စီၤယိၤၡူကဲခိၣ်ကဲနၢ်လၢ ယဟိဝၤယွၤ အပှၤဂီၢ်မုၢ်အဖီခိၣ်​ အါနံၣ်အါလါ ဝံၤအလီၢ်ခံ အဝဲသံဝဲဖဲ အသးအိၣ်​ ၁၁၀ နံၣ်. ဖဲစီၤယိၤၡူ အိၣ်မူဝဲအခါ ပှၤအံၣ်စရ့လးဖိတဖၣ်​ ဘူၣ်ထီၣ်ဘါထီၣ်ဝဲ ယဟိဝၤယွၤ. ဘၣ်ဆၣ်​ ဖဲစီၤယိၤၡူသံဝံၤ အလီၢ်ခံန့ၣ်​ ပှၤအံၣ်စရ့လးဖိတဖၣ်​ စးထီၣ်ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်​ ဒ်ပှၤကနၤဧၣ်ဖိတဖၣ်အသိး. ခီဖျိလၢ ပှၤအံၣ်စရ့လးဖိတဖၣ်​ တအိၣ်မူပိာ်ထွဲဝဲ ဒ်သိးဒီး စီၤယိၤၡူအဃိ ယဟိဝၤယွၤ ဟ့ၣ်အခွဲးလၢ ပှၤကနၤဧၣ်ဖိ အစီၤပၤယၤဘံၣ်​ ကမၤနၢၤအီၣ်​ အဝဲသ့ၣ်. ဖဲန့ၣ်အဆၢကတီၢ် ပှၤအံၣ်စရ့လးဖိတဖၣ်​ ဃ့ကညးဝဲလၢ ယဟိဝၤယွၤ ကမၤစၢၤအဝဲသ့ၣ်. ဒီးယဟိဝၤယွၤ ဃုထၢထီၣ်န့ၢ် ပှၤအံၣ်စရ့လးဖိ အခိၣ်နၢ်လၢ အသီတဂၤ လၢအမံၤမ့ၢ်ဝဲစီၤဘါရး. စီၤဘါရးမၤစၢၤဝဲ ပှၤအံၣ်စရ့လးဖိတဖၣ်​ ဒ်သိး အဝဲသ့ၣ်​ ကဟဲက့ၤ ဘူၣ်ထီၣ်ဘါထီၣ်က့ၤ ယဟိဝၤယွၤအဂီၢ်.

ဝံမုၣ်လၢအမ့ၢ် နီၢ်ဒဘိရၤန့ၣ်​ မၢပှၤဟဲကိး စီၤဘါရးဆူအအိၣ်. နီၢ်ဒဘိရၤ တဲဘၣ်အီၤ တၢ်ကစီၣ်လၢ အဟဲလၢ ယဟိဝၤယွၤအအိၣ်​ ဒီးတဲဝဲလၢ ‘ကိးထီၣ်ပှၤပိာ်ခွါအဂၤ ၁၀,၀၀၀ ဒီးလဲၤဒုးတၢ်ဒီး စီၤပၤယၤဘံၣ်​ အသုးဖိတဖၣ်လၢ ထံကျိကံၡိၣ်. ဖဲန့ၣ်န့ၣ်​ နကဒုးလိာ်သးဒီး စီၤစံစရၤ လၢအမ့ၢ် စီၤပၤယၤဘံၣ်​ အသုးခိၣ်ဖးဒိၣ်တဂၤ ဒီးနကမၤနၢၤအီၤ.’ စီၤဘါရး တဲဘၣ်နီၢ်ဒဘိရၤလၢ ‘နမ့ၢ်လဲၤဒီးယၤန့ၣ်​ ယကလဲၤ.’ နီၢ်ဒဘိရၤ တဲဆၢက့ၤအီၤလၢ ‘ယကလဲၤဒီးနၤ, ဘၣ်ဆၣ်​ နဘၣ်သ့ၣ်ညါလၢ နတမၤသံဘၣ်​ စီၤစံစရၤဘၣ်. ယဟိဝၤယွၤ တဲဝဲလၢ ပှၤပိာ်မုၣ်တဂၤ ကမၤသံအီၤ.’

နီၢ်ဒဘိရၤ လဲၤတၢ်ဒီးစီၤဘါရး ဒီးအသုးဖိတဖၣ်လၢ ကစၢၢ်တၤဘိၢ် ဒ်သိးကဒုးတၢ်အဂီၢ်. ဖဲစီၤစံစရၤ နၢ်ဟူဝဲ တၢ်ဂ့ၢ်အံၤအခါ အဝဲကိးထီၣ်​ အသုးဖိတဖၣ်​ ဒီးကတဲာ်ကတီၤထီၣ်​ အလ့ၣ်ကဟၣ်​ ဒီးလဲၤဝဲဆူ ထံကျိကံၡိၣ်​ လၢအိၣ်လၢ ကစၢၢ်အဖီလာ်. နီၢ်ဒဘိရၤ တဲဘၣ်စီၤဘါရးလၢ ‘တနံၤအံၤ ယဟိဝၤယွၤ ကဟ့ၣ်နၤ တၢ်မၤနၢၤ.’ စီၤဘါရး ဒီးအပှၤသုးဖိအဂၤ ၁၀,၀၀၀ လဲၤလီၤလၢ ကစၢၢ်ဖီလာ် ဒ်သိးကဒုးတၢ်ဒီး စီၤစံစရၤ အပှၤသုးဖိလၢ အဂံၢ်ဆူၣ်ဘါဆူၣ်တဖၣ်.

ဒီးယဟိဝၤယွၤ မၤဒိၣ်ထီၣ်ဝဲ ထံကျိကံၡိၣ်အထံ. စီၤစံစရၤ အလ့ၣ်ကဟၣ်တဖၣ်​ အိၣ်ကတာ်ဝဲလၢ ကပံာ်အကျါ. အဃိ စီၤစံစရၤပာ်တ့ၢ်ကွံာ် အလ့ၣ်ကဟၣ်​ ဒီးဃ့ၢ်ထီၣ်ကွံာ်ဝဲ. စီၤဘါရးဒီးအပှၤသုးဖိ မၤနၢၤဝဲစီၤစံစရၤ အသုးဖိတဖၣ်​ ဘၣ်ဆၣ်​ စီၤစံစရၤ လဲၤဃ့ၢ်ဝဲဖးယံၤ ဒီးလဲၤအိၣ်ခူသူၣ်ဝဲလၢ နီၢ်ယဧ့လးအဒဲပူၤ. နီၢ်ယဧ့လး ဟ့ၣ်ဒုးအီစီၤစံစရၤလၢ တၢ်နုၢ်ထံ ဝံၤဒီးဟ့ၣ်လုးထီၣ်အီၤလၢ ယၣ်တဘ့ၣ်. မ့ၢ်လၢ စီၤစံစရၤ လီၤဘှံးဒိၣ်မး အဃိ အဝဲမံဘၣ်အသး. ဝံၤဒီး နီၢ်ယဧ့လး ဟဲဝဲဆူ စီၤစံစရၤအအိၣ်​ ကယီကယီ ဒီးဆဲးဝဲအခိၣ်လၢ နီၣ်ပျၤတဘိ ဒီးစီၤစံစရၤသံဝဲ.

စီၤဘါရး ဟးဃုကွၢ်ဝဲ စီၤစံစရၤ. နီၢ်ယဧ့လး ဟးထီၣ်လၢ အဒဲချၢ ဒီးတဲဘၣ်စီၤဘါရးလၢ ‘ဟဲနုာ်လီၤလၢယဒဲပူၤ ဒီးယကဒုးနဲၣ်နၤလၢ ပှၤလၢနဃုအီၤတဂၤန့ၣ်.’ စီၤဘါရး လဲၤနုာ်လီၤဝဲလၢဒဲပူၤ ဒီးထံၣ်ဘၣ်ဝဲလၢ စီၤစံစရၤသံဝဲလံ. စီၤဘါရး ဒီးနီၢ်ဒဘိရၤ စံးထီၣ်ပတြၢၤ ယဟိဝၤယွၤလၢ တၢ်သးဝံၣ်တယုၢ် မ့ၢ်လၢ ပှၤအံၣ်စရ့လးဖိတဖၣ်မၤနၢၤဝဲ အဒုၣ်အဒါတဖၣ်အဃိ. တၢ်မၤအသးတဖၣ်အံၤ ဝံၤအလီၢ်ခံ ပှၤအံၣ်စရ့လးဖိတဖၣ်​ အိၣ်ဘၣ်ဝဲ မုာ်မုာ်ခုၣ်ခုၣ်​ အနံၣ် ၄၀.

ဖဲတၢ်သၣ်ဝံၤလီၤဒိ အိၣ်ထီၣ်ဝဲလၢ ကီၢ်အံၣ်စရ့လးပူၤအခါ ပှၤအံၣ်စရ့လးဖိတဂၤ လၢအမံၤမ့ၢ် နီၢ်နၤဧမံန့ၣ်​ လဲၤအိၣ်လၢ ကီၢ်မိၤအးအပူၤ ဃုာ်ဒီးအဝၤ ဒီးအဖိခွါခံဂၤ. လၢခံန့ၣ်​ နီၢ်နၤဧမံ အဝၤသံဝဲ. အဖိခွါခံဂၤန့ၣ်​ ဟံးန့ၢ်အမါဒီး ပှၤမိၤအးမုၣ်​ လၢအမံၤမ့ၢ် နီၢ်ရူၤသး ဒီးနီၢ်ဧိးရပၤ. တယံာ်ဘၣ်ဒီး နီၢ်နၤဧမံ အဖိခွါခံဂၤန့ၣ်​ သံဝဲ.

နီၢ်နၤဧမံ နၢ်ဟူဘၣ်ဝဲလၢ ကီၢ်အံၣ်စရ့လးအပူၤန့ၣ်​ တၢ်သၣ်ဝံၤလီၤဒိ ပတုာ်ဝဲလံအဃိ အဝဲ ဆၢတဲာ်လီၤအသးလၢ ကက့ၤကဒါက့ၤဆူ အထံအကီၢ်. နီၢ်ရူၤသးဒီးနီၢ်ဧိးရပၤ က့ၤပိာ်ဝဲ နီၢ်နၤဧမံအခံ. ဘၣ်ဆၣ်​ ဖဲအဝဲသ့ၣ်​ ဟးလၢကျဲအခါန့ၣ်​ နီၢ်နၤဧမံ တဲဘၣ်အဝဲသ့ၣ်လၢ ‘သုမ့ၢ်မါလၢ အဂ့ၤလၢ ယဖိခွါအဖီခိၣ်​ ဒီးဒဲၣ်မုၣ်လၢ အဂ့ၤလၢယဖီခိၣ်. ယအဲၣ်ဒိးလၢသု ကဖျီသုသးလၢ အသီတဘျီ. က့ၤဆူ သုဟံၣ်လၢ ကီၢ်မိၤအးမီၤ.’ အဝဲသ့ၣ်တဲဘၣ်နီၢ်နၤဧမံလၢ ‘ပအဲၣ်နၤ. ပတအဲၣ်ဒိး ပာ်တ့ၢ်နၤဘၣ်.’ နီၢ်နၤဧမံဆဲးတဲအဝဲသ့ၣ်လၢ က့ၤလၢသုဟံၣ်သုဃီသၢၤ. လၢခံ နီၢ်ဧိးရပၤ က့ၤဝဲဆူ အဟံၣ်လၢ ကီၢ်မိၤအးအပူၤ. မ့မ့ၢ်နီၢ်ရူၤသးန့ၣ်​ အိၣ်တ့ၢ်ဒီး နီၢ်နၤဧမံ. နီၢ်နၤဧမံ တဲဘၣ်နီၢ်ရူၤသးလၢ ‘နီၢ်ဧိးရပၤ က့ၤကဒါက့ၤဝဲဆူ အပှၤကလုာ် ဒီးအကစၢ်ယွၤအအိၣ်လံ. က့ၤပိာ်အခံ ဒီးက့ၤလၢ နမိၢ်အဟံၣ်နီၤ.’ ဘၣ်ဆၣ်​ နီၢ်ရူၤသးတဲဝဲလၢ ‘ယတပာ်တ့ၢ်နၤဘၣ်. နပှၤကလုာ်န့ၣ်​ ကကဲထီၣ်ဝဲ ယပှၤကလုာ် ဒီးနကစၢ်ယွၤန့ၣ်​ ကကဲထီၣ်​ ယကစၢ်ယွၤ.’ ဖဲနီၢ်နၤဧမံ နၢ်ဟူဘၣ်ဝဲ နီၢ်ရူၤသး အတၢ်ကတိၤအခါ အဝဲကသးခုဝဲထဲလဲၣ်.

နီၢ်ရူၤသးဒီးနီၢ်နၤဧမံ က့ၤတုၤဝဲလၢ ကီၢ်အံၣ်စရ့လးအပူၤန့ၣ်​ ဘၣ်ဖဲပှၤစးထီၣ်ကူးဝဲ ဘုမုယီၤအခါ. ဘၣ်တနံၤ နီၢ်ရူၤသး လဲၤထၢဝဲဘုစဲၤတဖၣ်​ လၢအအိၣ်လီၤတဲာ်လၢ စီၤဘိၤဧးအစံာ်ပျီပူၤ. စီၤဘိၤဧးန့ၣ်​ မ့ၢ်ဝဲနီၢ်ရၤဃးအဖိခွါ. စီၤဘိၤဧးနၢ်ဟူဘၣ်ဝဲလၢ နီၢ်ရူၤသးန့ၣ်​ မ့ၢ်ပှၤမိၤအးမုၣ်ဖိလၢ အအိၣ်ဒီး တၢ်သးတီ လၢနီၢ်နၤဧမံ အဖီခိၣ်. လၢတၢ်န့ၣ်အဃိ စီၤဘိၤဧးတဲဘၣ်​ အခ့အပှၤလၢ ပာ်လီၤတဲာ်ဘုစဲၤလၢ စံာ်ပျီပူၤဒ်သိးနီၢ်ရူၤသး ကထၢထီၣ်ဝဲအဂီၢ်.

ဖဲဟါအဝဲန့ၣ်​ နီၢ်နၤဧမံ သံကွၢ် နီၢ်ရူၤသးလၢ ‘နလဲၤထၢထီၣ်ဘုစဲၤလၢ မတၤတဂၤ အစံာ်ပျီပူၤလဲၣ်.’ နီၢ်ရူၤသး တဲဆၢက့ၤဝဲလၢ ‘ယလဲၤထၢထီၣ်ဘုစဲၤလၢ စီၤဘိၤဧးအစံာ်ပျီပူၤလီၤ.’ ဝံၤဒီးနီၢ်နၤဧမံ တဲဘၣ်နီၢ်ရူၤသးလၢ ‘စီၤဘိၤဧးန့ၣ်​ မ့ၢ်ယဝၤ အဘူးအတံၢ်တဂၤ. ဆဲးထၢထီၣ်ဘုစဲၤလၢ အစံာ်ပျီပူၤ ဃုာ်ဒီးပိာ်မုၣ်သးစၢ်လၢ အဂၤတဖၣ်. နမ့ၢ်ထၢထီၣ်ဘုစဲၤဖဲန့ၣ်န့ၣ်​ တၢ်ဘၣ်ယိၣ်တအိၣ်လၢ နဂီၢ်ဘၣ်.’

နီၢ်ရူၤသး ဆဲးထၢဝဲဘုစဲၤလၢ စီၤဘိၤဧး အစံာ်ပျီပူၤတုၤလၢ ပှၤကူးဘုမုယီၤဝံၤတစု. စီၤဘိၤဧးထံၣ်ဘၣ်ဝဲလၢ နီၢ်ရူၤသး မ့ၢ်ပိာ်မုၣ်လၢအခုဒီး မ့ၢ်ပှၤလၢအဂ့ၤတဂၤ. ဖဲစိၤဝဲန့ၣ်​ ပိာ်ခွါတဂၤ မ့ၢ်သံဝဲဖဲ တချုးလၢ အဖိအိၣ်ဒံးဘၣ်အခါ အဘူးအတံၢ်တဂၤဂၤ ကဟံးန့ၢ်က့ၤ ပိာ်ခွါလၢအသံတဂၤအံၤ အမါ. လၢတၢ်န့ၣ်အဃိ စီၤဘိၤဧး ဟံးန့ၢ်ဝဲနီၢ်ရူၤသး. လၢခံန့ၣ်​ အဝဲသ့ၣ်​ အိၣ်ဖျဲၣ်ထီၣ်ဝဲ အဖိတဂၤ ဒီးကိးန့ၢ်ဝဲအမံၤလၢ စီၤဧိၤဘ့း. စီၤဧိၤဘ့းန့ၣ်​ မ့ၢ်ဝဲစီၤပၤဒၤဝံးအဖု. နီၢ်နၤဧမံ အသကိးတဖၣ်​ သးခုဃုာ်ဒီးအီၤ. ဒီးအဝဲသ့ၣ်တဲဘၣ်​ နီၢ်နၤဧမံလၢ ‘အဆိကတၢၢ်န့ၣ်​ ယဟိဝၤယွၤ ဟ့ၣ်လီၤနၤ နီၢ်ရူၤသးဒီး အဝဲမ့ၢ်ပှၤလၢ အဂ့ၤလၢနဖီခိၣ်. ခဲအံၤ နဒိးန့ၢ်ဘၣ်​ နလံၤခွါတဂၤလံ. မ်ယဟိဝၤယွၤ ဘၣ်တၢ်စံးထီၣ်ပတြၢၤအီၤ.’