ဖဲပှၤဒုၣ်ဒွဲၣ်စံးအၢ ယဟိဝၤပှၤအုၣ်အသးတဖၣ်အခါ ဘၣ်မနုၤအဃိ အဝဲသ့ၣ် တက့ၤစံးဆၢဝဲ ကိးဘျီဒဲးလဲၣ်

ယဟိဝၤပှၤအုၣ်အသးတဖၣ် မၤထွဲဝဲ လံာ်စီဆှံ အတၢ်ဟ့ၣ်ကူၣ်အဃိ ပှၤဒုၣ်ဒွဲၣ်စံးအၢ ဒီးပာ်ဒ့ၣ်ပာ်ကမၣ် အဝဲသ့ၣ် သနာ်က့ တက့ၤစံးဆၢဝဲ ကိးဘျီဒဲးဘၣ်. အဒိ, လံာ်ကတိၤဒိ စံးဝဲလၢ– “ပှၤလၢအသိၣ်က့ၤသီက့ၤ ပှၤဒုၣ်ဒွဲၣ်တၢ်န့ၣ်, န့ၢ်ဘၣ်တၢ်မဲာ်ဆှးလၢ အဂီၢ်ဒၣ်ဝဲ” လီၤ. (ကတိၤဒိ ၉:၇, ၈; ၂၆:၄) ဖဲပှၤဒုၣ်ဒွဲၣ်စံးအၢအီၤအခါ တမ့ၢ်လၢ ကကတိၤအါလိာ်အသးဒီး ပှၤဂၤဘၣ်. လၢတၢ်န့ၣ်အလီၢ် အဝဲသ့ၣ် သးစၢၢ်ဆၢဒၣ်ထဲလၢ ကမၤတၢ်ဘၣ်ယွၤအသးလီၤ.—စံးထီၣ်ပတြၢၤ ၁၁၉:၆၉.

လံာ်စီဆှံစံးဝဲလၢ “အကတီၢ်လၢ ပှၤကအိၣ်ဘှီၣ်ကလာ်အဂီၢ်, ဒီးအကတီၢ်လၢ ပှၤကကတိၤတၢ်အဂီၢ်” န့ၣ်အိၣ်ဝဲလီၤ. (စံၣ်တဲၤတဲလီၤတၢ် ၃:၇) မ့ၢ်လၢပှၤတနီၤန့ၣ် အဲၣ်ဒိးသ့ၣ်ညါဝဲ တၢ်မ့ၢ်တၢ်တီအဃိ ပစံးဆၢက့ၤအဝဲသ့ၣ် အတၢ်သံကွၢ် သနာ်က့ ပဟးဆှဲး တၢ်တဲအါလိာ်သးဒီး ပှၤဂၤလီၤ. မ့ၢ်လၢပမၤဒ်န့ၣ်အဃိ မ့ၢ်ဒၣ်ပမၤပိာ်ထွဲ ယ့ၣ်ၡူး ဒီးခရံာ်ဖိလၢညါတဖၣ် အဒိအတဲာ် ဒီးအတၢ်သိၣ်လိနဲၣ်လိန့ၣ်လီၤ.

• ဖဲယ့ၣ်ၡူး ဘၣ်တၢ်ပာ်ဒ့ၣ်ပာ်ကမၣ်အီၤ လၢစီၤပံၤလး အမဲာ်ညါအခါ အဝဲတတဲဆၢက့ၤ တၢ်နီတမံၤဘၣ်. (မးသဲ ၂၇:၁၁-၁၄; ၁ ပ့းတရူး ၂:၂၁-၂၃) တကးဒံးဘၣ် ပှၤဒုၣ်ဒွဲၣ်စံးအၢအီၤလၢ အမ့ၢ် ပှၤအီၣ်လုၣ်ကိ အီလုၣ်ကိတၢ် သနာ်က့ အဝဲတတဲဆၢက့ၤဝဲ တၢ်နီတမံၤဘၣ်. လၢတၢ်န့ၣ်အလီၢ် အဝဲသ့ၣ် အတၢ်ကတိၤကမၣ်န့ၣ် ယ့ၣ်ၡူးပာ်ဖျါထီၣ်ဝဲ ခီဖျိလၢ အဒိအတဲာ်လီၤ. ဒ်လံာ်စီဆှံ တဲဝဲအသိး “တၢ်ကူၣ်သ့န့ၣ် ဘၣ်တၢ်ပာ်တီပာ်လိၤအီၤလၢ အတၢ်ဖံးတၢ်မၤဒၣ်ဝဲန့ၣ်လီၤ.” (မးသဲ ၁၁:၁၉, ခ့ခါစှီၤကျိာ်) ဘၣ်ဆၣ် ဖဲပှၤတဲဟးဂီၤအီၤအခါ အလီၢ်မ့ၢ်အိၣ်န့ၣ် အဝဲစံးဆၢက့ၤဝဲလၢ တၢ်သူၣ်ဒူသးဒူအပူၤလီၤ.—မးသဲ ၁၅:၁-၃; မၢ်ကူး ၃:၂၂-၃၀.

  ယ့ၣ်ၡူးသိၣ်လိ အပျဲၢ်အဘီၣ်တဖၣ်လၢ ပှၤမ့ၢ်ပာ်ဒ့ၣ်ပာ်ကမၣ် အဝဲသ့ၣ်ဘၣ်ဆၣ် တလိၣ်သးဟးဂီၤဘၣ်. ဘၣ်ဆၣ် ယ့ၣ်ၡူးစံးစ့ၢ်ကီးဝဲလၢ– “တုၤပှၤဒုၣ်ဒွဲၣ်သု, ဒီးမၤအၢမၤနးသု, ဒီးစံးအၢသု ကဘျံးကဘျၣ်လၢ ကယဲၢ်တၢ်အၢတၢ်သီ လၢယဃိဒီး, သုဘၣ်ဆိၣ်ဂ့ၤဆိၣ်ဝါလီၤ.” (မးသဲ ၅:၁၁, ၁၂) ဘၣ်ဆၣ် ယ့ၣ်ၡူးစံးစ့ၢ်ကီးဝဲလၢ ဖဲပှၤကတိၤဒုၣ်ဒွဲၣ်ပှၤအခါ တၢ်ခွဲးတၢ်ယာ် ကအိၣ်ထီၣ်ဝဲလၢ ပကအုၣ်ပသး ဒီးအဝဲအၢၣ်လီၤပှၤလၢ– “ယကဟ့ၣ်သုထးခိၣ်, ဒီးတၢ်ကူၣ်သ့လၢ သုဒုၣ်သုဒါတဖၣ်န့ၣ် ဂ့ၢ်လိာ်ဘှီလိာ်တသ့ဘၣ် နီတဂၤဘၣ်လီၤ.”—လူၤကၣ် ၂၁:၁၂-၁၅.

• တၢ်မၢဖိ ပီလူး ဟ့ၣ်ပလီၢ် ပှၤခရံာ်ဖိတဖၣ်လၢ အဝဲသ့ၣ် ကဘၣ်ဟးဆှဲး တၢ်တဲအါလိာ်သးဒီး ပှၤလၢအထီဒါတၢ်တဖၣ်လီၤ. ဒီးအဝဲစံးဝဲလၢ တၢ်အ့ၣ်လိာ်ဆိးက့လိာ်န့ၣ် “မ့ၢ်တၢ်တဂိာ်တသီၣ်ဘၣ်, ဒီးတၢ်ကလီကလီ” န့ၣ်လီၤ.—တံတူး ၃:၉; ရိမ့ၤ ၁၆:၁၇, ၁၈.

• တၢ်မၢဖိ ပ့းတရူး ဟ့ၣ်ဂံၢ်ဟ့ၣ်ဘါ ခရံာ်ဖိတဖၣ်လၢ အလီၢ်မ့ၢ်အိၣ်န့ၣ် အဝဲသ့ၣ် ကဘၣ်တဲနၢ်ပၢၢ်ပှၤဂၤ တၢ်မ့ၢ်တၢ်တီ ဘၣ်ဃးအဝဲသ့ၣ် အတၢ်နာ်န့ၣ်လီၤ. (၁ ပ့းတရူး ၃:၁၅) ဘၣ်ဆၣ် အဝဲသ့ၣ်ညါပာ်ဝဲလၢ ပတၢ်ဒိဂ့ၤတဲာ်ဘၣ်န့ၣ် ဂ့ၤန့ၢ် ပတၢ်စံးတၢ်ကတိၤန့ၣ်လီၤ. အဃိ အဝဲကွဲးဝဲလၢ– “သုကဒုးအိၣ်ဘှီၣ်ကလာ် ပှၤဟးဂီၤဖိ အတၢ်တသ့ၣ်ညါဘၣ်, လၢသုမၤတၢ်ဂ့ၤအဃိန့ၣ်လီၤ.”—၁ ပ့းတရူး ၂:၁၂-၁၅.