တၢ်သူၣ်ခုသးခု တၢ်ဂ့ၤတၢ်ဝါလၢ ပဒိးန့ၢ်ဘၣ်လၢ ယွၤအအိၣ်
ပှၤကိးဂၤဒဲး အဲၣ်ဒိးအိၣ်ဒီးတၢ်သူၣ်ခုသးခုလီၤ. ပအိၣ်မူဘၣ်လၢ မုၢ်နံၤခံကတၢၢ်အဆၢကတီၢ်အဃိ ပှၤကိးဂၤဒဲးထံၣ်ဘၣ်တၢ် “အကီအခဲ” တဖၣ်လီၤ. (၂ တံၤမသ့း ၃:၁) ပှၤတနီၤနီၤ အတၢ်သူၣ်ခုသးခု လီၤမၢ်ကွံာ်ဝဲခီဖျိ အထံၣ်ဘၣ်တၢ်တတီတလိၤ, အိၣ်ဒီးတၢ်ဆူးတၢ်ဆါ, အတၢ်ဖံးတၢ်မၤတအိၣ်လၢၤဘၣ် မ့တမ့ၢ် ပှၤလၢအဲၣ်ဘၣ်ဝဲတဂၤသံအဃိလီၤ. ဒီးပှၤအဂၤတနီၤနီၤန့ၣ် ခီဖျိလၢ အဝဲသ့ၣ်အိၣ်ဒီးတၢ်သူၣ်ကိၢ်သးဂီၤ ဒီးတၢ်သူၣ်အုးသးအုးအဃိ အတၢ်သူၣ်ခုသးခု တအိၣ်လၢၤဘၣ်. ပှၤလၢအဘူၣ်ထီၣ်ဘါထီၣ် ယဟိဝၤယွၤဒၣ်လဲာ် အဝဲသ့ၣ်အသးလီၤစၢ် ဒီးယံာ်ထီၣ်ယံာ်ထီၣ်န့ၣ် အတၢ်သးခုလီၤမၢ်ကွံာ်ဝဲသ့လီၤ. တၢ်မ့ၢ်ကဲထီၣ်အသးဒီးနၤဒ်အံၤန့ၣ် ဒ်သိးနကဒိးန့ၢ်ဘၣ်က့ၤ တၢ်သူၣ်ခုသးခုနီၢ်နီၢ်အဂီၢ် နကဘၣ်မၤဒ်လဲၣ်.
တချုးလၢပစံးဆၢက့ၤ တၢ်သံကွၢ်တဖျၢၣ်အံၤဒံးဘၣ်န့ၣ် အဆိကတၢၢ်ပကဘၣ်နၢ်ပၢၢ် လၢတၢ်သူၣ်ခုသးခုနီၢ်နီၢ်န့ၣ် မ့ၢ်မနုၤလဲၣ်. ဒီးပှၤအဂၤတဖၣ်န့ၣ် ထံၣ်ဘၣ်တၢ်ကီတၢ်ခဲ ဘၣ်ဆၣ်အဝဲသ့ၣ်ဆဲးအိၣ်ဒီး တၢ်သူၣ်ခုသးခုဒ်လဲၣ်. ဒီးပကသ့ၣ်ညါဘၣ်လၢ ပဝဲသ့ၣ်တဖၣ်စ့ၢ်ကီး ပဆဲးအိၣ်ဒီးတၢ်သူၣ်ခုသးခုကသ့ဒ်လဲၣ် ဒီးပမၤအါထီၣ်အီၤကသ့ဒ်လဲၣ်န့ၣ်လီၤ.
တၢ်သူၣ်ခုသးခုန့ၣ် မ့ၢ်မနုၤလဲၣ်
တၢ်သးဖှံဒီး တၢ်သူၣ်ခုသးခုန့ၣ် တဒ်သိးလိာ်အသးဘၣ်. ဆိကမိၣ်ကွၢ်ဒ်အံၤတက့ၢ်. ပှၤလၢအမူၤသံးတဂၤန့ၣ် အတၢ်ကီတၢ်ခဲအိၣ်သနာ်က့ အနံၤဝဲဆူၣ်မး. ဘၣ်ဆၣ် အဝဲမ့ၢ်တမူၤသံးလၢၤဘၣ်န့ၣ် တနံၤဝဲလၢၤဘၣ်. အဝဲသ့ၣ်ညါလၢ အတၢ်ကိၢ်တၢ်ဂီၤတဖၣ် တလီၤမၢ်ဘၣ်. အတၢ်သူၣ်ဖှံသးညီတဖၣ်န့ၣ် မ့ၢ်ဒၣ်တစိၢ်တလီၢ်လီၤ. တမ့ၢ်တၢ်သူၣ်ခုသးခုနီၢ်နီၢ်ဘၣ်.—ကတိၤဒိ ၁၄:၁၃.
မ့မ့ၢ်တၢ်သူၣ်ခုသးခုန့ၣ် မ့ၢ်ဝဲတၢ်ဂ့ၤတၢ်ဝါတခါလၢ အအိၣ်ထီၣ်လၢပသးပူၤ ဖဲပဒိးန့ၢ်ဘၣ်တၢ်လၢပအဲၣ်ဒိး မ့တမ့ၢ် တၢ်ဂ့ၤတမံၤမံၤလၢ ပမုၢ်လၢ်အီၤအခါန့ၣ်လီၤ. ပအိၣ်ဒီးတၢ်သူၣ်ခုသးခုနီၢ်နီၢ်န့ၣ် မ့ၢ်ဝဲပတၢ်အိၣ်သး မ့ၢ်အိၣ်ဒ်လဲၣ်ဂ့ၤဒ်လဲၣ်ဂ့ၤ ပတၢ်သးခုတလီၤမၢ်ဘၣ်. (၁ သ့းစၤလနံ ၁:၆) ပသးမ့ၢ်တမုာ်ဘၣ်လၢ တၢ်တမံၤမံၤအဃိ သနာ်က့ ပအိၣ်ဒီးတၢ်သူၣ်ခုသးခု သ့ဒံးလီၤ. အဒိ, တၢ်မၢဖိတဖၣ် စံၣ်တဲၤတဲလီၤယ့ၣ်ၡူး အဂ့ၢ်အဃိ ပှၤဒိအီၤတီၢ်အီၤလီၤ. ဘၣ်ဆၣ် အဝဲသ့ၣ်ဘၣ် “တၢ်ပာ်အီၤလၢ ပှၤကြၢးဒိးတၢ်မဲာ်ဆှးလၢအမံၤအဃိဒီး, အဝဲသ့ၣ်သူၣ်ခုသးခု, ဒီးဟးထီၣ်ကွံာ်ဝဲလၢ သူၣ်က့သးပှၢ် အတၢ်အိၣ်ဖှိၣ်အမဲာ်ညါလီၤ.” (မၤတၢ် ၅:၄၁) အဝဲသ့ၣ်အိၣ်ဒီး တၢ်သူၣ်ခုသးခုန့ၣ် တမ့ၢ်လၢပှၤတီၢ်အီၤအဃိဘၣ်. မ့ၢ်လၢအဝဲသ့ၣ် တီဒီးကစၢ်ယွၤန့ၢ်အဃိလီၤ.
ဖဲပအိၣ်ဖျဲၣ်ထီၣ်အခါ ပတအိၣ်ဖျဲၣ်ဃုာ်ဒီး တၢ်သူၣ်ခုသးခုတဘျီဃီဘၣ်. ဒီးတၢ်သူၣ်ခုသးခုန့ၣ် တဟဲကဲထီၣ်အသးဒၣ်ဝဲဘၣ်. ဘၣ်မနုၤအဃိလဲၣ်. မ့ၢ်လၢတၢ်သူၣ်ခုသးခုန့ၣ် မ့ၢ်ဝဲသးအတၤသၣ်အဃိလီၤ. ဒ်သိးပအိၣ်ဒီး “နီၢ်သီ” လၢအပၣ်ဃုာ်ဒီး တၢ်သူၣ်ခုသးခုကသ့အဂီၢ် ယွၤအသးစီဆှံကမၤစၢၤပှၤလီၤ. (အ့းဖ့းစူး ၄:၂၄; ကလၤတံ ၅:၂၂) ပမ့ၢ်အိၣ်ဒီးတၢ်သူၣ်ခုသးခုန့ၣ် ပလဲၤခီဖျိတၢ်ကီတၢ်ခဲတဖၣ် ကညီထီၣ်ဝဲလီၤ.
တၢ်အဒိလၢ ပအဲၣ်ဒိး ကွၢ်လိမၤဒိးတဖၣ်
လၢဟီၣ်ခိၣ်ချၢန့ၣ် ယဟိဝၤယွၤအဲၣ်ဒိးထံၣ်ဝဲထဲ တၢ်အဂ့ၤတဖၣ်လီၤ. အဝဲတအဲၣ်ဒိးထံၣ်ဝဲ တၢ်အၢတၢ်သီလၢ ပထံၣ်ဘၣ်လၢ မုၢ်မဆါတနံၤအံၤဘၣ်. ပှၤဟီၣ်ခိၣ်ဖိတဖၣ် မၤတၢ်အၢတၢ်သီသနာ်က့ ယဟိဝၤယွၤ အတၢ်သူၣ်ခုသးခု တလီၤမၢ်ကွံာ်ဝဲဘၣ်. လံာ်စီဆှံ တဲဝဲလၢ “တၢ်လၤကပီၤ, ဒီးတၢ်ကဟုကညီၢ်အိၣ်လၢအမဲာ်ညါ, ဒီးတၢ်ဂံၢ်တၢ်ဘါ, ဒီးတၢ်သးခုအိၣ်လၢအလီၢ်ပူၤလီၤ.” (၁ ကွဲးနီၣ်တၢ် ၁၆:၂၇) တကးဒံးဘၣ် ဖဲယဟိဝၤယွၤထံၣ်ဝဲလၢ အပှၤဂီၢ်မုၢ်တဖၣ် မၤတၢ်ဂ့ၤအခါ အဝဲသးခုဒိၣ်မးလီၤ.—ကတိၤဒိ ၂၇:၁၁.
ဒ်ပမုၢ်လၢ်အသိး တၢ်မ့ၢ်တဟဲကဲထီၣ်အသးသနာ်က့ ပမ့ၢ်ဆဲးအိၣ်ဒီးတၢ်သူၣ်ခုသးခုန့ၣ် မ့ၢ်ဒၣ်ပကွၢ်လိမၤဒိး ယဟိဝၤယွၤလီၤ. လၢတၢ်န့ၣ်အဃိ လၢပကသူၣ်ကိၢ်သးဂီၤတၢ်အလီၢ် ပကဘၣ်သးစၢၢ်ဆၢ ဒီးတၢ်အဂ့ၤလၢပဒိးန့ၢ်ဘၣ်အီၤခဲအံၤ ဒီးလၢတၢ်သးစူၤအပူၤ ပခိးကွၢ်လၢ်တၢ်အဂ့ၤလၢ ပကဒိးန့ၢ်ဘၣ်အီၤလၢ ခါဆူညါသ့ဝဲလီၤ.a—ကွၢ်တၢ်ဂ့ၢ်အဘျဲၣ်တက့ၢ်.
လံာ်စီဆှံ ပာ်ဖျါထီၣ်န့ၢ်ပှၤ တၢ်အဒိအတဲာ်အါမးလၢ အဘၣ်ဃးဒီး ပှၤလၢအထံၣ်ဘၣ်တၢ်ကီတၢ်ခဲဘၣ်ဆၣ် ဆဲးအိၣ်ဒီးတၢ်သူၣ်ခုသးခု အဂ့ၢ်န့ၣ်လီၤ. စီၤအၤဘြၤဟၣ်န့ၣ် ထံၣ်ဘၣ်ဝဲတၢ်လီၤဘၣ်ယိၣ်လၢ အသးသမူအဂီၢ် တကးဒံးဘၣ် ပှၤအဂၤတဖၣ်ဒုးအိၣ်ထီၣ် တၢ်ကီတၢ်ခဲလၢအဂီၢ်သနာ်က့ အဝဲအတၢ်သူၣ်ခုသးခုတလီၤမၢ်ဘၣ်. (၁ မိၤၡ့ ၁၂:၁၀-၂၀; ၁၄:၈-၁၆; ၁၆:၄, ၅; ၂၀:၁-၁၈; ၂၁:၈, ၉) ဘၣ်မနုၤအဃိ အဝဲဆဲးအိၣ်ဒီးတၢ်သးခုလဲၣ်. ခီဖျိလၢ အဝဲဆိကမိၣ်ထံဝဲ တၢ်မုၢ်လၢ်လၢအဘၣ်ဃးဒီး ကအိၣ်မူဘၣ်လၢဟီၣ်ခိၣ်သီ လၢမ့းၡံအၤအတၢ်ပၢအဖီလာ်န့ၣ်လီၤ. (၁ မိၤၡ့ ၂၂:၁၅-၁၈; ဧ့ၤဘြံၤ ၁၁:၁၀) ယ့ၣ်ၡူး တဲဝဲလၢ “သုပၢ်စီၤအၤဘြၤဟၣ် ဆၢထံၣ်ဘၣ်ယနံၤယသီအံၤ, ဒီးထံၣ်ဝဲဒီးအသူၣ်ဖှံအသးညီလီၤ.” (ယိၤဟၣ် ၈:၅၆) ပကွၢ်လိမၤဒိး စီၤအၤဘြၤဟၣ်သ့ခီဖျိ ပဆိကမိၣ်ထံ တၢ်သူၣ်ခုသးခုလၢ ပကဒိးန့ၢ်ဘၣ်အီၤလၢ ခါဆူညါအဂ့ၢ်န့ၣ်လီၤ.—ရိမ့ၤ ၈:၂၁.
ဒ်စီၤအၤဘြၤဟၣ်အသိး စီၤပီလူးဒီး စီၤစံလၤစ့ၢ်ကီး အဝဲသ့ၣ်အိၣ်ဒီးတၢ်နာ်လၢ အဂၢၢ်ကျၢၤအဃိ ထံၣ်ဘၣ်တၢ်ကီတၢ်ခဲဘၣ်ဆၣ် အတၢ်သူၣ်ခုသးခုတလီၤမၢ်ဘၣ်. အဒိ, ပှၤတီၢ်အဝဲသ့ၣ်နးနးကလဲာ် ဒီးပၢနုာ်အီၤလၢဃိာ်ပူၤဝံၤအလီၢ်ခံ အဝဲသ့ၣ် “ဘါထုကဖၣ်တၢ်, ဒီးသးဝံၣ်သးဆၢယွၤ” လီၤ. (မၤတၢ် ၁၆:၂၃-၂၅) အဝဲသ့ၣ်လဲၤခီဖျိ တၢ်နးတၢ်ဖှီၣ်န့ၢ်ဝဲန့ၣ် မ့ၢ်လၢအဆိကမိၣ်ထံဝဲ ယွၤအတၢ်အၢၣ်လီၤလၢ ခါဆူညါအဂ့ၢ်အဃိလီၤ. ဒီးအဝဲသ့ၣ်သူၣ်ခုသးခု မ့ၢ်လၢအသ့ၣ်ညါဝဲလၢ အတူၢ်ဘၣ်တၢ်ကီတၢ်ခဲတဖၣ်အံၤ ခီဖျိအပိာ်ယ့ၣ်ၡူးခရံာ်အခံအဃိလီၤ. ပမ့ၢ်ဆိကမိၣ်ထံ တၢ်ဆိၣ်ဂ့ၤလၢ ပဒိးန့ၢ်ဘၣ်အီၤခီဖျိ ပမၤယွၤအတၢ်မၤလၢ တၢ်သးတီအပူၤအဃိန့ၣ် မ့ၢ်ဒၣ်ပကွၢ်လိမၤဒိး စီၤပီလူးဒီးစီၤစံလၤလီၤ.—ဖံလံးပံၤ ၁:၁၂-၁၄.
မုၢ်မဆါတနံၤအံၤစ့ၢ်ကီး ဒီပုၢ်ဝဲၢ်မုၣ်ခွါအါဂၤ ထံၣ်ဘၣ်တၢ်ကီတၢ်ခဲသနာ်က့ အဝဲသ့ၣ်ဆဲးအိၣ်ဒီး တၢ်သူၣ်ခုသးခုလီၤ. အဒိ, ဖဲ ၂၀၁၃ လါ နိၣ်ဝ့ဘၢၣ်န့ၣ် ကလံၤမုၢ်ဖးဒိၣ်လီၤလၢ ကီၢ်ဖံးလံးဖံ(စ်) ဒီး ယဟိဝၤပှၤအုၣ်အသးအဟံၣ် ဟးဂီၤဝဲအဖျၢၣ် ၁,၀၀၀ ဘျဲၣ်ညါလီၤ. ကၠီၣ် လၢအအိၣ်လၢ ဝ့ၢ်ထၤချိၤဘဲန့ၣ် အဟံၣ်ဟးဂီၤဝဲလီၤ. အဝဲတဲဝဲလၢ “တၢ်ကဲထီၣ်အသးဒ်အံၤဘၣ်ဆၣ် ဒီပုၢ်ဝဲၢ်မုၣ်ခွါတဖၣ် အတၢ်သူၣ်ခုသးခု တလီၤမၢ်ဘၣ်. ပအိၣ်ဒီးတၢ်သူၣ်ခုသးခုထဲလဲၣ်န့ၣ် ပတဲဖျါထီၣ်မးတလၢာ်ဘၣ်.” ပမ့ၢ်ဆိကမိၣ်တၢ်လၢ ယဟိဝၤယွၤမၤန့ၢ်ပှၤ ဒီးပာ်ဖျါထီၣ်တၢ်စံးဘျုးစံးဖှိၣ်အီၤန့ၣ် ပမ့ၢ်ထံၣ်ဘၣ် တၢ်ကီတၢ်ခဲထဲလဲၣ်သနာ်က့ ပကပှဲၤဒီးတၢ်သူၣ်ခုသးခုလီၤ. ဒ်သိးပကဆဲးအိၣ်ဒီးတၢ်သူၣ်ခုသးခုအဂီၢ် တၢ်အဂၤလၢယဟိဝၤယွၤ ကတဲာ်ကတီၤန့ၢ်ပှၤတဖၣ်န့ၣ် မ့ၢ်မနုၤလဲၣ်.
ဘၣ်မနုၤအဃိ ပကဘၣ်အိၣ်ဒီးတၢ်သူၣ်ခုသးခုလဲၣ်
တၢ်ဂ့ၢ်လၢ အမၤသးခုပှၤအဒိၣ်ကတၢၢ်န့ၣ် မ့ၢ်လၢပအိၣ်ဒီးတၢ်ရ့လိာ်သးဒီး ယဟိဝၤယွၤလၢအဂ့ၤန့ၣ်လီၤ. တကးဒံးဘၣ် ပသ့ၣ်ညါဘၣ် စီၤပၤအဒိၣ်ကတၢၢ်တဂၤလီၤ. ဒီးအဝဲမ့ၢ်ပပၢ်, ပယွၤ, ဒီးပတံၤသကိးအဃိ ပသးခုဒိၣ်မးလီၤ.—စံးထီၣ်ပတြၢၤ ၇၁:၁၇, ၁၈.
တကးဒံးဘၣ် ပစံးဘျုးဘၣ် ယဟိဝၤယွၤဒိၣ်မးလၢ အဟ့ၣ်ပှၤပသးသမူ ဒီးတၢ်ခွဲးတၢ်ယာ်လၢ ပကအိၣ်ဒီးတၢ်သူၣ်ခုသးခုအဃိလီၤ. (စံၣ်တဲၤတဲလီၤတၢ် ၃:၁၂, ၁၃) မ့ၢ်လၢအဝဲမိၤဃီၤပှၤဆူအအိၣ်အဃိ ပသ့ၣ်ညါထီၣ်အတၢ်ဘၣ်သး ဒီးပကဘၣ်အိၣ်မူဒ်လဲၣ်အဂ့ၢ်န့ၣ်လီၤ. (ကလီးစဲ ၁:၉, ၁၀) ဘၣ်ဆၣ် ပှၤအါဂၤတနၢ်ပၢၢ်ဝဲ တၢ်အိၣ်မူအတၢ်တိာ်ပာ်အဂ့ၢ်ဘၣ်. လၢတၢ်န့ၣ်အဃိ စီၤပီလူး ကွဲးဝဲဘၣ်ဃးဒီး ပှၤလၢအသ့ၣ်ညါယွၤ ဒီးပှၤလၢတသ့ၣ်ညါယွၤ အတၢ်လီၤဆီလိာ်သးအဂ့ၢ်လီၤ. အဝဲတဲဝဲလၢ “မဲာ်တထံၣ်ဘၣ်, ဒီးနၢ်တနၢ်ဟူဘၣ်, ဒီးတဟဲနုာ်လၢပှၤကညီအသးဘၣ်. ဘၣ်ဆၣ်ဒီးယွၤလီၣ်ဖျါအီၤလၢအသးဒၣ်ဝဲ, လၢပှၤလီၤ. အဂ့ၢ်ဒ်အံၤ, သးန့ၣ်ဃုန့ၢ်တၢ်ခဲလၢာ်, တၢ်ယိာ်ဘၣ်ဃးဒီး ယွၤဒၣ်လဲာ်န့ၣ်လီၤ.” (၁ ကရံၣ်သူး ၂:၉, ၁၀) ပသ့ၣ်ညါဘၣ် ယဟိဝၤယွၤအတၢ်ဘၣ်သး ဒီးအတၢ်တိာ်ပာ်အဃိ ပသးခုဒိၣ်မးလီၤ.
ယဟိဝၤယွၤမၤန့ၢ်တၢ်လၢ ပဂီၢ်အါမးလီၤ. ဒ်သိးပတၢ်ဒဲးဘးကပျၢ်အဂီၢ် အဝဲအိးဟိထီၣ်န့ၢ်ပှၤကျဲလီၤ. (၁ ယိၤဟၣ် ၂:၁၂) အဝဲဟ့ၣ်ပှၤတၢ်မုၢ်လၢ်လၢ ပကအိၣ်မူဘၣ်လၢ ဟီၣ်ခိၣ်သီအပူၤ ဒီးတယံာ်လၢၤဘၣ်န့ၣ် ပကဒိးန့ၢ်ဘၣ်အီၤလီၤ. (ရိမ့ၤ ၁၂:၁၂) ခဲအံၤစ့ၢ်ကီးယဟိဝၤယွၤဟ့ၣ်ပှၤ တံၤသကိးတဖၣ် လၢအဘူၣ်ထီၣ်ဘါထီၣ်အီၤန့ၣ်လီၤ. (စံးထီၣ်ပတြၢၤ ၁၃၃:၁) တကးဒံးဘၣ် အဝဲဒီသဒၢပှၤလၢ မုၣ်ကီၤလံၢ် ဒီးအတၢ်ဝံတၢ်နါတဖၣ်စ့ၢ်ကီးလီၤ. (စံးထီၣ်ပတြၢၤ ၉၁:၁၁) ပမ့ၢ်ဆိကမိၣ်ထံ တၢ်အဂ့ၤလၢ ယဟိဝၤယွၤဟ့ၣ်ပှၤတဖၣ် အဂ့ၢ်ထီဘိန့ၣ် ပတၢ်သူၣ်ခုသးခုကအါထီၣ်ဝဲလီၤ.—ဖံလံးပံၤ ၄:၄.
ပမၤအါထီၣ်ပတၢ်သးခုကသ့ဒ်လဲၣ်
ခရံာ်ဖိလၢအအိၣ်ဒီးတၢ်သူၣ်ခုသးခုတဖၣ် မၤအါထီၣ်အတၢ်သူၣ်ခုသးခုကသ့ဒံးဧါ. ယ့ၣ်ၡူးတဲဝဲလၢ “ဒ်သိးယတၢ်သးခု ကအိၣ်ကဆိးလၢသုပူၤ, ဒီးသုတၢ်သးခု ကလၢထီၣ်ပှဲၤထီၣ်ဒီး, ယစံးဘၣ်တဲဘၣ်လံသုလၢ တၢ်န့ၢ်တဖၣ်လံ.” (ယိၤဟၣ် ၁၅:၁၁) ဖဲန့ၣ်ပသ့ၣ်ညါဘၣ်လၢ ပမၤအါထီၣ် ပတၢ်သူၣ်ခုသးခုသ့ထီဘိလီၤ. ပထိၣ်သတြီၤ ပတၢ်သူၣ်ခုသးခုဒီး မ့ၣ်အူသ့ဝဲလီၤ. ပမ့ၢ်အဲၣ်ဒိးလၢ မ့ၣ်အူကကဲၤဒိၣ်ထီၣ်န့ၣ် ပကဘၣ်ဖၢနုာ်အါထီၣ်သ့ၣ်မုၣ်လီၤ. လံာ်စီဆှံတဲဝဲလၢ သးစီဆှံမၤစၢၤပှၤဒ်သိး ပကအိၣ်ဒီးတၢ်သူၣ်ခုသးခုလီၤ. လၢတၢ်န့ၣ်အဃိ ပမ့ၢ်အဲၣ်ဒိးလၢ ပတၢ်သူၣ်ခုသးခုအါထီၣ်န့ၣ် ပကဘၣ်ဆဲးဃ့ယွၤအသးစီဆှံ ခီဖျိတၢ်ဃ့ဘါထုကဖၣ်န့ၣ်လီၤ. ပကဘၣ်ဆဲး ဆိကမိၣ်ထံယွၤအကလုၢ်ကထါ လၢအဘၣ်တၢ်ကွဲးအီၤလၢ ယွၤအသးစီဆှံန့ၣ်လီၤ.—စံးထီၣ်ပတြၢၤ ၁:၁, ၂; လူၤကၣ် ၁၁:၁၃.
ကျဲအဂၤတဘိလၢ ကမၤအါထီၣ်ပတၢ်သးခုန့ၣ် မ့ၢ်ဝဲပသးဆူၣ်လၢ ကမၤတၢ်လၢအမၤသးခု ယဟိဝၤယွၤအသးန့ၣ်လီၤ. (စံးထီၣ်ပတြၢၤ ၃၅:၂၇; ၁၁၂:၁) ဘၣ်မနုၤအဃိလဲၣ်. လံာ်စီဆှံတဲဝဲလၢ “ပျံၤယွၤဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်ပှၤကညီအတၢ်ခဲလၢာ်လီၤ.” (စံၣ်တဲၤတဲလီၤတၢ် ၁၂:၁၃) ယဟိဝၤယွၤ တ့လီၤပှၤဒ်သိး ပကမၤအတၢ်ဘၣ်သးလီၤ. လၢတၢ်န့ၣ်အဃိ ဖဲပမၤယဟိဝၤယွၤအတၢ်မၤအခါ ပကဒိးန့ၢ်ဘၣ် တၢ်သူၣ်ခုသးခုအဒိၣ်ကတၢၢ်န့ၣ်လီၤ.b—ကွၢ်တၢ်ဂ့ၢ်အဘျဲၣ်တက့ၢ်.
တၢ်သးခုန့ၣ် ကဲဘျုးဒ်လဲၣ်
ပမ့ၢ်မၤအါထီၣ် ပတၢ်သူၣ်ခုသးခုန့ၣ် ကကဲဘျုးလၢပဂီၢ်အါမးလီၤ. အဒိ, ပမ့ၢ်ထံၣ်ဘၣ်တၢ်ကီတၢ်ခဲသနာ်က့ ပဆဲးမၤယဟိဝၤယွၤအတၢ်မၤလၢ တၢ်သူၣ်ခုသးခုအပူၤအဃိ ယဟိဝၤယွၤကအဲၣ်ပှၤဒိၣ်မးလီၤ. (၅ မိၤၡ့ ၁၆:၁၅; ၁ သ့းစၤလနံ ၅:၁၆-၁၈) တကးဒံးဘၣ် မ့ၢ်လၢပအိၣ်ဒိးတၢ်သူၣ်ခုသးခုအဃိ ပတပာ်ဒိၣ်တၢ်ထူးတၢ်တီၤလၢ ပတၢ်အိၣ်မူအပူၤဘၣ်. လၢတၢ်န့ၣ်အလီၢ် ပကဟ့ၣ်လီၤအါထီၣ်ပသးလၢ ယွၤအဘီမုၢ်အဂီၢ်လီၤ. (မးသဲ ၁၃:၄၄) ဖဲပမၤယဟိဝၤယွၤအတၢ်မၤဒီး ပထံၣ်ဘၣ် တၢ်ကဲထီၣ်လိၣ်ထီၣ်အခါ ပတၢ်သူၣ်ခုသးခုအါထီၣ်ဝဲလီၤ. တကးဒံးဘၣ် ပှၤအဂၤတဖၣ်စ့ၢ်ကီး ကသူၣ်ခုသးခုဝဲလီၤ.—မၤတၢ် ၂၀:၃၅; ဖံလံးပံၤ ၁:၃-၅.
တကးဒံးဘၣ် ပတၢ်သူၣ်ခုသးခုမ့ၢ်အါထီၣ်န့ၣ် ပတၢ်အိၣ်ဆူၣ်အိၣ်ချ့စ့ၢ်ကီး ကဂ့ၤထီၣ်ဝဲလီၤ. လံာ်စီဆှံ တဲဝဲလၢ “သးလၢအခုန့ၣ် မၤဂ့ၤပနီၢ်ခိလီၤ.” (ကတိၤဒိ ၁၇:၂၂) ပှၤတဂၤလၢအမၤလိ တၢ်အိၣ်ဆူၣ်အိၣ်ချ့အဂ့ၢ်လၢ နၤဘြါစကး အဖၠၣ်စိမိၤလၢ ကီၢ်အမဲရကၤန့ၣ် အသးလီၤပလိာ်ဒီး လံာ်စီဆှံတဆၢအံၤလီၤ. အဝဲတဲဝဲလၢ “နမ့ၢ်အိၣ်ဒီး တၢ်သူၣ်ခုသးခုဒီး တၢ်သူၣ်မံသးမုာ်န့ၣ် ခဲအံၤမ့ၢ်ဂ့ၤ, ခါဆူညါမ့ၢ်ဂ့ၤ နတၢ်အိၣ်ဆူၣ်အိၣ်ချ့ ဂ့ၤထီၣ်ဝဲသ့လီၤ.”
ပအိၣ်မူဘၣ်ဆၢကတီၢ်လၢ အကီအခဲဘၣ်ဆၣ် ပဒိးန့ၢ်ဘၣ်တၢ်သူၣ်ခုသးခုသ့ဝဲလီၤ. ပဒိးန့ၢ်ဘၣ်အီၤသ့ခီဖျိ ပဃ့ယဟိဝၤယွၤအသးစီဆှံ, မၤလိအကလုၢ်ကထါ ဒီးဆိကမိၣ်ထံတၢ်လၢ ပမၤလိတဖၣ်န့ၣ်လီၤ. တကးဒံးဘၣ် ပမ့ၢ်ဆိကမိၣ်ထံ တၢ်ဆိၣ်ဂ့ၤလၢပဒိးန့ၢ်ဘၣ်ခဲအံၤတဖၣ်, ကွၢ်လိမၤဒိးပှၤအဂၤတဖၣ်အတၢ်နာ် ဒီးပမ့ၢ်ဂုာ်ကျဲးစၢးမၤ တၢ်ဘၣ်ယွၤအသးန့ၣ် ပတၢ်သူၣ်ခုသးခုကအါထီၣ်ဝဲလီၤ. ပမ့ၢ်မၤဒ်န့ၣ်န့ၣ် ပကတူၢ်ဘၣ်ဒ် စံးထီၣ်ပတြၢၤ ၆၄:၁၀ ပာ်ဖျါထီၣ်ဝဲအသိးလီၤ. ဖဲန့ၣ်တဲဝဲလၢ “ပှၤတီပှၤလိၤ ကသးခုလၢယွၤအပူၤ, ဒီးကသန့ၤအသးလၢအီၤ” လီၤ.
a တၢ်ကွဲးဖုၣ်လၢခံတခါအပူၤန့ၣ် ပကတဲသကိး “သးအတၤသၣ်” လၢအမ့ၢ်တၢ်ဝံသးစူၤအဂ့ၢ်လီၤ.
b ကျဲအဂၤတဖၣ်လၢ ကမၤအါထီၣ်ပတၢ်သူၣ်ခုသးခုန့ၣ် ကွၢ်တၢ်လွံၢ်နၢၣ်လၢအမ့ၢ် “ကျဲတဖၣ်လၢကမၤအါထီၣ် တၢ်သူၣ်ခုသးခု”