ယဟိဝၤယွၤ ပာ်လုၢ်ပာ်ပှ့ၤအခ့အပှၤလၢ အအိၣ်ဒီးတၢ်ဆီၣ်လီၤသးတဖၣ်

၁. ပှၤလၢအဆီၣ်လီၤအသးန့ၣ်​ ယဟိဝၤယွၤထံၣ်အီၤ ဒ်လဲၣ်, တဲဖျါထီၣ်တက့ၢ်.

ယဟိဝၤယွၤအဲၣ်​ ပှၤလၢအဆီၣ်လီၤအသးလီၤ. ထဲဒၣ်ပှၤလၢ အဆီၣ်လီၤအသးနီၢ်ကီၢ်တဖၣ်န့ၣ်​ အိၣ်ဒီးတၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ်သ့လီၤ. မ့မ့ၢ် “ပှၤပာ်အသးထီၣ်ထီန့ၣ်” ကစၢ်ယွၤ “သ့ၣ်ညါဝဲလၢအယံၤလီၤ.” (စံးထီၣ်ပတြၢၤ ၁၃၈:၆) ပဝဲခဲလၢာ် ပအဲၣ်ဒိးမၤ တၢ်ဘၣ်ယဟိဝၤယွၤအသး ဒီးဒိးန့ၢ်ဘၣ်​ အတၢ်အဲၣ်လီၤ. လၢတၢ်န့ၣ်အဃိ ပအဲၣ်ဒိး မၤအါထီၣ်​ တၢ်ဆီၣ်လီၤသးလီၤ.

၂. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.

^၂ လၢတၢ်မၤလိအံၤအပူၤ ပကတဲသကိး တၢ်သံကွၢ်သၢဖျၢၣ်လီၤ. (၁) တၢ်ဆီၣ်လီၤသးန့ၣ်​ မ့ၢ်တၢ်မနုၤလဲၣ်. (၂) ဘၣ်မနုၤအဃိ ပကဘၣ်မၤအါထီၣ်​ တၢ်ဆီၣ်လီၤသးလဲၣ်. (၃) ကီလၢပကအိၣ်ဒီး တၢ်ဆီၣ်လီၤသး ဖဲလဲၣ်အခါလဲၣ်. ဒီးပကသ့ၣ်ညါဘၣ်လၢ ပမ့ၢ်မၤအါထီၣ်​ တၢ်ဆီၣ်လီၤသးန့ၣ်​ ယဟိဝၤယွၤ ကသးခု, တကးဒံးဘၣ်​ ပကဒိးန့ၢ်ဘၣ်​ အဘျုးစ့ၢ်ကီးလီၤ.—ကတိၤဒိ ၂၇:၁၁; ယၡါယၤ ၄၈:၁၇.

တၢ်ဆီၣ်လီၤသးန့ၣ်​ မ့ၢ်တၢ်မနုၤလဲၣ်

၃. တၢ်ဆီၣ်လီၤသးန့ၣ်​ မ့ၢ်တၢ်မနုၤလဲၣ်.

^၃ ပှၤလၢအအိၣ်ဒီး တၢ်ဆီၣ်လီၤသးန့ၣ်​ တဆိကမိၣ်ဝဲလၢ အမ့ၢ်ပှၤလၢ အရ့ဒိၣ်န့ၢ်ဒံးပှၤဂၤဘၣ်​ ဒီးအဝဲ တပာ်ထီၣ်ထီအသးဘၣ်. လံာ်စီဆှံ ပာ်ဖျါထီၣ်ဝဲလၢ ပှၤလၢအအိၣ်ဒီး တၢ်ဆီၣ်လီၤသးတဂၤန့ၣ်​ သ့ၣ်ညါဝဲလၢ ယဟိဝၤယွၤ ဒိၣ်န့ၢ်အီၤစၢၢ်တလၢၢ် ဒီးအကြၢးရ့ဒီးပှၤဂၤ ဒ်လဲၣ်န့ၣ်လီၤ. ဒီးအဝဲနၢ်ပၢၢ်ဝဲလၢ ပှၤအဂၤသ့ၣ်တဖၣ်​ ဂ့ၤန့ၢ်ဒံးအီၤလၢ ကျဲအဂၤတမံၤမံၤလီၤ.—ဖံလံးပံၤ ၂:၃, ၄.

၄-၅. ပှၤလၢအဖျါလၢ အအိၣ်ဒီးတၢ်ဆီၣ်လီၤသးန့ၣ်​ အခီပညီမ့ၢ်ဝဲ အဝဲအိၣ်ဒီးတၢ်ဆီၣ်လီၤသး နီၢ်ကီၢ်ဧါ.

^၄ ပှၤတနီၤန့ၣ်​ ဖျါလၢအအိၣ်ဒီး တၢ်ဆီၣ်လီၤသးလီၤ. ဘၣ်သ့ၣ်သ့ၣ်​ ကမ့ၢ်လၢအဝဲသ့ၣ်​ အမဲာ်ဆှးသ့အဃိလီၤ. မ့တမ့ၢ် ခီဖျိလၢ အဝဲသ့ၣ်​ အတၢ်ဆဲးတၢ်လၤ ဒီးအမိၢ်အပၢ် သိၣ်လိအီၤအဃိ အဝဲသ့ၣ်​ ပာ်ဖျါထီၣ်​ တၢ်ပာ်ကဲလီၤ. ဘၣ်ဆၣ်​ ဘၣ်သ့ၣ်သ့ၣ်​ အဝဲသ့ၣ်​ ကမ့ၢ်ပှၤလၢ အပာ်ထီၣ်ထီသး ဒိၣ်မးလီၤ. အဃိ အဝဲသ့ၣ်​ မ့ၢ်ပှၤဒ်လဲၣ်တဂၤလဲၣ်န့ၣ်​ တယံာ်တမီၢ် မ့တမ့ၢ် လၢခံန့ၣ်​ ကဖျါထီၣ်လီၤ.—လူၤကၣ်​ ၆:၄၅.

^၅ အဂၤတမံၤန့ၣ်​ ပှၤတနီၤန့ၣ်ဖျါလၢ အနာ်န့ၢ်လီၤအသး မ့တမ့ၢ် အတဲတၢ်ပျီပျီလီၤ. ဘၣ်ဆၣ်​ အခီပညီတမ့ၢ်လၢ အဝဲသ့ၣ်​ မ့ၢ်ပှၤလၢ အပာ်ထီၣ်ထီအသးဘၣ်. (ယိၤဟၣ်​ ၁:၄၆, ၄၇) ပှၤလၢအမဲာ်ဆှးတသ့အါအါ ဒ်အံၤတဖၣ်န့ၣ်​ ကဘၣ်ပလီၢ်အသး ဒ်သိးအသုတသန့ၤလီၤအသးလၢ အတၢ်ဂ့ၤတၢ်ဝါတဖၣ်​ တဂ့ၤအဂီၢ်လီၤ. ပမ့မ့ၢ်ပှၤလၢ အမဲာ်ဆှးသ့မ့ၢ်ဂ့ၤ, တသ့ဘၣ်မ့ၢ်ဂ့ၤ ပဝဲခဲလၢာ် ပဘၣ်ဂုာ်ကျဲးစၢးဆူၣ်ဆူၣ်​ ဒ်သိးပကမ့ၢ်ပှၤလၢ အအိၣ်ဒီးတၢ်ဆီၣ်လီၤသး နီၢ်ကီၢ်အဂီၢ်န့ၣ်လီၤ.

၆. ဒ် ၁ ကရံၣ်သူး ၁၅:၁၀ ပာ်ဖျါထီၣ်ဝဲအသိး ပမၤလိန့ၢ်တၢ်မနုၤလၢ တၢ်မၢဖိပီလူးအအိၣ်လဲၣ်.

^၆ ဆိကမိၣ်ကွၢ် တၢ်မၢဖိပီလူး အဒိအတဲာ်တက့ၢ်. ယဟိဝၤယွၤသူအီၤလၢ ကသူၣ်ထီၣ်​ တၢ်အိၣ်ဖှိၣ်အသီတဖၣ်​ လၢဝ့ၢ်တဝ့ၢ်ဝံၤတဝ့ၢ်လီၤ. ဘၣ်သ့ၣ်သ့ၣ်​ အဝဲမၤကစၢ်ယွၤအတၢ်မၤ ကကဲထီၣ်လိၣ်ထီၣ်​ အါန့ၢ်ဒံး ခရံာ်အတၢ်မၢဖိလၢ အဂၤတဖၣ်ဒံးလီၤ. ဘၣ်ဆၣ်​ အဝဲတဆိကမိၣ်လီၤအသးလၢ အမ့ၢ်ပှၤလၢ အရ့ဒိၣ်န့ၢ်ဒံး ဒီပုၢ်ဝဲၢ်တဖၣ်န့ၣ်ဘၣ်. လၢတၢ်ဆီၣ်လီၤသးအပူၤ အဝဲတဲဝဲလၢ “ယဲဒၣ်အံၤ ယမ့ၢ်ပှၤတၢ်မၢဖိ အဆံးကတၢၢ်လၢ ယမၤအၢမၤသီ ယွၤအတၢ်အိၣ်ဖှိၣ်အဃိ, ဒီးတၢ်တဂ့ၤကိးဘၣ်ယၤလၢ ပှၤတၢ်မၢဖိဘၣ်” လီၤ. (၁ ကရံၣ်သူး ၁၅:၉) ဒီးစီၤပီလူးတဲဝဲလၢ အဝဲအိၣ်ဒီးတၢ်ရ့လိာ်သးဒီး ယဟိဝၤယွၤလၢအဂ့ၤန့ၣ်​ တမ့ၢ်လၢ အမ့ၢ်ပှၤလၢအလီၤဆီ မ့ၢ်တမ့ၢ် မၤတၢ်ကဲထီၣ်လိၣ်ထီၣ်အါမး အဃိဘၣ်. အဝဲတဲဝဲလၢ အဝဲအိၣ်ဒီး အတၢ်ရ့လိာ်သးဒ်အံၤ ခီဖျိလၢ ကစၢ်ယွၤအတၢ်သးကညီၤ ဒိၣ်ဒိၣ်မုၢ်မုၢ်အဃိလီၤ. (ဖး ၁ ကရံၣ်သူး ၁၅:၁၀ တက့ၢ်.) စီၤပီလူး မ့ၢ်ပှၤလၢအဒိဂ့ၤတဲာ်ဘၣ်လၢ အအိၣ်ဒီးတၢ်ဆီၣ်လီၤသး တဂၤလီၤ. လၢကရံၣ်သူးန့ၣ်​ ပှၤလၢအပာ်ဒ့ၣ်ပာ်ကမၣ်အီၤ အိၣ်တနီၤ ဘၣ်ဆၣ်​ ဖဲအဝဲကွဲးလံာ်လၢ တၢ်အိၣ်ဖှိၣ်ဖဲန့ၣ်အခါ အဝဲတတဲဂ့ၤလီၤအသးဘၣ်.—၂ ကရံၣ်သူး ၁၀:၁၀.

၇. လၢပစိၤခဲအံၤ ဒီပုၢ်ဝဲၢ်လၢ ပှၤသ့ၣ်ညါအီၤအါတဂၤ ပာ်ဖျါထီၣ်ဝဲလၢ အအိၣ်ဒီးတၢ်ဆီၣ်လီၤသး ဒ်လဲၣ်.

^၇ ဒီပုၢ်ဝဲၢ်ခွါခၤ ဖြဲၤဒၢၤရဲၣ်​ ချဲ(န်) မ့ၢ်ပှၤလၢ အပာ်ဖျါထီၣ်​ တၢ်ဒိဂ့ၤတဲာ်ဘၣ်လၢ ဘၣ်ဃးဒီး တၢ်ဆီၣ်လီၤသးန့ၣ်လီၤ. အဝဲမ့ၢ် ပှၤပၢဆှၢတၢ်ကမံးတံာ် တဂၤလီၤ. အဝဲကွဲးဝဲ အတၢ်အိၣ်မူ အတၢ်လဲၤခီဖျိအဂ့ၢ်လၢ အကဲထီၣ်တၢ်ဂံၢ်တၢ်ဘါ တခါလီၤ. ဖဲအဝဲကွဲး အတၢ်လဲၤခီဖျိအဂ့ၢ်အခါ အဝဲပာ်ဖျါထီၣ်​ အတၢ်ကီတၢ်ခဲ ဒီးအတၢ်ဂံၢ်စၢ်ဘါစၢ်အဂ့ၢ် လၢတၢ်ဆီၣ်လီၤသးအပူၤလီၤ. အဒိ ဖဲ ၁၉၂၂ န့ၣ်အဝဲလဲၤစံၣ်တဲၤတဲလီၤတၢ် တဟံၣ်ဘၣ်တဟံၣ်​ အဆိကတၢၢ်တဘျီ ဒီးကီလၢအဂီၢ်ဒိၣ်မးလီၤ. အဃိ အဝဲတစံၣ်တဲၤတဲလီၤတၢ် တဟံၣ်ဘၣ်တဟံၣ်လၢၤဘၣ်​ ကအိၣ်ခံနံၣ်ဃၣ်ဃၣ်လီၤ. လၢခံ ဖဲအဝဲမၤတၢ်လၢ ဘ့ၤသ့လးအခါ ခီဖျိလၢ ဒီပုၢ်ဝဲၢ်တဂၤ ဟ့ၣ်ကူၣ်အီၤအဃိ အသးတမုာ် ဒီပုၢ်ဝဲၢ်တဂၤန့ၣ်​ ဖးယံာ်ညါလီၤ. အဝဲအိၣ်စ့ၢ်ကီးဒီး တၢ်သးလီၤဘှံးအတၢ်ဆါ ဒီးလၢခံ အကိညၢ်ထီၣ်က့ၤလီၤ. ဘၣ်ဆၣ်​ အဝဲအိၣ်ဒီး အမူဒါလၢ အရ့ဒိၣ်ဒီး မၤဝဲမုာ်ဒိၣ်မးလီၤ. ဒီပုၢ်ဝဲၢ်ခၤ မ့ၢ်ပှၤလၢ ပှၤသ့ၣ်ညါအီၤအါတဂၤ ဘၣ်ဆၣ်အဝဲ ကွဲးလီၤဝဲ အတၢ်ဂံၢ်စၢ်ဘါစၢ်အဂ့ၢ်အဃိ ဖျါလၢအဝဲ အိၣ်ဒီးတၢ်ဆီၣ်လီၤသးလီၤ. ပဒီပုၢ်ဝဲၢ်မုၣ်ခွါအါဂၤ ဘၣ်သူၣ်ဘၣ်သးဝဲ ဒီပုၢ်ဝဲၢ်ခွါခၤ ဒီးအတၢ်သးတီ လၢအဝဲပာ်ဖျါထီၣ်ဝဲလၢ အတၢ်လဲၤခီဖျိ အပူၤန့ၣ်လီၤ.b

ဘၣ်မနုၤအဃိ ပကဘၣ်မၤအါထီၣ်​ တၢ်ဆီၣ်လီၤသးလဲၣ်

၈. ယဟိဝၤယွၤ ဘၣ်သူၣ်ဘၣ်သးဝဲ တၢ်ဆီၣ်လီၤသးန့ၣ်​ ၁ ပ့းတရူး ၅:၆ ပာ်ဖျါထီၣ်ဝဲဒ်လဲၣ်.

^၈ တၢ်ဂ့ၢ်အရ့ဒိၣ်ကတၢၢ်တမံၤလၢ ပမၤအါထီၣ်​ တၢ်ဆီၣ်လီၤသးန့ၣ်မ့ၢ်ဝဲ ပအဲၣ်ဒိးမၤ တၢ်ဘၣ်ယဟိဝၤယွၤ အသးအဃိလီၤ. ဘၣ်ဃးဒီးတၢ်ဂ့ၢ်အံၤန့ၣ်​ တၢ်မၢဖိပ့းတရူး ပာ်ဖျါထီၣ်ဝဲ ၡဲၡဲလီၤ. (ဖး ၁ ပ့းတရူး ၅:၆ တက့ၢ်.) လံာ်လၢအမ့ၢ် “ဟဲပိာ်ယခံတက့ၢ်” (Come Be My Follower) န့ၣ်တဲနၢ်ပၢၢ်ပှၤ တၢ်လၢစီၤပ့းတရူး တဲဝဲတဖၣ်လီၤ. ဖဲန့ၣ်တဲဝဲလၢ “တၢ်ပာ်ထီၣ်ထီသးန့ၣ်​ လီၤဂာ်ဒီး တၢ်စုၣ်တၢ်ပျၢ် အဃိလီၤဘၣ်ယိၣ်ဒိၣ်မးလီၤ. ပှၤလၢအပာ်ထီၣ်ထီအသးန့ၣ်​ မ့ၢ်အိၣ်ဒီး တၢ်သ့တၢ်ဘၣ်အါမး သနာ်က့ ကစၢ်ယွၤသူအီၤတသ့ဘၣ်. မ့မ့ၢ်ပှၤလၢအအိၣ်ဒီး တၢ်ဆီၣ်လီၤသးန့ၣ်​ အတၢ်သ့တၢ်ဘၣ်​ မ့ၢ်အိၣ်ထဲတစဲးဖိသနာ်က့ ယဟိဝၤယွၤ သူအီၤသ့အါမးလီၤ. . . . နမ့ၢ်အိၣ်ဒီး တၢ်ဆီၣ်လီၤသးန့ၣ်​ အဝဲကအဲၣ်ဒိး ဆိၣ်ဂ့ၤနၤ သပှၢ်တၢၢ်လီၤ.”c တၢ်အဂ့ၤကတၢၢ်တခါ လၢပမၤအီၤသ့န့ၣ်​ မ့ၢ်ပမၤသးခု ယဟိဝၤယွၤအသးန့ၣ်လီၤ.—ကတိၤဒိ ၂၃:၁၅.

၉. ပမ့ၢ်အိၣ်ဒီးတၢ်ဆီၣ်လီၤသးန့ၣ်​ ဘၣ်မနုၤအဃိ ပှၤဂၤရ့ဒီးပှၤကမုာ်လဲၣ်.

^၉ ပမ့ၢ်မၤအါထီၣ်​ တၢ်ဆီၣ်လီၤသးန့ၣ်​ ယဟိဝၤယွၤ ကသးခု, တကးဒံးဘၣ်​ ပကဒိးန့ၢ်ဘၣ်စ့ၢ်ကီး အဘျုးအါမးလီၤ. ပမ့ၢ်အိၣ်ဒီး တၢ်ဆီၣ်လီၤသးန့ၣ်​ ပှၤဂၤကအဲၣ်ဒိးရ့ဒီးပှၤလီၤ. ဒ်သိးနကနၢ်ပၢၢ် တၢ်ဂ့ၢ်အံၤအဂီၢ် ဆိကမိၣ်ကွၢ်လၢ နရ့ဒီးပှၤ မုာ်ဒ်လဲၣ်တကလုာ်လဲၣ်န့ၣ်တက့ၢ်. (မးသဲ ၇:၁၂) ပှၤလၢအအဲၣ်ဒိးဝဲလၢ ပှၤကမၤဒ် အတၢ်ဘၣ်သးအသိးထီဘိ ဒီးတတူၢ်လိာ် ပှၤဂၤအတၢ်ဟ့ၣ်ကူၣ်ဘၣ်တဖၣ်န့ၣ်​ ပရ့အီၤတမုာ်ဘၣ်. ဘၣ်ဆၣ်​ ဖဲပရ့ဒီး ဒီပုၢ်ဝဲၢ်တဖၣ်အခါ အဝဲသ့ၣ်မ့ၢ် ပာ်ဖျါထီၣ်​ ‘တၢ်အဲၣ်ဒီပုၢ်ဝဲၢ်, တၢ်သးကညီၤ, တၢ်ဆီၣ်လီၤအသး’ န့ၣ်ပရ့ဒီးအဝဲသ့ၣ်​ မုာ်ဒိၣ်မးလီၤ. (၁ ပ့းတရူး ၃:၈) ပရ့ဒီးပှၤလၢ အဆီၣ်လီၤအသး မုာ်မးအဃိ ပမ့ၢ်အိၣ်ဒီး တၢ်ဆီၣ်လီၤသးန့ၣ်​ ပှၤဂၤရ့ဒီးပှၤ ကမုာ်စ့ၢ်ကီးလီၤ.

၁၀. ပမ့ၢ်အိၣ်ဒီး တၢ်ဆီၣ်လီၤသးန့ၣ်​ ကညီလၢ ပတၢ်အိၣ်မူအဂီၢ်ဒ်လဲၣ်.

^၁၀ ပမ့ၢ်အိၣ်ဒီး တၢ်ဆီၣ်လီၤသးန့ၣ်​ ကညီလၢ ပတၢ်အိၣ်မူအဂီၢ် စ့ၢ်ကီးလီၤ. တဘျီတခီၣ်​ ပကထံၣ်ဘၣ်​ မ့တမ့ၢ် လဲၤခီဖျိဘၣ်​ တၢ်လၢပဆိကမိၣ်လၢ အတတီတလိၤဘၣ်န့ၣ်လီၤ. စီၤပၤၡလိၤမိၤ လၢအမ့ၢ် ပှၤကူၣ်တၢ်သ့တဂၤ တဲဝဲလၢ “ယထံၣ်တၢ်အခ့အပှၤ လၢကသ့ၣ်လိၤ, ဒီးပဒိၣ်ဖးဒိၣ်​ လဲၤတၢ်လၢအခီၣ်​ ဒ်တၢ်အခ့အပှၤအသိးန့ၣ်လီၤ.” (စံၣ်တဲၤတဲလီၤတၢ် ၁၀:၇) တဘျီတခီၣ်​ ပှၤလၢအအိၣ်ဒီး တၢ်သ့တၢ်ဘၣ်အါမးတဂၤန့ၣ်​ တဘၣ်တၢ်မၤလၤကပီၤအီၤဘၣ်. ဘၣ်ဆၣ်​ တဘျီတခီၣ်​ ပှၤလၢအတအိၣ်ဒီး တၢ်သ့တၢ်ဘၣ်​ အါအါတဖၣ်န့ၣ်​ ဘၣ်တၢ်မၤလၤကပီၤအီၤလီၤ. အဃိ စီၤၡလိၤမိၤသ့ၣ်ညါဝဲလၢ ပမ့ၢ်တူၢ်လိာ် တၢ်လၢအကဲထီၣ်အသးလၢ ပတၢ်အိၣ်မူအပူၤန့ၣ်​ မ့ၢ်တၢ်လၢအဂ့ၤ ဒိၣ်န့ၢ်ဒံး ပသူၣ်အုးသးအုးလၢ တၢ်သ့ၣ်တဖၣ်န့ၣ်အဃိဒံးလီၤ. (စံၣ်တဲၤတဲလီၤတၢ် ၆:၉) ပမ့ၢ်အိၣ်ဒီးတၢ်ဆီၣ်လီၤသးန့ၣ်​ ကညီလၢပကတူၢ်လိာ် တၢ်လၢအကဲထီၣ်အသးလၢ ပတၢ်အိၣ်မူအပူၤ လၢပတဘၣ်သူၣ်ဘၣ်သးအီၤတဖၣ်န့ၣ်လီၤ.

ကီလၢပကအိၣ်ဒီး တၢ်ဆီၣ်လီၤသး ဖဲလဲၣ်အဆၢကတီၢ်လဲၣ်

၁၁. ဖဲပှၤဂၤ ဟ့ၣ်ကူၣ်ပှၤအခါ ပကြၢးမၤဒ်လဲၣ်.

^၁၁ ကိးနံၤဒဲးန့ၣ်​ ပအိၣ်ဒီးတၢ်ခွဲးတၢ်ယာ်အါမး လၢပကပာ်ဖျါထီၣ်​ တၢ်ဆီၣ်လီၤသးန့ၣ်လီၤ. ပကကွၢ်သကိး တၢ်အိၣ်သးတနီၤလီၤ. အဆိကတၢၢ်တမံၤန့ၣ်​ ဆိကမိၣ်ကွၢ် ဖဲပှၤဂၤဟ့ၣ်ကူၣ်ပှၤအခါ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသး ကသ့ဒ်လဲၣ်န့ၣ်တက့ၢ်. ဖဲပှၤဂၤဂုာ်ကျဲးစၢး ဘှီဘၣ်ထီၣ်ပှၤအခါ ပကြၢးသ့ၣ်နီၣ်ထီၣ်က့ၤလၢ ဘၣ်သ့ၣ်သ့ၣ်​ ပတၢ်ကမၣ်န့ၣ်​ ကဒိၣ်န့ၢ်ဒံး ပသ့ၣ်ညါလီၤပသးဒံးလီၤ. ဖဲပှၤတဂၤဂၤ ဟ့ၣ်ကူၣ်ပှၤအဆၢကတီၢ် ဘၣ်သ့ၣ်သ့ၣ်​ ပတအဲၣ်ဒိးတူၢ်လိာ်အီၤ တဘျီဃီဘၣ်. ဘၣ်ဆၣ်​ ပမ့ၢ်အိၣ်ဒီးတၢ်ဆီၣ်လီၤသးန့ၣ်​ ပကဂုာ်ကျဲးစၢး အိၣ်ဒီးတၢ်ထံၣ်လၢ အကြၢးအဘၣ်လီၤ.

၁၂. ဒ် ကတိၤဒိ ၂၇:၅, ၆ ပာ်ဖျါထီၣ်ဝဲသိး ဘၣ်မနုၤအဃိ ပကြၢးပာ်လုၢ်ပာ်ပှ့ၤ ပှၤဂၤအတၢ်ဟ့ၣ်ကူၣ်န့ၣ်လဲၣ်. ဟ့ၣ်တၢ်အဒိတက့ၢ်.

^၁၂ ပှၤလၢအအိၣ်ဒီး တၢ်ဆီၣ်လီၤသးန့ၣ်​ ကပာ်လုၢ်ပာ်ပှ့ၤ ပှၤဂၤအတၢ်ဟ့ၣ်ကူၣ်လီၤ. အဒိ ဆိကမိၣ်ကွၢ်လၢ နလဲၤထီၣ်တၢ်အိၣ်ဖှိၣ်​ ဒီးဖဲနဟးတဲတၢ်ဒီး ပှၤတဘျုးဂၤဝံၤအလီၢ်ခံ ပှၤတဂၤ လဲၤကိးနၤလၢ တၢ်ကပၤ ဒီးတဲဘၣ်နၤလၢ နမဲကဆူးန့ၣ်​ အိၣ်ဒီးတၢ်အီၣ်တမံၤမံၤလီၤ. နကမဲာ်ဆှး ဘၣ်ဆၣ်​ နကစံးဘျုးဘၣ်​ ပှၤလၢအဟဲတဲနၤတဂၤန့ၣ်​ သပှၢ်တၢၢ်လီၤ. ဒီးဘၣ်သ့ၣ်သ့ၣ်​ နကအဲၣ်ဒိး လၢပှၤကဟဲတဲဘၣ်နၤ ဆိန့ၢ်အန့ၢ်ဒံးလီၤ. ဒ်န့ၣ်အသိး ပဒီပုၢ်ဝဲၢ်မုၣ်ခွါလၢ အအိၣ်ဒီးတၢ်သးဒူလၢ အဟ့ၣ်ကူၣ်ပှၤ ဖဲပလိၣ်ဘၣ်အီၤ အဆၢကတီၢ်န့ၣ်​ ပကြၢးစံးဘျုးစံးဖှိၣ်အီၤ ဒီးပတထံၣ်အီၤဒ် ပဒုၣ်ပဒါအသိးဘၣ်. ပထံၣ်အီၤဒ် ပတံၤသကိးအသိးလီၤ.—ဖး ကတိၤဒိ ၂၇:၅, ၆ တက့ၢ်; ကလၤတံ ၄:၁၆.

၁၃. ဖဲပှၤဂၤဒိးန့ၢ်ဘၣ်​ မူဒါတဖၣ်လၢ ကစၢ်ယွၤအတၢ်မၤအပူၤအခါ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသး ကသ့ဒ်လဲၣ်.

^၁၃ ခံမံၤတမံၤန့ၣ်​ ဖဲပှၤဂၤဒိးန့ၢ်ဘၣ်​ မူဒါတဖၣ်လၢကစၢ်ယွၤအတၢ်မၤအပူၤအခါ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသး ကသ့ဒ်လဲၣ်. တၢ်အိၣ်ဖှိၣ်သးပှၢ်လၢ အမံၤမ့ၢ် ကၠ့စၢၤ(န်) တဲဝဲလၢ “ဖဲယထံၣ်ဘၣ်လၢ ပှၤဂၤဒိးန့ၢ်ဘၣ်​ မူဒါတဖၣ်အခါ ယဆိကမိၣ်လၢ ဘၣ်မနုၤအဃိ ပှၤတဃုထၢယၤဘၣ်လဲၣ်.” မ့ၢ်နၤစ့ၢ်ကီး နတူၢ်ဘၣ်ဒ်န့ၣ်​ တဘျီဘျီဧါ. နမ့ၢ် “ဆၢကဲထီၣ်” ပှၤလၢအန့ၢ်ဘၣ်မူဒါလီၤဆီ လၢကစၢ်ယွၤ အတၢ်မၤအပူၤန့ၣ်​ တကမၣ်ဘၣ်. (၁ တံၤမသ့း ၃:၁) ဘၣ်ဆၣ်​ ပကဘၣ်ပလီၢ်သး ဘၣ်ဃးဒီး တၢ်လၢပဆိကမိၣ်အီၤတဖၣ်န့ၣ်လီၤ. ပမ့ၢ်တပလီၢ်ပသးဘၣ်န့ၣ်​ ပတၢ်ပာ်ထီၣ်ထီသး ကအါထီၣ်ဝဲလီၤ. အဒိ ဒီပုၢ်ဝဲၢ်ခွါတဂၤ ကဆိကမိၣ်ဘၣ်ဝဲလၢ အဝဲမ့ၢ်ပှၤလၢ အတုၤထီၣ်ထီၣ်ဘး ဒိၣ်ကတၢၢ်လၢ ကမၤဝဲမူဒါ တမံၤမံၤ လၢတၢ်အိၣ်ဖှိၣ်အပူၤန့ၣ်လီၤ. မ့တမ့ၢ် ဘၣ်သ့ၣ်သ့ၣ်​ ဒီပုၢ်ဝဲၢ်မုၣ်တဂၤ ကဆိကမိၣ်ဘၣ်ဝဲလၢ အဝၤန့ၣ်​ တုၤထီၣ်ထီၣ်ဘး ဒိၣ်န့ၢ်ဒံး ဒီပုၢ်ဝဲၢ်အဂၤတဖၣ်လီၤ. ပမ့ၢ်အိၣ်ဒီး တၢ်ဆီၣ်လီၤသးန့ၣ်​ ပကဟးဆှဲး တၢ်ပာ်သူၣ်ပာ်သး ဒ်အံၤလီၤ.

၁၄. ဖဲပှၤဂၤဒိးန့ၢ်ဘၣ်​ မူဒါတဖၣ်အခါ စီၤမိၤၡ့မၤဝဲဒ်လဲၣ်​ ဒီးပဒိးန့ၢ်ဘၣ်​ တၢ်မၤလိမနုၤလၢ အအိၣ်လဲၣ်.

^၁၄ ဖဲပှၤဂၤ ဒိးန့ၢ်ဘၣ်​ မူဒါအခါ စီၤမိၤၡ့မၤဝဲဒ်လဲၣ်န့ၣ်​ ပဟံးန့ၢ်တၢ်မၤလိလၢအအိၣ်​ သ့ဝဲလီၤ. စီၤမိၤၡ့ ပာ်လုၢ်ပာ်ပှ့ၤဝဲ အမူဒါလၢအမ့ၢ် အဘၣ်တီခိၣ်ရိမဲဝဲ ပှၤအံၣ်စရ့လးဖိတဖၣ်န့ၣ်လီၤ. ဘၣ်ဆၣ်​ ဖဲယဟိဝၤယွၤ ဟ့ၣ်ပှၤဂၤတၢ်သ့တၢ်ဘၣ်​ လၢကမၤတၢ်မၤတနီၤလၢ စီၤမိၤၡ့မၤဝဲအခါ စီၤမိၤၡ့မၤဝဲဒ်လဲၣ်. အဝဲ တသူၣ်က့ၣ်သးကါပှၤဂၤဘၣ်. (၄ မိၤၡ့ ၁၁:၂၄-၂၉) လၢတၢ်ဆီၣ်လီၤသးအပူၤ စီၤမိၤၡ့ပျဲလၢ ပှၤကမၤသကိးတၢ်ဒီးအီၤ ဘၣ်ဃးဒီး တၢ်စံၣ်ညီၣ်တၢ်လၢ ပှၤဂီၢ်မုၢ်အဂီၢ်န့ၣ်လီၤ. (၂ မိၤၡ့ ၁၈:၁၃-၂၄) ပှၤလၢအကစံၣ်ညီၣ်န့ၢ်တၢ်လၢ ပှၤအံၣ်စရ့လးဖိတဖၣ်အဂီၢ် အိၣ်ဝဲအါဂၤအဃိ အဝဲသ့ၣ်တလိၣ်အိၣ်ခိး တၢ်ဆၢကတီၢ်ယံာ်ယံာ်ဘၣ်. ပထံၣ်ဘၣ်လၢ စီၤမိၤၡ့သးအိၣ်ပှၤဂၤ အါန့ၢ်ဒံး အသးအိၣ်​ အလီၢ်အလၤဒံးလီၤ. အဃိ စီၤမိၤၡ့ မ့ၢ်ပှၤဒိဂ့ၤတဲာ်ဘၣ်​ လၢပဂီၢ်ဒိၣ်မးလီၤ. ပမ့ၢ်အဲၣ်ဒိးလၢ ယဟိဝၤယွၤ သူပှၤသ့န့ၣ်​ ပကဘၣ်သ့ၣ်နီၣ်ထီၣ်လၢ ပကဘၣ်အိၣ်ဒီး တၢ်ဆီၣ်လီၤသးန့ၣ်​ အရ့ဒိၣ်န့ၢ်ဒံး ပကဘၣ်အိၣ်ဒီး တၢ်သ့တၢ်ဘၣ်ဒံးန့ၣ်လီၤ. လံာ်စီဆှံတဲဝဲလၢ “ယွၤအိၣ်ဝဲလၢ တၢ်ထီၣ်ထီဘၣ်ဆၣ်ဒီး, ကွၢ်လီၤပှၤလၢ အဆီၣ်လီၤအသး” လီၤ.—စံးထီၣ်ပတြၢၤ ၁၃၈:၆.

၁၅. ပှၤအါဂၤ ထံၣ်ဘၣ်ဒီးတၢ်အိၣ်သးလၢအသီ ဒ်လဲၣ်တဖၣ်လဲၣ်.

^၁၅ သၢမံၤတမံၤန့ၣ်​ ဖဲပတၢ်အိၣ်သး ဆီတလဲအခါ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသး ကသ့ဒ်လဲၣ်. လၢအပူၤကွံာ်အနံၣ်တဖၣ်န့ၣ်​ ပဒီပုၢ်ဝဲၢ်မုၣ်ခွါအါဂၤ လၢအမၤယဟိဝၤယွၤအတၢ်မၤ လၢအနံၣ်အါမးတဖၣ်န့ၣ်​ ဒိးန့ၢ်ဘၣ်မူဒါလၢအသီလီၤ. အဒိ စးထီၣ်ဖဲ ၂၀၁၄ န့ၣ်တၢ်ကရၢကရိတဲဝဲလၢ တၢ်ရဲၣ်တၢ်ကျဲၤလၢအမ့ၢ် ကီၢ်ရ့ၣ်အပှၤကွၢ်တၢ်န့ၣ်​ တအိၣ်လၢၤဘၣ်​ ဒီးအဝဲသ့ၣ်ဒီးအမါန့ၣ်​ ပှၤဟ့ၣ်လီၤအီၤမူဒါလၢ ကမၤကစၢ်ယွၤအတၢ်မၤလၢ ဆၢကတီၢ်လၢပှဲၤ လၢကျဲအဂၤလီၤ. စးထီၣ်ဖဲနံၣ်အဝဲန့ၣ်န့ၣ်​ တၢ်ကရၢကရိ တဲဝဲလၢ ကဝီၤအပှၤကွၢ်တၢ်လၢ အသးနံၣ်အိၣ်​ ၇၀ န့ၣ်တမၤဘၣ်ဝဲ ကဝီၤအပှၤကွၢ်တၢ်လၢၤဘၣ်. ဒီးဒီပုၢ်ဝဲၢ်ခွါလၢ အသးနံၣ်အိၣ်​ ၈၀ ဒီးဆူအဖီခိၣ်တဖၣ်န့ၣ်​ တမၤဘၣ်တၢ်ဒ် တၢ်အိၣ်ဖှိၣ်သးပှၢ်လၢ အရဲၣ်ကျဲၤတၢ်တဂၤလၢၤဘၣ်. တကးဒံးဘၣ်​ လၢအပူၤကွံာ် စှၤကိာ်နံၣ်န့ၣ်​ ပှၤဘ့ၤသ့လးဖိအါဂၤ ဒိးန့ၢ်ဘၣ်က့ၤမူဒါလၢ တၢ်စံၣ်တဲၤတဲလီၤတၢ်မၤ အပူၤန့ၣ်လီၤ. ဒီးပှၤအဂၤတနီၤန့ၣ်​ ခီဖျိလၢ အတၢ်အိၣ်ဆူၣ်အိၣ်ချ့ တဂ့ၤဘၣ်, ဘၣ်ကွၢ်ထွဲ အဟံၣ်ဖိဃီဖိ မ့တမ့ၢ် တၢ်ဂ့ၢ်လၢ အဂၤတဖၣ်အဃိ အဝဲသ့ၣ်​ ဆဲးမၤယွၤအတၢ်မၤ လၢဆၢကတီၢ်လၢပှဲၤ တသ့လၢၤဘၣ်.

၁၆. ဖဲပဒီပုၢ်ဝဲၢ်မုၣ်ခွါတဖၣ်​ ထံၣ်ဘၣ်တၢ်အိၣ်သး လၢအသီတဖၣ်အခါ အဝဲသ့ၣ်​ ပာ်ဖျါထီၣ်လၢ အအိၣ်ဒီး တၢ်ဆီၣ်လီၤသးဒ်လဲၣ်.

^၁၆ ပဒီပုၢ်ဝဲၢ်မုၢ်ခွါလၢ အထံၣ်ဘၣ်​ တၢ်ဆီတလဲဒ်အံၤတဖၣ်န့ၣ်​ တညီလၢအဝဲသ့ၣ်အဂီၢ်ဘၣ်. အဝဲသ့ၣ်​ ဘၣ်သူၣ်ဘၣ်သးဝဲ အမူဒါလၢအပူၤကွံာ် အမၤတ့ၢ်ဝဲလၢ အနံၣ်အါမးန့ၣ်လီၤ. ခီဖျိလၢ အဝဲသ့ၣ်​ ဘၣ်ပာ်တ့ၢ်ကွံာ် အမူဒါလၢ အဘၣ်သူၣ်ဘၣ်သးဝဲအဃိ တဘျီတခီၣ်​ အဝဲသ့ၣ်တနီၤန့ၣ်​ “သးအုးဒိၣ်မး” လီၤ. ဘၣ်ဆၣ်​ မ့ၢ်လၢပဒီပုၢ်ဝဲၢ်မုၣ်ခွါတဖၣ်အံၤ အဲၣ်ယဟိဝၤယွၤအဃိ လၢခံန့ၣ်​ အဝဲသ့ၣ်​ ဆီတလဲအသး န့ၢ်ဝဲလီၤ. အဝဲသ့ၣ်​ သ့ၣ်ညါဝဲလၢ အဝဲသ့ၣ်​ ဟ့ၣ်လုၢ်ထီၣ်အသးဆူ ကစၢ်ယွၤအအိၣ်​ ဒီးတမ့ၢ်လၢ တၢ်မၤ, မံၤလၤသၣ်ကပီၤ မ့တမ့ၢ် မူဒါအအိၣ်ဘၣ်. (ကလီးစဲ ၃:၂၃) ပဒီပုၢ်ဝဲၢ်မုၣ်ခွါတဖၣ်အံၤ မ့ၢ်ဒိးန့ၢ်ဘၣ်​ မူဒါဒ်လဲၣ်ဂ့ၤဒ်လဲၣ်ဂ့ၤ အဝဲသ့ၣ်​ ဆဲးမၤယဟိဝၤယွၤအတၢ်မၤ လၢတၢ်ဆီၣ်လီၤသးအပူၤလီၤ. ဒီးပဒီပုၢ်ဝဲၢ်မုၣ်ခွါတဖၣ်အံၤ သ့ၣ်ညါဝဲလၢ ကစၢ်ယွၤ သးအိၣ်အဝဲသ့ၣ်အဃိ အဝဲသ့ၣ်ပာ်ထီၣ်​ ‘ကယဲၢ်အတၢ်ဘၣ်ယိၣ်ဘၣ်ဘီ’ လၢကစၢ်ယွၤ “အလိၤခဲလၢာ်” လီၤ.—၁ ပ့းတရူး ၅:၆, ၇.

၁၇. ဘၣ်မနုၤအဃိ ပစံးဘျုးဘၣ်​ ကစၢ်ယွၤ ခီဖျိလၢ အဟ့ၣ်ဂံၢ်ဟ့ၣ်ဘါပှၤလၢ ပကအိၣ်ဒီး တၢ်ဆီၣ်လီၤသးအဃိန့ၣ်လဲၣ်.

^၁၇ ကစၢ်ယွၤ အကလုၢ်ကထါ ဟ့ၣ်ဂံၢ်ဟ့ၣ်ဘါပှၤလၢ ပကအိၣ်ဒီးတၢ်ဆီၣ်လီၤသးအဃိ ပစံးဘျုးဘၣ်အီၤ ဒိၣ်မးလီၤ. ပမ့ၢ်မၤအါထီၣ်​ တၢ်ဂ့ၤတၢ်ဝါအံၤန့ၣ်​ ပကဒိးန့ၢ်ဘၣ်အဘျုး ဒီးပှၤဂၤစ့ၢ်ကီး ကဒိးန့ၢ်ဘၣ်အဘျုးလီၤ. ဒီးပလဲၤခီဖျိ တၢ်ကီတၢ်ခဲတဖၣ်စ့ၢ်ကီး ကန့ၢ်အါထီၣ်လီၤ. တကးဒံးဘၣ်​ ပကဘူးထီၣ်ဒီး ပပၢ်လၢမူခိၣ်န့ၣ်လီၤ. ပသ့ၣ်ညါဘၣ်လၢ ကစၢ်ယွၤမ့ၢ် “ပှၤလၢအထီၣ်ထီ, ဒီးအိၣ်ဝဲထီၣ်ထီ” သနာ်က့ အဝဲပာ်လုၢ်ပာ်ပှ့ၤ ဒီးအဲၣ်အခ့အပှၤလၢ အအိၣ်ဒီး တၢ်ဆီၣ်လီၤသးအဃိ ပသးခုဒိၣ်မးလီၤ.—ယၡါယၤ ၅၇:၁၅.