နသ့ၣ်ညါဧါ

အူးခဲလီၢ်လံၤလၢ ပှၤထံၣ်န့ၢ်ဝဲဖဲ ဘၤဘူၤလိၣ်လၢပျၢၤန့ၣ်​ ပာ်ဖျါထီၣ်ဝဲလၢ လံာ်စီဆှံန့ၣ်​ အဘၣ်ဝဲ လီၤတံၢ်လီၤဆဲးဒ်လဲၣ်

ပှၤဃုသ့ၣ်ညါ တၢ်ဖိတၢ်လံၤလၢပျၢၤတဖၣ်​ ထံၣ်န့ၢ်က့ၤဝဲ အူးခဲအက့အခီဒီဒူၣ်​ လၢပှၤတ့ထီၣ်ဝဲ ဝ့ၢ်ဘၤဘူၤလိၣ်လၢပျၢၤ. အဒိ ရီဘၢၤ ခိဒွ့ၤ လၢအကဲ ပှၤဃုသ့ၣ်ညါ တၢ်ဖိတၢ်လံၤလၢပျၢၤတဂၤ တဲဝဲလၢ အူးခဲတဖၣ်န့ၣ်​ ပှၤကုၢ်ဝဲလၢ ဖၣ်ကပူၤဖးဒိၣ်​ လၢအ “အိၣ်လၢဝ့ၢ်ချၢ, တၢ်လီၢ်ဖဲန့ၣ်​ အိၣ်ဒီးကပံာ်ညၣ်ဂ့ၤ ဒီးသ့ၣ်မုၣ်​ . . . ဒီဒူၣ်လၢ ပှၤကကုၢ်တၢ်အဂီၢ်.”

တၢ်ကွဲးနီၣ်ကွဲးဃါလၢပျၢၤတဖၣ်​ ပာ်ဖျါထီၣ်ဝဲလၢ ဝ့ၢ်ဘၤဘူၤလိၣ်လၢပျၢၤ အပဒိၣ်တဖၣ်န့ၣ်​ သူဝဲဖၣ်ကပူၤဖးဒိၣ်အံၤ ဒီးမၤတၢ်လၢအလီၤပျံၤစ့ၢ်ကီး. ဖီအလ့ ဘူလံၤယူး လၢအကဲ သရၣ်လၢ အသိၣ်လိ တၢ်စံၣ်စိၤတဲစိၤ ဒီးအၤၡူၢ်လၢပျၢၤအကျိာ် လၢထိၤရီထိၤ ဖၠၣ်စိမိၤကၠိန့ၣ်​ တဲဝဲလၢ “ဝ့ၢ်ဘၤဘူၤလိၣ်လၢပျၢၤ အတၢ်ကွဲးနီၣ်ကွဲးဃါ ပာ်ဖျါဝဲလၢ ပှၤလၢ အတကနၣ်စီၤပၤအကလုၢ် ဒီးပှၤလၢအတပာ်ကဲ ဘၤဘူၤလိၣ်အယွၤဘၣ်န့ၣ်​ ပှၤဖၢနုာ်အဝဲသ့ၣ်လၢ ဖၣ်ကပူၤဖးဒိၣ်​ ဒီးဒွဲၣ်အူသံကွံာ်အဝဲသ့ၣ်.” အဒိ လံာ်တၢ်ကွဲးနီၣ်တဘ့ၣ်​ လၢစီၤပၤနဘူၤကးန့စၢ်အစိၤ ပာ်ဖျါထီၣ်ဝဲလၢ “မၤသံကွံာ်အဝဲသ့ၣ်, ဒွဲၣ်အူထီၣ်အဝဲသ့ၣ်, ဃိထီၣ်ကွံာ်အဝဲသ့ၣ်, ဒုးခုၣ်ထီၣ်မ့ၣ်အူလုၢ် ဒီးဒွဲၣ်အူအီၣ်ကွံာ် အဝဲသ့ၣ်လၢ မ့ၣ်အူပူၤ.”

တၢ်ဂ့ၢ်အံၤ ဒုးသ့ၣ်နီၣ်ထီၣ်က့ၤ ပှၤဖးလံာ်စီဆှံဖိတဖၣ်​ ဘၣ်ဃးဒီး တၢ်ကဲထီၣ်သးဖဲ လံာ်ဒၤနံးယ့လး အဆၢဒိၣ်​ ၃ အပူၤ. ပဖးဘၣ်လၢ စီၤပၤနဘူၤကးန့စၢ် တ့ထီၣ်တၢ်ဂီၤထူလၢ ဒူရၤအတၢ်ပျီပူၤ လၢအအိၣ်လၢ ဘၤဘူၤလိၣ်အဝ့ၢ်ချၢ. ဖဲန့ၣ်အခါ ပှၤဧ့ၤဘြံၤဖိသးစၢ် သၢဂၤလၢအမံၤမ့ၢ် စီၤၡၤဒရး, စီၤမ့ၤၡး ဒီးစီၤဧဘ့ၤဒနကိၤန့ၣ်​ တဘါလီၤ စီၤပၤနဘူၤကးန့စၢ် အတၢ်ဂီၤထူဘၣ်အဃိ စီၤပၤသးပှံၢ်ထီၣ်တၢ်ဖးဒိၣ်​ ဒီးမၢပှၤမၤကိၢ်ထီၣ်မ့ၣ်အူလၢ ဖၣ်ကပူၤဖးဒိၣ်အပူၤ “ကိၢ်န့ၢ်အလီၢ်နွံစး” ဒီးမၢပှၤ “ကွံာ်လီၤ အဝဲသ့ၣ်လၢ ဖၣ်ကပူၤဖးဒိၣ်​ လၢမ့ၣ်အူကဲၤဝဲ.” ဘၣ်ဆၣ်​ မူခိၣ်ကလူးလၢ အစိကမီၤဒိၣ်တဂၤ မၤပူၤဖျဲးအဝဲသ့ၣ်လၢ တၢ်သံ.—ဒၤ ၃:၁-၆, ၁၉-၂၈.

© The Trustees of the British Museum. Licensed under CC BY-NC-SA 4.0. Source

အူးခဲလၢ ပှၤထံၣ်န့ၢ်ဝဲတဖၣ်န့ၣ်​ ပာ်ဖျါထီၣ်စ့ၢ်ကီး တၢ်ကွဲးအသးလၢ လံာ်စီဆှံပူၤန့ၣ်​ အဘၣ်ဝဲလီၤတံၢ်လီၤဆဲး. လၢအူးခဲအါဘ့ၣ်​ အလိၤန့ၣ်​ ပှၤကွဲးလီၤဝဲတၢ်ကတိၤလၢ အစံးထီၣ်ပတြၢၤစီၤပၤ. အဒိ လၢအူးခဲတဘ့ၣ်အလိၤန့ၣ်​ ပှၤကွဲးဝဲလၢ “ဘၤဘူၤလိၣ်​ အစီၤပၤနဘူၤကးန့စၢ် . . . နီလၢ ယၤ, စီၤပၤအဒိၣ်ကတၢၢ် တ့ထီၣ်ဝဲန့ၣ်​ . . . မ်ယစၢၤယသွဲၣ်​ ပၢဘၣ်ဝဲ လီၤစိၤလီၤထီတက့ၢ်.” တၢ်ကွဲးအသးတခါအံၤ လီၤဂာ်ဒီး စီၤပၤနဘူၤကးန့စၢ် အတၢ်ကတိၤလၢ အအိၣ်ဖဲ ဒၤနံးယ့လး ၄:၃၀ လၢအတဲဝဲလၢ “အဝဲအံၤမ့ၢ် ဝ့ၢ်ဘၤဘူၤလိၣ်​ လၢအဒိၣ်အမုၢ်လၢ ယတ့ထီၣ်လၢ ယနီၢ်ကစၢ် အဂံၢ်အဘါ ဒ်စီၤပၤ အတၢ်အိၣ်တၢ်ဆိးအလီၢ်အသိး လၢယကပာ်ဖျါထီၣ်​ ယလၤကပီၤ ဒီးယတၢ်ကဟုကညီၢ် အဂီၢ်.”