စီၤမိၤၡ့အိၣ်ဝဲလၢ ကီၢ်မံးဒယၣ်အပူၤအနံၣ်​ ၄၀. စီၤမိၤၡ့ န့ၢ်ဘၣ်အမါဖဲန့ၣ်​ ဒီးအဖိအိၣ်ဝဲ. ဘၣ်တနံၤန့ၣ်​ စီၤမိၤၡ့လဲၤကွၢ်သိလၢ အဘူးဒီးကစၢၢ်စံၤနါ. ဖဲန့ၣ်န့ၣ်​ စီၤမိၤၡ့ထံၣ်ဘၣ်ဝဲ တၢ်လီၤဆီတမံၤ. မ့ၣ်အူအီၣ်ထီၣ်ဝဲ သ့ၣ်တၤဆှုၣ်ဖိတခိၣ်. ဘၣ်ဆၣ်​ သ့ၣ်တၤဆှုၣ်ဖိတခိၣ်အံၤ တအူအီၣ်​ ဒီးတကဲထီၣ်ဝဲ ဖၣ်ဆါဘၣ်. ဖဲစီၤမိၤၡ့လဲၤသုးဘူးအသးလၢ သ့ၣ်တၤဆှုၣ်ဖိတခိၣ်အံၤ အကပၤအခါ အဝဲနၢ်ဟူဘၣ်ဝဲ တၢ်ကလုၢ်သီၣ်ထီၣ်လၢ ‘စီၤမိၤၡ့ဧၢ, တဘၣ်ဟဲဘူးထီၣ်လၢၤတဂ့ၤ. ဘ့ၣ်လီၤကွံာ် နခီၣ်ဖံး မ့ၢ်လၢနဆၢထၢၣ်လၢ တၢ်လီၢ်စီဆှံ အဖီခိၣ်အဃိ.’ ယဟိဝၤယွၤ သူဝဲမူခိၣ်ကလူးလၢ ကတဲတၢ်ဒီး စီၤမိၤၡ့.

စီၤမိၤၡ့ ပျံၤတၢ်အဃိ အဝဲကးဘၢအမဲာ်သၣ်. တၢ်ကလုၢ်တဲဘၣ်အီၤလၢ ‘ယထံၣ်ဘၣ်​ ပှၤအံၣ်စရ့လးဖိတဖၣ်​ ဘၣ်နးဘၣ်ဖှီၣ်. ယကမၤပူၤဖျဲး အဝဲသ့ၣ်လၢ ပှၤအဲၤကူပတူးဖိတဖၣ်​ အစုပူၤ ဒီးယကဒုးလဲၤ ပှၤအံၣ်စရ့လးဖိလၢ ကီၢ်လၢအဂ့ၤတဘ့ၣ်. ဒီးနကမ့ၢ်ပှၤတဂၤလၢ ကထုးထီၣ်ကွံာ် ယပှၤဂီၢ်မုၢ်လၢ ကီၢ်အဲၤကူပတူးအပူၤလီၤ.’ ကစၢ်ယွၤ တဲဘၣ်အီၤ ဒ်အံၤအဃိ စီၤမိၤၡ့ ကဖုးဘၣ်အသး.

စီၤမိၤၡ့ သံကွၢ်ကစၢ်ယွၤလၢ ‘ပှၤမ့ၢ်သံကွၢ်ယၤလၢ မတၤတဂၤဆှၢလီၤယၤလဲၣ်န့ၣ်​ ယကဘၣ်စံးဆၢက့ၤ အဝဲသ့ၣ်ဒ်လဲၣ်.’ ကစၢ်ယွၤ တဲဆၢက့ၤအီၤလၢ ‘တဲဘၣ်အဝဲသ့ၣ်လၢ ယဟိဝၤယွၤလၢအမ့ၢ် စီၤအၤဘြၤဟၣ်အယွၤ, စီၤအံၤစဲးအယွၤ ဒီးစီၤယၤကိာ်အယွၤ ဆှၢလီၤနၤ.’ ဝံၤဒီး စီၤမိၤၡ့တဲဆၢက့ၤ ကစၢ်ယွၤလၢ ‘ပှၤမ့ၢ်တဒိကနၣ်​ ယကလုၢ်န့ၣ်​ ယကဘၣ်မၤဒ်လဲၣ်.’ ယဟိဝၤယွၤ မၤဝဲတၢ်လီၤလးတခါ ဒ်သိး ကကဲထီၣ်တၢ်မၤစၢၤလၢ စီၤမိၤၡ့အဂီၢ်. ယဟိဝၤယွၤ မၢစီၤမိၤၡ့ တၢၤလီၤအနီၣ်ထိးဘိလၢ ဟီၣ်ခိၣ်လိၤ. ဝံၤဒီး နီၣ်ထိးဘိကဲထီၣ်ဂုၢ်. ဖဲစီၤမိၤၡ့ဖီၣ်ဝဲ ဂုၢ်အခံမဲၢ်အခါ ဂုၢ်အံၤကဲထီၣ်က့ၤ နီၣ်ထိးဘိ. ယဟိဝၤယွၤ တဲဘၣ်စီၤမိၤၡ့လၢ ‘ဖဲနမၤတၢ်လီၤလးအံၤအခါ ပှၤကသ့ၣ်ညါလၢယမၢလီၤနၤ.’

စီၤမိၤၡ့ တဲဘၣ်ကစၢ်ယွၤလၢ ‘ယတဲတၢ်တသ့ဘၣ်.’ ယဟိဝၤယွၤ အၢၣ်လီၤအီၤလၢ ‘ယကတဲဘၣ်နၤတၢ်လၢ နကဘၣ်တဲတဖၣ်. ဒီးယကမၢ နဒီပုၢ်ဝဲၢ်ခွါ စီၤအၤဟရိၣ်​ မၤစၢၤနၤ.’ စီၤမိၤၡ့ သ့ၣ်ညါဝဲလၢ ယဟိဝၤယွၤ အိၣ်ဒီးအီၤအဃိ အဝဲကိးထီၣ်အမါ ဒီးအဖိခွါတဖၣ်​ ဒီးက့ၤကဒါက့ၤဆူ ကီၢ်အဲၤကူပတူးအပူၤ.

ပှၤအံၣ်စရ့လးဖိတဖၣ်န့ၣ်​ တၢ်မၢအီၣ်​ အဝဲသ့ၣ်ဒ် ကုၢ်အသိး. ယဟိဝၤယွၤဆှၢလီၤ စီၤမိၤၡ့ ဒီးစီၤအၤဟရိၣ်လၢ ကတဲဘၣ်ဝဲ စီၤပၤဖၤရိၤလၢ ‘ပျၢ်လီၤကွံာ်ယပှၤဂီၢ်မုၢ် ဒ်သိး ကလဲၤဘူၣ်ထီၣ်ဘါထီၣ်ယၤလၢ ပှၢ်လၢ်ကျါ.’ စီၤပၤဖၤရိၤ ပာ်ထီၣ်ထီအသး ဒီးတဲဝဲလၢ ‘ယတကနၣ်ဃုာ်တၢ်လၢ ယဟိဝၤယွၤတဲဝဲဘၣ်. ဒီးယတပျဲလဲၤပှၤအံၣ်စရ့လးဖိစ့ၢ်ကီးဘၣ်.’ ဝံၤဒီး စီၤပၤဖၤရိၤ မၢပှၤအံၣ်စရ့လးဖိတဖၣ်​ မၤတၢ်ဆူၣ်န့ၢ်ဒံးအလီၢ်. အဃိ ယဟိဝၤယွၤ ကသိၣ်ဃီၣ်စီၤပၤဖၤရိၤ. ကစၢ်ယွၤ သိၣ်ဃီၣ်အီၤဒ်လဲၣ်န့ၣ်​ မ့ၢ်နသ့ၣ်ညါဧါ. ကစၢ်ယွၤ ဒုးလီၤဝဲတၢ်နးတၢ်ဖှီၣ်အခါ ၁၀ လၢကီၢ်အဲၤကူပတူး အပူၤ. ယဟိဝၤယွၤ တဲဘၣ်စီၤမိၤၡ့လၢ ‘စီၤပၤဖၤရိၤတဒိကနၣ်ယကလုၢ်ဘၣ်. ခဲမုၢ်ဆ့ၣ်ဂီၤခီန့ၣ်​ စီၤပၤဖၤရိၤ ကလဲၤလၢ ထံကျိနံၤလါအကပၤ. လဲၤဆူအအိၣ်​ ဒီးတဲဘၣ်အီၤလၢ မ့ၢ်လၢနတပျဲလဲၤ ယပှၤဂီၢ်မုၢ်အဃိ ထံလၢအိၣ်လၢ ထံကျိနံၤလါအပူၤအံၤ ကကဲထီၣ်တၢ်သွံၣ်ခဲလၢာ်.’ စီၤမိၤၡ့ ဒိကနၣ်ကစၢ်ယွၤ အကလုၢ် ဒီးလဲၤဝဲဆူ စီၤပၤဖၤရိၤအအိၣ်. ဒီးဖဲစီၤအၤဟရိၣ်တီၢ်ဝဲ ထံကျိနံၤလါ လၢအနီၣ်ထိးဘိအခါ စီၤပၤဖၤရိၤထံၣ်ဘၣ်ဝဲလၢ ထံကဲထီၣ်တၢ်သွံၣ်. ဒီးထံကျိအထံနၢအုၣ်ဝဲ, ညၣ်တဖၣ်လၢအိၣ်လၢ ထံကျိပူၤန့ၣ်သံဝဲ ဒီးပှၤအီထံလၢ ထံကျိအံၤအပူၤ တသ့လၢၤဘၣ်. ဘၣ်ဆၣ်​ စီၤပၤဖၤရိၤတပျဲလဲၤပှၤအံၣ်စရ့လးဖိတဖၣ်လၢ ကလဲၤဘူၣ်ထီၣ်ဘါထီၣ်​ ယဟိဝၤယွၤဒံးဘၣ်.

ပူၤကွံာ်နွံသီ ဝံၤအလီၢ်ခံ ယဟိဝၤယွၤ ဆှၢလီၤက့ၤစီၤမိၤၡ့ဆူ စီၤပၤဖၤရိၤအအိၣ်​ ဒီးတဲဘၣ်အီၤလၢ ‘နမ့ၢ်တပျဲလဲၤ ယပှၤဂီၢ်မုၢ်န့ၣ်​ ဒ့ၣ်ကအိၣ်ထီၣ်ဝဲလၢ ကီၢ်အဲၤကူပတူးအပူၤဝးဝး.’ ဒီးစီၤအၤဟရိၣ်​ ယူာ်ထီၣ်အနီၣ်ထိးဘိ ဒီးဒ့ၣ်တဖၣ်​ အိၣ်ထီၣ်ဝဲလၢ ထံကီၢ်ဒီတဘ့ၣ်အပူၤ. ဒ့ၣ်တဖၣ်​ အိၣ်ဝဲလၢ ပှၤအဲၤကူပတူးဖိ အဟံၣ်ပူၤ, လၢအလီၢ်မံခိၣ်​ ဒီးလၢအလီခီပူၤ. ဒ့ၣ်တဖၣ်အိၣ်လၢ တၢ်လီၢ်ကိးပူၤဒဲး. ဒီးစီၤပၤဖၤရိၤမၢ စီၤမိၤၡ့ဃ့ကညး ယဟိဝၤယွၤဒ်သိး ကမၤလီၤမၢ်ကွံာ် ဒ့ၣ်တဖၣ်အံၤအဂီၢ်. စီၤပၤဖၤရိၤအၢၣ်လီၤဝဲလၢ ကပျဲလဲၤပှၤအံၣ်စရ့လးဖိလၢ ကလဲၤဘူၣ်ထီၣ်ဘါထီၣ်​ ကစၢ်ယွၤ. အဃိ ယဟိဝၤယွၤ မၤပတုာ်ဝဲ တၢ်နးတၢ်ဖှီၣ်အံၤ. ဒ့ၣ်တဖၣ်သံကွံာ်ဝဲဒီး ပှၤပာ်ဖှိၣ်ထီၣ်ဒ့ၣ်တဖၣ်အံၤန့ၢ်ဝဲ တပူၣ်ဘၣ်တပူၣ်. ဒီးကီၢ်အဲၤကူပတူး နၢအုၣ်ဝဲ ဒီကီၢ်ညါ. ဘၣ်ဆၣ်​ စီၤပၤဖၤရိၤဆီတလဲအသး ဒီးတပျဲလဲၤ ပှၤအံၣ်စရ့လးဖိဒံးဘၣ်.

ဝံၤဒီး ယဟိဝၤယွၤတဲဘၣ်​ စီၤမိၤၡ့လၢ ‘မၢစီၤအၤဟရိၣ်​ တီၢ်လီၤဟီၣ်ခိၣ်လၢ အနီၣ်ထိးဘိ ဒီးဟီၣ်ခိၣ်ကမူၣ်​ ကဲထီၣ်လၢ ဃးသူလီၤ.’ ဖဲစီၤအၤဟရိၣ်​ တီၢ်ဝဲဟီၣ်ခိၣ်ဝံၤအလီၢ်ခံ တၢ်ဖိဃၢ်အိၣ်ထီၣ်ဝဲလၢ တၢ်လီၢ်ကိးပူၤဒဲး. စီၤပၤဖၤရိၤ အခ့အပှၤတနီၤ တဲဘၣ်အီၤလၢ ‘တၢ်နးတၢ်ဖှီၣ်အံၤ ဟဲလၢကစၢ်ယွၤအအိၣ်.’ ဘၣ်ဆၣ်သနာ်က့ စီၤပၤဖၤရိၤတပျဲလဲၤ ပှၤအံၣ်စရ့လးဖိဒံးဘၣ်.