ပှၤအံၣ်စရ့လးဖိတဖၣ်​ ပာ်တ့ၢ်ကွံာ် ယဟိဝၤယွၤလၢ အသီတဘျီ ဒီးဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်. ဖဲပှၤဧၣ်မိၣ်ဖိတဖၣ်​ ဟဲဒုးပှၤအံၣ်စရ့လးဖိအခါ ယွၤလၢအကမၣ်တဖၣ်အံၤ မၤစၢၤအဝဲသ့ၣ်​ တသ့ဘၣ်. ပှၤအံၣ်စရ့လးဖိတဖၣ်​ ဘၣ်နးဘၣ်ဖှီၣ်ယံာ်ဝဲ အနံၣ်အါမးလံ. လၢခံန့ၣ်​ အဝဲသ့ၣ်​ တဲဘၣ်ယဟိဝၤယွၤလၢ ‘ပမၤကမၣ်ဘၣ်နၤလံ. ဝံသးစူၤ မၤပူၤဖျဲးပှၤလၢ ပဒုၣ်ပဒါအစုပူၤ.’ ပှၤအံၣ်စရ့လးဖိတဖၣ်​ မၤဟးဂီၤကွံာ် အတၢ်ဂီၤတၢ်ဖှီၣ်တဖၣ်​ ဒီးစးထီၣ်ဘူၣ်ထီၣ်ဘါထီၣ်က့ၤ ယဟိဝၤယွၤ. ယဟိဝၤယွၤ တအဲၣ်ဒိးထံၣ်ဝဲလၢ အဝဲသ့ၣ်​ ကတူၢ်ဘၣ်​ တၢ်နးတၢ်ဖှီၣ်လၢၤဘၣ်.

ပှၤသုးဖိတဂၤလၢ အမံၤမ့ၢ် စီၤယံးဖသၤန့ၣ်​ ဘၣ်တၢ်ဃုထၢထီၣ်အီၤလၢ ကကဲခိၣ်ကဲနၢ်လၢ ပှၤအံၣ်စရ့လးဖိ အဖီခိၣ်​ ဒ်သိး ကဒုးတၢ်ဒီး ပှၤဧၣ်မိၣ်ဖိတဖၣ်အဂီၢ်. အဝဲတဲဘၣ်​ ယဟိဝၤယွၤလၢ ‘နမ့ၢ်မၤစၢၤပှၤလၢ ပကမၤနၢၤ တၢ်ဒုးအံၤန့ၣ်​ ယအၢၣ်လီၤနၤလၢ ဖဲယဟဲက့ၤတုၤလၢ ဟံၣ်အခါ ပှၤလၢအဟဲသဂၢၢ်ယၤ အဆိကတၢၢ်တဂၤန့ၣ်​ ယကဟ့ၣ်လီၤနၤ.’ ယဟိဝၤယွၤ ဒိကနၣ်ဝဲစီၤယံးဖသၤ အတၢ်ထုကဖၣ်​ ဒီးမၤစၢၤအီၤလၢ အကမၤနၢၤ တၢ်ဒုးအဂီၢ်.

ဖဲစီၤယံးဖသၤ ဟဲက့ၤလၢဟံၣ်အခါ ပှၤလၢဟဲသဂၢၢ်အီၤ အဆိကတၢၢ်တဂၤန့ၣ်​ မ့ၢ်အဖိမုၣ်. စီၤယံးဖသၤန့ၣ်​ အဖိအိၣ်ထဲတဂၤဧိၤ. ဖဲအဖိမုၣ်အံၤ ဟဲသဂၢၢ်အီၤအခါ ဂဲၤကလံၣ်​ ဒီးပှီၢ်ဝဲဒၢ. ဖဲစီၤယံးဖသၤထံၣ်ဘၣ်​ အဖိမုၣ်အခါ အဝဲမၤဝဲဒ်လဲၣ်. အဝဲသ့ၣ်နီၣ်ထီၣ်က့ၤ အတၢ်အၢၣ်လီၤအီလီၤ ဒီးတဲဝဲလၢ ‘အၣ်လါ, ယဖိမုၣ်ဧၢ, နမၤသ့ၣ်ဖးယသးလံ. ယအၢၣ်လီၤတၢ်ဒီး ယဟိဝၤယွၤအဃိ ယကဘၣ်​ မၤလၢပှဲၤအီၤ. ယအၢၣ်လီၤလၢ ပှၤလၢအဟဲသဂၢၢ်ယၤ အဆိကတၢၢ်တဂၤန့ၣ်​ အဝဲကဘၣ်မၤတၢ်လၢ ဒဲစီဆှံ လၢဝ့ၢ်ၡံလိၤအပူၤ.’ ဒီးစီၤယံးဖသၤ အဖိမုၣ်​ တဲဘၣ်အီၤလၢ ‘ယပၢ်ဧၢ, တၢ်လၢ နအၢၣ်လီၤအီလီၤဒီး ယဟိဝၤယွၤန့ၣ်​ မၤထွဲအီၤသၢၤ. ဘၣ်ဆၣ်​ ယဃ့နၤထဲတမံၤလၢ နကဟ့ၣ်ယၤ တၢ်ဆၢကတီၢ်ခံလါလၢ ယကလဲၤဟး ဒီးယတံၤသကိး ပိာ်မုၣ်တဖၣ်လၢ ကစၢၢ်ခိၣ်နီၤ. မ့ၢ်ဝံၤန့ၣ်​ ယကလဲၤမၤတၢ်လၢ ဒဲစီဆှံ.’ စီၤယံးဖသၤ အဖိမုၣ်မၤတၢ်လၢ ဒဲစီဆှံအပူၤ တစိၤလၢအသး. ကိးနံၣ်ဒဲးန့ၣ်​ အတံၤသကိးတဖၣ်​ ဟဲဟးအိၣ်သကိးအီၤလၢ ဝ့ၢ်ၡံလိၤအပူၤ.

ပှၤလုၢ်တၢ်ခိၣ်​ အဒိၣ်ကတၢၢ် စီၤဧ့လံၤန့ၣ်​ အဖိခွါအိၣ်ဝဲခံဂၤ. အဖိခွါခံဂၤအံၤ မၤတၢ်လၢ ဒဲစီဆှံအပူၤ ဒ်ပှၤလုၢ်တၢ်ဒိၣ်အသိး. အဖိခွါခံဂၤအံၤ အမံၤလၢ စီၤဃၤဖနံ ဒီးစီၤဖံၤနဃၣ်. အဝဲသ့ၣ်​ တဒိကနၣ်​ ယဟိဝၤယွၤ အတၢ်သိၣ်တၢ်သီဘၣ်. ဒီးအဝဲသ့ၣ်ရ့ဒီးပှၤဂၤ အၢအၢသီသီ. ဖဲပှၤအံၣ်စရ့လးဖိတဖၣ်​ ဟဲလုၢ်ထီၣ်တၢ်ဆူ ယဟိဝၤယွၤအိၣ်အခါ စီၤဃၤဖနံ ဒီးစီၤဖံၤနဃၣ်​ ဟံးန့ၢ်ဝဲ တၢ်ညၣ်လၢ အဂ့ၤကတၢၢ်လၢ အနီၢ်ကစၢ်အဂီၢ်. စီၤဧ့လံၤ နၢ်ဟူဘၣ်ဝဲလၢ အဖိခွါခံဂၤအံၤမၤဝဲ တၢ်အၢတၢ်သီတဖၣ်​ ဘၣ်ဆၣ်​ အဝဲတစံၣ်ညီၣ်​ အဖိခွါဘၣ်. မ့ၢ်ယဟိဝၤယွၤ ကပျဲဝဲ တၢ်အၢတၢ်သီတဖၣ်အံၤ ကဆဲးမၤအသးဒ်အံၤ ထီဘိဧါ.

စီၤၡမူၤအ့လး အသးစၢ်န့ၢ်ဒံး စီၤဃၤဖနံ ဒီးစီၤဖံၤနဃၣ်​ သနာ်က့ အဝဲတကွၢ်လိမၤဒိးဝဲ အဝဲသ့ၣ်​ အဒိအတဲာ်ဘၣ်. ယဟိဝၤယွၤ ဘၣ်သူၣ်ဘၣ်သးဝဲ စီၤၡမူၤအ့လး. ဘၣ်တနၤန့ၣ်​ ဖဲစီၤၡမူၤအ့လး မံဝဲအခါ အဝဲနၢ်ဟူ ပှၤကိးအမံၤ. အဝဲဂဲၤဆၢထၢၣ်​ ဒီးလဲၤဃ့ၢ်ဝဲဆူ စီၤဧ့လံၤအအိၣ်. ဒီးအဝဲတဲဘၣ်​ စီၤဧ့လံၤလၢ ‘ယဟဲတုၤလံ.’ ဘၣ်ဆၣ်​ စီၤဧ့လံၤ တဲဆၢက့ၤအီၤလၢ ‘ယတကိးနၤဘၣ်. က့ၤမံဟီ.’ စီၤၡမူၤအ့လးက့ၤမံဝဲ. ဝံၤဒီး စီၤၡမူၤအ့လးနၢ်ဟူဝဲ ပှၤကိးအမံၤတဘျီကဒီး. ဖဲစီၤၡမူၤအ့လး နၢ်ဟူပှၤကိးအီၤ ပှဲၤထီၣ်သၢဘျီအခါ စီၤဧ့လံၤသ့ၣ်ညါဝဲလၢ ယဟိဝၤယွၤ ကိးစီၤၡမူၤအ့လး. ဒီးစီၤဧ့လံၤ တဲဘၣ်စီၤၡမူၤအ့လးလၢ နမ့ၢ်နၢ်ဟူ ပှၤကိးနမံၤလၢအသီတဘျီန့ၣ်​ နကြၢးတဲဆၢက့ၤလၢ ‘ယဟိဝၤယွၤဧၢ. နခ့နပှၤ ဒိကနၣ်နၤလီၤ.’

ဝံၤဒီးစီၤၡမူၤအ့လး က့ၤမံဝဲ ဒီးအဝဲနၢ်ဟူဘၣ်ဝဲ ပှၤကိးအီၤလၢ ‘စီၤၡမူၤအ့လးဧၢ, စီၤၡမူၤအ့လးဧၢ.’ အဝဲစံးဆၢဝဲလၢ ‘နခ့နပှၤ ဒိကနၣ်နၤလီၤ.’ ယဟိဝၤယွၤ တဲဘၣ်အီၤလၢ ‘စီၤဧ့လံၤ သ့ၣ်ညါဝဲလၢ အဖိခွါခံဂၤ မၤတၢ်အၢတၢ်သီလၢ ယဒဲစီဆှံအပူၤ ဘၣ်ဆၣ်​ အဝဲတစံၣ်ညီၣ်​ အဖိခွါဘၣ်. လၢတၢ်န့ၣ်အဃိ တဲဘၣ်စီၤဧ့လံၤလၢ ယကစံၣ်ညီၣ်​ အဝဲဒီးအဟံၣ်ဖိဃီဖိ.’ ဖဲဂီၤခီန့ၣ်​ စီၤၡမူၤအ့လး အိးထီၣ်ဒဲစီဆှံအတြဲၤ ဒ်အဝဲမၤညီနုၢ်ဝဲအသိး. တၢ်လၢယဟိဝၤယွၤ တဲဘၣ်အီၤန့ၣ်​ စီၤၡမူၤအ့လး တဲဘၣ်စီၤဧ့လံၤ တဘူၣ်ဘၣ်. ဘၣ်ဆၣ်​ စီၤဧ့လံၤကိးအီၤ ဒီးသံကွၢ်အီၤလၢ ‘ယဖိခွါဧၢ, ယဟိဝၤယွၤ တဲဘၣ်နၤ တၢ်ဂ့ၢ်မနုၤလဲၣ်. တဲဘၣ်ယၤ ခဲလၢာ်နီၤ.’ ဒီးစီၤၡမူၤအ့လး တဲဘၣ်စီၤဧ့လံၤလၢ တၢ်ဂ့ၢ်ခဲလၢာ်.

ဖဲစီၤၡမူၤအ့လး ဒိၣ်ထီၣ်ဝဲအခါ ယဟိဝၤယွၤ ဆဲးအိၣ်ဒီးအီၤ. ပှၤအံၣ်စရ့လးဖိခဲလၢာ် သ့ၣ်ညါဝဲလၢ ယဟိဝၤယွၤ ဃုထၢထီၣ်​ စီၤၡမူၤအ့လးဒ် ဝံဒီးပှၤစံၣ်ညီၣ်ကွီၢ်တဂၤအသိး.