အဆၢဒိၣ် ၁၄
ကစၢ်ယွၤကတိၤတၢ် ခီဖျိလၢအဝံတဖၣ်
ယဟိဝၤယွၤ ဃုထၢထီၣ်ဝဲဝံတဖၣ်ဒ်သိး ကစံၣ်တဲၤတဲလီၤဝဲ တၢ်ကစီၣ်လၢ အဘၣ်ဃးဒီးတၢ်စံၣ်ညီၣ်, တၢ်ဘူၣ်တၢ်ဘါလၢ အမ့ၢ်အတီ, ဒီးတၢ်မုၢ်လၢ်လၢ မ့းၡံအၤကဟဲဝဲအဂ့ၢ်န့ၣ်လီၤ
ဖဲအံၣ်စရ့လးဒီး ယူဒၤအစီၤပၤတဖၣ်အစိၤ ပိာ်ခွါလၢအဒိးန့ၢ်ဘၣ်မူဒါလီၤဆီန့ၣ် အိၣ်ဝဲတကရူၢ်လီၤ. အဝဲသ့ၣ်န့ၣ် မ့ၢ်ဝံတဖၣ်လီၤ. ပှၤသ့ၣ်တဖၣ်န့ၣ် အိၣ်ဒီးတၢ်စူၢ်တၢ်နာ်ဂၢၢ်ဂၢၢ်ကျၢၤကျၢၤလီၤ. ဒီးအဝဲသ့ၣ်အိၣ်ဒီးတၢ်သူၣ်ဒူသးဒူလၢကတဲဘၣ်ပှၤဂၤ တၢ်ကစီၣ်လၢဟဲလၢယွၤအိၣ်န့ၣ်လီၤ. ဆိကမိၣ်ကွၢ် တၢ်ဂ့ၢ်အရ့ဒိၣ်လွံၢ်မံၤလၢ ယွၤအဝံတဖၣ် စံၣ်တဲၤတဲလီၤဝဲန့ၣ်တက့ၢ်.
၁. တၢ်မၤဟးဂီၤ ဝ့ၢ်ယရူၤၡလ့ၣ်. ဝ့ၢ်ယရူၤၡလ့ၣ် ကဘၣ်တၢ်မၤဟးဂီၤအီၤဒီး ကအိၣ်သယုၢ်ဝဲအဂ့ၢ်န့ၣ် ယွၤအဝံလၢအမ့ၢ်ယၡါယၤဒီး ယံးရမံယၤ ဟ့ၣ်ပလီၢ်ဆိဝဲ အနံၣ်အါမးန့ၣ်လီၤ. အဝဲသ့ၣ်ပာ်ဖျါထီၣ်ဝဲလၢ ဘၣ်မနုၤအဃိ ကစၢ်ယွၤသးထီၣ်ဝဲပှၤဝ့ၢ်ဖိတဖၣ်လဲၣ် န့ၣ်လီၤ. ပှၤဝ့ၢ်ဖိတဖၣ်အံၤ စံးလီၤအသးလၢ အဝဲသ့ၣ်မၤတၢ်လၢယဟိဝၤယွၤအခၢၣ်စး သနာ်က့ အဝဲသ့ၣ်အတၢ်အိၣ်မူတခီ တလီၤပလိာ်လိာ်အသးဒီး အတၢ်ကတိၤဘၣ်. မ့ၢ်လၢအဝဲသ့ၣ် ပၣ်ဃုာ်လၢတၢ်ဘူၣ်တၢ်ဘါကမၣ် အလုၢ်အလၢ်အပူၤ, မၤတၢ်တတီတလိၤ ဒီးအဲၣ်တၢ်မၤဆူၣ်မၤစိးအဃိန့ၣ်လီၤ.—၂ စီၤပၤ ၂၁:၁၀-၁၅; ယၡါယၤ ၃:၁-၈, ၁၆-၂၆; ယံးရမံယၤ ၂:၁-၃:၁၃.
၂. တၢ်သူၣ်ထီၣ်က့ၤ တၢ်ဘူၣ်တၢ်ဘါအမ့ၢ်အတီ. ယွၤအပှၤဂီၢ်မုၢ်န့ၣ် ကအိၣ်လၢဘၤဘူၤလိၣ်အနံၣ် ၇၀ ဝံၤအလီၢ်ခံ ကထူၣ်ဖျဲးထီၣ်ဝဲလီၤ. ဒီးအဝဲသ့ၣ်ကဟဲက့ၤလၢ အထံအကီၢ်ဒီးကသူၣ်ထီၣ်က့ၤဝဲ ယဟိဝၤယွၤအတၢ်လုၢ်ဟံၣ်လၢ ဝ့ၢ်ယရူၤၡလ့ၣ်အပူၤန့ၣ်လီၤ. (ယံးရမံယၤ ၄၆:၂၇, ဧၤမိၣ် ၉:၁၃-၁၅) ပူၤကွံာ်အနံၣ် ၂၀၀ ဃၣ်ဃၣ်တချုးဝ့ၢ်ဘၤဘူၤလိၣ်ဘၣ်တၢ်မၤဟးဂီၤအီၤန့ၣ် ဝံယၡါယၤ တဲဆိပာ်ဝဲဒၣ်လၢ ပှၤလၢအကမၤနၢၤပှၤဘၤဘူၤလိၣ်ဖိတဖၣ်န့ၣ် အမံၤကမ့ၢ်ဝဲစီၤကိရ့ၣ်လီၤ. ဒီးအဝဲကပျဲဝဲယွၤအပှၤဂီၢ်မုၢ်လၢ ကက့ၤသူၣ်ထီၣ်က့ၤ တၢ်ဘူၣ်တၢ်ဘါအမ့ၢ်အတီန့ၣ်လီၤ. စီၤကိရ့ၣ်ကလဲၤဒုးဝ့ၢ်ဘၤဘူၤလိၣ်လၢကျဲဒ်လဲၣ်န့ၣ် ဝံယၡါယၤပာ်ဖျါထီၣ်ဝဲ လီၤတံၢ်လီၤဆဲးလီၤ.—ယၡါယၤ ၄၄:၂၄–၄၅:၃.
၃. မ့းၡံအၤကဟဲ ဒီးတၢ်လၢအဝဲကဘၣ်လဲၤခီဖျိဝဲတဖၣ်. မ့းၡံအၤကအိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ်အပူၤလီၤ. (မံကၤ ၅:၂) အဝဲကအိၣ်ဒီးတၢ်ဆီၣ်လီၤအသးအဃိ ကဒိးကသ့ၣ်ယီၤ ဖဲဟဲနုာ်ဝဲလၢဝ့ၢ်ယရူၤၡလ့ၣ်အဆၢကတီၢ်လီၤ. (စကၤရယၤ ၉:၉) ကစၢ်ကအိၣ်ဒီးတၢ်သူၣ်ဂ့ၤသးဝါဒီး တၢ်သးကညီၤသနာ်က့ ပှၤအါဂၤတမ့ၢ်ကဘၣ်သူၣ်ဘၣ်သးအီၤဘၣ် ဒီးကညိကွံာ်အီၤလီၤ. (ယၡါယၤ ၄၂:၁-၃; ၅၃:၁, ၃) ကစၢ်ကဘၣ်တၢ်မၤဆါအီၤနးနးကလဲာ် ဖဲပှၤကမၤသံအီၤအဆၢကတီၢ်လီၤ. ဘၣ်ဆၣ် အတၢ်အိၣ်မူန့ၣ် ကကတၢၢ်ကွံာ်ဝဲ လီၤထူလီၤယိာ်ဧါ. တမ့ၢ်ဘၣ်. ကစၢ်ဟ့ၣ်လုၢ်ထီၣ်အသးသမူ ဒ်သိးပှၤအါဂၤအတၢ်ဒဲးဘး ကဘၣ်တၢ်ပျၢ်ကွံာ်အီၤအဂီၢ်လီၤ. (ယၡါယၤ ၅၃:၄, ၅, ၉-၁၂) ဘၣ်ဆၣ်ဒီးကစၢ်မ့ၢ်တဂဲၤဆၢထၢၣ်သမူထီၣ်က့ၤဘၣ်န့ၣ် တၢ်အံၤကဲထီၣ်အသးတသ့ဘၣ်.
၄. မ့းၡံအၤ ကပၢဟီၣ်ခိၣ်. ပှၤဟီၣ်ခိၣ်ဖိအတၢ်ပၢတၢ်ပြးတဖၣ် ဒုးအိၣ်ထီၣ်ဝဲတၢ်ဃူတၢ်ဖိး တန့ၢ်ဘၣ်သနာ်က့ စီၤပၤမ့းၡံအၤန့ၣ် ကဘၣ်တၢ်ကိးအီၤလၢ တၢ်ဃူတၢ်ဖိးအပဒိၣ်ဖးဒိၣ်န့ၣ်လီၤ. (ယၡါယၤ ၉:၆, ၇; ယံးရမံယၤ ၁၀:၂၃) ကစၢ်မ့ၢ်ပၢတၢ်န့ၣ် ပှၤဟီၣ်ခိၣ်ဖိကဒဲကဒဲ ဒီးဆၣ်ဖိကီၢ်ဖိသ့ၣ်တဖၣ်ခဲလၢာ် ကအိၣ်ဒီးတၢ်ဃူတၢ်ဖိးလီၤ. (ယၡါယၤ ၁၁:၃-၇) တၢ်ဆူးတၢ်ဆါ ကဟါမၢ်ကွံာ်ဝဲလီၤ. (ယၡါယၤ ၃၃:၂၄) တၢ်သံစ့ၢ်ကီးကလီၤမၢ်ကွံာ် လီၤထူလီၤယိာ်လီၤ. (ယၡါယၤ ၂၅:၈) ဖဲမ့းၡံအၤပၢတၢ်အတီၢ်ပူၤ ပှၤလၢအသံတ့ၢ်တဖၣ်န့ၣ် ကဂဲၤဆၢထၢၣ်သမူထီၣ်က့ၤလၢ ဟီၣ်ခိၣ်ချၢလီၤ.—ဒၤနံးယ့လး ၁၂:၁၃.
—ဘၣ်တၢ်ဒိးသန့ၤထီၣ်အီၤလၢ လံာ်ယၡါယၤ, ယံးရမံယၤ, ဒၤနံးယ့လး, ဧၤမိၣ်, မံကၤ ဒီးစကၤရယၤ န့ၣ်လီၤ.