ပှၤအံၣ်စရ့လးဖိ အဒူၣ်တဆံ အစီၤပၤတဖၣ်န့ၣ်​ မၤတၢ်အၢတၢ်သီ. ဒီးစီၤအၤဃာ်န့ၣ်​ မ့ၢ်စီၤပၤလၢ အအၢအသီ ဖးဒိၣ်တဂၤ. စီၤအၤဃာ်အမါန့ၣ်​ မ့ၢ်ဝဲပိာ်မုၣ်အအၢအသီ တဂၤလၢ အဘူၣ်ထီၣ်ဘါထီၣ်ဝဲ ဘဧၤလး. ဒီးအမံၤမ့ၢ်ဝဲ နီၢ်အံၤစ့ဘ့ၤလး. ခီဖျိလၢ စီၤအၤဃာ် ဒီးနီၢ်အံၤစ့ဘ့ၤလး အဃိ ကီၢ်အံၣ်စရ့လး ဒီကီၢ်ညါ ပှဲၤဒီးတၢ်ဘူၣ်ထီၣ်ဘါထီၣ်​ ဘဧၤလး ဒီးယဟိဝၤယွၤ အဝံတဖၣ်​ ဘၣ်တၢ်မၤသံ အဝဲသ့ၣ်. လၢတၢ်န့ၣ်အဃိ ယဟိဝၤယွၤ ကမၤဝဲဒ်လဲၣ်. ကစၢ်ယွၤဆှၢလီၤ ဝံအ့ၤလံယၤလၢ ကလဲၤတဲဘၣ်ဝဲ စီၤအၤဃာ်လၢ တၢ်ကစီၣ်တခါ.

ဝံအ့ၤလံယၤတဲဘၣ်​ စီၤအၤဃာ်လၢ ခီဖျိလၢ နမၤတၢ်အၢတၢ်သီအဃိ တၢ်တစူၤလီၤလၢ ကီၢ်အံၣ်စရ့လး အပူၤဘၣ်. မူခိၣ်တစူၤဝဲ သၢနံၣ်ဒီးဃုလါလံ အဃိ တၢ်မုၢ်တၢ်ဘိတဖၣ်​ တမဲထီၣ်ဝဲဂ့ၤဂ့ၤဘၣ်​ ဒီးပှၤဂီၢ်မုၢ်တဖၣ်​ လီၤဒိဝဲ. လၢခံန့ၣ်​ ယဟိဝၤယွၤမၢဝဲ စီၤအ့ၤလံယၤ လဲၤကဒါက့ၤဆူ စီၤအၤဃာ်အအိၣ်. ဒီးစီၤပၤတဲဘၣ်​ စီၤအ့ၤလံယၤလၢ ‘ခီဖျိလၢနၤအဃိ မူခိၣ်တစူၤလီၤဝဲဘၣ်.’ စီၤအ့ၤလံယၤ တဲဆၢက့ၤအီၤလၢ ‘မူခိၣ်တစူၤလီၤဘၣ်န့ၣ်​ တမ့ၢ်လၢ ယဃိဘၣ်. မ့ၢ်လၢနဘူၣ်ထီၣ်ဘါထီၣ်​ ဘဧၤလးအဃိ. ကိးဖှိၣ်ထီၣ်​ ပှၤဂီၢ်မုၢ်တဖၣ်​ ဒီးဘဧၤလးအဝံတဖၣ်​ ဒီးမၢအဝဲသ့ၣ်​ လဲၤထီၣ်လၢ ကစၢၢ်ကၢ်မ့ၤလးအလိၤတက့ၢ်. ဒီးဖဲန့ၣ်န့ၣ်​ ပကမၤကွၢ် တၢ်တမံၤ.’

ပှၤဂီၢ်မုၢ်တဖၣ်​ လဲၤထီၣ်ဝဲဆူ ကစၢၢ်လိၤ. ဒီးစီၤအ့ၤလံယၤ တဲဝဲလၢ ‘ဆၢတဲာ်လီၤသုသးသၢၤ. ယဟိဝၤယွၤမ့မ့ၢ် ယွၤလၢအမ့ၢ်အတီန့ၣ်​ မၤအတၢ်တက့ၢ်. ဘၣ်ဆၣ်​ ဘဧၤလး မ့မ့ၢ်ယွၤလၢ အမ့ၢ်အတီန့ၣ်​ မၤအတၢ်တက့ၢ်. ယကတၤသုဒ်အံၤ. ဘဧၤလးအဝံအဂၤ ၄၅၀ န့ၣ်​ ကြၢးကတဲာ်ကတီၤထီၣ်ဝဲ တၢ်လုၢ်ထီၣ်​ ဒီးကိးထီၣ်ဆူ အယွၤအအိၣ်. မ့မ့ၢ်ယၤန့ၣ်​ ယကကတဲာ်ကတီၤထီၣ်​ တၢ်လုၢ် ဒီးကိးထီၣ်ယဟိဝၤယွၤ. ယွၤလၢအစံးဆၢတၢ် လၢမ့ၣ်အူန့ၣ်​ မ့ၢ်ယွၤလၢအမ့ၢ်အတီ.’ ပှၤဂီၢ်မုၢ်တဖၣ်​ အၢၣ်လီၤတူၢ်လိာ်ဝဲ ဝံအ့ၤလံယၤ အတၢ်ကတိၤ.

ဘဧၤလးအဝံတဖၣ်​ ကတဲာ်ကတီၤထီၣ်ဝဲတၢ်လုၢ်. အဝဲသ့ၣ်​ ကိးထီၣ်ဝဲ အယွၤဒီတနံၤလၢ ‘အိ ဘဧၤလးဧၢ, စံးဆၢပှၤသၢၤ.’ ခီဖျိလၢ ဘဧၤလး တစံးဆၢအဝဲသ့ၣ်​ အဃိ ဝံအ့ၤလံယၤ တဲဆါအဝဲသ့ၣ်. စီၤအ့ၤလံယၤ တဲဘၣ်အဝဲသ့ၣ်လၢ ‘ကိးထီၣ်မ့ၢ်ဒိၣ်သၢၤ ဘၣ်သ့ၣ်သ့ၣ်​ ဘဧၤလး ကမံဘၣ်အသး ဒီးပှၤတဂၤဂၤကဘၣ်​ လဲၤကိးဂဲၤဆၢထၢၣ်အီၤဧါသၢၤ.’ ဘဧၤလးအဝံတဖၣ်​ ကိးထီၣ်ဝဲဘဧၤလး တုၤလီၤလၢ ဟါခီ. ဘၣ်ဆၣ်​ ဘဧၤလး တစံးဆၢအဝဲသ့ၣ်ဘၣ်.

ဝံအ့ၤလံယၤ ပာ်ထီၣ်အတၢ်လုၢ်လၢ တၢ်လုၢ်လီၢ်အဖီခိၣ်​ ဒီးလူဘၣ်စီၣ်ဝဲလၢထံ. ဝံၤဒီးဝံအ့ၤလံယၤ ဃ့ဘါထုကဖၣ်ဝဲလၢ ‘အိ ယဟိဝၤယွၤဧၢ, ဝံသးစူၤ ဒုးသ့ၣ်ညါ ပှၤဂီၢ်မုၢ်တဖၣ်အံၤလၢ နမ့ၢ်ယွၤ လၢအမ့ၢ်အတီ.’ တဘျီဃီန့ၣ်​ ယဟိဝၤယွၤ ဆှၢလီၤဝဲမ့ၣ်အူ လၢမူခိၣ်​ ဒီးအီၣ်ကွံာ်ဝဲ တၢ်လုၢ်အံၤ. ပှၤဂီၢ်မုၢ်တဖၣ်​ ကိးပသူထီၣ်ဝဲလၢ ‘ယဟိဝၤယွၤ မ့ၢ်ယွၤလၢ အမ့ၢ်အတီလီၤ.’ ဝံအ့ၤလံယၤတဲဝဲလၢ ‘ဒုးပူၤဖျဲး ဘဧၤလးအဝံ နီတဂၤတဂ့ၤ.’ ဖဲနံၤအဝဲန့ၣ်​ ဘဧၤလးအဝံအဂၤ ၄၅၀ န့ၣ်ဘၣ်တၢ်မၤသံကွံာ် အဝဲသ့ၣ်.

ဖဲတၢ်အၢၣ်ဆံးဆံးဖိ ဟဲအိၣ်ဖျါထီၣ်လၢ ပီၣ်လဲၣ်အဖီခိၣ်အခါ ဝံအ့ၤလံယၤ တဲဘၣ်စီၤအၤဃာ်လၢ ‘ကလံၤမုၢ်ဟဲဝဲလံ. ဒိးထီၣ်နလ့ၣ်ကဟၣ်​ ဒီးက့ၤဆူနဟံၣ်တက့ၢ်.’ တၢ်အၢၣ်ထီၣ်သူ ဒီးမူခိၣ်ခံးလီၤဝဲ, ကလံၤမုၢ် စးထီၣ်အူတၢ် ဒီးမူခိၣ်စးထီၣ်​ စူၤလီၤဝဲဖးဒိၣ်. ဖဲန့ၣ်အဆၢကတီၢ် တၢ်ယီၤဃ့ ကတၢၢ်ကွံာ်ဝဲ. စီၤအၤဃာ် နီဝဲအလ့ၣ်ကဟၣ်လၢ အချ့ကတၢၢ်. လၢယဟိဝၤယွၤ အတၢ်မၤစၢၤအဃိ ဝံအ့ၤလံယၤ ဃ့ၢ်တလၢကွံာ်ဝဲ စီၤအၤဃာ် အလ့ၣ်ကဟၣ်. ဘၣ်ဆၣ်​ မ့ၢ်ဝံအ့ၤလံယၤ ကဘၣ်လဲၤခီဖျိ တၢ်ကီတၢ်ခဲ တမံၤမံၤဒံးဧါ. ပကကွၢ်သကိးလၢ တၢ်မၤလိလၢခံတခါ.

နီၢ်အံၤစ့ဘ့ၤလး နၢ်ဟူဝဲလၢ ဘဧၤလးအဝံတဖၣ်​ သံဝဲအဃိ အဝဲသးပှံၢ်ထီၣ်တၢ် ဒိၣ်မး. အဃိ နီၢ်အံၤစ့ဘ့ၤလး ဆှၢလီၤဝဲ တၢ်ကစီၣ်လၢ ဝံအ့ၤလံယၤအအိၣ်လၢ ‘ဒ်ဘဧၤလးအဝံတဖၣ်​ သံဝဲအသိး ခဲမုၢ်ဆ့ၣ်န့ၣ်​ နကသံ.’ ဝံအ့ၤလံယၤ ပျံၤတၢ်ဒိၣ်မး အဃိ အဝဲလဲၤဃ့ၢ်အိၣ်ဝဲလၢ ပှၢ်မုၢ်ကနၢအပူၤ. ဝံအ့ၤလံယၤ ဃ့ဘါထုကဖၣ်ဝဲလၢ ‘ယဟိဝၤယွၤဧၢ, ယတူၢ်တပှဲၤလၢၤဘၣ်. ယအဲၣ်ဒိးသံလံ.’ ခီဖျိလၢ ဝံအ့ၤလံယၤ လီၤဘှံးလီၤတီၤဒိၣ်မး အဃိ အဝဲမံဘၣ်အသးလၢ သ့ၣ်တထူၣ်​ အခီၣ်ထံး.

မူခိၣ်ကလူးတဂၤ ဟဲကိးပၢၢ်ထီၣ်​ ဝံအ့ၤလံယၤ ဒီးတဲဘၣ်အီၤလၢ အကလုၢ်ကပုာ်လုးလၢ ‘ဆၢထၢၣ်အီၣ်တၢ်.’ ဝံအ့ၤလံယၤထံၣ်ဝဲ ကိၣ်လၢအကိၢ်ကိၢ်လၢၤလၢၤ ဒီးထံအီဒၢတဖျၢၣ်. ဝံအ့ၤလံယၤ အီၣ်တၢ်ဒီးအီတၢ်ဝံၤ ဒီးက့ၤမံကဒါက့ၤဝဲ. မူခိၣ်ကလူး ကိးပၢၢ်ထီၣ်ကဒီးအီၤ ဒီးတဲဘၣ်အီၤလၢ ‘အီၣ်တၢ်သၢၤ. နလိၣ်ဘၣ်​ တၢ်ဂံၢ်တၢ်ဘါလၢ နတၢ်လဲၤတၢ်က့ၤအဂီၢ်.’ လၢတၢ်န့ၣ်အဃိ ဝံအ့ၤလံယၤပၢၢ်ထီၣ်​ ကဒီး ဒီးအီၣ်တၢ်ဒီးအီတၢ်. ဝံၤဒီး ဝံအ့ၤလံယၤ လဲၤတၢ်အနံၤ ၄၀ ဒီး အနၤ ၄၀ တုၤလီၤလၢ ကစၢၢ်ဃိၤရ့း. ဖဲန့ၣ်န့ၣ်​ ဝံအ့ၤလံယၤ လဲၤမံဝဲလၢလ့ပူၤ. ဘၣ်ဆၣ်​ ယဟိဝၤယွၤ တဲဘၣ်အီၤလၢ ‘ဝံအ့ၤလံယၤဧၢ, နဟဲမၤတၢ်မနုၤ ဖဲအံၤလဲၣ်.’ ဝံအ့ၤလံယၤ တဲဆၢက့ၤဝဲလၢ ‘ပှၤအံၣ်စရ့လးဖိတဖၣ်​ တတီဒီး အတၢ်အၢၣ်လီၤအီလီၤဒီးနၤ လၢၤဘၣ်. အဝဲသ့ၣ်​ မၤဟးဂီၤကွံာ် နတၢ်လုၢ်ထီၣ်တၢ်အလီၢ် ဒီးမၤသံကွံာ် နဝံတဖၣ်. ခဲအံၤ အဝဲသ့ၣ်​ ဂုာ်ကျဲးစၢး မၤသံယၤစ့ၢ်ကီး.’

ယဟိဝၤယွၤတဲဘၣ်​ ဝံအ့ၤလံယၤလၢ ‘လဲၤဂဲၤဆၢထၢၣ်လၢ ကစၢၢ်လိၤ.’ အဆိကတၢၢ်န့ၣ်​ ဝံအ့ၤလံယၤ ထံၣ်ဘၣ်ဝဲ ကလံၤမုၢ်ဖးဒိၣ်​ ဟဲအူထီၣ်ဝဲ. ဝံၤဒီး ဟီၣ်ခိၣ်ဟူးဝးထီၣ်ဝဲဆူၣ်ဆူၣ်​ ဒီးမ့ၣ်အူ ဟဲဖျိးထီၣ်ဝဲ ဒီဒူၣ်ဒီထၢ. လၢခံန့ၣ်​ ဝံအ့ၤလံယၤနၢ်ဟူဝဲ တၢ်ကလုၢ် ကဖီလီတခါ. ဝံအ့ၤလံယၤ ကးဘၢအမဲာ်လၢ အဆ့ကၤ ဒီးလဲၤဆၢထၢၣ်ဝဲလၢ လ့ကအိအချၢ. ဝံၤဒီး ယဟိဝၤယွၤ သံကွၢ်အီၤလၢ ဘၣ်မနုၤအဃိ အဝဲဘၣ်ဃ့ၢ်ကွံာ်ဝဲလဲၣ်. ဝံအ့ၤလံယၤ တဲဆၢက့ၤ ယဟိဝၤယွၤလၢ ‘ပှၤလၢ အဘူၣ်ထီၣ်ဘါထီၣ်နၤန့ၣ်​ အိၣ်တ့ၢ်ထဲ ယၤတဂၤဧိၤလီၤ.’ ဘၣ်ဆၣ်​ ယဟိဝၤယွၤ တဲဘၣ်အီၤလၢ ‘ပှၤလၢအဘူၣ်ထီၣ်ဘါထီၣ်ယၤန့ၣ်​ တအိၣ်တ့ၢ်ထဲ နၤတဂၤဧိၤဘၣ်. ပှၤလၢကီၢ်အံၣ်စရ့လးအပူၤ လၢအဘူၣ်ထီၣ်ဘါထီၣ်ယၤန့ၣ်​ အိၣ်ဒံးဝဲအဂၤ ၇,၀၀၀. က့ၤဃုထၢထီၣ်​ စီၤအလံၤၡါလၢ ကကဲထီၣ်​ ဝံလၢနလီၢ်.’ တဘျီဃီန့ၣ်​ ဝံအ့ၤလံယၤ က့ၤဝဲဒီးမၤထွဲဝဲ ဒ်ယဟိဝၤယွၤ မၢအီၤအသိး. နမ့ၢ်မၤတၢ်လၢ ယဟိဝၤယွၤ မၢနမၤန့ၣ်​ နဆိကမိၣ်လၢ ယဟိဝၤယွၤ ကမၤစၢၤနၤစ့ၢ်ကီးဧါ. ယဟိဝၤယွၤ ကမၤစၢၤနၤ. ခဲအံၤ ပကဃုသ့ၣ်ညါအါထီၣ်​ တၢ်မနုၤမၤအသး ဖဲတၢ်ယီၤဃ့ အိၣ်ထီၣ်ဝဲ အဆၢကတီၢ်လဲၣ်.