ပှၤဖးလံာ်ဖိတဖၣ် အတၢ်သံကွၢ်
လံာ်စီဆှံတဲဝဲလၢ ဖဲတၢ်ဂ့ၢ်ကဲထီၣ်အသး တမံၤမံၤအခါ ဒ်သိးပှၤကပာ်ဂၢၢ်ပာ်ကျၢၤ တၢ်ဂ့ၢ်အဂီၢ် အစှၤကတၢၢ်န့ၣ် ပှၤအုၣ်အသး ကဘၣ်အိၣ် ခံဂၤလီၤ. (၄ မိၤၡ့ ၃၅:၃၀; ၅ မိၤၡ့ ၁၇:၆; ၁၉:၁၅; မးသဲ ၁၈:၁၆; ၁ တံၤမသ့း ၅:၁၉) ဘၣ်ဆၣ် စီၤမိၤၡ့အတၢ်သိၣ်တၢ်သီ တဲဝဲလၢ ပှၤပိာ်ခွါတဂၤ မ့ၢ်မၤတရီတပါ ပှၤပိာ်မုၣ်လၢ အအိၣ်ဒီး အတၢ်အဲၣ်တီတဂၤလၢ “ပှၢ်လၢ်ကျါ” ဒီးပိာ်မုၣ်တဂၤအံၤ မ့ၢ်ကိးပသူထီၣ်န့ၣ် ပိာ်ခွါတဂၤအံၤ အတၢ်ကမၣ်အိၣ်လၢ အအဲၣ်ဘၢတၢ် သနာ်က့ မ့မ့ၢ်ပိာ်မုၣ်တဂၤန့ၣ် အတၢ်ကမၣ် တအိၣ်ဘၣ်. ဖဲအံၤန့ၣ် ပထံၣ်ဘၣ်လၢ ပှၤအုၣ်အသး တအိၣ်လၢ ပှၤပိာ်ခွါတဂၤအံၤ မၤတရီတပါတၢ် ဘၣ်ဆၣ် ဘၣ်မနုၤအဃိ ပိာ်ခွါတဂၤအံၤ အတၢ်ကမၣ်အိၣ်ဒီး ပှၤပိာ်မုၣ်တဂၤအံၤ အတၢ်ကမၣ်တအိၣ်ဘၣ်လဲၣ်.
တၢ်ကွဲးနီၣ်ဖဲ ၅ မိၤၡ့ ၂၂:၂၅-၂၇ အပူၤန့ၣ် ပိာ်ခွါတဂၤအံၤ ဘၣ်တၢ်ပာ်ပနီၣ်ပာ်စၢၤအီၤ ဒ်ပှၤမၤကမၣ်တၢ်လံ. အဃိ တၢ်ကွဲးနီၣ်အံၤ အတၢ်ဂ့ၢ်ခိၣ်သ့ၣ်န့ၣ် တမ့ၢ်လၢ ပှၤကပာ်ဖျါထီၣ် ပှၤပိာ်ခွါတဂၤအံၤ အတၢ်ကမၣ်အိၣ်ဧါ တအိၣ်ဧါ အဂ့ၢ်န့ၣ်ဘၣ်. လၢတၢ်န့ၣ်အလီၢ် အအဲၣ်ဒိးပာ်ဖျါထီၣ်ဝဲလၢ ပှၤပိာ်မုၣ်တဂၤအံၤ အတၢ်ကမၣ် တအိၣ်ဘၣ်အဂ့ၢ်လီၤ. ဆိကမိၣ်ကွၢ် တၢ်ဂ့ၢ်လၢ လံာ်ကျိၤအမဲာ်ညါ ဒီးအလီၢ်ခံန့ၣ်တက့ၢ်.
လၢလံာ်စီဆှံအဆၢလၢ အမဲာ်ညါတဖၣ်န့ၣ် ပာ်ဖျါထီၣ်ဝဲ ပှၤပိာ်ခွါတဂၤလၢ အမံဃုာ်ဒီး ပိာ်မုၣ်လၢ အအိၣ်ဒီး အတၢ်အဲၣ်တီတဂၤလၢ “ဝ့ၢ်ပူၤ” အဂ့ၢ်လီၤ. မ့ၢ်လၢပှၤပိာ်မုၣ်လၢ အအိၣ်ဒီးတၢ်အဲၣ်တီန့ၣ် ပှၤပာ်ပနီၣ်အီၤဒ် ပှၤလၢအဆီဟံၣ်ဆီဃီလံအဃိ ပှၤပိာ်ခွါလၢ အမၤအီၤဒ်အံၤတဂၤန့ၣ် မ့ၢ်အအဲၣ်ဘၢတၢ်လီၤ. လံာ်စီဆှံ တဲဝဲလၢ “ပိာ်မုၣ်တဂၤန့ၣ် အိၣ်ဝဲလၢဝ့ၢ်ပူၤ ဒီးတကိးပသူထီၣ်ဘၣ်.” အဝဲမ့ၢ်ကိးပသူထီၣ်န့ၣ် ပှၤဂၤကနၢ်ဟူအီၤ ဒီးမၤစၢၤအီၤကသ့လီၤ. ဘၣ်ဆၣ်မ့ၢ်လၢ အဝဲတကိးပသူထီၣ်ဘၣ်အဃိ အဝဲစ့ၢ်ကီး ပၣ်ဃုာ်လၢ တၢ်အဲၣ်ဘၢတၢ်အကျါလီၤ. လၢတၢ်န့ၣ်အဃိ အဝဲသ့ၣ်ခံဂၤလၢာ်န့ၣ် ဘၣ်တၢ်စံၣ်ညီၣ်အီၤလၢ အမၤကမၣ်တၢ်လီၤ.—၅ မိၤၡ့ ၂၂:၂၃, ၂၄.
ဒီးစီၤမိၤၡ့ အတၢ်သိၣ်တၢ်သီ ဆဲးပာ်ဖျါထီၣ် တၢ်အိၣ်သးလၢ အဂၤတခါလီၤ. “မ့မ့ၢ်ပှၤမ့ၢ်ထံၣ်န့ၢ်ပိာ်မုၣ်လၢ အဘၣ်တၢ်အဲၣ်တီတဂၤ လၢပှၢ်လၢ်ကျါ, ဒီးမ့ၢ်ဖိးန့ၢ်ဆူၣ်, ဒီးမံဃုာ်ဒီးအီၤဒီး, ကဘၣ်သံထဲ ပိာ်ခွါလၢအမံဃုာ်ဒီး ပိာ်မုၣ်တဂၤဧိၤလီၤ. မ့မ့ၢ်ပိာ်မုၣ်တဂၤန့ၣ် နတဘၣ်မၤအီၤလၢ တၢ်နီတမံၤဘၣ်. တၢ်ဒဲးဘး ဘၣ်ဃးဒီးတၢ်သံန့ၣ် တအိၣ်လၢ ပိာ်မုၣ်အလိၤဘၣ်. အဂ့ၢ်ဒ်အံၤ, ဒ်ပှၤဂဲၤဆၢထၢၣ်ထီဒါဘၣ် ပှၤလၢအဃၢၤ, ဒီးမၤသံအီၤအသိးန့ၣ်, တၢ်တမံၤအံၤ မ့ၢ်ဒ်န့ၣ်သိးလီၤ. အဂ့ၢ်ဒ်အံၤ, ပိာ်ခွါထံၣ်န့ၢ် ပိာ်မုၣ်လၢ ပှၢ်လၢ်ကျါ, ပိာ်မုၣ်လၢ အဘၣ်တၢ်အဲၣ်တီတဂၤ ကိးပသူထီၣ်, ဒီးပှၤအုၣ်က့ၤခီၣ်က့ၤအီၤ တအိၣ်ဘၣ်လီၤ.”—၅ မိၤၡ့ ၂၂:၂၅-၂၇.
လၢတၢ်အိၣ်သးတခါအံၤန့ၣ် စံၣ်ညီၣ်ကွီၢ်တဂၤ နာ်ဝဲလၢ ပိာ်မုၣ်တဂၤအံၤ “ကိးပသူထီၣ်” ဘၣ်ဆၣ် “ပှၤအုၣ်က့ၤခီၣ်က့ၤအီၤ တအိၣ်ဘၣ်.” အဃိ အဝဲတမ့ၢ်ပှၤလၢ အအဲၣ်ဘၢတၢ်ဘၣ်. ဘၣ်ဆၣ်မ့မ့ၢ် ပှၤပိာ်ခွါတဂၤအံၤန့ၣ် မ့ၢ်လၢအ “ဖိးန့ၢ်ဆူၣ်, ဒီးမံဃုာ်” ပှၤပိာ်မုၣ်လၢ အအိၣ်ဒီးတၢ်အဲၣ်တီအဃိ အဝဲမ့ၢ်ပှၤလၢ အမၤတရီတပါ ဒီးအဲၣ်ဘၢတၢ်န့ၣ်လီၤ.
တၢ်သိၣ်တၢ်သီအံၤ ပာ်ဖျါထီၣ်ဝဲလၢ ပှၤပိာ်မုၣ်တဂၤအံၤ အတၢ်ကမၣ် တအိၣ်ဘၣ်ဆၣ် ဖဲတၢ်ကွဲးနီၣ်အံၤန့ၣ် ပာ်ဖျါထီၣ်ဝဲယိယိဖိလၢ ပှၤပိာ်ခွါတဂၤအံၤ မၤတရီတပါတၢ် ဒီးအဲၣ်ဘၢတၢ်လီၤ. ပနာ်သ့သပှၢ်ကတၢၢ်လၢ စံၣ်ညီၣ်ကွီၢ်တဂၤအံၤက “ဃုတၢ်ထံထံ” ဒီးကဆၢတဲာ်တၢ်ဒ် တၢ်ဟံးစုနဲၣ်ကျဲလၢ ကစၢ်ယွၤပာ်ဖျါထီၣ်ဝဲ အဘျီတဖၣ်အဘျီ ဒီးၡဲၡဲဖိအသိးန့ၣ်လီၤ.—၅ မိၤၡ့ ၁၃:၁၄; ၁၇:၄; ၂ မိၤၡ့ ၂၀:၁၄.