ပှၤလၢတကဲ ယဟိဝၤပှၤအုၣ်အသးလၢၤဘၣ်န့ၣ် ယဟိဝၤပှၤအုၣ်အသးတဖၣ် ရ့အီၤဒ်လဲၣ်

ပဂုာ်ကျဲးစၢးရ့ဒီး ပှၤကိးဂၤဒဲးလၢ တၢ်အဲၣ်, တၢ်ပာ်ကဲ ဒီးတၢ်သူၣ်ဂ့ၤသးဝါအပူၤ. ယဟိဝၤပှၤအုၣ်အသး တဂၤဂၤ အနီၢ်သး မ့ၢ်လီၤစၢ် မ့တမ့ၢ် တဘူၣ်ထီၣ်ဘါထီၣ် ယဟိဝၤယွၤ လၢၤဘၣ်န့ၣ် ပဂုာ်ကျဲးစၢး ဆဲးကျိးဒီးအီၤ ဒီးပာ်ဖျါထီၣ်လၢ ပအဲၣ်အီၤ ဒီးပမၤစၢၤအီၤ ဒ်သိး အကသုးဘူးကဒါက့ၤအသး လၢကစၢ်ယွၤအအိၣ်.—လူၤကၣ် ၁၅:၄-၇.

တဘျီတခီၣ် ပှၤတဂၤ ကဘၣ်တၢ်ထုးထီၣ်ကွံာ်အီၤ လၢတၢ်အိၣ်ဖှိၣ်ပူၤ ခီဖျိတၢ်လၢ အမၤဝဲ တမံၤမံၤအဃိ. (၁ ကရံၣ်သူး ၅:၁၃) ဘၣ်ဆၣ် တချုးလၢ အဘၣ်တၢ်ထုးထီၣ်ကွံာ်အီၤ ဒံးဘၣ်န့ၣ် မ့ၢ်လၢပအဲၣ်အီၤဒိၣ်မး အဃိ ပဂုာ်ကျဲးစၢး မၤစၢၤအီၤ ဒ်သိး အကဆဲးအိၣ်ဘၣ်လၢ တၢ်အိၣ်ဖှိၣ်ပူၤ. ပှၤတဂၤမ့ၢ်ဘၣ်တၢ်ထုးထီၣ်ကွံာ်အီၤ လၢတၢ်အိၣ်ဖှိၣ်ပူၤဒၣ်လဲာ် ပဆဲးပာ်ဖျါထီၣ် တၢ်အဲၣ် ဒီးတၢ်ပာ်ကဲ လၢအဖီခိၣ် ဒ်လံာ်စီဆှံ တဲပှၤအသိး.—မၢ်ကူး ၁၂:၃၁; ၁ ပ့းတရူး ၂:၁၇.

ဘၣ်မနုၤအဃိ ပထုးထီၣ်ကွံာ် ပှၤတဂၤလၢ တၢ်အိၣ်ဖှိၣ်ပူၤလဲၣ်

ခရံာ်ဖိတဂၤ မ့ၢ်မၤဘၣ် တၢ်ကမၣ်ဖးဒိၣ် ဒီးတဆီတလဲအသးဘၣ်န့ၣ် ပှၤကြၢးထုးထီၣ်ကွံာ်အီၤ လၢတၢ်အိၣ်ဖှိၣ်ပူၤ.a (၁ ကရံၣ်သူး ၅:၁၁-၁၃) လံာ်စီဆှံ ပာ်ဖျါထီၣ်ဝဲ တၢ်ကမၣ်ဖးဒိၣ်တဖၣ်အဂ့ၢ် လၢပှၤမ့ၢ်မၤအီၤန့ၣ် ပှၤဘၣ်တၢ်ထုးထီၣ်ကွံာ်လၢ တၢ်အိၣ်ဖှိၣ်ပူၤသ့. အဒိ တၢ်ကမၣ်ဖးဒိၣ်တနီၤန့ၣ် မ့ၢ်ဝဲ တၢ်အဲၣ်ဘၢမါအဲၣ်ဘၢဝၤ, တၢ်အီမူၤသံး, တၢ်မၤသံ ပှၤကညီ, တၢ်မၤဆူၣ်မၤစိးလၢ ဟံၣ်ပူၤဃီပူၤ ဒီးတၢ်ဟုၣ်တၢ်.—၁ ကရံၣ်သူး ၆:၉, ၁၀; ကလၤတံ ၅:၁၉-၂၁; ၁ တံၤမသ့း ၁:၉, ၁၀.

ဘၣ်ဆၣ် ပှၤလၢအမၤဘၣ် တၢ်ကမၣ်ဖးဒိၣ်န့ၣ် ပှၤတထုးထီၣ်ကွံာ်အီၤ လၢတၢ်အိၣ်ဖှိၣ်ပူၤ တဘျီဃီဘၣ်. အဆိကတၢၢ်န့ၣ် တၢ်အိၣ်ဖှိၣ်သးပှၢ်တဖၣ်b ကဂုာ်ကျဲးစၢး မၤစၢၤအီၤ ဒ်သိး ကဆီတလဲအသး. (ရိမ့ၤ ၂:၄) အဝဲသ့ၣ် ကပာ်ဖျါထီၣ် တၢ်အဲၣ်တၢ်ကွံ, ရ့ဒီးအီၤဂ့ၤဂ့ၤ ဒီးတဲတၢ်ဒီးအီၤ မုာ်မုာ် ဒ်သိး အကသးအိၣ် ဆီတလဲအသးအဂီၢ်. (ကလၤတံ ၆:၁) အဝဲသ့ၣ် မၤဝဲဒ်န့ၣ်အဃိ ဘၣ်သ့ၣ်သ့ၣ် ပှၤလၢအမၤကမၣ်တၢ်တဂၤ ကသ့ၣ်ညါလီၤက့ၤ အတၢ်ကမၣ် ဒီးကပီၢ်ယၢ်လီၤသး. (၂ တံၤမသ့း ၂:၂၄-၂၆) တၢ်အိၣ်ဖှိၣ်သးပှၢ်တဖၣ် ကဆဲးမၤစၢၤအီၤ တဘျီဝံၤတဘျီ ဘၣ်ဆၣ် အဝဲမ့ၢ်တပီၢ်ယၢ်လီၤအသး ဒီးဆဲးမၤတၢ်လၢ လံာ်စီဆှံ တဲဝဲလၢ အကမၣ်န့ၣ် ပှၤကဘၣ်ထုးထီၣ်ကွံာ်အီၤ လၢတၢ်အိၣ်ဖှိၣ်ပူၤ. တၢ်အိၣ်ဖှိၣ်သးပှၢ် ကဘိးဘၣ်သ့ၣ်ညါလီၤဝဲ လၢတၢ်အိၣ်ဖှိၣ်ပူၤ လၢပှၤတဂၤအံၤတကဲ ယဟိဝၤပှၤအုၣ်အသးလၢၤဘၣ်.

ပှၤမ့ၢ်ထုးထီၣ်ကွံာ် ပှၤလၢအပာ်လီၤအသးလၢ ကဆဲးမၤ တၢ်ကမၣ်တဂၤ လၢတၢ်အိၣ်ဖှိၣ်ပူၤန့ၣ် ကကဲဘျုးဝဲ ဒ်လဲၣ်. တၢ်အိၣ်ဖှိၣ် မၤဝဲဒ်န့ၣ်အဃိ လီၤဂာ်ဒ်သိးဒီး အဆီၣ်ထွဲဝဲ ကစၢ်ယွၤ အတၢ်ဘျၢလၢ ဘၣ်ဃးဒီး တၢ်သကဲာ်ပဝး လၢအကဆှီ. ဒီးအကဲထီၣ် တၢ်ဒီသဒၢလၢ တၢ်အိၣ်ဖှိၣ်ဖိတဖၣ်အဂီၢ်, ဒ်သိး အဝဲသ့ၣ် တမၤဒ် ပှၤတဂၤန့ၣ်တဂ့ၤ. (၁ ကရံၣ်သူး ၅:၆; ၁၅:၃၃; ၁ ပ့းတရူး ၁:၁၆) တကးဒံးဘၣ် ပှၤမၤဒ်န့ၣ်အဃိ ဘၣ်သ့ၣ်သ့ၣ် ပှၤလၢအမၤတၢ်ကမၣ်တဂၤ ကသးအိၣ် ပတုာ်ကွံာ် အတၢ်မၤလၢ အကမၣ် ဒီးကဆီတလဲအသး.—ဧ့ၤဘြံၤ ၁၂:၁၁.

ယဟိဝၤ ပှၤအုၣ်အသးတဖၣ် ရ့ဒီးပှၤလၢ အဘၣ်တၢ်ထုးထီၣ်ကွံာ်အီၤ လၢအတၢ်အိၣ်ဖှိၣ်ပူၤတဖၣ် ဒ်လဲၣ်

လံာ်စီဆှံ တဲဝဲခရံာ်ဖိတဖၣ်လၢ “တဘၣ်ရ့လိာ်သုသးဒီး” ပှၤလၢအဘၣ် တၢ်ထုးထီၣ်ကွံာ်အီၤလၢ တၢ်အိၣ်ဖှိၣ်ပူၤ ဒီး “အီၣ်သကိးတၢ်ဒီး ပှၤဒ်န့ၣ်တဂၤဒၣ်လဲာ်တဂ့ၤ.” (၁ ကရံၣ်သူး ၅:၁၁) အဃိ ပတရ့လိာ်မုာ်လိာ်သးဒီး ပှၤလၢအဘၣ် တၢ်ထုးထီၣ်ကွံာ်အီၤ လၢတၢ်အိၣ်ဖှိၣ်ပူၤဘၣ်. သနာ်က့ ပတကနၣ်ဃုာ်အီၤ နီတစဲးဘၣ်ဒု တမ့ၢ်စ့ၢ်ကီးဘၣ်. ပပာ်ဖျါထီၣ် တၢ်ပာ်ကဲ လၢအဖီခိၣ်ဒံး. အဝဲဟဲထီၣ်တၢ်အိၣ်ဖှိၣ်သ့ ဒီးဖဲအဟဲထီၣ် တၢ်အိၣ်ဖှိၣ်အခါ ဘၣ်သ့ၣ်သ့ၣ် ယဟိဝၤပှၤအုၣ်အသးတနီၤ ကလဲၤဆၢဂ့ၤဆၢဝါအီၤ.c ဒီးအမ့ၢ်အဲၣ်ဒိး ဟဲက့ၤလၢ တၢ်အိၣ်ဖှိၣ်ပူၤန့ၣ် အဃ့တၢ်မၤစၢၤ လၢတၢ်အိၣ်ဖှိၣ်သးပှၢ်တဖၣ် အအိၣ်သ့.

ပှၤလၢအဘၣ်တၢ်ထုးထီၣ်အီၤ လၢတၢ်အိၣ်ဖှိၣ်ပူၤတဂၤ အသးသမူတံၤသကိး ဒီးအဖိ မ့ၢ်ကဲ ယဟိဝၤပှၤအုၣ်အသးဟီမီၤ. အဝဲတဘူၣ်ထီၣ်ဘါထီၣ် ယဟိဝၤယွၤ တပူၤဃီဒီး အဟံၣ်ဖိဃီဖိ လၢၤဘၣ်သနာ်က့ ဟံၣ်ဖိဃီဖိ တၢ်ဘၣ်ထွဲအိၣ်ဒံး. အဃိ အဝဲသ့ၣ် မ့ၢ်အိၣ်ဟံၣ်တဖျၢၣ်ဃီန့ၣ် အဝဲသ့ၣ် ကဆဲးရ့လိာ်အသး ဒ်ဟံၣ်ဖိဃီဖိအသိး ဒီးကြၢးပာ်ဖျါထီၣ် တၢ်အဲၣ်တၢ်ကွံ လၢတဂၤဒီးတဂၤ အဖီခိၣ်ဒံး.

ပှၤလၢအဘၣ် တၢ်ထုးထီၣ်ကွံာ်အီၤ လၢတၢ်အိၣ်ဖှိၣ်ပူၤတဂၤ မၢတၢ်အိၣ်ဖှိၣ်သးပှၢ်တဖၣ် ဟဲဟးအိၣ်သကိးအီၤသ့. ဖဲတၢ်အိၣ်ဖှိၣ်သးပှၢ်တဖၣ် လဲၤအိၣ်သကိးအီၤအခါ အဝဲသ့ၣ် ကဟ့ၣ်ကူၣ်အီၤ လၢလံာ်စီဆှံပူၤ ဒီးဟ့ၣ်ဂံၢ်ဟ့ၣ်ဘါအီၤ လၢတၢ်အဲၣ်တၢ်ကွံပူၤ ဒ်သိး အကပီၢ်ယၢ်လီၤအသး ဒီးဟဲက့ၤဆူ ကစၢ်ယွၤအအိၣ်. (စကၤရယၤ ၁:၃) အဝဲမ့ၢ်ပတုာ်ကွံာ် တၢ်မၤလၢအကမၣ် ဒီးပာ်ဖျါထီၣ်လၢ အဘၣ်သးအိၣ်မူဒ် လံာ်စီဆှံ အတၢ်သိၣ်တၢ်သီအသိး နီၢ်ကီၢ်န့ၣ် ပှၤတူၢ်လိာ်က့ၤအီၤ လၢတၢ်အိၣ်ဖှိၣ်ပူၤသ့. တၢ်အိၣ်ဖှိၣ်က “ပျၢ်အတၢ်ကမၣ် လၢသးဒီဖျၢၣ် ဒီးမၤမုာ်ထီၣ်က့ၤအီၤ” ဒ်ခရံာ်ဖိလၢညါ လၢဝ့ၢ်ကရံၣ်သူးအပူၤ ပျၢ်ကွံာ်ပှၤမၤကမၣ်တၢ် လၢအဆီတလဲ အတၢ်အိၣ်မူတဂၤအသိး.—၂ ကရံၣ်သူး ၂:၆-၈.

လၢအပူၤကွံာ် ပှၤလၢဘၣ်တၢ်ထုးထီၣ်ကွံာ်အီၤလၢ တၢ်အိၣ်ဖှိၣ်ပူၤ ဒီးအဟဲက့ၤလံတဖၣ်န့ၣ် တူၢ်ဘၣ်ဝဲဒ်လဲၣ်

ယဟိဝၤပှၤအုၣ်အသးတနီၤ လၢဘၣ်တၢ်ထုးထီၣ်ကွံာ်အီၤ လၢတၢ်အိၣ်ဖှိၣ်ပူၤန့ၣ် လၢခံအဝဲသ့ၣ် ဟဲက့ၤကဒါက့ၤ လၢကစၢ်ယွၤအအိၣ်. ပကကွၢ်သကိး တၢ်လၢအဝဲသ့ၣ် တဲဝဲတနီၤ.

“ပှၤထုးထီၣ်ယၤလၢ တၢ်အိၣ်ဖှိၣ်ပူၤ အိၣ်အနံၣ်အါမးလံ. အဃိ ဖဲယဟဲက့ၤလၢ တၢ်အိၣ်ဖှိၣ်အခါ ယဆိကမိၣ် တၢ်အိၣ်ဖှိၣ်သးပှၢ်တဖၣ် ကဘၣ်သးသ့ၣ်ညါ တၢ်ကမၣ်လၢ ယမၤတ့ၢ်အီၤ ကိးမံၤဒဲး. ဘၣ်ဆၣ် တမ့ၢ်ဒ်န့ၣ်ဘၣ်. အဝဲသ့ၣ်တဲဝဲလၢ ‘ပဘၣ်သးလၢ နကသးစၢၢ်ဆၢလၢ တၢ်လၢနကဆဲးမၤအီၤ ဆူညါတဖၣ်.’ အဃိ ယသးဖှံလီၤ ဖးဒိၣ်ညါ.”—မရံယၤ, အမဲရကၤ.

“ဒီပုၢ်ဝဲၢ်မုၣ်ခွါတဖၣ် အိၣ်ခိးကွၢ်လၢ်လၢ ယကဟဲက့ၤကဒါက့ၤ အဃိ ယတူၢ်ဘၣ်လၢ ယလုၢ်ယပှ့ၤအိၣ်. အဝဲသ့ၣ် မၤစၢၤယၤဒ်သိး ယကတူၢ်ဘၣ်လၢ ယဟိဝၤယွၤ ဒီးအဝဲသ့ၣ် ပျၢ်ကွံာ်ယတၢ်ကမၣ် ဒီးယကဆဲးလဲၤဆူညါ. ထီဘိန့ၣ် တၢ်အိၣ်ဖှိၣ်သးပှၢ်တဖၣ် မၤစၢၤယၤဒ်သိး ယတၢ်ရ့လိာ်သးဒီး ယဟိဝၤယွၤ ကဂ့ၤထီၣ်က့ၤ. အဝဲသ့ၣ်ဟ့ၣ်ကူၣ်ယၤ ဒီးမၤစၢၤယၤ ဒ်သိး ယကပလၢၢ်ဘၣ် ယဟိဝၤယွၤ အတၢ်အဲၣ် ဒီးအတၢ်ပာ်လုၢ်ပာ်ပှ့ၤယၤ.”—မဲလခဲၤ, ကီၢ်စံၣ်အဲရၢၣ်လံၣ်အိၣ်.

“ယသ့ၣ်ညါဘၣ်လၢ ယဟိဝၤယွၤ အဲၣ်အပှၤဂီၢ်မုၢ်တဖၣ်ဒိၣ်မး အဃိ အဒီသဒၢ အတၢ်ကရၢကရိ ဒ်သိး ကအိၣ်ကဆှဲကဆှီအဂီၢ်. ပှၤတနီၤ ဆိကမိၣ်ဝဲလၢ တၢ်ကရၢကရိ အတၢ်သိၣ်တၢ်သီတခါအံၤ ဃံးတလၢ ဘၣ်ဆၣ် နီၢ်ကီၢ်န့ၣ် ပှၤကြၢးမၤဒ်န့ၣ် ဒီးအမ့ၢ်ဝဲ ကျဲလၢအအိၣ်ဒီး တၢ်အဲၣ်တၢ်ကွံ. ပပၢ်ကစၢ်ယွၤန့ၣ် အိၣ်ဒီးတၢ်အဲၣ်တၢ်ကွံ ဒီးပျၢ်ကွံာ် တၢ်ကမၣ်အဃိ ယသးခုဒိၣ်မး.”—စဲဒံ, အမဲရကၤ.