လၢခံ ပှၤအံၣ်စရ့လးဖိတဖၣ်​ တဘူၣ်ထီၣ်ဘါထီၣ်​ ယဟိဝၤယွၤလၢၤဘၣ်. အဝဲသ့ၣ်​ ဘူၣ်ထီၣ်ဘါထီၣ်က့ၤ ယွၤလၢအကမၣ်တဖၣ်. အဃိ လၢနွံနံၣ်အတီၢ်ပူၤန့ၣ်​ ပှၤမံးဒယၣ်ဖိဟုၣ်ဝဲ ပှၤအံၣ်စရ့လးဖိ အဆၣ်ဖိကီၢ်ဖိတဖၣ်​ ဒီးမၤဟးဂီၤကွံာ် အဝဲသ့ၣ်​ အတၢ်လီၢ်လၢ ကသူၣ်အီၣ်ဖျးအီၣ်တၢ်အဂီၢ်. ဒ်သိး ပှၤအံၣ်စရ့လးဖိတဖၣ်​ ကပူၤဖျဲးလၢပှၤမံးဒယၣ်ဖိ အစုပူၤအဂီၢ် အဝဲသ့ၣ်​ ဘၣ်လဲၤအိၣ်ခူသူၣ်လၢ ကစၢၢ်ဒီးလ့ကအိအပူၤ. ဒီးပှၤအံၣ်စရ့လးဖိတဖၣ်​ ဃ့ကညး ယဟိဝၤယွၤလၢ ကမၤစၢၤအဝဲသ့ၣ်. အဃိ ယဟိဝၤယွၤဆှၢလီၤ အမူခိၣ်ကလူးလၢ ပှၤသးစၢ်တဂၤလၢ အမံၤမ့ၢ် စီၤကံးဒဧိၣ်အအိၣ်. မူခိၣ်ကလူး တဲဘၣ်စီၤကံးဒဧိၣ်လၢ ‘ယဟိဝၤယွၤ ဃုထၢထီၣ်နၤ ဒ်သိး နကကဲထီၣ်သုးဖိလၢ အဂံၢ်ဆူၣ်တဂၤလီၤ.’ စီၤကံးဒဧိၣ်​ တဲဆၢက့ၤအီၤလၢ ‘ယတမ့ၢ် တၢ်နီတမံၤဘၣ်အဃိ ယမၤပူၤဖျဲး ပှၤအံၣ်စရ့လးဖိ ကသ့ဒ်လဲၣ်.’

ယဟိဝၤယွၤ ဃုထၢထီၣ်​ စီၤကံးဒဧိၣ်​ အနီၢ်ကီၢ်န့ၣ်​ စီၤကံးဒဧိၣ်​ ကသ့ၣ်ညါဝဲဒ်လဲၣ်. စီၤကံးဒဧိၣ်​ ပာ်လီၤသိဆူၣ်လၢ ဟီၣ်ခိၣ်လိၤ ဒီးအဝဲတဲဘၣ်​ ယဟိဝၤယွၤလၢ ‘ဖဲဂီၤခီ အဆၢကတီၢ်န့ၣ်​ ဟီၣ်ခိၣ်မ့ၢ်ဃ့ထီ ဘၣ်ဆၣ်​ သိဆူၣ်အံၤ မ့ၢ်ဘၣ်စီၣ်လၢ ပစီၤထံန့ၣ်​ ယနာ်လၢ နဃုထၢထီၣ်ယၤလၢ ယကမၤပူၤဖျဲး ပှၤအံၣ်စရ့လးဖိတဖၣ်.’ လၢခံတဂီၤန့ၣ်​ စီၤကံးဒဧိၣ်​ ထံၣ်ဘၣ်ဝဲလၢ သိဆူၣ်ဘၣ်စီၣ်ဝဲ, မ့မ့ၢ် ဟီၣ်ခိၣ်န့ၣ်​ ဃ့ထီဝဲ. ဘၣ်ဆၣ်​ စီၤကံးဒဧိၣ်​ ဃ့ယဟိဝၤယွၤ လၢအသီတဘျီလၢ သိဆူၣ်ကဘၣ်ဃ့ထီ ဒီးဟီၣ်ခိၣ်န့ၣ်​ ကဘၣ်ဘၣ်စီၣ်ဝဲ. ဖဲတၢ်မၤအသး ဒ်န့ၣ်အခါ စီၤကံးဒဧိၣ်​ နာ်ဝဲလၢ ယဟိဝၤယွၤ ဃုထၢထီၣ်အီၤ နီၢ်ကီၢ်. ဒီးစီၤကံးဒဧိၣ်​ ပာ်ဖှိၣ်ထီၣ်​ အပှၤသုးဖိတဖၣ်​ ဒ်သိး ကလဲၤဒုးဝဲ ပှၤမံးဒယၣ်ဖိတဖၣ်အဂီၢ်.

ယဟိဝၤယွၤ တဲဘၣ်စီၤကံးဒဧိၣ်လၢ ‘ဒ်သိး ပှၤအံၣ်စရ့လးဖိတဖၣ်​ ကမၤနၢၤတၢ်အဂီၢ် ယကမၤစၢၤအဝဲသ့ၣ်. ဘၣ်ဆၣ်​ ခီဖျိလၢအဝဲသ့ၣ်​ အနီၣ်ဂံၢ် အိၣ်အါအဃိ ဘၣ်သ့ၣ်သ့ၣ်​ သုကဆိကမိၣ်လၢ သုမၤနၢၤတၢ်လၢ သုနီၢ်ကစၢ် အဂံၢ်အဘါ. အဃိ တဲဘၣ်အဝဲသ့ၣ်လၢ ပှၤလၢအပျံၤတၢ်န့ၣ်​ က့ၤလၢသုဟံၣ်.’ ပှၤသုးဖိအဂၤ ၂၂,၀၀၀ န့ၣ်​ က့ၤဝဲလၢအဟံၣ်. မ့မ့ၢ် ပှၤလၢအအိၣ်တ့ၢ်န့ၣ်​ အိၣ်ဒံးဝဲအဂၤ ၁၀,၀၀၀ . ဒီးယဟိဝၤယွၤတဲဘၣ်​ စီၤကံးဒဧိၣ်လၢ ‘ပှၤသုးဖိတဖၣ်န့ၣ်​ အနီၣ်ဂံၢ်အိၣ်အါဒံး, မၢပှၤသုးဖိတဖၣ်​ လဲၤလီၤလၢ ထံကျိပူၤ ဒီးမၢအဝဲသ့ၣ်အီထံ. ပှၤလၢအအိၣ်ဒီး တၢ်ပလီၢ်အသး ဖဲအအီထံအခါန့ၣ်​ ဃုထၢထီၣ်အီၤ.’ ဒီးပှၤလၢအအီထံ လၢအစု ဒီးပလီၢ် အသးတဖၣ်န့ၣ်​ အနီၣ်ဂံၢ်အိၣ်ထဲ ၃၀၀. ယဟိဝၤယွၤ အၢၣ်လီၤဝဲလၢ ပှၤသုးဖိအဂၤ ၃၀၀ အံၤကဒုးနၢၤဝဲ ပှၤမံးဒယၣ်​ အသုးဖိအဂၤ ၁၃၅,၀၀၀.

ဖဲနၤအဝဲန့ၣ်​ ယဟိဝၤယွၤ တဲဘၣ်စီၤကံးဒဧိၣ်လၢ ‘ခဲအံၤ အဆၢကတီၢ်ဘၣ်လၢ သုကဘၣ်ဒုး ပှၤမံးဒယၣ်ဖိတဖၣ်လံ.’ စီၤကံးဒဧိၣ်​ ဟ့ၣ်လီၤဝဲ အသုးဖိတဖၣ်လၢကွဲၤ, မ့ၣ်အူအတၢၣ်​ ဒီးပာ်ခူသူၣ်ဝဲ မ့ၣ်အူအတၢၣ်လၢ သပၢၤဟီၣ်ခိၣ်အပူၤ. စီၤကံးဒဧိၣ်တဲဘၣ်​ အဝဲသ့ၣ်လၢ ‘ကွၢ်ယၤဒီး မၤပိာ်ထွဲယခံ.’ စီၤကံးဒဧိၣ်​ အူထီၣ်အကွဲၤ, မၤသ့ၣ်ဖးအသပၢၤ, ဝံၢ်ဝၢ်အမ့ၣ်အူတၢၣ်​ ဒီးကိးပသူထီၣ်လၢ ‘ယဟိဝၤယွၤ ဒီးစီၤကံးဒဧိၣ်အနးတဘ့ၣ်.’ ပှၤသုးဖိအဂၤ ၃၀၀ အံၤ မၤဝဲဒ် စီၤကံးဒဧိၣ်အသိး. ဝံၤဒီး ပှၤမံးဒယၣ်ဖိတဖၣ်ပျံၤတၢ် ဒီးဃ့ၢ်ကွံာ်ဝဲ တဂၤတပူၤတဂၤတပူၤ. မ့ၢ်လၢ တၢ်သဘံၣ်သဘုၣ်​ အိၣ်ထီၣ်ဝဲအဃိ ပှၤမံးဒယၣ်ဖိတဖၣ်​ ဒုးလိာ်က့ၤအသး ကဒဲကဒဲ. တဘျီအံၤစ့ၢ်ကီး ယဟိဝၤယွၤမၤစၢၤ ပှၤအံၣ်စရ့လးဖိတဖၣ်​ ဒ်သိး ကဒုးနၢၤဝဲ အဒုၣ်အဒါအဂီၢ်.

ပှၤအံၣ်စရ့လးပိာ်ခွါတဂၤ လၢအမံၤမ့ၢ် စီၤအ့လကါနၤန့ၣ်​ အမါအိၣ်ဝဲခံဂၤ. အမါခံဂၤန့ၣ်​ အမံၤလၢ နီၢ်ဃးနၤ ဒီးနီၢ်ပနံးနၤ. ဒီးစီၤအ့လကါနၤ အဲၣ်ဝဲနီၢ်ဃးနၤ ဒိၣ်န့ၢ်ဒံး နီၢ်ပနံးနၤ. ခီဖျိလၢနီၢ်ပနံးနၤ အဖိအိၣ်ဝဲအါဂၤ ဒီးနီၢ်ဃးနၤ အဖိတအိၣ်ဘၣ်​ အဃိ နီၢ်ပနံးနၤ တဲဆါဝဲ နီၢ်ဃးနၤထီဘိ. ကိးနံၣ်ဒဲးန့ၣ်​ စီၤအ့လကါနၤ ဒီးအဟံၣ်ဖိဃီဖိ လဲၤဘူၣ်ထီၣ်ဘါထီၣ်တၢ်လၢ ဒဲစီဆှံလၢ ဝ့ၢ်ၡံလိၤအပူၤ. ဘၣ်တဘျီ ဖဲအဝဲသ့ၣ်​ လဲၤတုၤဝဲ လၢဝ့ၢ်ၡံလိၤအခါ စီၤအ့လကါနၤ ထံၣ်ဝဲလၢ နီၢ်ဃးနၤ အသးအုးဒိၣ်မး. စီၤအ့လကါနၤ တဲဘၣ်အီၤလၢ ‘ဟီၣ်တဂ့ၤ, ယအိၣ်ဒီးနၤ ဒီတဂၤညါ. ယအဲၣ်နၤ.’

လၢခံ နီၢ်ဃးနၤ လဲၤဃ့ဘါထုကဖၣ်တၢ် ထဲတဂၤဧိၤ. ဖဲအဃ့ဘါထုတဖၣ်တၢ်အခါ အဝဲဟီၣ်ဝဲ လီၤကၢ်လီၤကုၤ ဒီးဃ့ကညးဝဲလၢ ယဟိဝၤယွၤ ကမၤစၢၤအီၤ. နီၢ်ဃးနၤ အၢၣ်လီၤဝဲလၢ ‘ယဟိဝၤယွၤဧၢ, နမ့ၢ်ဟ့ၣ်လီၤယၤ ဖိခွါတဂၤန့ၣ်​ ယကဟ့ၣ်လီၤက့ၤနၤ. ဒီးယဖိခွါအံၤကမၤ နတၢ်မၤ တစိၤအသး.’

ပှၤလုၢ်တၢ်ခိၣ်​ အဒိၣ်ကတၢၢ် စီၤဧ့လံၤ ထံၣ်ဝဲလၢ နီၢ်ဃးနၤ ဟီၣ်သါသကုးဝဲအဃိ အဝဲဆိကမိၣ်လၢ နီၢ်ဃးနၤအီမူၤသံး. ဘၣ်ဆၣ်​ နီၢ်ဃးနၤ တဲဆၢက့ၤအီၤလၢ ‘ယကစၢ်ဧၢ, ယတမူၤသံးဘၣ်. ယအိၣ်ဒီး တၢ်ကီတၢ်ခဲဖးဒိၣ်တခါ ဒီးခဲအံၤယတဲဘၣ်​ ယဟိဝၤယွၤ.’ ဒီးစီၤဧ့လံၤ သ့ၣ်ညါဝဲလၢ အဆိကမိၣ်ကမၣ်ဘၣ်​ နီၢ်ဃးနၤအဃိ အဝဲတဲဘၣ်က့ၤအီၤလၢ ‘မ်ကစၢ်ယွၤ ဟ့ၣ်လီၤနၤ တၢ်လၢနဃ့အီၤ.’ နီၢ်ဃးနၤ အသးမုာ်ထီၣ်က့ၤ ဒီးဟးထီၣ်ဝဲဖဲန့ၣ်. ဒီးလၢ တနံၣ်အတီၢ်ပူၤန့ၣ်​ နီၢ်ဃးနၤ အိၣ်ဖျဲၣ်ထီၣ်ဝဲ ဖိခွါတဂၤ ဒီးကိးဝဲအမံၤလၢ စီၤၡမူၤအ့လး. နီၢ်ဃးနၤ ကသးခုဝဲထဲလဲၣ်န့ၣ်​ ဆိကမိၣ်ကွၢ်သၢၤ.

နီၢ်ဃးနၤ တသးပ့ၤနီၣ်​ အတၢ်အၢၣ်လီၤအီလီၤဒီး ယဟိဝၤယွၤဘၣ်. ဖဲစီၤၡမူၤအ့လး ဖှၣ်နုၢ်အခါ အမိလဲၤဆှၢအီၤလၢ ဒဲစီဆှံ. နီၢ်ဃးနၤတဲဘၣ်​ စီၤဧ့လံၤလၢ ‘ယဃ့ထုကဖၣ်လၢ ကဒိးန့ၢ်ဘၣ်​ ဖိခွါတဂၤအံၤအဂီၢ်. ဒီးယအၢၣ်လီၤလၢ အဝဲကမၤ ယဟိဝၤယွၤအတၢ်မၤ တစိၤလၢအသး.’ စီၤအ့လကါနၤ ဒီးနီၢ်ဃးနၤ လဲၤအိၣ်သကိးဝဲ စီၤၡမူၤအ့လး တနံၣ်တဘျီ ဒီးလဲၤစိာ်န့ၢ်အီၤ ဆ့ကၤအသီ ကိးဘျီဒဲး. ယဟိဝၤယွၤ ဆိၣ်ဂ့ၤနီၢ်ဃးနၤ ဒီးအဝဲအိၣ်ဖျဲၣ်ထီၣ်ကဒီးဝဲ အဖိခွါသၢဂၤ ဒီးအဖိမုၣ်ခံဂၤ.