အိၣ်မူဒ် ခရံာ်ဖိအသိး
တၢ်ကီတၢ်ခဲတဖၣ် မုၢ်တနံၤ ကလီၤမၢ်ကွံာ်ခဲလၢာ်
ဖဲပထံၣ်ဘၣ် တၢ်ကီတၢ်ခဲအခါ ပသးလီၤစၢ်ဝဲသ့ လီၤဆီဒၣ်တၢ် ဖဲတၢ်ကီတၢ်ခဲတဖၣ် မ့ၢ်ယံာ်ဝဲအခါလီၤ. စီၤဒၤဝံး သ့ၣ်ညါပာ်ဝဲလၢ တၢ်ကီတၢ်ခဲလၢ အထံၣ်ဘၣ်ဝဲခီဖျိလၢ စီၤပၤစီလူးအဃိတဖၣ်န့ၣ် မုၢ်တနံၤကကတၢၢ်ကွံာ်ဝဲ ဒီးအဝဲကကဲထီၣ်ဘၣ် စီၤပၤ ဒ်ယဟိဝၤယွၤ အၢၣ်လီၤပာ်ဝဲအသိးလီၤ. (၁ မူၤ. ၁၆:၁၃) စီၤဒၤဝံး အတၢ်နာ်န့ၣ် မၤစၢၤအီၤလၢ ကအိၣ်ခိးဝဲ ယဟိဝၤယွၤလၢ တၢ်သူၣ်စူၤသးစူၤအပူၤ လၢကမၤဘၣ်ဂီၢ်န့ၢ် အတၢ်အိၣ်သးတဖၣ်အဂီၢ်လီၤ.
ဖဲပထံၣ်ဘၣ် တၢ်ကီတၢ်ခဲအခါ ဘၣ်သ့ၣ်သ့ၣ် ပကသူ ပတၢ်ကူၣ်တၢ်ဆး, ပတၢ်သ့ၣ်ညါနၢ်ပၢၢ် မ့တမ့ၢ် ပတၢ်သ့ဆိကမိၣ်ထံတၢ်လၢ ပကမၤဘၣ်ဂီၢ်က့ၤ ပတၢ်အိၣ်သးအဂီၢ်လီၤ. (၁ မူၤ. ၂၁:၁၂-၁၄; ကတိၤ. ၁:၄) ဘၣ်ဆၣ် တၢ်ကီတၢ်ခဲတနီၤန့ၣ် ပဘှါၡဲအီၤလၢအလီၤပလိာ်ဒီး လံာ်စီဆှံတၢ်ဟံးစုနဲၣ်ကျဲအသိး ဝံၤသနာ်က့ ဆဲးအိၣ်ဒံးဝဲလီၤ. ဖဲန့ၣ်အဆၢကတီၢ် ပကဘၣ်အိၣ်ခိးယဟိဝၤယွၤလၢ တၢ်သူၣ်စူၤသးစူၤအပူၤ. မ့ၢ်လၢတယံာ်လၢၤဘၣ်န့ၣ် အဝဲကမၤကတၢၢ်ကွံာ် ပတၢ်နးတၢ်ဖှီၣ်ခဲလၢာ် ဒီးကထွါကွံာ်ပ “မဲာ်ထံခဲလၢာ်” လီၤ. (လီၣ်. ၂၁:၄) ဆၢကတီၢ်ခဲအံၤ ပဒိးန့ၢ်ဘၣ် တၢ်မၤစၢၤလၢ ယဟိဝၤယွၤအအိၣ် မ့တမ့ၢ် လၢတၢ်ဂ့ၢ်အဂၤတမံၤမံၤသ့ သနာ်က့ ပနာ်သ့သပှၢ်ကတၢၢ်လၢ မုၢ်တနံၤန့ၣ် တၢ်ကီတၢ်ခဲတဖၣ်အံၤ ကလီၤမၢ်ကွံာ်ဝဲခဲလၢာ်လီၤ. တၢ်ဂ့ၢ်အံၤ မၤမုာ်ထီၣ်က့ၤပှၤဒိၣ်မးလီၤ.
ကွၢ်တၢ်ဂီၤမူလၢအမ့ၢ် ပှၤတဒူၣ်လၢ အိၣ်ဒီးတၢ်ဃူတၢ်ဖိးလၢ ဟီၣ်ခိၣ်လၢ အလီၤမုၢ်လီၤဖးတဘ့ၣ်အပူၤ ဒီးစံးဆၢတၢ်သံကွၢ်တဖၣ်အံၤ–
လၢကလံၤထံး အမဲရကၤန့ၣ် ဒီပုၢ်ဝဲၢ်တဖၣ် ထံၣ်ဘၣ်ဒီး တၢ်ကီတၢ်ခဲမနုၤတဖၣ်လဲၣ်.
အဝဲသ့ၣ် ပာ်ဖျါထီၣ် တၢ်အဲၣ် ဒီးတၢ်သူၣ်စူၤသးစူၤဒ်လဲၣ်.
အဝဲသ့ၣ် ဆဲးသးစၢၢ်ဆၢဝဲ “တၢ်လၢအရ့ဒိၣ်ကတၢၢ်တဖၣ်” ဒ်လဲၣ်.—ဖံလံး. ၁:၁၀