တၢ်သံကွၢ်လၢတၢ်လွံၢ်နၢၣ်အပူၤ

◼ မ့ၢ်ပှၤစံၣ်တဲၤတဲလီၤတၢ်ဖိတဖၣ် ကြၢးစံၣ်တဲၤတဲလီၤတၢ် မ့တမ့ၢ် မၤလိလံာ်စီဆှံဒီး ပှၤလၢအအိၣ်လၢ ထံဂၤကီၢ်ဂၤလၢ အဝဲသ့ၣ်တသ့ၣ်ညါဝဲဘၣ်တဂၤ လၢအ့ထၢၣ်နဲးအပူၤန့ၣ်ဧါ.

ပှၤစံၣ်တဲၤတဲလီၤတၢ်ဖိတနီၤ ကသူဝဲအ့ထၢၣ်နဲး ဒ်သိးကစးထီၣ်မၤလိလံာ်စီဆှံဒီး ပှၤလၢအအိၣ်လၢထံကီၢ်လၢ တၢ်စံၣ်တဲၤတဲလီၤတၢ်မၤဘၣ်တၢ်တြီအီၤ မ့တမ့ၢ် တၢ်လီၢ်လၢပှၤစံၣ်တဲၤတဲလီၤတၢ်ဖိ အိၣ်စှၤဂၤန့ၣ်လီၤ. တဘျီတခီၣ်န့ၣ် ပှၤစံၣ်တဲၤတဲလီၤတၢ်ဖိတဖၣ်အံၤ ထံၣ်ဘၣ်ဝဲလၢအကဲဘျုးန့ၣ်လီၤ. ဘၣ်ဆၣ် ဖဲပှၤစံၣ်တဲၤတဲလီၤတၢ်ဖိတဖၣ် ဆဲးကျိးဒီးပှၤလၢအဝဲသ့ၣ် တသ့ၣ်ညါဝဲတဖၣ်လၢ အံမ့(လ်) (e-mail) မ့တမ့ၢ် တၢ်တဲသကိးတၢ်အဒၢး လၢအ့ထၢၣ်နဲးအပူၤ (chat room) န့ၣ် တၢ်ဘၣ်ယိၣ်အလီၢ်အိၣ်ဝဲလီၤ. (ကွၢ် ၂၀၀၇၊ ဇူလိုင်လထုတ် ကျွန်ုပ်တို့၏နိုင်ငံတော်ဓမ္မအမှု စာမျက်နှာ ၃ တက့ၢ်.) ဖဲအဝဲသ့ၣ်မၤဝဲဒ်န့ၣ်အခါ အသးအိၣ်မၤစၢၤ ပှၤလၢအသူၣ်တီသးလိၤတဖၣ် လၢကနၢ်ဟူဘၣ် ဘီမုၢ်အတၢ်သးခုကစီၣ်အဂီၢ်လီၤ. ဘၣ်ဆၣ် ပမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် ပကဆဲးကျိးဘၣ်ဒီး ပှၤလၢအတဂ့ၤပၣ်ဃုၣ်ဒီး ပှၤလၢအညိကွံာ်တၢ်နာ်တဖၣ်လီၤ. (၁ ကရံၣ်. ၁:၁၉-၂၅; ကလီး. ၂:၈) အါန့ၢ်အန့ၣ် ထံကီၢ်တနီၤနီၤန့ၣ် ဘီမုၢ်တၢ်သးခုကစီၣ် ဘၣ်တၢ်တြီအီၤအဃိ ပမ့ၢ်ဆဲးကျိးလိာ်သးဒီးထံဖိကီၢ်ဖိန့ၣ် ဘၣ်သ့ၣ်သ့ၣ် ပဒိၣ်ပပှၢ်ကနုာ်လီၤကွၢ်ဝဲတၢ်ဆဲးကျိးဒီး ကကဲထီၣ်တၢ်ဘၣ်ယိၣ်လၢ ပဒီပုၢ်ဝဲၢ်လၢ အိၣ်ဖဲန့ၣ်တဖၣ်အဂီၢ်လီၤ. လၢတၢ်န့ၣ်အဃိ ပှၤစံၣ်တဲၤတဲလီၤတၢ်ဖိတဖၣ် တကြၢးသူဝဲ အ့ထၢၣ်နဲးလၢ ကဃုဝဲပှၤလၢထံဂၤကီၢ်ဂၤ ဒ်သိးကစံၣ်တဲၤတဲလီၤ ဘီမုၢ်တၢ်သးခုကစီၣ်အဂီၢ်ဘၣ်.

တဘျီတခီၣ် ပကတဲသကိးဘၣ်တၢ်မ့ၢ်တၢ်တီဒီး ပှၤလၢထံဂၤကီၢ်ဂၤတဂၤ လၢအဟဲဟးဆူပအိၣ်တၢ်လီၢ်န့ၣ်လီၤ. ဘၣ်ဆၣ် ဖဲအဝဲက့ၤကဒါက့ၤဆူ အထံအကီၢ်အဆၢကတီၢ် မ့တမ့ၢ်ဘၣ်လၢ ဝဲၤတြၢ်အတၢ်ဟံးစုနဲၣ်ကျဲဘၣ်ဒီး ပတကြၢးဆဲးကျိးဒီး အီၤလၢကတဲသကိးလံာ်စီဆှံတၢ်မ့ၢ်တၢ်တီလၢၤဘၣ်. လၢတၢ်န့ၣ်အလီၢ် ဒ်သိးအဝဲကဃုသ့ၣ်ညါအါထီၣ် တၢ်ဂ့ၢ်တၢ်ကျိၤအဂီၢ် အဝဲကဘၣ်သူဝဲ jw.org ဒ်လဲၣ်ဒီးကဆဲးကျိးဒီး ဝဲၤတြၢ်လၢအိၣ်လၢအထံကီၢ်ဒ်လဲၣ်န့ၣ် ဒုးနဲၣ်အီၤတက့ၢ်. ဟ့ၣ်ဂံၢ်ဟ့ၣ်ဘါအီၤလၢ ကလဲၤဆူဘီမုၢ်ဘျီၣ်ဒိၣ်လၢ အဘူးဒီးအီၤန့ၣ်တက့ၢ်. ဘၣ်ဆၣ်ထံကီၢ်တနီၤနီၤန့ၣ် ဘီမုၢ်ဘျီၣ်ဒိၣ်တအိၣ်ဘၣ်. အဝဲမ့ၢ်အဲၣ်ဒိးလၢ ယဟိဝၤပှၤအုၣ်အသးကလဲၤဟးလၢ အအိၣ်န့ၣ် ပကြၢးမၤပှဲၤလံာ်က့လၢအမ့ၢ် ဝံသးစူၤဆဲးကျိးဒီးအီၤတက့ၢ် (S-43) ဒီးဟ့ၣ်လီၤနဲၣ်ရွဲၣ်တက့ၢ်. မ့ၢ်ဝံၤဒီး နဲၣ်ရွဲၣ်အံၤ ကသူဝဲ jw.org ဒ်သိးကဆှၢဝဲ တၢ်ဂ့ၢ်တၢ်ကျိၤတဖၣ်အံၤဆူ ဝဲၤတြၢ်လၢအကြၢးဝဲဘၣ်ဝဲန့ၣ်လီၤ. ဝဲၤတြၢ်လၢအကွၢ်ထွဲဝဲ တၢ်စံၣ်တဲၤတဲလီၤတၢ်မၤဖဲ ထံကီၢ်လၢပှၤသးအိၣ်တၢ်မ့ၢ်တၢ်တီတဂၤအံၤ အိၣ်ဝဲဆိးဝဲအပူၤန့ၣ် သ့ၣ်ညါဝဲထံကီၢ်တၢ်အိၣ်သးန့ၣ်လီၤ. လၢတၢ်န့ၣ်အဃိ ဝဲၤတြၢ်န့ၣ်ရဲၣ်ကျဲၤဝဲ တၢ်မၤစၢၤလၢအဂ့ၤကတၢၢ်သ့ဝဲလီၤ.—ကွၢ် ၂၀၁၄၊ ဇွန်လထုတ် ကျွန်ုပ်တို့၏နိုင်ငံတော်ဓမ္မအမှု စာမျက်နှာ ၅ နဲ့ ၂၀၁၁၊ နိုဝင်ဘာလထုတ် ကျွန်ုပ်တို့၏နိုင်ငံတော်ဓမ္မအမှု စာမျက်နှာ ၂ တက့ၢ်.

ပှၤလၢပတဲသကိးလံာ်စီဆှံဒီးအီၤတဂၤ မ့ၢ်သုးအသးလၢ ထံဂၤကီၢ်ဂၤ မ့တမ့ၢ် ပမ့ၢ်မၤလိလံာ်စီဆှံဒီး ပှၤလၢထံဂၤကီၢ်ဂၤလၢပတသ့ၣ်ညါအီၤတဂၤလၢ အ့ထၢၣ်နဲးအပူၤန့ၣ် ပကြၢးမၤထွဲတၢ်နဲၣ်လိလၢ တၢ်ဖီခိၣ်တဖၣ်အံၤန့ၣ်လီၤ. ဘၣ်ဆၣ် ဖဲပှၤစံၣ်တဲၤတဲလီၤတၢ်ဖိတဖၣ် လၢအလီၢ်ကဝီၤအပူၤ တချုးဆဲးကျိးဒီးအီၤဒံးဘၣ် အဆၢကတီၢ်န့ၣ် ပဆဲးမၤလိအီၤသ့ဒံးလီၤ. ဒ်လဲၣ်ဂ့ၤဒ်လဲၣ်ဂ့ၤ အဝဲမ့ၢ်အိၣ်လၢ ထံကီၢ်လၢ ပတၢ်စံၣ်တဲၤတဲလီၤတၢ်မၤ ဘၣ်တၢ်တြီအီၤအပူၤန့ၣ် ဖဲပသူလံာ်လဲၢ်, လီတဲစိ မ့တမ့ၢ် အ့ထၢၣ်နဲးလၢ ပကတဲသကိးလံာ်စီဆှံအဂ့ၢ်ဒီးအီၤအခါန့ၣ် ပကြၢးပလီၢ်ပသးဒိၣ်မးလီၤ.—မး. ၁၀:၁၆.