ယဟိဝၤယွၤတဲဘၣ်​ စီၤၡမူၤအ့လးလၢ ‘လဲၤလၢစီၤယံးၡဲအဟံၣ်, ဒီးလၢအဖိခွါတဖၣ်အကျါတဂၤန့ၣ်​ ကကဲထီၣ်​ ပှၤအံၣ်စရ့လးဖိ အစီၤပၤလၢခံတဂၤ.’ လၢတၢ်န့ၣ်အဃိ စီၤၡမူၤအ့လး လဲၤဝဲဆူ စီၤယံးၡဲအဟံၣ်. ဖဲစီၤၡမူၤအ့လး ထံၣ်ဘၣ်ဝဲ စီၤယံးၡဲအဖိခွါ အဒိၣ်ကတၢၢ်တဂၤအခါ အဝဲဆိကမိၣ်ဝဲလၢ ‘ပှၤသးစၢ်တဂၤအံၤ ကဘၣ်မ့ၢ်ပှၤတဂၤလၢ ယဟိဝၤယွၤ ဃုထၢထီၣ်ဝဲ.’ ဘၣ်ဆၣ်​ ယဟိဝၤယွၤတဲဘၣ်​ စီၤၡမူၤအ့လးလၢ တမ့ၢ်ပှၤတဂၤအံၤဘၣ်. ယဟိဝၤယွၤတဲဝဲလၢ ‘ယတကွၢ်ထဲ ပှၤအက့ၢ်အဂီၤဘၣ်, ယကွၢ်တၢ်အိၣ်လၢ ပှၤသးပူၤလီၤ.’

စီၤယံးၡဲဒုးနဲၣ်​ စီၤၡမူၤအ့လးလၢ အဖိခွါဃုဂၤလံ. ဘၣ်ဆၣ်​ စီၤၡမူၤအ့လး တဲဝဲလၢ ‘ယဟိဝၤယွၤ တဃုထၢထီၣ်​ အဝဲသ့ၣ်​ နီတဂၤဘၣ်. မ့ၢ်နဖိခွါအိၣ်ဒံး တဂၤဂၤဧါ.’ စီၤယံးၡဲတဲဘၣ်​ စီၤၡမူၤအ့လးလၢ ‘ယဖိခွါအိၣ်ဒံးတဂၤ, အဝဲမ့ၢ်ယဖိခွါသဒါ ဒီးအမံၤမ့ၢ်စီၤဒၤဝံး. ခဲအံၤ အဝဲလဲၤကွၢ်ယသိလၢ တၢ်ပျီပူၤ.’ ဖဲစီၤဒၤဝံးဟဲက့ၤအခါ ယဟိဝၤယွၤတဲဘၣ်​ စီၤၡမူၤအ့လးလၢ ‘ယဃုထၢထီၣ်ပှၤတဂၤအံၤ.’ အဃိ စီၤၡမူၤအ့လးလူလီၤသိလၢ စီၤဒၤဝံးအခိၣ်လိၤ ဒ်သိး အဝဲကကဲထီၣ်​ ပှၤအံၣ်စရ့လးဖိ အစီၤပၤလၢ ခါဆူညါအဂီၢ်.

တယံာ်တမီၢ်န့ၣ်​ ပှၤအံၣ်စရ့လးဖိ ဒုးလိာ်အသးဒီး ပှၤဖလ့ၡသးဖိတဖၣ်. ဒီးပှၤဖလ့ၡသးဖိ လၢအနီၢ်ဒိၣ်​ အိၣ်ဝဲတဂၤလၢ အမံၤမ့ၢ် စီၤကၤလယး. တနံၤဘၣ်တနံၤန့ၣ်​ စီၤကၤလယးတဲဆါဝဲ ပှၤအံၣ်စရ့လးဖိ. စီၤကၤလယး ကိးပသူထီၣ်လၢ ‘ဆှၢထီၣ်​ နပှၤသုးဖိတဂၤလၢ ကဒုးတၢ်ဒီးယၤသၢၤ. အဝဲမၤယၤမ့ၢ်နၢၤန့ၣ်​ ပကကဲထီၣ်သုကုၢ်, ဘၣ်ဆၣ်​ ယမၤမ့ၢ်နၢၤန့ၣ်​ သုကဘၣ်ကဲထီၣ်​ ပကုၢ်.’

စီၤဒၤဝံးအဝဲၢ်တဖၣ်​ ကဲသုး. အဃိ စီၤဒၤဝံးလဲၤဝဲဆူ ပှၤအံၣ်စရ့လးဖိအသုးဖိတဖၣ်​ အိၣ်တၢ်လီၢ် ဒ်သိးကလဲၤစိာ်န့ၢ် အဝဲၢ်တဖၣ်​ တၢ်အီၣ်တၢ်အီ. ဖဲစီၤဒၤဝံးနၢ်ဟူ စီၤကၤလယး အတၢ်ကတိၤအခါ အဝဲတဲဝဲလၢ ‘ယကဒုးတၢ်ဒီးအီၤ.’ ဒီးစီၤပၤစီၤစီလူးတဲဘၣ်​ စီၤဒၤဝံးလၢ ‘နမ့ၢ်ဖိသၣ်လီၤ.’ ဘၣ်ဆၣ်​ စီၤဒၤဝံး တဲဆၢက့ၤအီၤလၢ ‘ယဟိဝၤယွၤ ကမၤစၢၤယၤ.’

စီၤစီလူးမၢ စီၤဒၤဝံးသိးထီၣ်ကွၢ် အဆ့ကၤ ဒီးအစုကဝဲၤတဖၣ်​ ဘၣ်ဆၣ်​ စီၤဒၤဝံးတဲဝဲလၢ ‘ယမ့ၢ်လဲၤဒ်အံၤန့ၣ်​ ယဒုးတၢ် တဘၣ်လၢၤဘၣ်.’ စီၤဒၤဝံး ဟံးန့ၢ်ပျံၤလၢ ကကွံာ်လၢၢ်အဂီၢ် ဒီးလဲၤလီၤဝဲဆူ ထံကျိအကပၤ. စီၤဒၤဝံး ဃုထၢထီၣ်လၢၢ်ယဲၢ်ဖျၢၣ်​ ဒီးဖၢနုာ်လီၤဝဲလၢ အထၢၣ်ပူၤ. ဝံၤဒီးစီၤဒၤဝံးလဲၤဃ့ၢ်ဝဲဆူ စီၤကၤလယးအအိၣ်. စီၤကၤလယး ကိးပသူထီၣ်ဝဲလၢ ‘နနီၢ်ဆံးဆံးန့ၣ်​ ဟဲလၢအံၤတထံၣ်. နဖံးနညၣ်န့ၣ်​ ယကဒုးအီၣ်ကွံာ် ထိၣ်ဖိလံၣ်ဖိ ဒီးဆၣ်ဖိကီၢ်ဖိ အမံၤတဖၣ်.’ ဘၣ်ဆၣ်​ စီၤဒၤဝံးတပျံၤအီၤဘၣ်. စီၤဒၤဝံး တဲဆၢအီၤလၢ ‘နဟဲဒီးနးဧိၤဘီဧိၤ ဘၣ်ဆၣ်​ ယဟဲလၢ ယဟိဝၤယွၤအမံၤ. နတဒုးတၢ်ဒီးပှၤဘၣ်. မ့ၢ်နဒုးတၢ်ဒီး ကစၢ်ယွၤလီၤ. ကယဲၢ်ပှၤအိၣ်ဖဲအံၤတဖၣ်​ ကသ့ၣ်ညါဝဲလၢ ယဟိဝၤယွၤန့ၣ်​ အစိကမီၤဒိၣ်န့ၢ်ဒံး နးဧိၤဘီဧိၤ. ယဟိဝၤယွၤ ကဟ့ၣ်လီၤနၤလၢ ယစုပူၤ.’

စီၤဒၤဝံး ပာ်လီၤလၢၢ် လၢပျံၤလိၤ, တဝံၢ်ထီၣ်ဝဲ ဆူၣ်ဆူၣ်​ ဒီးကွံာ်ဝဲ. ခီဖျိလၢ ယဟိဝၤယွၤ အတၢ်မၤစၢၤအဃိ လၢၢ်အံၤလဲၤဘၣ်ဝဲ စီၤကၤလယး အခိၣ်တိသၣ်. ဒီးစီၤကၤလယး လီၤဃံၢ်သံဝဲ လၢဟီၣ်ခိၣ်လိၤ. ဝံၤဒီး ပှၤဖလ့ၡသးဖိတဖၣ်​ ဃ့ၢ်ကွံာ်ဝဲ. မ့ၢ်နနာ်န့ၢ် ယဟိဝၤယွၤ ဒ်စီၤဒၤဝံးအသိးဧါ.

ဖဲစီၤဒၤဝံးမၤသံ စီၤကၤလယး ဝံၤအလီၢ်ခံ စီၤပၤစီလူး ပာ်ထီၣ်အီၤလၢ သုးခိၣ်. စီၤဒၤဝံး ဒုးတၢ်နၢၤအါဘျီ အဃိ အမံၤဟူသၣ်ဖျါထီၣ်ဝဲ ဒိၣ်မး. ဖဲစီၤဒၤဝံးဒုးတၢ်ဝံၤ ဒီးဟဲက့ၤလၢဟံၣ်အခါ ပှၤပိာ်မုၣ်တဖၣ်​ ဟဲထီၣ်ဂဲၤကလံၣ်​ ဒီးသးဝံၣ်တၢ်. အဝဲသ့ၣ်​ သးဝံၣ်ထီၣ်ဝဲလၢ ‘စီၤစီလူး မၤသံပှၤလၢ အကထိ မ့မ့ၢ်စီၤဒၤဝံးန့ၣ်​ မၤသံဝဲ ပှၤလၢအကလးတဖၣ်.’ လၢတၢ်န့ၣ်အဃိ စီၤစီလူးသးက့ၣ်ဝဲ စီၤဒၤဝံးဒီးအဲၣ်ဒိး မၤသံအီၤ.

စီၤဒၤဝံး ဒ့တနၢ်သ့ဝဲဂ့ၤဂ့ၤ. ဘၣ်တနံၤ ဖဲစီၤဒၤဝံး ဒ့ဝဲတနၢ်လၢ စီၤစီလူးအဂီၢ်အခါ စီၤပၤကွံာ်အီၤလၢဘီ. တဘျီဃီန့ၣ်​ စီၤဒၤဝံးပလဲၤအသး ဒီးဘီန့ၣ်လဲၤဘၣ်ဝဲ တၢ်ဒူၣ်ကပၤ. ဖဲန့ၣ်ဝံၤအလီၢ်ခံ စီၤစီလူးဃုမၤသံဝဲ စီၤဒၤဝံးအါဘျီ. လၢခံ စီၤဒၤဝံး ဃ့ၢ်ကွံာ်ဝဲလၢအယံၤ ဒီးလဲၤအိၣ်ခူသူၣ်ဝဲလၢ ပှၢ်မုၢ်ကနၢအပူၤ.

စီၤစီလူးကိးထီၣ်​ အပှၤသုးဖိအဂၤ ၃,၀၀၀ ဒ်သိးကလဲၤဃုမၤသံ စီၤဒၤဝံးအဂီၢ်. စီၤစီလူးနုာ်လီၤဝဲဆူ လ့ကအိအပူၤ ဖဲစီၤဒၤဝံး ဒီးအပှၤသုးဖိတဖၣ်​ အိၣ်ခူသူၣ်ဝဲအလီၢ်. စီၤဒၤဝံးအပှၤသုးဖိတဖၣ်​ တဲဘၣ်အီၤလၢ ‘နမၤသံစီၤစီလူးန့ၢ်လံ.’ စီၤဒၤဝံး လဲၤဃီၤဝဲကယီကယီ ဆူစီၤစီလူးအအိၣ်​ ဒီးကူးဝဲစီၤစီလူး အဆ့ကၤအခီၣ်ထံးတစဲး. ဒီးစီၤစီလူး တသ့ၣ်ညါတၢ်နီတမံၤဘၣ်. ဖဲန့ၣ်ဝံၤအလီၢ်ခံ စီၤဒၤဝံး သးဘၣ်ဒိဝဲဒိၣ်မး မ့ၢ်လၢ အတပာ်ကဲဝဲ စီၤပၤလၢယဟိဝၤယွၤ ဃုထၢထီၣ်ဝဲအဃိ. ဒီးစီၤဒၤဝံး တဟ့ၣ်အခွဲးလၢ အပှၤသုးဖိတဖၣ်​ ကမၤသံဝဲ စီၤစီလူးဘၣ်. စီၤဒၤဝံးကိးပသူထီၣ်ဆူ စီၤစီလူးအအိၣ်​ ဒီးတဲဘၣ်အီၤလၢ ဖဲနအိၣ်လၢလ့ကအိပူၤအခါ ယမ့ၢ်အဲၣ်ဒိးမၤသံနၤန့ၣ်​ ယမၤန့ၢ် ဘၣ်ဆၣ်​ ယတမၤဘၣ်. လၢတၢ်န့ၣ်အဃိ မ့ၢ်စီၤစီလူးဆီတလဲ အတၢ်ပာ်သူၣ်ပာ်သးလၢ စီၤဒၤဝံးအဖီခိၣ်စ့ၢ်ကီးဧါ.

စီၤစီလူး တဆီတလဲဘၣ်. အဝဲဆဲးဃုမၤသံဝဲ စီၤဒၤဝံးလီၤ. ဘၣ်တနၤ စီၤဒၤဝံးဒီးအဖိဒိၣ်ခွါ စီၤအဘံၡဲၤ လဲၤနုာ်လီၤဝဲ ကယီကယီလၢ စီၤစီလူးအိၣ်တၢ်လီၢ်. စီၤအဘံန့ၢ် လၢအမ့ၢ်ပှၤလၢ အဘၣ်အိၣ်ခိးကွၢ်ဝဲ စီၤစီလူးန့ၣ်​ မံဘၣ်အသးလီၤ. စီၤအဘံၡဲၤတဲဘၣ်​ စီၤဒၤဝံးလၢ ‘အဝဲအိၣ်လၢပစုပူၤလံ, ယကမၤသံအီၤတထံၣ်ဧဲၣ်.’ စီၤဒၤဝံး တဲဆၢက့ၤအီၤလၢ ‘ယဟိဝၤယွၤ ကဟ့ၣ်ကၣ်​ စီၤစီလူးလီၤ. ပကဟံးန့ၢ်ထဲအဘီ, အထံအီဒၢ ဒီးပကက့ၤ.’

စီၤဒၤဝံးလဲၤထီၣ်ဆူ ကစၢၢ်ခိၣ်လၢ အအိၣ်ဘူးဒီး စီၤစီလူးအိၣ်တၢ်လီၢ်, ဒီးဖဲန့ၣ်အခါ စီၤဒၤဝံးကွၢ်စိလီၤတၢ်ဆူ စီၤစီလူးအအိၣ်​ ဒီးကိးပသူထီၣ်ဝဲလၢ ‘စီၤအဘံန့ၢ်ဧၢ, ဘၣ်မနုၤအဃိ နတကွၢ်ထွဲ နစီၤပၤလဲၣ်. ခဲအံၤ စီၤစီလူးအထံအီဒၢ ဒီးအနးအိၣ်ဖဲလဲၣ်.’ စီၤစီလူးနၢ်ဟူဝဲ စီၤဒၤဝံးအကလုၢ် ဒီးတဲဝဲလၢ ‘နမ့ၢ်အဲၣ်ဒိးမၤသံယၤန့ၣ်​ နမၤသံယၤန့ၢ် ဘၣ်ဆၣ်​ နတမၤသံယၤဘၣ်. အဃိ ယသ့ၣ်ညါလၢ နကကဲထီၣ်ဘၣ်​ ပှၤအံၣ်စရ့လးဖိအစီၤပၤ လၢခံတဂၤလီၤ.’ ဝံၤဒီး စီၤစီလူးက့ၤဝဲဆူ အနီပူၤ. ဘၣ်ဆၣ်​ စီၤစီလူးအဟံၣ်ဖိဃီဖိ တသးဟ့ စီၤဒၤဝံး ကိးဂၤဒဲးဘၣ်.