ဖဲတၢ်ယီၤဃ့ အဆၢကတီၢ်န့ၣ်​ ယဟိဝၤယွၤတဲဘၣ်​ ဝံအ့ၤလံယၤလၢ ‘လဲၤလၢ ဝ့ၢ်စၤရဖၤသးအပူၤ. မုၣ်ကမဲတဂၤ ကဒုးအီၣ်ဒုးအီနၤ.’ ဖဲဝံအ့ၤလံယၤ လဲၤတုၤလၢ ဝ့ၢ်အကျဲနုာ်လီၤအခါ အဝဲထံၣ်ဘၣ်ဝဲ မုၣ်ကမဲလၢ အဖှီၣ်အယာ်တဂၤ ထၢဖှိၣ်ထီၣ်ဝဲသ့ၣ်မုၣ်. ဒီးဝံအ့ၤလံယၤ ဃ့အီထံတခွးလၢအအိၣ်. ဖဲမုၣ်ကမဲအံၤ ကက့ၤဟံးန့ၢ်အီၤထံအခါ ဝံအ့ၤလံယၤ တဲဘၣ်အီၤလၢ ‘ဝံသးစူၤဟဲစိာ်န့ၢ်ယၤ ကိၣ်တဘ့ၣ်နီၤ.’ ဘၣ်ဆၣ်​ မုၣ်ကမဲ တဲဆၢက့ၤအီၤလၢ ‘ယကိၣ်တအိၣ်ဘၣ်. ယအိၣ်ဒီး ကိၣ်ကမူၣ်​ ဒီးသိထဲတစဲးဖိလၢ ယၤဒီးယဖိခွါအဂီၢ်.’ ဒီးဝံအ့ၤလံယၤ တဲဘၣ်မုၣ်ကမဲလၢ ‘ယဟိဝၤယွၤ အၢၣ်လီၤအီလီၤဝဲလၢ နမ့ၢ်တ့န့ၢ်ယၤကိၣ်န့ၣ်​ နကိၣ်ကမူၣ်​ ဒီးနသိကအိၣ်ဒံး တုၤလီၤလၢ တၢ်စူၤလီၤဝဲတစု.’

လၢတၢ်န့ၣ်အဃိ မုၣ်ကမဲတဂၤအံၤ က့ၤလၢဟံၣ်​ ဒီးတ့ဝဲကိၣ်လၢ ယဟိဝၤယွၤ အဝံအဂီၢ်. ဒ်ယဟိဝၤယွၤ အၢၣ်လီၤအီလီၤဝဲအသိး ဖဲတၢ်ယီၤဃ့ အဆၢကတီၢ်န့ၣ်​ မုၣ်ကမဲဒီးအဖိခွါ အတၢ်အီၣ်တၢ်အီ အိၣ်ဝဲထီဘိ. ကိၣ်ကမူၣ်ဒီးသိလၢ မုၣ်ကမဲ အသပၢၤအပူၤန့ၣ်​ တလၢာ်ဝဲ နီတဘျီဘၣ်.

လၢခံ တၢ်လၢအလီၤသူၣ်အုးသးအုး ဟဲကဲထီၣ်အသးတခါ. မုၣ်ကမဲ အဖိခွါဆိးက့ ဒီးသံဝဲ. မုၣ်ကမဲဃ့ကညး ဝံအ့ၤလံယၤလၢ ကမၤစၢၤအီၤ. ဝံအ့ၤလံယၤ လဲၤစိာ်ထီၣ်ဖိသၣ်ဆူ ဟံၣ်ဖီခိၣ်. ဝံအ့ၤလံယၤပာ်လီၤ ဖိသၣ်လၢ လီၢ်မံခိၣ်​ ဒီးဃ့ဘါထုကဖၣ်ဝဲလၢ ‘ယဟိဝၤယွၤဧၢ, ဝံသးစူၤ မၤသမူထီၣ်က့ၤ ဖိသၣ်အံၤ.’ ယဟိဝၤယွၤ မၤသမူထီၣ်က့ၤ ဖိသၣ်ပိာ်ခွါတဂၤအံၤန့ၣ်​ မ့ၢ်တၢ်လီၤလးလၢ အလီၤကမၢကမၣ်ဖးဒိၣ်တခါ. မ့ၢ်လၢဖိသၣ်တဂၤအံၤ မ့ၢ်ပှၤအဆိကတၢၢ် တဂၤလၢ ဘၣ်တၢ်မၤသမူထီၣ်က့ၤအီၤ. ဒီးမုၣ်ကမဲတဂၤအံၤ ဒီးအဖိခွါန့ၣ်​ တမ့ၢ်ပှၤအံၣ်စရ့လးဖိဘၣ်.

ဖိသၣ်တဂၤအံၤ ဂဲၤဆၢထၢၣ်သမူထီၣ်က့ၤဝဲ ဒီးဝံအ့ၤလံယၤ တဲဘၣ်မုၣ်ကမဲလၢ ‘ကွၢ်လၢအံၤ. နဖိခွါ သမူထီၣ်က့ၤဝဲလံ.’ မုၣ်ကမဲအံၤ သးခုဝဲဒိၣ်မး ဒီးတဲဘၣ်ဝံအ့ၤလံယၤလၢ ‘ယသ့ၣ်ညါသပှၢ်ကတၢၢ်လၢ နမ့ၢ်ယွၤအခ့အပှၤတဂၤ. ဒီးကယဲၢ်တၢ်လၢ နတဲခဲလၢာ်န့ၣ်​ နတဲဒ် ယဟိဝၤယွၤ မၢနတဲအသိး.’

ဖဲစီၤပၤအၤဃာ် ဆၢထၢၣ်ဝဲလၢ အနီအပဲတြီဖိအမဲာ်ညါလၢ ဝ့ၢ်ယံးစရ့လးအပူၤန့ၣ်​ အဝဲကထံၣ်စိဝဲ စီၤနၤဘိးအစပံးလီၢ်. စီၤအၤဃာ်န့ၣ်​ အဲၣ်ဒိးန့ၢ်ဝဲ စပံးလီၢ်အံၤ အဃိအဝဲဃ့ပှ့ၤဝဲလၢ စီၤနၤဘိး အအိၣ်. ဘၣ်ဆၣ်​ စီၤနၤဘိးတဆါန့ၢ် စီၤအၤဃာ်ဘၣ်, မ့ၢ်လၢယဟိဝၤယွၤ အတၢ်သိၣ်တၢ်သီ အိၣ်ဝဲလၢ ဟီၣ်ခိၣ်လီၢ်လၢ ပှၤန့ၢ်သါဝဲန့ၣ်​ ပှၤတဘၣ်ဆါအီၤဘၣ်. ခီဖျိလၢ စီၤနၤဘိးဒိကနၣ်​ ယွၤအတၢ်သိၣ်တၢ်သီ အဃိ မ့ၢ်စီၤအၤဃာ် ပာ်ကဲအီၤဧါ. တပာ်ကဲဝဲဘၣ်. စီၤအၤဃာ် သးထီၣ်တၢ်ဖးဒိၣ်. ဒီးစီၤအၤဃာ် အသးဘၣ်ဒိဝဲဒိၣ်မး တုၤလၢ အတဟးထီၣ်လၢ အဒၢးပူၤ ဒီးတအီၣ်တၢ်အီတၢ်လၢၤဘၣ်.

နီၢ်ပၤမုၣ်​ အံၤစ့ဘ့ၤလး လၢအမ့ၢ် စီၤအၤဃာ်အမါလၢ အအၢအသီတဂၤအံၤ တဲဘၣ်အီၤလၢ ‘နမ့ၢ်ပှၤအံၣ်စရ့လးဖိ အစီၤပၤ. တၢ်လၢနအဲၣ်ဒိးန့ၣ်​ နကဘၣ်န့ၢ်. စပံးလီၢ်လၢ နအဲၣ်ဒိးန့ၢ်န့ၣ်​ ယကမၤန့ၢ်နၤ.’ နီၢ်အံၤစ့ဘ့ၤလး ကွဲးလံာ်ဆူ ပှၤသူၣ်က့သးပှၢ်တဖၣ်အအိၣ်. ဒီးနီၢ်အံၤစ့ဘ့ၤလး မၤလိာ်အဝဲသ့ၣ်လၢ သုကဘၣ်ပာ်တၢ်ကမၣ်လၢ စီၤနၤဘိးအလိၤ လၢအဝဲဆိၣ်အၢ ကစၢ်ယွၤ, ဝံၤဒီး သုကဘၣ်​ ကွံာ်သံအီၤလၢလၢၢ်. ဒီးပှၤသူၣ်က့သးပှၢ်တဖၣ်​ မၤဝဲဒ်နီၢ်အံၤစ့ဘ့ၤလး မၢအဝဲသ့ၣ်အသိး. လၢခံ နီၢ်အံၤစ့ဘ့ၤလးတဲဘၣ်​ စီၤအၤဃာ်လၢ ‘စီၤနၤဘိးသံလံ. စပံးလီၢ်န့ၣ်​ ကဲထီၣ်နတၢ်လံ.’

နီၢ်အံၤစ့ဘ့ၤလး တမၤသံ စီၤနၤဘိး ထဲတဂၤဧိၤဘၣ်. အဝဲမၤသံစ့ၢ်ကီး ပှၤအါဂၤလၢ အအဲၣ်ယဟိဝၤယွၤ. အဝဲဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်​ ဒီးမၤဝဲတၢ်အၢတၢ်သီလၢ အဂၤစ့ၢ်ကီး. တၢ်အၢတၢ်သီလၢ နီၢ်အံၤစ့ဘ့ၤလး မၤဝဲတဖၣ်န့ၣ်​ ယဟိဝၤယွၤ ထံၣ်ဝဲခဲလၢာ်. လၢတၢ်န့ၣ်အဃိ ယဟိဝၤယွၤ ကမၤဝဲဒ်လဲၣ်.

ဖဲစီၤအၤဃာ် သံဝံၤအလီၢ်ခံ အဖိခွါစီၤယဟိရၣ်​ ကဲထီၣ်စီၤပၤလၢ အလီၢ်. ယဟိဝၤယွၤ ဆှၢလီၤဝဲ ပိာ်ခွါတဂၤလၢ အမံၤမ့ၢ် စီၤယ့ၤဟူလၢ ကလဲၤစံၣ်ညီၣ်ဝဲ နီၢ်အံၤစ့ဘ့ၤလး ဒီးအဟံၣ်ဖိဃီဖိ.

စီၤယ့ၤဟူ ဒိးထီၣ်ဝဲအလ့ၣ်ကဟၣ်​ ဒီးလဲၤဝဲဆူ ဝ့ၢ်ယံးစရ့လး လၢအမ့ၢ် နီၢ်အံၤစ့ဘ့ၤလး အိၣ်တၢ်လီၢ်. စီၤယဟိရၣ်စ့ၢ်ကီး ဟဲဒိးဝဲ လ့ၣ်ကဟၣ်​ ဒ်သိးကလဲၤသဂၢၢ်ဝဲ စီၤယ့ၤဟူအခိၣ်. ဒီးစီၤယဟိရၣ်​ တဲဘၣ်စီၤယ့ၤဟူလၢ ‘မ့ၢ်တၢ်ဃူတၢ်ဖိးအိၣ်လၢ ပဘၢၣ်စၢၤဧါ.’ စီၤယ့ၤဟူ တဲဘၣ်အီၤလၢ ‘နမိနီၢ်အံၤစ့ဘ့ၤလး မ့ၢ်မၤဒံးတၢ်အၢတၢ်သီန့ၣ်​ တၢ်ဃူတၢ်ဖိးအိၣ်ထီၣ်လၢ ပဘၢၣ်စၢၤ တသ့ဘၣ်.’ စီၤယဟိရၣ်​ ဂုာ်ကျဲးစၢး ဃၣ်တရံး အလ့ၣ်ကဟၣ်အခိၣ်​ ဒ်သိး ကဃ့ၢ်ကွံာ်ဝဲ လၢအယံၤ. ဘၣ်ဆၣ်​ စီၤယ့ၤဟူ ခးအီၤလၢချံၣ်​ ဒီးစီၤယဟိရၣ်သံဝဲ.

ဝံၤဒီး စီၤယ့ၤဟူလဲၤဝဲဆူ နီၢ်အံၤစ့ဘ့ၤလးအနီ. ဖဲနီၢ်အံၤစ့ဘ့ၤလး နၢ်ဟူဝဲလၢ စီၤယ့ၤဟူဟဲဝဲအခါ အဝဲက့ၤဖှူထီၣ်အမဲာ်, မၤဂ့ၤထီၣ်အခိၣ်ဆူၣ်​ ဒီးလဲၤအိၣ်ခိးအီၤလၢ အဟံၣ်ဖီခိၣ်​ အပဲတြီဖိ အကပၤ. ဖဲစီၤယ့ၤဟူ ဟဲတုၤဝဲအခါ နီၢ်အံၤစ့ဘ့ၤလး တဲဆဲးအဲးအီၤ. စီၤယ့ၤဟူ ကိးပသူထီၣ်ဆူ နီၢ်အံၤစ့ဘ့ၤလး အပျဲၢ်တဖၣ်အအိၣ်လၢ ‘တၢၤလီၤကွံာ် နီၢ်အံၤစ့ဘ့ၤလးလၢ ဟီၣ်ခိၣ်လိၤ.’ တဘျီဃီန့ၣ်​ အဝဲသ့ၣ်​ ဆီၣ်လီၤတဲာ် နီၢ်အံၤစ့ဘ့ၤလးလၢ ပဲတြီဖိအချၢ ဒီးနီၢ်အံၤစ့ဘ့ၤလး လီၤတဲာ်သံလၢ ဟီၣ်ခိၣ်လိၤ.

ဝံၤဒီး စီၤယ့ၤဟူမၤသံဝဲ စီၤအၤဃာ်အဖိခွါအဂၤ ၇၀ ဒီးမၤလီၤမၢ်ကွံာ်ဝဲ ဘဧၤလး အတၢ်ဘူၣ်တၢ်ဘါလၢ ကီၢ်အံၣ်စရ့လးအပူၤ. ခီဖျိလၢ တၢ်ဂ့ၢ်အံၤအဃိ ပထံၣ်ဘၣ်လၢ ယဟိဝၤယွၤ သ့ၣ်ညါတၢ်ခဲလၢာ် ဒီးဖဲအဆၢကတီၢ်မ့ၢ်ဘၣ်န့ၣ်​ အဝဲကစံၣ်ညီၣ်ဝဲ ပှၤလၢအမၤ တၢ်အၢတၢ်သီ.