ပှၤအံၣ်စရ့လးဖိတဖၣ်​ ဟးထီၣ်ကွံာ်ဝဲလၢ ကစၢၢ်စံၤနါ ဒီးလဲၤခီဂာ်ဝဲ ပှၢ်မုၢ်ကနၢပၤရၣ်. အဝဲသ့ၣ်​ လဲၤဝဲဆူ တၢ်လီၢ်ကိးဝဲအမံၤလၢ ကၤဒ့ၣ်. ဖဲန့ၣ်န့ၣ်​ ယဟိဝၤယွၤ တဲဘၣ်စီၤမိၤၡ့လၢ ‘ဃုထၢထီၣ်​ ပှၤကွၢ်ဟုၣ်တၢ် ၁၂ ဂၤလၢ ပှၤအံၣ်စရ့လးဖိ တဒူၣ်စုာ်စုာ်အကျါ ဒီးမၢအဝဲသ့ၣ်​ လဲၤကွၢ်ဟုၣ်​ ကီၢ်ကနၤဧၣ်. အဝဲသ့ၣ်​ ကဘၣ်လဲၤကွၢ်ဟုၣ်ဝဲ ကီၢ်ကနၤဧၣ်လၢ ယကဟ့ၣ်လီၤ ပှၤအံၣ်စရ့လးဖိ.’ အဃိ စီၤမိၤၡ့ ဃုထၢထီၣ်ဝဲ ပှၤ ၁၂ ဂၤ ဒီးတဲဘၣ်​ အဝဲသ့ၣ်လၢ ‘လဲၤဆူကီၢ်ကနၤဧၣ်​ ဒီးဃုသ့ၣ်ညါ ပှၤအိၣ်ဖဲန့ၣ်တဖၣ်​ အတၢ်အိၣ်သး. ဒီးတၢ်လီၢ်အဝဲန့ၣ်​ မ့ၢ်အဂ့ၤလၢ တၢ်သူၣ်အီၣ်ဖျးအီၣ်တၢ် အဂီၢ်ဧါ. ဒီးပှၤအိၣ်ဖဲန့ၣ်တဖၣ်​ မ့ၢ်ပှၤလၢ အဂံၢ်အဘါဆူၣ်​ မ့တမ့ၢ် အဂံၢ်စၢ်ဘါစၢ်ဧါ. ဒီးမ့ၢ်အဝဲသ့ၣ်​ အိၣ်လၢဒဲ မ့တမ့ၢ် လၢဝ့ၢ်ပူၤစ့ၢ်ကီးဧါ.’ ပှၤကွၢ်ဟုၣ်တၢ် ၁၂ ဂၤန့ၣ်​ ပၣ်ဃုာ်ဝဲဒီး စီၤယိၤၡူဒီးစီၤကၤလ့း. အဝဲသ့ၣ်လဲၤဝဲလၢ ကီၢ်ကနၤဧၣ်.

ဖဲအသီ ၄၀ ပူၤကွံာ်ဝံၤအလီၢ်ခံ ပှၤကွၢ်ဟုၣ်တၢ်တဖၣ်​ ဟဲက့ၤဝဲ. အဝဲသ့ၣ်​ ဟဲက့ၤစိာ်ဝဲ ချၢၣ်ဒၢသၣ်, သလဲသၣ်​ ဒီးစပံးသၣ်တဖၣ်. ပှၤကွၢ်ဟုၣ်တၢ်တဖၣ်အံၤ တဲဝဲလၢ ‘ကီၢ်ကနၤဧၣ်န့ၣ်​ မ့ၢ်ဝဲတၢ်လီၢ်လၢအဂ့ၤ. ဘၣ်ဆၣ်​ ပှၤအိၣ်ဖဲန့ၣ်တဖၣ်​ အဂံၢ်ဆူၣ်ဘါဆူၣ်ဝဲ ဒီးအဝဲသ့ၣ်​ အဝ့ၢ်ခိၣ်ဒူန့ၣ်​ ထီဝဲ.’ ဝံၤဒီး စီၤကၤလ့း တဲဝဲလၢ ‘ပဒုးနၢၤအဝဲသ့ၣ်သ့ ဒီးပကလဲၤဒုးအဝဲသ့ၣ်​ ခဲအံၤလီၤ.’ ဘၣ်မနုၤအဃိ စီၤကၤလ့း တဲဝဲဒ်အံၤလဲၣ်. ခီဖျိလၢ အဝဲဒီးစီၤယိၤၡူန့ၣ်​ အိၣ်ဒီးတၢ်နာ်ယဟိဝၤယွၤအဃိ. မ့မ့ၢ်ပှၤကွၢ်ဟုၣ်တၢ် အဂၤတဆံန့ၣ်​ တဲဝဲလၢ ‘ပတကြၢးလဲၤဒုး ပှၤကနၤဧၣ်ဖိဘၣ်. အဝဲသ့ၣ်​ မ့ၢ်ပှၤဖးဒိၣ်ဖးထီ လီၤဂာ်ဒ်သိးဒီး ဒိးတကါတဖၣ်. မ့မ့ၢ်ပဝဲန့ၣ်​ ပလီၤဂာ်ဒ်ဒွဲၣ်ဧိၤတြၤဧိၤလၢ အဝဲသ့ၣ်​ အခီၣ်ထံး.’

ဖဲပှၤအံၣ်စရ့လးဖိတဖၣ်​ နၢ်ဟူဘၣ်​ တၢ်ကစီၣ်အံၤအခါ အဝဲသ့ၣ်​ သးဟးဂီၤဝဲ. အဝဲသ့ၣ်​ စးထီၣ်ကဒူးကဒ့ၣ်တၢ် ဒီးတဲလိာ်အသးလၢ ‘ပကဃုထၢထီၣ်​ ခိၣ်နၢ်လၢ အသီတဂၤ ဒီးပကက့ၤဆူ ကီၢ်အဲၤကူပတူးအပူၤ. ဘၣ်မနုၤအဃိ ပဘၣ်လဲၤဒိးသံလီၤပသးလၢ တၢ်လီၢ်ဖဲန့ၣ်လဲၣ်.’ စီၤယိၤၡူ ဒီးစီၤကၤလ့း တဲဝဲလၢ ‘ဒိကနၣ်ယဟိဝၤယွၤ အကလုၢ် ဒီးတဘၣ်ပျံၤတၢ်တဂ့ၤ. ယဟိဝၤယွၤ ကဒီသဒၢပှၤ.’ ဘၣ်ဆၣ်​ ပှၤအံၣ်စရ့လးဖိတဖၣ်​ တဒိကနၣ်​ အဝဲသ့ၣ်​ အကလုၢ်ဘၣ်. လၢတၢ်န့ၣ်အလီၢ် ပှၤအံၣ်စရ့လးဖိတဖၣ်​ အဲၣ်ဒိးမၤသံဝဲ စီၤယိၤၡူဒီးစီၤကၤလ့း.

ယဟိဝၤယွၤ မၤဝဲဒ်လဲၣ်. အဝဲတဲဘၣ်စီၤမိၤၡ့လၢ ‘ယမၤန့ၢ်တၢ်လၢ ပှၤအံၣ်စရ့လးဖိတဖၣ်​ အဂီၢ်အါမး ဘၣ်ဆၣ်​ အဝဲသ့ၣ်​ တဒိကနၣ်ယကလုၢ်ဒံးဘၣ်. အဃိ အဝဲသ့ၣ်​ ကဘၣ်အိၣ်လၢ ပှၢ်မုၢ်ကနၢအပူၤအနံၣ်​ ၄၀ ဒီးအဝဲသ့ၣ်ကသံဝဲဖဲန့ၣ်. ထဲဒၣ်အဝဲသ့ၣ်အဖိအလံၤ, စီၤယိၤၡူဒီးစီၤကၤလ့းန့ၣ်​ ကလဲၤနုာ်လီၤဘၣ်ဆူ ကီၢ်တၢ်စံးပာ်အပူၤ.’

ဖဲပှၤအံၣ်စရ့လးဖိတဖၣ်​ အိၣ်လၢပှၢ်မုၢ်ကနၢအခါ စီၤကိၤရး, စီၤဒၤသၣ်, စီၤအဘံရၣ်​ ဒီးအပှၤအဂၤ ၂၅၀ န့ၣ်ထီဒါဝဲစီၤမိၤၡ့. အဝဲသ့ၣ်​ တဲဘၣ်စီၤမိၤၡ့လၢ ‘ပမၤဃုာ်နၤ တကဲလၢၤဘၣ်. ဘၣ်မနုၤအဃိ နဘၣ်ကဲပခိၣ်​ ဒီးစီၤအၤဟရိၣ်​ ဘၣ်ကဲပှၤလုၢ်တၢ်ခိၣ်​ အဒိၣ်ကတၢၢ်လဲၣ်. ကစၢ်ယွၤ တအိၣ်ဒီးသု ထဲခံဂၤဧိၤဘၣ်. ယဟိဝၤယွၤ အိၣ်ဒီးပဝဲဒၣ်ခဲလၢာ်.’ လၢတၢ်ဂ့ၢ်အံၤအဃိ ယဟိဝၤယွၤ အသးတမုာ်ဘၣ်. ကစၢ်ယွၤ ထံၣ်အဝဲသ့ၣ်ဒ် ပှၤလၢအထီဒါအီၤ.

စီၤမိၤၡ့ တဲဘၣ်စီၤကိၤရး ဒီးအပှၤတဖၣ်လၢ ‘ခဲမုၢ်ဆ့ၣ်န့ၣ်​ ဟဲလၢဒဲစီဆှံ ဒီးဟဲစိာ်ဃုာ်ဒီး သုသပၢၤမ့ၣ်အူ. ဒီးပှၤလၢယဟိဝၤယွၤ ဘၣ်အသးန့ၣ်​ အဝဲကပာ်ဖျါထီၣ်န့ၢ်ပှၤ.’

လၢခံတနံၤန့ၣ်​ စီၤကိၤရးဒီးအပှၤ ၂၅၀ လဲၤထံၣ်လိာ်အသးဒီး စီၤမိၤၡ့လၢ ဒဲစီဆှံ. ဖဲန့ၣ်န့ၣ်​ အဝဲသ့ၣ်​ လုၢ်ထီၣ်တၢ်ဆိၣ်ကဲၤနၢမူ ဒ်ပှၤလုၢ်တၢ်ဒိၣ်​ မၤဝဲအသိး. ယဟိဝၤယွၤ တဲဘၣ်စီၤမိၤၡ့ ဒီးစီၤအၤဟရိၣ်လၢ ‘သုးယံၤထီၣ်သုသးဒီး စီၤကိၤရးဒီးအပှၤ.’

စီၤကိၤရးလဲၤဆူ စီၤမိၤၡ့အအိၣ်လၢ ဒဲစီဆှံ. မ့မ့ၢ် စီၤဒၤသၣ်, စီၤအဘံရၣ်​ ဒီးအဝဲသ့ၣ်​ အဟံၣ်ဖိဃီဖိတဖၣ်န့ၣ်​ တလဲၤဝဲဘၣ်. ယဟိဝၤယွၤ တဲဘၣ်ပှၤအံၣ်စရ့လးဖိလၢ သုးယံၤထီၣ်​ သုသးဒီးစီၤကိၤရး, စီၤဒၤသၣ်​ ဒီးစီၤအဘံရၣ်အဒဲ. တဘျီဃီန့ၣ်​ ပှၤအံၣ်စရ့လးဖိတဖၣ်​ သုးယံၤထီၣ်အသးဒီး အဝဲသ့ၣ်. မ့မ့ၢ်စီၤဒၤသၣ်, စီၤအဘံရၣ်​ ဒီးအဟံၣ်ဖိဃီဖိတဖၣ်​ ဆၢထၢၣ်ဝဲလၢ အဒဲချၢ ဒီးဖဲန့ၣ်န့ၣ်​ ဟီၣ်ခိၣ်အိးထီၣ်အသး ဒီးယူၢ်လီၤကွံာ် အဝဲသ့ၣ်​ တဘျီဃီ. တကးဒံးဘၣ်​ စီၤကိၤရးဒီးအပှၤ ၂၅၀ လၢအိၣ်လၢဒဲစီဆှံန့ၣ်​ မ့ၣ်အူဟဲလီၤအီၣ်ကွံာ် အဝဲသ့ၣ်ခဲလၢာ်.

ဒီးယဟိဝၤယွၤ တဲဘၣ်စီၤမိၤၡ့လၢ ‘လၢပှၤအံၣ်စရ့လးဖိ တဒူၣ်စုာ်စုာ်အကျါန့ၣ်​ ဟံးန့ၢ်အဝဲသ့ၣ်​ အခိၣ်နၢ်တဖၣ်​ အနီၣ်ထိးဘိဒီး ကွဲးလီၤအဝဲသ့ၣ်အမံၤလၢ နီၣ်ထိးဘိအလိၤ. မ့မ့ၢ် ပှၤလ့ၤဝံဖိတဒူၣ်​ အနီၣ်ထိးဘိန့ၣ်​ ကွဲးလီၤစီၤအၤဟရိၣ်အမံၤ ဒီးလဲၤပာ် နီၣ်ထိးဘိတဖၣ်န့ၣ်လၢ ဒဲစီဆှံအပူၤ. လၢခံ ပှၤလၢ ယဃုထၢထီၣ်အီၤန့ၣ်​ အနီၣ်ထိးဘိ ကဖီထီၣ်​ ဒီးသၣ်ထီၣ်ဝဲ.’

လၢခံတနံၤန့ၣ်​ စီၤမိၤၡ့ ထုးထီၣ်နီၣ်ထိးဘိတဖၣ်​ ဒီးဒုးနဲၣ်ဖျါထီၣ်လၢ ပှၤအံၣ်စရ့လးဖိ အခိၣ်အနၢ်တဖၣ်​ အမဲာ်ညါ. စီၤအၤဟရိၣ်​ အနီၣ်ထိးဘိန့ၣ်​ ဖီထီၣ်ဒီးသၣ်ထီၣ်ဝဲ. အဃိ ယဟိဝၤယွၤ ပာ်ဂၢၢ်ပာ်ကျၢၤဝဲလၢ အဝဲဃုထၢထီၣ်ဝဲ စီၤအၤဟရိၣ်လၢ ပှၤလုၢ်တၢ်ခိၣ်​ အဒိၣ်ကတၢၢ်.