ပှၤဖးလံာ်ဖိတဖၣ် အတၢ်သံကွၢ်
ပှၤယူဒၤဖိ အတၢ်လုၢ်ဟံၣ် အသုးဖိန့ၣ် မ့ၢ်မတၤသ့ၣ်တဖၣ်လဲၣ် ဒီးအဝဲသ့ၣ် အိၣ်ဒီးမူဒါ မနုၤတဖၣ်လဲၣ်
ပှၤလ့ၤဝံဖိတနီၤလၢ အတမ့ၢ် ပှၤလုၢ်တၢ်ဒိၣ်တဖၣ်န့ၣ် အဘၣ်မၤဝဲ မူဒါလၢအဂၤ ဒ်သိးဒီး တၢ်လုၢ်ဟံၣ် အသုးဖိလီၤ. အဝဲသ့ၣ် ဘၣ်အိၣ်လၢ တၢ်လုၢ်ဟံၣ်အသုးဖိအခိၣ် အတၢ်ဟံးစုနဲၣ်ကျဲ အဖီလာ်လီၤ. ပှၤယူဒၤဖိ အပှၤကွဲးလံာ် ဖံၣ်လိၣ် ပာ်ဖျါထီၣ်ဝဲ မူဒါလၢ သုးဖိတဖၣ်အံၤ မၤဝဲန့ၣ်လီၤ. အဝဲတဲဝဲလၢ “ပှၤလ့ၤဝံဖိတဖၣ်အံၤအကျါ တနီၤန့ၣ် ဘၣ်အိၣ်ခိးဝဲ ပဲတြီလၢပှၤကနုာ်လီၤဆူ တၢ်လုၢ်ဟံၣ်အဂၢၤပူၤန့ၣ်လီၤ. ဒီးမ့မ့ၢ်အဂၤတနီၤန့ၣ် အိၣ်လၢတၢ်လုၢ်ဟံၣ်အဂၢၤပူၤ ဒီးအိၣ်ခိးတၢ်လၢ တၢ်လီၢ်စီဆှံ အမဲာ်ညါ ဒ်သိးပှၤလၢ တအိၣ်ဒီးတၢ်ခွဲးတၢ်ယာ်သ့ၣ်တဖၣ် အသုတလဲၤနုာ်လီၤ ဖဲန့ၣ်တဂ့ၤအဂီၢ်လီၤ. အဝဲသ့ၣ်တနီၤ ဟးတရံးကွၢ်တၢ်လၢ တၢ်လုၢ်ဟံၣ် အကပိာ်ကပၤ ဒီးအဝဲသ့ၣ်တနီၤ လီၤဘၣ်မူဒါလၢ မုၢ်နၤခီ ဒီးမုၢ်ဆါခီ တဂၤတကလဲးလီၤ.”
ပှၤယူဒၤဖိအကွီၢ်ဘျီၣ် လၢအဒိၣ်ကတၢၢ်န့ၣ် ဃ့တၢ်မၤစၢၤလၢ သုးဖိတဖၣ်အံၤအအိၣ်သ့လီၤ. ထဲဒၣ်ပှၤသုးဖိတဖၣ်အံၤန့ၣ် ရိမ့ၤအပဒိၣ် ဟ့ၣ်အခွဲးလၢ အကဖီၣ် တၢ်စုကဝဲၤန့ၣ်လီၤ.
ယိၤခ့ၤ(မ်) ကၠၢၤရမဲယၤ(စ်) လၢအမ့ၢ် ပှၤကူၣ်ဘၣ်ကူၣ်သ့ ဘၣ်ဃးဒီး လံာ်စီဆှံန့ၣ် တဲဝဲလၢ “ဖဲသုးဖိတဖၣ် ဟဲဖီၣ်ယ့ၣ်ၡူးအခါ ယ့ၣ်ၡူးသံကွၢ် အဝဲသ့ၣ်လၢ ဖဲအဝဲသိၣ်လိတၢ်လၢ တၢ်လုၢ်ဟံၣ်ပူၤအခါ ဘၣ်မနုၤအဃိ အဝဲသ့ၣ် တဖီၣ်အီၤဘၣ်လဲၣ်. (မးသဲ ၂၆:၅၅) သုးဖိတဖၣ်အံၤ မ့တမ့ၢ်သုးဖိလၢ တၢ်လုၢ်ဟံၣ်ဘၣ်န့ၣ် တမ့ၢ်လၢ ယ့ၣ်ၡူးကသံကွၢ်အီၤ တၢ်သံကွၢ်အံၤဘၣ်.” ပှၤကူၣ်ဘၣ်ကူၣ်သ့တဂၤအံၤ ဆိကမိၣ်ဝဲလၢ သုးဖိတဖၣ်လၢ အအဲၣ်ဒိးဖီၣ်ယ့ၣ်ၡူး လၢညါတဘျီစ့ၢ်ကီး မ့ၢ်သုးဖိလၢ တၢ်လုၢ်ဟံၣ်လီၤ. (ယိၤဟၣ် ၇:၃၂, ၄၅, ၄၆) လၢခံန့ၣ် ပှၤယူဒၤဖိ အကွီၢ်ဘျီၣ် ဆှၢလီၤဝဲ ပှၤသုးဖိအခိၣ် ဃုာ်ဒီးပှၤသုးဖိတနီၤ ဒ်သိးအကဟဲကိး တၢ်မၢဖိတဖၣ် ဆူအဝဲသ့ၣ်အအိၣ်လီၤ. ပှၤလၢအတွံၢ်ထီၣ် စီၤပီလူးဆူ တၢ်လုၢ်ဟံၣ်အချၢစ့ၢ်ကီး ဘၣ်သ့ၣ်သ့ၣ် ကမ့ၢ်ဝဲ ပှၤသုးဖိလၢ တၢ်လုၢ်ဟံၣ်လီၤ.—မၤတၢ် ၄:၁-၃; ၅:၁၇-၂၇; ၂၁:၂၇-၃၀.