နကဒိးဘျၢထံအဂီၢ် မၤယံာ်မၤနီၢ် နသးတဂ့ၤ

၁. နမ့ၢ်ဒိးဘျၢထံန့ၣ် နကဒိးန့ၢ်ဘၣ် အဘျုးဒ်လဲၣ်.

ယဟိဝၤယွၤ လၢအဟ့ၣ်နၤ သးသမူ ဒီးတၢ်ဟ့ၣ်လၢအဂ့ၤ ကိးမံၤဒဲးန့ၣ် နအဲၣ်အီၤဧါ. နမ့ၢ်အဲၣ်အီၤန့ၣ် နကပာ်ဖျါထီၣ်ဒ်လဲၣ်. ကျဲအဂ့ၤကတၢၢ်တဘိလၢ နပာ်ဖျါထီၣ်လၢ နအဲၣ်အီၤန့ၣ်မ့ၢ်ဝဲ နဟ့ၣ်လုၢ်ထီၣ်သး လၢအအိၣ် ဒီးဒိးဘျၢထံ. နမ့ၢ်မၤဒ်န့ၣ်န့ၣ် နကကဲထီၣ်ဘၣ် ယဟိဝၤယွၤ အဟံၣ်ဖိဃီဖိ. ဒီးမ့ၢ်လၢ နအိၣ်ဘၣ်လၢ ယဟိဝၤယွၤ အဟံၣ်ဖိဃီဖိ အကျါအဃိ ယဟိဝၤယွၤ လၢအမ့ၢ် နပၢ်ဒီးနသကိးန့ၣ် ကဟံးစုနဲၣ်ကျဲနၤ ဒီးကဟုကယာ်နၤ. (စံး ၇၃:၂၄; ၡါ ၄၃:၁, ၂) တကးဒံးဘၣ် ခီဖျိလၢ နဟ့ၣ်လုၢ်ထီၣ်သး ဒီးဒိးဘျၢထံအဃိ နအိၣ်ဒီး တၢ်မုၢ်လၢ်လၢ နကအိၣ်မူဘၣ် လီၤထူလီၤယိာ်.—၁ ပ့း ၃:၂၁.

၂. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၂ နကဒိးဘျၢထံအဂီၢ် တၢ်မၤတံာ်တာ်နၤ အိၣ်တမံၤမံၤဧါ. မ့ၢ်အိၣ်န့ၣ် တမ့ၢ်ထဲနၤတဂၤဘၣ်. ပှၤလၢအကကွဲၢ်တဖၣ်စ့ၢ်ကီး တချုးလၢ အဝဲသ့ၣ် တုၤထီၣ်ထီၣ်ဘးလၢ တၢ်ဒိးဘျၢထံ ဒံးဘၣ်န့ၣ် အဝဲသ့ၣ် ဘၣ်ဆီတလဲ အလုၢ်လၢ်သကဲာ်ပဝး ဒီးအတၢ်အိၣ်မူ အကျိၤအကျဲ အကလုာ်ကလုာ်. ခဲအံၤ အဝဲသ့ၣ် မၤယဟိဝၤယွၤ အတၢ်မၤ လၢတၢ်သးဆူၣ် ဒီးလၢတၢ်သးခုအပူၤလံ. ပမ့ၢ်ကွၢ်စ့ၢ်ကီး ဖဲတၢ်မၢဖိအစိၤန့ၣ် ပှၤတနီၤ ထံၣ်ဘၣ် တၢ်မၤကွၢ်အါမး သနာ်က့ အဝဲသ့ၣ် ဒိးဘျၢထံဒံး. အဃိ လၢတၢ်မၤလိအံၤ ပကတဲသကိး ဘၣ်ဃးဒီး ပမၤလိန့ၢ်တၢ်လၢ အဝဲသ့ၣ် အဒိအတဲာ် ကသ့ဒ်လဲၣ်.

ပှၤၡၤမရံဖိတဖၣ် ဒိးဘျၢထံ

၃. တချုးလၢ ပှၤၡၤမရံဖိတဖၣ် ဒိးဘျၢထံဒံးဘၣ်န့ၣ် အဝဲသ့ၣ် ကဘၣ်မၤ မနုၤလဲၣ်.

^၃ ပှၤၡၤမရံဖိ အတၢ်ဘူၣ်တၢ်ဘါတဒူၣ် လၢအအိၣ်ဖဲ ယ့ၣ်ၡူးအစိၤန့ၣ် အဝဲသ့ၣ် အိၣ်ဘူးဒီး ဝ့ၢ်ၡက့ၣ် ဒီးဝ့ၢ်ၡၤမရံ လၢအအိၣ်လၢ ယူဒၤအကလံၤစိးတခီ. တချုးလၢ ပှၤၡၤမရံဖိတဖၣ် ဒိးဘျၢထံဒံးဘၣ်န့ၣ် ဒ်သိး အဝဲသ့ၣ် ကနၢ်ပၢၢ်အါထီၣ် ကစၢ်ယွၤ အကလုၢ်ကထါအဂီၢ် အဝဲသ့ၣ် ကဘၣ်မၤလိဝဲ လီၤတံၢ်လီၤဆဲး. ပှၤၡၤမရံဖိတဖၣ်န့ၣ် နာ်ဝဲထဲ လံာ် ၁ မိၤၡ့ တုၤလၢ ၅ မိၤၡ့ ဒီးဘၣ်သ့ၣ်သ့ၣ် ကနာ်ဝဲ လံာ်ယိၤၡူစ့ၢ်ကီး. ဒီး ဖဲ ၅ မိၤၡ့ ၁၈:၁၈, ၁၉ န့ၣ် ယဟိဝၤယွၤ အၢၣ်လီၤဝဲလၢ မ့းၡံအၤ ကဟဲအဃိ အဝဲသ့ၣ် နာ်ဝဲဒ်န့ၣ်စ့ၢ်ကီး. (ယိၤ ၄:၂၅) ဘၣ်ဆၣ် ဒ်သိး ပှၤၡၤမရံဖိတဖၣ် ကဒိးဘျၢထံအဂီၢ် အဝဲသ့ၣ် ကဘၣ်နာ်ဝဲလၢ မ့းၡံအၤန့ၣ် ကဲဝဲယ့ၣ်ၡူး ဒီး “ပှၤၡၤမရံဖိအါဂၤ” နာ်ဝဲဒ်န့ၣ်. (ယိၤ ၄:၃၉) သနာ်က့ ဒ်သိး အဝဲသ့ၣ် ကနာ်ယ့ၣ်ၡူးအဂီၢ် အဝဲသ့ၣ်တနီၤ ဘၣ်ဆီတလဲ အတၢ်ပာ်သူၣ်ပာ်သးလၢ ပှၤယူဒၤဖိ အဖီခိၣ်.—လူၤ ၉:၅၂-၅၄.

၄. ဒ် မၤတၢ် ၈:၅, ၆, ၁၄ ပာ်ဖျါထီၣ်ဝဲအသိး ဖဲပှၤၡၤမရံဖိ နၢ်ဟူဘၣ်ဝဲ စီၤဖံလံးပူး စံၣ်တဲၤတဲလီၤတၢ်အခါ အဝဲသ့ၣ်တနီၤ မၤဝဲဒ်လဲၣ်.

^၄ ပှၤၡၤမရံဖိတဖၣ် ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်. ဖဲစီၤဖံလံးပူး “စံၣ်တဲၤတဲလီၤ” ပှၤၡၤမရံဖိလၢ “ခရံာ်အဂ့ၢ်” အခါ အဝဲသ့ၣ်တနီၤ “တူၢ်လိာ်ဝဲ ကစၢ်ယွၤ အကလုၢ်ကထါ.” (ဖး မၤတၢ် ၈:၅, ၆, ၁၄.) စီၤဖံလံးပူး ကဲပှၤယူဒၤဖိတဂၤ သနာ်က့ ပှၤၡၤမရံဖိတဖၣ် ဒိကနၣ်အီၤ ဒီးတထီဒါအီၤဘၣ်. ဘၣ်သ့ၣ်သ့ၣ် အဝဲသ့ၣ် ကနီၣ်ဘၣ် လံာ်စီဆှံ အဆၢတဖၣ် လၢအတဲဝဲလၢ ကစၢ်ယွၤန့ၣ် တကွၢ်ဒိၣ်ဆံးအါစှၤတၢ်ဘၣ်. (၅ မိၤ ၁၀:၁၇-၁၉) အဝဲသ့ၣ် နီၣ်ဘၣ်မ့ၢ်ဂ့ၤ တနီၣ်ဘၣ်မ့ၢ်ဂ့ၤ “တၢ်လၢ စီၤဖံလံးပူး တဲဝဲ” ဘၣ်ဃးဒီး ခရံာ်အဂ့ၢ်န့ၣ် အဝဲသ့ၣ် “ဒိကနၣ်ဝဲ လီၤတံၢ်လီၤဆဲး.” ဒီးအဝဲသ့ၣ် ထံၣ်ဘၣ်ဝဲ တၢ်လီၤလးအါမံၤလၢ စီၤဖံလံးပူးမၤဝဲ ဒ်သိးဒီး အမၤဘျါက့ၤပှၤဆါ ဒီးနီဟးထီၣ်ကွံာ် တၢ်ဝံတၢ်နါတဖၣ် လၢအအိၣ်လၢပှၤလိၤ. (မၤတၢ် ၈:၇) အဃိ အဝဲသ့ၣ် နာ်ဝဲလၢ ကစၢ်ယွၤ ဆှၢလီၤ စီၤဖံလံးပူး နီၢ်ကီၢ်.

၅. လၢပှၤၡၤမရံဖိတဖၣ် အအိၣ်န့ၣ် နန့ၢ်ဘၣ် တၢ်မၤလိဒ်လဲၣ်.

^၅ စီၤဖံလံးပူးန့ၣ် အကဲဝဲ ပှၤယူဒၤဖိ ဒီးတၢ်လၢအသိၣ်လိဝဲန့ၣ် ပှၤၡၤမရံဖိတဖၣ် တနၢ်ဟူဘၣ်ဝဲ နီတဘျီဘၣ်. အဃိ မ့ၢ်ပှၤၡၤမရံဖိ တအဲၣ်ဒိး မၤလိန့ၢ်တၢ် လၢအအိၣ် ဒီးကပျဲလၢ တၢ်ကွၢ်ဒိၣ်ဆံးအါစှၤ ကလုာ်ဒူၣ် မၤတံာ်တာ် အဝဲသ့ၣ်ဧါ. အဝဲသ့ၣ် တမၤဝဲဒ်န့ၣ်ဘၣ်. ပှၤၡၤမရံဖိတနီၤ နာ်ဝဲသပှၢ်တၢၢ်လၢ စီၤဖံလံးပူး သိၣ်လိအဝဲသ့ၣ် တၢ်မ့ၢ်တၢ်တီအဃိ အဝဲသ့ၣ် တမၤယံာ်မၤနီၢ် အသးလၢ ကဒိးဘျၢထံဘၣ်. လံာ်စီဆှံ တဲဝဲလၢ “ဖဲစီၤဖံလံးပူး စံၣ်တဲၤတဲလီၤ ကစၢ်ယွၤအဘီမုၢ် တၢ်သးခုကစီၣ် ဒီးယ့ၣ်ၡူးခရံာ် အမံၤအခါ အဝဲသ့ၣ် စူၢ်က့ၤနာ်က့ၤတၢ်လီၤ. ဒီးပိာ်မုၣ် ဒီးပိာ်ခွါတဖၣ် ဒိးဘျၢအသးလၢထံ.” (မၤတၢ် ၈:၁၂) နၤမီၤ, နနာ်လၢ ကစၢ်ယွၤ အကလုၢ်ကထါန့ၣ် မ့ၢ်တၢ်မ့ၢ်တၢ်တီဧါ. ဒီးနနာ်လၢ ယဟိဝၤပှၤအုၣ်အသးတဖၣ် ပာ်ဖျါထီၣ် တၢ်အဲၣ်နီၢ်ကီၢ် ဒ်ယ့ၣ်ၡူးတဲဘၣ် အပျဲၢ်အဘီၣ်တဖၣ် အသိးဧါ. (ယိၤ ၁၃:၃၅) နမ့ၢ်နာ် ဒ်န့ၣ်န့ၣ် နကဒိးဘျၢထံအဂီၢ် ဘၣ်ယိၣ်တၢ်တဂ့ၤ. နာ်သပှၢ်တၢၢ်လၢ ယဟိဝၤယွၤ ကဆိၣ်ဂ့ၤနၤ.

၆. ဒီပုၢ်ဝဲၢ်ခွါရူဘ့ၤ အဒိအတဲာ်န့ၣ် မၤစၢၤနၤ သ့ဒ်လဲၣ်.

^၆ ပကကွၢ်သကိး ဒီပုၢ်ဝဲၢ်ခွါရူဘ့ၤ အတၢ်လဲၤခီဖျိ. ရူဘ့ၤန့ၣ် အအိၣ်လၢ ကီၢ်ကၠၢမနံၣ် ဒီးအဒိၣ်ထီၣ်ဘၣ်လၢ ဟံၣ်ဖိဃီဖိလၢ အကဲယဟိဝၤပှၤအုၣ်အသး. ဘၣ်ဆၣ် ဖဲအသးစၢ်အခါ မ့ၢ်ကစၢ်ယွၤ အိၣ်နီၢ်ကီၢ်ဧါန့ၣ် အတသ့ၣ်ညါဝဲ လီၤတံၢ်ဘၣ်. အဃိ အပာ်လီၤသးလၢ အကဃုသ့ၣ်ညါအါထီၣ် ကစၢ်ယွၤအဂ့ၢ်. ဒီးအတဲဝဲလၢ “ဖဲယမၤနီၢ်ကစၢ် တၢ်မၤလိလံာ်စီဆှံအခါ ယဃုသ့ၣ်ညါအါထီၣ် ဘၣ်ဃးဒီး ကစၢ်ယွၤအဂ့ၢ်. ဒီးယဘၣ်မၤလိ ဘၣ်ဃးဒီး သးသမူအတၢ်လဲလိာ်သး တဆီဘၣ်တဆီန့ၣ် တဘျုးဘျီညါ.” ဒီပုၢ်ဝဲၢ်ခွါရူဘ့ၤ ဖးဝဲ လံာ်လၢအမ့ၢ် Is There a Creator Who Cares About You? ဒီးလံာ်အံၤ မၤစၢၤအီၤလၢ အတၢ်နာ်ကစၢ်ယွၤ ကဂၢၢ်ကျၢၤဒိၣ်ထီၣ်. အဃိ အဆိကမိၣ်ထီၣ်လၢ ‘အၢၤဒၢး, ကစၢ်ယွၤ အိၣ်ဝဲ နီၢ်ကီၢ်လီၤမၢၤ.’ တကးဒံးဘၣ် ဖဲဒီပုၢ်ဝဲၢ်ခွါရူၤဘ့ၤ လဲၤဟးလၢ ဝဲၤလီၢ်ခိၣ်သ့ၣ်အခါ အထံၣ်ဘၣ်ဝဲ ဒီပုၢ်ဝဲၢ်မုၣ်ခွါ လၢဟီၣ်ခိၣ်ဒီဘ့ၣ်န့ၣ် အိၣ်ဝဲဃူဃူဖိးဖိးအဃိ အတၢ်အဲၣ် ဒီပုၢ်ဝဲၢ်မုၣ်ခွါ ဟဲအါထီၣ်. ဖဲအဟဲက့ၤကဒါလၢ ကီၢ်ကၠၢမနံၣ် ဝံၤအလီၢ်ခံ အဒိးဘျၢထံ ဒီးဖဲန့ၣ်အခါအအိၣ် ၁၇ နံၣ်. နၤစ့ၢ်ကီး နမ့ၢ်သးဒ့ဒီ ဘၣ်ဃးဒီး တၢ်ဂ့ၢ်လၢ နမၤလိဘၣ်လၢ လံာ်စီဆှံပူၤန့ၣ် ဃုသ့ၣ်ညါအါထီၣ်လၢ ပတၢ်ကရၢကရိ လံာ်လဲၢ်တဖၣ်အပူၤ. နမ့ၢ်မၤ ဒ်န့ၣ်န့ၣ် နကန့ၢ်ဘၣ် “တၢ်သ့ၣ်ညါ . . . လီၤတံၢ်လီၤဆဲး” အဃိ ကမၤစၢၤနၤလၢ နကမၤနၢၤကွံာ် နတၢ်သးဒ့ဒီ. (အ့း ၄:၁၃, ၁၄) တကးဒံးဘၣ် ဖဲနထံၣ်ဘၣ် ဒီပုၢ်ဝဲၢ်မုၣ်ခွါလၢ ဟီၣ်ခိၣ်ဒီဘ့ၣ် ဒီးလၢနတၢ်အိၣ်ဖှိၣ်အပူၤ အိၣ်ဃူဃူဖိးဖိး ဒီးအဲၣ်လိာ်သးအခါ နတၢ်အဲၣ် ဒီပုၢ်ဝဲၢ်မုၣ်ခွါ ကဒိၣ်ထီၣ်အါထီၣ်.

ပှၤတၢ်စူးဖိ စီၤစီလူး ဒိးဘျၢထံ

၇. ဘၣ်မနုၤအဃိ စီၤစီလူး ဘၣ်မၤဘၣ်ထီၣ်က့ၤ အတၢ်ဆိကမိၣ်လဲၣ်.

^၇ ပကကွၢ်သကိး ပှၤတၢ်စူးဖိ စီၤစီလူးအဂ့ၢ်. စီၤစီလူးန့ၣ် အသ့ၣ်ညါ ပှၤယူဒၤဖိ အတၢ်သိၣ်တၢ်သီဂ့ၤဂ့ၤ ဒီးအမံၤဟူသၣ်ဖျါလၢ ပှၤယူဒၤဖိတဖၣ်အကျါ. (ကလၤ ၁:၁၃, ၁၄; ဖံလံး ၃:၅) ဖဲန့ၣ်အခါ ပှၤယူဒၤဖိအါဂၤ ဆိကမိၣ်ဝဲလၢ ခရံာ်ဖိတဖၣ် ကဲပှၤလၢ အထီဒါက့ၤ ပှၤယူဒၤဖိ အတၢ်စူၢ်တၢ်နာ်. အဃိ စီၤစီလူး မၤအၢမၤနး အဝဲသ့ၣ် အၢအၢသီသီ ဒီးအဆိကမိၣ်ဝဲလၢ အမၤကစၢ်ယွၤ အတၢ်ဘၣ်သး. (မၤတၢ် ၈:၃; ၉:၁, ၂; ၂၆:၉-၁၁) ဒ်သိး စီၤစီလူး ကစူၢ်က့ၤနာ်က့ၤယ့ၣ်ၡူး ဒီးဒိးဘျၢထံ ဒ်ခရံာ်ဖိတဂၤ အသိးအဂီၢ် အကဘၣ်တူၢ်လိာ်လၢ အကထံၣ်ဘၣ် တၢ်မၤအၢမၤနးစ့ၢ်ကီး.

၈. (က) စီၤစီလူး ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်. (ခ) ဒ် မၤတၢ် ၂၂:၁၂-၁၆ ပာ်ဖျါထီၣ်ဝဲအသိး စီၤအနၤနံ မၤစၢၤစီၤစီလူးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၈ စီၤစီလူး ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်. ဖဲစီၤစီလူးနၢ်ဟူ ယ့ၣ်ၡူးအကလုၢ် သီၣ်လီၤလၢ မူခိၣ်အခါ တၢ်ကပီၤဝးတရံးအီၤ ဒီးအတထံၣ်တၢ်လၢၤဘၣ်. (မၤတၢ် ၉:၃-၉) လၢသၢသီအတီၢ်ပူၤန့ၣ် စီၤစီလူး တအီၣ်တၢ်အီတၢ်ဘၣ် ဒီးအဆိကမိၣ်ထံက့ၤဝဲ တၢ်ကဲထီၣ်သးဒီးအီၤ. အဃိ စီၤစီလူး အတၢ်လဲၤခီဖျိန့ၣ် မၤစၢၤအီၤလၢ အကနာ်ဝဲလၢ ယ့ၣ်ၡူးန့ၣ် အကဲဝဲမ့းၡံအၤ ဒီးအပျဲၢ်အဘီၣ်တဖၣ် ဘူၣ်ထီၣ်ဘါထီၣ်ယွၤလၢ ကျဲမ့ၢ်ကျဲတီ. ဒီးစီၤစီလူး မ့ၢ်နီၣ်ဘၣ်က့ၤဝဲ ဘၣ်ဃးဒီး ဖဲပှၤကမၤသံ စီၤစတ့းဖၣ်အခါ အဘၣ်သူၣ်ဘၣ်သးဝဲန့ၣ် အသးကဘၣ်ဒိက့ၤ ဖးဒိၣ်ညါ. (မၤတၢ် ၂၂:၂၀) ဖဲသၢသီတသီန့ၣ် ယ့ၣ်ၡူး အပျဲၢ်အဘီၣ်တဂၤ လၢအမံၤမ့ၢ် စီၤအနၤနံန့ၣ် ဟဲလၢ စီၤစီလူးအအိၣ် ဒီးမၤစၢၤအီၤဒ်သိး အကထံၣ်ထီၣ်က့ၤတၢ် ဒီးဟ့ၣ်ဂံၢ်ဟ့ၣ်ဘါအီၤလၢ အကဒိးဘျၢထံ. (ဖး မၤတၢ် ၂၂:၁၂-၁၆.) စီၤစီလူးန့ၣ် အဆီၣ်လီၤသး, အဒိကနၣ် စီၤအနၤနံ အကလုၢ် ဒီးအဒိးဘျၢထံ တဘျီဃီ.—မၤတၢ် ၉:၁၇, ၁၈.

၉. လၢစီၤစီလူး အအိၣ်န့ၣ် နန့ၢ်ဘၣ် တၢ်မၤလိဒ်လဲၣ်.

^၉ ပဟံးန့ၢ်တၢ်မၤလိလၢ စီၤစီလူးအအိၣ်သ့. စီၤစီလူး ကဒိးဘျၢထံအဂီၢ် အတပျဲလၢ တၢ်ပာ်ထီၣ်ထီသး ဒီးတၢ်ပျံၤပှၤကညီ ကမၤတံာ်တာ်အီၤဘၣ်. စီၤစီလူး ဆီၣ်လီၤအသး ဒီးအတူၢ်လိာ်ဝဲ တၢ်မ့ၢ်တၢ်တီ ဘၣ်ဃးဒီး ယ့ၣ်ၡူးခရံာ် ဒီးအဆီတလဲက့ၤ အတၢ်အိၣ်မူ လၢာ်လၢာ်ဆ့ဆ့. (မၤတၢ် ၂၆:၁၄, ၁၉) တကးဒံးဘၣ် အသ့ၣ်ညါထီၣ်ဝဲလၢ အမ့ၢ်ကဲထီၣ်ခရံာ်ဖိန့ၣ် အကထံၣ်ဘၣ် တၢ်မၤအၢမၤနး ဘၣ်ဆၣ် အသးဆူၣ်လၢ အကကဲထီၣ်ခရံာ်ဖိဒံး. (မၤတၢ် ၉:၁၅, ၁၆; ၂၀:၂၂, ၂၃) ဖဲအဒိးဘျၢထံ ဝံၤအလီၢ်ခံ ဒ်သိး အလဲၤခီဖျိ တၢ်မၤကွၢ် အကလုာ်ကလုာ် ကန့ၢ်အဂီၢ် အဆဲးသန့ၤအသးလၢ ယဟိဝၤယွၤ. (၂ ကရံၣ် ၄:၇-၁၀) နၤစ့ၢ်ကီး ဖဲနဒိးဘျၢထံ ဝံၤအလီၢ်ခံန့ၣ် ဘၣ်သ့ၣ်သ့ၣ် နကထံၣ်ဘၣ် တၢ်မၤကွၢ် ဒီးတၢ်ထီဒါတဖၣ်. ဘၣ်ဆၣ် ဒ်သိး နဆဲးတူၢ်တၢ်ကန့ၢ် ဒီးနကအိၣ်ဒီး တၢ်သးတီအဂီၢ် နာ်သပှၢ်တၢၢ်လၢ ယဟိဝၤယွၤ ဒီးယ့ၣ်ၡူးကမၤစၢၤနၤ.—ဖံလံး ၄:၁၃.

၁၀. လၢဒီပုၢ်ဝဲၢ်မုၣ်အဲနၤ အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.

^၁၀ ပကကွၢ်သကိး ဒီပုၢ်ဝဲၢ်မုၣ်အဲနၤ အတၢ်လဲၤခီဖျိ. အဲနၤန့ၣ် အဒိၣ်ထီၣ်လၢ ကီၢ်ယူရပၤ အမုၢ်ထီၣ်တခီ ဒီးအကဲဝဲ ခၢဒံးအကလုာ်ဒူၣ်. ဖဲအဲနၤ အမိဒိးဘျၢထံ ဝံၤအလီၢ်ခံ အပါဟ့ၣ်အီၤအခွဲးလၢ အကမၤလိလံာ်စီဆှံ ဒီးဖဲန့ၣ်အခါ အအိၣ် ၉ နံၣ်ဒံးလီၤ. ဘၣ်ဆၣ် အဘူးအတံၢ်လၢ အိၣ်ဟံၣ်တဖျၢၣ်ဃီဒီးအီၤန့ၣ် နာ်ဝဲလၢ ပှၤမ့ၢ်ပာ်တ့ၢ်ကွံာ် အမိၢ်ပၢ်ဖံဖု အတၢ်ဘူၣ်တၢ်ဘါန့ၣ် ကကဲထီၣ် တၢ်မဲာ်ဆှးလၢ အဟံၣ်ဖိဃီဖိအဂီၢ်. အဃိ အဝဲသ့ၣ် တဘၣ်သးလၢ အဲနၤ ကမၤလိလံာ်စီဆှံဘၣ်. ဖဲအဲနၤအိၣ် ၁၂ နံၣ်အခါ အသံကွၢ်အပါလၢ အဒိးဘျၢထံန့ၢ်ဧါ. တချုးလၢ အပါပျဲအီၤလၢ အကဒိးဘျၢထံ ဒံးဘၣ်န့ၣ် အပါအဲၣ်ဒိး သ့ၣ်ညါဝဲလၢ အဲနၤ ဘၣ်သးဒိးဘျၢထံန့ၣ် မ့ၢ်လၢအအဲၣ် ယဟိဝၤယွၤအဃိဧါ မ့တမ့ၢ် ပှၤတဂၤဂၤ မၢဆူၣ်အီၤအဃိဧါ. အဲၤနၤ တဲဝဲလၢ “မ့ၢ်လၢယအဲၣ် ယဟိဝၤယွၤအဃိ.” ဒီးဖဲအပါ နၢ်ဟူဝဲ ဒ်န့ၣ်အခါ အပါပျဲအီၤ. အဲနၤ ဒိးဘျၢထံ ဝံၤအလီၢ်ခံ အဘူးအတံၢ်တဖၣ် ထီဒါအီၤ ဒီးတရ့အီၤဂ့ၤဂ့ၤဘၣ်. ဒီးအဖု တဲအီၤလၢ “နမ့ၢ်အီမိာ် ဒီးအိၣ်မူလုၢ်လၢ်လၢ အတဂ့ၤဘၣ်န့ၣ် ကဂ့ၤဒိၣ်န့ၢ်ဒံး နကဲယဟိဝၤပှၤအုၣ်အသး တဂၤဒံး.” အဃိ အဲနၤ လဲၤခီဖျိ တၢ်ထီဒါအံၤဒ်လဲၣ်. အတဲဝဲလၢ “ယဟိဝၤယွၤ မၤဆူၣ်ထီၣ်ယဂံၢ်ယဘါ ဒီးယမိယပါ မၤစၢၤယၤအါမး.” တကးဒံးဘၣ် ဖဲယဟိဝၤယွၤ မၤစၢၤအီၤ တဘျီဂ့ၤတဘျီဂ့ၤန့ၣ် အကွဲးနီၣ်ဃာ်ဝဲ. ဒီးတၢ်လၢအကွဲးနီၣ်ဝဲန့ၣ် အကွၢ်ကဒါက့ၤဝဲအဃိ ယဟိဝၤယွၤ မၤစၢၤအီၤဒ်လဲၣ်န့ၣ် အတသးပ့ၤနီၣ်ဝဲဘၣ်. နၤစ့ၢ်ကီး နမ့ၢ်ပျံၤတၢ်ထီဒါန့ၣ် နာ်လၢ ယဟိဝၤယွၤ ကမၤစၢၤနၤ သပှၢ်တၢၢ်.—ဧ့ၤ ၁၃:၆.

စီၤကန့လံး ဒိးဘျၢထံ

၁၁. စီၤကန့လံး ကဒိးဘျၢထံအဂီၢ် တၢ်လၢအမၤတံာ်တာ်အီၤအိၣ်ဧါ.

^၁၁ စီၤကန့လံး အဒိအတဲာ် လၢလံာ်စီဆှံပူၤန့ၣ် မၤစၢၤပှၤသ့စ့ၢ်ကီး. စီၤကန့လံးန့ၣ် အကဲဝဲ ရိမ့ၤအ “သုးခိၣ်” ဒီးလၢအဖီလာ်န့ၣ် အအိၣ်ဒီး သုးဖိ ၁၀၀ ဃၣ်ဃၣ်. (မၤတၢ် ၁၀:၁) အဃိ လၢအလီၢ်ကဝီၤပူၤ ဒီးသုးဖိတဖၣ် အကျါန့ၣ် ဘၣ်သ့ၣ်သ့ၣ် အကဲပှၤတဂၤလၢ အပတီၢ်ထီ. တကးဒံးဘၣ် စီၤကန့လံးန့ၣ် အ “ဟ့ၣ်မၤစၢၤ ပှၤဂၤတၢ်အါမး.” (မၤတၢ် ၁၀:၂) ယဟိဝၤယွၤဆှၢလီၤ တၢ်မၢဖိပ့းတရူး လၢအအိၣ်ဒ်သိး ကတဲဘၣ်အီၤ တၢ်သးခုကစီၣ်. ဖဲန့ၣ်အခါ မ့ၢ်စီၤကန့လံး အလီၢ်အလၤ လၢအပတီၢ်ထီန့ၣ် ကမၤတံာ်တာ်အီၤလၢ အကဒိးဘျၢထံဧါ.

၁၂. စီၤကန့လံး ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်.

^၁၂ စီၤကန့လံး ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်. လံာ်စီဆှံ တဲဝဲလၢ စီၤကန့လံးန့ၣ် အဃ့ကညးတၢ်လၢ ကစၢ်ယွၤအအိၣ်ထီဘိ. ဒီးအဝဲ “ဒီးပှၤလၢ အအိၣ်ဟံၣ်တဖျၢၣ်ဃီဒီးအီၤ ကိးဂၤဒဲးန့ၣ် ပျံၤကစၢ်ယွၤ.” (မၤတၢ် ၁၀:၂) အဃိ ဖဲစီၤပ့းတရူး တဲပၠးစီၤကန့လံး တၢ်သးခုကစီၣ်အခါ စီၤကန့လံး ဒီးအဟံၣ်ဖိဃီဖိန့ၣ် စူၢ်က့ၤနာ်က့ၤခရံာ် ဒီးဒိးဘျၢထံ တဘျီဃီ. (မၤတၢ် ၁၀:၄၇, ၄၈) ဒ်သိးစီၤကန့လံး ဒီးအဟံၣ်ဖိဃီဖိ ကဘူၣ်ထီၣ်ဘါထီၣ် ယဟိဝၤယွၤ တပူၤဃီအဂီၢ် တၢ်ဆီတလဲတနီၤလၢ အကဘၣ်မၤဝဲန့ၣ် ဖျါလၢအသးအိၣ်မၤဝဲ.—ၡူ ၂၄:၁၅; မၤတၢ် ၁၀:၂၄, ၃၃.

၁၃. လၢစီၤကန့လံးအအိၣ်န့ၣ် နန့ၢ်ဘၣ် တၢ်မၤလိဒ်လဲၣ်.

^၁၃ ဒ်စီၤစီလူးအသိး စီၤကန့လံးစ့ၢ်ကီး အတပျဲလၢ အလီၢ်အလၤ လၢအပတီၢ်ထီန့ၣ် မၤတံာ်တာ်အီၤလၢ အကကဲထီၣ်ခရံာ်ဖိဘၣ်. နၤမီၤ, ဒ်သိးနကဒိးဘျၢထံအဂီၢ် နဘၣ်မၤ တၢ်ဆီတလဲ အိၣ်တမံၤမံၤဧါ. နမ့ၢ်ဘၣ်မၤ တၢ်ဆီတလဲ ဖးဒိၣ်သနာ်က့ ယဟိဝၤယွၤ ကမၤစၢၤနၤ. နပာ်လီၤသးလၢ နကဘူၣ်ထီၣ်ဘါထီၣ်အီၤ ဒီးမၤထွဲ လံာ်စီဆှံ အတၢ်ဟံးစုနဲၣ်ကျဲအဃိ အကဆိၣ်ဂ့ၤနၤ.

၁၄. လၢစူၣ်ယိၡံၤ အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.

^၁၄ စူၣ်ယိၡံၤ လၢအအိၣ်လၢ ကီၢ်ယပၣ်န့ၣ် ဒ်သိး အကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် ဘၣ်ဃးဒီး အတၢ်မၤန့ၣ် အဘၣ်မၤ တၢ်ဆီတလဲ အိၣ်ဝဲတနီၤ. စူၣ်ယိၡံၤန့ၣ် အမၤတၢ်လၢ အံခနိဘိၤကၠိ လၢပှၤမၤဃံမၤလၤဖီအဂီၢ်. ဒီးဖဲန့ၣ် အကဲဝဲ ကၠိခိၣ်အပှၤမၤစၢၤတၢ်တဂၤ. ကၠိခိၣ်တဂၤအံၤ ညီနုၢ်န့ၣ် အဘၣ်ရဲၣ်ကျဲၤဝဲဖီ လၢပှၤခူၣ်လီၤပှၤသံ အတၢ်ရဲၣ်တၢ်ကျဲၤအဂီၢ်. ဒီးဖဲကၠိခိၣ်အံၤ လဲၤလၢ ပှၤခူၣ်လီၤပှၤသံ အတၢ်ရဲၣ်တၢ်ကျဲၤအခါ အပၣ်ဃုာ်ဒီး ပှၤဘူးဒးဖိ အလုၢ်အလၢ်. ဘၣ်ဆၣ် ဖဲအလဲၤဝဲ တချုးဘၣ်အခါ အါတက့ၢ်န့ၣ် စူၣ်ယိၡံၤ ဘၣ်လဲၤန့ၢ်ဝဲ လၢအလီၢ် ဒီးမၤထွဲဝဲ ပှၤဘူးဒးဖိ အလုၢ်အလၢ်. ဘၣ်ဆၣ် ဖဲစူၣ်ယိၡံၤ မၤလိတၢ်မ့ၢ်တၢ်တီ ဘၣ်ဃးဒီး တၢ်သံအဂ့ၢ်အခါ အသ့ၣ်ညါဘၣ်ဝဲလၢ အမ့ၢ်ဆဲးမၤ တၢ်မၤလၢ အဘၣ်ထွဲဒီး လုၢ်လၢ်တဖၣ်အံၤန့ၣ် အဒိးဘျၢထံတန့ၢ်ဘၣ်. အဃိ အဆၢတဲာ်လီၤသးလၢ အတမၤဘၣ်ဃးအသးဒီး လုၢ်လၢ်တဖၣ်အံၤလၢၤဘၣ်. (၂ ကရံၣ် ၆:၁၅, ၁၆) စူၣ်ယိၡံၤ တဲဘၣ်အကၠိခိၣ် ဘၣ်ဃးဒီး အတၢ်ဆၢတဲာ် အဃိ တၢ်ကဲထီၣ်သးဒ်လဲၣ်. အကၠိခိၣ် ဟ့ၣ်အီၤအခွဲးလၢ အကဆဲးမၤတၢ်မၤ ဒီးအတလိၣ် မၤဘၣ်ဃးအသးဒီး လုၢ်လၢ်တဖၣ်န့ၣ်ဘၣ်. စူၣ်ယိၡံၤ မၤလိလံာ်စီဆှံ တနံၣ်ဝံၤအလီၢ်ခံ အဒိးဘျၢထံ.a နၤစ့ၢ်ကီး ဒ်သိး နကမၤသးခု ယဟိဝၤယွၤ အသးအဂီၢ် နမ့ၢ်ဘၣ်ဆီတလဲ တၢ်တမံၤမံၤ ဘၣ်ဃးဒီး နတၢ်ဖံးတၢ်မၤ သနာ်က့ နာ်သပှၢ်တၢၢ်လၢ ယဟိဝၤယွၤ ကအံးထွဲကွၢ်ထွဲနၤ ဒီးနဟံၣ်ဖိဃီဖိ.—စံး ၁၂၇:၂; မး ၆:၃၃.

ပှၤကရံၣ်သူးဖိတဖၣ် ဒိးဘျၢထံ

၁၅. ပှၤကရံၣ်သူးဖိ ကဒိးဘျၢထံအဂီၢ် ဘၣ်မနုၤအဃိ တညီလၢ အဝဲသ့ၣ်အဂီၢ်ဘၣ်လဲၣ်.

^၁၅ လၢညါ ပှၤလၢအအိၣ်လၢ ဝ့ၢ်ကရံၣ်သူးန့ၣ် အဝဲသ့ၣ်လူၤဝဲ တၢ်ထူးတၢ်တီၤ ဒီးအိၣ်မူတၢ်အိၣ်မူ လီၤရၢၢ်လီၤစၢၢ်. ပှၤအိၣ်ဖဲန့ၣ်အါဂၤ တအိၣ်မူဒ် ကစၢ်ယွၤ အတၢ်ဘၣ်သးဘၣ်. အဃိ အဝဲသ့ၣ် ကတူၢ်လိာ် တၢ်သးခုကစီၣ် ဒီးဘူၣ်ထီၣ်ဘါထီၣ် ယဟိဝၤယွၤန့ၣ် တညီဘၣ်. ဘၣ်ဆၣ် ဖဲစီၤပီလူး ဟဲလၢဝ့ၢ်ကရံၣ်သူး ဒီးစံၣ်တဲၤတဲလီၤ တၢ်သးခုကစီၣ် ဘၣ်ဃးဒီး ခရံာ်အဂ့ၢ်အခါ “ပှၤကရံၣ်သူးဖိ အါဂၤလၢ အနၢ်ဟူဘၣ် တၢ်သးခုကစီၣ်န့ၣ် စူၢ်က့ၤနာ်က့ၤတၢ် ဒီးဒိးဘျၢထံ.” (မၤတၢ် ၁၈:၇-၁၁) ဝံၤဒီး ကစၢ်ယ့ၣ်ၡူးခရံာ် လီၣ်ဖျါထီၣ်အသးလၢ စီၤပီလူးအမဲာ်ညါ လၢတၢ်ထံၣ်လၢညါခီ ဒီးတဲဝဲလၢ “လၢဝ့ၢ်အံၤအပူၤန့ၣ် ယပှၤအိၣ်ဝဲ ဒီဒူၣ်.” အဃိ စီၤပီလူး ဆဲးစံၣ်တဲၤတဲလီၤတၢ်ဖဲန့ၣ် ယံာ်ဝဲတနံၣ်ဒီးတခီ.

၁၆. ပှၤကရံၣ်သူးဖိတဖၣ် ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်. (၂ ကရံၣ်သူး ၁၀:၄, ၅)

^၁၆ ပှၤကရံၣ်သူးဖိတဖၣ် ကဒိးဘျၢထံအဂီၢ် တၢ်မနုၤ မၤစၢၤအီၤလဲၣ်. (ဖး ၂ ကရံၣ်သူး ၁၀:၄, ၅.) ဒ်သိးပှၤကရံၣ်သူးဖိတဖၣ် ဆီတလဲ အတၢ်အိၣ်မူ ကန့ၢ်အဂီၢ် ကစၢ်ယွၤ အကလုၢ်ကထါ ဒီးအသးစီဆှံ အတၢ်စိတၢ်ကမီၤ မၤစၢၤအဝဲသ့ၣ်. (ဧ့ၤ ၄:၁၂) ခီဖျိလၢ ကစၢ်ယွၤ အတၢ်မၤစၢၤအဃိ အဝဲသ့ၣ် ပာ်တ့ၢ်ကွံာ် လုၢ်လၢ်သကဲာ်ပဝး လၢအတဂ့ၤဘၣ် ဒ်သိးဒီး တၢ်အီမူၤသံး, တၢ်ဟုၣ်တၢ် ဒီးပိာ်မုၣ်သကိးပိာ်မုၣ် ပိာ်ခွါသကိးပိာ်ခွါ အတၢ်မံဃုာ်လိာ်သးန့ၢ်ဝဲ.—၁ ကရံၣ် ၆:၉-၁၁.b

၁၇. လၢပှၤကရံၣ်သူးဖိ အအိၣ်န့ၣ် နန့ၢ်ဘၣ် တၢ်မၤလိဒ်လဲၣ်.

^၁၇ ပထံၣ်ဘၣ်လၢ ပှၤကရံၣ်သူးဖိတနီၤလၢ အဘၣ်သးကဲထီၣ် ခရံာ်ဖိန့ၣ် အဘၣ်မၤ တၢ်ဆီတလဲ အိၣ်ဝဲအါမး. ဘၣ်ဆၣ် တၢ်ဆီတလဲလၢ အဝဲသ့ၣ် ကဘၣ်မၤဝဲန့ၣ် အဝဲသ့ၣ် တထံၣ်လၢ အကီဒိၣ်တလၢ လၢအဝဲသ့ၣ်အဂီၢ်ဘၣ်. ဒီးအဝဲသ့ၣ် ဂုာ်ကျဲးစၢးဝဲဆူၣ်ဆူၣ် ဒ်သိးကလဲၤတၢ်လၢ ကျဲလၢအအံၣ် လၢကဆှၢအဝဲသ့ၣ် လၢတၢ်မူ. (မး ၇:၁၃, ၁၄) နၤမီၤ, ဒ်သိး နကဒိးဘျၢထံအဂီၢ် နဘၣ်ပာ်တ့ၢ်ကွံာ် လုၢ်လၢ်သကဲာ်ပဝး လၢအတဂ့ၤဘၣ် အိၣ်တမံၤမံၤဧါ. မ့ၢ်အိၣ်န့ၣ် တဘၣ်ဟ့ၣ်အၡူတဂ့ၤ. ဒီးဒ်သိး နတြီဆၢကွံာ် လုၢ်လၢ်သကဲာ်ပဝး လၢအတဂ့ၤဘၣ် ကန့ၢ်အဂီၢ် ဃ့ယဟိဝၤယွၤ အသးစီဆှံလၢ ကမၤစၢၤနၤ.

၁၈. လၢမီနံးကၤ အတၢ်လဲၤခီဖျိန့ၣ် နန့ၢ်ဘၣ် တၢ်မၤလိဒ်လဲၣ်.

^၁၈ မီနံးကၤ လၢအအိၣ်လၢ ကီၢ်ကၠီၣ်ကၠံယၢၣ်န့ၣ် ဒ်သိး အကတုၤထီၣ်ထီၣ်ဘးလၢ တၢ်ဒိးဘျၢထံအဂီၢ် တၢ်ကတိၤ ဒီးတၢ်မၤမုာ်မၤဖှံသးလၢ အတဂ့ၤဘၣ်န့ၣ် အဘၣ်ဂုာ်ကျဲးစၢး ပာ်တ့ၢ်ကွံာ်ဝဲ သပှၢ်ပှၢ်. အတဲဝဲလၢ “တချုးလၢ ယဒိးဘျၢထံ ဒံးဘၣ်န့ၣ် ယဃ့ထုကဖၣ်လၢ ယဟိဝၤယွၤအအိၣ် ဒ်သိး ယကန့ၢ်ဘၣ် တၢ်ဂံၢ်တၢ်ဘါလၢ ယဆီတလဲ ယတၢ်အိၣ်မူ ကန့ၢ်အဂီၢ်. ယဘၣ်သး မၤတၢ်လၢအဘၣ်န့ၣ် ယဟိဝၤယွၤ သ့ၣ်ညါဝဲအဃိ အမၤစၢၤယၤ ဒီးဟံးစုနဲၣ်ကျဲယၤထီဘိ.” ဖဲမီနံးကၤအိၣ် ၁၆ နံၣ်အခါ အဒိးဘျၢထံ. နၤမီၤ, ဒ်သိးနဒိးဘျၢထံ ကန့ၢ်အဂီၢ် လုၢ်လၢ်သကဲာ်ပဝး လၢအတဂ့ၤဘၣ် လၢနပာ်တ့ၢ်ကွံာ်အီၤ တညီဘၣ်န့ၣ် အိၣ်တမံၤမံၤဧါ. မ့ၢ်အိၣ်န့ၣ် ဆဲးဃ့ယဟိဝၤယွၤ လၢအကဟ့ၣ်နၤ တၢ်ဂံၢ်တၢ်ဘါလၢ နဆီတလဲနသး ကန့ၢ်အဂီၢ်. ယဟိဝၤယွၤန့ၣ် အသးအိၣ်ဟ့ၣ်နၤ အသးစီဆှံနီၢ်ကီၢ်.—ယိၤ ၃:၃၄.

နတၢ်နာ်မ့ၢ်အိၣ်န့ၣ် နသုးကွံာ်ကစၢၢ်သ့

၁၉. ဒ်သိး နလဲၤခီဖျိ တၢ်ကီတၢ်ခဲလၢ အလီၤဂာ် ဒ်သိးဒီး ကစၢၢ်ကန့ၢ်အဂီၢ် တၢ်မနုၤ ကမၤစၢၤနၤလဲၣ်. (ကွၢ်စ့ၢ်ကီးတၢ်ဂီၤ.)

^၁၉ ဒ်သိး နကဒိးဘျၢထံအဂီၢ် တၢ်ကီတၢ်ခဲ မ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ ဘၣ်ဆၣ် နာ်သပှၢ်တၢၢ်လၢ ယဟိဝၤယွၤအဲၣ်နၤ ဒီးအဘၣ်သးလၢ နကကဲထီၣ် အဟံၣ်ဖိဃီဖိ. ယ့ၣ်ၡူးတဲဘၣ် အပျဲၢ်အဘီၣ်တဖၣ်လၢ “သုတၢ်နာ် မ့ၢ်အိၣ်ထဲသိးဒီး သဘၣ်အချံ တဖျၢၣ်န့ၣ် သုမ့ၢ်တဲ ကစၢၢ်တဖျၢၣ်အံၤလၢ ‘လဲၤသုးလၢတၢ်လီၢ် အဝဲန့ၣ်’ န့ၣ်အကသုးအသးလီၤ. ဒီးတၢ်လၢ သုမၤတသ့ဘၣ်န့ၣ် တအိၣ်ဘၣ်နီတမံၤဘၣ်.” (မး ၁၇:၂၀) ယ့ၣ်ၡူး အပျဲၢ်အဘီၣ်တဖၣ် အိၣ်ဘၣ်ဒီးယ့ၣ်ၡူး ထဲစှၤကိာ်နံၣ်အဃိ အဝဲသ့ၣ် ကဘၣ်ဆဲးမၤဒိၣ်ထီၣ် အတၢ်နာ်. အဃိ ယ့ၣ်ၡူးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ အဝဲသ့ၣ် မ့ၢ်ဆဲးမၤဂၢၢ်ကျၢၤထီၣ် အတၢ်နာ်န့ၣ် ယဟိဝၤယွၤ ကမၤစၢၤအဝဲသ့ၣ်လၢ ကသုးကွံာ် အတၢ်ကီတၢ်ခဲလၢ အလီၤဂာ် ဒ်သိးဒီးကစၢၢ်. နၤစ့ၢ်ကီး ယဟိဝၤယွၤ ကမၤစၢၤနၤဒ်န့ၣ်.

၂၀. လၢတၢ်မၤလိအံၤ ခရံာ်ဖိလၢညါ ဒီးခရံာ်ဖိခဲအံၤတဖၣ် အဒိအတဲာ်န့ၣ် ထိၣ်ဟူးထိၣ်ဂဲၤထီၣ်နၤလၢ နကမၤမနုၤလဲၣ်.

^၂၀ ဒ်သိး နကဒိးဘျၢထံအဂီၢ် တၢ်မၤတံာ်တာ်နၤ မ့ၢ်အိၣ်တမံၤမံၤန့ၣ် ဂုာ်ကျဲးစၢးဆူၣ်ဆူၣ်လၢ နကမၤနၢၤကွံာ်အီၤ. ဒီးဒ်သိး နတြီဆၢကွံာ် တၢ်မၤတံာ်တာ် ကန့ၢ်အဂီၢ် ဆိကမိၣ်ထံ ခရံာ်ဖိလၢညါ ဒီးခရံာ်ဖိခဲအံၤတဖၣ် အတၢ်လဲၤခီဖျိ. နမ့ၢ်မၤဒ်န့ၣ်န့ၣ် တၢ်လဲၤခီဖျိတဖၣ်အံၤ ကမၤမုာ်ထီၣ်နသး ဒီးကထိၣ်ဟူးထိၣ်ဂဲၤထီၣ်နၤလၢ နကဟ့ၣ်လုၢ်ထီၣ်သး ဒီးဒိးဘျၢထံ. နမ့ၢ်ဆၢတဲာ်လီၤသးလၢ နကဒိးဘျၢထံန့ၣ် အကဲဝဲ တၢ်ဆၢတဲာ် လၢအဂ့ၤကတၢၢ်.