အိၣ်ဒီးတၢ်ဆီၣ်လီၤသး ဒီးတူၢ်လိာ်လၢ နတသ့ၣ်ညါတၢ် ခဲလၢာ်ဘၣ်

၁. ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်မနုၤလဲၣ် ဒီးဘၣ်မနုၤအဃိလဲၣ်.

ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်လၢ ပကဆိကမိၣ်တၢ်, မၤလိန့ၢ် တၢ်အသီ ဒီးပကဘၣ်မၤထွဲ တၢ်လၢပမၤလိဘၣ်တဖၣ် ဒ်လဲၣ်န့ၣ် ပသ့ၣ်ညါဘၣ်စ့ၢ်ကီး. ဘၣ်မနုၤအဃိ အတ့လီၤပှၤဒ်အံၤလဲၣ်. အဘၣ်သးလၢ ပက “ထံၣ်န့ၢ် တၢ်သ့ၣ်ညါ ဘၣ်ဃးဒီး ကစၢ်ယွၤ” ဒီးဖဲပမၤ အတၢ်မၤအခါ အဘၣ်သးလၢ ပတၢ်ဆၢတဲာ်န့ၣ် ဒိးသန့ၤထီၣ်သးလၢ တၢ်သ့ၣ်ညါ လီၤတံၢ်လီၤဆဲး.—ကတိၤ ၂:၁-၅; ရိ ၁၂:၁.

၂. (က) ပကဘၣ် သ့ၣ်ညါလီၤပသးဒ်လဲၣ်. (ယိၤဘး ၃၇:၂၃, ၂၄) (ကွၢ်စ့ၢ်ကီးတၢ်ဂီၤ.) (ခ) ပမ့ၢ်တူၢ်လိာ်လၢ ပတသ့ၣ်ညါတၢ် ခဲလၢာ်ဘၣ်န့ၣ် ကမၤစၢၤပှၤဒ်လဲၣ်.

^၂ ယဟိဝၤယွၤ တ့လီၤပှၤဃုာ်ဒီး တၢ်သ့တၢ်ဘၣ်လၢ ပကမၤလိန့ၢ်တၢ်အါမး ဘၣ်ဆၣ် တၢ်ဂ့ၢ်လၢ ပတသ့ၣ်ညါဘၣ်န့ၣ် အိၣ်ဒီဒူၣ်ညါ. (ဖး ယိၤဘး ၃၇:၂၃, ၂၄.) ဆိကမိၣ်ကွၢ် စီၤယိၤဘး အဒိအတဲာ်. ယဟိဝၤယွၤ သံကွၢ်စီၤယိၤဘး တၢ်သံကွၢ် တဖျၢၣ်ဝံၤတဖျၢၣ်အဃိ မၤစၢၤအီၤဒ်သိး အကသ့ၣ်ညါလီၤသးလၢ တၢ်ဂ့ၢ်လၢ အတသ့ၣ်ညါဝဲဘၣ်န့ၣ် အိၣ်ဒီဒူၣ်ဒံး. တၢ်လဲၤခီဖျိအံၤ မၤစၢၤ စီၤယိၤဘးလၢ အကအိၣ်ဒီး တၢ်ဆီၣ်လီၤသး ဒီးမၤဘၣ်ထီၣ်က့ၤ အတၢ်ဆိကမိၣ်. (ဘး ၄၂:၃-၆) ပဝဲစ့ၢ်ကီး ပမ့ၢ်တူၢ်လိာ်လၢ ပတသ့ၣ်ညါတၢ် ခဲလၢာ်ဘၣ်န့ၣ် ပကဒိးန့ၢ်ဘၣ်အဘျုး. အဒိ အမၤစၢၤပှၤဒ်သိး ပကအိၣ်ဒီး တၢ်ဆီၣ်လီၤသး ဒီးဒ်သိး ပဆၢတဲာ် တၢ်လၢအဘၣ် ကသ့အဂီၢ် ပနာ်လၢ ယဟိဝၤယွၤ ကတဲဘၣ်ပှၤ တၢ်ဂ့ၢ်လၢ ပလိၣ်ဘၣ်နီၢ်ကီၢ်.—ကတိၤ ၂:၆.

၃. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၃ လၢတၢ်မၤလိအံၤ ပကထံၣ်ဘၣ်လၢ တၢ်ဂ့ၢ်တနီၤလၢ ပတသ့ၣ်ညါဘၣ်န့ၣ်အိၣ်ဝဲ ဒီးခီဖျိလၢ ပတသ့ၣ်ညါဘၣ်အဃိ တဘျီတခီၣ်န့ၣ် အကကီလၢပဂီၢ်. ဘၣ်ဆၣ် ပကမၤလိဘၣ်လၢ ပမ့ၢ်တသ့ၣ်ညါ တၢ်ဂ့ၢ်တနီၤနီၤဘၣ် သနာ်က့ ပကဒိးန့ၢ်ဘၣ် အဘျုးစ့ၢ်ကီး. ဒီးပကတဲသကိး တၢ်ဂ့ၢ်လၢ ကမၤစၢၤပှၤဒ်သိး ပကနာ် သပှၢ်တၢၢ်လၢ ယဟိဝၤယွၤန့ၣ် အကဲဝဲ “ပှၤလၢအသ့ၣ်ညါနၢ်ပၢၢ်တၢ် လၢလၢပှဲၤပှဲၤတဂၤ” ဒီးအကတဲဘၣ်ပှၤ တၢ်ဂ့ၢ်လၢ ပလိၣ်ဘၣ်နီၢ်ကီၢ်.—ဘး ၃၇:၁၆.

တၢ်အကတၢၢ် ကတုၤဝဲ လၢအခါဖဲလဲၣ်န့ၣ် ပတသ့ၣ်ညါဘၣ်

၄. ဒ် မးသဲ ၂၄:၃၆ ပာ်ဖျါထီၣ်ဝဲအသိး တၢ်ဂ့ၢ်တခါလၢ ပတသ့ၣ်ညါဘၣ်န့ၣ် မ့ၢ်မနုၤလဲၣ်.

^၄ ဖး မးသဲ ၂၄:၃၆. လၢပစိၤခဲအံၤ တၢ်အကတၢၢ် ကတုၤဝဲ လၢအခါဖဲလဲၣ်န့ၣ် ပတသ့ၣ်ညါဘၣ်. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ ဘၣ်ဃးဒီး “မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ်” အတသ့ၣ်ညါဝဲ စ့ၢ်ကီးဘၣ်.a လၢခံ ယ့ၣ်ၡူးတဲဘၣ် တၢ်မၢဖိတဖၣ်လၢ ယဟိဝၤယွၤန့ၣ် အကဲ “ပှၤလၢအအိၣ်ဒီးတၢ်ခွဲးတၢ်ယာ်” လၢကပာ်ပနီၣ်ဃာ် တၢ်ဆၢကတီၢ်. (မၤတၢ် ၁:၆, ၇) အဃိ တၢ်အကတၢၢ် ကတုၤဝဲ လၢအခါဖဲလဲၣ်န့ၣ် ယဟိဝၤယွၤ ပာ်ပနီၣ်ဃာ် တၢ်ဆၢကတီၢ်ဝံၤလံ. ဘၣ်ဆၣ် ပတအိၣ်ဒီး တၢ်ခွဲးတၢ်ယာ်လၢ ပကသ့ၣ်ညါ တၢ်ဆၢကတီၢ် လီၤတံၢ်လီၤဆဲးဘၣ်.

၅. ပတသ့ၣ်ညါ တၢ်ဆၢကတီၢ်လၢ တၢ်အကတၢၢ်အဂီၢ်ဘၣ်အဃိ ဘၣ်သ့ၣ်သ့ၣ် တၢ်ကကဲထီၣ်သးဒီးပှၤဒ်လဲၣ်.

^၅ ပကဘၣ်အိၣ်ခိး တၢ်ဆၢကတီၢ်လၢ တၢ်အကတၢၢ်အဂီၢ် ယံာ်ဒံးထဲလဲၣ်န့ၣ် ပတသ့ၣ်ညါဘၣ်. အဃိ ပဝဲကိးဂၤ, လီၤဆီဒၣ်တၢ် ပမ့ၢ်ကဲပှၤလၢ အအိၣ်ခိး ယဟိဝၤယွၤ အမုၢ်နံၤ ဖးယံာ်လံန့ၣ် ဘၣ်သ့ၣ်သ့ၣ် ပသးတစူၤလၢၤဘၣ် ဒီးပသးကဟးဂီၤ. တကးဒံးဘၣ် ပဟံၣ်ဖိဃီဖိ တဂၤဂၤ မ့တမ့ၢ် ပှၤအဂၤ မ့ၢ်ဒုၣ်ဒွဲၣ်စံးအၢပှၤ ဘၣ်ဃးဒီး တၢ်အကတၢၢ် တတုၤဒံးဘၣ် အဂ့ၢ်န့ၣ် ဘၣ်သ့ၣ်သ့ၣ် ပသးကဟးဂီၤစ့ၢ်ကီး. (၂ ပ့း ၃:၃, ၄) ဘၣ်သ့ၣ်သ့ၣ် ပကဆိကမိၣ်လၢ ပမ့ၢ်သ့ၣ်ညါ တၢ်ဆၢကတီၢ်လၢ တၢ်အကတၢၢ်အဂီၢ် လီၤတံၢ်လီၤဆဲးန့ၣ် ပကဆဲးအိၣ်ဒီး တၢ်သးစူၤ ဒီးပလဲၤခီဖျိ ပှၤဂၤအတၢ်ဒုၣ်ဒွဲၣ်စံးအၢ ကညီဝဲ.

၆. ပတသ့ၣ်ညါ တၢ်ဆၢကတီၢ်လၢ တၢ်အကတၢၢ်အဂီၢ်ဘၣ်န့ၣ် ဘၣ်မနုၤအဃိ အကဲဘျုး လၢပဂီၢ်လဲၣ်.

^၆ ခီဖျိလၢ ယဟိဝၤယွၤ တတဲဘၣ်ပှၤ တၢ်ဆၢကတီၢ်လၢ တၢ်အကတၢၢ်အဂီၢ်ဘၣ်အဃိ ပအိၣ်ဒီး တၢ်ခွဲးတၢ်ယာ်လၢ ပကပာ်ဖျါလၢ ပမၤအတၢ်မၤန့ၣ် မ့ၢ်လၢပအဲၣ်အီၤဒီးနာ်န့ၢ်အီၤ. ဒီးပတပာ်ပနီၣ်ဃာ် မုၢ်နံၤမုၢ်သီ ဒီးမၤအတၢ်မၤ တုၤဖဲ တၢ်အကတၢၢ် တုၤဝဲအခါဘၣ်, ပအဲၣ်ဒိး မၤအတၢ်မၤ လီၤထူလီၤယိာ်. အဃိ ပတဘၣ် ဆိကမိၣ် ထဲလၢ “ယဟိဝၤယွၤ အမုၢ်နံၤ” ကတုၤဝဲ လၢအခါဖဲလဲၣ်ဘၣ်. ဘၣ်ဆၣ် ပကဘၣ် ဆိကမိၣ်ထံလၢ ဖဲမုၢ်နံၤအဝဲန့ၣ် တုၤဝဲအခါ ပကဒိးန့ၢ်ဘၣ် အဘျုးလၢ တၢ်လၢယဟိဝၤယွၤ ကမၤန့ၢ်ပှၤအဂ့ၢ်. ပမ့ၢ်မၤဒ်န့ၣ်န့ၣ် ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ်, ပကနာ်န့ၢ်အီၤ ဒီးပကဂုာ်ကျဲးစၢးမၤ တၢ်လၢအဘၣ်အသး.—၂ ပ့း ၃:၁၁, ၁၂.

၇. တၢ်ဂ့ၢ်လၢ ပသ့ၣ်ညါန့ၣ် မ့ၢ်မနုၤလဲၣ်.

^၇ တၢ်ဂ့ၢ်လၢ ပသ့ၣ်ညါန့ၣ် အရ့ဒိၣ်လၢ ပကဆိကမိၣ်ထံအီၤ. အဒိ ဝံအတၢ်စံးပာ်လၢ လံာ်စီဆှံအပူၤန့ၣ် ပာ်ဖျါန့ၢ်ပှၤလၢ မုၢ်နံၤခံကတၢၢ်တဖၣ် စးထီၣ်အသးဖဲ ၁၉၁၄ နံၣ်. တကးဒံးဘၣ် ဖဲတၢ်တနံၣ်န့ၣ် ဝံၤအလီၢ်ခံ ဟီၣ်ခိၣ်တၢ်အိၣ်သး ကအိၣ်ဒ်လဲၣ်န့ၣ် ယဟိဝၤယွၤ ပာ်ဖျါန့ၢ်ပှၤ တၢ်ဂ့ၢ်အါမးစ့ၢ်ကီး. အဃိ ပနာ်သပှၢ်တၢၢ်လၢ “ယဟိဝၤယွၤ အမုၢ်နံၤဖးဒိၣ်န့ၣ် ဘူးထီၣ်လံ.” (ဖါ ၁:၁၄) ဒီးပသ့ၣ်ညါဘၣ် စ့ၢ်ကီးလၢ ယဟိဝၤယွၤ အဲၣ်ဒိးလၢ ပကဂုာ်ကျဲးစၢး တဲဘၣ် ပှၤအါဂၤ ဘၣ်ဃးဒီး “ဘီမုၢ်တၢ်သးခုကစီၣ်” အဂ့ၢ်. (မး ၂၄:၁၄) အဃိ တၢ်သးခုကစီၣ်အံၤ ပစံၣ်တဲၤတဲလီၤအီၤလၢ ထံကီၢ် ၂၄၀ ဘ့ၣ် ဒီးလၢ ကျိာ် ၁,၀၀၀ ဘျဲၣ်. ဒီးပကစံၣ်တဲၤတဲလီၤတၢ်လၢ တၢ်သးဆူၣ်အဂီၢ် ပတလိၣ်သ့ၣ်ညါ “မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ်” ဘၣ်.

ယဟိဝၤယွၤ ကမၤတၢ် ဒ်လဲၣ်န့ၣ် ပတသ့ၣ်ညါဘၣ်

၈. “ယွၤလၢအမ့ၢ်အတီ လၢအမၤတၢ်ခဲလၢာ် တဂၤ” အတၢ်မၤန့ၣ် အဲၣ်ဒိးတဲဝဲ မနုၤလဲၣ်. (စံၣ်တဲၤတဲလီၤတၢ် ၁၁:၅)

^၈ “ယွၤလၢအမ့ၢ်အတီ လၢအမၤတၢ်ခဲလၢာ် တဂၤ” အတၢ်မၤန့ၣ် ပတသ့ၣ်ညါနၢ်ပၢၢ် ထီဘိဘၣ်. (ဖး စံၣ်တဲၤတဲလီၤတၢ် ၁၁:၅.) တၢ်ကတိၤအံၤ အဲၣ်ဒိးတဲဝဲ ဒ်သိး ယဟိဝၤယွၤ အတၢ်ဘၣ်သး ကလၢပှဲၤထီၣ်အဂီၢ် အဒုးကဲထီၣ်တၢ် မ့တမ့ၢ် အပျဲလၢ တၢ်တမံၤမံၤ ကဟဲကဲထီၣ်သး. ဒီးဘၣ်မနုၤအဃိ ယဟိဝၤယွၤ ပျဲဝဲလၢ တၢ်တမံၤမံၤ ကကဲထီၣ်သး မ့တမ့ၢ် ယဟိဝၤယွၤ ကမၤစၢၤပှၤဒ်လဲၣ်န့ၣ် ပတသ့ၣ်ညါ တၢ်ဂ့ၢ်ခဲလၢာ် လီၤတံၢ်လီၤဆဲးဘၣ်. (စံး ၃၇:၅) လံာ်စီဆှံ ထိၣ်သတြီၤဝဲ ဘၣ်ဃးဒီး ပတသ့ၣ်ညါနၢ်ပၢၢ် ယွၤလၢအမ့ၢ်အတီ အတၢ်မၤန့ၣ် အလီၤဂာ် ဒ်သိးဒီး ပတသ့ၣ်ညါနၢ်ပၢၢ် ဘၣ်ဃးဒီး ဖိသၣ်ဒိၣ်ထီၣ်လၢ အမိဒၢလီၢ်ပူၤ အဂ့ၢ်ဘၣ်. ဒီးတုၤခဲအံၤ ဖိသၣ်ဒိၣ်ထီၣ်လၢ အမိဒၢလီၢ်ပူၤ ဒ်လဲၣ်န့ၣ် ပှၤစဲအ့ၣ်ဖိ တသ့ၣ်ညါနၢ်ပၢၢ်ဝဲ လီၤတံၢ်လီၤဆဲးဒံးဘၣ်. ဒ်န့ၣ်အသိး ယဟိဝၤယွၤ ကမၤတၢ်ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်.

၉. ယဟိဝၤယွၤ ကမၤစၢၤပှၤ ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်အဃိ ဘၣ်သ့ၣ်သ့ၣ် ပကတူၢ်ဘၣ်ဒ်လဲၣ်.

^၉ ယဟိဝၤယွၤ ကမၤစၢၤပှၤ ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်အဃိ ဘၣ်သ့ၣ်သ့ၣ် ပကမၤယံာ်မၤနီၢ်သးလၢ ပကဆၢတဲာ်တၢ်တမံၤမံၤ. အဒိ ဒ်သိး ပကမၤအါထီၣ် တၢ်စံၣ်တဲၤတဲလီၤတၢ်မၤ မ့တမ့ၢ် လဲၤပၠီလၢတၢ်လီၢ်လၢ ပှၤလိၣ်ဘၣ်အါထီၣ် ပှၤစံၣ်တဲၤတဲလီၤတၢ်ဖိအဂီၢ် ဘၣ်သ့ၣ်သ့ၣ် ပတအဲၣ်ဒိးတူၢ်ၡူကွံာ် တၢ်လၢအအိၣ်ဒီးပှၤဘၣ် ဒီးပကဘၣ်ယိၣ်လၢ ကစၢ်ယွၤ တမၤစၢၤပှၤဘၣ်အဃိ ပမၤယံာ်မၤနီၢ်ပသး. တကးဒံးဘၣ် ပဖီတၢၣ်လၢ နီၢ်သးတခီ မ့ၢ်တဟဲလၢပှဲၤထီၣ်ဘၣ်, ပတၢ်စံၣ်တဲၤတဲလီၤတၢ်မၤ မ့ၢ်တလဲၤထီၣ်လဲၤထီဘၣ် မ့တမ့ၢ် ဖဲပမၤ ပတၢ်ကရၢကရိ အတၢ်ဖံးတၢ်မၤ တမံၤမံၤအခါ ပမ့ၢ်ထံၣ်ဘၣ် တၢ်ကီတၢ်ခဲန့ၣ် ဘၣ်သ့ၣ်သ့ၣ် ပကဆိကမိၣ်လၢ ယဟိဝၤယွၤ တဘၣ်သူၣ်ဘၣ်သးပှၤဘၣ်.

၁၀. ယဟိဝၤယွၤ ကမၤတၢ်ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်အဃိ မၤစၢၤပှၤလၢ ပကမၤအါထီၣ် တၢ်ဂ့ၤတၢ်ဝါ လၢအရ့ဒိၣ် မနုၤလဲၣ်.

^၁၀ ယဟိဝၤယွၤ ကမၤတၢ်ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်အဃိ မၤစၢၤပှၤလၢ ပကမၤအါထီၣ် တၢ်ဂ့ၤတၢ်ဝါ လၢအရ့ဒိၣ် ဒ်သိးဒီး တၢ်ဆီၣ်လီၤသး. ပသ့ၣ်ညါထီၣ်လၢ ယဟိဝၤယွၤ အတၢ်ဆိကမိၣ် ဒီးအတၢ်မၤန့ၣ် အပတီၢ်ထီန့ၢ်ဒံး ပတၢ်ဆိကမိၣ် ဒီးပတၢ်မၤ. (ၡါ ၅၅:၈, ၉) အဃိ ပနာ်န့ၢ်အါထီၣ် ယဟိဝၤယွၤ ဒီးနာ်သပှၢ်တၢၢ်လၢ တၢ်တမံၤဂ့ၤ တမံၤဂ့ၤလၢ အမၤဝဲန့ၣ် အကမၤဝဲလၢ အဂ့ၤကတၢၢ်. တကးဒံးဘၣ် ဖဲပတၢ်စံၣ်တဲၤတဲလီၤတၢ်မၤ မ့တမ့ၢ် ပတၢ်ကရၢကရိ အတၢ်ဖံးတၢ်မၤ လဲၤထီၣ်လဲၤထီအခါ ပစံးထီၣ်ပတြၢၤ ယဟိဝၤယွၤ. (စံး ၁၂၇:၁; ၁ ကရံၣ် ၃:၇) ဘၣ်ဆၣ် တၢ်မ့ၢ်တဟဲကဲထီၣ်သး ဒ်ပဆိကမိၣ်ပာ်စၢၤ အသိးဘၣ်န့ၣ် ပကဘၣ် သ့ၣ်နီၣ်ထီၣ်လၢ ယဟိဝၤယွၤ ထံၣ်ဝဲ ဒီးသ့ၣ်ညါဝဲခဲလၢာ်. (ၡါ ၂၆:၁၂) အဃိ ပဆဲးဂုာ်ကျဲးစၢးမၤ ပမူဒါလၢအဂ့ၤကတၢၢ် ဒီးနာ်လၢ ယဟိဝၤယွၤ ကမၤစၢၤပှၤထီဘိ. ဒီးယဟိဝၤယွၤ မ့ၢ်တမၤတၢ်လီၤလး ဒီးမၤစၢၤပှၤဒ်သိး အမၤစၢၤ အခ့အပှၤလၢညါဘၣ် သနာ်က့ ပနာ်သပှၢ်တၢၢ်လၢ အကဟ့ၣ်ပှၤ တၢ်ဟံးစုနဲၣ်ကျဲ လၢပလိၣ်ဘၣ်.—မၤတၢ် ၁၆:၆-၁၀.

၁၁. တၢ်ဂ့ၢ်အရ့ဒိၣ်လၢ ပသ့ၣ်ညါန့ၣ် မ့ၢ်မနုၤလဲၣ်.

^၁၁ ပသ့ၣ်ညါလၢ ယဟိဝၤယွၤန့ၣ် အအိၣ်ဒီးတၢ်အဲၣ်, အမၤတၢ် တီတီလိၤလိၤ ဒီးအကူၣ်တၢ်သ့ထီဘိ. ဒီးတၢ်လၢ ပမၤလၢအဂီၢ် ဒီးဒီပုၢ်ဝဲၢ်မုၣ်ခွါအဂီၢ်န့ၣ် ပသ့ၣ်ညါလၢ အပာ်လုၢ်ပာ်ပှ့ၤဝဲဒိၣ်မး. တကးဒံးဘၣ် ပသ့ၣ်ညါလၢ ယဟိဝၤယွၤ ကဆိၣ်ဂ့ၤက့ၤ ပှၤလၢအတီဒီးအီၤ ထီဘိ.—ဧ့ၤ ၁၁:၆.

ခဲမုၢ်ဆ့ၣ် တၢ်ကမၤအသး ဒ်လဲၣ်န့ၣ် ပတသ့ၣ်ညါဘၣ်

၁၂. ဖဲ ယၤကိာ် ၄:၁၃, ၁၄ န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.

^၁၂ ဖး ယၤကိာ် ၄:၁၃, ၁၄. “တၢ်ဆၢကတီၢ် ဒီးတၢ်ဘၣ်န့ၢ်အတီၤ” ဘၣ်ပှၤသ့ ကိးဂၤဒဲးအဃိ ခဲမုၢ်ဆ့ၣ် တၢ်ကမၤအသးဒီးပှၤ ဒ်လဲၣ်န့ၣ် ပတသ့ၣ်ညါဘၣ်. (စံၣ် ၉:၁၁) အဃိ တၢ်လၢပရဲၣ်ကျဲၤ ပာ်စၢၤန့ၣ် ကဟဲကဲထီၣ်သးဧါ မ့တမ့ၢ် ပကအိၣ်မူဘၣ်ဒံး တုၤလၢ ပမၤလၢပှဲၤထီၣ် ပတၢ်ရဲၣ်တၢ်ကျဲၤဧါန့ၣ် ပတသ့ၣ်ညါဘၣ်.

၁၃. ခါဆူညါ တၢ်ကကဲထီၣ်သး ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်အဃိ တဘျီတခီၣ် ပကတူၢ်ဘၣ်ဒ်လဲၣ်.

^၁၃ ခါဆူညါ တၢ်ကကဲထီၣ်သး ဒ်လဲၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်အဃိ ဘၣ်သ့ၣ်သ့ၣ် ပလဲၤခီဖျိ တၢ်ကီတၢ်ခဲ တညီဘၣ်. ဘၣ်မနုၤအဃိ ပတဲဒ်န့ၣ်လဲၣ်. ဘၣ်သ့ၣ်သ့ၣ် ပကဘၣ်ယိၣ်တၢ် အါတလၢ ဘၣ်ဃးဒီး တၢ်လၢကဟဲကဲထီၣ်သး အဃိ ပတသးခုလၢၤဘၣ်. ဒီးဘၣ်သ့ၣ်သ့ၣ် ပကထံၣ်ဘၣ် တၢ်ဆီတလဲ လၢပတၢ်အိၣ်မူပူၤ မ့တမ့ၢ် တၢ်လၢအတဂ့ၤဘၣ် ကကဲထီၣ်သး သတူၢ်ကလာ်အဃိ ပကသးအုးနးမး ဒီးသးပှံၢ်ထီၣ်တၢ်. ဒီးပတၢ်မုၢ်လၢ် မ့ၢ်တဟဲလၢထီၣ်ပှဲၤထီၣ်ဘၣ်န့ၣ် ပသးကဟးဂီၤ ဒီးပသးဂံၢ်ဘါကလီၤစၢ်.—ကတိၤ ၁၃:၁၂.

၁၄. ပကအိၣ်ဒီး တၢ်သးခုနီၢ်ကီၢ်အဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၄ ဖဲပထံၣ်ဘၣ် တၢ်ကီတၢ်ခဲအခါ ပအိၣ်ဒီး တၢ်ခွဲးတၢ်ယာ်လၢ ပကပာ်ဖျါထီၣ်လၢ ပဘူၣ်ထီၣ်ဘါထီၣ် ယဟိဝၤယွၤန့ၣ် မ့ၢ်လၢပအဲၣ်အီၤအဃိ ဒီးတမ့ၢ်ခီဖျိလၢ ပဒိးန့ၢ်ဘၣ် အဘျုးအဃိဘၣ်. တၢ်အဒိတဖၣ်လၢ လံာ်စီဆှံအပူၤန့ၣ် ပာ်ဖျါထီၣ်န့ၢ်ပှၤလၢ ပတကြၢး မုၢ်လၢ်လၢ ယဟိဝၤယွၤ ကဒီသဒၢပှၤလၢ တၢ်ကီတၢ်ခဲ ခဲလၢာ်ဘၣ် ဒီးတၢ်ကကဲထီၣ်သးဒီးပှၤ ဒ်လဲၣ်န့ၣ် ယဟိဝၤယွၤ တရဲၣ်ကျဲၤ ပာ်စၢၤဝဲဘၣ်. ယဟိဝၤယွၤ သ့ၣ်ညါဝဲလၢ တၢ်ကမၤအသးဒီးပှၤ ဒ်လဲၣ်န့ၣ် ပမ့ၢ်တသ့ၣ်ညါ ခဲလၢာ်ဘၣ်သနာ်က့ ပအိၣ်ဒီး တၢ်သးခုသ့ဒံး. တကးဒံးဘၣ် အသ့ၣ်ညါဝဲလၢ ပမ့ၢ်ဆဲးဃု အတၢ်ဟံးစုနဲၣ်ကျဲ ဒီးဒိကနၣ် အကလုၢ်န့ၣ် ပကအိၣ်ဒီး တၢ်သးခုနီၢ်ကီၢ်. (ယံး ၁၀:၂၃) အဃိ ဖဲပဘၣ်ဆၢတဲာ်တၢ်အခါ ပမ့ၢ်ဃ့အတၢ်မၤစၢၤန့ၣ် လီၤဂာ်ဒ်သိးဒီး ပတဲလၢ “မ့ၢ်ဘၣ်ယဟိဝၤယွၤ အသးန့ၣ် ပကမူဒီးပကမၤတၢ် ဒ်အံၤဒ်နုၤလီၤ.”—ယၤ ၄:၁၅.

၁၅. ဘၣ်ဃးဒီး ခါဆူညါန့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.

^၁၅ တနံၤဘၣ်တနံၤ တၢ်ကကဲထီၣ်သး ဒ်လဲၣ်န့ၣ် ပတသ့ၣ်ညါဘၣ် သနာ်က့ ပတၢ်မုၢ်လၢ် မ့ၢ်အိၣ်လၢ ပကအိၣ်မူဘၣ် လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤ ပသ့ၣ်ညါလၢ ယဟိဝၤယွၤ အၢၣ်လီၤပှၤလၢ ပကအိၣ်မူဘၣ် လီၤထူလီၤယိာ်. ပသ့ၣ်ညါလၢ ယဟိဝၤယွၤန့ၣ် အလံၣ်တၢ် တသ့ဘၣ် ဒီးဒ်သိး အကမၤလၢပှဲၤထီၣ် အတၢ်အၢၣ်လီၤအဂီၢ် တၢ်လၢကမၤတံာ်တာ်အီၤ တအိၣ်နီတမံၤဘၣ်. (တံ ၁:၂) ယဟိဝၤယွၤန့ၣ် အကဲပှၤထဲတဂၤလၢ အ “တဲဆိပာ်စၢၤ တၢ်လၢအကကဲထီၣ်အသး” ဒီးလၢပျၢၤန့ၣ် အ “တဲဆိတၢ်လၢ အတမၤအသးဒံးဘၣ်တဖၣ်.” ပထံၣ်ဘၣ်လၢ တၢ်လၢ အတဲပာ်စၢၤဝဲ လၢအပူၤကွံာ်န့ၣ် ဟဲလၢပှဲၤထီၣ် ဒီးတၢ်လၢ အတဲပာ်စၢၤဝဲ လၢခါဆူညါ အဂီၢ်န့ၣ် ကဟဲလၢပှဲၤထီၣ် သပှၢ်တၢၢ်. (ၡါ ၄၆:၁၀) ဒီးပသ့ၣ်ညါ သပှၢ်တၢၢ်လၢ တၢ်တမံၤဂ့ၤတမံၤဂ့ၤ မၤလီၤဖးပှၤဒီး ယဟိဝၤယွၤ အတၢ်အဲၣ် တသ့နီတမံၤဘၣ်. (ရိ ၈:၃၅-၃၉) တကးဒံးဘၣ် ယဟိဝၤယွၤ ကဟ့ၣ်ပှၤ တၢ်ကူၣ်သ့, ကမၤမုာ်ထီၣ်ပသး ဒီးဒ်သိး ပလဲၤခီဖျိ တၢ်ကီတၢ်ခဲ ကန့ၢ်အဂီၢ် အကဟ့ၣ်ပှၤ တၢ်ဂံၢ်တၢ်ဘါ လၢပလိၣ်ဘၣ်. အဃိ ပနာ်သ့သပှၢ်တၢၢ်လၢ ယဟိဝၤယွၤ ကမၤစၢၤပှၤ ဒီးကဆိၣ်ဂ့ၤပှၤ.—ယံး ၁၇:၇, ၈.

ယဟိဝၤယွၤ သ့ၣ်ညါပှၤ ဂ့ၤထဲလဲၣ်န့ၣ် ပနၢ်ပၢၢ်တသ့ဘၣ်

၁၆. ဒ် စံးထီၣ်ပတြၢၤ ၁၃၉:၁-၆ ပာ်ဖျါထီၣ်ဝဲအသိး ယဟိဝၤယွၤ သ့ၣ်ညါပဂ့ၢ် ထဲလဲၣ် ဒီးနတူၢ်ဘၣ်ဒ်လဲၣ်.

^၁၆ ဖး စံးထီၣ်ပတြၢၤ ၁၃၉:၁-၆. ပတၢ်ဘၣ်တ့ကစၢ်န့ၣ် အသ့ၣ်ညါပဂ့ၢ်ခဲလၢာ်. အဒိ ပတၢ်တူၢ်ဘၣ်, ပတၢ်ဆိကမိၣ် ဒီးတၢ်လၢပလဲၤခီဖျိဘၣ်လၢ ပတၢ်အိၣ်မူပူၤန့ၣ် အသ့ၣ်ညါဝဲ လီၤတံၢ်လီၤဆဲး. ဒီးတၢ်လၢပတဲ ဒီးတၢ်အိၣ်လၢ ပသးပူၤန့ၣ် အသ့ၣ်ညါဝဲဂ့ၤဂ့ၤ. တကးဒံးဘၣ် တၢ်လၢပမၤ ဒီးဘၣ်မနုၤအဃိ ပမၤအီၤလဲၣ်န့ၣ် အသ့ၣ်ညါဝဲစ့ၢ်ကီး. အဃိ ပသ့ၣ်ညါဘၣ်လၢ ယဟိဝၤယွၤန့ၣ် အသးအိၣ်ပှၤဒိၣ်မး. စီၤပၤဒၤဝံး တဲဖျါထီၣ်ဝဲလၢ ယဟိဝၤယွၤန့ၣ် အအိၣ်ကတဲာ်ကတီၤ အသးလၢ ကမၤစၢၤပှၤ ဒီးပတၢ်အိၣ်သး မ့ၢ်အိၣ်ဒ်လဲၣ် ဒီးပမ့ၢ်အိၣ်ဖဲလဲၣ် သနာ်က့ ယဟိဝၤယွၤ မၤစၢၤပှၤသ့ထီဘိ. ယဟိဝၤယွၤ လၢအမ့ၢ် တၢ်ပၢကစၢ် ဒီးတၢ်ဘၣ်တ့ကစၢ် လၢအတ့လီၤ မူခိၣ်ဟီၣ်ခိၣ်န့ၣ် သူၣ်အိၣ်သးအိၣ်နၤ ဒိၣ်မးအဃိ အလီၤကမၢကမၣ်ညါ တမ့ၢ်ဧီၤ. အဃိ ဘၣ်ဃးဒီး ယဟိဝၤယွၤန့ၣ် စီၤဒၤဝံး တဲဝဲလၢ “နတၢ်သ့ၣ်ညါအံၤ ယိာ်ဝဲဒိၣ်မး တုၤဒၣ်လဲာ် ယနၢ်ပၢၢ်အီၤတသ့ဘၣ်.”—စံး ၁၃၉:၆.

၁၇. ပကထံၣ် ယဟိဝၤယွၤ ဒ်ပါတဂၤလၢ အသးအိၣ်ပှၤန့ၣ် ဘၣ်မနုၤအဃိ အတညီဘၣ်လဲၣ်.

^၁၇ ခီဖျိလၢ ပဟံၣ်ဖိဃီဖိ တၢ်အိၣ်သး, ပတၢ်ဆဲးတၢ်လၤ မ့တမ့ၢ် ပတၢ်စူၢ်တၢ်နာ် လၢအပူၤကွံာ်အဃိ ဘၣ်သ့ၣ်သ့ၣ် ပကထံၣ် ယဟိဝၤယွၤ ဒ်ပါတဂၤလၢ အအဲၣ်ပှၤ ဒီးသးအိၣ်ပှၤန့ၣ် အတညီဘၣ်. မ့တမ့ၢ်ဘၣ်န့ၣ် ခီဖျိလၢ ပမၤဘၣ် တၢ်ကမၣ်ဖးဒိၣ် လၢအပူၤကွံာ်အဃိ ဘၣ်သ့ၣ်သ့ၣ် ပကဆိကမိၣ်လၢ ယဟိဝၤယွၤ အိၣ်ယံၤဒီးပှၤ ဒီးအတအဲၣ်ဒိး ကနၣ်ဃုာ်ပှၤဘၣ်. စီၤဒၤဝံးစ့ၢ်ကီး တဘျီတခီၣ် အတူၢ်ဘၣ်ဝဲဒ်န့ၣ်. (စံး ၃၈:၁၈, ၂၁) တကးဒံးဘၣ် ပှၤတဂၤလၢ အဂုာ်ကျဲးစၢး ဆီတလဲ အတၢ်အိၣ်မူ ဒီးအိၣ်မူက့ၤဒ် ကစၢ်ယွၤ အတၢ်ဘၣ်သး အသိးန့ၣ် ဘၣ်သ့ၣ်သ့ၣ် အကဆိကမိၣ်ဘၣ်ဝဲဒ်အံၤ. ‘ကစၢ်ယွၤ မ့ၢ်နၢ်ပၢၢ်စၢၤယၤ နီၢ်ကီၢ်န့ၣ် ဘၣ်မနုၤအဃိ အဘၣ်သးဝဲလၢ ယကဆီတလဲ ယတၢ်အိၣ်မူလၢ ယဆီတလဲအီၤ တညီဘၣ်လဲၣ်.’

၁၈. ပမ့ၢ်တူၢ်လိာ်လၢ ယဟိဝၤယွၤ သ့ၣ်ညါပှၤ ဂ့ၤဒိၣ်န့ၢ်ဒံး ပသ့ၣ်ညါလီၤပသးန့ၣ် ပကဒိးန့ၢ်ဘၣ် အဘျုးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၈ ပကဘၣ် မၤလိထီၣ်ပသး ဒ်သိး ပကတူၢ်လိာ်လၢ ယဟိဝၤယွၤ သ့ၣ်ညါပှၤ ဂ့ၤဒိၣ်န့ၢ်ဒံး ပသ့ၣ်ညါလီၤပသး ဒီးပတၢ်ဂ့ၤတၢ်ဝါ လၢပနီၢ်ကစၢ် တထံၣ်ဘၣ်တဖၣ်န့ၣ် အထံၣ်ဝဲ. ပတၢ်ဂံၢ်စၢ်ဘါစၢ် အိၣ်ဒ်လဲၣ်န့ၣ် အထံၣ်ဝဲ ဘၣ်ဆၣ် ပအဲၣ်ဒိး ကဲထီၣ်ပှၤဒ်လဲၣ်န့ၣ် အသ့ၣ်ညါဝဲစ့ၢ်ကီး ဒီးအအဲၣ်ပှၤ. (ရိ ၇:၁၅) အဃိ ပမ့ၢ်ထံၣ်လီၤပသး ဒ်ယဟိဝၤယွၤထံၣ်ပှၤ အသိးန့ၣ် ပသးကဆူၣ်ထီၣ်, ပကဆဲးတီဒီးအီၤ ဒီးဘူၣ်ထီၣ်ဘါထီၣ်အီၤ လၢတၢ်သးခု.

၁၉. ဘၣ်ဃးဒီး ယဟိဝၤယွၤန့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်.

^၁၉ ပသ့ၣ်ညါ ဒီးပနာ်သပှၢ်တၢၢ်လၢ ယဟိဝၤယွၤန့ၣ် အမ့ၢ်ဝဲတၢ်အဲၣ်. (၁ ယိၤ ၄:၈) တကးဒံးဘၣ် ပသ့ၣ်ညါလၢ ယဟိဝၤယွၤ ဘၣ်သးဝဲ တၢ်အဂ့ၤကတၢၢ် လၢပဂီၢ် ဒီးအအဲၣ်ပှၤအဃိ အတဲဘၣ်ပှၤ တၢ်လၢပကြၢးမၤ ဒီးတကြၢးမၤဘၣ်. ပသ့ၣ်ညါစ့ၢ်ကီးလၢ ယဟိဝၤယွၤ အဲၣ်ဒိးလၢ ပကအိၣ်မူဘၣ် လီၤထူလီၤယိာ်. ဒီးဒ်သိး ပကအိၣ်မူဘၣ် လီၤထူလီၤယိာ်အဂီၢ် အဟ့ၣ်ပှၤ တၢ်ဟ့ၣ်လၢအမ့ၢ် တၢ်ပှ့ၤက့ၤ. ခီဖျိလၢ တၢ်ပှ့ၤက့ၤအဃိ ပကဲပှၤတၢ်ဒဲးဘးဖိ ဒီးမၤကမၣ်တၢ် သနာ်က့ ပဘူၣ်ထီၣ်ဘါထီၣ် ယဟိဝၤယွၤ ဒ်အတၢ်ဘၣ်သး အသိးသ့. (ရိ ၇:၂၄, ၂၅) ဒီးပသ့ၣ်ညါစ့ၢ်ကီးလၢ “ကစၢ်ယွၤန့ၣ် ဒိၣ်န့ၢ်ဒံးပသး ဒီးသ့ၣ်ညါတၢ်ခဲလၢာ်.” (၁ ယိၤ ၃:၁၉, ၂၀) ယဟိဝၤယွၤ သ့ၣ်ညါပဂ့ၢ် လီၤတံၢ်လီၤဆဲး ဒီးအနာ်ဝဲ သပှၢ်တၢၢ်လၢ ပမၤအတၢ်ဘၣ်သးသ့.

၂၀. ဒ်သိး ပတဘၣ်ယိၣ်တၢ် အါတလၢတဂ့ၤအဂီၢ် တၢ်မနုၤ ကမၤစၢၤပှၤလဲၣ်.

^၂၀ တၢ်ဂ့ၢ်လၢ ပကဘၣ်သ့ၣ်ညါ နီၢ်ကီၢ်န့ၣ် ယဟိဝၤယွၤ တဲဘၣ်ပှၤခဲလၢာ်. အဃိ တၢ်ဂ့ၢ်လၢ ပတသ့ၣ်ညါဘၣ်န့ၣ် ပတလိၣ် ဘၣ်ယိၣ်တၢ်ဘၣ်. ပကဘၣ် သးစၢၢ်ဆၢ တၢ်ဂ့ၢ်လၢ အရ့ဒိၣ်. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပနာ်န့ၢ် ယဟိဝၤယွၤ လၢအမ့ၢ် “ပှၤလၢအသ့ၣ်ညါနၢ်ပၢၢ်တၢ် လၢလၢပှဲၤပှဲၤတဂၤ.” (ဘး ၃၆:၄) ခဲအံၤ တၢ်ဂ့ၢ်တနီၤန့ၣ် ပတသ့ၣ်ညါနၢ်ပၢၢ် ခဲလၢာ်ဒံးဘၣ် ဘၣ်ဆၣ် ပသ့ၣ်ညါလၢ ယဟိဝၤယွၤ ကဆဲးသိၣ်လိပှၤ တၢ်ဂ့ၢ်လၢအသီတဖၣ် လီၤထူလီၤယိာ်. ဒီးပကဆဲး မၤလိအါထီၣ်ဘၣ်ဒံး ပကစၢ်ယွၤလၢ အဒိၣ်အထီတဂၤ အဂ့ၢ်အဃိ အလီၤသးခုဒိၣ်မး.—စံၣ် ၃:၁၁.