တၢ်မၤလိ ၄၆
ယဟိဝၤယွၤ မၤစၢၤပှၤ ဒ်သိးဒီး ပလဲၤခီဖျိတၢ်ကီတၢ်ခဲကန့ၢ် ဒီးကသးခုထီဘိ
“ဘၣ်ဆၣ် ယဟိဝၤယွၤ အိၣ်ခိးဝဲလၢ တၢ်ဝံသးစူၤအပူၤ လၢအကပာ်ဖျါထီၣ် လၢအဘၣ်သူၣ်ဘၣ်သးသု ဒီးအဝဲ ကဆၢထၢၣ် ပာ်ဖျါထီၣ် တၢ်သးကညီၤ လၢသုဖီခိၣ်.”—ယၡါယၤ ၃၀:၁၈.
တၢ်သးဝံၣ် ၃ ပတၢ်ဂံၢ်တၢ်ဘါ, ပတၢ်မုၢ်လၢ်, ပတၢ်နာ်န့ၢ်အလီၢ်
တၢ်မၤလိအံၤ အတၢ်တိာ်ပာ်a
၁-၂. (က) ပကတဲသကီး တၢ်သံကွၢ် မနုၤလဲၣ်. (ခ) ယဟိဝၤယွၤ ဘၣ်သးမၤစၢၤပှၤ နီၢ်ကီၢ်န့ၣ် ပသ့ၣ်ညါဘၣ်ဒ်လဲၣ်.
ယဟိဝၤယွၤ ကမၤစၢၤပှၤ ဒ်သိးဒီး ပလဲၤခီဖျိတၢ်ကီတၢ်ခဲကန့ၢ် ဒီးပက မၤအတၢ်မၤ လၢတၢ်သးခုထီဘိ. ယဟိဝၤယွၤ မၤစၢၤပှၤ ဒ်လဲၣ်. တၢ်မၤစၢၤလၢ ယဟိဝၤယွၤ ဟ့ၣ်ပှၤန့ၣ် အကကဲဘျုးလၢ ပဝဲတဂၤဘၣ်တဂၤအဂီၢ် ပကဘၣ်မၤဒ်လဲၣ်. တၢ်မၤလိတခါအံၤ ကပာ်ဖျါန့ၢ်ပှၤ တၢ်သံကွၢ်တဖၣ်အံၤ အတၢ်စံးဆၢ. နာ်က့ ခဲအံၤန့ၣ် ပကတဲသကီးဆိ ဘၣ်ဃးဒီး တၢ်သံကွၢ်လၢအမ့ၢ် ယဟိဝၤယွၤ ဘၣ်သးမၤစၢၤပှၤ နီၢ်ကီၢ်ဧါ.
၂ တၢ်ကတိၤလၢ တၢ်မၢဖိပီလူးတဲဝဲ ဖဲအကွဲးန့ၢ် ပှၤဧ့ၤဘြံၤဖိ အလံာ်ပရၢန့ၣ် ကမၤစၢၤပှၤ လၢပကသ့ၣ်ညါဘၣ် တၢ်သံကွၢ်တဖျၢၣ်န့ၣ် အတၢ်စံးဆၢ. စီၤပီလူး ကွဲးဝဲလၢ “ယဟိဝၤယွၤ မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်. ပှၤဟီၣ်ခိၣ်ဖိ မၤယၤတၢ်မနုၤကသ့လဲၣ်.” (ဧ့ၤဘြံၤ ၁၃:၆) လံာ်စီဆှံ တၢ်ကွဲးကျိာ်ထံ အဂၤတဘ့ၣ် ပာ်ဖျါထီၣ်ဝဲလၢ တၢ်ကတိၤ လၢအမ့ၢ် “ပှၤလၢ အမၤစၢၤ” တၢ်န့ၣ် အဲၣ်ဒီးတဲဝဲ ပှၤတဂၤလၢ အကရီမၤစၢၤ ပှၤလၢအလိၣ်ဘၣ် တၢ်မၤစၢၤ. ထံၣ်တမှံကွၢ်လၢ ယဟိဝၤယွၤ ကရီမၤစၢၤ ပှၤလၢအထံၣ်ဘၣ် တၢ်ကီတၢ်ခဲတဂၤဂၤ. နကသ့ၣ်ညါဘၣ်လၢ တၢ်ကတိၤတဖျၢၣ်အံၤ အခီပညီန့ၣ် အဘၣ်လိာ်သးဒီး ယဟိဝၤယွၤ အတၢ်ပာ်သူၣ်ပာ်သး ဒီးအပာ်ဖျါန့ၢ်ပှၤလၢ ယဟိဝၤယွၤ ဘၣ်သးမၤစၢၤပှၤ နီၢ်ကီၢ်. တကးဒံးဘၣ် ခီဖျိလၢ ယဟိဝၤယွၤ မၤစၢၤပှၤအဃိ ပလဲၤခီဖျိ တၢ်ကီတၢ်ခဲန့ၢ် ဒီးပကသးခု.
၃. တၢ်မၤစၢၤသၢခါလၢ ယဟိဝၤယွၤ ဟ့ၣ်လီၤပှၤန့ၣ် မ့ၢ်မနုၤလဲၣ်.
၃ ဒ်သိးဒီး ပလဲၤခီဖျိ တၢ်ကီတၢ်ခဲကန့ၢ် ဒီးပကသးခုထီဘိအဂီၢ် ယဟိဝၤယွၤ မၤစၢၤပှၤဒ်လဲၣ်. အဆိကတၢၢ်န့ၣ် ပကကွၢ်သကီး တၢ်ဂ့ၢ်လၢ အအိၣ်လၢ လံာ်ယၡါယၤအပူၤတနီၤ. မ့ၢ်လၢ တၢ်ဂ့ၢ်လၢ ဝံယၡါယၤ ကွဲးဝဲတဖၣ်န့ၣ် ကဲဘျုးဝဲလၢ ကစၢ်ယွၤ အပှၤဂီၢ်မုၢ် လၢဆၢကတီၢ်ခဲအံၤ. တကးဒံးဘၣ် ညီနုၢ်ဝံယၡါယၤ မ့ၢ်ကွဲးယဟိဝၤယွၤ အဂ့ၢ်န့ၣ် အကွဲးဝဲ ဒ်သိးဒီး ပှၤကနၢ်ပၢၢ်ဘၣ်ညီညီ. အဒိ ယၡါယၤ အဆၢဒိၣ် ၃၀ န့ၣ်အိၣ်ဝဲဒီး တၢ်အဒိတနီၤ. ဖဲန့ၣ်န့ၣ် ဝံယၡါယၤ သူဝဲတၢ်အဒိတဖၣ် လၢအတဲဖျါထီၣ်ဝဲ ဘၣ်ဃးဒီး ယဟိဝၤယွၤ မၤစၢၤအပှၤဂီၢ်မုၢ်အဂ့ၢ်. ဝံယၡါယၤ တဲဝဲလၢ ယဟိဝၤယွၤ မၤစၢၤပှၤခီဖျိ (၁) အဒိကနၣ် ပတၢ်ထုကဖၣ် လီၤတံၢ်လီၤဆဲး ဒီးအစံးဆၢက့ၤ ပတၢ်ထုကဖၣ်, (၂) အဟံးစုနဲၣ်ကျဲပှၤ (၃) အဟ့ၣ်ပှၤ တၢ်ဆိၣ်ဂ့ၤလၢခဲအံၤ ဒီးခါဆူညါ. အဃိ ခဲအံၤန့ၣ် ပကတဲသကီး ဘၣ်ဃးဒီး ယဟိဝၤယွၤ အတၢ်မၤစၢၤ သၢခါအံၤအဂ့ၢ်.
ယဟိဝၤယွၤ ဒိကနၣ် ပတၢ်ထုကဖၣ်
၄. (က) ဖဲဝံယၡါယၤအစိၤန့ၣ် ယဟိဝၤယွၤ တဲဝဲလၢ ပှၤယူဒၤဖိတဖၣ် ကဲပှၤဒ်လဲၣ် ဒီးယဟိဝၤယွၤပျဲလၢ အဝဲသ့ၣ်ကထံၣ်ဘၣ်ဒီး တၢ်မနုၤလဲၣ်. (ခ) ပှၤယူဒၤဖိလၢအသးတီတဖၣ်န့ၣ် ယဟိဝၤယွၤ တဲဘၣ်အဝဲသ့ၣ်လၢ တၢ်မနုၤလဲၣ်. (ယၡါယၤ ၃၀:၁၈, ၁၉)
၄ တၢ်ကတိၤလၢ အစးထီၣ်သးသီသီဖဲ ယၡါယၤ အဆၢဒိၣ် ၃၀ န့ၣ် ယဟိဝၤယွၤ ပာ်ဖျါထီၣ်ဝဲလၢ ပှၤယူဒၤဖိတဖၣ်န့ၣ် အဝဲသ့ၣ်ကဲ “ပှၤလၢအခိၣ်ကိၤ” ဒီး “လၢတၢ်ဒဲးဘးအဖီခိၣ်န့ၣ် အဝဲသ့ၣ်ပာ်ဖှိၣ်အါထီၣ်တၢ်ဒဲးဘး.” တကးဒံးဘၣ် ကစၢ်ယွၤ ဆဲးတဲဝဲလၢ “အဝဲသ့ၣ် မ့ၢ်ပှၤလၢ အထီဒါတၢ်, . . . ဖိလၢ အတအဲၣ်ဒိး ဒိကနၣ် ယဟိဝၤယွၤ အတၢ်သိၣ်တၢ်သီဘၣ်.” (ယၡါယၤ ၃၀:၁, ၉) ဝံယၡါယၤ တဲဆိပာ်စၢၤဝဲလၢ မ့ၢ်လၢ ပှၤယူဒၤဖိတဖၣ်န့ၣ် တကနၣ်တၢ်ဘၣ်အဃိ ယဟိဝၤယွၤ ပျဲဝဲလၢအဝဲသ့ၣ် ကထံၣ်ဘၣ်ဒီး တၢ်ကီတၢ်ခဲ. (ယၡါယၤ ၃၀:၅, ၁၇; ယံးရမံယၤ ၂၅:၈-၁၁) ဒီးဖဲပှၤဘၤဘူၤလိၣ်ဖိ က့ၤဖီၣ်အဝဲသ့ၣ်ခါန့ၣ် အဝဲသ့ၣ်ထံၣ်ဘၣ် တၢ်ကီတၢ်ခဲနီၢ်ကီၢ်. ဘၣ်ဆၣ် လၢပှၤယူဒၤဖိ အကျါတနီၤန့ၣ် ပှၤလၢအသးတီအိၣ်ကၠ့ၤ. အဃိ ဝံယၡါယၤတဲဝဲလၢ မုၢ်ကအိၣ်ဝဲတနံၤ ယဟိဝၤယွၤ ကပျဲက့ၤအဝဲသ့ၣ် လၢယရူၤၡလ့ၣ်. တၢ်ကစီၣ်တခါအံၤ မၤစၢၤ ပှၤယူဒၤဖိ လၢအသးတီတဖၣ် ဒ်သိး အဝဲသ့ၣ် ကအိၣ်ဒီးတၢ်မုၢ်လၢ်. (ဖး ယၡါယၤ ၃၀:၁၈, ၁၉.) လၢခံ တၢ်ကဲထီၣ်သး ဒ်သီးဒီး ယဟိဝၤယွၤ တဲပာ်စၢၤဝဲ. ယဟိဝၤယွၤ မၤစၢၤအဝဲသ့ၣ် ဒီးအဝဲသ့ၣ် ဟးထီၣ်ဘၣ်လၢ ဝ့ၢ်ဘၤဘူၤလိၣ်. ဘၣ်ဆၣ် တချုးလၢ ယဟိဝၤယွၤ မၤစၢၤအဝဲသ့ၣ် ဒံးဘၣ်န့ၣ် အဝဲသ့ၣ် ဘၣ်အိၣ်ခီးတၢ် တဘျုးနံၣ်ညါ. တၢ်ကတိၤ လၢအမ့ၢ် “ယဟိဝၤယွၤ အိၣ်ခိးဝဲလၢ တၢ်ဝံသးစူၤအပူၤ လၢအကပာ်ဖျါထီၣ် လၢအဘၣ်သူၣ်ဘၣ်သးသု” န့ၣ်အဲၣ်ဒီးတဲဝဲ တချုးလၢ ယဟိဝၤယွၤ မၤပူၤဖျဲးထီၣ် ပှၤယူဒၤဖိ လၢအသးတီတဖၣ်န့ၣ် အဝဲသ့ၣ် ဘၣ်အိၣ်ခီးတၢ် တတီၤဖိညါ. ပှၤအံၣ်စရ့လးဖိတဖၣ် အိၣ်လၢ ဝ့ၢ်ဘၤဘူၤလိၣ်အနံၣ် ၇၀ ဝံၤအလီၢ်ခံ ပှၤလၢအအိၣ်တ့ၢ် တနီၤန့ၣ် ယဟိဝၤယွၤ ပျဲက့ၤအဝဲသ့ၣ်. (ယၡါယၤ ၁၀:၂၁; ယံးရမံယၤ ၂၉:၁၀) ပှၤအံၣ်စရ့လးဖိတဖၣ်န့ၣ် ဖဲအဝဲသ့ၣ်အိၣ်လၢ ဘၤဘူၤလိၣ်အခါ အဝဲသ့ၣ်သးအုးအဃိ အမဲာ်ထံလီၤ နာ်က့ ဖဲအဝဲသ့ၣ် က့ၤဘၣ်လၢ အကီၢ်ခါန့ၣ် အဝဲသ့ၣ်သးခုအဃိ အမဲာ်ထံလီၤ.
၅. ယၡါယၤ ၃၀:၁၉ န့ၣ်မၤမုာ်ထီၣ်ပသးဒ်လဲၣ်.
၅ “ဖဲသုကိးပသူထီၣ်လၢ တၢ်မၤစၢၤအဂီၢ်အခါ ကစၢ်ယွၤ ကပာ်ဖျါထီၣ်လၢ အဘၣ်သူၣ်ဘၣ်သးသု သပှၢ်တၢၢ်.” ဆၢကတီၢ်ခဲအံၤ တၢ်ကတိၤအံၤန့ၣ် အမၤမုာ်ထီၣ်ပသး သပှၢ်တၢၢ်. (ယၡါယၤ ၃၀:၁၉) ပမ့ၢ်ဃ့ထုကဖၣ်လၢ ပသးဒီဖျၢၣ်န့ၣ် ယဟိဝၤယွၤ ကကနၣ်ပှၤ လီၤတံၢ်လီၤဆဲး ဒီးအကမၤစၢၤပှၤ တဘျီဃီ. ဝံယၡါယၤ တဲဝဲလၢ “ဖဲအနၢ်ဟူ သုတၢ်ကိးပသူထီၣ်အခါ အဝဲကစံးဆၢသု တဘျီဃီ.” တကးဒံးဘၣ် ပသ့ၣ်ညါဘၣ်လၢ ပှၤလၢ အဃ့တၢ်မၤစၢၤ လၢကစၢ်ယွၤအအိၣ်န့ၣ် ကစၢ်ယွၤဘၣ်သး မၤစၢၤအဝဲသ့ၣ် သပှၢ်တၢၢ်. ပသ့ၣ်ညါဘၣ် ဒ်အံၤအဃိ မၤစၢၤပှၤလၢ ပကအိၣ်ဒီး တၢ်တူၢ်န့ၢ်ခီၣ်ကဲ ဒီးတၢ်သးခု.
၆. ယဟိဝၤယွၤ ကနၣ်ဝဲ အပှၤဂီၢ်မုၢ် တဂၤဘၣ်တဂၤ အတၢ်ထုကဖၣ်န့ၣ် ဝံယၡါယၤ တဲဖျါထီၣ်ဝဲဒ်လဲၣ်.
၆ ဘၣ်ဃးဒီး တၢ်ထုကဖၣ်အဂ့ၢ်န့ၣ် ယၡါယၤ ၃၀:၁၉ သိၣ်လိဒံးပှၤ တၢ်ဂ့ၢ်မနုၤလဲၣ်. ပသ့ၣ်ညါဘၣ်လၢ ယဟိဝၤယွၤ ကနၣ် ပဝဲတဂၤဘၣ်တဂၤ တၢ်ထုကဖၣ်. ဘၣ်မနုၤအဃိ ပတဲဒ်န့ၣ်လဲၣ်. ဖဲယၡါယၤ အဆၢဒိၣ် ၃၀ အဆၢဖိလၢ အခီၣ်ထံးတကုာ်န့ၣ် ယဟိဝၤယွၤ တဲတၢ်ဒီး အပှၤဂီၢ်မုၢ် ဒီတဖုညါအဃိ တၢ်ကတိၤ လၢအမ့ၢ် “သု” န့ၣ်အဲၣ်ဒီးတဲဝဲ ဘၣ်ဃးဒီး ပှၤအါဂၤ. သနာ်က့ ဖဲအဆၢဖိ ၁၉ န့ၣ်ယဟိဝၤယွၤ တဲတၢ်ဒီး အပှၤဂီၢ်မုၢ် တဂၤဘၣ်တဂၤ အဃိ တၢ်ကတိၤ လၢအမ့ၢ် “သု” တဖျၢၣ်အံၤန့ၣ် အဲၣ်ဒီးတဲဝဲ ပှၤတဂၤ. ဝံယၡါယၤ တဲဝဲလၢ “လ့ၤတက့ၤ သုတဟီၣ်ဘၣ်,” “ကစၢ်ယွၤ ကပာ်ဖျါထီၣ်လၢ အဘၣ်သူၣ်ဘၣ်သးသု သပှၢ်တၢၢ်” ဒီး “အဝဲကစံးဆၢသု.” ဖဲအံၤ ပသ့ၣ်ညါဘၣ်လၢ ယဟိဝၤယွၤန့ၣ် အကဲပါလၢ အအဲၣ်အဖိဒိၣ်မးအဃိ အတထိၣ်သတြီၤ အဖိတဂၤဒီးတဂၤဘၣ်. အဖိတဂၤ သးမ့ၢ်ဘၣ်ဒိန့ၣ် အကတဲအဖိတဂၤန့ၣ်လၢ “သးဆူၣ်ဒ်သိးဒီး နဒီပုၢ်ဝဲၢ် အဂၤတဖၣ်န့ၣ်” ဧါ. တတဲဝဲကၠဲန့ၣ်ဘၣ်. နီၢ်ကီၢ်န့ၣ် အဖိတဂၤဂ့ၤတဂၤဂ့ၤ မ့ၢ်ဃ့ထုကဖၣ် လၢအအိၣ်န့ၣ် အကနၣ် အဝဲသ့ၣ်ခဲလၢာ်.—စံးထီၣ်ပတြၢၤ ၁၁၆:၁; ယၡါယၤ ၅၇:၁၅.
ဝံယၡါယၤ တဲဝဲလၢ “ဆဲးကိးထီၣ် [ယဟိဝၤယွၤ]” န့ၣ်အဲၣ်ဒီးတဲဝဲ အခီပညီဒ်လဲၣ် (ကွၢ်လံာ်အဆၢ ၇)
၇. ဘၣ်မနုၤအဃိ ဝံယၡါယၤ ဒီးယ့ၣ်ၡူး တဲဝဲလၢ ပကဘၣ် ဆဲးဃ့ထုကဖၣ်တၢ် ဆူၣ်ဆူၣ်လဲၣ်.
၇ ပမ့ၢ်ဃ့ထုကဖၣ် လၢယဟိဝၤယွၤအအိၣ် ဒီးတဲဘၣ်အီၤ ပတၢ်ကီတၢ်ခဲန့ၣ် အကဟ့ၣ်လီၤပှၤ တၢ်ဂံၢ်တၢ်ဘါ ဒ်သိးဒီး ပလဲၤခီဖျိ ပတၢ်ကီတၢ်ခဲကန့ၢ်. ဒီးပတၢ်ကီတၢ်ခဲ မ့ၢ်တလီၤမၢ်ကွံာ် တဘျီဃီဘၣ်နာ်က့ ပကဘၣ်ဃ့ဒံး ယဟိဝၤယွၤ လၢကမၤစၢၤပှၤ ဒ်သိးပဆဲးတူၢ်တၢ်ကန့ၢ်. တကးဒံးဘၣ် ဝံယၡါယၤ အတၢ်ကတိၤ လၢအတဲဝဲလၢ “ဆဲးကိးထီၣ် [ယဟိဝၤယွၤ]” န့ၣ်ဒုးသ့ၣ်ညါပှၤလၢ ယဟိဝၤယွၤ ဘၣ်သးလၢ ပကဆဲးဃ့ထုကဖၣ် လၢအအိၣ်. (ယၡါယၤ ၆၂:၇) ဝံယၡါယၤ အတၢ်ကတိၤတထံၣ်အံၤ အဲၣ်ဒီးတဲဝဲလၢ ပကဘၣ် ဃ့ထုကဖၣ်လၢ ယဟိဝၤယွၤအအိၣ် ခဲအံၤခဲအံၤ ဒီးဆဲးကိးထီၣ်အီၤ. ဝံယၡါယၤ အတၢ်ကတိၤအံၤန့ၣ် အလီၤဂာ်ဒီး ယ့ၣ်ၡူးတဲတၢ်အဒိ လၢအဘၣ်ဃးဒီး တၢ်ထုကဖၣ် ဖဲလူၤကၣ် ၁၁:၈-၁၀, ၁၃. လၢတၢ်အဒိ တခါအံၤ ယ့ၣ်ၡူး သိၣ်လိပှၤလၢ ပကဘၣ် “ဆဲးဃ့ . . . ဆူၣ်ဆူၣ်လၢ တၢ်သးဒူ” ဒီးပကဘၣ် “ဆဲးဃ့” ယဟိဝၤယွၤ အသးစီဆှံ. တကးဒံးဘၣ် ပကဘၣ်ဃ့ကညး ယဟိဝၤယွၤ လၢအကမၤစၢၤပှၤ ဒ်သိးဒီး ပကဆၢတဲာ်တၢ်လၢအဘၣ်.
ယဟိဝၤယွၤ ဟံးစုနဲၣ်ကျဲပှၤ
၈. လၢညါန့ၣ် ဝံယၡါယၤ အတၢ်ကတိၤဖဲ ယၡါယၤ ၃၀:၂၀, ၂၁ န့ၣ်ဟဲလၢပှဲၤထီၣ် ဒ်လဲၣ်.
၈ ဖး ယၡါယၤ ၃၀:၂၀, ၂၁. ပှၤဘၤဘူၤလိၣ်ဖိ ကဝီၤဃာ်ဝဲ ဝ့ၢ်ယရူၤၡလ့ၣ် တနံၣ်ဒီးတဝာ်ညါ. ဖဲန့ၣ်အဆၢကတီၢ် ပှၤဝ့ၢ်ဖိတဖၣ် ထံၣ်ဘၣ်ဝဲ တၢ်ကီတၢ်ခဲဒီဒူၣ်. ဘၣ်ဆၣ် ဖဲယၡါယၤ ၃၀:၂၀, ၂၁ န့ၣ်ယဟိဝၤယွၤ အၢၣ်လီၤ ပှၤယူဒၤဖိတဖၣ်လၢ အဝဲသ့ၣ် မ့ၢ်ပီၢ်ယၢ်လီၤက့ၤသး ဒီးဆီတလဲအတၢ်ပာ်သးန့ၣ် ယဟိဝၤယွၤ ကမၤစၢၤအဝဲသ့ၣ်. တကးဒံးဘၣ် ဝံယၡါယၤ တဲဝဲလၢ ယဟိဝၤယွၤန့ၣ် အကဲဝဲ “သရၣ် လၢအဒိၣ်အထီတဂၤ” အဃိ အကသိၣ်လိ အပှၤဂီၢ်မုၢ် ဒ်သိးဒီး အဝဲသ့ၣ် ကဘူၣ်ထီၣ်ဘါထီၣ်အီၤ ဒ်အတၢ်ဘၣ်သး. ဒီးဖဲပှၤယူဒၤဖိတဖၣ် ဟးထီၣ်ဘၣ်လၢ ဝ့ၢ်ဘၤဘူၤလိၣ်ခါန့ၣ် ပထံၣ်ဘၣ်လၢ ဝံယၡါယၤ အတၢ်ကတိၤအံၤ ဟဲလၢပှဲၤထီၣ်ဝဲ. တကးဒံးဘၣ် ခီဖျိလၢ ယဟိဝၤယွၤကဲဝဲ သရၣ် လၢအဒိၣ်အထီတဂၤ ဒီးအဟံးစုနဲၣ်ကျဲ အပှၤဂီၢ်မုၢ်တဖၣ် အဃိ အဝဲသ့ၣ် ဘူၣ်ထီၣ်ဘါထီၣ်ဘၣ်က့ၤ ယဟိဝၤယွၤ ဒ်ယဟိဝၤယွၤ အတၢ်ဘၣ်သးအသိး. ဆၢကတီၢ်ခဲအံၤစ့ၢ်ကီး ယဟိဝၤယွၤကဲဝဲ ပသရၣ် လၢအဒိၣ်အထီတဂၤအဃိ ပသးခုညါ.
၉. ဆၢကတီၢ်ခဲအံၤန့ၣ် ပန့ၢ်ဘၣ် ယဟိဝၤယွၤ အတၢ်ဟံးစုနဲၣ်ကျဲ ဒ်လဲၣ်.
၉ ယဟိဝၤယွၤန့ၣ် အကဲပှၤလၢ အသိၣ်လိပှၤအဃိ ပသးခုညါ. ဝံယၡါယၤ တဲဝဲလၢ “သုကထံၣ်ဘၣ် သုသရၣ် လၢအဒိၣ်အထီတဂၤအံၤ လၢသုမဲာ်.” ဖဲအံၤန့ၣ် ဝံယၡါယၤ ဒိလီၤပှၤ ဒ်သီးဒီး ပှၤကၠိဖိ. ဒီးအဒိလီၤဝဲ ယဟိဝၤယွၤ ဒ်သီးဒီး ကၠိသရၣ်တဂၤ လၢအဆၢထၢၣ်လၢ ပှၤကၠိဖိအမဲာ်ညါ. ဆၢကတီၢ်ခဲအံၤန့ၣ် ယဟိဝၤယွၤ သိၣ်လိပှၤဒ်လဲၣ်. အသိၣ်လိပှၤခီဖျိ အတၢ်ကရၢကရိ. ဒီးပန့ၢ်ဘၣ် ယဟိဝၤယွၤ အတၢ်ဟံးစုနဲၣ်ကျဲ လၢအတၢ်ကရၢကရိအအိၣ် လီၤတံၢ်လီၤဆဲးအဃိ ပစံးဘျုးအီၤဒိၣ်မး. ပန့ၢ်ဘၣ် တၢ်ဟံးစုနဲၣ်ကျဲတဖၣ်အံၤ ဖဲပထီၣ်တၢ်အိၣ်ဖှိၣ်, တၢ်အိၣ်ဖှိၣ်ဖးဒိၣ်, ဖဲပဖး ပတၢ်ကရၢကရိလံာ်လဲၢ်, ကွၢ် JW တၢ်ဂီၤမူ ဒီးတၢ်မၤစၢၤအဂၤလၢ ယဟိဝၤယွၤ ဟ့ၣ်လီၤပှၤ. အဃိ ပမ့ၢ်ထံၣ်ဘၣ် တၢ်ကီတၢ်ခဲနာ်က့ တၢ်ဟံးစုနဲၣ်ကျဲတဖၣ်အံၤ ကမၤစၢၤပှၤဒ်သိးဒီး ပတူၢ်တၢ်ကန့ၢ် ဒီးကသးခုထီဘိ.
၁၀. ဆၢကတီၢ်ခဲအံၤန့ၣ် ပနၢ်ဟူ “တၢ်ကလုၢ်သီၣ်လၢ [ပ]လီၢ်ခံ” ဒ်လဲၣ်.
၁၀ ဝံယၡါယၤ တဲဝဲလၢ ယဟိဝၤယွၤ ဟ့ၣ်ပှၤ အတၢ်ဟံးစုနဲၣ်ကျဲ လၢအဂၤ အိၣ်ဒံး. အတဲဝဲလၢ “သုကနၢ်ဟူ တၢ်ကလုၢ်သီၣ်လၢ သုလီၢ်ခံ.” ဖဲအံၤန့ၣ် ဝံယၡါယၤ ဒိလီၤဝဲ ယဟိဝၤယွၤ ဒ်သီးဒီး သရၣ်တဂၤလၢ အဟးလၢ ပှၤကၠိဖိတဖၣ် အလီၢ်ခံ ဒီးတဲဘၣ် ပှၤကၠိဖိလၢ အဝဲသ့ၣ် ကဘၣ်လဲၤကျဲ ဖဲလဲၣ်တဘိလဲၣ်. ဆၢကတီၢ်ခဲအံၤန့ၣ် ပနၢ်ဟူ ကစၢ်ယွၤ အကလုၢ်သီၣ်လၢ ပလီၢ်ခံ ခီဖျိပဖးလံာ်စီဆှံ. တၢ်ဂ့ၢ်လၢအအိၣ်လၢ လံာ်စီဆှံပူၤန့ၣ် ပှၤကွဲးပာ်ဝဲ လၢအပူၤကွံာ် ဖးယံာ်လံ နာ်က့ ပမ့ၢ်ဖးလံာ်စီဆှံန့ၣ် အလီၤဂာ်ဒ်သီးဒီး ပနၢ်ဟူ ကစၢ်ယွၤ အကလုၢ်သီၣ် လၢပလီၢ်ခံ.—ယၡါယၤ ၅၁:၄.
၁၁. ဒ်သိးဒီး ပတူၢ်တၢ်ကန့ၢ် ဒီးပကသးခုထီဘိအဂီၢ် ပကဘၣ်မၤဒ်လဲၣ်.
၁၁ တၢ်ဟံးစုနဲၣ်ကျဲလၢ ပန့ၢ်ဘၣ်လၢ လံာ်စီဆှံပူၤ ဒီးလၢယဟိဝၤယွၤ အတၢ်ကရၢကရိန့ၣ် အကကဲဘျုးလၢ ပဝဲတဂၤဘၣ်တဂၤအဂီၢ် ပကဘၣ်မၤဒ်လဲၣ်. ဝံယၡါယၤ တဲဘၣ်ပှၤ တၢ်ကတိၤခံထံၣ်. တၢ, “ကျဲအိၣ်လၢအံၤ.” ခံ, “ဟးလၢကျဲတဘိအံၤ.” (ယၡါယၤ ၃၀:၂၁) ဖဲအံၤ ပထံၣ်ဘၣ်လၢ ပကဘၣ်သ့ၣ်ညါ “ကျဲ” အံၤတကးဒံးဘၣ် ပကဘၣ် “ဟးလၢကျဲတဘိအံၤ.” ယဟိဝၤယွၤ အကလုၢ်ကထါ လံာ်စီဆှံ ဒီးတၢ်ဂ့ၢ်လၢ ယဟိဝၤယွၤ အတၢ်ကရၢကရိ ၡဲပၠးပှၤန့ၣ် မၤစၢၤပှၤလၢ ပကသ့ၣ်ညါ ယဟိဝၤယွၤ အတၢ်ဘၣ်သး. အဃိ တၢ်လၢပမၤလိဘၣ်တဖၣ်န့ၣ် ပကဘၣ်မၤထွဲအီၤ. တကးဒံးဘၣ် ဒ်သိးဒီး ပတူၢ်တၢ်ကန့ၢ် ဒီးပကဆဲးသးခုအဂီၢ် ပကဘၣ် မၤလိဒီးမၤထွဲ ကစၢ်ယွၤ အတၢ်ဟံးစုနဲၣ်ကျဲ. ပမ့ၢ်မၤလိဒီးမၤထွဲ တၢ်လၢပမၤလိဘၣ်မၣ် ယဟိဝၤယွၤ ကဆိၣ်ဂ့ၤပှၤ.
ယဟိဝၤယွၤ ဆိၣ်ဂ့ၤပှၤ
၁၂. ဖဲယၡါယၤ ၃၀:၂၃-၂၆ န့ၣ်ယဟိဝၤယွၤ ဆိၣ်ဂ့ၤအပှၤဂီၢ်မုၢ်ဒ်လဲၣ်.
၁၂ ဖး ယၡါယၤ ၃၀:၂၃-၂၆. ဝံအတၢ်စံးပာ်တခါအံၤ ဟဲလၢပှဲၤထီၣ်ဝဲ ဒ်လဲၣ်. ပှၤယူဒၤဖိလၢ ပှၤဘၤဘူၤလိၣ်ဖိ က့ၤဖီၣ်ဝဲတဖၣ်န့ၣ် လၢခံအဝဲသ့ၣ် က့ၤဘၣ်လၢ ကီၢ်အံၣ်စရ့လး. ဒ်သိး အဝဲသ့ၣ် ကဆဲးမူ ဒီးဘူၣ်ထီၣ်ဘါထီၣ်ဘၣ် ယဟိဝၤယွၤအဂီၢ် ယဟိဝၤယွၤ ဟ့ၣ်လီၤအဝဲသ့ၣ် တၢ်အါမး. အဒိ ယဟိဝၤယွၤ ဟ့ၣ်လီၤအဝဲသ့ၣ် တၢ်အီၣ်တၢ်အီ တကးဒံးဘၣ် ဒ်သီးဒီး အဝဲသ့ၣ် ကမၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤ ဒီးကဘူၣ်ထီၣ်ဘါထီၣ်အီၤ ဒ်သီးဒီး အတၢ်ဘၣ်သးန့ၣ် ယဟိဝၤယွၤ မၤစၢၤအဝဲသ့ၣ် ဒီဒူၣ်ညါ. တၢ်မၤစၢၤလၢ အဝဲသ့ၣ် န့ၢ်ဘၣ်ဝဲတဘျီအံၤန့ၣ် အါန့ၢ်ဒံး လၢအပူၤကွံာ်ဒံး. ဒီးဖဲအဆၢဖိ ၂၆ န့ၣ်ယဟိဝၤယွၤ ဟ့ၣ်အါထီၣ် အဝဲသ့ၣ်လၢ တၢ်ကပီၤ လၢအအဲၣ်ဒီးတဲဝဲ ယဟိဝၤယွၤ မၤစၢၤအဝဲသ့ၣ် ဒ်သီးဒီး အဝဲသ့ၣ် ကနၢ်ပၢၢ်အါထီၣ် ယဟိဝၤယွၤ အကလုၢ်ကထါ. (ယၡါယၤ ၆၀:၂) ယဟိဝၤယွၤ အတၢ်ဆိၣ်ဂ့ၤတဖၣ်အံၤ မၤစၢၤဝဲ အပှၤဂီၢ်မုၢ် ဒ်သီးဒီး အဝဲသ့ၣ် ကဆဲးဘူၣ်ထီၣ်ဘါထီၣ်အီၤ ဒီး “ခီဖျိလၢ [အဝဲသ့ၣ်] သးခုအဃိ” အဝဲသ့ၣ် အဂံၢ်ဘါဆူၣ်ထီၣ်.—ယၡါယၤ ၆၅:၁၄.
၁၃. ဝံအတၢ်စံးပာ် ဘၣ်ဃးဒီး တၢ်ဘူၣ်ထီၣ်ဘါထီၣ် အစီအဆှံ ကအိၣ်ထီၣ်က့ၤ အဂ့ၢ်န့ၣ် ဟဲလၢပှဲၤထီၣ်လၢ ဆၢကတီၢ်ခဲအံၤဒ်လဲၣ်.
၁၃ ဝံအတၢ်စံးပာ် ဘၣ်ဃးဒီး တၢ်ဘူၣ်ထီၣ်ဘါထီၣ် အစီအဆှံ ကအိၣ်ထီၣ်က့ၤ အဂ့ၢ်န့ၣ် ဟဲလၢပှဲၤထီၣ်လၢ ဆၢကတီၢ်ခဲအံၤကၠ့ၤဧါ. ဟဲလၢပှဲၤထီၣ်ဝဲ သပှၢ်တၢၢ်. စးထီၣ်လၢ ၁၉၁၉ နံၣ်န့ၣ် ပှၤဟးထီၣ်ကွံာ်လၢ ဘၤဘူၤလိၣ်ဖးဒိၣ် လၢအမ့ၢ် တၢ်ဘူၣ်တၢ်ဘါကမၣ်န့ၣ် အိၣ်ဝဲအဂၤ လၢအကကွဲၢ်ညါ. ပှၤလၢ အဟးထီၣ်ကွံာ်တဖၣ်အံၤ အဝဲသ့ၣ် အိၣ်ဘၣ်လၢ နီၢ်သးပၤရဒံစူးအပူၤ ဒီးတၢ်လီၢ်အံၤန့ၣ် အဂ့ၤဒိၣ်န့ၢ်ဒံး ကီၢ်တၢ်စံးပာ် လၢပှၤအံၣ်စရ့လးဖိ န့ၢ်ဘၣ်ဝဲဒံး. (ယၡါယၤ ၅၁:၃; ၆၆:၈) နီၢ်သးပၤရဒံစူးန့ၣ် ကဲဝဲမနုၤလဲၣ်.
၁၄. နီၢ်သးပၤရဒံစူးန့ၣ် ကဲဝဲမနုၤလဲၣ် ဒီးမတဂၤသ့ၣ်တဖၣ် အိၣ်ဝဲဖဲန့ၣ်လဲၣ်. (ကွၢ်တၢ်ကတိၤ အခီပညီ.)
၁၄ စးထီၣ်လၢ ၁၉၁၉ နံၣ်န့ၣ် ပှၤလၢအဘၣ်တၢ်ဒိးဖှူအီၤတဖၣ် အိၣ်ဘၣ်ဝဲ မုာ်မုာ်ခုၣ်ခုၣ်လၢ နီၢ်သးပၤရဒံစူးအပူၤ.b တၢ်ဆၢကတီၢ် လဲၤပူၤကွံာ်ဝဲ ကယီကယီဘျီ “သိလၢအဂၤ” လၢအမ့ၢ် ပှၤလၢအအိၣ်ဒီး တၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ချၢန့ၣ် အိၣ်ဘၣ်စ့ၢ်ကီးလၢ နီၢ်သးပၤရဒံစူး ဒီးအဝဲသ့ၣ် န့ၢ်ဘၣ်ဝဲ ယဟိဝၤယွၤ အတၢ်ဆိၣ်ဂ့ၤ ဒီဒူၣ်ညါ.—ယိၤဟၣ် ၁၀:၁၆; ယၡါယၤ ၂၅:၆; ၆၅:၁၃.
၁၅. နီၢ်သးပၤရဒံစူးန့ၣ် အိၣ်ဖဲလဲၣ်.
၁၅ ဆၢကတီၢ်ခဲအံၤန့ၣ် နီၢ်သးပၤရဒံစူး အိၣ်ဖဲလဲၣ်. ပှၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် အိၣ်ဝဲလၢ ဟီၣ်ခိၣ်ဒီဘ့ၣ်ညါ. အဃိ နီၢ်သးပၤရဒံစူးန့ၣ် အိၣ်ဝဲလၢ ဟီၣ်ခိၣ်ဒီဘ့ၣ်ညါ. ဒီးဆၢကတီၢ်ခဲအံၤ ပမ့ၢ်အိၣ်လၢ တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ ပမ့ၢ်ဆီၣ်ထွဲ တၢ်ဘူၣ်တၢ်ဘါ အမ့ၢ်အတီန့ၣ် အကဲဝဲ ပအိၣ်လၢ နီၢ်သးပၤရဒံစူးအပူၤ.
ပမၤဃံလၤဒိၣ်ထီၣ် နီၢ်သးပၤရဒံစူး ကသ့ဒ်လဲၣ် (ကွၢ်လံာ်အဆၢ ၁၆-၁၇)
၁၆. ပမ့ၢ်ဘၣ်သးအိၣ်လၢ နီၢ်သးပၤရဒံစူး အပူၤထီဘိန့ၣ် ပကဘၣ်မၤဒ်လဲၣ်.
၁၆ ပမ့ၢ်ဘၣ်သးအိၣ်လၢ နီၢ်သးပၤရဒံစူး အပူၤထီဘိန့ၣ် ပကဘၣ် ပာ်လုၢ်ပာ်ပှ့ၤ ပဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်ပူၤ. ပပာ်လုၢ်ပာ်ပှ့ၤ အဝဲသ့ၣ် ခီဖျိ ပကွၢ်ကပာ်ကွံာ် အဝဲသ့ၣ် တၢ်ဂံၢ်စၢ်ဘါစၢ် ဒီးကွၢ်လၢ အဝဲသ့ၣ် တၢ်ဂ့ၤတကပၤဟီ. (ယိၤဟၣ် ၁၇:၂၀, ၂၁) ဘၣ်မနုၤအဃိ အရ့ဒိၣ်လၢ ပကမၤကၠဲန့ၣ်လဲၣ်. အဒိ ပမ့ၢ်လဲၤဟးလၢ ပှၢ်ပူၤန့ၣ် ပကထံၣ်ဘၣ် သ့ၣ်ထူၣ် အကလုာ်ကလုာ် ဒီးသ့ၣ်တဖၣ်န့ၣ် ပကွၢ်အီၤဂ့ၤမး. လၢပကပၤန့ၣ် သ့ၣ်ထူၣ်လၢ အတဂ့ၤဘၣ် မ့ၢ်အိၣ်တထူၣ်နာ်က့ ပသးတဟးဂီၤဘၣ်. ပကကွၢ်ဒံး တၢ်ဃံတၢ်လၤ လၢအအိၣ်လၢ ပှၢ်တဘ့ၣ်န့ၣ် အပူၤဒံး. (ယၡါယၤ ၄၄:၄; ၆၁:၃) ဒ်န့ၣ်အသိး လၢတၢ်အိၣ်ဖှိၣ်ပူၤန့ၣ် ပဒီပုၢ်ဝဲၢ်မုၣ်ခွါတဖၣ် အတၢ်ပာ်သူၣ်ပာ်သး ကအိၣ်ဝဲ အကလုာ်ကလုာ်. အဃိ ပတဘၣ်ကွၢ်လၢ အဝဲသ့ၣ် တၢ်ဂံၢ်စၢ်ဘါစၢ်ဘၣ်, ဘၣ်ဆၣ် ပကဘၣ်ကွၢ်လၢ အဝဲသ့ၣ် တၢ်ဂ့ၤတကပၤဟီ. ဒီးပတဘၣ်ပျဲလၢ ပနီၢ်ကစၢ် တၢ်ဂံၢ်စၢ်ဘါစၢ် ဒီးပှၤဂၤ အတၢ်ဂံၢ်စၢ်ဘါစၢ် မၤဟးဂီၤ ပတၢ်ဃူတၢ်ဖိးလၢ တၢ်အိၣ်ဖှိၣ်ပူၤဘၣ်.
၁၇. ပမ့ၢ်ဘၣ်သးလၢ တၢ်ဃူတၢ်ဖိး ကအိၣ်လၢ ပဒီပုၢ်ဝဲၢ်မုၣ်ခွါ အကျါန့ၣ် ပကဘၣ်မၤဒ်လဲၣ်.
၁၇ ပမ့ၢ်ဘၣ်သးလၢ တၢ်ဃူတၢ်ဖိး ကအိၣ်လၢ ပဒီပုၢ်ဝဲၢ်မုၣ်ခွါ အကျါန့ၣ် ပကဘၣ်မၤဒ်လဲၣ်. ပကဘၣ် ကဲပှၤလၢ အမၤဃူမၤဖိးတၢ်. (မးသဲ ၅:၉; ရိမ့ၤ ၁၂:၁၈) ပတၢ်ဂ့ၢ်ကီ မ့ၢ်အိၣ်ထီၣ်ဒီး ပဒီပုၢ်ဝဲၢ်မုၣ်ခွါတဂၤဂၤ ဒီးပမ့ၢ်လဲၤမၤဃူမၤဖိးဆိတၢ်ဒီး အဝဲသ့ၣ်န့ၣ် အကဲဝဲ ပမၤဃံလၤဒိၣ်ထီၣ် နီၢ်သးပၤရဒံစူး. ပဒီပုၢ်ဝဲၢ်မုၣ်ခွါ လၢအအိၣ်လၢ နီၢ်သးပၤရဒံစူးပူၤ ကီးဂၤဒဲးန့ၣ် ယဟိဝၤယွၤ မူၤဃီၤအဝဲသ့ၣ်လၢ တၢ်ဘူၣ်ထီၣ်ဘါထီၣ် အစီအဆှံအပူၤ. (ယိၤဟၣ် ၆:၄၄) အဃိ ယဟိဝၤယွၤ မ့ၢ်ထံၣ်ဝဲလၢ ပကျဲးစၢး မၤဃူမၤဖိးတၢ် ဒီးအိၣ်ဃူအိၣ်ဖိးဒီး ပဒီပုၢ်ဝဲၢ်မုၣ်ခွါ လၢအအဲၣ်ဝဲဒိၣ်မးန့ၣ် အကသးခုညါ.—ယၡါယၤ ၂၆:၃; ဃးကဲ ၂:၇.
၁၈. ပကဘၣ်ဆိကမိၣ်ထံ တၢ်ဂ့ၢ်မနုၤလဲၣ် ဒီးဘၣ်မနုၤဃိလဲၣ်.
၁၈ ယဟိဝၤယွၤန့ၣ် အဆိၣ်ဂ့ၤပှၤအါမး. တၢ်ဆိၣ်ဂ့ၤတဖၣ်အံၤ အကကဲဘျုးလၢ ပဝဲတဂၤဘၣ်တဂၤအဂီၢ် ပကဘၣ်မၤဒ်လဲၣ်. ပကဘၣ် ဆိကမိၣ်ထံ တၢ်ဂ့ၢ်လၢ ပမၤလိဘၣ်လၢ လံာ်စီဆှံပူၤ ဒီးလံာ်လဲၢ်လၢ ပတၢ်ကရၢကရိ ထုးထီၣ်ဝဲန့ၣ် လီၤတံၢ်လီၤဆဲး. ပမ့ၢ်မၤလိ လံာ်စီဆှံ ဒီးဆိကမိၣ်ထံအီၤ လီၤတံၢ်လီၤဆဲးန့ၣ် ကမၤစၢၤပှၤလၢ ပကပာ်ဖျါထီၣ် ခရံာ်ဖိ အတၢ်ဂ့ၤတၢ်ဝါ. ဖဲပရ့လိာ်သးဒီး ပဒီပုၢ်ဝဲၢ်မုၣ်ခွါ ခါန့ၣ် ပက “အဲၣ်လိာ် [ပ]သး ဒ်ဒီပုၢ်ဝဲၢ်တံၢ်နီၢ်အသိး” ဒီးပက “ကဟုကယာ်လိာ် [ပ]သး တဂၤဒီးတဂၤလၢ တၢ်သူၣ်အိၣ်သးအိၣ်.” (ရိမ့ၤ ၁၂:၁၀) တကးဒံးဘၣ် တၢ်ဆိၣ်ဂ့ၤ လၢယဟိဝၤယွၤ ဟ့ၣ်လီၤပှၤခဲအံၤတဖၣ် ပမ့ၢ်ဆိကမိၣ်ထံအီၤန့ၣ် ပတၢ်ရ့လိာ်သးဒီး ယဟိဝၤယွၤ ကဂ့ၤထီၣ်. ဒီးပမ့ၢ်ဆိကမိၣ်ထံ တၢ်ဆိၣ်ဂ့ၤလၢ ယဟိဝၤယွၤ ကဟ့ၣ်လီၤပှၤ လၢခါဆူညါန့ၣ် ကမၤစၢၤပှၤလၢ ပကသးခုထီဘိ ဒီးပကမၤအတၢ်မၤ ခဲအံၤဒီးခါဆူညါ လီၤထူလီၤယိာ်.
ပကအိၣ်ခီး ယဟိဝၤယွၤလၢ တၢ်ဝံသးစူၤထီဘိ
၁၉. (က) ဖဲယၡါယၤ ၃၀:၁၈ န့ၣ်ယဟိဝၤယွၤ အၢၣ်လီၤပှၤဒ်လဲၣ်. (ခ) ပလဲၤခီဖျိတၢ်ကီတၢ်ခဲကန့ၢ်အဂီၢ် တၢ်မနုၤ ကမၤစၢၤပှၤလဲၣ်.
၁၉ တယံာ်လၢၤဘၣ်န့ၣ် ယဟိဝၤယွၤ “ကဆၢထၢၣ်” ဒီးမၤလီၤမၢ်ကွံာ် တၢ်အၢတၢ်သီခဲလၢာ် လၢဟီၣ်ခိၣ်ချၢ. (ယၡါယၤ ၃၀:၁၈) နာ်က့ ခဲအံၤန့ၣ် ယဟိဝၤယွၤ အိၣ်ခီးတၢ်လၢ တၢ်ဝံသးစူၤ ဒီးပှၤသ့ၣ် ပဘၣ်အိၣ်ခီးအီၤလၢ တၢ်ဝံသးစူၤ. တကးဒံးဘၣ် ယဟိဝၤယွၤန့ၣ် အကဲ “ကစၢ်ယွၤလၢ အစံၣ်ညီၣ်တၢ်တီ” ဒီးပနာ်သပှၢ်တၢၢ်လၢ အခါမ့ၢ်ဘၣ်န့ၣ် အကဒုးအိၣ်ထီၣ်က့ၤ တၢ်တီတၢ်လိၤ လၢဟီၣ်ခိၣ်ချၢ. (ယၡါယၤ ၂၅:၉) အဃိ ပဆဲးပာ်လုၢ်ပာ်ပှ့ၤ တၢ်မၤစၢၤလၢ ယဟိဝၤယွၤ ဟ့ၣ်လီၤပှၤ ဒီးပဃ့ထုကဖၣ်တၢ်, ပဖးလံာ်စီဆှံဒီး မၤထွဲတၢ်လၢပမၤလိဘၣ် ဒီးပဆိကမိၣ်ထံ တၢ်ဆိၣ်ဂ့ၤလၢ ပန့ၢ်ဘၣ်တဖၣ်ထီဘိ. ပမၤကၠဲန့ၣ်အဃိ ယဟိဝၤယွၤ ကမၤစၢၤပှၤလၢ ပလဲၤခီဖျိတၢ်ကီတၢ်ခဲကန့ၢ် ဒီးပကမၤ အတၢ်မၤ လၢတၢ်သးခုထီဘိ.
တၢ်သးဝံၣ် ၁၄၂ တၢ်မုၢ်လၢ်လၢ အမၤဂၢၢ်မၤကျၢၤပှၤ
a တၢ်မၤလိတခါအံၤ ကပာ်ဖျါထီၣ် တၢ်သၢမံၤလၢ ယဟိဝၤယွၤ မၤန့ၢ်ဝဲ ပှၤလၢ အဘူၣ်ထီၣ်ဘါထီၣ်အီၤ ဒ်သိးဒီး အဝဲသ့ၣ် လဲၤခီဖျိတၢ်ကီတၢ်ခဲကန့ၢ် ဒီးကသးခုထီဘိ. တၢ်သၢမံၤလၢ ယဟိဝၤယွၤမၤဝဲန့ၣ် ပကသ့ၣ်ညါအါထီၣ်ဘၣ်လၢ ယၡါယၤ အဆၢဒိၣ် ၃၀ အပူၤ. ဖဲပတဲသကီး ယၡါယၤ အဆၢဒိၣ် ၃၀ ခါန့ၣ် ပကသ့ၣ်ညါဘၣ်လၢ အရ့ဒိၣ်လၢ ပကဘၣ် ဃ့ထုကဖၣ်, မၤလိလံာ်စီဆှံ ဒီးဆိကမိၣ်ထံ တၢ်ဆိၣ်ဂ့ၤလၢ ယဟိဝၤယွၤ ဟ့ၣ်ပှၤလၢခဲအံၤ ဒီးခါဆူညါ.
b တၢ်ကတိၤ အခီပညီ– “နီၢ်သးပၤရဒံစူး” န့ၣ်အဲၣ်ဒီးတဲဝဲ ပဘူၣ်ထီၣ်ဘါထီၣ် ယဟိဝၤယွၤ လၢတၢ်ဃူတၢ်ဖိး ဃုာ်ဒီးပဒီပုၢ်ဝဲၢ်မုၣ်ခွါတဖၣ်. ယဟိဝၤယွၤ သိၣ်လိပှၤ တၢ်ဂ့ၢ်အါမံၤ လၢကမၤစၢၤပှၤ ဒ်သိးပကပူၤဒီး တၢ်ဘူၣ်တၢ်ဘါကမၣ် အတၢ်လံၣ်တၢ်လီ ဒီးအမၤစၢၤပှၤလၢ တၢ်စံၣ်တဲၤတဲလီၤ ဘီမုၢ်တၢ်သးခုကစီၣ် အတၢ်မၤကၠ့ၤ. ပကဲဘၣ် ယဟိဝၤယွၤ အသကီး ဒီးပရ့လိာ်ဘၣ်သးဒီး ပဒီပုၢ်ဝဲၢ်မုၣ်ခွါတဖၣ် ဃူဃူဖိးဖိး. တကးဒံးဘၣ် ပဒီပုၢ်ဝဲၢ်မုၣ်ခွါတဖၣ် မၤစၢၤပှၤ ဒ်သီးဒီး ပလဲၤခီဖျိတၢ်ကီတၢ်ခဲကန့ၢ် ဒီးပကသးခုထီဘိ. အဃိ ပမ့ၢ်ဘူၣ်ထီၣ်ဘါထီၣ် ယဟိဝၤယွၤ ဒ်အတၢ်ဘၣ်သး ဒီးတသ့ဖဲအသ့ ပမ့ၢ်ကျဲးစၢး ကွၢ်လိအီၤန့ၣ် အကဲဝဲ ပအိၣ်လၢ နီၢ်သးပၤရဒံစူးအပူၤ.