ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမၢ်ၡး ၇-၁၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၁၂-၁၃
“တၢ်ပာ်ထီၣ်ထီသးန့ၣ် လီၤမဲာ်ဆှးဒိၣ်မး”
တၢး၀၀ ၈/၁ ၁၃ ¶၁၇
တၢ်ပာ်ထီၣ်ထီသးန့ၣ် လီၤမဲာ်ဆှးဒိၣ်မး
၁၇ ကစၢ်ယွၤအပှၤဂီၢ်မုၢ်န့ၣ် ထံၣ်ဘၣ် “တၢ်ကိၢ်တၢ်ဂီၤ” ဒီးအဝဲသ့ၣ် ကနိးကစုာ်ဝဲခီဖျိလၢ တၢ်အိၣ်သးလၢအကီအခဲတဖၣ်အဃိလီၤ. အဃိ တၢ်လၢစီၤစီလူးမၤဝဲန့ၣ် ဘၣ်သ့ၣ်သ့ၣ် ပှၤကဆိကမိၣ်ဘၣ်လၢ အကြၢးဝဲဘၣ်ဝဲလီၤ. (၁ ၡမူၤအ့လး ၁၃:၆, ၇) ဖဲတၢ်လိၣ်အိၣ်ဝဲအဆၢကတီၢ် ပှၤမ့ၢ်ဂုာ်ကျဲးစၢးမၤတၢ်တမံၤမံၤန့ၣ် တမ့ၢ်တၢ်လၢအကမၣ်ဘၣ်. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ယဟိဝၤယွၤ သ့ၣ်ညါဝဲပသး ဒီးနၢ်ပၢၢ်ဝဲ ပတၢ်ပာ်သူၣ်ပာ်သးခဲလၢာ်လီၤ. (၁ ၡမူၤအ့လး ၁၆:၇) ဘၣ်ဃးဒီး စီၤစီလူး အတၢ်ဂ့ၢ်တနီၤလၢ လံာ်စီဆှံတပာ်ဖျါထီၣ်ဝဲ လီၤတံၢ်လီၤဆဲးဘၣ်န့ၣ် ယဟိဝၤယွၤသ့ၣ်ညါဝဲ. အဒိ ဘၣ်သ့ၣ်သ့ၣ် ယဟိဝၤယွၤ ကထံၣ်ဝဲလၢ စီၤစီလူး အတၢ်ဝံသးစူၤတအိၣ်ဘၣ်န့ၣ် ခီဖျိလၢ အပာ်ထီၣ်ထီသးအဃိလီၤ. ပှၤအံၣ်စရ့လးဖိ အစီၤပၤလၢအမ့ၢ် စီၤစီလူးန့ၣ် ဘၣ်သ့ၣ်သ့ၣ် ကထံၣ်ဝဲစီၤၡမူၤအ့လး ဒ်သိးဒီးဝံသးပှၢ်တဂၤလၢ အထုးယံာ်တၢ်ဆၢကတီၢ် အဃိအသးကအ့န့ဖးဒိၣ်ညါ. ဒ်လဲၣ်ဂ့ၤဒ်လဲၣ်ဂ့ၤ အဝဲကဆိကမိၣ်ဘၣ်ဝဲလၢ စီၤၡမူၤအ့လး ဟဲစၢၤခံအဃိ အဝဲအိၣ်ဒီးတၢ်ခွဲးတၢ်ယာ်လၢ ကမၤဖဲအသး ဒီးတလိၣ်ဒိကနၣ် တၢ်ဟံးစုနဲၣ်ကျဲလၢ အဒိးန့ၢ်ဘၣ်ဝဲလၢ ယဟိဝၤယွၤ အအိၣ်လီၤတံၢ်လီၤဆဲးန့ၣ်ဘၣ်. တၢ်ကဲထီၣ်အသးဒ်လဲၣ်. စီၤၡမူၤအ့လး တပတြၢၤအီၤလၢ အမၤတၢ်သ့ၣ်တဖၣ်န့ၣ်အဃိဘၣ်. လၢတၢ်န့ၣ်အလီၢ် စီၤၡမူၤအ့လး သိၣ်အီၤ ဒီးတဲအီၤလၢ “နဘီနမုၢ်တအိၣ်ဂၢၢ်ဆိးကျၢၤဘၣ်ဘၣ် . . . အဂ့ၢ်ဒ်အံၤ, နတတိၢ်န့ၢ်ဘၣ်တၢ်လၢယွၤမၤလိာ်နၤဘၣ်.” (၁ ၡမူၤအ့လး ၁၃:၁၃, ၁၄) ခီဖျိလၢ အပာ်ထီၣ်ထီသးအဃိ ဒိးန့ၢ်ဘၣ် တၢ်မဲာ်ဆှးလံ.
တၢး၀၇ ၆/၁၅ ၂၇ ¶၈
ယဟိဝၤယွၤ ပာ်လုၢ်ပာ်ပှ့ၤ နတၢ်ဒိကနၣ်
၈ လံာ်စီဆှံတၢ်ကွဲးနီၣ်ကွဲးဃါလၢ ဘၣ်ဃးဒီး စီၤပၤစီလူးအဂ့ၢ်န့ၣ် ပာ်ဖျါထီၣ်ဝဲလၢ တၢ်ဒိကနၣ် မ့ၢ်တၢ်လၢအရ့ဒိၣ်ဒိၣ်မးလီၤ. ဖဲစီၤစီလူး ကဲထီၣ်စီၤပၤသီသီအခါ အဝဲအိၣ်ဒီးတၢ်ဆီၣ်လီၤသး ဒီးအဝဲဆိကမိၣ်လီၤအသးလၢအမ့ၢ် “ပှၤအဆံး” တဂၤလီၤ. ဘၣ်ဆၣ်လၢခံ အတၢ်ပာ်ထီၣ်ထီသးန့ၣ် ဒိၣ်စိလၢအဖီခိၣ် ဒီးအဝဲတဲပူၤဖျဲးအသးလၢ အတၢ်ကမၣ်အဃိလီၤ. (၁ ၡမူၤအ့လး ၁၀:၂၁, ၂၂; ၁၅:၁၇) အဒိ ဘၣ်တဘျီ စီၤစီလူး ကဘၣ်လဲၤဒုးတၢ်ဒီး ပှၤဖလ့ၡသးဖိတဖၣ်, စီၤၡမူၤအ့လး မၢစီၤပၤစီလူး အိၣ်ခိးအီၤလၢ အဝဲကဟဲလုၢ်ထီၣ်တၢ်လၢ ယဟိဝၤယွၤအအိၣ် ဒီးဟ့ၣ်အီၤတၢ်ဟံးစုနဲၣ်ကျဲအဂီၢ်လီၤ. ဘၣ်ဆၣ် ပှၤဆိကမိၣ်လၢ စီၤၡမူၤအ့လး ဟဲစၢၤခံအဃိ ပှၤလီၤပြံလီၤပြါဝဲ, ဖဲစီၤစီလူးထံၣ်ဝဲဒ်န့ၣ်အခါအဝဲ “လုၢ်ဝဲလၢတၢ်လုၢ်မ့ၣ်အူလီၤ.” ဘၣ်ဆၣ် ယဟိဝၤယွၤတဘၣ်သူၣ်ဘၣ်သးဝဲဘၣ်. ဖဲစီၤၡမူၤအ့လး ဟဲတုၤအခါ စီၤပၤန့ၣ် တဲပူၤဖျဲးအသး ဒီးတဲဝဲလၢ ခီဖျိလၢ စီၤၡမူၤအ့လး ဟဲစၢၤခံအဃိ ‘ယဘၣ်မၤဆူၣ်ယသး, ဒီးလုၢ်တၢ်လုၢ်မ့ၣ်အူ’ လၢကဒိးန့ၢ်ဘၣ် ယဟိဝၤယွၤ အတၢ်ဘၣ်သးအဂီၢ်လီၤ. စီၤပၤစီလူး ကလုၢ်ထီၣ်တၢ်လုၢ်န့ၣ် ထံၣ်ဝဲလၢအရ့ဒိၣ်န့ၢ်ဒံး ကဒိကနၣ် တၢ်ဟံးစုနဲၣ်ကျဲလၢ ကဘၣ်အိၣ်ခိးဝဲ စီၤၡမူၤအ့လး လၢကဟဲလုၢ်ထီၣ်တၢ်အဂီၢ်လီၤ. စီၤၡမူၤအ့လး တဲအီၤလၢ “နမၤလံပှၤဟးဂီၤဖိအတၢ်မၤလံ. နတတိၢ်န့ၢ်ဘၣ် ယွၤအတၢ်မၤလိာ်လၢအမၤလိာ်နၤဘၣ်.” စီၤစီလူး တဒိကနၣ် ယဟိဝၤယွၤအကလုၢ်ဘၣ်အဃိ တကဲဘၣ်စီၤပၤလၢၤဘၣ်.—၁ ၡမူၤအ့လး ၁၀:၈; ၁၃:၅-၁၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၁ ၇/၁၅ ၁၃ ¶၁၅
နကမၤထွဲ ယဟိဝၤယွၤ အတၢ်ဟံးစုနဲၣ်ကျဲလၢ အပှဲၤဒီးတၢ်အဲၣ်န့ၣ်ဧါ
၁၅ ဘၣ်သ့ၣ်သ့ၣ် ပှၤတဖၣ်န့ၣ် ကဆိကမိၣ်ဘၣ်ဝဲလၢ အဝဲသ့ၣ်ထံၣ်ဝဲ ပှၤဟီၣ်ခိၣ်ဖိအစီၤပၤသ့အဃိ နာ်န့ၢ်ဝဲသ့အါန့ၢ်ဒံး ယဟိဝၤယွၤဒံး. အဝဲသ့ၣ်မ့ၢ်ဆိကမိၣ်ဝဲ ဒ်န့ၣ်န့ၣ် မ့ၢ်ဒၣ်အလူၤပိာ်ထွဲဝဲ တၢ်ကလီကလီအခံလီၤ. ဒီးတၢ်ဘၣ်ယိၣ်အလီၢ်အိၣ်လၢ အဝဲသ့ၣ် ကလူၤပိာ်ထွဲဝဲ တၢ်ကလီကလီအဂၤတဖၣ်လၢ အဟဲလၢမုၣ်ကိၤလံၢ်အအိၣ်လီၤ. ပှၤဟီၣ်ခိၣ်ဖိအစီၤပၤတဖၣ်န့ၣ် ညီလၢကကွဲန့ၢ်လွဲန့ၢ်ဝဲ ပှၤဂၤလၢကဘူၣ်ထီၣ်ဘါထီၣ် တၢ်ဂီၤတၢ်ဖှီၣ်အဂီၢ်လီၤ. ယဟိဝၤယွၤ တ့လီၤတၢ်ခဲလၢာ် သနာ်က့ ပှၤလၢအဘါတၢ်ဂီၤတၢ်ဖှီၣ်တဖၣ်န့ၣ် ဆိကမိၣ်ဝဲလၢ ယွၤသ့ၣ်, ယွၤလၢၢ်လၢ ပှၤထံၣ်အီၤသ့တဖၣ်န့ၣ် ပှၤနာ်န့ၢ်အီၤသ့အါန့ၢ်ဒံး ယဟိဝၤယွၤ လၢပှၤထံၣ်အီၤ တသ့ဘၣ်န့ၣ်လီၤ. ဘၣ်ဆၣ် ဒ်တၢ်မၢဖိပီလူး တဲဝဲအသိး တၢ်ဂီၤတၢ်ဖှီၣ်တဖၣ်န့ၣ် “တမ့ၢ်တၢ်နီတမံၤဘၣ်.” (၁ ကရံၣ်. ၈:၄) တၢ်ဂီၤတၢ်ဖှီၣ်တဖၣ်အံၤ ထံၣ်တၢ်, နၢ်ဟူတၢ်, တဲတၢ် မ့တမ့ၢ် မၤတၢ်တသ့နီတမံၤဘၣ်. တၢ်ဂီၤတၢ်ဖှီၣ်တဖၣ်အံၤ နထံၣ်အီၤမ့ၢ်သ့ ဒီးနဖီၣ်အီၤမ့ၢ်သ့ သနာ်က့ နမ့ၢ်ဘူၣ်ထီၣ်ဘါထီၣ်အီၤန့ၣ် မ့ၢ်ဒၣ်နလူၤတၢ်ကလီကလီလၢ အကဒုးအိၣ်ထီၣ် တၢ်ဟးဟူာ်ဟးဂီၤလီၤ.—စံး. ၁၁၅:၄-၈.
လါမၢ်ၡး ၁၄-၂၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၁၄-၁၅
“ဒိကနၣ်တၢ်န့ၣ်ဂ့ၤန့ၢ်လုၢ်တၢ်”
တၢး၀၇ ၆/၁၅ ၂၆ ¶၄
ယဟိဝၤယွၤ ပာ်လုၢ်ပာ်ပှ့ၤ နတၢ်ဒိကနၣ်
၄ ယဟိဝၤယွၤန့ၣ် မ့ၢ်တၢ်ဘၣ်တ့ကစၢ်အဃိ တၢ်ခဲလၢာ်န့ၣ် မ့ၢ်အတၢ်လီၤ. မ့မ့ၢ်ဒ်န့ၣ်န့ၣ် ပဟ့ၣ်ဆၢက့ၤအီၤတၢ်ကသ့ တမံၤမံၤဧါ. ပဟ့ၣ်အီၤတၢ်လၢ အလုၢ်ဒိၣ်ပှ့ၤဒိၣ်တမံၤသ့ဝဲလီၤ. ကမ့ၢ်ဝဲတၢ်မနုၤလဲၣ်. ကစၢ်ယွၤတဲဝဲလၢ “ယဖိခွါဧၢ, ကူၣ်တၢ်သ့, ဒီးမၤခုယသး ဒ်သိးယကစံးဆၢပှၤလၢ အဒုၣ်ဒွဲၣ်ယၤန့ၣ်တက့ၢ်.” (ကတိၤဒိ ၂၇:၁၁) တၢ်လၢပဟ့ၣ်ဆၢက့ၤ ကစၢ်ယွၤသ့န့ၣ် မ့ၢ်ဝဲပဒိကနၣ်အကလုၢ်လီၤ. မုၣ်ကီၤလံၢ်တဲဝဲလၢ ပဝဲပှၤဟီၣ်ခိၣ်ဖိတဖၣ် မ့ၢ်ထံၣ်ဘၣ်တၢ်မၤကွၢ်န့ၣ် ပတတီဒီးကစၢ်ယွၤလၢၤဘၣ်. ပဝဲတဂၤဒီးတဂၤ ပတၢ်အိၣ်သးတဒ်သိးလိာ်အသးဘၣ် သနာ်က့ ပမ့ၢ်ဒိကနၣ် ကစၢ်ယွၤအကလုၢ်န့ၣ် မ့ၢ်ဒၣ်ပစံးဆၢက့ၤ မုၣ်ကီၤလံၢ်လၢအမ့ၢ် ပှၤလီတၢ်လီၤ.
it-2 ၅၂၁ ¶၂
တၢ်ဒိကနၣ်
ပှၤလၢတအိၣ်ဒီး တၢ်ဒိကနၣ်န့ၣ် တဒိးန့ၢ်ဘၣ် ကစၢ်ယွၤအတၢ်ဘၣ်သးဘၣ်. စီၤၡမူၤအ့လး တဲဘၣ် စီၤပၤစီလူးလၢ “ဘၣ်ယွၤအသးလၢတၢ်လုၢ်မ့ၣ်အူ, ဒီးတၢ်လုၢ်, ထဲသိးဒီးအဘၣ်အသးလၢ တၢ်ဒိကနၣ်ယွၤအကလုၢ်အကထါန့ၣ်ဧါ. ကွၢ်ကွၢ်, ဒိကနၣ်တၢ်န့ၣ်ဂ့ၤန့ၢ်လုၢ်တၢ်, ဒီးစူၢ်တၢ်န့ၣ်ဂ့ၤန့ၢ်သိဖါ အသိတက့ၢ်လီၤ.” (၁ မူၤ. ၁၅:၂၂) ပှၤမ့ၢ်တဒိကနၣ် ယဟိဝၤယွၤ အကလုၢ်ဘၣ်န့ၣ် ပာ်ဖျါထီၣ်ဝဲလၢ တနာ်န့ၢ်ကစၢ်ယွၤ ဒီးအကလုၢ်ကထါဘၣ်. အဃိ ပှၤလၢတအိၣ်ဒီး တၢ်ဒိကနၣ်တဖၣ်န့ၣ် တလီၤဆီလိာ်အသးဒီး ပှၤလၢအမၤတၢ်ဝံတၢ်နါအတၢ်ဖံးတၢ်မၤတဖၣ် ဒီးပှၤလၢအဘါတၢ်ဂီၤတၢ်ဖှီၣ်တဖၣ်န့ၣ်ဘၣ်. (၁ မူၤ. ၁၅:၂၃; ထိၣ်သတြီၤဒီး ရိ. ၆:၁၆) ပှၤမ့ၢ်တဲဝဲလၢ အတူၢ်လိာ်တၢ်ဟံးနဲၣ်ကျဲတမံၤမံၤ သနာ်က့ မ့ၢ်တမၤထွဲဝဲဘၣ်န့ၣ် မ့ၢ်ဒၣ်အပာ်ဖျါထီၣ်ဝဲလၢ အဝဲတနာ် ဒီးတပာ်ကဲ ပှၤလၢအဟံးစုနဲၣ်ကျဲတၢ်တဂၤန့ၣ်ဘၣ်. (မး. ၂၁:၂၈-၃၂) ပှၤလၢအနၢ်ဟူ ဒီးတူၢ်လိာ်ဝဲ ကစၢ်ယွၤ အတၢ်မ့ၢ်တၢ်တီ ဒီးမ့ၢ်တမၤထွဲဝဲဘၣ်န့ၣ် အဝဲမ့ၢ်ပှၤလၢအလီလီၤအသး ဒီးတဒိးန့ၢ်ဘၣ် ကစၢ်ယွၤ အတၢ်ဆိၣ်ဂ့ၤနီတမံၤဘၣ်. (ယၤ. ၁:၂၂-၂၅) ကစၢ်ယွၤအဖိခွါ တဲဝဲလၢ ပှၤတနီၤကမၤတၢ်ဒ် အလီၤဂာ်ဒီး တၢ်လၢကစၢ်ယွၤ မၢပှၤမၤဝဲအသိး ဘၣ်ဆၣ် ခီဖျိလၢ အဝဲသ့ၣ် တမၤဝဲဒ်ကစၢ်ယွၤ အတၢ်ဘၣ်သးအသိးဘၣ် မ့တမ့ၢ် အတၢ်ပာ်သူၣ်ပာ်သးတဂ့ၤဘၣ်အဃိ တနုာ်လီၤဘၣ်လၢ ယွၤအဘီအမုၢ်အပူၤဘၣ်.—မး. ၇:၁၅-၂၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၄၉၃
တၢ်သးကညီၤ
ဖဲကစၢ်ယွၤ တအဲၣ်ဒိးလၢ ပပာ်ဖျါထီၣ်တၢ်သးကညီၤ အဆၢကတီၢ် ပမ့ၢ်ပာ်ဖျါထီၣ် တၢ်သးကညီၤန့ၣ် ကကဲထီၣ်တၢ်ကီတၢ်ခဲလီၤ. ဘၣ်ဃးဒီး တၢ်ဂ့ၢ်အံၤန့ၣ် ပကထံၣ်ဘၣ်လၢ စီၤပၤစီလူးအဒိအတဲာ်လီၤ. ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအခါ တၢ်ဂ့ၢ်တအိၣ်ဘၣ်သနာ်က့ ပှၤဧမၤလ့းဖိတဖၣ် ဟဲဒုးအဝဲသ့ၣ်အဃိ ယဟိဝၤယွၤ မၤလိာ်အဝဲသ့ၣ်လၢ ကဘၣ်မၤသံကွံာ် ပှၤဧမၤလ့းဖိတဖၣ်ခဲလၢာ်လီၤ. ကစၢ်ယွၤ မၤလိာ်စီၤစီလူးလၢ တဘၣ်သးကညီၤ ပှၤဧမၤလ့းဖိတဖၣ်ဘၣ်. ဘၣ်ဆၣ် ခီဖျိလၢ ပှၤဆီၣ်သနံးအီၤအဃိ အဝဲတဒိကနၣ် ယဟိဝၤယွၤ အတၢ်ဟံးစုနဲၣ်ကျဲ လီၤတံၢ်လီၤဆဲးဘၣ်. အဃိ ယဟိဝၤယွၤ သုးကွံာ်စီၤစီလူးလၢ စီၤပၤအလီၢ်လီၤ. (၁ မူၤ. ၁၅:၂-၂၄) ပှၤတဂၤမ့ၢ်မၤအါထီၣ် အတၢ်သ့ၣ်ညါဆၢက့ၤတၢ်ဘျုးတၢ်ဖှိၣ်လၢ ဘၣ်ဃးဒီး ယဟိဝၤယွၤ အတၢ်ဘျၢလၢအတီအလိၤ ဒီးမ့ၢ်အိၣ်ဒီးတၢ်သးတီလၢ ကစၢ်ယွၤအဖီခိၣ်န့ၣ် တမ့ၢ်လၢအဝဲကမၤဘၣ် တၢ်ကမၣ်ဒ် စီၤစီလူးအသိးဘၣ်. ဒီးကဒိးန့ၢ်ဘၣ်ကစၢ်ယွၤ အတၢ်ဘၣ်သးလီၤ.
လါမၢ်ၡး ၂၁-၂၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၁၆-၁၇
“တၢ်ဒုးအံၤ မ့ၢ်ယွၤအတၢ်”
wp၁၆.၅ ၁၁ ¶၂-၃
“တၢ်ဒုးအံၤ မ့ၢ်ယဟိဝၤယွၤအတၢ်”
ဒ်သိးစီၤစီလူး အသးသုတကိၢ်တၢ်တဂ့ၤအဂီၢ် စီၤဒၤဝံးတဲဘၣ်အီၤလၢ အဝဲမၤနၢၤဘၣ်ဝဲ ခ့ဃုၢ် ဒီးတၤသူလီၤ. မ့ၢ်အဝဲတဲဒိၣ်လီၤအသးဟီဧါ. တမ့ၢ်ဘၣ်. ဘၣ်မနုၤအဃိ အဝဲမၤနၢၤဝဲ ဆၣ်ဖိကီၢ်ဖိလဲၣ်န့ၣ် စီၤဒၤဝံးသ့ၣ်ညါဝဲဂ့ၤဂ့ၤလီၤ. အဝဲတဲဝဲလၢ “ယွၤလၢအမၤပူၤဖျဲးယၤဒီးခ့ယုၢ်အစု, ဒီးတၤသူအစုန့ၣ် ကမၤပူၤဖျဲးယၤဒီး ပှၤဖလ့ၡသးဖိတဂၤန့ၣ် အစုပူၤလီၤ.” လၢခံစီၤစီလူး ဟ့ၣ်စီၤဒၤဝံးအခွဲး ဒီးတဲဝဲလၢ “လဲၤတၢ်, ဒီးမ်ယွၤအိၣ်ဒီးနၤတက့ၢ်.”—၁ ၡမူၤအ့လး ၁၇:၃၇
မ့ၢ်နအဲၣ်ဒိး အိၣ်ဒီးတၢ်နာ်ဒ် စီၤဒၤဝံးအသိးဧါ. ပာ်သူၣ်ပာ်သး စီၤဒၤဝံးအတၢ်နာ်န့ၣ် တမ့ၢ်ထဲလၢ အတၢ်ဆိကမိၣ် ဒီးအတၢ်သးအိၣ်မၤတၢ်ဘၣ်. အဝဲအတၢ်နာ်န့ၣ် သန့ၤထီၣ်အသးလၢ တၢ်သ့ၣ်ညါကစၢ်ယွၤ ဒီးအတၢ်လဲၤခီဖျိတဖၣ်. အဝဲသ့ၣ်ညါဝဲလၢ ယဟိဝၤန့ၣ် မ့ၢ်တၢ်အဲၣ်တၢ်ကွံကစၢ်လၢ အဒီသဒၢအခ့အပှၤတဖၣ် ဒီးတီဒီးအတၢ်အၢၣ်လီၤအီလီၤတဖၣ်လီၤ. ပမ့ၢ်အဲၣ်ဒိးအိၣ်ဒီး တၢ်နာ်ဒ်သိးန့ၣ်န့ၣ် ပကဘၣ်မၤလိ ကစၢ်ယွၤအဂ့ၢ်လၢ လံာ်စီဆှံအပူၤထီဘိ. ဖဲပအိၣ်မူမၤထွဲဒ် တၢ်လၢပမၤလိဘၣ်အီၤတဖၣ်အသိးအခါ ပသ့ၣ်ညါလၢ အကဲဘျုးလၢပဂီၢ် ဒီးမၤဂၢၢ်ကျၢၤထီၣ် ပတၢ်နာ်လီၤ.—ဧ့ၤဘြံၤ ၁၁:၁
wp၁၆.၅ ၁၁-၁၂
“တၢ်ဒုးအံၤ မ့ၢ်ယဟိဝၤယွၤအတၢ်”
စီၤဒၤဝံးအတၢ်ကတိၤလၢ အပာ်ဖျါထီၣ်အတၢ်နာ်န့ၣ် ကဲဘျုးတုၤလၢပစိၤခဲအံၤလီၤ. ထံၣ်တမှံကွၢ်လၢ ပှၤသးစၢ်တဂၤ ကိးပသူထီၣ် ဒီးတဲဝဲ စီၤကၤလယးလၢ “နဟဲဆူယအိၣ်ဒီး နး, ဒီးဘီ, ဒီးကတီၤလီၤ. မ့မ့ၢ်ယဲဒၣ်အံၤယဟဲဆူနအိၣ်လၢ တၢ်သုးမုၢ်ဂီၢ်မုၢ်အယွၤအမံၤ, အံၣ်စရ့လးအပှၤ သုးမုၢ်ဂီၢ်မုၢ်အကစၢ်လၢ နမၤတရီတပါအီၤလီၤ.” စီၤဒၤဝံးသ့ၣ်ညါဝဲလၢ ပှၤဟီၣ်ခိၣ်ဖိ အတၢ်စိတၢ်ကမီၤ ဒီးအတၢ်စုကဝဲၤန့ၣ် တမ့ၢ်တၢ်နီတမံၤဘၣ်. စီၤကၤလယး တပာ်ကဲယဟိဝၤယွၤဘၣ်အဃိ ယဟိဝၤယွၤ မၤကၣ်က့ၤအီၤလီၤ. လၢတၢ်န့ၣ်အဃိ စီၤဒၤဝံးတဲဝဲလၢ “တၢ်ဒုးတၢ်အံၤ မ့ၢ်ယွၤအတၢ်လီၤ.”—၁ ၡမူၤအ့လး ၁၇:၄၅-၄၇
စီၤကၤလယး အမိၢ်ပှၢ်ဒိၣ်ထဲလဲၣ် ဒီးအတၢ်စုကဝဲၤအိၣ်ဒ်လဲၣ်န့ၣ် စီၤဒၤဝံးသ့ၣ်ညါပာ်ဝဲဂ့ၤဂ့ၤလီၤ. ဘၣ်ဆၣ် စီၤဒၤဝံးတဟ့ၣ်အခွဲးလၢ တၢ်သ့ၣ်တဖၣ်န့ၣ် ကကဲထီၣ်တၢ်လီၤပျံၤလီၤဖုးလၢ အဂီၢ်ဘၣ်. ဒီးအဝဲတမၤကမၣ်တၢ်ဒ် စီၤစီလူး ဒီးအသုးမုၢ်တဖၣ်အသိးဘၣ်. အဝဲတထိၣ်သတြီၤလီၤအသးဒီး စီၤကၤလယးဘၣ်. လၢတၢ်န့ၣ်အလီၢ် အဝဲထိၣ်သတြီၤဝဲ စီၤကၤလယးဒီး ယဟိဝၤယွၤလီၤ. စီၤကၤလယးန့ၣ် အနီၢ်ထီဝဲ ခွံပ့ၣ်ဘျဲၣ် ဒီးဒိၣ်န့ၢ်ထီန့ၢ်ပှၤအဂၤတဖၣ် သနာ်က့ ပှၤမ့ၢ်ထိၣ်သတြီၤအီၤဒီး ယွၤလၢအတ့လီၤတၢ်ခဲလၢာ်န့ၣ် အဝဲကဒိၣ်ဝဲထဲလဲၣ်. ဒ်ပှၤအဂၤတဖၣ်အသိး အဝဲစ့ၢ်ကီး ကအိၣ်ထဲသိး တၢ်ဖိဃၢ်ဖိ ဒီးယဟိဝၤယွၤ ပာ်လီၤအသးလၢ ကမၤဟးဂီၤကွံာ်အီၤလီၤ.
wp၁၆.၅ ၁၂ ¶၄
“တၢ်ဒုးအံၤ မ့ၢ်ယဟိဝၤယွၤအတၢ်”
လၢပျၢၤန့ၣ် ကစၢ်ယွၤအခ့အပှၤတဖၣ် လဲၤဒုးတၢ် ဘၣ်ဆၣ်မုၢ်မဆါတနံၤအံၤန့ၣ် ယဟိဝၤယွၤ အခ့အပှၤတဖၣ် တပၣ်ဃုာ်လၢ တၢ်ဒုးတၢ်ယၤအပူၤဘၣ်. (မး. ၂၆:၅၂) ဘၣ်ဆၣ် လိၣ်လၢပကဘၣ် ဆဲးကွၢ်လိမၤဒိး စီၤဒၤဝံး အတၢ်နာ်လီၤ. ဒ်စီၤဒၤဝံးအသိး ပကဘၣ်ထံၣ် ယဟိဝၤယွၤ ဒ်ပှၤနီၢ်နီၢ်တဂၤ, ပကဘၣ်ဘူၣ်ထီၣ်ဘါထီၣ်အီၤ ဒီးယူးယီၣ်ပာ်ကဲအီၤလီၤ. တဘျီတခီၣ် ဖဲပထံၣ်ဘၣ် တၢ်ကီတၢ်ခဲတဖၣ်အခါ ပသးဟးဂီၤသ့ သနာ်က့ ပမ့ၢ်ထိၣ်သတြီၤ ပတၢ်ကီတၢ်ခဲဒီး ယဟိဝၤယွၤလၢ အပှဲၤဒီးတၢ်စိတၢ်ကမီၤန့ၣ် ပတၢ်ကီတၢ်ခဲတဖၣ် မ့ၢ်ဒၣ်တၢ်ဆံးဆံးဖိလီၤ. ဒ်စီၤဒၤဝံးအသိး ပမ့ၢ်ဃုထၢ ယဟိဝၤယွၤ ဒ်အမ့ၢ်ပကစၢ်ယွၤ ဒီးပမ့ၢ်နာ်န့ၢ်အီၤလၢလၢပှဲၤပှဲၤန့ၣ် ပမ့ၢ်ထံၣ်ဘၣ် တၢ်ကီတၢ်ခဲဒ်လဲၣ်ဂ့ၤဒ်လဲၣ်ဂ့ၤ ပတပျံၤတၢ်လၢၤဘၣ်. တၢ်လၢအဒိၣ်န့ၢ်ထီန့ၢ် ယဟိဝၤယွၤအစိကမီၤန့ၣ် တအိၣ်နီတမံၤဘၣ်. ပကမၤနၢၤတၢ်သပှၢ်ကတၢၢ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၈၇၁-၈၇၂
စီၤစီလူး
တၢ်ကဲထီၣ်အသးတဖၣ်အံၤ ဒီးယဟိဝၤယွၤ ဒိးဖှူဝဲ စီၤဒၤဝံး ဒ်ခါဆူညါ ပှၤအံၣ်စရ့လးဖိ အစီၤပၤအသိး ဝံၤအလီၢ်ခံ ကစၢ်ယွၤအသးစီဆှံ တအိၣ်ဒီးစီၤစီလူးလၢၤဘၣ်. စးထီၣ်ဖဲန့ၣ် “သးအၢတမံၤလၢယွၤန့ၣ်” မၤကိၢ်မၤဂီၤအီၤလီၤ. ကစၢ်ယွၤအသးစီဆှံ တအိၣ်ဒီးအီၤလၢၤဘၣ်အဃိ စီၤစီလူးအသးလၢ အတဂ့ၤအံၤ မၤကိၢ်မၤဂီၤအီၤနးမးလီၤ. အတၢ်တူၢ်ဘၣ်, အတၢ်ဆိကမိၣ် ဒီးအတၢ်ပာ်သူၣ်ပာ်သးန့ၣ် ကဲထီၣ်တၢ်လၢအကမၣ်ခဲလၢာ်လီၤ. အဝဲတဒိကနၣ် ယဟိဝၤယွၤအကလုၢ်န့ၣ် ပာ်ဖျါထီၣ်လၢ အဝဲအိၣ်ဒီး တၢ်ပာ်သူၣ်ပာ်သးလၢ အတဂ့ၤဘၣ်လီၤ. လၢတၢ်န့ၣ်အဃိ ကစၢ်ယွၤ အသးစီဆှံ တဒီသဒၢအီၤလၢၤဘၣ်. ကစၢ်ယွၤဟ့ၣ်အခွဲးလၢ “သးအၢတမံၤ” ကမၤကိၢ်မၤဂီၤအီၤအဃိ စီၤစီလူးအကုၢ်တဖၣ် တဲအီၤလၢ “သးအၢတမံၤလၢယွၤန့ၣ်” မၤကိၢ်မၤဂီၤအီၤလီၤ. စီၤစီလူးအခ့အပှၤတဖၣ် ဟ့ၣ်ကူၣ်အီၤလၢဖဲ “သးအၢတမံၤ” မၤတံာ်တာ်အီၤတဘျီလၢ်လၢ်အခါ မၢအကိးန့ၢ် ပှၤဒ့တၢ်ဖိစီၤဒၤဝံးဆူနီပူၤ လၢကဒ့န့ၢ်အီၤတၢ် ဒ်သိးအဝဲပာ်အသး မုာ်မုာ်ခုၣ်ခုၣ်ကန့ၢ်အဂီၢ်လီၤ.—၁ မူၤ. ၁၆:၁၄-၂၃; ၁၇:၁၅.
လါမၢ်ၡး ၂၈–လါအ့ဖြ့ၣ် ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၁၈-၁၉
“ဆဲးအိၣ်ဒီး တၢ်ဆီၣ်လီၤသး ဖဲတၢ်ကဲထီၣ်လိၣ်ထီၣ်အခါ”
တၢး၀၄ ၄/၁ ၁၅ ¶၄
လၢပတၢ်အိၣ်မူအပူၤ ဖဲပဘၣ်သဂၢၢ်ဒီး တၢ်ဆီတလဲတဖၣ်အခါ သန့ၤနသးလၢ ကစၢ်ယွၤအသးစီဆှံတက့ၢ်
၄ တယံာ်တမီၢ် ပှၤကွၢ်သိဖိအံၤ ကကဲထီၣ်ပှၤမံၤဟူသၣ်ဖျါလၢ ထံကီၢ်အပူၤလီၤ. စီၤပၤကွဲမုာ်အီၤလၢ ကဟဲမၤတၢ်မၤလၢအနီပူၤ ဒီးကဒ့န့ၢ်အီၤတနၢ်လီၤ. ပှၤအံၣ်စရ့လိဖိအသုးဖိလၢ အအိၣ်ဒီးတၢ်လဲၤခီဖျိတဖၣ် ဒုးဝဲစီၤကၤလယးလၢ အလီၤပျံၤလီၤဖုးတဂၤအံၤတဘူၣ်ဘၣ်. ဘၣ်ဆၣ် စီၤဒၤဝံးမၤသံကွံာ်ဝဲလီၤ. စီၤဒၤဝံးဒိးန့ၢ်ဘၣ် မူဒါလၢ ကတီခိၣ်ရိၤမဲဝဲတၢ်ဒုးတဖၣ် ဒီးအဝဲမၤနၢၤဝဲ ပှၤဖလ့ၡသးဖိတဖၣ်လီၤ. အဃိ ပှၤဂီၢ်မုၢ်တဖၣ်အဲၣ်အီၤဒိၣ်မး. အဝဲသ့ၣ်ကွဲးဝဲ တၢ်သးဝံၣ်လၢ စီၤဒၤဝံးအဂီၢ် ဒီးသးဝံၣ်စံးပတြၢၤအီၤလၢ အကလုၢ်ဖးဒိၣ်လီၤ. လၢအခီၣ်ထံးခါ ဘၣ်ဃးဒီး သးစၢ်ဒၤဝံးန့ၣ် စီၤပၤစီလူး ပာ်ဖျါထီၣ်ဝဲလၢ အဝဲမ့ၢ်ပှၤလၢ “အသ့ၣ်ညါဒ့တၢ်, ဒီးမ့ၢ်ဝဲလၢပှၤအဆူၣ်, ဒီးပှၤအသးခူတလ့ၢ်, ဒီးပှၤသုးဖိ, ဒီးပှၤအသူၣ်ဆးအသးဆး, ဒီးအက့ၢ်အဂီၤဂ့ၤ” လီၤ.—၁ ၡမူၤအ့လး ၁၆:၁၈; ၁၇:၂၃, ၂၄, ၄၅-၅၁; ၁၈:၅-၇.
နကထံၣ်ဘၣ် ပှၤလၢအမၤယဟိဝၤယွၤ အတၢ်မၤ ဒီးပှၤလၢတမၤဘၣ်တဖၣ် အတၢ်လီၤဆီလိာ်အသး
၆ ပှၤတနီၤနီၤန့ၣ် အဝဲသ့ၣ်ပာ်ဒိၣ်လီၤအသး မ့ၢ်လၢအဝဲသ့ၣ် ဒိၣ်တၢ်ဂ့ၤ, အမံၤဒိၣ်, အဖၠဲးလၢတၢ်ဒ့တၢ်အူ ဒီးတၢ်သူၣ်ဝံၣ်သးဆၢ, အဂံၢ်ဆူၣ် မ့တမ့ၢ် ခီဖျိလၢပှၤဂၤပတြၢၤအီၤအဃိလီၤ. တၢ်သ့ၣ်တဖၣ်အံၤန့ၣ် အိၣ်ဒီးစီၤဒၤဝံးခဲလၢာ် ဘၣ်ဆၣ် အဝဲဆီၣ်လီၤသး လၢအတၢ်အိၣ်မူဒီတကတီၢ်အပူၤလီၤ. အဒိ, ဖဲစီၤဒၤဝံး မၤသံစီၤကၤလယးဝံၤအလီၢ်ခံ စီၤပၤစီလူး တဲအီၤလၢကဟ့ၣ်အီၤအဖိမုၣ်လီၤ. ဘၣ်ဆၣ် စီၤဒၤဝံး တဲဝဲလၢ– “ဒ်သိးယကကဲထီၣ်စီၤပၤအမာ်ဒီး, ယမ့ၢ်မတၤတဂၤလဲၣ်. ဒီးယသးသမူမ့ၢ်ဂ့ၤ, ယပၢ်အဟံၣ်လၢအံၣ်စရ့လးအကျါမ့ၢ်ဂ့ၤ, မ့ၢ်မနုၤလဲၣ်.” (၁ ၡမူၤအ့လး ၁၈:၁၈) ဒ်သိးစီၤဒၤဝံး ကအိၣ်ဒီးတၢ်ဆီၣ်လီၤသးအဂီၢ် တၢ်မနုၤမၤစၢၤအီၤလဲၣ်. အဝဲသ့ၣ်ညါဝဲလၢ ကစၢ်ယွၤအိၣ်ဒီးတၢ်ဆီၣ်လီၤသး ဒီးသူၣ်အိၣ်သးအိၣ်အီၤအဃိ အဝဲဒိးန့ၢ်ဘၣ်ဝဲ တၢ်ဂ့ၤတၢ်ဝါ, တၢ်သ့တၢ်ဘၣ် ဒီးတၢ်ခွဲးတၢ်ယာ်တဖၣ်အံၤလီၤ. (စံးထီၣ်ပတြၢၤ ၁၁၃:၅-၈) ဒီးစီၤဒၤဝံးသ့ၣ်ညါဝဲလၢ ကယဲၢ်တၢ်အဂ့ၤလၢ အိၣ်ဒီးအီၤခဲလၢာ်န့ၣ် ဟဲလၢယဟိဝၤယွၤအအိၣ်လီၤ.—ထိၣ်သတြီၤကွၢ်ဒီး ၁ ကရံၣ်သူး ၄:၇.
၇ ယဟိဝၤယွၤအခ့အပှၤလၢ မုၢ်မဆါတနံၤအံၤတဖၣ် အိၣ်ဒီး တၢ်ဆီၣ်လီၤသး ဒ်စီၤဒၤဝံးအသိးလီၤ. ပသ့ၣ်ညါလၢ ယဟိဝၤယွၤလၢအမ့ၢ် ယွၤလၢအထီကတၢၢ်တဂၤန့ၣ် အိၣ်ဒီးတၢ်ဆီၣ်လီၤသးအဃိ အလီၤသူၣ်မံသးမုာ်ဒိၣ်မးလီၤ. (စံးထီၣ်ပတြၢၤ ၁၈:၃၅) လံာ်စီဆှံတဲဝဲလၢ– “ကူထီၣ်သိးထီၣ် တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်တက့ၢ်.” ပဂုာ်ကျဲးစၢးမၤထွဲ ဒ်လံာ်စီဆှံတဆၢအံၤအသိးလီၤ. (ကလီးစဲ ၃:၁၂) ပသ့ၣ်ညါစ့ၢ်ကီးလၢ တၢ်အဲၣ်န့ၣ် “တပာ်ဘၣ်အသးကဖၢလၢဘၣ်, တပာ်ထီၣ်ထီဘၣ်အသးဘၣ်.” (၁ ကရံၣ်သူး ၁၃:၄) ဖဲပှၤအဂၤတဖၣ် ထံၣ်ဝဲလၢပအိၣ်ဒီးတၢ်ဆီၣ်လီၤသးအခါ အဝဲသ့ၣ်တဖၣ်စ့ၢ်ကီး ကအဲၣ်ဒိးသ့ၣ်ညါထီၣ် ယဟိဝၤယွၤအဂ့ၢ်လီၤ. မါအတၢ်သကဲာ်ပဝးလၢအဂ့ၤန့ၣ် ထိၣ်ဟူးထိၣ်ဂဲၤထီၣ် အဝၤလၢကဘူၣ်ထီၣ်ဘါထီၣ် ယဟိဝၤယွၤသ့ဝဲလီၤ. ဒ်န့ၣ်အသိး ပှၤအဂၤတဖၣ် မ့ၢ်ထံၣ်ဝဲ ယွၤအခ့အပှၤတဖၣ် အတၢ်ဆီၣ်လီၤသးန့ၣ် အဝဲသ့ၣ်ကအဲၣ်ဒိးသ့ၣ်ညါထီၣ် ယဟိဝၤယွၤလီၤ.—၁ ပ့းတရူး ၃:၁
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၆၉၅-၆၉၆
ဝံ
ယဟိဝၤယွၤ ဒိဖှူဝဲဝံတဖၣ်လၢ အသးစီဆှံ သနာ်က့ တၢ်လၢဝံတဖၣ်တဲဝဲန့ၣ် တဟဲခီဖျိလၢ သးစီဆှံခဲလၢာ်ဘၣ်. ဖဲကစၢ်ယွၤအသးစီဆှံ ‘ဟဲလီၤလၢ အဝဲသ့ၣ်အလိၤ’ အခါမး အဝဲသ့ၣ်တဲဝဲ တၢ်ကစီၣ်လၢကဘၣ်တဲဝဲလီၤ. (ဃ့း. ၁၁:၄, ၅; မံ. ၃:၈) လၢတၢ်န့ၣ်အဃိ ဖဲသးစီဆှံဟဲလီၤလၢ အဝဲသ့ၣ်အလိၤအခါ အဝဲသ့ၣ်တဲတၢ်လၢဝံကျိာ် လၢတၢ်သူၣ်ဆူၣ်သးဆူၣ်အပူၤလီၤ. (၁ မူၤ. ၁၀:၁၀; ယံး. ၂၀:၉; ဧၤ. ၃:၈) အဝဲသ့ၣ်အတၢ်ဖံးတၢ်မၤတဖၣ်န့ၣ် လီၤဆီန့ၢ်ဒံး တၢ်လၢအမၤညီနုၢ်ဝဲ တကးဒံးဘၣ် အဝဲသ့ၣ် အတၢ်စံးတၢ်ကတိၤ ဒီးတၢ်လၢအမၤဝဲတဖၣ်န့ၣ် လီၤကမၢကမၣ်ဒိၣ်မး. လၢတၢ်န့ၣ်အဃိ ပှၤတဲလၢအဝဲသ့ၣ် “ကတိၤတၢ်လၢ ဝံအကျိာ်” လီၤ. (၁ မူၤ. ၁၀:၆-၁၁; ၁၉:၂၀-၂၄; ယံး. ၂၉:၂၄-၃၂; ထိၣ်သတြီၤဒီး မၤတၢ် ၂:၄, ၁၂-၁၇; ၆:၁၅; ၇:၅၅) ဝံတဖၣ်ဖဲအဒိးန့ၢ်ဘၣ်မူဒါအခါ အဝဲသ့ၣ်သးစၢၢ်ဆၢ ဒီးမၤလၢပှဲၤဝဲလၢ တၢ်သူၣ်ဆူၣ်သးဆူၣ် ဒီးတၢ်သူၣ်ဒူသးဒူအပူၤလီၤ. အဃိကဲထီၣ် တၢ်လီၤကမၢကမၣ်လၢ ပှၤဂၤအဂီၢ်. ဖဲဝံတဂၤလဲၤဒိးဖှူ စီၤယ့ၤဟူအခါတၢ်ကဲထီၣ်အသးဒ်န့ၣ်လီၤ. ဘၣ်ဆၣ် ဖဲသုးခိၣ်တဖၣ် သ့ၣ်ညါဝဲလၢ ပှၤတဂၤန့ၣ် မ့ၢ်ဝဲဝံတဂၤအခါ အဝဲသ့ၣ်ပာ်ကဲအီၤလီၤ. (၂ စီၤပၤ. ၉:၁-၁၃; ထိၣ်သတြီၤဒီး မၤတၢ်. ၂၆:၂၄, ၂၅) ဖဲစီၤစီလူးလူၤဖီၣ် စီၤဒၤဝံးအခါ အဝဲမၤဝဲဒ် ဝံတဂၤအသိးလီၤ. အဝဲဘ့ၣ်လီၤကွံာ်အဆ့ကၤ “အိၣ်ဘ့ၣ်ဆ့သ့တနံၤကျၢၤဒီး သီတနၤကျၢၤလီၤ.” ဖဲန့ၣ်အဆၢကတီၢ် စီၤဒၤဝံးဃ့ၢ်ကွံာ်ဝဲလီၤ. (၁ မူၤ. ၁၉:၁၈–၂၀:၁) ဘၣ်ဆၣ် တအဲၣ်ဒိးတဲဝဲလၢ ဝံတဖၣ်ဟးဘ့ၣ်ဆ့ ကြီကြီဘၣ်. လံာ်စီဆှံစ့ၢ်ကီး တပာ်ဖျါထီၣ်ဝဲဒ်န့ၣ်ဘၣ်. တၢ်ကွဲးနီၣ်ကွဲးဃါ အဂၤခံတီၤ ပာ်ဖျါဝဲလၢ မ့ၢ်လၢတၢ်ဂ့ၢ်အိၣ်ဝဲအဃိ ဝံတဖၣ်အကူအကၤ တအိၣ်လၢအလိၤဘၣ်. (ၡါ. ၂၀:၂-၄; မံ. ၁:၈-၁၁) စီၤစီလူး ဘ့ၣ်လီၤကွံာ်အကူအကၤန့ၣ် ဘၣ်သ့ၣ်သ့ၣ် အဲၣ်ဒိးပာ်ဖျါဝဲလၢ အဝဲမ့ၢ်ပှၤယိယိဖိ ဒီးပှၤမ့ၢ်ထိၣ်သတြီၤအီၤဒီး ယဟိဝၤယွၤအတၢ်ပၢ ဒီးအတၢ်စိတၢ်ကမီၤန့ၣ် အဝဲတမ့ၢ်တၢ်နီတမံၤဘၣ်.
km ၁/၀၃ ၁
တၢ်မၤလၢ လိၣ်လၢပကဘၣ်အိၣ်ဒီး တၢ်ဆီၣ်လီၤသး
၁ ကစၢ်ယွၤ အကလုၢ်ကထါ သိၣ်လိပှၤလၢ ပကဘၣ်အိၣ်ဒီး ‘တၢ်ဆီၣ်လီၤသး, မၤဆၢက့ၤတၢ်အၢလၢ တၢ်အၢတဂ့ၤ . . . ဟ့ၣ်ဆၢက့ၤတၢ်လၢ တၢ်ဆိၣ်ဂ့ၤ.’ (၁ ပ့း. ၃:၈, ၉) တၢ်ဟ့ၣ်ကူၣ်အံၤ ဘၣ်ထွဲလိာ်အသးဒီး တၢ်စံၣ်တဲၤတဲလီၤတၢ်မၤလီၤ. တၢ်စံၣ်တဲၤတဲလီၤတၢ်မၤန့ၣ် မ့ၢ်တၢ်မၤလၢ အမၤကွၢ်ပတၢ်နာ်လီၤ.
၂ တၢ်ဆီၣ်လီၤသးန့ၣ် မ့ၢ်ဝဲတၢ်ဂ့ၤတၢ်ဝါတခါလၢ အမၤစၢၤပှၤလၢ ပကအိၣ်ဒီး တၢ်တူၢ်န့ၢ်ခီၣ်ကဲ လၢတၢ်အိၣ်သးလၢအကီခဲတဖၣ်အပူၤလီၤ. ဖဲပလဲၤစံၣ်တဲၤတဲလီၤတၢ်အခါ ပဘၣ်လဲၤလၢ ပှၤလၢပတသ့ၣ်ညါအီၤ ဒီးပသ့ၣ်ညါလၢအဝဲသ့ၣ်တနီၤန့ၣ် ကသးထီၣ်ပှၤလီၤ. အဃိဖဲပထံၣ်ဘၣ် တၢ်အိၣ်သးဒ်သိးအံၤအခါ ပကဆဲးစံၣ်တဲၤတဲလီၤတၢ်အဂီၢ် ပလိၣ်ဘၣ် တၢ်ဆီၣ်လီၤသးလီၤ. ဒီပုၢ်ဝဲၢ်မုၣ်လၢအမၤပှၤလဲၤလၢညါခံဂၤ လဲၤစံၣ်တဲၤတဲလီၤတၢ်လၢ တၢ်လီၢ်လၢအကီအခဲလၢ ပှၤတတူၢ်လိာ်တၢ်မ့ၢ်တၢ်တီနီတဂၤဘၣ် သနာ်က့ လၢခံနံၣ်အတီၢ်ပူၤန့ၣ် အဝဲသ့ၣ် လဲၤစံၣ်တဲၤတဲလီၤတၢ်လၢ တဟံၣ်ဘၣ်တဟ့ၣ်ကိးနံၤဒဲးလီၤ. ခီဖျိလၢ အဝဲသ့ၣ် အိၣ်ဒီးတၢ်ဝံသးစူၤအဃိ ခဲအံၤတၢ်လီၢ်အဝဲန့ၣ် တၢ်အိၣ်ဖှိၣ်အိၣ်ခံဖျၢၣ်လံ.
၃ ပမ့ၢ်ထံၣ်ဒီးပှၤလၢအသးဒိၣ်ထီၣ်တၢ်န့ၣ် ပကမၤဒ်လဲၣ်. ဖဲပှၤအဂၤတဖၣ် မ့ၢ်တဲဆါပှၤ မ့တမ့ၢ် မ့ၢ်သးထီၣ်ပှၤအခါ တၢ်ဆီၣ်လီၤသးန့ၣ် ကမၤစၢၤပှၤလၢ ပကကွၢ်လိမၤဒိး ယ့ၣ်ၡူးလီၤ. (၁ ပ့း. ၂:၂၁-၂၃) ဖဲဒီပုၢ်ဝဲၢ်မုၣ်တဂၤ လဲၤဝဲလၢဟံၣ်တဖျၢၣ်အခါ ပှၤနီၢ်ဒီမါဝၤခံဂၤ ကိးဃါအီၤ ဒီးမၢအဟးထီၣ်ကွံာ်လၢအဟံၣ်. ဖဲန့ၣ်အခါ ဒီပုၢ်ဝဲၢ်မုၣ်အံၤ နံၤကမှံထီၣ် ဒီးတဲဘၣ်အဝဲသ့ၣ်လၢ ယမုၢ်လၢ်လၢ ပကတဲသကိးဘၣ်တၢ်လၢ ဆၢကတီၢ်အဂၤတဘျီ. ခီဖျိလၢ ဒီပုၢ်ဝဲၢ်မုၣ်အံၤ မၤဝဲဒ်အံၤအဃိ ထုးန့ၢ်ပှၤနီၢ်ဒီမါဝၤခံဂၤအသး ဒီးလၢခံဖဲယဟိဝၤပှၤအုၣ်အသးအတဂၤလဲၤအခါ အဝဲသ့ၣ်ဒိကနၣ်ဝဲ တကးဘၣ် ဖဲပှၤကွဲမုာ်အီၤလၢ ကဟဲထီၣ်တၢ်အိၣ်ဖှိၣ်လၢ ဘီမုၢ်ဘျီၣ်ဒိၣ်အခါ အဝဲသ့ၣ်တူၢ်လိာ်ဝဲစ့ၢ်ကီးလီၤ. ဒီပုၢ်ဝဲၢ်မုၣ်လၢ အဆိကတၢၢ် ပှၤကိးဃါအီၤတဂၤန့ၣ် လဲၤတူၢ်လိာ်မုာ်အဝဲသ့ၣ် ဒီးတဲသကိးတၢ်လၢ ကစံၣ်တဲၤတဲလီၤအီၤအဂီၢ်လီၤ. ပဝဲသ့ၣ်တဖၣ်စ့ၢ်ကီး ပမ့ၢ်ပာ်ဖျါထီၣ် “တၢ်သးစူၤ ဒီးတၢ်ပာ်ကဲဒိၣ်မး” န့ၣ် ဘၣ်သ့ၣ်သ့ၣ် ပကထုးန့ၢ်ပှၤလၢ တအဲၣ်ဒိးတူၢ်လိာ်ပှၤတဖၣ်အသးလီၤ.—၁ ပ့း. ၃:၁၅; ကတိၤ. ၂၅:၁၅.
၄ ဟးဆှဲး တၢ်ပာ်ထီၣ်ထီသး. ပတၢ်သ့ၣ်ညါနၢ်ပၢၢ်လၢ ဘၣ်ဃးဒီးလံာ်စီဆှံန့ၣ် တမ့ၢ်လၢ ပကထံၣ်ဆံးပှၤဂၤ မ့တမ့ၢ် တဲဟးဆါပှၤအဂီၢ်ဘၣ်. (ယိၤ. ၇:၄၉) ကစၢ်ယွၤအကလုၢ်ကထါ ဟ့ၣ်ကူၣ်ပှၤလၢပ “တဘၣ်တဲအၢတဲသီ ပှၤနီတဂၤဘၣ်.” (တံတူး ၃:၂) ဒ်ယ့ၣ်ၡူးအသိး ဖဲပအိၣ်ဒီး တၢ်ဆီၣ်လီၤသးအခါ မၤသးခုပှၤဂၤအသးလီၤ. (မး. ၁၁:၂၈, ၂၉) ပမ့ၢ်အိၣ်ဒီးတၢ်ဆီၣ်လီၤသးန့ၣ် ပှၤကအဲၣ်ဒိးဒိကနၣ် ပတၢ်ကစီၣ်လီၤ.
၅ မ့ၢ်လီၤ, တၢ်ဆီၣ်လီၤသးန့ၣ် မၤစၢၤပှၤလၢ ပကဆဲးစံၣ်တဲၤတဲလီၤတၢ်လၢ တၢ်လီၢ်လၢပှၤတအဲၣ်ဒိး ဒိကနၣ်ဘၣ်န့ၣ်လီၤ. တၢ်ဆီၣ်လီၤသးန့ၣ် မၤလီၤကပုာ်ပှၤလၢ တအဲၣ်ဒိးဒိကနၣ်တၢ်တဖၣ်အသးသ့ ဒီးထုးန့ၢ်ပှၤသးလၢ ကတူၢ်လိာ် ဘီမုၢ်တၢ်သးခုကစီၣ်အဂီၢ်လီၤ. တကးဒံးဘၣ် ယဟိဝၤယွၤန့ၣ် “ပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ်” လၢပှၤလၢအဆီၣ်လီၤအသးတဖၣ်အဖီခိၣ်လီၤ. အဃိ ပှၤလၢအိၣ်ဒီးတၢ်ဆီၣ်လီၤသးန့ၣ် ကဒိးန့ၢ်ဘၣ် ယဟိဝၤယွၤအတၢ်ဘၣ်သးလီၤ.—၁ ပ့း. ၅:၅
လါအ့ဖြ့ၣ် ၄-၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၂၀-၂၂
“နကဲထီၣ်တံၤသကိးလၢ အဂ့ၤတဂၤကသ့ဒ်လဲၣ်”
တချုးလၢ တၢ်အကတၢၢ် ဟဲဒံးဘၣ်န့ၣ် မၤဂၢၢ်ကျၢၤထီၣ် သုတၢ်ရ့လိာ်သး
၁၈ မုၢ်မဆါတနံၤအံၤ ပဒီပုၢ်ဝဲၢ်မုၣ်ခွါတဖၣ် ထံၣ်ဘၣ်ဒီး တၢ်ကီတၢ်ခဲအါမးလီၤ. အဒိ အဝဲသ့ၣ် ထံၣ်ဘၣ်ဒီး န့ဆၢၣ်အတၢ်ဘၣ်ဒိဘၣ်ထံး မ့တမ့ၢ် တၢ်ကီတၢ်ခဲလၢ အဟဲကဲထီၣ်ခီဖျိလၢ ပှၤဟီၣ်ခိၣ်ဖိ မၤဝဲတဖၣ်န့ၣ်လီၤ. ဖဲတၢ်သ့ၣ်တဖၣ်အံၤ ဟဲကဲထီၣ်အသးအခါ ပဝဲတနီၤန့ၣ် ပမၢအဝဲသ့ၣ် ဟဲအိၣ်ဒီးပှၤသ့လီၤ. ဒီးပဝဲတနီၤန့ၣ် ပမၤစၢၤအဝဲသ့ၣ်လၢ ကျိၣ်စ့တကပၤသ့ဝဲလီၤ. ဘၣ်ဆၣ် ပဝဲခဲလၢာ်န့ၣ် ပဃ့တၢ်မၤစၢၤလၢ ယဟိဝၤယွၤအအိၣ် လၢပဒီပုၢ်ဝဲၢ်မုၣ်ခွါတဖၣ်အဂီၢ်သ့လီၤ. ဖဲပသ့ၣ်ညါလၢ ပဒီပုၢ်ဝဲၢ်မုၣ် မ့တမ့ၢ် ပဒီပုၢ်ဝဲၢ်ခွါတဂၤဂၤ အသးဂံၢ်ဘါလီၤစၢ်အခါ ပကဘၣ် တဲတၢ်မနုၤလဲၣ်, မၤတၢ်မနုၤလဲၣ်န့ၣ် ဘၣ်သ့ၣ်သ့ၣ် ပတသ့ၣ်ညါဘၣ်. ဘၣ်ဆၣ် ပဝဲခဲလၢာ်န့ၣ် ပမၤစၢၤ အဝဲသ့ၣ်သ့လီၤ. အဒိ ပဟ့ၣ်တၢ်ဆၢကတီၢ်လၢ အဝဲသ့ၣ်အဂီၢ်သ့လီၤ. ဒီးဖဲအဝဲသ့ၣ် တဲတၢ်ဒီးပှၤအခါ ပဒိကနၣ်န့ၢ်အီၤ လၢတၢ်အဲၣ်တၢ်ကွံအပူၤသ့လီၤ. ဒီးပတဲဘၣ်အဝဲသ့ၣ်လၢ လံာ်စီဆှံအဆၢလၢ အမၤမုာ်ထီၣ်ပှၤတဖၣ်သ့လီၤ. (ယၡါယၤ ၅၀:၄) တၢ်လၢအရ့ဒိၣ်ကတၢၢ်န့ၣ် ဖဲအဝဲလိၣ်ဘၣ်နၤ အဆၢကတီၢ် နကဘၣ်မၤချုးနသးလီၤ.—ဖး ကတိၤဒိ ၁၇:၁၇ တက့ၢ်.
တၢး၀၈ ၂/၁၅ ၈ ¶၇
လဲၤတၢ်လၢ ယဟိဝၤယွၤအကျဲပူၤ
၇ ကစၢ်ယွၤမုၢ်လၢ်ဝဲလၢ ပကကဲထီၣ် တံၤသကိးလၢ ပှၤနာ်န့ၢ်အီၤသ့. (ကတိၤ. ၁၇:၁၇) စီၤပၤစီလူး အဖိခွါ စီၤယိနၤသၣ်န့ၣ် မ့ၢ်ဝဲစီၤဒၤဝံးအတံၤသကိးလီၤ. ဖဲစီၤယိနၤသၣ် နၢ်ဟူဝဲလၢ စီၤဒၤဝံးမၤသံ စီၤကၤလယးအခါ “စီၤယိနၤသၣ်အသးစဲဘူးဒီး စီၤဒၤဝံးအသး, ဒီးစီၤယိနၤသၣ်အဲၣ်အီၤ ဒ်အသးဒၣ်ဝဲအသိးန့ၣ်လီၤ.” (၁ မူၤ. ၁၈:၁, ၃) စီၤယိနၤသၣ် ဟ့ၣ်ပလီၢ်စီၤဒၤဝံးလၢ စီၤစီလူးအဲၣ်ဒိးမၤသံအီၤ. ဖဲစီၤဒၤဝံး ဃ့ၢ်ပူၤဖျဲးအသးဝံၤအခါ စီၤယိနၤသၣ် လဲၤထံၣ်လိာ်အသးဒီးအီၤ ဒီးမၤတၢ်အၢၣ်လီၤအီလီၤဒီးအီၤ. ဖဲစီၤယိနၤသၣ် တဲသကိးတၢ်ဒီးစီၤစီလူး ဘၣ်ဃးဒီး စီၤဒၤဝံးအဂ့ၢ်အခါ ကဲထီၣ်တၢ်ဘၣ်ယိၣ်လၢ အသးသမူအဂီၢ် သနာ်က့ အဝဲလဲၤထံၣ်လိာ်ကဒီးအသးဒီး စီၤဒၤဝံး ဒီးမၤဂၢၢ်ကျၢၤထီၣ်အတၢ်ရ့လိာ်သးလီၤ. (၁ မူၤ. ၂၀:၂၄-၄၁) ဖဲအဝဲသ့ၣ်ထံၣ်လိာ်အသး အလီၢ်ခံကတၢၢ်တဘျီအခါ စီၤယိနၤသၣ် ဟ့ၣ်ဂံၢ်ဟ့ၣ်ဘါ စီၤဒၤဝံး “ဒီးဒုးဆူၣ်ထီၣ်အစုလၢယွၤအပူၤလီၤ.”—၁ မူၤ. ၂၃:၁၆-၁၈.
တၢး၀၉ ၁၀/၁၅ ၁၉ ¶၁၁
ဆဲးပၢၤဃာ်တၢ်ရ့လိာ်သးလၢအဂ့ၤ လၢဟီၣ်ခိၣ်လၢ တၢ်အဲၣ်လီၤစှၤဝဲတဖျၢၣ်အံၤအပူၤ
၁၁ အိၣ်ဒီးတၢ်သးတီ. စီၤၡလိၤမိၤကွဲးဝဲလၢ “ပှၤအတံၤအသကိးအဲၣ်တၢ် ကိးအဆၢအကတီၢ်ဒဲး, ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.” (ကတိၤ. ၁၇:၁၇) ဖဲစီၤၡလိၤမိၤ ကွဲးဝဲတၢ်ကတိၤတဖၣ်အံၤအခါ ဘၣ်သ့ၣ်သ့ၣ် အဝဲကသ့ၣ်နီၣ်ထီၣ်က့ၤဝဲ အပၢ်စီၤဒၤဝံး ဒီးစီၤယိနၤသၣ် အတၢ်ရ့လိာ်သးလီၤ. (၁ မူၤ. ၁၈:၁) စီၤပၤစီလူးန့ၣ် အဲၣ်ဒိးလၢအဖိခွါ စီၤယိနၤသၣ် ကထီၣ်အလီၢ် ဒီးကဲထီၣ်ပှၤအံၣ်စရ့လးဖိအစီၤပၤလီၤ. ဘၣ်ဆၣ် မ့မ့ၢ်စီၤယိနၤသၣ်န့ၣ် တူၢ်လိာ်ဝဲ ယဟိဝၤယွၤ အတၢ်ရဲၣ်တၢ်ကျဲၤလၢအဃုထၢထီၣ်ဝဲ စီၤဒၤဝံးလၢ တၢ်ခွဲးတၢ်ယာ်အံၤအဂီၢ်လီၤ. စီၤယိနၤသၣ်န့ၣ် တဒ်သိးဒီး စီၤစီလူးဘၣ် အဝဲတသူၣ်က့ၣ်သးကါ စီၤဒၤဝံးဘၣ်. ဖဲစီၤဒၤဝံး ဒိးန့ၢ်ဘၣ်တၢ်စံးပတြၢၤအခါ စီၤယိနၤသၣ် တသးဒိၣ်ထီၣ်တၢ်ဘၣ် တကးဒံးဘၣ် ဖဲစီၤစီလူး တဲစီၤဒၤဝံးအဂ့ၢ်လၢ အတဂ့ၤအခါစ့ၢ်ကီး အဝဲတနာ်ဝဲဘၣ်. (၁ မူၤ. ၂၀:၂၄-၃၄) မ့ၢ်ပလီၤဂာ်ဒီး စီၤယိနၤသၣ်ဧါ. ဖဲပတံၤသကိးတဖၣ် ဒိးန့ၢ်ဘၣ်တၢ်ခွဲးတၢ်ယာ်လီၤဆီအခါ မ့ၢ်ပသးခု ဃုာ်ဒီးအဝဲသ့ၣ်ဧါ. ဖဲအဝဲသ့ၣ်ထံၣ်ဘၣ် တၢ်ကီတၢ်ခဲအခါ မ့ၢ်ပမၤမုာ်ထီၣ် ဒီးဆီၣ်ထွဲမၤစၢၤအဝဲသ့ၣ်ဧါ. ဖဲပနၢ်ဟူပှၤတဲ ပတံၤသကိးအဂ့ၢ်လၢ အတဂ့ၤအခါ မ့ၢ်ပနာ်အီၤတဘျီဃီဧါ. မ့တမ့ၢ် ဒ်စီၤယိနၤသၣ်အသိး ပကတီဒီးပတံၤသကိး ဒီးဒီသဒၢအီၤဧါ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၃/၁၅ ၂၄ ¶၄
လံာ်စီဆှံ အတၢ်ပာ်ဖျါလၢလံာ် ၁ ၡမူၤအ့လး အဂီၢ်
၂၁:၁၂, ၁၃. ဖဲပထံၣ်ဘၣ်တၢ်ကီတၢ်ခဲလၢ ပတၢ်အိၣ်မူပူၤအခါ ယဟိဝၤယွၤ အဲၣ်ဒိးလၢပကသူ ပတၢ်သ့တၢ်ဘၣ် ဒီးတၢ်သ့ၣ်ညါနၢ်ပၢၢ် ဒ်သိးပကမၤဘၣ်ဂီၢ်က့ၤ ပတၢ်ကီတၢ်ခဲအဂီၢ်လီၤ. ကစၢ်ယွၤ ဟ့ၣ်ပှၤအကလုၢ်ကထါလံာ်စီဆှံ ဒ်သိးကမၤစၢၤပှၤလၢ ပကအိၣ်ဒီး တၢ်သ့ၣ်ညါနၢ်ပၢၢ် ဒီးတၢ်သ့ဆိကမိၣ်တၢ်အဂီၢ်လီၤ. (ကတိၤဒိ ၁:၄) တကးဒံးဘၣ် ပအိၣ်ဒီးတၢ်အိၣ်ဖှိၣ်သးပှၢ်တဖၣ်လၢ ကမၤစၢၤပှၤလီၤ.
လါအ့ဖြ့ၣ် ၁၈-၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၂၃-၂၄
“အိၣ်ခိးယဟိဝၤယွၤလၢ တၢ်သူၣ်စူၤသးစူၤ”
တၢး၀၄ ၄/၁ ၁၆ ¶၈
လၢနတၢ်အိၣ်မူအပူၤ ဖဲနဘၣ်သဂၢၢ်ဒီး တၢ်ဆီတလဲတဖၣ်အခါ သန့ၤနသးလၢ ကစၢ်ယွၤအသးစီဆှံတက့ၢ်
၈ စီၤဒၤဝံး ဂ့ၢ်လိာ်ဝဲလၢ ကမၤဘၣ်ဒိ စီၤစီလူးလီၤ. အဝဲအိၣ်ဒီးတၢ်နာ် ဒီးတၢ်သးစူၤ ခီဖျိ ပာ်ထီၣ်အတၢ်ဂ့ၢ်တဖၣ်လၢ ယဟိဝၤယွၤအစုပူၤလီၤ. ဖဲစီၤပၤဟးထီၣ်လၢ လ့ကအိပူၤဝံၤအလီၢ်ခံ စီၤဒၤဝံး ကိးအီၤဒီးတဲအီၤလၢ “မ်ယွၤစံၣ်ညီၣ်တၢ်လၢယၤဒီးနၤအဘၢၣ်စၢၤ ဒီးယွၤမၤဆၢနၤလၢ တၢ်အၢလၢယဂီၢ်တက့ၢ်. မ့မ့ၢ်ယစုတအိၣ်ဘၣ်လၢနလိၤဘၣ်.” (၁ ၡမူၤအ့လး ၂၄:၁၂) အဝဲသ့ၣ်ညါဝဲလၢ စီၤစီလူး မၤကမၣ်တၢ် သနာ်က့ အဝဲတဟ့ၣ်ကၣ်က့ၤဝဲလၢ အနီၢ်ကစၢ်ဘၣ်. ဘၣ်ဃးဒီး စီၤစီလူးမ့ၢ်ဂ့ၤ စီၤစီလူးအဂ့ၢ်မ့ၢ်ဂ့ၤ အဝဲတတဲဟးဂီၤဝဲနီတဘျီဘၣ်. ဒီးလၢတၢ်အိၣ်အသး လၢအဂၤတဖၣ်စ့ၢ်ကီး အဝဲအိၣ်ဒီးတၢ်ကီၤသူၣ်ကီၤသး ဒ်သိးအသုတမၤကၣ်က့ၤဘၣ် တၢ်တဂ့ၤအဂီၢ်လီၤ. အဝဲသန့ၤအသးလၢ ယဟိဝၤယွၤ လၢကမၤဘၣ်ဂီၢ်န့ၢ် အတၢ်ကီတၢ်ခဲတဖၣ်လီၤ.—၁ ၡမူၤအ့လး ၂၅:၃၂-၃၄; ၂၆:၁၀, ၁၁.
တၢး၀၄ ၆/၁ ၂၂-၂၃
နတၢ်အိၣ်သးန့ၣ် ပၢၤဃာ်ဝဲ နတၢ်အိၣ်မူဧါ
တၢ်မၤလိသၢခါတခါန့ၣ်မ့ၢ်ဝဲ ပတဘၣ်မၤဘၣ်ဂီၢ်က့ၤ ပတၢ်အိၣ်သးတဖၣ်လၢ အတလီၤပလိာ်ဒီး လံာ်စီဆှံအတၢ်ဟံးစုနဲၣ်ကျဲဘၣ် လၢတၢ်န့ၣ်အလီၢ် ပကဘၣ်အိၣ်ခိး ယဟိဝၤယွၤ. တၢ်မၢဖိယၤကိာ် ကွဲးဝဲလၢ “မ်တၢ်တူၢ်န့ၢ်ခီၣ်ကဲ မၤဝံၤအတၢ်မၤ ဒ်သိးသုကလၢထီၣ်ပှဲၤထီၣ် လၢတၢ်ခဲလၢာ်အပူၤ ဒီးဒ်သိးသုသု တလီၤတူာ်လီၤကာ်လၢ တၢ်နီတမံၤတဂ့ၤအဂီၢ်တက့ၢ်.” (ယၤကိာ် ၁:၄) ပတဘၣ်ဃုကျဲလၢ အထီဒါလိာ်အသးဒီး လံာ်စီဆှံအတၢ်ဟံးစုနဲၣ်ကျဲ ဒ်သိးတၢ်ကီတၢ်ခဲတဖၣ် ကလီၤမၢ်ကွံာ်ဝဲ ချ့ချ့အဂီၢ်ဘၣ်. လၢတၢ်န့ၣ်အလီၢ် ပကဘၣ်ဟ့ၣ်အခွဲးလၢ တၢ်တူၢ်န့ၢ်ခီၣ်ကဲက “မၤဝံၤအတၢ်မၤ” လီၤ. ပမ့ၢ်မၤဒ်န့ၣ်န့ၣ် ပတၢ်နာ်အံၤဘၣ်တၢ်မၤကွၢ် ဒီးကဆှီထီၣ် ဒီးပတၢ်နာ်ဂၢၢ်ကျၢၤဝဲန့ၣ် ကအိၣ်ဖျါထီၣ်လီၤ. စီၤယိၤသး ဒီးစီၤဒၤဝံးန့ၣ် အိၣ်ဒီးတၢ်တူၢ်န့ၢ်ခီၣ်ကဲ ဒ်အံၤအသိးလီၤ. အဝဲသ့ၣ် တဂုာ်ကျဲးစၢး မၤဘၣ်ဂီၢ်က့ၤအတၢ်အိၣ်သးလၢ ကျဲလၢယဟိဝၤယွၤ တဘၣ်သူၣ်ဘၣ်သးဝဲဘၣ်. လၢတၢ်န့ၣ်အလီၢ် အဝဲသ့ၣ်မၤဝဲအဂ့ၤကတၢၢ် လၢအတၢ်အိၣ်သးအဖီခိၣ်လီၤ. အဝဲသ့ၣ် အိၣ်ခိးယဟိဝၤယွၤ အဃိဒိးန့ၢ်ဘၣ် တၢ်ဆိၣ်ဂ့ၤလၢ တၢ်လၢအမၤဝဲတဖၣ်အဂီၢ်. ယဟိဝၤယွၤ သူအဝဲသ့ၣ်လၢ ကမၤပူၤဖျဲး ဒီးတီခိၣ်ရိၤမဲ အပှၤဂီၢ်မုၢ်အဂီၢ်လီၤ.—၁ မိၤၡ့ ၄၁:၃၉-၄၁; ၄၅:၅; ၂ ၡမူၤအ့လး ၅:၄, ၅.
ပဝဲသ့ၣ်တဖၣ် ပကထံၣ်ဘၣ် တၢ်လ့ပစီ ဒ်သိးပကမၤဘၣ်ဂီၢ်က့ၤ ပတၢ်အိၣ်သးလၢ တလီၤပလိာ်ဒီး လံာ်စီဆှံအတၢ်ဟံးစုနဲၣ်ကျဲ. အဒိ နဃုထံၣ်န့ၢ်သးသမူတံၤသကိး လၢအကြၢးဒီးနၤတဘၣ်ဘၣ်အဃိ နသးဟးဂီၤဧါ. မ့မ့ၢ်ဒ်န့ၣ်န့ၣ် နကဘၣ်ဟးဆှဲး တၢ်အိၣ်သးကိးမံၤဒဲးလၢ ကကဲထီၣ်တၢ်လ့ပစီလၢနဂီၢ် ဒ်သိးနသုတဒိကနၣ် ယဟိဝၤယွၤ အတၢ်မၤလိာ်လၢအမ့ၢ် တၢ်ဆီဟံၣ်ဆီဃီန့ၣ် “ကဘၣ်မ့ၢ်ပှၤတဂၤလၢ ကစၢ်အပူၤ” လီၤ. (၁ ကရံၣ်သူး ၇:၃၉) နအိၣ်ဒီး တၢ်ကီတၢ်ခဲလၢ နတၢ်ဆီဟံၣ်ဆီဃီအပူၤဧါ. တဘၣ်ပျဲလၢပှၤဟီၣ်ခိၣ်ဖိအတၢ်ပာ်သူပာ်သး ဒ်သိးဒီး တၢ်အိၣ်လီၤဖး ဒီးတၢ်မၤကတၢၢ် တၢ်ဆီဟံၣ်ဆီဃီ ဒိၣ်စိလၢနဖီခိၣ်တဂ့ၤ. လၢတၢ်န့ၣ်အလီၢ် ဂုာ်ကျဲးစၢးဒ်သိးသိး လၢသုကမၤဘၣ်ဂီၢ်က့ၤ တၢ်ကီတၢ်ခဲအဂီၢ်တက့ၢ်. (မၤလကံ ၂:၁၆; အ့းဖ့းစူး ၅:၂၁-၃၃) ခီဖျိလၢ စံပွါယ့ တဘၣ်လီၢ်ဘၣ်စးအဃိ ကီခဲလၢနကလုၢ်အီၣ်လုၢ်အီ နဟံၣ်ဖိဃီဖိအဂီၢ်ဧါ. ပအိၣ်ခိးယဟိဝၤယွၤန့ၣ် ပၣ်ဃုာ်စ့ၢ်ကီးဒီး ပကဘၣ်ဟးဆှဲး တၢ်မၤလၢအလီၤသးဒ့ဒီ မ့တမ့ၢ် တၢ်မၤလၢတဖိးသဲစးတဖၣ်လီၤ. (စံးထီၣ်ပတြၢၤ ၃၇:၂၅; ဧ့ၤဘြံၤ ၁၃:၁၈) ပဝဲခဲလၢာ် ပကဘၣ်ဂုာ်ကျဲးစၢးမၤအဂ့ၤကတၢၢ်လၢ ပတၢ်အိၣ်သးအဖီခိၣ် ဒီးပကဘၣ်ဂုာ်ကျဲးစၢးစ့ၢ်ကီးလၢ ပကဒိးန့ၢ်ဘၣ် ယဟိဝၤယွၤ အတၢ်မၤစၢၤလီၤ. မ်ပကပာ်လီၤပသးလၢ ပကမၤဒ်န့ၣ် ဒီးအိၣ်ခိးယဟိဝၤယွၤ တုၤလၢအဝဲမၤဘၣ်ဂီၢ်က့ၤ ပတၢ်အိၣ်သးတစုတက့ၢ်.—မံကၤ ၇:၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဒ်သိးနကန့ၢ်ခိၣ်ဖးအဂီၢ် တဘၣ်ပျဲ ပှၤမၤလီၤဃံၢ်နၤ နီတဂၤတဂ့ၤ
၁၁ ပမ့ၢ်ဂုာ်ကျဲးစၢး မၤအါထီၣ်တၢ်အဲၣ်တၢ်ကွံ ဒီးတၢ်သးကညီၤန့ၣ် ပတသးက့ၣ်တၢ်ညီညီဘၣ်. လံာ်စီဆှံစံးဝဲလၢ– “တၢ်အဲၣ်တၢ်ကွံ ဝံသးစူၤတၢ်ဃဲးဃဲး ဒီးမၤဂ့ၤတၢ်, တၢ်အဲၣ်တၢ်ကွံ တသးကါဘၣ်တၢ်ဘၣ်.” (၁ ကရံၣ်သူး ၁၃:၄) ဒ်သိးပသုတမ့ၢ်ပှၤလၢ အသးက့ၣ်တၢ်တဂ့ၤအဂီၢ် ပကဘၣ်ဂုာ်ကျဲးစၢးအိၣ်ဒီး တၢ်ထံၣ်ဒ်ယဟိဝၤယွၤအသိးလီၤ. ပဒီပုၢ်ဝဲၢ်တဖၣ်န့ၣ် ပကဘၣ်ထံၣ်အီၤ ဒ်ပနီၢ်ခိက့ၢ်ဂီၤတခါခါအသိးလီၤ. လံာ်စီဆှံစံးဝဲလၢ– “တၢ်အက့ၢ်အဂီၤတမံၤမံၤ မ့ၢ်ဘၣ်တၢ်နးတၢ်ဖှီၣ်ဒီး, တၢ်အက့ၢ်အဂီၤ ဘၣ်ဃုာ်ခဲလၢာ်စ့ၢ်ကီးလီၤ.” (၁ ကရံၣ်သူး ၁၂:၁၆-၁၈, ၂၆) ပဒီပုၢ်ဝဲၢ်သ့ၣ်တဖၣ် မ့ၢ်သးခုန့ၣ် ပဘၣ်သးခုဃုာ်ဒီးအဝဲသ့ၣ်လီၤ. ပတဘၣ်သးက့ၣ်အဝဲသ့ၣ်ဘၣ်. ဆိကမိၣ်ကွၢ် စီၤစီလူးအဖိခွါ စီၤယိနၤသၣ် အဂ့ၢ်တက့ၢ်. ဖဲစီၤဒၤဝံး ဘၣ်တၢ်ဃုထၢထီၣ်အီၤလၢစီၤပၤ လၢအဝဲအလီၢ်အခါ စီၤယိနၤသၣ် တသးက့ၣ်အီၤဘၣ်. အဝဲဆီၣ်ထွဲ ဒီးဟ့ၣ်ဂံၢ်ဟ့ၣ်ဘါဝဲ စီၤဒၤဝံးလီၤ. (၁ ၡမူၤအ့လး ၂၃:၁၆-၁၈) မ့ၢ်ပအိၣ်ဒီး တၢ်အဲၣ်တၢ်ကွံ ဒီးတၢ်သးကညီၤဒ် စီၤယိနၤသၣ် အသိးကသ့ဧါ.
လါအ့ဖြ့ၣ် ၂၅–လါမ့ၤ ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ ၡမူၤအ့လး ၂၅-၂၆
“နမ့ၢ်ပှၤလၢ အတဆိကမိၣ်ထံတၢ်ဘၣ် ဒီးမၤကရီတၢ်ဧါ”
ပိာ်မုၣ်တဂၤလၢ အဆၢတဲာ်တၢ်လၢ တၢ်ကူၣ်သ့အပူၤ
၁၀ ခီဖျိလၢပှၤသုးဖိတဒူၣ်အံၤ ကွၢ်ဆၢၣ်မဲာ်ဘၣ်ဝဲ တၢ်ကီတခဲအဃိ အဝဲသ့ၣ်ကမၤဝဲ ပှၤကွၢ်သိတဖၣ်အံၤဒ်လဲၣ်. ပှၤသုးဖိတဒူၣ်အံၤ မ့ၢ်အဲၣ်ဒိးဟံးန့ၢ်ဝဲသိတဖၣ်အံၤန့ၣ် ညီဝဲဒိၣ်မးလီၤ. ဘၣ်ဆၣ် အဝဲသ့ၣ်တမၤဝဲဒ်န့ၣ်ဘၣ်. လၢတၢ်န့ၣ်အလီၢ် ပှၤသုးဖိတဖၣ်အံၤန့ၣ် လီၤဂာ်ဒ်ဝ့ၢ်ခိၣ်ဒူလၢ အဒီသဒၢဝဲစီၤနၤဘလး အသိဒီးအခ့အပှၤတဖၣ်န့ၣ်လီၤ. (ဖး ၁ ၡမူၤအ့လး ၂၅:၁၅, ၁၆ တက့ၢ်.) ပှၤကွၢ်သိဒီးသိဖိတဖၣ်န့ၣ် ကသဂၢၢ်ဘၣ်ဝဲ တၢ်ကီတၢ်ခဲအကလုာ်ကလုာ်လီၤ. အဒိ ဖဲတၢ်လီၢ်အဝဲန့ၣ် ဆၣ်ဖိကီၢ်ဖိလၢ အအၢအိၣ်ဝဲအါမးလီၤ. ဒီးပှၤကွၢ်သိဒီးသိတဖၣ်န့ၣ် အိၣ်တယံၤလိာ်အသးဒီး အံၣ်စရ့လးအကီၢ်ဆၢ လၢကလံၤထံးတခီဘၣ်. လၢတၢ်န့ၣ်အဃိ ညီဝဲလၢတမျာ်လၢ ထံကီၢ်အဂၤတဖၣ် ကဟဲဟုၣ်န့ၢ်အဝဲသ့ၣ်အသိ ဒီးမၤအၢမၤသီအဝဲသ့ၣ်န့ၣ်လီၤ.
၁၁ လၢပှၢ်မုၢ်ကနၢအံၤအပူၤ ဒ်သိးပှၤသုးဖိတဖၣ်အံၤ ကအီၣ်ဘၣ်အီဘၣ်ဝဲအဂီၢ် တညီဝဲဘၣ်. လၢတၢ်န့ၣ်အဃိ မုၢ်အိၣ်ဝဲတနံၤန့ၣ် စီၤဒၤဝံးဆှၢလီၤဝဲအခ့အပှၤအဂၤတဆံ ဆူစီၤနၤဘလးအအိၣ် ဒ်သိးကလဲၤဃ့ဝဲတၢ်မၤစၢၤအဂီၢ်လီၤ. စီၤဒၤဝံး ဃုထၢဝဲတၢ်ဆၢကတီၢ် လၢအကြၢးဝဲဘၣ်ဝဲလီၤ. ဖဲန့ၣ်အဆၢကတီၢ် ဘၣ်လၢပှၤတံာ်သိဆူၣ် ဒီးပှၤမၤဝဲတၢ်သူၣ်ဖှံသးညီအဃိ ပှၤဟ့ၣ်အီၣ်ဟ့ၣ်အီတၢ် ဒီးပှၤဂီၢ်မုၢ်တဖၣ် အိၣ်ဒီးသးလၢအဟ့ၣ်တၢ်ညီန့ၣ်လီၤ. ဒီးစီၤဒၤဝံးဃုထၢဝဲ တၢ်ကတိၤလၢအပှဲၤဝဲဒီး တၢ်သညူးသပှၢ် ဒီးတၢ်ယူးယီၣ်ပာ်ကဲ တုၤဒၣ်လဲာ်စီၤဒၤဝံး ကိးလီၤအနီၢ်ကစၢ်အသးလၢ ယမ့ၢ် “နဖိခွါစီၤဒၤဝံး” န့ၣ်လီၤ. ခီဖျိလၢ စီၤဒၤဝံးအသးစၢ်န့ၢ်စီၤနၤဘလးအဃိ ဘၣ်သ့ၣ်သ့ၣ် အဝဲကိးလီၤအသးဒ်အံၤလၢ အကပာ်ဖျါထီၣ်အတၢ်ပာ်ကဲအီၤန့ၣ်လီၤ. ဘၣ်ဆၣ်သနာ်က့ စီၤနၤဘလး စံးဆၢကဒါက့ၤအီၤဒ်လဲၣ်.—၁ မူၤ. ၂၅:၅-၈.
၁၂ စီၤနၤဘလး အသးပှံၢ်ထီၣ်တၢ်ဖးဒိၣ်ညါ. ပှၤပိာ်ခွါသးစၢ်တဂၤ လဲၤဝဲဆူနီၢ်အဘံၤကါယံးလး အအိၣ်ဒီးစံးဘၣ်အီၤလၢ စီၤနၤဘလးကိးဃါတၢ်ဒီး “ဒုၣ်ဒွဲၣ်” စီၤဒၤဝံးဒီးအပှၤသုးဖိတဖၣ်န့ၣ်လီၤ. ပှၤပံဒံသံလၢအမ့ၢ် စီၤနၤဘလးတဂၤအံၤ ကဒူးကဒ့ၣ်တၢ်လၢ အကလုၢ်ဒိၣ်ဒိၣ် ဘၣ်ဃးဒီး အကိၣ်, အထံဒီးအတၢ်ဖံးတၢ်ညၣ်တဖၣ်န့ၣ် မ့ၢ်တၢ်လၢအလုၢ်အပှ့ၤဒိၣ်ဝဲဒိၣ်မးလီၤ. စီၤနၤဘလး စံးအၢစံးသီဝဲစီၤဒၤဝံး ဒီးစံးဝဲလၢအဝဲတမ့ၢ်တၢ်နီတမံၤဘၣ်, လီၤဂာ်ဒ် ကုၢ်လၢအဃ့ၢ်ပူၤဖျဲးအသး လၢအကစၢ်အစုပူၤအသိးန့ၣ်လီၤ. စီၤနၤဘလးအတၢ်ပာ်သူၣ်ပာ်သးန့ၣ် လီၤဂာ်လိာ်အသးဒီးစီၤစီလူးလၢ အသးဟ့ဝဲစီၤဒၤဝံးန့ၣ်လီၤ. အဝဲသ့ၣ်ခံဂၤန့ၣ် တထံၣ်စီၤဒၤဝံးဒ် ယဟိဝၤယွၤထံၣ်ဝဲအသိးဘၣ်. မ့မ့ၢ်ယဟိဝၤယွၤန့ၣ် အဲၣ်ဝဲစီၤဒၤဝံး ဒီးတထံၣ်အီၤဒ်ကုၢ်လၢအပူထီၣ်တၢ် ဒီးဃ့ၢ်ပူၤဖျဲးအသးတဂၤဘၣ်. ကစၢ်ယွၤထံၣ်ဝဲစီၤဒၤဝံး ဒ်အမ့ၢ်ပှၤလၢအကကဲထီၣ်ဝဲ အံၣ်စရ့လးအစီၤပၤတဂၤန့ၣ်လီၤ.—၁ မူၤ. ၂၅:၁၀, ၁၁, ၁၄.
ပိာ်မုၣ်တဂၤလၢ အဆၢတဲာ်တၢ်လၢ တၢ်ကူၣ်သ့အပူၤ
၁၈ ဘၣ်ဃးဒီးတၢ်ဂ့ၢ်ကီတဖၣ်အံၤန့ၣ် နီၢ်အဘံၤကါယံးလး ဟံးန့ၢ်မူဒါဒီးဃ့ဝဲလၢ စီၤဒၤဝံးကပျၢ်ကွံာ်အတၢ်ကမၣ်လီၤ. အဝဲစံးဘၣ်စီၤဒၤဝံးလိၤလိၤလၢ ယဝၤစီၤနၤဘလးန့ၣ် မ့ၢ်ပှၤလၢအသးတဆးဘၣ် ဒ်အမံၤအခီပညီအိၣ်ဝဲအသိးလီၤ. လၢတၢ်န့ၣ်အဃိ တဘၣ်ကနၣ်ဃုာ်အီၤတဂ့ၤ. နီၢ်အဘံၤကါယံးလး အတၢ်ကတိၤတဖၣ်အံၤ ကဒုးဆိကမိၣ်စီၤဒၤဝံးလၢ အဝဲမ့ၢ်မၤဆၢက့ၤပှၤဒ်သိးဒီး စီၤနၤဘလးန့ၣ် ကမၤဘၣ်ဒိဘၣ်ထံးအနီၢ်ကစၢ်အလၤကပီၤလီၤ. နီၢ်အဘံၤကါယံးလး တဲဖျါထီၣ်ဝဲ အတၢ်နာ်စီၤဒၤဝံးခီဖျိလၢ အဝဲမ့ၢ်ယဟိဝၤယွၤ အခၢၣ်စးတဂၤလီၤ. တကးဒံးဘၣ် နီၢ်အဘံၤကါယံးလး တဲဘၣ်စီၤဒၤဝံးလၢ ယသ့ၣ်ညါလၢ နဒုးတၢ်လၢ “ယွၤအတၢ်ဒုးတၢ်တဖၣ်” အဂီၢ်လီၤ. လၢန့ၣ်အမဲာ်ညါ ပထံၣ်ဘၣ်လၢ အဝဲသ့ၣ်ညါဝဲလၢ ယွၤအၢၣ်လီၤဝဲလၢ စီၤဒၤဝံးကကဲထီၣ်စီၤပၤလီၤ. မ့ၢ်လၢ အဝဲစံးဘၣ် စီၤဒၤဝံးလၢ “ယွၤ . . . ကပာ်နၤလၢ ပှၤပၢအံၣ်စရ့လး” အဂီၢ်န့ၣ်လီၤ. ဒီးနီၢ်အဘံၤကါယံးလး ဟ့ၣ်ကူၣ်ဟ့ၣ်ဖးဝဲစီၤဒၤဝံးလၢ အဝဲမ့ၢ်မၤသံပှၤဂၤလၢ အတၢ်ကမၣ်တအိၣ်န့ၣ် လၢခံကကဲထီၣ် “တၢ်သးဘၣ်တိၢ်ဘၣ်ထံး” လၢအဂီၢ်န့ၣ်လီၤ. အခီပညီအဲၣ်ဒိးစံးဝဲလၢ လၢခံစီၤဒၤဝံးအသးလၢ အသ့ၣ်ညါဒၣ်တၢ်န့ၣ် ကမၤတံာ်တာ်အီၤလီၤ. (ဖး ၁ ၡမူၤအ့လး ၂၅:၂၄-၃၁ တက့ၢ်.) နီၢ်အဘံၤကါယံးလး အတၢ်ကတိၤလၢ အပှဲၤဒီးတၢ်အဲၣ်တၢ်ကွံအံၤ ထုးန့ၢ်ဝဲစီၤဒၤဝံးအသးန့ၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ပိာ်မုၣ်တဂၤလၢ အဆၢတဲာ်တၢ်လၢ တၢ်ကူၣ်သ့အပူၤ
၁၆ ခီဖျိလၢ နီၢ်အဘံၤကါယံးလး မၤဝဲဒ်အံၤအဃိ မ့ၢ်အဝဲထီဒါဝဲအဝၤအလီၢ်အလၤ လၢအမ့ၢ်ဟံၣ်ခိၣ်န့ၣ်ဧါ. တမ့ၢ်လ့ၤတက့ၤဘၣ်. သ့ၣ်နီၣ်ထီၣ်က့ၤလၢ စီၤနၤဘလးကတိၤတရီတပါဘၣ်ဝဲ ယဟိဝၤယွၤအခ့အပှၤ လၢအဘၣ်တၢ်ဒိးဖှူအီၤတဂၤန့ၣ်တက့ၢ်. လၢတၢ်ဂ့ၢ်အံၤအဃိ စီၤနၤဘလး အဟံၣ်ဖိဃီဖိအဂၤတဖၣ် လၢအတၢ်ကမၣ်တအိၣ်န့ၣ် ကဘၣ်တၢ်မၤသံအဝဲသ့ၣ်လီၤ. နီၢ်အဘံၤကါယံးလး မ့ၢ်တရဲၣ်ကျဲၤဝဲတၢ်နီတမံၤဘၣ်န့ၣ် ဘၣ်သ့ၣ်သ့ၣ် ကဖျါလၢအဝဲအိၣ်ဃူဝဲအဝၤ ဒီးကပၣ်ဃုာ်လၢ အဝၤအတၢ်ကမၣ်အပူၤလီၤ. လၢတၢ်န့ၣ်အဃိ ဖဲတၢ်မၤအသးဒ်အံၤအခါ နီၢ်အဘံၤကါယံးလး ကဘၣ်ပာ်ဒိၣ်ယွၤအါန့ၢ်ဒံးအဝၤန့ၣ်လီၤ.