ဖဲပှၤကွၢ်ဟုၣ်တၢ်ဖိခံဂၤ လဲၤလၢဝ့ၢ်ယရံၤဃိအခါ အဝဲသ့ၣ်​ လဲၤအိၣ်ဝဲလၢ နီၢ်ရၤဃးအဟံၣ်. ဖဲယရံၤဃိ အစီၤပၤသ့ၣ်ညါဝဲအခါ အဝဲမၢလီၤဝဲ ပှၤသုးဖိတဖၣ်ဆူ နီၢ်ရၤဃးအဟံၣ်. နီၢ်ရၤဃး ပာ်ခူသူၣ်​ ပှၤကွၢ်ဟုၣ်တၢ် ခံဂၤအံၤလၢ အဟံၣ်ခိၣ်ဒီး မၢဝဲယရံၤဃိ အသုးဖိတဖၣ်​ လဲၤဃုကွၢ်အဝဲသ့ၣ်လၢ တၢ်လီၢ်အဂၤတတီၤ. ဝံၤဒီး နီၢ်ရၤဃးတဲဘၣ်ပှၤကွၢ်ဟုၣ်တၢ် ခံဂၤအံၤလၢ ‘ယမၤစၢၤသုန့ၣ်​ ခီဖျိလၢ ယသ့ၣ်ညါလၢ ယဟိဝၤယွၤ အိၣ်ဒီးသု ဒီးကဟ့ၣ်လီၤသု ထံကီၢ်တဘ့ၣ်အံၤအဃိ. ဝံသးစူၤ အၢၣ်လီၤအီလီၤယၤလၢ သုကမၤပူၤဖျဲး ယဟံၣ်ဖိဃီဖိမီၤ.’

ဒီးပှၤကွၢ်ဟုၣ်တၢ်ခံဂၤန့ၣ်​ တဲဘၣ်နီၢ်ရၤဃးလၢ ‘ပအၢၣ်လီၤအီလီၤနၤလၢ ကယဲၢ်ပှၤအိၣ်လၢ နဟံၣ်ပူၤန့ၣ်​ ကပူၤဖျဲးဝဲခဲလၢာ်. ဘၣ်ဆၣ်​ နကဘၣ်စဲၤလီၤပျံၤဂီၤတဘိ လၢနပဲတြီအချၢ. နမ့ၢ်မၤဒ်န့ၣ်န့ၣ်​ နၤဒီးနဟံၣ်ဖိဃီဖိ ကပူၤဖျဲးဝဲ.’

နီၢ်ရၤဃးစဲၤလီၤပျံၤလၢ ပဲတြီအချၢဒီးမၢဝဲ ပှၤကွၢ်ဟုၣ်တၢ်ခံဂၤအံၤ စံၣ်လီၤဝဲ. ပှၤကွၢ်ဟုၣ်တၢ်ခံဂၤအံၤ လဲၤဃ့ၢ်လၢကစၢၢ်ခိၣ်​ ဒီးအိၣ်ခူသူၣ်ဝဲ ဖဲန့ၣ်သၢသီ. ဝံၤဒီးအဝဲသ့ၣ်​ က့ၤကဒါက့ၤဆူ စီၤယိၤၡူအအိၣ်. ပှၤအံၣ်စရ့လးဖိတဖၣ်​ ခီဂာ်ဝဲ ထံကျိယၢ်ဒ့ၣ်​ ဒီးကတဲာ်ကတီၤထီၣ်အသးလၢ ကလဲၤမၤန့ၢ်ထံကီၢ်. ဝ့ၢ်ယရံၤဃိန့ၣ်​ မ့ၢ်ဝ့ၢ်အဆိကတၢၢ်တဖျၢၣ်လၢ ပှၤအံၣ်စရ့လးဖိ မၤနၢၤဝဲ. ယဟိဝၤယွၤ မၢပှၤအံၣ်စရ့လးဖိတဖၣ်​ ဟးတရံးဝ့ၢ်အံၤ တနံၤတဘျီလၢ ဃုသီအတီၢ်ပူၤ. ဘၣ်ဆၣ်​ ဖဲနွံသီတသီန့ၣ်​ ပှၤအံၣ်စရ့လးဖိတဖၣ်​ ကဘၣ်ဟးတရံးဝ့ၢ်အံၤ နွံဘျီညါ. ဝံၤဒီး ပှၤလုၢ်တၢ်ဒိၣ်တဖၣ်​ အူထီၣ်ဝဲကွဲၤ ဒီးပှၤအံၣ်စရ့လး အသုးဖိတဖၣ်န့ၣ်​ ကိးပသူထီၣ်လၢ အကလုၢ်ဖးဒိၣ်. ဒီးဝ့ၢ်ယရံၤဃိ အဝ့ၢ်ခိၣ်ဒူ လီၤပှီၢ်ဝဲတဘျီဃီ. ဘၣ်ဆၣ်​ နီၢ်ရၤဃးအဟံၣ်န့ၣ်​ တလီၤပှီၢ်ဝဲဘၣ်. မ့ၢ်လၢနီၢ်ရၤဃးအိၣ်ဒီး တၢ်နာ်ယဟိဝၤယွၤအဃိ အဝဲဒီးအဟံၣ်ဖိဃီဖိ ပူၤဖျဲးဝဲ.

ပှၤအံၣ်စရ့လးဖိတဖၣ်​ ဒုးနၢၤဝဲ ဝ့ၢ်ယရံၤဃိန့ၣ်​ ဟူထီၣ်သါလီၤလၢ ကီၢ်ကနၤဧၣ်​ ဒီကီၢ်ညါ. ကီၢ်ကနၤဧၣ်​ အစီၤပၤတဖၣ်​ ဆၢတဲာ်လီၤအသးလၢ ကဒုးတၢ်ဒီးပှၤအံၣ်စရ့လးဖိ. ဘၣ်ဆၣ်​ ပှၤကံးဘိၣ်ဖိ အတၢ်ထံၣ်န့ၣ်​ လီၤဆီဒီး ပှၤကနၤဧၣ်​ အစီၤပၤတဖၣ်​ အတၢ်ထံၣ်. ပှၤကံးဘိၣ်ဖိတဖၣ်​ လဲၤဝဲဆူ စီၤယိၤၡူအအိၣ်​ ဒီးဟဲကူကၤဝဲ တၢ်ကူတၢ်ကၤ လၢအလီၢ်လံၤ. ဒီးအဝဲသ့ၣ်​ တဲဝဲလၢ ‘ပဟဲလၢ ထံကီၢ်လၢ အယံၤတဘ့ၣ်. ဖဲသုအိၣ်လၢ ကီၢ်အဲၤကူပတူးအပူၤ ဒီးဖဲသုဒုးတၢ်ဒီး ပှၤမိၤအးဖိအခါ ယဟိဝၤယွၤမၤစၢၤသုန့ၣ်​ ပနၢ်ဟူဘၣ်လံ. အၢၣ်လီၤအီလီၤပှၤ ဒ်သိး သုသုတဒုးတၢ်ဒီးပှၤတဂ့ၤ, ဒီးပကကဲထီၣ်​ သုကုၢ်သုပှၤ.’

စီၤယိၤၡူနာ်ဝဲ ပှၤကံးဘိၣ်ဖိ အတၢ်ကတိၤ ဒီးမၤတၢ်အၢၣ်လီၤအီလီၤလၢ တဒုးတၢ်ဒီး အဝဲသ့ၣ်ဘၣ်. ပူၤကွံာ်သၢသီဒီး စီၤယိၤၡူ သ့ၣ်ညါဝဲလၢ အဝဲသ့ၣ်​ တဟဲလၢတၢ်လီၢ်လၢအယံၤဘၣ်. ပှၤကံးဘိၣ်ဖိတဖၣ်အံၤ အိၣ်ဝဲဖဲ ကီၢ်ကနၤဧၣ်အပူၤ. စီၤယိၤၡူ သံကွၢ်ဝဲ ပှၤကံးဘိၣ်ဖိလၢ ‘ဘၣ်မနုၤအဃိ သုလံၣ်အီၣ်ပှၤလဲၣ်.’ အဝဲသ့ၣ်​ တဲဆၢက့ၤလၢ ‘မ့ၢ်လၢပပျံၤတၢ်အဃိ. ပသ့ၣ်ညါလၢ ယဟိဝၤယွၤ လၢအမ့ၢ် သုကစၢ်ယွၤန့ၣ်​ ဒုးတၢ်လၢသုဂီၢ်. ဝံသးစူၤ မၤသံပှၤတဂ့ၤ.’ စီၤယိၤၡူ တီဒီးအတၢ်အၢၣ်လီၤ အဃိ တမၤသံ ပှၤကံးဘိၣ်ဖိတဖၣ်ဘၣ်.

တယံာ်တမီၢ်န့ၣ်​ ကီၢ်ကနၤဧၣ်​ အစီၤပၤယဲၢ်ဂၤ ပာ်ဖှိၣ်ထီၣ်အသးလၢ ကလဲၤဒုးဝဲ ပှၤကံးဘိၣ်ဖိတဖၣ်. လၢတၢ်န့ၣ်အဃိ စီၤယိၤၡူ ဒီးအသုးဖိတဖၣ်​ လဲၤဝဲဒီတနၤကျၢၤဆူ ပှၤကံးဘိၣ်ဖိတဖၣ်အအိၣ်​ ဒ်သိး ကဒုးစၢၤ အဝဲသ့ၣ်အဂီၢ်. တၢ်ဒုးစးထီၣ်ဝဲ လၢခံတနံၤ ဖဲဂီၤခီဂီၤဂီၤ အဆၢကတီၢ်. ခီဖျိလၢ ပှၤကနၤဧၣ်ဖိတဖၣ်​ ၡူဝဲအဃိ အသုးဖိတဖၣ်​ ဃ့ၢ်ကွံာ်ဝဲ တဂၤတပူၤတဂၤတပူၤ. ယဟိဝၤယွၤ ဒုးလီၤတဲာ်ဝဲ သူၣ်ဖးဒိၣ်တဖၣ်လၢ ပှၤကနၤဧၣ်သုးဖိတဖၣ်​ အဖီခိၣ်. ဝံၤဒီး စီၤယိၤၡူဃ့ဝဲလၢ ယဟိဝၤယွၤ ကဒုးအိၣ်ကတီၢ်မုၢ်. လၢညါန့ၣ်​ မုၢ်တအိၣ်ကတီၢ် နီတဘျီဘၣ်. ဘၣ်မနုၤအဃိ စီၤယိၤၡူ မၢယဟိဝၤယွၤ ဒုးအိၣ်ကတီၢ်မုၢ်လဲၣ်. ခီဖျိလၢ စီၤယိၤၡူနာ်ဝဲ ယဟိဝၤယွၤအဃိ. ဒီးမုၢ်အိၣ်ကတီၢ်ဝဲတုၤလီၤလၢ ပှၤအံၣ်စရ့လးဖိတဖၣ်​ ဒုးနၢၤဝဲ ကီၢ်ကနၤဧၣ်အစီၤပၤ ဒီးအသုးဖိတဖၣ်.