၢ်နီတမံၤဘၣ်. မၤထဲတၢ်လၢကယဲၢ်ပှၤဘၣ်အီၣ်ဧိၤလီၤ. ဘၣ်မၤထဲန့ၣ်ဧိၤလီၤ.” (၂ မိၤ. ၁၂:၁၅, ၁၆) ဘၣ်ဆၣ်ဖဲ “တၢ်ကိးဖှိၣ်စီဆှံ” အတီၢ်ပူၤန့ၣ် ပှၤလုၢ်တၢ်အဒိၣ်တဖၣ် အတၢ်မၤအါလၢ ကဟ့ၣ်လုၢ်ထီၣ်တၢ်လၢ ယဟိဝၤယွၤအဂီၢ်လီၤ. (၃ မိၤ. ၂၃:၃၇, ၃၈) ပှၤမၤတၢ်မၤလၢ တနံၤဘၣ်တနံၤအဂီၢ်န့ၣ် တမ့ၢ်တၢ်လၢအမၤကမၣ် တၢ်သိၣ်တၢ်သီဘၣ်. ဖဲမူးပွဲအဆၢကတီၢ် ပှၤပတီၢ်မုၢ်တဖၣ် တဘၣ်မၤလၢာ်ဂီၤတၢ်ဆၢကတီၢ်လၢ တမၤတၢ်မၤအဃိဘၣ်. မ့ၢ်တၢ်ဆၢကတီၢ်လၢ ပှၤကဒိးန့ၢ်ဘၣ် တၢ်အဘျုးအါမးလၢနီၢ်သးတခီလီၤ. ကိးနွံဒဲး မုၢ်အိၣ်ဘှံးနံၤန့ၣ် ပှၤဂီၢ်မုၢ်တဖၣ်ပာ်ဖှိၣ်ထီၣ်အသး ဒ်သိးကဘူၣ်ထီၣ်ဘါထီၣ်တၢ် ဒီးဒိးန့ၢ်ဘၣ်တၢ်ဟံးစုနဲၣ်ကျဲအဂီၢ်လီၤ. လၢခံဒ်ပှၤမၤလၢဘူၣ်ဘျီၣ်ပူၤအသိး အဝဲသ့ၣ်တဖၣ်န့ၣ် ဖးဝဲယွၤအကလုၢ်ကထါ ဒီးတဲနၢ်ပၢၢ်ဝဲအခီပညီလီၤ. (မၤတၢ်. ၁၅:၂၁) လၢတၢ်န့ၣ်အဃိ ပှၤတမၤတၢ်လၢ မုၢ်အိၣ်ဘှံးအနံၤ ဒီး “တၢ်ကိးဖှိၣ်စီဆှံ” အနံၤဘၣ်န့ၣ် မ့ၢ်ဒ်သိး ပှၤကဃ့ဘါထုကဖၣ် ဒီးဆိကမိၣ်ထံ တၢ်ဘၣ်တ့ကစၢ် ဒီးအတၢ်တိာ်ပာ်အဂ့ၢ်အဂီၢ်လီၤ.—See ASSEMBLY.
တၢ်ဖးလံာ်စီဆှံ
(၂ မိၤၡ့ ၁၂:၁-၂၀) ဒီးယွၤစံးဘၣ်စီၤမိၤၡ့, ဒီးစီၤအၤဟရိၣ်လၢကီၢ်အဲၤကူပတူးအပူၤ, ဒီးစံးဝဲဒၣ်, ၂ လါတလါအံၤကကဲထီၣ်လါတဖၣ်အခိၣ်, လါအခီၣ်ထံးလၢနံၣ်အပူၤလၢသုဂီၢ်လီၤ. ၃ ကတိၤတၢ်ဒီး ပှၤအံၣ်စရ့လးဖိအတၢ်အိၣ်ဖှိၣ်ခဲလၢာ်, ဒီးစံး, လါအံၤထီၣ်ဆံဆဲၣ်နံၤတနံၤန့ၣ်, ပှၤဘၣ်ဟံးန့ၢ်လၢသိ ဒီးမဲာ်တဲးလဲးအကျါ, အဖိလၢအဂီၢ်, တဂၤအဖိတဒု, တဂၤအဖိတဒု, ဒ်အပၢ်အဟံၣ်အသိး, အဖိတဒု လၢဟံၣ်တဖျၢၣ်အဂီၢ်လီၤ. ၄ ဒီးပှၤဟံၣ်ဖိ မ့ၢ်စှၤကဲၣ်ဆိးလၢ တၢ်အဖိတဒုအဂီၢ်ဒီး, မ်အဝဲဒၣ်ဒီးပှၤလၢအအိၣ်ဘူးဒီးအဟံၣ်န့ၣ်, ဟံးန့ၢ်ဒ်ပှၤကညီအသးအသိးန့ၣ်တက့ၢ်. သုဘၣ်ဂံၢ်ပှၤဒ်အအီၣ်လၢ အီၣ်တၢ်အသိးန့ၣ် လၢတၢ်အဖိအဂီၢ်ကိးဂၤဒဲးလီၤ. ၅ သုတၢ်အဖိတဒုဘၣ်မ့ၢ်အလၢအပှဲၤ, အဖါ, တနံၣ်အဖိလီၤ. လၢသိတဖၣ်အကျါမ့ၢ်ဂ့ၤ, လၢမဲာ်တဲးလဲးတဖၣ်အကျါမ့ၢ်ဂ့ၤ, သုဘၣ်ဟံးန့ၢ်အီၤလီၤ. ၆ ဒီးသုဘၣ်ပၢၤအီၤတုၤလၢ လါထီၣ်တဆံလွံၢ်နံၤတနံၤ လၢလါတလါဃီန့ၣ်လီၤ. ဒီးအံၣ်စရ့လး အပှၤဂီၢ်မုၢ်ခဲလၢာ် အတၢ်အိၣ်ဖှိၣ်န့ၣ် ဘၣ်မၤသံအီၤ လၢမုၢ်ဟါလီၤခံတီၤ အဘၢၣ်စၢၤန့ၣ်လီၤ. ၇ ဒီးဘၣ်ဟံးန့ၢ်အသွံၣ်တနီၤ ဒီးပာ်ဝဲလၢကျဲစၢၤအထူၣ်လိၤခံခီ, ဒီးလၢကျဲစၢၤအခိၣ်ပိာ်လိၤ, လၢဟံၣ်တဖၣ်ဖဲအကအီၣ်အီၤလီၤ. ၈ ဒီးတၢ်လၢမုၢ်နၤန့ၣ် ကဘၣ်အီၣ်အညၣ်ကၣ်လၢမ့ၣ်အူ, ဒီးကိၣ်တအိၣ်ဘၣ်ဒီးကိၣ်မံၣ်ဘၣ်, ဒီးဘၣ်အီၣ်ဝဲဒီးတၢ်ဒိးအခၣ်လီၤ. ၉ အီၣ်အီၤအသံကစဲာ်တဂ့ၤ. ချီအီၤဒီးထံလ့ၤတက့ၤတဂ့ၤ. ကၣ်အီၤလၢမ့ၣ်အူ, အခိၣ်, ဒီးအခီၣ်, ဒီးတၢ်အိၣ်လၢသအိအပူၤန့ၣ်တက့ၢ်. ၁၀ ဒီးဒုးအိၣ်လီၤတဲာ်တုၤမုၢ်ဆ့ၣ်ထီၣ်နီတစဲးတဂ့ၤ. ဒီးတၢ်လၢအအိၣ်လီၤတဲာ်တုၤမုၢ်ဂီၤန့ၣ်, သုဘၣ်ဆူးထီၣ်ကွံာ်အီၤလၢမ့ၣ်အူလီၤ. ၁၁ ဒီးသုဘၣ်အီၣ်အီၤဒ်အံၤ, သုယီၢ်ဒ့ကံၢ်တူာ်အသး, သုခီၣ်ဖံးအိၣ်လၢသုခီၣ်လိၤ, ဒီးသုနီၣ်ထိးဘိလၢသုစုပူၤလီၤ. ဒီးသုဘၣ်အီၣ်အီၤချ့ချ့လီၤ. မ့ၢ်ဝဲလၢယွၤအလဲၤကပာ်တၢ်လီၤ. ၁၂ အဂ့ၢ်ဒ်အံၤ, လၢမုၢ်တနၤအံၤ ယကလဲၤခီဂာ်ကီၢ်အဲၤကူပတူး, ဒီးယကကျီသံကွံာ်ကယဲၢ်တၢ်အဖိဝဲၢ်ကိလၢ ကီၢ်အဲၤကူပတူးအပူၤ လၢပှၤကညီတုၤလၢ ဆၣ်ဖိကီၢ်ဖိအဒၢ, ဒီးထီဒါအဲၤကူပတူးအကစၢ်တဖၣ်ခဲလၢာ်န့ၣ် ယကမၤတၢ်စံၣ်ညီၣ်လီၤ. ယဲဒၣ်အံၤယမ့ၢ်ယွၤလီၤ. ၁၃ ဒီးတၢ်သွံၣ်န့ၣ် ကကဲထီၣ်တၢ်ပနီၣ် လၢသုဂီၢ်လၢဟံၣ်လိၤဖဲသုအိၣ်လၢအပူၤ, ဒီးတုၤယထံၣ်တၢ်သွံၣ်န့ၣ်ဒီး, ယကလဲၤကပာ်သု, ဒီးတုၤယကျီကွံာ်ကီၢ်အဲၤကူပတူးဒီး, တၢ်သံသတြိာ် တဘၣ်ဘၣ်သု လၢတၢ်ဟးဂီၤအဂီၢ်ဘၣ်လီၤ. ၁၄ ဒီးတၢ်လၢမုၢ်နံၤအံၤ ကကဲထီၣ်တၢ်သ့ၣ်နီၣ်ထီၣ်က့ၤတၢ်လၢသုဂီၢ်, ဒီးသုဘၣ်တိၢ်န့ၢ်အီၤလၢ တၢ်မၤဘူၣ်ယွၤလီၤစိၤလီၤဃၣ်လီၤ. သုဘၣ်မၤအီၤလၢတၢ်မၤဘူၣ်လၢ တၢ်မၤလိာ်အထူအယိာ်လီၤ. ၁၅ နွံနံၤန့ၣ် သုဘၣ်အီၣ်ကိၣ် တအိၣ်ဘၣ်ဒီး ကိၣ်မံၣ်ဘၣ်. မုၢ်ခီၣ်ထံးတနံၤန့ၣ်ဒၣ်လဲာ်သုဘၣ်ပာ်ကွံာ်ကိၣ်မံၣ်လၢသုဟံၣ်ပူၤလီၤ. အဂ့ၢ်ဒ်အံၤ, ပှၤလၢအအီၣ်ကိၣ်အိၣ်ဒီးကိၣ်မံၣ်လၢ မုၢ်ခီၣ်ထံး တုၤလၢမုၢ်နွံနံၤတနံၤတဂၤဂၤန့ၣ်, ကဘၣ်တၢ်ဒီၣ်တဲာ်ကွံာ်အီၤဒီးအံၣ်စရ့လးလီၤ. ၁၆ ဒီးလၢမုၢ်ခီၣ်ထံးန့ၣ်တၢ်ကိးဖှိၣ်စီဆှံ, ဒီးလၢမုၢ်နွံနံၤတနံၤန့ၣ် တၢ်ကိးဖှိၣ်စီဆှံကအိၣ်လၢသုဂီၢ်လီၤ. လၢမုၢ်နံၤတဖၣ်န့ၣ်အတီၢ်ပူၤ သုတဘၣ်မၤတၢ်နီတမံၤဘၣ်. မၤထဲတၢ်လၢကယဲၢ်ပှၤဘၣ်အီၣ်ဧိၤလီၤ. ဘၣ်မၤထဲန့ၣ်ဧိၤလီၤ. ၁၇ ဒီးသုဘၣ်တိၢ်န့ၢ် ဘူၣ်ကိၣ်တအိၣ်ဘၣ် ဒီးကိၣ်မံၣ်လီၤ. အဂ့ၢ်ဒ်အံၤ, တၢ်လၢမုၢ်တနံၤအံၤဒၣ်လဲာ် ယဒုးဟးထီၣ်ကွံာ်သုသုးမုၢ်တဖၣ် လၢကီၢ်အဲၤကူပတူးအပူၤ, ဒီးသုဘၣ်တိၢ်န့ၢ် မုၢ်တနံၤအံၤလၢ သုစၢၤသုသွဲၣ်လၢတၢ်မၤလိာ်အထူအယိာ်လီၤ. ၁၈ လၢလါအခီၣ်ထံးတလါန့ၣ် လါထီၣ်တဆံလွံၢ်နံၤတနံၤလၢမုၢ်ဟါ, သုဘၣ်အီၣ်ကိၣ်တအိၣ်ဘၣ်ဒီးကိၣ်မံၣ်, တုၤလၢလါထီၣ်ခံဆံတနံၤလၢမုၢ်ဟါန့ၣ်လီၤ. ၁၉ နွံနံၤအတီၢ်ပူၤကိၣ်မံၣ်န့ၣ် တဘၣ်အိၣ်လၢသုဟံၣ်ပူၤဘၣ်. အဂ့ၢ်ဒ်အံၤ, ကယဲၢ်ပှၤလၢအအီၣ်တၢ်အိၣ်ဒီးကိၣ်မံၣ်တဂၤလၢ်လၢ်န့ၣ်, ပှၤတခီဘီတခီမုၢ်ဖိမ့ၢ်ဂ့ၤ, ပှၤအိၣ်ဖျဲၣ်လၢကီၢ်ပူၤမ့ၢ်ဂ့ၤ, အဝဲဒၣ်ကဘၣ် တၢ်ဒီၣ်တဲာ်ကွံာ်အီၤလၢ အံၣ်စရ့လးအတၢ်အိၣ်ဖှိၣ်န့ၣ်လီၤ. ၂၀ တၢ်အိၣ်ဒီးကိၣ်မံၣ်န့ၣ်သုတဘၣ်အီၣ်နီတမံၤဘၣ်. သုဘၣ်အီၣ်ကိၣ်တအိၣ်ဘၣ် ဒီးကိၣ်မံၣ်လၢသုအိၣ်သုဆိးအလီၢ်ကိးပူၤဒဲးလီၤ.