“ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ” တၢ်ဂ့ၢ်ဘျးစဲ

ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ

SEPTEMBER 2-8

လါစဲးပတ့ဘၢၣ် ၂-၈

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၇၉-၈၁

ပာ်ဖျါထီၣ်လၢ နအဲၣ်ယဟိဝၤယွၤအမံၤ လၢအလီၤကဟုကညီၢ်

တၢ်ပှ့ၤက့ၤန့ၣ် မ့ၢ် “တၢ်ဟ့ၣ်အလၢ အပှဲၤ” လၢအဟဲလၢပၢ်အအိၣ်

^၅ ပပာ်ဖျါထီၣ်လၢ ပအဲၣ်ယဟိဝၤယွၤအမံၤ ကသ့ဒ်လဲၣ်. ပပာ်ဖျါထီၣ်သ့ခီဖျိလၢ ပတၢ်ဖံးတၢ်မၤတဖၣ်လီၤ. ယဟိဝၤယွၤအဲၣ်ဒိးဝဲလၢ ပကအိၣ်စီဆှံလီၤ. (ဖး ၁ ပ့းတရူး ၁:၁၅, ၁၆ တက့ၢ်.) တၢ်အံၤအဲၣ်ဒိးတဲဝဲ ယဟိဝၤယွၤဘၣ်သးလၢ ပဘူၣ်ထီၣ်ဘါထီၣ်ထဲဒၣ်အီၤ ဒီးဒိကနၣ်အကလုၢ်လၢ ပသူၣ်ဒီဖျၢၣ်ပသးဒီဖျၢၣ်န့ၣ်လီၤ. ဖဲပှၤဂၤမၤအၢမၤသီပှၤအခါဒၣ်လဲာ် ပဂုာ်ကျဲးစၢးအိၣ်မူဒ် ယဟိဝၤယွၤသိၣ်လိနဲၣ်လိပှၤအသိးလီၤ. ပမ့ၢ်အိၣ်မူဒ် ယွၤအတၢ်သိၣ်တၢ်သီအသိးန့ၣ် ယဟိဝၤယွၤအမံၤကဘၣ် တၢ်မၤလၤကပီၤအီၤလီၤ. (မးသဲ ၅:၁၄-၁၆) ပပာ်ဖျါထီၣ်လၢ ယဟိဝၤယွၤအတၢ်သိၣ်တၢ်သီန့ၣ် ဂ့ၤဝဲဒီး မုၣ်ကီၤလံၢ်မ့ၢ် ပှၤလံၣ်တၢ်လီတၢ်တဂၤန့ၣ်လီၤ. ပတမ့ၢ် ပှၤလၢပှၤပှဲၤအဃိ ပမၤကမၣ်ဘၣ်တၢ်သ့လီၤ. ဘၣ်ဆၣ် ဖဲပမၤကမၣ်ဘၣ်တၢ်အခါ ပပီၢ်ယၢ်လီၤက့ၤပသးဒီး ပဂုာ်ကျဲးစၢးဟးဆှဲးတၢ်လၢ ယွၤသးဟ့ဝဲတဖၣ်န့ၣ်လီၤ.—စံးထီၣ်ပတြၢၤ ၇၉:၉.

ijwbv-E ၃ ¶၄-၅

ရိမ့ၤ ၁၀:၁၃—“ကိးထီၣ် ယဟိဝၤယွၤ အမံၤ”

ဖဲလံာ်စီဆှံ တဲဝဲလၢ “ကိးထီၣ် ယဟိဝၤယွၤ အမံၤ” အခါန့ၣ် အအဲၣ်ဒိးတဲဝဲ ပကဘၣ်သ့ၣ်ညါ ကစၢ်ယွၤအမံၤ ဒီးသူအီၤလၢ ပတၢ်ဘူၣ်ထီၣ်ဘါထီၣ်အပူၤ တကးဒံးဘၣ် ပကဘၣ်မၤ အါန့ၢ်အန့ၣ်ဒံး. (စံးထီၣ်ပတြၢၤ ၁၁၆:၁၂-၁၄) ပကဘၣ်နာ်န့ၢ်ကစၢ်ယွၤ ဒီးဃ့တၢ်မၤစၢၤလၢအအိၣ်.—စံးထီၣ်ပတြၢၤ ၂၀:၇; ၉၉:၆.

ကစၢ်ယွၤအမံၤန့ၣ် အရ့ဒိၣ်လၢ ယ့ၣ်ၡူးအဂီၢ်ဒိၣ်မး. လၢယ့ၣ်ၡူးအတၢ်ထုကဖၣ်န့ၣ် အပာ်ဖျါထီၣ်ဝဲ ဘၣ်ဃးဒီး ကစၢ်ယွၤအမံၤ လၢအဆိကတၢၢ်. အဝဲဃ့ဝဲလၢ “ပပၢ်အိၣ်လၢမူခိၣ်ဧၢ, မ်နမံၤ ဘၣ်တၢ်ပာ်စီဆှံအီၤတက့ၢ်.” (မးသဲ ၆:၉) တကးဒံးဘၣ် ယ့ၣ်ၡူး ပာ်ဖျါထီၣ်စ့ၢ်ကီးဝဲလၢ ဒ်သိးပကန့ၢ်ဘၣ် တၢ်မူအထူအယိာ်အဂီၢ် ပကဘၣ်သ့ၣ်ညါ ကစၢ်ယွၤအမံၤ, ဒိကနၣ်အကလုၢ် ဒီးအဲၣ်အီၤ.—ယိၤဟၣ် ၁၇:၃, ၆, ၂၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2-E ၁၁၁

စီၤယိၤသး

စီၤယိၤသး အမံၤန့ၣ် အမ့ၢ်မံၤလၢ အရ့ဒိၣ်. လၢစီၤယၤကိာ် အဖိခွါတဖၣ်အကျါ စီၤယိၤသးန့ၣ် အိၣ်ဒီးလီၢ်လၤလၢ အပတီၢ်ထီ အဃိ တဘျီတခီၣ် ပှၤကိးဝဲ ပှၤအံၣ်စရ့လးဖိ ဒီတကလုာ် မ့တမ့ၢ် ပှၤလၢ ကလံၤစိး ဘီမုၢ်တကပၤ လၢစီၤယိၤသးအမံၤန့ၣ် ကြၢးဝဲဘၣ်ဝဲ. (စံး ၈၀:၁; စံး ၇၈:၆၇; ဧၤ ၅:၆, ၁၅; ၆:၆) စီၤယိၤသးအမံၤန့ၣ် ပထံၣ်ဘၣ်အီၤလၢ ဝံအတၢ်စံးပာ်အပူၤစ့ၢ်ကီး. လၢဝံယဃ့းစက့လး အတၢ်ထံၣ်လၢညါအပူၤန့ၣ် အပာ်ဖျါထီၣ်ဝဲလၢ စီၤယိၤသးကန့ၢ်ဘၣ်ဝဲ တၢ်လီၢ်ခံတီၤ. လၢတၢ်ထံၣ်လၢညါခီအပူၤ ဝ့ၢ်တဖျၢၣ်လၢ အမံၤလၢ “ယဟိဝၤယွၤ အိၣ်ဝဲဖဲန့ၣ်” န့ၣ်အိၣ်ဒီးအတြဲၤတဖၣ်. ဒီးလၢအတြဲၤတဖၣ်အကျါတဘ့ၣ်န့ၣ် အမံၤမ့ၢ်ဝဲ ယိၤသးအတြဲၤ. (ဃ့း ၄၇:၁၃; ၄၈:၃၂, ၃၅) ဒီးဖဲအပာ်ဖျါထီၣ်ဝဲလၢ ကစၢ်ယွၤကပာ်ဖှိၣ်ထီၣ်က့ၤ အပှၤဂီၢ်မုၢ်အခါ အပာ်ဖျါထီၣ်ဝဲ စီၤယိၤသးဒ် ကလံၤစိးဘီမုၢ်အခိၣ် ဒီးယူဒၤလၢ ကလံၤထံး ဘီမုၢ်အခိၣ်. (ဃ့း ၃၇:၁၅-၂၆) ဝံဧိၤဘါဒယၤ ပာ်ဖျါထီၣ်ဝဲလၢ “စီၤယိၤသး အစၢၤအသွဲၣ်တဖၣ်” န့ၣ် ကပၣ်ဃုာ်လၢ ပှၤမၤဟးဂီၤဝဲ “စီၤဧ့ၡီၤ အစၢၤအသွဲၣ်တဖၣ်.” (ဧိၤ ၁၈) ဒီးဝံစကၤရယၤ ပာ်ဖျါထီၣ်ဝဲလၢ ယဟိဝၤယွၤ ကမၤပူၤဖျဲးဝဲ “စီၤယိၤသး အစၢၤအသွဲၣ်.” (ကၤ ၁၀:၆) ဒီးလၢနီၢ်သး အံၣ်စရ့လး အဒူၣ်တဖၣ်အကျါန့ၣ် ပှၤပာ်ဖျါထီၣ်ဝဲ စီၤယိၤသးအမံၤ ဒီးပှၤတပာ်ဖျါထီၣ်ဝဲ စီၤအ့ဖရဲၣ်အမံၤဘၣ်.—လီၣ် ၇:၈.

စီၤယိၤသးအမံၤအိၣ်လၢ လီၣ်ဖျါ အဆၢဒိၣ်နွံအပူၤန့ၣ် အပာ်ဖျါထီၣ်ဝဲလၢ ဝံအတၢ်စံးပာ်လၢ စီၤယၤကိာ်တဲဝဲ တချုးဖဲအသံဒံးဘၣ်န့ၣ် အဘၣ်ဃးဒီး နီၢ်သးအံၣ်စရ့လးဖိ.

လါစဲးပတ့ဘၢၣ် ၉-၁၅

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၈၂-၈၄

ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ နဒိးန့ၢ်ဘၣ်အီၤ လၢကစၢ်ယွၤ အတၢ်မၤပူၤ

wp၁၆.၆-E ၈ ¶၂-၃

တၢ်မၤလိလၢ ပဒိးန့ၢ်ဘၣ်လၢ ထိၣ်လၢမူခိၣ်တဖၣ်အအိၣ်

ပှၤယရူၤၡလ့ၣ်ဖိတဖၣ်န့ၣ် ကသ့ၣ်ညါဝဲ ထိၣ်ဘျ့ၣ်ဘျီၣ်အဂ့ၢ်. ထိၣ်တဖၣ်အံၤ ညီနုၢ်န့ၣ် အဝဲသ့ၣ် ဟးတ့ထီၣ်အသွံလၢ တၢ်သူၣ်ထီၣ်အခိၣ်ဒုး အနၢၣ်ထံးတဖၣ်. ဒီးတနီၤန့ၣ် အလဲၤတ့ထီၣ်အသွံလၢ စီၤၡလိၤမိၤ အတၢ်လုၢ်ဟံၣ်. တနံၣ်ဘၣ်တနံၣ် ထိၣ်ဘျ့ၣ်ဘျီၣ်လၢ အလဲၤတ့ထီၣ်အသွံလၢ တၢ်လုၢ်ဟံၣ်တဖၣ်န့ၣ် လီၤဂာ်လၢ အဝဲသ့ၣ် သ့ၣ်ညါဝဲလၢ တၢ်လီၢ်အံၤ အိၣ်ဒီးတၢ်ဘံၣ်တၢ်ဘၢ ဒီးပှၤတမၤတံာ်တာ် အဝဲသ့ၣ်အဖိဘၣ်.

စီၤကိရၤ အစၢၤအသွဲၣ်တဂၤလၢ အကွဲးဝဲ ထါစံးထီၣ်ပတြၢၤ ၈၄ န့ၣ် အဟဲမၤဘၣ်တၢ်လၢ တၢ်လုၢ်ဟံၣ် ဃုလါတဘျီ. ဒီးအပာ်သူၣ်ပာ်သးဝဲ ထိၣ်တဖၣ်လၢ အအိၣ်လၢ တၢ်လုၢ်ဟံၣ်. ဒီးအဝဲဘၣ်သးအိၣ်လၢ ယဟိဝၤယွၤ အဟံၣ်ဖးယံာ် ဒ်ထိၣ်ဘျ့ၣ်ဘျီၣ်တဖၣ် အိၣ်ဝဲအသိး. အဃိ အဝဲတဲဝဲလၢ “အိ တၢ်သုးမုၢ်ဂီၢ်မုၢ် အကစၢ် ယဟိဝၤယွၤဧၢ, နဒဲစီဆှံလၢ အဒိၣ်အမုၢ်န့ၣ် ယဘၣ်သူၣ်ဘၣ်သးအီၤဒိၣ်မး. ယဆၢလဲၤလၢ ယဟိဝၤယွၤ အတၢ်ပျီတဖၣ်အပူၤ, ယဆၢလဲၤလၢ ယသးဒီဖျၢၣ်ညါ သပှၢ်တၢၢ် တုၤဒၣ်လဲာ် ယလီၤဘှံးလီၤဘှါလီၤ. . . . ထိၣ်တဖၣ်ဒၣ်လဲာ် ဃုထံၣ်န့ၢ် အတၢ်အိၣ်တၢ်ဆိးအလီၢ်လၢ နဟံၣ်ပူၤ ဒီးထိၣ်ဘျ့ၣ်ဘျီၣ် တ့ထီၣ်အသွံလၢ အနီၢ်ကစၢ် ဒီးအဖိတဖၣ်အဂီၢ် လၢနတၢ် လုၢ်လီၢ်လၢ အလီၤကဟုကညီၢ် အကပၤလီၤ.” (စံးထီၣ်ပတြၢၤ ၈၄:၁-၃) ပဝဲ ဒီးပဖိတဖၣ်န့ၣ် မ့ၢ်ပဘၣ်သး လဲၤထံၣ်လိာ်ပသးဒီး ကစၢ်ယွၤအပှၤဂီၢ်မုၢ်လၢ တၢ်အိၣ်ဖှိၣ်ပူၤ ဒီးပပာ်လုၢ်ပာ်ပှ့ၤ တၢ်ခွဲးတၢ်ယာ်တခါအံၤဧါ.—စံးထီၣ်ပတြၢၤ ၂၆:၈, ၁၂.

တၢး၀၈-E ၇/၁၅ ၃၀ ¶၃-၄

နမ့ၢ်တမုၢ်လၢ်တၢ်လၢ နနီၢ်ကစၢ်အအိၣ် အါတလၢဘၣ်န့ၣ် နကအိၣ်ဒီးတၢ်သးခု

ခီဖျိလၢ နသးပှၢ်ထီၣ် မ့တမ့ၢ် နတၢ်အိၣ်ဆူၣ်အိၣ်ချ့တဂ့ၤလၢၤဘၣ်အဃိ ဘၣ်သ့ၣ်သ့ၣ် နမၤယဟိဝၤယွၤအတၢ်မၤ တန့ၢ်ဒ်သိးဒီးနအဲၣ်ဒိးမၤအသိးဘၣ်. ဒီးနမ့မ့ၢ် မိပါန့ၣ် နဘၣ်သူနတၢ်ဆၢကတီၢ် ဒီးနတၢ်ဂံၢ်တၢ်ဘါလၢ ကွၢ်ထွဲနဖိအဃိ ဘၣ်သ့ၣ်သ့ၣ် နမၤနီၢ်ကစၢ်တၢ်မၤလိလံာ်စီဆှံ တချုးအါအါလၢၤဘၣ် မ့တမ့ၢ် နထီၣ်တၢ်အိၣ်ဖှိၣ် သနာ်က့ နကတူၢ်ဘၣ်လၢ နတဒိးန့ၢ်ဘၣ်အဘျုး အါအါဘၣ်. ဒီးဘၣ်သ့ၣ်သ့ၣ် နသးစၢၢ်ဆၢတၢ်လၢ နမၤအီၤတသ့ဘၣ်တဖၣ် အဃိနတထံၣ်တၢ်လၢနမၤအီၤသ့တဖၣ်လၢၤဘၣ်.

လၢအပူၤကွံာ် အနံၣ်လၢအကထိန့ၣ် ပှၤလ့ၤဝံဖိတဂၤ ပာ်ဖျါထီၣ်ဝဲ အတၢ်မိၣ်န့ၢ်သးလီလၢ အကဲထီၣ်အသးတသ့ဘၣ်. အဝဲလဲၤမၤဘၣ်တၢ်လၢ တၢ်လုၢ်ဟံၣ်တနံၣ် ခံဘျီ ဒီးတဘျီန့ၣ် မၤဘၣ်ဝဲ တနွံအဃိ အဝဲပာ်လုၢ်ပာ်ပှ့ၤဝဲ တၢ်ခွဲးတၢ်ယာ်တခါအံၤဒိၣ်မး. သနာ်က့ အအဲၣ်ဒိးအိၣ်ဘူးဒီး တၢ်လုၢ်လီၢ်ထီဘိ. ဒ်သိးအကအိၣ်ဒီး တၢ်သးမံအဂီၢ် တၢ်မနုၤမၤစၢၤအီၤလဲၣ်. (စံး ၈၄:၁-၃) အအိၣ်ဘၣ်လၢ တၢ်လုၢ်ဟံၣ် အတၢ်ပျီတဖၣ် တသီန့ၣ် အထံၣ်ဝဲ ဒ်သိးဒီး တၢ်ခွဲးတၢ်ယာ်လီၤဆီအဃိ မၤစၢၤအီၤဒ်သိး အကအိၣ်ဒီးတၢ်သးမံအဂီၢ်. (စံး ၈၄:၄, ၅, ၁၀) ဒ်န့ၣ်အသိး ပဝဲနာ်က့ လၢပကဆိကမိၣ် တၢ်လၢပမၤတသ့ဘၣ်တဖၣ်အလီၢ် ပကြၢးဆိကမိၣ်ထံ တၢ်လၢပမၤအီၤသ့ ဒီးကဲထီၣ်အသးသ့တဖၣ် ဒီးပာ်လုၢ်ပာ်ပှ့ၤအီၤ.

တၢး၂၀.၀၁ ၁၇ ¶၁၂

ယဟိဝၤယွၤ အဲၣ်နၤဒီးပာ်လုၢ်ပာ်ပှ့ၤနၤ

^၁၂ နမ့ၢ်တူၢ်ဘၣ် တၢ်ဆူးတၢ်ဆါသနာ်က့ နနာ်သ့ သပှၢ်ကတၢၢ်လၢ ယဟိဝၤယွၤ သ့ၣ်ညါဝဲ တၢ်လၢအကဲထီၣ်အသးဒီးနၤန့ၣ်လီၤ. ဃ့ကစၢ်ယွၤ လၢကမၤစၢၤနၤဒ်သိး နကအိၣ်ဒီး တၢ်ထံၣ်လၢအကြၢးအဘၣ် လၢနတၢ်အိၣ်သး အဖီခိၣ်န့ၣ်တက့ၢ်. မ့ၢ်ဝံၤန့ၣ် ဃုဖးကွၢ် တၢ်ဂ့ၢ်တၢ်ကျိၤလၢ လံာ်စီဆှံအပူၤ လၢယဟိဝၤယွၤ ကွဲးလီၤပာ်စၢၤဝဲလၢ နဂီၢ်န့ၣ်တက့ၢ်. ဒီးသးစၢၢ်ဆၢ လံာ်စီဆှံအဆၢဖိတဖၣ်လၢ အပာ်ဖျါထီၣ်ဝဲ ယဟိဝၤယွၤ ပာ်လုၢ်ပာ်ပှ့ၤ အခ့အပှၤဒိၣ်မးန့ၣ်တက့ၢ်. နမ့ၢ်မၤဒ်န့ၣ်န့ၣ် နကထံၣ်ဘၣ်လၢ ယဟိဝၤယွၤ ဂ့ၤဝဲလၢ ပှၤလၢအတီဒီးအီၤတဖၣ် အဖီခိၣ်လီၤ.—စံးထီၣ်ပတြၢၤ ၈၄:၁၁.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1-E ၈၁၆

ပှၤဖိၣ်ဃဲဖိ

ပှၤဖိၣ်ဃဲတဖၣ်န့ၣ် ပှၤလၢအကွၢ်ထွဲအီၤတဖၣ် သံသဒၣ်ကွံာ်အဝဲသ့ၣ် ဒီးပှၤဒီသဒၢအဝဲသ့ၣ် တအိၣ်ဘၣ်အဃိ ညီဒိၣ်မးလၢ ပှၤကကွၢ်ကပာ်ကွံာ်အဝဲသ့ၣ်. ဖဲယဟိဝၤယွၤ ကပာ်ဖျါထီၣ်ဝဲလၢ ပှၤအံၣ်စရ့လးဖိတဖၣ် မၤတၢ်တီတၢ်လိၤထဲလဲၣ် မ့တမ့ၢ် အလဲၤကပာ်ကွံာ် တၢ်တီတၢ်လိၤထဲလဲၣ်အခါ အဝဲသူဝဲတၢ်ကတိၤလၢအမ့ၢ် “ပှၤဖိၣ်ဃဲဖိ.” ဖဲပှၤအံၣ်စရ့လးဖိတဖၣ် အနီၢ်သးဆူၣ်အခါန့ၣ် ပှၤဖိၣ်ဃဲဖိတဖၣ်အံၤ ပှၤကွၢ်ထွဲအဝဲသ့ၣ်ဂ့ၤဂ့ၤ. သနာ်က့ ဖဲလၢထံကီၢ်ပူၤ ပှၤတမၤတၢ် တီတီလိၤလိၤလၢၤဘၣ်အခါ ပှၤကွၢ်ကပာ်ကွံာ်ဝဲ ပှၤဖိၣ်ဃဲဖိတဖၣ်. ခီဖျိလၢ ပှၤအံၣ်စရ့လးဖိတဖၣ် မၤဝဲဒ်န့ၣ်အဃိ အဝဲသ့ၣ်တုၤလၢတၢ်ဟးဂီၤ. (စံး ၈၂:၃; ၉၄:၆; ၡါ ၁:၁၇, ၂၃; ယံး ၇:၅-၇; ၂၂:၃; ဃ့း ၂၂:၇; ကၤ ၇:၉-၁၁; မၤ ၃:၅) ယဟိဝၤယွၤဆိၣ်အၢဝဲ ပှၤလၢ အမၤနၢၤအီၣ်ဃီၣ် ပှၤဖိၣ်ဃဲတဖၣ်. (၅ မိၤ ၂၇:၁၉; ၡါ ၁၀:၁, ၂) ယဟိဝၤယွၤ ပာ်ဖျါထီၣ်အသးဒ် ပှၤပှ့ၤက့ၤတၢ် (ကတိၤ ၂၃:၁၀, ၁၁), ပှၤလၢ အမၤစၢၤတၢ် (စံး ၁၀:၁၄), ဒီးပၢ် (စံး ၆၈:၅) လၢဖိၣ်ဃဲတဖၣ်အဂီၢ်. ဒီးအဝဲစံၣ်ညီၣ်တၢ် တီတီလိၤလိၤလၢ ပှၤဖိၣ်ဃဲတဖၣ်အဂီၢ် (၅ မိၤ ၁၀:၁၇, ၁၈), ပာ်ဖျါထီၣ် တၢ်သးကညီၤ (ဟိၤ ၁၄:၃), ဆီၣ်ထွဲမၤစၢၤ ပှၤဖိၣ်ဃဲတဖၣ် (စံး ၁၄၆:၉), ပာ်မူ အဝဲသ့ၣ်.—ယံး ၄၉:၁၁.

ခရံာ်ဖိ အမ့ၢ်အတီတဖၣ် အတၢ်ပနီၣ်တခါန့ၣ် မ့ၢ်ဝဲ ပကဘၣ်ပာ်ဖျါထီၣ်လၢ ပဆိကမိၣ်န့ၢ်တၢ်လၢ မုၣ်ကမဲ ဒီးဖိၣ်ဃဲတဖၣ်အဂီၢ်. စီၤယၤကိာ် ကွဲးဝဲ လံာ်ဆူ ခရံာ်ဖိတဖၣ် အအိၣ်လၢ “လၢပပၢ်ကစၢ်ယွၤ အမဲာ်ညါန့ၣ် တၢ်ဘူၣ်ထီၣ်ဘါထီၣ်လၢ အစီအဆှံ ဒီးအတဘၣ်အၢဘၣ်သီဘၣ်န့ၣ် မ့ၢ်ဝဲတၢ်ကွၢ်ထွဲမၤစၢၤ ပှၤဖိၣ်ဃဲ ဒီးမုၣ်ကမဲ လၢအဘၣ်နးဘၣ်ဖှီၣ်တဖၣ် ဒီးတၢ်ဟးဆှဲး ပှၤဟီၣ်ခိၣ်ဖိလၢ အတဒိကနၣ်တၢ်ဘၣ်တဖၣ် အတၢ်အိၣ်မူကျဲလၢ အဘၣ်အၢဘၣ်သီတဖၣ်လီၤ.”—ယၤ ၁:၂၇.

လါစဲးပတ့ဘၢၣ် ၁၆-၂၂

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၈၅-၈၇

တၢ်ထုကဖၣ် မၤစၢၤပှၤလၢ ပကအိၣ်ဒီး တၢ်တူၢ်န့ၢ်ခီၣ်ကဲ

တၢး၁၂-E ၅/၁၅ ၂၅ ¶၁၀

မ့ၢ်နမၤလၤကပီၤယဟိဝၤယွၤဧါ

^၁၀ ဒ်သိးပမၤလၤကပီၤ ကစၢ်ယွၤကသ့အဂီၢ်ပကဘၣ် “ဆဲးဃ့ထုကဖၣ်တၢ် ထီဘိတက့ၢ်.” (ရိမ့ၤ ၁၂:၁၂) ပဃ့ယဟိဝၤယွၤလၢ ကမၤစၢၤပှၤဒ်သိး ပကဘူၣ်ထီၣ်ဘါထီၣ်အီၤလၢ ကျဲလၢဘၣ်အသးသ့. ဒီးပကြၢးဃ့ဒ်န့ၣ်. ဒီးဒ်သိးဒီး ပတၢ်နာ်ကအါထီၣ် ဒီးပကအိၣ်ဒီးတၢ်ဂံၢ်တၢ်ဘါလၢ ပကတြီဆၢကွံာ် တၢ်မၤကွၢ်တဖၣ်ဒီး ပ “သူ ကစၢ်ယွၤ အကလုၢ်ကထါ တၢ်မ့ၢ်တၢ်တီ တီတီလိၤလိၤ” ကသ့အဂီၢ် ပဃ့အီၤသးစီဆှံသ့. (၂ တံၤ ၂:၁၅; မး ၆:၁၃; လူၤ ၁၁:၁၃; ၁၇:၅) ဒ်ဖိတဂၤ သန့ၤအသးလၢ အပၢ်အအိၣ်အသိး ပကဘၣ်သန့ၤပသးလၢ ပပၢ်ယဟိဝၤယွၤအအိၣ်ဒ်န့ၣ်. ပမ့ၢ်ဃ့ ကစၢ်ယွၤလၢ ကမၤစၢၤပှၤ ဒ်သိးပမၤအါထီၣ် အတၢ်မၤကသ့န့ၣ် ပနာ်သ့သပှၢ်ကတၢၢ်လၢ အဝဲကမၤစၢၤပှၤ. ပတကြၢးတူၢ်ဘၣ်လၢ ပမ့ၢ်ဃ့ထုကဖၣ်န့ၣ် ကကဲထီၣ်တၢ်တံာ်တာ်လၢ ကစၢ်ယွၤအဂီၢ် နီတဘျီဘၣ်. လၢပတၢ်ဃ့ထုကဖၣ်အပူၤ ပကြၢးစံးထီၣ်ပတြၢၤ ဒီးစံးဘျုးအီၤ ဒီးဃုအတၢ်ဟံးစုနဲၣ်ကျဲ လီၤဆီဒၣ်တၢ်ဖဲ ပထံၣ်ဘၣ်ဒီး တၢ်မၤကွၢ်အဆၢကတီၢ်. တကးဒံးဘၣ် ပဃ့အီၤလၢ ကမၤစၢၤပှၤ ဒ်သိးပမၤလၤကပီၤ အမံၤကသ့အဂီၢ်သ့.—စံး ၈၆:၁၂; ယၤ ၁:၅-၇.

တၢး၂၃.၀၅ ၁၃ ¶၁၇-၁၈

ယဟိဝၤယွၤ စံးဆၢပတၢ်ထုကဖၣ်ဒ်လဲၣ်

^၁၇ ဖး စံးထီၣ်ပတြၢၤ ၈၆:၆, ၇. စီၤဒၤဝံး နာ်ဝဲသပှၢ်တၢၢ်လၢ ယဟိဝၤယွၤ နၢ်ဟူ ဒီးစံးဆၢ အတၢ်ထုကဖၣ်. ဒ်စီၤဒၤဝံးအသိး နၤစ့ၢ်ကီး နနာ်န့ၢ် ယဟိဝၤယွၤသ့. တၢ်လဲၤခီဖျိလၢ ပတဲသကီးလၢ တၢ်မၤလိတခါအံၤန့ၣ် ဒုးသ့ၣ်ညါပှၤလၢ ဒ်သိးပလဲၤခီဖျိ ပတၢ်ကီတၢ်ခဲကန့ၢ်အဂီၢ် ယဟိဝၤယွၤ ကဟ့ၣ်ပှၤ အတၢ်ကူၣ်သ့ ဒီးအတၢ်စိကမီၤ. ဒီးတဘျီတခီၣ်န့ၣ် ဒ်သိးယဟိဝၤယွၤ ကမၤစၢၤပှၤ အဂီၢ် အကသူဝဲ ပဒီပုၢ်ဝဲၢ်မုၣ်ခွါတဖၣ် မ့တမ့ၢ် ပှၤလၢအတဘူၣ်ထီၣ်ဘါထီၣ်အီၤတဖၣ်.

^၁၈ တဘျီတခီၣ် ယဟိဝၤယွၤ တစံးဆၢ ပတၢ်ထုကဖၣ် ဒ်သိးပဆိမိၣ်ဘၣ်. သနာ်က့ ပသ့ၣ်ညါလၢ အကစံးဆၢပှၤသပှၢ်တၢၢ်. တကးဒံးဘၣ် ပလိၣ်ဘၣ် မနုၤလဲၣ် ဒီးပလိၣ်ဘၣ်လၢအခါဖဲလဲၣ်န့ၣ် ယဟိဝၤယွၤသ့ၣ်ညါဝဲ ဒီးအကဟ့ၣ်ပှၤသပှၢ်တၢၢ်. အဃိ ပကဘၣ် ဆဲးဃ့ထုကဖၣ် ဒီးနာ်သပှၢ်တၢၢ်လၢ ယဟိဝၤယွၤ နၢ်ဟူပတၢ်ထုကဖၣ်. ဒီးခဲအံၤန့ၣ် ပကဘၣ်နာ်သပှၢ်တၢၢ်လၢ ယဟိဝၤယွၤ သးအိၣ်ပှၤ ဒီးခါဆူညါ လၢဟီၣ်ခိၣ်သီန့ၣ် အက “မၤလၢပှဲၤ တၢ်သးသမူခဲလၢာ် အတၢ်မိၣ်န့ၢ်သးလီတဖၣ်.”—စံးထီၣ်ပတြၢၤ ၁၄၅:၁၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၀.၀၆ ၁၃ ¶၁၇, ၁၈

ဟ့ၣ်ယၤ တၢ်သးစၢၢ်ဆၢပံၢ်ကလာ် လၢယကပျံၤ နမံၤအဂီၢ်တက့ၢ်

^၁၇ ပမ့ၢ်တသးစၢၢ်ဆၢ ကစၢ်ယွၤ လၢပသးဒီဖျၢၣ်ညါဘၣ်န့ၣ် တကဲဘျုးဝဲဘၣ်. ဆိကမိၣ်ကွၢ် ပှၤလိာ်ကွဲဖိတဖု လၢအတမၤသကိးတၢ် ဃူဃူဖိးဖိးဘၣ်န့ၣ်တက့ၢ်. လၢအဝဲသ့ၣ်အကျါ တနီၤန့ၣ် အဲၣ်ဒိးလၢ အမံၤဒိၣ်သၣ်ဒိၣ်, တနီၤန့ၣ် တအဲၣ်ဒိးလိာ်ကွဲ ဒ်တၢ်ဘျၢအိၣ်ဝဲအသိးဘၣ် ဒီးတနီၤန့ၣ် တပာ်ကဲဝဲ ပှၤလၢအသိၣ်လိအီၤတဂၤဘၣ်. ပှၤလိာ်ကွဲဖိဒ်အံၤတဖုန့ၣ် တမ့ၢ်လၢအဝဲသ့ၣ် ကမၤနၢၤတၢ်ဘၣ်. မ့မ့ၢ်ပှၤလိာ်ကွဲဖိတဖု လၢအမၤသကိးတၢ် ဃူဃူဖိးဖိးန့ၣ် အဝဲသ့ၣ်ကမၤနၢၤတၢ်လီၤ. ဒ်နမ့ၢ် ပှၤလၢအဘူၣ်ထီၣ်ဘါထီၣ် ယဟိဝၤယွၤအသိး နတၢ်ဆိကမိၣ်, တၢ်လၢနအဲၣ်ဒိး ဒီးနတၢ်တူၢ်ဘၣ်တဖၣ် မ့ၢ်အိၣ်တမံၤဃီမး နသးကလီၤဂာ်ဒ်သိး ပှၤလိာ်ကွဲဖိတဖုလၢ အကမၤနၢၤတၢ်လီၤ. ဘၣ်ဆၣ် မုၣ်ကီၤလံၢ် အဲၣ်ဒိးမၤတံာ်တာ်ပှၤ ဒ်သိးပသုတသးစၢၢ်ဆၢ ကစၢ်ယွၤလၢ ပသးဒီဖျၢၣ်တဂ့ၤအဂီၢ်လီၤ. အဝဲအဲၣ်ဒိးလၢ ပတၢ်ဆိကမိၣ်, ပတၢ်သူၣ်လီသးကွံ ဒီးပတၢ်တူၢ်ဘၣ်တဖၣ် ကထီဒါလိာ်အသးဒီး ယဟိဝၤယွၤ အတၢ်ဘၣ်သးလီၤ. နမ့ၢ်အဲၣ်ဒိးလၢ ယဟိဝၤယွၤ ကတူၢ်လိာ် နတၢ်ဘူၣ်ထီၣ်ဘါထီၣ်န့ၣ် နကဘၣ် ဘူၣ်ထီၣ်ဘါထီၣ်အီၤ လၢနသးဒီဖျၢၣ်ညါလီၤ. (မးသဲ ၂၂:၃၆-၃၈) ဒ်သိး ပကသးစၢၢ်ဆၢ ယဟိဝၤယွၤ လၢပသးဒီဖျၢၣ်အဂီၢ် ပတဘၣ်ဟ့ၣ် မုၣ်ကီၤလံၢ်အခွဲး နီတဘျီဘၣ်.

^၁၈ ဃ့ဘါထုကဖၣ် လၢယဟိဝၤယွၤအအိၣ် ဒ်စီၤဒၤဝံးဃ့ဝဲလၢ “ဘိးထီၣ်ယသး [ဟ့ၣ်ယၤတၢ်သးစၢၢ်ဆၢ] လၢယကပျံၤနမံၤတက့ၢ်.” ဒီးတသ့ဖဲအသ့န့ၣ် မၤထွဲဒ် နတၢ်ထုကဖၣ်အသိးတက့ၢ်. ကိးနံၤဒဲး ဖဲနဆၢတဲာ်တၢ်လၢ အဒိၣ်မ့ၢ်ဂ့ၤ အဆံးမ့ၢ်ဂ့ၤ ပာ်လီၤနသးလၢ နတၢ်ဆၢတဲာ်တဖၣ် ကပာ်ဖျါထီၣ်လၢ နယူးယီၣ်ပာ်ကဲ ယဟိဝၤယွၤအမံၤစီဆှံ သပှၢ်တၢၢ်တက့ၢ်. ဒ်နမ့ၢ် ယဟိဝၤပှၤအုၣ်အသးတဂၤအသိး နမ့ၢ်မၤဒ်န့ၣ်န့ၣ် ကစၢ်ယွၤအမံၤကဘၣ် တၢ်မၤလၤကပီၤအီၤ လၢနဃိလီၤ. (ကတိၤဒိ ၂၇:၁၁) ဒီးပတဲဒ်သိး ဝံမံကၤ လၢအတဲဝဲလၢ “ပကလဲၤတၢ်ပဝဲလၢ ယွၤပကစၢ်အမံၤပူၤ လီၤထူလီၤယိာ်” ကသ့ဝဲလီၤ.—မံကၤ ၄:၅.

လါစဲးပတ့ဘၢၣ် ၂၃-၂၉

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၈၈-၈၉

ယဟိဝၤယွၤအတၢ်ပၢ မ့ၢ်တၢ်ပၢ လၢအဂ့ၤကတၢၢ်

တၢး၁၇.၀၆ ၂၂ ¶၅

ဆီၣ်ထွဲ ယဟိဝၤယွၤ ပၢတၢ်အခွဲးတက့ၢ်

^၅ ဆိကမိၣ်ကွၢ်တၢ်ဂ့ၢ်အဂၤတမံၤလၢ ဘၣ်မနုၤအဃိ ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ ကပၢတၢ်လဲၣ်န့ၣ်တက့ၢ်. အဝဲသူဝဲ အတၢ်စိတၢ်ကမီၤလၢ ကျဲလၢအဂ့ၤကတၢၢ်န့ၣ်လီၤ. အဝဲတဲဝဲလၢ– “ယမ့ၢ်ယွၤလၢ အမၤတၢ်ဘျုးတၢ်ဖှိၣ်, ဒီးတၢ်စံၣ်ညီၣ်တီ, ဒီးတၢ်တီတၢ်လိၤလၢ ဟီၣ်ခိၣ်ချၢတက့ၢ်. အဂ့ၢ်ဒ်အံၤ, ဘၣ်ယသးလၢတၢ်န့ၣ်တဖၣ်လီၤ, ယွၤစံးဝဲဒၣ်.” (ယံးရမံယၤ ၉:၂၄) ဒ်သိးယဟိဝၤယွၤ ကဆၢတဲာ်တၢ်လၢအဘၣ်အဂီၢ် အဝဲတလိၣ်ပှၤဟီၣ်ခိၣ်ဖိ အတၢ်သိၣ်တၢ်သီဘၣ်. လၢတၢ်န့ၣ်အလီၢ် အဝဲမ့ၢ်ပှၤလၢအပာ်ပနီၣ်ဝဲ တၢ်ဂ့ၤဒီးတၢ်အၢန့ၣ်လီၤ. ဒီးယဟိဝၤယွၤ ဟ့ၣ်လီၤဝဲ ပှၤဟီၣ်ခိၣ်ဖိတဖၣ် တၢ်သိၣ်တၢ်သီလၢ ဒိးသန့ၤထီၣ်အသးလၢ အတၢ်တီတၢ်လိၤန့ၣ်လီၤ. စံးထီၣ်ပတြၢၤ စံးဝဲလၢ– “နလီၢ်ပစိာ်အိၣ်ဝဲဆိးဝဲလၢ တၢ်တီတၢ်လိၤ, ဒီးတၢ်စံၣ်ညီၣ်အပူၤလီၤ.” လၢတၢ်န့ၣ်အဃိ ကယဲၢ်တၢ်သိၣ်တၢ်သီ, တၢ်ဟံးစုနဲၣ်ကျဲ မ့တမ့ၢ် တၢ်ဆၢတဲာ်လၢအဟဲလၢ ယဟိဝၤယွၤအအိၣ်န့ၣ် ဘၣ်ဝဲခဲလၢာ်လီၤ. (စံးထီၣ်ပတြၢၤ ၈၉:၁၄; ၁၁၉:၁၂၈) မုၣ်ကီၤလံၢ် တဲဟးဂီၤဝဲလၢ ယဟိဝၤယွၤအတၢ်ပၢန့ၣ် တတီတလိၤဘၣ်. ဘၣ်ဆၣ် မုၣ်ကီၤလံၢ်အနီၢ်ကစၢ်ဒၣ်ဝဲ ဒုးအိၣ်ထီၣ်တၢ်တီတၢ်လိၤလၢ ဟီၣ်ခိၣ်ချၢတန့ၢ်ဘၣ်.

တၢး၁၇.၀၆ ၂၃-၂၄ ¶၁၀-၁၁

ဆီၣ်ထွဲ ယဟိဝၤယွၤ ပၢတၢ်အခွဲးတက့ၢ်

^၁၀ ယဟိဝၤယွၤ အတၢ်ပၢန့ၣ် တဃံးတလၢဘၣ်. လၢတၢ်န့ၣ်အလီၢ် ပှၤလၢအဒိကနၣ်အကလုၢ်တဖၣ်န့ၣ် ကဒိးန့ၢ်ဘၣ် တၢ်သဘျ့ ဒီးတၢ်သူၣ်ခုသးခု နီၢ်နီၢ်လီၤ. (၂ ကရံၣ် ၃:၁၇) စီၤဒၤဝံးတဲဝဲ ယဟိဝၤယွၤန့ၣ်– “တၢ်လၤကပီၤ, ဒီးတၢ်ကဟုကညီၢ်အိၣ်လၢအမဲာ်ညါ, ဒီးတၢ်ဂံၢ်တၢ်ဘါ, ဒီးတၢ်သးခုအိၣ်လၢအလီၢ်ပူၤလီၤ.” (၁ ကွဲးနီၣ်တၢ် ၁၆:၇, ၂၇) ပှၤကွဲးထါစံးထီၣ်ပတြၢၤ စီၤအ့သၣ် ကွဲးဝဲလၢ– “ပှၤဂီၢ်မုၢ်လၢ အသ့ၣ်ညါတၢ်သးခုအသီၣ်န့ၣ် ဘၣ်ဆိၣ်ဂ့ၤဝဲလီၤ. အဝဲသ့ၣ်ကလဲၤ, ယွၤဧၢ, လၢနမဲာ်အတၢ်ကပီၤအပူၤလီၤ. သူၣ်ဖှံသးညီလၢနမံၤအပူၤဒီနံၤညါ, ဒီးကထီၣ်ဘးလၢတၢ်ထီၣ်ထီလၢ နတၢ်တီတၢ်လိၤန့ၣ်လီၤ.”—စံးပတြၢၤ ၈၉:၁၅, ၁၆.

^၁၁ ပဆိကမိၣ်ထံ ယဟိဝၤယွၤအတၢ်ဂ့ၤတၢ်ဝါတဖၣ် မ့ၢ်အါထီၣ်န့ၣ် ပတၢ်နာ်လၢ ယဟိဝၤယွၤအတၢ်ပၢအဖီခိၣ်စ့ၢ်ကီး ကဂၢၢ်ကျၢၤထီၣ်ဝဲလီၤ. ပကတူၢ်ဘၣ်ဒ် ပှၤကွဲးထါစံးထီၣ်ပတြၢၤလၢအစံးဘၣ်ယွၤလၢ– “ပအိၣ်ပဆိးလၢနဂၢၤတဖၣ်အပူၤမုၢ်တနံၤ, ဂ့ၤန့ၢ်ပအိၣ်လၢအဂၤတပူၤ အနံၤတကထိန့ၣ်တက့ၢ်လီၤ.” (စံးထီၣ်ပတြၢၤ ၈၄:၉) ယဟိဝၤယွၤ တ့လီၤပှၤအဃိ ဒ်သိးပကအိၣ်ဒီးတၢ်သးခုအဂီၢ် ပကဘၣ်မၤဒ်လဲၣ်န့ၣ် အဝဲသ့ၣ်ညါဝဲလီၤ. အဝဲဟ့ၣ်လီၤပှၤတၢ်လၢ ပလိၣ်ဘၣ်တဖၣ် လၢလၢပှဲၤပှဲၤလီၤ. တၢ်လၢယဟိဝၤယွၤ မၢပမၤတၢ်တမံၤလၢ်လၢ်န့ၣ် ကဲဘျုးလၢပနီၢ်ကစၢ် အဂီၢ်ခဲလၢာ်လီၤ. ပမ့ၢ်ဘၣ်တူၢ်ဆါပသးဒၣ်လဲာ် ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပကသူၣ်ခုသးခုထီဘိလီၤ.—ဖး ယၡါယၤ ၄၈:၁၇ တက့ၢ်.

တၢး၁၄-E ၁၀/၁၅ ၁၀ ¶၁၄

နာ်န့ၢ် ယွၤအဘီအမုၢ် သပှၢ်ကတၢၢ်

^၁၄ ယဟိဝၤယွၤ မၤဝဲတၢ်အၢၣ်လီၤအီလီၤဒီး အံၣ်စရ့လး အစီၤပၤဒၤဝံး. ဒီးတၢ်အၢၣ်လီၤအီလီၤတခါအံၤ ဘၣ်တၢ်ကိးအီၤလၢ တၢ်အၢၣ်လီၤအီလီၤလၢ အဘၣ်ဃးဒီး စီၤဒၤဝံး. (ဖး ၂ ၡမူၤအ့လး ၇:၁၂, ၁၆.) ယဟိဝၤယွၤ အၢၣ်လီၤဝဲလၢ မ့းၡံအၤ ကဟဲလီၤစၢၤလီၤသွဲၣ်လၢ စီၤဒၤဝံး. (လူၤ ၁:၃၀-၃၃) အဃိ ပသ့ၣ်ညါဘၣ်လၢ ယဟိဝၤယွၤ ပာ်ဖျါထီၣ်ဝဲ လီၤတံၢ်လီၤဆဲးလၢ မ့းၡံအၤ ကဟဲလီၤစၢၤလီၤသွဲၣ်လၢ မတဂၤအအိၣ်လဲၣ်. ဒီးယဟိဝၤယွၤ တဲဝဲလၢ စီၤဒၤဝံးအစၢၤအသွဲၣ်အံၤန့ၣ် အအိၣ်ဒီး “တၢ်ခွဲးတၢ်ယာ်” လၢကကဲထီၣ် မ့းၡံအၤ အဘီအမုၢ် အစီၤပၤ. (ဃ့း ၂၁:၂၅-၂၇) စီၤဒၤဝံး အတၢ်ပၢန့ၣ် ကအိၣ်ဝဲလီၤထူလီၤယိာ် မ့ၢ်လၢ စီၤဒၤဝံး အစၢၤအသွဲၣ် ယ့ၣ်ၡူးန့ၣ် “ကအိၣ်ဂၢၢ်ဆိးကျၢၤဝဲ လီၤထူလီၤယိာ် ဒီးအလီၢ်ပစိာ် ကအိၣ်ဂၢၢ်ဆိးကျၢၤဝဲ ဒ်မုၢ်အသိး.” (စံး ၈၉:၃၄-၃၇) ပနာ်သ့ သပှၢ်ကတၢၢ်လၢ မ့းၡံအၤ အတၢ်ပၢန့ၣ် ဟးဂီၤတန့ၢ်ဘၣ် ဒီးအတၢ်ပၢန့ၣ် ကကဲဘျုးဝဲ လီၤထူလီၤယိာ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

cl-E ၂၈၁ ¶၄-၅

“ပှၤလၢအသးတီန့ၣ် အိၣ်ထဲနၤတဂၤ”

^၄ “တၢ်သးတီ” လၢပထံၣ်ဘၣ်အီၤလၢ ဧ့ၤဘြံၤလံာ်စီဆှံအပူၤန့ၣ် အဲၣ်ဒိးတဲဝဲ တၢ်အဲၣ် ဒီးတၢ်သူၣ်အိၣ်သးအိၣ်လၢ တၢ်တမံၤမံၤအဖီခိၣ်. ဒီးတချုးလၢ တၢ်တိာ်ပာ်လၢ အဘၣ်ဃးဒီးအီၤတမံၤမံၤ လၢထီၣ်ပှဲၤထီၣ်ဒံးဘၣ်န့ၣ် ပှၤတပာ်တ့ၢ်ကွံာ်အီၤဘၣ်. ပှၤလၢအအိၣ်ဒီး တၢ်သးတီန့ၣ် အအိၣ်ဒီးတၢ်အဲၣ်တၢ်ကွံ. တဘျီတခီၣ် ပှၤတဂၤကမၤတၢ်တမံၤမံၤ ခီဖျိလၢ အအဲၣ်ဒိး မၤလၢပှဲၤအမူဒါအဃိ ဒီးတမ့ၢ်လၢ တၢ်အဲၣ်အဃိဘၣ်. အဃိ ပှၤလၢအအိၣ်ဒီး တၢ်သးတီန့ၣ် အလီၤဆီဒီး ပှၤလၢပှၤနာ်န့ၢ်အီၤသ့. တဘျီတခီၣ် တၢ်လၢအသးသမူတအိၣ်ဘၣ်နာ်က့ အကဲထီၣ် တၢ်လၢပှၤနာ်န့ၢ်အီၤသ့ သ့ဝဲ. အဒိ ဘၣ်ဃးဒီးလါန့ၣ် ပှၤကွဲးထါစံးထီၣ်ပတြၢၤ ပာ်ဖျါထီၣ်ဝဲလၢ လါန့ၣ်ကဲဝဲ “တၢ်အုၣ်သးလၢအတီ လၢမူခိၣ်,” မ့ၢ်လၢလါန့ၣ် အဟဲထီၣ်လၢ မုၢ်နၤအဆၢကတီၢ် ထီဘိအဃိ. (စံးထီၣ်ပတြၢၤ ၈၉:၃၇) ဘၣ်ဆၣ် လါန့ၣ် ပှၤတတဲလၢ အိၣ်ဒီးတၢ်သးတီဘၣ်, မ့ၢ်လၢ တၢ်တမံၤမံၤလၢ အသးသမူတအိၣ်ဘၣ်န့ၣ် အပာ်ဖျါထီၣ် တၢ်အဲၣ်တသ့ဘၣ်. မ့မ့ၢ် ပှၤဟီၣ်ခိၣ်ဖိတဖၣ်န့ၣ် အပာ်ဖျါထီၣ်တၢ်အဲၣ်သ့.

^၅ လၢလံာ်စီဆှံအပူၤ တၢ်ကတိၤလၢ အမ့ၢ်တၢ်သးတီန့ၣ် အမၤမုာ်ထီၣ်ပသးဒိၣ်မး. အပာ်ဖျါထီၣ်ဝဲ ပှၤလၢအပာ်ဖျါထီၣ် တၢ်သးတီ ဒီးပှၤလၢ အဘၣ်တၢ်ပာ်ဖျါထီၣ် တၢ်သးတီလၢအိၣ်တဂၤ အဝဲသ့ၣ် အိၣ်ဒီးတၢ်ရ့လိာ်သးလၢအဂ့ၤ. ဒီးတၢ်သးတီတခါအံၤ အတကဒံကဒါ ညီညီဘၣ်. အတလီၤဂာ်ဒ်သိး ပီၣ်လဲၣ်အလပီလၢ အဒံဝ့ၤဒံဝီၤ လၢကလံၤအူဝဲအဃိန့ၣ်ဘၣ်. တၢ်သးတီ မ့တမ့ၢ် တၢ်အဲၣ်လၢအအိၣ်ဒီး တၢ်သးတီန့ၣ် ဂၢၢ်ကျၢၤဝဲထီဘိ ဒီးအလဲၤခီဖျိ တၢ်ကီတၢ်ခဲဖးဒိၣ်န့ၢ်ဝဲ.

ijwbq-E ၁၈၁

လံာ်စီဆှံန့ၣ် မ့ၢ်မနုၤလဲၣ်

လၢလံာ်စီဆှံပူၤ အဆိကတၢၢ်န့ၣ် ပှၤကွဲးဝဲဘၣ်ဃးဒီး သ့တၢ်လၢာ်ကစၢ် တ့လီၤဝဲ မူခိၣ် ဒီးဟီၣ်ခိၣ်ဒ်လဲၣ်အဂ့ၢ်တစဲးဖိ. ဒီးလံာ်စီဆှံပာ်ဖျါထီၣ်ဝဲ ကစၢ်ယွၤအမံၤ ယဟိဝၤ. ဒီးယဟိဝၤယွၤ အဲၣ်ဒိးလၢ ပှၤကသ့ၣ်ညါအဂ့ၢ်.—စံးထီၣ်ပတြၢၤ ၈၃:၁၈.

လံာ်စီဆှံ ပာ်ဖျါထီၣ်ဝဲ ကစၢ်ယွၤအမံၤ ဘၣ်တၢ်ဒုၣ်ဒွဲၣ်စံးအၢအီၤ ဒ်လဲၣ် ဒီးအကပာ်စီဆှံက့ၤ အမံၤဒ်လဲၣ်.

လံာ်စီဆှံ ပာ်ဖျါထီၣ်ဝဲ ကစၢ်ယွၤ အတၢ်တိာ်ပာ်လၢ ပှၤဟီၣ်ခိၣ်ဖိ ဒီးဟီၣ်ခိၣ်အဂီၢ် ဒီးကစၢ်ယွၤ ကမၤလီၤမၢ်ကွံာ်ဝဲ ပှၤဟီၣ်ခိၣ်ဖိ အတၢ်ကီတၢ်ခဲဒ်လဲၣ်.

လံာ်စီဆှံ ပာ်ဖျါထီၣ်ဝဲ တၢ်ဟ့ၣ်ကူၣ်လၢ ပတၢ်အိၣ်မူ ကိးနံၤဒဲးအဂီၢ်စ့ၢ်ကီး အဒိ အပာ်ဖျါထီၣ်ဝဲ ဘၣ်ဃးဒီး–

ပရ့လိာ်သးဒီး ပှၤဂၤဂ့ၤဂ့ၤကသ့ဒ်လဲၣ်. “အဃိ ကယဲၢ်တၢ်လၢ သုအဲၣ်ဒိးလၢ ပှၤဂၤကမၤသုန့ၣ် မၤအဝဲသ့ၣ်ဒ်န့ၣ် စ့ၢ်ကီးတက့ၢ်. နီၢ်ကီၢ်န့ၣ် စီၤမိၤၡ့ အတၢ်သိၣ်တၢ်သီ ဒီးဝံအတၢ်ကွဲးအသးတဖၣ် သိၣ်လိဝဲ တၢ်ဂ့ၢ်အဝဲန့ၣ်လီၤ.”—မးသဲ ၇:၁၂.

အခီပညီ– ပကြၢးရ့ဒီးပှၤဂၤ ဒ်ပအဲၣ်ဒိးလၢ ပှၤရ့ပှၤအသိး.

ပကဘၣ်လဲၤခီဖျိ တၢ်သူၣ်ကိၢ်သးဂီၤဒ်လဲၣ်. “ခဲမုၢ်ဆ့ၣ်န့ၣ် တၢ်ကိၢ်တၢ်ဂီၤ ကအိၣ်ဒံးအဃိ တဘၣ်သူၣ်ကိၢ်သးဂီၤတၢ်လၢ ခဲမုၢ်ဆ့ၣ်အဂီၢ်တဂ့ၤ. တၢ်ကီတၢ်ခဲလၢ တနံၤအံၤ အဂီၢ်န့ၣ် အါဝဲလံ.”—မးသဲ ၆:၃၄.

အခီပညီ– လၢပကဘၣ်ယိၣ်တၢ် အါတလၢ လၢခါဆူညါအဂီၢ် ပကြၢးအိၣ်မူ လၢအဂ့ၤကတၢၢ် လၢတနံၤဘၣ်တနံၤအဂီၢ်.

ပှၤနီၢ်ဒီမိၢ်ဝၤတဖၣ် အိၣ်ဒီးတၢ်သးခုကသ့ဒ်လဲၣ်. “ဒ်လဲၣ်ဂ့ၤ ဒ်လဲၣ်ဂ့ၤ သုဝဲတဂၤစုာ်စုာ် သုကဘၣ်အဲၣ် သုမါ ဒ်သုအဲၣ်လီၤ သုနီၢ်ကစၢ် အသးအသိးလီၤ. ဒ်န့ၣ်အသိး မါစ့ၢ်ကီး ကဘၣ်ပာ်ကဲအဝၤ ဒိၣ်မးလီၤ.”—အ့းဖ့းစူး ၅:၃၃.

အခီပညီ– ဒ်သိး ပှၤနီၢ်ဒီမိၢ်ဝၤတဖၣ် ကအိၣ်ဒီး တၢ်သးခု ထီဘိအဂီၢ် အဝဲသ့ၣ် ကဘၣ်အိၣ်ဒီး တၢ်အဲၣ် ဒီးတၢ်ပာ်ကဲလိာ်သး.

လါစဲးပတ့ဘၢၣ် ၃၀–လါအီးကထိဘၢၣ် ၆

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၉၀-၉၁

ဒ်သိး နသးသမူ ကထီထီၣ်အဂီၢ် သန့ၤသးလၢ ယဟိဝၤယွၤ

တၢး၁၉.၃ ၅ ¶၃-၅

တၢ်ဃုသ့ၣ်ညါဘၣ်ဃးဒီး သးသမူကထီထီၣ်အဂီၢ်

ပှၤစဲအ့ၣ်ဖိအါဂၤန့ၣ်တဲဝဲလၢ ပအိၣ်ဒီးကသံၣ်အမၠိမၠိလၢ ကတြီဝဲတၢ်သးပှၢ်ထီၣ် ဘၣ်ဆၣ် ပှၤဟီၣ်ခိၣ်ဖိတဖၣ်အိၣ်မူအါန့ၢ်ဒံး အအဲၣ်ဒိးအိၣ်မူဝဲန့ၣ် တန့ၢ်ဘၣ်. ဒီးစးထီၣ်လၢ ၁၉ ယၤဖှိၣ်န့ၣ် ပှၤဟီၣ်ခိၣ်ဖိတဖၣ် အသးသမူထီထီၣ်ဝဲကယီကယီန့ၣ်လီၤ. မ့ၢ်လၢအဝဲသ့ၣ် အိၣ်ကဆှဲကဆှီ, သူဝဲကသံၣ်လၢ အဒီသဒၢတၢ်ဆါ ဒီးကသံၣ်လၢအမၤဘျါတၢ်ဆါတဖၣ်အဃိ. ပှၤကူၣ်ဘၣ်ကူၣ်သ့တနီၤန့ၣ် နာ်ဝဲလၢ ပှၤဟီၣ်ခိၣ်ဖိတဖၣ်အသးသမူန့ၣ် ကအိၣ်မူဘၣ်ဒ်တၢ်ပာ်ပနီၣ် အသးနံၣ်အသိးလီၤ.

အပူၤကွံာ်အနံၣ် ၃,၅၀၀ န့ၣ် ပှၤကွဲးလံာ်စီဆှံလၢအမ့ၢ် စီၤမိၤၡ့န့ၣ်သ့ၣ်ညါဝဲလၢ “ပနံၣ်တဖၣ်အမုၢ်နံၤန့ၣ် မ့ၢ်အနံၣ်နွံဆံလီၤ. ဒီးလၢတၢ်ဂံၢ်တၢ်ဘါအဃိန့ၣ် မ့ၢ်အိၣ်အနံၣ်ဃိးဆံဒီး, တၢ်လၢအဂံၢ်အဘါန့ၣ် မ့ၢ်တၢ်ကိၢ်တၢ်ဂီၤ, ဒီးတၢ်နးတၢ်ဖှီၣ်လီၤ. အဂ့ၢ်ဒ်အံၤ, ဒံကွံာ်ဝဲ, ဒီးပယူၤထီၣ်ကွံာ်လီၤ.” (စံးထီၣ်ပတြၢၤ ၉၀:၁၀) အဃိပှၤဟီၣ်ခိၣ်ဖိတဖၣ် ဂုာ်ကျဲးစၢးလၢ ကမၤထီထီၣ်ဝဲ ပသးသမူအဂီၢ်သနာ်က့ ပကအိၣ်မူဘၣ်ဒ်စီၤမိၤၡ့ ပာ်ဖျါထီၣ်ဝဲအသိးလီၤ.

ပမ့ၢ်ထိၣ်သတြီၤပတၢ်အိၣ်မူဒီး တၢ်ဘၣ်တ့အဂၤတနီၤန့ၣ် ပှၤဟီၣ်ခိၣ်ဖိတဖၣ်တၢ်အိၣ်မူဖုၣ်ဝဲလီၤ. အဒိ, ချိၣ်ဆှုၣ်ဂီၤ ဒီးချိၣ်တံာ်တကလုာ် လၢအအိၣ်ဝဲလၢပီၣ်လဲၣ်ခံဒးန့ၣ် အိၣ်မူဝဲအါန့ၢ်အနံၣ် ၂၀၀ လီၤ. ဒီးသ့ၣ်ဂီၤဖးဒိၣ်တကလုာ်စ့ၢ်ကီးန့ၣ် အိၣ်မူဝဲတုၤလၢအနံၣ် ၁,၀၀၀ ညါလီၤ. အဃိ ပမ့ၢ်ထိၣ်သတြီၤက့ၤ ပတၢ်အိၣ်မူဒီး တၢ်ဘၣ်တ့သ့ၣ်တဖၣ်အံၤန့ၣ်မ့ၢ် ‘ပကအိၣ်မူဘၣ်ထဲအနံၣ် ၇၀ ဒီး ၈၀ လီၤဧါ.’

တၢး၁၉.၁ ၅, တၢ်လွံၢ်နၢၣ်

ကစၢ်ယွၤန့ၣ် အမံၤဒ်လဲၣ်

ဘၣ်ဃးဒီး တၢ်သံကွၢ်တဖျၢၣ်အံၤန့ၣ် ပှၤအါမးအဲၣ်ဒိးသ့ၣ်ညါဝဲလီၤ. ဘၣ်သ့ၣ်သ့ၣ် နၤစ့ၢ်ကီးနကအဲၣ်ဒိးသ့ၣ်ညါလီၤ. ကယဲၢ်တၢ်အိၣ်လၢမူခိၣ်ဟီၣ်ခိၣ် ဒီးတၢ်အဂၤခဲလၢာ် ပှၤတ့လီၤအီၤမ့ၢ်အိၣ်န့ၣ် မ့မ့ၢ်ကစၢ်ယွၤမီၤ မတၤတ့လီၤအီၤလဲၣ်.

ပှၤစဲအ့ၣ်ဖိအါတက့ၢ်တူၢ်လိာ်ဝဲလၢ ကယဲၢ်တၢ်အိၣ်လၢမူခိၣ်မ့ၢ်ဂ့ၤ တၢ်အိၣ်လၢဟီၣ်ခိၣ်မ့ၢ်ဂ့ၤန့ၣ် ဘၣ်တၢ်တ့လီၤအီၤလီၤ. တၢ်ဂ့ၢ်တခါအံၤလီၤပလိာ်လိာ်သးဒီး လံာ်စီဆှံအဆိကတၢၢ်တဆၢန့ၣ်လီၤ. ဖဲန့ၣ်တဲဝဲလၢ “လၢထံးလၢသီန့ၣ် ယွၤတ့လီၤမူခိၣ် ဒီးဟီၣ်ခိၣ်လီၤ.”—၁ မိၤၡ့ ၁:၁.

ကယဲၢ်တၢ်အိၣ်လၢမူခိၣ်မ့ၢ်ဂ့ၤ တၢ်အိၣ်လၢဟီၣ်ခိၣ်မ့ၢ်ဂ့ၤ ဟဲကဲထီၣ်အသးလၢ အနီၢ်ကစၢ်ဒၣ်ဝဲတသ့ဘၣ်. တၢ်တမံၤမံၤ ကဟဲကဲထီၣ်အသးအဂီၢ် ပှၤတဂၤဂၤကဘၣ်တ့လီၤဝဲလီၤ. တၢ်ဘၣ်တ့ကစၢ်မ့ၢ်တအိၣ်ဘၣ်န့ၣ် ပဝဲဒီးတၢ်အဂၤတဖၣ် ဟဲကဲထီၣ်အသးတသ့ဘၣ်. ဒီးတၢ်အခီၣ်ထံးခီၣ်ဘိမ့ၢ်တအိၣ်ဘၣ်န့ၣ် တၢ်အကတၢၢ်စ့ၢ်ကီးတအိၣ်ဘၣ်. လၢတၢ်န့ၣ်အဃိ တၢ်ဘၣ်တ့ကစၢ်ကဘၣ်အိၣ်ဝဲလီၤ. အဝဲမ့ၢ်ပှၤလၢ အစိကမီၤဒိၣ်ကတၢၢ်တဂၤ ဒီးအမံၤမ့ၢ် ယဟိဝၤယွၤလီၤ.—ယိၤဟၣ် ၄:၂၄.

ဘၣ်ဃးဒီးကစၢ်ယွၤန့ၣ် လံာ်စီဆှံတဲဝဲလၢ “ကစၢၢ်ကလိ တချုးအိၣ်ဖျဲၣ်ဒံးဘၣ်, ဒီးနတချုးတ့ဒံးဘၣ် ဟီၣ်ခိၣ်လၢာ်ခိၣ်ဒီး, နဲဒၣ်အံၤ လၢပျၢၤလၢကစၢၤကစၢၤန့ၣ် နမ့ၢ်ယွၤ အစိၤစိၤအဃၣ်ဃၣ်လီၤ.” (စံးထီၣ်ပတြၢၤ ၉၀:၂) ကစၢ်ယွၤန့ၣ် အိၣ်ပာ်စၢၤအစိၤစိၤအဃၣ်ဃၣ်လံ. လၢတၢ်န့ၣ်အဃိ “လၢထံးလၢသီ” န့ၣ်အဝဲတ့လီၤဝဲ ကယဲၢ်တၢ်အိၣ်လၢမူခိၣ်မ့ၢ်ဂ့ၤ တၢ်အိၣ်လၢဟီၣ်ခိၣ်မ့ၢ်ဂ့ၤခဲလၢာ်လီၤ.—လီၣ်ဖျါ ၄:၁၁.

တၢး၂၂.၀၆ ၁၈ ¶၁၆-၁၇

တၢ်အဲၣ်န့ၣ် မၤစၢၤပှၤလၢ ပမၤလီၤမၢ်ကွံာ် တၢ်ပျံၤတၢ်ဖုးသ့ဒ်လဲၣ်

^၁၆ မုၣ်ကီၤလံၢ် သ့ၣ်ညါဝဲလၢ ပပာ်လုၢ်ပာ်ပှ့ၤ ပသးသမူ. အဃိ အတဲဝဲလၢ ပကမၤတၢ်ကိးမံၤဒဲး ဒ်သိး ပကဆဲးအိၣ်မူဘၣ်အဂီၢ်. တၢ်လၢပကမၤအီၤတဖၣ် မ့ၢ်မၤဘၣ်ဒိ ပတၢ်ရ့လိာ်သးဒီး ယဟိဝၤယွၤ သနာ်က့ ပကမၤအီၤဒံး. (ယိၤဘး ၂:၄, ၅) မုၣ်ကီၤလံၢ် တဲတၢ်န့ၣ် ကမၣ်ဖးဒိၣ်ညါ. ဘၣ်ဆၣ် မုၣ်ကီၤလံၢ်န့ၣ် အကဲ “ပှၤလၢအဒုးအိၣ်ထီၣ်တၢ်သံ” ဒီးအဝဲသ့ၣ်ညါလၢ ပပျံၤလၢ ပကသံအဃိ အဝဲဂုာ်ကျဲးစၢးသူဝဲ တၢ်ပျံၤတခါအံၤ ဒ်သိးဒီး ပကပာ်တ့ၢ်ကွံာ် ယဟိဝၤယွၤအဂီၢ်. (ဧ့ၤဘြံၤ ၂:၁၄, ၁၅) တဘျီတခီၣ် မုၣ်ကီၤလံၢ် ကသူဝဲ ပှၤကညီတဖၣ် ဒ်သိး ကမၤပျံၤမၤဖုးပှၤလၢ ပမ့ၢ်တပာ်တ့ၢ်ကွံာ် ပတၢ်စူၢ်တၢ်နာ်ဘၣ်န့ၣ် အဝဲသ့ၣ် ကမၤသံပှၤ. တဘျီတခီၣ် ဖဲပဆိးက့ နးနးအခါ မုၣ်ကီၤလံၢ် ဟံးန့ၢ်တၢ်ခွဲးတၢ်ယာ် ဒ်သိးဒီး ပကမၤကမၣ် ကစၢ်ယွၤ အတၢ်သိၣ်တၢ်သီအဂီၢ်. အဒိ, ကသံၣ်သရၣ် မ့တမ့ၢ် ပဟံၣ်ဖိဃီဖိလၢ အတစူၢ်တနာ်တၢ် သ့ၣ်တဖၣ်န့ၣ် အဝဲသ့ၣ် ကမၢဆူၣ်ပှၤလၢ ပကမၤကမၣ် ကစၢ်ယွၤ အတၢ်သိၣ်တၢ်သီ ဒ်သိး ပကတူၢ်လိာ် တၢ်သွီသွံၣ်. မ့တမ့ၢ် ဘၣ်သ့ၣ်သ့ၣ် ပှၤတဂၤဂၤ ကကွဲန့ၢ်လွဲန့ၢ်ပှၤဒ်သိးဒီး ပကတူၢ်လိာ် တၢ်ကူစါယါဘျါ အကျိၤအကျဲ လၢအထီဒါလိာ်သးဒီး လံာ်စီဆှံတၢ်သိၣ်တၢ်သီ.

^၁၇ ပတအဲၣ်ဒိးသံဘၣ် ဘၣ်ဆၣ် ပမ့ၢ်သံသနာ်က့ ပသ့ၣ်ညါလၢ ယဟိဝၤယွၤ အဲၣ်ပှၤဒံး. (ဖး ရိမ့ၤ ၈:၃၇-၃၉.) ယဟိဝၤယွၤ အပှၤဂီၢ်မုၢ်တဖၣ် မ့ၢ်သံဘၣ်ဆၣ် ယဟိဝၤယွၤ သ့ၣ်နီၣ်အဝဲသ့ၣ်ဒံး. လၢအဂီၢ်န့ၣ် လီၤဂာ်ဒ်သိးဒီး အဝဲသ့ၣ်အိၣ်မူဒံး. (လူၤကၣ် ၂၀:၃၇, ၃၈) တကးဒံးဘၣ် ကစၢ်ယွၤအဲၣ်ဒိး မၤမူထီၣ်က့ၤ အဝဲသ့ၣ်သပှၢ်တၢၢ်. (ယိၤဘး ၁၄:၁၅) အဃိ ဒ်သိးပ “ကန့ၢ်ဘၣ် တၢ်မူအထူအယိာ်” အဂီၢ်န့ၣ် ယဟိဝၤယွၤဟ့ၣ်လီၤပှၤ တၢ်ပှ့ၤက့ၤ. (ယိၤဟၣ် ၃:၁၆) ပသ့ၣ်ညါလၢ ယဟိဝၤယွၤ ကဟုကယာ်ပှၤဒီး အဲၣ်ပှၤဒိၣ်မး အဃိ ဖဲပဆိးက့အခါ ဒီးပှၤဂၤမၤပျံၤမၤဖုးပှၤလၢ ကမၤသံပှၤအခါန့ၣ် ပတအဲၣ်ဒိးပာ်တ့ၢ်ကွံာ် ယဟိဝၤယွၤဘၣ်. ဖဲပထံၣ်ဘၣ်ဒီး တၢ်အိၣ်သးဒ်န့ၣ်အခါန့ၣ် ပကသန့ၤပသးလၢ ကစၢ်ယဟိဝၤယွၤအအိၣ် ဒ်သိး ပသးကမုာ်ထီၣ်က့ၤ ဒီးအကဟ့ၣ်ပှၤတၢ်ကူၣ်သ့ ဒီးတၢ်ဂံၢ်တၢ်ဘါအဂီၢ်. ဒီပုၢ်ဝဲၢ်မုၣ်ဘဲလရံၤ ဒီးအဝၤ လၢပပာ်ဖျါထီၣ်အဂ့ၢ် လၢအခီၣ်ထံးန့ၣ် အဝဲသ့ၣ် မၤဝဲဒ်န့ၣ်.—စံးထီၣ်ပတြၢၤ ၄၁:၃.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

wp၁၇.၅-E ၅

ပဝဲတဂၤစုာ်စုာ်န့ၣ် ပအိၣ်ဒီး မူခိၣ်ကလူးလၢ အကဒီသဒၢပှၤဧါ

လံာ်စီဆှံ တသိၣ်လိဝဲလၢ ပဝဲတဂၤစုာ်စုာ်န့ၣ် ပအိၣ်ဒီး မူခိၣ်ကလူးလၢ ကဒီသဒၢပှၤန့ၣ်ဘၣ်. ယ့ၣ်ၡူးတဲဝဲလၢ “ပလီၢ်သုသးဒ်သိး သုတဆိကမိၣ်ဆံး ပှၤအဆံးတဖၣ်အံၤ နီတဂၤတဂ့ၤ. ယကတဲဘၣ်သုလၢ အဝဲသ့ၣ် အမူခိၣ်ကလူး အိၣ်လၢမူခိၣ်န့ၣ် ကွၢ်ထီၣ်ဝဲ ယပၢ်အိၣ်လၢ မူခိၣ်တဂၤ အမဲာ်သၣ်ထီဘိလီၤ.” (မးသဲ ၁၈:၁၀) ယ့ၣ်ၡူးတအဲၣ်ဒိးတဲဝဲလၢ ပဝဲတဂၤဘၣ်တဂၤန့ၣ် ပအိၣ်ဒီး မူခိၣ်ကလူးလၢ ကဒီသဒၢပှၤန့ၣ်ဘၣ်. ယ့ၣ်ၡူးအဲၣ်ဒိးတဲဝဲ ယိယိဖိလၢ မူခိၣ်ကလူးတဖၣ်န့ၣ် အသူၣ်အိၣ်သးအိၣ်ဝဲ ယ့ၣ်ၡူးအပျဲၢ်အဘီၣ် တဂၤစုာ်စုာ်. အဃိ ခရံာ်ဖိလၢအမ့ၢ်အတီတဖၣ်န့ၣ် တကြၢးဆိကမိၣ်ဝဲလၢ အမ့ၢ်ဟးမၤကြီတၢ်သနာ်က့ ကစၢ်ယွၤအမူခိၣ်ကလူး ကဒီသဒၢအီၤန့ၣ်ဘၣ်.

မ့မ့ၢ်ဒ်န့ၣ်န့ၣ် မူခိၣ်ကလူးတဖၣ်န့ၣ် တမၤစၢၤပှၤဟီၣ်ခိၣ်ဖိဘၣ်ဟီဧါ, တမ့ၢ်ဒ်န့ၣ်ဘၣ်. (စံးထီၣ်ပတြၢၤ ၉၁:၁၁) ပှၤတနီၤန့ၣ် နာ်ဝဲသပှၢ်ကတၢၢ်လၢ ကစၢ်ယွၤ ဆှၢလီၤမူခိၣ်ကလူး ဒ်သိး ကဒီသဒၢ ဒီးဟံးစုနဲၣ်ကျဲအဝဲသ့ၣ်. ခဲနၢၤ လၢပပာ်ဖျါထီၣ်အဂ့ၢ်လၢ တၢ်မၤလိ အမဲာ်ညါကတၢၢ်တခါန့ၣ် အနာ်ဝဲဒ်န့ၣ်စ့ၢ်ကီး. တၢ်လၢအနာ်ဝဲန့ၣ် ဘၣ်သ့ၣ်သ့ၣ် ကဘၣ်. ဘၣ်ဆၣ် ပတဲလီၤတံၢ်တသ့ဘၣ်. ယဟိဝၤပှၤအုၣ်အသးတဖၣ်န့ၣ် အဝဲသ့ၣ်ထံၣ်ဝဲ တၢ်အုၣ်အသးအါဘျီလၢ ဖဲအဝဲသ့ၣ် ဟးစံၣ်တဲၤတဲလီၤတၢ်အခါ မူခိၣ်ကလူး မၤစၢၤအဝဲသ့ၣ်. ဘၣ်ဆၣ် မူခိၣ်ကလူးတဖၣ်န့ၣ် ပထံၣ်အီၤတသ့ဘၣ်အဃိ ကစၢ်ယွၤသူအဝဲသ့ၣ်လၢ ကမၤစၢၤပှၤလၢ တၢ်ဂ့ၢ်မနုၤတဖၣ်လဲၣ် ဒီးကမၤစၢၤပှၤ ထဲလဲၣ်န့ၣ် ပတသ့ၣ်ညါဘၣ်. ဘၣ်ဆၣ် ပမ့ၢ်စံးဘျုး သ့တၢ်လၢကစၢ် ခီဖျိ တၢ်လၢအမၤန့ၢ်ပှၤတဖၣ် အဃိန့ၣ် တကမၣ်ဘၣ်.—ကလီးစဲ ၃:၁၅; ယၤကိာ် ၁:၁၇, ၁၈.

lmd တၢ်ဂ့ၢ်ဘၣ်ထွဲလိာ်သး က တၢ်ဂ့ၢ် ၅

ပသးအိၣ်သိၣ်လိ တၢ်မ့ၢ်တၢ်တီ

နအိၣ်မူလီၤထူလီၤယိာ် လၢဟီၣ်ခိၣ်သ့.—စံး ၃၇:၂၉; မး ၅:၅.

လါအီးကထိဘၢၣ် ၇-၁၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၉၂-၉၅

ယဟိဝၤယွၤ အတၢ်မၤန့ၣ် မ့ၢ်တၢ်မၤ လၢအဂ့ၤကတၢၢ်

တၢး၁၈.၀၄ ၂၈ ¶၅

ပှၤသးစၢ်သ့ၣ်ဧၢ မ့ၢ်နသးစၢၢ်ဆၢလၢ နီၢ်သးအဖီတၢၣ်ဧါ

^၅ တၢ်ဂ့ၢ်အရ့ဒိၣ်ကတၢၢ်တထံၣ်လၢ ပကဘၣ်ပာ်လီၤ နီၢ်သးဖီတၢၣ်န့ၣ် မ့ၢ်ဒ်သိး ပကစံးဘျုးယဟိဝၤယွၤ လၢအတၢ်အဲၣ် ဒီးတၢ်လၢအမၤန့ၢ်ပှၤတဖၣ်အဃိလီၤ. ပှၤကွဲးထါစံးထီၣ်ပတြၢၤတဂၤ တဲဝဲလၢ “ပစံးထီၣ်ပတြၢၤယွၤ, . . . န့ၣ် မ့ၢ်တၢ်အဂ့ၤ . . . အဂ့ၢ်ဒ်အံၤ, နဒုးသးခုယၤလၢ နမၤတၢ်အဃိ, ယွၤဧၢ, လၢတၢ်လၢနမၤလၢ နစုတဖၣ်အဃိန့ၣ် ယကသူၣ်ဖှံသးညီလီၤ.” (စံးထီၣ်ပတြၢၤ ၉၂:၁, ၄) ဆိကမိၣ်ထီၣ်က့ၤ တၢ်ခဲလၢာ်လၢ ယဟိဝၤယွၤ ဟ့ၣ်လီၤနၤ ဒ်သိးဒီးသးသမူ, တၢ်စူၢ်တၢ်နာ်, လံာ်စီဆှံ, တၢ်အိၣ်ဖှိၣ် ဒီးတၢ်မုၢ်လၢ်လၢ နကအိၣ်မူဘၣ်လီၤထူလီၤယိာ်လၢ ပၤရဒံစူးအပူၤန့ၣ်တက့ၢ်. နမ့ၢ်ပာ်လီၤနီၢ်သးအဖီတၢၣ်န့ၣ် မ့ၢ်ဒၣ်နပာ်ဖျါထီၣ်လၢ နစံးဘျုးစံးဖှိၣ်ယဟိဝၤယွၤလၢ အဟ့ၣ်နၤတၢ်တဖၣ်အံၤအဃိလီၤ. ဒီးနမ့ၢ်မၤဒ်န့ၣ်န့ၣ် နတၢ်ရ့လိာ်သးဒီးအီၤကဘူးထီၣ်လီၤ.

တၢး၁၈.၁၁ ၂၃ ¶၈

မ့ၢ်နဆိကမိၣ်တၢ်ဒ် မတၤအသိးလဲၣ်

^၈ ဒ်မိၢ်ပၢ်လၢအဂ့ၤအသိး ယဟိဝၤယွၤအဲၣ်ဒိးလၢ အဖိတဖၣ် ကဒိးန့ၢ်ဘၣ်တၢ်အိၣ်မူလၢ အပှဲၤဒီးတၢ်သူၣ်မံသးမုာ်လီၤ. (ယၡါယၤ ၄၈:၁၇, ၁၈) အဃိ အဝဲဟ့ၣ်လီၤပှၤ တၢ်ဟံးစုနဲၣ်ကျဲ လၢဘၣ်ဃးဒီး တၢ်သကဲာ်ပဝးဒီး ပကဘၣ်ရ့ဒီးပှၤဂၤ ဒ်လဲၣ်န့ၣ်လီၤ. ဒီးအဝဲအဲၣ်ဒိးလၢ ပကမၤလိသ့ထီၣ်ပသး ဒ်သိးပကအိၣ်ဒီးတၢ်ထံၣ်ဒ်အီၤ ဒီးအိၣ်မူဒ် အတၢ်သိၣ်တၢ်သီအသိးလီၤ. ကစၢ်ယွၤအတၢ်ဟံးစုနဲၣ်ကျဲန့ၣ် တမ့ၢ်တၢ်လၢအဃံးတလၢဘၣ်. လၢတၢ်န့ၣ်အလီၢ် ကမၤစၢၤပှၤဒ်သိး ပကကဲထီၣ်ပှၤလၢ အကူၣ်တၢ်သ့ ဒီးဆၢတဲာ်တၢ်လၢအဘၣ်န့ၣ်လီၤ. (စံးထီၣ်ပတြၢၤ ၉၂:၅; ကတိၤဒိ ၂:၁-၅; ယၡါယၤ ၅၅:၉) ဒီးကမၤစၢၤပှၤဒ်သိး ပကမၤတၢ်ဆၢတဲာ်လၢ အမၤသးခုပှၤ တကးဒံးဘၣ် ပမၤတၢ်လၢ ပဘၣ်သူၣ်ဘၣ်သးအီၤသ့ၣ်တဖၣ် သ့ဒံးဝဲလီၤ. (စံးထီၣ်ပတြၢၤ ၁:၂, ၃) ပမ့ၢ်ဆိကမိၣ်တၢ်ဒ် ယဟိဝၤယွၤအသိးန့ၣ် ကကဲဘျုးလၢပဂီၢ်လၢ ကျဲအါဘိလီၤ.

တၢး၂၀.၀၁ ၁၉ ¶၁၈

ယဟိဝၤယွၤ အဲၣ်နၤဒီးပာ်လုၢ်ပာ်ပှ့ၤနၤ

^၁၈ ပသးမ့ၢ်ပှၢ်ထီၣ် သနာ်က့ ပမၤယဟိဝၤယွၤအတၢ်မၤ သ့ဒံးဝဲလီၤ. (စံးထီၣ်ပတြၢၤ ၉၂:၁၂-၁၅) ယ့ၣ်ၡူးသိၣ်လိဝဲလၢ တၢ်လၢပမၤအီၤသ့တဖၣ်န့ၣ် မ့ၢ်ဖျါလၢအရ့တဒိၣ်ဘၣ် သနာ်က့ တသ့ဖဲအသ့ ပမ့ၢ်မၤယဟိဝၤယွၤ အတၢ်မၤ လၢအဂ့ၤကတၢၢ်န့ၣ် ကစၢ်ယွၤ ပာ်လုၢ်ပာ်ပှ့ၤဝဲလီၤ. (လူၤကၣ် ၂၁:၂-၄) အဃိ သးစၢၢ်ဆၢ တၢ်လၢနမၤအီၤသ့တဖၣ်န့ၣ်တက့ၢ်. အဒိ တဲဘၣ်ပှၤဂၤ လၢယဟိဝၤယွၤအဂ့ၢ်, ဃ့ဘါထုကဖၣ်လၢ ဒီပုၢ်ဝဲၢ်မုၣ်ခွါတဖၣ်အဂီၢ် ဒီးဟ့ၣ်ဂံၢ်ဟ့ၣ်ဘါပှၤဂၤ လၢကအိၣ်ဒီး တၢ်သးတီအဂီၢ်န့ၣ်တက့ၢ်. ယဟိဝၤယွၤ ပာ်နၤဒ်သိး အပှၤမၤသကိးတၢ်န့ၣ် တမ့ၢ်လၢ တၢ်လၢနမၤအီၤ ကဲထီၣ်လိၣ်ထီၣ်တဖၣ်အဃိဘၣ်. လၢတၢ်န့ၣ်အလီၢ် မ့ၢ်လၢနသးအိၣ် ဒိကနၣ် အကလုၢ်အဃိ အဝဲပာ်နၤဒ် အပှၤမၤသကိးတၢ်လီၤ.—၁ ကရံၣ်သူး ၃:၅-၉.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

cl-E ၁၇၆ ¶၁၈

“ကစၢ်ယွၤ . . . အတၢ်ကူၣ်သ့ . . . ယိာ်ဝဲဒိၣ်မး”

^၁၈ ဘၣ်ဃးဒီး ယဟိဝၤယွၤ အတၢ်ကူၣ်သ့ အိၣ်ဝဲထဲလဲၣ်န့ၣ် စီၤပီလူးတဲဝဲလၢ “ကစၢ်ယွၤ အတၢ်ဆိၣ်ဂ့ၤ ထူးထူးတီၤတီၤ, အတၢ်ကူၣ်သ့ ဒီးအတၢ်သ့ၣ်ညါနၢ်ပၢၢ်န့ၣ် ယိာ်ဝဲဒိၣ်မးလီၤ. အဃိ အတၢ်စံၣ်ညီၣ်တဖၣ် ဒီးတၢ်လၢအမၤဝဲတဖၣ်န့ၣ် ပနၢ်ပၢၢ်အီၤ တလၢာ်ဘၣ်.” (ရိမ့ၤ ၁၁:၃၃) လၢလံာ်စီဆှံလၢ ပှၤကွဲးအီၤလၢ အခီၣ်ထံးအပူၤ လံာ်စီဆှံတဆၢအံၤန့ၣ် စီၤပီလူး စးထီၣ်ကွဲးဝဲလၢ တၢ်ကတိၤလၢ အမ့ၢ် “အိ” အဃိ အပာ်ဖျါထီၣ်ဝဲလၢ အကမၢကမၣ်ဝဲဒိၣ်မး. ကြံးအတၢ်ကတိၤလၢ စီၤပီလူးတဲဝဲလၢ “ယိာ်ဝဲ” န့ၣ် အဘၣ်ထွဲလိာ်သးဒီး တၢ်ကတိၤလၢအမ့ၢ် တၢ်ပူၤယိာ်. ဒီးအတၢ်ကတိၤတဖၣ်အံၤန့ၣ် ဒုးထံၣ်တမှံပှၤလၢ တၢ်ပူၤတခါအံၤ ယိာ်ထဲလဲၣ်. ဖဲပဆိကမိၣ်ထံ ယဟိဝၤယွၤ အတၢ်ကူၣ်သ့အခါန့ၣ် လီၤဂာ်ဒ်သိးဒီး ပကွၢ်လီၤတၢ်ပူၤလၢ အကတၢၢ်တအိၣ်ဘၣ် ဒီးတၢ်ပူၤလၢ အဒိၣ်အယိာ်တုၤဒၣ်လဲာ် ပတဲဖျါထီၣ်အီၤတဘၣ်ဘၣ်. (စံးထီၣ်ပတြၢၤ ၉၂:၅) အဃိ အမၤစၢၤပှၤ ဒ်သိးဒီး ပကအိၣ်ဒီးတၢ်ဆီၣ်လီၤသး.

လါအီးကထိဘၢၣ် ၁၄-၂၀

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၉၆-၉၉

“စံၣ်တဲၤတဲလီၤ . . . တၢ်သးခုကစီၣ်”

တၢး၁၁-E ၃/၁ ၆ ¶၁-၂

တၢ်သးခုကစီၣ်န့ၣ် မ့ၢ်မနုၤလဲၣ်

ခရံာ်ဖိတဖၣ်န့ၣ် ကဘၣ်စံၣ်တဲၤတဲလီၤဝဲ “ဘီမုၢ်တၢ်သးခုကစီၣ်” ခီဖျိ တဲဘၣ်ပှၤဂၤလၢ ခါဆူညါန့ၣ် ယွၤအဘီအမုၢ် ကပၢဟီၣ်ခိၣ် ဒီးကပၢတၢ် တီတီလိၤလိၤ. လံာ်စီဆှံ ပာ်ဖျါထီၣ်ဝဲလၢ “တၢ်သးခုကစီၣ်” န့ၣ် အိၣ်ဝဲအမၠိမၠိ. အဒိ အတဲဝဲလၢ “တၢ်သးခုကစီၣ် ဘၣ်ဃးဒီး အတၢ်အုၣ်က့ၤခီၣ်က့ၤ” (စံးထီၣ်ပတြၢၤ ၉၆:၂), “ကစၢ်ယွၤ အတၢ်သးခုကစီၣ်” (ရိမ့ၤ ၁၅:၁၆) ဒီး “တၢ်သးခုကစီၣ် ဘၣ်ဃးဒီး . . . ယ့ၣ်ၡူးခရံာ်.”—မၢ်ကူး ၁:၁.

ပမ့ၢ်ဘၣ်တဲလၢ အဖုၣ်န့ၣ် တၢ်သးခုကစီၣ်န့ၣ် အပၣ်ဃုာ်ဒီး တၢ်မ့ၢ်တၢ်တီ ခဲလၢာ်လၢ ယ့ၣ်ၡူးသိၣ်လိတ့ၢ်ဝဲ ဒီးတၢ်ဂ့ၢ်လၢ အပျဲၢ်အဘီၣ်တဖၣ် ကွဲးဝဲ. တချုးလၢ ယ့ၣ်ၡူးက့ၤထီၣ်လၢ မူခိၣ်ဒံးဘၣ်အခါ အဝဲတဲဘၣ် ပှၤလၢအပိာ်အခံတဖၣ်လၢ “အဃိ လဲၤဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ်တက့ၢ်. ဒီးဒိးဘျၢ အဝဲသ့ၣ်လၢ ပၢ်ဒီးဖိခွါ ဒီးသးစီဆှံအမံၤအပူၤတက့ၢ်. သိၣ်လိအဝဲသ့ၣ် ဒ်သိး အဝဲသ့ၣ်ကမၤထွဲ တၢ်လၢယမၤလိာ်သု ခဲလၢာ်တက့ၢ်. ဒီးယကအိၣ်ဒီးသု ကိးမုၢ်နံၤဒဲး တုၤလီၤလၢ တၢ်အကတၢၢ်လီၤ.” (မးသဲ ၂၈:၁၉, ၂၀) အဃိ ခရံာ်ဖိလၢ အမ့ၢ်အတီတဖၣ်န့ၣ် တမ့ၢ်ထဲ ကဘၣ်တဲဘၣ်ပှၤဂၤလၢ ယွၤအဘီအမုၢ်အဂ့ၢ်ဘၣ်. အဝဲသ့ၣ် ကဘၣ်ဂုာ်ကျဲးစၢး ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်.

တၢး၁၂-E ၉/၁ ၁၆ ¶၁

ဖဲတၢ်စံၣ်ညီၣ်အနံၤန့ၣ် တၢ်ကမၤအသးဒ်လဲၣ်

ဒ်တၢ်ဂီၤပူၤ ပာ်ဖျါထီၣ်ဝဲအသိး ပှၤအါဂၤဆိကမိၣ်ဝဲလၢ မုၢ်စံၣ်ညီၣ်အနံၤန့ၣ် ပှၤအကကွဲၢ်လၢအကထိတဖၣ် ကဆၢထၢၣ်လၢ ကစၢ်ယွၤ အလီၢ်ပစိာ်အမဲာ်ညါ ဒီးအဝဲသ့ၣ် ကဘၣ်တၢ်စံၣ်ညီၣ်အီၤ ဒ်တၢ်လၢအမၤတ့ၢ်ဝဲတဖၣ်အသိး. ဒီးအဝဲသ့ၣ် ဆိကမိၣ်ဝဲလၢ ဖဲန့ၣ်အဆၢကတီၢ် ပှၤတနီၤန့ၣ် ကလဲၤထီၣ်ဘၣ်လၢမူခိၣ် ဒီးအဂၤတနီၤန့ၣ် ကဘၣ်တၢ်စံၣ်ညီၣ်အီၤလၢ လရာ်အပူၤ. ဘၣ်ဆၣ် မ့မ့ၢ် လံာ်စီဆှံန့ၣ် အပာ်ဖျါထီၣ်ဝဲလၢ တၢ်စံၣ်ညီၣ်အမုၢ်နံၤ အတၢ်တိာ်ပာ်န့ၣ် မ့ၢ်ဝဲ ကစၢ်ယွၤကမၤပူၤဖျဲး ပှၤဟီၣ်ခိၣ်ဖိတဖၣ်လၢ တၢ်တတီတလိၤ. (စံးထီၣ်ပတြၢၤ ၉၆:၁၃) ကစၢ်ယွၤ ဃုထၢထီၣ်ဝဲ ယ့ၣ်ၡူးလၢ စံၣ်ညီၣ်ကွီၢ် ဒ်သိး ကစံၣ်ညီၣ်န့ၢ် ပှၤဟီၣ်ခိၣ်ဖိတဖၣ်တၢ် တီတီလိၤလိၤ.—ဖး ယၡါယၤ ၁၁:၁-၅; မၤတၢ် ၁၇:၃၁.

တၢး၁၂-E ၉/၁၅ ၁၂ ¶၁၈-၁၉

တၢ်ဃူတၢ်ဖိးလၢ အနံၣ်တကထိအတီၢ်ပူၤ ဒီးအနံၣ်တကထိဝံၤအလီၢ်ခံ

^၁၈ ဖဲပှၤဟီၣ်ခိၣ်ဖိတဖၣ် ဒိကနၣ် မုၣ်ကီၤလံၢ် ဒီးထီဒါယဟိဝၤယွၤ အတၢ်ပၢအခါ တၢ်ဃူတၢ်ဖိးလၢ ပှၤဟီၣ်ခိၣ်ဖိ ဒီးယဟိဝၤယွၤ အဘၢၣ်စၢၤန့ၣ် ဟးဂီၤကွံာ်ဝဲ. ဘၣ်ဆၣ် စးထီၣ်ဖဲ ၁၉၁၄ န့ၣ်မ့းၡံအၤ အဘီအမုၢ် မၤဝဲဒ်သိးဒီး တၢ်ဃူတၢ်ဖိးအံၤ ကအိၣ်ထီၣ်က့ၤအဂီၢ် တဆီဘၣ်တဆီ. (အ့း ၁:၉, ၁၀) ဖဲအနံၣ်တကထိ အတီၢ်ပူၤန့ၣ် တၢ်လီၤကမၢကမၣ်လၢ ဆၢကတီၢ်ခဲအံၤ “ပထံၣ်အီၤတသ့ဘၣ်” န့ၣ်ကဟဲကဲထီၣ်ဝဲ အနီၢ်ကီၢ်. ဒီးတၢ် “အကတၢၢ်န့ၣ်” ကဟဲတုၤဝဲ. အဲၣ်ဒိးတဲဝဲ ခရံာ်ပၢတၢ် အနံၣ်တကထိကပှဲၤထီၣ်ဝဲ. ခရံာ်ပၢတၢ် အနံၣ်တကထိ မ့ၢ်ပှဲၤထီၣ်န့ၣ် တၢ်မနုၤ ကဆဲးကဲထီၣ်အသးလဲၣ်. ယ့ၣ်ၡူးန့ၣ် အဒိးန့ၢ်ဘၣ်ဝဲ “ကယဲၢ်တၢ်စိတၢ်ကမီၤ လၢမူခိၣ်ဒီးဟီၣ်ခိၣ်” သနာ်က့ အဝဲတပာ်ထီၣ်ထီအသးဘၣ်. အဝဲတပာ်လီၤအသးလၢ ကဟံးန့ၢ် ယဟိဝၤယွၤအလီၢ်ဘၣ်. ဖဲအနံၣ် တကထိဝံၤအလီၢ်ခံ အဝဲက “ဟ့ၣ်က့ၤဘီမုၢ်လၢ ပၢ်ကစၢ်ယွၤအစုပူၤ.” ထီဘိန့ၣ် ယ့ၣ်ၡူးသူဝဲ အလီၢ်အလၤ ဒီးတၢ်ခွဲးတၢ်ယာ်လၢ “ကစၢ်ယွၤ အလၤကပီၤ” အဂီၢ်.—မး ၂၈:၁၈; ဖံလံး ၂:၉-၁၁.

^၁၉ ဒီးပှၤလၢ အအိၣ်လၢ ယွၤအဘီမုၢ် တၢ်ပၢအဖီလာ်န့ၣ် ကကဲထီၣ် ပှၤလၢပှၤပှဲၤ ဒီးအဝဲသ့ၣ် ကကွၢ်လိ ယ့ၣ်ၡူးအဒိအတဲာ်, ကအိၣ်ဒီးတၢ်ဆီၣ်လီၤသး ဒီးကတူၢ်လိာ်ဝဲ လၢယဟိဝၤယွၤ အိၣ်ဒီးတၢ်ပၢအခွဲး လၢတၢ်သူၣ်အိၣ်သးအိၣ်ပူၤ. အဝဲသ့ၣ် ဘၣ်သးမၤဝဲဒ်န့ၣ်န့ၣ် အပာ်ဖျါထီၣ်ဝဲသ့ခီဖျိ အလဲၤခီဖျိ တၢ်မၤကွၢ် အလီၢ်ခံကတၢၢ်တဘျီ တုၤလၢအန့ၢ်. အဃိ မ့ၢ်ဝဲ တၢ်ခွဲးတၢ်ယာ် လၢအဝဲသ့ၣ်အဂီၢ်. (လီၣ် ၂၀:၇-၁၀) ဒီးတၢ်မၤကွၢ် အလီၢ်ခံကတၢၢ် ဝံၤအလီၢ်ခံ ပှၤဟီၣ်ခိၣ်ဖိ ဒီးတၢ်သးသမူလၢ အထီဒါတၢ်တဖၣ်န့ၣ် ကဘၣ်တၢ်မၤဟးဂီၤကွံာ် အဝဲသ့ၣ် လီၤထူလီၤယိာ်. ဖဲန့ၣ်အဆၢကတီၢ်န့ၣ် ကလီၤသးခုဝဲဒိၣ်မး. ကစၢ်ယွၤ အခ့အပှၤ လၢမူခိၣ် ဒီးလၢဟီၣ်ခိၣ်ခဲလၢာ်န့ၣ် ကစံးထီၣ်ပတြၢၤဝဲ ယဟိဝၤယွၤ လၢအမ့ၢ် “တၢ်ခဲလၢာ်လၢ ပှၤခဲလၢာ်အဂီၢ်.”—ဖး စံးထီၣ်ပတြၢၤ ၉၉:၁-၃.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2-E ၉၉၄

တၢ်ကတိၤ လၢအမ့ၢ် “တၢ်သးဝံၣ်အသီ တယုၢ်” န့ၣ် ပထံၣ်ဘၣ်လၢ လံာ်စံးထီၣ်ပတြၢၤအပူၤ တကးဒံးဘၣ် ပထံၣ်ဘၣ်လၢ ဝံယၡါယၤ ဒီးတၢ်မၢဖိယိၤဟၣ် ကွဲးဖျါထီၣ်ဝဲစ့ၢ်ကီး. (စံး ၃၃:၃; ၄၀:၃; ၉၆:၁; ၉၈:၁; ၁၄၄:၉; ၁၄၉:၁; ၡါ ၄၂:၁၀; လီၣ် ၅:၉; ၁၄:၃) ဒီးဖဲပသမံသမိး တၢ်ဂ့ၢ်အလီၢ်ခံမဲာ်ညါ ဘၣ်ဃးဒီး တၢ်ကတိၤ လၢအမ့ၢ် “တၢ်သးဝံၣ်အသီ” အခါ အါဘျီန့ၣ် ပသ့ၣ်ညါဘၣ်လၢ ပှၤသးဝံၣ် တၢ်သးဝံၣ်အသီတယုၢ် ဒ်သိးကပာ်ဖျါထီၣ် တၢ်ကဲထီၣ်လိၣ်ထီၣ် အသီတမံၤမံၤ လၢအဘၣ်ဃးဒီး ယဟိဝၤယွၤ အတၢ်ပၢ. အဒိ ဖဲစံးထီၣ်ပတြၢၤ ၉၆:၁၀ န့ၣ် ပှၤတဲဖျါထီၣ်လၢ တၢ်သးခုအပူၤလၢ “ယဟိဝၤယွၤ ကဲထီၣ်စီၤပၤလံ.” အဃိ ဖျါလီၤဂာ်လၢ “တၢ်သးဝံၣ်အသီ” န့ၣ်အဲၣ်ဒိးတဲဝဲ ဘၣ်ဃးဒီး တၢ်ကဲထီၣ်လိၣ်ထီၣ် အသီတမံၤမံၤ လၢအဘၣ်ဃးဒီး ယဟိဝၤယွၤ အတၢ်ပၢ ဒီးတၢ်အသီတမံၤမံၤအံၤ ကကဲဘျုးလၢ ပှၤအိၣ်လၢမူခိၣ် ဒီးလၢဟီၣ်ခိၣ်အဂီၢ် ဒ်လဲၣ်အဂ့ၢ်.—စံး ၉၆:၁၁-၁၃; ၈၉:၉; ၡါ ၄၂:၁၀, ၁၃.

လါအီးကထိဘၢၣ် ၂၁-၂၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၀၀-၁၀၂

ပာ်ဖျါထီၣ်လၢ နပာ်လုၢ်ပာ်ပှ့ၤယဟိဝၤယွၤ အတၢ်အဲၣ်လၢအတီ

တၢး၂၃.၀၃ ၁၂ ¶၁၈-၁၉

နအိၣ်ကတီၤပာ်သးလၢ တၢ်ဒိးဘျၢထံအဂီၢ် ကသ့ဒ်လဲၣ်

^၁၈ နတၢ်အဲၣ် ယဟိဝၤယွၤန့ၣ် အကဘၣ်ကဲ တၢ်လၢအရ့ဒိၣ်ကတၢၢ် လၢနတၢ်အိၣ်မူပူၤ. (ဖး ကတိၤဒိ ၃:၃-၆.) နမ့ၢ်အဲၣ် ယဟိဝၤယွၤနီၢ်ကီၢ်န့ၣ် နတၢ်အဲၣ်တခါအံၤ ကမၤစၢၤနၤလၢ နလဲၤခီဖျိ တၢ်ကီတၢ်ခဲကန့ၢ် ဒီးနကဆဲးမၤ ယဟိဝၤယွၤအတၢ်မၤ. လံာ်စီဆှံ ပာ်ဖျါထီၣ်စ့ၢ်ကီးလၢ ယဟိဝၤယွၤန့ၣ် အအိၣ်ဒီးတၢ်အဲၣ်လၢအတီ လၢအခ့အပှၤတဖၣ် အဖီခိၣ်. တၢ်အဲၣ်လၢအတီအံၤ အဲၣ်ဒိးတဲဝဲ ယဟိဝၤယွၤ တပာ်တီၢ် အခ့အပှၤ နီတဘျီဘၣ် ဒီးကဆဲးအဲၣ် အဝဲသ့ၣ်ထီဘိ. (စံးထီၣ်ပတြၢၤ ၁၀၀:၅) ယဟိဝၤယွၤ တ့လီၤနၤဒ်သိး နကွၢ်လိအီၤကသ့. (၁ မိၤၡ့ ၁:၂၆) အဃိ နပာ်ဖျါထီၣ်က့ၤ တၢ်အဲၣ်လၢအတီ ဒ်သိးဒီး ယဟိဝၤယွၤ ကသ့ဒ်လဲၣ်.

^၁၉ ပအဲၣ်ယဟိဝၤယွၤန့ၣ် ပပာ်ဖျါထီၣ်သ့ခီဖျိ ပစံးဘျုးက့ၤအီၤ. (၁ သ့းစၤလနံ ၅:၁၈) သံကွၢ်လီၤနသး ကီးနံၤဒဲးလၢ ‘ယဟိဝၤယွၤ ပာ်ဖျါထီၣ်လၢ အအဲၣ်ယၤဒ်လဲၣ်.’ ဒီးဖဲနဃ့ထုကဖၣ်အခါ စံးဘျုးယဟိဝၤယွၤ ဒီးတဲဖျါထီၣ် တၢ်လၢအမၤန့ၢ်နၤတဖၣ် လီၤတံၢ်လီၤဆဲး. ပမ့ၢ်ဆိမိၣ်ထံ တၢ်လၢယဟိဝၤယွၤ မၤန့ၢ်ပှၤန့ၣ် ပကသ့ၣ်ညါဘၣ်လၢ အပာ်ဖျါထီၣ် တၢ်အဲၣ်လၢ ပဝဲတဂၤဘၣ်တဂၤ အဖီခိၣ်. ဘၣ်ဃးဒီး ယဟိဝၤယွၤ အတၢ်အဲၣ်အံၤ တၢ်မၢဖိပီလူးစ့ၢ်ကီး သ့ၣ်ညါဘၣ်ဝဲဂ့ၤဂ့ၤ. (ဖး ကလၤတံ ၂:၂၀.) အဃိ သံကွၢ်လီၤနသးလၢ ‘ယပာ်ဖျါထီၣ်လၢ ယအဲၣ်ဆၢက့ၤ ယဟိဝၤယွၤ ကသ့ဒ်လဲၣ်.’ နတၢ်အဲၣ် ယဟိဝၤယွၤန့ၣ် ကမၤစၢၤနၤလၢ နကတြီဆၢကွံာ် တၢ်လ့ပစီ ဒီးနမ့ၢ်ထံၣ်ဘၣ် တၢ်ကီတၢ်ခဲနာ်က့ နကဆဲးတီဒီး ယဟိဝၤယွၤ. တကးဒံးဘၣ် တၢ်အဲၣ်အံၤ ကမၤစၢၤနၤ ဒ်သိးဒီး နကဆဲးဘူၣ်ထီၣ်ဘါထီၣ် ယဟိဝၤယွၤ ဒီးပာ်ဖျါထီၣ်လၢ နအဲၣ်အီၤ ကီးနံၤဒဲး.

တၢး၂၃.၀၂ ၁၇ ¶၁၀

“အိၣ်ဆၢပံၢ်ကလာ် ဒီးအိၣ်ပလီၢ်သး”

^၁၀ တၢ်လၢကမၤဟးဂီၤ ပတၢ်ရ့လိာ်သးဒီး ယဟိဝၤယွၤန့ၣ် ပၣ်ဃုာ်ဒီး တၢ်လိၣ်ကွဲတၢ်အဲၣ်, တၢ်အီသံးအါတလၢ, တၢ်အီၣ်တၢ်အါတလၢ, တၢ်တဲဆါပှၤဂၤ, တၢ်မၤမုာ်မၤဖှံသး လၢအပၣ်ဃုာ်ဒီး တၢ်မၤဆူၣ်မၤစိး, တၢ်ကွၢ်တၢ်ဂီၤဘ့ၣ်ဆ့ ဒီးတၢ်အဂၤတဖၣ်. (စံးထီၣ်ပတြၢၤ ၁၀၁:၃) ပဒုၣ်ပဒါ မုၣ်ကီၤလံၢ်န့ၣ် အဃုတၢ်ခွဲးတၢ်ယာ်လၢ အကမၤဟးဂီၤ ပတၢ်ရ့လိာ်သးဒီး ယဟိဝၤယွၤ မၢ်မၢ်လီၤ. (၁ ပ့းတရူး ၅:၈) အဃိ ပမ့ၢ်တအိၣ်ပလီၢ်သး ထီဘိဘၣ်န့ၣ် မုၣ်ကီၤလံၢ် ကဒုးအိၣ်ထီၣ် တၢ်ပာ်သူၣ်ပာ်သး ဒ်သိးဒီး တၢ်သးက့ၣ်, တၢ်တတီတလိၤ, တၢ်သူၣ်လီသးကွံ, တၢ်ပာ်ထီၣ်ထီသး ဒီးတၢ်ဟံဃာ်ပှၤဂၤတၢ်ကမၣ် လၢပသးပူၤ. (ကလၤတံ ၅:၁၉-၂၁) ခီၣ်ထံးခါဒု ပကဆိမိၣ်လၢ တၢ်ပာ်သူၣ်ပာ်သးတဖၣ်အံၤ တလီၤဘၣ်ယိၣ်ဘၣ်. ဘၣ်ဆၣ် ပမ့ၢ်တမၤလီၤမၢ်ကွံာ် တၢ်ပာ်သူၣ်ပာ်သးတဖၣ်အံၤ တဘျီဃီဘၣ်န့ၣ် အကဆဲးဒိၣ်ထီၣ် လၢပသးပူၤ ဒီးကဒုးအိၣ်ထီၣ် တၢ်ကီတၢ်ခဲ.—ယၤကိာ် ၁:၁၄, ၁၅.

တၢး၁၁-E ၇/၁၅ ၁၆ ¶၇-၈

မ့ၢ်နကဒိကနၣ် ယဟိဝၤယွၤ တၢ်ဟ့ၣ်ပလီၢ်ဧါ

^၇ ပဟးဆှဲး ပှၤသိၣ်လိတၢ်လၢ အကမၣ်တဖၣ်န့ၣ် အဲၣ်ဒိးတဲဝဲ အခီပညီဒ်လဲၣ်. အဲၣ်ဒိးတဲဝဲ ပတတူၢ်လိာ် အဝဲသ့ၣ် လၢပဟံၣ် မ့တမ့ၢ် ပတဆၢဂ့ၤဆၢဝါအဝဲသ့ၣ်ဘၣ်. တကးဒံးဘၣ် ပတဖးအဝဲသ့ၣ် အလံာ်အလဲၢ်, ကွၢ်တၢ်ဂီၤမူ ဒီးတၢ်ရဲၣ်တၢ်ကျဲၤလၢ အဝဲသ့ၣ်ပာ်ထီၣ်ဝဲ ဒီးလဲၤနုာ်လီၤကွၢ် အဝဲသ့ၣ် အဝဲးပဆဲး ဒီးကွဲးလီၤ ပတၢ်ထံၣ်ဘၣ်. ဘၣ်မနုၤအဃိ ပဘၣ်မၤဒ်န့ၣ်လဲၣ်. မ့ၢ်လၢ တၢ်အဲၣ်အဃိ. ပအဲၣ် “တၢ်မ့ၢ်တၢ်တီကစၢ်” ယဟိဝၤယွၤအဃိ ပတမၤဘၣ်ဃးပသးဒီး တၢ်သိၣ်လိ အကမၣ်လၢ အထီဒါလိာ်အသးဒီး ကစၢ်ယွၤကလုၢ်ကထါ တၢ်မ့ၢ်တၢ်တီဘၣ်. (စံး ၃၁:၅; ယိၤ ၁၇:၁၇) တကးဒံးဘၣ် ပအဲၣ်ယဟိဝၤယွၤ အတၢ်ကရၢကရိအဃိ ပဟးဆှဲး ပှၤလၢအသိၣ်လိ တၢ်လၢအကမၣ်တဖၣ်. ယဟိဝၤယွၤ အတၢ်ကရၢကရိန့ၣ် အသိၣ်လိပှၤ တၢ်မ့ၢ်တၢ်တီလၢ အဘၣ်ဃးဒီး ယဟိဝၤယွၤအမံၤ ဒီးအခီပညီ, ကစၢ်ယွၤ အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်, တၢ်မၤအသးဒီး ပှၤသံတဖၣ်ဒ်လဲၣ် ဒီးတၢ်ဂဲၤဆၢထၢၣ်သမူထီၣ်က့ၤ အဂ့ၢ်. နနီၣ်ဘၣ်ဒံးဧါ, ဖဲနမၤလိဘၣ် တၢ်မ့ၢ်တၢ်တီတဖၣ်အံၤ ဒီးတၢ်မ့ၢ်တၢ်တီ အဂၤတဖၣ်အခါ နတူၢ်ဘၣ်ဒ်လဲၣ်. အဃိ တဘၣ်ဟ့ၣ်အခွဲးလၢ ပှၤတဂၤဂ့ၤ တဂၤဂ့ၤ လၢအထီဒါ ယဟိဝၤယွၤ အတၢ်ကရၢကရိန့ၣ် ကမၤယံၤထီၣ်နၤဒီး တၢ်ကရၢကရိလၢ အသိၣ်လိနၤ တၢ်မ့ၢ်တၢ်တီတဖၣ်အံၤတဂ့ၤ.—ယိၤဟၣ် ၆:၆၆-၆၉.

^၈ ပှၤသိၣ်လိတၢ်လၢ အကမၣ်တဖၣ် မ့ၢ်မၤဝဲ ဒ်လဲၣ်ဂ့ၤဒ်လဲၣ်ဂ့ၤ ပတဒိကနၣ် အဝဲသ့ၣ်ဘၣ်. အဝဲသ့ၣ် လီၤဂာ်ဒ် ထံပူၤလၢ ထံတအိၣ်ဘၣ် အဃိ ပမ့ၢ်ဒိကနၣ် အဝဲသ့ၣ်န့ၣ် ပသးကဟးဂီၤ. မ်ပကသးတီဒီး ယဟိဝၤယွၤ ဒီးအတၢ်ကရၢကရိ. ယဟိဝၤယွၤ အတၢ်ကရၢကရိန့ၣ် ဟ့ၣ်ပှၤယွၤအကလုၢ်ကထါ တၢ်မ့ၢ်တၢ်တီ အထံထီဘိ အဃိ ပမ့ၢ်ဆဲးအိၣ်ဒီး တၢ်သးတီန့ၣ် ပတထံၣ်ဘၣ် တၢ်သးဟးဂီၤ နီတဘျီဘၣ်.—ၡါ ၅၅:၁-၃; မး ၂၄:၄၅-၄၇.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2-E ၅၉၆

ထိၣ်ဒိၣ်ဖုၣ်ခီၣ်

ဖဲထိၣ်ဒိၣ်ဖုၣ်ခီၣ်တဖၣ် အီၣ်တၢ်ဘျဲအခါ ညီနုၢ်န့ၣ် အဝဲသ့ၣ် လဲၤလၢ တၢ်လီၢ်လၢ ပှၤတအိၣ်နီတဂၤဘၣ် ဒီးအဖျါလီၤသယုၢ်သညိ. ဒီးအဝဲသ့ၣ် တီၣ်ထီၣ် အခိၣ်သၣ်ဃံလၢ အဒံးဆ့အလိၤ ဒီးအိၣ်ဝဲ ဂၢၢ်တပၢၢ်အဃိ နမ့ၢ်ကွၢ်စိလၢအယံၤန့ၣ် လီၤဂာ်ဒ်သိးဒီး လၢၢ်ဝါဝါတဖျၢၣ်. ထိၣ်တကလုာ်အံၤ တဘျီတခီၣ်န့ၣ် အဝဲသ့ၣ် အိၣ်ဝဲဒ်န့ၣ် ယံာ်လၢ အနၣ်ရံၣ်ညါ. ဖဲပှၤကွဲးထါ စံးထီၣ်ပတြၢၤ ပာ်ဖျါထီၣ်ဝဲလၢ အသးအုးဖးဒိၣ်အဂ့ၢ်အခါ အဝဲသူဝဲ ထိၣ်ဒိၣ်ဖုၣ်ခီၣ် ဒ်တၢ်အဒိအသိး. အဝဲတဲဝဲလၢ “ယလီၤဂာ်ဒ်သိးဒီး ထိၣ်ဒိၣ်ဖုၣ်ခီၣ် လၢအအိၣ်လၢ ပှၢ်မုၢ်ကနၢ.” (စံး ၁၀၂:၆) ဖဲလံာ်စီဆှံတဆၢအံၤ တဲဝဲလၢ “ပှၢ်မုၢ်ကနၢ” န့ၣ်တအဲၣ်ဒိးတဲဝဲ မဲးမုၢ်ပျီဘၣ်, အဲၣ်ဒိးတဲဝဲ တၢ်လီၢ်လၢ အအိၣ်ယံၤဒီး ပှၤအိၣ်ဝဲအလီၢ်. ဘၣ်သ့ၣ်သ့ၣ် ကမ့ၢ်ဝဲဒၣ် တၢ်လီၤဘျၢၣ်အလီၢ်. လၢယၢ်ဒ့ၣ်အတၢ်တြီၤပူၤ ကလံၤစိးတကပၤန့ၣ် ထိၣ်ဒိၣ်ဖုၣ်ခီၣ်တဖၣ် အိၣ်ဝဲဖဲ မူခိၣ်ကလံၤသီၣ်ဂီၤတတီၤ အတီၢ်ပူၤ. လၢကီၢ်အံၣ်စရ့လးအပူၤန့ၣ် ပှၤထံၣ်ဘၣ်ဝဲ ထိၣ်ဒိၣ်ဖုၣ်ခီၣ်သၢကလုာ်. ထိၣ်ဒိၣ်ဖုၣ်ခီၣ်အဝါ (Pelecanus onocrotalus) အိၣ်ဝဲအါကတၢၢ် ဒီးအဂၤတကလုာ်န့ၣ်မ့ၢ်ဝဲ ထိၣ်ဒိၣ်ဖုၣ်ခီၣ် ဝါဃး (Pelecanus crispus) ဒီးအဂၤတကလုာ်န့ၣ် မ့ၢ်ဝဲ ထိၣ်ဒိၣ်ဖုၣ်ခီၣ်ဂီၤစၢ် (Pelecanus rufescens) ဒီးထိၣ်ဒိၣ်ဖုၣ်ခီၣ်တကလုာ်အံၤန့ၣ် တအိၣ်အါအါဘၣ်.

ထိၣ်ဒိၣ်ဖုၣ်ခီၣ်တဖၣ်န့ၣ် အအိၣ်လၢ တၢ်လီၢ်လၢ ပှၤတအိၣ်ဘၣ်အလီၢ် အဃိ ပှၤမၤတံာ်တာ် အဝဲသ့ၣ်တသ့ဘၣ်. ဖဲန့ၣ်န့ၣ် အဝဲသ့ၣ် တ့ထီၣ်အသွံ ဒီးအဖိဖးထီၣ်ဖဲန့ၣ် ဒီးအဝဲသ့ၣ် ဖီၣ်ညၣ်မ့ၢ်ဝံၤန့ၣ် အအိၣ်ဘှံးဝဲဖဲန့ၣ်. မ့ၢ်လၢ ထိၣ်ဒိၣ်ဖုၣ်ခီၣ်တဖၣ်အံၤ အိၣ်ဝဲလၢ တၢ်လီၢ်လီၤဃီ ဒီးတၢ်လီၢ်လၢ ပှၤတအိၣ်ဘၣ်အလီၢ်အဃိ လံာ်စီဆှံ သူအဝဲသ့ၣ် ဒ်တၢ်အဒိအသိး ဒ်သိးကပာ်ဖျါထီၣ်ဝဲလၢ တၢ်အိၣ်လီၤဃီ လၢာ်လၢာ်ဆ့ဆ့အဂီၢ်. အဒိ ဖဲဝံယၡါယၤ တဲဆိပာ်စၢၤဝဲလၢ ကီၢ်အဒိၣ် ကကဲထီၣ်တၢ်လီၢ်လၢ အအိၣ်လီၤဃီအခါ အဝဲတဲဝဲလၢ ထိၣ်ဒိၣ်ဖုၣ်ခီၣ် ကအိၣ်လၢ တၢ်လီၢ်ဖဲန့ၣ်. (ၡါ ၃၄:၁၁) ဒီးဖဲဝံစဖါနယၤ တဲဆိပာ်ဝဲလၢ ဝ့ၢ်နံၤနဝ့ ကဟးဂီၤကွံာ်ဝဲ လၢာ်လၢာ်ဆ့ဆ့ ဒီးပှၤတအိၣ်ဝဲလၢၤဘၣ်အခါ အဝဲတဲဝဲလၢ ထိၣ်ဒိၣ်ဖုၣ်ခီၣ်တဖၣ် ကအိၣ်လၢ ဝ့ၢ်အတၢ်ထူၣ်အခိၣ်ထိး လၢအလီၤပှီၢ်တဖၣ်အကျါ.—ဖါ ၂:၁၃, ၁၄.

ijwbq-E ၁၂၉

တၢ်ဂ့ၢ်လၢ လံာ်စီဆှံပူၤန့ၣ် ဆီတလဲအသးဧါ

တဆီတလဲဘၣ်. လၢအနံၣ်လၢ အကထိအတီၢ်ပူၤ လံာ်စီဆှံန့ၣ် ပှၤကွဲးကူအီၤလၢ တၢ်ဖိတၢ်လံၤလၢ အဟးဂီၤညီတဖၣ်အလိၤ တဆီဘၣ်တဆီ. သနာ်က့ ဖဲပှၤက့ၤထိၣ်သတြီၤအီၤဒီး တၢ်ကွဲးအသး လၢပျၢၤတဖၣ်အခါ ပှၤထံၣ်ဘၣ်ဝဲလၢ တၢ်ဂ့ၢ်တၢ်ကျိၤတဖၣ် တဆီတလဲဝဲဘၣ်.

ဖဲပှၤကွဲးကူက့ၤ လံာ်စီဆှံအခါ ပှၤကွဲးကမၣ်တၢ် အိၣ်တဘျီဘျီဧါ

ပှၤထံၣ်န့ၢ်က့ၤဝဲ လံာ်စီဆှံအက့အခီ လၢပျၢၤတဖၣ် လၢအကထိညါ. ဒီးတၢ်ကွဲးအသးတဖၣ်န့ၣ် အလီၤဆီလိာ်သး အိၣ်ဝဲတနီၤ အဃိ အပာ်ဖျါထီၣ်လၢ ဖဲပှၤကွဲးကူက့ၤ လံာ်စီဆှံအခါ ပှၤကွဲးကမၣ်တၢ် အိၣ်ဝဲ. သနာ်က့ အါတက့ၢ်န့ၣ် အကမၣ်ထဲတစဲးဖိ ဒီးအခီပညီ တဆီတလဲဘၣ်. ဘၣ်ဆၣ် ပှၤတနီၤန့ၣ် အဆီတလဲဝဲ လံာ်စီဆှံအခီပညီ ဒ်အအဲၣ်ဒိး ဆီတလဲဝဲအသိးအဃိ ပထံၣ်ဘၣ်စ့ၢ်ကီး တၢ်လၢအလီၤဆီဖးဒိၣ်တနီၤ. အဒိ

၁. ၁ ယိၤဟၣ် ၅:၇ န့ၣ် လံာ်စီဆှံလၢညါတနီၤ ကွဲးကျိာ်ထံဝဲလၢ “လၢမူခိၣ်န့ၣ် ပၢ်, တၢ်ကလုၢ်, ဒီးသးစီဆှံ အိၣ်ဝဲ ဒီးတၢ်သၢမံၤအံၤန့ၣ် မ့ၢ်ဝဲတဂၤဃီ.” ဘၣ်ဆၣ် လံာ်စီဆှံအက့အခီ လၢပျၢၤလၢ ပှၤနာ်န့ၢ်အီၤသ့တဖၣ် ပာ်ဖျါထီၣ်ဝဲလၢ တၢ်ကွဲးအသးတဖၣ်အံၤ တအိၣ်ဝဲလၢ လံာ်စီဆှံလၢ ပှၤကွဲးအီၤလၢ အခီၣ်ထံးခါန့ၣ်ဘၣ်. အဝဲသ့ၣ် ဖၢနုာ်က့ၤဝဲလၢခံမး. ပစိၤခဲအံၤ လံာ်စီဆှံ တၢ်ကွဲးကျိာ်ထံ လၢပနာ်န့ၢ်အီၤသ့တဖၣ်အပူၤန့ၣ် ပတထံၣ်န့ၢ် တၢ်ကွဲးအသးတဖၣ်အံၤဘၣ်.

၂. လၢလံာ်စီဆှံလၢပျၢၤတဖၣ် အပူၤန့ၣ် ကစၢ်ယွၤအမံၤ အိၣ်ဝဲလၢအကထိညါ. ဘၣ်ဆၣ် လံာ်စီဆှံ တၢ်ကွဲးကျိးထံ အါမးန့ၣ် ထုးထီၣ်က့ၤ ကစၢ်ယွၤအမံၤ ဒီးလၢကစၢ်ယွၤ အမံၤအလီၢ်န့ၣ် အဝဲသ့ၣ် ကွဲးက့ၤဝဲလၢ အမံၤလၤသၣ်ကပီၤ လၢအမ့ၢ် “ကစၢ်” မ့တမ့ၢ် “ယွၤ.”

ဘၣ်မနုၤအဃိ ပနာ်သ့လၢ တၢ်ဂ့ၢ်တၢ်ကျိၤလၢ လံာ်စီဆှံပူၤတဖၣ် အိၣ်ဒံးအလီၢ်လီၢ် တုၤလၢခဲအံၤလဲၣ်

ပှၤယူဒၤဖိ ဒီးခရံာ်ဖိလၢ အကွဲးကူ လံာ်စီဆှံတဖၣ်န့ၣ် ကွဲးကူဝဲတၢ်ဂ့ၢ်လၢ ဘၣ်ဃးဒီး ကစၢ်ယွၤ အပှၤဂီၢ်မုၢ်တဖၣ် မၤကမၣ်တၢ်ဖးဒိၣ်အဂ့ၢ် လီၤတံၢ်လီၤဆဲး. (၄ မိၤၡ့ ၂၀:၁၂; ၂ ၡမူၤအ့လး ၁၁:၂-၄; ၁ မိၤၡ့ ၂:၁၁-၁၄) တကးဒံးဘၣ် အဝဲသ့ၣ် ကွဲးကူဝဲ တၢ်ဂ့ၢ်လၢ ဘၣ်ဃးဒီး ပှၤယူဒၤဖိတဖၣ် တဒိကနၣ်တၢ်ဘၣ်အဂ့ၢ် ဒီးတၢ်ဂ့ၢ်လၢ အပာ်ဖျါထီၣ်ဝဲ ပှၤဟီၣ်ခိၣ်ဖိ အတၢ်သိၣ်တၢ်သီအဂ့ၢ်. (ဟိၤၡ့ ၄:၂; မၤလကံ ၂:၈, ၉; မးသဲ ၂၃:၈, ၉; ၁ ယိၤဟၣ် ၅:၂၁) အဝဲသ့ၣ် ကွဲးကူဝဲ တၢ်ဂ့ၢ်တဖၣ် လီၤတံၢ်လီၤဆဲးန့ၣ် အပာ်ဖျါထီၣ်ဝဲလၢ အဝဲသ့ၣ် ပာ်လုၢ်ပာ်ပှ့ၤ ကစၢ်ယွၤ အကလုၢ်ကထါစီဆှံဒိၣ်မး ဒီးပနာ်န့ၢ် အဝဲသ့ၣ်သ့.

ကစၢ်ယွၤန့ၣ် ဒုးအိၣ်ထီၣ် လံာ်စီဆှံအဃိ ပနာ်သ့လၢ အဝဲကမၤဝဲဒ်သိး တၢ်ဂ့ၢ်တၢ်ကျိၤလၢ လံာ်စီဆှံပူၤတဖၣ် ကအိၣ်ဒ်အလီၢ်လီၢ် တုၤလၢခဲအံၤ. (ယၡါယၤ ၄၀:၈; ၁ ပ့းတရူး ၁:၂၄, ၂၅) ကစၢ်ယွၤ ဒုးအိၣ်ထီၣ်လံာ်စီဆှံန့ၣ် တမ့ၢ်ထဲလၢ ကကဲဘျုးလၢ ပှၤလၢပျၢၤတဖၣ်အဂီၢ်ဘၣ် အဒုးအိၣ်ထီၣ်ဝဲ ဒ်သိးကကဲဘျုးလၢ ပဂီၢ်စ့ၢ်ကီး. (၁ ကရံၣ်သူး ၁၀:၁၁) အဃိ လံာ်စီဆှံ တဲဝဲလၢ “တၢ်ကွဲးအသးလၢ အပူၤကွံာ်တဖၣ် ခဲလၢာ်န့ၣ် ဘၣ်တၢ်ကွဲးအီၤလၢ ကသိၣ်လိပှၤအဂီၢ်လီၤ. အဃိ ပအိၣ်ဒီးတၢ်မုၢ်လၢ် ခီဖျိလၢ ပတၢ်တူၢ်န့ၢ်ခီၣ်ကဲ ဒီးတၢ်မၤမုာ်ထီၣ်က့ၤလၢ ပဒိးန့ၢ်ဘၣ်အီၤလၢ တၢ်ကွဲးအသးတဖၣ်အပူၤ အဃိလီၤ.”—ရိမ့ၤ ၁၅:၄.

ယ့ၣ်ၡူး ဒီးအပျဲၢ်အဘီၣ်တဖၣ် နာ်အီၣ်ဝဲ ဧ့ၤဘြံၤလံာ်စီဆှံလၢ ပှၤကွဲးကူအီၤတဖၣ် ဒီးအသူက့ၤဝဲ တၢ်ကတိၤ ဖဲလံာ်စီဆှံတဖၣ်န့ၣ်အပူၤ.—လူၤကၣ် ၄:၁၆-၂၁; မၤတၢ် ၁၇:၁-၃.

လါအီးကထိဘၢၣ် ၂၈–လါနိၣ်ဝ့ဘၢၣ် ၃

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၁၀၃-၁၀၄

အဝဲ သ့ၣ်နီၣ်ထီၣ်က့ၤဝဲလၢ “ပမ့ၢ်ဟီၣ်ခိၣ်ကမူၣ်”

တၢး၂၃.၀၇ ၂၁ ¶၅

ကွၢ်လိ ယဟိဝၤယွၤ လၢအမ့ၢ်ပှၤလၢ အအိၣ်ဒီး တၢ်ထံၣ်အကြၢးအဘၣ်

^၅ ခီဖျိလၢ ယဟိဝၤယွၤ အိၣ်ဒီး တၢ်ဆီၣ်လီၤသး ဒီးတၢ်သးကညီၤအဃိ အအိၣ်ဒီး တၢ်ထံၣ်အကြၢးအဘၣ်. အဒိ တချုးဖဲ ယဟိဝၤယွၤ ကမၤဟးဂီၤ ပှၤအၢပှၤသီလၢ ဝ့ၢ်စဒိၣ်အပူၤ ဒံးဘၣ်န့ၣ် အပာ်ဖျါထီၣ် တၢ်ဆီၣ်လီၤသးဒ်လဲၣ်. ယဟိဝၤယွၤဆှၢလီၤ မူခိၣ်ကလူးတဖၣ်လၢ ကတဲဘၣ်စီၤလိာ်လၢ ကလဲၤဃ့ၢ်ပူၤဖျဲးသးလၢ ကစၢၢ်ကလိအကျါ. ဘၣ်ဆၣ် စီၤလိာ် လဲၤဃ့ၢ်ပူၤဖျဲးအသးဖဲန့ၣ် တဘူၣ်ဘၣ်. ဒီးအဃ့ကညး ယဟိဝၤယွၤလၢ အကဃ့ၢ်လၢ ဝ့ၢ်စိၤဧၢ်လၢ အကဲဝဲ ဝ့ၢ်ဆံးဆံးဖိတဖျၢၣ်. နီၢ်ကီၢ်န့ၣ် ယဟိဝၤယွၤ ကမၤဟးဂီၤဝဲ ဝ့ၢ်တဖျၢၣ်အံၤ စ့ၢ်ကီး. ဒီးယဟိဝၤယွၤ မ့ၢ်မၢဆူၣ်စီၤလိာ်လၢ ကဒိကနၣ် အတၢ်ဟံးစုနဲၣ်ကျဲန့ၣ် အမၤဝဲသ့ ဘၣ်ဆၣ် ယဟိဝၤယွၤ တမၤဝဲဒ်န့ၣ်ဘၣ်. ယဟိဝၤယွၤ ဒိကနၣ်စီၤလိာ် အတၢ်ဃ့ကညး ဒီးအတမၤဟးဂီၤ ဝ့ၢ်စိၤဧၢ်လၢၤဘၣ်. (၁ မိၤ ၁၉:၁၈-၂၂) အနံၣ်လၢအကယၤ ပူၤကွံာ်အလီၢ်ခံ ယဟိဝၤယွၤ ပာ်ဖျါထီၣ်စ့ၢ်ကီး တၢ်သးကညီၤလၢ ပှၤနံၤနဝ့ဖိ အဖီခိၣ်ဒ်လဲၣ်. ယဟိဝၤယွၤ ဆှၢလီၤဝဲ ဝံယိၤနါဒ်သိး ကလဲၤတဲဘၣ် ပှၤနံၤနဝ့ဖိ လၢအအၢအသီတဖၣ်လၢ ယဟိဝၤယွၤ ကမၤဟးဂီၤဝဲ ဝ့ၢ်နံၤနဝ့ ဒီးပှၤနံၤနဝ့ဖိခဲလၢာ်. ပှၤနံၤနဝ့ဖိတဖၣ်န့ၣ် ပီၢ်ယၢ်လီၤက့ၤအသး ဒီးယဟိဝၤယွၤ သးကညီၤဘၣ်အဝဲသ့ၣ် အဃိ ယဟိဝၤယွၤ တမၤဟးဂီၤအဝဲသ့ၣ်လၢၤဘၣ်.—ယိၤနါ ၃:၁, ၁၀; ၄:၁၀, ၁၁.

တၢး၂၃.၀၉ ၆-၇ ¶၁၆-၁၈

သန့ၤနသးလၢ ယဟိဝၤယွၤ ဒ်စီၤၡံၡိၣ်အသိး

^၁၆ စီၤၡံၡိၣ် မၤကမၣ်တၢ်အဃိ အထံၣ်ဘၣ် တၢ်ကီတၢ်ခဲနးမး သနာ်က့ အဆဲးမၤ ယဟိဝၤယွၤ အတၢ်ဘၣ်သးဒံး. ပဝဲစ့ၢ်ကီး ပမ့ၢ်မၤကမၣ်ဘၣ်တၢ် ဒီးပမ့ၢ်ဘၣ် တၢ်သိၣ်က့ၤပှၤ မ့တမ့ၢ် ပမ့ၢ်တဒိးန့ၢ်ဘၣ် တၢ်ခွဲးတၢ်ယာ်လၢၤဘၣ် သနာ်က့ ပကဘၣ်ဆဲးမၤ ယဟိဝၤယွၤ အတၢ်ဘၣ်သးဒံး. ပကဘၣ် သ့ၣ်နီၣ်ထီၣ်လၢ ယဟိဝၤယွၤန့ၣ် အဘၣ်သး ပျၢ်ပတၢ်ကမၣ်ထီဘိ. (စံး ၁၀၃:၈-၁၀) ပမ့ၢ်မၤကမၣ်တၢ် သနာ်က့ ဒ်ယဟိဝၤယွၤ ဆဲးသူစီၤၡံၡိၣ်အသိး ယဟိဝၤယွၤ ဆဲးသူပှၤသ့ဒံး.

^၁၇ ပကတဲသကိး ဒီပုၢ်ဝဲၢ်ခွါသးစၢ် မဲကၢၤ အတၢ်လဲၤခီဖျိ. ဒီပုၢ်ဝဲၢ်ခွါမဲကၢၤန့ၣ် အမၤ ယဟိဝၤယွၤ အတၢ်မၤဆူၣ်မး. အကဲ တၢ်အိၣ်ဖှိၣ် အပှၤမၤစၢၤတၢ် ဒီးအကဲစ့ၢ်ကီး ပှၤလဲၤလၢညါတဂၤ. ဘၣ်ဆၣ် ခီဖျိလၢ အမၤကမၣ်တၢ်အဃိ လၢတၢ်အိၣ်ဖှိၣ်ပူၤန့ၣ် အတဒိးန့ၢ်ဘၣ် တၢ်ခွဲးတၢ်ယာ်လၢၤဘၣ်. ဒီပုၢ်ဝဲၢ်ခွါမဲကၢၤ တဲဝဲလၢ “တချုးတၢ်ကဲထီၣ်သး ဒ်န့ၣ်ဒံးဘၣ်န့ၣ် ယခိၣ်နူာ်ပူၤ အိၣ်ထဲ ယကမၤ ယဟိဝၤယွၤ အတၢ်မၤ. ဘၣ်ဆၣ် ဖဲတၢ်ကဲထီၣ်သးဒီးယၤ တဘျီဃီန့ၣ် ယတူၢ်ဘၣ်လၢ ယမၤ ယဟိဝၤယွၤ အတၢ်မၤ တသ့နီတမံၤလၢၤဘၣ်. ယသ့ၣ်ညါလၢ ယဟိဝၤယွၤ တပာ်တ့ၢ်ကွံာ်ယၤ နီတဘျီဘၣ်. ဘၣ်ဆၣ် ယဆိမိၣ်ထီၣ်လၢ မ့ၢ်ယတၢ်ရ့လိာ်သးဒီး ယဟိဝၤယွၤ ကဂ့ၤဒ်သိးလၢညါဒံးဧါ. ဒီးယမၤ ယဟိဝၤယွၤ အတၢ်မၤ လၢတၢ်အိၣ်ဖှိၣ်အပူၤ ဒ်သိးလၢညါကန့ၢ်ဒံးဧါ.”

^၁၈ ဒီပုၢ်ဝဲၢ်ခွါမဲကၢၤ တဟ့ၣ်အၡူဘၣ်အဃိ လီၤသးခုဒိၣ်မး. အဝဲတဲဝဲလၢ “ဒ်သိး ယတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်အဂီၢ် ယကျဲးစၢးဆူၣ်ဆူၣ်. ယဃ့ထုကဖၣ် လၢယဟိဝၤယွၤအအိၣ် လၢယသးဒီဖျၢၣ်, ယမၤလိ လံာ်စီဆှံ ဒီးယဆိမိၣ်ထံ တၢ်လၢယမၤလိအီၤ.” လၢခံ ဒီပုၢ်ဝဲၢ်ခွါမဲကၢၤ န့ၢ်ဘၣ်ကဒါက့ၤ တၢ်ခွဲးတၢ်ယာ်လၢ တၢ်အိၣ်ဖှိၣ်အပူၤ. ဒီးခဲအံၤန့ၣ် အကဲတၢ်အိၣ်ဖှိၣ်သးပှၢ် ဒီးအကဲပှၤလဲၤလၢညါ. အတဲဝဲလၢ “တၢ်အိၣ်ဖှိၣ်သးပှၢ်တဖၣ် အတၢ်မၤစၢၤ ဒီးအတၢ်ဟ့ၣ်ဂံၢ်ဟ့ၣ်ဘါန့ၣ် မၤစၢၤယၤဒ်သိး ယကသ့ၣ်ညါလီၤယသးလၢ ယဟိဝၤယွၤ အဲၣ်ယၤဒံး. အဃိ ယမၤဘၣ်ကဒါ တၢ်အိၣ်ဖှိၣ် အတၢ်မၤ ဒီးယအိၣ်ဒီး သးလၢအသ့ၣ်ညါဒၣ်တၢ် လၢအကဆှီ. ယတၢ်လဲၤခီဖျိအံၤ သိၣ်လိယၤလၢ ပှၤတဂၤဂ့ၤ တဂၤဂ့ၤ လၢအပီၢ်ယၢ်လီၤက့ၤသး နီၢ်ကီၢ်န့ၣ် ယဟိဝၤယွၤ ကပျၢ်ကွံာ် အတၢ်ကမၣ်.” ပမ့ၢ်မၤကမၣ်ဘၣ်တၢ် သနာ်က့ ပမ့ၢ်ကျဲးစၢး ဘှီဘၣ်ထီၣ်က့ၤပသး ဒီးဆဲးသန့ၤသးလၢ ယဟိဝၤယွၤန့ၣ် ပနာ်သပှၢ်တၢၢ်လၢ ယဟိဝၤယွၤ ကဆဲးသူပှၤ ဒီးကဆိၣ်ဂ့ၤပှၤစ့ၢ်ကီး.—စံး ၈၆:၅; ကတိၤ ၂၈:၁၃.

တၢး၂၃.၀၅ ၂၆ ¶၂

နမၤလၢပှဲၤထီၣ် နနီၢ်သးဖီတၢၣ်သ့

^၂ နပာ်လီၤဖီတၢၣ်လံ ဒီးနမၤလၢပှဲၤအီၤ မ့ၢ်တန့ၢ်ဒံးဘၣ်နာ်က့ တဘၣ်သးဟးဂီၤတဂ့ၤ. ပှၤတဂၤကမၤလၢပှဲၤ အဖီတၢၣ်ဆံးဆံးဖိတခါအဂီၢ် အကဘၣ်ဟံန့ၢ် တၢ်ဆၢကတီၢ် ဒီးကျဲးစၢးဝဲဆူၣ်ဆူၣ်. ဒီးပသ့ၣ်ညါလၢ နဘၣ်သး မၤလၢပှဲၤနဖီတၢၣ်ဒံးအဃိ နပာ်ဖျါထီၣ်လၢ နပာ်လုၢ်ပာ်ပှ့ၤ နတၢ်ရ့လိာ်သးဒီး ယဟိဝၤယွၤ ဒီးနဘၣ်သးဟ့ၣ် ယဟိဝၤယွၤ တၢ်လၢအဂ့ၤကတၢၢ်. အဃိ ယဟိဝၤယွၤ ပာ်လုၢ်ပာ်ပှ့ၤ နတၢ်ကျဲးစၢး ဒီးတၢ်လၢနမၤတန့ၢ်ဘၣ်န့ၣ် အတမၢနမၤဘၣ်. (စံးထီၣ်ပတြၢၤ ၁၀၃:၁၄; မံကၤ ၆:၈) ပဝဲတဂၤဒီးတဂၤန့ၣ် ပတၢ်အိၣ်သး တဒ်သိးလိာ်သးဘၣ်အဃိ ပကဘၣ်ပာ်လီၤဖီတၢၣ်လၢ ပမၤအီၤန့ၢ်. အဃိ ဒ်သိးပမၤလၢပှဲၤပဖီတၢၣ်ကန့ၢ်အဂီၢ် ပကဘၣ်မၤဒ်လဲၣ်န့ၣ် ပကတဲသကီး တၢ်ဟ့ၣ်ကူၣ်တနီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

cl-E ၅၅ ¶၁၈

“ပှၤတဂၤလၢ အတ့လီၤမူခိၣ် ဒီးဟီၣ်ခိၣ်” န့ၣ်တ့လီၤတၢ်သ့ အကလုာ်ကလုာ်

^၁၈ ဘၣ်ဃးဒီး ယဟိဝၤယွၤ အတၢ်စိတၢ်ကမီၤ အတ့လီၤတၢ်သ့ အကလုာ်ကလုာ်န့ၣ် ပသ့ၣ်ညါဘၣ် တၢ်မနုၤလဲၣ်. တၢ်ဘၣ်တ့တဖၣ် အိၣ်ဝဲအကလုာ်ကလုာ်အဃိ အလီၤကမၢကမၣ်ဒိၣ်မး. ပှၤကွဲးထါစံးထီၣ်ပတြၢၤတဂၤ တဲဝဲလၢ “အိ ယဟိဝၤယွၤဧၢ, တၢ်လၢ နမၤတ့ၢ်တဖၣ် အိၣ်အါမး . . . ဟီၣ်ခိၣ်န့ၣ် ပှဲၤဝဲဒီး တၢ်လၢနတ့လီၤတဖၣ်လီၤ.” (စံးထီၣ်ပတြၢၤ ၁၀၄:၂၄) ပှၤဃုသ့ၣ်ညါ တၢ်သးသမူအဂ့ၢ်တဖၣ် ထံၣ်ဘၣ်ဝဲလၢ လၢဟီၣ်ခိၣ်ချၢပူၤ တၢ်လၢအအိၣ်ဒီး အသးသမူတဖၣ်န့ၣ် အကလုာ်အိၣ်ဝဲ အါန့ၢ်ဒံး တကကွဲၢ်ဘျဲၣ်ညါ. ဘၣ်ဆၣ် ဘၣ်သ့ၣ်သ့ၣ် အကအိၣ်ဝဲလၢ အကကွဲၢ်တဖၣ်ညါ. ပှၤဆွဲတၢ်ဂီၤဖိတဂၤန့ၣ် တဘျီတခီၣ် အကဘၣ်တ့ တၢ်ဂီၤမနုၤလဲၣ်န့ၣ် အဆိမိၣ်ဝဲ တဘၣ်လၢၤဘၣ်သ့. ဘၣ်ဆၣ် မ့မ့ၢ် ယဟိဝၤယွၤန့ၣ် အတၢ်သ့တၢ်ဘၣ် လၢကတ့လီၤတၢ်အသီ ဒီးတ့လီၤတၢ် အကလုာ်ကလုာ်န့ၣ် လၢာ်ကွံာ်တသ့နီတဘျီဘၣ်.

lmd တၢ်ဂ့ၢ်ဘၣ်ထွဲလိာ်သး က တၢ်ဂ့ၢ် ၆

ပသးအိၣ်သိၣ်လိ တၢ်မ့ၢ်တၢ်တီ

ဝၤန့ၣ်ကဘၣ် ‘အဲၣ်အမါ ဒ်အအဲၣ်လီၤ အနီၢ်ကစၢ် အသးအသိး.’—အ့း ၅:၃၃; ကလီး ၃:၁၉.