ဖဲတၢ်သူၣ်အုးသးအုး လီၤဘၣ်နၤအခါ

နဂုာ်ကျဲးစၢးအဂ့ၤကတၢၢ်လၢ နတၢ်ဆီဟံၣ်ဆီဃီဒီး နဟံၣ်ဖိဃီဖိကအိၣ်ဒီး တၢ်မုာ်တၢ်ခုၣ်သနာ်က့ တၢ်ကဲထီၣ်အသးလၢ တၢ်တပာ်သူၣ်ပာ်သးအပူၤန့ၣ် မၤစှၤလီၤနတၢ်သူၣ်ဖှံသးညီသ့လီၤ. (စံၣ်တဲၤတဲလီၤတၢ် ၉:၁၁) ဖဲပကွၢ်ဆၢၣ်မဲာ်ဘၣ် တၢ်ကီတၢ်ခဲအခါ ကစၢ်ယွၤမၤစၢၤပှၤလၢ တၢ်အဲၣ်တၢ်ကွံအပူၤလီၤ. နၤဒီးနဟံၣ်ဖိဃီဖိ သုမ့ၢ်မၤထွဲလံာ်စီဆှံ တၢ်ဟ့ၣ်ကူၣ်လၢ တၢ်နီၤဖးအံၤအပူၤန့ၣ် တၢ်အိၣ်အသးလၢ အနးကတၢၢ်ဒၣ်လဲာ် သုတူၢ်အီၤကန့ၢ်လီၤ.

၁ သန့ၤနသးလၢ ယဟိဝၤယွၤတက့ၢ်

လံာ်စီဆှံစံးဝဲ– “ကယဲၢ်သုတၢ်ဘၣ်ယိၣ်ဘၣ်ဘီန့ၣ် ပာ်ထီၣ်လၢအဝဲဒၣ်အလိၤ ခဲလၢာ်တက့ၢ်. အဂ့ၢ်ဒ်အံၤ အသးအိၣ်သုလီၤ.” (၁ ပ့းတရူး ၅:၇) နမ့ၢ်တူၢ်ဘၣ် တၢ်မၤကွၢ်တဖၣ်န့ၣ် သ့ၣ်နီၣ်ထီၣ်ထီဘိလၢ နပာ်တၢ်ကမၣ်လၢ ကစၢ်ယွၤအလိၤ တသ့ဘၣ်န့ၣ်တက့ၢ်. (ယၤကိာ် ၁:၁၃) နမ့ၢ်သုးဘူးနသးလၢ ကစၢ်ယွၤအအိၣ်န့ၣ် အဝဲကမၤစၢၤနၤလၢ ကျဲလၢအဂ့ၤကတၢၢ်လီၤ. (ယၡါယၤ ၄၁:၁၀) “လူလီၤသုသးလၢ အမဲာ်ညါတက့ၢ်.” — စံးထီၣ်ပတြၢၤ ၆၂:၈.

ကိးနံၤဒဲးဖဲနဖးဒီး မၤလိလံာ်စီဆှံအခါ နကဒိးန့ၢ်ဘၣ်စ့ၢ်ကီး တၢ်မၤမုာ်ထီၣ်က့ၤန့ၣ်လီၤ. ခီဖျိနမၤဒ်န့ၣ်အဃိ နကထံၣ်ဘၣ်လၢ ယဟိဝၤယွၤ “မၤမုာ်ထီၣ်ပှၤလၢ ပတၢ်နးတၢ်ဖှီၣ် ခဲလၢာ်အပူၤ”လီၤ. (၂ ကရံၣ်သူး ၁:၃, ၄; ရိမ့ၤ ၁၅:၄) ကစၢ်အၢၣ်လီၤဝဲလၢ ကဟ့ၣ်နၤ “ယွၤအတၢ်ဃူတၢ်ဖိ:လၢ အဒိၣ်န့ၢ်ယိာ်န့ၢ်ကယဲၢ် ပသ့ၣ်ညါနၢ်ပၢၢ်တၢ်” န့ၣ်လီၤ.—ဖံလံးပံၤ ၄:၆, ၇, ၁၃.

တၢ်လၢနမၤသ့–

• ဃ့ယဟိဝၤယွၤ အတၢ်မၤစၢၤလၢ နသးကမုာ်ထီၣ်က့ၤဒီး နကဆိကမိၣ်တၢ် လီၤတံၢ်လီၤဆဲးအဂီၢ်တက့ၢ်

• နဘၣ်သမံသမိးကျဲလၢ နဃုထၢသ့ခဲလၢာ်ဝံၤဒီး ဃုထၢကျဲလၢ အဂ့ၤကတၢၢ်တက့ၢ်

၂ အံးထွဲကွၢ်ထွဲလီၤက့ၤနသးဒီး နဟံၣ်ဖိဃီဖိတက့ၢ်

လံာ်စီဆှံစံးဝဲ– “ပှၤအကူၣ်အဆးအသးန့ၣ် န့ၢ်ဘၣ်တၢ်သ့ၣ်ညါလီၤ. ဒီးပှၤကူၣ်တၢ်သ့အနၢ်န့ၣ် ဃုတၢ်သ့ၣ်ညါလီၤ.” (ကတိၤဒိ ၁၈:၁၅) ဃုသ့ၣ်ညါတၢ်ဂ့ၢ်ခဲလၢာ်လၢ ဘၣ်ဃးဒီးတၢ်လၢ နတူၢ်ဘၣ်န့ၣ်တက့ၢ်. ဃုသ့ၣ်ညါနဟံၣ်ဖိဃီဖိကိးဂၤဒဲး အတၢ်လိၣ်ဘၣ်တက့ၢ်. ကတိၤတၢ်ဒီးအဝဲသ့ၣ်, ဒိကနၣ်အဝဲသ့ၣ် အတၢ်ကတိၤတက့ၢ်.—ကတိၤဒိ ၂၀:၅.

ပှၤလၢနအဲၣ်ဘၣ်အီၤတဂၤ မ့ၢ်သံအခါန့ၣ် တဘၣ်မဲာ်ဆှးလၢ နကပာ်ဖျါထီၣ် နတၢ်သူၣ်အုးသးအုးတဂ့ၤ. သ့ၣ်နီၣ်ထီၣ်လၢ ယ့ၣ်ၡူးဒၣ်လဲာ် “အမဲာ်ထံလီၤဝဲ” န့ၣ်တက့ၢ်. (ယိၤဟၣ် ၁၁:၃၅; စံၣ်တဲၤတဲလီၤတၢ် ၃:၄) ဒ်သိးနလဲၤခီဖျိ တၢ်အိၣ်အသးလၢ အလီၤသူၣ်ကိၢ်သးဂီၤတဖၣ် ကန့ၢ်အဂီၢ်တၢ်ဟံးန့ၢ် တၢ်အိၣ်ဘှံးလၢလၢပှဲၤပှဲၤဒီး တၢ်မံလၢမံန့ၣ် ကမၤစၢၤနၤစ့ၢ်ကီးလီၤ.—စံၣ်တဲၤတဲလီၤတၢ် ၄:၆.

တၢ်လၢနမၤသ့–

• ညီနုၢ်ရ့လိာ်ကတိၤတၢ်ဒီး နဟံၣ်ဖိဃီဖိ တချုးနကွၢ်ဆၢၣ်မဲာ်ဘၣ် တၢ်သူၣ်အုးသးအုးအခါန့ၣ်တက့ၢ်. နမ့ၢ်မၤဒ်န့ၣ်ဒီး ဖဲတၢ်သဘံၣ်ဘုၣ် ဟဲအိၣ်ထီၣ်အခါအဝဲသ့ၣ် ကတိၤတၢ်ဒီးနၤကဘူၣ်လီၤ

• ကတိၤသကိးတၢ်ဒီးပှၤအဂၤလၢ အကွၢ်ဆၢၣ်မဲာ်ဘၣ် တၢ်အိၣ်အသးဒ်သိးဒီးနၤတက့ၢ်

၃ ဟံးန့ၢ်တၢ်မၤစၢၤ လၢနလိၣ်ဘၣ်

လံာ်စီဆှံစံးဝဲ– “ပှၤအတံၤအသကိး အဲၣ်တၢ်ကိးအဆၢအကတီၢ်ဒဲး ဒီးပှၤဒီပုၢ်ဝဲၢ်အိၣ်ဖျဲၣ်ဝဲလၢ တၢ်မၤကိၢ်မၤဂီၤအဂီၢ်လီၤ.” (ကတိၤဒိ ၁၇:၁၇) နတံၤသကိးတဖၣ် အဲၣ်ဒိးမၤစၢၤနၤဘၣ်ဆၣ် အဝဲသ့ၣ်ကဘၣ်မၤစၢၤဝဲဒ်လဲၣ်န့ၣ် ဘၣ်သ့ၣ်သ့ၣ် တသ့ၣ်ညါဝဲဘၣ်. တဘၣ်သးဆံးလၢ နကတဲဘၣ်အဝဲသ့ၣ် တၢ်လၢနလိၣ်ဘၣ် နီၢ်နီၢ်န့ၣ် တဂ့ၤ. (ကတိၤဒိ ၁၂:၂၅) နကဘၣ်မၤထွဲလံာ်စီဆှံ တၢ်နဲၣ်လိဒ်လဲၣ်န့ၣ် ဃ့တၢ်မၤ စၢၤလၢ ပှၤလၢအနၢ်ပၢၢ် လံာ်စီဆှံဂ့ၤဂ့ၤတဖၣ် အအိၣ်တက့ၢ်. အဝဲသ့ၣ်ဒုးနဲၣ်နၤ တၢ်နဲၣ်လိလၢလံာ်စီဆှံပူၤန့ၣ် ကဲထီၣ်တၢ်မၤစၢၤလၢ နဂီၢ်သ့လီၤ. —ယၤကိာ် ၅:၁၄.

ထီဘိန့ၣ်နမ့ၢ်ရ့ဒီး ပှၤလၢအသန့ၤအသးလၢယွၤဒီး နာ်န့ၢ်ယွၤအတၢ်စံးပာ်တဖၣ်န့ၣ် နကဒိးန့ၢ်ဘၣ်တၢ်မၤစၢၤလၢ နလိၣ်ဘၣ်န့ၣ်လီၤ. ဖဲနမၤစၢၤပှၤလၢအလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါအခါ နကဒိးန့ၢ်ဘၣ်စ့ၢ်ကီး တၢ်မၤမုာ်ထီၣ်က့ၤနၤန့ၣ်လီၤ. တဲနၢ်ပၢၢ်အဝဲသ့ၣ်ဘၣ်ဃးဒီး ယဟိဝၤယွၤဒီးကစၢ် အတၢ်စံးပာ်အဂ့ၢ်န့ၣ်တက့ၢ်. ပှၤလၢအလိၣ်ဘၣ်တၢ်မၤစၢၤန့ၣ် မၤစၢၤအီၤတက့ၢ်. တဘၣ်အိၣ်လီၤဆီ ထဲတဂၤဧိၤ တဂ့ၤ, ရ့ဒီးပှၤလၢအအဲၣ်နၤဒီး သးအိၣ်မၤစၢၤနၤတက့ၢ်.—ကတိၤဒိ ၁၈:၁; ၁ ကရံၣ်သူး ၁၅:၅၈.

တၢ်လၢနမၤသ့–

• ကတိၤတၢ်ဒီးနတံၤသကိးလၢ အအဲၣ်ဘၣ်နၤတဂၤဒီး တူၢ်လိာ်အတၢ်မၤစၢၤတက့ၢ်

• တဲဖျါထီၣ်နတၢ်လိၣ်ဘၣ်တဖၣ် လီၤတံၢ်လီၤဆဲး ဒီးတဲအီၤတီတီလိၤလိၤတက့ၢ်