ကတီၤပာ်စၢၤသးလၢ တၢ်မၤလိလံာ်စီဆှံအဂီၢ်

ဖဲပဖးဒီးမၤလိ လံာ်စီဆှံအခါ ပအဲၣ်ဒိးလၢ တၢ်ဂ့ၢ်လၢပဖးန့ၣ် ကထိးဘၣ်ပသး ဒီးပတၢ်ဆိကမိၣ်. အဒိ ပထံၣ်ဘၣ်လၢ စီၤဧ့စြၤန့ၣ် “အကတဲာ်ကတီၤ ပာ်စၢၤအသး ဒ်သိး အကဃုသ့ၣ်ညါဝဲ ယဟိဝၤယွၤ အတၢ်သိၣ်တၢ်သီ.” (ဧ့ ၇:၁၀) ပကွၢ်လိ စီၤဧ့စြၤ အဒိအတဲာ် ကသ့ဒ်လဲၣ်.

ဃ့ထုကဖၣ်. တချုးလၢပစးထီၣ် ဖးဒီးမၤလိ လံာ်စီဆှံဒံးဘၣ်န့ၣ် ပကဘၣ် ဃ့ထုကဖၣ်. ဃ့ယဟိဝၤယွၤလၢ ကမၤစၢၤပှၤဒ်သိး ပကနၢ်ပၢၢ် တၢ်ဂ့ၢ်လၢပဖး ဒီးကမၤထွဲ တၢ်ဂ့ၢ်လၢ ပမၤလိဘၣ်.—စံး ၁၁၉:၁၈, ၃၄.

အိၣ်ဒီးတၢ်ဆီၣ်လီၤသး. ပှၤလၢအပာ်ထီၣ်ထီသး ဒီးသန့ၤအသးလၢ အနီၢ်ကစၢ် တၢ်ကူၣ်သ့န့ၣ် ကစၢ်ယွၤ တဒုးထံၣ်အဝဲသ့ၣ်လၢ တၢ်မ့ၢ်တၢ်တီဘၣ်. (လူၤ ၁၀:၂၁) အဃိ ဖဲပဃုသ့ၣ်ညါအါထီၣ် တၢ်ဂ့ၢ်တမံၤမံၤအခါ ပတဘၣ်မၤဒ်သိး ပှၤကထံၣ်ဒိၣ်ပှၤလၢ ပသ့ၣ်ညါတၢ်ဂ့ၢ် အါထဲလဲၣ်န့ၣ်ဘၣ်. ဒီးပမ့ၢ်သ့ၣ်ညါဘၣ်လၢ ပတၢ်ထံၣ် တဘၣ်လိာ်သးဒီး ကစၢ်ယွၤ အတၢ်ထံၣ်ဘၣ်န့ၣ် ပကဘၣ် အိၣ်ဒီးတၢ်ဆီၣ်လီၤသး ဒီးဆီတလဲက့ၤ ပတၢ်ထံၣ်.

ဒိကနၣ် ဘီမုၢ်အတၢ်သးဝံၣ်. တၢ်သးဝံၣ်န့ၣ် အထိၣ်ဟူးထိၣ်ဂဲၤထီၣ် ပသးသ့ ဒီးကမၤစၢၤပှၤ ဒ်သိး ပကအိၣ်ကတီၤသးလၢ တၢ်ဘူၣ်ထီၣ်ဘါထီၣ်အဂီၢ်. အဃိ တချုးလၢပစးထီၣ် နီၢ်ကစၢ် တၢ်မၤလိလံာ်စီဆှံ ဒံးဘၣ်အခါ ပမ့ၢ်ဒိကနၣ် ဘီမုၢ်အတၢ်သးဝံၣ်န့ၣ် ကမၤစၢၤပှၤဒ်သိး ပကသးစၢၢ်ဆၢ တၢ်လၢယဟိဝၤယွၤ ကသိၣ်လိပှၤ.