ဖဲနနၢ်ဟူ ကွဲၤသီၣ်အခါ နကမၤဒ်လဲၣ်
ပဝဲခဲလၢာ် ပနာ်လၢ ယဟိဝၤယွၤ ဟံးစုနဲၣ်ကျဲပှၤ ဒီးဟ့ၣ်ပှၤတၢ်လၢ ပလိၣ်ဘၣ်အီၤလၢ နီၢ်သးတခီဖဲ “မုၢ်နံၤအခံကတၢၢ်တဖၣ်အပူၤ” န့ၣ်လီၤ. (၂ တံၤမသ့း ၃:၁) ဘၣ်ဆၣ် ပဝဲခဲလၢာ်န့ၣ် ပကဘၣ် ဒိကနၣ် ယဟိဝၤယွၤလီၤ. ပထိၣ်သတြီၤ ပတၢ်အိၣ်သးဒ် ပှၤအံၣ်စရ့လးဖိလၢ အအိၣ်လၢ ပှၢ်မုၢ်ကနၢ အပူၤသ့ဝဲလီၤ. ဖဲအဝဲသ့ၣ် နၢ်ဟူကွဲၤသီၣ်ထီၣ်အခါ အဝဲသ့ၣ် မၤဝဲတၢ်လၢ အကဘၣ်မၤဝဲတဖၣ်န့ၣ်လီၤ.
ယဟိဝၤယွၤ မၢစီၤမိၤၡ့တ့ထီၣ် ကွဲၤစ့ခံဖျၢၣ် ဒ်သိးစီၤမိၤၡ့ ‘ကကိးထီၣ်တၢ်အိၣ်ဖှိၣ်, ဒီးဒ်သိး အကဒုးလဲၤ ပှၤအိၣ်လၢ သူၣ်ဒဲအလီၢ်ပူၤ’ န့ၣ်လီၤ. (၄ မိၤၡ့ ၁၀:၂) ပှၤလုၢ်တၢ်အဒိၣ်တဖၣ် ကဘၣ်အူသီၣ်အကွဲၤ အကလုာ်ကလုာ်လီၤ. ဘၣ်မနုၤအဃိလဲၣ်. အဝဲသ့ၣ် မ့ၢ်မၤဝဲဒ်န့ၣ်မး ဖဲကွဲၤသီၣ်ထီၣ်အခါ ပှၤဂီၢ်မုၢ်တဖၣ် ကသ့ၣ်ညါဝဲလၢ အကဘၣ်မၤဝဲ တၢ်မနုၤလဲၣ်န့ၣ်လီၤ. (၄ မိၤၡ့ ၁၀:၃-၈) မုၢ်မဆါတနံၤအံၤ ကစၢ်ယွၤ အခ့အပှၤတဖၣ်န့ၣ် ဒိးန့ၢ်ဘၣ် တၢ်ဟံးစုနဲၣ်ကျဲ လၢကျဲအါဘိလီၤ. ဘၣ်ဆၣ် ပကတဲသကိးထဲ ကျဲသၢဘိ လၢပဒိးန့ၢ်ဘၣ် တၢ်ဟံးစုနဲၣ်ကျဲအဂ့ၢ် ဒီးပကထိၣ်သတြီၤကွၢ် ကျဲတဖၣ်အံၤ ဒ်ကွဲၤအသီၣ် လၢပှၤအံၣ်စရ့လးဖိ လၢပျၢၤတဖၣ် အစိၤလီၤ. ကျဲသၢဘိအံၤန့ၣ်မ့ၢ်ဝဲ ဖဲပဘၣ်တၢ်ကွဲမုာ်ပှၤလၢ ပကအိၣ်ဖှိၣ်သကိးအါအါဂီၢ်ဂီၢ် တပူၤဃီအခါမ့ၢ်ဂ့ၤ ဒီးတၢ်အိၣ်ဖှိၣ်သးပှၢ်တဖၣ် ဒိးန့ၢ်ဘၣ် တၢ်သိၣ်လိနဲၣ်လိအခါမ့ၢ်ဂ့ၢ် ဒီးဖဲတၢ်ကရၢကရိ အတၢ်ရဲၣ်တၢ်ကျဲၤ လၢတၢ်အိၣ်ဖှိၣ်အပူၤဆီတလဲသး မ့တမ့ၢ် ဘၣ်တၢ်မၤဂ့ၤထီၣ်က့ၤအီၤအခါမ့ၢ်ဂ့ၤန့ၣ်လီၤ.
ပဘၣ်တၢ်ကွဲမုာ်ပှၤလၢ ပကအိၣ်ဖှိၣ်သကိး အါအါဂီၢ်ဂီၢ် တပူၤဃီ
ဖဲယဟိဝၤယွၤ အဲၣ်ဒိးလၢ “ပှၤဂီၢ်မုၢ်ခဲလၢာ်” ပာ်ဖှိၣ်ထီၣ်အသးလၢကျဲစၢၤ လၢဒဲစီဆှံအမဲာ်ညါ လၢမုၢ်ထီၣ်တကပၤအခါ ပှၤလုၢ်တၢ်ဒိၣ်တဖၣ် အူထီၣ်ကွဲၤ ခံဖျၢၣ်လၢာ်လီၤ. (၄ မိၤၡ့ ၁၀:၃) အံၣ်စရ့လး အဒူၣ်ခဲလၢာ်လၢ အအိၣ်ဝးတရံး ဒဲစီဆှံ လွံၢ်ကပၤလၢၤန့ၣ် နၢ်ဟူဘၣ်ဝဲ ကွဲၤအသီၣ်ဂ့ၤဂ့ၤလီၤ. ပှၤလၢအအိၣ်ဘူးဒီး ကျဲစၢၤန့ၣ် ကလဲၤတုၤဝဲ ဆိဆိလီၤ. မ့မ့ၢ်ပှၤလၢ အအိၣ်လၢအယံၤတနီၤန့ၣ် ဒ်သိးအဟဲကတုၤ လၢကျဲစၢၤအဂီၢ် အတၢ်ဆၢကတီၢ်ကလၢာ်အါ ဒီးကဘၣ်ထဲးဂံၢ်ထဲးဘါ အါတစဲးလီၤ. အဝဲသ့ၣ် အိၣ်ယံၤမ့ၢ်ဂ့ၤ, အိၣ်ဘူးမ့ၢ်ဂ့ၤ ယဟိဝၤယွၤ အဲၣ်ဒိးလၢ အဝဲသ့ၣ်ခဲလၢာ် ကဟဲပာ်ဖှိၣ်ထီၣ်အသး ဒီးကနၢ်ဟူဘၣ် အတၢ်ဟံးစုနဲၣ်ကျဲတဖၣ်န့ၣ်လီၤ.
မုၢ်မဆါတနံၤအံၤန့ၣ် ပတလဲၤပာ်ဖှိၣ်ထီၣ်ပသး လၢဒဲစီဆှံလၢၤဘၣ်. ဘၣ်ဆၣ် တၢ်ဟ့ၣ်ဂံၢ်ဟ့ၣ်ဘါပှၤလၢ ပကလဲၤအိၣ်ဖှိၣ်သကိး ဃုာ်ဒီးကစၢ်ယွၤ အပှၤဂီၢ်မုၢ်လီၤ. တၢ်အိၣ်ဖှိၣ်တဖၣ်အံၤ ပၣ်ဃုာ်ဒီး တၢ်အိၣ်ဖှိၣ်ဖးဒိၣ်တဖၣ် ဒီးတၢ်အိၣ်ဖှိၣ်လီၤဆီ အဂၤတဖၣ်လီၤ. ဖဲန့ၣ်န့ၣ် ပနၢ်ဟူဘၣ်စ့ၢ်ကီး တၢ်ဂ့ၢ်တၢ်ကျိၤ ဒီးတၢ်ဟံးစုနဲၣ်ကျဲ လၢအရ့ဒိၣ်တဖၣ်လီၤ. ယဟိဝၤယွၤ အခ့အပှၤ လၢအအိၣ်လၢဟီၣ်ခိၣ်ဒီဘ့ၣ်န့ၣ် ဒိးန့ၢ်ဘၣ်ဝဲ တၢ်ဟံးစုနဲၣ်ကျဲတဖၣ် တမံၤဃီလီၤ. ပှၤလၢအလဲၤပာ်ဖှိၣ်ထီၣ်အသး ဒ်အံၤတဖၣ်န့ၣ် အဝဲသ့ၣ်အိၣ်ဘၣ်လၢ ကစၢ်ယွၤအပှၤဂီၢ်မုၢ် လၢအအိၣ်ပှဲၤဒီး တၢ်သးခုတဖၣ်အကျါလီၤ. ပှၤတနီၤန့ၣ် ဘၣ်လဲၤတၢ်က့ၤတၢ် ယံၤန့ၢ်ပှၤအဂၤတဖၣ်ဒံးလီၤ. ဘၣ်ဆၣ် ပှၤလၢအလဲၤထီၣ် တၢ်အိၣ်ဖှိၣ်ခဲလၢာ်အံၤန့ၣ် တူၢ်ဘၣ်ဝဲလၢ တၢ်အိၣ်ဖှိၣ်အံၤ ကဲဘျုးကဲဖှိၣ်လၢ အဝဲသ့ၣ်အဂီၢ် သပှၢ်ကတၢၢ်လီၤ.
ကရူၢ်တဖၣ်လၢ အအိၣ်ယံၤဒီး တၢ်လီၢ်လၢပှၤမၤတၢ်အိၣ်ဖှိၣ်န့ၣ် ကဒိးန့ၢ်ဘၣ်အဘျုး လၢကျဲဒ်လဲၣ်. ခီဖျိလၢ စဲးဖီကဟၣ် တၢ်လဲၤထီၣ်လဲၤထီအဃိ အဝဲသ့ၣ်အါတက့ၢ် မ့ၢ်အိၣ်ယံၤဒီးတၢ်အိၣ်ဖှိၣ်လီၢ်ဘၣ်ဆၣ် အဝဲသ့ၣ် ဒိးန့ၢ်ဝဲအဘျုးအဖှိၣ်လၢ တၢ်ရဲၣ်တၢ်ကျဲၤတမံၤဃီလီၤ. အဒိ ဖဲဝဲၤလီၢ်ခိၣ်သ့ၣ် အပှၤခၢၣ်စးတဂၤ လဲၤအိၣ်သကိးဝဲ ဘဲနံ(န်) အဝဲၤတြၢ်အခါ ပှၤလၢအအိၣ်လၢ ဝ့ၢ်ဖိအါလ့ၣ် လၢအအိၣ်လၢ စးဟါရၤမဲးမုၢ်ခိၣ် လၢကီၢ်နါကၠၢၤန့ၣ် ပှၤဘျးစဲန့ၢ် အဝဲသ့ၣ်လၢ တၢ်ရဲၣ်တၢ်ကျဲၤလီၤ. ဖဲန့ၣ်န့ၣ် ပဒီပုၢ်ဝဲၢ်မုၣ်ခွါတဖၣ် ဒီးပှၤလၢအသးအိၣ် တၢ်မ့ၢ်တၢ်တီတဖၣ် ဟဲအိၣ်ဖှိၣ်ဝဲ ခံဆံတဂၤလီၤ. အဝဲသ့ၣ်အိၣ်လၢ တၢ်လီၢ်ဖးယံၤသနာ်က့ အဝဲသ့ၣ် တူၢ်ဘၣ်လၢ အအိၣ်ဘၣ်ဒီး ပှၤလၢအထီၣ်တၢ်အိၣ်ဖှိၣ်အဂၤ ၄၄,၁၃၁ လီၤ. ဒီပုၢ်ဝဲၢ်ခွါတဂၤ တဲဝဲလၢ “သုဘျးစဲန့ၢ်ပှၤ တၢ်ရဲၣ်တၢ်ကျဲၤအံၤအဃိ တၢ်ဘျုးဒိၣ်မး. သုမၤဒ်အံၤန့ၣ် ပာ်ဖျါထီၣ်ဝဲလၢ သုအဲၣ်ပှၤနီၢ်နီၢ်လီၤ.”
တၢ်အိၣ်ဖှိၣ်သးပှၢ်တဖၣ် ဘၣ်တၢ်ကွဲမုာ်အီၤလၢ ကလဲၤထီၣ်တၢ်မၤလိ
ဖဲပှၤအံၣ်စရ့လးဖိ အပှၤလုၢ်တၢ်ဒိၣ်တဖၣ် အူထီၣ်ကွဲၤထဲတဖျၢၣ်အခါ “ပှၤအံၣ်စရ့လးဖိ အကထိတဖၣ်အခိၣ်” လၢအမ့ၢ် “ပဒိၣ်တဖၣ်” ကဘၣ်ဟဲလၢ တၢ်အိၣ်ဖှိၣ်အဒဲလီၤ. (၄ မိၤၡ့ ၁၀:၄) ဖဲန့ၣ်န့ၣ် အဝဲသ့ၣ် ကဒိးန့ၢ်ဘၣ် တၢ်သိၣ်လိနဲၣ်လိ ဒီးတၢ်ဂ့ၢ်တၢ်ကျိၤ လၢစီၤမိၤၡ့အအိၣ်လီၤ. တၢ်သ့ၣ်တဖၣ်အံၤ ကမၤစၢၤအဝဲသ့ၣ်ဒ်သိး ကမၤလၢပှဲၤအမူဒါလၢ အဝဲသ့ၣ် အဒူၣ်ဖိထၢဖိအကျါန့ၣ်လီၤ. နမ့မ့ၢ်ဘၣ်ဖုး ပှၤအခိၣ်လၢ အဝဲသ့ၣ်အကျါတဂၤဂၤန့ၣ် နကလဲၤဖဲန့ၣ်ဒ်သိး နကဒိးန့ၢ်ဘၣ် တၢ်အဘျုးအဖှိၣ်အဂီၢ်လီၤ.
မုၢ်မဆါတနံၤအံၤ တၢ်အိၣ်ဖှိၣ်သးပှၢ်တဖၣ်န့ၣ် တမ့ၢ်ဝဲ “ပဒိၣ်တဖၣ်” ဒီးအဝဲသ့ၣ်တကဲစ့ၢ်ကီး ကစၢ်ယွၤ အသိတဖၣ် အကစၢ်ဘၣ်. (၁ ပ့းတရူး ၅:၁-၃) ဘၣ်ဆၣ် အဝဲသ့ၣ် ဂုာ်ကျဲးစၢး အဂ့ၤကတၢၢ် လၢကကွၢ်ထွဲ ကစၢ်ယွၤအသိတဖၣ်လီၤ. အဃိ ဖဲတၢ်အိၣ်ဖှိၣ်သးပှၢ်တဖၣ် ဘၣ်တၢ်ကွဲမုာ်အဝဲသ့ၣ် လၢကလဲၤထီၣ် တၢ်မၤလိ ဒ်သိးဒီး ဘီမုၢ်တၢ်မၤအကၠိအခါ အဝဲသ့ၣ် တူၢ်လိာ်ဝဲလၢ တၢ်သးခုအပူၤလီၤ. ဖဲတၢ်မၤလိအံၤ အဆၢကတီၢ်န့ၣ် တၢ်အိၣ်ဖှိၣ်သးပှၢ်တဖၣ် မၤလိဘၣ်ဝဲလၢ အဝဲသ့ၣ်ကကွၢ်ထွဲ တၢ်အိၣ်ဖှိၣ်တဖၣ်ဂ့ၤဂ့ၤ ကသ့ဒ်လဲၣ်န့ၣ်လီၤ. မ့ၢ်လၢတၢ်သိၣ်လိအံၤအဃိ တၢ်အိၣ်ဖှိၣ်သးပှၢ် ဒီးပှၤလၢအဝဲသ့ၣ် ကွၢ်ထွဲဝဲတဖၣ်ခဲလၢာ်န့ၣ် အဝဲသ့ၣ်ဘူးဒိၣ်ထီၣ်ဒီး ယဟိဝၤယွၤလီၤ. အဃိ နမ့ၢ်တလဲၤထီၣ်ဘၣ် ကၠိတဖၣ်အံၤဒၣ်လဲာ် နဒိးန့ၢ်ဘၣ်အဘျုးလၢ ပှၤလၢအလဲၤထီၣ်ဝဲတဖၣ် အအိၣ်သ့လီၤ.
ဖဲတၢ်ဆီတလဲ အိၣ်ထီၣ်အခါ
တဘျီတခီၣ် ပှၤအံၣ်စရ့လးဖိ အပှၤလုၢ်တၢ်ဒိၣ်တဖၣ် အူထီၣ်ကွဲၤ သီၣ်ဒိၣ်တထံၣ်ထံၣ် ဒီးသီၣ်ဆံးတထံၣ်ထံၣ်လီၤ. ဖဲန့ၣ်အဆၢကတီၢ် ယဟိဝၤယွၤ အဲၣ်ဒိးလၢ ပှၤအံၣ်စရ့လးဖိခဲလၢာ် ကသုးလီၢ်သုးကျဲလီၤ. (၄ မိၤၡ့ ၁၀:၅, ၆) ဖဲပှၤအံၣ်စရ့လးဖိတဖၣ် သုးလီၢ်သုးကျဲအခါ အဝဲသ့ၣ် ရဲၣ်လီၤအသးဂ့ၤဂ့ၤဘၣ်ဘၣ်. ဘၣ်ဆၣ် တညီလၢ ပှၤကိးဂၤဒဲးအဂီၢ်ဘၣ်. တဘျီတခီၣ် ပှၤအံၣ်စရ့လးဖိ တနီၤနီၤန့ၣ် တမ့ၢ်လၢ ကအဲၣ်ဒိး သုးလီၢ်သုးကျဲဘၣ်. ဘၣ်မနုၤအဃိလဲၣ်.
ဘၣ်သ့ၣ်သ့ၣ် အဝဲသ့ၣ်တနီၤ ကတူၢ်ဘၣ်ဝဲလၢ ကွဲၤသီၣ်ထီၣ်ခဲအံၤခဲအံၤလၢ ပှၤကဘၣ် သုးလီၢ်သုးကျဲအဂီၢ် ဒီးတဘျီတခီၣ် ကသီၣ်ထီၣ်လၢ တၢ်တမုၢ်လၢ်အပူၤလီၤ. လံာ်စီဆှံတဲဝဲလၢ ဘၣ်တဘျီဘျီ “တၢ်အၢၣ်အိၣ်လၢ မုၢ်ဟါတုၤလၢမုၢ်ဂီၤ” လီၤ. ဒီးတဘျီတခီၣ် တချုးလၢအဝဲသ့ၣ် သုးလီၢ်သုးကျဲဒံးဘၣ်န့ၣ် တၢ်အၢၣ်အိၣ်ဝဲ “ခံနံၤမ့ၢ်ဂ့ၤ, တလါမ့ၢ်ဂ့ၤ, တနံၣ်မ့ၢ်ဂ့ၤ” ဝံၤမး အဝဲသ့ၣ်ဘၣ်သုးလီၢ်သုးကျဲလီၤ. (၄ မိၤၡ့ ၉:၂၁, ၂၂) အဝဲသ့ၣ် ဘၣ်သုးလီၢ်သုးကျဲ ပှဲၤဘျီလဲၣ်. ၄ မိၤၡ့ အဆၢဒိၣ် ၃၃ ပာ်ဖျါထီၣ်ဝဲလၢ ပှၤအံၣ်စရ့လးဖိတဖၣ် သုးလီၢ်သုးကျဲအလီၢ်န့ၣ် အိၣ်ဝဲတၢ်လီၢ်အတီၤ ၄၀ ဃၣ်ဃၣ်ညါလီၤ.
တဘျီတခီၣ် ပှၤအံၣ်စရ့လးဖိတဖၣ် သူၣ်လီၤအဒဲလၢ တၢ်လီၢ်လၢအခုၣ်လီၤ. အဒိ ဖဲအဝဲသ့ၣ် “လဲၤတၢ်လၢ ပှၢ်မုၢ်ကနၢဖးဒိၣ် . . . အိၣ်ဒီးတၢ်ပျံၤတၢ်ဖုးအလီၢ်” အခါ တဘျီတခီၣ် အဝဲသ့ၣ် ကအဲၣ်ဒိး သူၣ်လီၤအဒဲ လၢတၢ်လီၢ်လၢ အခုၣ်လီၤ. (၅ မိၤၡ့ ၁:၁၉) ဖဲန့ၣ်အဆၢကတီၢ် အဝဲသ့ၣ် ကဆိကမိၣ်ဘၣ်ဝဲလၢ အမ့ၢ်လဲၤသုးဘၣ်လၢ တၢ်လီၢ်အဂၤန့ၣ် ဘၣ်သ့ၣ်သ့ၣ် တမုာ်ထဲသိးဒီး တၢ်လီၢ်လၢ အဝဲသ့ၣ်အိၣ်ခဲအံၤဘၣ်.
ဖဲပှၤစးထီၣ် သုးလီၢ်သုးကျဲအခါ အဝဲသ့ၣ်အဒူၣ်အထၢတနီၤ မ့ၢ်တဟးထီၣ်ဘၣ်ဒံးဘၣ်န့ၣ် အဝဲသ့ၣ် ကဘၣ်အိၣ်ခိးဝဲ လၢတၢ်သူၣ်စူၤသးစူၤအပူၤလီၤ. ပှၤအဒူၣ်ခဲလၢာ်န့ၣ် နၢ်ဟူဝဲကွဲၤ သီၣ်ဒိၣ်တထံၣ်ထံၣ် သီၣ်ဆံးတထံၣ်ထံၣ် ဘၣ်ဆၣ်အဝဲသ့ၣ် တဟးထီၣ်ဘၣ်ဝဲ တဘျီဃီခဲလၢာ်ဘၣ်. ကွဲၤမ့ၢ်သီၣ်ထီၣ်ဒ်အံၤန့ၣ် ပှၤအဒူၣ်အထၢလၢ အအိၣ်လၢမုၢ်ထီၣ်တကပၤ လၢအမ့ၢ် ယူဒၤအဒူၣ်, ယံးစၣ်ကၢ်အဒူၣ် ဒီးစဘူလိၣ်အဒူၣ်တဖၣ်န့ၣ် ကဘၣ်ဟးထီၣ်ဆိလီၤ. (၄ မိၤၡ့ ၂:၃-၇; ၁၀:၅, ၆) အဝဲသ့ၣ်ဟးထီၣ်ဝံၤအလီၢ်ခံ ပှၤလုၢ်တၢ်ဒိၣ်တဖၣ် အူထီၣ်ကဒီးကွဲၤ ခံဘျီတဘျီ ဒီးပှၤအဒူၣ်သၢဒူၣ် လၢအသူၣ်ဒဲလၢ ကလံၤထံးတကပၤန့ၣ် ကဘၣ်ဟးထီၣ်ဝဲလီၤ. ပှၤလုၢ်တၢ်ဒိၣ်တဖၣ် မၤဝဲဒ်န့ၣ်တုၤလၢ ပှၤအဒူၣ်အထၢခဲလၢာ် ဟးထီၣ်ဝံၤတစုလီၤ.
ဖဲတၢ်ဆီတလဲအိၣ်ထီၣ်လၢ တၢ်ကရၢကရိအပူၤအခါ ဘၣ်သ့ၣ်သ့ၣ် တညီလၢ နကတူၢ်လိာ်အီၤဘၣ်. ဘၣ်မနုၤအဃိ တညီဘၣ်လဲၣ်. လၢတၢ်တမုၢ်လၢ်အပူၤ ဘၣ်သ့ၣ်သ့ၣ် နထံၣ်ဘၣ်တၢ်ဆီတလဲ အိၣ်ထီၣ်အါမးလီၤ. မ့တမ့ၢ် နဘၣ်သူၣ်ဘၣ်သးပာ်စၢၤ တၢ်ရဲၣ်တၢ်ကျဲၤအံၤအဃိ နတမုၢ်လၢ်လၢ အကဆီတလဲအသးဘၣ်. ဒ်လဲၣ်ဂ့ၤဒ်လဲၣ်ဂ့ၤ ဖဲနမၤထွဲဒ် တၢ်ဆီတလဲအိၣ်ထီၣ်ဝဲအသိးန့ၣ် ဘၣ်သ့ၣ်သ့ၣ် ကကီလၢနကအိၣ်ဒီး တၢ်သူၣ်စူၤသးစူၤအဂီၢ်လီၤ. ဒီးဒ်သိးနမၤထွဲကန့ၢ်အဂီၢ် နလိၣ်ဘၣ်တၢ်ဆၢကတီၢ်လီၤ. ဘၣ်ဆၣ် ပမ့ၢ်လူၤပိာ်မၤထွဲ ဒ်တၢ်ဆီတလဲအိၣ်ထီၣ်ဝဲအသိးန့ၣ် ပကဒိးန့ၢ်ဘၣ် ယဟိဝၤယွၤအတၢ်ဆိၣ်ဂ့ၤနီၢ်ကီၢ်လီၤ.
လၢစီၤမိၤၡ့အစိၤန့ၣ် ယဟိဝၤယွၤ ဟံးစုနဲၣ်ကျဲဝဲ ပှၤအကကွဲၢ် လၢအပၣ်ဃုာ်ဒီး ပှၤပိာ်ခွါ, ပှၤပိာ်မုၣ် ဒီးပှၤဖိသၣ်တဖၣ် လၢပှၢ်မုၢ်ကနၢအပူၤလီၤ. ကစၢ်ယွၤ မ့ၢ်တကဟုကယာ်ဒီး ဟံးစုနဲၣ်ကျဲ အဝဲသ့ၣ်ဘၣ်န့ၣ် ဘၣ်သ့ၣ်သ့ၣ် အဝဲသ့ၣ်တပူၤဖျဲးဝဲဘၣ်. ဒ်န့ၣ်အသိး မုၢ်မဆါတနံၤအံၤစ့ၢ်ကီး ယဟိဝၤယွၤဟံးစုနဲၣ်ကျဲ ဒီးဒီသဒၢပှၤလၢ နီၢ်သးတကပၤလီၤ. ယဟိဝၤယွၤ မၤစၢၤပှၤဒ်သိး ပကအိၣ်ဒီး တၢ်နာ်လၢအဂၢၢ်ကျၢၤ ဒီးဆဲးအိၣ်ဒီး တၢ်ရ့လိာ်သးဒီးအီၤလၢအဂ့ၤလီၤ. အဃိ မ်ပပာ်လီၤပသး ဂၢၢ်ဂၢၢ်ကျၢၤကျၢၤ လၢပကအိၣ်ဒီး တၢ်ဒိကနၣ် ဒ်ပှၤအံၣ်စရ့လးဖိလၢ အနၢ်ဟူကွဲၤသီၣ် ဒီးမၤထွဲဝဲအသိးတက့ၢ်.