လၢကီၢ်ဧူးစးအပူၤ ပှၤလၢအဘူၣ်ထီၣ်ဘါထီၣ်​ ယဟိဝၤယွၤန့ၣ်​ အိၣ်ဝဲတဂၤ ဒီးအမံၤမ့ၢ် စီၤယိၤဘး. စီၤယိၤဘး မ့ၢ်ပှၤထူးပှၤတီၤတဂၤ ဒီးအဟံၣ်ဖိဃီဖိအိၣ်ဝဲအါဂၤ. စီၤယိၤဘးမ့ၢ်ပှၤလၢအသးဂ့ၤ, မၤစၢၤပှၤဖှီၣ်ဖိယာ်ဖိ, ပိာ်မုၣ်လၢ အဝၤသံတဖၣ်, ဒီးဖိသၣ်လၢ အမိၢ်အပၢ် တအိၣ်လၢၤဘၣ်တဖၣ်. ခီဖျိလၢ စီၤယိၤဘးမၤတၢ်တီတီလိၤလိၤအဃိ မ့ၢ်အကအိၣ်မူဘၣ်​ မုာ်မုာ်ခုၣ်ခုၣ်​ ထီဘိဧါ.

မုၣ်ကီၤလံၢ်ကွၢ်ဝဲ တၢ်လၢစီၤယိၤဘး မၤဝဲတဖၣ်​ ဘၣ်ဆၣ်စီၤယိၤဘး တသ့ၣ်ညါဝဲဘၣ်. ယဟိဝၤယွၤတဲဘၣ်​ မုၣ်ကီၤလံၢ်လၢ ‘နထံၣ်ယခ့ယပှၤ စီၤယိၤဘးဧါ. လၢဟီၣ်ခိၣ်ချၢန့ၣ်​ ပှၤဒ်သိးဒီးအီၤ တအိၣ်နီတဂၤဘၣ်. အဝဲ ဒိကနၣ်ယကလုၢ် ဒီးမၤတၢ်လၢအဘၣ်ထီဘိ.’ မုၣ်ကီၤလံၢ် စံးဆၢက့ၤ ကစၢ်ယွၤလၢ ‘စီၤယိၤဘး ကဒိကနၣ်နကလုၢ်သၢၤ. နဒီသဒၢအီၤ, နဆိၣ်ဂ့ၤအီၤ, နဟ့ၣ်လီၤအီၤ တၢ်လီၢ်တၢ်ကျဲ ဒီးဆၣ်ဖိကီၢ်ဖိတဖၣ်ဒီဒူၣ်. ဘၣ်ဆၣ်​ နမ့ၢ်ဟံးထီၣ်ကွံာ် တၢ်လၢအအိၣ်ဒီးအီၤ ခဲလၢာ်န့ၣ်​ အဝဲတဘူၣ်ထီၣ်ဘါထီၣ်နၤလၢၤဘၣ်.’ ယဟိဝၤယွၤ တဲဆၢက့ၤ မုၣ်ကီၤလံၢ်လၢ ‘နမၤကွၢ်စီၤယိၤဘးသ့, ဘၣ်ဆၣ်​ တဘၣ်မၤသံအီၤတဂ့ၤ.’ ဘၣ်မနုၤအဃိ ယဟိဝၤယွၤ ပျဲမုၣ်ကီၤလံၢ် မၤကွၢ်စီၤယိၤဘးလဲၣ်. ခီဖျိ ယဟိဝၤယွၤ နာ်ဝဲလၢ စီၤယိၤဘး ကတီဒီးအီၤ တုၤလၢအကတၢၢ်အဃိ.

မုၣ်ကီၤလံၢ် စးထီၣ်မၤကွၢ်ဝဲ စီၤယိၤဘးလၢ တၢ်နးတၢ်ဖှီၣ်အကလုာ်ကလုာ်. အဆိကတၢၢ်န့ၣ်​ ပှၤစဘၤဖိတဖၣ်​ ဟုၣ်ဝဲစီၤယိၤဘးအကျီၢ် ဒီးကသ့ၣ်ယီၤတဖၣ်. ဝံၤဒီး မ့ၣ်အူဟဲလီၤ လၢမူခိၣ်​ ဒီးအီၣ်ကွံာ်ဝဲ စီၤယိၤဘးအသိခဲလၢာ်. လၢခံ ပှၤက့ၤစ့းဖိတဖၣ်ဟုၣ်ဝဲ စီၤယိၤဘး အကီၤလၤအူးတဖၣ်. မ့မ့ၢ် စီၤယိၤဘးအကုၢ်တဖၣ်လၢ အကွၢ်ထွဲဝဲဆၣ်ဖိကီၢ်ဖိတဖၣ်အံၤန့ၣ်​ ဘၣ်တၢ်မၤသံကွံာ် အဝဲသ့ၣ်. တကးဒံးဘၣ်​ စီၤယိၤဘးနၢ်ဟူဘၣ်ဝဲ တၢ်ကစီၣ်လၢ အလီၤသူၣ်အုးသးအုး အဒိၣ်ကတၢၢ်တခါ. ဖဲစီၤယိၤဘး အဖိတဖၣ်​ အီၣ်သကိးတၢ်အခါန့ၣ်​ ဟံၣ်လီၤပှီၢ်ဒိးအဝဲသ့ၣ်​ ဒီးသံဝဲခဲလၢာ်. ဖဲစီၤယိၤဘးနၢ်ဟူဘၣ်ဝဲ တၢ်ဂ့ၢ်အံၤအခါ အသးဘၣ်ဒိဒိၣ်မး. ဘၣ်ဆၣ်​ စီၤယိၤဘး ဆဲးဘူၣ်ထီၣ်ဘါထီၣ်​ ယဟိဝၤယွၤ.

မုၣ်ကီၤလံၢ်အဲၣ်ဒိးဝဲလၢ စီၤယိၤဘး ကတူၢ်ဘၣ်တၢ် အါန့ၢ်ဒံးအလီၢ်. အဃိ မုၣ်ကီၤလံၢ် ဒုးလီၤတၢ်ဝ့အၢလၢ စီၤယိၤဘးအလိၤ ဒီဂၤညါ, ဒီးစီၤယိၤဘး အလိၤဆါဒိၣ်မး. ဘၣ်မနုၤ တၢ်သ့ၣ်တဖၣ်အံၤ ဟဲကဲထီၣ်အသးဒီးအီၤလဲၣ်န့ၣ်​ စီၤယိၤဘး တသ့ၣ်ညါဝဲဘၣ်. ဘၣ်ဆၣ်​ အဝဲဆဲးဘူၣ်ထီၣ်ဘါထီၣ်ဒံး ယဟိဝၤယွၤ. မ့ၢ်လၢ ကစၢ်ယွၤထံၣ်စီၤယိၤဘး အတၢ်သးတီအဃိ ကစၢ်ယွၤ ဘၣ်သူၣ်ဘၣ်သးအီၤ ဒိၣ်မး.

လၢခံ မုၣ်ကီၤလံၢ် ပျဲလီၤပှၤသၢဂၤလၢ ကဟဲမၤကွၢ် စီၤယိၤဘး. အဝဲသ့ၣ်​ တဲဘၣ်စီၤယိၤဘးလၢ ‘နမၤဘၣ်တၢ်ဒဲးဘး ဒီးပာ်ခူသူၣ်အီၤအဃိ ကစၢ်ယွၤစံၣ်ညီၣ်နၤ.’ စီၤယိၤဘးတဲဆၢက့ၤ အဝဲသ့ၣ်လၢ ‘ယတမၤကမၣ်ဘၣ်တၢ် နီတမံၤဘၣ်.’ ဘၣ်ဆၣ်လၢခံ စီၤယိၤဘး စးထီၣ်ဆိကမိၣ်ဝဲလၢ ယဟိဝၤယွၤ ဒုးအိၣ်ထီၣ်ဝဲ တၢ်ကီတၢ်ခဲတဖၣ်အံၤ. အဃိ စီၤယိၤဘးတဲဝဲလၢ ကစၢ်ယွၤ မၤဝဲဒ်အံၤန့ၣ်​ တကြၢးဝဲဘၣ်ဝဲဘၣ်.

ဖဲအဝဲသ့ၣ်​ တဲသကိးတၢ်အခါ ပှၤသးစၢ်တဂၤ လၢအမံၤမ့ၢ် စီၤအလံဟူၤန့ၣ်​ ဒိကနၣ်ဝဲ လီၤတံၢ်လီၤဆဲး. ဝံၤဒီး စီၤအလံဟူၤ တဲဝဲလၢ ‘သုတဲတၢ်န့ၣ်​ တဘၣ်နီတဂၤဘၣ်. ယဟိဝၤယွၤ အတၢ်ဖံးတၢ်မၤန့ၣ်​ ပနၢ်ပၢၢ်အီၤ တလၢာ်ဘၣ်. ကစၢ်ယွၤ တမၤတၢ်အၢတၢ်သီ နီတဘျီဘၣ်. ကစၢ်ယွၤ ထံၣ်တၢ်ခဲလၢာ် ဒီးမၤစၢၤပှၤလၢ အအိၣ်ဒီးတၢ်ကီတၢ်ခဲတဖၣ်.’

ဝံၤဒီး ယဟိဝၤယွၤတဲတၢ်ဒီး စီၤယိၤဘး. ကစၢ်ယွၤတဲဘၣ်အီၤလၢ ‘ဖဲယတ့လီၤမူခိၣ်​ ဒီးဟီၣ်ခိၣ်အခါန့ၣ်​ မ့ၢ်နအိၣ်ဖဲလဲၣ်. ဘၣ်မနုၤအဃိ နတဲလၢယမၤတၢ် တကြၢးဝဲဘၣ်ဝဲလဲၣ်. နတဲဒ်န့ၣ်​ ဘၣ်ဆၣ်​ နတသ့ၣ်ညါတၢ်လၢ အဟဲကဲထီၣ်အသး နီၢ်ကီၢ်ဘၣ်.’ စီၤယိၤဘး အၢၣ်လီၤအတၢ်ကမၣ်​ ဒီးတဲဝဲလၢ ‘ယတဲကမၣ်ဘၣ်နၤလံ. လၢညါယနၢ်ဟူဘၣ်​ နဂ့ၢ်နကျိၤဘၣ်ဆၣ်​ ခဲအံၤ ယသ့ၣ်ညါနၤ နီၢ်ကီၢ်လံ. တၢ်လၢနမၤတသ့ဘၣ်န့ၣ်​ တအိၣ်နီတမံၤဘၣ်. ယတဲကမၣ်အဃိ ယပီၢ်ယၢ်လီၤက့ၤယသး.’

ဖဲစီၤယိၤဘး ဘၣ်တၢ်မၤကွၢ်အီၤဝံၤ အလီၢ်ခံ ယဟိဝၤယွၤ မၤဘျါက့ၤ စီၤယိၤဘး အတၢ်ဆူးတၢ်ဆါ ဒီးဟ့ၣ်လီၤက့ၤအီၤ တၢ်ထူးတၢ်တီၤ အါန့ၢ်ဒံးလၢညါ. ဒီးစီၤယိၤဘး ဆဲးအိၣ်မူဘၣ်ဒံးဝဲဖးယံာ် ဒီးအိၣ်ဘၣ်ဝဲမုာ်မုာ်ခုၣ်ခုၣ်. ဖဲစီၤယိၤဘးထံၣ်ဘၣ်​ တၢ်ကီတၢ်ခဲဖးဒိၣ်အခါ အဝဲဆဲးဘူၣ်ထီၣ်ဘါထီၣ်​ ယဟိဝၤယွၤအဃိ ကစၢ်ယွၤဆိၣ်ဂ့ၤအီၤ. ဖဲနထံၣ်ဘၣ်​ တၢ်ကီတၢ်ခဲအခါ မ့ၢ်နကကွၢ်လိ စီၤယိၤဘးဒီး ဆဲးဘူၣ်ထီၣ်ဘါထီၣ်​ ယဟိဝၤယွၤဒံးဧါ.

လၢကီၢ်အဲၤကူပတူးအပူၤ စီၤယၤကိာ် အဟံၣ်ဖိဃီဖိန့ၣ်​ ဘၣ်တၢ်သ့ၣ်ညါ အဝဲသ့ၣ်လၢ ပှၤအံၣ်စရ့လးဖိ. ဖဲစီၤယၤကိာ် ဒီးစီၤယိၤသး သံဝံၤအလီၢ်ခံ စီၤပၤဖၤရိၤလၢအသီတဂၤ စးထီၣ်ပၢတၢ်. စီၤပၤတဂၤအံၤ ဘၣ်ယိၣ်ဝဲလၢ ပှၤအံၣ်စရ့လးဖိတဖၣ်​ ကဒိၣ်စိလၢ ပှၤအဲၤကူပတူးဖိတဖၣ်​ အဖီခိၣ်. အဃိ စီၤပၤဖၤရိၤဒုးကဲထီၣ်​ ပှၤအံၣ်စရ့လးဖိတဖၣ်လၢကုၢ်. ဒီးစီၤပၤမၢဆူၣ်ပှၤအံၣ်စရ့လးဖိတဖၣ်​ လၢကတ့အူးခဲ ဒီးမၢအဝဲသ့ၣ်​ မၤတၢ်လၢ စံာ်ပျီပူၤဆူၣ်ဆူၣ်. ပှၤအဲၤကူပတူးဖိတဖၣ်​ မၢဝဲပှၤအံၣ်စရ့လးဖိ မၤတၢ်မၤ ဒံးယံာ်ဒံးဆူၣ်ထီၣ်ဝဲ ဘၣ်ဆၣ်​ ပှၤအံၣ်စရ့လးဖိတဖၣ်​ အနီၣ်ဂံၢ် ဒံးအါထီၣ်ဝဲ. ခီဖျိလၢ စီၤပၤဖၤရိၤ တအဲၣ်ဒိးဝဲလၢ ပှၤအံၣ်စရ့လးဖိတဖၣ်​ အနီၣ်ဂံၢ် ကအါထီၣ်ဝဲအဃိ အဝဲဟ့ၣ်လီၤတၢ်ကလုၢ်လၢ ပှၤကမၤသံကွံာ် ပှၤအံၣ်စရ့လးအဖိပိာ်ခွါလၢ အဟဲအိၣ်ဖျဲၣ်ထီၣ်သီသီခဲလၢာ်. ပှၤအံၣ်စရ့လးဖိတဖၣ်​ ကပျံၤတၢ်ထဲလဲၣ်န့ၣ်​ နဆိကမိၣ်ကွၢ်သ့ဝဲ.

ပှၤအံၣ်စရ့လးမုၣ်တဂၤ အမံၤလၢနီၢ်ယိကဘ့ၣ်န့ၣ်​ အိၣ်ဖျဲၣ်ထီၣ်ဝဲအဖိခွါလၢ အလီၤအဲၣ်လီၤကွံတဂၤ. မ့ၢ်လၢ နီၢ်ယိကဘ့ၣ်​ အဲၣ်ဒိးဒီသဒၢ အဖိခွါအဃိ ပာ်လီၤအီၤလၢချံဖိတဘ့ၣ်အပူၤ ဒီးလဲၤပာ်ခူသူၣ်ဝဲလၢ ထံကျိနံၤလါအပူၤ. ဖိသၣ်အနီလၢ အမံၤမ့ၢ် နီၢ်မံးရယၣ်​ ခိးကွၢ်ဝဲ တၢ်ကမၤအသးဒီး အပုၢ်ဒ်လဲၣ်.

ဖဲဖၤရိၤအဖိမုၣ်ဟဲလုၢ်ထံလၢ ထံကျိပူၤအခါ အဝဲထံၣ်ဘၣ်ဝဲ ချံဖိတဘ့ၣ်. လၢချံဖိအပူၤန့ၣ်​ အဝဲထံၣ်ဝဲလၢ ဖိသၣ်ဟီၣ်ဝဲအဃိ အဝဲသးကညီၤဘၣ်အီၤ. နီၢ်မံးရယၣ်သံကွၢ် ဖၤရိၤအဖိမုၣ်လၢ ‘မ့ၢ်ယကဘၣ်လဲၤကိးန့ၢ်နၤ ပိာ်မုၣ်လၢ ကဒုးအီၣ်အီၤအနုၢ်အဂီၢ်ဧါ.’ ဖဲဖၤရိၤအဖိမုၣ်​ အၢၣ်လီၤအီၤအခါ နီၢ်မံးရယၣ်​ က့ၤကိးန့ၢ်ဝဲ အမိၢ်နီၢ်ယိကဘ့ၣ်. ဖၤရိၤအဖိမုၣ်တဲဘၣ်​ နီၢ်ယိကဘ့ၣ်လၢ ‘က့ၤကွၢ်ဒိၣ်ထီၣ်​ ဖိသၣ်အံၤလၢယဂီၢ် ဒီးယကဟ့ၣ်လီၤနၤစ့.’

ဖဲဖိသၣ်ပိာ်ခွါ ဒိၣ်ထီၣ်ဝဲအခါ နီၢ်ယိကဘ့ၣ်​ လဲၤဆှၢအီၤဆူ စီၤပၤဖၤရိၤ အဖိမုၣ်အအိၣ်. စီၤပၤအဖိမုၣ်​ ယုၢ်န့ၢ်အမံၤလၢ စီၤမိၤၡ့ ဒီးလုၢ်ဒိၣ်ထီၣ်က့ၤအီၤ ဒ်အနီၢ်ကစၢ်အဖိခွါ. စီၤမိၤၡ့ဒိၣ်ထီၣ်​ ဒ်စီၤပၤအဖိခွါတဂၤအသိး ဒီးကယဲၢ်တၢ်လၢ အသးလီဝဲခဲလၢာ်န့ၣ်​ ဒိးန့ၢ်ဘၣ်ဝဲသ့. ဘၣ်ဆၣ်​ စီၤမိၤၡ့ တသးပ့ၤနီၣ်​ ယဟိဝၤယွၤ နီတဘျီဘၣ်. စီၤမိၤၡ့သ့ၣ်ညါလီၤအသးလၢ အတမ့ၢ်ပှၤအဲၤကူပတူးဖိဘၣ်, အဝဲမ့ၢ် ပှၤအံၣ်စရ့လးဖိတဂၤ. ဒီးစီၤမိၤၡ့ ဃုထၢဝဲလၢ အကမၤယဟိဝၤယွၤ အတၢ်မၤ.

ဖဲစီၤမိၤၡ့အိၣ်အနံၣ်​ ၄၀ အခါ အဝဲဆၢတဲာ်လီၤအသးလၢ ကမၤစၢၤဝဲ အပှၤကလုာ်. ဘၣ်တနံၤ စီၤမိၤၡ့ထံၣ်ဝဲ ပှၤအဲၤကူပတူးဖိတဂၤ တီၢ်ဝဲ ပှၤအံၣ်စရ့လးဖိတဂၤ. ဖဲန့ၣ်အခါ စီၤမိၤၡ့ တီၢ်ကဒါက့ၤ ပှၤအဲၤကူပတူးဖိတဂၤအံၤ ဒီးအဝဲသံဝဲ. ဝံၤဒီး စီၤမိၤၡ့ မၤဘၢကွံာ်အစိၣ်လၢ မဲးဖီလာ်. ဖဲစီၤပၤဖၤရိၤ သ့ၣ်ညါတၢ်ဂ့ၢ်အံၤအခါ စီၤပၤဃုမၤသံစီၤမိၤၡ့. ဘၣ်ဆၣ်​ စီၤမိၤၡ့လဲၤဃ့ၢ်ဝဲဆူ ကီၢ်မံးဒယၣ်အပူၤ. ဖဲန့ၣ်န့ၣ်​ ယဟိဝၤယွၤကွၢ်ထွဲအီၤ.