အဲၣ်လိာ်သး တဂၤဒီးတဂၤ လၢသးဒီဖျၢၣ်

၁. ယ့ၣ်ၡူးမၤလိာ်တ့ၢ် အပျဲၢ်အဘီၣ်တဖၣ်​ ဒ်လဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)

တချုးဖဲ ယ့ၣ်ၡူးသံအနၤန့ၣ်​ အဝဲမၤလိာ်တ့ၢ် အပျဲၢ်အဘီၣ်တဖၣ်​ လီၤတံၢ်လီၤဆဲးလၢ “အဲၣ်လိာ်ကွံလိာ်သုသး သကိးသကိး, ဒ်ယအဲၣ်သုအသိး, . . . လၢသုအဲၣ်လိာ်ကွံလိာ်သုသး အဃိဒီး, ပှၤခဲလၢာ် ကသ့ၣ်ညါလၢ သုမ့ၢ်ယပျဲၢ်ယဘီၣ်လီၤ.”—ယိၤဟၣ်​ ၁၃:၃၄, ၃၅.

၂. ဘၣ်မနုၤအဃိ အရ့ဒိၣ်လၢ ပကအဲၣ်လိာ်ကွံလိာ်ပသး တဂၤဒီးတဂၤလဲၣ်.

^၂ ယ့ၣ်ၡူးတဲဝဲလၢ အပျဲၢ်အဘီၣ်တဖၣ်​ မ့ၢ်ပာ်ဖျါထီၣ်​ တၢ်အဲၣ်ဒ် အဝဲပာ်ဖျါတ့ၢ်ဝဲအသိးန့ၣ်​ ပှၤကိးဂၤဒဲး ကသ့ၣ်ညါလၢ အဝဲသ့ၣ်မ့ၢ် အပျဲၢ်အဘီၣ်လီၤ. လၢတၢ်မၢဖိအစိၤန့ၣ်​ မ့ၢ်လၢခရံာ်အပျဲၢ်အဘီၣ်တဖၣ်​ ပာ်ဖျါထီၣ်​ တၢ်အဲၣ်အဃိ ပှၤသ့ၣ်ညါအဝဲသ့ၣ်လၢ အမ့ၢ်ခရံာ်အပျဲၢ်အဘီၣ်လီၤ. လၢပစိၤခဲအံၤစ့ၢ်ကီး တၢ်မၤအသး ဒ်န့ၣ်လီၤ. အဃိ မ့ၢ်ကီလၢ ပကပာ်ဖျါထီၣ်​ တၢ်အဲၣ်ဒၣ်လဲာ် အရ့ဒိၣ်ဒိၣ်မးလၢ ပကဘၣ်ပာ်ဖျါထီၣ်အီၤလီၤ.

၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.

^၃ ပတလၢတပှဲၤဘၣ်​ ဒီးပှၤဂၤစ့ၢ်ကီး တလၢတပှဲၤဘၣ်. အဃိကကီလၢ ပကအဲၣ်လိာ်ပသး တဂၤဒီးတဂၤ လၢပသးဒီဖျၢၣ်လီၤ. ဘၣ်ဆၣ်​ ပကဘၣ်​ ကွၢ်လိမၤဒိး ယ့ၣ်ၡူးလီၤ. လၢတၢ်မၤလိအံၤအပူၤ ပကမၤလိဘၣ်​ တၢ်ဂ့ၢ်လၢအမ့ၢ် တၢ်အဲၣ်န့ၣ်ကမၤစၢၤပှၤဒ်သိး ပကမၤဃူမၤဖိးတၢ်ဒီးပှၤဂၤ, တကွၢ်ဒိၣ်ဆံးအါစှၤတၢ်ဘၣ်​ ဒီးအဲၣ်တူၢ်တံၤတူၢ်တမှံၤန့ၣ်လီၤ. ဖဲနမၤလိ တၢ်မၤလိအံၤအခါ သံကွၢ်လီၤနသးလၢ ‘ဒီပုၢ်ဝဲၢ်မုၣ်ခွါတဖၣ်န့ၣ်​ ကီလၢအဝဲသ့ၣ်​ ကပာ်ဖျါထီၣ်တၢ်အဲၣ်ဘၣ်ဆၣ်​ အဝဲသ့ၣ်​ ဆဲးပာ်ဖျါထီၣ်တၢ်အဲၣ်​ ဒ်လဲၣ်​ ဒီးယမၤလိန့ၢ် တၢ်မနုၤလၢ အဝဲသ့ၣ်အအိၣ်လဲၣ်.’

ကဲထီၣ်ပှၤလၢ အမၤဃူမၤဖိးတၢ်

၄. ဒ် မးသဲ ၅:၂၃, ၂၄ တဲဝဲအသိး ဘၣ်မနုၤအဃိ အရ့ဒိၣ်လၢ ပကမၤဃူမၤဖိးတၢ်ဒီး ပဒီပုၢ်ဝဲၢ်လၢ အသးတမုာ်ပှၤဘၣ်န့ၣ်လဲၣ်.

^၄ ယ့ၣ်ၡူးသိၣ်လိပှၤလၢ ပကဘၣ်မၤဃူမၤဖိးတၢ်ဒီး ပဒီပုၢ်ဝဲၢ်လၢ အသးတမုာ်ပှၤန့ၣ်​ မ့ၢ်တၢ်လၢအရ့ဒိၣ်ဒိၣ်မးလီၤ. (ဖး မးသဲ ၅:၂၃, ၂၄ တက့ၢ်.) အဝဲပာ်ဖျါထီၣ်ဝဲလၢ ပမ့ၢ်အဲၣ်ဒိး မၤသးခု ကစၢ်ယွၤအသးန့ၣ်​ ပကဘၣ်ပၢၤဃာ် ပတၢ်ရ့လိာ်သးဒီးပှၤဂၤလီၤ. တသ့ဖဲအသ့ ပမ့ၢ်ဂုာ်ကျဲးစၢး မၤဃူမၤဖိးတၢ်ဒီး ပဒီပုၢ်ဝဲၢ်န့ၣ်​ ယဟိဝၤယွၤ အသးခုဒိၣ်မးလီၤ. ပသးမ့ၢ်တမုာ် ပှၤတဂၤဂၤဘၣ်​ ဒီးပမ့ၢ်တဂုာ်ကျဲးစၢး မၤဃူမၤဖိးတၢ်ဒီး ပှၤတဂၤအံၤဘၣ်န့ၣ်​ ကစၢ်ယွၤ တတူၢ်လိာ် ပတၢ်ဘူၣ်ထီၣ်ဘါထီၣ်ဘၣ်.—၁ ယိၤဟၣ်​ ၄:၂၀.

၅. ဘၣ်မနုၤအဃိ ကီလၢဒီပုၢ်ဝဲၢ်ခွါမးခ် ကမၤဃူမၤဖိးတၢ်ဒီးပှၤဂၤ အဂီၢ်လဲၣ်.

^၅ ဘၣ်သ့ၣ်သ့ၣ်​ ကကီလၢ ပကမၤဃူမၤဖိးတၢ်ဒီး ပှၤဂၤအဂီၢ်လီၤ. ဘၣ်မနုၤအဃိလဲၣ်. ဆိကမိၣ်ကွၢ် ဒီပုၢ်ဝဲၢ်မးခ် အတၢ်လဲၤခီဖျိတက့ၢ်.b ဖဲဒီပုၢ်ဝဲၢ်ခွါတဂၤ ပာ်ဒ့ၣ်ပာ်ကမၣ်အီၤ ဒီးတဲဟးဂီၤအီၤလၢ ဒီပုၢ်ဝဲၢ်အဂၤအအိၣ်အခါ အဝဲအသးဘၣ်ဒိဒိၣ်မးလီၤ. အဝဲတဲဝဲလၢ “ယပၢၤယသး တန့ၢ်လၢၤဘၣ်​ ဒီးယသးဒိၣ်ထီၣ်တၢ်လီၤ.” မ့ၢ်လၢအဝဲမၤဘၣ်ဝဲ ဒ်န့ၣ်အဃိ လၢခံန့ၣ်​ အဝဲအသးဘၣ်ဒိဒိၣ်မးလီၤ. အဃိ အဝဲဃ့ဝံသးစူၤ ဒီပုၢ်ဝဲၢ်တဂၤအံၤ ဒီးဂုာ်ကျဲးစၢး မၤဃူမၤဖိးတၢ်ဒီးအီၤလီၤ. ဘၣ်ဆၣ်​ ဒီပုၢ်ဝဲၢ်တဂၤအံၤ တတူၢ်လိာ်ဝဲဘၣ်. အဃိ လၢအခီၣ်ထံးန့ၣ်​ မးခ်ဆိကမိၣ်ဝဲလၢ ‘အဝဲမးတအဲၣ်ဒိး မၤဃူမၤဖိးတၢ်န့ၣ်​ ဘၣ်မနုၤအဃိ ယဘၣ်ဂုာ်ကျဲးစၢး မၤဃူမၤဖိးတၢ်ဒီးအီၤလဲၣ်.’ ကဝီၤအပှၤကွၢ်တၢ်တဂၤ ဟ့ၣ်ဂံၢ်ဟ့ၣ်ဘါမးခ်လၢ အကဆဲးမၤဃူမၤဖိးတၢ်ဒီး ဒီပုၢ်ဝဲၢ်တဂၤန့ၣ်လီၤ. အဃိ မးခ်မၤဝဲဒ်လဲၣ်.

၆. (က) မးခ် မၤဃူမၤဖိးတၢ်ဒီးပှၤဂၤဒ်လဲၣ်. (ခ) မးခ် မၤထွဲဝဲ တၢ်ဟ့ၣ်ကူၣ်ဖဲ ကလီးစဲ ၃:၁၃, ၁၄ အပူၤဒ်လဲၣ်.

^၆ ဒီပုၢ်ဝဲၢ်ခွါမးခ် ဆိကမိၣ်လီၤက့ၤ အတၢ်ပာ်သူၣ်ပာ်သး ဒီးအဝဲသ့ၣ်ညါလီၤအသးလၢ တဘျီတခီၣ်န့ၣ်​ အဆိကမိၣ်လီၤအသးလၢ အဂ့ၤဒိၣ်န့ၢ်ဒံးပှၤဂၤလီၤ. ဒီးအဝဲ သ့ၣ်ညါလီၤအသးလၢ အကဘၣ်ဆီတလဲ အတၢ်ပာ်သူၣ်ပာ်သးလီၤ. (ကလီးစဲ ၃:၈, ၉, ၁၂) အဃိ အဝဲလဲၤဃ့ဝံသးစူၤကဒီး ဒီပုၢ်ဝဲၢ်တဂၤန့ၣ်​ လၢတၢ်ဆီၣ်လီၤသးအပူၤလီၤ. မးခ်ကွဲးစ့ၢ်ကီးလံာ်ဆူ ဒီပုၢ်ဝဲၢ်တဂၤအံၤအအိၣ်​ ဒီးတဲဝဲလၢ အသးတမုာ်ဘၣ်ဒိၣ်မး ဒီးအအဲၣ်ဒိး က့ၤရ့လိာ်သးဒီးအီၤ ဒ်လၢညါအသိးလီၤ. ဒီးမးခ် ဟ့ၣ်လီၤစ့ၢ်ကီးဝဲ ဒီပုၢ်ဝဲၢ်တဂၤအံၤလၢ တၢ်ဟ့ၣ်ဆံးဆံးဖိတဖၣ်​ လၢအဆိကမိၣ်ဝဲလၢ ဒီပုၢ်ဝဲၢ်တဂၤအံၤ ကဘၣ်သူၣ်ဘၣ်သးဝဲန့ၣ်လီၤ. ဘၣ်ဆၣ်​ ဒီပုၢ်ဝဲၢ်ခွါတဂၤအံၤ တပျၢ်အတၢ်ကမၣ်ဘၣ်​ ဒီးအသးထီၣ်ဒံးအီၤလီၤ. သနာ်က့ မးခ်ဆဲးဒိကနၣ်​ ယ့ၣ်ၡူး အတၢ်မၤလိာ်လၢအမ့ၢ် ပှၤကဘၣ်အဲၣ်လိာ်ကွံလိာ်သး တဂၤဒီးတဂၤ ဒီးပျၢ်လိာ်သး တၢ်ကမၣ်လီၤ. (ဖး ကလီးစဲ ၃:၁၃, ၁၄ တက့ၢ်.) ပမ့ၢ်အဲၣ်ပှၤဂၤ ဒ်ယ့ၣ်ၡူးအသိးန့ၣ်​ ပှၤဂၤမ့ၢ်တအဲၣ်ဒိး အိၣ်ဃူအိၣ်ဖိးဒီးပှၤဘၣ်ဆၣ်​ ပကဆဲးပျၢ် အဝဲသ့ၣ်​ အတၢ်ကမၣ်​ ဒီးဆဲးဃ့ထုကဖၣ်လၢ ပအိၣ်ဃူအိၣ်ဖိးက့ၤဒီးအဝဲသ့ၣ်​ ကသ့အဂီၢ်လီၤ.—မးသဲ ၁၈:၂၁, ၂၂; ကလၤတံ ၆:၉.

၇. (က) ယ့ၣ်ၡူးဟ့ၣ်ဂံၢ်ဟ့ၣ်ဘါပှၤ ဒ်လဲၣ်. (ခ) ဒီပုၢ်ဝဲၢ်မုၣ်တဂၤ ထံၣ်ဘၣ်ဒီး တၢ်အိၣ်သးလၢ အကီအခဲဒ်လဲၣ်.

^၇ ယ့ၣ်ၡူးဟ့ၣ်ဂံၢ်ဟ့ၣ်ဘါပှၤလၢ ပကရ့ဒီး ပှၤဂၤဒ် ပအဲၣ်ဒိးလၢ ပှၤဂၤရ့ဒီးပှၤအသိးန့ၣ်လီၤ. အဝဲတဲဝဲလၢ တမ့ၢ်ထဲ ပကဘၣ်ပာ်ဖျါထီၣ်​ တၢ်အဲၣ်လၢ ပှၤလၢအအဲၣ်ပှၤတဖၣ်​ အဖီခိၣ်န့ၣ်ဘၣ်. (လူၤကၣ်​ ၆:၃၁-၃၃) ပှၤလၢတၢ်အိၣ်ဖှိၣ်ပူၤတဂၤဂၤ မ့ၢ်ဟးဆှဲးနၤ ဒီးမ့ၢ်တအဲၣ်ဒိး ဆၢဂ့ၤဆၢဝါနၤန့ၣ်​ နကမၤဒ်လဲၣ်. ညီနုၢ်န့ၣ်​ တၢ်တကဲထီၣ်အသးဒ်န့ၣ်ဘၣ်. ဒီပုၢ်ဝဲၢ်မုၣ်လါရၤ ထံၣ်ဘၣ်ဒီး တၢ်အိၣ်သးဒ်န့ၣ်လီၤ. အဝဲတဲဝဲလၢ “ဒီပုၢ်ဝဲၢ်မုၣ်တဂၤန့ၣ်​ ဟးဆှဲးယၤ ဒီးဘၣ်မနုၤအဃိလဲၣ်န့ၣ်​ ယတနၢ်ပၢၢ်ဘၣ်. အဃိ ယသးဘၣ်တံာ်တာ်ဒိၣ်မး ဒီးယတအဲၣ်ဒိးလဲၤထီၣ်​ တၢ်အိၣ်ဖှိၣ်ဘၣ်.” လၢအခီၣ်ထံးန့ၣ်​ လါရၤတဲဝဲလၢ ‘ယတမၤကမၣ်အီၤ နီတမံၤဘၣ်. ဒီပုၢ်ဝဲၢ်အဂၤတဖၣ်စ့ၢ်ကီး တူၢ်ဘၣ်ဝဲလၢ ဒီပုၢ်ဝဲၢ်မုၣ်တဂၤအံၤ မၤထီၣ်အသး လီၤဆီလီၤ.’

၈. လါရၤမၤဃူမၤဖိးတၢ် ဒ်လဲၣ်​ ဒီးပန့ၢ်ဘၣ်​ တၢ်မၤလိလၢ အအိၣ်ဒ်လဲၣ်.

^၈ လါရၤ စးထီၣ်မၤဃူမၤဖိးတၢ်ဒီး အီၤလီၤ. အဝဲဃ့ထုကဖၣ်လၢ ယဟိဝၤယွၤအအိၣ်ဒီး ပာ်လီၤအသးလၢ အကလဲၤတဲတၢ်ဒီး ဒီပုၢ်ဝဲၢ်မုၣ်တဂၤန့ၣ်လီၤ. အဝဲသ့ၣ်​ တဲသကိးဘၣ်ဃးဒီး အတၢ်ဂ့ၢ်ကီ, ဖိးဟုလိာ်အသး ဒီးမၤဃူမၤဖိးတၢ်လီၤ. ဒီးဖျါလၢ အဝဲသ့ၣ်​ အတၢ်အိၣ်သးန့ၣ်​ ဂ့ၤထီၣ်က့ၤလီၤ. လါရၤတဲဝဲလၢ “ဘၣ်ဆၣ်​ လၢခံန့ၣ်​ ဒီပုၢ်ဝဲၢ်မုၣ်တဂၤအံၤ အတၢ်ပာ်သူၣ်ပာ်သးလၢ ယဖီခိၣ်န့ၣ်​ က့ၤကဲထီၣ်​ ဒ်အလီၢ်လီၢ်အဃိ ယသးဟးဂီၤဒိၣ်မးလီၤ.” အခီၣ်ထံးခါန့ၣ်​ လါရၤဆိကမိၣ်ဝဲလၢ အသးခုထီၣ်က့ၤ ကသ့ထဲလၢ ဒီပုၢ်ဝဲၢ်မုၣ်တဂၤအံၤ မ့ၢ်ဆီတလဲ အတၢ်ပာ်သူၣ်ပာ်သးမးလီၤ. ဘၣ်ဆၣ်​ လၢခံန့ၣ်​ လါရၤသ့ၣ်ညါဝဲလၢ အဝဲမ့ၢ်ဆဲးရ့ဒီး ဒီပုၢ်ဝဲၢ်မုၣ်တဂၤအံၤလၢ တၢ်အဲၣ်တၢ်ကွံအပူၤဒီးဆဲး “ပျၢ်” အတၢ်ကမၣ်န့ၣ်​ ကမ့ၢ်တၢ်လၢ အဂ့ၤကတၢၢ်လီၤ. (အ့းဖ့းစူး ၄:၃၂–၅:၂) လါရၤ သ့ၣ်နီၣ်ထီၣ်ဝဲလၢ ခရံာ်ဖိတၢ်အဲၣ်နီၢ်နီၢ်န့ၣ်​ “တဆိကမိၣ်ဘၣ်​ တၢ်အၢတၢ်သီ [မ့တမ့ၢ် တၢ်ကမၣ်] ဘၣ်. ဒိးတၢ်ခဲလၢာ်, နာ်တၢ်ခဲလၢာ်, မုၢ်လၢ်တၢ်ခဲလၢာ်, ဝံသးစူၤတၢ်ခဲလၢာ်လီၤ.” (၁ ကရံၣ်သူး ၁၃:၅, ၇) လါရၤတဘၣ်ကိၢ်ဘၣ်ဂီၤတၢ်လၢ တၢ်အိၣ်သးတခါအံၤအဂီၢ်လၢၤဘၣ်. လၢခံန့ၣ်​ ဒီပုၢ်ဝဲၢ်မုၣ်တဂၤအံၤ ရ့ဒီးအီၤမုာ်ထီလီၤ. နမ့ၢ်မၤဃူမၤဖိးတၢ်ဒီး နဒီပုၢ်ဝဲၢ်မုၣ်ခွါတဖၣ်​ ဒီးအဲၣ်အဝဲသ့ၣ်ထီၣ်ဘိန့ၣ်​ နနာ်သ့သပှၢ်ကတၢၢ်လၢ ‘တၢ်အဲၣ်တၢ်ကွံ, ဒီးတၢ်ဃူတၢ်ဖိးအကစၢ်န့ၣ်, ကအိၣ်ဒီးနၤလီၤ.’—၂ ကရံၣ်သူး ၁၃:၁၁.

ကွၢ်ဒိၣ်ဆံးအါစှၤတၢ်တဂ့ၤ

၉. ဒ် မၤတၢ် ၁၀:၃၄, ၃၅ ပာ်ဖျါထီၣ်ဝဲအသိး ဘၣ်မနုၤအဃိ ပတဘၣ်​ ကွၢ်ဒိၣ်ဆံးအါစှၤတၢ်ဘၣ်လဲၣ်.

^၉ ယဟိဝၤယွၤန့ၣ်​ တကွၢ်ဒိၣ်ဆံးအါစှၤတၢ်ဘၣ်. (ဖး မၤတၢ် ၁၀:၃၄, ၃၅ တက့ၢ်.) လၢတၢ်န့ၣ်အဃိ ပမ့ၢ်တကွၢ်ဒိၣ်ဆံးအါစှၤတၢ်ဘၣ်န့ၣ်​ မ့ၢ်ဒၣ်ပပာ်ဖျါထီၣ်လၢ ပမ့ၢ်ကစၢ်ယွၤ အဖိအလံၤလီၤ. ပဒိကနၣ်​ တၢ်မၤလိာ်လၢအမ့ၢ် ပကဘၣ်အဲၣ်ပှၤလၢပဃၢၤ ဒ်ပအဲၣ်လီၤပသး ဒီးပအိၣ်ဃူအိၣ်ဖိးဒီး ပဒီပုၢ်ဝဲၢ်မုၣ်ခွါတဖၣ်လီၤ.—ရိမ့ၤ ၁၂:၉, ၁၀; ယၤကိာ် ၂:၈, ၉.

၁၀-၁၁. ဒီပုၢ်ဝဲၢ်မုၣ်တဂၤ မၤလီၤမၢ်ကွံာ် အတၢ်ထံၣ်လၢအတဂ့ၤ န့ၢ်ဝဲဒ်လဲၣ်.

^၁၀ ပဝဲတနီၤန့ၣ်​ ပကကဲထီၣ်​ ပှၤလၢအတကွၢ်ဒိၣ်ဆံးအါစှၤတၢ် တဂ့ၤအဂီၢ် တညီထီဘိဘၣ်. ဆိကမိၣ်ကွၢ် တၢ်မၤအသးဒီး ဒီပုၢ်ဝဲၢ်မုၣ်ရူၣ်(သ်)န့ၣ်တက့ၢ်. ဖဲအဝဲ အသးစၢ်အခါ ပှၤလၢအအိၣ်ဟဲလၢ ထံကီၢ်အဂၤတဘ့ၣ်န့ၣ်​ မၤဘၣ်ဒိဘၣ်​ အဟံၣ်ဖိဃီဖိ တမံၤမံၤလီၤ. လၢတၢ်န့ၣ်အဃိ အဝဲတူၢ်ဘၣ်ဝဲဒ်လဲၣ်. ရူၣ်(သ်) တဲဝဲလၢ “ယသးဟ့ တၢ်ခဲလၢာ်လၢ အဘၣ်ဃးဒီး ထံကီၢ်ဝဲန့ၣ်လီၤ. ယဆိကမိၣ်လၢ ပှၤလၢအဟဲလၢ ထံကီၢ်အဝဲန့ၣ်​ ဒီးဒီပုၢ်ဝဲၢ်မုၣ်ခွါဖဲန့ၣ်စ့ၢ်ကီး အမ့ၢ်ပှၤဒ်န့ၣ်​ ကိးဂၤဒဲးလီၤ.” ရူၣ်(သ်) မၤလီၤမၢ်ကွံာ် အတၢ်ထံၣ်လၢ အတဂ့ၤတဖၣ်​ ဒ်လဲၣ်.

^၁၁ ရူၣ်(သ်)သ့ၣ်ညါဝဲလၢ အကဘၣ်တြီဆၢကွံာ် အတၢ်ဆိကမိၣ်လၢ အတဂ့ၤအံၤန့ၣ်လီၤ. အဝဲဖးဝဲ တၢ်လဲၤခီဖျိတဖၣ်​ ဒီးတၢ်ဂ့ၢ်တၢ်ကျိၤလၢ နံၣ်ကတၢၢ်လံာ်တၢ်ပာ်ဖျါ အပူၤ လၢအပာ်ဖျါထီၣ်ဝဲ ထံကီၢ်အံၤအဂ့ၢ်လီၤ. အဝဲတဲဝဲလၢ “ဘၣ်ဃးဒီး ပှၤလၢအအိၣ်ဖဲ ထံကီၢ်အဝဲန့ၣ်န့ၣ်​ ယဂုာ်ကျဲးစၢး အိၣ်ဒီးတၢ်ထံၣ်လၢအဂ့ၤ တကပၤလီၤ. ဒီးယထံၣ်ဘၣ်လၢ ဒီပုၢ်ဝဲၢ်မုၣ်ခွါတဖၣ်အံၤန့ၣ်​ အသးဆူၣ်လၢ ယဟိဝၤယွၤအဂီၢ် ဒိၣ်မးလီၤ. အဃိ မၤစၢၤယၤဒ်သိး ယကထံၣ်လၢ အဝဲသ့ၣ်စ့ၢ်ကီး ပၣ်ဃုာ်လၢ ပဒီပုၢ်ဝဲၢ်လၢ ဟီၣ်ခိၣ်ဒီဘ့ၣ်အကျါလီၤ.” လၢခံန့ၣ်​ ရူၣ်(သ်)သ့ၣ်ညါဝဲလၢ အကဘၣ်​ ပာ်ဖျါထီၣ်​ တၢ်အဲၣ်လီၤ. အဝဲတဲဝဲလၢ “ဖဲယထံၣ်​ ဒီပုၢ်ဝဲၢ်မုၣ်ခွါ လၢအဟဲလၢထံကီၢ်အံၤ တဘျီလၢ်လၢ်န့ၣ်​ ယဂုာ်ကျဲးစၢး ရ့ဒီးအဝဲသ့ၣ်​ လၢတၢ်အဲၣ်တၢ်ကွံအပူၤလီၤ. ယတဲတၢ်ဒီး အဝဲသ့ၣ်​ ဒီးရ့လိာ်အါထီၣ်ယသးဒီး အဝဲသ့ၣ်လီၤ.” အဃိ ရူၣ်(သ်) ဒိးန့ၢ်ဘၣ်အဘျုး ဒ်လဲၣ်. ရူၣ်(သ်)တဲဝဲလၢ “လၢခံန့ၣ်​ ယတၢ်ထံၣ်လၢအတဂ့ၤအံၤ လီၤမၢ်ကွံာ်ဝဲ ကယီကယီလီၤ.”

၁၂. ဒီပုၢ်ဝဲၢ်မုၣ်စဲရၤ ထံၣ်ဘၣ်ဒီး တၢ်ကီတၢ်ခဲမနုၤလဲၣ်.

^၁၂ ပှၤတနီၤန့ၣ်​ ဘၣ်သ့ၣ်သ့ၣ်​ တသ့ၣ်ညါလီၤအသးလၢ အကွၢ်ဒိၣ်ဆံးအါစှၤတၢ်ဘၣ်. အဒိ ဒီပုၢ်ဝဲၢ်မုၣ်​ စဲရၤန့ၣ်​ တကွၢ်ဒိၣ်ဆံးအါစှၤပှၤဂၤ ခီဖျိလၢ အဝဲသ့ၣ်​ အကလုာ်ဒူၣ်, အတၢ်ထူးတၢ်တီၤ ဒီးအမူဒါလၢ တၢ်ကရၢကရိအပူၤဘၣ်အဃိ အဝဲဆိကမိၣ်လီၤအသးလၢ အမ့ၢ်ပှၤလၢ အတကွၢ်ဒိၣ်ဆံးအါစှၤတၢ်ဘၣ်. ဘၣ်ဆၣ်​ အဝဲအၢၣ်လီၤဝဲလၢ “ယသ့ၣ်ညါလီၤယသးလၢ ယမ့ၢ်ပှၤလၢ အကွၢ်ဒိၣ်ဆံးအါစှၤတၢ်လီၤ.” အဝဲကွၢ်ဒိၣ်ဆံးအါစှၤတၢ် လၢကျဲဒ်လဲၣ်. စဲရၤန့ၣ်​ ဒိၣ်ထီၣ်ဘၣ်လၢ ဟံၣ်ဖိဃီဖိလၢ အအိၣ်ဒီး တၢ်ကူၣ်ဘၣ်ကူၣ်သ့ လၢအပတီၢ်ထီအဃိ အဝဲရ့ထဲ ပှၤဒ်န့ၣ်အသိးတဖၣ်လီၤ. တုၤဒၣ်လဲာ် ဘၣ်တဘျီန့ၣ်​ အဝဲတဲဘၣ်အသကိးလၢ “ယရ့ထဲပှၤလၢ အအိၣ်ဒီးတၢ်ကူၣ်ဘၣ်ကူၣ်သ့လၢ အပတီၢ်ထီလီၤ. မ့မ့ၢ်ပှၤလၢ အတၢ်ကူၣ်ဘၣ်ကူၣ်သ့ အပတီၢ်တအိၣ်ဘၣ်တဖၣ်န့ၣ်​ ယတရ့ဘၣ်.” အဃိ စဲရၤကဘၣ်ဆီတလဲ အတၢ်ပာ်သူၣ်ပာ်သးလီၤ. အဝဲမၤဝဲ ဒ်လဲၣ်.

၁၃. စဲရၤဆီတလဲ အတၢ်ပာ်သူၣ်ပာ်သး ဒ်လဲၣ်​ ဒီးပန့ၢ်ဘၣ်တၢ်မၤလိ လၢအအိၣ်ဒ်လဲၣ်.

^၁၃ ကဝီၤအပှၤကွၢ်တၢ်တဂၤ မၤစၢၤစဲရၤ ဒ်သိးအကသ့ၣ်ညါလီၤအသး လၢအတၢ်ပာ်သူၣ်ပာ်သး အိၣ်ဒ်လဲၣ်န့ၣ်လီၤ. စဲရၤတဲဝဲလၢ “အဝဲပတြၢၤယၤ ခီဖျိလၢ ယမၤကစၢ်ယွၤအတၢ်မၤ လၢတၢ်သးတီအပူၤ, ယဟ့ၣ်တၢ်စံးဆၢဂ့ၤဂ့ၤ ဒီးယတၢ်သ့ၣ်ညါနၢ်ပၢၢ် လံာ်စီဆှံအဃိလီၤ. ဒီးအဝဲတဲဝဲလၢ ဒ်ပတၢ်သ့ၣ်ညါအါထီၣ်အသိး ပကဘၣ်မၤအါထီၣ်​ ခရံာ်ဖိအတၢ်ဂ့ၤတၢ်ဝါ ဒ်သိးဒီး တၢ်ဆီၣ်လီၤသး, အိၣ်ဒီးတၢ်ထံၣ်လၢအကြၢးအဘၣ်​ ဒီးတၢ်သးကညီၤလီၤ.” စဲရၤမၤထွဲဝဲ ဒ်ကဝီၤအပှၤကွၢ်တၢ် တဲအီၤအသိးလီၤ. အဝဲတဲဝဲလၢ “ယသ့ၣ်ညါလၢ တၢ်လၢအရ့ဒိၣ်ကတၢၢ်န့ၣ်​ မ့ၢ်ဝဲတၢ်အဲၣ်​ ဒီးတၢ်သးကညီၤလီၤ.” အဃိလၢခံန့ၣ်​ စဲရၤအတၢ်ထံၣ်လၢ ဒီပုၢ်ဝဲၢ်မုၣ်ခွါတဖၣ်အဖီခိၣ်​ ဆီတလဲဝဲလီၤ. အဝဲတဲဝဲလၢ “ယဂုာ်ကျဲးစၢးဆိကမိၣ်ထံ ဒီပုၢ်ဝဲၢ်မုၣ်ခွါတဖၣ်​ အတၢ်ဂ့ၤတၢ်ဝါလၢ ယဟိဝၤယွၤပာ်လုၢ်ပာ်ပှ့ၤဝဲ တဖၣ်လီၤ.” ပဝဲသ့ၣ်တဖၣ်စ့ၢ်ကီး ပတအဲၣ်ဒိး ကွၢ်ဒိၣ်ဆံးအါစှၤပှၤဂၤ ခီဖျိလၢ အဝဲသ့ၣ်​ အတၢ်ကူၣ်ဘၣ်ကူၣ်သ့အဃိ နီတဘျီဘၣ်. ပမ့ၢ် “အဲၣ်ဒီပုၢ်ဝဲၢ်ခဲလၢာ်” လၢပသးဒီဖျၢၣ်န့ၣ်​ ပတကွၢ်ဒိၣ်ဆံးအါစှၤတၢ်ဘၣ်.—၁ ပ့းတရူး ၂:၁၇.

အဲၣ်တူၢ်တံၤတူၢ်တမှံၤ

၁၄. ဒ် ဧ့ၤဘြံၤ ၁၃:၁၆ ပာ်ဖျါထီၣ်ဝဲအသိး တၢ်အဲၣ်တူၢ်တံၤတူၢ်တမှံၤန့ၣ်​ ယဟိဝၤယွၤ ထံၣ်ဝဲဒ်လဲၣ်.

^၁၄ တၢ်အဲၣ်တူၢ်တံၤတူၢ်တမှံၤန့ၣ်​ ယဟိဝၤယွၤ ပာ်လုၢ်ပာ်ပှ့ၤဝဲဒိၣ်မးလီၤ. (ဖး ဧ့ၤဘြံၤ ၁၃:၁၆ တက့ၢ်.) လီၤဆီဒၣ်တၢ် ပမ့ၢ်ကွဲမုာ်ပှၤလၢ အလိၣ်ဘၣ်တၢ်မၤစၢၤတဖၣ်န့ၣ်​ ယဟိဝၤယွၤထံၣ်ဝဲဒ် ပမၤတၢ်လၢ အဘၣ်ထွဲဒီး တၢ်ဘူၣ်ထီၣ်ဘါထီၣ်အီၤလီၤ. (ယၤကိာ် ၁:၂၇; ၂:၁၄-၁၇) လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “ပှၤတမှံၤန့ၣ်​ လုၢ်အီၣ်လုၢ်အီအီၤ” တက့ၢ်. (ရိမ့ၤ ၁၂:၁၃) ပမ့ၢ်အဲၣ်တူၢ်တံၢ်တူၢ်တမှံၤန့ၣ်​ မ့ၢ်ဒၣ်ပပာ်ဖျါထီၣ်လၢ ပသူၣ်အိၣ်သးအိၣ်​ အဝဲသ့ၣ်, အဲၣ်အဝဲသ့ၣ်​ ဒီးအဲၣ်ဒိး ဒီသကိးဒီး အဝဲသ့ၣ်လီၤ. ပမ့ၢ်ဟ့ၣ်ပှၤဂၤ တၢ်အီၣ်တၢ်အီ တမံၤမံၤ ဒီးဟ့ၣ်အဝဲသ့ၣ်​ တၢ်ဆၢကတီၢ်န့ၣ်​ ယဟိဝၤယွၤ ဘၣ်သူၣ်ဘၣ်သးဝဲလီၤ. (၁ ပ့းတရူး ၄:၈-၁၀) ဘၣ်ဆၣ်​ တဘျီတခီၣ်​ ကကီလၢ ပကပာ်ဖျါထီၣ်​ တၢ်အဲၣ်တူၢ်တံၤတူၢ်တမှံၤအဂီၢ်လီၤ.

၁၅-၁၆. (က) ဘၣ်မနုၤအဃိ ပှၤတနီၤန့ၣ်​ ဘၣ်ယိၣ်တၢ်လၢ ကတူၢ်တံၤတူၢ်တမှံၤ အဂီၢ်လဲၣ်. (ခ) တၢ်မနုၤမၤစၢၤ အဲးဒ့းလၢ ကသးအိၣ်​ တူၢ်တံၤတူၢ်တမှံၤအဂီၢ်လဲၣ်.

^၁၅ မ့ၢ်လၢ ပတၢ်အိၣ်သးအဃိ ဘၣ်သ့ၣ်သ့ၣ်​ ပကဘၣ်ယိၣ်တၢ်လၢ ပကတူၢ်တံၤတူၢ်တမှံၤ အဂီၢ်န့ၣ်လီၤ. ဆိကမိၣ်ကွၢ် အဲးဒ့းလၢအမ့ၢ် မုၣ်ကမဲတဂၤ အဂ့ၢ်တက့ၢ်. တချုးလၢ အဝဲကဲထီၣ်​ ယဟိဝၤပှၤအုၣ်အသးတဂၤ ဒံးဘၣ်န့ၣ်​ အဝဲတရ့ဒီးပှၤဂၤအါအါဘၣ်. အဝဲဆိကမိၣ်ဝဲလၢ ပှၤဂၤတဖၣ်​ တူၢ်လိာ်မုာ်တမှံၤ ကန့ၢ်ဂ့ၤဒိၣ်န့ၢ်ဒံးအီၤလီၤ.

^၁၆ ဖဲအဲးဒ့းကဲထီၣ်​ ယဟိဝၤပှၤအုၣ်အသး ဝံၤအလီၢ်ခံ အဝဲဆီတလဲ အတၢ်ဆိကမိၣ်လီၤ. အဝဲဃုတၢ်ခွဲးတၢ်ယာ်လၢ ကတူၢ်လိာ်တမှံၤအဂီၢ်လီၤ. အဲးဒ့းတဲဝဲလၢ “ဖဲပှၤတ့ထီၣ်​ ပဘီမုၢ်ဘျီၣ်ဒိၣ်အခါ တၢ်အိၣ်ဖှိၣ်သးပှၢ်တဂၤ တဲဘၣ်ယၤလၢ ပှၤဒီမါဝၤခံဂၤ ကဟဲမၤစၢၤတၢ် ဒီးမ့ၢ်ယဒုးအိၣ်​ အဝဲသ့ၣ်လၢယဟံၣ်​ ခံနွံကသ့ဧါ. ဒီးယသ့ၣ်နီၣ်ထီၣ်လၢ ယဟိဝၤယွၤ ဆိၣ်ဂ့ၤဝဲ မုၣ်ကမဲလၢ စၤရဖၤသးတဂၤ ဒ်လဲၣ်န့ၣ်လီၤ.” (၁ စီၤပၤ ၁၇:၁၂-၁၆) အဲးဒ့းတဲဝဲလၢ အကတူၢ်လိာ် ပှၤဒီမါဝၤ ခံဂၤအံၤလီၤ. အဃိ အဝဲဒိးန့ၢ်ဘၣ်​ တၢ်ဆိၣ်ဂ့ၤ မနုၤလဲၣ်. အဝဲတဲဝဲလၢ “အဝဲသ့ၣ်တအိၣ်ဒီးယၤ ထဲခံနွံဘၣ်, အိၣ်ဒီးယၤ ခံလါညါအဃိ ယသးခုဒိၣ်မးလီၤ. ဖဲန့ၣ်အဆၢကတီၢ် ပသ့ၣ်ညါအါထီၣ်လိာ်ပသးလီၤ.” အဲးဒ့းအိၣ်ဒီး အသကိးလၢ တၢ်အိၣ်ဖှိၣ်အပူၤ အါမးလီၤ. ခဲအံၤ အဝဲမၤ ပှၤလဲၤလၢညါ ဒီးဟဲက့ၤကိးအိၣ်သကိး အသကိးလၢ အဟးစံၣ်တဲၤတဲလီၤတၢ်ဒီးအီၤတဖၣ်​ ဒီးအဝဲသ့ၣ်​ ရ့လိာ်အသး မုာ်မးလီၤ. အဝဲတဲဝဲလၢ “ယဟ့ၣ်တၢ်အဃိ ယသးခုဒိၣ်မး. ဘၣ်ဆၣ်​ ယမ့ၢ်ဘၣ်တဲတီတီန့ၣ်​ ယဒိးန့ၢ်ဘၣ်ကဒါက့ၤ တၢ်ဆိၣ်ဂ့ၤအါမးလီၤ.”—ဧ့ၤဘြံၤ ၁၃:၁, ၂.

၁၇. လူၣ်(ခ်) ဒီးအမါ သ့ၣ်ညါလီၤအသး ဒ်လဲၣ်.

^၁၇ ဘၣ်သ့ၣ်သ့ၣ်​ ပကမ့ၢ်ပှၤလၢ အအဲၣ်တူၢ်တံၤတူၢ်တမှံၤလီၤ. ဘၣ်ဆၣ်​ ပမၤဂ့ၤန့ၢ်အလီၢ် ကသ့ဧါ. အဒိ လူၣ်(ခ်) ဒီးအမါန့ၣ်​ မ့ၢ်ပှၤလၢ အအဲၣ်တူၢ်တံၤတူၢ်တမှံၤလီၤ. ညီနုၢ်န့ၣ်​ အဝဲသ့ၣ်ကွဲမုာ် အမိၢ်ပၢ်, အဘူးအတံၢ်, အသကိး ဒီးကဝီၤအပှၤကွၢ်တၢ် ဒီမါဝၤလီၤ. လူၣ်(ခ်) တဲဝဲလၢ “ပသ့ၣ်ညါလၢ ပကွဲမုာ်ထဲ ပှၤလၢအဘူးဒီးပှၤတဖၣ်လီၤ.” ဘၣ်ဃးဒီး တၢ်တူၢ်တံၤတူၢ်တမှံၤန့ၣ်​ လူၣ်(ခ်)ဒီးအမါ မၤဂ့ၤထီၣ်ဝဲ ဒ်လဲၣ်.

၁၈. ဘၣ်ဃးဒီး တၢ်တူၢ်တံၤတူၢ်တမှံၤန့ၣ်​ လူၣ်(ခ်)ဒီးအမါ မၤဂ့ၤအါထီၣ်ဝဲ ဒ်လဲၣ်.

^၁၈ ယ့ၣ်ၡူးတဲဝဲလၢ “သုမ့ၢ်အဲၣ်ပှၤလၢအအဲၣ်သုဒီး, သုအိၣ်​ ဒီးသုဘျုးမနုၤတမံၤလဲၣ်.” (မးသဲ ၅:၄၅-၄၇) ဖဲလူၣ်(ခ်)ဒီးအမါ ဆိကမိၣ်ထံ ယ့ၣ်ၡူးအတၢ်ကတိၤအံၤအခါ အဝဲသ့ၣ်​ အတၢ်ထံၣ်​ ဆီတလဲဝဲလီၤ. အဝဲသ့ၣ်​ သ့ၣ်ညါဝဲလၢ အကဘၣ်​ ကွၢ်လိမၤဒိး ယဟိဝၤယွၤ လၢအပာ်ဖျါထီၣ်​ တၢ်သးအိၣ်ဟ့ၣ်တၢ်လၢ ပှၤကိးဂၤဒဲးလီၤ. လၢတၢ်န့ၣ်အဃိ အဝဲသ့ၣ်​ ပာ်လီၤအသးလၢ ကကွဲမုာ် ဒီပုၢ်ဝဲၢ်မုၣ်ခွါတဖၣ်​ လၢအတကွဲမုာ်ဘၣ်ဒံးဝဲတဖၣ်လီၤ. လူၣ်(ခ်) တဲဝဲလၢ “တဘျီအံၤဒု ပဝဲခဲလၢာ် ပရ့လိာ်သးမုာ်မး. ပတူၢ်ဘၣ်လၢ ပတၢ်ရ့လိာ်သးဒီး ယဟိဝၤယွၤ ဒီးပှၤဂၤစ့ၢ်ကီး ဘူးထီၣ်လီၤ.”

၁၉. ပပာ်ဖျါထီၣ်လၢ ပမ့ၢ်ယ့ၣ်ၡူး အပျဲၢ်အဘီၣ်​ ကသ့ဒ်လဲၣ်​ ဒီးနပာ်လီၤနသးလၢ နကမၤ မနုၤလဲၣ်.

^၁၉ ပမၤလိတ့ၢ်လၢ ပမ့ၢ်အဲၣ်လိာ်ကွံလိာ်ပသး တဂၤဒီးတဂၤ လၢပသးဒီဖျၢၣ်န့ၣ်​ ကမၤစၢၤပှၤဒ်သိး ပကကဲထီၣ်​ ပှၤလၢအမၤဃူမၤဖိးတၢ်, ပှၤလၢအတကွၢ်ဒိၣ်ဆံးအါစှၤတၢ်ဘၣ်​ ဒီးအဲၣ်တူၢ်တံၤတူၢ်တမှံၤန့ၣ်လီၤ. ပကဘၣ်​ တြီဆၢကွံာ် ပတၢ်ထံၣ်လၢအတဂ့ၤ ဒီးပကဘၣ်အဲၣ်​ ပဒီပုၢ်ဝဲၢ်မုၣ်ခွါတဖၣ်​ လၢပသးဒီဖျၢၣ်လီၤ. ပမ့ၢ်မၤဒ်န့ၣ်န့ၣ်​ ပကသးခု ဒီးမ့ၢ်ဒၣ်​ ပပာ်ဖျါထီၣ်လၢ ပမ့ၢ်ယ့ၣ်ၡူး အပျဲၢ်အဘီၣ်​ နီၢ်နီၢ်န့ၣ်လီၤ.—ယိၤဟၣ်​ ၁၃:၁၇, ၃၅.