ဖဲစီၤယၤကိာ် သးပှၢ်ထီၣ်အဆၢကတီၢ်န့ၣ်​ စီၤယိၤသးအိၣ်ဖျဲၣ်ထီၣ်ဝဲ. အဝဲၢ်တဖၣ်ထံၣ်ဘၣ်ဝဲလၢ အပၢ်အဲၣ်ဝဲ စီၤယိၤသးဒိၣ်ကတၢၢ်. မ့ၢ်နဆိကမိၣ်လၢ စီၤယိၤသးအဝဲၢ်တဖၣ်​ အသးကမၤအသးဒ်လဲၣ်. အဝဲသ့ၣ်​ သးက့ၣ်ဒီးသးဟ့ဝဲစီၤယိၤသး. ဒီးဖဲစီၤယိၤသးမံမီၢ်ဝဲ တၢ်မံမီၢ်လၢအလီၤဆီအခါ အဝဲတဲဘၣ်ဝဲ အဒီပုၢ်ဝဲၢ်တဖၣ်​ ဘၣ်ဃးဒီး အတၢ်မံမီၢ်. ဒီးအဒီပုၢ်ဝဲၢ်တဖၣ်​ ဆိကမိၣ်ဝဲလၢ မုၢ်ကအိၣ်ဝဲတနံၤန့ၣ်​ အဝဲသ့ၣ်​ ကဘၣ်ထိၣ်လီၤပှီၤအသး လၢအပုၢ်စီၤယိၤသးအမဲာ်ညါ. အဃိ အဝဲသ့ၣ်​ သးဟ့ဝဲစီၤယိၤသး ဒိၣ်န့ၢ်ဒံးလၢညါ.

ဘၣ်တနံၤ စီၤယိၤသးအဝဲၢ်ခွါတဖၣ်​ လဲၤကွၢ်ဝဲသိလၢအဘူးဒီး ဝ့ၢ်ၡက့ၣ်. ဒီးစီၤယၤကိာ်အဲၣ်ဒိး သ့ၣ်ညါဝဲလၢ အဝဲသ့ၣ်အတၢ်အိၣ်သး အိၣ်ဒ်လဲၣ်. အဃိ အဝဲမၢအဖိခွါစီၤယိၤသး လဲၤကွၢ်ဝဲ. အဝဲၢ်တဖၣ်​ ထံၣ်စိစီၤယိၤသးလၢအယံၤဒီး တဲလိာ်အသးလၢ ‘တၢ်မံမီၢ်ကစၢ်ဟဲလံ, ပကမၤသံအီၤ.’ အဝဲသ့ၣ်​ ဖီၣ်ဝဲစီၤယိၤသး ဒီးတ့ၢ်လီၤကွံာ်အီၤလၢ တၢ်ပူၤဖးယိာ်အပူၤ. ဘၣ်ဆၣ်​ အဒီပုၢ်ဝဲၢ်တဂၤ လၢအမ့ၢ်စီၤယူဒၤန့ၣ်​ တဲဝဲလၢ ‘တဘၣ်မၤသံစီၤယိၤသးတဂ့ၤ. ပကြၢးဆါကွံာ်အီၤဒ် ကုၢ်အသိးသၢၤ.’ အဃိ အဝဲသ့ၣ်​ ဆါကွံာ်စီၤယိၤသးဆူ ပှၤပှ့ၤတၢ်ဆါတၢ်ဖိ လၢအမ့ၢ် ပှၤမံးဒယၣ်ဖိတဖၣ်​ အစုပူၤ လၢစ့အဘ့ၣ်​ ၂၀. ပှၤမံးဒယၣ်ဖိ လဲၤကိးအီၤလၢ ကီၢ်အဲၤကူပတူးအပူၤ.

ဝံၤဒီး စီၤယိၤသးအဝဲၢ်တဖၣ်​ ဘျၢလီၤဝဲစီၤယိၤသး အဆ့ကၤလၢ မဲာ်တဲးလဲးတဒုအသွံၣ်ကျါ ဒီးက့ၤစိာ်ဝဲလၢ အပၢ်အအိၣ်. ဒီးအဝဲသ့ၣ်​ တဲဘၣ်အပၢ်လၢ ‘ဆ့ကၤတဘ့ၣ်အံၤ မ့ၢ်စီၤယိၤသးအတၢ်, တမ့ၢ်ဧါ.’ ဖဲစီၤယၤကိာ်ထံၣ်ဝဲအခါ အဝဲဆိကမိၣ်ဝဲလၢ ဆၣ်ဖိကီၢ်ဖိအမံၤတဒု မၤသံကွံာ်စီၤယိၤသးလံ. စီၤယၤကိာ် သးဘၣ်ဒိဒိၣ်မး. ဒီးပှၤမၤမုာ်ထီၣ်က့ၤအီၤ တသ့နီတဂၤဘၣ်.

စီၤယိၤသး ဘၣ်ကဲကုၢ်လၢ ကီၢ်အဲၤကူပတူးလၢ ပဒိၣ်ဖးဒိၣ်​ စီၤပိၤတံၤဖၢ်အဟံၣ်ပူၤ. ဘၣ်ဆၣ်​ ယဟိဝၤယွၤ အိၣ်ဒီးစီၤယိၤသး. စီၤပိၤတံၤဖၢ် ထံၣ်ဝဲလၢ စီၤယိၤသးမ့ၢ်ပှၤမၤတၢ်ဖိလၢ အဂ့ၤတဂၤအဃိ အဝဲနာ်န့ၢ်စီၤယိၤသး. တယံာ်တမီၢ်န့ၣ်​ စီၤယိၤသး ဒိးန့ၢ်ဘၣ်မူဒါလၢ ကကွၢ်ထွဲ ကယဲၢ်တၢ်အိၣ်လၢ စီၤပိၤတံၤဖၢ် အဟံၣ်ပူၤဃီပူၤခဲလၢာ်.

စီၤပိၤတံၤဖၢ်အမါ ထံၣ်ဘၣ်ဝဲလၢ စီၤယိၤသးမ့ၢ်ပှၤလၢ အဒိၣ်တၢ်ဂ့ၤ ဒီးမ့ၢ်ပှၤလၢအဂံၢ်ဆူၣ်ဘါဆူၣ်တဂၤ. တနံၤဘၣ်တနံၤန့ၣ်​ စီၤပိၤတံၤဖၢ်အမါမၢ စီၤယိၤသးမံဃုာ်ဒီးအီၤ. မ့မ့ၢ်စီၤယိၤသးတခီ ကမၤဝဲဒ်လဲၣ်. စီၤယိၤသး တအဲၣ်ဒိးမၤဝဲဘၣ်, ဒီးတဲဘၣ်အီၤလၢ ‘ယတမၤဘၣ်. ယဟံၣ်ကစၢ်နာ်န့ၢ်ယၤ, မ့မ့ၢ်နၤန့ၣ်​ နမ့ၢ်အမါ. ယမ့ၢ်မံဃုာ်ဒီးနၤန့ၣ်​ မ့ၢ်ဒၣ်ယမၤတၢ်ဒဲးဘးလၢ ယကစၢ်ယွၤ အမဲာ်ညါစ့ၢ်ကီး.’

ဘၣ်တနံၤန့ၣ်​ စီၤပိၤတံၤဖၢ်အမါ ဂုာ်ကျဲးစၢးမၢဆူၣ်​ စီၤယိၤသးလၢ ကမံဃုာ်ဒီးအီၤ. ဒီးအဝဲ ဖ့ၣ်ထုးဝဲစီၤယိၤသး အဆ့ကၤ. ဘၣ်ဆၣ်​ စီၤယိၤသး ဃ့ၢ်ထီၣ်ကွံာ်ဝဲလၢအချ့. ဖဲစီၤပိၤတံၤဖၢ် ဟဲက့ၤလၢအဟံၣ်အခါ စီၤပိၤတံၤဖၢ်အမါ တဲလံၣ်တဲလီတၢ် ဒီးတဲဘၣ်အီၤလၢ စီၤယိၤသးမၤဆူၣ်အီၤဒ်သိး ကမံဃုာ်ဒီးအီၤ. စီၤပိၤတံၤဖၢ် သးပှံၢ်ထီၣ်တၢ် ဒီးမၢပှၤပၢနုာ် စီၤယိၤသးလၢဃိာ်ပူၤ. ဘၣ်ဆၣ်​ ယဟိဝၤယွၤ တသးပ့ၤနီၣ်​ စီၤယိၤသးဘၣ်.

ဖဲစီၤယိၤသး အိၣ်လၢဃိာ်ပူၤ အဆၢကတီၢ် အဲၤကူပတူး အစီၤပၤဖၤရိၤ မံမီၢ်ဝဲတၢ်မံမီၢ်တဖၣ်. ဘၣ်ဆၣ်​ ပှၤတဲဘၣ်အီၤ အခီပညီတဘၣ်ဝဲနီတဂၤဘၣ်. ဖဲန့ၣ်အဆၢကတီၢ် ဖၤရိၤအပျဲၢ်အဘီၣ်တဂၤ တဲဘၣ်အီၤလၢ စီၤယိၤသးတဲဖျါထီၣ်​ စီၤပၤအတၢ်မံမီၢ် အခီပညီသ့ဝဲ. တဘျီဃီန့ၣ်​ စီၤပၤဖၤရိၤမၢပှၤလဲၤ ထုးထီၣ်စီၤယိၤသးလၢ ဃိာ်ပူၤ.

စီၤပၤဖၤရိၤ သံကွၢ်စီၤယိၤသးလၢ ‘ဘၣ်ဃးဒီး ယတၢ်မံမီၢ်န့ၣ်​ နတဲပၠးယၤအခီပညီ ကသ့ဧါ.’ စီၤယိၤသးတဲဘၣ်​ ဖၤရိၤလၢ ‘နွံနံၣ်အတီၢ်ပူၤန့ၣ်​ ကီၢ်အဲၤကူပတူး ကအိၣ်ဒီး တၢ်အီၣ်တၢ်အီလၢလၢပှဲၤပှဲၤ. ဝံၤဒီးတၢ်သၣ်ဝံၤလီၤဒိ ကအိၣ်ထီၣ်ဝဲ နွံနံၣ်စ့ၢ်ကီး. အဃိ ဃုထၢထီၣ်​ ပှၤကူၣ်တၢ်သ့တဂၤလၢ ကပာ်ဖှိၣ်ဃာ်ဝဲ တၢ်အီၣ်တၢ်အီလၢ နထံဖိကီၢ်ဖိအဂီၢ်သၢၤ.’ စီၤပၤဖၤရိၤ တဲဆၢက့ၤအီၤလၢ ‘ယဃုထၢထီၣ်နၤလီၤ. နကကဲထီၣ်​ ပှၤအစိကမီၤဒိၣ်ကတၢၢ် ခံဂၤတဂၤလၢ ကီၢ်အဲၤကူပတူးအပူၤ.’ စီၤပၤဖၤရိၤ အတၢ်မံမီၢ်န့ၣ်​ စီၤယိၤသး သ့ၣ်ညါဝဲအခီပညီ သ့ဒ်လဲၣ်. မ့ၢ်လၢယဟိဝၤယွၤ မၤစၢၤအီၤအဃိ.

ဆူညါနွံနံၣ်အတီၢ်ပူၤန့ၣ်​ စီၤယိၤသးပာ်ဖှိၣ်ဝဲ တၢ်အီၣ်တၢ်အီ အါအါဂီၢ်ဂီၢ်. ဝံၤဒီး တၢ်သၣ်ဝံၤလီၤဒိ အိၣ်ထီၣ်ဝဲလၢ ဟီၣ်ခိၣ်ဒီဘ့ၣ်​ ဒ်စီၤယိၤသးတဲဆိပာ်ဝဲအသိး. ဒီးပှၤအိၣ်လၢ တၢ်လီၢ်ကိးပူၤဒဲးန့ၣ်​ ဟဲပှ့ၤတၢ်အီၣ်တၢ်အီလၢ စီၤယိၤသးအအိၣ်. စီၤယိၤသးအပၢ် စီၤယၤကိာ်နၢ်ဟူဘၣ်ဝဲလၢ ကီၢ်အဲၤကူပတူးအပူၤန့ၣ်​ တၢ်အီၣ်တၢ်အီ အိၣ်ဝဲအါအါဂီၢ်ဂီၢ်. အဃိ အဝဲမၢလီၤဝဲအဖိခွါအဂၤ ၁၀ လဲၤပှ့ၤတၢ်အီၣ်တၢ်အီလၢ ကီၢ်အဲၤကူပတူးအပူၤ.

ဖဲစီၤယၤကိာ် အဖိခွါတဖၣ်​ လဲၤဝဲဆူ စီၤယိၤသးအအိၣ်အခါ စီၤယိၤသး ကွၢ်နီၣ်အဝဲၢ်ခွါတဖၣ်​ ဘၣ်တဘျီဃီ. မ့မ့ၢ်အဝဲၢ်ခွါတဖၣ်န့ၣ်​ ကွၢ်နီၣ်ဝဲစီၤယိၤသးတဘၣ်ဘၣ်. အဝဲသ့ၣ်​ တီၤလီၤအခိၣ်လၢ စီၤယိၤသးအမဲာ်ညါ ဒ်စီၤယိၤသးမံမီၢ်တ့ၢ်ဝဲ လၢညါအသိး. ဒီးစီၤယိၤသး အဲၣ်ဒိးသ့ၣ်ညါဝဲလၢ မ့ၢ်အဝဲၢ်ခွါတဖၣ်န့ၣ်​ အိၣ်ဒီးတၢ်သူၣ်က့ၣ်သးက့ၣ်ဒံးဧါ. အဃိ စီၤယိၤသးတဲဘၣ်​ အဝဲၢ်ခွါတဖၣ်လၢ ‘သုအဲၣ်ဒိးသ့ၣ်ညါလၢ ပထံပကီၢ်အံၤ အတၢ်ဂံၢ်စၢ်ဘါစၢ် အိၣ်ဒ်လဲၣ်အဃိ သုဟဲကွၢ်ဟုၣ်တၢ်.’ အဝဲၢ်ခွါတဖၣ်​ တဲဆၢက့ၤအီၤလၢ ‘တမ့ၢ်ဘၣ်, ပအိၣ်ဟဲလၢ ကီၢ်ကနၤဧၣ်အပူၤ ဒီးပဒီပုၢ်ဝဲၢ်ခွါအိၣ်ဝဲ ၁၂ ဂၤ. လၢပဒီပုၢ်ဝဲၢ်အကျါန့ၣ်​ သံဝဲတဂၤလံ. မ့မ့ၢ်အသဒါတဂၤန့ၣ်​ အိၣ်တ့ၢ်ဒီး ပပၢ်လၢဟံၣ်.’ ဝံၤဒီး စီၤယိၤသးတဲဝဲလၢ ‘သုမ့ၢ်အဲၣ်ဒိးလၢ ယကနာ်သုတၢ်ကတိၤန့ၣ်​ ဟဲကိးသုပုၢ်သဒါဆူယအိၣ်.’ ဝံၤဒီးအဝဲၢ်ခွါတဖၣ်​ က့ၤဝဲဆူအတၢ်လီၢ်တၢ်ကျဲ.

ဖဲအဝဲသ့ၣ်ဟံၣ်ဖိဃီဖိ အတၢ်အီၣ်တၢ်အီလၢာ်ဝဲအခါ စီၤယၤကိာ်ပျဲလီၤကဒီး အဖိခွါဆူ ကီၢ်အဲၤကူပတူးအပူၤ. တဘျီအံၤ အဝဲသ့ၣ်လဲၤကိးဃုာ်ဒီး အပုၢ်သဒါ စီၤဘံၣ်ယၤမံၣ်. ဒ်သိး စီၤယိၤသးကမၤကွၢ် အဒီပုၢ်ဝဲၢ်တဖၣ်အဂီၢ် အဝဲပာ်လီၤခူသူၣ်​ အထံခွးစ့လၢ စီၤဘံၣ်ယၤမံၣ်​ အဘုသးထၢၣ်ပူၤ. ဝံၤဒီး စီၤယိၤသးတဲဝဲလၢ အဒီပုၢ်ဝဲၢ်တဖၣ်ဟုၣ်ဝဲ အထံခွးစ့. ဖဲစီၤယိၤသးအခ့အပှၤတဖၣ်​ ထံၣ်န့ၢ်ဝဲ ထံခွးစ့လၢ စီၤဘံၣ်ယၤမံၣ်​ အထၢၣ်ပူၤအခါ အဝဲၢ်ခွါတဖၣ်​ ဖုးဘၣ်အသးဖးဒိၣ်. ဒီးစီၤယိၤသးအဝဲၢ်ခွါတဖၣ်​ ဃ့ကညးအီၤလၢ အဝဲသ့ၣ်​ ကတူၢ်တၢ်စံၣ်ညီၣ်လၢ စီၤဘံၣ်ယၤမံၣ်အလီၢ်.

ခဲအံၤ စီၤယိၤသးသ့ၣ်ညါဝဲလၢ အဝဲၢ်ခွါတဖၣ်​ အတၢ်ပာ်သူၣ်ပာ်သးန့ၣ်​ ဆီတလဲဝဲလံ. စီၤယိၤသး ပၢၤအသး တန့ၢ်လၢၤဘၣ်အဃိ အဝဲဟီၣ်ဝဲ. ဒီးစီၤယိၤသး တဲဘၣ်အဝဲသ့ၣ်လၢ ‘ယမ့ၢ်သုဒီပုၢ်ဝဲၢ်ခွါ စီၤယိၤသး. မ့ၢ်ယပၢ်အိၣ်မူဒံးဧါ.’ အဃိ စီၤယိၤသး အဒီပုၢ်ဝဲၢ်တဖၣ်​ ဖုးဝဲ. ဒီးစီၤယိၤသးတဲဘၣ်​ အဒီပုၢ်ဝဲၢ်လၢ ‘တဘၣ်သးဘၣ်ဒိလၢ သုဆါလီၤကွံာ်ယၤအဃိတဂ့ၤ. ကစၢ်ယွၤ ဆှၢလီၤယၤဖဲအံၤလၢ ကမၤပူၤဖျဲး သုသးသမူအဂီၢ်. ခဲအံၤ က့ၤကိးယပၢ်ဒီး ဟဲကိးအီၤဖဲအံၤ.’

ဖဲစီၤယိၤသး အဒီပုၢ်ဝဲၢ်တဖၣ်​ က့ၤတုၤလၢဟံၣ်အခါ အဝဲသ့ၣ်​ တဲဘၣ်အပၢ်လၢ စီၤယိၤသးအဂ့ၢ်. ဝံၤဒီး လဲၤကိးဝဲအပၢ်ဆူ ကီၢ်အဲၤကူပတူးအပူၤ. စီၤယိၤသး ဘၣ်အိၣ်လီၤဖးဒီးအပၢ် ဖးယံာ်လံ. ဘၣ်ဆၣ်​ ခဲအံၤန့ၣ်​ အဝဲအိၣ်ဘၣ်ကဒါက့ၤဒီး အပၢ်တပူၤဃီ.